رواية احتواء القاسي
الفصل الخامس والخمسون 55
بقلم سوسو تويكس
ما كان احسن ليك تلبسي التوب بدل الفستان ده_لينه:وانا عاجبني الفستان البس التوب لي؟، وما ممكن معاك كل شويه تقعد تنكد علي بكلامك ده، يعني قصدك انا سمنتا وبقيت سمينه صاح_ اتكلم معاي بهدؤ بعد ما شافني شويه كده وابكي :اهدي ما تنفعلي، انا ما قصدي ليك كده _لينه:اها قصدك شنو يعني_معتصم: ننتي عايني بالعقل كده انتي في الشهر الكم_قلت وانا باكل اخر حبات تسالي عندي:دخلت في ال8 بأسبوعين _معتصم:هدى بي نفسك قلتي ال8 يعني بطنك كبرت، ومهما كان الفستان واسع، ما ح يكون مريح زي التوب_لينه:التسالي كمل، انا عايزه داردومه جامبو من المره ديك _معتصم:انا بقول في شنو وانتي في شنو، خلاص دقيقه خليك هنا انا بمشي بجيبو _وجهتا نظري للبحر مع نسمات اليل البارده الضلام والنور الطالع من القمر والعربات البتجي الظلط اصوات همسات بعيده من اي اتنين جمب بعض وهدوء في نفس الوقت ده كلو كان جو خطير، عرفتوهو صاح🐸شارع النيل✨_مد لي الاسكريم وهو بقول:هاك ما وريتيني عايزه باي نكهة جبت ليك منقه_شلتو وبديت اكل فيهو، كنا بنتمشا قال لي:ما مصدق تاني من بكره ما ح اشوفك الا من بعيد، البيت ح بكون فاضي بلاك والله، تاني انكد على منو _طبعا حددو لي الولاده بعد اسبوعين عمليه، خالتو ساميه أصرت وقت الولاده اكون هناك،_لينه:ح توديني متين بعد الفطور صاح_معتصم:خلي بليل ياخ عايز اقضي معاك وقت حبه، وحاخد ليك اذن من الجامعه والمحاضرات خلي يرسلوها ليك _وقفت ومسكت بطني وقت حسيت بألم، من الصباح كنت حاسه بالم بس ما وريت معتصم عشان ما يمنعني الطلعه _معتصم:مالك وقفتي فيك شي _لينه:لالا شويه الم بس_معتصم:عشان كده ما كنت عايز اطلعك، حسي خلي نرجع _لينه:لالا ياخ نحنا بتين جينا لمن نم.... ايي بطني_مسكتا بطني وقت الألم زاد شويه كده الألم بقا زايد زياده لمن ما قادره اقيف بقيت اصرخ ومعتصم مييت من الخوف الناس انتبهو معاي، بقيت اصرخ زياده وماقادره اقيف، ما حسيت الا بنفسي وانا في الهوا، بغمض عيوني وبفتحهم يا داب استوعبتا انو معتصم شايلني وملامح من الخوف اتغيرت عديل، ركبني العربيه وبقيت شبه فاقده الوعي، حسيت بالعربيه وقفت وقبل ما ينزلني من العربيه غطا لي شعري الكان كلو طالع، قلت ليهو وانا بقيت ما قادره اتنفس من الالم:ما وقت غيرتك يا معتصم يااخ _ ما رده على بعد كمل تكويز الطرحه حتى دخلني المستشفى وتاني ما عارفه الحصل شنو __ بلسان معتصم:مضو ال5شهور دي بخيرها وشرها، ومزاج لينه المتقلب، وزعلها من اقل شي، طول ال5شهور دي ما كنت بخليها تعمل شي الا مرات بس بجي على مزاجها تطبخ، وبعد جامعتها فتحت نزلت السنه الرابعه، كنت بوصلها وبترجع بترحال عن ناس امي ومن هناك بجيبا البيت، لحدي ما خلصت السمستر الأول من سنه رابعه ونزلت السمستر التاني، موعد ولادتها قرب وحددو ليها بعد اسبوعين، بس كنت خايف انو يحصل ليها شي لانو تأثير التوأم عليها واضح، جسمها نحف شديد مع انو بتتغذا بس كلو بمشي للتوأم، لحدي ما جا يوم قالت بما انو اخر يوم ليها معاي لانو تاني ح تمشي عند ناس امي، أصرت انو نمشي شارع النيل في اليل داك في الاول رفضتا طوالي زعلت وزعلها طبعا كعب بالزات الفتره دي، في الاخير وافقتا ووقت كنا بنتمشا ما