رواية ذئاب لا تعرف الحب الجزء الثاني2الفصل الحادى والثلاثون31والثاني والثلاثون32بقلم نجمه براقه
عاصم
كنا راجعين من النادي انا وعصام اخويا بنشد مع بعض ونلعب زي عادتنا انا بسوق وهو بيشد مني الدريكسيون او العكس ، العاب متهورة وتأدي لتهلكة بس دي لعبتنا المفضلة لما يكون الطريق فاضي من اي عربيات غيرنا ،وفي لحظة بيشد مني الدريسكيون وبيقولي
_ طيب والله لا تسيب ولاااا هعمل بينا حادثة يلا
_ ياااض هنخبط في شجرة يخربيتك... ولا ياعصام هنموت بجد ياغبي
_ طيب انزل انا اللي هسوق.. مش هسيبك غير لما تنزل
كمل وهو بيدورة جامد
_ طيب اهوووو
وفجأة طلع في وشنا واحد وخبطناه بالعربية واترما مسافة مترين قدامنا صرخ عصام وقالي
_ حاااسب
في لحظة دوست فرامل وقفت العربية وكان مفيش اي مسافة بينا كانت العربية هتدوسه لولا ستر ربنا ف قال عصام وعينه جاحظة وجسمه بيترعش من الخضة
_ مات
قولت بتوتر
_ مـ معرفش... هنعمل ايه
_ انت لسة هتسأل نهرب قبل ما حد يشوفنا اطلع
_ نهرب ايه اسكت ، تعالي هنشوفه يمكن عايش
مسك فيه وقال
_ نشوف مين ياغبي هنتحبس وناخد اعدام ، امشي وسيبه
قولت بانفعال
_ اسكت بقا، انت السبب وسع كدة
زقيت ايده عني وطلعت اشوفه وانا اعصابي سايبة ومتوتر جداً وبصعوبة قدرت احط ايدي علي رقبته اشوفه عايش ولا لا وبعد ما لمست رقبته حسيت بالنبض في عروقة ف خدت نفس وبقيت باصصله بتفحص ، كان في كدمات في وشة وربطة فوق دماغه وشكله عامل حادثة قبل كدة واضح انه متعود ف قومت وقولت
_ عصام الحق طلع عايش.. تعالي بسرعه
جه عندي وقال وهو بيبصله
_ ده متكسر جاهز .. هنعمل ايه يا زفت ابوك هينفخنا ومش بعيد يقول ان احنا عملنا فيه كدة
_ ما يقول هنسيبه يموت يعني شيل معايا
_ اشيل مين ياااعم هنشيل الشحط دة ازاي ولا انت شويه التمارين مقوين عضلاتك
_ يااابني شيل معايا قبل ما حد يجي انت هتودينا في داهيه برغيك ده .. شييييل
_ شيل ياعم شيل ماهو يوم باين من اوله استرها معانا يارب
شيلناه بصعوبة دخلناه العربية في الكبينة الخلفية وعصام هو اللي ساق وانا بقيت باصصله وانا لسة متوتر ومش عارف هنعمل ايه ف قولت
_ هنعمل ايه.. مش هينفع نسيبه ولا هنقدر نوديه المستشفي
_ معرفش يا فالح قولتلك نسيبه أنت اللي عملتلي فيها ابو قلب طيب ، وربنا تستاهل اللي بيعملوا فيك بابا
_ طيب اااكتم..
قولت بعد ما لقيت الحل
_ بس لقيتها عم رؤف مفيش غيره انا هتصل بيه
_ عم رؤف راجل فتنة هيقول لبابا وهنننننتعلق
_ لو قاله نكدبلنا كدبه
_ كدبة مين انت مبتعرفش تكدب ابوك هيقفشك اول ما تنطق وهنننتعلق بردو
_ يووووه اسكت بقا صدعتني
_ ياحبيبي اسمعني وربنا هنتكشف
طنشت كلامه واتصلت ب عم رؤف صاحب بابا ومساعدة في الشغل وطلبت منه يساعدنا قالي اروح بيه علي الاستراحة وهو جاي وفعلا خدناه علي الاستراحة في الفيلا وبقينا مستنين وطول الوقت ده وانا وعصام بنشوفه عايش ولا مات لغيت ما سمعنا صوت بابا بيزعق ويقول هما فينا بصينا انا وعصام لبعض ف قالي
_ مش قولتلك... جهزت كدبتك يا فالح
قولت بتوتر
_ استني افكر
_ تفكر ايه يخربيتك ابوك هيهجم مش سامع صوته
_ بس لقيتها هنقول ان احنا لقيناه واقع وباين ان في عربية خبطته قبل عربيتنا
_ قبل عربيتنا؟ ، استر يارب..اقولك سيبني انا اتكلم
دخل بابا علينا و عم رؤف وراه وقال وهو بيبص للولد اللي معانا
_ مين فيكم اللي خبطه
هميت اني اتكلم ف قاطع عصام
كلامي وقال وهو وبيشاور علية
_ عاصم هو اللي كان سايق وخبطه بس هو كان قصده يحوج علشان كان في قطة معديه خاف يدوسها ماهي روح بردو
بصتله بصدمة ف رقصلي حواجبه وبعد مسافة وانا بقيت في مواجهة بابا اللي بيتقدم ناحيتي وعينيها كلها شر وبيقولي
_ صحيح الكلام ده
_ ماهو اصل... اصل.. ال...
_ بقولك صحيح الكلام ده
_ صحيح بس هو طلع فجاة في ....
قاطع كلامي بقلم علي وشي وقال
_ حسابك معايا بعدين... رؤف شوفه عايش ولا ميت
حطيت ايدي علي خدي وبصيت لعصام بغيظ وهو بيدير قزحيته ويمط بوقة بهبل وعم رؤق قرب من الولد وبعد ما شافه قال
_ عايش باين عليها خبطه مش شديدة ، هو شكله مضروب قبل كده اصلا
_ طيب ابعت هات الدكتور يشوفه ومش عايز شوشرة
_ حاضر
قالها وخرج وبابا رجع يبصلي ويقول بعصبية
_ ده اخر دلعي فيكم انتوا الاتنين... بعد كده مفيش عربية ومفيش نادي وتبتدوا مذاكرة من دلوقتي..
بصلي وقال
_ ومفيش جيتار ولا الات موسيقية ... علي البيت
طلعنا من غير ما نقول ولا كلمة ورجعت سابق عصام بمسافة كبيرة وانا مش طايقة ولما وصلنا البيت لقيت ماما في وشي بتقولي
_ مالكم
_ جوزك لسعني قلم
_ لييييه
وقف عصام جمبي وقال
_ عشان خبط واحد.. جوزك دة مش هيسكت غير لما يعقدلنا الواد... مش تبقي تحسني اختيار اب لابنائك ولا عاوزين تطلعوه مريض نفسي
قولت وانا بشوطة برجلي
_ ما تغور بقا وربنا لا ماشي يا عصام هخلصها منك
قالت ماما
_ عاصم!!! عيب كدة اخوك... مالكم ايه الحكاية ومين دة اللي خبطتوه
قال وهو واقع علي الأرض
_ هو بس اللي خبطة هو اللي كان قاعد في مقعد القيادة
_ انت **** يلا
قولتها بانفعال وطلعت فوق وهو جه ورايا وقالي وهو بيحط درعه علي كتفي ويحاوط رقبتي
_ خلاص يا ميستروا خلصت مش محتاجين نكدب
زقيته عني وقولت بعصبية
_ انت واطي يلا... بقا بتدبسني فيها ما انا كنت قادر اقوله انك كنت بتلعب معايا ونتضرب احنا الاتنين
_ خلاص بقا يا برو متبقاش حمقي ما حرمني معاك من العربية والنادي
_ بس محرمكش من الجيتار ولا ضربك... ده انت عيل زبالة
_ اسكت طيب انا مش ناقصك سيبنلي في اللي انا فيه انت مش حاسس بالكارثه
_ كارثة إيه تاني
_ هنبتدي مذاكرة
_ احسن ربنا جابلي حقي منك
_ ايوه ياخويا عيدك انت
_ طيب غور من وشي دلوقتي
انا وعصام تؤام عندنا 19 سنه صحاب وقريبين قوي من بعض بس هو مدردح بيعرف يمشي اموره وانا حمبلي وصريح مبعرفش الف وادور ودي مشكلتي
#اسراء
ساعات وانا قاعدة علي اعصابي ورايحة جاية من الشارع للبيت مستنيه اي خبر عن ريان في الوقت اللي بابا مسابش اوضته... مكنتش عارفة هو زعلان ولا مش فارق معاه اللي حصل ف رجعت البيت فتحت الباب عليه لقيته قاعد علي سريره ساكت ف قولت
_ ازاي جايلك قلب تقعد كده وابنك ماشي من غير عقله... مصعبش عليك... طيب قلبك مقالكش انه ممكن يكون حصله حاجة وهو ماشي مش حاسس بنفسه
_..
_ حرام عليك يا بابا ، مش لدرجة القسوة دي ، ده انت ابوه مين غيرك دلوقتي ممكن يقلق ويدور عليه.. مين هيهتم باذا كان بخير ولا لا.. معقول مش همك ولا تكون فاكر انه هيرجع تاني زي كل مره ... ساااكت ليييه! ابنك هيموت مش فارق معاك؟
جت ماما من روايا تقولي بصوت باكي
_ سيبي ابوكي في حالة وامشي علي اوضتك
_ انتوا ايه!! حرام عليك ده ابنكم ازاي قادرين تكونوا هاديين كدة
_ بقولك ادخلي اوضتك
قولت ببكاء
_ مش مصدقاكم.. انتوا مستحيل تكونوا بتحسوا
قولت كده ودخلت اوضتي قعدت هناك ابكي بحرقة حزن علي اخويا اللي انا مش عارفة حصله إيه واللي متوقعة اسمع عنه خبر وحش في اي وقت وبعد دقايق سمعت صوت باب البيت بيتقفل وبعدها جت ماما عندي تقولي بعصبية
_ انتي ايه معندكيش دم مش شايفة حالة ابوكي
_ ماله حالته قاعد في اوضته مستريح ومش همه حاجة... ماله ماهو كويس بعد ما ضيع ابنه ... انا اول مره في حياتي احس اني كرهاه كدة... عنده حق ريان ينفر منه ويخاف من شوفته ا
_ والله ما حد قاسي وعاوز قطع لسانه غيرك... واحد غيره كان طرده من زمان وسابه لكلاب السكك تنهش فيه.. كان كل يوم رزعه علقة نضيفة علشان يتعدل... ماهو مقعده في بيته يختي وبياكلوا وبيشربه وهو معندهوش دم لا بيقول اساعد ابويا ولا اقف جمب امي... واد فاشل مش نافع في حاجه ولولا حب ابوه ليه وطيبة قلبه كان اتبري منه من زمان
_ انتي فاكره انه دة حب ... لا يا ماما انتي مش فاهمة حاجة.. انتي اتعودتي تكوني زي امك الشتيمة والضرب عادي بيربوا ويطلعو رجاله وستات متحملين مسؤلية ...
