رواية ابي بواب وامك خدامه الفصل التاسع عشر19والعشرون20بقلم رانيا عماره
كمال:متخافيش يا زهرة، انا المره دي مش جاي لأذيتك، انا جاي أشرحلك موقفي من اللي حصل آخر مره!
زهرة(بخوف) :مابقتش أثق فيك من بعد ما ضحكت عليا وسلمتني لـ غسان!..انت كدبت عليا كدبة كبيره أوي!
كمال:غسان سافر يا زهرة...وسابني انا وليلى..انا جيت أنبهك منه...غسان لو لقاكي هيـقـ.ـتلك!!..لازم تداري منه وتهربي منه بعيد!
زهرة(بسخرية) :عامل انك قلبك عليا يا كمال؟...بتعملي طُعم فاكرني السمكة اللي هتشبط في الخطاف؟...لا تبقى غلطان...انا اتعلمت من غلطي وبطلت أثق في حد..والكلام اللي قولته ده مدخلش دماغي
{جات مهره وهى مستغربة من وجود كمال}
مهره(بصويت) :مش ده صاحب أخوكي اللي جه معاه في شقة اليونان؟
زهرة:ايوه هو
كمال:انا مش جاي لأذية حد فيكم!!!...كل اللي حصل ده كان غصب عني....انا كنت مغلوب على أمري...غسان محدش قادر عليه..طايح في خلق الله ومش بيرحم حد...انا أول واحد نفسي أبعد عنه...بس لو ده حصل مش هيسيبني في حالي..غسان بقى خطر علينا كلنا مش انتي بس يا زهرة!
زهرة(بخوف) :وانت جاي عاوز اية؟؟؟
كمال:انا جاي أبلغك ان غسان سافر كام يوم لحد ما الحكومة تهدى وتنسى الموضوع...وهيرجع على قتـ.ـلك...الحقي اتصرفي قبل ما يرجع!
مهرة(بإستغراب) :انت عرفت مكان زهرة ازاي؟؟
كمال:شوفتك وانتي خارجة من السجن، وانا عارف انك انتي و زهرة صحاب من زمان، قولت أشوف زهرة هل هي موجودة معاكي ولالا..انا كدة كدة مش خسران حاجة!
زهرة(بصويت) :احنا كدة روحنا في ستين داهيه...امشي بقى من هنا انت عايز مننا اية؟؟
كمال:انا كده كده ماشي، خدي بالك من نفسك يا زهرة، سلام
{مشى كمال و زهرة قفلت الباب وراه وقعدت على السرير هى ومهره}
مهرة:انا مش مرتاحة لـ مجيته دي يا زهرة، أكيد غسان عرف مكانك...احنا لازم نمشي من هنا
زهرة(بخوف) :وانا كنت ناقصة؟؟...هما بيطلعولي منين بس!!!...أهرب منهم وأروح فين؟؟؟
مهرة:تعالي نروح لـ عم متولي، بس قبل مانروح لازم نتدارى بحيث محدش يعرفنا
{وبالفعل مهرة وزهرة لبسوا نقاب وخرجوا من بيت درية..وراحوا العمارة عند متولي...كان متولي بيكنس قدام الأوضة، ومشغل الراديو..واول ما وصلوا، رفعت مهرة النقاب...بص لها متولي بإستغراب}
متولي:مهرة؟؟...اية يابنتي اللي انتي عاملاه في نفسك ده؟
مهرة:احنا مش هينفع نقعد عند طنط درية تاني ياعم متولي
متولي(بإستغراب) :غريبة يعني يا مهرة، هي قالت حاجة دايقتكم؟
مهرة:بالعكس دي كانت شايلانا في عينيها الاتنين...بس صاحب أخو زهرة عرف مكانا، كان لازم نغير المكان قبل ما أخوها ذات نفسه يجي!
متولي:انا مش فاهم حاجة يا مهرة!
مهرة:هفهمك بعدين ياعم متولي..احنا أهم حاجة عندنا دلوقتي لازم نشوف مكان سكن تاني...احنا بقينا متراقبين!
متولي:تعالوا معايا يا مهرة
مهرة:هنروح فين ياعم متولي؟
{دخل متولي جوا الأوضة وحط المقشة...وقفل الراديو وخرج قفل باب الأوضة بالقفل}
متولي:هتعرفي كمان شوية...يلا بينا
{مشي متولي ووراه مهرة وصاحبتها زهرة...وركبوا المواصلات وسافروا لـ بلد متولي، وبعد ما وصلوا، نزلوا من التوكتوك قصاد بيت قديم، قرب متولي وفتح باب البيت وطلع أول شقة. فتحها ودخل...كانت شقة صغيره وفيها صور حاتم وهو صغير...قربت مهرة من صورة حاتم وابتسمت}
متولي:ده حاتم وهو صغير...وله صور تانية لحد ما كبر
مهرة:عمري ما اتوه عنه ابداً ياعم متولي...ملامحه زي ماهي متغيرتش كتير!
متولي:ده البيت اللي حاتم واخواته اتربوا فيه..ومن ساعة مااتطلقت انا وأمهم، هى راحت بيت أبوها تتجوز فيه، وانا رجعت شغل العمارة..والشقة زي مانتوا شايفين قديمة ومتربه وعاوزه تتنضف...ايدك بـ ايد صاحبتك لحد ماترجعوها عروسة من أول وجديد، وحلال عليكم..انتوا في مقام بناتي
مهرة(بتردد) :امممم بس مش ممكن يعني حد من بناتك يجي ويدايق من وجودنا هنا؟
متولي:لا من الناحية دي اتطمني...نسمة بنتي متجوزه وعندها بيتها...وضحى مينفعش تقعد هنا لواحدها فااهي قاعدة مع أمها وجوزها...وحاتم ربنا يفك سجنه
مهرة:شكراً ياعم متولي..بجد مش عارفة أودي جمايلك عليا فين!
متولي:الشكر لله وحدة يا مهره
{وطلع ٢٠٠ جنية من جيبه واداها لـ مهرة}
متولي:خلي دول معاكم..هما أه قليلين بس اهو أحسن من مفيش!
مهرة:لا ياعم متولي احنا مش واخدين حاجة...احنا...
متولي:انتوا اية؟...اعذريني بس انتوا محدش فيكم معاه جنية يوحد ربنا...هتاكلوا ازاي؟...خليهم معاكي واصرفي منهم وحاولوا تدبروا أموركم لحد ما حاتم يرجعلنا بالسلامة
مهرة(بحزن) :تشكر ربنا ما يحرمنا منك
متولي:خدوا بالكم من نفسكم
مهرة:حاضر
{خرج متولي من البيت، ومهرة قفلت الباب، وزهرة قلعت النقاب وقعدت على الكنبة}
زهرة:واحنا هنفضل هنا لحد امتى يا مهرة؟
مهرة:لحد ما حاتم يخرج ونتجوز
================================
{بعد مرور شهرين، في العمارة عند متولي...كان وجيدة جالها شغل في شقة تانية، وهي طالعه وقفت قصاد متولي وسكتت مكنتش عارفة هتقول اية!}
وجيدة:صباح الخير ياعم متولي
متولي:صباح النور
وجيدة(بتردد) :هي.. هي مهرة عاملة اية؟
متولي:مهرة؟...وانا اية عرفني بطريق مهرة؟
وجيدة:ازاي متعرفش؟...هى مش آخر مره مشيت معاك؟
متولي:لا مهرة اتحايلت عليها أوديها عند جماعة قرايبنا محترمين رفضت...ومشيت لواحدها ولحد دلوقتي معرفش عنها حاجة!
وجيدة(بصويت) :يعني اية مشيت لواحدها يا متولي؟؟...ازاي تسيبها تمشي لواحدها؟؟
متولي:اية دلوقتي بقيتي تخافي عليها؟...أما صحيح مخوفتيش عليها لية يوم ما طردتيها من البيت؟...مخوفتيش عليها ليه من كلاب السكك؟
وجيدة(بصويت) :لا تكون مهرة حصلها حاجة يا متولي!!...انا فاكراها مشيت معاك...ياعالم راحت فين دلوقتي!
متولي:والله دي حاجة متخصنيش...هي دي بنتي ولا بنتك انتي؟...والمشاكل اللي مابينكم وبين بعض دي انا مالي بيها تدخلوني فيها لية؟؟
وجيدة(بصويت) :ازاي متخصكش؟؟...هي مش المشاكل اللي حصلت دي بسبب ابنك!!
متولي:كان في ايديكي توافقي ولا كان كل ده حصل من الأول...لا كان حاتم اتسجن ولا بنتك اتشردت
وجيدة(بصويت) :لا يا متولي...حرام عليكم اللي بتعملوه فيا ده...انا عندي القلب ومش مستحمله...دورلي على مهرة وطلعهالي من تحت الأرض أبوس ايدك!
متولي:لما اعرف مكانها أبقى أرجعهالك انما انا معرفش طريقها، روحي انتي بقى اسألي عليها في الأقسام والمستشفيات...ويا تلاقيها...يا متلاقيهاش!
