رواية ابي بواب وامك خدامه الفصل التاسع والعشرون29والثلاثون30بقلم رانيا عماره
{لف علاء وهو خايف من نويري، وارتبك في كلامه}
علاء:انا كنت مسافر مصر عشان أخلص اللي اتفقنا عليه!
نويري:واية هو بقى اللي اتفقنا عليه؟
علاء:هو احنا مش اتفقنا نخلص على بيري ولا اية؟
نويري:ياه هو انت لسة فاكر؟...ياعم فكك بلا بيري بلا كلام فاضي خلينا في نفسنا ومستقبلنا هو ده اللي هينفعنا بجد!
علاء:بس انا مش هرتاح غير لما آخد روحها بإيدي!!
نويري:وتودي نفسك في داهية؟...ولا الأحسن نحكم عقلنا ونفكر بشويش؟
علاء:وبعد ما نفكر؟
نويري:هبعتلك واحد من رجالتي يخلص الموضوع في minute...وهتبقي انت بعيد عن المشاكل، بدل ماتروح والحكومة تمسكك!
علاء:انا مستعد أضحي بحياتي ومستقبلي في سبيل ان انا أخلص منها وأرجع حقي اللي هي كلته!...ومش منها هي وبس لا هي وعيلتها، حتى عم متولي وابنه اللي داير مابينهم وبين بعض حوارات...هما فكرهم عشان انا سافرت، يبقي خلاص نسيت اللي عملوه؟..انا كنت هرجع أندمهم كلهم واحد واحد!
نويري:طب مانا أبعتلك حد ينتقم منهم كلهم، ياحبيبي افهم انا خايف عليك ومش عايزك تتحط في موقف صعب زي ده، مش كفاية ان غسان الحكومة مسكته!!
علاء(مصدوم) :ايه؟؟؟...امتى الكلام ده؟؟
نويري:من كام شهر
علاء(مصدوم) :يعني مسافرش زي مانا كنت فاكر؟؟
نويري(بيضحك) :لا مسافرش، اتمسك...عشان كده انا خايف عليك... ده انا لو لفيت الدنيا كلها مش هلاقي صاحب زيك يا علاء!
{وقرب حضنه، وخرج حاتم من شنطة العربية بالحبل، وفجأة ربطه...واتصدم علاء من غدر صاحبه له!!}
علاء(بزعيق) :قول بقى انك عامل الحوار ده كله عشان تخلص مني يا نويري...هانت عليك العِشرة؟؟؟؟
نويري(بزعيق) :تهون ونص زي مانا هونت عليكم زمااان...زي ما خطفت مني بيري واتجوزتها وانت عارف كويس ان انا وهي كنا بنحب بعض وناويين على الجواز، ده انا من يومها وانا في مكاني مش قادر أنسى...هنسى اية ولا اية؟؟؟...ده انت قهرتوني وموتوني بالحياه...وبوظتولي مليون حاجة كنت مخططلها...الفرق بيني وبينكم ان انا كانت نيتي خير، لكن انتوا نيتكم زبالة شبهكم!!...وكل اللي انت فيه ده تستاهله يا علاء، وتستاهل أكتر من كده كمان...ولسة هتشوف وهتعرف ان ده كان ذنبي انا!!!!
علاء(بزعيق) :يعني انت كنت مقرب مني عشان بيري؟؟...بتستغفلني يا كلب؟؟؟
نويري(بزعيق) :اخرس...اخرس مسمعش صوتك..مين فينا اللي كان بيقرب من التاني عشانها؟...انا ولا انت؟؟؟...ومين فينا اللي استغفل التاني..أنا ولا انت؟؟...انت السبب في كل حاجة حصلت ياعلاء،وانا مش مسامحك ولا عمري هسامحك..ولو رجع بيا الزمن كنت دفنتك بدل المرة مليون!!!...يلا ارميه في العربية
{خد حاتم...علاء وشده ورماه في شنطة العربية وقفل عليه وعلاء بيزعق..لحد ما نويري وحاتم ركبوا العربية ومشوا راحوا الميناء...وهناك كان القبطان والمساعد مستنينهم...لحد ما دخلوا علاء في نفس الأوضة اللي غسان كان فيها...مد نويري ايده في جيب علاء وطلع كل اللي فيه، بما فيهم المفتاح اللي كان بيدور عليه، وأول ما مسكه ابتسم وكله فخر}
نويري:كده أنام مرتاح لأول مره في حياتي
{واداه لـ حاتم و خرج، واتحرك القبطان متجه لـ مصر، في وجود حاتم و كمال...ورجع نويري للجبل مره تانية}
==============================
{عند هويدا، بعد ما نسمة رجعت هي وجوزها، كانت واقفه مستنياهم قصاد البيت، وكلها غضب}
هويدا:روحتوا برضه يا نسمة؟؟...و نسيتوا اتفاجنا مع بعض؟
نسمة:حرام عليكي ياماما، مانتي أصلك مشوفتيش مهرة كانت تعبانة ازاي..ده الله يكون في عونها على اللي هي كانت مستحملاه!
هويدا(بصويت) :يامرارك ياهويدا...هودي وشي من الخلج فين؟..هجولهم اية يا عالم!!... هجولهم ابني الوحيد سندي وضهري في الدنيا...راح اتچوز من ورايا ومراته ولدت وچابت الواد؟...هيبتي فين؟.. وشكلي جصاد الخلج؟
نسمة:ده ريان حفيدك اسم الله عليه، كله حاتم وهو صغير، سبحان الله الخالق الناطق
هويدا(بعياط) :لية كده يا حاتم...حرام عليك..هي أمك للدرچادي ملهاش خاطر عندك؟...لية تخلي شكلي طين جصاد العالم حوالينا؟...يجولوا عليا اية؟...مش عارفة أحكم على عيالي؟؟
عبدالله:خلاص بقى يا حماتي اللي حصل حصل، هو يعني كلامك ده هيرجع اللي فات؟
هويدا(بعياط) :ماهو ده اللي حاتم عمله...جال يتچوز من ورايا عشان يحطني جصاد الأمر الواقع...اااه يا مُرك في ابنك يا هويدا...حسبنا الله ونعم الوكيل
نسمة:عشان خاطري كفاية بقي!!...بدل مانتي بتوجعي في قلبك كده، استهدي بالله وقومي اشتريلك هدية وخديها وروحي لـ مرات ابنك!
هويدا(بصويت) :انتي اية يانسمة، جبلة؟؟...چلدك تخين مش بتحسي؟؟...هدية اية اللي آخدها واروحلها...راحلها ملك الموت يابعيدة
{ودخلت جوا و رزعت الباب من كتر العصبية...بصيت نسمة لـ جوزها بيأس ان هويدا قلبها يحن على حاتم ومهرة، وتنسى اللي حصل!..لحد ما مشوا ورجعوا بيتهم}
==============================
{عند مهرة بعد ما متولي خد ضحى ومشى..كانت وجيدة شايله حفيدها ومبسوطة بيه، وجنبها زهرة}
وجيدة:ياخلاثي عليك...اسم الله...اسم الله...سبحان الله الخالق يا مهرة...كله أبوه ده مخدش حاجة منك!
زهرة:لا ياطنط وجيدة، واخد مناخير مهرة
وجيدة:على العموم بكرا لما اسم الله عليه يكبر، هتظهر ملامحه، هي بس العيال الصغيره كلها كده في الأول متعرفيلهمش شكل
مهرة(بتضحك بتعب) :ودي أحسن حاجة ياماما انه طلع شبهه...انا نسيت تعب الـ ٩ شهور بقرفه بكل ما فيه أول ما شوفته ولقيته شبه حاتم!
وجيدة(بفرحه) :ده احنا بقى بإذن الله..لازم نعمله أحسن سبوع في الدنيا كلها..ونجيب الشوكولاتات والحلويات ونعزم قرايبنا ونوزع عليهم كلهم من كبيرهم لـ صغيرهم...والنبي يا زهرة ابقي فكريني نكتب كل الطلبات في الورقه مش عايزين ننسى حاجة
زهرة:حاضر ياطنط وجيدة
{قامت وجيدة وحطت ريان على رجل زهرة}
وجيدة:خدي بسم الله...انا هدخل أعمله الرضعه وجاية
زهرة:ماشي
{دخلت وجيدة المطبخ تجهز الببرونه لـ ريان، وزهرة بصيت لـ مهرة بكل سعادة}
زهرة(بفرحه) :الف مبروك يا حبيبتي
مهرة(بتعب) :الله يبارك فيكي
===============================
{عند علا في المستشفى..دخلها الدكتور في الأوضة عشان يديها العلاج}
الدكتور:حمدالله على السلامه
علا(بتعب) :الله يسلمك
الدكتور:احنا محتاجين نعرف منك شوية معلومات
علا:اتفضل
الدكتور:مين اللي رماكي قصاد المستشفى؟
علا(بتعب) :بيري
الدكتور:بيري اية؟
علا:بيري صاحبة المطعم
الدكتور:ايوه اسمها اية يعني؟
علا(بتفكير) :مش عارفه
الدكتور:حاولي تعرفي، وإلا كده حقك هيضيع من اللي عمل فيكي كده!
