ماعندي مقدمة بس حطيت هي الاية القرءانية ومنها بنفهم مغزى القصة
أعوذُ بالله من الشيطان الرجيم :
إِنْ خِفْتُمْ أَلَّا تُقْسِطُواْ فِى ٱلْيَتَٰمَىٰ فَٱنكِحُواْ مَا طَابَ لَكُم مِّنَ ٱلنِّسَآءِ مَثْنَىٰ وَثُلَٰثَ وَرُبَٰعَ ۖ فَإِنْ خِفْتُمْ أَلَّا تَعْدِلُواْ فَوَٰحِدَةً أَوْ مَا مَلَكَتْ أَيْمَٰنُكُمْ ۚ ذَٰلِكَ أَدْنَىٰٓ أَلَّا تَعُولُواْ.
بداية القصة :
دخلت على بيتها وعلقت المفتاح على العلاقة وبلشت تشلح من رجلها وهية عم تبربر : والله معد ينعاش بهل البلد
لبست شحاطة البيت وكملت على المطبخ لعند امها يلي عم تطبخ وعطتها الكيس يلي بايدها وقالت : الكيلو بس ب ١٠ الاف
امها : شووو البصل بعشرة
:اي والله
امها : وشقد جبتي
: جبت كيلو مو انت قلتي بدك كيلو
امها : كنتي جيبي كم حبة نمشي حالنا فيهن
: يعني رجعن
امها : لا خلص جبتيهن هلق .
: اجت اسماء
امها : اي اجت وهلق بالغرفة .. مشغولة بعرس رفيقتها ومحتارة شو تلبس تقولي العرس الها
الاء : لقوم شوفها ... بدك شي مساعدة
امها : لا رح خلص .. بس لسه بدي قلّي المجدرة
قامت ومشت بهل البيت السوري المتواضع وفاتت عغرفة بتختين وكان فيها بنت قربية من عمرها قاعدة ومشغولة على موبايلها
فكت الشال عن راسها وضربتو على اختها
اسماء: اي ولووو
الاء: ما مليون مرة نبهت عليكي ماتلبسي شي من عندي ... انا بقرب شي على غراااضك...
اسماء : اي ماخربت الدنيا هلق بغسلك اياها
الاء ؛ مو قصة غسيل .. بس هيك مابحب حدا يشاركني بشي عم تفهمي
اسماء : خلص خلص معد قربلك على شي عاساس كتر مو حلوين تيابك
الاء : عاجبيني لاتقربي مرة تاني عليهن
اسماء :اووف ماشي ماشي
الاء : شو عم تعملي ... وليش ماعم تساعدي امي
اسماء : اي هية مجدرة .. شو بدها عشرة يشتغلو فيها..... المهم هلق تعي شوفي هدول حلوين
قربت وقعدت جنبها وصارت تفرجيها عدة صور .. وكل صورة فيها مجموعة فساتين من نفس اللون
اسماء : ايو أحلى مجموعة
الاء : كلن حلوين
اسماء : هلق الصبايا قالو الموف .. شو رايك انت
الاء : ليش بدكن تلبسو نفس الالوان
اسماء: اي
الاء : بس هدول اجاراتهن غالية كتتير
اسماء : ومين قلك انو رح ندفع
الاء : لكن مين
اسماء : عحساب العروس ... الفساتين والكوافير وكلوو .. وبدا تجيب مصورة تصورنا فيديو بالفندق ونحنا لابسين هي الرواب يلي بكون مكتوب عليها رفيقة العروس وهيك .. وتصورنا ونحنا عم نعمل الميكب وبعدها صور لما نخلص .. وعم نتدرب على رقصة نقدمها
الاء : والله فكرة حلوة .... بس مو بعزقة كتير
اسماء : عاساس دافعة هية شي من جيبتها .. كلو عحساب خالها وبظن كمان من العريس .. لاتفكري بالمصاري ابدا .. حرفيا معن مصاري متل التراب
الاء : من وين عريسها
اسماء : سوري مغترب
الاء : اي قولي هيك
اسماء : بس الدعم الاكبر من خالها ... مليونير
الاء : اف لهل الدرجة
اسماء : اي والله ..
الاء : والغربة بتعمل مصاري كل هالقد
اسماء : هو ببداية الاحداث طلع ع قطر بعد ماكان مخلص هندسة بترول وهنيك بلش شغلو الخاص .. وماشاء الله بسرعة البرق الله فتحها عليه .. وصار يكبر بشركتو ويستثمر .. بخلال هالعشر سنين صار مليونير
الاء : يلا منيح الله يهنيه
اسماء : ومتزوج تنتين كمان
الاء : ههههههه
اسماء : لي عم تضحكي
الاء : الرجل السوري او العربي بشكل عام بس يصير معو قرشين بفكر بالنسوان
اسماء : اذا كافيهن ليش لأ
الاء : يعني لو هلق واحد بيتقدملك ومعو مصاري بس متزوج بترضي
اسماء : اي ليش لأ
الاء : عم تحكي جد
اسماء : والله .. لكن شو متأملة من عيشتنا بهل البلد .. يجيكي شي عسكري منتوف وبقضيها بين العسكرية ... والبيت .. واكيد الراتب مارح يكفي بصير بدو يشتغل ... ويادوب تلحق تشوفيه كم ساعة بالاسبوع ومع كل هاد يادوب تقدري تعيشي بظل هالاوضاع
الاء : وجهة نظرك ... بس انا مستحيل اقبل .. لو كان عندو مال قارون... والله شي حلو انا ووحدة تانية نتشارك زلمة
اسماء : خلصينا عاد لا زلمة ولا نص ماوجهنا هالوجه
ماعلقت الاء
اسماء : المهم ايو احلى.. البنات عم يقولو الموف ومنن عم يقولو الزهر
الاء : لا خليكن ع الموف أحلى
(بنعرفكن الصبايا .. الاء واسماء ، عاديات .. هنن حلوين بشكل عام بس مانهن فائقات الجمال و في احلى ... الاء اكبر من اسماء بسنة واعمارهن ٢٠ ،١٩ عم يدرسو جامعة .. الاء ادب انكليزي واسماء تمريض )
~~~~~~~~~~~~•
بمكان تاني
ببيت فخم .. اثاثو فخم .. قاعدين عدة اشخاص على طاولة طويلة عليها اشهى انواع الاكل
براس الطاولة شخص عمرو بين ال٣٠ ل ٤٠ و عجنبو اليمين في صبيتن كتير كتير حلوين بس مابيشبهو بعض كل وحدة عندها جمال خاص فيها ، وع الجنب التاني قاعدة مرى كبيرة بالعمر بحدود ٥٠ وجنبها بنت صبية ومبين انها بنتها
ام عمر : اخي دوق هدول كتيير طيبين عملتهن مخصوص الك
هشام : اختي شوي شوي علي .. بكرا بصير وزني شي مية
ملك : بكرا بتحرقهن خالو .. بعرفك بتهتم برشاقتك
هشام : والله اكلات امك الطيبين مارح يخلو فيها رشاقة
ام عمر : نور وحلا .. ما سمعنا صوتكن .. كانو ماعجبكن الاكل
نور : لا مبلى يسلم هالايدين
حلا : لا كتير طيب .. ومن كتر مو طيب مو عارفة من وين بدي اكل .. وبنفس الوقت خايفة اكل كتير واسمن .. ولا شو رأيك ابن عمي
هشام : معلش اسمني فداكي .. لاتحرمي حالك من شي
حلا : تسلملي يارب
هشام : لاتصدقي عم امزح هههه
والكل ضحك
نور : ابن عمي انا ناوية اتعلم من ام عمر كل هالاكلات ونصير نطبخلك اياهن انا وضرتي
هشام : ياريت والله
نور : لكن خلص من هون ورايح رح تصير تاكل من تحت ادينا ونصرف الطباخة
حك دقنو وقال : انا بقول خليها للاحتياط هههه.