{عيطت وجيدة وحطيت ايديها على قلبها}
وجيدة:ياارب....انت العالم بيا وبحالي!!
{وطلعت فوق وهي بتعيط..ولكن متولي كان عايز يعلمها الأدب ويديها درس عشان تعرف قيمة بنتها!}
==============================
{عند هويدا، باعت أرض أبوها، ودفعت فلوس لـ حاتم عشان يخرجوه ولكن المبلغ كان كبير...واليوم ده كانت هويدا وبناتها وجوز بنتها واقفين برا مستنين حاتم يخرج}
هويدا(بدموع) :آني مش جادرة أصدج ان حاتم ابني هيخرچ...يا سبحان مغير الأحوال...ده آني كنت هموت لما عرفت انه هيتسچن سنة بحالها!!... بس على مين؟... مفيش حاچة بعيدة على ربنا... اه المبلغ كبير بس كله يهون عشان خاطر حاتم!
نسمة:ربنا يرجعه لينا بألف سلامة، بقاله شهرين غايب علينا، ومبنشوفوش إلا كل فين وفين!
هويدا(بعياط) :هتجنن وأشوفه يا نسمة، وحشني جوي جوي
عبدالله:ده احنا دافعنله مبلغ يجوز عريس في بلدنا، وبعد كل ده مش هيخرجوه؟
هويدا:لااا هيخرچوه غصب عن حباب عينيهم...أمال احنا دافعين المبلغ دهو كله لية؟...مش عشان يخرچ؟
ضحى:يارب يارب
{وفضلوا واقفين شوية، لحد ما حاتم خرج أخيراً...جريت عليه هويدا وحضنته وهى بتصرخ}
هويدا:ياحبيب جلب جلب جلبي...وحشتني جوي جوي يا حاتم يابني...أمك كانت هتموت عليك المدة اللي فاتت دي كلها...انا بحمد ربنا اننا لاجينالها حل وخرچناك...اهي چات من عند ربك...لولولولولولوي
نسمة:لولولولولوي حمدالله على السلامه يا حاتم
{وقربت نسمة تحضن حاتم، هي وضحى}
عبدالله(بإبتسامة) :حمدالله على السلامة يا حاتم، هتنور بيتك من تاني!
حاتم:انتوا اللي وحشتوني أوي..وحشتيني أوي يا ماما
{وباس راس وايد هويدا.. راحت هويدا هى اللي بايساه}
هويدا(بعياط) :يا غالي...حمدالله على سلامتك
حاتم:الله يسلمك يا أمي
نسمة:لولولولولولوي
{وبعد ما حاتم سلم على أهله، قرر يروح لـ متولي..كان متولي نايم في الأوضة، لقى الباب بيخبط..راح يفتح لقاه حاتم..فضل يتهته بالكلام من صدمته لحد ما حضن حاتم وهو مش مصدق نفسه}
متولي(بصويت) :حاااتم.....حاااتم..خرجوك امتي وازاي؟؟... اوعاك تكون هربت!!!
حاتم(بيحضنه) :والله العظيم ابداً...امي اتصرفت وخرجتني...وحشتني اوي اوي يا بابا!!
متولي(بدموع) :وانت كمان اوي يا حاتم...انت بجد خرجت ولا انا بحلم؟
حاتم:والله العظيم خرجت...طمني عليك عامل اية؟
متولي(بدموع) :كنت تعبان اوي وقلبي مقهور عليك يابني، بس لما شوفتك روحي ردتلي!!
حاتم:خلاااص اتحلت...انا في خلال الشهرين اللي فاتوا دول اتعلمت حاجات كتير...انا قررت اغير من كل حياتي، وابقى انسان جديد!
متولي:ربنا يحفظك ويبارك فيك يا حاتم...عشان خاطري امشي جنب الحيط واتعلم من غلطتك اللي فاتت دي...انت المره دي ربنا سترها معاك، المرة الجاية محدش عارف اية اللي مستخبي!
حاتم(بيضحك) :متخافش عليا ابنك أسد...أمال مهرة فين؟
متولي(بتردد) :مهرة امها طردتها من البيت
حاتم(مصدوم) :طردتها ازاي؟؟
متولي:يوم المشكله لما خدوك القسم، امها خيرتها بين اختيارين وهي اختارتك..لكن أمها طردتها وبقالها شهرين متبهدلة من هنا لـ هنا
حاتم(مصدوم) :ازاي مقالتليش حاجة زي دي لما كانت بتيجي؟؟...انا فاكر انها عند وجيدة!!
متولي(بحزن) :متخافش عليها يا حاتم...مهرة في الحفظ والصون، مهرة وصاحبتها عندنا في البيت
حاتم(بإستغراب) :عند هويدا؟
متولي:لااا...في بيتك يا بطل اللي اتربيت فيه ويا اخواتك..تعالى تعالى دي هتفرح بيك اوي
حاتم:انا اللي هفرح بيها أوي...انا الشهرين اللي عدوا عليا دول كأنهم سنتين...مهرة وحشتني اوي بكل حاجة فيها...انا مش عارف هعمل اية لما أشوفها!
{وفي نص كلام حاتم...كان متولي بيقفل الأوضة وبعد ما خلص.. خده وخرجوا}
متولي:ده هي اللي هتتجنن عليك يا حاتم... مهرة طلعت بتحبك اوي اوي لدرجة انها قبلت تترمي في الشارع ولا انها تبيعك!
حاتم:مهره دي مفيش منها في الزمن ده...حاجة مميزة ومختلفة مش هتتكرر تاني!
متولي:ربنا يلين دماغ وجيدة ودماغ أمك...يمكن ربنا يهديهم ويوافقوا
حاتم:حتى لو موافقوش...انا خدت القرار خلاص!
================================
{وبعد ساعة عند مهرة و زهرة... كانوا قاعدين قصاد التلفزيون، وكل واحده فيها هم الدنيا كله...الباب خبط...قامت مهرة تفتح لقيته متولي}
مهرة:اتفضل ياعم متولي
متولي:اتفضل لواحدي؟
مهرة(بإستغراب) :هو انت معاك حد؟
متولي:أمال؟
{بعد متولي...وحاتم وقف مكانه...ولما مهرة شافته صرخت..و نطت في حضنه وهى مش مصدقة!}
مهرة(بصويت) :وحشتني اوي اوي اوي...وحشتني اوي يا حاتم....اية المفاجأة الحلوه اوي اوي دي؟؟...انت خرجت بجد؟؟؟... انت خرجت أخيراً؟؟... خرجت ازاي طيب؟؟؟
حاتم(بـ حب) :فاكرة لما قولتيلي ان قلبك حاسس انها خلاص هانت؟...كان قلبك عنده حق...ارادة ربنا فوق كل شئ يا مهرة!....انتي اللي عاملة اية طمنيني عليكي، كنتي عايشة ازاي الفتره اللي فاتت دي كلها؟؟
مهرة(بـ حب) :كانت حياتي عذاب من غيرك...مكنتش عايشة...كنت ميتة بالحياة!!... بس النهاردة انا روحي اتردتلي...الحمدلله يارب انك خرجت الحمدلله
حاتم(بـ حب) :وحشتيني اوي يا مهرة...انا اكتشفت اني بحبك اوي...واني مقدرش اعيش من غيرك...شهرين بس عملوا كده...أمال سنة كاملة كان اية هيحصل!!
مهرة:كان هيحصل حاجات كتير...انا كان عندي استعداد يخرجوك وادخل انا مكانك!!...انا مكنتش قادرة استحمل أشوفك في المكان ده وسط الناس دي!!...احنا مكانا مش هنا يا حاتم...احنا يوم ما رجعنا كان اسوأ قرار خدناه..كان المفروض نفضل هناك منرجعش!!
حاتم:وانا خلاص خدت القرار، بس لآخر مره هدي فرصة لأمي وأمك انهم يوافقوا، عشان ابقى عملت اللي عليا وضميري ميوجعنيش!
متولي:كلام اية اللي بتقوله ده يا حاتم؟؟...انت اتجنتت ولا اية؟...عايز تتجوز مهرة بدون موافقة أمها وأمك؟
حاتم(منفعل) :انا ومهره مش هينفع نبعد عن بعض تاني!!...وبعدين هو انا قولتلك هتجوزها في السر؟...احنا هنعمل فرح وهنعزم كل الناس ماعدا الاطراف اللي رافضه!...ولما يتحطوا قصاد الأمر الواقع ساعتها مش هيكون عندهم اختيار تاني!
متولي:لا يا حاتم...انا من رأي تاخد رأي أمك وأمها الاول وتطلب منهم الموافقة!
حاتم:ماهو ده اللي انا بقوله!!
