![](https://blogger.googleusercontent.com/img/b/R29vZ2xl/AVvXsEhlF9wzJmaHi487VdLjvOnUOuKZ0bMjHrdtD9NW1_JYlU2eNutv9mRj610g9CusI2omhQ6s8otiT93oCKlAWhB0WbLvpQcHya3blbo04r9rdjQld_kdYe_Gju99l4lAEm2FvNwgOU31ufqdIaX8j877TGDm3JPwtbPsMDgKBBEA5Wd9be_mJArlCJedjOHp/s320-rw/FB_IMG_1715173309068.jpg)
رواية ابي بواب وامك خدامه الفصل السابع عشر17والثامن عشر18بقلم رانيا عماره
المديرة:انتي جيبتي الفيديوهات دي منين؟
بيري(بثقة) :من عندي طبعاً، أصل انا كان عندي بيوتي سنتر زي اللي عندك ده..بس اتقفل..هو بصراحة متقفلش بسبب علا...اتقفل لأسباب تانية..ولكن حبيت أديكي نبذة بسيطة عن اللي علا هتعمله معاكي انتي كمان قريب
المديرة(مصدومة) :انا مش مصدقة!
بيري:طبيعي متصدقيش ولا حتى تستوعبي، بس سبحان الله ربنا بعتني ليكي عشان أقولك خلي عينيكي في وسط راسك الفتره اللي جاية
{قامت بيري بكل برود ولا مبالاة، ومشيت خطوه وبعدين رجعت تاني، واتمايلت على المكتب ناحية صاحبة المكان}
بيري:وأه نسيت أقولك، ياريت محدش يعرف ان انا جيت عشان المشاكل
{لبست بيري نضارتها الشمس، ومشيت بكل ثقة..والمديرة على المكتب بتحاول تستوعب!}
===============================
{عند حاتم وأهله في موقف العربيات، كان حاتم واقف معاهم وهيتجنن من المشاكل اللي زادت متحلتش}
حاتم(بصوت حاد) :يعني اية؟؟...هو انا باعتكم عشان تتخانقوا ولا عشان تحلوا؟...ما طبيعي تقول كده وأكتر كمان!
هويدا(بصوت حاد) :انت كمان هتدافع عنها بعد ما مسخرتنا في بيتها؟..دي طردتنا!!!...يانهار اسود ومطين فوج دماغنا، بجى هويدا على آخر الزمن، يتعمل فيها كل ده من خدامة؟
حاتم(بصوت حاد) :ماما!!!...بلاش تتكلمي بالطريقة دي تاني!!...الخدامة دي مهنة شريفه احسن ما تترقص في الكباريهات، ولا تمشي مشي شمال!...انتي لو مكان ست وجيدة كنتي هتعملي كده وأكتر!
هويدا(بزعيق) :مسمعكش تقول لو كنتي مكانها دي مرة تانية!!..انا مربية اخواتك البنات أحسن تربية، ولا يمكن يعملوا زي ما مهره بتعمل!!
حاتم:تقصدي اية؟...قصدك ان مهره مش كويسة؟؟؟
هويدا:اجصد اللي اجصده، انت هتجفلي على الواحده ولا اية؟... هو مين فينا الكبير آني ولا انت؟؟
حاتم(بزعيق) :طب اقسم بالله مانتي شايفة وشي ده تاني
{ومشى وهو متعصب، وهويدا متنحه}
هويدا(مصدومة) :حاتم!!...استنى احنا لسة مخلصناش كلامنا!
متولي:اركبي يا نسمة انتي وامك ولما توصلوا البلد كلميني
نسمة:ماشي يا بابا...يلا بينا
{مشيت نسمه وهويدا وركبوا العربية، ومتولي مشى ورا حاتم!}
===============================
{بعد شهر، في بيت هويدا..كانت قاعدة مع العريس وأمه في الصالة، ومهره بتعيط في أوضتها وبتتصل بـ حاتم، ولكنه مكنش بيرد...لدرجة انها اتأكدت ان حاتم خلاص يأس ونسى موضوعها واستسلم}
عبد السميع:وانا تحت أمركم في كل اللي تطلبوه، اهم حاجة عندي راحة مهره!
وجيدة:ربنا يكرمك يا أستاذ عبد السميع، انا قلبي ارتاحلك أول ما شوفتك
عبد السميع:الله يخليكي يا حاجة وجيدة
شوقية:طلباتكم اية؟
وجيدة:انا أهم حاجة عندي بنتي تعيش متصانة، عايزة اتطمن عليها قبل ما أموت
عبد السميع:مهره في عينيا يا حاجة، متخافيش!
وجيدة:و يعني ان شاء الله انت عندك اية،شقة ايجار ولا تمليك، وبالنسبة للوظيفة؟
عبد السميع:أه عندي شقتين الحمدلله، والاتنين في بيت أبويا الله يرحمه و بإسمي، وشغال مدير في البنك
وجيدة(مصدومه) :ماشاء الله..تبارك الله...انا أول مره اعرف انك شغال في البنك!
شوقية:عبدالسميع متعين من ٣ سنين، والحمدلله بياخد مرتب كويس يفتح ٣ بيوت مش بيت واحد!
وجيدة:بسم الله ماشاء الله، ربنا يحفظه ويخليه ليكي يا ست شوقية
شوقية:امال العروسة مش جاية ولا اية؟
وجيدة:اه جاية أمال اية؟...دقيقة أندهها
شوقية:خدي وقتك
{قامت وجيدة وفتحت الأوضة، لقيت مهره مقطعة نفسها من كتر العياط، دخلت وجيدة وعلى وشها الغضب}
وجيدة(بصوت حاد) :مهرة!!...انتي عايزة تخلي شكلي وحش ولا اية قصاد الناس اللي برا؟؟..امسحي وشك وحطي كريم يداري العياط ده، انتي عايزاهم يقولوا اية؟؟...غاصبينك تتجوزيه؟؟
مهره(بعياط) :ايوه انتي غصبتيني عليه، انا مختارتش حاجة بإيدي، انتي اللي عايزه تلغي شخصيتي وتمشي كلامك على حساب قلبي!!
وجيدة:وطي صوتك لا يسمعونا!!!...بلا قلب بلا زفت، الكلام ده مبيأكلش عيش في الزمن ده...أستاذ عبد السميع ماشاءالله عليه، ابن ناس ومحترم...اخلاق اية وأدب اية...وعنده بدل الشقة اتنين، ومدير في البنك مره واحده، عارفة يعني اية مدير في البنك؟...يعني بياخد فلوس قد كده...يلا قومي وخلصي الناس مستنية برا...يلا
مهره(بصويت) :وانا مش هخرج، ومش هتجوز غير حاتم، خليهم يسمعوا ويبقى عندهم دم ويمشوا..انا مش هتجوز حد غير حاتم مهما عملتي!!
{ضربتها وجيدة بالقلم على وشها}
وجيدة(بزعيق) :اخرسي ووطي صوتك...والله يا مهره لا تشوفي كلام مين فينا اللي هيمـ....
{ولسه بتكمل كلامها سمعوا زعيق جامد في الشارع، والناس كانت ملمومه، خرجت وجيدة ووراها مهره ووقفوا في البلاكونه...والعريس وأمه وقفوا يشوفوا في اية!...كان في ضرب نار وناس بتزعق، بتبص مهره لقيت حاتم هو اللي بيضرب النار في نص الشارع، ومتولي واقف بيتخانق معاه والناس ملمومة ومش فاهمين في اية!...لحد ما حاتم وقف تحت البلاكونه وابتدى يزعق}
حاتم(بزعيق) :رايحة تجوزيها لواحد غني، ورميتي حبنا علي الأرض ياست وجيدة؟؟....ده لو السما نزلت علي الأرض، لا هي هتاخد غيري، ولا انا هاخد غيرها!!..مهره مش مكتوبة لحد غيري!!...ومهما تعملي مهره مش هتتجوز غيري انا...وانا اللي كلامي هيتنفذ في الآخر وكلكم هتشوفوا
متولي(بزعيق) :ارجع معايا، وكفاياك فضايح!!
حاتم(بزعيق) :لا يا بابا...انا مش رايح في حتة...ده احنا من ساعة ما رجعنا واحنا بنحاول معاها بكل الطرق، وهي برضة منشفة دماغها!!...تتحرق الفلوس اللي تخليكي ترمي بنتك لواحد هي مش عايزاه!!
_هو في اية؟
=مااحناش عارفين حاجة!!
حاتم(بزعيق) :العريس اللي فوق ده لو ممشاش انا هخطف مهره، ومش هتشوفي وشها تاني!!
متولي(بزعيق) :كلام اية اللي بتقوله ده يا حاتم؟...انت اتجننت؟
_استهدوا بالله، ولو بينكم مشاكل حلوها مع بعض، مش على الملأ كده!
وجيدة(بزعيق) :امشي من هنا، الشويتين اللي انت عاملهم دول يا حاتم ولا ينفعوا معايا..هو انت فكرك لما تعمل كده في قلب الشارع..هخاف واوافق؟...لا تبقى غلطان...ده لو كان في شوية صغيرين يخلوني اوافق عليك، بعد اللي انت عملته ده، اختفوا خلاص، وانسى جوازك من مهره...مهره مش هتتجوزك يا حاتم!!