علا(بتعب) :بيري صاحبتي...اسمها بيري فريد يسري الوالي..انا عايزة حقي يرجعلي منها
الدكتور:حقك هيرجعلك بس عايز اعرف هي لية عملت كده؟
علا(بتعب) :عشان تخلص مني
الدكتور(بتفكير) :وهي عايزه تخلص منك لية؟...انتي أذيتيها في حاجة؟
علا(بتعب) :عشان...عشان.....
{وقبل ما تكمل جملتها، دخلت في غيبوبه،جرى الدكتور وحاول يفوقها لكنها للأسف ماتت!}
==============================
{وبعد ما بيري باعت كل أملاكها وخدت الفلوس وسافرت...في بيت فاتن كانت قاعدة مع غادة وفجأة الباب خبط بقوه..ولما فتحت لقيتهم الشرطة}
فاتن(بصويت) :في اية؟؟
الظابط:معانا أمر من النيابة بإحضار بيري فريد يسري الوالي...مش ده بيت والدها السيد فريد؟
فاتن(بخوف) :اه بيته، بس في اية فهمني؟
غادة(بإستغراب) :في اية يا حضرة الظابط، مطلوب أمر بإحضارها لية؟
الظابط:الأستاذة اتسببت في موت زميلتها علا مجدي محمد...بيري موجودة ولالا؟
فاتن(بصويت) :اية؟؟؟...يعني اية؟؟...يعني بنتي مجرمة ياسعاة الباشا؟؟؟؟
{دخل الظابط جوا ووراه العساكر وهما بيدوروا على بيري في الشقة بحالها!}
غادة:بيري مش موجوده، مينفعش اللي حضرتك بتعمله ده!!
الظابط:أمال بيري فين؟
غادة:معرفش!!
الظابط:انتي مين؟
غادة:انا غادة أختها
الظابط:اتصلي بيها
غادة:مفيش مشكلة
{وطلعت موبايلها تتصل بيها ولكن الخط مقفول}
غادة:الخط مقفول
الظابط:اتصلي تاني وافتحي الاسبيكر!
{اتصلت غادة لتاني مره، وبرضة الخط مقفول}
غادة:اظن المفروض تكون حضرتك كده اتأكدت!
الظابط:تمام
{وخرج من الشقة هو والعساكر، وغادة قفلت الباب، وفاتن بتعيط}
فاتن(بعياط) :ضيعتي نفسك يا بيري، حرام عليكي...لية كده وعشان اية بس...عشان اية!!
=============================
{وعند بيري في مطار دبي بعد ما وصلت، لقيت الشرطة بتوقفها وبتمنعها من الدخول}
_ممنوع الدخول
بيري:يعني اية ممنوع الدخول؟؟
_جاء لنا أمر من الشرطة المصرية بترحيلك إلي بلدك مرة ثانية، ومنعك من دخول الإمارات العربية المتحدة
بيري(بإستغراب) :يعني اية؟؟...وانا عملت اية لكل ده؟
{مسكوها الشرطة ورجعوها الطيارة بالكلبشات، وبيري بتصرخ!}
==============================
{عند حاتم و كمال بعد ساعات لما وصلوا مصر، خدوا علاء ووقفوا في وسط الميناء واتصلوا بالظابط حسني}
حاتم:احنا لقينا علاء وهو دلوقتي معانا، نجيبه ونيجي القسم ولا نعمل اية؟
حسني:بجد لقيت علاء هو كمان؟...لأ ده انا أسقفلك بقى وأقولك شابوه...هاته هيضرنا في اية؟...ماهو كده كده متهم في قضية قتل أشرف العقاد بمساعدة غسان أقصد سيد
حاتم:حالاً ونكون عندك، سلام
{ وحط الموبايل في جيبه..وشد علاء مع كمال وكان علاء بيعافر بكل ما فيه عشان ميروحش!!...وبعد ما حاتم خد علاء ودخله عند الظابط...قام الظابط بكل سعادة وفخر وهو مش مصدق نفسه}
حسني:انا بقول انك ليك مستقبل باهر مع الشرطة يا حاتم
حاتم:شرف ليا
حسني(بيسقف) :شابوه ليك...ازيك يا علاء أخبارك اية؟..بذمتك سيد موحشكش؟...ده انتوا منورين الدنيا في الفيديو وانتوا بتساعدوا بعض في قـ.ـتل أشرف العقاد..بصراحة كان مجهود جبار...وعمالين تداروا وتمسحوا قال يعني عشان لما نوصل منشكش فيكم، بس على مين..قدرة ربنا فوق كل شئ...يشاء القدر اننا نسترجع كل البلاوي من على الميموري...تخيل حتة بتاعة قد كده، تكشفكم؟
{وقرب منه وشد اللزق من على بؤه، فبص علاء لـ حاتم وهو النار طالعه من عينيه!}
علاء(بزعيق) :ياكلب ياابن الكلب...ياابن البواب ياواطي، وديني ماهحلك...ده انا هطلع ******
حاتم(بزعيق) :سيرتي وسيرة ابويا متجيش على لسانك بدل ماأقطعهولك، فاهم ولا أعيد تاني؟؟
حسني(بصوت حاد) :امشوا انتوا يا حاتم، وانا قاعد مع علاء حبيب قلبي، ده انت نورت الدنيا كلها
حاتم:عن اذنك
{خرج حاتم ووراه كمال ومشوا..وقرب الظابط من علاء وهو مبتسم ابتسامة شر}
حسني(بصوت حاد) :انا مش هقولك اعترف، لان الدليل في ايدي...هقولك متخافش عشان هتبقي مع صاحبك هتونسوا بعض، وقريب تتقابلوا في نار جهنم ان شاء الله
علاء(بزعيق) :انتوا جيبتوا الفيديوهات دي منين؟
حسني(بصوت حاد) :هو في حاجة تصعب على الحكومة؟...هو احنا بنلعب؟...ولا قاعدين نأزأز لب؟...ده احنا عنينا في وسط راسنا يالااا
{وخبط على المكتب، فدخل العسكري}
حسني:حطله الكلبشات، وارميه في الحجز!
علاء(بزعيق قوي) :يبقى كان كلام حسن صح بقى وفي حاجة مابينهم، بقى بتبعتيلي اللي يقضي عليا يا بيري لأ وبمساعدة نويري....نويري اللي كان عايز يتجوزك قبل مني...بتستغفلوني ياولاد الكلب...لاااا لااااا انا مش هسكت!!
===============================
{وفي الوقت ده كانت الدنيا ليل، وعند حاتم وكمال طلعوا على السلم وخبطوا على الباب..واللي فتحت زهرة...ولما شافت كمال مصدقتش نفسها}
زهرة:حمدالله على السلامه يا حاتم انت وكمال
حاتم وكمال:الله يسلمك
زهرة(بفرحه) :ادخل يا حاتم، دي مهرة هتفرح بيك أوي!!
{دخل حاتم جوا لقى مهرة قاعدة على السرير وجنبها وجيدة وشايله ريان...كانت مهرة هتقوم من فرحتها برجوع حاتم، ولكن حاتم شاورلها تقعد وقرب منها حضنها، ابتدت دموع مهرة تنزل من اشتياقها له، مكنتش متخيلة انه ممكن يرجع بعد ولادتها بيوم واحد بس، ويكون جنبها هي وابنها}
مهرة(بعياط) :خلاص كده يا حاتم؟...اوعى عشان خاطري تقولي انك مسافر تاني...ده انا ماصدقت انك رجعت...انا مكنتش متخيله انك هترجع المره دي بسرعة!
حاتم(بحب) :وانا مش مسافر تاني يا مهرة خلاص!...اوعدك ان انا هفضل جنبك وجنب ابننا!!
{وباس راسها...وبص جنبه لقى وجيدة شايله ريان، فاابتسم وقرب ايده من ريان وهو الفرحه مالية قلبه}
وجيدة(بسعادة) :حمدالله على السلامه ياحبيبي
حاتم:الله يسلمك
وجيدة:بسم الله
{واديته ريان يشيله...وفي الوقت ده دخل كمال و زهرة وهما الابتسامة على وشهم}
حاتم(بحب ومشاعر عميقه) :يااااااه يا ريان!
وجيدة(بفرحه) :تعالى يا كمال، شوف ريان، وقولنا شبه مين بس بذمتك!
{قرب كمال وبص على ريان وابتسم}
كمال(بيضحك) :شبه حاتم!
وجيدة(بتضحك) :كلنا قولنا كده
حاتم(بفرحه شديدة) :حاجة غريبة مش عارف أوصفها!
زهرة:الف مبروك ياابو ريان، يتربى في عزكم يارب، ويكبر وتشوفوه أحلى عريس في الدنيا بحالها!
حاتم(بفرحه) :الله يبارك فيكي
{قرب حاتم، وخد مهرة وريان في حضنه، كانت مهرة مبسوطة جداً وفي قمة سعادتها، وفجأة وبدون أي مقدمات}
وجيدة:لولولولولولوي...اعمل حسابك يا حاتم، لازم نعمل أحلى سبوع لـ ريان، ده أول حفيد ليا وأول فرحتي!