الكل هون ضحك
هشام : دايمة اختي يسلم هالادين بس عنجد مابينشبع من اكلاتك
ام عمر : مية صحة وهنا ياعمري
هشام : نور وحلا ساعدو اختي بلم السفرة
نور : امرك ابن عمي
ملك : ماما خليكي مع خالو .. انو انا ونسوان خالي بنلم السفرة
ام عمر : لكن ركبو ع الشاي فرد مرة
ملك : حاضر
قام هشام واختو يتمشو لعند البلكون
هشام : اختي ليش ماعم ترضي جبلك خدامة تخدمك
ام عمر : مابحب حدا غريب يفوت على بيتي
هشام : بس بكرا رح تتزوج ملك وتضلي لحالك
ام عمر : لا .. رح جوز عمر وجيبو قعدو معي
هشام : ان شاء الله .. الله يفرحك فيهن وبولادن يارب
هشام : خلصتو كل تجهيزات العرس
ام عمر : كلو جاهز ومن احسنو .. ليش انت يا اخي عم تخلينا نحتاج شي .. روح الله يعوض عليك يارب
هشام : لا تحكي هيك .. انا كلشي بملكو فداكي انت بس اطلبي
ام عمر : والله مابدي الا شوفك مبسوط
هشام : مبسوط والحمد لله
ام عمر ضحكت وقالت : وما احلاك ماتكون مبسوط وعندك نسوان تنين بقولو للقمر قوم لاقعد محلك .. ومتفقين وبس بدهن رضاك
هشام : وما احلاهن مايكونو بدهن بس رضايي .. هي مقدملهن كلشي عطبق من دهب
ام عمر : اخي كأنو عم يصيبك الغرور
هشام : لا مو غرور ... بس الحمد لله الله مفضلها علي وليش لحتى مامتع حالي بهل الدنيا وكلو ضمن الحلال ... وانا ماجبرتن على شي وكمان يلي صايرلن مو صاير لحدا
ام عمر : معك حق .. الله يديم الوفق بيناتكن يارب
هشام : آمين .. اي اختي في موضوع بدي افتحو معك
ام عمر : اي اخي قلي
هشام : بدي اتزوج
ام عمر : عم تحكي جد
هشام : والله
ام عمر : بدك تلاقي احلا من هالاميرات
هشام : مين قلك بدي احلى منهم .. بس هيك حابب اتزوج واعملهن تلاتة
ام عمر : والله مابعرف شو قلك
هشام : لك شبك .. والله مراح نقص على حدا منهن شي والله بيشهد انو بعدل بيناتهن .. بس هالفترة جاي عبالي اعمل شي جديد بحياتي
ام عمر : وتقوم تتزوج
هشام : اي شوفيها ... النسوان احلا شي بهل الدنيا وانا مابدي قرب ع الحرام مازال الحلال موجود
ام عمر : ونسوانك عندن اعتراض
هشام: اكيد لا
ام عمر : قد ماكان المرى مابتحب حدا يشاركها بزوجها
هشام : نور وحلا تعودو .. وانا حاطتهم بالصورة
اجو نور وحلا وملك
وملك حاملة الشاي وقربت تضيفن
هشام : يسلمون يا احلى عروس
ملك : صحة وهنا
هشام لاختو : اسأليهن
نور : ع شو ابن عمي
هشام : بدي اتزوج
مافي غير ملك انصدمت وقالت : شوو عم تحكي جد
حلا : اي واذا .. اذا الشرع حللو ٤ .. قلي ابن عمي شو الموصفات يلي بدك اياها
ملك : انتو عم تحكو جد
هشام : اي خالو عم نحكي جد ... بعدين عم اعمل شي حرام
ملك : لا مو حرام ... بس خالو والله نسوانك مارح تلاقي لا بجمالهن ولا بأدبهن
هشام: يا خالو مارح تفهمي علي .. انا ماني عم دور على احسن او اجمل .. نور وحلا مارح لاقي متلن ... بس هيك حابب اتزوج ... ومزال بقدر حقق مرادي ليش لاحرم حالي
نور: ابن عمي انت بس اشر ع البنت يلي بدك اياها وبراسنا بنروح بنخطبلك اياها
هشام : هلق مافي وحدة محددة
ام عمر : لكن بكرا بعرس ملك بنشوفلك شي وحدة
هشام : فكرة والله
نور : ابن عمي جهزلك الاركيلة
هشام : لا عندي شوية شغل ع اللاب ..
ملك : خالو فيك تستخدم غرفة الضيوف هادية
هشام : اوك .. حلا ذكاتك جيبلي شنتتي من الغرفة
حلا : حاضر
راحو وضلت نور وملك وامها
ملك : شي حلو ... وان شاء الله بكرا جوزي بصير بدو يتزوج علي
نور : انت شرطي عليه قبل العرس .
ملك : وهو هيك ... عنجد انتو كيف بتتحملوا
نور : هههه انت ملاقيتها صعبة .. بس نحنا كتير مبسوطين وابن عمي مامنقص علينا شي .. اذا بنطلب لبن العصفور بيحضر .
ملك : يعني هو شرط عليكي قبل ماتتزوجي انو رح يتزوج عليكي
نور : اي .. هلق انا بالاول لقيتها صعبة بس وافقت .. مافيني حرم شي رب العالمين حللو .. وبالمقابل انا سعيدة .. شيلك عن المصاري مع انو هية كتتيييير مهمة وبالمركز الاول ... بس خالك كتير حنون ورومنسي .. بحياتو ما غلط مع وحدة مننا بالحكي او رفع ايدو عليها ... واذا وحدة مرضت بيسهر على تعبها .
ملك : بس كأنو حسيت انو انتو كتير بتدللوه
نور : بيستاهل يقبر قلبي
ملك اتطلعت بامها مستغربة وامها ابتسمت والتفتت ع الشارع وماعلقت
~~~~~~~~~~~~•
دخل هشام على غرفة الضيوف وحلا دخلت ومعها شنتة العمل
حطتها قدامو على الطاولة وقالت : بتحب حضرلك شي تشربو تقبرني
هشام : قهوة حلوة متلك
حلا : بامر عيونك انا
غابت شوي وجايبة معها فنجان قهوة حطتو قدامو والتفتت لوراه وصارت تعملو مساج لكتافو
سحب ايدها وباسها وقال : مافي داعي حبيبتي ..
حلا : بس انا بدي رياحتك
هشام : ولايهمك انا هيك مرتاح ... وعندي شغل كتير بدي ركز فيه .. بتعرفي بهل اليومين بكون صار تراكمات ولازم تابعها
حلا : طيب .. واذا بدك شي اندهلي
هشام : اذا بتحبو طلعو غيرو جو مع ملك واختي
حلا : والله فكرة حلوة ... وانت تضل لحالك
هشام : اي ولايهمك .. هاد فنجان القهوة بكفيني
حلا: طيب انا رح خبرهن بركي بننزل عشي مكان ناكل بوظة
هشام : طيب شوفو شو بصير معكن وانا رح خلي الشوفير يجهز السيارة
حلا : حبيبي معلش انا سوق
هشام : لا .. هون غير قطر ... الطرقات هون غير ومابتعرفوها .. خلي الشوفير معكن اضمن
حلا : ماشي ياعمري
قربت باستو على خدو
هشام : لاتخلو اختي تدفع شي
حلا ؛ ولايهمك يا تاج راسي
((وهيك اخدنا فكرة عن هي العيلة .. هشام شب حلو عمرو ٣٧طولو حلو .. جسمو معبى شوي مع انو شخص رياضي وسيم لحيتو وشعرو داخلهن بعض الشيب بس مبين من وجهو انو مرتاح ومابيحمل اي هم
زوجتو الاولة نور : شقرا بعيونك خضر طويلة ورشيقة
والزوجة التانية حلا: بيضا بعيون سودة .. بشرتها صافية وبتحمل غمازات على خدودها..
