رواية سلطان زمانه
الفصل التاسع9
بقلم مريم اليوسف
عم تدق نور الباب عليها بس مافي جواب ... شقت الباب شوي وفاتت بتردد وسمعت صوتها طالع من الحمام عم تستفرغ .. ولما سمعتها تقدمت بلهفة وصارت تدق باب الحمام عليها
نور : الاء انت منيحة ...
اختفى صوتها وبعد شوي انفتح الباب وطلعت الاء بتعب وعيون ورمانة وعم تنشف ايدها ووجهها بمنشفة
سندتها نور وحكت : شو عم يصير معك .. انت منيحة
هزت براسها وقالت : انا بس اضايق وابكي بصير استفرغ
نور : طيب طولي بالك مافي شي مستاهل
قعدت الاء ع طرف التخت وحكت كل هاد ومافي شي مستاهل
نور : صدقيني حلا كل همها تغيظك .. واصلا الاصوات من تاريخ قديم وعملت هالحركة مشان تقهرك
الاء : ايي .. وبدي كمل هيك .. انا مابقدر على هالعيشة بس انا الحق علي .. من الاول كان لازم ضل عند موقفي وما انجرف ورا مشاعري .. وكان ما لازم ارجع بعد مانزلت ع سوريا ... بس خلص انا اخدت قرار ورح انزل بدون رجعة... حلم عشتو كم يوم ولازم فيق منو حاج لهون وبكفي
نور : مو لهل الدرجة انت التانية .. مشان هالموضوع بدك تقومي تزعلي
الاء: انت شايفتيه مو مستاهل ؟
نور : مو قصة مستاهل او لا .. انت متزوجة هشام .. ومشكلتك معو وبنسبة لحلا فيكي تحطيلها حد او تقولي لهشام يلاقيها حل
سكتت وماردت
نور : اي هيك روقي ولا تهزي بدنك وكل الحكي يلي حكتو حلا لاتشيليه من ارضو ..وصدقيني هية غيرانة منك مو اكتر
الاء : بصير خير
نور : ان شاء الله مابصير الا الخير
الاء : حكي هشام معك شي
نور : لا والله ... هشام عندو الشغل شغل والبيت بيت .. واكيد مشغول كتير لانو لو بالشغل الا مايتصل
رن موبايل الاء اخدتو وردت وظهر صوت اسماء : الاءء كل عام وانت بخير ياعمري ان شاء الله السنة الجاي بشوفك احلى ام واحلا بنزنس وامن (سيدة اعمال )
ابتسمت رغم حزنها : وانت بخير ياعمري .. متذكرة ؟
اسماء :معقول انسى ... هاتي خبريني شو ناوية تعملي على عيد ميلادك
الاء : ولا شي .. هشام مسافر
اسماء : اممم .. يلا مو مشكلة بتعوضوها ان شاء الله
الاء : ان شاء الله
حكت شوي معها وبعدها سكرت وحكت نور يلي ناطرتها تخلص : اليوم عيد ميلادك
الاء : اي
نور : كل عام وانت بالف خير
الاء : وانت بخير يارب
نور : عفكرة انا بكرا عيد ميلادي
الاء: اي لااا
نور : والله شايفة على هالصدفة
الاء : اي والله ..
نور : لكن رح نعمل اليوم حفلة الي والك فرد مرة
الاء: مافي داعي .. وبعدين ايو حفلة بدون ناس
نور : انت ماعليكي
الاء : طيب اجليه لبكرا مشانك
نور : كم ساعة مابتفرق .. وانا قصد عملتو اليوم مشان تعرفي انك غالية علي وماتقولي عملتلي عيد ميلادي معها .. وهيك انا رح اعمل عيد ميلادي معك
الاء :والله انت مافي منك .. بشك انك ضرتي
نور : اي شو كل الضراير ضراير ههههه وبعدين شو بقول المتل مركب الضراير سار ومركب السلايف غار
الاء :.....
نور : وبالنسبة لحلا والله هية حبابة بس متسغربة انو حدا اخد مكانها هية الجديدة وهيك .. بس مع الايام بتعاشريها وبتشوفي شقد حبابة
الاء : ان شاء الله
طبطبتلا على ايدها وقامت طلعت وضل الاء قاعدة عم تتخبط بافكارها بس ماقدرت تتخطى كلام حلا ورجعت تبكي
~~~~~~~~~~~~~•
دخلت نور على حلا وحكت : يلا قومي
حلا : ع وين
نور : بدنا نجهز لحفلة عيد ميلاد
حلا : لمين ... الك؟
نور : انا بكرا عيد ميلادي
حلا : لكن ليه اليوم
نور : والاء اليوم عيد ميلادها
حلا : شو هالصدفة
نور : المهم قومي بدنا نجهز للحفلة نوصي على غراض الحفلة وعلى الكيك والزينة ونعزم رفقاتنا
حلا : بالله شو
نور : وبدك تجبيلها هدية كمان
حلا : كمان
نور : اي حلا فهمنا ... حلي عن هالبنت واتقبلي انها صارت ضرتك وحاج تقهريها على شي مادخلها فيه .. والا والله بقول لهشام على كلشي وهالمرة ماعم امزح وما عم هدد على الفاضي
حلا : شايفتك حاببتيها كتير
نور : اي حبيتها عندك مانع
لوت حلا تمها وقالت : شو المطلوب مني
نور : اول شي واهم شي انك تغيري معاملتك معها وتاني شي قومي معي نجهز لحفلة المسا
حلا : ورح نعزم رفقاتنا
نور : اي ومنو بيتعرفو عليها... كانو حابين يتعرفو عليها
حلا : هه اكيد رح يقولو شو جاب لجاب
نور: حلااااااا
حلا : خلص سكتت .. يلا قايمة عجبتني الشغلة
~~~~~~~~~~~~•
المسا
الاء ملتزمة غرفتها مع انو سامعة صوت ضجة برا .. بس ابدا مو هاممها مكتئبة لدرجة كبيرة
الاء : اي مارح انزل تحتفل بعيد ميلادها هية انا مابدي لا عيد ولابطيخ ... بدي شي قبر يطمني واخلص من هالعيشة
اندق الباب وانفتح ودخلت نور
نور : لسه ماجهزتي حاالك؟
الاء : ولابدي جهز حالي .. خلص انت احتفلي بميلادك واكيد رفقاتك بيعرفوكي انا مارح انزل
نور : اي مو على كيفك .. الاجواء تحت بتجنن.. وكمان حسبت حساب وجبت ميكب ارتسيت تظبطلك اللوك
الاء : بسس
نور : بلا بس بلا بطيخ .. سوسو ..
دخلت الميكب ارتسيت ومعها شنتة
نور : خلصي منها وبعدها بتجي لعندي على الجناح بكون تحممت ولبست فستاني
سوسو : حاضر مدام
نور : نقي شي حلو بدي عرفك على رفقاتنا
الاء : وانو عادي ؟
نور : واقل من عادي .. اصلا كلن بيتمنو يكونو مكان وحدة مننا .. يلا لا تطولو
طلعت وتركتن وحكت سوسو : شو لون الفستان
الاء : لحظة لشوف ..
قامت على غرفة الملابس .. وطلع قدامها فستان جابتو من سوريا اخر زيارة كان بالنسبة لسوريا غالي بس بالنسبة لقطر سعرو عادي .. بس كان بجنن .. بلون الزيتي المونس بالدهبي طويل للارض مع فتحة عند الرجل طبقتو مع طقم دهب داخلو احجار خضرا
طلعتو وطلعت فيه لعند الميكب ارتسيت
الاء : هاد هو
سوسو: وااوو بجنن
الاء: اي لكن هي بضاعة سورية مو حيلا
سوسو : عنجد روعة .. وبظن يطلع مع سمارك تحفة
الاء : لكن فرجيني ابداعك
وبلشت تحس ببعض الطاقة عم تتجدد جواتها
~~~~~~~~~~~~•
الحفلة عمرانا
صبايا من اعمارهن ولابسين احلى الفساتين واخر شياكة .. وحلا ماكلة الجو ومن وحدة لوحدة على مزح وضحك طبعا مع شوفة حال... كانت طالعة كتير حلوة بفستانها الاسود يلي عاكس بياضها وشعرها اللي نازل متل الحرير وطقم الماس
وهلق انضمت نور يلي لابسة فستان بلون الموف الهادي بدون منازع كانو احلى شي بالحفلة
حكت وحدة من المعازيم واقفة على جنب : والله هالهشام بيعرف ينقي ليكي هالنسوان
ردت عليها رفقيتها: لسه بدنا نشوف التالتة
: عم يقولو عادية
:مابظن عادية ... هاد هشام مابنقي حيالله
: قولتك
: ااااه لو ماني متزوجة لطلق زوجي وروح ادبق فيه وخليه يتزوجني
: مجنونة بتنزلي على ضرة
: اطلعي عليهن مبسوطين ولا كانو ضراير ... لما بكون الزلمة زلمة عن حق وحقيق بيضبط ٤ نسوان واكتر
: اي والله معك حق ... هالشغلة بدها زلم
كان في فرقةمن الخادمات عم يخدمو على الجميع وطاولة طويلة عليها جميع انواع المقبلات والتبولة والحلويات والعصائر
نور واقفة مع حلا وعم تتلفت حواليها
نور : مانزلت الاء
حلا : لا ماشفتها .. لتكون ماخلصت
نور : شو ماخلصت .. سوسو خلصت منها وبعدين اجت لعندي
حلا : ابعتي نجود تشوفها
مشت لتدور على نجود بس انتبهت على الاء واقفة بقمة الدرج وعم تتأمل الكل بتوتر
شافتها نور وابتسمت واشرتلها تنزل
هزت براسها ونزلت ... كانت ناعمة وجذابة ... عندها كريزما وماخصها بالجمال بتجبر الكل يتطلع فيها وبدور على الشي يلي عم يجذبو الها ويسأل حالو ياترى شو سرها
استقبلتها نور اول الدرج ومابننكر انها طالعة حلوة بالفستان والمكياج وتسريحة الشعر
والكل قربو يسلمو عليها
الاء : مساء الخير
ردو : مساء النور
نور : بعرفكن ضرتنا الاء ...
