رواية صرخات انثي
الفصل التاسع والعشرون 29
بقلم آيه محمد رفعت
حيبتي العبرية
صعق يوسف وجمال مما يروه، سكينًا حاد يستهدف رقبة عمران المنصدم ومازال منحني تجاه تلك اليد التي تحيط رقبته، بينما أيوب يتمدد جوار ذاك الجسد الملتف بالغطاء السميك يحاول انقاذ عمران بطريقة آمنة لا تعرض رقبته لأي خدش.
المؤكد لهم بتلك اللحظة بأن عمران قد فعل جرمًا ما لينال غضب آدهم المتوحش، ولكن الصدمة لجراءة فعلته جعلتهم يراقبون بعضهم البعض بألسنة منعقدة، ازدادت عقدتها على ذاك الصوت القادم من خلف اجسادهم:
_في أيه؟
اتجهت الأعين لآدهم المستند على باب الغرفة يضم كتفه المصاب بيده وعلى وجهه أثار النوم، فعادت النظرات لمن يتمدد على الفراش والغطاء يحكم جسده.
تحرك عمران عن نزعة جموده وجذب الغطاء عنوة ليكشف هوية ذاك اللعين الذي حتمًا سيُقتل الآن لتجرأه برفع سكينه بوجه "عمران الغرباوي" ، ومع توهج أضواء الغرفة وانكشاف الغطاء انهدرت الصدمات تجوب وجوه الشباب بأكملهم وعلى رأسهم أيوب الذي همس بصوتٍ تزلزل قوته رغم انخفاضه بذاك الصمت:
_آديرا!!
اتجهت بعينيها المحتقنة غضبًا لصاحب الصوت، فعادت تخطف نظرة لمن تقوم بتسديد سلاحها إليه، وحينما وجدت ذاتها تخطئ هدفها عادت تسلط على رقبة أيوب الذي يتراجع مشيرًا لها بذعرٍ مدهش لأعين الشباب:
_لا تلمسيني يا امرأة... لا أريد أن ينتزع وضوئي!
لم يتمكن الوقح تلك المرة من حجب وقاحته الجديدة على هذا الصديق المستجد فصاح ساخرًا:
_وحياة أمك هو ده كل اللي همك!!! إنت بتهزر يالا... البت دي دخلت هنا ازاي وجاتلها الجرأة منين إنها ترفع عليا أنا سلاح!
ردد جمال باستهزاءٍ وهو يتابعها بدهشة:
_متسئش الظن يا عم الوقح شكلك مش المقصود... الضلمة خلتها متعرفش تحدد هدفها.
صفق يوسف بحدة لتتجمع اليه الأعين:
_حلو الكلام ده.. بس السؤال المهم دلوقتي دخلت هنا ازاي؟
رفع أيوب كتفيه بقلة حيلة:
_معرفش والله يا يوسف.
وعاد يصيح لمن تقترب بتحذير:
_يا ويلي لا تقتربي!
خرجت عن صمتها تصيح غير عابئة بأنها محاصرة بأربعة رجال أقوياء البنية قد يقتلوها أرضًا إن تعرضت لخامسهم:
_ألم يكن بيننا عهدًا بإنني إن أردت فعلها بأي وقت أتي إليك.
ورددت بتلقائية:
_أنا جاهزة فلنفعلها الآن.
جحظت أعين الشباب بصدمة من جرئتها وبالطبع لم يصل مفهوم معاهدة القتل المتفقة بينهما، فكان عمران أول من صاح ساخرًا:
_أيه يا ابن الشيخ مهران اتفاق أيه ده يا حبيبي وأنا اللي فكرتك محترم ومتدين طلعت بتتثبت بمطوة!! وبيقولوا عليا وقح!
شددت من ضغطها على رقبته وهو غير عابئ بما تفعله تلك الفتاة، كل ما يعنيه ما تسلل لمفهومهم، فقال يبرر:
_لا متفهمش غلط يا عمران.. انا اتفقت معاها إنها لو عايزة تقتلني وتأخد طار أخوها في أي وقت تجيني دماغك مترحش بعيد الله يكرمك.
استغل آدهم انشغال الجميع وبحذرٍ وخفة فجأة يوسف وجمال انتزع المدة من يدها، ولف ذراعها بمهارة للخلف بقوة ألمتها وجعلت عينيها تبرقان بذعرٍ، خاصة مع تسلل صوته الرجولي القابض لها:
_حركة خاطئة وسيطيح سكينك رقبتك يا فتاة!
ابتعد أيوب للخلف عنها بحرصٍ الا تلامسه، بينما يمنحه آدهم نظرة ساخرة:
_إنت بتجري منها قدامنا أمال من ورانا طبيعة علاقتها بيك أيه يا بشمهندس، شكلها معلمة عليك!!
هز رأسه ينفي ذلك ويشير بيده لآدهم:
_آنت فاهم غلط يا آدهم.. من فضلك سبها وإبعد السكينة عنها دي أمانة في رقبتي!
جلس جمال على الفراش يراقبه بسخطٍ وهو يضع ساقًا فوق الاخرى:
_أمانة أيه يا أيوب إنت مش في وعيك ولا شارب حاجة البت داخلة تثبتك بمطوة ولا هممها حد!
وتابع وهو يستدير ليوسف المنصدم من توابع الموقف:
_دخلت هنا ازاي أصلًا!
هز كتفه بدهشة'
_معرفش صدقني أنا قافل الباب كويس.
تنهد عمران بنزقٍ وهو يراقبها بنفورٍ:
_أنا كنت راجع ومعايا شنط البيتزا، دخلتهم المطبخ ورجعت قفلت الباب يمكن دخلت وقتها!
تدفق صوت آدهم المتعصب ومازال يحكم سكينه عليها:.
_هي دي مشكلتكم إنها دخلت ازاي!! والاستاذ اللي مرحب بفكرة قتله ده أيه واكلة معاكم!! ومش لاقي غير يهودية بنت آ*** يموت على إيدها!
اتجهت الأعين إليه مجددًا فقال وهو يزدرد ريقه بتوتر:
_يا رجالة انتوا فاهمين الحكاية غلط، سيف لما يرجع هيفهمكم غرضي من الليلة دي كلها أيه.
واستطرد وهو يحاول أبعاد يد آدهم عنها:
_أرجوك يا سيادة الرائد أبعد السكينة دي عنها، الحمد لله محدش اتصاب ولا حصله حاجة، أنا هأخدها وهنزل حالًا.
تملكه خوفًا غريبًا تجاهه، فتركها لتسقط أرضًا واندفع نحوه يجذب رقبته بضربات خفيفة:
_ولما تاخدها وتنزل اتحل الموضوع يعني! ده هتهاجمك في أي وقت لإن طبعهم ال** الخيانة والضرب في الضهر.
تعجب أيوب من طريقته وخاصة حينما شدد من ضغط يده على كتفه:
_مش هتنزل من هنا مع حد، هي تغور لوحدها وتقطع علاقتك بيها وبطل بقى دور المحارب اللي نازل بلد الكفر يجاهد للإيمان لانك لوحدك مش قد ولاد ال** دول يا أيوب.
أسبل عمران جفنيه بذهولٍ، لأول مرة منذ أن اجتمع بآدهم المتوحش يراه ينفعل بتلك الطريقة، حتى في مخاضع المعركة واستنزاف راكان كل ما يمتلك من فنون الاجرام ليجرده من رزانته وبروده الا أنه كان صامدًا يملكُ من الجمود والبرود ما جعل الجميع يهابه يومها، والآن يخرج عن ردائه لأجل شخصًا يعتقد بأنه يراه الإن لمرته الاولى!
اندفع يوسف بينهما متدخلًا:
_خلاص يا عمر أيوب مش هيخالف كلامك..
واتجه بنظراته إليه، يغمز له بضيقٍ كأنه ينجده من أبيه:
_اسمع الكلام يا أيوب مش عايزين سيادة الرائد يتنرفز وهو مصاب، خرجها من هنا ومشيها.