مافي مقارنة بين التنيتن لأنو كل وحدة بتملك جمال خاص فيها
ملك هية العروس يلي عرسها بكرا ويلي اسماء مجهزة حالها تجي على عرسها
ملك بنت نعومة وحلوة
~~~~~~~~~~~~~~•
~~~~~~~~~~~~~~•
تاني يوم وهو يوم العرس
اسماء من الصبح مع رفيقتها
الاء عم تساعد امها بضب البيت .. وكانت عم تمسح الارض
الاء : ماما بدنا نروح ع العرس
امها : والله مابعرف .. مو جاي عبالي روحي انت
الاء : بدي روح لحالي
امها : ما اختك هنيك كيف لحالك
الاء : والله بخجل .. بعدين ماعندي شي البسو عليه القيمة
امها : شوفي عند اختك بركي بتلاقي شي فستان تلبسيه
الاء : لا خلص ماني رايحة
امها : شو مانك رايحة الله يرضى عليكي روحي مشان ترجعي انت واختك ... شوبدك تخليها ترجع لحالها بنصاص الليالي
~~~~~~~~~~~•
البنات بافخم الاوتيلات لابسين ارواب من الساتان والعروس نفسهن ... طبعا كانت للمحجبات وعم ياخدو بعض الصور بعد ماخلصو مكياجهن متل ماعم تطلب منهن المصورة ... وبعدها لبسو الفساتين متناسبة الالوان والعروس طبعا فستانها الابيض
وبعدها عملو حركات كتير وفيديوهات كتير
وتقريبا هون خلصو وباقي صور يلي بالصالة
قعدو كلن حوالي العروس .. بعد ماطلبو عصير
ملك : بس ماينتزع الروج
اسماء : لا مابينتزع مبين تقيل
سلام : لك ملك كل هاد عحساب خالك
ملك : اي الله يخليلي اياه
الكل : آمين
نسمة : نيالك ع هيك خال
فداء : خالك متزوج
ملك : هههههه تنيتن
نسمة : فرد مرة هههه
اسماء : سألتها قبلكن هههههه
ملك : بس بتعرفو ناوي ع التالتة شو رأيكن
اسماء : عم تحكي جد
ملك : والله
نسمة : ونسوانو
ملك : متل مابدو بنفذو متل الخاتم باصبعو
فداء : معقول هيك
ملك : اي والله .. وهو بحبهن وبيحترمن
اسماء : لكن ليه بدو يتزوج
ملك : والله مابعرف .. ماعندو اي سبب ... لك اصلا لو تشوفو نسوانو بجننو .. جمال واخلاق
سلام: هنن الزلم مابعبي عيونن غير التراب
ملك : بهي معك حق ... بس هو ملاقي حالو مقتدر وقادر يفتح ٣ بيوت وعشرة كمان .. ليش لأ .. وع قولتهن الشرع حلل ٤
اسماء : وكل وحدة الها بيت لحالها
ملك : لأ بس عندو قصر كبير وكل وحدة الها جناح خاص فيها مابدو كل وحدة تقعد لحالها .. بدو يضلو كلن قدام عيونو ووببيت واحد ... بس كل جناح قد شقة ... ولا السيارات كل وحدة عندها سيارتين وكل فترة بتدبل سيارة ولا الدهب والالماس ولا اللبس
فداء : انا بتزوجو بياخدني هههه
الكل ضحك
فداء : والله عم احكي جد
ملك : بقلو
سلام : وانا بوافق اذا تقدملي
ملك : خلص انا رح خليه يشوفكن وبركي عجبتو شي وحدة منكن .. هو اصلا اكيد رح يشوفكن بالعرس
اسماء : اي هيك احسن
نسمة : حتى انت
اسماء : اي شو هنن احسن مني ههههه
نسمة : هههه .. بس حلو تفكيرو .. انو بدال ما بياخد وحدة بياخد ٤ وبخليهن يعيشو حياتن وبطالعن من الفقر يلي هنن فيه .. والله خالك قلبو كبير
اسماء : ههههههه صبايا مازال في خانتين فاضيين بنخليه يختار تنتين ههههه
سلام : والله فكرة
قضوها ضحك ومزح لحتى صار وقت زفة العروس على الصالة
~~~~~~~~~~~~•
دخلت امها ل الاء ع غرفتها وشافتها قاعدة عم تكتب شي بدروسها
امها : لك امي مابدك تروحي ع العرس
الاء : امي شوبدي روح اقعد لحالي وبعدين ماعندي شي البسو ... خلص بس تخلص الحفلة بروح انا وجارنا ابو جعفر بالتاكسي بنجيبها وبنجي
امها : طيب ماشي .. انا رايحة طلع ابوكي على الصالون دوبها اجت الكهربا بتفرج شوي على التلفزيون
الاء : لكن رح اجي ساعدك قبل ماتنقطع
تركت من ايدها وقامت مع امها على غرفة تانية كان رجال كبير متمدد على التخت
امها : رح ننقلك ع الصالون تتفرج ع التلفزيون
الاب : اي ...
نقلوه ع الكرسي المتحرك وطلعوه ع الصالون
الاء : ع الاخبار اكيد ماهيك
الاب : اي خلينا نشوف شو صار بهل العالم
حطولو على الاخبار
وحكت امها : امي لا تتاخري على اختك
الاء : حاضر ماما رح البس وامشي
امها : اي الله يرضى عليكن ... لو انو هون لؤي كان راح جابها هو
الاء : اي والله ... صحي ايمت بدو ينزل اجازة
امها : بهل اليومين قلي
الاء : الله يحميه يارب
امها : آمين
~~~~~~~~~~~~~•
البنات كانو خمسة مع العروس وعاملين رقصة مشتركة على اغنية بنت الجيران والصالة عم تضج بالمعازيم والكل عم يتفرج على هالرقصة الحلوة .. كانو عم يرقصو والعريس واقف ومكتف ايديه وعم يتفرج على عروستو يلي عم تتمايل قدامو وهية عم تقدملو استعراض ... لتخلص الغنية ويحطولن غنية رومنسية وينسحبو البنات ويضل بس العريس والعروس واضواء خفيفة مركزة عليهن وطبعا فرقة تصوير عم تصور .. وبعد ما خلصت الرقصة .. العريس باسها من راسها ومسكها ايدها بكل رقي ومشو لعند منصتهن
وع طاولة قاعد هشام ونور وحلا واختو ام عمر
هشام : يعني هلق خلصو تصوير
ام عمر : والله مابعرف هالجيل عليه حركات غير شكل
هشام : اي اختي هاد الدارج
نور : ابن عمي ايمت بدنا نبارك للعروس
هشام : انا بظن خلصو فيكن تروحو تباركولها
حلا: مو جاي معنا
هشام : مبلى
قامو كلن مع ام عمر ومشو ... نور وحلا كانو لابسين فساتين كتير تقيلة والدهب يلي بايدهن للكواع .. وماشيين بكل غرور وراى هشام يلي كان لابس طقم رسمي وام عمر لحقتهم
البنات واقفين وعم يتأملو هالشخص يلي فارض هيبتو بكل المكان .. وكمان عم يتاملوا نسوانو يلي كتير حلوين
سلم ع العريس وباركلو وباس ملك من جيبنها وباركلها ومد ايدو اتجاه نور عطتو علبة .. فتحها وخلا نور ترجع تمسكها وكان فيها طقم دهب كامل من طوق لحلق لاسوارة لحلق
تفاجأت فيه وحطت ايدها على تمها من الذهول : كتتتير حلو خالو يسلم هالادين
هشام :قليل عليكي يا قمر
اخد الطوق ولبسها اياه
ونور حطت العلبة على الطاولة ولبستها الاسوارة
وحلا لبستها الخاتم
هشام : الحلقات ابقي لبسيهن بعدين هههه
العريس : ماخلتيلي مكان لالبسها شي خال
هشام : هههه خلص خبيلا اياهن لبعدين
ضحكو ونزل هو ونسوانو وضلت امها عم تضبطلها الطرحة
والبنات على جنب عم يشاهدو بذهول
اسماء :شايفين يا صبايا
سلام : شو اكابر وكلاس .. ولا جمال نسوانو
فداء : هاد بدو يتزوج بس بالاول بدو وحدة تكون أحلى من نسوانو ... ونحنا مابنتقارن قدامن
نسمة : اي والله معك حق
اسماء : انا بقول ننسى القصة
فداء : هههههه
رن جوال اسماء برسالة شافتها وكانت من الاء
مطولة .. انا برا بالتاكسي
اسماء : اي وماتنزلي
الاء : انو نمشي
اسماء : بالله شو هلق بلشت الحفلة
الاء : شو يعني
اسماء : انزلي
الاء : مو لابسي شي عليه القيمة
اسماء : ما بأثر في مين خاطف الاضواء
الاء : مين قصدك
اسماء : لك تعي محدا رح ينتبه
الاء : ماشي
~~~~~~~~~~~~~~•
نزلت الاء من التاكسي وقالتلو : عمو شي ساعة وبترجع
ابو جعفر : ماشي يابنتي
وقفت واتطلعت عحالها .. كانت لابسة كنزة وبنطلون وبوط ابيض مع شال ابيض
الاء : مابهن شي حلوين .. بس مو خرج عرس ... يلا عاد مين داير علي