حاتم(بفرحه) :بس كده، أحلى سبوع لأحلى ريان...ده انا هعمله سبوع الدنيا كلها تحلف بيه
{وتعالت زغاريد وجيدة و زهرة في أركان البيت}
==============================
{تاني يوم عند نويري في الجبل...كان بيكلم حاتم في الموبايل}
نويري:طب تمام حلو أوي...آخر حاجة بقى يا حاتم، واظن ان دي اسهل من كل اللي فات..المفتاح اللي انا اديتهولك ده...عايزك تروح مكتب علاء القديم...وتقلبهولي على مفتاح لونة أخضر، بص هو شكله غريب كده وهيبان من منظره..وأول ما تلاقيه كلمني وهقولك تعمل اية!
حاتم:ماشي، ابعتلي عنوان مكتبه وهروح
نويري:تمام، دقيقة ويكون عندك
حاتم:تمام
{وبعد ما حاتم قفل مع نويري، اتبعتتله مسدج بالعنوان، فا بعت مسدج لـ نويري "تمام"...وحط موبايله...لقى وجيدة خارجة من المطبخ بـ كوبايات الشاي باللبن، لحد ما حطتها على الترابيزه وقعدت}
وجيدة:سكرك قد اية يا حاتم؟
حاتم:٣ معالق
وجيدة:احلى ٣ معالق
{خرجت زهرة من الأوضة وهي ساندة مهرة...لحد ما قعدت على الكنبة}
حاتم:عاملة ايه دلوقتي يا مهرة؟
مهرة(بتعب) :الحمدلله أحسن شوية
وجيدة:انتي بقى يا مهرة..انا عاملالك مُغات، عشان يسمنك كده ويعوض النقص اللي عندك
مهرة:ياه ياماما ده انتي من ساعة ما ولدت وانتي بتشربيهولي!
وجيدة:ماهو لازم تتغذي كويس ياحبيبتي، عشانك وعشان ريان يعرف يرضع...وهسلقلك فرخة بس وحياتك عندي لا تاكليها كلها ومتغلبينيش زي امبارح!
مهرة:حرام عليكي، وانا برضة هقدر آكل فرخة كاملة لواحدي؟
زهرة(بتضحك) :بصراحة ياطنط انتي مش راحماها من ساعة ما ولدت، ده انتي كل ساعة داخلة بكوباية مغات، وفطار وغدا وعشا مصممة تأكليها فراخ و لسان عصفور!
وجيدة(بتضحك) :بكرا تتجوزي انتي كمان، وتخلفي ونعمل معاكي زي ما بنعمل مع مهرة!
حاتم:صحيح بمناسبة الجواز..في عريس جاي لـ زهرة، هو انا معرفوش من زمان، بس حاسس انه كويس
{اتقلبت ملامح زهرة لما حاتم جاب سيرة العريس}
وجيدة:طب على بركة الله...يطلع مين ده يا حاتم؟
حاتم:كمال عايز يتجوز زهرة
وجيدة:انا حسيت كده رغم انه متكلمش، بس مادام هو كويس ايه يمنع؟
زهرة(بإحراج) :انا مستنية غسان يتعدم عشان أقدر آخد خطوة
وجيدة:متعطليش فرحتك يا عالم اية يحصل بكرا!
زهرة:مش هكون مرتاحة والله ياطنط...الأحسن لما غسان يتحكم عليه!
وجيدة:خلاص زي ماتحبي
{قام حاتم وحط الموبايل في جيبه}
مهرة(بتعب) :رايح فين؟
حاتم:هروح مشوار، وهبقي أجيبلك علاجك وانا راجع
مهرة:خلي بالك من نفسك يا حاتم
حاتم:حاضر
{مشي حاتم، وراح العنوان اللي نويري بعتهوله}
===============================
{عند كمال رجع بيته، قامت والدته وهي مش مصدقة}
نورا:كمال؟
{قرب كمال من والدته وحضنها وهو بيعيط}
نورا:كنت فين كل ده يا كمال؟
كمال(بحزن) :سامحيني يا ماما...انا أسف...عارف ان انا بعدت عنكم كتير..بس يمكن بسبب المشاكل اللي كانت دايماً مابينا، انا عمري ما كنت مرتاح وسطكم، كنت بلاقي نفسي في الغربة أكتر...بس انا خلاص مابقتش قادر أبعد أكتر من كده...انا لو كنت اتسابت كنت هغرق وهيبقى مصيري من مصير غسان
نورا(بدموع) :قولنالك بلاش غسان ده خالص...غسان ده مش شبهنا وياما عملنا مشاكل عشان تنهي علاقتك بيه وبرضة مكنتش بتسمع كلامنا!
كمال(بدموع) :انا اسف على أي حاجة عملتها زعلتكم...خلاص مبقاش في غسان تاني...وكمال رجع لأصله وبطل يصاحب ناس مش شبهه!
{خرج والده من الأوضة فااستغرب وجوده}
احمد(بصوت حاد) :انت اية اللي جابك هنا؟...ازاي تجرأ وتيجي لحد هنا بعد اللي عملته معانا آخر مرة؟؟
كمال(بدموع) :انا اسف...والله اسف، وحقكم عليا...انا حسيت بغلطي وجاي عـ.....
احمد(بيقاطعه بزعيق) :بعد اية؟؟؟...بعد ما قهرت أمك وخليتها صاحية نايمة ماسكة صورتك وبتعيط زي المجانين؟...اطلع برا مش عايز أشوفك تاني...يلاااا
{ولسة كمال هيطلع، شدته نورا ناحيتها}
نورا:لاااا كمال مش هيخرج...انا ماصدقت انه رجع لحضني!!!...حرام عليك يااحمد...ده ابنك سامحه!!
احمد(بعصبية) :اسامحه بعد كل ده؟؟...انتي اكيد اتجننتي يا نورا...لعلمك لو ابنك ممشاش من هنا، انا اللي همشي ومش هتشوفي وشي تاني!!
{قرب كمال من أحمد وحضنه وهو بيعيط}
كمال:عشان خاطري، نفتح صفحة جديدة مع بعض وننسى كل اللي فات
احمد:كل اللي فات ده انت اللي هديته بإيدك!!
كمال:ومستعد أصلحه بس تسامحني!...ده ربنا بيسامح، يبقى انت مش هتسامحني؟...عشان خاطري اديني فرصة تانية...ده انا مليش غيركم!!!...عشان خاطري!!
{ابتدا احمد يضعف من كلام ابنه، وحضنه...فا قربت منهم نورا وحضنت كمال، وقرروا يفتحوا صفحة جديدة}
===============================
{عند حاتم بعد ما وصل مكتب علاء القديم وفتحه ودخل، كان بيدور في كل حتة على المفتاح الأخضر، لحد ما لقاه بعد وقت طويل..فطلع موبايله واتصل بـ نويري}
حاتم:انا لقيت المفتاح، اعمل اية تاني؟
نويري:هتاخده وهتروح على العنوان اللي هبعتهولك
حاتم:تمام
{وبعد ما نويري بعت العنوان لـ حاتم...راح حاتم ودخل بيت وفتحه، ودور على الخزنة، وبعد ما لقاها وفتحها طلع منها مجوهرات!!..فااتصل بيه تاني}
حاتم:انا لقيت مجوهرات
نويري:واحدة حمرا وواحدة خضراء واتنين لونهم أبيض؟
حاتم:أه هما
نويري:هبعتلك حد بكرا في الميناء، تسلمه المجوهرات وتستلم الفلوس
حاتم:فلوس اية؟
نويري:حقك، مانت برضة تعبت معايا في المهمة دي، واحد غيرك كان قال وانا مالي بكل ده...متنساش ان انا من غيرك مكنتش هعرف أرجع مصر وأسلمه للحكومة بنفسي!
حاتم:الناس لبعضها ياأستاذ نويري
نويري:تسلم ياحاتم، انت جدع وعشان كده تستاهل اللي هديهولك!
حاتم:ماشي وانا في إنتظار اللي هيجي ياخد مني المجوهرات
نويري:مع السلامة
حاتم:سلام
{قفل حاتم الخزنة، ورجع كل حاجة مكانها..وخد المجوهرات ورجع البيت}
==============================
{عند غسان في السجن، جاتله تشنجات تاني، وفضل يصرخ من التعب...اتلم حواليه المساجين، وشالوه على السرير..وواحد منهم جرى وخبط على باب الزنزانة}
_معانا واحد تعبان...افتحوا...في واحد تعبان هنا!!
{دخل العسكري وخده لمكتب الظابط، وحولوه لـ مستشفى السجن}
الدكتور:بيشتكي من اية؟
=جاتله تشنجات وكان بيصرخ..محدش فينا عارف ماله!
{ووقتها الدكتور قرب ياخد عينة دم منه، عشان يعرفوا سبب تعبه}
العسكري:النتيجة هتطلع امتى؟
_ساعة بالكتير
==============================
{عند وجيدة خرجت من المطبخ بطبق الشوربة والفرخة المسلوقة...وراحت عند مهرة في السرير...كانت مهرة قاعدة، وريان نايم جنب منها}
وجيدة:ايه ده...ده نام!