خطف نظرة سريعة إليها فوجدها تتابع حديثهم بعدم فهم ولكنها تتحاشى أقدامهم وتنجرف بزواية الغرفة بخوفٍ من تخمين مجرى حديثهم الذي بالطبع سيكون بشأن اقتحامها الشقة، وليتها علمت بأنهم بهذا العدد، تخيلته مازال يجلس مع ذلك الشاب الذي سبق لها رؤيته بالمقهى، فتجرأت وولجت للداخل واختبأت بتلك الغرفة الفارغة، فما أن استمعت لصوت أيوب يقترب للغرفة برفقة رجلًا يرافقه حتى تمددت بالفراش وبيدها السكين باستعداد لقتله في الحال بعد أن تلقنت جرعة محفزة من رسائل عمها.
وها هي الآن تواجه مصيرها المرعب بين يد خمسة رجال، احدهم شرسًا لدرجة جعلتها تفقد سلاحها وقوتها في لمح البصر، ومن قامت باستهدافه بالسكين أولًا يمنحها نظرات قاتلة متقززة من وجودها يين الحين والأخر، أما الاثنان الأخرون يكتفين بمراقبة حديث المتوحش مع أيوب الوحيد الذي تتأمل برأفة قلبه أن يقوم بحمايتها من هؤلاء.
رفع أيوب عينيه ليوسف وقال بحرجٍ:
_أنا بعتذرلك يا يوسف على كل اللي حصل ده، بس أنا آسف مش هقدر أسيبها بالوقت ده تنزل لوحدها... دي وصية أخوها ومش هقدر أكسر وعدي ليه.
اندفع تجاهه عمران وبكل غضب امتلكه سدد به لكمة على وجهه ليسقطه أرضًا ويندفع تجاهه صارخًا بعنفوان:
_هتضيع نفسك ومستقبلك عشان الحقيرة اليهودية دي، فوق لنفسك يالا.
فشل جمال ويوسف بابعاده عنه، وحينما نجحوا برفع جسده رفع عمران جسد أيوب خلفه لينظر بعمق عينيه هاتفًا بقلقٍ:
_مصيبة تكون حبتها!!
انتفض بين ذراعيه بنفور استطاع الشباب بأكملهم الشعور به، وردد بعدم تصديق:
_أحب مين يا عمران إنت عقلك راح فين؟ أقسملك بالله ما طايق أبص في وشها بس هعمل أيه أخوها أمني عليها علشان خايف من عمها... هي لحد اللحظة دي متعرفش إنه هو اللي قتل أخوها.. وبيهددها لو مقتلتنيش هيقتلها هو عشان كده قعدتها عندي في الشقة وجيت هنا.
همس جمال بصدمة مضحكة:
_في شقتك كمان؟!!!!
هز آدهم رأسه بقلة حيلة في اقناع هذا الأيوب، ومن ثم قال بنفاذ صبر:
_قصره طلعها بره وارجع.. ومتقلقش أنا هجبلك قرار عمها ده وهلبسه في حيطة سد.
أومأ له والابتسامة تشق وجهه في بادرة جعلت عمران يهتف بسخط:
_ليك نفس تضحك!
هز رأسه مؤكدًا وقال بصوتٍ محتقن بالدموع المتلألأة رغمًا عنه:
_عشت طول عمري وحيد ومسبقش ليا إني خوفت أو عملت اعتبار لحد غير أبويا، فأول مرة أحس إني مش وحيد وعندي اخوات رجالة خايفين عليا بجد.
تاثروا بحديثه، فابتسم جمال وضمه إليه بقوةٍ:
_والله العظيم أنا من ساعة ما شوفتك هنا مع سيف وأنا بحبك لله في الله... خلقتك سمحة وتتحب غصب عين أي حد.
ضحك يوسف بمرحٍ وهو يفصلهما عن العناق:
_ايدك يا جمال سيف لو شافك هيولع فيك.
تعالت ضحكاتهم الرجولية بمرحٍ، فضمه يوسف وهو يعاتبه بمحبة:
_ما أنا قايلك يا عبيط إنك في مقام دكتور سيفو بس إنت الحمد لله نسخة أعقل منه.. بس لو تطاوعنا وتتخلص من القازورات دي!!
منحه آدهم ابتسامة صغيرة، ومن ثم ربت على كتفه بحنان قبل أن يغادر الغرفة التي لم يحتمل البقاء بها بوجود تلك الفتاة، خرج الشباب وتبقى عمران يحدجه بنظرات صلبة، انتهى باشارته الصارمة:
_هاتها وانزل هدور العربية وهستناك.
لحق به قبل أن يخرج من الغرفة:
_مفيش داعي يا عمران أنا هأخد أي تاكسي.
التف إليه محطمًا أسنانه من فرط ضغطه المتعصب عليها، وصاح بتحذير:
_هاتها وانزل بدل ما أمد إيدي عليك تاني، أنا خلاص مبقاش عندي تفاءل لإني على يقين إن المعاتيه هما اللي بيقعوا في طريقي.
وأشار وهو يغادر:
_لخص في ليلتك.
هز رأسه له وما أن غادر الغرفة حتى إلتف لها بنظرة غاضبة لحقت صراخه:
_بحق الله كيف تأتين إلى هنا! أنتِ حمقاء يا امرأة أم فقدتي عقلك المعتوه هذا!
التقطت أنفاسها بحرية فور مغادرة الجميع، ونهضت تقف قبالته تهتف بملل:
_ وأخيرًا انتهى حديثكم الغريب هذا.. حسنًا فإن بقينا بمفردنا فلنفعلها الآن.
مزق شفتيه السفلى باسنانه واحتدت وتيرته:
_اللعنة... توقفي عن نطق تلك الكلمات البذيئة، أنا لا أحتمل سماعها ولا سماع صوتك هذا، هيا سنغادر.
رفضت التزحزح عن محلها وقالت باصرار:
_انتهى الأمر أحضر لي السكين من هذا الشرس لأقتلك هنا ولننتهي من هذا.
توسعت مقلتيه بدهشةٍ وأجابها بنفس طريقتها البسيطة في طرح وجهة نظرها:
_إن خرجت وطالبته بالسكين سيعود ليقطع رقبتك وتلك المرة لن أستطيع انقاذك من بين براثينه.... ما رأيك أذهب لطلب سكينك أم ستتحركين الآن؟
ابتلعت ريقها بتوترٍ وخاصة بعد أن أُتيح لها فرصة تقييم حالة ذلك الرجل الشرس ذو البنية الضخمة، فهمست برعبٍ فشلت باخفائه:
_لنخرج من هنا الآن... من فضلك.
سخر من رعبها وهروبها السريع لخارج الشقة، لحق بها للأسفل، فوجد عمران بانتظاره بالسيارة، دخلت "آديرا" للمقعد الخلفي وصعد "أيوب" جواره يتابع صمته وتجهم معالمه بضيقٍ، وكلما حاول التحدث معه كان يوقفه باشارة قاطعة حتى وصل لمسكن أيوب، فهبطت وهبط من خلفها أيوب يشير لعمران:
_شكرًا يا عمران.. تقدر تمشي إنت.
نزع عنه حزام الأمان بقسوة، وهبط ليكون جواره طارقًا بقوة على سقف السيارة:
_مش هتحرك من هنا خطوة واحدة من غيرك.. سامع!
هز رأسه عدة مرات بارتباك من رؤية حالته الغريبة، واتجه معها لمدخل العمارة، فوقف قبالتها يشدد عليها:
_هيا اصعدي للأعلى ولا تفعليها مجددًا والا لن أنجح بتحريرك.