================================
{عند هويدا بعد ما حاتم راحلها و فتح معاها الموضوع}
هويدا(بزعيق) :على چثتي انه يحصل يا حاتم..انت نسيت عملوا فينا اية؟...روحنا لأمها واتكلمنا معاها بكل ذوج واحترام وفي الآخر طردتنا من الدار، ودخلت السچن شهرين بسببها...خلتني أبيع أرض أبويا برضه بسببها عشان أخرچك من المصيبة السوده اللي انت وجعت فيها...لا يا حاتم الموضوع ده خلاص اتجفل بالضبه والمفتاح...آني هخطبلك زينب چارتنا، هي دي اللي تنفع معانا..واهي حتى زيها زيك معاها كلية..خلي ست مهره تروح تشوف واحد من عينتها!
حاتم(بزعيق) :زينب اية وكلية اية؟...انا مالي بيها!!...وبعدين مانا قايلك ان مهرة ملهاش ذنب... وان اللي حصل ده كان بسبب تهوري!!...انا اللي غلطان مش هي!
هويدا(بسخرية) :ما لازم تجول كده وأكتر كمان، ماهو مينفعش تطلعها وحشة جدامي عشان أوافج عليها...انت لو اتچوزت مهره يبجى جليت من أمك جصاد وچيدة يا حاتم!!
حاتم(بعصبيه) :انا مش فاهم انتي لية مصممة على رأيك؟...هو انا هلاقيها من ست وجيدة ولا منك؟...انتوا الاتنين لية راكبين دماغكم أوي كده!!
هويدا(بصوت حاد) :وچيدة مش أحسن مننا عشان ترفضك واحنا نرحب ببتها...آني ابني مش جليل، لااا آني ابني حاچه كبيره، ولازم يوم مايروح يتچوز تكون الخلج مجدرة جيمته كويس...آني هخطبلك وآچوزك على حسابي يا حاتم بس بشرط!
حاتم:شرط اية؟
هويدا:اللي هتتچوزها تكون على كيفي!
حاتم:برضة؟؟؟... برضة مصممة؟؟
هويدا:وهفضل مصممة..وچيدة أصلها مش أحسن مني في حاچة!
حاتم(بزعيق) :طب أقسم بالله لأنا متجوزها غصب عنك وعنها..مادام هي ماشية بالعند بقى ومحدش مدور على احساسي ولا على احساسها!!!
هويدا(مصدومة) :انت بتكسر كلام أمك يا حاتم؟؟
حاتم(بعصبية) :اعتبريها زي ما تعتبريها، مادام انا محدش عامل حساب لـ زعلي
{خرج حاتم من البيت وهو متعصب، وهويدا مشيت وراه لحد نص الصالة ووقفت}
هويدا(بزعيق) :طب ابجى اعملها يا حاتم، وشوف آني هعمل اية!!
==============================
{عند بيري يوم افتتاح مشروعها الجديد "مطعم"...كانت واقفة مع غادة ونبيل...لحد ما عادل و علا جم يباركولها}
علا(بتحضنها) :ألف مليون مبروك ياحبيبتي
بيري:الله يبارك فيكي يا علا
عادل:مبروك يا بيري على الأوبنينج
بيري:الله يبارك فيك يا عادل
نبيل:بس اية رأيك في ذوق بيري؟
عادل:لا بصراحة لا يعلى عليه
بيري:شكراً يا عادل، ده من ذوقك
نبيل:تعالى عايزك في موضوع، عن اذنكم يا جماعة
{وخد عادل وخرجوا برا...راحت بيري قعدت مع غادة و علا...وطول ما هما قاعدين كانت بيري وعلا بيبصوا لبعض بنظرات مريبة لحد ما غادة خدت بالها}
_مبروك يا بيري، عقبال اوبنينج بقيت الفروع
بيري:ميرسي ياحبيبتي، الله يبارك فيكي
غادة:فرحك امتى يا علا؟
علا:لسة ٦ شهور كمان...انا قولت لعادل انهم قليلين والمفروض كنا نطول الفترة عن كده بس هو مستعجل
غادة:انتوا مش محتاجين خطوبة اصلاً، عادل ماشاء الله عليه، ذوق اية، وأخلاق ايه!
بيري:اه فعلاً...عادل ده ابن ناس أوي
{كانت بيري بتضغط على كلمة "أوي" وهي بتبص لـ علا كأنها تقصدها بحاجة!}
علا:اه الحمدلله ربنا عوضني بيه
{قامت بيري، وابتسمتلهم}
بيري:خدوا راحتكم..وانا هروح المطبخ
غادة:ماشي يا بيري
{مشيت بيري}
علا:انا كنت عايزة أكلمك في موضوع كده وانتي تفتحيه مع بيري
غادة:موضوع اية؟
علا:انا عايزة أدخل شريكه مع بيري في المطعم
غادة:وانتي جاهزة لحاجة زي دي؟
علا:أه طبعا جاهزة جداً، هي بس توافق
غادة:وانتي لية مفتحتيش الموضوع معاها عالطول.. اشمعنا اختارتي انك تكلميني فيه انا الأول؟
علا:مش حابه اتحط في موضع احراج لو هي رفضت، فا شايفه انه من بعيد لـ بعيد أحسن!
غادة:خلاص سيبيها عليا...انا هكلمها في الموضوع ده وهشوف هتقول اية
علا:تمام، شكراً يا غادة
غادة:العفو
================================
{عند غسان، كان شغال برا مع علاء ونويري، وبيتاجروا في الأسلحة والآثار..واللي بيعرفلهم مكان الآثار هو غسان..واليوم ده كانوا مع بعض في الجبل مع ناس ليبين}
علاء:فين الآثار يا غسان..هنا ولا هنا؟
غسان:هناك
{لحد ما فضلوا ماشيين ووصلوا عند حتة أرض}
نويري:فين بالظبط يا غسان؟
غسان:هنا
نويري:احفروا هنا
{وبعد ما ألة الحفر..قربت وابتدت تحفر بعد شوية وقت كانوا لقوا الأثار، ضحك نويري وهو مش مصدق ان غسان طلع كلامه صح!}
نويري(بيضحك) :ياابن اللذينة..لا انا كدة هبتدي اخاف منك!
غسان:لأ وخدوا التقيله، لسه بقى في زيهم أضعاف في المنطقة اللي هناك دي!
{علاء سقف وهو بيضحك}
علاء:ايوه هو ده الكلام الصح، ياريتنا جينا من سنين
نويري:طلعوا الأثر من غير خربوش واحد، ألا خدوا بالكم الخدش ده يقل من تمنه
علاء:تمن اية ياعم اللي يقل منه...الأثار أثار ولو حطوا عليها ماية نار
نويري(بيضحك) :لا بتقول حكم وأمثال
{وبعد شوية وقت كانوا أخيراً خرجوا الأثار..وقف علاء قصاد منها وهو مش مصدق نفسه}
علاء:البتاعه دي تعملها كام دلوقتي؟
نويري:٥٠٠ ألف دولار
علاء:يعني كام بالمصري؟
نويري(بتفكير) :بتاع مليون ونص
علاء:وانا اللي فاكرها غالية...وهما المليون ونص دول يعملوا اية في الزمن ده؟
نويري:انا بقولك سعر تقريبي، لكن مش انا اللي هسعرها يمكن تجيب أكتر منك كده، ويمكن تجيب أقل!
علاء:طب بقولكم اية احفروا تاني يمكن تلاقوا حاجة جديدة!!
غسان:مفيش حاجة تاني هنا، اللي انتوا عايزينه هتلاقوه هناك!
نويري:طب تعالى ورينا يا بركتنا..يلا يا جماعة
{وخدهم وراحوا الناحية التانية}
غسان:تحت رجلي
نويري:طيب احفروا هنا... يلا
{وبعد ما حفروا لقوا ٣ أثار أكبر من بعض!}
علاء(بيضحك) :بركاتك يا شيخ غسان...ده احنا من غيرك كان زمانا بنحفر بقالنا شهر عشان نلاقي واحدة منهم ويا عالم بعد كل ده كنا هنلاقي ولالا!
{بص له غسان بنظرة مريبة، ومشي!}
نويري(بصوت عالي) :يلا يا جماعة، طلعوهم زي ما عملتوا في اللي قبلهم.. خدش واحد مش عايز...اللهم بلغت اللهم فااشهد!
===============================
{فوق عند وجيدة في الشقة، كانت بتنضفها وكل تفكيرها رايح لـ مهرة..ومش عارفة هل مهرة بخير ولالا..لحد ما جات صاحبة الشقة}
_انا رايحة مشوار يا ست وجيدة...عايزاكي تنضفي المطبخ والصالون كويس، في ناس مهمة جاية بالليل
وجيدة:حاضر يا ست شروق من عينيا الاتنين
_وفي دليفري هيجي بأكل...عايزاكي تاخديه وتشيليه جوا الفرن، وقبل ماآجي هتصل بيكي واقولك سخنيه، لاني مش هرجع لواحدي!
