رواية سلطان زمانه
الفصل الرابع4
بقلم مريم اليوسف
وصلو على السفرة ..
هو ترك ايدها و سبقها على مكانو وتزعم راس الطاولة وهية تباطئت بخطواتها لأنها انصدمت من نور وحلا .. لابسين أحلى لبس فساتين مكشوفة وسكربينات بكعب .. وهية نازلة بالبجامة وبشحاطة ... قربت بهدوء وقالت مساء الخير وقعدت جنب حلا .. وصفنت بصحنها وكانت عم تحكي حالها : شو هدول ... والله حرام عليك يا هشام شوبدك مني ... ناوي تقهرني ... والله انا قدامن متل السرلانكية شو رايحين على حفلة ... اي لكن لينالو رضاه للبيك ... ياربي انا مكاني مو هون
مدت حلا ايدها لتاخد الملح من قدامها وانتبهت على بياضها ،وايديها على الطاولة كيف سمر خافت تسحبن تحسسهن بشي
فاقت من شرودها على صوت هشام العالي
هشام : الاااااء
الاء : شوفي
هشام : وين شاردة
نور : عم قلك عجبك العشا ولا خليهن يحضرو شي تاني
صفنت بوجهن وماردت
هشام ؛ شو القصة ... شبك
الاء ؛ مو جوعانة
تركت الاكل وراحت قعدت على كنبة قريبة ... ماكانت حابة ترجع على الغرفة لأنو دبحها الملل
قام هشام وقعد جنبها شاف حزن بعيونها
هشام : انت منيحة
الاء : رجعني لعند اهلي انا مكاني مو هون
تركها وترك الغرفة وتوجه لعند الباب وهو طالع حكى نور : خلصي عشاكي والحقيني
طلع ونور قامت لجنبها
نور : انت منيحة
الاء : لا .. مابتحمل هيك ... انتو كيف عايشين مع بعض
نور : غيرانة عليه ؟
الاء : لاء طبعا ... بس مابقدر انجبر على شي مابدي اياه
نور : طيب عم تحكمي على شي ماجربتيه .. جربي بركي اتقبلتي الوضع .. بالاول شعور صعب الغيرة وهيك .. بس والله تعودنا انا وحلا ما هيك حلا
قامت حلا لعندن وقالت : اي هيك .. وبكرا بنتعود على بعض مبين عليك حبابة .. وبتنحبي
خجلانة تقلها انها غيرانة منهن ومن جمالهن ومن اناقتهن
نور : البنت مالها غير بيت زوجها .. مفكرة انك ترجعي على بيت اهلك متل ماكنتي ... رح ترجعي مطلقة ... رح تحسي بنظرات اهلك مختلفة هية بتكون طبيعية او متعاطفين معك .. بس انت رح تحسيها صعبة .. رح تحسي انك تقيلة ... والمجتمع مارح يرحمك وخصوصا اذا رجعتي بهل السرعة .... صح هشام كذب عليكي بس خلص صار قدرك .. وهشام كتير منيح وحنون ومارح ينقص عليكي شي ولا على اهلك ... مو حابة تساعدي اهلك وتشيلي عنن كتف ..ونحنا رح نكون متل اخواتك ... في غيرة مابكذب عليكي .. بس رح يكون عندك كتير شغلات تلتهي فيها وتخف الغيرة .. انت يمكن عم تحلمي بالحياة الوردية يلي بتحلم فيها كل البنات تحبي وتنحبي .. وقصة خيالية ... بس مافي شي بيكمل .. حب وعشق وفقر ... الفقر بفوت من الباب والحب بيهرب من الشباك ... هاد وقت للمصاري يلي معو عايش ويلي مامعو عم ينام ويحلم لما يصير معو ومارح يصير معو ... نحنا مو عايشين عأساس زوج وزوجتو بنحب بعض وبنعشق بعض .. في حب مابخبي عليك بس حب استراتيجي ... مقدملي يلي بدي اياه ويعمل يلي بدو اياه ومازال عم يعمل هالشي بالحلال ليش لوقف قدام شرع ربنا ... الحياة يلي كنا عايشينها جحيم وهشام طلعنا منها.. وبتحمل عشر ضراير ولا برجع لعيشيتي عند اهلي ... وبعدين المرى بتفر من الرجل المهمل البخيل يلي بيضرب ... وهشام ماعندو اي صفة من هدول ... بالغزل شاعر .. بالاهتمام محدا بيسبقوا بيهتم باتفه الاسباب ... والكرم قد ماحكيتلك ما مارح تصدقي .. واطول من بالو مافي ولابحياتو رفع ايدو وضرب وحدة منا كف ...
الاء : والحب ؟؟
نور : وكمان حب .. بس مو حب يلي بتفكروه انتو ..انا بحب يلي بدللني وبيهم فيني وبجبلي هدايا وبسفرني وين مابدي .. اما الحب يلي مابطعمي خبز مابيلزمني
حلا قاعدة وعم تتسمع ومو عاجبها حديث نور كلو
الاء : ليش تزوجني ؟بتعرفي ؟
حلا : لتجيبلو ولد اكيد ... لأنو انا ونور مو فاضين
الاء : ليش شو عندكن
حلا : كتير شغلات انت بتجهليها ... واكيد شاف فيكي ام مناسبة .. لانو مو شايفة فيكي شي تاني يعجبو
نور : حلا شو هالحكي هاد
حلا : هاد يلي عندي وانت حاج تقنعيها .. عملتيلي هشام ملاك ونازل من السما
نور : وبشو زاعجك هشام مازالو مانو معبي عينك
حلا ؛ عايشة كرمال بنتي
نور : اي كتر مابتشوفيها لبنتك .. ماكل وقتها مع الدادا
حلا : عأساس ولادك مابفارقوكي
نور : مادخلك بولادي ... انت عم تتحججي ببنتك ... بس هالحكي كذب انت عايشة هون كرمال المصاري وبس
حلا : عأساس انت انظم
نور : مو انظم ... وانا عارفة مانك حابة هشام يتزوج علينا وماعارفة شو الغاية ... وانا مبسوطة وعم اقنعها كرمال تحترقي بقهرك ومتل مانزلتي علي ضرة الله بعتلك مين ياخدلي حقي منك ...
حلا : اي قولي هيك ... وانا عم قول شو هالحنية يلي دبت فجأة
نور : من يوم يومي حنونة مو متلك خبيثة
حلا : هلق اناا خبيثة
الاء هون مصدومة وعم تنقل نظرها بين هي وهي يلي اصواتهن عم تعلا ورح يقومو يعلقو ببعض ومابتعرف ليش اجتها الضحكة مع انو مافي اي شي يضحكها
نور : خبيثة ونص .. قال مابعرف انو انت يلي اتفقتي مع الشب يلي بالمطعم مشان يتعالق معو هشام ويشتكي عليه وياخدوه على القسم ... وانت تروحي تجيبي الاء من المطار ... اساليبك مابتمرق عليي حافظتك اكتر منك
حلا : عم تتبلي علي
نور : لا وحياتك هي الحقيقة
حلا : ايو حقيقة انقبري اخرسي لايسمعك هشام ويصدق هالخرافات
نور : مو ساكتة شو رح تعملي
قامت حلا وهجمت عليها وحطت ايدها على تمها مشان تسكتها بالقوة وهديك عضتها وعليت صراخهن بالبيت وشد الشعر و الاء رجعت لورا وماحاولت تفك بيناتهن
لحتى نزل هشام على الصوت وشافهن مبلشين ببعض
هشام ؛ شو عم يصييير هووون ... بسسس انت واياها
بسرعة بعدو عن بعض وحالتهن مابتشبه ابدا حالتهن قبل شوي وكأنو الاء طرقتهن عين هههه
هشام : شبكن شوو صاير ... من ايمت بتتخانتقوا هيك
حلا : كلوو من مرتك الجديد هية محراك الشر
الاء : اناا
حلا : مين غييرك
الاء : مازال انا السبب .. اي ماشي .. بتستاهلوا .. وانا علقتهن ببعض ولسه ماشفت شي ياهشام بيك والله لخليك تمشي وتحاكي حالك
هشام : يعني انت السبب
الاء : من ايمت بيتخانقوا نسوانك هي اول مرة مو هيك .. وشو الجديد هية انا .. اصبح انا السبب
نور : لا ابن عمي مو هية السبب
الاء : لأ انا السبب
هشام : حلا ونور تصالحوا لشوف
اتطلعو ببعض وماردوا
هشام : يلا
قربت حلا وضمتها وهمست بادنها لاتحكي شي عن الشب
وردت عليها نور بهمس : ماشي .. بعتذر لأنو قلتلك خبيثة .. بس اسلوبك استفزني
حلا : مرقتها بس انت احفظي لسانك
نور : ماشي
بعدو عن بعض
هشام : شوو هلق
نور : معد تتكرر ... اسفة حلا
حلا: وانا كمان اسفة ضرتي
اتطلع هشام بالاء بثقة وقال : انت خربي وانابصلح ماروانا شي بنتسلى
مد ايدو لنور وقال : اتاخرتي علي
نور : جيتك يا تاج راسي
الاء : لك شو عم يصير ... انتو عنجد طبيعيين هيك
راح هشام ونور وضلت حلا : لسه ماشفتي شي تعي نتعشى ماجعتي برد الاكل
الاء : عم تحكيني الي
حلا : لكن عم حكي الحيطان تعالي
الاء : بس كأنو من شوي ماكنتي طايقتيني وعم ترمي حكي متل السم
حلا : كل ساعة والها ملائكتها ... تعي خلصيني ....