مهرة(بإبتسامه) :اه نام
وجيدة(بتقعد) :يلا يا مهرة...مين هياخد ورك الفرخة ده؟
مهرة:انتي معملتيش حساب زهرة؟
وجيدة:وانا معقول يعني هأكل زهرة أكل مسلوق...انا عاملة أكلنا انا وزهرة وحاتم على جنب...لكن انتي ياحبيبتي لازم تاكلي مسلوق وتشربي سوايل
{وابتدت تأكل مهرة في بؤها}
مهرة:بس انا مليش نفس
وجيدة:معلش تعالي على نفسك وكلي، ولا احنا هنقضيها لبن صناعي لريان كل يوم؟
{رجع حاتم من برا بـ كيس العلاج، ودخل الأوضة}
حاتم:عاملين اية؟
وجيدة:يا أهلاً يا أهلاً، نورت الدنيا كلها
{حط حاتم كيس العلاج على الترابيزه، وقرب من مهرة باس راسها، وراح عند ريان باسه}
وجيدة:ربنا ما يحرمهم من دخلتك عليهم يارب، ويديمها عليهم نعمة
مهرة:يارب ياماما
حاتم:انا جيبتلك العلاج..كل علبة مكتوب عليها هتاخدي منها امتى..وفي علاج منهم هتاخديه دلوقتي
وجيدة:مكتبلهاش على حقن؟
حاتم:لا هو سألني عندها جرح وخياطه وكلام من ده قولتله لا..فكتب على دول
وجيدة:الحمدلله،انا هقوم أحط الأكل
حاتم:ماشي
{دخلت وجيدة المطبخ تحط الأكل في الاطباق، وحاتم قعد مكانها..وطلع المجوهرات من شنطة صغيره جوا كيس الأدوية}
مهرة(بإستغراب) :اية ده يا حاتم؟؟
حاتم:دي المجوهرات بتاعت نويري
مهرة:واية اللي جابها عندنا؟؟
حاتم:هياخدهم مني بكرا
مهرة(بخوف) :اوعى تكون هتسافر تاني!
حاتم:مهرة!!...صدقيني خلاص مفيش سفر تاني...ولو في هيكون معاكي انتي و ريان، احنا مش هنبعد عن بعض تاني!
مهرة:وعد؟
حاتم:وعد!
==============================
{عند كمال في الأوضة بعد ما اتوضى، كان في آخر ركعة، وبعد ما قام...حط السجادة على السرير و خرج...كانت نورا وأحمد قاعدين في الصالون}
احمد:شكلك كنت بتصلي!
نورا(بإبتسامة) :القفطان الأبيض هياكل منك حته!
كمال(بيقعد) :انا بصراحة فكرت بيني وبين نفسي...قولت لازم أراجع حساباتي وأقرب من ربنا، وأنسى كل العك اللي فات من حياتي ده!
احمد:وده أحسن قرار انت خدته، ياريت تفضل ثابت في قرارك!
كمال:ربنا يثبتني ويهديني
نورا:يارب ياحبيبي يارب
كمال:انا كنت عايز أكلمكم في موضوع، واتمنى انكم تفهموني صح
احمد:موضوع اية؟
كمال:في واحدة بنت حلال...هي محترمة وطيبة وجدعة وتستاهل كل خير والله...وشافت كتير من الدنيا...انا حابب اني اتقدملها بس مستني أشوف رأيكم الأول
احمد:ودي انت عرفتها منين؟
كمال:بصوا بما اني فتحت صفحة جديدة وقررت أقرب من ربنا...فاانا مش هكدب...اللي انا عايز أخطبها دي تبقي زهرة اللي كلنا كنا فاكرين انها أخت غسان
نورا(بزعيق) :غسان المجرم؟؟
كمال:لالا استني بس ياماما...انتي مش فاهمة حاجة!...غسان مطلعش أخوها...غسان طلع مزور أوراق ومنتحل شخصية أخوها اللي هو في أساس قـ.ـتله
احمد:يعني غسان ده اسمه اية ولا اية نصيبته؟؟
كمال:اسمه الحقيقي سيد..ومتقلقوش هو اتقبض عليه وهيتحكم عليه بالاعدام...و زهرة دي ولا أخته ولا أي حاجة زي ما كلنا كنا فاكرين..وخدوا المصيبة الأكبر...قتـ.ـل أخوها وأبوها وأمها، حتي مرات أبوها دخلها مستشفى المجانين..دمرلها حياتها بأكملها
احمد:اية الشر والأذية دي كلها؟...هو لية عمل كل ده؟
كمال:عمل كل ده عشان يورث..واهو بعد ده كله ولا هيورث ولا هيتهبب وهيلبس في الحيط بسبب شره وأذيته..وكل ده هيرجع لـ زهرة في الآخر!
نورا:واشمعنا دي بالذات اللي انت عايز تتجوزها؟
كمال:عشان لقيتها شبهي..طيبة وبنت حلال زي ما قولتلكم..وغلبانة..غلب الدنيا كله اتجمع واتحط في قلبها..انا متأكد انكم هتحبوها زي مانا حبيتها!
نورا:شوقتني أشوفها يا كمال
كمال:والله لا تدخل قلبكم من أول مره،زهرة دي اسم على مسمى...كأنها زهرة فعلاً ونازلة من الجنة!
احمد(بتنهيده) :ماشي يا كمال، ابقى خد ميعاد مع أقرب حد ليها و ربنا يسهل
كمال(بفرحه) :يعني انت موافق؟
احمد:كلامك ده يخلي أي حد يوافق
{ضحك كمال وقام حضن والده ووالدته}
كمال:ربنا ميحرمنيش منكم ابداً
=============================
{عند حاتم ووجيدة ومهرة وزهرة...كانوا قاعدين في الصالة قصاد الأكل..ومهرة قاعدة على الكنبة بـ ريان..رن موبايل زهرة فدخلت تتكلم جوا}
حاتم:انا ان شاء الله المفروض يعني يبقى معايا ٢ مليون وشوية كسور...عايز أفتح بيهم مشروع
مهرة:مشروع اية ده؟
حاتم:مصنع للصناعات الخشبية والأثاث
وجيدة:وده انت هتعمله ازاي؟
حاتم:سهله اللي يسأل ميتوهش..واهو المصنع يكبر ويجيب دخل كويس..انا لو عيشت على المبلغ اللي معايا هرجع لنقطة الصفر من تاني
وجيدة:صحيح خد من التل يختل
حاتم:بالظبط..ولو جاب أرباح كويسة، أفتح مشروع تاني..ولو نجح.. أفتح مشروع تالت...لحد ما يبقى عندي مصانع في كل حتة
وجيدة:روح ربنا يفتحها في طريقك وييسرلك امرك
حاتم:يارب
{وفجأة الباب خبط، قام حاتم يفتح لقاه متولي..ولما متولي شافه حضنه بإشتياق}
متولي:كده يا حاتم ترجع ومتقوليش؟؟
وجيدة:تعالى ياعم متولي، ده انت حماتك بتحبك
{دخل متولي وقعد على الكنبة}
متولي:تسلميلي ياست وجيدة
وجيدة:والله لا تيجي تاكل، ده انا عاملة أكل بزيادة
متولي:واكل والله
وجيدة:كل تاني ده انا حلفت!
{ودخلت المطبخ تجيب اطباق زيادة، وحاتم قعد}
حاتم:كنت هكلمك بس كنت مسحول في كام حوار من ساعة ما رجعت
متولي:ايوه اضحك عليا بالكلمتين دول، كل ماتتزنق متلاقيش غيرهم تقولهملي
حاتم:طب قوليله انتي يا مهرة عشان هو مبيصدقنيش
مهرة:حاتم مش بيكدب والله ياعم متولي...هو فعلاً من ساعة ما رجع وكل شوية رايح مشوار شكل
متولي:وانت يعني مكنتش تعدي على أبوك تشوفه ٥ دقايق؟
حاتم:وانا ينفع أقعد معاك ٥ دقايق بس؟...بقى ده اسمه كلام؟..ده احنا عايزين لنا قاعدة طويله نحكي ونتحاكى فيها
مهرة(بإبتسامه) :معلش هاتها فيا انا المره دي!
متولي:عشان خاطرك انتي يا مهرة
مهرة:حبيبي يا عم متولي
==============================
{عند غسان بعد ما نتيجة التحليل طلعت والدكتور خرج من الأوضة وملامحه متغيره}
العسكري:اية يادكتور عنده اية؟
الدكتور:عنده كانسر من الدرجة الرابع
الفصل الثلاثون30 الاخير
{وبعد ما غسان وصله الخبر في الأوضة، كان في حالة صدمة..كان عايز يقوم من مكانه، لحد ما الدكاتره كتفوه، والعسكري قرب وكلبشه في السرير!}
غسان(بصويت) :يعني اية؟؟...وازاي محستش بحاجة زي دي؟؟...انا كويس ومعنديش حاجة...انتوا كدابين، بتعملوا كل ده عشان تموتوني بالحياه..عشان أعيش متعذب!!...لكن انا...انا كويس!