رفعت عينيها الزرقاء إليه وأبعدت خصلاتها الصفراء خلف أذنيها بارتباكٍ مما تجاهد لقوله، وحينما فشلت قالت:
_لماذا تفعل كل ذلك؟ لماذا تساعدني بالمسكن والطعام والآن فعلتها وانقذتني من صديقك الغاضب، لماذا تفعل كل ذلك؟
وتابعت تزيح عقلاتها الصعبة عنها:
_إن كنت ارهابيًا تقتل من حولك لماذا لم تقتلني حينما هاجمتك بأول مرة؟
صمته يطول وكأنه لم يستمع لها، عينيه مازالت تنخفض أرضًا، يتركها تحرر ما داخلها ويحلل مسافته هو لهدفه، فوجده قريبًا حينما قالت:
_ظننت بأنك تفعل كل ذلك لإنك قد تكون كأي رجلًا يسقط أمام جمالي خادمًا لي ولكنك ولا مرة رفعت عينك بي!!
وبوضوحٍ شديد قالت:
_ماذا تريد من كل ذلك أيوب، أخبرني؟
مسح وجهه بيده والعصبية جعلت أصابعه تعلم على وجنتيه البيضاء، وأخرج إليها أحد الاسرار التي لا تعرفها:
_لإنكِ وصية محمد لي... أخر ما فعله قبل أن يفارق الحياة بأن وضعكِ في ذمتي وأمانتي وأنا أحاول بكل طاقتي ألا أنكس بوعدي له رغم صعوبة ذلك، فأنا بالنهاية مسلمًا وديني يُحرم علي التعامل مع أي امرأة تحل لي.
سددت له نظرة مشككة بحديثه، فانهدرت أنفاسها من شدة انفعال مجرى الهواء، وتساءلت:
_ولماذا يضعني أخي بأمانة قاتله؟
تخلى عن هدوئه وهدر بانفعالٍ وصراخ وصل لعمران الذي يتابع وقفتهما عن كثبٍ:
_لإنني لست قاتل أخيكِ.. أخبرتك كثيرًا بأنني لست هو!
_ومن هو إذًا؟
تساءلت بحدةٍ وعينيها لا تفارقه، لتجده يرفع رأسه وعينيه الجذابة إليها لمرته الاولى وبكل ثقة قال:
_عمك من فعلها.
تغاضت عن رؤية عينيه الذي حق له إخفائها بتطلعه للأرض باستمرارٍ، وتراجعت للخلف ويدها تكبت شهقات يعجز فمها عن تحريرها، بينما رأسها ينفي تهمته:
_لا... هذا ليس صحيحًا... أنت كاذب... عمي لا يفعلها... عمي لا يقتل أخي.. كيف سيقتله وهو من كان مسؤولًا عنا منذ أن توفى أبي وأمي؟
وصرخت بانهيارٍ ويدها تحيط جبهتها:
_إنت كاذب.. بالطبع كاذب.. عمي لا يفعلها.
بقوةٍ واصرار قال:
_بلى فعلها.. أراده أن يكفر بالدين الاسلامي بعدما أصبح مسلمًا وحينما رفض عذبه مرارًا ليجعله يرتد عن دينه حتى لاقى مصرعه.
هزت رأسها مجددًا بشراسة وعنف:
_أنت كاذب... إرهابي لعين..
ابتسم ساخرًا وهو يراقب حالتها:
_وإن كنت ارهابيًا لماذا لم أقتلك بأول مرة قمتي بمهاجمتي بها؟ ولماذا لم أترك صديقي يفعلها الآن؟ ولماذا أبقيكِ بمنزلي آمنة؟!
وضع يديه بجيب سرواله واستدار يتابع عمران المستند على مقدمة السيارة بانتظاره، ومن ثم عاد يقف محله قائلًا:
_أتعلمين آديرا بداخلك فتاة رقيقة ولكن ينقصها العقل...إن كنتِ لا تستطيعين جرح أصبع صغير لرجلٍ تظنيه قاتل أخيكِ، كيف يظن عمك بأنكِ ستنجحين باتمام مهمتك الا وإن كان يعلم بأنكِ ستخسرين بتلك الحرب وحينها سيتخلص منكِ مثلما يريد وحتى إن نجحتي بهدفك وقتلتيني هل سيتركك القانون هنا؟
استندت على الحائط من خلفها لتعزز قوتها، بينما تابع أيوب:
_ألم يكن بمقدوره قتلي بنفسه أو على الأقل ارسال أحدًا من رجاله ليقتلني!
وأجاب ذاته باستهزاءٍ:
_هدفه الوحيد أن يتخلص منكِ يا عديمة العقل!
ضمت يديها لآذنيها وصرخت بعصبية:
_اصمت.. لا أريد سماع شيئًا من أكاذيبك... سحقًا لك أيوب.
وتركته وصعدت الدرج تهرول عن مواجهته التي بدت أكثر منطقية لها، تابعها حتى صعدت وعاد لمن ينتظره، جلس جواره فتحرك به عمران للمقهى المقابل لمبنى سكن يوسف، وأمره بحدة:
_انزل.
توجس من طريقته ولكنه انصاع إليه، فهبط يتبعه للطاولة الخارجية للمقهى.
وضع عمران مفاتيح سيارته وأغراضه على الطاولة بصمت طال بالأخر الذي يترقب سماع ما سيقول، بينما يتجاهله ويطلب كوبين من القهوة، وطال بهدوئه حتى أتى النادل بطلبه فارتشفه ببرود تام دفع أيوب ليتساءل:
_عمران أنت لسه زعلان مني؟
رفع حاجبه باستنكارٍ:
_هو إنت كنت متوقع رينج معين لعملتك السودة دي غير زعلي!!
تنهد بتعبٍ وقال:
_أنا اتورطت في كل ده بدون ارادة مني والله.
ورمى الكرة إليه حينما تابع:
_طيب لو انت مكاني هتعمل أيه؟ هتتخلى عنها وهي وصية صاحبك؟
أجابه بخشونة تتبع عرف رجولته المتشدد:
_مش هتخلى عنها بس الأكيد مش هقدملها نفسي وأقولها اقتليني براحتك!
جذب كوب قهوته يرتشف منه ليبتعد عن اجابة قد تشعل الأخير، فتابع عمران بنفس العصبية:
_أيوب أخرة اللي بتعمله ده هيحرقك... البنت دي مش هتسيبك في حالك لا هي ولا عمها، إنت لازم تبعد عنها وتغير مكانك خالص لحد ما تخلص السنة الاخيرة اللي لسالك وترجع مصر على طول.
حرك رأسه هامسًا بخفوت:
_أوعدك إني هبعد عن المشاكل.. وكلها كام شهر وهنزل مصر نهائي معدليش رجوع هنا.
امتعضت معالمه بشدة، فقال بمرح:
_قول إنك جبان وبتهرب من أولها.. بس أنا واثق إنك هترجع محدش صاحب عمران الغرباوي وقدر على بعده.
ضحك أيوب بشدةٍ، وطرق كف بكفه فغمز له وهو يسحب يده سريعًا:
_مراتك جت.
زوى حاجبيه بذهولٍ، واستدار، خلفه تجاه ما يتأمله، فوجد سيف يهرول إليهما بعدما رأهما من الشرفة، وما أن وصل إليهما حتى احتوى أيوب بين أحضانه مرددًا بقلقٍ:
_اترعبت لما يوسف حكالي اللي حصل، قولتلك يا أيوب البت دي مش هتسيبك في حالك.
ربت على ظهره بحنانٍ وأخبره ببسمة ممتنة لحبه الصادق:
_أنا كويس يا سيف متقلقش.
ابتعد عنه وهو يبادله الابتسامة، ثم جذب المقعد المجاور لعمران الذي يرتشف قهوته ويتابعه بطرف عينيه، وحينما وجده يتأمله قال بنزقٍ:
_صاحبك عندك أهو يا عم محدش جيه جنبه، هو اللي لازق فيا ومرضاش يطلع.
ابتسم سيف وقد أتقن مقصده، فقال بامتنانٍ:
_شكرًا إنك مسبتهوش يا عمران... وجودك معاه طمني إنه هيكون بخير.
رمش بعدم استيعاب وأشارب لايوب:
_مين ده؟ هو القهوة اللي بيقدموها هنا فيها كحول ولا أيه؟
تعالت ضحكاتهما الرجولية فشاركهما عمران، استند سيف بذراعيه على الطاولة الصغيرة الفاصلة بينهم وقال:
_لا ده أنا متقلقش ولو كنت جيت الصبح الجامعة عندي كنت هتشوف أد أيه دروسك جابت نتيجة معايا حتى اسال زينب.