~~~~~~~~~~~~~•
طالعة على غرفتها ... ووقفت بالكاريدور كمان هالمرة ضيعت الغرفة ...
مشت كم خطوة ووقفت قدام باب بشك .. وبعدها فتحت ولقت حالها بجناح مو بغرفة ... لفت لتطلع بس سمعت همس وفضولها خلاها تلحق الصوت .. لقربت من باب مشقوق شوي الصوت طالع منو ... قربت ودغري رجعت لورا وهية مغمضة عيونها .. وطلعت بسرعة وبهدوء ... وقفت بالكاريدور وكانت لونها مخطوف ... مشت خطوتين لتسمع صوت خطوات وراها وكانت حلا
الاء : لهلق ماعرفت وين بتصير غرفتي
حلا : هي يلي واقفة جنبها انت
الاء : اوك ... شكرا
حلا : تجي نسهر بجناحي
الاء : لا شكرا
فتحت الباب ودخلت وراحت لعند التخت وقعدت مزعوجة ... او يمكن غيرانة
اخدت موبايلها ولقت ميساء باعتتلها
الاء : اجيتي بوقتك
م : كيفك ولو
الاء : منيحة
م : شو الاخبار
_: ماعم ير ضى يطلقني
:وبدك تضلي هيك
: حكيت مع حمزة بركي بيحكي معو وبيتفاهمو رجال لرجال
::عملتي منيح .. واحكيلي شو اخر الاخبار
وحكتلها كلشي
الاء : ماعم افهم شي ... من جهة هشام لا بحبني .. ولا اني بجمال نسوانو ليش مابدو يتركني مابعرف .. ونور من جهة بتلاقيها حبابة ومن جهة تانية بحسها بدها تقهر حلا فيني ... وحلا مبينة مو طايقتني بس اوقات مدري شو بصيبها
ميساء : اوبة معاقين اجتمعوا
الاء : اي والله ...
ميساء : ولو الاء طيب جربي فترة معن بركي بتتأقلمي
الاء : مابتحمل انا ... انا كتير بغار .. لك هلق على العشا الله وكيلك حسيت حالي سيرلانكية بيناتن هنن هاللبس وهالجمال وانا نازلة قال بالبجامة ... وبنفس الوقت بموت اذا جوزي نام عند غيري بدي اياه الي وبس ... عفكرة انا هشام تحركت مشاعري تجاهو .. وعم غار عليه
ميساء : وينو هلق
الاء ؛ عند نور
ميساء : وانت هلق مزعوجة
الاء : كتيركتير ...
ميساء : يعني حاببتيه
الاء : مو قصة حب .. بس نحنا البنات عنا غريزة الغيرة ... قلك شغلة
ميساء : قولي
الاء : هلق فتت على غرفتهن بالغلط وشفتن مع بعض
ميساء : عنجد عم تحكي
الاء ؛ اي والله ... مقهورة من حالي كتير ماكان لازم فوت ... وكمان مدري شو صابني من وقت شفتن
ميساء : شو شفتي بالزبط
الاء : كانت هية قاعدة قدام المراية عم تظبط حالها وهو كان وراها ونازل لمستواها وباسها على كتفها .....
ميساء : بايتنو رومنسي
الاء : يضرب منو لرومنسيتو ... بدي اطلع من هون رح اختنق
ميساء : طيب انت ظبطي حالك متلن
الاء : انا بحكيكي من الشرق انت بتحكيني من الغرب
ميساء : طيب ماعم يرضى يطلقك حاولي فوتي بالجو .. وكملي تنكيد عليه
الاء : لشوف شو رح يطلع مع حمزة
ميساء : شوبدو يطلع يعني ... الله يساعد اهلك واخواتك ... شويدو يطلع معو .. لاتزعلي مني بس هي الحقيقة ... يعني حمزة مثلا قادر يروح يجيبك
الاء: مافي امل يعني
ميساء : انا لو محلك بعيش الدور ... مازال كلن رضيانين
الاء : عم قلك رح موت غيرة
ميساء : بكرا بتتعودي .. واصلا هشام مستحيل يتركك ترجعي اذا ما اخد منك يلي بدو اياه
الاء : ماهو قالها
ميساء : شايفة كيف ...
الاء : شو عاجبو فيني
ميساء : حاج تستقلي بحالك ... والله انك بتجنني وبتنحبي وروحك مافي احلى منها .. ونصيحة لاتضلي تقارني حالك فيهن ... البسي واتظبطي متلن وعمر محدا يورت واكيد عندك شي هنن ماعندن اياه لهيك اختارك هشام
الاء : مابعرف .. مابعرف ... يعني هي نهايتي
ميساء : طيب مازال جابرك تضلي .. فوتي بجوهن استكشفيهن .... اعتبري حالك عم تعملي مغامرة .. نكدي عليهن ...
الاء : والله ضحكتيني
ميساء : اي اضحكي شوفيها هالدنيا .. حاجتنا هم وغم ..
سكرت وقامت على شنتتها يلي منكوتة بغرفة الملابس .. كل جهازها جديد بس مو بفخامة تياب نور وحلا .. اختارت فستان اسود لامع واخدت علبة الميكب وراحت لقدام المراية ...
بعد شوي كانت واقفة بحلتها الجديدة قدام المراية عم تتأمل حالها برضا ... وشعرها خلتو على راحتو مع تسريحة خفيفة .. وميكب بس حطت خط ايلاينر ومسكارا مع حمرة هادية قعدت على الكرسي وغمضت عيونها عم تسترجع المشهد يلي شافتو .. بس انو هية مكان نور ... قبل العرس كانت تخطر كتير افكار عبالها لما تكون هية وهشام لحالن ... بس لما فتحت عيونها واتذكرت نور حست بديق
ونزلت دمعة من عيونها
الاء : ليش عملت فيني هيك الله يسامحك ... كنت ناوية حبك بكل شي فيني ... بس جيت ولقيت معي شركاء ... مابقدر على هيك والله مابقدر
قامت وراحت على التخت تمددت وحضنت المخدة وشردت والافكار عم تدور براسها .. ماعارفة ترسى على بر
وغفت على وضعيتها
~~~~~~~~~~•
بالغرفة المجاورة .. تجلس هشام من جنب نور وعم يفرك رقبتو بوجع .. صار يفتح الدروج وكأنو عم يدور على شي
هشام ؛ نور .. نور
تجلست وقالت : اي حبيبي
هشام : مرهم الاعصاب وينو
نور : مابعرف .. بس مانو هون .. اي صح كان بغرفتك
هشام : ماشي انت ارجعي نامي
نور : روح جيبو ودهنلك واعملك مساج
هشام : لا بدبر حالك
قام ولبس روب فوق بجامتو وطلع .. راح على غرفتو يلي فيها الاء وحاول يفتحها بس كانت مقفولة
ضحك وراح شوي ورجع معو مفتاح فتح ودخل على الغرفة ... شافها كيف لابسة فستان ونايمة فيه ابتسم وقرب لعندها
وهية حست على حركة وعرفت انو هو ومثلت النوم بس كانت من عم ترجف وتقاوم ماتنكشف انها فايقة
ومنحرجة بنفس الوقت من لبسها كيف غفت هيك ... لف ضهرو وراح على الحمام وطلع من الصيدلية مرهم هية مفتحة عيونها شوي ولمحت انو اخد شي ..
قرب لعندها مرة تانية وشاف حركتها المرتجفة وعرف انها فايقة .. سحب الغطا وغطاها وقرب باسها على راسها وطلع ولما سمعت طبشت الباب فتحت عيونها واتجلست بسرعة مالقت حدا تنفست براحة
~~~~~~~~~~~~•
طلع الصبح وهية واقفة على الشباك عم تراقب شروق الشمس ولابسة بجامة محتشمة نوعا ما .. والظاهر مانامت ... نفخت وبرمت لتطلع والفستان يلي كانت لابستو مرمي على الارض دعست عليه وطلعت من الغرفة ونزلت كان الجو هادي كتيير نزلت على الطابق السفلي .. وصارت تتفتل فيه .. في مكتب وغرفة استقبال .. مطبخ كبير .. وغرفة مونة .. وغرفة سفرة وغرف كتير مابتعرف لشو وجنب المطبخ في غرفتين والظاهر انهن للخدم .. وبلكون كبير من الجنب التاني
دخلت على المطبخ وصارت تدور على دلة تعمل فيها قهوة
~~~~~~~~~~~•
قاعدة بالصالة عم تشرب قهوتها وعم تقلب بموبايلها سمعت حركة وراها ... وشافت الدادا منزلة بنت صغيرة لابسة تياب مدرسة
الدادا صباح الخير مدام
الاء : صباح النور
البنت : صباح الخير خالة
الاء : اهلين ياحلوة ..