وجيدة:حاضر اللي تؤمري بيه
{مشيت الست وخرجت من الشقة، ولسة وجيدة بتمسح...لحد ما قامت وهي بتقوم جالها دوخة فقعدت ترتاح}
وجيدة(بتعب) :اااه يا راسي...واحنا اللي زينا بيرتاح ولا هيشوف يوم راحة؟...اتكتبلنا التعب والشقى طول حياتنا
{قامت وجيدة ودخلت المطبخ وخرجت العلاج بتاعها وخدته وكملت مسح، وتحت كان متولي قصاد العمارة بيسقي الزرع بعد ما رجع...لقى حاتم جاي}
متولي(بإستغراب) :اية يابني وهو انت لحقت؟
حاتم(مدايق) :انا اتخانقت مع أمي
متولي:لية حصل اية؟
حاتم:عايزه تجوزني جارتهم...ولسة رافضة مهره، لأ وبتقولي وجيدة مش أحسن مني في حاجة...كأنهم داخلين في مسابقة..مين هيحرق قلب التاني أسرع!!!
متولي:انا شايف انك تريح نفسك، مش كله خبط رزع ورا بعضه، طول بالك شوية!
حاتم:أريَح بالي اية؟...وهو عمره هيرتاح طول ما هما رافضين جوازي بمهرة؟؟....هي ست وجيدة فين؟
متولي:وانت عايزها في اية؟
حاتم:هفاتحها هي كمان في الموضوع عشان أبقي ريَحت دماغي وضميري ميأنبنيش بعد كده!
متولي(بصوت حاد) :عرفت انك طلقك حامي؟...ده انت يوم ما رجعتوا من السفر فضلت تفرك لحد ما اتكلمت قصاد وجيدة رغم ان ده لا كان وقته ولا أوانه!!..والنهارده بدل ماترتاح من غيبة شهرين كاملين في نومة وبهدلة السجون، لأ رايح تكلم أمك وأمها!!...هو انت في اية يابني متسربع كدة لية ماتدي لنفسك فرصة ترتاح!!!
حاتم(بعصبية) :انا في الأساس رجعت بمهرة عشان نتجوز وقولتلك وهفضل أقولك كده!!...انا مش فاهم اية وجه الاستفادة من اننا نبعد عن بعض ومنتجوزش؟...ماهي كده كده خربانة!!...وأمها اللي رفضاني دي انا مش فاهم رفضاني لية رغم ان مستوانا المادي زي بعضه!!...انا بصراحة حوار انها مش موافقة عشان الماديات ده مش داخل دماغي، هو في عداوة من زمان من أمي وست وجيدة؟
متولي:وهما في بينهم اية عشان يبقي في عداوة؟...لو قرايب فا هنقول عشان قريبين من بعض وفي حقد وكره...ولو جيران هنقول عشان جنب بعض ويمكن حصل مشادات في الكلام قبل كده، انما دي واحدة في الشرق، و دي واحدة في الغرب...اية اللي جاب القلعة جنب البحر؟
حاتم:امال في اية، مانا نفسي أفهم!!!
متولي:وانا اية عرفني بتسألني انا لية؟..روح اسألها هي
حاتم:هي في البيت ولا فين؟
متولي(بإستغراب) :انت هتروح تسألها بجد؟؟
حاتم:ست وجيدة فين!!
متولي:فوق في شقة ٧
حاتم:ماشي
{طلع حاتم فوق، ومتولي ضرب كف على كف من سربعة وتهور ابنه اللي مش مدي لنفسه فرصة يرتاح...وبعد ما حاتم خبط، فتحتله وجيدة...وتنحت أول ما شافته}
حاتم:بصي بقى انا مش هرتاح ولا ههدي الا لما توافقي، ولو موافقتيش فاانا من حقي اعرف انتي لية رفضاني!!
==============================
{عند بيري وغادة و فاتن وفيروز في مكتب ادارة المطعم}
بيري:معقول هي اللي طلبت بنفسها تدخل شريك معايا؟
غادة:اه والله، ده كلامها هي..ومرضتش تكلمك Face To Face عشان الإحراج
بيري:احراج في اية؟...انا موافقة انها تدخل شريك معايا وهو انا هلاقي أحسن منها؟
{بصيتلها غادة بصة استغراب، وشاورتلها بإيديها بمعنى ازاي!!}
بيري:علا دي صاحبة عمري...وعمري ما هلاقي أحسن منها يدخل معايا شريك في المطعم، دي بالذات أسلمها نفسي بدون تفكير
فاتن:وهى معاها فلوس تدخل بيها شراكة؟
غادة:اه ياماما مانا سألتها، قالتلي معاها فلوس، هي كل مشكلتها بس ان بيري متوافقش!
بيري:اعتبري ان المشكلة اتحلت، وانا موافقه وهكلمها حالاً أبلغها
{وطلعت الموبايل تتصل بـ علا...وغادة هتتجنن من اللي بيحصل، منين بيري عارفة ان جوزها كان بيخونها مع صاحبتها ومنين موافقة تدخل شراكة؟}
بيري:ازيك يا علا عاملة ايه؟.....طب الحمدللة طمنيني وصلتي البيت؟
==============================
{عند مهرة و زهرة في شقة متولي...خرجت زهرة من المطبخ بالأكل وقعدت مع مهرة على الأرض..كانت مهرة ماسكة ألبوم صور عيلة حاتم وبتشوف صوَره}
زهرة:من ساعة ما حاتم مشى وانتي فاتحة صورته!
مهرة(بحزن) :صعبان عليا أوي اللي بيحصلنا ده يا زهرة...لا انا ولا حاتم كنا نستاهل ده كله من الدنيا!!...هي لية بتيجي علي الغلبان وتقف؟
زهرة:يمكن ربنا شايلكم حاجة أحسن يا مهرة!..ويمكن برضة اهاليكم يوافقوا...وربنا يحنن قلوبهم عليكم!
مهرة(بحزن) :ياريت يا زهرة..بس اللي انا شايفاه بيقول عكس كده..كل يوم بتضيق علينا زيادة مبتتحلش!... كل ده يعني عشان طلب يتجوزني بحلال ربنا؟...مش أحسن ما يقضيها معايا حب وغراميات من غير جواز؟...هو اللي بيدخل البيت من بابه دلوقتي بقى وحش؟
زهرة:ضاقت فلما استحكمت حلقاتها فُرجت!...دي أكتر حاجة أقدر أوصف بيها حالتك...مفيش في ايديكي حاجة غير الصلاة والدعاء وفوضي أمرك لـ ربنا!
مهرة:مفيش حاجة بتهون عليا حزني غير كلامك ده يا زهرة...انتي معرفتك مكسب لأي حد...ازاي اخوكي مكنش مقدر قيمة النعمة اللي في ايده؟
زهرة(بحزن) :غسان ده في الضياع....كفاية بس اللي بيعمله وبيقوله استغفر الله العظيم على ربنا...تدخلي البيت تلاقيه عباره عن مكتبة لـ كتب الإلحاد!...لسانة ده مبينطقش غير شتايم وألفاظ مش كويسه!!..حتي ايده دي مبيستخدمهاش غير في الشر..كان كل يوم داخل عليا بـ جثة شكل، من ضمنهم جثة أخوكي!
مهرة:قومي يا زهرة، احنا لازم نعمل بلاغ في الحكومة باللي حصل، أكيد في ضحايا كتير غير اخويا حمزه الله يرحمه، انا متاكدة انهم قالبين عليه الدنيا في كل مكان!
زهرة:طيب استني، يفرض حد شافنا؟
مهرة:هنتدارى ومحدش هيعرف احنا مين...انا بس لازم أقول لـ حاتم الأول
{طلعت مهرة موبايلها واتصلت بـ حاتم}
=================================
{عند حاتم كان قاعد مع وجيدة في الصالون، ولما مهرة رنت عليه كتم الصوت لحد ما يخلص كلام}
حاتم:يعني ده سبب رفضك ليا؟
وجيدة(بحزن) :يمكن يا حاتم لو كنت جيتلي قبل ما حمزة ونسمة عيالي يموتوا...كنت وافقت...لكن انا بقيت اخاف على مهرة اوي اوي...بقى كل همي لو مت هتكون متصانة وكل طلباتها مُجابة ولا ذليلة مهانة!!
حاتم:وانا قايلك قبل كده ياست وجيدة ان انا هشيل مهره في عينيا الاتنين، انتي اللي مش عايزة تديني أي فرصة أثبتلك صحة كلامي!!
وجيدة:نلاقي مهرة الأول وبعدين ربنا يحلها
{دخلت صاحبة الشقة من الباب ولقيت حاتم و وجيدة قاعدين في الصالون، قربت وهي كلها عصبية}
_ماهو بيت اللي خلفوكم، مبقاش ناقص إلا الخدامين وولاد البوابين يقعدوا في الصالون اللي بيقعد عليه أسيادكم!!!
{قامت وجيدة و حاتم وهو مصدوم من كلام الست!}
الفصل العشرون
حاتم(بزعيق) :اية الكلام اللي بتقوليه ده؟...انتي اتجننتي؟؟
{قربت منهم الست وابتدت تزعق}
_احترم نفسك يا رمامة الشوارع، اية اللي طلعك هنا؟...وانتي ياست وجيدة هو ده الشغل اللي بتشوفيه؟...سايبالك البيت وانتي من تاني ناحية بتدخلي عيال البوابين هنا في بيتي وكمان على الصالون اللي لو اشتغلتوا طول حياتكم مش هتعرفوا تجيبوا واحد زيه!!!