الدكتور:كان في أمل اننا نلحقك لو كنت في مرحلة بدري عن كده، لكن للأسف انت وصلت لأصعب مرحلة
{وسابه وخرج ووراه العسكري، وفجأة دموع غسان نزلت، كان بيبص حواليه في كل ناحية، حاسس انه بيحلم وشوية والحلم هينتهي..لكن احساسه كان غلط ودي الحقيقة اللي كان لازم يصدقها!}
==============================
{تاني يوم في الميناء، راح حاتم يسلم المجوهرات لواحد تبع نويري}
حاتم:كله تمام؟
_اه تمام، كدة مظبوط
{وادا شنطة صغيرة لـ حاتم}
_نويري بيسلم عليك
حاتم:الله يسلمه
_يلا سلام
حاتم:سلام
{وحاتم خد الشنطة و رجع بيها البيت، وبالتحديد في الأوضة كان حاتم حاطط الشنطة على السرير وفاتحها بيعد الفلوس...ومهرة جنبه مش مصدقة}
مهرة(مصدومة) :يانهار اسود دي فلوس بجد!!...دي فلوس بحق وحقيقي!!
حاتم(بيضحك) :اه فلوس بجد...عرفتي يا مهرة ان سفري ده كان عشان مصلحتنا؟...لو مكنتش سافرت مكنتش خدت المبلغ ده كله..لأ ولسة اللي ظابط وعدني بيه
مهرة(بفرحه) :اوعي تكون عملت حاجة غلط،أوعي ياحاتم!!
حاتم:وانا برضة ليا في المشي الشمال يامهرة؟...انا لا قـ.ـتلت ولا سرقت ولا عملت حاجة إلا اني نفذت المهمة اللي نويري طلبها مني، أرجع علاء مصر وأسلمه للحكومة
مهرة:طب وهو لية مسلموش بنفسه، هو يعني مستني انك تيجي عشان تسلمه؟
حاتم:نويري مينفعش يرجع مصر، لا هو ولا اللي معاه، آخرهم الميناء يسلموا ويستلموا...انما انه ياخد علاء ويروح بيه لحد الحكومة فا دي مستحيلة فا كان لازم يستعين بيا، والحمدلله ان انا طلعت قدها وقدود
مهرة(بفرحه) :ده رزق ريان والله، فعلاً زي ما ماما قالت...العيل بيجي بـ رزقه!
حاتم(بإبتسامه) :ريان ده وش الخير عليا وعليكي يا مهرة...وبكرا الخير يزيد كمان وكمان، لحد ما أعوضكم عن كل اللي ناقصكم
مهرة(بفرحه) :اللهم لك الحمد والشكر
=============================
{عند بيري بعد ما رجعت مصر و ودوها سجن النسا، دخلت وهي خايفة...كان في ستات كتير زيها، منهم اللي شكلها مظلومة، ومنهم اللي شكلها قادرة ومفترية، كانت الستات جوا أشكال وألوان، لحد ما قعدت على السرير ودموعها بتنزل}
بيري(بعياط) :بقى بعد ده كله، تكون دي آخرتي؟...اترمي هنا وسط الأشكال دي؟....لية كده يا ماما، أكيد انتي اللي بلغتي عني زي ما قولتيلي!
======فلاش باك=====
فاتن(بزعيق) :عشان طماعة وكلبة فلوس..مبتحمديش ربنا على اللي في ايدك وبتبصي على اللي في ايد غيرك...عارفة لو بيعتي أملاكك وسافرتي برا انا هعمل اية؟.. هكون أول واحدة شاهدة عليكي في اللي عملتيه في صاحبتك
بيري(بصويت) :هي وصلت لـ كده؟؟
=================
بيري(بعياط) :انتي لا يمكن تكوني أمي!!...انتي عدوتي!...استخسرتي فيا الفرحة وجيتي عليا...كنتي شايفاني بسعى وبحاول أنجح في حياتي، وانتي من تاني ناحية بتهبطيني وبتدوسي عليا...كنتي بتتهميني ان انا أنانية وكلبة فلوس، كل ده عشان مش عايزة حد يبقى أحسن مني!...خلاص!...ماهي كده كده خربت، هتخرب اية أكتر من كده؟...لو انتي مش مسامحاني قيراط، انا مش مسامحاكي ٢٤..واوعدك ان انا لو خرجت، هاخد حقي منك انتي أول واحدة!
{جات واحدة مع بيري في السجن ووقفت قصادها}
_نتعرف؟
بيري(بصويت) :مش عايزة اتعرف على حد، ولا عايزة حد يعرفني...سيبوني في حالي بقى...حرام كفاية!!!
{لحد ما الست خافت ومشيت، وبيري كملت عياط}
=============================
{عند نويري بعد ما المجوهرات رجعتله في حضنه، وقف قصادهم وهو سعيد سعادة عمره ما حسها في حياته}
نويري(بإبتسامه) :أخيراً؟....ده انا اتبهدلت أوي عشان ألاقيكم...بس مش مهم!...المهم ان تعبي مراحش على الأرض و جه بنتيجة!
{وخدهم يبيعهم، وكسبله فيهم ٢ مليار بالمصري!!..وبعد ما باعهم للراجل، قام وحضنه}
_مبروك يا نويري، تستاهل كل خير
نويري:الله يبارك فيك ياحبيبي
=============================
{وبعد كام يوم لما مهرة قامت من تعبها وخفيت ورجعت تتحرك تاني، قرر حاتم انه ياخد مهرة و ريان ويروحوا لـ هويدا، ولكن مهرة كانت خايفة انها تطردهم!}
مهرة:عشان خاطري يا حاتم تعالى نرجع، انا عارفة اللي هي هتعمله كويس أوي!
حاتم:متخافيش، انتي ملكيش دعوة بأي حاجة..انا اللي هتكلم، ولو ياستي قالت حاجة مش على مزاجك اعذريها وهاتيها فيا لحد ما ترضى عننا!
مهرة(بخوف) :افتكر ان انا قولتلك لا
حاتم:متخافيش أوي كده، ما احنا لازم نروحلها يعني لازم سواء كان دلوقتي ولا بعدين!
{مردتش مهرة، وكانت من جواها خايفة هويدا تطردهم أو تتكلم معاهم بإسلوب وحش...وبعد ما وصلوا}
حاتم:على جنب ياسطا
{ونزل حاتم بريان، ومهرة نزلت وراهم...لحد ما راحوا بيت هويدا..خبط حاتم على الباب..وكانت مهرة واقفة وراه، لحد ما هويدا فتحت، ولما شافت حاتم قصادها شايل ريان ووراه مهرة، نزلت دموعها وفضلت تصوت}
هويدا(بصويت) :اية اللي چابكم هنا؟...چايين تحرجولي دمي أكتر ماهو محروج؟؟
{قرب حاتم من هويدا عشان يبوس راسها ولكنها كانت بتبعده عنها وبتصرخ أكتر}
هويدا(بصويت) :لاااا...لاااا..مش هسامحك...أمك ماتت... ماتت خلاص يا حاتم
حاتم:بعد الشر عليكي!!...اوعي تقولي على نفسك كده تاني!!...ده انتي الخير والبركة..وأحلى حاجة في حياتنا يا أمي!
{وقرب يبوس راسها ولكنها بعدت وصوتت لتاني مرة}
هويدا(بصويت) :چاي بمراتك وابنك عشان تحرجلي دمي، يامرارك ياهويدا...اااه يا جلبي، وچعت جلبي، امشي انت ومهرة من هنا جبل ماانا اللي آمشي وأسيب الدار بالكل
حاتم:عشان خاطري!...انا عايزك تسمعيني بس!
هويدا(بصويت) :لاااا امشي من هنا، مش عايزة أشوف وشك تاني يا جليل الرباية...بتكسر كلمة أمك يا حاتم؟..بتخلي الخلج ياكلوا وشي؟؟
{جات نسمة وعبدالله من برا ودخلوا}
نسمة:امانة عليكي تسامحيهم يا ماما...عشان خاطر ريان طيب!
{بصيت هويدا لـ ريان وهي بتعيط}
هويدا(بعياط) :وذنبه اية الغلبان دهو يچي للدنيا، وستو مش موافجه على چوازة أبوه وأمه؟
نسمة:ده قدر ومكتوب ياماما...مكتوب ان حاتم ومهرة يتجوزوا، ومكتوب برضة انهم يخلفوا ريان...ولا كلامك ولا كلام مليون واحد كان هيغير اللي ربنا كاتبه!
{قرب حاتم وباس راس هويدا وهي بتعيط..وضحى دخلت هي كمان}
حاتم:عشان خاطري سامحيني، ده انا ابنك الوحيد، ولا انا ليا غيرك، ولا انتي ليكي غيري!
هويدا(بعياط) :لااا...آني ليا اتنين غيرك، على الأجل مراحوش يتچوزوا من ورايا!
حاتم(بيبوس دماغها) :كل اللي حصل ده عشان انتي كنتي مصممة على رأيك...وانا بصراحة مكنتش هلاقي أحسن من مهرة...مهرة اللي انتي مش موافقة عليها دي مفيش أطيب ولا أحن منها، وبنت جدعة بميت راجل...وضيفي على كل ده انها بتحبك!