قربت حنين من الاء ووقفت قدامها ومدتلها ايدها
حنين : انا حنين
الاء ؛ تشرفت فيكي .. وانا الاء
حنين ؛ اي عرفت اسمك .. رح تضلي معنا هون على طول
الاء : لا حبيبتي زيارة
هشام : لا حبيبتي حنونة رح تضل على طول
الاء: حلم ابليس
ركضت حنين لعند هشام وهو نزل لعندها ضمها وباسها
هشام : شطورة على مدرستك ... هلق بتتأخري
نزلها وراحت مع الدادا
وراح قعد جنب الاء
هشام ؛ صباح الخير
الاء : اهلين
هشام : قهوة ... والله بوقتها
الاء : رح جبلك فنجان
هشام : لا ارتاحي هنن بجيبو
الاء :ماكان في حدا يمكن لساتهن نايمين
هشام : مين عمل القهوة
الاء : انا
هشام : اذا هيك لازم اشرب
الاء : لو بعرف هيك كنت حطيتلها سم
هشام : من ايدك مابأثر
الاء : هه
قامت وراحت ع المطبخ وغابت شوي وجابت معها فنجان قهوة
هشام ؛ كترتيهن
الاء : مابتقلب .. بتشرب من هون وبتطب من هون
هشام : اخدو من ايدها وقال : بسم الله
شرب اول شفة وقال : عفكرة السم بالقهوة طيب
الاء : هه
رجع بضهرو على الكنبة وصار بتمطمط بتعب
ومد ايدو على رقبتو وصار يفركها بوجع
هشام : بتعرفي تعملي مساج للوتاب
الاء : شبك
هشام ؛ كل مرة بشد علي
الاء : معودو ع المساج
هشام : ما بيهدا الا بهي الطريقة ... بدهنو بمرهم ... بليل فتت لعندك ع الغرفة اخدت المرهم ماحسيتي علي
الاء بتوتر : اااه ... فتت لعندي لا ماحسيت
هشام : وانا قلت هيك .. هلق شو بتعرفي
الاء : بتعلم
هشام : لا اذا بدك تتعلمي خليكي
الاء : لا بدي جرب
قامت لوراه وبلشت تفركلو بين كتافو ورقبتو
وكانت تشد بالفرك
هشام : خلصص .. دبحتيني .. اتركي
الاء : شو اتركي انا ما صدقت تصير بين ايدي
هشام : يعني بدك تاخدي بتارك مني
الاء : هيك شي
هشام : اااخ دبحتيني ... اتركي
اجا بدو يقوم بس هية رجعتو عمكانو وقالتلو ماخلصت اقعود انا صدقت تصير بين ايدي القى اذا بتلقى
هشام : لك تركييننيي
الاء :حااج تحوص ...
هشام : لك بسس.. بسس ... معد بدي .. تركيني
هية ماردت وتابعت تفركلو بكل قهر وعم يتلوى تحت اديها وكل مابدو يقوم ترجعو لمكانو
هشام : بكفييي .. ارحميني
ضحكت وبعدت عنو
هشام : شو هالايدين هدول شو كماشة
الاء : بتستاهل
برم رقبتو يمكن وشمال وصارت طقطق
الاء : ماصرت احسن
صار يتلفت يمين وشمال ويحرك رقبتو وكأنو الوجع اختفى
هشام : لك شو عملتي
الاء : ههههه
قامت لتتركو وهو حكي : اليوم جاي عفش الجناح تبعك وبتنتقلي عليه
الاء : مانك ناوي ترجعني لعندي اهلي
هشام : هىء .. بالمناسبة حكاني اخوكي
رجعت وقالت : ايي
هشام : قال بدو اياكي
الاء : وشو قلتلو
هشام : يجي ياخدك
الاء : انت مافي بقلبك رحمة
هشام : انا ولا انت ... يلي عم تشغلي بال اهلك عليكي وهنن مو طالع بايدن شي .. خلص اقعدي وكني .. يعني حلو هالموقف يلي حطيتي اخوكي فيه مو طالع بايدو شي كرمال اختو
الاء : لئييم
قربت وحملت فنجان القهوة ورشقتو بوجهو
هشام : ااااخ .. يا مجنونةةة .. لك حرقتيني
الاء : اطمن ما بتلحق تحترق من برودة دمك
تركتو وطلعت وهو ضل عم ينفض تيابو
~~~~~~~~~~~~•
الشام
فتحت الباب اسماء وكان حمزة
حمزة : صباح الخير
اسماء : صباح النور.. حماتك بتحبك عم نجهز الفطور
حمزة : يعني امي بالمطبخ
اسماء: اي
حمزة : وبابا
اسماء : بغرفتو
حمزة : تمام
اسماء : في شي
حمزة : اي
مشي على المطبخ واسماء لحقتوا
•••••••••••
قاعدين على طاولة الاكل يلي بالمطبخ
ام حمزة : شوفي حمزة شو القصة
حمزة : الاء
امو : شبها
حمزة حكالها كل القصة واسماء كانت عم تسمع من ورا الباب
امو : انت عم تحكي جد ولا عم تمزح
حمزة : لا والله مو مزح ..
امو : ليش ماخبرتني الي ... حكيتها قالت مبسوطة وماعم ارضى حكيها قلت بتكون بشهر العسل
حمزة : حكيتو ورد علي بكل استفزاز اذا بدك اياها تعا خدها
دخلت اسماء وسكتو
اسماء : ليش سكتّو .. كملو انا بعرف كلشي
حمزة : خبرتك
اسماء : انابعرف مين هشام من الاول
وقفت امها بوجها بصدمة وقالت : شووو... بتعرفيه
اسماء : اي ... هشام بكون خالها لملك رفيقتي .. وشافاها بعرس ملك وعجبتو وطلبو مني حكيها .. وانا حكيتها وهية رفضت وهو رجع اتقدملها عأساس عزابي
حمزة :وانت متكتمة على الخبر .. ليش ماحكيتيي
اسماء : مابعرف ... حسيت انو مصلحتها مع هشام .. احسن من هالقرف يلي عايشينو .. واذا نسوانو موافقين مافي مشكلة
امها : انت في شي بعقلك .. في حدا بيرمي اختو هالرمية على ضراير تنتين
اسماء : اي انا رميت اختي على قصر وسيارات وخدم وحشم وبرات هالبلاد..شوبدا احسن من هيك ... وهشام حاببها ومارح يرفضلها طلب .. وحتى هو مساير عندو المرى شي مقدس
امو : انت من شو مصنوعة .. انقلعي من وجهيي لنعرف كيف بدنا نطلع اختك من هالمشلكة
اسماء ، لاتعذبو حالكن لأنو هشام مارح يتركها
امها : اتصل فيه انا بعرف كيف اتصرف معو
حمزة : مامعي ميغا
اسماء : انا معي رح جيب جوالي
~~~~~~~~~~~~•
كان قاعد على مكتبو وعلى عيونو نضارات طبية وعم يدقق بمعاملات ووراق قدامو ..
وعجنب فنجان قهوة .. اخدو ليشرب منو شفة .. صفن فيه وابتسم
ليرن موبايلو بمكالمة فيديو من اسماء
شلح النضارات ووثبت الموبايل قدامو وفتح
ليظهر حمزة وجنبو امو
هشام : اهلا وسهلا بالغوالي
حمزة : لا تشترينا بكم كلمة حلوة ... هالكلمتين مافي غيرن متل ما اخدت الاء بترجعها
هشام : كيفك مرت عمي .. شو اخبارك .. كيفو عمي طمنيني عن صحتو
ام حمزة : اسمع ابني .. مابدنا مشاكل وخلينا صحاب رجع هالبنت ومالك نصيب عنا
هشام : له له هلق هيك صار الحكي
ام حمزة : ماعنا غير هالحكي .. مافينا نترك بنتنا بمكان هية مانها حاببتو ..