حاتم(بزعيق) :مهره مش هتتجوز حد غيري!!...ومش هسمح ليكي ولا لأي مخلوق خلقه ربنا انه يقف في طريقنا...وانا هتجوز مهره يعني هتجوزها!!!!
شوقية(بعصبية) :يلا يا عبده، البيت ده مشاكله كتير...بينا نمشي قبل ما نلبس في الحيط!!
{وخدت ابنها ونزلت..فضلت وجيدة تصوت}
وجيدة(بصويت) :خد ابنك وامشوا يا متولي، انتوا جايين تشوهوا صورتنا قصاد الناس؟؟؟
متولي(بزعيق) :يلا يا حاتم، قدامي!!
{وبيشد حاتم، راح حاتم ضارب بالنار في السما، فضلت الستات تصوت..وأول ما العريس وأمه عدوا من جنب حاتم راح ماسكه من البدله}
حاتم(بزعيق) :هو انت بقى العريس؟...طب اسمع، مهره مش هتتجوزك...انا كتب كتابي على مهره خلال الأسبوع ده، واياك اشوفك هنا تاني!!
عبد السميع(بزعيق) :وسع ايدك دي، واحترم نفسك، واعرف انت بتتكلم مع مين!!
حاتم(بزعيق) :مين يعني؟؟
عبد السميع(بزعيق) :انا هعرفك انا مين
{ولسة هيضرب حاتم، راح حاتم ضاربه..وقعه على الأرض، وأم العريس بتصرخ وبتجري وراهم}
حاتم(بيضربه) :انا اللي هعرفك
{وعجنه ضرب، ومهره و وجيدة بيصرخوا هما وبقيت ستات المنطقة..لحد ما الشرطة جات، وقبضوا على حاتم}
=============في قسم الشرطة===========
{كان حاتم جوا عند الظابط، وعبد السميع هدومه مقطعه ومتبهدل..وأمه معاهم!..وبرا كانت هويدا ونسمة ومهره ومتولي...كانت هويدا ومهره بيعيطوا من خوفهم على حاتم}
هويدا(بعياط) :كله بسببك انتي...ابني ضاع بسببك، ياريته ما عرفك ولا شافك من الأساس!!
متولي(بزعيق) :مهره ملهاش ذنب في اللي حصل..ابنك هو اللي كان رايح للشر بـ رجليه!!
هويدا(بصويت) :اديك قولت، رايح للشر برچليه، وهما أُص المشاكل والشر اللي في الدنيا بحالها...ضيعت نفسك يا حاتم، مش كان زمانك متخرچ دلوجتي من كليتك وبتشتغل، اية اللي بيجرالنا ده بس يارب!!!
{وجوا عند الظابط بعد التحقيق مع الطرفين}
الظابط:اتفضل بطاقتك يا أستاذ عبد السميع، ومتأسفين جداً للي حصل..واوعدك اننا مش هنسيب حقك
عبد السميع:شكراً لحضرتك
{وخرج برا هو وأمه، ومتبقاش إلا حاتم}
الظابط:مش ضربته وعملت اللي في دماغك؟..اشرب بقى من اللي هيحصلك
حاتم(بزعيق) :انا مش قاعد هنا دقيقة، وهمشي!
الظابط:لية هو بمزاجك وانا معرفش؟...ده احنا شكلنا هنبقى صحاب اوي...أصلك هتطول شويتين تلاته معانا، ومتقلقش هبقى أجيلك في سجن العقرب اتطمن عليك
حاتم:انت بتهزر؟؟
الظابط(بصوت حاد) :لا ياروح امك مبهزرش، مش انا اللي بتاع هزار..ده انت هتشوف الجد اللي على أصوله
حاتم(بزعيق) :انا أمي خط أحمر، اياك تجيب سيرتها على لسانك!!!
{راح الظابط قايمله من على المكتب، ولسه هيضربه بالقلم، راح حاتم ضاربه، وفي ساعتها الظابط صرخ ونده على العساكر}
الظابط(بزعيق) :ودوه الحبس الانفرادي، وديني وأيماني لأوريك النجوم في عز الضهر ياروح أمك
حاتم(بزعيق) :انا أمي أنضف منك، ولا انت هتستغل سلطتك علينا، متفكرش انك كده جامد لااا في الأقوى منك!!!!
الظابط(بزعيق) :خدوه في ستين داهية
{وخدوا حاتم وخرجوه برا، وأول ما اهله ومهره شافوه صرخوا وجروا وراه، والعسكري مكلبشه}
مهره(بصويت) :حاتم....هيعملوا فيك اية يا حاتم؟؟
هويدا(بصويت) :ياضناياااا يابني، اتبهدلت واتمرمطت في عز شبابك...والنبي ماتاخدوا ابني
حاتم(بصوت عالي) :متخافوش عليا، انا ثقتي في ربنا أكبر من كل شئ!!
هويدا(بصويت) :هدعيلك يا حاتم متخافش، وان شاء الله ربنا يستچيب دعايا...دعوة الأم مستچابة
متولي(بصوت عالي) :لا اله الا الله...الواد اللي حيلتي يا عالم...محيلتيش غيره...قولتله بلااش تجري على الشر مسمعش كلامي!!
مهره(بصوت عالي) :خد بالك من نفسك يا حاتم
{وخدوا حاتم ودخلوا بيه، راح متولي واخد مهره ورجعوا البيت عند وجيدة}
=============في بيت وجيدة===========
{خبط الباب..ولما وجيدة فتحت ولقيت متولي و مهره، الغضب ملى وشها!}
وجيدة(بزعيق) :مش خرجتي برا طوعي، وبرضة روحتي معاهم؟؟...جاية تهببي هنا اية؟؟؟
مهره(بعياط) :حاتم اتقبض عليه، ويا عالم هشوفه تاني امتى!!
وجيدة(بزعيق) :جايبة متولي تتحامي فيه؟..وانا اللي قولت انك كبير وعاقل يا متولي...ومش هتمشي ورا كلام العيال!!...ده احنا ياأخي جيران بقالنا سنين وعشرة عمر طويلة، وفي ثانية عيالنا هدوا كل ده!!
متولي:انا مستغرب قسوة القلب اللي جواكي دي كلها!!، ازاي قادره تشوفي ابني وبنتك بيتقطعوا من الحزن والقهر وبرضة مكمله؟...انتي بتعملي كل ده عشان اية؟؟؟
وجيدة(بصوت حاد) :كل واحد حر في حياته، يوافق يرفض دي حاجة متخصش الناس...وانا من حقي اختار الزوج الصالح لبنتي اللي يحافظ عليها ويشيلها في عيونه الاتنين...واهو ابنك بقى رد سجون، وبقى له ملف عند الحكومة خلاص
متولي(بزعيق) :انا ابني عمل كل ده عشان بيحب بنتك!!!...ومش قادر يبعد عنها ولا يشوف حد غيرها في حياته!!...ابني اللي بتعايريه بـ انه بقى رد سجون، اللي جرالة ده كان بسبب بنتك!
وجيدة(بزعيق) :لية وهي كانت قالتله تعالى افضحني وسط الجيران واهل المنطقة؟...ولا كانت قالتله تعالى مد ايدك على العريس المحترم ابن الناس الطيبه وقل من قيمته؟
متولي:الكلام مبقاش يفيد مادام دي طريقة تفكيرك ياست وجيدة، الأهم دخلي بنتك خليها ترتاح
وجيدة(بصوت حاد) :لو عايزة تدخلي يا مهرة فانا ليا شروط
مهرة(بإستغراب) :شروط اية؟
وجيدة:لا تروحي تشوفي حاتم ولا تسألي عنه، وتنسيه خالص ولا كأنه كان في حياتك..والعريس اللي يجي وألاقيه كويس، هتتخطبيله سواء موافقة ولالا، قولتي اية؟
{نزلت دموع مهره وبصيت لـ متولي والحزن بياكل قلبها، ومتولي كان زعلان على ابنه!}
مهرة(بدموع) :وانا مش موافقة
{نزلت مهره وهي بتعيط}
وجيدة(بزعيق) :وانا هعتبر ان عيالي التلاته ماتوا، ومحدش فيكم يجي ويكلمني في الموضوع ده تاني، واياكي يا مهره رجليكي تعتب عتبة البيت، قلبي و ربي هيفضلوا غضبانين عليكي ليوم الدين!!
{نزل متولي ورا مهره في الشارع وهى بتعيط}
متولي:هدي قلبك يا مهره...يمكن أمك ربنا يهديها ويلين قلبها من ناحيتكم!