صارو يسلمو عليها وحدة وحدة .. وهية ترد السلام
كانت خايفة يكون الوضع مختل بسبب الضراير وانو مو مقبول وانو رح يتمسخرو عليها .. بس شافت العكس .. وهية كانت حاسة انو هالشي عيب ... بس يلي اكتشفتو انو بالمصاري مافي شي عيب ولاحدا بيقدر يعيبك
حكت وحدة : وعنجد اليوم عيد ميلادكن مع بعض
نور : شايفة على هالصدفة
: نيالو هشام بيتوفر عليه عيد ميلاد
نور : هههه مو هيك بالله
: لك صحي وينو
نور : مسافر بشغل
حلا :خلينا نقطع الكيك يلا
: وجايبين قالب كاتو واحد ولا تنين
نور :هههه لا تنين ... بهي الشغلة ممنوع التوفير
طفو الشموع وقطعو الكيك وحطو اغاني ورقصوا ...
حبت الاء الجو .. والبنات كانو كتير لطيفين وكل وحدة صارت تعرف عن حالها وعن شغلها وعن اولادها ... وتعرف شو صلة القرابة او صلة الصداقة بينن وبين حلا ونور ... وعجبها هالوضع وحست حالا عنجد من سيدات المجتمع الراقي ...
خلصت الحفلة وراحو الضيوف والهدايا متسطرة على الطاولة
نور : شو رايك الاء حبيتي
الاء : تسلميلي يانور والله مافي منك .. مارح انسالك اياها طول عمري
نور : حبيبتي لاتحكي هيك .. كمان الي نصوو هههه
الاء : ههههه
حلا : يلا افتحو الهدايا
نور : ماشي
حلا : الاء العلبة الحمرا مني
الاء : بالله جد
حلا : اي واكيد رح تعجبك لانو زوقي ما الو مثيل
اخدتها الاء وندهت : نجووود
اجت نجود بسرعة : اي مدام
الاء : خدي هي مني الك
تلبكت نجود : والله مافي داعي
الاء: لا انت بتستاهلي .. بس مابعرف شو فيها .. بتقبليها على عيبها
نجود : اكيد بقبلها كلشي منك اكيد حلو
الاء : لكن مبروكة
نجود : الله يبارك فيكي .. ويسلمن
اخدتها وراحت مبسوطة
حلا عم تراقب بغيظ وقهر وحكت : حركة حلوة ... بس مارح تأثر علي
نور : هوهوو علينا انت واياها .. ماعد تصفى القلوب
الاء : عم نصفيها .. بس بالاول لازم نوفي الديون
حلا : هه ... عم تعجبني لانك صايرة بتشبهيني
الاء : فشرتي اتشبه فيكي
قامت بقهر وطلعت على جناحها وهية عم تتحلف لالاء
نور : ليش عملتي هيك .. قلت تتصالحوا وبتصفى القلوب
الاء : مو قبل ماردلها كلشي عم تعملو فيني
نور : اااخ احسن شي .. المهم انت روقتي
الاء : اي منيح
نور : وشلتي فكرة الرجعة لعند اهلك
الاء ؛ اي شلتها بس لازم لما يجي هشام يلاقي حل انا مابعيش بهيك جو
نور : تعيشي لحالك ؟
الاء : مابعرف تعودت على هون وعليكي بالذات وبنفس الوقت مارح اتحمل حلا
نور : طيب اسمعي مني انا رح حاول صالحكن بس بدي توعديني انو خلص ماعد في مشاكل
الاء : هية تكف مشاكلها عني وانا مارح اجي صوبها
نور : طيب اوعديني حتى لو رجعت زعجتك انت لاتردي لبين مانلاقي طريقة معها .. ولا تنسي بكل بيت في مشاكل
الاء : شوفي شو المناسب واعمليه .. بس انا مارح اسكت كتير عن حقي
نور : اوك .. يلا خلينا نشوف الهدايا زوق البنات حلو ورح يعجبك
~~~~~~~~~~~~•
الصبح فاقت الاء وهية عم تحاول تزود نفسها بالطاقة الايجابية وتبتعد عن المشاكل .. وعم تحاول تتناسى حكي حلا يلي مارح عن بالها .. بس نور طمنتها انو يلي سمعتن تسجلات قديمة لحتى تقهرها مو اكتر ... لبست فستان نص كم من القطن مريح للركبة فيه الوان من الطبيعة
الاء : رح موت من جوعي ان شاء الله يكون جهز الفطور ..
اتطلعت بالساعة وكان سبعة ونص
الاء : نص ساعة بعين الله عليهن .. فتحت الموبايل ع الوتساب وفتحت على اسم هشام وبعتتلو اشتقتلك كتتتير امانة لا تطول
طلعت من عندها بس ماوصلتو
الاء : شو هالشغل هاد يلي مافي يمسك الموبايل خمس دقايق ويتطمن علينا ... معقول ما اشتقلي .. ولا ما صدق خلص مني لياخد نقاهة ... معقول عنجد بحبني متل ماقلي ولا عم يكذب علي لحتى يسايريني
الاء : ياربي دخليك والله ماعم اقدر امنلو ... عم حاول كون من جامعة عيش اللحظة ومافكر بغيرها لأنوو التفكير الزايد رح يقتلني
نزلت وكانت نجود عم تنقل صحون الفطور على السفرة
الاء : صباحو
نجود : صباح النور
الاء : بشرفك عجلي حاسة معي جوع قديم
نجود : تكرم عيونك
اندق باب الفيلا
نجود : انا رح شوف هاد اكيد الحارس
راحت نجود والاء سحبت صحن الزيتون لقدامها وبلست تنقرش فيه وتستمتع بطعمتو
اجت نجود ومعها صندوق احمر كبير
الاء : شو هاد
نجود : هاد من هشام بيك للمدام نور ... هدية بمناسبة عيد ميلادها
تجمدت الاء مكانها وحبة الزيتون يلي بأيدها رجعتها على الصحن
نجود : اكيد مابيعرف بعيد ميلادك والا كان جبلك هدية احلى منها
كانت حلا واصلة وسامعة الحديث وحكت بشماتة : سبحان الله .. كيف هيك زبط شي متل مابدي بدون ما اتدخل
وقفت الاء والتفتت لقدام حلا وحكت : بعترف انت يلي فزتي .. بس الي عندك رجاء لاتقربي علي لبين ما اختفي من حياتكن
سحبت الكرسي وقعدت بكل ثقة وقالت: وانا موافقة
طلعت الاء ودموعها على خدها
وهية ماشية تصادفت مع نور طالعة من جناحها وعم تحكي على الموبايل : بتكون وصلت يسلم ايديك يارب وما انحرم لا منك ولامن عطاياك
الاء سمعتها ونور انتبهتلا بكيانة : الااء
هشام : الاء جمبك ؟
اتجاهلتا ودخلت على جناحها
نور : كانت ... هشام انت مابعتت هدية لالاء
هشام : ليه
نور : مابتعرف انو مبارح كان عيد ميلادها
هشام : شوو ... عنجد
نور : والله
هشام : شو هالصدفة
نور : كانت تحت ومبين انها شافت الهدية وشكلها زعلانة
هشام : والله مابعرف ايمت عيد ميلادها
نور : طيب احكي معها اذا معك وقت
هشام : طيب سلمي وبوسي الولاد
نور : الله معك
~~~~~~~~~~•
واقفة على الشباك ودموعها ماوقفوا
وكلشي حواليها عم ياكدلها انو ماعد الها لزوم ... لا جمالها من جمالن ... بيهتم فين .. وحتى مقاطع الصوت يمكن ماتكون قديمة متل ماقالت نور ... اتذكرها وبعتلها هدية ومتصل عم يعيدها... وانا بعتلو رسالة ما اتنازل وفتحها ... انا شو عم اعمل هون .. خلص وقتي راح ... انا متل شي لعبة جديدة كان متحمس عليها وهلق صارت مهملة وماعد الها لزوم
رن موبايلها ... قربت من الطاولة وشافت اسمو المتصل ابتسمت ابتسامة جانبية وسكرت بوجهو
الاء : انا مارح اقدر كمل ... مابقدر كمل هيك .. انا غصب عم اتخطى موضوع الغيرة ... اما غيرة واهمال مستحيل ...