_ وهو امتي ضرب
_ مضربش.. بس حطم ثقته في نفسه اثبتله وبالبارهين انه فاشل ومش هينجح.. محاولش يساعده يخرج من الحالة اللي هو فيها لغيت ما دور بره عن حد يخرجه منها.. هو مكنش محتاج اكتر من ايد تتمدله وتساعده وتستغل ادمانه للكتابه بشكل صح مش تخلوه يحس انه اجرم وحتي هو بنفسه محاولش يدور علشان ينشر قصصه دي لانه مقتنع انه فاشل ومفيش حاجة هتنجحله.... انتي مش هتفهمي يعني ايه انك تكوني محتاجة ايد تتمدلك تخرجك من الغرق ولما تتمد تتمدد علشان تدوس عليكي اكتر
كملت ببكا
_ حاولت كتير اساعدة بس هو مش محتاجني انا ، هو كان محتاجكم انتوا
قالت بدموع
_ اتفلسفتي يختي، خلصتي محضرتك.. طيب قوليلي يا فاهمة يا عاقله.. ابوكي اللي كبر دة ولسه بيكبر ومش لاقي ابنه جمبه يسانده هيجيب منين نفس يطلع من الغرق... لاهو وانتي كنتي فاكره ابوكي متربي في بيت دكاتره... ابوكي ياحبيبتي ابوه راجل نجار وهو ساب مدرسته وساعدة وده اللي عارفه ان الابن يقف جمب ابوه مش الا يتعقد ويطلب منه يساعد
_ انا مش عارفه حاجة دلوقتي ولا فاهمة حاجة غير ان بأيده قتل ابنه.. استعوضي ربنا فيه بقا وخلفي غيره... وحتي دي مش هتقدري تعمليها ماخلاص مش هتخلفي تاني.
كانت قلقانة عليه وكلامي وجعها بس بردو مش مقتنع انهم كانوا
#خلود
يومين وكلمته وهو بيقولي كفاية قلت ادب بتتردد في ودني ومكنش عندي تفسير ليها غير انه يقصد حوار اسيل مع ان الموضوع انتهي وهو نهاه بنفسه بس واضح انه حابب يتمادا في الغلط وقاصد يهني ومش مستبعدة انه يفضل ماسكها علية زلة ، بس انا قررت اني مش هخاف منه ومش هسمحله يغلط فيه تاني ولو حصلت هسيب البيت ويحصل اللي يحصل وبالفعل بدأت العند لما نداني وقالي
_ بتعملي ايه
_ بعمل اللي بعمله عايز مني ايه
_ اممم ، طيب انا عايز شاي وبسرعة علشان مصدع
_ مش فاضية اعمل لنفسك
_ ده بجد
_ وانا من امتي بهزر معاك
قولت كده ورجعت اوضتي وانا متنرفزة واعصابي شايطة وعلشان اهدا شوية واخرجه من دماغي فتحت التليفون ونزلت بوست كتبت فيه...
" من تجاربكم الشخصية مين اللي بيفوز دائماً العقل ولا القلب؟ "
وبعد ما نزل اكتشفت ان حتي البوست ده هو اساسه ، لأن انا كنت في صراع بين عقلي وقلبي ، عقلي رافض اسلوبة معايا وقلبي مش عايز يبعد عنه.
وبدات التعليقات و وسط التعليقات لقيت تعليق من إسلام صبحي بيقولي
_ القلب مهزء مودي العقل وكل الأعضاء في داهيه ودايماً هو اللي بيفوز.. يعني انا دلوقتي سايب شغلي وقاعد براقبها
بعد ما رديت علي كام تعليق رديت عليه هو وقولت
_ ههههه كدة مش هتلاقي تاكل ، سيبك من قلبك وفكر بعقلك شويه هي مش هتنفعك لما شغلك يروح منك
_ ياريت اقدر ، اعمل ايه مجننة امي مش قادر .
شوفت تعليقه ده وعملت لاف ومردتش تاني وبقيت قاعدة بتابع التعليقات لغيت ما صدمني تعليق من زيد بيقولي فيها
_ احياناً المعدة هي اللي بتفوز.. يعني انا مثل لو جعان او عاوز شاي ومشربتش العقل والقلب والمعدة هيتحكموا فيه واعمل حاجة انا مش عامل حسابها
اطلعي اعمليلي شاي وبلاش هيافة
من اول ما ظهر الكومنت حذفته وطلعت عنده وقولت وانا منفعلة
_ إيه اللي انت بتعمله ده
_ عاوز شاي
_ انت كده عاوز شاي ولا قاصد تهزئني قدام الناس
_ لا بس حبيت اعرفك ان دورك تعملي الشاي علشان بعد كده تفكري قبل ما ترفضيلي طلب
_ دوري اعمل شاي؟ .. يعني انا خدامة
قال ببرود
_ انتي شايفة حاجة غير كدة
بهتت ملامحي وهدي انفعالي قدامه وقولت
_ خدامه؟..... اها انت عندك حق... بس اكيد ليه الحق اسيب الشغل وامشي لو مش مرتاحة "
استدرت ف وقفني كلامه وهو بيقول
_ لو مشيتي هعرف جدتك والكل هنا باللي عملتيه معايا
قولت بعد ما التفيت ليه
_ بتهددني؟
_ اه بهددك .. انا لسه موفتش بوعدي ليكي
قولت بعد ما نزلت دموعي
_ بس انت قولت انك مش هتضايقني تاني وانك مش هتطلب مني حاجة
_ ده كان كلام هرجع فيه علشان تكرهيني
_...
_ اعملي شاي وبسرعة
_ مش...
قال بمقاطعة
_ الشاااي بسرعة
زادت دموعي وانا بصاله ف قال بعد ما طالت وقفتي
_ هتفضلي واقفة كدة كتير خلصي علشان تلحقي تردي علي معجبينك تلاقيهم سايبين شغلهم عشانك "
سيبته ودخلت المطبخ لقيت جدتي هناك بتطبخ بدأت اعمل الشاي وانا بحاول اخفي دموعي واتماسك علشان مبكيش قدامها ولكن خدت بالها بس مسألتنيش مالي لأنها كانت لسة زعلانة مني وتقريباً مستنياني انا اللي اصالحها بس انا مصالحتش وخدت الشاي وروحت الصالون ملقتهوش ف اتجهت لاوضته وخبطت قالي ادخلي دخلت وانا متلخبطة ولسة بحاول اتماسك وامنع نفسي من العياط وحطيت الشاي جمبه بأيد مرتعشة من شدة التوتر وقبل ما اسيب الشاي كويس انتفضت بفزع لما ماسك ايدي والشاي اتدلدق عليها لسعني وحرقلي ايدي كنت حاسه بألم غير محتمل وكأن نار ماسكة فيها
#زيد
اتنرفزت جداً بسبب اللي بتعمله علي الانترنت لدرجة خلتني اعمل حاجات عيل صغير ميعملهاش علقت عندها بكلام ملهوش لازمة يهني انا مش هي وبعدين قولتلها كلمتين جارحين لو دادة امينة عرفتهم هتزعل جداً وبعد ما سابتني ودخلت تعمل اشاي بقيت آأنب نفسي وألومها علي التصرفات الطايشة دي ف قررت اراضيها وافهمها ان إسلام صبحي دة شخص مش كويس وتصرفاته اخرها ميطمنش وبعد شويه دخلت عندي خافضة جفونها وبتبعد وشها عني كانت بتحاول تتماسك متبكيش قدامي ف لما حطت الشاي مسكت ايدها كان قصدي ارضيها يمكن التصرف غلط وكان ممكن ارضيها ب كذا طريقة بس لقتني من غير ما اشعر بمسك ايدها ومن التوتر الشاي ادلدق عليها حرق ايدها ف شدتها مني وبقت تبكي من الالم قومت ورجعت امسك ايدها تاني وانا بقول بتوتر
_ انا اسف جداً ، مخدتش بالي ، تعالي
شدت ايدها مني وقالت ببكاء
_ ابعد عني!!!
_ ايدك اتحرقت.. تعالي حطيها تحت الميه
_ لااا .. ااه
مسكت ايدها التانيه وقولت بنرفزه
_ بقولك تعالي
شدتها ناحية الحمام شغلت الحنفية وحيطت ايدها تحت الميه وقولت
_ معلش هتهدي دلوقتي
قالت ببكاء
_ ااه، حرام عليك حاسة بنار بتحرق في ايدي
قولت بعبس
_ انا اسف.. هديت شوية؟
_ مش قوي
_ طيب كام ثانيه وطلعيها
استمرت وقفتها لثواني ولسه دموعها بتسيل ف قولت
_ هنحطلها مرهم وهتخف
قولتها وروجعت ابص لأيدها لقيت الجلد اتقشر واتنفخ ف قولت
_ لا شكلك لازم تروحي لدكتور ، مش هينفع مرهم.. تعالي معايا
بصتلي بحدة وقالت
_ مش عاوزة منك حااااجة
قفلت الحنفية وطلعت روحت وراها وقولت بنرفزه
_ بقولك هنروح لدكتور كفاية نشفان دماغ وعند معايا
قالت بألم
_ مش عاوزه منك حاجة أبعد عني وانا هكون بخير
_ وبعدين!!! امشي قدامي لحسن والله هقول لجدتك علي اللي عملتيه معايا
قالت بعصبية
_ انت هتهددني ، قولها مش خايفة منك!!!
قولت بعصبية وانا بتقدم ناحيتها
_ بت انتي!!! انا مش عايز اعمل حاجة اندم عليها ، اسمعي الكلام!!
وقفت قدامي نظراتها كلها كره واستحقار ممزوجين بالالم ف قولت وانا بمسك ايدها
_ امشي معايا .. وابقي اعقلي ها اعقلي لا اخزقلك عيونك اللي بتبرقلي بيهم
خدتها وطلعت لقيت خالتي قدامي ولما شافت ايدها شهقت وقالت
❤_ يا مصيبتي ايه اللي عمل في ايدها اكده
_ الشاي اتدلق عليها ، وانا هوديها لدكتور يعالجها
قالت وهي بتبكي
_ هو اللي دلقه عليه يا طنط.. كان قصدني شوفي جلدي اتقشر ازاي.. ياشيخ ينتقم منك!!!