هشام : بس هية رح تحبو
ام حمزة : انت ليش ماعم تفهم .. البنت مابتقدر تعيش بهل الوضع .. رجعها ويادار مادخلك شر
هشام ؛ هلق لو انو ماخدة شي واحد منتوف وشحاد كنتوا قلتوا يا بنتي اصبري .. لو شي واحد سكرجي امرجي كمان بتقولو اصبري الله بيهديه وانتو بتعرفوا تماما انو يلي فيه عادة مستحيل يغيرها لك حتى لو عم يخونها بالحرام كنتو قلتو اصبري ... وانا شو عامل شي حرام .. لأنو متزوج بالحلال ورح امنلها حياة محدا بيحلم فيها مالازم تصبر وتقعد وتكن ... انا الاء من اول مرة شفتها حطيتها براسي وضليت وراها لصارت الي .. مو مشان اقهرها .. مشان اسعدها وحققلا يلي بتحلم فيه .. بس هية غبية ومابتعرف تستغل وضعها .... وانا لهلق مطول بالي عليها وعم سايرها لتتقبل الوضع وبلشت تلين .. مشان هيك انتو يا خليكن على جنب يا اما اقنعوها تحافظ على بيتها .... وهية معي بأمان لاتخافو عليها ... والله لو تطلب عيوني مابيغلو عليها ... وعشان التعدد انا الحمد لله الله مأنعم علي من فضلو واتزوجت اول مرة والتاني ونسواني ماعندن اي مانع ... اذا ضرايرها ماعندن مانع شو مانعها هية ... هلق بعرف هية صعبة لكل مرى .. بس معها معها بتتعود ... مرت عمي احكي مع بنتك وانصحيها لأنو والله مصلحتها معي ... بدك تطلقيها وترجعيها لعندك وهية ماصرلا غير يومين متزوجة ... رح تخلصو من حكي العالم ... شيلك عن حكي العالم ... شو بدا تعمل لما ترجع ... بدا تكمل دراستها اي وبعدين .. عأساس الوظايف مقتلة بعضها ... ولنفترض لقت شغل .. راتبها لشو رح يكفي .... واذا تقدملها حدا رح يقدر يعيشها عيشة بتستاهلها .... واصلا انا والاء كان في بينا انسجام كبير ايام الخطبة وهية بتحبني مشان هيك اتركيها وانا بعرف كيف راضيها
ساكتين وبس عم يتسمعو عليه
هشام : شو مرت عمي
ام حمزة : والله مابعرف .. بس هية بنتي وقطعة من قلبي مافيني ما اسأل عنها
هشام : والله هية معي رح تكون منيحة ... لا تاكلي همها ... وبعدين فيكي تسألي عني ... انا كذبت عليكن بالبداية بس هلق كلو صار مشكوف ... انا اختي بتكون ام عمر امها لملك رفيقة اسماء فيكي تساليها عني وعن اخلاقي وكيف بعامل نسواني .... وانا ان شاء الله رح امنلك كرت زيارة تجي انت وعمي شي يومين تغيرو جو وتشوفي بنتك كيف عايشة
ام حمزة : طيب ماشي .. انا رح امشي معك واحكي الاء ... ورح اعطيك فرصة .. وان كانت عنجد مو مقتنعة انا مارح خليها عندك ولا ثانية
هشام : وانا بأمرك ... بس هلق لسه كلشي جديد واجباري ماتتقبل الوضع بس مع الايام بوعدك ينحل كلشي
ام حمزة : طيب دير بالك عليها
هشام : بعيوني والله ... حمزة انا بعتذر منك لأنو حكيتك بجفاصة شوي
حمزة : ولا يهمك مرقت
هشام: انا صار لازم سكر .. وامانة اذا اعتزتو اي شي انا بالخدمة
حمزة : مابدنا غير السلامة
هشام : الله معكن
سكرو وحكت ام حمزة : اتصلي باختك بدي حكيها
~~~~~~~~~~~~~•
قاعدة على بلكونة غرفتها ليرن تلفونها باسماء
فتحت وظبطت قعدتها لتشوف امها
الاء : مامااا ..
امها : كيفك يا عمري
الاء : مشتاقتلك خيرات الله
امها ؛ كيفك على هالجازة يا بنتي
الاء ؛ منيحة الحمد لله
امها : انا عرفت كلشي .. ليش ماحكيتلي اول ماوصلتي
الاء : ماكان بدي اشغل بالكن علي
امها ؛ طيب شو ناوية
الاء : مستحيل ضل هون
امها : هشام مانو منيح
الاء : لا مانو منيح .. حدا بيكذب علي هيك كذبة وبدو يكون منيح
امها : مد ايدو عليكي
الاء : فشر والله بكسرلو اياها
امها : عم يغصبك علي شي
الاء : عشو بدو يغصبني .. بعدين ماما شو هالاسئلة
اندق الباب
الاء: تفضل
دخلت الخادمة وقالت : مدام جناحك صار جاهز فيكي تنتقلي عليه .. بتحبي اخدلك تيابك رتبلك اياهن هنيك
الاء : اي ماشي
الخادمة : حاضر
راحت الخادمة وحكت امها : مين هي ضرتك
الاء : لاا هي الخادمة
امها : وعندك خادمة
الاء : خدم ... في مربية اطفال وفي طباخة وخادمتين
امها : وبدك تتركي كل هاد وترجعي لهون
الاء : اكيد
امها : اي اقعدي وانضبي.. يلي صايرلك مو صاير لغيرك ... ع وين بدك ترجعي ع القرف والنشح ... ع الشح والقلة ... عوين بدك ترجعي بنتي ... خلص اقبلي بنصيبك .. هشام مبين ابن حلال ورايدك ... عيشي حياتك يابنتي شوبدك بهل الرجعة .. لا تزيدي الهم على ابوكي هو مو متحمل .. شو مفكرة ناطرك هون
الاء : مستقبلي ودراستي
امها : اي اهلين مستقبل واهلين دراسة... كملي دراستك عندك اذا بيمشي الحال ومتأكدة انو هشام مارح يعارض .. وبعدين طلع متزوج شو هالقصة .. متزوج بالحلال والحمد لله مانو عم يعمل شي حرام ولا حتى عم يقرب عليه ..
الاء : هلق انت يا ماما عم تحكي هيك وانا يلي شادة ضهري فيكن
امها : يا امي والله همكن كبير وحمدت رب العالمين انو الله ستر عليكي مع زلمة ابن حلال .. لاتخليني ارجع شيل همك يا امي
الاء بحزن : ولايهمك ماما مارح شيلك همي .. انا بدي سكر .. الله معكن
امها : بنتي لاتزعلي.(طوط .. طوط )
رمت الموبايل على الطاولة قدامها وصارت تبكي
اندق الباب ودخلت نور وهية فورا مسحت دموعها
نور : لك انت قاعدة هون .. قومي شوفي جناحك بجنن
اتطلعت فيها وماردت
شدتها من ايدها وقالت : لك قوميي
راحو على جناحها وكانو العمال مخلصين تركيب العفش والخادمات عم يظبطوه ويرتبو التياب في ... والديكور كان غرفة قعدة كنبايات بالون النبيتي وطاولة ازاز .. وشاشة على نص الحيط وجهاز فيديو والاثريات يلي مزينة .. وغرفة النوم كانت بيضا مع عرق احمر من لون غرفة القعدة مبين عليهن ... والبرادي حتى لون البواب متناسق مع لون الفرش .. كان كلو بجنن
نور : مبروك جناحك الجديد وتعيشي فيه احلى لحظاتك
الاء: شكرا
نور : هيك هالناشف بدنا حلوان
دخلت حلا وقالت : احكو مع هشام خلينا نطلع ونتحلى برا .. والله طقت خلاقي بدي اطلع وفوت
الاء : اطلعي مين ماسكك
حلا : كيف بدي اطلع وهو مامخلي معي مصاري وسيارتي حاجزلي عليها واصلا مابظن يسمحلي اطلع
نور : وماتصالحيه
حلا : اليوم اذا الله .. المهم حكوه
نور : شو الاء تطلعي
الاء : بنطلع
نور : رح خبر هشام
اتصلت فيه وقالتلا حلا افتحي سبيكر
هشام : اهلين حبي
نور : شو عم تعمل
هشام ؛ بهل الشغل
نور : بدنا ننزل ع السوق من بعد اذنك
هشام : انت ومين
نور : انا وحلا والاء
هشام ؛ الاء بدا تنزل معكن
نور : اي رضت
هشام : اي تمام روحو
حلا تأشرلها على عليها
نور : وشو مشان حلا
هشام : شبها
نور : لساتها معاقبة
هشام : اي بس هالمرة رح مرقها ... استعملي بطاقتك نور هالمرة
نور : اوك
سكرت وقالت : يلا روحوا البسوا
حلا : هلق كل مابدي شغلة بدي اترجى خواطرك لتعطيني ادفع
نور : هههه والله هالطلعة تحت اشرافي وعلى كيفي الصرف
حلا : ملا طلعة
نور : شوو بدك ولا نلغي الروحة
حلا : لا لا
نور : اكتر من نص ساعة مابنطر
~~~~~~~~~~~•
شريط سريع بيعرضلنا
البنات بالمول عم يتمشو .. والاء طول وقتها عم تستكشف بعيونها ...
وباحد محلات التياب الاء عم تشوف السعر على التياب
وبعدها بتطلع الموبايل وبتصير تحسب ... وتصير تتفاصل مع البياع ...
ومحلات الاحذية كمان هيك
والجزادين
وبيقعدو بمكان عم يشربو شي بارد
وعمحلات المكياجات ...