رجع يتصل ويبعت رسائل بس تجاهلت الموبايل كلو وضلت على وقفتها
اندق الباب وانفتح وسمعت خطوات جاي لعندها
نجود : مدام الاء هشام بيك على التلفون بدو يحكي معك
التفتت عليها وكان معها الهاتف موبايل البيت
اخدتو بصمت وسكرت الخط بوجهو
الاء : اذا رجع اتصل قوليلو تعبانة ومابدا تحكي مع حدا
طلعت نجود وحكت : لهون وبكفي بكي معد في رح يصيبني مرض نفسي مو وراك وكنو ماصابني ... النوم الطويل والحزن والنفسية المتقلبة كل هاد مرض نفسي بس ماعد اسمحلك تسلب روحي اكتر من هيك اتهنى منك لنسوانك
اخدت موبايلها ناوية على شي .. بس نزلت برداية الاشعارات وشافت اخر رسالة منو : الاء ردي علي خلينا نحكي .. والله مابعرف انو مبارح كان عيد ميلادك خليني احكي واشرحلك
ماردت فتحت على غوغل حجوزات سفر
~~~~~~~~~~~~~•
قضت يومها كلو بالغرفة ... وماشافت حدا ولاسمحت لحدا يدخل لعندها ... ولو ماداخت بالليل مابتطلب شي تاكل ...
الصبح فاقت على حدا قاعد جنبها عم يمرر ايدو على شعراتها
فتحت عيونها وشافتو ... اي هو
تجلست بسرعة واتخيلت حالها عم تحلم بس لقت حالها بالحقيقة
الاء : انت شو عم تعمل هون
هشام : استأذنت يومين مشان اجي شوفك
الاء : هه رح صدق
هشام : يعني انا عم اكذب
الاء : واكبر كذاب ...ماعد صدق ولا حرف منك
هشام ؛ شوفي شو صاير ... وليش هيك .. كل هاد لانو نسيت عيد ميلادك ... والله مابعرفو بأيو شهر
الاء: لا مو بس هيك ..شغلات كتير
هشام : شو هية
الاء: مابتفضى تحكيني بس بتفضى تحكي حلا ونور ... وانا استكترت علي ترد على رسالتي ياعمي لو بملصق انا قبلانة
هشام : والله العظيم عم اوصل الليل بالنهار لحتى خلص بسرعة وارجع .. مافي استراحة .. عم نام ٤ ساعات بس ... وقفت المشروع كلو كرمال اجي وشوفك هاد مابين معك
الاء : ولا رح يبين لأنك كذاب ومستحيل صدقك بعد هيك ... قلتلك انا بغااار ... لا تكذب علي ... قلي بحبكن كلن بس ما تقلي بحبك وتضحك علي والاهتمام والحب لغيري وانا الي الكذب
هشام : ايو اهتمام وحدي الله .. والله لو ماعيد ميلاد نور مابفتح تلفوني .. بس مناسبة متل هية خصصتلها ثواني من وقتي
والهدية بعتها عن طريق السكرتيرة
الاء : ماعد يهمني شيي اتهنى منك الهن وخصصلن الوقت يلي بدك اياه .. انا معد في بيني وبينك الا الطلاق
هشام : هيك الطلاق فرد مرة ... الاء ما عأساس مشي الحال وتقبلتي الوضع
الاء : اناهاد الوضع مستحيل اتقبلو .. لك مناقرة حلا عم اتحملها بس تمييزك مارح اتمحلو
هشام :ايوو تمييز يامخلوقة و الله ماحكيت مع حدا .. واقسم بالله كنت ناوي بس خلص مع نور حكيكي لأنو كتيرر مشتقلك
الاء : بشرفك هشام حااج... مافي شي يخليك تحبني..يلي عندو نور وحلا بدو بتطلع على الاء
هشام : الاء انا لهلق عم ساير كرمال حبي.. بس لهون وخلص ...كم مرة حلفتلك انو بحبك وبمووت فيكي
الاء : لكن مازال هيك هلق بدك تطلع وتخبرهن انك بتحبني اكتر وحدة
هشام : نعمم
الاء : شايفة ماعجبك
هشام : طبعا ماعجبني ... قد ماكان هدول نسواني وامهات ولادي ومارح اجرح مشاعرن
الاء : لكن انا مشاعري معلش تتمرمرط بالاراضي اي روح الله يهنيك فيهن انا اليوم راجعة لعند اهلي
هشام : عبسسس .. عبسس... ياربي ... لك من ايو طينة مخلوقة يا بنت الحلال
الاء : لو سمحت انا حكيي خلص وياريت تطلع وتتركني لحالي
هشام : اي طااالع ... وعفكرة انا مليييت ملييت منك ومن حساسيتك الزايدة كل شوي .. ماخليت وسيلة لحتى ارضيكي فيها وانت كل مالك بكبري بهل الراس ... وعاساس اتقبلنا الوضع وخي ما احلانا .. بس خلص انا وصلت معك لنهاية الطريق ومارح اجبرك تضلي اكتر من هيك ... بدك تروحي الله معك
بعد هالكلام عم تحاول تكون قوية وتحبس الدمعة بس كبست على جرحها وحكت : شااايف بلشت تبين على حقيقتك ... هاي هية الحقيقة يلي بدي اوصلها انا فاهمة عليك من اول لحظة
هشام : لانو هاد يلي بدك تفهمي وهاد يلي حابة تسمعيه ... روحي يا الاء انت لابتهميني ولا حابك ولا شي ... ومتل ماقلتي كنت معجب فيكي وضليت وراكي لاخدتك وصرتي مرتي بس بعدين صرت قارن شو جاب لجاب مابتتقارني ابدا فيهن .. يلا روحي ماعد تلزميني ... وورقة طلاقك بتوصلك لعند اهلك
ماقدرت تنطق بعد هالكلام وهو طلع بسرعة وطبش الباب وهية انهارت من البكي
نزل لعند نور وحلا يلي مبين عليهن هلق فايقين وكانو مستنفرين
هشام : شو القصة .. ممكن توضيح
نور : والله مابنعرف شبها الاء
هشام : مابعرف انا يلي عم اسأل
حلا : بتكون زعلت لأنك نسيت عيد ميلادها
هشام : لا مو بس هيك ... الاء راسها معبى وهلق بدي اعرف مين يلي كان يعبي راسها
حلا انخطف لونها واتطلعت بنور بترجي
نور : مابنعرف شي اصلا عم تضل حابسة حالها بالغرفة
هشام : ماشي .. انا رح اعرف كلشي .. بس مو نيالكن اذا عرفت انو انتو ورا هالقصة
وضل طالع برات الفيلا
نور : هشام انت هلق جاي من السفر خليك ارتاح
هشام : ارتااح ؟؟ كتتير دايرين على رياحتي ... باطلة ومحولة ساعة يلي اتزوجت فيها .. حدا بجيب وجع الراس لحالو
تركهن وطلع وحلا قربت من نور : بترجاكي ماتقوليلو
نور : انا مادخلني ... وقت الجد رح احكي كلشي ... والله انا ماني مضطرة غطي عنك واخرب بيتي
حلا : اول مرة بشوفو هيك
نور : الله يستر ... اصلا جيتو كلها مابتطمن
حلا : قولك شو صار معقول طلقها
نور : مابعرف احسن شي
تركتها وطلعت ... وحلا كمان طلعت على جناحها
~~~~~~~~~~~•
بعد ساعات
والدنيا ليل والوضع بالبيت متكركب
نزلت نجود ومعها صينية الاكل
نور : شو مابدها تاكل
نجود : لا دقيت كتير وماردت
نور : طيب روحي انت يعطيكي العافية
حلا : لتقوم تعمل بحالها شي
نور : اكيد لا .. لاتبلشي انت التانية
انفتح الباب وطل هشام ومبينة الجدية على وجهو وهنن التنتين وقفو
هشام : السلام عليكم
ردو السلام
هشام : شو الوضع
نور : حابسة حالها وماعم تفتح لحدا
رن تلفونو بمسج فتحو وانصدم من الرسالة يلي وصلت
(انا صرت عند اهلي فيك تبعتلي ورقة الطلاق )
رمى الموبايل وطلع يركض
نور : شوو في
اخدت حلا موبايل هشام وشافت الرسالة : شكلا رجعت لعند اهلا
نور : شوو .. ايمت
وطلعو يركضو ورا هشام
كان باب الجناح مفتوح ودخلو وراه ما الها اي اثر
هشام : ايمت راحت ؟
نور : والله ماشفناها ... عأساس حابسة حالها متل كل مرة
هشام : اطلعو لبرا واتركوني لحالي
لبوا رغبتو وطلعو وسكرو الباب وراهن وهو قعد على حرف التخت وغطا وجهو بايديه بقهر
~~~~~~~~~~~~•
سوريا
طلعت اسماء من غرفتها وسكرت الباب بهدوء ولا الباب عم يندق وراحت تفتح وطلع حمزة
حمزة : عنجد الاء هون
هزت راسها : تفضل فوت
فات وحكي شو القصة شو صاير
اسماء : مابعرف اجت وقضتها بكي وهلق فاتت ونامت
حمزة : امي وابي وين
ابي ارتفع ضغطو وامي عملتلو كاسة لبن وهية هلق عندو
حمزة : حسبي الله ونعم الوكيل من هالقصة
اسماء : اي والله .. احكي انت مع هشام
حمزة : شوبدي احكي ما لنعرف شو الموضوع بالاول
اسماء : بس مبارح حكيتها وقالتلي مسافر معقول اجا واختلفو
حمزة : مابعرف .. لتفيق بنعرف شو القصة
اسماء : منيح لؤي مو هون ماكنا خلصنا منو
حمزة : اي والله
~~~~~~~~~~~~~•
نازل هشام من على الدرج عم يحكي على الموبايل ونور وحلا بحالة رعب
هشام : قلو يشوف مهندس غيري ..... هيك ماعد بدي كمل المشروع .... العقد ؟ .... طيب ماشي خلص احكي مع المدير التنفيذي وقلو انا بكرا الصبح بكون بالمشروع
كان واصل لعندن قعد ورمى الموبايل على الطاولة يلي قدامو شبك ايديه ببعضن وسندن على رجليه وصار يتطلع فيهن
وحلا قررت تحكي يلي صار
حلا : هشام الحق علي انا ...