حديت من نظرتي ليها وقولت بخفوت
_ مابلااااش
_ بلاش انت انا مش خايفة منك علي فكرة، وكفااااية كدة انا مش هسكتلك ، انا مش ضعيفة علشان تعمل فيه كدة واخضعلك
_ هي حصلت اخضعلك ، طيييب... اصلهاااا يا خاااالتي عملت " فيك اكونت" وكانت بـتشتـ.....
ضربت رجلها في رجلي وقالت
_ اتدلق لوووحده قضاء وقدر، انا اللي مكنتش منتبهه ، يلا وديني مش مستحمله ايدي هتموتني من الوجع
_ ايوة كدة نحترم نفسنا وميبقاش بيتنا من ازاز ونغير في الصالون.. قداااامي جلدك كله اتقشر
وديتها لدكتور شاف ايدها وعملها الازم وادالها مسكن مع الوقت سكن الألم وهديت وبعدين خدتها ورجعنا ولمسافة كبيرة وشها كان لشارع ومكلمتنيش ولا كلمة ف قولت
_ احسن دلوقتي
_
_ بكلمك
قالت بتأفف
_ اه
_ اه ايه
_ احسن دلوقتي
بصتلي وقالت
_ وكدة نبقي خالصين ، انت انجرحت بسببي وانا اتحرقت بسببك
_ بس لسه مضربتيش بسببي يومها انا خدت ضربتين علي وشي
_ نفسك تضربهمني
_ قووووي
سكتت ف قولت
_ تحبي تاخديهم علشان نكون خالصين بجد
_ ولما نكون خالصين هتسيبني في حالي
_ لا
_ امال خالصين ازاي
_ هنخلص من الضرب ، بس مش هنخلص خالص غير لما تكرهيني
_ ما انا كرهتك ، يعني هتحرقلي ايدي وتبتزني ومش هكرهم
_ مش حاسس بكدة
_ وهتحس ازاي... اخنقك انت ونايم
_ او وانا صاحي .. وممكن تحطيلي السم في القهوة بردو
_ قريب ان شاءلله
_ قريب ايه
_ هحطلك سم في القهوة
_ بس ياريت يكون سم فيران... ما انا قط بقا
كملت بسخرية
_ وقال اييييه اخد اصيص الورد واقول لكل اللي كانوا بيحبطوني اهو اصيص الورد بتاااعي نبت... اوووفر قوووي
قالت باشمئزاز
_ ولما هو اووووفر قوووي رديت عليه ليه
_ علشان اوفر
قالت بتبتمه
_ علشان رخم
_ سمعتك... وبعدين تعالي هنا... جبتي منين حوار انك خايفه ترتبطي ف يموت ها... الفتيها ازاي
_ زي مانت بالظبط الفت حوار قطعة البازل
_ ده مش تأليف ده بجد انا مش هتجوز ولا هحب غير قطعة البازل
_ ارجع واقولك ان الحب لا يخضع لقوانين... طلع تحليلك غلط.. القلب مش بيمشي ورا اختيارات العقل
_ وعرفتي ازاي انه غلط
دارت وشها عني ف قولت
_ باين انك حبيتي واحد عقلك مش مقتنع بيه تماماً
استمرت في السكوت ف قولت
_ طيب ايه مقولتليش وفيت بوعدي ولا لسه
ترقبت ردها لغيت ما بصتلي وقالت بعد تردد
_ انت رايك ايه
_ معرفش
_ تمام
_ طيب إيه ، وفيت ولا لا
_ معرفش
_ لازم تعرفي وتعرفيني علشان اعرف امتي اوقف
_ وقف وقت ما توقف مبقتش فارقة.. سواء كملت او بطلت حياتي مش هتتعدل... وهفضل خدامة اعمل القهوة ، ومتنساش اني كنت بعملك القهوه واجهزلك اكل من زمان فرقت بس طريقة الطلب
_ بردو مقولتليش وفيت ولا لا
سكتت لوقت كبير وبعدين بصتلي وقالت
_ شوفت المنشور اللي نزلته من شويه وهزئتني فيه
_ ايوة
_ واحد معلق بيقول القلب مهزء مودي العقل وكل الأعضاء في داهيه.. وطلع عنده حق
_ ايوه بردو مفهمتش
_ احسن
_ يعني موفتش لسة
_...
_ اوكي يبقي موافتش لسة ... وبمناسبة البوست والتعليق دة بذات عايز اقولك اني هوفيه... علشان انتي عايزة قرصة ودن اكبر من قرصة نيرة علشان تتعلمي من اخطائك وتتقلي
_ ما تقول انك خايف انجح بدل ما تطلعني متهورة
_ واخاف لية.. احنا مفيش بينا منافسة اساساً ولا المرضا بتوعي هيسيبوني ويروحولك ، وانتي مهما نجحتي ومهما زادت شهرتك هيطلع غيرك وهتقدمي وهتتنسي لغيت ماتنتهي تماماً زي غيرك كتير ... الانترنت ده ملهوش امان كله تريندات وانتي علشان تكوني تريند دائماً لازم تعملي فضيحة ورا فضيحة وكل فضيحة تكون اسخن من اللي قبلها ، نصايحك وفيديوهاتك اجمد واحد فيهم هيكون تريند ليوم واحد ويجي تريند غيره يمحيه
#بيجاد
بعد ما تعبت من المذاكرة قومت من علي المكتب اترميت علي السرير وغمضت عيني بتعب استمريت علي الوضع دة لغيت ما فاطمة جت علي بالي ، من يوم اللي حصل مع ريان لا شوفتها ولا عرفت عملت ايه مع خالي ف دخلت استحميت وقررت اروحلهم وقبلها دخلت لجويرية اطمنت عليها وقولتلها اني هروح ومش هتأخر وفي طريقي اتصلت بيهم قولتلهم علشان تعمل حسابها بدل ما تحصل الصدفة اللي تخليني اشوفها مع اني فضولي زاد قوي لأني اشوفها ولكن مش حابب اني اشوفها بشكل ده لازم هي بنفسها تكشف وشها قدامي ولما وصلت لقيتها لابس النقاب وبعد ما سلمت عليهم هي راحت تعمل الشاي ف قولت لخالي
_ امورك بقت تمام انت وفاطمة
قال بإبتسامة
_ تمام بس طريقة كلامك عنها اتعدلت ، خير
_ يعني انت عاوزني اتكلم عنها بطريقة مش حلوة
_ لا بس ملاحظ التغيير ف بسأل
_ انا بتكلم بطريقة تناسب شخصيتها.. بنت حضرتك انسانة كويسة وتجبر اي حد علي احترامها انا بس كان عندي انطباع مش حلو عن المنتقبات علشان كده كنت رزل في الاول
_ مفيش مشكله ، بس فاطمة مش زيهم ، فاطمة حالة خاصة تختلف عن الكل... زي عمتك بالظبط
_ لسة فاكرها
_ هي متتنسيش
_ كنت بتحبها قوي باين عليك
_ ولغيت دلوقتي... طيب اقولك حاجة
_ قول
_ مش عارف هتصدقني ولا لأ بس فاطمة مفارقتنيش
_ شغلاك علي طول
_ وبشوفها علي طول اقصي فترة غياب غابتها عني تلات ايام اول يوم بيكون احساس بالوحدة .. تاني يوم بيزيد عليه احساس الوحشة تالت يوم بيزيد عليهم احساس الاحتضار بيكون بيني وبين الموت ثانية لغيت ما بتظهر وروحي تردلي تاني
سقطت دموعه وهو بيقول
_ بس مبتكلمنيش... ولا مره ردت عليه و ولا مره لمستها كل مرة بتكلم معاها وهي بتكوت بصالي وبس
_ بتشوفها قدامك زي مانت شايفني كدة
_ ايوة ، ده جنان صح؟ .. عقلي هو اللي بيصورهالي مش كدة
_ مش عارف بس اكيد هي حاسه بيك وشيفاك
#فاطمة
كنت سمعاهم من المطبخ وسامعه كلام بابا عن حبيبته اللي بيشوفها وبيكلمها ف فهمت ان هي اللي بيتكلم معاه وهو لوحده ومقدرة حجم حبه ليها اللي وصله انه يتخيلها قدامه ويكلمها بس مفهمتش منين بيحبها كل الحب ده ومنين خلفني من علاقة عابرة وغير شرعية ولا لية خبي عني وايه الفايدة من أنه يخبي ، في حاجة انا مش فهماها ومتاكدة ان في حاجة لو عرفتها مش هتعجبني وبقيت متوقعة في اي وقت اكتشف سر جديد اقوي من اللي قبله بس هو ايه مش قادرة اتوقعه ولا هحاول اعرفه .