ضيق رماديته بتشوشٍ، فحاول تذكر ذاك الإسم وتساءل بعدم فهم:
_زينب مين؟
وتابع بعد ارشاد عقله:
_آه... تقصد أخت مرات أخويا؟
أكد له:
_أيوه أخت مرات دكتور علي.
تابعه أيوب باهتمامٍ فاستدار يخبره بمشاكسة:
_هي نفسها البنت اللي وقعتلها الأيس كريم وروقتك.
طرق الطاولة بحماس:
_كنت حاسس لإن وقفتك معاها يومها مكنتش طبيعية.
راقبهما عمران بشك مما يدور بنيتهم، فأسرع سيف بتفادي غضبه قائلًا:
_حيلك يا أيوب دماغك راحت فين يالا، اللي حصل مالوش علاقة بالارتباط ولا غيره، أنا بس ساعدتها كان في شاب بيضيقها وأنا ربيته.
تحفز بجلسته وهو يسأله:
_بيضايقها ازاي؟
رد عليه بإيجازٍ:
_بيضايقها يا عمران وأنا اتدخلت واتحلت.
منحه نظرة محتقنة لاختصاره الاحداث، فزفر بضيق:
_أعتقد انها دخلت الفصل وشافت اتنين في وضع مخل فاتعرض ليها.
أسبل بدهشةٍ، وهتف:
_في الفصل!! الكلام ده ممنوع جوه الجامعات إزاي مأخدتهاش وقدمت شكوى باللي حصل، ازاي تعمل كده يا سيف الولد ده أكيد هيتعرضك إنت وهي تاني، لكن لو كنت لجئت للمدير أو حد من الادارة كان أقل حاجة أخد فصل، الكلام ده ممنوع وفي تشديد بكده.
أجابه باستهزاء:
_مين اللي هياخد فصل يا عمران؟ معتقدش إنه هيتأذى في حاجة الأذى كله ممكن يطولها لإن ده يومها الأول بالجامعة وعملت المشاكل دي، عمومًا متقلقش أنا فهمتها على شوية قواعد لو مشت عليها هتتجنب المشاكل.
تحاشى عنه جموده وابتسم ابتسامة واسعة جعلت سيف مرتبكًا مما يجوب بخاطره، فأتاه يكشف له نيته:
_غريبة يعني يا سيف انك تخرج عن هدوئك وطبيعتك علشان واحدة أول مرة تشوفها!
ابتلع ريقه بارتباكٍ:
_مهو أنا مكنتش هقف أتفرج عليها ومساعدهاش.. دي حتى لو مش متدينة كنت هساعدها بردو، صح يا أيوب؟
قالها وهو يلكز ذاك الذي يتابعه بخبث، فكبت ضحكاته وراح يوافقه بالحديث باشارة رأسه، فتجرع عمران أخر ما تبقى بقهوته قائلًا باستهزاء:
_لو يوسف عرف انك ضربت حد عشان بنت هيجوزهالك النهاردة.
ضحك وهو يؤمي له، مؤكدًا:
_هو نفسه يجوزني بأي شكل مش مستني حتى اما اتخرج... ده فرحان إنه بكره افتتاح عيادة دكتورة ليلى علشان يبدأ يشطب الشقة اللي اشترهالي فوق شقته بحيث يجوزني فيها أول ما العمال يخلصوا!!
نهض وهو يجذب مفاتيحه ومتعلقاته غامزًا بمكرٍ:
_هساعده المرادي بنفسي لإني حاسس أن الحوار جاي على هواك!
وأشار لأيوب قبل أن يغادر:
_شكل في ضرة داخلة عليك قريب يابن الشيخ مهران!
وتركهما يضحكان بشدة وغادر على الفور، بينما طعنه أيوب بنظرة محتقنة تليها قوله المازح:
_أهون عليك تجبلي ضرة يا سيفو... بس وماله ده يوم الهنى على الأقل تتجهالها شوية وتفكك مني.
لكزه بغضب رغم انطلاق ضحكاتهما، ليوقفه أيوب متسائلًا بجدية:
_لا لخص واحكيلي حوارك معاها على أيه؟!
ضم شفتيه معًا وسرح بتفكيره عنها ومن ثم أجابه بحيرة:
_مش عارف والله يا أيوب، بس أنا حابب أتعرف عليها عن قرب أوي، وإنت عارف إن حاجة زي دي مينفعش تحصل من غير رابط راسمي، فلو عملنا خطوبة اتعرف عليها كويس هيكون أفضل.
رد عليه باستنكارٍ لما يظنه متاح:
_وتفتكر دكتور يوسف هيقبل بده! مش هيرضى غير بكتب كتاب وأنا معاه في الحتة دي، فألحق قرر قبل ما يعرف وتلاقيه داخل عليك بالمأذون!
*******
ادعت نومها بينما تراقبه وهو ينتهي من غلق الحاسوب بعدما اختار أغلب التصميمات المؤكدة للمركز، ونهض يتجه لمكان نومه حيث سيتوسط الأريكة اليوم تاركًا لها الفراش.
وضعت فاطمة الوسادة من أسفل رأسها وأخذت تراقبه بارتباكٍ، تجاهد رغبتها بالبقاء جواره، وحينما ظن أنها غافلة نهضت هي تناديه:
_علي.
فتح عينيه واستدار لها بابتسامة واسعة:
_إنتِ صاحية؟
هزت رأسها بخفةٍ، وحاربت بشدة احتقان وجهها لنطق:
_ممكن تخليك جنبي، عايزة أتعود على وجودك.
رمش بعدم استيعاب لدرجة جعلته يظن بأنه أخطأ ما استمع له للتو، فاستقام بجلسته وتساءل بتوترٍ:
_أنام جنبك تقصدي؟
هزت رأسها تؤكد له، وكأنما حصل الآن على أذنٍ صريحٍ منها، فاستقام بوقفته واتجه ليتمدد جوارها وعينيه لا تفارق عينيها، كلاهما يتمددان باتجاه بعضهما البعض باستكانة عجيبة، أعينهما لا تفارق الأخرى.
تردد علي كثيرًا بفعلته ولكنه جازف حينما فرق ذراعيه وجذبها إليه لتغفو داخل أضلعه، فابتسم براحة حينما رأها تتمسك به وتستريح برأسها فوق صدره ملامسة موضع قلبه.
مال علي على رأسها يطبع قبلات متفرقة على جبينها بابتسامة جذابة وصوتًا محشرج يصل لأذنيها:
_مش مصدق إنك نايمة في حضني أخيرًا... كنت حاسس إن اللحظة دي مستحيل هتيجي في يوم من الأيام يا فطيمة.
شعر بارتباك حركتها، حتى أنفاسها التي تلفح رقبته كانت مضطربة بشكلٍ جعله ينهض بها، فأبعدها عنه تقابل وجهه.
أبعد علي شعرها خلف أذنيها مبددًا اختفاء معالمها الرقيقة، وهمس بعاطفته:
_حبيبتي بصيلي.
رفعت عينيها إليه وهي تجاهد لاخفاء ربكتها، فوجدته يقييم حالتها بنظرة متفحصة، وفجأة انفصل عنها متراجعًا لأخر نقطة بالفراش:
_أنا آسف إني أخدت خطوة إنتي مش جاهزة ليها، لو حابة ممكن أرجع مكاني!
ما فعله لم يكن جرمًا كل ما أراده أن تغفو بين ذراعيه ولكنها على ما بدى له ارتبكت والبداية ستوشك على اختبار أشد حدة منها، هزت فاطمة رأسها نافية عودته للأريكة، فتمدد بعيدًا عنها قائلًا:
_نامي وارتاحي، أنا كل اللي يهمني انك تكوني مطمنه.