رفع ايدو بمعنى انو لاتكملي
هشام : مارح حاسب حدا فيكن ... معك حق ضرتك وماتحبيها ... المشكلة الاساسية هية انا
نور وحلا :....
هشام : انا غلطت بحقكن كلكن وظلمتكن لما نزلت عليكن ضراير وجمعتكن ببيت واحد مع انو عملت جهدي لأرضيكن .. بس كان المقابل ارضي حالي .. الاء خلص طلبت الطلاق ورجعت عبيت اهلها وانا ماعد فيني اجبرها اكتر من هيك وزيد من ظلمها لانو هية اكتر حدا ظلمتو والطلاق انسب حل وبالنسبة الكن انا قررت حرركن مني
نور وحلا : شووو
هشام : خلوني كمل ... حقوقكن كلها رح توصل على اكمل وجه والطلبات يلي بدكن اياها رح تكون مجابة من بيت مستقل الها ولولادها ومن راتب شهري ومارح ينقص عليكن شي .. وهيك لكون عطيتكن حريتكن وماعد بدي اظلم حدا اكتر من هيك .. من حقكن تعيشو الحياة يلي بدكن اياها ومع شريك يكتفي بس بوحدة مارح وقف بوجه اي وحدة والولاد رح نحاول انا وانتو قد مافينا مانحسسن بالشي يلي رح يصير واذا حبيتو تخلوهن معكن ماعندي اي مانع واذا بدكن يضلو معي بحطهن بعيوني
وقف وقال : معكن وقت كافي لبين ماخلص المشروع لحتى تفكرو بكل طلباتكن وانا بكون فضي راسي لبلش بإجراءات الطلاق
بالاذن
انسحب وطلع برات الفيلا وتركهن بحالة صدمة كبيرة
التفتت نور على حلا وقالت : ان شاء الله تكوني انبسطي بخربان بيوتنا ... انا رح احكي مع هشام وقلو عنك انك اصل البلا ومارح اسمحلو يطلقني لأني انا مرتو الأولى
حلا ساكتة
نور : اااه صح اهلك اذا خبرو انك اتطلقتي رح يخلوكي عادي عايشة ببلد غريب وانت متطلقة ... ولا رح يشحطوكي شحط لعندن وترجعي لحياتك القديمة يلي هشام خلصك منها ... بتتذكري معاملة نسوان اخواتك الك ... ولما تزوجتي هشام كيف فرقت المعاملة وصارو يحسبولك الف حساب ولما تنزلي زيارة تنزلي اميرة ويا ارض اشتدي ماحدا قدي .... هلق بدك ترجعي لحلا القديمة يلي الكل رح يتمقطع فيها وتصيري خدامة للكل وبنتك مارح يستقبلوها ورح تضل عند ابوها وتنحرمي منها
ساكتة وماعم تحكي
نور : بتستاهلي كلشي صار الله لا يقيمك
وقفت لتطلع بس حلا مسكتها من ايدها وقالت : نور بترجاكي ساعديني مابدي ارجع لعندن
نترت نور ايدها منها وقالت : لساعد حالي بالاول .... اذا هشام اصر على الطلاق مصيري ما احلى من مصيرك
تركتها وطلعت على غرفتها .. وحلا ضلت مكانها مقهورة كتير من الشي يلي صار
~~~~~~~~~~~~•
فاقت الاء الصبح على صوت اسماء عم تصيحها
اسماء : ليش صاير نومك تقيل قومي رح تصير الضهر
اتجلست وماحكت ولا كلمة وقالت بقلبها ؛ لازم اتعالج من هالحالة
اخدت موبايلها واتفقدت الواتساب وفتحت على اسمو ... مبين انو شاف اخر رسالة ومارد
الاء : ماصدق ايمت خلص مني
ودمعت عيونها
اسماء : الاء شوفي ليش عم تبكي ... قومي غسلي وتعي احكيلنا شو صاير معك امي مانامت الليل وهية مقهورة عليكي
الاء :كيف صار بابا
اسماء : مو زيادة ... زعلان عليكي ... قومي الكل برا بدو يعرف شو صاير معك وكمان الفطور جاهز
رفعت الغطا عنها وقامت لبرا شافت اهلا مجتمعين على سفرة الفطور وريحة البيض المقلي ظاهرة ...قرفت كتير من الريحة
الاء : صباح الخير
امها عم تحاول تكون طبيعية : صباح النور ياعمري ... يلا غسلي وتعي بسرعة قبل مايبرد البيض عملتو متل مابتحبيه
ماعد قدرت تتحمل وراحت تركض على الحمام وايدها على تمها
اسماء لحقتها بخوف وامها كمان تركت السفرة وقامت لعندن ..
اسماء واقفة على باب الحمام وامها وقفت جنبها
اسماء : الاء انت منيحة
صوتها جوا عم تستفرغ
امها : ماما الاء افتحيلي خلي فوت لعندك
فتحت الباب وطلعت وهية عم تنشف وقالت : مشي الحال
امها : ماخدة برد يعني
الاء : لا اضايقت من ريحة البيض
ماعلقت امها واجو لعند السفرة
امها : نشيل البيض من على السفرة
الاء بتعب : ياريت
ابوها :شبك ياعمري شو صاير معك
الاء بحنان : لا تخاف حبيبي انا كتير منيحة بس شميت ريحة زنخة البيض وقرفت
اخدت اسماء البيض على المطبخ وقعدت جنبها : صرتي احسن
الاء : اي الحمد لله
امها : ليش هيك عم يصير معك
الاء ؛ مابعرف .. يمكن حالة نفسية
امها : كمان نفسيتك تعبانة
الاء : كتيير ..
ابوها : طيب كلي هلق وبعد الاكل رح نقعد وتحكيلنا كلشي
الاء : مافي شي ينحكى انا بدي اتطلق
امها : طيب كلي هلق وبعد الاكل بنحكي
~~~~~~~~~~~~•
بعد الاكل
الاء رافضة تحكي وامها ماحبتها تحكي
دخلت على غرفتها ودخلت وراها اسماء وبعدها امها
اسماء : عنجد شو صاير
الاء : مشاكل سخيفة بس انا ماعد اتحمل هالعيشة
امها : لا تضغطي على اختك ... مانك شايفة نفسيتها تعبانة
الاء : لو ضليت كمان كانت انعدمت نفسيتي
امها : اسماء بدي تنزلي على الصيدلية يلي تحت
اسماء : ليه
امها : تجيبي تسيت حمل
اسماء : لمين
امها : الي قررت جبلكن اخ
اسماء : عم تحكي جد
امها : لك انت مجنونة شي ... اكيد مو الي لاختك مانك شايفتها كيف مصفرنة ومبين عليها اعراض الوحام
الاء : انا ؟؟
امها : اي انت لكن شو اسمو هاد النوم الكتير ومزاجك المقلوب ولا استفراغك الصبح من ريحة البيض
الاء بصدمة : معقول
امها : انت مابتعرفي اعراض الحمل
الاء : فكرت انها حالة نفسية
امها : قصدك حالة جنونية ... انا متأكدة من حبلك بس مشان التأكيد .. انزلي اسماء بسرعة جيبه
اسماء : يلا ثواني
~~~~~~~~~~~~•
اسماء وام حمزة واقفين على باب الحمام وناطرين ... شوي وطلعت الاء ومعها التيست
امها : شوو
الاء : خطين
امها : اي الف مبرووك
الاء : يعني انا حامل
امها : اي
وحالتي كلها من الحمل .. يعني ماني مريضة نفسية
امها : اي مابتشكي من شي عين الله عليكي
قدر هالخبر يغير شوي من مزاجها .. بس ضل معكر بسبب المشكلة
امها : فوتي ارتاحي بغرفتك والمسا رح نحكي ورح نسمع قرارك ورح نحترمو ويلي بدك اياه بصير ... مارح غامر بسعادتك كرمال اي شي ... بالاول ضغطنا عليكي كرمال مصلحتك بس اذا ماعم تقدري تكملي عمرينو هو ومصاريه صحتك بالدنيا ياقلب امك بس لاتنسي انك حامل ومارح تفكري بس عن حالك رح تفكري عنك وعن ابنك
~~~~~~~~~~~•
كانت نور قاعدة بالحديقة وشاردة اجت قعدت جنبها حلا اتطلعت عليها بطرف عينها وبعدها كملت شرودها
حلا : لازم نلاقي حل انو هشام مايطلقنا... مابقدر اترك هي العيشة ... فكرت فيها بنكذب على اهلنا ومابنخبرن بالطلاق .. بس مابقدر عيش براتب شهري ثابت انا
نور : مستحيل تتغيري هي انت
حلا : من مبارح عم فكر ... ماعم تظبط معي عم حاول خفف عن حالي واكذب على اهلي انو ماني متطلقة بس حتى هون مابقدر بعد ماتعودت على بنك مفتوح
نور : يعني حسيتي بالنعمة يلي عايشة فيها
حلا : اي وبعترف انا غلطانة ولو بعرف العواقب هيك والله لحط الاء فوق راسي وبعيوني
نور : اممم طيب شو رايك في يلي بلاقي حل
حلا: امانة احكي
نور : حل وحيد مافي غيرو
حلا : ويلي هو
نور : ترجع الاء على البيت
حلا ؛ وانا مستعدة اعتذر منها واوعدها انو ماعد ازعجها... بس هية بتقبل ترجع بعد الشي يلي صار
نور : اي رح ترجع وخصوصا انها حامل
حلا : حااامل؟؟
نور : اذا الله ماخيبني ... شفت عليها اعراض الوحام
حلا : بس ياترى اذا حكيناها رح ترد
نور : تنزلي عسوريا
~~~~~~~~~~~•
المسا مجتمعين العيلة مع حمزة ومرتو
واسماء جايبة معها زهورات ضيفت الكل وقعدت