بعد ما عملت الشاي طلعت حطيته قدامهم وقعدت ف قالي بيجاد وهي متردد يبصلي بشكل كامل
_ تسلم ايدك
_ الله يسلمك جويرية عاملة إيه دلوقتي
_ الحمدلله بخير
_ مجبتهاش معاك لية
_ مفتكرش كانت هتيجي
_ محصلش فارق في حالتها بعد اللي حصل معقول
_ حصل فارق كبير بقت تتكلم من غير خروف وبتتكلم بشكل طبيعي بس مكنتش هتيجي اظن كدة
_ الحمدلله المهم انها بخير وابقي سلملي عليها
_ يوصل ، وانتوا ابقوا تعالوا وشوفيها
_ بإذن الله
بعد ما بابا وزع نظراته بينا وابتسامة خفيفة مفارقتش شفايفه قال دقيقة وجاي كان واضح انه بيفضيلنا المكان علشان حاجة في دماغه هو وعمتي وبعد ما دخل قال بيجاد
_ عاملة اية
_ تمام
_ كل حاجة بقت تمام مع خالي
_ تمام.. علي فكرة انا سمعت كلامه عن عمتك.. مكنش حكهولي قبل كده رغم اني كنت كل شويه اسأله بتكلم مين
_ يمكن خاف تخافي منه
_ يمكن
_ اكيد ، هو خاف تخافي منه وتتخيلي ان عفريتها موجود معاكم
_ هههههه يمكن... بس طلعت بيحبها قوي
_ فعلاً ماما حكتلي عن قصته معاها ، حبها وكل حاجة كانت بتمنع انهم يتجمعوا للأسف
_ يمكن عشان كده حبها
_ اشمعنا
_ اصل طبع الانسان بيحب الحاجة البعيدة عن ايديه والمحرمة دائما كل حاجة ممنوعة بيكون عندنا رغبة للحصول عليها
_ لا مفتكرش ، لو كدة كان حب تاني مكنش عاش لوحده كل العمر دة
_ وهو عاش لوحده كل العمر ده بردو
_ يعني ، متتحسبش يمكن ده حصل في لحظة ضعف
_ هههههههه كمان في لحظة ضعف دة انا جيت غلطة... بس اكيد في حكمة من جيتي لدنيا
قال بإبتسامة
_ صح حكمة كبيرة قوي
_ تفتكر هي إيه
قال بإبتسامة
_ هي انك تغيري رأيي في المنتقبات
احمر وشي خجل من كلامه ف قولت
_ اه... اوكي.. اشرب الشاي
زادت ابتسامته ومسك كباية الشاي وبدء يشرب وبعدين قال
_ انتي مخلصتيش تعليمك لسة
_ لسة
_ ناوية تكملي
_ طبعاً بس شكلي هعدي السنة الجاية
_ لية
_ افتكر الإجراءات هتاخد وقت وانا لسة معملتش اي حاجة
_ لا ولا هتاخد وقت ولا حاجة انا ممكن اساعدك في الموضوع ده
_ بجد
_ ايوه ، هاتي ورقك وانا هخلصلك الحوار دة
_ اوكي دقيقة هجبهملك
دخلت اجيب الملف وادتهوله وبعد ما فتحه زم شفايفة وقال
_ في مشكلة
_ إيه
_ اكيد في صور هنا
_ ايوة في .. بس إيه المشكلة ما دة الطبيعي
_ اكيد مش بنقاب
ضحكت وقولت
_ ايوة ، نسيت
_ مفيش مشكلة انا هديه لعمي شبل وهو يشوفلنا الموضوع ده
قولت باستفهام
_ ماشي بس ايه التشدد دة ف انك متشوفش صورتي.. افتكر دي صدفة
_ قولتلك قبل كدة
_ قولت اية
_ انك طالما لسة مغطياه قدامي ف مش هحاول اشوفه
قولت بإبتسامة
_ يعني مش هتيجي بره تفتح وتشوف
قال وهو بيديني الملف
_ اكيد لأ.. مبحبش اتطفل.. بس تمام خدي اديه بنفسك لعمي شبل وهو هيخلصلك الإجراءات بسرعة
قولت بإبتسامة
_ طيب ما تدهوله انت... مش هخاف تدور لان واضح ان عندك مبدء
_ مش مبدء كبير انا فضولي وصل لقمتة لأني اشوف شكلك اللي مخبياه بحجة انه ملفت بس نعمل ايه للاسف امي مربياني علي الأمانة ربنا يسامحها بقي
_ ههههههه
لمعة عيونه وقال
_ اممم ، هو خالي اتاخر؟
_ ايوة فعلاً ، هدخل اطمن عليه
روحت اوضته لقيته قاعد علي السرير ف قولت
_ قاعد هنا ليه
_ كنت باخد الدوا وهقوم اهو
_ طيب بيجاد بيسال عنك
_ ماشي دقيقة وجاي اسبقيني انتي
مشيت من عنده ورجعت لبيجاد وقولت
_ دقيقة وجاي
_ هو كويس
_ اه
_ طيب إيه رأيك تيجوا النهاردة نتغدا مع بعض
_ لا شكراً مره تانية يكون البيت هدي عندكم
_ البيت هادي
_ بس اكيد لسة في توتر بسبب اللي حصل
_ صحيح ، ماشي علي راحتكم
#جويرية
بقيت لساعة واقفة عند الشباك مستنية خروج اسراء من بيتهم ولكن مخرجتش ف قررت اخرج من البيت واتقدم ناحيتها شويه يمكن اصادفها ولكن من اول ما فتحت الباب لقيت بابا في وشي وبيبصلي بجمود ف قولت بربكة
_ بابا... انا كنت خارجة اقعد علي السلم متضايقة من البيت
مردش عليه ودخل ف قفلت الباب ودخلت وراه وقولت
_ بابا
دخل اوضته وقفل الباب علي نفسه خبطت وقولت وانا دموعي بتجمع في عيني
_ بابا من فضلك اسمعني.. والله يا بابا ما غلطت في حاجه.. انت عارفني ازاي تشك ان كان بيني وبينه حاجة تخليه يدخل عندي.. بابا.. بابا افتحلي
مردش عليه وانا رجعت اوضتي مش قادره اوقف دموعي ولا عارفه ازاي اثبتله ان مكنش في بينا حاجة... حتي لو كنت بحبه ف مكنش في اعتراف ولا كان في سبب يجرأه يدخل عندي اللي حصل لا انا ولا هو لينا ذنب فيه
#بيجاد
بعد ما مشيت بقيت في صراع مميت بيني وبين نفسي علشان مفتحش الملف واشوف صورتها ولكن في النهاية قدرت اتغلب علي فضولي ومشوفهاش ولما رجعت البيت لقيت بابا هناك حطيت الملف علي التربيزة وقعدت معاه شويه وبعدين دخلت اغير ولما رجعت لقيته ماسك الملف بيبصوله وبيقولي
_ بسم الله ماشاء الله.. بت خالك طلعت جميلة صح
_ انت شوفتها
_ ايوه مش ده الملف بتاعها بردو ولا دي فاطمة تانية
_ لا هي
_ حلوة مش كدة؟
_ معرفش ، مشوفتش شكلها قبل كده
_ مشوفتهاش خالص
_ لأ
_ طيب ما تشوف اهي قدامك
كانت نفسي هتغلبني وابصلها بعد ما مدلي ايده بالملف ولتاني مرة ارفض ان فضولي ورغبتي يخلوني اعمل كدة ف قولت وانا ببعد عينه عنه
_ لا ما دام ساترة وشها عني اشوف صورتها ليه
_ تشوف علشان تجوزها
_ ملهوش لازمه بعدين اشوف
_ يعني موافق تجوزها
_ اه مش احنا اتفقنا اني هتجوزها
_علي كده مشوفتهاش
_ مشفتهاش والله.. بس ليه هي جميلة قوي كدة
_ جميلة قوي... جمالها صارخ زي ما بيقولوا
_ ده بجد ولا بتبالغ
_ اهي شوف بنفسك
_ لا ، مصدقك من غير ما اشوف
كلامه زود رغبتي اني اشوفها، كنت عايز اشوف اللي بيتكلموا عنها وعن جمالها واللي هي نفسها مقتنعه انها مخبية جمالها علشان ملفت معقول تكون احلي من صاحبة الطرحة ولاجمالها امريكاني يموع النفس.. مبقتش قادر استحمل وبقت اللحظة اللي هشوفها فيها لحظة مرتقبة زي ترقب ضربت جزاء في نهاية المبارة والفايز هو فريق بلدي ، كان احساس صعب جداً ومع كده مش قادر افتح الملف واشوفها
#عاصم
فضل نايم في الاستراحة لاربع ايام كل ما ادخل عنده الاقيه رايح في النوم ولما سألت عم رؤف عن كل النوم ده واذا كان في غيبوبة ولا حاجة قالي ان الدكتور قال انه كويس مفهوش حاجة ويمكن الخبطة اللي كانت في دماغه قبل كده هي السبب في النوم ده كله وبعد الاربع أيام دول جت خديجة بنته ومساعدة بابا في شغلة تقولي لما بابا طلع فوق
_ انت يا متهور
قولت مشير علي نفسي
_ انا
_ اه انت ، ازاي تخبط واحد ... ولا انت مش عاصم
_ لا انا عصام
_ إيه دة سوري افتكرتك عاصم اصلكم شبه بعض قوي
جانا صوت عصام وهو نزل من فوق يقول
_ انا عصام هو عاصم احفظينا بقا
قولت
_ كداااب هو عاصم وانا عصام
قال
_ بيكدب يا ديجا انا عصام
قالت
_ انتوا هتحدفوني لبعض مين فيكم عاصم
قولت بزهق
_ انا عاصم ياستي نعم عاوزة ايه انتي كمان
_ انتوا الاتنين هتجننوني لغيت دلوقتي مش بعرف افرقكم من بعض .. مين ما كان فيكم عاصم يتقدم خطوه للأمام
ضحك عصام وقال
_ هههههههه مش بقولك شاويش ومكانها في الجيش وسط بتوع الصاعقة
عدلت نضارتها وقالت
' انا شاويش يا عاصم
قولت بزهق
_ ياديني امي ، يابنتي ده عصلااام اللي تلاقيه مترباش اعرفي ان هو عصام
قال
_ واللي تلاقية متهور بيخبط ولاد الناس بعربيته اعرفي انه عاصم
_ ولااا وربنا افضحك.. هو اللي كان بيشد الدريكسيون مني
_ انا يا كداب
قالت بنرفزه موجهه وشها لعصام
_ بس... في ايه يا عاصم خلاص
قال
_ هوووو عاصم انا عصام غيري النضارة دي بقا
_ هي المشكلة في النضارة بردو ، انا هسيبني منكم احسن... فين القتيل
قولت
_ في الاستراحة تعالي نشوفه
_ يلااا... مش ممكن ده انتوا تجننوا بلد
_ ما انا قولتلك علمينا من لسانا ، هو مترباش انا اتربيت
_ والله انتوا الاتنين متربتوش
_ طيب ايه رايك كلامك ده هيوصل لبابا
_ عصام مش عايز قطع عيش
' عاااصم انا عاااصم
_ مين ما كنت ارحمني شويه وامشي عاوزة اشوف القتيل
_ قتيل ايه هتودينا في داهيه عايش
_ بردو هشوفه
روحنا عنده لقيناه لسة نايم ومغمض عينيه وقفت خديجة تتفحص شكله شويه وبعدين بصتلي وقالت
_ ده نايم
_ اه ما انا واخد بالي بس غريبة مصحيش مع ان الدكتور قال ان مفهوش حاجة
_ مفهوش حاجة ازاي دة متكسر حرام عليكم تلاقي اهله هيتجننوا عليه
_ هو كان متكسر جاهز احنا لقيناه بربطتة دي
_ بجد
_ ايوة
_ امممم ليكون مجرم... لا لا دي مش دقن مجرم
_ نعم .. ودقن المجرم بتكون عاملة ازاي بقا
_ مبيكنلهوش دقن عمري ما شوفت مجرم بدقن
_ وعلي كدة انتي شوفتي مجرمين كتير
_ اه شوفتك
_ امممم واضح انك لازم تترفدي ، احترمي نفسك يا ديجا عيشك هيتقطع
_ يابني افهم ابوك ميقدرش يستغني عن اتنين في المجموعة انا وبابا ، دة بيحبني اكتر منكم متحاولش
_ طبعاً.. بس علي فكرة ابوكي دة ميسترش اتصلت بيه علشان يلحقنا جاب رشدي قبله
_ وانت عاوزه يعملك إيه وانت جايبله قتيل ما لازم يقوله
_ بقولك ايه يا ديجا امشي بابا بينده عليكي
_ بجد
_ اه والله اجري هيخصملك اجري
_ طيب طيب... ايوة يا رشدي بيه جايه
قالتها وطلعت تجري وانا قعدت جمبه ابصله لوقت كبير واخر ما زهقت قربت منه وقولت وانا بحاول اصحيه
_ انت! يا استاذ اصحي... يا استاذ
حرك جفونه ف فهمت انه بدء يفوق بقيت واقف مترقب لغيت ما فتح عينيه ومرر نظره في المكان ف قولت بإبتسامة
_ حمدالله علي سلامتك .. عامل اية دلوقتي
ركز نظرة عليه من غير ما يرد ف قولت
_ انا عاصم... انت اسمك ايه
_
_ طيب ايه اللي حصلك؟ .... انت سامعني؟... يا استاذ
نطق حروفه بصعوبة وقال
_ انا فين
_ انت في الاستراحة عندنا... اسمك ايه
مرر عينيه تاني في الاوضه وبعدين تحسس جيوبة ورجع يبصلي ويقول
_ مين جابني هنا
_ انا... بتدور علي ايه
_...