وبعدها ع صالون تجميل ... ظبطو اضافيرن .. وعناية للبشرة
واخر الشي ركبو بالسيارة ونور يلي عم تسوق
حلا : بدنا ناكل متت من جوعي
نور :شو رأيكن نروح لعند هشام ونطلع معو نتغدى
الاء : لاء
نور : تضربي شو حوبة خليكي هيك
حلا : اي والله فضحتنا بالمحلات .. قال عم تفاصل انا معد اطلع معها بالمرة
نور ؛ اي صح الاء هالشي مابصير
الاء : يعني هالبعزقة يلي مالها لزوم بتصير
نور : ليكون عم تدفعي شي من جيبتك
الاء: مو من جيبتي بس شي ومنو .. ومعد تلبسو الا من اغلى الماركات
حلا : والله هيك نحنا مابنلبس غير من اغلى الماركات
الاء ؛ اي اصلا معد اطلع معكن
حلا : بكون اريح
نور : شو هلق نروح لعند هشام
حلا : انا اي بروح
نور : لكن الاغلبية موافقين رح نروح
وصلو على الشركة وكان قدامها فسحة كبيرة صفو السيارة ونزلو .. والاء عم تتصفن حواليها وبالشركة يلي هية عبارة عن ٣ طوابق وشكلها مستدير ومكسية بالبلور الاسود
الاء : شركة شو هي
نور : هشام مهندس بترول ... وعندو مصافي تكرير نفط وبعض الاعمال التانية .. بس الاساسية هون .. وهون الشركة الأساسية لتصريف النفط وتصديرها
الاء : كلها الو
نور : لا عندو شريك قطري ... بس هداك بس بالاسم كرمال تسجيلها وتكون نظامية
دخلو على المبنى وركبو الاصنصير وطلعوا على الطابق التالت .. انفتح الباب وطلعو ومشو بالكاريدور والناس صارت تطلع فيهن
الاء : ليكو الناس كيف عم تطلع علينا
حلا : اي بيعرفونا نسوانو لهشام بيك
الاء : ياحبيبي على هالفضيحة ...
كانو لابسين عبايات خليجة والنظارات على عيونهن وكعب عالي وضهر مشدود وماشين بكل شموخ
الاء : بيعرفو انو هشام صار عندو التالتة
حلا : لا تخافي بفكروكي الشغالة
الاء : اي سكري تمك
حلا : ههههه حلو استفزازك يابنت
نور : حلا قصري لسانك وحلي عن البنت .. وبعدين الاء نحنا مابهمنا حكي العالم ولا كيف بفكرو
وصلو للغرفة المطلوبة .. دقو الباب ودخلو كان مكان السكرتيرة فاضي .. كملو على مكتب هشام الاساسي دقو الباب ودخلو
كان هشام قاعد والسكرتيرة واقفة جنبو وعم تسجل الملاحظات .. ولما انفتح الباب رفع راسو وابتسم وقال : روحي هلق بعدين بنكمل
ووقف وقال : شو هالمفاجأة الحلوة ... اهلا وسهلا بأميرات قلبي
لف واجى لعندن
وهو فاتح ايديه
قربت نور سلمت عليه وباستو .. ووراها حلا .. بس الاء ضلت واقفة
هشام : مابدك تسلمي على جوزك
الاء : عأساس جاي من الحج من شوي شفتك بالبيت .. وعلى كتر مو حابة شوفتك لأخدك بالاحضان
هشام: امم
راح وقعد على الكرسي قدام المكتب وقال : ليش جايين
راحت نور قعدت جنبو وقالت : نطلع نتغدا سوى
هشام : والله فكرة لأنو رح موت من جوعي
حلا : لكن يلا
هشام : ثواني انتو اسبقوني لتحت وانا بس لخلص هالكم ورقة
نور : بدك اتطول
هشام : لا .. دقايق
نور : نروح بسيارة وحدة
هشام : اي
مشو ليطلعو وهو حكى : الاء خليكي شوي
الاء : مابدي
لفت لتطلع وهو قام بسرعة مسكها من ايدها وقال : انتو اسبقونا جايين
الاء: اتركني احسن ما اصرخ ولم عليك الشركة كلها طلعو وسكرو الباب وراهن
الاء : عم قلك اتركني
هشام : انت ايمت بدك تعقلي ... انا اول ماشفتك قلت بنت عاقلة ...
الاء : مابدي اعقل .. الك عندي شي
هشام : الي عندك انو تحترميني .. تاني مرة اذا بتقللي من احترامي قدام اي مخلوق وخصوصا قدام ضرايرك ماتلومي الا حالك
الاء : مابيطلع بأيدك شي
هشام : هيك لكن
الاء : هيك ونص وهلق اتركني خلينا نطلع
هشام : مو قبل ماقلك شو بيطلع معي ...
وثبتها على الحيط وباسها .......
واخيرا دفشتو عنها وهية عم تصرخ بعد عنييي
هشام ؛ شفتي شو بيطلع معي ... انا ناوي خليكي على راحتك بس انت عم تجبرني اعمل شغلات بموت واعملها
عم تمسح تمها بقرف
الاء : مقررف ..
هشام : بس انت طيبة
نزلت دمعة من عيونها بس هو فورا قرب منها بلهفة وحنية وقال : لا لا .. خلص ... والله ماعد ازعجك لاتبكي
وحط ايدو على خدها ومسحلها دموعها بابهامو بحنية
هية متفاجئة من تصرفو ..رفعت عيونها عليه وشردت فيه
هشام : لا تبكي تاني مرة ماشي .. وشو مابدك انا جاهز
الاء : بدي ..
ماخلها تكمل وقال : الا هي ... بدي اياكي يا بنت بدي تضلي جنبي
الاء : مابيكمل الطقم الا فيني
هشام : لاء هههه
وهية هون ابتسمت
هشام : ما انحرم من هالمبسم الحلو
دغري مسحت الابتسامة على وجها ونزلت راسها
هشام : رح قوم جيب جاكيتي ونطلع
~~~~~~~~~~~~•
راكبين بالسيارة
هشام عم يسوق ونور جنبو ... وحلا والاء ورا .. الاء شاردة بالطريق وحاسة كل جسمها عم ينتفض ... البوسة حكيو حنيتو ... رفعت عيونها عليه ... كان عم يسوق بثبات ... واتذكرتو لما كان مع نور .. ولما كان معها هلق
من حكيو حسسني انو انا أحلى وحدة بالكون .. وبنفس الوقت عم حسو كذاب
بس لو حتى كذب حركلي مشاعري بطريقة فظيعة ... يمكن نحنا بنحب يلي بيضحك علينا وبيكذب علينا
هشام : بتحبو تسمعو شي يا حلوين
الاء : كذبك حلو
نور : شو ذكرك بهالغنية
الاء : مابعرف خطرت على بالي
هشام : تكرم عيونك الاء خانم
نور : انا بحطها
وصلتها من الموبايل وشغلتها
~~~~~~~~~~~~•
قاعدين بمطعم فخم وعم يتغدوا
هشام : كيف كانت روحة السوق
حلا : تنذكر وما تنعاد اول مرة واخر مرة بطلع مع الاء
نور : وانا نفس حكيها .. مو طبيعية الاء فضحتنا قال عم تفاصل اصحاب المحلات ولسه كل شوية تفتح على الآلة الحاسبة وتصير تحسب ع السوري
الاء : انا اصلا معد بدي هالنزلة معكن ... صرفوا شي مو بالعقل لكن فستان ب٥٠٠ دولار والله حرام وين عايشين نحنا ... هاد المبلغ بعيش الناس بسوريا شهرين
هشام : طيب ليش مزعوجة ليش ما اشتريت معهن
الاء : لا مابحب التبزير
نور : عفكرة مو تبزير متل مو مفكرة .. هي تياب عليها قيمتها وهي قيمتها واذا بدنا الغالي لسه في اغلى
الاء : هلق معد تعجبكن صناعة سوريا حلب
حلا : دخيلك شو دقة قديمة
الاء : بعدين من قلة التياب يلي عندكن
هشام : يشترو يلي بيخطر عبالن انا لمين عم اشتغل مو مشانكن وما نقص عليكن شي .. وانت كمان الاء اشتري يلي بتشتيه ولا تاكلي هم المصاري
الاء : لا شكرا جهازي لساتو جديد
هشام: اي مابأثر ضل جددي لأنو مابحب شوف نفس التياب عليكن على طول
