رواية احتواء القاسي
الفصل الثاني2
بقلم سوسو تويكس
زعلتا شديد وقت امي قالت انزل للجامعه مع ناس عمي، في الاول كنت بنزل مع ناس حبوبه ام ابوي في البيت الكبير وبعد ما حبوبه اتوفت، عمي اقنعها انو الدوره دي انزل معاهم، زعلتا لانو كده ما بقدر أخد راحتي مع ولدو المتعصب داك جنو أوامر وقبل كده حصلت مشكله قبل ٤ سنه ومن اليوم داك حرمتا المشي عندهم وقت انزل السودان، وانا بطبعي من صغيره زوله متحررة وما بقبل يتحكمو بي وتحرري زاد وقت سافرنا أمريكا واتاثرتا بيهم ما محجبه وعادي بلبس فساتين مع الركبه وقمصان اغلبهم مع كمر البنطلون ،انا لينه عمري 20 سنه من بعد ابوي اتوفت وانا عمري10سنه امي تزوجت من راجل تاني مستقر في أمريكا بقينا عايشين هناك وبنزل السودان للدراسه بس لانها في أمريكا غاليه شديد لغير المواطن، السنه دي ح انزل ٣جامعه لغات، لغتي الانجليزيه متقنه، مضى الوقت وصلتا السودان استقبلني عمي صراحه هو حنين شديد معاي خاصه لاني من ريح المرحوم خالتو ساميه وكلهم معاي كويسين شديد الا ولدو المنفسن داك، عمي سليمان سلم لي بحنيه وشوق واضح اما المنفسن داك السلام ابا يردو بس بعاين لي ببرود، صراحه هو وسيم وما عارفه اذا وجاتهو زادت ولا عشان انا ٤ سنه ما شفتو،كان ملتحي لحيه خفيفه من فوق وكثيفه من تحت،ياها زاتها الملامح الهاديه و العيون المرخيه الناعسه بي نظراتو البارده نفس، نفس الأنف المستقيم المدببه والحواجب الغزيره العريضه حتى نفس البشره الخمريه مايله للسمار الفاتح، طولو زاد ونحفو النحف المعقول، اتكلم بنفس الصوت البارد الفيهو بحه خفيفه وهو بعاين لي بنظرات بارده:مش نتحرك ولا كيف؟_مد يدو المشعر العروقها بارزه وشال شنطتي بي طلب من عمو سليمان اتحرك قدامنا وبقيت ماشه عمو سليمان وبنتونس وهو طول الطريق ساكت ده احسن شي عملو لانو اسلوب الزفت داك ما بنفع معاي وللمرة التانيه انا زوله متحررة ما بحب التقييد وصلنا بيتهم الكان عباره عن عمار من ٣ طوابق، عمو طلب من المنفسن داك يوريني غرفتي وين، مشيت وراهو بسكات وانا تايهة في ريحة عطرو الماليه الممر وصلنا الطابق التاني كان فيهو كم غرفه وقف قدام واحده من الغرف وهو بقول:دي غرفتك يا بت أمريكا_وفات خلاني من زمان بفوز دمى وقت يقول بت أمريكا، دخلتا الغرفه لقيتها مرتبه من التعب نمتا بهدومي ولا غيرتهم وانا بفكر الايام الجايه ح تعدي كيف....
يتبع