مهرة(بعياط) :ماما واخداها عِند، مش حب وخوف..انا مش قادرة استوعب كمية القسوة اللي هي بقيت فيها!!...هي بتعمل كل ده عشان اية؟؟؟
متولي:ربنا يهديها يا مهره..انا مش هقدر أقول أي حاجة وحشة في حقها، دي في الأول والآخر أمك!...المهم خلينا في المشكلة اللي اتحطينا فيها دي..هتروحي فين ولا هتعملي اية؟
مهرة(بعياط) :ممكن تيجي معايا في مشوار ياعم متولي؟
متولي(بحزن) :ماشي يا مهره
{خدته مهره وراحوا عند عم صالح اللي راحوله في الميناء في بداية المسلسل، خبطت مهره على الباب واللي فتحلهم درية مرات صالح، ولما شافتها اتفاجئت، وحضنتها}
درية(بتحضنها) :مهره!!...ازيك يا مهره عاملة اية؟؟...ليكي واحشة، بقى كل دي غيبه!!
مهره(بعياط) :وانتي كمان ليكي واحشة يا طنط درية
درية:مالك بتعيطي لية، هو في حاجة حصلت؟..وانت مين؟
متولي:انا عم متولي في مقام أبو مهره
درية:طب اتفضلوا، تعالوا
{وخدتهم وقعدوا جوا}
درية:مالك بقى قوليلي في اية؟
مهرة(بعياط) :حاتم اتسجن، وماما طردتني من البيت، مش عارفة اروح فين ولا آجي منين بس!!
درية:وهو ده سؤال؟..تعالي هنا ياحبيبتي ده انتي تنوريني، حتي انا قاعدة لواحدي وزهقانة
مهره(بعياط) :لية هو عم صالح فين؟
{بصيت درية في الأرض بحزن}
درية(بحزن) :عمك صالح توفاه الله من شهر ونص!
مهره(مصدومة) :مات!!!!...مات ازاي؟؟
درية(بحزن) :جاتله غيبوبة سكر، والحالة كانت متأخرة اوي، يلا الحمدلله
مهره(بعياط) :لا حول ولا قوة الا بالله، ربنا يرحمه ويغفرله يارب
درية:يارب
===============عند بيري==============
{خدت بنتها وراحوا الشقة الجديدة..كانت شقة واسعه.. وقفت بيري في الريسيبشن بشنط الهدوم وهى بتبص حواليها}
بيري:ها يا فيروز اية رأيك؟
فيروز:حلوه اوي يا ماما...وأحسن من الشقة القديمه
بيري:بصراحة هى أحسن بكتير، والأحلى اننا هنقعد فيها لواحدنا
فيروز:هو بابا راح فين؟
بيري:ابوكي ده زبالة يا فيروز...انا عايزاكي تعتبريه مات ومتسأليش عنه تاني!
فيروز(بإستغراب) :لية يا ماما بتقولي عليه كده؟..هو عملك اية؟
بيري:عمل كتير اوي اوي...مش عايزه أشغلك بمشاكلنا...لما تكبري هحكيلك كل حاجة، انا بس مش عايزاكي تصدقيه...علاء ده تعلب مكار، مش سهل، بس انا بقى أصعب منه...المهم ادخلي أوضتك غيري، على ما الدليفري يوصل
فيروز:حاضر
{دخلت فيروز الأوضة بتاعتها، وبيري قعدت على الكنبة في الريسيبشن، وبعتت مسدج لـ علا لـ تالت مره}
بيري:بكلمك لتالت مرة..بس المره دي غير أي مرة فاتت، انا عايز ٢ مليون جنية، وعشان انا قلبي حنين، هديكي فرصة شهر تجمعي فيهم المبلغ ده، وإن موصلش المبلغ اللي انا عايزوا الفيديوهات هتوصل لـ خطيبك!!
علا:لا ده انت مبتزهقش بقى!!
بيري:ومش هزهق، ماهو كله من عمايلك السودة، اهي اتقلبت عليكي في الآخر، اشربي بقى!
================================
{تـاني يوم في الشغل عند علا، كانت المديره حاطاها تحت المراقبة بعد اللي عرفته من بيري، جات علا وطلبت تاخد المرتب مقدم}
علا:كنت عايزة أكلم حضرتك في موضوع
المديرة:موضوع اية؟
علا:انا مزنوقة اليومين دول أوي في مبلغ كدة، وكنت عايزة آخد المرتب مقدم
المديرة:عايزة الفلوس في اية؟
علا(بتردد) :لـ طلبات البيت وكده يعني
المديرة:طيب عدي عليا بكرا، أكون جهزتلك المرتب
علا(بتردد) :انا كنت عايزة مبلغ سلف من حضرتك فوق المرتب
المديرة:لأ انتي كدة داخله على طمع بقى، مبلغ اية ده؟
علا:نص مليون سلف، وأول ما يبقى معايا فلوس هرجعهملك تاني!
المديرة(بسخرية) :وانتي هيبقى معاكي منين؟...هو انتي بتشتغلي في مكان غير هنا وانا معرفش؟...ده انا لو خصمتلك ٣ سنين من المرتب برضة مش هيكفي
علا:يعني حضرتك مش هتساعديني؟
المديرة:لا..انا ممعايش المبلغ اللي انتي عايزاه، شوفي حد غيري...ويلا اتفضلي على شغلك
علا:طيب ماشي، شكراً
{خرجت علا وراحت تكمل شغلها، وهي واقفه قررت تتصل بـ علاء، ولكنه مكنش بيرد!}
علا:أوف بقى!!!
================================
{في بيت درية...صحيت مهره..لقيت درية قاعدة قصادها بصينية الأكل}
درية:كل ده نوم يا مهرة؟
مهرة:معلش يا طنط...غصب عني..الأيام اللي فاتت مدوقتش طعم النوم ولا ارتاحت لحظة...حتى امبارح نمت بالعافية والله...الحياة صعبة اوي اوي من بعد ما رجعنا مصر
درية:كان لازم ترجعوا يا مهرة، امال كنتوا هتقضوا طول حياتكم هناك؟
مهرة:أكيد لا...بس يعتبر كنا مرتاحين شوية، انا بقيت اتمنى الأيام دي ترجع تاني...حاتم وحشني اوي، انا من غيره ضايعه ويتيمه!
درية:ربنا يرجعهولكم بالسلامة يا مهرة
مهرة(بحزن) :يارب
درية:ووصلتوا لـ اية في موضوع حاتم؟
مهرة:لسة مش عارفة والله، عم متولي المفروض يعدي عليا كمان شوية وياخدني نروح القسم!
درية:ربنا يقرب البعيد وييسر أمركم
مهرة:يارب
{خرجت مهره السلسلة من رقبتها وباستها}
مهرة(بحزن) :السلسلة دي، كان عم صالح مديها لـ حاتم هدية، وحاتم هاداني بيها، انا بحبها اوي وناوية احط فيها صورة حاتم، عشان حتى وهو بعيد، يكون قصاد عيني، اهو أي حاجة. تصبرني على بعده!
{وفجأة ملامح درية اتغيرت، ومهره خدت بالها}
مهره(بإستغراب) :في اية؟
درية(بتردد) :امممم مفيش حاجة
مهره:لا في وإلا مكنش وشك جاب ألوان!!
درية(بتردد) :بصي يا مهره انا في حاجة مهمة لازم أقولهالك، انتي من ساعة ما جيتي امبارح وانا قلبي واجعني ومش عارفة أجيبهالك ازاي، بس خايفة تزعلي مني!!
مهره(بخوف) :انتي كده خوفتيني زيادة، في اية اتكلمي!!
درية(بتردد) :السلسلة دي مش بتاعت ابني ولا حاجة زي ما عمك صالح قالكم، السلسلة دي فيها جهاز تتبع، بيراقب كل خطواتكم يا مهره!
============فلاش باك ١==========
{خرج صالح من البيت بالليل..وفجأة حد لبسة قماشة في دماغة وحط ايده على بؤه وخده في حتة بعيد في الميناء..وبعد ما وصلوا فكله القماشة}
صالح(بخوف) :انت مين؟؟...وجايبني هنا لية؟؟
مجهول:هتاخد السلسلة دي وتديها لـ حاتم، وهتقوله انها بتاعت ابنك وغالية عليك...وإن مدتهالوش انا هفرتكك انت ومراتك
{وطلع المسدس من جيبه ورفعه في وش صالح}
صالح(بخوف) :طب فهمني طيب، انت تقربله اية؟
مجهول:وانت مالك؟...احنا هنتصاحب؟...انجز وخد بالك لو مدتهالوش انا هعرف!
صالح(بخوف) :طيب ماشي...حاضر
{مشى صالح وهو مرعوب، والمجهول ماشي وراه بالمسدس وموجهه في راسه لحد ما وصل للبيت ودخل}
=============فلاش باك ٢=========
حاتم(بحزن) :انا نفسي اعرف مين دول واحنا مالنا اصلاً بكل ده!!...حتي ابويا انا مش عارف حصله ايه!!...انا لو كنت فضلت هناك كان زماني ميت..ياعم صالح انا طول عمري ماشي جنب الحيط وعمري ما أذيت حد
صالح:باين عليك طيب وابن حلال..علي العموم خد بالك من نفسك...وخد دي اقبلها هديه مني
{وطلع سلسله شكلها حلو واداهاله}
حاتم(بإستغراب) :ايه دي ياعم صالح؟
صالح:دي سلسلة محمد ابني رحمة الله عليه...من بعد ما مات وانا شايلها في جيبي.. ولما شوفتك حسيتك فيك كتير من ابني...خدها وخليها معاك
=============================
مهره:معقول؟؟...وانتوا لية معرفتوناش حاجة زي دي؟؟
درية:مكنش ينفع يا مهره، الراجل اللي هدد عمك صالح..كان ممكن يإذينا في أي لحظة، معلش يابنتي اعذرينا دي كانت حاجة غصب عننا...ومن يومها وانا ضميري بيأنبني، حتى عشان أوصلكم كان صعب، ده احنا ناس غلابة ومش حِمل المشاكل!