حمزة : اي الاء حابة تحكيلنا شو القصة .. انا مبارح كنت بدي احكي مع هشام بس بالاول قلت خليني افهم منك
بلشت الاء تحكي وانها ماعد متحملة الغيرة .. ومعاملة حلا .. وهو كيف مابيحكي معها وكيف اتذكر عيد ميلاد نور والها متجاهلا .. واخر الشي المشكلة والشي يلي حكاه
اسماء : طيب بركي هي حلا عنجد سمعتك مقطع صوت قديم
الاء : طيب ليش مارد علي ... وكيف متذكر عيد ميلاد نور وانا عيد ميلادي ماتكلف يعرفو
حمزة : كل هي حجج سخيفة
الاء : بنظركن سخيفة بس انا عم موت ماعم اقدر اتأقلم
امها : طيب خليه يسكنك لحالك ولا مابيرضى
الاء : بالعكس هو عرض علي بس انا مابدي .. بدي خليه قدام عيوني واعرف شو عم يعمل بالبيت معهن
حمزة :والله احترنا معك
الاء : وحكيوو يلي قلي اياه
حمزة : لأنو جننتيه وهو بقلك بحبك وبموت فيكي وانت تقوليلو كذاب .. بدا تطلع الجنية ويخبص معك بالحكي
الاء : بعتلو انو جيت وما كلف خاطرو يتصل وكأنو ماصدق
امها : وليش ماضفتي انو ترك المشروع يلي كان مستلمو وقطع مسافة كبيرة كرمال يجي لعندك لانك زعلانة .. ليش بس بتشوفي الشغلات يلي بدك اياها
الاء : لعد تقنعوني انا خلص اخدت قراري ومعد ارجع والطلاق انسب حل
امها : والولد يلي ببطنك شو وضعو
حمزة : حااامل ؟؟
امها : اي حامل
الاء : رح نزلو
امها : بالله شوو انت مابتخافي الله .. وبعدين ابوه لازم يعرف انك حامل وهو يلي بقرر
حمزة : انا رح احكي معو
ابوه : احكي لنشوف
اتصل حمزة بس مافي رد
الاء : شايفين مابدو يرد لانو مستقلع
امها : اتصل مرة تانية حمزة لاترد عليها
اتصل وكمان مافي رد
الاء : اي انا كذابة مابتصدق
شوي ورن الموبايل
الاء : لاتخبرو اني حامل .. احكو بس بالمشكلة
حمزة : ماشي ... الو
هشام : السلام عليكم
حمزة : وعليكم السلام ورحمة الله وبركاته
هشام : كيفك طمني عنك
حمزة : الحمد لله
هشام ؛ والاء طمني عنها
حمزة : منيحة الحمد لله
هشام : اي الحمد لله .
حمزة : هشام انا متصل لأعرف شو القصة وليش اختي زايرة عنا
هشام : المشكلة كلها مني ... انا غلطت بحق اختك كتير .. ويمكن وصلنا لطريق مسكرة وانا ماعد فيني اجبرها تضل معي اكتر من هيك
حمزة : يعني بفهم من كلامك انك ماعد بدك اياها
هشام : انااا؟؟ مين قال هيك
حمزة : هيك فهمت
هشام : انا بدي اياها لاخر نفس بعمري ... وبكل الطرق عم حاول اثبتلها انو بحبها بس هية ماحابة تصدق .. وبدها الطلاق قلي شو اعمل بهل الحالة حاولت اسعدها بس يمكن وضعي ماناسبها وانا مابلومها
حمزة : طيب في شي لازم تعرفو
هشام : ثواني بس
وصوت حدا جنبو عم يحكي معو (بش مهندس هشام بيندهو عليك )
هشام : جاي .. اي اخي حمزة بدي اعتذر منك انا حاليا مارح اقدر احكي .. انا مستلم مشروع ولازم خلصو باقصى سرعة وبس انتهي منو ان شاء الله بنزل لعندكن وبنتفاهم والاء مارح تكون غير رضيانة .. سلميلي على الجميع
حمزة : الله معك
سكر واتطلع فيهن
اسماء ؛ شو عم يشتغل
الاء : يمكن رجع يكمل المشروع يلي كانو مبلشين فيه
امها : مبين كتير مشغول
اسماء : ومع هيك حكي معنا.. بس كأنو يلي كان يحكيه لهجتو مصرية
الاء : اي في من كل الجنسيات قطر اكترها مغتربين
ابوها : بس يلي بين معي انو لساتو شاريها
حمزة : قول هالحكي لبنتك
امها : يابنتي هي حالتك بسبب الحمل والوحام ...وبكرا مع الايام رح يتعدل مزاجك
الاء : بصير خير .. انا قايمة نام تصبحو على خير
حمزة : بكير
امو : اتركها ماعم تشبع نوم وحامها جاي على نوم
حمزة : الله يتمملها على خير
امو : عقبالك
حمزة : ان شاء الله .. الله كريم
~~~~~~~~~~~~•
باليوم التاني
فاتت اسماء على غرفتها المشتركة مع الاء وشافتها عم ترتب تختها
اسماء : انت شو عم تعملي
الاء : شو شايفة
اسماء : اي اقعدي اقعدي لايروح يصير شي على ولي العهد مابنخلص من هشام
الاء : نانانا
رن تلفون اسماء بمسج
الاء : مين عند هالصبح
اسماء : ملك
الاء : اف عجب
اسماء : مارجعنا جددنا الصحبة ورجعنا متل اول واحسن
الاء : امممم
اسماء : وبيني وبينك حاسستها عم تلمحلي على اخوها وانو معجب فيني
الاء : وانت شو رأيك
اسماء : عادي .. شب حلو وملتزم وعندو شغلو ومكتفي
الاء : يعني اذا تقدملك رح توافقي
اسماء : انو اي ... مارح يجيني احسن منو
الاء : ايه الله يوفقك
اندق الباب وراجت اسماء تفتح وتفاجأت بنور وحلا
اسماء بلبكة : اهلا وسهلا
نور ؛ بيت الاء مو هيك
اسماء : اي اي .. تفضلو اهلا وسهلا دخلتن على الصالون وندهت بصوت عالي : الاء ضيووف الك
طلعت امها من المطبخ والاء من الغرفة بنفس الوقت
الاء انصدمت فيهن وقالت : انتوو؟؟؟
نور ؛ كيفك الاء
الاء : الحمد لله ... ماما بعرفك ضرايري
قربت امها بلبكة لأنو شكلهن بيوحي على شي فوق .. من اناقة وجمال وجخ
تقدمت امها وسلمت عليهن والاء راحت قعدت قدامن
الاء : اهلين ارتاحو
رجعت امها على المطبخ وبقيت الاء معهن
حلا : كيفك الاء
الاء : مو المهم انا .. المهم انت كيفك ان شاء الله ارتحتي
حلا : الاء انا بعتذر كتير منك
الاء مصدومة
نور : الاء ليش تركتي البيت
الاء : مشان ترتاحو
نور : بالعكس البيت مابيسوا شي بدونك
حلا : اي والله ... ماكنت متخلية الامور توصل لهون
الاء : ليش مو هاد يلي كان بدك اياه
حلا ؛ بالاول بس هلق لأ
الاء : وشو عدا مابدا
نور : هشام بدو يطلقنا
الاء ؛ شووو
نور : متل ماسمعتي
الاء : بس ماكون انا السبب
حلا : لا ابدا ... مابعرف شو خطر عبالو وقرر يطلقنا كلنا وقال مابدو يظلمنا ورح يأمنلنا حياتنا ومارح ينقص علينا شي
نور ؛ ونحنا مابدنا نتطلق مبسوطين مع هشام رح تنخرب حياتنا اذا اتطلقنا
الاء : بس انا شو دخلني
نور : هشام بحبك ويمكن حس انو مارح يقدر يكون معنا وهو عقلو وقلبو معك
الاء : هه بحبني ؟؟
نور : هو ماقالها بس نحنا عرفنا لحالنا .. من يوم دخلتي على حياتنا وهشام تغير ١٨٠ درجة ... هشام كان ينق كتير وعلى اتفه الاسباب ... على قوانين للبيت .. وعلى اللبس والمكياج والشعر ... كل يوم بدو يشوفنا بلوك جديد وهاد يعجبو ... كانت حياتنا عبارة عن تبادل مصالح مو اكتر .. هو بقدملنا يلي بدنا اياه بالمقابل نحنا نقدملو يلي بدو اياه .. بس لما جيتي كلشي تغير ... لما حس انا عم يحبك حس انو عم يظلمنا وصار يهتم فينا اكتر وبس بدو رضانا بعد ما نحنا كان بدنا رضاه ... خايف يظلمنا بحبو الك وماكان بدو يحسسنا انك مميزة عندو بس نحنا حسينا وهالشي ابدا ما ازعجنا بالعكس كتير عجبنا ... مابهمني المشاعر بهمني المعاملة
حلا ؛ انا كل غيرتي منك انو انت غيرتيه ونحنا ماقدرنا نغيرو
الاء : يعني بتعترفي انك غيرانة مني
حلا : اي ... بعترف ... بدك اياه يحبك بس الك موافقين .. واذا بدك اياه خديه كل ايام الاسبوع المهم مانطلق
الاء : بس انا مابدي ارجعلو
حلا : ليش والله مافي سبب محرز
طلعت موبايلها وفتحت على تسجيل الصوت وقالت : ليكي والله قديم
نور : وبالنسبة لعيد الميلاد ماكان بيعرف .. ماكفر .. وانت شفتي انو قطع مسافات بس ليجي ويراضيكي
حلا : كان بدو يلغي المشروع بس في عقد وقع عليه مشان هيك رجع سافر
نور : ممكن اسألك سؤال
الاء : اسألي
نور : انت حامل ؟؟
الاء ؛ شو عرفك
نور : حسيتي عليكي اعراض الوحام
حلا : يعني في حمل
الاء : اي
حلا : منيح كتير .. هشام رح يفرح كتير بهاد الخبر
الاء :....