هويدا(بعياط) :وهي لو كانت بتحبني، كانت هتتچوز ابني بدون علمي؟؟
{قربت مهرة منها وباست ايديها}
مهرة:والله العظيم بحبك زي أمي بالظبط...ولعلمك انا مكنتش مرتاحة من مخاصمتك لـ حاتم...كان نفسي انكم تتصالحوا وكل حاجة تبقى زي الأول وأحسن!
هويدا(بعياط) :لا انا جلبي غضبان على حاتم، ومش هسامحه مهما يحصل
{راح حاتم مدي ريان لـ مهرة، ووطي على الأرض يبوس رجل هويدا}
حاتم:سامحيني يا أمي..سامحيني علشان خاطري، متكسريش بخاطرنا...ده احنا جايين وكلنا عشم في قلبك الأبيض انه يسامحنا
{شدت هويدا ابنها وقومته وهي بتعيط}
هويدا:جلبي الطيب ده انتوا دوستوا عليه!
عبدالله:لا اله الا الله...ده حاتم ومهرة جم لحد عندك وطالبين منك السماح تقومي تكسفيهم؟
ضحى:سامحيهم ياماما، وعفا الله عما سلف
نسمة:متكسريش بخاطرهم...وسامحيهم خلينا نفرح كلنا!!
مهرة:طب والله يا طنط هويدا...حاتم مرضاش يعمل سبوع ريان إلا لما انتي تسامحيه الأول وترضي عنه!
نسمة:شوفتي بقى اهو معطلين كل حاجة عشان تسامحيهم...وبعد ده كله برضة مش موافقة؟
حاتم:حقك على راسي يا أمي!
{حضنته هويدا وعيطت، وكلهم ابتسموا لبعض، وبعدين مهرة قربت ريان واديته لـ هويدا تشيله...كانت هويدا بتبصله بكل حب}
هويدا(بدموع) :مصدجتهمش لما جالوا انه شبهك وانت صغير، عارف يا حاتم...آني حاسة إني رچعت بالزمن يجي ٢٦ سنة...حاسة ان ده انت وانت صغير، ياسبحانك يارب
حاتم:وعشان انتي سامحتينا، احنا ناوينا نعمل السبوع عندك هنا!!
هويدا:لا يا حاتم...الدار هنا مش جد المجام!
حاتم:ده قد المقام ونص، وانا قررت اعمل السبوع هنا يعني هعمله هنا، خلاص مفيش نقاش!
{ضحكت هويدا، ونسمة وضحى زغردوا}
=============================
{عند كمال و زهرة، بعد ما باعوا الفيلا، وراحوا البنك بشنطتين فلوس صغيرين}
زهرة:لو سمحت عايزين نفتح حساب بنكي بـ ٢ مليون
_اتفضلي املي بياناتك هنا
{مسكت زهرة القلم وابتدت تملى بياناتها، وبعد ما خلصت سلمتها للموظف}
_البطاقة لو سمحتي
زهرة:اه حاضر
{وخرجت البطاقة واديتهاله}
كمال:هياخد وقت قد اية؟
_ربع ساعة، اتفضلوا ارتاحوا هنا
{واداهم ورقة وقعدوا يستنوا دورهم}
كمال:هو انتي مش ورثتي ٤ مليون؟
زهرة:لا انا ورثت اتنين، والاتنين التانيين هيروحوا لـ طنط ليلى
كمال:بس هي يعني مجنونة ومش واعية للكلام ده ولا حتى هتقدر تتصرف زينا!
زهرة:هفتحلها حساب بنكي...وبعد عمر طويل ان شاء الله، ميراث والدي، هيروح لـ أقرب ناس من عيلتها، وهما حريين يتصرفوا فيه براحتهم..انا مش هاخد جنية زيادة وهو مش من حقي!
كمال(بإبتسامه) :أكتر حاجة بتعجبني فيكي، حبك للعدل والأمانة!...انتي كل يوم بتكبري في نظري زيادة يا زهرة وبحس ان انا فعلاً اختارت صح!
زهرة(بإبتسامه) :ده عدل ربنا يا كمال، وانا لو عملت غير كده أبقي انسانة مش كويسة
كمال:ده انتي أحلي وأجدع واحدة في الدنيا كلها، واعملي حسابك...اسبوع بالكتير وهكون عندك انا وأهلي، بجد هتحبيهم أوي وهتحسي انهم عيلتك التانية!
زهرة:على خير ان شاء الله
كمال:ان شاء الله
{وبص لـ زهرة بـ ابتسامة حب}
==============================
{يوم سبوع ريان، وزي ما حاتم قرر انه يعمله في بيت هويدا، بالفعل زينوا البيت من جوا بـ بلالين و ورد، وكانوا عاملين شادر قصاد البيت وحاطين كراسي واضاءة، دخل حاتم بـ وجيدة عند هويدا وبناتها في المطبخ، ولما هويدا شافتها مكنتش عارفة هتتعامل معاها ازاي، ولكن وجيدة قربت منها وحضنتها}
وجيدة:مبروك يا هويدا، تعيشي وتشوفي ريان زينة العِرسان
هويدا:الله يبارك فيكي يا وچيدة، نعيش آني وانتي ونشوفه زينة الشباب يارب
وجيدة:اللهم أمين
نسمة:ازيك ياطنط وجيدة؟
{ وحضنتها}
وجيدة:الحمدلله بخير، ازيك انتي يا نسمة؟
نسمة:الحمدلله بألف خير
ضحى(بتحضنها) :نورتي الدنيا كلها يا ست وجيدة
وجيدة:الله يخليكي يا ضحى، منورة بيكي وبـ الحاجة هويدا وبـ نسمة وبيكوا كلكم
{خرج حاتم وطلع برا عند متولي وقرايبه، وقعد جنبه على الكرسي }
متولي:أمال العريس الصغير فين؟
حاتم:مع مهرة في الأوضة، شوية ويطلعوا...بس اما اية الشياكة والأناقة دي يا حاج؟
متولي(بيضحك) :الجلابية الجديدة، ذوقي
حاتم(بيضحك) :يسلم ذوقك، ده انا بفكر بعد كده آخدك معايا تنقيلي كل لبسي
متولي(بيضحك) :مش للدرجادي يعني
حاتم:لا للدرجادي ونص
{جه توكتوك ونزل منه كمال وزهرة، وبعد ما كمال حاسب، قرب من حاتم وحضنه}
كمال:الف مبروك ياأبو ريان، ربنا يباركلك فيه وتشوفه أحسن الناس
حاتم:الله يبارك فيك، ويلا شد حيلك انت وزهرة عايزين نفرح بيكم انتوا كمان!
كمال:أن شاء الله قريب أوي
زهرة:مبروك يا حاتم
حاتم:الله يبارك فيكي
زهرة:أمال مهرة فين؟
حاتم:في تاني أوضة، ادخلي هتلاقيها جوا
زهرة:ماشي
{دخلت زهرة وخبطت على الباب، جات مهرة وفتحتلها وهي لابسة فستان شكله جميل، وملبسه ريان بدلة نفس لون فستانها، حضنتها زهرة وهي بتزغرد والفرحة مش سايعاها}
زهرة:لو لولولولولوي،اية ده...ده عريسنا القمر صاحي!
مهرة(بتضحك) :ايوة ماهو مينفعش ينام في يوم زي ده...ده الليلة ليلته!
{قربت زهرة من ريان وباسته}
زهرة:بصي بقى يا مهرة
مهرة:خير؟
زهرة:انا هحجز ريان لـ بنتي ان شاء الله، ويبقى زيتنا في دقيقنا، ها قولتي اية؟
مهرة(بتضحك) :مفيش أي مشكلة، واحنا هنجيبلها شبكة من ١٠٠ ألف لـ ١٠ مليون، عنينا ليكم
زهرة(بتضحك) :حبيبتي يا مهرة
{وحضنتها...وفي المطبخ كانت وجيدة بتساعد هويدا وبناتها، وبيحطوا اللحمة في الاطباق...وبعد ما خلصوا، دخل حاتم وكمال وخدوا كل الأطباق وبدأوا يوزعوها على الموجودين، وبعد ما انتهوا من التوزيع، جات فقرة السبوع...كانت وجيدة حاطة ريان في غربال السبوع، ومهرة بتعدي فوق منه، وهويدا ماسكة ايد الهون بتدقه}
هويدا:الأوله بسم الله، والتانيه باسم الله، والتالته باسم الله، والرابعه بسم الله، والخامسة باسم الله، والسادسة باسم الله، والسابعة يا بركة محمد بن عبد الله
وجيدة:لولولولولوي
{وبعد ما عدت مهرة كل الخطوات السابعة}
هويدا:اسمع كلام أبوك...اياك تسمع كلام أمك!
{راحت وجيدة خدت منها الهون، وابتدت تدق الهون مكانها وهي بتضحك}
وجيدة:لااا اسمع كلام أمك، اياك تسمع كلام أبوك، اديني بقولك اهو!!