مشت متوترة لعند الصالة وخجلانة بنفس الوقت وهية عم تمشي ... هشام كان عم يحكي على تلفون ع جنب .. وخلص المكالمة ومشي بخطوات سريعة على الكم درجة قدام الصالة ليدخل وهو ماشي وقع منو ورقة نقدية ... مشت بسرعة ولقطتها .. كانت ٥٠ دولار امريكي .. قامت اسرعت بمشيتها وقدرت توقفو قبل مايدخل : لو سمحت
وقف والتفت عليها
الاء : وقعت منك هي
اتطلع ع ايدها وبعدها اتطلع فيها وقال : خلص خليها الك
طالت النظر فيه ... وبعدها ابتسمت .. واسحبتلو ايدو وفتحتها وحطتلو الخمسين بايدو وكملت لجوا بدون ماترد عليه بولا حرف .. بس ردها كان مبهر بالنسبة الو .. اتطلع بايدو يلي فيها الخمسين ورجع اتطلع فيها يلي كانت داخلة الصالة ... ابتسم حطها بجيبتو وكمل لجوا
~~~~~~~~~~~~•
ع طاولة محايدة قاعدة اسماء والاء
اسماء : ليش هيك مبهدلة بحالك
الاء : وين البهدلة بالموضوع .. عاجبيني
اسماء : هلق هنن حلوين .. بس مو خرج عرس .. حدودهن للجامعة
الاء : خلصينا لا تدققي عاساس انا جاي اخدك ونمشي
اسماء : لسه عشرة ماصارت عشو مستعجلين
الاء : هي امك قالتلي اجي عبكير
اسماء : بنقعد شوي وبعدها بنمشي
الاء : ماشي
اسماء : انا قايمة ارقص مع الصبايا
الاء : بس لاتطولي لا تخليني قاعدة لحالي
اسماء : لا مابطول
راحت اسماء والاء صارت تتفرج ع المعازيم .. ولفت انتباهها نور وحلا .. بدون منازع كانو أحلى تنين بهل الحفلة
كانو قاعدين ع طاولة لحالهن .. مبين عليهن الاكابرية .. وانتبهت للدهب يلي لابسينو ولا كل وحدة حاملة ايفون احدث موديل
~~~~~~~~•
عند الضراير
نور عم تحكي حلا : قولك هشام بيعملها وبيتزوج
حلا : والله مابعرف ... بس ياريت مايعملها
نور :عادي واذا عملها هي انت نزلتي علي ضرة وانا ماحكيت
حلا: ماكنت متخيلة انها صعبة
نور : صعبة او لا مافينا نعمل شي ... شرطو بعقد الزواج انو يتزوج وقت يلي بحب
حلا : طيب نحنا شو منقصين عليه
نور : مو قصة منقصين ... بس الزلمة متل النار كل ماعطتيه اكتر كل ماطلب اكتر
حلا : عم اتخيل انو صرنا ٣ بالقصر
نور : وتخيلينا اربعة كمان
حلا : بس مابظن يتزوج من هون
نور : ليه
حلا : ع القليلة وحدة حلوة متلنا .. مالقيت ولا وحدة بتفش القلب
نور : قولتلك ... هشام ذوقو كتير صعب
حلا : ليكي هديك شو مبين عليها مشرشحة
نور : الله يساعد الناس مادخلنا
وع طاولة قريبة .. قاعد هشام ولافف رجل على رجل وجنبو اختو وعيونو على المعازيم .. لحتى اجت عينو عليها .. كانت قاعدة وساندة ايدها على الطاولة وعم تطلع ع الحفلة وفي ابتسامة مرسومة على وجها .. والطاولة قدامها فاضية
نده للكرسون وقلو : شوف هديك الصبية شو بدا تطلب
طبعا من الضجة والاغاني محدا انتبهلو
راح لعندها الكرسون وشافها عم تهز راسها بالنفي انو مابدها شي
التفت ع اختو وقالها : اختي
ام عمر : اي اخي
هشام : هديك البنت مين
اتطلعت عليها وقالت : هي بتكون اخت رفيقتها لملك .. بس ليه عم تسأل
هشام : مجرد سؤال
ام عمر : لا تقلي عجبتك
هشام : اي عجبتني
ام عمر : بس هي عادية في احلا منها بكتير
هشام : انا بدي هي .. ابقي احكيلي فيها
ام عمر : متأكد
هشام ؛ اي
اتطلع بالساعة وقال : انا اتاخرت بدي امشي
ام عمر : ع وين .. بكير مابدك تودع ملك
هشام : هي عمامها هون .. وعمر
عجنب كان عمر مع مجموعة شباب
ام عمر : طيب رايح ع البيت
هشام : لا ع الاوتيل .. رح تروح معي نور .. حلا بترجع معكن على البيت
ام عمر : ماشي
قام هشام وقرب من نور همس بادنها وقامت فورا معو وراحو
وام عمر راحت لعند ملك وهمست بادنها واشرتلا على الاء بدون محدا ينتبه
ملك بصدمة : عنجدد
امها : والله
ملك : خالي ماعم يشوف هالايام
امها : والله مابعرف .. بس قال هي واحكيلي فيها
ملك : هلق البنت حبابة وحلوة مابها شي بس في احلى .. يعني مابتتقارن مع حلا ونور
امها : يسطفل
ملك : يعني قلها لأسماء
امها : قوليلها
ملك : ماشي
نزلت ام عمر وراحت لعند اخوات زوجها المتوفي وانضمت الهن ..و ملك اشرت لأسماء انو تجي لعندها وحكتلها كلشي .. حتى اسماء انصدمت
ملك : شو
اسماء : بس كيف شافها
ملك : شو بعرفني
اسماء : بس مابظن الاء توافق
ملك : معقول
اسماء : اي معقول .. متزوج تنتين وهية التالتة
ملك : بس لاتنسي كمان حياتها رح تنقلب ونسوانو ابدا مانن عائق
اسماء : بقلها
ملك : ماشي .. وانا ببقى بحكيكي وبسألك
اسماء : هههههه التهي بحالك انت
ملك : الا ما افضى وحكيكي هههه
اسماء : ماشي انا صار لازم روح .. الف مبروك يا عمري وان شاء الله زواج الدهر
ملك : حبيبتي عقبالك
بوسو بعض وراحت اسماء اخدت الاء وراحو على البيت
~~~~~~~~~~~~~~•
اول ما دخلو على غرفتهن .. الاء راحت على كتبها يلي تركتهن مفتوحين واسماء وقفت قدام المراية وبلشت تشلح وتطلع بالمراية على اختها وتحكي حالها : معقول عجبتو وهية هيك ... اي ليش شبها الاء والله مافي منها.... بس انو كيف شافها وعجبتو بين مية بنت حلوين ولابسين أحلى لبس .. وبعدين نسوانو كتير حلوين
رفعت راسها الاء ولقت اسماء صافنة فيها
الاء : شبك وليه جدوبة وين شاردة
اجت اسماء وقعدت جنبها وقالت : الاء شفتيه لخالها لملك
الاء : ماشفت حدا .. شو شكلو
اسماء : حليوة ومهيوب ... ماشفته هو و نسوانو الحلوين
الاء : لا .. اي صح شفت تنتين كتير حلوين كانو قاعدين مع بعض هدول هنن
اسماء : اي وجوزهن شفتيه
الاء : لا كانو قاعدين لحالن .. بس عنجد كتير حلوين
اسماء :معك حق .... بس جوزهن شافك
الاء : شافني الي .. وانت كيف عرفتي
اسماء : شايفك ودالل اختو عليكي قال عجبيته
الاء : هههههههههههه عم تسلبيها علي قومي قومي بدلي تيابك وروحي نامي .. يمكن اثرت عليكي هديك الاجواء
اسماء : بلا مسخرتك عم احكي جد
الاء : طيب جيت معك .. كيف شافني .. او لنفترض شافني ... شو يلي عجبو فيني
اسماء : شو مستقلة بحالك
الاء : بس مو بهل المنظر .. وبعدين شو جايني من اعجابو
اسماء : قال بدو يطلبك
الاء : اي لااا هيك كتير ههههههه
اسماء : والله عم احكي جد .. ملك حكتني لحكيكي
الاء : كل يلي قعدتن بالصالة نص ساعة .. لحق يشوفني وينعجب فيني ويطلب من اختو تحكي فيني واختو تحكي بنتها وبنتها تحكيكي ... قومي عنا ياااه
اسماء : والله عم احكي جد
الاء : كمان رح اجي معك ... واذا عم تحكي جد شو المطلوب مني انا هلق .. قوم نتف تيابي من الفرحة ... ماعم تقولي متزوج وتنتين ياريت وحدة متخلية مني اني اقبل .. ليك هالعالم
اسماء : بس معو مصاااري كتير بصير عندك بيت وسيارة لحالك
الاء : يضرب منو لمصاريه ... عاملي حالو سلطان زمانو والنسوان عندو متل الجواري وايمت ماحب بروح بيتزوج ... ماعندو تنتين متل القمر ولسه يدو يتزوج .... هههههههه بس تعي لهون دخلك شو عجبو فيني ... متأكدة قصدن علي
اسماء : هههههه والله مابعرف هيك قالولي .. بس والله انك حلوة لي هيك عم تحكي عن حالك
الاء : بس مامتل نسوانو ... نقطة ترشو اللاهي
اسماء : يعني شو قلن
الاء : بالله شووو... اكيييددد لاااا شو مجنونة انت