تمددت محلها والتوتر يزيد من حدته، كيف تخبره بأنها لم تخاف قربه بل ازدادت نبضاتها لقربه بشكلٍ تختبره لأول مرة، الثواني التي قضتها بين ذراعيه منحتها شعورًا لم يسبق لها خوضه من قبل، بالرغم من أنها لم تكن ضمته الأولى.
خطفت فاطمة نظرة إليه فوجدته يضع ذراعه على عينيه وعلى ما يبدو من انتظام أنفاسه بأنه قد غفى سريعًا.
تسللت إليه حتى أصبحت ملتصقة به ووضعت رأسها على صدره مجددًا، تختبر ذاك الشعور مجددًا، تقسم أنها بتلك اللحظة لن يزورها أي كابوس مجددًا.
ارتسمت ابتسامة على شفتيه، وأخفض ذراعيه معًا يحاوطها بحبٍ وتملكٍ، وعادت همساته تختلج آذنها:
_أوعدك إنك عمرك ما هتندمي على الثقة اللي ادتهاني في يوم من الأيام يا فطيمة... أنا ميهمنيش غير إني أكون موجود جنبك.
تشبثت يدها بقميصه وضمت نفسها لكتفه، فأحاطها بشوقٍ ولهفة تجوب لمساته، واستدار بجسده يحاوطها داخله هامسًا بنعومة رقيقة:
_تصبحي على خير يا أغلى من روحي!
******
النغمات الهادئة تنطلق من المذياع الصغير، ومن أمامه تتحرك بخفة بين ذراعيه وعينيها لا تفارق رماديته، يضم بيديه خصرها ويتحرك ببطءٍ معها، ابتسمت برقةٍ وهمست له:
_كان نفسي أرقص معاك ولا مرة اتجرأت وطلبت منك كده.
اندهش أحمد من كلماتها العفوية وسألها باستفسار:
_ليه؟
ضحكت وأجابته وهي تميل لكتفه:
_لإني كنت بحس دايمًا إنك خايف تقرب مني لتضعف، كنت بتخاف تكون آثم ومخطئ، وبتحاول تحافظ عليا وتصوني لنفسك.
وأطلت بزرقة عينيها إليه تسأله بكل جدية:
_لو كنت تعرف إني هكون لغيرك كنت هتفضل محافظ عليا كده يا أحمد؟
تعمق بنظرته العاشقة إليها، ومد يده الممسكة بيدها إليه يطبع قبلة عميقة تلامس أصابعها هامسًا بصوتٍ رخيم:
_أنا وقعت في عشقك من وإنتِ طفلة بضفرتين، وعمري ما سمحت لمشاعري تنجرف لطريق يأذيكِ يا فريدة، حاربت نزواتي كلها ومسمعتش غير لقلبي اللي بيرتاح لما يشوف ابتسامتك الجميلة، والأكتر من كده نظرة الثقة اللي كانت جوه عيونك ليا، الثقة اللي خالتني أول شخص تلجئ له وانتي مش خايفة اني أستغل ضعفك ووجودك معايا.
وتابع وهو يقربها إليه لتكون قبالته للغاية:
_فريدة أنا استكفيت بيكِ عن ستات الدنيا كلها، حتى الحاجة الوحيدة اللي كانت ممكن تخضعني للجواز كرهتها، كرهت إني يكونلي ابن من ست غيرك ولو مكنتيش وافقتي على جوازنا كنت هكمل كده لأخر حياتي.
تدفق الدمع من عينيها، فاندست باحضانه هامسة ببكاء:
_حقك عليا يا حبيبي، أنا كنت قاسية وظلمتك يا ريتك صارحتيني بكل ده من زمان، يا ريتك فوقتني ومسبتنيش أعيش كل ده وأنا مخدوعة، سامحني أرجوك.
أحاطها مجددًا وأخبرها باستنكارٍ:
_هو أنا كنت زعلت منك عشان أسامحك، أنا اللي اتظلمت وظلمتك معايا يا فريدة.. بس خلاص اللي فات انتهى واترمى بره حياتنا.. اللي جاي هو اللي ملكنا.. هو اللي أنا قادر بيه أعوضك عن كل العذاب والبعد.
وحملها بين ذراعيه وإتجه بها لفراشه وهو يهمس بشغفٍ:
_بعشقك يا فريدة.. وعشقي ليكِ مستحيل ينتهي الا بموتي!
*******
صعد لجناحه بارهاقٍ يجتابه، فوضع متعلقاته جانبًا واستكمل خطاه للداخل، فتفاجئ بها تجلس أمام السراحة واضعة من أمامها الكثير من عُلب مستحقات التجميل.
رفع عمران ساعته إليه وتفاجئ بتأخر الوقت للغاية، وعاد بنظراته لها متسائلًا بحيرةٍ:
_بتعملي أيه في الوقت ده يا مايا؟
تفاجئت بعودته المبكرة عن المعتاد، فارتبكت للغاية وأخبرته:
_مفيش كنت زهقانه شوية فقولت أسلي نفسي وأعمل ميكب كامل وبعد كده همسحه وأنام.
كبت ضحكة فالته منه واقتراب يجلس على جزء من السراحة قبالتها، ورفع يديه معًا يشدد على وجنتها مرددًا بدلال:
_حبيب قلبه يا ناس زهقان وملان وجوزه موجود طيب تيجي ازاي دي!!
نزع عنه جاكيته واسقطه جانبًا، ثم انحنى ليختار أحد الفراشات التجميلية من أمامه، خطفت مايا نظرة سريعة إليه وتساءلت بذهول:
_بتعمل أيه يا عمران؟
قال وهو يحاول جاهدًا العثور على غايته:
_هنتسلى سوى يا بيبي، مينفعش مشاركيش في شيء بيساليكي، حتى لو عملنا من وشك خريطة أو وش بلياتشو.
وصاح بحماس:
_لقيتها.
لعقت شفتيها بتوتر وهو يقرب منها ما يحمله، فصاحت به:
_عمران إنت أساسًا بتعرف تحط ميكيب؟
تجاهل سؤالها وبدأ بفرد طبقة من الكريم المرطب على وجهها، قائلًا ورماديته لا تحيل عن فرك يده للكريم:
_مش يمكن لو جربت أطلع بعرف! أكيد يعني حاجة سهلة مش كميا هي.
وتابع وهو يعود بنظره للأغراض من أمامه:
_بصي توكلي على الله ثم علي وسبيلي نفسك.. أنا هروشنك وإن لقدر الله البوهية باظت فأنتِ كده كده كان عندك نية تمسحيها يعني مفيش أي خساير في الموضوع... ممكن تسكتي بقى وتسبيني أركز.. عايز أخد فرصتي لو سمحتي!
ضحكت بصوتها كله وهي تراه ينصدم من كمية الادوات من أمامه، ويتمعن بالألوان باهتمامٍ بالغ، فيعود لخطف نظرة سريعة لها ويعود ليتحقق من الألوان بيده، راق لها قربه واهتمامه بتفاهتها، فراقبته بصمت وهي تعلم أن فور انتهائه ستكون شبيهة بلوحة الألوان الفجة ولكن ما عليها سوى الاستمتاع بوقتهما معًا.
سمعته يهمس بحيرة وهو يبدي كل اهتمامه لعمله وكأنه سيقوم بانشاء احد مشاريعه:
_اللون ده حلو بس حاسس إني لو دمجت عليه لون تاني هيدي لون تالت مميز... طيب هجرب ده.
وجدته يدمجهما على يده قبل أن يتجه لعينيها، بدأ بوضع ما اختاره بعناية وتركيزه بأكمله منصوب على ما يفعله، فقالت بسخرية:
_ها يا بشمهندس ألوان النقاشة عجبتك ولا أستلف لونين من شمس.
انحنى بعينيه لعينيها التي تتابع ما يفعل، فاقترب بمنديل ورقي وأزاح الزائد عن باطن عينيها قائلًا:
_هششش، سبيني أركز قولت... كل ما تديني شوية هدوء كل ما خرجتلك شغل نضيف اسمعي مني بس.