حلا : ارجعي والك وعد مني انو ماعد ازعجك بلعكس رح اعتبرك اختي وهي قدام نور
نور : وانا بتعرفي معزتك عندي
حلا : شووو
الاء : وبركي هو مصصم على الطلاق
حلا : انت اذا ارجعتي كلشي رح يرجع متل ماكان
الاء ؛ عن اذنكن
قامت على المطبخ وشافت امها واقفة عم تتسمع
الاء : ماما ماعملتي قهوة
امها : اي حبيبتي ليكها على الغاز
راحت الاء وصارت تحركها وشردت بحكيهن
قربت امها وقالت : شو رايك باللي سمعتو
الاء : مابعرف
طفت تحت النار وصبت القهوة بالفناجين وراحت تضيفهن
اخدو القهوة وقعدت قدامهن
نور : شو رأيك ترجعي معنا
الاء : مابعرف اعطوني وقت فكر .. بس لاتخافو ان شاء الله مارح ينخرب بيتكن
اندق الباب وقامت الاء تفتح وسالت مين واجاها الرد : انا لؤي
فتحت الباب والابتسامة على وجها
لؤي : الاء !!
الاء : اهلا وسهلااا
ضمو بعض وحكي : شو عم تعملي عنا ماصرلك زمان رايحة
الاء ؛ كأنو ما انبسطت بشوفتي
لؤي : بالعكس كتير بس استغربت .. وين الكل
الاء : عنا ضيوف
لؤي بهمس : مين
الاء : ضرايري
لؤي : عنجد ؟؟
الاء : ههه والله تعا دخل وراها بتيابو العسكرية وسلم سلام سريع ودخل على المطبخ امو ناطرتو
سلم عليها وباس ايدها وراسها وهية ضمتو
امو : شو هالزيارة الحلوة
لؤي : ههههه الله يحلي ايامك .... امي عنجد هدول ضراير بنتك
امو : اي والله ...
لؤي : والله هالهشام زوقو حلو
امو : مو هيك
لؤي : بس حدا عندو هيك نسوان شو عجبو ببنتك
امو : وبس بدو رضاها
لؤي : حظ ... بس شو سبب وجودهن عنا هنن وبنتك
امو : اااه ... زيارة عادية ... هشام مسافر وهنن نزلو على البلد يضيعو وقت بين اهلن
لؤي : اي منيح مابقصرو
امو : بس انت شو نزلك ماصرلك زمان رايح
لؤي : وماعد روح
امو : كيف
لؤي ؛ هشام دفعلي بدل
امو : عم تحكي جد
لؤي :؛والله ... مع انو ماهان علي .. بس خلص كل الامور مشت وماعد الي لزوم اخدم حملت حالي وجيت ... بس رح اشتغل ووفيه المصاري مابقبل شي من حدا
امو : المهم خلصنا من العسكرية ... والله هالخبرية عندي بالدنيا تعا عطيني بوسة
رجع ضمها
وبرا الاء عم تودع نور وحلا ورجعت لعند لؤي فرحانة برجعتو
الاء : الحمد لله عسلامتك .. شو عارف انو انا هون وجيت كرمالي مو هيك
لؤي : بصراحة لا والله .. بس جوزك يكتر خيرو هو سبب هالنزلة
الاء : كيف
لؤي : دفعلي بدل وانا خلص ماعد اخدم
الاء مصدومة وماردت
لؤي ؛ شو مافرحتيلي
الاء : مبلا .. بس تفاجأت .. وكيف هشام عمل هيك
لؤي : عن طريق واحد صاحبو ... حتى انا انصدمت بعرف مالو معارف بالدولة
الاء : يلا المهم النتيجة والله فرحت خير الله بهل الخبر
لؤي : بس انا مارح اقبل هالشي من هشام ورح اشتغل ووفيه كل ليرة دفعها
الاء : متل مابدك
لؤي : يلا بس لغسل وارتاح رح احكي معو واتشكرو
الاء؛ مافي داعي هالفترة مشغول كتير وماعم يحمل الموبايل ابدا
لؤي ؛ مو مشكلة .. وينو بابا ؟
~~~~~~~~~~~~~•
المسا قاعدة بغرفتها وعم تفكر بكلشي صاير حواليها
اجت امها وعم تعزمها على العشا : قومي حبيبتي العشا جاهز
الاء : ليش ماندهتيلي ساعدك
امها: وانت حامل ماحزرتي ... يلا قومي
الاء ؛ يلا جاي
امها : امي انا ماقلت للؤي انك زعلانة
الاء : منيح ماعملتي ماوقت وجعلو راسو
طلعت وقعدت مع العيلة وكان العشى مكلف بالنسبة لوضع اهلها
الاء : ليه كل هالاكل
امها ؛ كرمال عيونك وعيون لؤي
اسماء : يعني نحنا عم رح ناكل بجريرتكن
الاء ؛ هههه لا ولوو انت الأصل
اسماء : امي بكرا بس اتزوج رح تدلليني ولا بس الدلال لناس وناس
لؤي : هو يجي معمي القلب وماعليكي
اسماء : قصدك يلي امو داعيتلو
ابوها : يلا سمو بالله الاكل رح يبرد
بلشو اكل وكان الجو حلو ولطيف .. وامها كل شوي تدعم الصحن يلي قدام الاء
الاء : يا امي والله بطول كلشي
امها : اي كلي واتغذي .. يقوم يصير شي على الولد مابنخلص من ابوه
تشردق لؤي بالاكل وقال : اح اح حاامل ؟
اسماء : ليه ماخبروك
لؤي : لا
اسماء : اي باركلها رح تصير خال
لؤي : والله هالخبر حلو .. مبروك اختي
اسماء : الله يبارك فيك يارب عقبال ماشوف ولادك
لؤي : تسلميلي ... لكن مازال هيك كلي واتغذي ع قولة امي
الاء : يعني خايفين من ابو الولد ليقوم يصير شي على ابنو
لؤي : اذا صار عليه شي بنعلق معو ونحنا مو قدو كلي اختي كلي
الاء : انتو ليش عم تعاملوني هيك
امها : لك شبك عم نمزح
الاء : حتى لو مزح .. واذا صار على الولد شي بدو يقطع راسنا هشام بيك .. انا امو ومسؤول مني وبخاف عليه
لؤي : شبك ماحكينا شي
الاء : ماشي سكتت
اكلت شوي وقامت اخدت صحنها وفورا اسماء وقامت اخدت منها الصحن
الاء : على فكرة كلو صحن
اسماء : روحي ارتاحي مابدنا نعذبك
ماجادلتها وراحت قعدت وحست انو اهلها عم يعاملوها معاملة الضيفة .. معقول هية ماعد تنتمي لهل البيت وعنجد هية ضيفة
الاء بقلبها : لا لا هاد بيت ابي وبحياتي مارح صير غريبة عنو
قامت وقالت :رح اعمل شاي مين يشرب
امها : يعني انت مشتهية الشاي
الاء: انو اي شاي بعد العشا
امها : اقعدي هلق اسماء بتعملو
الاء : يا امي لا تحسسوني غريبة
امها :مو غريبة ياعمري بس مشان رياحتك
الاء : انا برتاح لما تعامولني متل الكل
امها : طيب ماشي اعملي شاي وحليها
الاء : حاضر
وهية بالمطبخ رن موبايلها بمسج وكان من نور : نحنا بكرا مسافرين تسافري معنا
فكرت شوي وبعدها ردت : حالياً لا
نور : طيب متل مابدك بس فكري منيح
الاء : ماشي .. توصلو بالسلامة
~~~~~~~~~~~•
بعد ايام
طلعت الاء من غرفتها وتوجهت لعند المطبخ وسمعت امها عم تحكي مع اسماء : قوليلو كيلو غنم ناعم وخليه يسجلن .. وبعدها بتروحي للدكان وجيبي لبن
اسماء : كمان يسجلن ؟
امها : اي
اسماء : ماشي
دخلت الاء وقالت : لشو هدول الغراض
امها: للغدا