مهره:مش هزعل منك ياطنط درية...انا عذراكي...ومين قالك انكم لواحدكم اللي مغلوبين على أمركم؟...احنا كمان كنا مغلوبين على أمرنا...ومش عارفين الدنيا رايحة بينا على فين!
درية:ربنا يتولانا برحمته يا مهره، مدي ايدك و كلي
مهره(بحزن) :ماليش نفس
درية:عشان خاطري، ده انا عاملة الأكل ده عشانك..كلي يا مهره وفوضي أمرك لله
مهره:ونعم بالله
===============================
{عند زهرة..كانوا اخوها غسان طول الشهر اللي فات وهو بيعذب فيهم، ده غير ان موضوع إلحاده بقى يوسع عن الطبيعي، وليل نهار ينزل بوستات يسب فيها الأديان، وكل ما حد يشتمه، يعرف مكانه فيه ويوصله ويعمل فيه زي ما عمل في حمزه!..واليوم ده دخل الأوضة لـ زهرة، كانت مرمية على الأرض وبتدعي عليه}
زهرة(بحزن) :حسبنا الله ونعم الوكيل فيك يا غسان..اللهي ربنا يوريني فيك يوم
{راح غسان موطي ناحيتها وشاددها بعنف من شعرها}
غسان(بصوت حاد) :انتي بتدعي على مين؟...عليا انا؟
زهرة(بصوت حاد) :أه عليك انت، هو في حد غيرك اسمه غسان؟؟
غسان(بزعيق) :اتعدلي...بدل ما أوريكي الجديد، مانا أصلي كل مره بطلع بحاجة جديدة، اية رأيك تطلعي معايا في الغرفة الحمراء؟
زهرة(بإستغراب) :غرفة حمرا اية؟؟؟
غسان:معقول مش عارفة الغرفة الحمراء في الدارك ويب؟...ده انا بعت أمك هناك، وبصراحة عملوا معاها صح الصح
زهرة(بصويت) :انا مش فاهمة حاجة، انت بتتكلم عن اية بالظبط؟؟.. وماما فين، وديتها فين انطق!
{راح غسان مطلع الموبايل يوريها، وبعد ما شافت الفيديو تنحت وصرخت}
زهرة(بصويت) :مامااااااا....ماماااااا
{مسكها غسان من شعرها بعنف لتاني مره}
غسان:تحبي تروحي هناك امتى؟
{راحت زهرة ضاربة غسان بالرجل، وقامت تجري فتحت الباب، وهو جرى وراها...ولسة كمال هيمسكها، راحت كاسرة الفازة على دماغه، وفتحت الشباك وهربت من الفيلا وهى بتصرخ...لحد ما وصلت قسم الشرطة تبلغ عنه}
الظابط:اهدي في اية؟؟؟
زهرة(بصويت) :أبوس ايدكم انجدوني منه، هيموتني...قتل ماما...قتلها هناك...وعايز يعمل معايا زي ما عمل معاها أبوس أيديكم عشان خاطري الحقوني منه!!!
الظابط:اهدي طيب، انتي بتتكلمي عن مين بالظبط؟
زهرة(بصويت) :غسان اخويا
الظابط:اشرحيلي كل اللي حصل!!
{وعند غسان، كان بيدور في الشارع هو وكمال على زهرة..راح غسان ماسك كمال من هدومه}
غسان(بزعيق) :انت اية يا أخي حمار؟؟...ازاي تسيبها تخرج من أم البيت؟؟؟
كمال(بتعب) :انت مش شايف الدم اللي نازل من دماغي؟...كان ناقص تقتلني عشان سعاتك ترتاح؟؟...اعمل ايه تاني أكتر من اللي عملته؟؟
غسان(بزعيق) :غور يالا من هنا، ده انت زي قلتك
{وزق كمال بعيد، ومشى ينده على زهرة}
غسان(بزعيق) :هقتلك يا زهرة...يوم ما ألاقيكي هقتلك، انا خلاص مابقاش هاممني!!!
==============================
{بعد ما زهرة حكيت كل حاجة للظابط،قرروا يقبضوا على غسان وكمال، وبالفعل اتحركوا..وفي الوقت ده زهرة خرجت من مكتب الظابط، لقيت مهره ومتولي في وشها، أول ما شافتها حضنتها وعيطت!}
زهرة(بعياط) :صاحبتك اتبهدلت أوي يا مهره، أمي ماتت متعذبة بسبب غساان...انا حياتي اتدمرت من ساعة ما دخلها...انا تعبانه اوي اوي يا مهره
مهره(بعياط) :حاسة بيكي والله يا زهرة، انا كمان الدنيا جات عليا اوي، حاتم اتحبس، وماما طردتني، مبقاش ليا حد غير ربنا!!
زهرة(بعياط) :طردتك لية يا مهره؟؟
مهره(بعياط) :عشان انا وحاتم لسة متمسكين ببعض رغم رفضها لجوازنا...انا مش هستسلم ولا هيأس، حاتم لو ضاع عمري ما هعرف أعوضه يا زهرة!!
زهرة(بعياط) :خليني معاكي، انا مابقاش ليا غيرك بعد ربنا...غسان لو لقاني هيقتلني!
مهره(بخوف) :بعد الشر عليكي يا زهرة!!...متخافيش احنا في حماية ربنا والله...انا ساكنة عند ست طيبة، هاخدك تعيشي معايا ولا تزعلي نفسك!
زهرة(بعياط) :ربنا يخليكي ليا يارب ومايحرمني منك يا صاحبة عمري كله
مهره:استنيني هنا، هروح اتطمن على حاتم وجاية!!
زهرة:ماشي يا مهره
{مشيت مهره وراحت قصاد مكتب الظابط مع متولي، دخلت هويدا وبناتها ووصلوا عندهم}
هويدا(بخوف) :حاتم ابني وصل لـ اية؟؟
متولي:لسة مش عارفين يا هويدا، دلوقتي نعرف!
{جه العسكري بـ حاتم من جوا}
هويدا(بتحضنه) :طمني عليك يا حاتم، اية الأخبار؟
حاتم:هترحل للمحكمة بكرا الصبح، مهره...طمنيني عليكي عاملة اية؟؟
مهره(بعياط) :مش كويسة والله، انت اللي طمني عليك، أكيد متبهدل جوا!!
حاتم(بحزن) :ده قدر ومكتوب يا مهره...انا مستعد أستحمل أي حاجة إلا انك تروحي لحد غيري!!
هويدا(بصوت حاد) :حرام عليك يا حاتم...مفيش حد يستاهل بهدلتك دي...بجى تحرمني من وچودك وسطنا عشان تتچوز مهره؟؟...تضيع نفسك عشانها يابني؟؟
حاتم:بلاش الكلام ده مالوش تلاتين لازمة
العسكري:يلاااا كفاية عليك كده
{وخده ومشى}
مهره(بصوت عالي) :خد بالك من نفسك يا حاتم
حاتم(بصوت عالي) :اوعي تآمني لحد يا مهره، واوعدك ان انا هخرج من هنا قريب!
هويدا(بصوت عالي) :في رعاية الله وحفظة يا حاتم
متولي:اتطمنتي يا هويدا على ابنك؟
هويدا(بحزن) :بالعكس جلبي خاف علية زيادة
نسمة:بإذن الله هيخرج منها قريب، ده مفيش حاجة بعيده على ربنا!!
هويدا(بحزن) :يااارب
{مشيت مهره والزعل زاد أضعاف بعد كلام هويدا عنها، حسيت انها كرهتها زيادة ومابقتش تقبلها!...لحد ما وصلت لـ زهرة}
زهرة:ها عملتوا اية؟؟
مهره(بحزن) :حاتم هيترحل على المحكمة بكرا
زهرة(بحزن) :بإذن الله خير متقلقيش!
مهره(بحزن) :يارب...يلا بينا
{وخدت زهرة ومشوا}
==============================
{عند غسان،راحت الشرطة في بيت غسان، ولما اقتحموه ملاقوش حد..والباب كان علية خيوط عناكب والبيت مليان تراب !!!}
الظابط(بإستغراب) :ازاي ده؟؟؟
الفصل الثامن عشر
{بعد مالظابط لقى البيت فيه تراب وخيوط عناكب حس إن العنوان غلط، وشك إن البيت ده محدش عايش فيه من سنين!}
الظابط(بإستغراب) :انتوا اتأكدتوا من العنوان كويس؟؟
_ايوه يافندم هو ده العنوان!
============فلاش باك=========
{غسان بعد ما عرف ان زهرة راحت القسم، كان لازم يهربوا!}
غسان(بزعيق) :يلااا بسرعة قبل ما الحكومة تيجي!!