عارف الحصل شنو فجأة بقت تصرخ وانا قلبي وقف عديل مع صوت صراخها، ما عارف زاتو كيف وصلتها المستشفى، كنت متوتر لانو ده ما موعد ولادتها المفروض بعد اسبوعين، استلموها مني لانو حالة طارئه طوالي دخلوها غرفه العمليات، بقيت قاعد برا في الانتظار، اتصلت لي ناس امي وفي ليلهم داك جابهم ماجد بالعربيه، ما قدرتا اقعد بقيت ماشي وجاي والبوظ اعصابي انهم اتاخرو شديد، شويه كده سمعنا صوت بيبي بيبكي، كلنا عاينا لبعض بفرحه، تلقائي ابتسمت بفرح وانا منتظر الممرضه تطلع، شويه كده جات شايله واحد من التوأم وكان ببكي وملفوف بالبشكير ازرق عرفتو ده الولد، ادتني ليهو وكان حاجه كده قدر الفاره بس وجسمو كلو محمر وبس شغال يبكي، بدون ما احس دمعتي جرت معقوله يكون ده احساس الابوة _بقولو الاب ما زي الام، الام بتحس بالشعور ده من وقت هو في بطنها، لكن الاب الا بعد ما يشيلو قدامو، ما انتبهت الا مع ابوي قالي: معتصم اذن ليهو_قربتا منو وانا بأذن ليهو وريحة الأطفال ملتني _بعد اذنت ليهو اديتو لي ابوي وامي دي بقت تزغرت ومعاها خالات لينه العرفو وجو _تاني الممرضه طلعت شايلة بيبي وملفوف بي بشكير بمبي، عرفتها دي البت، ادتني ليها وبرضو كانت بتبكي شديد الدوره دي يدي لمن رجفت عديل لانو حجمها كان أقل من الولد، وجسمها كلو محمر، بتبكي وبتاكل في يدها، سبحان الله مجرد ما شلتها وبديت أءذن ليها طوالي سكتت، عكس الولد الكان ببكي، لحدي ما خلصت الأذان ونهائي ما بكت، ملاذ ضحكت وقالت:شوف بتك عرفتك طوالي سكتت دي شكلها طالعه بت ابوها 😂_ضحكتا وانا بعاين ليها وهي ما قادره تفتح عيونا عشان الضو _سليمان :كدي جيب حفيدتي دي نشوفها_ مجرد ما اديتا ليهو وناس امي فكو الزغاريت، رجعت تبكي _ابوي ضحك وقال:صحي والله بت ابوها من شلتها منك رجعت تبكي 😂_هم انشغل مع التوأم، والدكتوره والممرضات طلعو سالت الممرضه عن لينه بخوف واضح، قالت لي بقدر اخش اشوفها بس بسرعه لانو ح ينقلوها غرفه عاديه بعد شويه_طبعا الولد بشاغلو فيهو بقا ياكل في يدو و سكت _اما البت نهائي من وقت شالوها مني بتبكي، امي ادتني ليها وقالت:هاك دخلا معاك لأمها وتاني تعال شيل الولد_شلتها وانا يدي بترجف حاسي نفسي ح اوقعا حاجه بس قدر كفة اليد، اتكلمت معاها طوالي سكتت، سبحان الله، دخلتا الغرفه لي لينه وانا بقول :شوفي بتك شكلها حفظت صوتي لمن بقرا ليكم_عاينت ليها لقيتها راقده وراسها عرقان ولونها شاحب، منظرها ما عجبني وقلبي دق بخوف في كل خطوه انا بقرب عليها، اتكلمت معاها وكانت مغمضه عيونها الفيهم هالات سود، معتصم:نن.. تي، ننتي قومي شوفي بتك ولا ما عايزه تشوفيها _برضو ما ردت علي حسيت بغصه في حلقي مسكت البت بيد واحده ورفعت يد لينه بيدي التانية وانا بقول :لينة هييي، اصحي _برضو ماف رد فكيت يدها الماسكه جات واقعه وقلبي وقع معاها دمعتي جرت وقتي لي ما قاعده ترد معقوله يكون حصل ليها شي، رفعت ليها يدها تاني جات واقعه بنفس الطريقه، بقيت اهز فيها وانا بقول بجنون:لالالا لينه اصحى، بطلي تمثيل ياخ لينه، لينه اصحى عليك الله فتحي عيونك لينه، ما عايزه تشوفي أولادنا توأمنا القلنا ح نسميهم بلسم وباسل، طيب والله بخليك تسمى الولد حسام زي ما عايزه بس انتي اصحى ما تعملي فيني كده_بس لا رد، لاحياة لمن تنادي💔