_ طيب اسمك ايه طيب
رجع يدور تاني في جيوبة وبعدين بصلي وقال
_ ملقتوش حاجة في جيوبي
_ لا مكنش في اي حاجة في جيوبك... انت بتدور علي ايه
رجع يسكت ف قولت باستفهام
_ يا استاذ حضرتك كويس... اسمك ايه طيب علشان اعرف اناديك
بصلي وقال
_ انا اسمي ايه
_ إيه!
_ مش عارف
_ مش عارف اسمك؟!
_ مش عارف حاجة... إيه اللي حصل
الفصل الثاني والثلاثون
عاصم
مكنش فاكر اي حاجة ، لا فاكر اسمه ولا فاكر اية اللي حصلة سبب الضرب اللي في وشه ولا قالنا اي حاجة توصلنا ل أهله ، بس مكنتش عارف هو نسي من الخبطة اللي انا خبطتهاله العربية ولا من اللي قبلها ولما بابا عرف قعد معاه وحاول يعرف اي حاجة عنه وبردو معرفش ف وقفنا انا وعصام قدامه وقفه عسكرية وقال
_ عجبكم كدة اديكم طيرتوله عقله
قال عصام
_ ما يمكن كان طاير من قبل يا بابا ، ماهو الدكتور قال انه مفهوش حاجة
قولت
_ معقول يا بابا عقلة هيطير وميدخلش في غيبوبة حتي ، ده كان نايم اكيد نسي من الخبطة الاولانية
قال بتنهيدة
_ مش مهم بقا اهو نسي وخلاص.. هو هيفضل هنا لغيت ما يتعافا تماماً وبعدين نشوف هنعمل معاه إيه ، خلوا بالكم منه استرجلوا شوية ، اتحملوا مسؤلية غلطكم
_ حاضر يا بابا
مشي وانا رجعت عنده لقيته قاعد شارد وفي دنيا تانية ومحسش بدخولي عليه لوقت كبير ف قولت بتردد
_ احم ، عامل اية دلوقتي
قال بعد ما انتبهلي
_ إيه
_ بسألك عامل اية
رجع يبص قدامه وقال بتلبد
_ كويس
_ متزعلش دلوقتي هتفتكر.. بس ممكن اعرف انت ناسي من امتي؟
_ معرفش ، انا اخر حاجة فاكرها اني كنت ماشي في الشارع وعربية خبطتني
_ يعني من قبل.. اكيد لو نسيت بسبب الخبطة دي مكنتش افتكرت اللي قبلها ، انك كنت ماشي في الشارع وكدة يعني
_ ايوة
_ يعني من قبل
طال سكوته بعد ما وجهه عينيه ليه وكأنه بيفكر في حاجة وبعدين اتنهد وقال
_ من قبل انا كنت ماشي مش فاكر حاجة ، انت ملكش دعوة... مش انت اللي خبطتني بردو
قولت بخجل
_ اه... انا اسف
_...
_ طيب بابا قال انك هتفضل معانا لغيت ما تخف خالص، وانا واخويا هنهتم بيك ، لو احتجت اي حاجة قول.. مـ... متتكسفش
_ شكراً
_ طيب ايه رأيك نختارلك اسم نناديك بيه يكون افتكرت اسمك
_...
_ موافق؟
هز دماغه ايجاباً ف قولت مفكراً
_ إيه رأيك نسميك ... محمد.. او عمر.. او مثلا سعيد... حلو سعيد إيه رأيك
شرد بعنيه والحزن كسا وشه ف قولت
_ خلاص بلاش سعيد إيه رأيك في ادم... حلو؟
هز دماغه ورجع لسكوته كان شكله زعلان من حاجة بس مفهمتش ايه ممكن يزعله وهو معندهوش ذكريات تزعله... لكن افتكر ان هو دة اللي مزعله ان معندهوش ذكريات ودماغة اتعادت برمجتها؟
اسراء
بعد ما بلغ وقضا ايام في البحث عن ريان رجع تعبان وحزين وفاقد الأمل لدرجة انه بان علي وشه العجز والانكسار ، وطول الأيام دي مكنش بياكل ولا بيتكلم ولا يقول حاجة بس سكوته وحزنه اللي في عينيه كانوا بيقولو كل حاجة مكنش محتاجة يقول حاسس بأية علشان نفهمه .
وبعد ما رجع من برة دخل اوضة ريان ومكنتش دي اول مره يدخلها من وقت ما مشي وفي كل مرة ماما كانت بتمنعني ادخل عنده من خوفها ازود عليه حزنه ف استنيتها تبعد عن المكان ودخلت عنده لقيته ماسك اجندة بيقرا فيها ودموعي بتسيل علي خده كانت اجندة اول مره اشوفها ولكن افتكرت انها قصة تاهت مني فرحت جداً وقربت منه وقولت
_ ايه ده يا بابا ، قصة من بتوع ريان؟
مردش عليه ف جيت جمبه وبصيت للمكتوب وقريت شويه لقيت انها قصة تشبه لمذكرات كان بيوصف فيها احساسه ف خدتها من بابا وقريت المكتوب وبعد ما خلصت قفلتها وقولت ودموعي بتسيل
_ كان مخبيها بعيد ، اول مره اشوفها
قال بصوت مختنق بيجاهد علشان يخرج
_ كنت فاكر ان اللي بيعمله مضايقني انا لوحدي طلع مضايقة هو كمان .. ومكنتش اعرف ان في حد ممكن يعمل حاجه ويدمنها وهو كارها.. بس هو مكنش بيتكلم كنت هفهمه ازاي وهو كل ما يشوفني يدخل اوضته
_ هو مكنش بيكرها يا بابا.. هو كره دفن نفسه فيها.. كره فشله بسببها.. ريان كان مقتنع ان ده مرض ومحتاج حد يساعده يتعافي منه بس محدش فيكم كان فاهم ، مكنتوش فاهمين ان قعدته طول الوقت في اوضته بعيد عنكم بيكتب مرض كان بيزيد كل يوم وكان مضايقة هو شخصياً.. يمكن لو انت وماما فهمتوا كدة من زمان ومبتدتوش تحطموه بكلامكم وتكرروا كلمة فاشل كانكم بتزرعوها جواه كان نجح .. كان سعي ورا حلمه.. مكنش فضل قاعد يكوم في القصص من غير ما يحاول ينشرها.. هو من كتر الضغط مكنش قادر يفكر وحاصر نفسه في حاجة واحدة بس ان مخرج او منتج هياخد قصصه وناسي ان في طرق تانية ، محاولش حتي يعرف الناس انه بيكتب.. انا اسفة بس انتوا السبب في الحالة اللي وصلها
_ اسكوتي! انتي مش فاهمة حاجة بتتكلمي وخلاص وانتي مش عارفة احنا كنا حاسين بأية وايه اللي محتاجينه ، .. يابنتي كل واحد عنده اللي شاغله واللي تاعب نفسيته ، وكل واحد بيفكر في الحاجة اللي تريحة يعني انا لما امك جابت الولد فرحت وقولت هيسندني لما يكبر ، هلاقي عكاز اتعكز عليه ، هيكون سندي في الدنيا لما اكبر واعجز وفرحتي بيه كانت بتزيد يوم عن يوم لما كنت بشوفه محترم ومش زي العيال التانية لما كان شاطر في مدرسته وبيجيب درجات عالية كنت بقولك هيطلع حاجة كبيرة قوي ، دكتور ،مهندس، ويمكن وزير ، لغيت ما بدء يكتب بقا يبعد يوم بعد يوم ويفشل في دراسته مبقاش يقعد معانا ومعايا انا بذات وكأني بعضه ، ملهوش طموح مفيش غير الكتابة بيكتبها ويستف علي الرف وسايبني اشتغل واشقي واجيب فلوس واصرف عليه واكله واشربه وهو قاعد في اوضته ولو اشتغل مبيكملش اسبوع وصاحب الشغل بيمشيه وانا اشتغل واصرف وهو يجيب دفاتر علشان يكتب .. كنت عامل زي اللي بيكبر نخله لسنين طويله ومستنيها تطرح وفي الاخر تطلع نخله دكر مبتطلعش بلح .. استفدت ايه انا من تعبي عليه كل السنين دي ، اي حد بيزرع محتاج يحصد بس انا محصدتش حاجة بالعكس ده انا خسرت كتير ، وزي ماشوفتي بنفسك كان هيقتلني ، اللي تعبت عشانه وكبرته اول ما كبر كنت هموت علي ايده... هتقوليلي مكنش حاسس هقولك هو اللي راح للمخدرات برجليه يعني غلط.. ومش بس كان هيقتلني ده بوظلك وشك و وقفلك حالك... واوعي تفتكري ان حرق القصص مجاش علي بالي لا جه علي بالي وكتير قوي بكون عاوز احرقهم وبمنع نفسي علشان عارف انه تعب فيهم عارف انهم كل حياته ولو حصلهم حاجة ممكن يموت فيها لغيت بقا ما جه قالي بعد كل ده لو قعدت هتخنق وكان هيمشي... طيب رد الجميل الاول.. ادخل اوضتك واسكت ما انا كتير بقوله كدة وبيقعد ، معقول بعد ما بوظلنا حياتنا كلها وبوظ علاقتنا بناس يقول لو قعدت هتخنق ، مين فينا اللي يتخنق انا ولا هو ... وبس عملت اللي عملته ومحستش بنفسي غير وانا شايفه واقف صنم قدامي وهو باصص لنار وهي بتحرق قصصه حتي دموعه منزلتش ، ساعتها بس فوقت للي عملته وفهمت اني قضيت عليه وخسرته بجد المره دي ، وده مكنش كفاية لا ده انا لما جيت بعد ما مشي بيومين ودورت يمكن الاقي كام قصة متحرقوش عشان تهون مصيبته شوية لقيت دي بيحكي فيها عن نفسه ، طول ما انا بقرا متوقع الاقي صفحة بيكتب فيها كلام وحش عني او يلومني او يقول اني انا اللي عقدته بس الحمدلله طلع عارف اللي في فيها وفاهم كل حاجة ، عارف ان الغلط منه وانه عاله علينا ، عارف انه السبب في اللي انتي فيه وان اكتر حاجة بتتعبه هو تعاطفك معاه وحبك ليه
كمل ببكاء
_ انا كنت فاكره بارد مبيحسش طلع بيحس، يمكن لو جه قالي الكلام ده كنت ساعتها فهمت مشكلته وقدرت اساعده واساعد نفسي بس هو مكنش يتكلم كان بيلاقيني داخل البيت يجري علي اوضته او علي اوضتك انتي مكنش يحب يكلمني.. طيب ليه مكلمنيش.. هو انا كنت بضربه ، مكنتش بضربه بقالي سنين ايدي متمدتش عليه غير اخر يوم شوفته فيه وبعد كل ده مشي ومش عارف هو فين ولا عايش ولا ميت ، بعقله ولا اتجنن
قولت ببكاء
_ انا اسفة يا بابا.. حقك عليه اسفة علي كل كلمة قولتها انا بس كنت زعلانة علي ريان
_ اسفة علي ايه انتي كان عندك حق في كل كلمة قولتيها انا اللي غلطان محاولتش افهم
كمل وهو بيقوم
_ انا هرجع ادور عليه لغيت ما الاقيه.