اسماء : لو طالبني الي لوافق
الاء : اي ماصار شي قوليلن اختي مابدها بس انا بوافق
اسماء : تضربي ايه
الاء : ههههههه قومي قومي ... الله يثبت علينا العقل والدين
~~~~~~~~~~~~•
تاني يوم
ببيت ام عمر
قاعدة ام عمر وابنها واخوها هشام ونسوانو
ام عمر : اخي والله بكير ماشفناكن منيح
هشام : والله مافيني اتأخر اكتر من هيك ومشان الولاد لحالن هنيك مع الدادا
ام عمر : طيب ليش ماجبتوهن معكن لكن شو هالقعدة ٣ ايام بس
هشام : والله الشغل لفوق راسي وجيت على عجلة كرمال عرس ملك
عمر : طيب ع القليلة شي يوم انا لسه ماشفتك منيح يا خال
هشام: ان شاء الله برجع بهل القرب شي اجازة طويلة شوي
ام عمر : ايمت الطيارة
هشام : ساعة ولازم نكون بالمطار
ام عمر : الله يسرلكن يارب وتوصلو بخير وسلام
هشام ونسوانو : الله يسلمك يارب
نور : حكيتي مع العروس اليوم
ام عمر : كيف لكن .. حكتني من المطار رايحة يعملو شهر عسل بتركيا
حلا؛ ابن عمي خدنا عتركيا كتير حبيتها بعد اخر زيارة
هشام ؛ ان شاء الله
عمر : ضبطلنا وضعنا عندك
اتطلع بأختو يلي رفعتلو بحواجبها
هشام: اذا مابتقنع امك وتطلع انت واياها مافي
عمر : والله عم اقنعها بس متل مانك شايف
هشام : اي صح اختي اسمعي مني واطلعي معي على قطر بتضلي حدي وبضل اطمن عنك على طول
ام عمر : مابقدر اترك بيتي بعد كل هالعمر وسافر ... والحمد لله مو ناقص علينا شي
هشام : كرمال عمر خليه يشوف حياتو
ام عمر : ليش شبها حياتو هون .. هي انت يكتر خيرك مضبطلو وضعو وفتحتلو محل الجوالات وعايشين ببلدنا معززين مكرمين
عمر : امي بس انا حابب اطلع
هشام : خلص ببقا بضبطلكن زيارة تغيرو فيها جو .. شو اختي
ام عمر : اذا زيارة ماشي
هشام : لكن انتو ايمت بتحبو بس خبروني
ام عمر ان شاء الله
هشام : يلا نحنا صار لازم نروح
ام عمر : الله ينور طريقك يا اخي
قامو ومشو لعند الباب وحكي هشام : اختي مابدي وصيكي اي شي بتحتاجيه فورا بتخبريني
ام عمر : الله لا يحرمني منك ... ليه انت عم تخليني احتاج شي
هشام : لك انت الروح والروح بترخصلك والله
ام عمر : تقبر قلبي يا حق
هشام : اي اختي ابقي خبرني شو بصير معك بالموضوع يلي قلتلك عليه
ام عمر : اي صح انا لما حكيت مع ملك كانت حكيانة مع اختها للبنت
هشام : اي وشو كان ردهن
ام عمر : لا مابدا
هشام : عم تحكي جد
ام عمر : اي والله ... قال هية مابتنزل على ضرة كيف على تنين
هشام : ما شرحتلها انو مارح تكون غير رضيانة ومارح نقص عليها شي
ام عمر : حسب مافهمت قال اخدت الموضع بمسخرة وفورا سكرت الموضوع .. بس اختها بتقبل اذا بدك
هشام : خلص سكري ع القصة هلق
ام عمر : متل مابدك
عمر : شو خال بدك تجدد
هشام : ههههه اي عقبالك
عمر : آااااامين ههههه
نور وحلا اتطلعو ببعض وابتسموا وطلعوا من البيت بعد ما ودعو ام عمر
~~~~~~~~~~~~~~•
بعد ايام
&&قطر&&
باحدى المطاعم الفاخرة
قاعد هشام مع تنين من اصدقائو وقدامن اشهى انواع الاكل ... كانو عم ياكلو ببطئ ويتبادلو الحديث
رن موبايل رفيقو ورد : الو ... اهلا حبيبتي ... اي بالشغل ... لاء ، لا تنطروني على الغدا ... اي عندي غدا شغل بعد شوي .... اوكي .. باي
هشام : ولاه رياض لي عم تكذب ع مرتك
رياض : لأنو اذا بتخبر انو قاعد معك تحديدا لتحرد شهر عند اهلا
هشام : اف ليش
رياض : خايفة اتقلد منك واتزوج
هشام : اخس ع الزلم ..
رياض : مابكفي انت زلمة خلص حل عنا
هشام : اذا الواحد ما تزوج تنتين وتلاتة مانو زلمة
الشب التالت حسن : لي ناوي ع التالتة يا صاحبي
هشام : اي والله
رياض ؛ ونسوانك
هشام : شبهن
رياض : مابيحكو شي
هشام : ماعجبهن الباب بفوت جمل .. بس لأ عاجبهن وبيفرحولي كمان
حسن : طيب شو ناقصك لتجيب هالهم على قلبك
هشام : مين قال هم ... والله مافي أحلى من النسوان ... وبعدين ماني عم اعمل شي بالحرام
رياض : وعم تعدل
هشام : مافي حدا بيعدل مضبوط مية بالمية ... بس الحمد لله مو منقص عليهن شي
حسن : طيب انت عنجد خرج لسه تجيب التالتة
هشام : شباب وحياتك
رياض : ايه الله يهنيك
هشام : عقبالكن
حسن : هههههه لك نحنا بوحدة ماعم نقمط
هشام: قلتلكن مانكن زلم
حسن : خلينا الزولمية الك
رياض : المهم هشام شو ناوي تعمل بخصوص المشروع الجديد
هشام : هاد يا سيدي ....
~~~~~~~~~~~~~•
£££الشام££££
طالعة الاء من الحمام ومعها كنزة ودخلت على المطبخ لعند امها
الاء : ماما ما عم تجي الكهربا يعني
امها : لا والله يا بنتي صرلا كم يوم مقطوعة
الاء : طيب تيابي كلهن بالغسيل شوبدي البس بكرا على الجامعة
امها : شوبدك تلبسي لاغسلك اياه على ايدي
الاء : لا ماما يسلم ايديكي انا بغسلن
امها : هاتيها والله بغسلك اياها
الاء : لا ياعمري انا بغسلها
طلعت اسماء من الغرفة وقالت : مين بدو يغسل
الاء : انا
اسماء : تغسليلي هالبنطلون معك
الاء : ماحزرتي كل حدا يغسل لحالو
اسماء : اي بلاا
الاء : اي هيك بدك
اندق الباب وراحت الاء تفتح واسماء عم تبربر تضرب هالعيشة .. والله الوضع صاير بهوي .. وكأنو عم يطفشونا من هالبلاد ماعجبك احمل حمالك وانقلع
الاء قبل ماتوصل على الباب : انقلعي مين ماسكك
اسماء : افتحي افتحي لنشوف مين متذكرنا
فتحت الاء وكان عسكري
الاء : لك اهلاااا
لؤي : كيفكن يا حلوين
الاء : اشتقنالك
دخل وضم اختو وباسها واجت اسماء سلمت عليه وباستو .. واجت امو سلمت عليه وباسها من راسها
امها : اهلين ياتقبرني نورت
لؤي : نورك يا غالية
الاء ؛ كالعادة حمو الحمام
لؤي : برافو حافظين الدرس
الاء : معقول ننساه
امو : فوت سلم ع ابوك لبين ماحطلك شي تاكلو على السريع
لؤي : شو اخبارو
امو : على حالو
~~~~~~~~~~~~~~
عند ام عمر
قاعدة ام عمر عم تحكي فيديو مع اخوها هشام
هشام : كيفك يا غالية
ام عمر : والله مشتاقتلك
هشام : طمنيني عنك شو الاخبار
ام عمر : والله ضايجة على غياب ملك
هشام : هي سنة الكون يا اختي .. وانت كمان زوجي عمر
ام عمر : عن قريب ان شاء الله
هشام : ان شاء الله ، اي اختي بدي اسألك صار شي بخصوص موضوع البنت يلي قلتلك عليها
ام عمر : لا ابداً .. تسكر من وقتها
هشام : امممم
ام عمر : عنجد اخي حاطط البنت ببالك
هشام : اي البنت عجبتني
ام عمر : هلق البنت حلوة الله يستر عليها .. بس مابتتقارن بنسوانك
هشام : مو قصة جمال يا اختي .. بس هالبنت فيها شي غريب من اول ما شفتها لفتتني ... نظرة عيونها خاصة .. وكمان بدي اعرف ليش رفضتني
ام عمر : البنت حرة مابدها تنزل ع ضرة قصدي ع ضراير
هشام : بس غيرها بيقبل
ام عمر : معك حق .. الناس بدها منفذ تطلع من هالبلد حتى لو على ضرة .. وكيف اذا كان وضعو متل وضعك ... على فكرة اختها قالت ياريت يطلبني الي
هشام : طيب هية ليش رفضت
ام عمر : كل حدا وبفكر بطريقة مختلفة .. طيب شو رأيك اطلبلك اختها
هشام : لا انا مصر عليها
ام عمر : يعني بدك ترجع تطلبها
هشام : اي .. بس اسمعي كيف .........