وجيدة(بخوف) :لا ياست... لا لا... انا هفهم....
حاتم(بيقاطعها بزعيق) :استني انتي ياست وجيدة...أبويا البواب ده ضوفره برقبة ١٠٠ واحدة منك، وانا مش هسمحلك ولا هسمح لأي حد انه يتكلم عليا وعلى ابويا بالشكل ده
وجيدة(بخوف) :اسكت يا حاتم...اسكت!!
حاتم(بزعيق) :مش هسكت...انتي مش شايفة بتقول اية؟؟...وصالون اية اللي بتتكلمي فيه، ده انا بشغل يومين في اليونان أشتريكي انتي وبلدك
{خرج حاتم من الشقة وهو متعصب، ووجيدة بتلطم، مشيت الست وراه وهي بتزعق}
_استنى...انت مش هتخرج من هنا...ده انا هوديكم في ستين داهية، استنى بقولك!!
{ولكن حاتم نزل... وهو نازل لقى متولي في وشه}
متولي(بإستغراب) :في اية يا حاتم؟؟
حاتم(بزعيق) :في ان واحدة متسواش جنية..بتعايرنا بفقرنا اللي مختارناهوش بإيدينا...بتعايرني بمهنتك المحترمة، علي الأقل احنا ماشيين جنب الحيط ومبنمدش ايدينا لحد ونقوله هات...لولا انها ست كان هيبقى ليا تصرف تاني معاها!!
متولي:طب اصبر يا حاتم
{نزل حاتم وهو متعصب ودخل الأوضة، ومتولي طلع فوق، لقى الست بتتكلم في الموبايل وبتزعق}
_تيجي دلوقتي حالاً، وإلا هعمل محضر في النيابة، مستنياك، سلام
متولي(بخوف) :هو اية اللي حصل؟
_اطلع برااا...يلااا...متوسخوش بيتي برجليكم، دلوقتي أستاذ حسن هيجي وهنشوف حل نهائي للي حصل ده، وانتي يا وجيدة اعتبري نفسك مرفودة
وجيدة(بصويت) :لااا أبوس رجليكي لاااا...احب على رجليكي بلاااش
{وطت وجيدة وهي بتعيط ناحية رجل الست، وهي واقفه بكل غرور وباصالهم بقرف}
_اوعي من قدامي..انا كلامي مش معاكم، انا كلامي مع أستاذ حسن!
{وبعد شوية نزل حسن، ودخل الشقة}
حسن:ابنك فين يا متولي؟؟؟
متولي:يااستاذ حسن في سو....
حسن(بيقاطعه بزعيق) :ابنك فين بقولك!!!
متولي(بخوف) :تحت
{نزل حسن ووراه متولي ووجيدة..وأول ما قرب من الأوضة طلع منها حاتم}
حسن(بزعيق) :انت كنت بتعمل اية فوق عند ست وجيدة؟
وجيدة:كان بيتكلم معايا والله في موضوع شخصي
حسن(بزعيق) :انا بسأله هو، يبقى هو اللي يرد...كنت بتعمل اية فوق، مش هعيد السؤال تاني؟
حاتم(بصوت حاد) :وطي صوتك وبلاش يعلى عليا عشان متزعلش!
حسن(بزعيق) :انت نسيت نفسك ولا اية يالا؟؟؟...انت هنا عبد المأمور...اية القلم اللي انت واخده في نفسك ده؟...عارف انت اية يا حاتم؟...انت ولا حاجة!!...ده حتى شغلانة البوابين أنضف منكم، انتوا كان آخركم تشتغلوا زبالين في الشوارع هو ده اللي يليق بمقامكم
وجيدة(بزعيق) :اقسم بالله العظيم إن زودت كلمة كمان لأفضحك وسط الناس واقول السر اللي كنت مخبياه وكاتماه في قلبي من سنين، خلي الناس تعرف حقيقتك الزبالة!
حسن(مصدوم) :حقيقتي الزبالة؟
{ولسة هيضرب وجيدة بالقلم على وشها، حاتم مسك ايده، وضربه بالراس وقعه على الأرض..صرخت وجيدة..ومتولي كان بيحاول يسلك بينهم...قرب حاتم من حسن وضربه بالايد و الرجل!!}
حسن(بصويت) :ااااه
حاتم(بزعيق+بيضربه) :احنا مقامنا زبالين في الشوارع اهو كويس علي الأقل لسة رجالة وبنكسب بـ عرق جبينا ...لكن انت مقامك مَرَه لابسة بدلة رقص، بصراحة مش قادر أشوفك غير كده
{وضربه بقوته لتاني مره، لحد ما الدم نزل من دماغ حسن، ووجيدة صوتت}
حاتم(بزعيق) :والست اللي انت كنت عايز تمد ايدك عليها دي، لو فكرت تقرب منها بس انا هقطعلك رقبتك
{وضربه تاني، وحسن لسة بيصرخ، والناس اتلمت على الصويت...لحد ما حاتم قرب من حسن}
حاتم(بصوت حاد) :واللي حصل ده لو وصل للحكومة هتزعل اوي مني...ساعتها ست وجيدة هتعملك محضر باللي عملته زمان، ومش لازم أحدد أصل اللي يستره الرب، ميفضحوش العبد...وخد بالك انت عليك قواضي يعني لو قربت من القسم هتتاخد، فا خد بالك بقى...واه قبل ما تطردنا من العمارة أصل انا عارف اللي هيحصل، بس احنا هنمشي بكرامتنا...يلا يا بابا...يلا ياست وجيدة...لموا حاجتكم وتعالوا ورايا
{وقف حاتم بكل ثقة..والناس كانت بتقوم حسن وهو وشه غرقان دم}
حسن(بتعب) :ااه....اااه
================================
{عند مهرة..كانت بتتصل بحاتم مابيردش}
مهرة:مابيردش
زهرة:اتصلي بيه تاني
مهرة:اتصلت كتير مش بيرد...بقولك اية خلي الحوار ده يوم تاني يكون حاتم ارتاح
زهرة:وهو لية يجي معانا؟...مااحنا كنا هنروح لواحدنا!
مهرة:مقدرش أعمل حاجة من غير مااعرفه..انا وحاتم اتعودنا نشارك بعض في كل حاجة..وكمان عشان ميقلقش عليا لو جه وملاقنيش!
زهرة:نفسي أشوفكم مع بعض يا مهرة...ويجي اليوم ده وانا واقفة جنب منك في الكوشة، ومورناش مشاكل ولا خوف ولا قلق
مهرة:ساعات بقول لنفسي انه هيجي وبيكون الأمل مالي قلبي، وساعات بقول لا انتي بتحلمي، يعني مش شايفة رفض كل اللي حواليكم لـ جوازكم؟
زهرة:ياما ناس اترفضت، واهو دلوقتي متجوزين، مش نهاية الكون يا مهرة...لسة الأمل موجود!
{فجأة رن تليفون مهرة، فاابتسمت}
مهرة(بفرحه) :ده حاتم!!
زهرة:طب ردي!
{ردت مهرة على حاتم}
مهرة(بفرحه) :أخيراً رديت ده انا اتصلت بيك كتير أوي
حاتم:انا جاي أخدك يا مهرة
مهرة(بإستغراب) :تاخدني فين؟
حاتم:هترجعي البيت مع أمك
مهرة:انا مش فاهمة حاجة!
حاتم:دلوقتي هتفهمي، جهزي حاجتك انتي وصاحبتك
مهرة:لا يا حاتم...ماما طردتتي من البيت، انا مش ناقصة مشاكل معاها تاني!!...ماهو مش كل شوية!
حاتم:متخافيش من حاجة، آجي الاقيكم جاهزين
مهرة:طيب
{والمكالمة انتهت، كانت مهرة مستغربة}
زهرة:في اية؟
مهرة:حاتم جاي ياخدنا!
زهرة(بإستغراب) :ياخدنا فين؟؟
مهرة:مش عارفة
================================
{عند غسان في الأوضة في الجبل...كان قاعد بيقرأ كتب كالعادة...دخل نويري وهو بيصرخ}
نويري:الجبل بيقع يا غسان، قوم بسرعة
{قام غسان بكل برود لحد ما خرجوا من الأوضة، كان علاء بيتشنج على الأرض، وأول ما غسان وقف قصاده فضل راكع ناحيته!!...برق نويري وصعق لما شاف المنظر}
نويري(بزعيق) :انتوا بتعملوا اية؟؟؟؟
{ابتدا غسان يعمل حركات غريبة بإيديه الاتنين في الهوا..ونويري مصدوم مش فاهم اية اللي بيحصل...لحد ما الجبل وقع بيهم، وفجأة نويري صحى من النوم مخضوض!}
علاء:مالك في اية؟
نويري(بينهج) :كابوس
علاء(بيضحك) :كابوس مرة واحدة؟...شكلك تقلت في الأكل قبل ماتنام!
نويري:أكل اية بس...ده كابوس وحش اوي اوي بشكل!