انطلقت صوت ضحكاتها بقوة وهو يشاركها الابتسامة، فانتهى من رسم عينيها وكأنه يرسم لوحة فنية تذيبه داخلها، حتى جذي فرشاة أخرى يضع بها حمرة طفيفة على وجنتها، وانتهى باختيار طلاء الشفاة، وضعها بتمهل وبحرص حتى لا ينتزع ما فعله، وألقى ما بيده ليستند على المرآة بظهره وهو يقييمها بنظرة عاشقة تتفننن بحفظ معالمها، فقالت بقلق:
_ها طمني الشكل بشع لأي درجة؟
ابتسم وهو ينهض عن السراحة:
_شوفي بنفسك.
تماسكت وهي تسحب نظراتها للمرآة، فبرقت بعينيها صدمة جعلتها تنهض عن المقعد وتسرع للمرآة حتى كادت بالولوج داخلها.
نزع عنه قميصه وجذب بيجامته وعينيه مازالت تتابعها بابتسامة صغيرة، استدارت إليه بتلعثمٍ:
_ازاي!!!!!
سقط منه الملابس بفزعٍ:
_أيه يا عسلية مالك؟
أشارت بيدها على المرآة:
_أيه ده؟
تطلع للمرآة ثم عاد يتطلع لها باستغرابٍ:
_أيه؟! مايا خشي في المضمون أنا معنديش دماغ تفكر عقد وألغاز الستات دي!
ركضت تجاهه فتراجع للخلف بخوفٍ مصطنع:
_صلى على النبي واللي انكسر يتصلح.
أمسكت يديه وبحماس وفرحة تساءلت:
_عملت الميكب التحفة ده ازاي!!! انطق يا عمران إنت واخد كورس؟
زوى حاجبيه بسخرية من طريقتها وكأنه صعد للسماء وعاد بالقمر للتو، فانخفض يجذب الملابس وانتصب ينزع قميصه ليلقفها بكلماتٍ مغرورة:
_أنا محدش يتوقعني، ثم إني كبشمهندس أد الدنيا مفيش شيء صعب يقف قدامي.
ابتسمت بفرحة أضاءت عينيها:
_مش مصدقة بجد، الميكب سمبل وألوانه رقيقة اوي يا عمران!
راقب فرحتها بابتسامة جذابة، وانحنى يضع قبلة على خدها قائلًا:
_مبسوط إنه عجبك يا حبيب قلبه.
تركته وهرولت للسراحة تجذب أحد الزجاجات وترش بها على وجهها بأكمله، فتابعها وهو يضع رقبته بطوق التيشرت المنزلي:
_بتعملي أيه؟
أجابته ببسمة واسعة:
_بثبته علشان أروح الشركة بيه بكره.
احتل الغضب معالمه وصاح إليها:
_مش هيحصل، إنتِ بطبيعتك أحلى يا مايا.. وبعدين أنا اجتهدت في الالوان والروج عشاني أنا مش عشان تمشي تتمختري قدام الموظفين كلهم، عايزة تفتني حد في جمالك افتنيني أنا معنديش مانع غيري No يا بيبي.
أدلت شفتيها السفلية بحزن، واتجهت للفراش، فقالت بعد تفكير:
_طيب لو روحنا مناسبة مهمة هتحطلي زيه بالظبط؟
اتجه ليجاورها، وقال ساخرًا:
_خايف أوعدك بصراحة، هي طلعت مني كده صدفة الله أعلم هتتكرر معايا تاني ولا أيه! بس أوعدك اني هحاول يا حبيب قلبه!
اقتربت بجلستها منه وواجهت جلسته، وحركت كتفها بدلال:
_جوزي حبيبي هينجح تاني وتالت وعاشر عشان حبيب قلبه ميزعلش.
حدجها بنظرة مشاغبة، وبمكر قال:
_مقدرش على زعل حبيب قلبه أبدًا وهبدأ بالمصالحة من دلوقتي.
لم تفهم مقصده الا حينما هاجمها بدغدغة تستهدف بطنها وأسفل إبطيها، انفجرت بنوبة من الضحك وهي تترجاه أن يكف قائلة:
_بس يا عمران... عمران لأ..
ضحك هو الأخر على صوت ضحكاتها وصاح بدلاله الطفولي:
_حبيب قلب جوزه هيزعل منه ومش هيصالحه ازاي ده بس، أنا هدلعك النهاردة لبكره على الأقل يكون عندك جرعة سعادة تنفجر وقت ما نشوف نعمان الملزق إلهي ما يلحق يوصل على رجليه ويجعل زيارته من المستشفى للطيارة مرة تانية على مصر للقبر عدل مهو مش هيجي هنا يقرفنا بجثته!
لم تكف عن الضحك وهو يستشعر صوت قهقهاتها فضحك برفقتها وضمها إليه، متسائلًا بخبث:
_مش نعيمًا الميكب؟
حركت رأسها بعدم فهم لكلماته فتابع:
_ فين حق تعب الميكب آرتست المحترف اللي ظبطك الظبطة دي!
زحفت للخلف بنظرات تحذيرية إليه حينما وجدته يدنو منها بغمزة تعلم نهايتها كيف ستكون، وقبل أن تعترض وجدت ذاتها تستجيب لنوبة عشقه فلم تستطع مواجهته بالنفي وانساقت خلفه لبوابة الغرام.
******
انساق الليل بغيمته السوداء وسطعت شمس يوم جديد، اجتمع فيه أحمد وفريدة بالأسفل على طاولة الطعام برفقة شمس وزينب وعلي، حتى مايا نهضت وهبطت للأسفل تتساءل بدهشة:
_صباح الخير... فاطيما فين؟
أجابها علي وهو يتابع تناول الجبن بالخبز:
_صباح النور يا مايا... شوية ونازلة.
منحته ابتسامة صغيرة، واتجهت لتحتل مقعدها، انتبهوا جميعًا لصوت عمران الذي يصفر بالأعلى رافعًا من صوته:
_فطار الهنا.. بس مش هيكون فيه سرور من غيري على فكرة.
قالها وهو يهم بهبوط الدرج، فانتبه لخروج فاطمة من غرفتها، استدار لها يبتسم كعادته:
_صباح الخير يا فاطمة.
اكتفت بهزة رأسها وحملت طرف فستانها الطويل واتجهت للهبوط للأسفل وهي تحمل بين يدها كتب زينب التي طالبتها بحملها لها.
هبطت فاطمة الدرج فأعاق لها حمل الكتب رؤية طرف فستانها الطويل، فتعلق كعب حذائها بطرفه فسقطت عنها الكتب وكادت بأن تلحق بهم، لتجد يد عمران تمتد لتمنع سقوطها، جذبها بقوة لدرجة آمنة في لحظة وقوف الجميع بفزع عليها، فوجدته يسألها ومازالت يده محاصرة لمعصمها:
_إنتي كويسة؟
انتفضت تدفعه بكل قوتها للخلف ونظراتها المحتقنة لا تحيد عنه، ارتجاف جسدها وتراجعه للدربزاين جعل الاخير يتابعها بدهشة متسائلًا عما فعله ليجد كل ذاك العداء منها؟!
أسرع علي إليها يجذبها إليه بلهفة:
_حصلك حاجة يا فطيمة؟
هزت رأسها بالنفي وعينيها تختطف النظرات لعمران باحراج لما فعلته، فحملت طرف فستانها وصعدت للأعلى هاربة، بينما انحنت شمس ومايا تجمعان الكتب، فاستغل علي ابتعادهما عن مكان عمران واتجه إليه يربت على كتفه بهمسٍ منخفض:
_متزعلش يا عمران منها، فاطيما لسه متخطتش الحالة النفسية اللي بتمر بيها.
هز رأسه بتفهمٍ، وعقد زر بذلته قائلًا:
_عارف يا علي ومش متضايق، المهم إنها موقعتش واتجرحت.