الاء : يا امي لسه اكل من مبارح بنعمل جنبن بطاطا مقلية وخلصنا
امها : لا مابأثر
الاء : طيب انا معي مصاري رح اعطيكي لاتسجلي شي
امها: لا والله مابتدفعي شي .. خبيهن بتعتازيهن وبعدين لازم تروحي على الدكتور تطمني عن الحمل
الاء : ماشي .. بشو ساعدك
امها : ولا شي .. بس اقعدي هون وسولفيني
قعدت وفات لؤي : قعدت الام وبنتها بالمطبخ كلها نميمة وغيبة
الاء : اي ماحكينا على حدا وانت لا تدخل
لؤي : بالله شوو ...(سحب كرسي وقعد وقال : هاتي احكيلني الاء شو الاخبار بقطر .. وايمت جوزك بدو يضبك وياخدك لعندو
الاء : بس ماكون زاعجتك لؤي بيك
لؤي : والله حاسس ماعد الي اهتمام بهل البيت كلو الك
الاء : اي طق موت
لؤي : امي شو الاكل اليوم
امو : شيشبرك
لؤي : اكلت الاء المفضلة .. وانا شو مشاني
الاء : عنجد امي بدك تعملي ششبرك كرمالي
امها : اي ياعمري كرمالك
الاء : بس والله مابدي غلبكن معي .. واصلا عادي ع الوحام ماعم حب شي
لؤي : سامعة قال عادي .. اصبح بدلي العجين بكوسا وعملي شيخ المحشي مشتهيها كتير
امو : غير مرة ... اليوم شيشبرك يعني شيشبرك
لؤي : اي لكن العز للرز
قام وطلع
امو : ع وين
لؤي : دور ع شغل احسن من القعدة ... القعدة مابتطعمي خبز
امو : اي والله معك حق .. الله يفتحها عليك يارب
انسحبت الاء ورجعت على غرفتها ... الاء حساسة كتير ومن اي شي بتتحسس حتى لو كان بسيط .. اهتمام اهلها المبالغ فيه بيختلف عن اهتمام اسماء بدل انن عم يعاملوها كغريبة .. او عنجد هنن بحبوها وعن يهتمو فيها لانن بحبوها بس هية فهمتها غير شي ... التكلفة يلي عم يبذلوها حست انها تقيلة عليهن .. وهية مابدها تكون عبق على حدا ... اتذكرت انو هشام كان يبعتلن مصاري بدون مايخبرها واكيد اهلا ممنونين منو ... يعني هية اذا اتطلقت رح تشكل عبق كبير على اهلها .... اما لما كانت هنيك كانت ما تهتم وكل هما المجاكرة ولا تحسب حساب مصروف ولا اي شي .. وشو ماتطلب يحضر عندها ... واصلا بحياتها ماحست وحدة متزوجة انها تقيلة على جوزها بالعكس بتحس بالاستقلال
وقفت قدام المراية وقالت ؛ الطلاق ابدا ما حل ... لكتير اسباب واولهن انت (ولمست ايدها على بطنها )
اخدت الموبايل وبعتت رسالة لهشام بدي احكي معك ضروري بس تفضى حكيني
نطرت حوالي الساعة وبعدها رن الموبايل واخدتو بلهفة ورد عليها: الساعة وحدة بعد نص ليل منيح
الاء : مع انو بكون بسابع نومة .. بس لازم نحكي (ردت: ماشي
~~~~~~~~~~~•
بسبب الوحام اغلب وقتها نوم بس مع هيك عيرت المنبه وفاقت على الوحدة.. اخدت تلفونها بحماس وقلبها عم يدق بسرعة .. شعور تجدد جواتها .. وكأنها ناطرة تحكي مع حبيبها بايام المراهقة .. نطرت شوي وبعت : نايمة
ردت : هلق فقت
هشام : كيفك
الاء : الحمد لله وانت
هشام : الحمد لله
الاء : كيف الشغل
هشام : انبليت بهل المشروع وماعد فيني انسحب
الاء : متعب
هشام : كتير
الاء : الله يقويك
هشام : تسلمي
الاء : شو طبيعة هالشغل يلي ماعم يخليك تفضى ولا خمس دقايق
هشام : باعتباري انا المهندس اغلب الشغل الي من تصميم واشراف على الشغل وانا عم حاول عجل كرمال خلص بسرعة ... حتى ببريك الاكل بناكل ع شكل كروبات وعالواقف ومافي مجال احكي مع حدا .. كرمال هيك فاصل الشغل لحال والحياة الشخصية لحال
الاء : اممم .. المهم الموضوع يلي بدي احكي فيه
هشام : تفضلي
الاء : انت مين طلب منك تدفع بدل خدمة لاخي لؤي .. يعني مفكرة بهل الحركة تضغط علي
هشام : انا لما عملت هالشي لما كنا بسوريا
ماردت
هشام : يعني مشي حالو
الاء : اي وهلق هو بالييت
هشام : اي مبروك
الاء : عكل حال كل شي دفعتو رح يرجعلك
هشام ؛ مو مشكلة
الاء : طيب هاد هو يلي كان بدي احكي .. فيك تروح تنام مبين عنك تعبان
هشام : مبسوطة عند اهلك
الاء : اي في حدا بين اهلو مابكون مبسوط
هشام : معك حق الله يخليلك اياهن
الاء ؛ تسلم
بعد صمت رجع بعت : ليش رحتي
قلبها صار يدق بسرعة
الاء : انت ماعد بدك اياني
هشام : اناااا ؟؟
الاء : اي ولا ذكرك شو حكيت
هشام : حكيت لانو كنت معصب من كلامك لكن في وحدة بتقول لجوزها كذاب ... ماتوقعت تروحي عنجد .. رجعت على البيت قلت بتكوني هديتي ونحكي عرواق وراضيكي .. بس بتفاجئ برسالتك وطلعت متل المجنون على جناحك ومالقيتك ... حسيت انو خسرتك للأبد
الاء : هشام بتحبني
هشام : اكتر مابتتصوري ... بس يمكن انت مارح تكوني مبسوطة معي وانا مقرر بس خلص شغل انزل لعندك وحررك مني كرمال تكوني مرتاحة وكرمال تعرفي شقد بحبك
الاء ؛ وانت
هشام : مو مهم .. المهم انت تكوني مبسوطة ومرتاحة .. ورياحتك رح تكون ببعدك عني
الاء : انا اخر فترة كنت مضطربة نفسيا والامور اجت مع بعضها
هشام : سلامتك من شو
ماردت
هشام : هرمونات ؟
ضحكت وكتبت : وبتعرف بالهرمونات
هشام ؛ لكن متزوج تلاتة ومابدي اعرف بالهرمونات وتقلب المزاج كل شهر
الاء : بس مو هاد السبب
هشام : لكن ؟؟
بعتتلو صورة التيست الحمل يلي صورتا مسبقا وعاطي نتيجة ايجابية
هشام : حاااامل
حست انو من حروفو مليانين فرح
ردت : اي .. بدك اياه ولا نزلو
هشام : عم تمزحي مو
ردت : هيك شي.. ماقلتلي بدك اياه
هشام ؛ بدي اياه هو وامو
الاء : لكن خلص شغل بسرعة ونحنا ناطرينك
هشام ؛ يومين بالكتير ورح كون عندك
الاء : فرحت
اتصل وردت فورا : قد الدنيا مبسووط
الاء نبرة الغنج بصوتها ممزوجة مع الفرح : مع انو مو اول ولد
هشام : صح .. بس اول ولد منك
دمعت بفرح وحكت ببحة : اشتقتلك
هشام : وانا كتتتير ... بس هلق الدنيا ضوت بعيوني ... مابتتخيلي الحالة يلي كنت عايشها هالفترة وانا عم اتخيل حياتي الجاي وانت مو معي ... الشخص الوحيد يلي قلبي بيرقص لما بكون معك او احكي معك
الاء : وهلق شو
هشام : هلق اختلفت الاحلام كلها ...