{شدت هويدا الهون من ايد وجيدة}
هويدا:اسمع كلام أبوك وستك أم أبوك، اياك تسمع كلام ستك أم أمك!!
{ضحكوا كلهم، وجات نسمة بـ صينية كبيرة عليها حلويات السبوع، ووزعتها على الأطفال...وبرا كان حاتم بيوزع شربات على المعازيم في وجود أغاني السبوع...لحد ما قريب متولي جه وسلم عليه}
_الف الف مبروك لـ حاتم، ياعم متولي...ربنا يباركله في ابنه ويجعله ذرية صالحة ان شاء الله
متولي:الله يبارك فيك ياحاج، نردهالك في الأفراح بإذن الله
{وبعد ما حاتم خلص توزيع الشربات، دخل جوا يجيب ريان، وبعد ما خده وخرج، خرجوا كلهم وراه وقعدوا على الكراسي...وكانت مهرة واقفة جنب حاتم وهو شايل ريان في الغربال وبيتصوروا...والحقيقة انه كان يوم حلو جداً وكلهم استمتعوا بيه}
===============================
{عند غسان بعد ما حلق شعره، في أول يوم من رحلة علاجه، كان بيتألم تألم شديد...وفجأة مبقاش في حد جنبه، لقى نفسه وحيد والكل سابه...حتى اللي كانوا معاه مشوا..ووقت علاج الكيماوي، مكنش حاسس بألم...من كتر ما الألم النفسي اللي جواه كان أكبر وأشد...كان بيفكر حتى انه لو اتعالج، ما كدة كدة هيتعدم، وفي الحالتين ميت..لحد ما رفض العلاج تماماً وقام..شده الدكتور ولكن غسان رفض، وبعد ما الدكتور والممرضين كتفوه، كان بيصرخ ومش عايز حد يلمسه!}
غسان(بصويت) :ابعدوا عني...سيبووني!!!!...مش عايز حد يعالجني، مش عايز أتعالج!!!!
===============================
{عند نويري بعد ما باع المجوهرات وسافر دولة تانية...كان ماشي قصاد البحر وهو بيبصله بحزن شديد..كان حاسس انه حتى بعد ده كله، جرح زمان لسة متعالجش، لحد ما طلع من جيبه صورة بيري، رفعها قدامه، ونزلت دموعه، وابتدا يبص للصورة ويصرخ بعتاب كأنها هتسمعه!}
نويري(بصريخ) :دمرتيني...كنتي حبي الأول والوحيد، ومازالتي...مش قادر أنسى جرحك وكسرك ليا...دوستي عليا عشان حبيتك!!...بقالي ١٦ سنة محطوط في نفس المكان مبتحركش منه!!!...لا اتجوزت ولا بنيت عيلة يقفوا جنبي!...عشان انا بحبك ومازالت بحبك...لكن انتي متستاهليش حبي...اه متستاهليهوش، بيعتيني وروحتي اتجوزتي وخلفتي من الكلب الزبالة علاء...وبجاحتك وصلتك انك تعزميني عشان قلبي يتحرق وانا شايفك مع غيري!...وفي النهاية اية؟؟؟....طلع كلب خسيس خانك وباعك ونصب عليكي، وبنتك ماتت، ورجعتي بطولك زي ما كنتي زمان، بس الفرق بين زمان ودلوقتي...قلبي مكنش مجروح زي دلوقتي...انا كنت فاكر اني هشفي غليلي بعد كل التخطيطات دي...طلعت غبي، وانا اللي زودت ناري بـ ايدي...كنت بعدت من الأول ولا كان كل ده حصل...قلبي ياناس...قلبي اللي اتكسر، وسنين عمري وشبابي اللي راحوا على كلبة متستاهلش!!!
{وفجأة قطع الصورة بكل عصبية وطلع الولاعه من جيبه وحرقها قصاد منه، ودموعه بتنزل، وبعد ما رماها ووقف قصادها يشوفها وهي بتتحرق}
نويري(بدموع) :كل ده ميجيش حاجة في قلبي اللي اتحرق بسببك يا بيري
{ورجع يصرخ تاني}
نويري:مش مسامحك ولا عمري هسامحك، ولو كان رجع بيا الزمن عمري ماكنت اختارتك!!...زباااله متستاهليش!!!!
{خبط حد على كتفه، ولما لف لقاها بيري، فاابتسم}
نويري:بيري؟...انتي جيتي ازاي؟
بيري:متزعلش مني، انا غلطانة في كل اللي فات...وعارفة ان انا جرحتك وكسرتك، لدرجة انك مش قادر تنسى لحد دلوقتي، انت حبيتني بجد يا نويري، وانا مكنتش قد الحب ده، انا كنت معمية بالفلوس، مانا أصلي كنت بدور على الحاجة اللي ناقصاني، وانا اتحرمت من ده في بيت أهلي، انت مكنش ليك ذنب، انا اللي المشكلة كلها جاية مني
{ولسة نويري بيحط ايده عليها اختفت، لف حواليه يبص ملقاش حد، لحد ما صرخ بأعلى صوته في السما}
نويري(بعياط) :يااااارب، يااااااارب
===============================
{وبعد كام يوم من انتهاء سبوع ريان، جه كمال وأهله في بيت وجيدة عشان يطلبوا ايد زهرة في وجود متولي بما ان زهرة مبقاش ليها أهل!}
متولي:يااهلاً وسهلاً
احمد:يااهلاً بحضرتك..احنا يشرفنا ويسعدنا اننا نطلب ايد الآنسة زهرة لـ ابننا كمال
متولي:زهرة بنت محترمة وانا معتبرها في مقام بناتي
نورا:عشان كده احنا جايين نطلب ايديها، كمال بيشكر فيها أوي، وانا متأكدة انها زي الوصف ويمكن أحسن كمان
وجيدة:اه والله، أدب اية. وأخلاق اية، مش هتلاقوا أحلى ولا أحن منها
أحمد:احنا بنتمنى ان حضراتكم توافقوا على جواز زهرة من كمال ابني، واوعدكم انها هتكون في عينينا وبنتنا التانية بالظبط!...وكمان احنا مش عايزين حاجة غير زهرة بشنطة هدومها
متولي:واحنا موافقين يااستاذ أحمد، نقرأ الفاتحة
احمد:على بركة الله
{رفعوا كلهم ايديهم وقروا الفاتحة وبعد ما خلصوا..قامت مهرة عشان تجيب زهرة من الأوضة}
مهرة(بإبتسامة) :انا هروح أجيب زهرة، عن اذنكم
نورا:اتفضلي ياحبيبتي
{دخلت مهرة الأوضة، لقيت زهرة بتلعب مع ريان على السرير}
مهرة:انتي سايبة العريس وأهله، وقاعدة هنا بتلعبي مع ريان؟
{قامت زهرة وهي محرجة ومسكت ايد مهرة وهي متوتره}
زهرة:انا خايفة أوي يا مهرة، وكمان محرجة جداً
مهرة:لا ده عادي، هتتعودي واحده واحده، بس يلا اتجرأي متخافيش دول مستنينك برا!
زهرة(بفرحه+خوف) :خايفة اوي!
مهرة(بإبتسامه) :متخافيش، انا هطلع معاكي وهقوي قلبك بس يلا!
زهرة:ماشي
{و مهرة زقيت زهرة لحد ما خرجت برا وسلمت على أهل العريس وهي كلها توتر واحراج}
نورا:ماشاءالله، زي ما وصفتها بالظبط يا كمال، فعلاً زهرة نازلة من الجنة!
زهرة:ربنا يخليكي ياطنط
{قعدت زهرة جنب مهرة وهي محرجة وباصة في الأرض}
متولي:مفيش حاجة لـ عريسك؟
زهرة(بإحراج) :ازيك عامل ايه؟
كمال(بإبتسامه) :الحمدلله، مبروك يا زهرة
زهرة(بإحراج) :الله يبارك فيك
وجيدة:لو لولولولولوي...قومي يا مهرة عايزاكي
{دخلت وجيدة المطبخ مع مهرة}
وجيدة:حطي العصير في الكوبايات، وانا هحط الجاتوه في الاطباق
مهرة:حاضر
{ولسة مهرة بتفتح الازازة، سمعت ريان بيعيط}
وجيدة:اهو ابتدينا، روحي وانا هعمل بدالك
{دخلت مهرة الأوضة ترضع ريان بالببرونه، ووجيدة عملت بدالها، وبرا قام حاتم وحضن كمال}
حاتم:الف مبروك ياعريس
كمال:الله يبارك فيك يا حاتم
{وبعد ما وجيدة خلصت، ندهت على حاتم}
وجيدة(بصوت عالي) :يا حاااتم
حاتم:جاي اهو
{و دخل حاتم المطبخ}
وجيدة:شيل معايا دول
حاتم:ماشي
{وخرج بالعصير ووجيدة وراه بالجاتوة}
وجيدة:لولولولولولوي
{وحطوا العصير والجاتوة على الترابيزة ووزعوا عليهم، وشوية ومهرة خرجت}
متولي:ربنا يجمعنا في الأفراح، ومايقطعها عادة
كمال:يارب
==============================
{وعند علاء اتحكم عليه بمؤبد، و فاتن قررت انها تجيب محامي يخرج بيري...واليوم ده كانوا لسة راجعين من عند المحامي}
غادة:خايفة أوي انها متخرجش يا ماما، يبقى كل اللي عملناه ده كان على الفاضي!