الاء : بالله جد ... منيح خبرتني لانو بتفيدني كتير هالمعلومة
هشام : ههههه عبسس
~~~~~~~~~~•
وصلوا ع الفيلا وهنن داخلين حلا مسكت هشام من ايدو ووقفتو حلا : ابن عمي بدي احكي معك شوي
ونور والاء ضلو مكملين .. بس الاء استوقفها هالمشهد وصار عند فضول تعرف شو القصة
حلا : وبدي نحكي عندي فوق
هشام : ماشي
طلعو والاء ضلت شوي الصالون .. لطلعت نور وبعدها طلعت وناوية تتسمع عليهن .. ولحسن حظها كان باب الجناح مشقوق شوي وصوتن قريب من الباب
التفتت حواليها وبعدها قربت لتمسع بوضوح
حلا : لأيمت بدك تضل زعلان مني
هشام : ماني زعلان ... بس عم اعملك فركة ادن مشان تاني مرة ماتتصرفي من راسك
حلا : طيب خليك عندي اليوم والله مجهزتلك سهرة بتجنن
هشام : مع انو ماكنت رح اعفي عنك بهل السهولة .. بس عروضك مابتتفوت
حلا : لكن تعا معي
وصوتهن صار بعيد
كملت على جناحها ومبين عليها مخنوقة
كملت على غرفة النوم ورمت الجزدان على التخت بقهر وصارت تشلح وتشلف تيابها ومبين من حركتها شقد مدايقة
قعدت وبلشت تاكل بأضافيرها
وبعدها وعت على حالها وقالت : انا ليش مقهورة ..لا فشر انقهر عليه او غار ... غاار ؟ معقول انا غيرانة .... لا لا الاء لاتبلشي جنان .. هو مابيعنيلي ورح تتركي هالمكان بأسرع وقت وساعتها يضرب منو الهن .. مو انا يلي بنحط تحت الامر الواقع
اندق الباب تلبكت يكون هشام ... اخدت نفس وظبطت شعراتها وقالت : تفضل
الخادمة : هدول يلي كانو بالسيارة الك مدام؟
الاء ما انتبهت قالت : اي خليهن عندك
حطتن الخادمة وراحت
وتنهدت مايكون هشام وقامت وبلشت تلم غراضها من على التخت ومشت لعند الكياس وقالت : صح انا ما اشتريت شي ... كيف قلتلا خليهن هون ... اااخ من هالقعل ... لمين هدول ... لحلا ولا لنور .. هلق بقلا للخادمة تجي تاخدن لسه ناقصني بس غراضن عندي مشت خطوتين ولمحت شي عم يلمع بكيس من الاكياس ... قربت منو وفتحتو .. وكان كلو لانجرين وكلها الوان فاقعة ومبين عنهن تقال ومغريين بنفس الوقت
الاء : كيف مابدو يحبن وهنن عم يلبسولو المحمر والمشمر ... وعجبو الموال قال بجدد بس والله ماحزرت اذا مابقرفك عيشتك وخليك تندم مابكون اسمي الاء
~~~~~~~~~~•
تاني يوم الصبح
لبست الاء بجامة عادية جداً بكمام ولفت شعرها على شكل كعكة ولبست شحاطة ونزلت .. هية متقصدة تبين عدم اهتمامها بحالها .. ونزلت كانت نور وحلا بكامل اناقتهن ومكياجهن وشعرهن ولابسين عبايات بيتية خليجة .. وطالعين كتير حلوين وانيقات وكعب عالي ... عكسها تماما
الاء : صباح الخير
نور وحلا : صباح النور
اتطلعو فيها وبشكلها .. نور ماعلقت بس حلا حكت : شو هالمنظر
الاء ؛ والله انا عاجبني يلي ماعاجبو لايتطلع
نور : خلص تسطفل.... كمليلي جابو نتيجتن هدول يلي كنتي موصية عليهن
حلا : جابو ونص ... ولسه يلي جبتن مبارح كمان حلوين
الاء : عن شو عم تحكو
حلا : شغلات مابتفهمي فيها
الاء : اي بالناقص منك ومن شغلاتك
نور : عم تحكي عن اللانجري
الاء : اي صح الخادمة بليل فوتت كياس عغرفتي بالغلط .. يلي الها غرض تروح تجيبو
حلا : اذا عجبك شي عحسابك مابيرخص عليكي شي
الاء : لا شكرا
سمعو صوت هشام نازل من على الدرج .. والاء حست حالها توترت وحست قلبها علت دقاتو ..بمكن لأنو رح يشوفها بهاد الشكل ...
ونور وحلا قامو وراحو لعندو
حلا : يسعد صباحك يا تاج راسي
نور : صباح الخير ابن عمي
هشام ؛ وصباحكن يارب
مشي لمحل ماكانو قاعدين وحط ايدو على راس الاء وقال: صباحو
الاء : صباح النور
قعد مقبالها ونور قعدت ع يمينو وحلا عشمالو
هشام : عجبك جناحك الجديد .. ارتحتي فيه
الاء : ولا رح ارتاح ..انا مابرتاح غير بحضن امي
هشام : جربي حضني مابندمي
حلا : مابتندمي عن تجربة
الاء : هه ليش ضل محل
هشام ؛ كل شخص والو مكانو
الاء : اي متنازلة عن مكاني لغيري
معد رد عليها وصار يتمعنها وضحك ضحكة خفيفة ورجع ضهرو لورا وقال : شو صار بالفطور
نور : خمس دقايق
هشام : تمام لأنو جوعان ومستعجل
الاء بهمس : طبيعي بدك تجوع بازل مجهود كبير الليلة
قامو عسفرة الفطور .. بس اليوم كانو الولاد على الفطور معهم ولما الاء شافتهن نازلين ابتسمتلهن بحب ... وبأخر الطاولة قعدت الدادا وقعدت جنبها ابن نور محمد بنت حلا سالي وصارت تعطميهن .. اما حنين ماكانت موجودة كانت بالمدرسة
والاء ضلت عم تراقبهن الولاد كتير حلوين
هشام لاحظ عليها وقال : اول مرة بتشوفي الاولاد يعني
الاء : شفتهن اول يوم جيت .. بس ماكنت منتبهتلن ماشاء الله عنن بجننو
هشام : الولد محمد ابن نور .. وسالي .. بنقلها سوسو بنت حلا
الاء : قدرت ميزهن ولاد مين الله يحميهن
نور : تسلمي عقبال مانشوف ولادك
الاء : ههههه
هشام ؛ ليش الضحك
الاء : لاء ولا شي
اكلو بهدوء .. ولما قام هشام قال : لاتنطروني على الغدا
حلا : حبيبي مشان الكريدت كارت
هشام : اليوم بتتفعل
حلا : يعني فيني اطلع
هشام : ع وين
حلا : مع رفيقتي
هشام : اوك .. سلام
قامت حلا وراه لعند الباب ودعتو
الاء : بهمس: يا الله ما ازنخكن
نور : قلتي شي
ركزت قعدتها والتفتت على نور وقالت : ليش وقفتو الخلفة انتو
نور : الولاد مسؤولية كبيرة وبدك ترتبطي فيهن والحمل متعب .. والولادة وفترة الولادة والرضاعة ... وسهر الليالي
الاء : بس مو شايفة انكن مرتبطين بشي
نور : صح موجودة الدادا بس مايلغي وجود الام ... وخضوصا بالمراحل الأولى ... وبصراحة رح تتعطلي عن كتير شغلات
اجت حلا وقعدت جنبن وقالت : عن شو عم تحكو
نور : عم تسأل ليش معد جبنا ولاد
حلا : هشام روح قلبو الولاد واذا البيت بينملى ولاد مابقول لأ .. بس نحنا معد بدنا او عمهل هالفترة لسا ولادنا صغار ... ماهو ليش جابك مشان تبظيلو ولاد
الاء : عفكرة انت كتير سخيفة .
تركت الاكل وقامت مقهورة من كلام حلا ونور صارت تنده عليها بس ماردت
نور ؛ شو هالحكي انت مابتبطلي عادتك
حلا : لكن ليش بدو يتزوجها .. اكيد مو لجمالها ولحبو الها والو غاية منها واكيد مشان الولاد ...
نور : من غرورك ماعم تشوفيها حلوة ... بالعكس انا يوم عن يوم عم حبها وشوفها حلوة من جوا عالقليلة ماعندها خباثتك ... وحتى البنت حلوة وناعمة وجذابة ...