منحه ابتسامة يجاهد باخفاء حزنه بها، فدنى الاخير منه يتفرسه بنظراته فقرأ ما يحاول اخفائه:
_مالك يا علي؟
احتل الألم نبرة صوته لتجردها من ثباته الزائف:
_بقالي فترة بخلص ورق فاطيما انا ومراد علشان تكمل تعليمها وتدخل الجامعة من جديد بس اللي شوفته بعيني دلوقتي يخليني متسرعش في الخطوة دي، فاطيما مش جاهزة لسه تواجه العالم اللي برة حساباتها، مبقتش قادرة تتعامل مع حد.
أصاب الحزن قلبه، فهو يعلم ماذا تعني لأخيه وكيف احتمل لأجلها، الا يكفيه بأنه لا يحاول أن يكون زوجًا طبيعيًا معها، ربما امتلك هو الخبرة وسابق التجربة مع ألكس وكان يومًا ما ملقبًا بزير النساء ومع ذلك ضعفت مقاومته أمام من أحبها وودها بكل ما فيه، وبتلك اللحظة يشهد بأن علي رجلًا بكل ما تحمله معنى الكلمة، يتساءل أحيانًا أين يذهب باحتياجاته إن لم تكن يومًا بحياته تجربة سابقة أو صلة تربطه بالنساء كيف يحتمل بقائه جوارها هكذا؟
تنحنح بخشونة وقال بعد فترة صمته:
_إنت محتاج لتجربة صغيرة تجبر فاطيما انها تختلط بالناس يا علي، ولو تسمحلي أنا اللي هجر رجليها لكده.
سأله باهتمامٍ:
_ازاي؟
ارتدى نظارته بعنجهيةٍ:
_بعدين هتعرف سبني دلوقتي أغطس على شركة الغرباوي قبل ما خالك الملزق يوصل.
انقبضت معالمه بتقزز صريح ومن خلفه صدمة سؤاله:
_خالك جاي؟
طرق بقوة على كتفه وهو يشير له:
_استعد للاختناق أخي الطبيب.
وتركه واتجه ليغادر فانحنى علي بجسده للدرابزين يذكره:
_متنساش تبعت الفريق على المركز عايزين نبتدي الشغل بدري.
أشار له وهو يتجه للطاولة:
_الفريق بالمركز من ساعتين يا دكتور ومتقلقش أنا هشرف عليهم بنفسي وبكره تشوف هتستلم المركز ازاي، خلاص بقى في قبضتي والمداخل من تصميمي شخصيًا بص هبهرك!!
ردد وهو يستكمل طريقه لغرفة فاطمة:
_ربنا يستر!
تابعت فريدة عمران بقلق من أن يكون منزعجًا من تصرف فاطمة، فوجدته يقترب منها بابتسامة واسعة عذباء مردفًا:
_صباح الجمال والدلال على أجمل فيري في عيلة الغرباوي كلها.
قالها وهو ينحني يقبل وجنتها ورأسها ويدها بطريقة جعلت أحمد يتابعه بنظرات متفرسة بينما يتعالى ضحكات فريدة فضمته اليها من مقعدها قائلة:
_صباح الورد يا حبيبي.. أيه الجمال والشياكة دي كلها.
ألقى على نفسه نظرة خاطفة وغمز لها مشاكسًا:
_لازم أكون شيك وآنيق مش ابن فريدة هانم الغرباوي!!
احتضنت جانب وجهه بحنان:
_انت بكاش بس بموت فيك.
تنحنح أحمد ليلفت انتباههما لما يزيد عن تحمله، فخطف إليه عمران نظرة خاطفة ومرر لسانه على شفتيه باستمتاعٍ لرؤيته هكذا، فأراد أن يحجم يومه مثلما يشعر هو بتلك اللحظة، فانتقل من مقعد والدته لمقعده.
مال عمران لعمه الذي بدى مستنكرًا لفعلته، وخاصة حينما وجده ينحني تجاهه فتراجع بوجهه باستغراب من فعلته فقال عمران ضاحكًا:
_أنا هقولك كلمة سر متفهمنيش غلط يابو حميد.
حدجه بعمق خطر وصاح بتذمر وهو يرتشف من كوب عصيره:
_انجز.
اتشح بابتسامة خبيثة وهمس له:
_الملزق جاي.
سكب ما تجرعه واستدار يقابله بعينين متوسعتين من شدة صدمته، فضحك وهو ينحني يمنحه محرمة ويربت على كتفه كأنه يواسيه، وقبل أن تنتبه لهم فريدة الغارقة بحديثها مع زينب قال:
_امسك نفسك عشان لو فريدة هانم لمحت الكره اللي جواك ليه هترجع حظر العزوبية من تاني ومش بعيد تفضل هناك لأخر عمرك.
وتابع مستهدفًا جولته:
_خد بالك مجاش فرحكم لإنه مكنش موافق على الجوازة يعني الجاية المرادي هتكون زي قشرة الموزة مزحلقة يا عمي!
وانتصب بوقفته يودعه:
_عن إذنك هروح أحضر نعش جنازته لأجل ما استقبله.
والتفت ينادي زوجته:
_يلا يا بيبي؟
خطفت حقيبة يدها ولوحت للفتيات تودعهما، بينما اشارت فريدة لشمس:
_اطلعي يالا غيري هدومك عما نجهز أنا وأنكل أحمد... هنتحرك اول ما علي ينزل هو كمان.
هزت رأسها بحماسٍ وهرعت بلهفة للأعلى لتبدل ملابسها.
******
طرق علي على باب جناحه ليجعلها تنتبه لدخوله، ومن ثم ولج للداخل فوجدها تجلس على الأريكة ويدها تزيح دموعها فور أن اقترب منها، جلس علي قبالتها وسحب نفسًا مطولًا يغلب به حزنه وضيقه، فتمسكت يده بيدها يفركها بحنانٍ ودفء يجتاحها:
_الجميل زعلان ليه؟
أتاها مهدئها ودوائها لتسرع بأخراج علتها عنها، فزحفت بجسدها تقابله وقالت ببكاء:
_مقصدتش والله أحرج عمران بالشكل ده، كنت بايخة جدًا بدل ما أشكره على مساعدته ليا زقيته وجريت زي الهبلة، أكيد بيقول عليا مجنونة أو قليلة الذوق!
وتابعت بقهر جعل ريقها كالعلقم:
_غصب عني والله يا علي، أول ما مسك ايدي حسيت اني دوخت ومبقتش شايفة غير تفاصيل الأيام القاسية اللي عشتها دي.. أنا مكسوفة من نفسي أوي وحابة أعتذرله أنا مشوفتش منه شيء وحش بالعكس من يوم ما جيت هنا وهو محترم وذوق معايا جدًا وفي المقابل عاملته بطريقة بشعة.
احتوى وجهها المحتقن بأثر الدموع، وأزاحها عنه بهدوء اتنقل لصوته الرزين:
_عمران مبيعرفش يزعل من حد، وبالعكس هو متفهم جدًا الحالة اللي بتمري بيها يا فاطمة.. ولو اعتذارك هيفرق معاكي فأول ما هيرجع بليل هخدك وتروحي تعتذري مع أني شايف أنه مالوش لزمة لإنه متقبل الموضوع ومنتهي بالنسباله.
نجح بأن يبدد حرجها وزرع الابتسامة الرقيقة على شفتيها، فابتسم هو الاخر وردد بهيامٍ:
_ابتسامتك دي كفيلة تقلب يومي كله لسعادة.. أنا مش عايز أنزل غير وأنا متأكد أنك تخطيتي الموقف كله.
واستطرد وهو ينحني مقبلًا يديها معًا:
_أنا صاحي فرحان إنك ولأول مرة ميجلكيش نوبات ولا كوابيس، الظاهر كده حضني له تأثير عليك يا جميل!
سحبت كفها منه بخجل:
_علي!!
تمردت ضحكاته بصوتٍ مرتفع ونهض يتمم على ملابسه وشعره:
_أنا هنزل علشان ورايا كام حاجة كده..لو عوزتي حاجة إبقى كلميني.
تساءلت باهتمامٍ :
_ نازل المستشفى.