الاء : ولساتك بدك اتطلق نور وحلا
هشام : شو عرفك
الاء : العصفورة خبرتني
هشام : وانت شوبدك طلقهن؟
الاء : اكيد لااا ... امهات ولادك ونسوانك مابسخى فيهن
هشام ؛بصراحة وانا كمان ههههه
الاء : مابتقدر مو بأيدك
هشام : والله كلو بالحلال
الاء : عفكرة اتفقت معهن عليك
هشام : يعني انت هيك بتكوني رضيانة
الاء : اي
هشام : لكن فداكي انا
الاء : اقسم بالله معد ميزت بين كذبك وصدقك
هشام : انا بكذب على الكل عليكي لاا
الاء : يعني بتعترف
هشام : ههههه اي بعترف .. بس عليكي والله لاا
الاء : يعني بتقلن انك بتحبن
هشام : الكذب بين المتزوجين حلال
الاء : اهم شي انك بتميز بين الحلال والحرام
هشام : بعجبك ... اي ياروحي شو عم تعملي
الاء : متسطحة بتختي
هشام ياريتني جنبك
الاء : هسسس... اسماء نايمة جنبي لا تبلش تخبيص
هشام ؛ ايمت بدي خلص هالمشروع الزفت واجي فرجيكي التخبيص على اصولو
الاء : هههه شو رأيك انزل على قطر وتلاقيني بالبيت
هشام : لااخليكي عندك انا بجي براسي وبعيوني وبكل حواسي باخدك .. ومشان ماتسافؤي لحالك وانت حامل بركي تعبتي
الاء : يعني خايف علي ولا على الولد
هشام : طبعا عليكي .. مجنونة انت
الاء : اي مجنونة فيك
هشام : وانا ميت عليكي
الاء : يلا لكن روح نام انت اكيد تعبان
هشام ؛ بتصدقي انو معد حاسس بأي تعب .. الادرينالين ضرب ع اخر العداد عندي
الاء : هههههههه
~~~~~~~~~~~~•
بعد كم يوم
والوضع عند الاء واهلها عادي وبما انو يوم جمعة مجتمعين بالاضافة لحمزة ومرتو
النسوان بالمطبخ عم يجهزو الغدا وحمزة ولؤي وابوهن قاعدين بالصالون
حمزة : كيف هالشغل
لؤي :ماشي حالو .. بس الراتب بالمرة
حمزة : تشتغل معي بالمدجنة
لؤي : لا دخيلك ريحة الجاج بتخنقني
حمزة : احسن من راتبك
لؤي : يعني وضعك متحسن
حمزة : الحمد لله مستورة عم طالع اجار البيت ومصروف
لؤي : والله هالحالة صعبة كتير
حمزة : اي والله
همس حمزة للؤي : بيني وبينك هشام بعت كم مرة مصاري لأهلي اي والله فرق الوضع كتير
لؤي : كان مالازم يقبلو شو نحنا بعنا اختنا بيع
حمزة : هو مابفكر هيك ... بس مشي الحال ماعد يبعت شي
لؤي : احسن .. بس صاير شي
رن جرس الباب
وقام لؤي يفتح .. فتح وانصدم بهشام
هشام : السلام عليكم
لؤي : اهلا اهلابالصهر .. تفضل تفضل
صافحو ودخل لجوا
لؤي : شو هالزيارة الحلوة
هشام : تسلم هاد من زوقك
لؤي : يا الله يالله
قام حمزة ليشوف مين والاء واسماء ركضو عل غرفتن ليلبسو لانو بيجهلو مين هو الزائر
دخل واتفاجئ حمزة فيه وقام يستقبلوا وبقلبو عم يقول هلق كنا بسيرتو هههه
سلم عليه ونزل لعند عمو سلم عليها وباسو من راسو
لؤي : امي الاء تعو هاد هشام
الاء كانت عم تلبس شي بس لما سمعت اسمو فورا شالت الشال عن راسها .. زبطت حالها وطلعت تستقبلو الابتسامة على وجهها
هو بعدو واقف اجت امها بالاول سلمت عليه وهية واقفة وراها ... خجلانة كتير منو وبنفس الوقت مو مصدقة انو قدامها
مدت ايدها برجفة وسلم عليها وباسها على خدها بوسة عابرة مشان وجود اهلها
والكل مستغرب منها عاساس بدها تتطلق وماعد بدها اياه .. وهلق عم تستقبلو والابتسامة على وجها شبر .. والظاهر انو ماخبرت حدا انن تصالحو
قعدو الكل والهدوء كان مسيطر ... والشي الوحيد يلي عم يحكي هنن عيون هشام يلي مزورعين على الاء ومتجاهل الكل
كسرت الصمت ام حمزة : جيت بوقتك رح نحط الغدا حماتك بتحبك
هشام : ههههه ايو وحدة منن
زورتو الاء والكل ضحك
هشام : الله يسلم هالادين .. بس مازال في غدا ممكن غسل ايدي
ام حمزة : اكيد تفضل
هشام : الاء وصليني على الحمام
الاء : اااه ... اي تفضل من هون
مشت قدامو ووصلت لباب الحمام فتحتو الباب وقالت تفضل
مسكها من ايدها وسحبها لجوا وسكر الباب وعم تحاول تفلت منو وتطلع
الاء : انت جنييت .. شو عم تعمل بدك تفضحنا
هشام : ههههههه خايفة
الاء : شو رأيك اخواتي وابي شو بدو يكون منظري قدامن اتركني خليني اطلع قبل مايحسو
هشام ؛ بوسة ع السريع ... مشتقلك كتير
الاء ؛ لا لا ... بعد هيك الله يوفقك
هشام : ههههه حركات عم تجنني
الاء : خلي الجنان لبعدين اتركني اطلع
هشام : بوسة وبفلتك
نفخت وقربت منو بسرعة باستو بوسة سريع تركها وطلعت بسرعة وهو غرق بضحكتو .. وهية فاتت بسرعة على غرفتها القريبة من باب الحمام
اجت لعندها اسماء وفتحت الباب وكأنو عم تدور عليها
اسماء : شو عم تعملي هون
الاء : ااااه عم اتاكد من شكلي
اسماء : يعني مافتي معو على الحمام
الاء : حدا شافنا
اسماء : هههه لا بس انا
الاء : امانة لاتقولي لحدا
اسماء : ماشي بس ليش هيك مخطوف لونك الاء : قلبي وقع خفت حدا يشوفني من اخواتي
اسماء : لا ماحدا شافك بس والله هالهشام مانو قليل جريء
الاء : اااخ منو
اسماء : تعي لنجهز الغدا يلا
الاء : جيت امشي قدامي
~~~~~~~~~~•
مشي الوقت بسرعة
العيلة كلها مجتمعة على نقاشات وسوالف
لؤي : بدي استأذن منك صهر بدي روح على الشغل
هشام : شغل شو
لؤي : بسوق الهال
هشام : عم تحكي جد
لؤي : ليش في شي
هشام : انا مادفعتلك مشان تشتغل بسوق الهال .. انا بحاجتك
لؤي : بحاجتي ؟ ليش
هشام : بدي افتح مشروع هون بالشام وانتو بدكن تستلموه
لؤي : مين انتو
هشام : انت وحمزة وعمر ابن اختي بدي حدا امين سلمو هالمشروع
لؤي : مشروع شو
هشام ؛ الطاقة الشمسية
لؤي : ونحنا شو عرفنا
هشام : عحد علمي انتو اصلكن كهربجية
لؤي : اي ما اختلفنا بنعرف بالكهربا بس مو بالطاقة
هشام : اي مابدها شي .. نفس الشي تقريبا بس تتعلمو البرمجة وهي اختصاص عمر
حمزة : هو انت ناوي على هالمشروع
هشام : اي ومن فترة عم ادرسو .. علي الاستيراد وعليكن الشغل هون
حمزة : وضمنان نجاحو.. لانو اغلب العالم ركبت
هشام : ليش ماعندكن عزيمة على الشغل ... واصلا ياحبيبي هي الالواح والاجهزة والبطاريات كلها الها اعمار محددة وبدها تتجدد كل فترة .. وبعدين الرزقة على الله والواحد بس ينوي ويقصد بابو الكريم ... وكمان نحنا رح نبلش بقوة مارح نبلش ع الخفيف .. ولما بتفوت على السوق بقوة بتاكل السوق
لؤي : حكيك منطقي كتيير
هشام : بصراحة انا مو فاضي لهاد المشروع وبنفس الوقت حابب افتحو وبدي حطو بايد امينة ... وانتو شغلكن رح يكون على النسبة افضل من الراتب الثابت
لؤي : بس هيك كتير
هشام : مافي شي كتير بالعكس ماعم اعمل شي وبالنهاية المصلحة الي
حمزة : طيب ونحنا من ايدك هي لايدك هي
هشام : انا بعتت المشروع لمختص وهو رح يعطيني النتيجة النهائية بخصوص التكلفة وحكيت مع بعض شركات الطاقة حول العالم ورح ادرسها وجيب احسن البضاعة بأقل الاسعار .. انتو عليكن المكان والديكور
حمزة ؛ كمان ديكور
هشام : اي اقل منها .. واذا بتلاقو محلات كبيرة للبيع افضل من الاجار ... ومع الايام بنصير نستورد ادوات كهربائية تشتغل على الطاقة وبنكبر الشغل .. بس الواحد يشغل مخو
لؤي : والله ياصهر عم نشغلو بس بدك مصاري
هشام : والمصاري موجودة اتكلوا على الله وباشرو بالموضوع .. وانا رح اجمعكن بهل اليومين مع عمر ونحكي بكل التفاصيل
حمزة : شقد بقيان هون
هشام : كم يوم
لؤي : الاتكال على الله
ردو : والنعم بالله
هشام : وهلق ياجماعة بتسمحولي اخد مرتي
حكي حمزة : شوف مرتك
لؤي : شكلها حابة القعدة عنا كتير هههه
حمزة : شو الاء
الاء بخجل : رح جهز حالي
وهيك تسكرت السالفة ومافتحو ابدا اي سيرة وكأنو ماصار شي
هشام : عمي كيف رضاك علينا
ابو حمزة : الله يرضى عليكن .. بس دير بالك على الاء
هشام : بعيوني والله
~~~~~~~~~~~~•
ركبو بالسيارة ومبين هشام فرحتو ماعاطيها لحدا .. حط ايدو بأيدها وقربها منو وباسها وحرك السيارة ومشو
الاء : ع وين رايحين
هشام : احزري
الاء : ع الاوتيل اكيد
هشام غمزها: مشتاقتيلي لهل الدرجة
الاء : قصدي عم اقرا تفكيرك
هشام : يعني مو مشتاقة
الاء : اي بس ماني منحرفة متلك
هشام : ههههه رايحين ع الاوتيل بس بالاول بدي نروح على الدكتورة نطمن عنك وعن البيبي
الاء : اااه يعني بدك تطمن عن ابنك بالاول
هشام : هههههه لا بدي اطمن عنك وشوف وضعك بيتحمل لشوق كبير
خجلت وقالت : قليل ادب مو بأيدك
رجع باسلها ايدها وضحك ضحكة كبيرة بتعبر عن سعادتو