حلا : اول مرة بشوف وحدة عم تمدح وتتغزل بضرتها
نور : موضوع الضراير قطعتو من زمان .. بس العترة على يلي رح ياكلو الدود
حلا ؛ انااا بدي غار من هي
نور : انا هاد يلي شايفتو
حلا : تضربي منك الها
تركت السفرة وراحت اخدت بنتها وطلعت على غرفتها
ونور قامت لعند ابنها كمان حملتو باستو وطلعت فيه لعند الاء
دقت الباب ودخلت .. شافتها واقفة على الشباك
نور : جينا نزورك انا وحمودة
التفتت عليهن وابتسمت لحمودة قربت وصارت تلمسلو على راسو
نور : تحمليه
الاء : عنجد
نور : اكيد
اخدتو منها بحذر وقعدت فيه وصار تبوسو على ايديه الناعمين بس هو صار يبكي وبدو يروح لعند امو
وعطتو لنور يلي قعدت جنبها
الاء : شقد عمرو
نور : رح يصير سنة
الاء : مابيزحف
نور : لكن رح يمشي .. بس اذا بينزل بيخرب الدنيا
الاء : ياعمري .. وحنين شقد عمرها
نور ؛ هي السنة صف اول
الاء ؛ الله يحميلكن اياهن وتشوفيهن باعلى المراتب
نور : تسلميلي ... وانت كمان شدي همتك وجيبلن اخ او اخت
الاء: بشرفك حاج
نور: لك الاء خلص عيشي يومك ... ع وين بدك ترجعي
الاء : انا هي الحياة يلي انتو عايشينها مستحيل اتحملها ... وضرة بتحب ضرتها ماعم تنبلع معي
نور : والله حاببتك متل اختي وربي يشهد علي ... وحلا لاتشيلي همها صح هية حكيها دج بس حبابة ... واصلا هية غيرانة منك
الاء : غيرانة مني ؟؟ عشو
نور : اي منك ... شو عشو ... انت بنت حلوة وبتجنني ... انت بنت جذابة ... في ناس حلوين كتير بس ما عندن جاذبية.. وناس عندها جاذبية وهنن بكونو عاديين .. ولاتنسي انت صغيرة وهشام مهتم فيكي
الاء : مهتم فيني؟ كيف يعني
نور : تمسكو فيكي ... وبضل يوصينا انتبهو ع الاء واتقربو من الاء .. وشو بدها الاء
الاء : هه لأنو جديدة وماحصل على غايتو مني
نور : وصدقيني اذا حصل عليها رح يحبك اكتر وخصوصا اذا جبتيلو ولاد لانو باين عليكي كتير بتحبيهن وماعندك مانع منهن ... هو بصراحة انا كتير بتعب بفترة المحل وبولد قيصرية .. وكمان وقتي كان يروح كلو على الولاد مشان هيك قلت عمهلي ... اما حلا غيرة مني مو اكتر .. شو بدي اعمل بدا تعمل .. هلق انا قرر احبل هية رح تحبل ... بس خايفة يفوتها شي
الاء : ههههه
نور ؛ حتى ضحكتك حلوة
الاء : تسلمي ع المجاملة
نور : والله مو مجاملة ، يلا انا بالاذن .. بدي اخد حمودة عغرفتي العب انا واياه شوي مو هيك يافصعون
حملتو وطلعت .. والاء قامت ووقفت عند المراية تتأمل حالها
هية قصيرة شوي .. اقصر منهن ... سمرا ملامحها ناعمة ... فلتت شعرها ونزل متل السلاسل .. حست حالها اقرب للطفلة جنبهن
~~~~~~~~~~~•
ع الضهر ...ماشية الاء بالكاريدور وسمعت صوت من غرفة حنين
: شبك يا ماما ليش زعلانة ... احكيلي
قربت ودقت الباب ودخلت وشافت نور قاعدة جنب حنين يلي بتياب المدرسة قاعدة ومتكتفة وزعلانة وماعم تحكي
الاء : شو القصة
نور : مابعرف .. اجت من المدرسة وهية على هالحالة
الاء : حنين حبيبتي مين مزعلك
رفعت بكتافها وماردت
نور : رح احكي مع هشام ... هو بيعرف يتصرف معها
قامت نور والاء عم تراقبها بعيونها وقفت عجنب واتصلت عهشام
نور : اي حبيبي ... فاضي تجي شوي ... لا مافي شي ... بس حنين اجت من المدرسة زعلانة ومدري شبها وماعم ترضى تحكي ... اوك
راحت نور لجنب حنين وقالت : البابا جاي منيح هيك
الاء نوعا ما مستغربة ... رح يترك شغلو كرمال بنتو زعلانة ... والواضح انو هالشي دلال
مرق شوية وقت وحلا انضمت الهن .. وبعدها دخل هشام وضل مكمل لعند حنين ونزل لعندها : بابا حبيبتي شبك ...مين مزعلك ياعمري ... لأحرق الارض من تحتو
نزلت راسها وماردت
هشام : نحكي لحالنا
هزت براسها
هشام : اتركونا لحالنا
طلعو كلن لبرا وهشام سكر الباب عليهن وبعد شوي طلع صوت هشام خلص ياعمري محلولة ... اليوم رح تنفصل كرمال عيونك
فتحت الباب نور ودخلت والاء وحلا دخلو وراها
نور : شو حكت
هشام : هي المس جارحتها بالحكي
نور : عنجد شو قايلتلا
هشام : عطيني رقم المدرسة فورا .. انا مو حاطط بنتي لتجيني زعلانة ومكسور خاطرها والله بكسر المدرسة فوق راسهن
نور : طيب شو القصة
هشام : احكيلها للماما بابا
حنين : المس قالتلي انو انا بلا تهذيب
الاء : وبعدين ؟
هشام : بدك اكتر من هيك
الاء : عم تحكو جد
هشام : الاء روحي على غرفتك
الاء : ههههههه لا انتو عنجد مو طبيعيين ... احكو مع المس بالاول وشوفو ليش قالتلا هيك وبعدين حاسبوها ... واصلا واذا قالتلا هيك عادي ... انا لما كنت اجي ماكلة قتلة من الانسة بالمدرسة امي تقلي بتستاهلي وتنبه الانسة انو اذا شاغبت تضربني بدون ما تسأل ... ومو منيح الدلع والغنج لهل الدرجة ... وممكن تكون حنين غلطانة ... لاتوقفوا معها على غلطها وتتعلم هالعادات السيئة
هشام بهدوء : نور احكي مع المس
نور : اوك
اتصلت نور مع المس وطلعت لبرا والاء مكتفة ايديها عم تراقب هشام بصمت وهشام عم يتطلع عليها
اجت نور وحكت : حنين ماما انت متمسخرة على رفيقتك وقلتيلا انو شعرتها مو حلوين
حنين نزلت راسها
الاء : شايفين وضحت الصورة
هشام ؛ ليش يا بابا .. هالتصرف عيب ... وبعدين هاد اسمو تنمر ... ماعم يعلموكن بالمدرسة انو ما نتنمر على حدا
هزت براسها
هشام : طيب بكرا شو رح نعمل
حنين : رح اعتذر من المس .. ورح اعتذر من رفيقتي
هشام : شطورة ... وانا كمان رح احكي مع المس انو ماتقسى معك تاني مرة بالحكي منيح هيك
ابتسمت وضمت ابوها
والاء هون انسحبت وطلعت وكانت شاردة .. اعجبها هشام بموقفو وفورة دمو على بنتو مع انو موضوع سخيف وانو ترك شغلو كرمال يجي ويعرف سبب زعلها .. وبعدين تفهم الوضع وحلو بعقلانية
دخلت على جناحها وسكرت الباب وقالت : ونعم الاب والله
وفجأة حست الباب انفتح التفتت وراها ولقتو
الاء : خير
هشام : شو خير ..
الاء : شوبدك ليش جاي لهون
هشام : جاي ارتاح عند مرتي
الاء ؛ عندك تنتين غيري
هشام : بس اليوم دورك
الاء : بالله شووو ... وعامللنا دور والله انك صاحب عدل
هشام : مشان تعرفي
الاء : طيب انا مسامحتك بدوري
هشام : اي مو على كيفك
سكر باب الجناح وقرب منها وهية اجت بدا تهرب مسكها ورجعها لقدامو
هشام : لأيمت بدك تضلي تهربي
الاء : لحتى تمل مني
هشام : مو لنجرب بالاول
الاء : قليل ادب .. اتركني
هشام : اسمعي مني خلينا نظبطها ومابتكوني غير رضيانة
الاء : ماحزرت
هشام : لأيمت يعني .. انا ماعد عندي صبر .. بدي دوق العسل
الاء : عسلي مر
هشام : معلشي خليني دوقو
ضحكت ضحكة صغيرة وسرعان ما اخفتها
هشام : يسلملي هالمبسم
خجلت ونزل راسها
صار يقرب منها ورفعلها راسها بأيدها ... واجت عيونو بعيونها وهية نوعا ما مستسلمة ... انفاسهن قريبة من بعض ... حست على دقات قلبها رح تطلع منها .. ليش ثابتة قدامو مستسلمة مابتعرف
هشام بهمس : موافقة ؟؟
هزت راسها بنفي وبعدت اديه عنها وقالت : لااا
ورجعت خطوتين لورا .. كانت هادية
هشام : ليش .. خلص هاد واقعك فكري بس بالشي يلي بيرضيكي ... واستسلامك الي يعني انك بتحبني
الاء : انت جرحتني وكذبت علي .. ماعم اقدر اتخطى هالشي ... اصلا مارح اتخطى شيء محتم ... ضراير يا هشام ... ليش جبتني و بدك تجبرني عيش بهاد الواقع
هشام : انا اسف .. بس لما شفتك حست فيكي شي مني ... انت الي ... حسيتك قطعة مني مفقودة ولقيتها
الاء : انا انسانة غيورة ... مابتحمل تكون الليلة معي وبكرا مع غيري
هشام : طيب انت فكري بس لما بكون معك
الاء ؛ مابقدر
هشام : خلينا نجرب
الاء : لأ ... هلق لأ ... يا اما بتعود .. يا اما انت بتمل ماعنا غير هالاحتمالين
هشام : وحياتك مارح مل