علاء:طب ماتحكيلي
نويري:حلمت استغفر الله العظيم يعني...انك ساجد لـ غسان، وانه بيقرأ عليك كلام مش مفهوم!
{اتغيرت ملامح علاء بعد كلام نويري...وارتبك!}
علاء(بتردد) :ده حلم عبيط، حد يصدق الأحلام دي برضة؟
نويري(بينهج) :انا بقول كدة
علاء:أجيبلك ماية؟
نويري(بتعب) :هات
{خرج علاء من الأوضة لقى غسان في وشه..بصوا لبعض بنظرات مريبه وبعدين راح يجيبله الماية و رجع}
علاء:حمدالله على السلامة
نويري:الله يسلمك
علاء:احنا بكرا الصبح هنغير الاتجاه وهنمشي يمين، غسان بيقول ان في حاجات جديدة في منطقة هو عارفها
نويري:ادينا ماشيين وراه للآخر
علاء:القربان يا نويري
نويري:قربان اية؟
علاء:أمال هتطلعلنا الأثار ببلاش؟...عايزين روح...روحين..تلاته..وانت طالع كده
نويري:مش فاهم برضة!
علاء:غسان هيرجع مصر، وهيستلم روح بيري...و روح زهرة أخته
{اتغيرت ملامح نويري لما سمع اسم بيري!}
نويري:اممممم...مابلاش بيري عشان بنتك متتيتمش، وشوفوا حد تاني أحسن
علاء:تتيتم لية وابوها عايش على وش الدنيا؟
نويري:خلاص يا علاء انت حر...المهم الآثار تطلع من تحت الأرض..ده دي اللي هتغير حياتنا ١٨٠ درجة وهترفعنا لفوق اوي!
علاء:يبقى مش خسارة في روح بيري،مش كدة ولا اية؟
نويري(بتردد) :اه مش خسارة
===============================
{عند بيري في المكتب، كانت بتكلم علا}
بيري:اول ما غادة قالتلي، بصراحة رحبت بالفكرة جداً...وقولت اللي نعرفه أحسن من اللي منعرفوش، وبصراحة بقى انتي أولي من أي حد غريب
علا:كفاية انك مكسفتنيش بس يا بيري، بجد مش عارفة أشكرك ازاي!
بيري:لا خالص متشكرنيش...ده احنا عِشرة عمر يابنتي..ده انا فرحانة اوي اوي انك هتكوني معايا، فاكرة أيام البيوتي سنتر ولا نسيتيها؟
علا(بتضحك) :وانا أقدر انساها برضة...ياه دي كانت أيام حلوه بشكل..انا متأكدة ان الايام الحلوه دي هتتكرر تاني..كفاية بس ان انا أشوفك كل يوم
بيري(بتضحك) :حبيبتي يا علا، خلاص عند اتفاقنا بكرا ان شاء الله تكوني عندي في المطعم، وهنتفق على كل حاجة
علا:اوكي يا بيري
بيري:باي باي
{وقفلت معاها وهي مبتسمة ابتسامة خبيثة، وخدت حاجتها بالشنطة وخرجت برا، ركبت عربيتها و رجعت البيت}
===============================
{عند حاتم ومهرة وزهرة...خدهم وراحوا بيت وجيدة، وبعد غياب مهرة عن وجيدة لمدة شهرين كان اللقاء بينهم صعب...قامت وجيدة وقربت من مهرة وعينيها فيها دموع}
وجيدة(بدموع) :حقك عليا يا مهرة...انا غلطانه يابنتي لو كنت عملت أي حاجة زعلتك
{وحضنت مهرة، وكانوا هما الاتنين بيعيطوا}
مهرة(بدموع) :وحشتيني اوي يا ماما...ازاي قدرتي تطرديني من البيت وتخليني بلف حوالين نفسي؟...مخوفتيش عليا؟
وجيدة(بعياط) :لا يا مهرة...انا خيرتك وانتي وقتها اختارتي..بس غيابك الشهرين دول أثروا فيا أوي، وحسسوني إني يتيمه رغم ان انا اللي أمك...بس يابنتي انتي واخواتك وجودكم في البيت كان بالدنيا وما فيها...كان مهون عليا حاجات كتير اوي..بصراحة حاتم بعد الموقف اللي حصل النهاردة وكبر في نظري وحسيته راجل قد المسئولية...لولاه كان زمان أمك متهانة، وكرامتها متداس عليها في الأرض من حتة كلب!
حاتم:انتي زي أمي ياست وجيدة...واللي مرضاهوش علي أمي، مرضاهوش عليكي لانك في مقامها...انا عملت اللي ابويا رباني عليه..متعلمتش أشوف الغلط قدامي وأسكت، ده حتى الساكت عن الحق شيطان أخرس
وجيدة(بدموع) :تشكر يا حاتم، ربنا يحفظك لشبابك يابني ويسترها في طريقك
حاتم:خدوا بالكم من نفسكم، وانا بكرا هعدي عليكم انا وابويا عشان نتكلم في الموضوع اللي بنأجله بقالنا كتير!
مهرة:خد بالك من نفسك انت يا حاتم، وطمنا عليك لما توصل بالسلامة!
حاتم(بحب) :حاضر يا مهرة...يلا عايزين حاجة؟
وجيدة:مع الف سلامة
{مشي حاتم، و وجيدة قفلت الباب وقعدت جنب مهرة}
وجيدة(بحزن) :متزعليش مني يا مهرة، انا كنت غلطانة...حقك عليا يابنتي!
مهرة(بحزن) :أفهم من كدة انك موافقة على حاتم؟
وجيدة:ربنا يكتب اللي فيه الخير يا مهرة...قومي غيري انتي وزهرة، وانا هحضرلكم العشا
{قامت وجيدة ودخلت المطبخ، وزهرة قامت وقعدت جنب مهرة وحضنتها}
================================
{تاني يوم عند حسن صاحب العمارة...كان بيغلي نار من اللي حاتم عمله معاه...كان بيفكر في مليون خطة ينتقم منه بيها، مكنش قدامه غير علاء..وده يرجع للموقف اللي متولي عمله مع بيري، لحد ما اتصل بيه}
حسن:الو يا أستاذ علاء..مسافر انت ليبيا ونايم في العسل واحنا هنا محطوطين في المشاكل
علاء(بإستغراب) :مشاكل اية؟؟
حسن:عم متولي اللي كان مساعد بيري على أذيتك، فاكروا ولا نسيته؟؟
علاء(بسخرية) :وانا أقدر انساه، ده بقى حبيبي هو انا بقيت أفكر غير فيه؟
حسن:حلو...ابنة حاتم اللي كان هربان في بلاد برا ورجع مصر...قولت يمكن راجع شايله قرشين حلوين هيفتح بيهم مشروع...لقيته راجع ايد ورا وايد قدام!
علاء:وانا مال أمي شايل فلوس ولا شايل طين، هعمله اية يعني مش فاهم!!
حسن:اصبر مانا جايلك في الكلام اهو...المعلم ماسكهولك وهو بينط على شباك مطبخك من المنور، انا بقول شكل ست بيري حدفته عليك عشان يبقى أبوه مره وهو مره، اهي شغالة على الاتنين ميضرش
علاء:انا مش فاهم حاجة!!...وهو اية هيبعته عندي؟
حسن:جاوب على نفسك انت بقى...اية هيجيبه عندك وهيخليه عاوز ينط في شقتك إلا لو حد زاقه يسرق حاجة...يمكن بيري مزنوقة في ورقتين تلاته ولا حاجة عشان تكمل اللعبة!
علاء(بـ شر) :تقصد ان متولي وابنه في حوارات بينهم وبين بيري؟
حسن:بالظبط...وإلا مكنوش فكروا في أذيتك
علاء(بـ شر) :انت متأكد من الكلام اللي بتقوله ده؟
حسن:طبعاً إلا متأكد..ده انا شايفهم بعينيا اللي ياكلهم الدود!
علاء(بـ شر) :جدع انك قولتلي، تصدق انت كل يوم بتكبر في نظري بحس انك قلبك عليا...برضة عشرة السنين دي كلها مراحتش على الأرض... على العموم لو حصل أي حاجة جديدة بلغني
حسن:من عينيا الاتنين، المهم طمني عامل اية في ليبيا؟
===============================
{عند حاتم ومتولي، راحوا بيت وجيدة، وكانوا كلهم قاعدين في الصالة، جات وجيدة من المطبخ بالعصير وحطته وقعدت}
وجيدة:اتفضلوا
متولي:تسلمي ياست وجيدة
{وبعد ما متولي و زهرة خدوا العصير}
وجيدة:ماتشرب يا حاتم!
حاتم:بعدين، خلينا في الموضوع المهم اللي انا وابويا جايين عشانه!...بصي انا مش كل مره هقولك انا بحب مهرة قد اية...انتي بعينيكي اللي هتقرري اذا كنت بحبها وشاريها ولالا!