كمال(بإستغراب) :وانت عرفت منين؟؟
غسان(بزعيق) :انت هتحقق معايا ولا اية؟؟...يلا انجز بسرعه
{قام كمال..و غسان دخل جنينة البيت، جاب شِكارة فيها تراب، وابتدى يوزعها بطريقة عشوائية في البيت كله، وطلع برطمان ووزع الحشرات في الأوض، وكمال خد ليلى وخرجوا برا، راح غسان طالع وراهم، وقفل الفيلا بالمفتاح، واستخدم بكتيريا بيو صناعية، شايلها في علبة صغيرة، وبعد ما وزعها على الباب، طلع برطمان الحشرات وخرج منه عنكبوت وحطه فوق القفل، كل ده وكمال مصدوم من دماغ غسان!!}
كمال(مصدوم) :اية اللي بتعمله ده يا غسان؟
غسان:يلا انت لسة هتسأل؟
{ولم الحاجات اللي حواليه و زقه ومشوا!}
============================
الظابط:يبقى زهرة ادتنا معلومات غلط!!
{وخد العساكر ومشوا}
============================
{عند مهرة..خدت زهرة وراحوا بيت درية..وبعد ما مهرة خبطت عليها، فتحتلهم}
مهرة:دي زهرة صاحبتي، أقرب حد ليا، ونعرف بعض من سنين، زهرة اتحطت في ظروف صعبة وملهاش مكان تاني تروحه، ينفع تقعد معانا كام يوم لحد مانشوف هنعمل اية؟
درية:وماله انتوا الاتنين تنوروا الدنيا بحالها، تعالوا ادخلوا
{دخلت مهره وزهرة، و درية قفلت الباب وقعدت معاهم}
مهرة(بحزن) :معلش هنتقل عليكي كام يوم، وبعد كده لما ربنا يحلها هنبقى نشوف مكان تاني نقعد فيه!
درية:لا يا مهرة اوعوا تمشوا، ده انتوا هنا هتونسوني، ربنا العالم يابنتي...كل يوم بقعد أكلم نفسي بالساعات، حتى مفيش حد من قرايبي بيسأل عليا
مهرة:الحمدللة ان ربنا حطك في طريقنا
درية:اما قوليلي يا مهرة، حاتم عمل اية؟
مهرة(بحزن ودموع) :حاتم هيترحل على المحكمة بكرا ياطنط درية...انا مش فاهمة هو لية عمل كل ده؟...ارتاح دلوقتي وهو مسجون وبعيد عني؟...ده انا مش عارفة هعيش من غيره ازاي لحد ما يخرج، ده هو اللي كان مهون عليا حاجات كتير اوي
درية:شكلك بتحبيه اوي يا مهره، بس هتتجوزوا ازاي، معقولة هتتجوزوا من ورا أمك؟
مهرة(بحزن) :شكل ده اللي هيحصل، خلاص مبقاش في حل تاني!
{قامت درية، وهي متأثرة عشانهم}
درية:لا يا مهرة اوعي تعملي كدة مهما يحصل، ده انتي امك ممكن تطب ساكته ولا يجرالها حاجة من الصدمة!..انتي تتصالحي عليها والماية ترجع لـ مجاريها، وانا لو جات فرصة هحاول أقنعهالك رغم ان عمري ما شوفتها ولا اتعاملت معاها!
مهرة:ماما دماغها أنشف من الحجر، متفكريش...
احنا كلنا حاولنا معاها وهي برضة اللي فيها فيها!
درية:معلش يا مهرة تعالي على نفسك شوية...المهم ريحي جتتك انتي وصاحبتك، وانا هجهز الأكل
{دخلت درية جوا، ومهره قعدت على السرير}
زهرة(بحزن) :انا خايفة اوي يا مهره لا غسان يعرف مكاني ويخلص عليا!!...انا بفكر أسافر!!
مهرة(بحزن) :وانتي فكرك لو سافرتي، كدة يعني مش هيعرف مكانك؟
زهرة(بخوف) :مش عارفة...طب اعمل اية بس قوليلي!!
مهرة:العمل عمل ربنا يا زهرة...سيبيها على ربنا
زهرة:ونعم بالله
===============================
{في بيت هويدا بعد ما رجعت البيت هي وبناتها..فكيت الحجاب وقعدت على الكنبة والحزن بياكل قلبها على حاتم}
هويدا(بحزن) :يا مرارك الطافح يا هويدا...طلعتلنا منين مهره دي؟...مآني ابني كان كويس وعايش حياته وسطنا بالطول والعرض!...من ساعة ما ظهرت في حياته والدنيا اتطربجت عاليها واطيها!
نسمة(بحزن) :بس مهرة دي شكلها بت طيبة وقلبها أبيض..مش شبه بنات اليومين دول
هويدا(بحزن) :وآني هعمل اية بشكلها؟..آني كل اللي يهمني ابني وبس...ابني لو مرچعش لحضني آني ههد الدنيا فوج دماغ وجيدة!!!
ضحى:لية هي ست وجيدة اللي دخلته السجن؟
هويدا:أمال ايه!!...مش الكلب اللي اتشاكل ويا أخوكم، هو السبب في دخوله السچن؟...ومش هو برضة العريس اللي كان متجدم لـ مهره بت وچيده؟
نسمة:خلاص يا ماما، كلامنا مش هيغير اللي فات
هويدا:بس هيغير اللي جاي!
نسمة:بمعنى اية؟
هويدا:بمعنى إن حاتم لو وجف على ايديه ورچليه عمري ما هوافج انه يتچوز مهره...آني ابني مش جُليل عشان يترفض من عالم زي دي!...لأ وكمان يدخل السچن ويضيع مستجبله بسببهم!!
{بصيت نسمة لـ ضحى في صمت، وهويدا رفعت حاجبها}
هويدا(بـ شر) :انتوا اللي هتفتحوا أبواب چهنم على نفسكم يا وچيده، استحملوا بجى!!
=============================
{بالليل وقت الفجر...مكنتش مهره جايلها نوم، وطول الليل صاحية وماسكه موبايلها تبص لصورة حاتم الوحيدة اللي على الموبايل، كانت دموعها بتنزل وحاسة ان كل اللي هما فيه ده بيضيع على الفاضي...لحد ما زهرة قامت}
زهرة(بصوت واطي) :انتي صاحية، منمتيش؟
مهرة(بحزن) :هيجيلي نفس انام ازاي وحاتم بعيد عني، وياعالم هيخرج منها ولالا!
زهرة:ثقي خير في ربنا يا مهرة، محدش عارف المستقبل فيه اية...المستقبل ده بإيد ربنا مش بإيدينا احنا...انتي اه دلوقتي خايفه وزعلانه عشانه، بس ممكن ربنا يكرم ويخرج بكرا!
مهرة(بضحكة سخرية) :يخرج؟...يخرج ازاي؟؟
زهرة:دي حاجة بإيد ربنا مش بإيدينا احنا..نامي عشان هنروح بكرا المحكمة سوا
مهرة:لا انتي اوعي تخرجي من هنا، أكيد غسان مراقبك وعارف خط سيرك كويس اوي!
زهرة:ماهو لو عارف مكاني، يبقى أكيد مش هيسيبني وممكن يهجم على البيت في آي لحظة!
مهرة:فاكره لما قولتلك بلاش تثقي في كمال اللي اوهمك بالحب؟...فاكرة قولتيلي اية؟
زهرة(بحزن) :كنت حماره وغبية...والنبي يا مهرة ماتفكريني وتقلبي عليا المواجع...محدش بيتعلم ببلاش!
مهرة:خلاص يا زهرة، انا اسفة
زهرة:نامي، كلها كام ساعة وتروحي المحكمة
مهرة:هحاول
{نامت مهرة وفي ايديها الموبايل فاتحه عليه صورة حاتم، وواخده الموبايل في حضنها!}
===============================
{الصبح الساعة ٩ ونص في بيت فاتن..نزلت و راحت لـ بيري في شقتها، واللي فتحتلها..فيروز}
فاتن(بتحضنها) :صباح الخير يا حبيبة تيته
فيروز(بتحضنها) :صباح النور يا تيته، عاملة ايه؟
فاتن:انا كويسة، انتي اللي عاملة اية، ومبسوطة في الشقة الجديدة ولالا؟
فيروز:اه
فاتن:ماما جوا ولا فين؟
فيروز:اه
{دخلت فاتن وفتحت باب الأوضة على بيري لقيتها نايمة، قعدت جنبها وهزتها}
فاتن:مش انا معرفاكي ان انا جاية النهاردة؟...و برضة لسة نايمة؟...يا بيري!
{ولكن بيري كانت رايحة في سابع نومك، لحد ما تليفونها رن}
فاتن:طب ردي على اللي بيتصل بيكي طيب، يمكن حاجة مهمه!