مشي وبعد ما هديت شوية طلعت وراه وبقيت ادور عليه في الاماكن اللي حولينا وأسال هنا وهناك لغيت ما لقيت نفسي قدام سوبر ماركت عيلة رضوان وقفت شويه ابصله كنت بفكر ادخل يمكن حد فيهم يعرف عنه حاجة بس مقدرتش وقبل ما امشي لقيت بدر طالع ولما شافني وقف للحظات يبصلي ولما هميت اني امشي قالي
_ اسراء !
وقفت في انتظاره ولما وصلني قال
_ في حاجة؟
_ بدور علي ريان
_ بس هو مش هنا
_ بدور في الشوارع ورجليه جابتني لهنا ، اذنك
_ استني
_ نعم
_ من وقت ما مشي مرجعش
_ انت عارف مشي امتي
_ اه يوم ما قصصه اتحرقوا قدام عينه
_ تبقي عارف... واه مرجعش من يومها
_ ومتوقعاه يرجع
_ ان شاءلله هيرجع ربنا يحميه
قال بشيء من السخرية
_ ربنا يحميه
_ ايوة هيحميه وهيكون بخير علشان هو طيب ومأذاش حد
_ طبعاً طيب قوي ومأذاش حد خااالص ، انتي هتقوليلي
_ انت اكتر واحد عارف ان ريان شخص كويس متخليش زعلك ينسيك اخلاقه كانت ازاي
_ تكون زي ما تكون اخلاقه وطيبته ممنعوهش يغدر بيه
_ هو مغدرش بيك وانت عارف...
قال بماقطعة
_ مش عارف حاجة ولا عايز اسمع حاجة عنه ..
_ شكلها جت من عند ربنا ومش هتسمع عنه حاجة بجد
قولتها ومشيت وبعد مسافة صغيرة سمعت بشر بيناديني
#بشر
كنت شايف بدر بيتكلم معاها ولما مشيت روحت عنده وقولت
_ مالها
قال وهو راجع
_ اخوها تايه وبتدور عليه
_ تايه يعني ايه.. بدر!!!
مشي من غير ما يرد وانا وقفت اسراء وروحت عندها اسألها
_ في حاجة
_ بدور علي ريان
_ هو راح فين
_ بقاله كام يوم مشي ومحدش عارف عنه حاجة
_ ماهو غاب من فترة ورجع تاني مفيش داعي تدوري عليه
قالتلي اللي حصل معاه وحالته هو وماشي ف قولت
_ لدرجة دي... طيب ومبلغتوش
_ بابا بلغ
_ ومفيش اي اخبار
_ لا
_ اها.. طيب متقلقيش انا هدور معاكي وممكن ننزل صورته في صفحات علي الانترنت
_ لا بلاش
_ بلاش ليه
_ مش عاوزة يحصلك مشاكل بسببنا ، كتر خيرك
_ مفيش حاجة هتحصل واحنا جيران واهل قبل أي حاجة
_ ربنا يخليك.. متشكرة
_ طيب روحي انتي وبلاش تدوري مش هتعرفي تعملي حاجة
_ انا دورت في كل مكان ممكن اقدر ادور عليه فيه وموصلتش لحاجة ، مش قدامي غير اقعد في البيت واستني
_ تمام ، اتفضلي ولو في جديد عنه هبلغك
مشيت وانا رجعت السوبر ماركت لقيت بدر واقف مستنيني وبيقولي
_ كنت بتقولها إيه
_ كنت بقولها هساعدها تلاقي ريان
_ نعم! ، تساعدها؟ ، انت بتتكلم جد؟
_ امال بهزر
_ ماهي دي المصيبة انك مبتهزرش ، هتساعدها بعد اللي عمله يا بشر
_ وهو عمل ايه قالولك كان متخدر
_ وخدروه بالعافية يعني ولا اتخدر بمزاجه... حام حوليها وهي خطيبتي غصب عنه ولا بمزاجه.. كتبلها قصة غصب ولا بمزاجه
_ قصة إيه
_ قصة كان بيكدب ويقولي كاتبها لواحد تاني اتاريه بيوصف فيها حكايتهم سوا ... ريان غدر بيه يا بشر ، طلع بينهم حاجات من زمان وانا مغفل وسطهم المفروض توقف معايا انا مش تدور عليه هو
_ انا مش عارف التفاصيل بس ريان كلنا عارفين انه شخص كويس وجويرية كمان محترمة مستحيل يغلطوا ، وحتي لو بجد بيحبوا بعض اديك بتقول من زمان يعني انت اللي دخيل عليهم مش هو
هتف بعصبية
_انت بتتكلم ازاي!! .. يعني انت عاجبك اللي بيحصل... طيب ولو مشيناها انهم بيحبوا بعض من زمان ومش مهم انه حام حوليها وهي خطيبتي ، وبنسبة لعادتنا ايه؟ نسيتها
_ عادات إيه انت شوفت عادات يابني ده انت عمرك ما شوفت نجع العربي حتي عشان تدافع عن عاداته.. ثم انا مش بدافع عنهم ولا هتكلم عن اللي حصل ولو غلطوا بجد ف هما الاتنين خدوا جزائهم هي اتعقدت وهو كمان اتعقد ويمكن كمان مات ، انا بعمل الواجب مع جيرانا اللي عيشنا معاهم علي الحلوة والمرة مش اكتر
_ وبابا وعمك عارفين انك هتعمل الواجب
_ إيه
_ بابا وعمك عارفين انك هتعمل الواجب
_ ده تهديد ولا انا اختلط عليه الامر
_ اعتبره زي ما تعتبره لو ساعدتهم انا هقول لابوك وعمك
قال كده ودخل جوه وانا وقفت مكاني استوعب تهديده ده لغيت ما جت معايا بعند بعد ما افتكرت تصرف عمي في حاجة تخصني وموافقة ابوي ليه وتهديده هو ليه بأنهم ممكن يعقبوني لو عرفوا وكأني عيل صغير .
وبدأت ادور ومش بس كده ده انا رجعت البيت واستنيت في البلكونة ان اسراء تطلع علشان اطلب منها صورة ل ريان لغيت ما اخيرا طلعت ف استدرت علشان اروحلها ولقيت هاجر في وشي بتبصلي وبعدين بتتقدم ناحية البلكونة وتبص لشارع وبعدين رجعت عندي وقالت
_ اسراء؟
_ اه انا كنت عايز اخد منها حاجة
_ ماشي روح خد منها حاجة
_ مالك
_ مالي ، مفيش
_ اها ، طيب هجيلك ونتكلم
قولتها ونزلت تحت بسرعه ولحقت اسراء قبل ما تدخل وقفتها قولت
_ عايز صورة ل ريان
_ ليه
_ هنزل خبر عنه
_ وتفتكر هيجيب نتيجة
_ اكيد لو حد شافه هيقول شوفته
_ طيب دقيقه هجيب التليفون واجيلك
دخلت وانا بقيت واقف مكاني مستني للحظات وبعدين بصيت لفوق لقيت هاجر هناك واقفة وبتبصلي وهي مربعة ايديها قدامها وبتهز جسمها ... اترسمت ابتسامتي وفرحت بعد ما فهمت انها غارت عليه ومكنتش مستني اطلع عندها عشان اشوف غيرتها دي في كلامها معايا ولكن الظاهر أن مشكلتي الاولانية معاها هتفضل ملحقاني.
بعد ما جت اسراء وخدت منها الصورة مراسلة علي بلوتوث طلعت لقيتها نازله ورايحة بيتهم وقفت في طريقها وقولت
_ علي فين
حاولت تعدي من غير ما ترد ف قولت وانا بحاصرها عند الحيط
_ بقولك علي فين
قالت بنرفزة
_ عديني يابشر
_ صوتك ميعلاش ، عاوز اعرف مالك
قالت وهي بتحاول تزقني
_ مليش ، بقولك عديني !!!
_وبعدين معاكي هتفضلي كدة كتير
_ اه ليك فيه
_ اه ليه فيه ، ليه انتي... في ايه قولي
_...