وجيدة:انا بعد اللي حصل امبارح وانا نظرتي ليك اتغيرت يا حاتم...حسيت انك انت اللي ينفع يتسند عليك..انا كل اللي يهمني راحة مهرة...تكون مبسوطة وسعيدة في حياتها!
حاتم:السعادة مش في المال...السعادة في الشخص اللي هتكوني معاه...الشخص اللي هيستحمل غيره بعيوبه ومميزاته، هيقف جنبه وقت تعبه وشدته!
وجيدة:ربنا ما يجيب شدة أبداً
حاتم:وعشان برضة متقلقيش، انا مجمع مبلغ من شغل اليونان، هو أه مش كبير...بس مع الأيام هعوض مهرة
وجيدة:مفيش إشكال يا حاتم
متولي:موافقة يا وجيدة؟
وجيدة:موافقة وأمري لله
متولي:على بركة الله
زهرة:لو لولولولولولوي
{ضحك حاتم ومهرة، وقامت زهرة حضنتها}
زهرة(بفرحه) :مبروك يا مهرة يا صاحبتي يا حبيبتي، ربنا يفرحك ويكملهالك على خير!
مهرة(فرحانه) :الله يبارك فيكي يا زهرة
{قامت وجيدة وحضنت مهرة}
وجيدة(بحزن) :مبروك يا وجيدة، هتقطعي بيا يا غالية!
مهرة:الله يبارك فيكي...متخافيش هجيلك كل شوية!
متولي:مبروك ياحاتم
حاتم:الله يبارك فيك يا بابا
وجيدة:ربنا يتمملكم على خير يا ولاد!
مهرة:يارب يا ماما
وجيدة(بإبتسامة) :ناويين الفرح يكون امتى؟
حاتم:خلال الأسبوع ده ان شاء الله
وجيدة:ربنا يكملها على خير...انا هدخل أكلم خالتك يا مهرة وأبلغها
مهرة(بفرحه) :ماشي
{دخلت وجيدة جوا تكلم أختها، وحاتم ضحك لـ مهرة، وكانوا كلهم فرحانين ان وجيدة وافقت أخيراً!}
===============================
{عند بيري في المكتب..كانت قاعدة..والباب خبط}
بيري:ادخل
{دخلت علا، وأول ما بيري شافتها ابتسمت ووقفت}
بيري(بتحضنها) :اية القمر اللي هَل علينا فجأة ده؟
علا(بتحضنها) :ميرسي يا روحي انتي اللي قمر
بيري:اتفضلي
{وبعد ما قعدوا}
بيري:فطرتي ولا لسة؟
علا:أه أكلت في البيت
بيري:خدي بالك بعد كده هنفطر سوا، أصلك هتيجي بدري شوية
علا:مفيش مشكلة...بس بجد أحييكي على الديكوريشنز دي، انا فكرتك جيبتي مهندس ديكور!
بيري:طبعاً جيبت...لكن كل ده من ذوقي انا
علا(بتضحك) :طول عمرك ذوقك حلو اوي
بيري:عشان كده اختارتك تكوني صاحبتي!
علا:أكيد، ندخل في التفاصيل بقى..المشروع ده من بدايته لنهايته وصل كام ؟
بيري: Final Total، مليون ونص
علا(مصدومة) :وانتي جيبتي المبلغ ده منين؟...خصوصاً يعني سمعت ان علاء نصب عليكي في مبلغ وقدره
بيري(بـ نظرة كره) :وانتي عرفتي منين انه نصب عليا؟
علا(بتردد) :اممممم، كل الناس بتتكلم عن الموضوع ده..بس بصراحة صعبتي عليا أوي
بيري:ميصعبش عليكي غالي يا حبيبتي...علاء ده لو راجل بحق وحقيقي مكنش هرب لـ بلاد برا..انما هو زي فار الجحر...ميغركيش اللي عمله، ده قصر ديل
علا:هرب فين؟
بيري:وانا اية عرفني؟..روحي اسأليه...عشان تدخلي شريكة معايا بالنص..لازم تدفعي قد مانا دفعت، قوليلي بقى معاكي المليون ونص اللي انا دفعتهم؟
علا:اه طبعا معايا وزيادة كمان
بيري:حلو...ثواني
{وطلعت كتاب من درج المكتب، وبصيت فيه}
بيري:نبدأ بالآلآت والأدوات اللي في المطبخ، عدد ٤ بان ماري، الواحد بـ ١٥ ألف..اضربيهم في ٤،امممم هيطلعلك ٦٠ ألف جنية...دي أول حاجة...تاني حاجة بقى....
{وفي الوقت ده كانت علا، سارحة بخيالها ومش سامعة ولا كلمة من كلام بيري، وبتفكر بس ازاي تنتقم منها بعد ما عرفت انها هي اللي بتهددها!!!}
==============================
{عند حاتم خد مهرة و زهرة وراحوا القسم، وهناك دخلوا للظابط في المكتب }
حسني:حاتم؟...يااهلاً وسهلاً نورت الدنيا كلها
حاتم(بإستغراب) :هو حضرتك تعرفني؟
حسني:طبعاً ومين ميعرفكش، ده انت قعدت شهرين في سجن العقرب، والغريب انك لسة خارج امبارح، مش تلحق ترتاح طيب؟
حاتم:وهو احنا اللي زينا بيشوف راحة يا سعاة الباشا
حسني(ببرود) :نعم؟
حاتم:احنا جايين نعمل بلاغ في أخو زهرة
حسني:مين فيكم زهرة؟
زهرة:انا
حسني:مالة أخوكي؟
زهرة(بخوف) :انا جاية أعمل بلاغ في أخويا غسان
حسني:الاسم بالكامل!
زهرة(بتردد) :غسان رفعت مجدي الأباصيري
حسني:جاية تعملي بلاغ في اية؟
حاتم:احنا كمان جايين نعمل بلاغ يا باشا مش هي بس
حسني:واحدة واحدة لما نفهم، انتي جاية تعملي بلاغ في اية؟
زهرة(بتردد وخوف) :انا اخويا غسان..قاتل متسلسل، وملحد و....
{وكانت بتبص لـ مهرة وحاتم بخوف}
حسني:كملي!
زهرة(بخوف) :وكان...كان كل يوم يدخل عليا بـ جثة شكل...ومؤخراً بعت والدتي في الغرفة الحمراء على الانترنت، و....وقتلوها...و قتل... قتل حمزة أخو مهرة
حسني:مهرة مين؟
زهرة(بتشاور) :دي
حسني:وانتي اية دليلك؟
زهرة(بخوف) :ورالي الفيديو بتاع والدتي...ده غير انه كان بيعذبنا بالكهربا والنار...وكان بيضربنا...مرحمنيش ولا رحم أمي الله يرحمها
{وابتدت تعيط، ومهره طبطبت عليها}
حسني:اهدي عشان أقدر أجمع المعلومات
{طلع حسني موبايله على صورة غسان}
حسني:عايزك تركزي في الصوره كويس وتقوليلي، تقصدي غسان ده؟...ركزي في ملامحه كويس!
زهرة(بصويت) :ايوه هو... هو... ده غسان اخويا!!
حسني:انتي متأكده؟
زهرة(بصويت) :اه والله العظيم هو
{قام الظابط من مكانه وهو مصدوم}
حسني:غسان فين؟؟؟
زهرة:غسان هرب برا مصر
حسني:راح فين؟؟؟
زهرة:مش عارفة...بس صاحبه في مصر مهربش معاه، وده يعتبر دراعه اليمين وعارف خط سيره كويس اوي
حسني(بإهتمام شديد) :صاحبة ده اسمه اية؟؟
زهرة:اسمه كمال أحمد شبانه
حسني:كمال ده هيكون بداية طرف خيط القضية
حاتم:هو حضرتك تعرف غسان؟
حسني:إلا اعرفه، ده انا بدور عليه من زمان وكان نفسي ألاقيه!!
{واسترجع الذاكرة وافتكر يوم لما كان في المستشفى ودخل مكتب المدير وشاف غسان وجهاً لـ وجه، ووقتها غسان ارتبك وكان باين عليه الخوف!}
حسني:انت اسمك اية؟
حاتم:اسمي حاتم متولي
حسني:هحتاجك الفتره الجاية يا حاتم، مقابل مكافأة مالية ضخمه لا تتخيلها إن ساعدتني ولقينا غسان!!
حاتم:مفيش مشكلة
==============================
{عند متولي، كان قاعد في شقته اللي في البلد، ونسمة وضحى خبطوا على الباب...قام يفتح}
نسمة(بإستغراب) :لا مانا بصراحة مش مصدقة اللي سمعته ده...يعني اية حاتم هيتجوز رغم رفض أمي!!
متولي:استهدي بالله واقعدي يا نسمة
{قعدت نسمة وضحى قصاد متولي}
ضحى:حاتم هيتجوز مهره بجد؟؟
متولي:اه هيتجوزها...وخلال الأسبوع ده كمان
نسمة(بإنفعال) :ازاي ياناس...ازاي بس؟...ماما لو عرفت هيجرالها حاجة!