~~~~~~~~~~~~~~•
بعد يومين
دخلت الاء واسماء على البيت وهي جيتهن من الجامعة
الاء : قولك امي شو طابختلنا اليوم
اسماء : مو شامة شي
الاء : كأنو عنا ضيوف
اتطلعت اسماء محل ماعم تطلع اختها على الاحذية الغريبة يلي بخزانة الاحذية
اسماء : مين ياترى
الاء : ومافي الهن صوت
اسماء : ماما نحنا جينا
الاء : ضروري تفضحي الدنيا .. كان خلينا نتسلل لنشوف مين
اسماء : دخيلو المحقق كونان ههههه
طلعت امهن من غرفة الضيوف : انتو جيتو
الاء : لا لساتنا هنيك ههه
امهن : بلا علاك وتعو سلمو على الضيوف
اسماء : مين عنا
امهن : مابتعرفوهن تعو سلمو وروحو على غرفكن
دخلت الاء واسماء وهنن حاملين كتبهن و مو عارفين شي على غرفة الضيوف وكانو نسوان تنتين
سلموا عليهن وتوجهو لعند الباب
حكت وحدة : لحظة يا بنات اقعدو معنا شوي
اتطلعو ببعض وقعدو
امهن : يا اهلا وسهلا .. هدول الاء واسماء وهي جيتهن من الجامعة
: ومين الاء ومين اسماء
اسماء مع ابتسامة : انا اسماء
الاء : وانا اكيد الاء ههههه
: ماشاء الله عنكن الله يفتحها بوجهكن يارب
الاء : شكرا خالة ... نحنا بدنا نستأذن منكن .. بدنا نغسل ونبدل تيابنا
: اي اكيد اذنكن معكن
الاء : مية اهلا وسهلا شرفتونا
قامت الاء وسحبت اختها
الاء : مين هدول
اسماء: انا بقول خطابة
الاء : معقول
اسماء : بس قولتك لمين
الاء : ان شاء الله يكون الك واخلص منك
اسماء : بالله شووو ليش مايكون الك مو انت الاكبر
الاء : سنة مو بيناتنا
اسماء : ليروحو بنفهم شو القصة
~~~~~~~`~~~•
المسا
البنات عم يلمو العشا مع امهن واسماء عم تزن على راس امها : ماما .. هدول شوبدهن
امها بابتسامة : هلق بعد العشا بنحكي
الاء : مشان الله احكيلها لانو نقمت راسنا
امها : هلق بنحكي قدام ابوكي واخوكي .. حتى بعتت ورا اخوكي حمزة
الاء : اف يعني شغلة كبيرة
اسماء : خطابة ماهيك
امها : اووف منك .. اي هيك
اسماء ؛ولمين
امها ؛ احزري
اسماء : لا الاء مو هيك
الاء : وليش مايكون الك
اسماء : لانك اكبر مني
الاء : هالسنة سويتها كبر .. وبعدين ان شاء الله مفكرة حالك بيبي
امهن : خلصونا حاج نق انت واياها
اسماء : بالاول قوليلي لمين العريس
امهن : ل الاء
اسماء : شفتتيي
الاء ؛ وعاساس انا هلق وافقت
صوت جرس الباب
امهن : هاد اكيد حمزة روحو انا رايحة افتحلو وانتو جهزو الشاي
الاء : حاضر ماما
اسماء : قلتلك الك العريس
الاء : لا تصرعيني .. بالاول خلينا نشوف شو مواصفاتو عريس الغفلة
~~~~~~~~~~~~~•
تجمعت العيلة بالاضافة لحمزة هو الاخ الاكبر .. يلي متزوج وساكن بعيد شوي عنهن .. مبين عنو ادمي وحالو على قدو متل وضع اهلو
اسماء : يلا ماما احكي
ام حمزة : رح احكي .. بس انت ريحيلي حالك شوي
اسماء : حاضر
ام حمزة : اليوم اجانا خطابة ل الاء
حمزة : اي شو موصفاتو شو بيشتغل
الاء كملت : مين دلن علينا
ام حمزة : قال ناس دلوهن علينا قال عنا بنات حلوين ومربياين وخلوقين والجماعة جايين ع السمعة
لؤي : اي كملي
ام حمزة : قال العريس مانو ساكن بسوريا قالوا بالخليج بس ماحددو .. وضعو كتير منيح ... وبدو بنت ادمية وبنت عالم وناس وبتخاف الله
الاء : وفائقة الجمال وعيونا خضر وشقرا وطويلة ورشيقة
ام حمزة : لا ما بهمو الجمال قد مابتهمو الاخلاق .. وبعدين ليش شبك انت اسم الله حولك وحواليكي
الاء ؛ طبعا انا واثقة بحالي بس هيك اغلب المغتربين
ام حمزة : لا من هالناحية ما حكو بس هو قال حاببها سمرة
الاء : هههههه لكن لقى طلبو
اسماء : دخيلا السمورة ... اي ماما كملي
ام حمزة : بس كبير شوي بالعمر
الاء : ماهو انا ناطرة هي ال بس لانو حظي وبعرفو مستحيل تجي كل هالصفات النا
ام حمزة : مانو كبير كتير ..
حمزة : شقد يعني
امو : ٣٧
الاء : بس ١٧ سنة فرق ... مابينحكى فيهن ولو
الكل ضحك
ام حمزة : بس الرجال مابعيبو شي
الاء : لك امي عمرر ١٧ سنة
ام حمزة : بس والله قالو عنو حليوة وصاحب دين وبخاف الله .. ووضعو ممتاز ... بتطلعي من هالعيشي يلي عايشينها لك بنتي
سكتت وماعلقت
الاء : طيب شو وضعو ارمل مطلق متزوج
ام حمزة : اعزب
الاء : اي اشوا
ام حمزة : شو قلتي
الاء : وبركي طلع كلشي عم يحكو غلط .. وطلع ابن حرام ولما طلعت استفرد فيني
ام حمزة : بنعمل فترة خطبة وبتحاولي تكتشفي شخصيتو
الاء اتطلعت بابوها يلي ماحكي ولا كلمة وقالت : شو رأيك بابا
ابوها : يلي بتشوفيه يابنتي .. بس تعرفي عليه مو غلط
اسماء : اي صح .. هي الفرصة مابتتكرر .. واهم شي انو مليان المصاري بهل الوقت هية كلشييي ... ويلي بقلك غير هيك كذاب
لؤي : طيب اختي في حدا بحياتك
ضحكت : من وين ياحسرة .. ليش هالبلد ضل فيها شباب
لؤي : انا بقول تعرفي عليه مانك خسرانة ... والجماعة جايين من الباب
الاء : طيب ماما عطوكي شي صورة الو
امها : اي اخدو رقمي وبعتولي اياها على الواتساب
الاء : فرجينا
عطتها الموبايل وقالتلا : اخر اسم مراسلني
اخدت الموبايل وفتحت على الصورة ... ويلي كان بالصورة هو هشام ... باعت صورة حلوة جنب برج خليفة .. كان انيق ومبسمو حلو
الاء : حلو مابو شي ..بس كانو شايفتو من قبل
اخدت اسماء الموبايل وقال : هاتي لشوف اي بجنن .. قال مابو شي قال (بعدين وين شايفتيه )
مررت الموبايل لحمزة وابتسامة بمغزى على وجها
حمزة : مهيوب .. اي ليش لا اختي شوفي
اسماء : اي اختي ايييي
الاء : طيب ماما قوليلن مبدأيا موافقين ..
الاب : على خيرة الله
اسماء : والله نقشت معك يا الوء
الاء : بكير على هالحكي
~~~~~~~~~~~~•
خلصت السهرة ودخلو اسماء والاء على غرفتهن
اسماء بفرح وحماس : حاسة هالشغلة رح تضبط .. والله فرحتلك من كل قلبي
الاء : ماشي الحال ع القليلة احسن من خال رفيقتك ..