بيري:--------------
{ووقتها فاتن اضطرت ترد على التليفون، وبما ان بيري كانت حاطة شريحتين في موبايلها، كل شريحة برقم، واللي منهم الشريحة اللي بتكلم منها علا بصوت متغير}
فاتن:الو...مين معايا؟....الو....مين؟؟....هو مبيردش لية؟
{وقتها علا سمعت صوت فاتن واتأكدت ان بيري هى اللي ورا الموضوع ده، وفي ساعتها قفلت الخط، واتصدمت لما عرفت ان الشخص المجهول اللي بيهددها هي صاحبتها بيري!!...وقررت تتصل بـ علاء للمره المليون لحد ما أخيراً رد}
==============عند علا==============
علا:الو يا علاء...أخيراً رديت بعد عذاب؟...انت عارف انا اتصلت بيك كام مرة لحد دلوقتي؟
علاء:وانتي عايزة مني اية؟
علا:انا عايزة اتكلم معاك في موضوع مهم أوي
علاء:موضوع اية ده؟
علا:الكلام مش هينفع في الموبايل، لازم نتقابل
علاء(بسخرية) :نتقابل فين ان شاء الله؟...عارفة المشمش اهو هناك في المشمش
علا:انت لية مش عايز تسمعني وتديني فرصة أشرحلك!!
علاء:تشرحيلي اية، مانا مش فاهم!
علا:انا في ورطة، وفي حد بيهددني بالصور والفيديوهات اللي مابينا، وبيساومني بفلوس عمال على بطال...وانا خلاص الفلوس اللي معايا بتخلص ومش عارفة اعمل اية!
علاء(مصدوم) :يانهار اسود، ومين اللي جاب الفيديوهات دي ووصلها ازاي اساساً؟
علا:مش عارفة..ما ده اللي هيجنني، هنتفضح يا علاء وكل الناس هتعرف!...لازم تتصرف بسرعة!
علاء:انتي اللي هتتفضحي مش انا...انا ميعبنيش حاجة..الدور والباقي عليكي انتي..هتعيشي وتموتي والناس هتفضل فاكرهالك!
علا(بـ غل) :بقى كده يا علاء بتبيعني؟؟
علاء:انا لا بقيت أبيع ولا أشتري، من الآخر اعتزلت الشغلانة، وروحت للأحسن منها بكتير
علا:خليك فاكرها ومتبقاش تزعل!
{وقفلت الخط في وشه، راح باصص الموبايل بلا مبالاة، جه نويري وهو مبتسم}
نويري:بيري مش كدة؟
علاء:لا دي علا صاحبتها
==============================
{في المحكمة عند حاتم، كانت مُهره و متولي و هويدا وبناتها وجوزها بنتها..وعريس مهره وأمه قاعدين في القاعة مستنين القاضي يخرج ويؤمر بالحكم}
هويدا(بخوف) :يااارب...يارب
{دخل القاضي والمستشارين، وقعدوا، وابتدوا يبصوا في الأوراق}
القاضي:بناءً على الأدلة المقدمة والشهود المسموعة، يدين المتهم حاتم متولي عبد العزيز بتهمة الاعتداء على أستاذ عبد السميع حمدي شريف. وعليه، يحكم بإصدار عقوبة السجن لمدة عام
هويدا(بصويت) :لااااا... لااااا ده ظلم، ده ظلم يانااااس...ابني حبيبي
مهره(بعياط) :لا يا حاتم لااا...انا مش هقدر أعيش من غيرك سنة كامله!!!
متولي(بحزن) :انت اللي جيبته لنفسك يا حاتم
{يخبط القاضي على الخشب}
القاضي(بزعيق) :الصوت يا اخوانا من فضلكم!!
{سكتوا كلهم، والقاضي كمل كلامه}
القاضي:المتهم الثاني سعد محمد عصام محمد، في قضية سرقة ونهب الممتلكات العامة و.....
{وبعد ما القاضي خلص كل المتهمين اللي عنده، ودخل جوا..قاموا كلهم وقربوا من حاتم ورا الحديد، كانت مهره بتعيط وماسكة ايد حاتم}
مهره(بعياط) :لية كده يا حاتم، ضيعت نفسك عشان كلب ميسواش
حاتم(بنظرة حزن) :كنتي عايزاني أشوفك بتضيعي مني يا مهره واسيبك وامشي؟
مهره(بعياط) :وانت بعد اللي عملته ده بقيت معايا يعني؟...سنة كاملة يا حاتم؟...دي صعبة عليا أوي...انا مش هقدر أبعد عنك!
حاتم:اوعديني يا مهرة انك متتجوزيش حد تاني!
مهره:اوعدك مش هتجوز حد غيرك يا حاتم...ده حبك جوا قلبي وفي عنيا الاتنين،عمري ما هبقى غير ليك...وهفضل مستنياك انشالله عمري كله!
متولي:انا هتصرف واخرجك من هنا يا حاتم
{جه العسكري وشد حاتم، وهويدا واقفه تعيط، وبناتها ييطبطوا عليها ومتأثرين!}
حاتم:ازاي؟
متولي(بصوت عالي) :هشوفلك محامي يخرجك، انا أملي في ربنا كبير!!
حاتم(بصوت عالي) :خدي بالك من نفسك يا مهره، خدي بالك من نفسك ياماما انتي ونسمة وضحى
هويدا(بصوت عالي) :متخافش علينا...احنا في حماية ربنا، انت اللي خد بالك من نفسك!
{مشى حاتم، وهما كمان خرجوا برا المحكمة...وقبل ما هويدا وبناتها يمشوا، قربت من مهرة في الشارع}
هويدا(بصوت حاد) :آني مش عايزه أشوفك هناهو المره الچاية...وياريت متتعبيش نفسك وتيچي هنا تاني...انتي لا من معارفنا ولا تجربيلنا حاچة وكل المصايب اللي حصلتلنا دهي كانت بسببك انتي، عمري ما هسامحك يا مهرة على بهدلتك لابني في السچون
نسمه(بإحراج) :ياماما!!!
هويدا(بصوت حاد) :اسكتي انتي...وانسي چوازك منه، حاتم أول ما ربنا ينفخ في صورته ويخرچ بألف سلامة هچوزه ست ستك، وابجي خلي أمك الخدامة اللي شايفة نفسها على مفيش تنفعك!
{ومشيت قدام هى وضحى..جات نسمة وطبطبت على كتف مهره وهى بتعيط وباصة في الأرض}
نسمة:حقك عليا انا يا مهرة، صدقيني ده كلام على الفاضي انما هويدا مفيش أطيب منها، ده بس من حرقتها...معلش حقك عليا سامحيني انا!
{ومشيت ورا هويدا، وعم متولي زعلان على حاتم ومهرة واللي حصلهم}
متولي:متعيطيش يا مهرة، ولا كأنها قالت حاجة!...هو انا طلقتها من فراغ؟...اللي شوفتي جزء منه ده انا كنت عايشه ليل نهار
مهرة(بعياط) :هو انت فاكرني ضعيفة ومش عارفة أرد يا عم متولي؟.لا انا عندي لسان وبعرف أرد كويس اوي،انا بس مش عايزة أرد وقلبها يشيل مني زيادة، ساعات بعذرها وبقول لو انا مكانها هعمل أكتر من كده...انا مش عايزه أزعلها عشان خاطر حاتم!..انا بحب حاتم وبحب كل اللي من طرفه..خصوصاً بقى لما تبقى أمه!
متولي:ادعي يا مهرة..ده الدعاء بيغير القدر
{وطبطب على ضهرها وخدها ومشوا}
===============================
{بعد كام ساعة كان غسان وصل ليبيا عند علاء ونويري..وأول ما شافوه، قام نويري وحضنه}
نويري:حبيب قلبي اللي مقدرش أعيش من غيره، عامل ايه طمني عليك؟
غسان:تمام، انت عامل اية يا نويري ؟
نويري:زي الفل
علاء:ازيك يا غسان، الطريق تعبك؟
غسان(بيقعد) :أوبشن التعب ده مش موجود عندي
نويري(بيقعد) :قولي بقى يا سيدي، كمال مجاش معاك لية؟
غسان:ده عيل لخمة..لو جيبته معايا كان مش بعيد نتكشف، انا مش عارف بس اية اللي مخليني استحمله؟
نويري:طول بالك شوية، ده مهما كان ايدك اليمين ومتقدرش تستغنى عنه
غسان:لو ايدي عارجه أقطعها
نويري:ياساتر على مصطلحاتك...أما اية اخبار زهرة وامك ومرات أبوك طمني!
غسان:بعت أنيسة لأمريكا وهناك عملوا معاها الصح وخلصوا عليها، لكن أمي لسة مش عارف...انما زهرة بقى ليلتها معايا طويلة
نويري:لية طيب، ده انتوا المفروض اخوات يعني!
غسان:هربت اليونان مع بت اسمها مهرة، وعيل ابن ستين كلب اسمه حاتم...الاتنين ساعدوها تهرب، بس على مين روحت وجيبتها من شعرها...بقى حتة اتنين اللي أبوه بواب وأمها خدامة، يلعبوا مع غسان رفعت مرة واحدة؟
علاء:استنى بس كده...انت قولت حاتم ومهرة؟...واحد أبوه بواب والتانية أمها خدامة ولا انا بيتهيئلي؟
غسان:ماتنضف ودانك يمكن تسمع كويس...ايوه اتنين جرابيع ميسووش جنية...بس وحياة أم الطبيعة لأندمهم، انا بس هتدارى كام يوم لحد ما حوار زهرة ده يقدم، زمان الحكومة قالبه عليا الدنيا!