هز رأسه نافيًا، وقال وهو يعيد تصفيف شعره:
_أنا إستقلت يا فاطيما.
نهضت واسرعت إليه تمنحه سؤالًا أخر:
_ليه؟
رد عليها بحلمٍ يتشاركه برفقتها:
_ما أنا قولتلك قبل كده يا حبيبتي إني حولت المستشفى بتاعتي لمركز كبير واليومين دول فريق عمران بيجهز المركز وأنا معاهم بساعد باختيار المفروشات وغيرها مع إني معنديش شك في عمران بس أنا عندي خبرة بردو في الألوان والتنسيق المريح للمريض.
منحته ابتسامة اتسعت بفرحتها:
_ربنا معاك يا دكتور... متأكدة إنك هتنجح لإنك دكتور شاطر وتستاهل ده.
وتابعت وهي تشير على ذاتها بعنجهية:
_والدليل قدامك.
انحنى تجاهها يقبل جبينها وودعها بايجازٍ:
_أشوفك بليل يا قمري... سلام مؤقت.
همست وهي تتابع خروجه بهيام:
_مع السلامة.
*******
استيقظ آدهم على يد تهز جسده برفق، ففتح عينيه يجاهد مهاجمة نومه، فوجد سيف يقابله بابتسامة عذباء:
_صباح الخير يا سيادة الرائد... أنا حضرتلك الفطار والدوا ومضطر أصحيك دلوقتي عشان أطمن إنك أخدت أدويتك قبل ما أنزل عشان دكتور يوسف هيآآآ..
قاطعه بضحكة صاخبة:
_هينفخك؟
ضحك وهو يؤكد له:
_بالظبط، بس عرفت منين؟
اعتدل بجلسته وسحب الوسادة من خلف ظهره:
_عشان أيوب قالي نفس الكلام امبارح، واضح ان يوسف شخصية بيتخاف منها بس مش باين عليه!
جلس سيف قبالته يضع الطاولة المطولة ومن ثم يرص أطباق الطعام وأجابه ببسمة شملت ملخص للحب المتبادل بين الاخوة:
_يوسف ده مفيش في طيبة قلبه، أينعم هو مصحيني النهاردة من النجمة عشان أروحله أساعده في تزين عيادة دكتورة ليلى عشان الافتتاح النهاردة ومخلعني من الجامعة اليوم بطوله بس عشان عيونه أنا جاهز لأي حاجة.
تابعه باهتمامٍ وخاصة حينما لاح الحزن على معالم وجه ذاك الذي ظنه فتى صغيرًا مرحًا:
_يوسف مش أخويا الكبير يوسف ده أبويا وأهلي وناسي وكل ما أملك، بالرغم من اني مش يتيم عندي أب وأم بس الاتنين مش شايفين غير شغلهم، مكنش حد مهتم بيا غير يوسف، أكلي.. لبسي.. دراستي.. كل عقبة قضتها في حياتي كان جنبي فيها كتف لكتف، تخيل يا سيادة الرائد أنا برجع من جامعتي ألقيه سايب عيادته وبيته ومراته وعاملي الأكل ومنضف الشقة حتى هدومي بيغسلهالي!
واستكمل بوجعٍ انغمس بنبرته المبحوحة من شدة اضرام مشاعره:
_لما سابنا في مصر واستقر هنا كنت حاسس إني يتيم من غيره، مكالمته كل يوم هي اللي كانت بتصبرني، وعدني إني لما أخلص الثانوي هيبعتلي وأسافرله، كنت بذاكر ليل نهار وبدعي أخر سنة ليا تخلص عشان أشوفه، وأول ما نتجتي ظاهرت كان أول واحد أبلغه بمجموعي وأفكره بوعده... وجيت هنا وناوي استقر زيه مش راجع مصر تاني، مكان ما يكون يوسف هتلاقيني موجود.
ختم باقي حديثه مازحًا ليخفف من حدة الاجواء التي اصطنعها حديثه، فوجد آدهم يتابعه بنظرة حنونة مهتمة لسماع ما سيقول حتى ولو ظل يتحدث للأبد، فنهض عن الفراش يضع طبق صغير به الأدوية، ثم قال:
_أنا دوشتك على الصبح، المهم افطر وخد أدويتك لاني لازم أنزل ليوسف قبل ما يتعصب عليا، وبليل لو قدرت تيجي هستناك هناك في العيادة أنا قايل لأيوب يجيبك معاه.
تفحص الطرقة المطلة من باب غرفته متسائلًا:
_هو فين أيوب؟
رد عليه وهو يسكب له كوب المياه:
_أيوب بينزل من بدري لانه بيشتغل في مطعم قبل الجامعة.
اتسعت ابتسامة آدهم فأعاد خصلات شعره الطويل للخلف بحركة خاطفة، وتطلع لسيف يخبره:
_انت وأيوب ويوسف وعلي وعمران وجمال شاملين جملة شباب مجدع وزي الورد اللي بنقولها في مصر.. بحس بالفخر كل ما بكتشف عنكم حاجه.
مد يده يربت على كتفه في حالة مفاجئة لآدهم وقال:
_وإنت بانقاذك لأيوب ينطبق عليك نفس المقولة يا سيادة الرائد، عشان كده حضرتلك الفطار على مزاج بعد اللي يوسف قالهولي عن اللي حصل هنا امبارح.
قهقه عاليًا وردد بمشاكسة:
_كل ده عشان أخدت السكينة من البنت دي، بصراحة أيوب يتحسد على حبك ليه يا دكتور سيفو.. ومتقلقش أنا بعيد ولا كأني أعرفه.
حك لحيته المنمقة وقال بحرجٍ:
_هو أنا بعز أيوب وبحبه جدًا بس مش بالطريقة اللي داخله دماغكم، أنا بس كنت خايف عليه من صداقة عمران وجمال لإن أيوب خام مالوش في أي حاجة، وعمران ما شاء الله عليه وقح درجة أولى وجمال درجة تانية، كنت قلقان ميظبطوش مع بعض بس شكلي كنت غلط لانه اندمج وسطيهم بسرعة متخيلتهاش!
تلقفت يده الخبز ليضعه بالبيض وتناوله وهو يراقب من أمامه بهدوء، ومن ثم جذب المياه يرتشفها، تابعه سيف باستغراب من طريقته بتناول الطعام، فتمتم آدهم:
_كمل سامعك.
وجده يراقب طريقة تناول طعامه وسأله:
_إنت بتشرب بعد كل لقمة!!
هز رأسه يؤكد له:
_معرفش هي عادة عندي كده بحس الأكل مبيتهضمش من غير المية وده تعبني جدًا بس اتعودت.
بدت الحيرة جلية على معالم سيف، فقال مبتسمًا:
_أيوب كده وبهريه تريقة طول ما بيأكل.
إلتقط الجبن يتناوله بتمهلٍ لحديثه:
_لأ ما أنا مش هديك الفرصة، لإنك ماشي حالًا هتتأخر كده على دكتور سيف وهينفخك المرادي بجد.. روح علق البلالين مع أخوك أفضل من التريقى على خلق الله.
تعالت ضحكاته وأشار له بمرحٍ:
_حاضر يا سيادة الرائد إنت تؤمر.... سلام.
غادر تاركًا الابتسامة تغزو وجه الأخر الذي يتابع تناول طعامه باستمتاعٍ
**********
أوقف سيارته أسفل الشركة فهبطت مايا وغادر بعد أن أخبرها بأنه سيذهب لمشوارٍ هام، استكمل بسيارته الطريق متبعًا هاتفه بعدما بحث عن إسم المطعم وأخرج موقعه، والآن أصبح يقابل وجهته.
صف عمران سيارته وولج للداخل يبحث عن غايته، فوجده يرتدي مريال يحمل لوجو المطعم وينتقل بين الطاولات، وضع العصائر على احدى الطاولة وما كاد بحمل بالعودة للمطبخ حاملًا الصينية الفارغة حتى تفاجئ به يقف قبالته، فتفوه باسترابةٍ:
_عمران!