اسماء : خلص شيلك منو .. ركزيلي بالعريس تبعك هلق
الاء : ههههههه عنجد كل مابتذكر هداك بيخطر على بالي مسلسل حريم السلطان ... لك شو كان اسمو السلطان ذكريني
اسماء: اممممم ... والله معد اتذكر
الاء : مصطفى ؟؟
اسماء : لااا .. مصطفى ابنو ... اييي اسمو سليمان هههههه
الاء : ايوا هاد هو ... السلطان سليمان ..ههههه شي حلو قال بدو اياني انزل ع نسوان تنيتن
اسماء : عفكرة هداك لسه احلى من هاد ... ومعو مصاري اكتر
الاء : دخيلك انت ومصاريه .. برأيي بدال ما عم يدور على زوجة تالتة يروح يدور على شي طبيب نفسي مشان يعالجو من عقدة النقص يلي عندو
اسماء : دخيلك انت ... مابيعجبك العجب
الاء : هيك الله خالقني
لفت الاء وراحت على الباب لتطلع من الغرفة
اسماء : ع وين
الاء : صلي ركعتين استخارة وشوف اذا هالعريس في خير او لأ
طلعت الاء .. بقيت اسماء شاردة بالفراغ يلي تركتو اختها .. لتتذكر شو صار معها امبارح
قاعدة هية وام رفيقتها ملك بكافيتريا .. وهية كان معها كتب الجامعة ومبين انها طالعة من الجامعة لتقابلها
اسماء : كيفك خالة وكيفها ملك
ام عمر : الحمد لله تمام بتسلم عليكي
اسماء : الله يسلمك يارب ،اي خالة في شي بصراحة استغربت اتصالك وانك مصرة لتشوفيني
ام عمر : اي والله بدي حكيكي مشان اختك
اسماء : مشان اخو حضرتك ؟
ام عمر : اي هاد هو السبب .. هية ليش رفضت شو سببها
اسماء : اخدت الموضوع بمسخرة كبيرة ... لمجرد تفكير مابتفكر انو تنزل على ضرة
ام عمر : بس مارح ينقص عليها شي
اسماء : هية حرة ولا انا غلطانة
ام عمر : اكيد حرة ... بس اخي طلب مني ارجع افتح الموضوع تاني مرة
اسماء : طيب شو سبب هالاصرار .. انو شو يلي عجبو ب الاء .. وهو يمكن لمحها لمح بعرس ملك
ام عمر : مابعرف .. بس لو مو عاجبتو وكتير مابيرجع بخليني افتح الموضوع
اسماء : بس لو انفتح الموضوع عشرين مرة الاء مارح توافق
ام عمر : هو طلب مني طلب بصراحة
اسماء : شو هو
ام عمر : انو بيتقدملها عأساس انو اعذب
اسماء : تكذبو عليها
ام عمر : هو هيك طلب .. وبصراحة انا بعرف انو اخي غلطان بس مابقدر وقف بوجهو او امنعو عن شي .. انت بتعرفي اخي الو فضل كبير علي وعلى عيلتي ...
اسماء : والله مو عارفة شو قلك بتسايريه هي شغلة بتخصك.. بس انا مارح كذب على اختي
ام عمر : رح تكذبي لمصلحتها
اسماء : مصلحتها انو تنزل ع ضراير تنتين
ام عمر : مصلحتها تطلع من هالبلد ويصير عندا بيت وسيارة وخدم وحشم وتكمل تعليمها برا اذا حبت ... تطلع وتدور العالم وتلبس الحرير والالماس .. مين منا مابتتمنى هي الشغلات .. وبالنسبة للضراير ماعندن مانع لأنو هشام كافيهن وشو مابيطلبو بكون عندن ... وفوق هاد كلو كل وحدة من نسوانو ... اخي مخصص لاهلها راتب شهري واخي صاحب دين رح يخاف الله فيها
اسماء ساكتة وماعم ترد
ام عمر : ما مطلوب منك الا انك تسكتي وماتقولي انو هاد هشام خالها لملك
اسماء : ومين يلي رح يجي يطلبها .. اختي بتعرفك
ام عمر : ناس من طرفنا ماتاكلي هم
اسماء : بس انا خايفة على اختي .. شو ماكان هاد شي مجهول
ام عمر : صدقيني كلشي حكيتلك اياه عن اخي صحيح .. والمشكلة الوحيدة هية الضراير .. اخي مارح يخبي عنها وهية مع الايام بتتأقلم
اسماء : طيب موافقة بس بشرط
ام عمر : شو هو
اسماء : تتصلي هلق باخوكي وتفتحي السبيكر وتسأليه ليش مصر على هي البنت بدون مايحس انو انا جنبك
ام عمر : موافقة
اخدت موبايلها وفورا اتصلت بأخوها ليجيها الرد
ام عمر : كيف اخي
هشام : مشتقلك يا غالية
ام عمر : فاضي دقيقتين
هشام : امريني
ام عمر : سؤال ورد غطاه ليش مصر على هي البنت
هشام ساكت
ام عمر : جاوبني بصراحة .. ولاتخبي علي
هشام : انا شفتها لدقايق مابينعدو .. بس عنجد لهفلا قلبي ... وحسيت انو بتملك شي مميز وحابب استكشفوا
ام عمر : بس انا لقيتها عادية
هشام : لأنها عادية مميزة ...
ام عمر سكتت
هشام : لقيتي جواب على سؤالك
ام عمر : مابعرف
هشام : طيب شو صار معك
ام عمر : رح شوف اختها واحكي معها لانو اختها بتعرفك
هشام : طيب اختي اعملي جهدك .. واذا مشي الحال قولي لاختها الها مني هدية ايفون ١٥ برو مكس
لتتسع عيون اسماء من الصدمة
###باااك ###
بنرجع للحاضر واسماء شاردة ومبتسمة بالهدية يلي رح تجيها
~~~~~~~~~~~~~~~
: £££قطر£££
باحدى احياء قطر الفخمة .. موجودة فيلا هشام ... كانت فيلا كتير حلوة وشيك ... كلشي فيها حلو من الفرش والاثاث للتحف يلي فيها ... وبجناح فيها بيجي بالطابق الثاني وهاد الجناح بكون لحلا ... وموجود فيه حلا وهشام ... حلا كانت لابسة فستان كتير حلو وفاردة شعرها الاسود الطويل على ضهرها ولابسة سكربينة كعب عالي وهشام بعدو بتياب الشغل .. قاعد على موبايلو وعم يقلب بالتيك توك
قعدت جنبو وصارت تملسو على شعرتو
حلا : حبيبي ليه بعدك بتياب الشغل
هشام: عم فكر نطلع نسهر بشي مكان شو رأيك
حلا : اي ليش لأ
هشام : قومي جهزي حالك لكن
ورجع يقلب بالتيك توك
حلا ما قامت من جنبو : شو كأنو عاجبينك بنات التيك توك
هشام : هه انا يعجبوني هيك شكيلات
حلا: ليش التيك توك شوفيه غير البنات
هشام : فيه يمان النجار مثلا
حلا: وبتدعهن
هشام ؛ مو شغلك ... يلا قومي البسي قبل ماغير رأيي
حلا : قبل ما البس بدي احكي معك
سكر الموبايل وحطو جنبو التفت عليها وقال : شوفي عندك هاتي لشوف
حلا : عنجد بدك تتزوج
هشام : شو مصلحتي لكذب
حلا : ولقيت العروس
هشام : اي لقيتها
حلا ؛ طيب ليش بدك تتزوج
هشام ؛ وشو يلي بيمنعني اتزوج
حلا : نحنا شو مقصرين معك
هشام : مو قصة تقصير .. بس حابب جدد حاسس حياتي صايرة مملة
حلا : طيب لا تتزوج وانا مستعدة لكلشي بدك اياه
هشام : طيب مارح اتزوج بس بشرط
حلا : شو هو
هشام : باخد منك سيارتك وبطاقة البنك .. مصروفك بتصيري بتاخديه مني مافي طلعة من البيت الا بأذني وتبطلي نادي وصالونات والى اخره...
حلا : كل هدول
هشام : لسه ماخلصت .. بدي تضلي بالبيت ايمت ما احتجتك لاقيكي وصبحيات وجمعات نسوان بدي تلغيها
حلا ؛ ونور كمان
هشام ؛ نور ما اعترضت اول مرة لتعترض تاني مرة
حلا : بس مافيني بلا النادي مشان رشاقتي
هشام : وهي صالة الرياضة تحت شو شغلتها وحديقة الفيلا كبيرة اركضي فيها قد مابدك
حلا ؛....