علاء:اسمه حاتم متولي؟
غسان:انت عرفت منين؟
علاء:ماهما دول اللي عندي في العمارة!!...انا عارف متولي، وست وجيدة..وعارف عيالهم بس مشوفتهمش بقالي كتير!...بقى هما كانوا هربانين برا؟
نويري:اوباا ده شكل في مابينكم مصلحة مشتركة
غسان:عشان انا نيتي صافية...شوف لما الاخبار الحلوة تيجي فجأة...يعني جوز الكلاب دول من عندك؟
علاء:اه ياحبيبي...وأبوه ده انا مرقدله، انا عاوز الحساب يتقل في الآخر، وهديله حتة قلم
غسان:يبقى ايدك في ايدي يا معلم!
علاء:وانا موافق!
{وحطوا ايديهم في بعض، ضحك نويري وشد الشيشة يشربها}
==============================
{عند مهرة وصلت بيت درية، ودخلت..لقيت زهرة بتعيط، ولما زهرة شافت مهرة مسحت دموعها وحاولت تداري}
مهرة(بإستغراب) :زهرة مالها؟
درية:انتي اللي مالك، كنتي بتعيطي ولا اية؟
مهرة(بعياط) :حاتم اتحكم عليه بـ سنة سجن يا طنط درية، انا مش قادرة أصدق اللي حصل ده...مش عارفة اروح فين ولا اتصرف ازاي عشان يخرج!
درية(بتحضنها) :اتمالكي اعصابك يا مهرة، ياما ناس اتحكم عليهم بسنين طويلة..يدخلوا شباب يخرجوا منها شايبين بالشعر الأبيض، وسبحان الله خرجوا على فجأه!
مهرة(بعياط) :ازاي؟...انتي تعرفي حد حصله كده؟
درية:اخويا كان محكوم علية بـ ١٠ سنين، خففوله الحكم، وبعدها بكام سنة خرج ورجع وسط بيته وولاده، ما بالك بقى اللي واخد سنة، يعني ممكن يخففوله الحكم ويخرج بعد ٦ شهور!
مهرة(بعياط) :وانا لسة هستنى ٦ شهور؟...الاتنين أصعب من بعض..انا كرهت الدنيا واللي فيها، مش عارفة اية اللي جابني بس...انا الدنيا كلها إسودت في عيني من بعد اللي حصل
{وقعدت على السرير جنب زهرة}
درية:اقريله قرآن كل يوم، ده ربك القادر..يقول للشئ كن فيكون برهن إشارة من ايده!
مهره(بحزن) :ونعم بالله
درية:روقي دمك يا مهرة
{ودخلت جوا..بصيت مهرة لقيت زهرة كاتمة دموعها}
مهرة(بحزن) :مالك انتي كمان؟
زهرة(بعياط) :قلبي واجعني على ماما...قلبي فيه نار يا مهره...غسان قتـ.ـلها وخلص عليها!!!
مهرة(بحزن) :حاسة بيكي والله...بس متخافيش مصير غسان ده هيقع في شر اعماله...هيقع في ايد اللي مبيرحمش!..ده زي ما في القوي في الأقوى!
زهرة(بحزن) :ربنا يرحمها ويصبرني...انا مينفعش أسيب حقها...لازم أرجع حقها من غسان!!
مهرة(بحزن) :وهتعمليها ازاي دي ان شاء الله؟
زهرة(بحزن) :مش عارفة...بس دور الطيبة اللي انا فيه ده لازم ينتهي وإلا حقي وحق ماما مش هيرجع!
{حضنتها مهره، وكانوا الاتنين بيعيطوا على اللي فيهم}
مهرة:متقلقيش يا زهرة، ربنا قادر على كل شئ، قادر يرجعلك حقك من غسان...وقادر يرجعلي حاتم!
================================
{عند متولي راح بيت وجيدة، ولما فتحت ولقيته استغربت}
وجيدة:متولي؟
متولي:عايز اتكلم وياكي كلمتين ياست وجيدة
وجيدة:زي مانت شايف مفيش غيري
متولي:مانا عارف ان مفيش غيرك، عيالك الاتنين ربنا يرحمهم ويغفرلهم...ومهره طردتيها في الشارع لكلاب السكك ومخوفتيش من اللي هيحصلها!!
وجيدة:انت جاي عايز اية؟...جاي تقلب عليا المواجع وخلاص؟؟
متولي:انا جاي أفوقك من اللي انتي فيه..انتي السبب في دخول حاتم السجن، والسبب برضة في ان بنتك اتشردت في الشوارع!
وجيدة(بصوت حاد) :بسببي لية؟..كنت قولتله تعالى اتبلطج هنا في المنطقة؟...واعملي فيها بطل من أبطال السيما؟...ولا قولتله افضحنا وخلي اللي مايشتري يتفرج؟...انا بنتي سوقها وقف وكله على يد ابنك!
متولي(بصوت حاد) :انتي السبب يا وجيدة، ومهما روحتي ولا جيتي هتفضلي انتي السبب..عارفة لية؟...لانك لو كنتي وافقتي من البداية مكنش كل ده حصل، كان زمان حاتم ومهره مخطوبين وكلها كام شهر ويتجوزوا ونفرح بيهم، لكن عِنادك ونشوفية دماغك هما اللي جابونا الأرض!
وجيدة(بصوت حاد) :دي بنتي انا...وانا حره فيها، أجوزها اللي على كيفي...ميجيش الغريب يتحكم فينا ويمشينا على مزاجه ، تكونش انت واصي علينا واحنا منعرفش؟
متولي:خلاص نسيتي سنين العِشرة دي كلها؟...مش ده حاتم اللي كان نفسك تخلفي عيل ويطلع زيه؟...وكنتي بتضربي بيه المثل؟...دلوقتي بقى كُخه؟
وجيدة:حاتم الطفل بتاع زمان، غير حاتم الشاب بتاع دلوقتي...محدش فينا بيفضل على حاله ولا حد ضامن نفسه!
متولي:سواء رافضة ولا موافقة على حاتم...مش ده الموضوع اللي انا جايلك عشانه...انا جايلك عشان تكلمي عريس بنتك، وتقوليله يتنازل عن القضية...انا ابني هيضيع من عمره سنه على الفاضي...هيبقى خسر جامعته وتعليمه وشغله، حتى مهره هيخسرها هى كمان!!
وجيدة:حاتم ومهره لا يمكن يتجوزوا...والموضوع ده اتقفل ومش هيتفتح تاني، وإن جاني الخبر..ابقى بلغها ان أمها ماتت وملهاش عزا!
متولي:كلمي عريس مهره، لو مش عشان حاتم، فعلشاني انا...اللي مترضيهوش على اللي منك مترضيهوش على الغريب، بالإذن
{وسابها ونزل، وهى قفلت الباب وقعدت على الكنبه تفكر في كلامه..لحد ما رفعت سماعة التليفون وطلبت رقم}
وجيدة:انا عارفة انك مش قابلة تكلميني بعد اللي حصل...انا بس عايزاكي في كلمتين..واديني فرصة أشرحلك!
===============================
{عند حاتم بعد ما رحلوه على السجن بالبدلة الزرقا، وقعد على سريره، طلع صورة مهرة من جيبة وبص فيها}
حاتم(بحزن) :هتوحشيني أوي يا مهرة...انا وعدتك إني عمري ما هبعد عنك ولا هسيبك...وبعدت بس ده مش بمزاجي ده غصب عني!...لكن انا راجعلك قريب، ولو الدنيا كلها رفضت جوازنا، فاانا معنديش مشكلة احاربهم انشالله يوصل عمري ١٠٠ سنة، هفضل أحارب علشانك طول ما فيا الروح!...المهم انك انتي تفضلي قد الوعد، ومخرجش ألاقيكي بقيتي لغيري!...ساعتها هطب ساكت مش هستحمل!... لكن انا عارف انك قد الوعد وعمرك ما هتكوني لحد غيري!...بحبك اوي يا مهرة!
===============================
{في بيت هويدا، كانت قاعدة على الكنبة حاطة ايديها على راسها وحزن الدنيا في قلبها}
سميح(بيضحك) :هههههه ابنك بجى رد سچون خلاص يا هويدا؟...هي دهي الخلفة اللي تشرف؟
هويدا(بصوت حاد) :خير انشالله؟...ناوي على خناجة ولا اية أمال؟
سميح(بيضحك) :ههههه جومي جومي، اعمليلنا كوبايتين شاي بالنعناع نعدل بيهم الطاسة!
{قامت هويدا وهى مستغربة جوزها عديم الاحساس}
هويدا(بزعيق) :انت اية يا أخي؟...على جلبك مراوح؟...كوبايتين شاي اية وزفت اية فوج دماغك؟...ابني محكومله بسنة سچن، وانت هناهو بتجولي كوبايتين شاي تعدل بيهم الطاسة؟..جاك طاسة لما ترن فوج دماغك!!