متولي:هو مش راحلها مرة واتنين وتلاته وهي برضة راكبة دماغها ومصممة؟
نسمة:ايوة بس مش للدرجادي...كان يحاول مره واتنين وعشره لحد ما قلبها يلين وتوافق!
متولي:لا اله الا الله....ده انتي ذات نفسك اتكلمتي معاها ورفضت...وكلنا جربنا معاها والتجربة فشلت...هيفضل حاتم قاعد مستني لحد ما أمه تحن عليه وتوافق؟
نسمة:لا حول ولا قوة الا بالله...بص يا بابا...لو هو عايز يتجوزها ومصمم أوي كده، احنا مش هنحضر الفرح، وياريت لو أمي عرفت متقولش اننا عارفين حاجة لان انتوا كده بتدخلونا معاكم في المشاكل!!
متولي:يعني في يوم مهم زي ده، متقفوش جنب أخوكم وتفرحوه؟...هتبقوا أنتوا وأمكم عليه؟
ضحى:لا انا هحضر...كده كده لما تتحط قصاد الأمر الواقع هتوافق غصب عنها!
نسمة:بقولك اية بعيد عني، لكن انا مش موافقة على اللي بيحصل ده، وياريت تطلعوني منها خالص!!
===============================
{يوم كتب كتاب وفرح حاتم ومهرة..كانوا عاملين حاجة بسيطة على الضيق..حتى مهرة لابسة فستان بسيط، وحاتم لابس قميص وبنطلون من غير بدلة...في حضور بنت عم وجيدة وجوزها وكانوا قاعدين في الحديقة والمأذون بيكتب الكتاب..كان اليوم ده مميز جداً عند حاتم ومهرة...اليوم اللي كانوا مستنينه من زمان..وبعد ما المأذون خلص صيغة كتب الكتاب...تعالت الزغاريد في أركان المكان...قربت وجيدة وحضنت مهره وهي بتبكي}
وجيدة(بعياط) :الف مبروك يا مهرة..انا مش مصدقة انك كبرتي واتجوزتي ياحبيبتي...انا الفرحة النهاردة مش سايعاني..مش عارفة أفرح ولا أعيط ولا أعمل اية بس!
مهرة(بعياط) :لا ياماما متعيطيش..انا عايزاكي تفرحي وتطمني عليا وانا مع حاتم!
وجيدة(بعياط) :متطمنه عليكي والله
{باست مهرة راس وجيدة، وقربت زهرة وحضنت مهرة وهي فرحانه لـ فرحها}
زهرة(بدموع) :مبروك يا قلبي...ربنا يرزقكم الذرية الصالحة، ويكمل فرحتكم على خير
مهرة(بدموع) :الله يبارك فيكي، و عقبالك مع اللي يستاهلك!
زهرة:يارب
{قرب حاتم وحضن مهرة وهو في قمة السعادة، وزادت دموع مهرة للضعف!}
حاتم(بـ فرحه) :أخيراً بقيتي مراتي يا مهرة!...وبقى اسمك على اسمي!!...من النهارده مش هكون خايف تاني...انتي بقيتي حلالي خلاص!
مهرة(بعياط) :انا مبسوطة اوي...عمري في حياتي ما فرحت الفرحة دي كلها...مش مصدقة ان ربنا استجاب دعوتي وقرب البعيد!
حاتم(بـ فرحه) :اوعدك انك طول مانتي معايا هيكون الجاي فرح وبس!
{قربت وجيدة من حاتم ومهرة}
وجيدة:امانة عليك يا حاتم..تحط مهره في عينيك الاتنين، وأوعي تزعلها منك ابداً!
حاتم:مقدرش والله، مهره في عينيا الاتنين...متخافيش انا عايزك تطمني!
متولي(بهزار) :اية ياست وجيدة، هو احنا في عزا ولا فرح؟..ماتفكي كده وتضحكي!
وجيدة(بدموع) :دي دموع الفرح والله..أصلك مش عارف انا فرحانه قد اية!!
{جات ضحى من بعيد، وحضنت مهره}
ضحى:لولولولولوي...الف مليون مبروك ياعروستنا يا حلوه
مهرة:الله يبارك فيكي يا ضحى، وعقبالك
ضحى:يارب
{وقربت من حاتم وحضنته}
ضحى:مبروك يا حاتم
حاتم:الله يبارك فيكي يا ضحى
ضحى:ربنا يسعدكم ياحبيبي
{جم قرايب متولي ووجيدة}
_مبروك يا حاج متولي، عقبال كدة ما تجوز عيال عيالك
متولي:الله يبارك فيك، عقبال عيالك انت يا حاج
{ابتدا حاتم ومهره يرقصوا سلو على الأغاني...لحد ما حاتم باس ايد مهرة، وشالها ولف بيها، والمعازيم بتسقف...وكانت زهرة وضحى بيرموا عليهم الورد من بعيد}
زهرة(بفرحه) :زي القمر يا مهره!!
{بعتتلها مهرة بوسة في الهوا بإبتسامة وكملت رقص...وفجأه حاتم وقف رقص ووقف وسط المعازيم}
حاتم(بصوت عالي) :انتوا جايين النهارده مش عشان تحضروا فرحنا...لا جايين عشان تشوفوا انا بحب مهره قد اية!!...وانا حابب أقولها قصاد الدنيا كلها...بحبك يا مهرة
{ضحكوا كلهم، ومهرة اتحرجت وشدته يكملوا رقص}
وجيدة(بفرح) :ربنا يجعل أيامكم كلها هنا وسعادة يارب، وما يخفي الإبتسامة من على وشوشكم ابداً
{وبعد ما الفرح خلص...رجعوا على شقة عم متولي، وكان حاتم مجددلها أوضة النوم لحد ما ربنا يكرمهم ويشتروا شقة..طلع حاتم على السلم وهو شايل مهرة ووراهم زهرة ووجيدة ومتولي وضحى وبقيت المعازيم}
وجيدة وزهرة:لولولولولولوي
{لحد ما دخلوا الشقة، وبالتحديد أوضة النوم..قربت وجيدة من مهرة وحضنتها}
وجيدة:خدي بالك من نفسك يا مهرة، وان شاء الله هنجيلك بكرا بالصباحية
مهرة:حاضر يا ماما
وجيدة:خدوا بالكم من نفسكم يا حاتم
حاتم:حاضر يا حماتي، خلاص هبطل ست وجيدة دي، من النهاردة هقولك يا حماتي!
وجيدة(بتضحك) :ماشي يابني
زهرة:سلام يا مهرة
مهرة:مع السلامة
{خرجوا كلهم من الشقة، ونزلوا...وكل واحد رجع بيته..ومتولي راح يقعد على القهوه مع قرايبه...كانت مهرة محرجة جداً من حاتم بعد مااتجوزوا، وكل شوية تقعد وبعدين ترجع تقف وبتلف في الأوضة كلها..ضحك حاتم وقرب منها وباس راسها}
حاتم(بفرحه) :أخيراً اتقفل علينا باب واحد؟
مهرة(بتوتر) :ممكن ادخل الحمام؟
حاتم:أه طبعا، خدي وقتك
{خرجت مهرة وهي متوتره، ودخلت الحمام غيرت الفستان وشالت الميك اب..وبعدين خرجت وقعدت في الصالة على الانترية...خرج حاتم من الأوضة وهو مبتسم لـ مهرة وقعد جنبها وشغل التلفزيون}
حاتم:بحبك اوي يا مهرة...كان نفسي موضوع جوازنا يجي في ظروف أحسن من كدة...بس انا واثق خير في ربنا وعارف انه هيعوضنا على صبرنا!
مهرة(بإبتسامة) :مش مهم أي حاجة يا حاتم...المهم اننا بقينا مع بعض...أي حاجة تانية تتعوض إلا اننا كنا نستسلم للظروف ونسيب بعض!
حاتم:وانا عمري ما كنت أقدر اعمل كده...اللي بيحب بجد يا مهرة عمره ما يسيب ولا يبعد مهما كانت الظروف قدامه اية!...حتى لو طلع بحجج الدنيا كلها..مفيش مبرر لخيانة الوعد!
{وبعدين حط ايده على كتف مهره وكمل كلامه}
حاتم:وانا حبيت أثبتلك حبي ليكي، تعرفي...انا نفسي البيت ده نمليه عيال.. وتكبر أسرتنا ويزيد الترابط ما بينا أكتر وأكتر...اية رأيك يا مهرة نتفق نسمي ولادنا من دلوقت؟
{ضحكت مهره وبصيت في الأرض وبعدين اتكلمت}
مهرة:معقول يا حاتم، بتفكر في المستقبل من دلوقتي؟
{راح حاتم شايل مهرة، فااتصدمت!!!}
مهرة(بإحراج) :حاتم..هو انت عايز اية بالظبط؟... طب... طب ممكن تنزلني ونتكلم زي الناس الطبيعيه!
حاتم:وانا بقي اعتبريني مش طبيعي ياستي، ده انا مستني اليوم ده من زمان واهو أخيراً جه!!
{ولسة هيدخل بيها الأوضة، متولي فتح باب الشقة ودخل}