هشام : لسه ماخلصت .. وبدي ولد
حلا ؛ لا هيك كتير
هشام ؛ وين الكتير بالموضوع .. يلي عايشتيه نص بنات الوطن العربي بتتمنى تعيشيو .. ويلي بدي احرمك منو كمان اغلب البنات بتتمنى توصلو .. وين الكتير بالموضوع .. وعشان الولد انا بدي ولاد نور بتتعب بالحمل وبتولد قيصرية مقدر وضعها وانت جبتي هالبنت ومعد بدك ومع هيك انا ماعم اجبركن على شي ... بس انو توقفي بوجه جازتي .. نفذي شروطي مابتزوج
حلا : ساكتة
هشام : شو قلتي
حلا : مو بكير على الولاد لسه شهد صغيرة .. وكمان نور عندا ٢ هي صارو ٣
هشام : بنصبر شوي ع موضوع الولاد ... بتنفذي باقي الشروط
حلا (بتهرب) : انت عم تحط شروط تعجيزية .. خلص روح تزوج الله يهنيك
هشام : هههههه بعرف مارح تتخلي عن رفاهيتك
حلا : مو هيك ابدا
هشام : خلص انسي القصة .. شو نروح نسهر
حلا : ثواني لألبس عباتي وحجابي
هشام : يلا بسرعة يا حلو
~~~~~~~~~~~~~•
في الشام
اليوم جمعة .. وعيلة الاء كلها مجتمعة بالاضافة لحمزة وزوجتو
كانو قاعدين على سفرة الغدا وعم يتغدو والغدا كان صنيتين جاج ببطاطا وجنبها سلطة
ام حمزة لحمزة : شو امي ما وصيتو على شي بيبي
حمزة : بكير امي بكير
امو : ليه بكير هي صرلكن سنتين متزوجين
حمزة : يا امي من وين بدنا نصرف عليه .. انت شايفة هالوضع
امو : يا امي كل ولد بيجي بتجي رزقتو معو
حمزة : يا امي معك بهل الحكي .. بس مافي بصيص امل انو الواحد تتحسن معيشتو او ينصلح حالو ... الوضع كل مالو لورا
لؤي ؛ والله معك حق .. كلو بالناار ومانو موجود والله العالم عايشة من قلة الموت
حمزة : احسن الشي الواحد يهج
لؤي : وين بدنا نهج اذا بلادنا ماطايقتنا
حمزة : عم فكر سافر
امو : يووه ع وين بدك تسافر
حمزة : شو بعرفني ع شي دولة اوربية
لؤي : تهريب
حمزة : لكن نظامي
امو : لا امي برضاي الله عليك لأ .. والله عم يقولو فيها خطورة ويمكن تموت ع الطريق بشي غابة او بالبحر
حمزة : امي عأساس نحنا هلق عايشين
امو : المهم انو عم نشوفك وانك بخير
ابوه : ابني بلاها ... ماناقصنا والله بكفي اخوك مات ماني قادر على خسارة تانية
حمزة : ليش عم تحتمو انو رايح موت يمكن اوصل وتتحسن اموري وبحسن اموركن ... وباخد مرتي وساعتها بخلف دزينة ولاد
اسماء : عفكرة اغلب يلي الناس هون يلي وضعهن منيح عم يجيهن من برا كل حدا الو حدا برا وعم يبعتلوا لحتى الناس قادرة تتاقلم شوي
ضحكت الاء وقالت : بكرا اذا وافقت على العريس بصير ببعتلكن ههههه
اسماء : انت وافقي ومابدنا منك شي ههههه
الاء : لا ان شاء الله رح وافق مبارح بعد ماصليت استخارة انشرح صدري
امها : الله يقدم يلي فيه الخير
مرت حمزة : رديتو خبر للجماعة
ام حمزة : لا والله .. للمسا بركي هنن بيحكو
الاء : اي احسن لا تحكيهن انت مشان مايقولو ماصدقو واجاهن عريس
اسماء ؛ من هلق انا بدي ايفون
امها : اسكتي اسكتي شو نحنا بالمرة لنخلي الصهر يبعتلنا مصاري ... هية تكون مرتاحة بحياتها ومبسوطة ومابدنا شي
لؤي: صح حكي امي ... خلي شي حدا منا تنقش معو
حمزة : انت ايمت بتخلص اجازتك
لؤي: يومين
امو ؛ ان شاء الله هالمرة المكان آمن
لؤي؛ بنقول ان شاء الله
امو: اي الله يوقفك خليك منتبه
لؤي: ماشي ماشي
رن جوال ام حمزة قامت لترد وحكت : هدول الجماعة
الاء : ههههه ردي لنشوف بطلو
اسماء : بلشت البومي
الاء : ههههه هلق شوفي .. انت بتصدقي انو تضبط مع حدا مننا المنحوس منحوس
ردت ام حمزة : اهلا وسهلا ... الحمد لله .. انتو كيفكن .... دووم يارب .... بصراحة مبدئياً ماعنا مانع بس حابين نتعرف على العريس اكتر ... طيب ماشي ... على بركة الله
سكرت وحكت اسماء بحماس : شو امي
امها : قال العريس هالفترة مافيه يجي بس رح ياخد رقمي ويتصل فينا لنتعرف عليه اكتر
الاء : يعني مابطلوا
امها : لاا ... يلا اذا خلصتو قوموا فوتوا هالاكل ع المطبخ يمكن يتصل بأي وقت
وبالفعل متل ماحكت ام حمزة مافي شوي الا واتصل رقم طويل فيهن مكالمة فيديو
حمزة : شكلو مستعجل ههههه
ضحكوا وقعدت ام حمزة بعد ماضبطت حجابها وجنبها جوزها وبالجنب التاني حمزة والبنات قربو يتفرجو بدون مايظهرو على الكاميرا
فتحت الكاميرا وظهر هشام
هشام : السلام عليكم
ردوا ؛وعليكم السلام ورحمة الله وبركاته
هشام : كيف الحال .. ان شاء الله انكن بخير
حمزة: بخير والحمد لله
هشام : بعرفكن عن حالي هشام القاضي
حمزة : وانا حمزة قمحاني وهي والدتي ووالدي ام حمزة وابو جمزة
هشام : تشرفت فيكن والله .. كيفها صحتك يا عم (وقصدو ابو حمزة وانتبه على الكرسي المتحرك يلي قاعد عليه )
ابو حمزة : اهلا .. اهلا يا ابني
حمزة : ابي شوي تعبان ومابيحكي زيادة لأنو بيتعب
هشام : ماعقلبك الا العافية ياعم
مرت حمزة همست للبنات : عنجد هالشب محترم واكابر
ابو حمزة : الله يعافيك ... ابني
هشام : وانت يا خالة كيفها صحتك
ام حمزة : الحمد لله بالف خير
هشام : دووم يارب ، اي ياجماعة بعرفكن عن حالي انا هشام وعمري ٣٧ عايش بدبي شغلي منيح والحمد لله ... وناوي القرب منكن .. بعتت لقرايبيني يلي بسوريا انو بدي بنت مرباية ومحترمة وبتخاف الله وسألوا وفاعلين الخير دلوهن عليكن .. وانا بصراحة ع الحكي حسيت هالمحروسة هية المناسبة وان شاء الله يتم النصيب وتكون من نصيبي
حمزة : مافينا نقول غير ان شاء الله
هشام : مظبوط .. وانا فتت من الباب وحسب الاصول وشو يلي بتحبوه تعرفوه عني انا جاهز وتحت امركن ... ولو الامر بيسمح كنت نزلت .. بس حاليا ملزوم شوي بالشغل
حمزة : شو بتشتغل اخي
هشام ؛ حاليا بالتجارة
حمزة : الله يقويك يارب ويرزق
هشام : تسلم
حمزة : شو شغلتك بالضبط
هشام : موظف .. بس براتب منيح الحمد لله .. عندي شقة وسيارة والحال مستور والحمد لله
همست الاء : وباينتو جريء وماخجل .. بس كأني شايفتو
همستلا اسماء : اذا الزلمة مدري من ايمت مسافر شو شوفك فيه
الاء : معك حق
حمزة : وشو عن اهلك
هشام : والله اهلي متوفيين .. وماعندي غير اخت وحيدة... هية عندكن بسوريا بس بعيدة عنكن ولو قريبة كانت هية يلي اجت وخطبتلي
حمزة : كل ناسكن خير وبركة
هشام : البركة فيكن اخي
انضم لقعدتهن لؤي وظهر على الكاميرا
لؤي : مرحبا
هشام : اهلا
لؤي : بعرفك عن نفسي انا لؤي
هشام : ماشاء الله عنكن كم شخص
حمزة : نحنا اخين وبنتين .. وكان في شب بيناتنا توفى بالاحداث
هشام : الله يرحمو
حمزة : تعيش
اخدتن السوالف وحكو كتير .. عن شغل حمزة وعن لؤي وعن الاوضاع .. وهشام كان سلس بالحكي وخلاهن يحسو بالراحة وهنن عم يحكو معو
وبنهاية المكالمة حكي هشام : من بعد اذنك اخي حمزة انا حابب اتعرف على المستورة اذا ممكن نتواصل على الواتساب بعلمكن طبعا مابدنا اكتر من يومين واذا عجبتها وعجبتني بنحدد موعد الخطبة
حمزة : حقك ... انا هلق بتواصل معك من رقمها
هشام : ع راسي اخي
حمزة : يسلم راسك
هشام ؛ وبكل الاحوال انا كتير فرحت انو تعرفت على ناس طيبين متلكن ... واذا احتجتو اي شي انا موجود وبالخدمة
حمزة : والله باين عليك ابن اصل ومابتقصر
هشام : مابنقصر مع الطيبين امثالكن ان شاء الله
حمزة : بارك الله فيك
هشام : انا بدي استأذن بس صار لازم سكر
حمزة : بامان الله
سكر حمزة والتفت ع اهلو
اسماء : كتير جنتل
لؤي: والله مبين عنو ابضاي ومحترم
الاء : بس سؤال محيرني
حمزة : شو هو
الاء : المكالمة ماقطشت بالعادة اذا بدنا نحكي مع حدا بنسمع الحارة ونحنا نصرخ
ولؤي : دخيلك انت هاد يلي لفت انتباهك
امها : هي تيسير من رب العالمين
الاء ؛ ههههه
ابوها : شو يابنتي
الاء : عجبني متل ماعجبكن .. محترم ومتحدث وبينتقي كلماتو .. ومتواضع
حمزة : ومتل ماقال احكي معو هاليومين ان عجبتو بعض كان بها ما اتفقو بتحظريه وكل مين ببيتو
الاء : على خيرة الله