قولت بمكر
_ ايه! زعلتي علشان شوفتيني واقف مع اسراء
_ اديك عارف بتسأل ليه
قولت بإبتسامة
_ ايوووه .. بتغيري عليه
_ لااا مبغريش عليك ، بس ميصحش يكون بينك وبينها كلام بعد اللي اخوها عمله في بنت عمك
_ ملكيش دعوة باخوها اتكلمي عن نفسك.. انتي غيرتي
_ بقولك لا مغيرتش ولا همني ومش انا بس اللي هتضايق من المنظر اللي شوفته كل البيت هيتضايقوا
_ كل البيت هيغير علية زيك
قالت بعصبية
_ مبغيرش
_ لو مش غيرة ف انتي مش من حقك تسأليني وقفت معاها ليه
حدت من نظراتها خلتني مش قادر احدد اذا هي بتتكلم جد ولا بتقول كده بسبب انزعجها من اللي حصل
_ مش بغير! ولو أي حد غيري شافك هيعمل نفس اللي انا بعمله ، اللي كانت هتموت واللي ضاع مستقبلها بنت عمك وانت اللي مفروض من نفسك تقاطع العيلة دي .. ومتقولش انت حر مش عاوزة اعرف
مسكت مرفقها قبل ما تمشي رجعتها قدامي وقولت
_ استني.. ماشي هقولك.. انا كنت واقف معاها علشان ريان اصله مختفي وانا قولتلها هساعدها تلاقية ، بس بجد انتي مزعلتيش عشان واقف مع اسراء تحديداً
_ طبعاً اتضايقت علشان واقف مع اسراء تحديداً ، اسراء تحديداً دي تبقي اخت ريان اللي تعدا علي بنت عمك وعلينا كلنا وانت مهتم بيه وبأختفائه
_ ده بس السبب اللي مضايقك
_ مستهون انت بالسبب ده طيب قوله لأي حد في البيت وشوف رد فعله... قول ل ابوك مثلا.. او بدر ، قولهم هدور علي اللي داس علينا كلنا علشان اخته متزعلش
قالت كدة وسابتني مش واثق اذا كان تصرفها غيره ولا ردة فعل زي ردة فعل بدر والباقين لو عرفوا
#زيد
من وقت ايدها ما اتحرقت وانا مش بطلب منها حاجة ومشوفتش منها اي منشورات وفي هدؤء في تعاملنا مع بعض مع اني قليل لما بشوفها يمكن من وقتها مشوفتهاش غير مرتين بالصدفة وفي كل مرة بتدخل وتسيبني.. وبعد فترة الغياب دي خرجت من الاوضه بعد ساعتين من النوم لأني سهرت كتير امبارح لقيتها قاعدة في الصالون وخالتي بتساعدها تغير علي الحرق في الوقت اللي كانت هاجر واقفة في البلكونة مش شيفاهم اصلا ولا حاولت تغيرلها هي وبعدين مشت وسابتهم.
ولما خلود شافتني واقف وببصلهم همت انها تقوم لولا ان خالتي منعتها ورجعت تكمل تغيير الشاش بس مكنتش عارفة تعمله حاجة ف قولت وانا بقعد جمبها علي الجهه التانية
_ عنك يا خالتي
حدت من نظراتها وقالت
_ لا هقدر اعمل لوحدي
مسكت ايدها من غير اهتمام باعتراضها او نبرتها وتجاهل كامل لثرثرتها وشد ايدها مني وبدأت افك الشاش لغيت ما اتكشفت ايدها وبان الحرق كان شكله يقشعر الجسم ويغمي القلب ف بصتالها وقولت
_ اية الإهمال دة ، مغيرتيش عليه خالص مش كدة .. دي لو ايد بلاستك كنتي حسيتي انها لازم يتغيرلها عشان متعفنش
كملت بزهق
_ هاتي يا خالتي البخاخ الابيض وهاتي شاش تاني زي دة
_ اللفة البيضة ولا اللي في الكيس
_ اللي في الكيس
_حاضر يا ولدي
مشيت خالتي وهي بقت دايرة وشها عني بانزعاج ف قولت
_ انا عارف ان الإهمال والتهور واخد حده معاكي بس مش لدرجة تهملي في ايدك
بصتلي بقرف وقالت
_ خايف معرفش اعملك قهوة طبعاً
_ مشكلتك انك دائماً بتلقطيها وهي طايرة ، طول عمري بقول عليكي ذكية.. طيب بذمتك ما قولت عليكي انك ذكية لما كنتي بتشتغليني بأسم اسيل "
رمقتني بسخط من غير رد ف قولت
_ يا فالحة انا بقولك كده علشان مصلحتك اكيد يعني مش عشان اشرب قهوة مع اني مشتاق جداً لفنجان قهوة من بتوعك محدش بيظبطها غيرك
كملت بأشمئزاز قاصد استفزازها
_ بس اوعي قلبك يرق عليه وتعمليلي قهوة بايدك دي بقرف
قالت بنرفزة وهي بتحاول تشد ايدها مني
_ طيب اوعي كدة مش عاوزاك تعملي حاجة
_ بس بقا ، هغيرلك الشاش وخديها مش عاوزها معايا اتنين
لاحت ابتسامه علي وشها خفتها بسرعه ورجعت تبص لبعيد وبعد ثواني جت خالتي معاها البخاخ والشاش وفي نفس الوقت دخل بشر وهو باين عليه الانزعاج راحت خالتي تشوفه وانا بدأت اغيرلها علي الحرق.
اولاً نضفت حولين الحرق كويس وبعدين رشيت من البخاخ ورجعت اراقب تعابير وشها متوقع الاقيها بتتألم بسببه ولكن عكس توقعي لقيتها هادية وعينيها عليه وهي اللي بتراقب تعابيري من الاول وللحظة التقت عينيا عن قرب ف ارتبكت وقالت بانزعاج مصتنع
_ ايه ده !! مش تخف ايدك شويه بتوجعني
_ هههههه سوري مجرد محاولة للوفي بوعدي
كملت بخبث
_ شكلي هتعب علشان اوفي ولا ايه
_ انت وفيت من زمان
_ واااللهي
_ اه واااااللهي
_ ههههه ماشي
رجعت اكمل اللي بعمله وبعد ما انهيت ربط الشاش سبتها وقولت
_ ابقي اهتمي شويه علشان تخفي... مش هفضل اشرب قهوة والسلام علشان حضرتك ايدك موجوعة
مطت بوقها باشمئزاز ف قولت
_ دة بدل ما تقومي تعمليلي فنجان بأيدك السليمة.. انا غلطان اني تنازلت وربطتلك ايدك.. رايح اشوف بشر احسن منك
سيبتها ودخلت عند بشر لقيت خالتي عماله تسأله ماله وهو مبيقولش غير مفيش ف طلبت منها تسيبنا لوحدنا وبعد ما مشيت قعدت جمبه وقولت
_ مالك
قال بتنهيدة
_ مش عارف
_ مش عارف ايه احكي
حكالي اللي حصل مع ريان ومحاولته انه يساعدهم وختم كلامه بقوله
_ مش عارف ابوي وعمي ممكن يعملوا ايه لو ساعدتهم يلاقوه
_ وانت هتساعدهم ازاي يعني يا بشر ما كنت سيبت المهمة دي للبوليس وعفيت نفسك من الحرج
_ يعني هنسيبهم
_ اه نسيبهم متنساش اللي حصل مع جويرية دي اقل حاجة كان فيها دبح
_ يابني هو انت لسه هتعرف ريان الولد كويس ومحترم بس اللي حصل كان غصب عنه.. هو انا اللي هقولك يا دكتور
_ فاهم بس في النهاية هو اللي عمل كده مش حد تاني والصح ان احنا مندخلش في حياتهم ، سيبك منهم والبوليس هو اللي يتصرف
_ مقدرش انا قولت ل اسراء هساعدها
_ قولت ل اسراء؟
_ اه قولت ل اسراء
_ وتقولها بصفتك إيه مش خلاص مفيش خطوبة
_ معرفش بقا قولتلها وخلاص
_ انت عاوز ايه.. مش هي دي اللي كنت عاوز تسيبها
_ يعني ايه عايز ايه.. هو انت متخيل اني متردد من ناحيتها لا طبعاً مفيش الكلام ده بس متنساش انهم جيرانا من زمان وفي بينا احترام ومعاملة طيبة
_ راح الاحترام وراحت المعاملة الطيبة من اول ما اخوها عمل اللي عمله ، خلاص مبقاش في حرج انك تتخلي عنهم
_ خلاص مبقاش ينفع انا قولتلها وهساعدها.. دة انا جبت منها صورته علشان انزلها علي صفحات يمكن حد شافه
_ كمان ، انت عاوز تعمل لنفسك مشكلة وخلاص
_ ليييه مشكله ليه مش راجل انا وحر في اللي هعمله ولا عيل انا معاهم.. اخطب يا بشر افسخ يا بشر ، ده عمك فسخلي الخطوبه من غير ما يسألني
_ ماشي بس مبقاش ينفع تكمل بعد اللي حصل
_ وانا مقولتش عاوز أكمل بس يعملولي حساب انا اللي اقرر مش هما .. وهساعدها ومحدش ليه دعوة بيه بقا
_ خلاص اهدي ساعدها ومش لازم تقول انك بتساعدها
قال بإنزعاج
_ طيب سيبني لوحدي دلوقتي
سيبته يهدي ورجعت اوضتي قعدت قدام الاب توب واثناء انشغالي بيه لاحظت فنجان القهوة اللي قدامي تخيلت ان دادة امينة هي اللي عملته مع انها مبتعملهاش كتير ولما بدأت اشرب لقيت ان دي قهوة خلود هي اللي بتعرف تعمل القهوة اللي انا بحبها اترسمت ابتسامه علي وشي وبعدين قومت دخلت المطبخ لقيت دادة امينة هناك ف سألت
_ مين اللي عمل القهوة
_ خلود
زي ما توقعت طلعت هي ولما دورت عليها عشان اشكرها بطريقتي قالولي خرجت واضح انها هربت من شكري ليها
#خلود
طلعت اتمشي شوية علشان مشفهوش لما يعرف اني عملتله القهوة من غير ما يطلب ف يبصلي بصه او يقولي كلمة تضايقني وفي طريقي وانا مشغولة بيه اتفزعت لما لقيت إسلام في وشي بيقولي
_ازيك يا فنانه.. والله انا امي دعيالي عشان اشوفك تاني
_ ياخي خضتني
_ حقك عليه يا نجمة والله انا بس من فرحتي مقدرتش مجيش واسلم عليكي اما شوفتك معدية
_ انت بتعمل ايه هنا