الاء: بنشوف
هشام : انا جوعان رح اطلب الغدا لهون نتغدى
الاء ؛ ليش هون مازال في غرفة سفرة .. غير تعجقولي الجناح
هشام : انا وانت لحالنا يا غبية
الاء : مافي داعي لهل الشغلات مابتلزمك
~~~~~~~~~~~•
بعد شوي كان الاكل مفروش على طاولة
وهشام قاعد قدامو والاء واقفة عند الباب ومكتفة اديها
هشام : يلا حبيبتي تعي ناكل الدنيا صارت المسا وانا بلا اكل من الصبح
الاء : مو جوعانة
هشام : تعي وحاج دلال
الاء : ماعم اتدلل وخلص اكلك وفرقني بريحة طيبة
هشام : لكن ياعمي صار عندها جناح خاص فيها وصارت تتمقطع فينا وتقلعنا منو
الاء : ما الي شي
قام لعندها وقال ليش انت نكدية استمتعي بوقتك
الاء : مابدي استمتع بشي وحل عني
نزل وحملها وهية صرخت وقالت شوو عم تعمل نزلني
مشي فيها لعند الاكل وقعد فيها وظبطلها قعدتها على رجليه
الاء : اتركني
حكم قبضتو عليها اكتر وقال : لا تحوصي كتير خلينا ناكل هاللقمتين عرواق
الاء بمسايرة : طيب اتركني رح اكل
هشام : لا رح تضلي قاعدة بحضني وبدي طعمكي بأيدي ... والله لستي ما صارت
الاء ؛ ليش ماعم تفهم مابدي منك شي
هشام : بس انا بدي منك كلشي اخد لقمة بأيدو وقال يلا فتحي تمك
بعدت راسها برفض
هشام ؛ لا تعاندي هلق بيسمعوا صوتنا وبفكرونا عم نتخانق
الاء : يفكرو اخر همي
هشام : طيب بس هالقمة وبخليكي تقومي
فتحت تمها واكلت من ايدو وقالت يلا اتركني
هشام : ملعقة سلطة مشان ماتغصي
الاء : عم قلك اتركنني
هشام : بس هاللقمة وبعدها وعد بتركك
اكلت من ايدو لقمة تانية
الاء : وهي اكلتها اتركني
هشام : شو رأيك ندوق المربى
الاء : انت وعدتني ... خليك عند كلمتك
هشام : وعدتك بعد اللقمة بس ماحددت ايو لقمة
الاء : يااربي منك
هشام : الاء شايفة انو انا اقوى منك ومقعدك غصب عنك يعني مارح يعجزني شي عنك وانا عم سايرك بمزاجي مشان هيك خليكي مطيعة ولا تطلعي جناني عليكي
ماردت وضمها اكتر لعندو .. واخد قطعة توست وغمسها بالمربى وقال يلي افتحي تمك يا حلوة .. واول ما ايدو صارت قريبة منها قربت منها وعضتها ليصرخ بوجع وهية تهرب منو
هشام : عم تعضي وانا عم دللك وطعميكي بأيدي .. انا بفرجيكي
راحت تركض وهية عم تضحك عليه وهو قام يركض وراها .. كانت بدا تسكر عحالها غرفة النوم بس هو حط رجلو ومنعها ودفش الباب وركضت لجوا وهو ركض وراها.. وهية عم تضحك بشماتة وهو عم يتابعها وهو مبتسم .. وكل مايقرب منها هية تهرب بسرعة وماتخليه يمسكها
الاء : مارح تقدرلي بكرشك هاد يا ابو كرش
هشام : هلق هاد بتسميه كرش
الاء : روح شوف حالك بالمراية
طبعا الحديث مع المطاردة
هشام : اي هاد كرش الوجاهة غير كرش البدانة
حاول يلقطها وهية هربت
الاء : صار بدك تعملي اياه وجاهة
هشام : اذا مدايقك بخفف
الاء : لا لابقلك
وركضت لعند باب غرفة النوم بس كان مسكر لأنو هشام سكرو وقت دخل وحطت ايدها على القبضة بس هشام ضغط عليه مشان مايفتح وصار وراها تماما وقال : وهلق وقعتي بين ايدي... عم تعضي لكن يا عضاضة
الاء : والله يلي بدو يعاشر القط بدو يلقى خراميشو
هشام : دخيل خراميشو وعضاتو انا
فتلها لعندو وصارت مواجهتو ... وهية خجلانة ترفع نظرها .. حطت اديها على صدرو لتبعدو عنها
هشام : عشو مستعجلة .. هلق ببعد عنك
الاء : اي ابعد شو ناطر
هشام : عطيني بوسة ببعد
الاء : ماحزرت
هشام : والله بتكسبي فيني حسنة
الاء : ايو حسنة بدا تجي منك
هشام : انك عم اتطيعي زوجك مافيها اجر وثواب ...
الاء : اي مابدي اياهن
هشام : عفكرة لأنك عم تمنعيني عنك الملائكة عم تلعنك ليل انهار
الاء : بالله شوو
هشام : والله ... بس انا مسامحك
الاء : لاء عنجد فضلت على راسي
هشام : الفضل لالله بعدي اسمو هو يلي زرعلي هالقلب الرقيق
الاء : والكبير يلي بساع كل نسوان الارض
هشام : مو لهل الدرجة انت التانية بينعدو على الاصابع
الاء : ظالمتك ماهيك
هشام : اي والله كتير ... المهم هلق عطيني بوسة ... مبارح ماراحت عن بالي طعمتها
الاء : يا امي شو انك محنك وكذاب
هشام ؛ في وحدة عاقلة بتقول لزوجها يا كذاب ... وين المحاضرات يلي كنت تعطيني اياه عن طاعة المرى لزوجها
الاء : نفس المحاضرات يلي كنت تعطيني اياها عن حقوق المرى
هشام : وحقوقك محفوظة يلي بدك اياه بصير
الاء : ماقلتلك انا مابقبل بالتعدد
هشام : انت عليكي ياللي بعدك ... وبوعدك انو ما اتزوج عليكي
الاء : مانك حاطتلي تنتين قدامي
هشام ؛ المهم حاسبينا يلا
الاء : على شو
هشام : حق العضة .. بدي بدالها بوسة
الاء : ماحزرت
هشام : عفكرة ليكي وضعك مافي حدا بيمنعني بس انا بدي اياها برضاكي
انتبهت على حالها هو ماسكلها ايديها التنتين ومثبتن على الباب ... حاولت تفلتن ماقدرت
هشام : لا تحاولي ... بوسة وبتركهن
الاء بقلة حيلة ونوعا ما عم تنجرف لهشام مع انها عم تقاوم حالها بس عم تضعف قدامو
الاء : بوسة وحدة
هشام : خليهن تنتين
الاء ؛ هشااام
ضحك ضحكة وكأنها طالعة من نص قلبو وقال ؛ خلص وحدة موافق ... بس اصحك تغدري وتعضي
الاء : خلصني انا ضجت
غمضت عيونها بأستسلام وهو صفن فيها وعم يتمعن ملامحها ... وعم يقرب منها بهدوء ... قرب من انفاسها اكتر اخد منهن نفس عميق .... وانتبه لتحول انفاسها لسريعة وحارة ... غمض عيونو وراح طابعلها بوسة طويلة ..... ارتخت ايده عن اديها ونزل فيهن على خصرها ... هية كانت مستسلمة شي جديد وحلوة ومع شخص دق قلبها الو وبالحلال وبنفس الوقت بدها تقاوم لأنو مابدها تنجبر على شي .... وهو مبسوط وعم يحكي بقلبو بلشت تلين
لحتى واخيرا بعدو عن بعض وبدفع هشام عنها بخجل كبير وتأنيب ضمير
الاء : وهي اخدت يلي بدك اياه .. اطلع من هون
هشام : ع وين بدي اطلع يا عيوني .. اليوم هون مبيتي
الاء : لكن انا طالعة
هشام : ع وين .. تعي لهون ... انا اسف واضح انو احرجتك ... بس خلينا نتعود على بعض
الاء : مابدي اتعود على حدا
هشام : بس انا بلشت اتعود عليكي
سحبها وضمها لصدرو وقال: ليش كل هاد .. والله ماعم نعمل شي غلط ... خلص وعد مابصير الا يلي بدك اياه انت ...
نزلت دموعها على صدرو
هشام : اسف انو نزلت هالدموع ... بس انانيتي فيكي جبرتني اعمل هيك
الاء : ليش
هشام : مابعرف
الاء : يعني مو حب
هشام : كل مين بشوف الحب من منظورو ... بس انا والله بحبك
الاء : بس مو الحب يلي انا عم احكي عنو
ضل ساكت
زاد بكاها اكتر
الاء عم تحكي بقلبها : اااه شو متمنية هالحضن بدي ابكي واشكي شو صار معي ... بس كيف بدي اشكيلك عليك
سحبها على التخت وخلاها تسترخي بحضنو وهية حست بالدف والامان بحضنو يلي اول مرة بتكون جنبو ... وبالفعل شي جديد وحلو .. لحتى دخلت بنوم عميق ... وهو تمدد جنبها ونامو
~~~~~~~~~•
فايقة الاء وبعدها بحضنو عم تتصفن فيه وبقربها منو اتنهدت برياحة وهو حس وفتح عيونو ولما شافها فايقة ابتسم وقرب منها وباسها من راسها وقال : صباح الخير
الاء : صباح النور
اتجلس وقال : نمنا كتير
الاء : مظبوط .. بس انا فايقة من زمان
هشام : ليش ماصحيتني
الاء : ماخطرلي
شاف الساعة وقال : لنلحق صلاة الصبح
الاء ؛ سبقتك
قام من مكانو ودخل على الحمام وطلع متوضي وفرش السجادة كبر وبلش صلى
والاء عم تراقبو بكل تفصيل وبكل حركة
خلص وقال : نشرب قهوة
الاء : هشام
هشام : عيونو
الاء : موافقة ضل معك
هشام : اي شو هالصباح الحلو
قرب لعندها لأنو مبين بدا تكمل حكي
الاء : بس بشرط ... واذا مانفذتو ساعتها مضطر ترجعني من مكان ماجبتني
هشام : ان شاء الله مارح اعجز عن طلبك
الاء : بس انا طلبي مو مادي
هشام : شو هو
الاء : بدي تحبني