سميح(بزعيق) :احترمي نفسك ومتتكلميش معايا بالطريجة دي تاني يا هويدا...بعدهالك..المرة الچاية هطين عيشتك انتي وبتك ضحى!
هويدا:وضحى مالها ان شاء الله؟..بتدخلها في اللي ملهاش فيه لية؟
{دخل عبدالله جوز نسمة عندهم}
عبدالله:في اية بس بتتخانقوا لية؟
هويدا(بزعيق) :البيه جال اية..بيجولي اعمليلنا كوبايتين طفح شاي، يعدل بيهم الطاسة!، ولا عامل أي اعتبار لمشاعري وأحاسيسي!
عبدالله:طب ادخل جوا يا عم سميح، عشان أعصابك متتعبش
{بص سميح بقرف لـ هويدا ودخل الأوضة}
عبدالله:مانا قايلك مليون مره خديه على قد عقله
هويدا(بعصبية) :خلاص مبجاش فيه طولة بال، آني روحي بجيت في مناخيري من چوا!!!
عبدالله:طب صلي على النبي
هويدا:علية افضل الصلاة والسلام
عبدالله:انا سألت ناس في موضوع حاتم
{وفجأة الأمل رد في قلب هويدا}
هويدا:بجد والله يا عبده؟
عبدالله:اه والله، وقالوا ندفع غرامة ونخرجه، يااما الراجل اللي رافع عليه قضية يتنازل عنها!
هويدا:أبيع الأرض بتاعت أبويا مفيش إشكال، بس حاتم يخرچ منها!!!
عبدالله:هو بس الحوار هياخدله كام يوم لكن بأمر الله محلوله!
هويدا:روح اللهي ربنا يسترها وياك يا عبده، ويوقفلك ولاد الحلال اللي يساعدوك زي ما بتساعدنا!!
عبدالله:اللهم آمين، انا جيت اطمن قلبك..عارفك أكيد خايفة وقلبك بياكلك على حاتم!
هويدا:اوي اوي، ده انت لو ولعت نار في بلدنا والبلاد اللي چنب بلدنا...والنبي ماهتيچي حاچة في النار اللي في جلبي!
عبدالله:عارف يا حماتي..بس ليها مخرج بعون الله
هويدا:يااارب...ياااارب
===============================
{عند بيري،وهي قاعدة مع فاتن في الريسيبشن، قصاد التلفزيون...لقيت علا بتتصل عليها..سكتت شوية ومتردده مش عارفة ترد ولالا لحد ما ردت}
بيري:الو
علا:هاي اخبارك اية يا بيري؟
بيري:بخير
علا:انتي عند طنط، ولا فين؟
بيري:هيفرق معاكي في اية؟
علا:أصلك وحشتيني وعايزة آجي أقعد معاكي شوية، بجد بقالنا كتير مقعدناش مع بعض لواحدنا
بيري:لا انا مسافرة
علا:ياخسارة، يعني مش هعرف اقعد معاكي؟
بيري:للاسف بقى، بس عادي يا حبيبتي تتعوض يوم تاني!...الأيام جاية كتير
{وكانت مبتسمة ابتسامة شر}
علا(بتردد) :خلاص مرة تانية بقى شكلي مليش نصيب، صحيح طنط أخبارها اية طمنيني عليها؟
بيري:كويسة الحمدلله
علا:الحمدلله، سلميلي عليها
بيري:يوصل
علا:باي
بيري:باي
فاتن:مين يا بيري؟...بتكلمي غادة أختك؟
بيري:لا دي علا...كانت عايزة تيجي بس انا قولتلها إني مسافرة
فاتن:وانتي مش عايزاها تيجي لية؟
بيري:امممم مش جاهزة يا ماما...عادي يعني
فاتن:طب قومي، شوفي مين بيخبط
بيري:حاضر
{قامت بيري، تشوف مين بيخبط، لقيته الهاكر اللي جابلها كل فضايح علاء جوزها وصاحبتها}
بيري:عايز اية؟
_بكلمك مبترديش لية؟
بيري:كنت مشغولة، خير!
_اسمعي الفويس ده كدة
{وشغلها تسجيل صوتي، لـ علاء وهو بيتفق مع غسان على قـتلـ.ـهـا}
[[علاء:عايزك تخفيلي ملامح أمها، مش عايز سم واحد فيها سليم، حتى العضم عايزوا يختفي ميبقالوش أثر
غسان:تحب أنفذ بأنهي طريقه؟
علاء:اللي يعجبك، ماهو أصل دي طول ماهي عايشة هتفضل ترازي في اللي جابوني..بس فيروز اياك تقرب منها، البت ملهاش ذنب، انا عايز أمها بس
غسان:من عينيا، بس كله بتمنه، ادفع وانت هتشوف
علاء:عايز كام؟
غسان:عايز مليون ونص
علاء:كتير اوي عليها الصراحة
غسان:بس مش كتير على مجهوي!
علاء:مجهودك يحترم، ماشي يا سيدي، أول ما تجهز عرفني وانا أجيبلك الفلوس، اتفقنا؟
غسان:اتفقنا ]]
بيري(بخوف) :يانهار اسود ومنيل!!!...هى حصلت انه ينوي على قتلي؟؟؟...يانهار اسود
فاتن(بصوت عالي) :مين يا بيري؟
بيري(بصوت عالي) :ده الدليفري يا ماما
{وبعدين رجعت تتكلم تاني بصوت واطي}
بيري:لو في أي جديد عرفني عشان أعرف اتصرف
_تمام
{مشي وبيري قفلت الباب ورجعت قعدت والخوف والتوتر على وشها}
فاتن:أمال فين الأكل؟
بيري:أكل اية؟
فاتن:انتي مش قولتي انه بتاع الدليفري؟
بيري(بتردد) :ااه اااه ايوة هو، بس جاب أوردر غلط، خليته يرجع بيه وهيبدله
فاتن:مابقوش يشوفوا شغلهم اليومين دول، تقوليلهم حاجة، ويجيبولك حاجة تانية خالص!
بيري(بتوتر) :صح فعلاً
================================
{تاني يوم عند مهرة، راحت السجن لـ حاتم بما انه كان يوم الزيارات على حظهم!..ولكن هويدا مكنتش تعرف..كانت مهرة قاعدة جنب حاتم وماسكة ايده والدموع في عينيها}
حاتم:متفكريش انها بعد اللي قالته، هصرف نظر ولا حتى هغير رأي!...انا مش عيل صغير يا مهره ولا معدوم الشخصية!!...دي حياتي وده اختياري انا!
مهرة(بدموع) :كلامها وجع قلبي أوي يا حاتم، حسسني اننا بدل ما نقرب من بعض زيادة..لا بنبعد، وبعد ما ماما كانت رافضة، بقيت أمك هي كمان رافضة!...عارف انا فكرت كتير أخلص من الدنيا دي و...
{ضغط حاتم على ايد مهره وتنحلها}
حاتم :اياكي تفكري بالشكل ده تاني يا مهره!...تبقي كتبتي الموت عليا من قبل مااخرج...انا لسة عندي أمل ان كل حاجة تتحل وأهلنا يوافقوا!...وحتى لو موافقوش انا مقداميش حل تاني
مهرة(بخوف) :لا يا حاتم مش هينفع!...احنا بالشكل ده هنقطع علاقتنا بيهم للأبد!..انا مش هقدر أعمل حاجة من ورا ماما...لازم نشوف طريقة لحد ماتوافق!
حاتم:مااحنا جربنا كل الطرق ولسة برضة مصممة يا مهرة وأديكي شايفة حصلنا اية من رفضها لجوازنا!
مهره(بخوف) :صدقني انا مش هقدر أعمل كده...أكيد ليها حل المهم يا حاتم طمني عرفت تنام وتاكل هنا؟
حاتم(بحزن) :معرفتش، ومش لإني مش متعود على العيشة دي...لا انا متعود على كده وأكتر بكتير!
مهره(بإستغراب) :امال معرفتش لية يا حاتم؟
حاتم(بحزن) :عشانك...عشان بعيد عنك...عشان قربي منك اللي بينورلي حياتي يا مهرة...وبكون متطمن عليكي وانتي معايا...لكن طول مانتي لواحدك انا مش متطمن!
مهرة(بحزن) :وانا عندي أمل انك تخرج قريب، قلبي بيقولي انها هانت اوي
{خرج العسكري من جوا وقال للناس بصوت عالي}
العسكري:يلاا الوقت خلص، يلااا امشوا... يلا يااساتذة يالي هنا
{قام حاتم ومهره}
حاتم:خدي بالك من نفسك يا مهرة
مهرة:حاضر، هجيلك الزيارة الجاية
حاتم:مع السلامة يا مهره
{مشيت مهره وخرجت وهي حزينة، وبعيد كان في شخص بيراقبها...وبعد ما وصلت بيت درية}
مهره:السلام عليكم
درية وزهرة:وعليكم السلام ورحمة الله وبركاته
{خبط الباب لتاني مرة، قامت زهرة تفتح لقيته كمال!!!!}
زهرة(مصدومة) :انت عرفت مكاني منين؟؟؟