_ بشتغل دليفري في المطعم اللي هناك ده
قالها وهو بيشاور علي مطعم قريب ف قولت
_ ربنا معاك شد حيلك
_ كله علي الله يا فنانة ولو عوزتي اكل ولا اي حاجة كلميني وفي دقيقة اكون عندك
قولت بإبتسامة
_ متشكرة قوي... عن اذنك
_ عن اذني إيه استني.. بقالك يومين منزلتيش حاجة ولا حتي رديتي علي رسايلي
رفعتله ايدي ف قال
_ ياديني النبي ايه ده يا نجمة ، سلامتك ياغالية مين عمل فيكي كده
افتكرت زعل زيد من كلمة قط ف قولت بإبتسامة
_ القط وقع عليه الشاي
_ الله يلعنه والله ما اطوله لا اسمه
_ ههههه ده حيوان ، من الاهانه لنفسنا اننا نعمله قيمة هههههه متشكرة قوي يا اسلام.. يلا ارجع شغلك هتترفد
_ طيب متغبيش عننا مستنين فيديو جديد النهاردة
_ لا مش دلوقتي
_ ليه بس
_ معلش... عن اذنك
سبته ومشيت وبعد ما رجعت البيت وفتحت التليفون لقيته منزل بوست في الجروب عن حرق ايدي وبيشتم في القط بقيت مش عارفة اتضايق انه عمل حاجة زي دي ولا اضحك وبعد وقت وانا بشوف باقي البوستات وتعليقات المنشور ده بذات جاتني فكرة احرق بيها دم زيد وهي اني اعمل سكرين للبوست وانزله علي البيدج وبالفعل نزلته وشكرت اللي سألوا عني واللي شتموا القط عشاني
#مليكة
بعد ما ايسل قعدت معانا يومين جه عمي احمد ياخدها وقبل ما يمشي قعدنا مع بعض شويه وفي الوقت ده وصلني اتصال من جويرية بتشتكيلي انها مش عارفة توصل ل اسراء وطلبت مني اروحلها قولتلها هجيلها ونهيت معاها المكالمة ورجعت قعدت معاهم ف قالتلي ماما
_ مين بيكلمك
_ جويرية
اتنهدت بزهق وقالت
_ ومالها بيكي مش كفاية لف وراها
_ في ايه يا ماما جويرية صحبتي
_ طيب يختي ربنا يخلي
قال عمي احمد
_ مالك يا مها مزعلاكي في ايه البنت دي
قولت
_ والله ما مزعلاها
_ لا مزعلاني ، مصحبالي بنت وراها اسرار وبلاوي وهتوقع نفسها في مشكلة بسببها
_ يا ماما مالك مشاكل ايه اللي هتحصلي من وراها
_ معرفش بس انا مش مرتاحه من وقت ما عرفتيها
قالت ايسل
_ بنت صايعة ولا ايه يا خالتوا
قولت
_ صايعة في عينك دي ملاك
كملت بغرور
_بس كانت معقدة وعقدتها اتفكت علي ايدي
قال عمي احمد
_ اشتغلتي دكتورة نفسانية ولا ايه
_ والله ياعمي فكتلها عقدتها بجد
_ ما شاءلله عليكي طالعة ناصحك
#احمد
بقوا يتكلموا ويشدوا مع بعض بسبب البنت دي وفي وسط الكلام قالت مها
_ مش كفاية عاداتهم الزفت
قولت باستفهام
_ عادات اية
_ عادات كدة بتمنعهم يجوزوا بناتهم بره بلدهم
_ إيه
قالت مليكة
_ كان زمان دلوقتي اتغيروا
_ اتغيروا ازاي ، جوزوا بنت من بناتهم بره.. ماهو علي ايدك كانوا هيموتوا الواد
قولت مستفهم بعد ما حسيت انهم بيتكلموا عن عيلة رضوان
_ في ايه يا جماعه ، مين الناس دي ومليكة تعرفهم منين
قالت مليكة
_ اهل زميلة ليه في الجامعة ومنهم دكتور ومعيد هناك بردو في الجامعة
_ اسمهم ايه
_ مين؟
_ الناس دي عليتهم اسمها إيه
_ مش عارفه بس الدكتور اسمه شبل العربي معروف بكده
توترت من كلامها جداً معقول مليكة تعرف الناس دي وليها تعامل معاهم كمان دول مش بعيد لو عرفوا صلة القرابة اللي بينا يقولوها علي اللي حصل زمان ساعتها منظري قدام مريم وايسل هيبوظ
_ مالك يا أحمد
قالتهالي الهام قطعت شرودي مع نفسي ف قولت
_ سلامتك... اسمعي كلام امك يا مليكة ابعدي عن الناس دي ، دول ممكن يأذوكي
_ بالعكس دول ناس محترمين جداً مفيش في ادبهم وبذات جويرية ، دي هي ماما بس اللي قلقانه علي الفاضي.. وانا خدتها تتعرف علي مامتها وشافت بنفسها قد ايه هي ست محترمه
قالت مها
_ هي فعلاً محترمه وذوق... تصور يا احمد دكتورة كبيرة ومعروفة متجوزة من الناس دي ازاي قبلت علي نفسها .. دي جميلة قوي مش ناقصها حاجة... انا نفسي بس اعرف اتجوزته ليه
نهيت الكلام معاهم بسرعه عشان ميبنش عليه وبعدين خدت ايسل ومشينا وانا كل اللي شاغلني ان مليكة تعرف حاجة عن اللي حصل زمان او هما يعرفوا اني جوز خالتها
#بيجاد
تاني يوم اديت الملف لعمي شبل وكنت حابب لما اروحلهم تاني يكون عندي خبر كويس اقول ليها وبعد ما اخيراً رد عليه قالي
_ الاوراق تمام بس هي لازم تروح بنفسها تملا الاستمارة ، ابقا خدها وخليها تملاها وتقدمهم بنفسها ، بس استعجل مفيش وقت
_ ماشي من بكرة هاخدها ونروح
_ تمام
_ متشكر يا عمي تعبتك معايا
_ تعبتني علي إيه انا معملتش حاجة .. بس ايه يا واد الحنية دي بتتوسط لمنتقبة
_ ماهي بنت خالي ياعمي
_ اهااا بنت خالك! ، ربنا يخليلك خالك وبنته
_ عاوز تقول ايه يعني
_ عاوز اقول ليك حق تساعدها البنت تنطق الحجر وتعدل اللي زيك
_ هو انت شوفت صورتها
_ ده العميد نفسه شافها وسألني متجوزه ولا لا شكله بيدور علي عروسة
_ ههههه ياااعمي
تلاشت ابتسامتي وانا بقول باستفهام
_بجد ،يعني لدرجة دي حلوة
_ وانت مش شايف انها حلوة يعني
_ مشفتهاش
_ لا ياشيخ
_ والله ما شوفتها
_ يا ولد
_ مشفتهاش بجد
_ ليه.. ولا مكشفتش وشها قدامك
_ لا
قال وهو بيفتح الملف
_ طيب سهله شوف صورتها
استنيت للحظات بعد ما فضولي تعدي الحدود لأني اشوفها وبعد ما خلاص طلع الورق ديرت وشي وبعدت الملف بايدي وقولت
_ لا مش عايز رجعه
_ ليه
_ مش عايز
_ بتتكلم جد
_ ايوه منتقبة اشوف وشها ليه
_ يعني يمكن نفسك تشوفها
اتنهدت بعمق وقولت
_ بيني وبينك معنديش صبر اني اشوفها بس انا قولتلها اني مش هحاول غير لما هي تكشف وشها قدامي ، كل ما حد يشوفها يعمل زي مانت عملت كده ومخليني هتجنن علشان اشوف شكلها ده ، دي حتي هي بتقولي منتقبة علشان جمالها ملفت... شكلها عامل ازاي علشان اللي بتعملوه ده ، ما توصفهالي
_ ملهاش لازمة خليها لما تشوفها بالمرة بس خلي بالك هي مش هتكشفة طالما مش محرم ، اخطبها وهي تكشفه
_ انا اصلا متفق مع ماما وبابا اني هتجوزها بس مكنتش حابب استعجل كنت عاوز اتعرف عليها الاول
_ ولسه متعرفتش
_ اتعرفت بس يعني كنت عاوز اصبر شوية
_ مفيش مشكلة هي بنت خالك وروحتك عندهم او جيتها هي عندكم هتكون مبررة ودي فرصة كويسة علشان تتعرفوا
_ صحيح.. طيب انا هروح ابلغها بموضوع الاستمارة
_ اهطبعاً لازم تكلمها في موضوع الاستمارة
_ عممممي براحة عليه انا بجد في معركة انت لا تدري عنها شيء ، الله يسامحها ماما قالتلي عمرك ما تخون الامانه مش كان زماني مرتاح من التوتر ده
_ هههههههه طيب بص هقولك وصفها ، هي بشرتها ناصعة البياض خدودها مليا....
_ بس بس بس كفاية انا عايز اتفاجيء ، سيبني اعرف لوحدي لما اشوفها
#فاطمة
من وقت ما خد الملف ومشفتهوش تاني وطول الوقت وانا مستنياه علشان اشوف اذا شاف الصورة ولا لأ وبعد ما اتأخر كنت داخلة لبابا اتحجج بأي حجة علشان نروح بيتهم وقبل ما اخبط عليه ، باب البيت هو اللي خبط وقتها قلبي انتفض وتوترت لما حسيت انه هو ف قولت
_ مييين
_ بيجاد
خدت نفس عميق علشان اهدا وبعدين قولت
_ بابا!! تعال افتح بيجاد بره
جاني رده من جوه وهو بيقولي
_ جاي
دخلت الاوضة لبست النقاب وبقيت واقفة مكاني لدقايق بحاول اتماسك وبعدين خرجت ومن أول ما الباب اتفتح عيني جريت عليه وده خلاني اشك انه شاف الصورة وعرفني ف اتقدمت عندهم وقولت بربكة
_ السلام عليكم
نظراته كانت مترددة مكنش مثبت نظره في اتجاه واحد عاوز يبصلي وفي نفس الوقت متوتر ، وتوتره ده زدني توتر وبعد ما ردوا السلام قولت هعمل شاي ف قال
_ لا استني
_ نعم
_ اديت لعمي الملف قالي لازم انتي تروحي تملي الاستمارة .. ايه رأيك نروح بكرة انا وانتي... اقصد احنا التلاتة
قال بابا
_ روحوا انتوا انا مش قادر
_ الف سلامة.. طيب مفيش مشكلة اخدها ونروح... مستعدة
_ ايوة مستعدة.. ماشي بكرة هستناك ونروح
_ تمام ، الساعة 8 هكون هنا