فاتن:متقلقيش هتخرج انا متأكدة، ده أكبر محامي فيكي يا مصر، وعدت عليه كل القضايا اللي كان مستحيل اصحابها يعدوا منها كده بالساهل
غادة:يارب، احنا مش مستحملين خساير تاني!
{دخلت فاتن الأوضة تغير، ولسة غادة هتقعد، لقيت الباب بيخبط..راحت تفتح لقيته نبيل وفي ايده بوكية ورد وعلبة شوكولاته وواقف مبتسم، اتوترت غادة أول ما شافته}
نبيل:انا اسف يا غادة!
غادة:آسف على اية؟
نبيل:ان انا خليت شكلك وحش في كل مرة جيتي تصالحيني وصديتك ورفضت!...و أسف ان انا اديت فرصة لوساوس الشيطان انها تدخل دماغك، وموضحتلكيش نيتي...انا لو لفيت الدنيا كلها عمري ما هلاقي زيك ولا هقدر أعوضك
غادة(بإبتسامه) :بس كل اللي حصل ده مكنش له لازمة!
نبيل:انتي غلطتي اه بس انا كمان غلطت وكلنا بنغلط، المفروض كنت اديتك فرصة وموقفتلكيش على الواحدة...انا بس كنت محتاج فترة احدد فيها انا عايز اية!
غادة:وعرفت انت عايز اية؟
نبيل:عايزك انتي
{ضحكت غادة، لحد ما نبيل مد ايده واداها بوكية الورد وعلبة الشوكولاته، ودخلت}
غادة:تعالى اتفضل
{دخل نبيل وقعد، وغادة خدت الهدية وحطيتها على الترابيزة، ووقفت قصاده تاني وهي مبتسمة}
غادة:هنده ماما..بجد هتفرح أوي لما تشوفك!
نبيل(بإبتسامه) :وانا مستنيها
{دخلت غادة عشان تنده فاتن، وخرجت بيها، وأول ما فاتن شافت نبيل قربت منه وحضنته}
فاتن:ياحبيبي، وحشتني اوي اوي، ينفع اللي حصل مابينكم ده؟
نبيل:وانا جيت لاني بجد مش هقدر أعيش من غيرها
فاتن:يعني خلاص اتصافيتوا؟
{هز نبيل دماغه وهو مبتسم بمعنى أه}
فاتن:مبروك للصلح ياحبايبي
نبيل وغادة:الله يبارك فيكي
{وحضنتهم هما الاتنين، دفعه واحدة}
==============================
{تعدي الأيام والشهور..وحاتم بيروح للظابط وبياخد المكافأة زي ما وعده}
حسني:حلال عليك يا حاتم، اتمنى انك تستخدمهم في حاجة تنفع لمستقبلك انت ومراتك وابنك!
حاتم:وده اللي هيحصل ياباشا
حسني:شكراً لوقفتك جنبنا
حاتم:الشرطة والشعب في خدمة الوطن
{و الظابط خد حاتم بالحضن، وهو كله سعادة وفخر...وبالفعل قرر حاتم انه يفتح أول مشروع، واليوم ده كان ماشي يشوف العاملين شايفين شغلهم ولالا}
حاتم:الله ينور، كملوا
_بنورك يااستاذ حاتم
{وبعد ما حاتم لف وشاف مصنعه، ويشاء القدر ان المشروع ينجح نجاح كبير ويجيب فلوس زيادة، وكان كل ما حاتم فلوسه بتزيد كان بيفتح مشروع جديد، لحد ما فتح مصنعين وشركة، وبقيت الناس تجيله من كل مكان عشان تتعامل معاه!...لحد ما حاتم خد كمال والمحامي وراحوا يشتروا العمارة اللي متولي ووجيدة كانوا شغالين فيها في الأول...كان حسن قاعد مستني المشتري يوصل بفارغ الصبر}
حسن:هو انت مش قولتلي انه جاي في الطريق؟
_ايوه زمانه جاي فعلاً، اهو جه اهو
{دخل حاتم بكامل اناقته بعد ما ربنا كرمه، وسلم على حسن والراجل اللي معاه...وكانت صدمة حسن لما عرف ان حاتم هو اللي هيشتريها!!}
حسن(بتوتر) :حاتم؟؟
حاتم:أه حاتم، في مشكلة ولا اية؟
حسن(بتوتر) :اممممم مين فيكم المشتري؟
حاتم(بـ ثقة) :أنا ياحبيبي..نقعد بقى؟
{الكل في صمت}
حاتم:يبقى نقعد
{وبعد ما قعدوا}
حسن(بتوتر) :هو انت هتشتري العمارة دي ازاي؟
حاتم(بصوت حاد) :زي الناس..ماهي عملية بيع، يعني خد وهات...وهات هنا اللي هي الفلوس...والحمدلله الفلوس موجودة وبزيادة كمان
حسن(بإستغراب شديد) :منين؟
حاتم:بفضل ربنا وقدرته الحمدلله، ها نبتدي ولا هنقضيها اسئلة كتير؟
{سكت حسن ومردش، راح الراجل اللي جنبه مطلع الورق واداه لـ حاتم، وبعد ما حاتم بص فيه كويس}
حاتم:تمام
{وابتدا يمضي على الورق، وحسن هيتجنن}
===============================
{وعند غسان بعد ما المرض كل جسمه، وبقى طريح الفراش وحالته بتدهور كل يوم زيادة...دخل الدكتور الأوضة لقى جهاز القلب بيصفر...صرخ الدكتور وحاول يعمله جلسات إنعاش ولكنها مجابتش نتيجة وبكدة غسان مات موتة ربنا بدون ما يتعدم، و شره وجريه على أذية الناس، منفعتوش بحاجة!...دخلت الممرضة وهي في حالة حزن}
الممرضة:مات يا دكتور؟
دكتور:للأسف...شوفوا حد من عيلته يستلم الجثمان
الممرضة:حاضر يادكتور
{خرج الدكتور من الأوضة، والممرضة غطيت وش غسان!، وخرجت هي كمان عشان تشوف حد من أهله وتكلمه يجي يستلم الجثمان!...وبعد ما بصيت وملقتش حد، دخلت المكتب للدكتور}
الممرضة:للأسف يا دكتور، ملقناش حد من أهله..هو تقريباً كل عيلته متوفيين
الدكتور:احنا كده هنضطر ندفنه في المقابر العامة
الممرضة:تمام يا دكتور، انا هبلغ الموظفين يطلعوله تصريح دفن
الدكتور:تمام
{وبعد ما الممرضة طلعتله تصريح دفن، ووقت الغسل حصلت الكارثة، كل ما المغسل يقرب منه، يلاقي وشه وجسمه بيسود بطريقة مش طبيعية!...يبعد،يرجع لـ طبيعته، ده غير عينيه اللي كانت بتنزل حشرات، خبطت الممرضة بعد ساعتين لما لقيت المدة طولت!..خرج المغسل، ووشه مخطوف}
الممرضة(بإستغراب) :كل ده بتغسلوه ياحاج محمد؟
المُغسل:انا مش عارف أغسله، شوفوا حد تاني
الممرضة:لية طيب في اية؟
{خرج المغسل وخلع الجوانتي من غير ما ينطق وبالفعل لما جابوا مغسل تاني حصل نفس اللي حصل المره اللي فاتت، وبرضة خرج بدون ما يعمل حاجة!}
الممرضة:في اية، المتوفي ماله؟
المغسل:اللي انا حسيته، انه فيه مشكله كبيره بينه وبين ربنا، انا مضطر أغسله من بعيد من غير ما ألمسه!
الممرضة:لا حول ولا قوة الا بالله، ربنا يعفو عنا
{وبعد ما المغسل، رمى الماية على غسان من بعيد، وخلص، وخدوه في عربية تكريم الأموات، ودفنوه!..وبمجرد ما قفلوا عليه القبر، سمعوا صريخ قوي محدش فيهم كان قادر يستحمله لحد ما كلهم مشوا من هول الصوت المرعب!...حتى الحانوتي من شدة الرعب اللي بيحصل مشى}
الحانوتي:لا اله الا الله...لا اله الا الله
{ودي كانت نهاية غسان!..وإلحاده وكفره وأذيته للحواليه دي كانت نتيجتها العذاب الأليم!}
===============================
{وعند حاتم بعد ما اشترى العمارة}
حاتم:وخد بالك انت مطرود من العمارة ياأستاذ حسن، أصل انا ناوي أسكن العمارة لناس جديدة
{وطلع فوق وحسن متعصب وبيزعق}
حسن(بزعيق) :يعني اية، في أوراق تثبت ان انا ليا هنا في العمارة، انت اكيد عقلك فلت، هتلعب بديلك فااهو كله في الآخر بالقانون!!!
حاتم(ببرود) :الورق ده تلفه وتحطه في الدرج
{وطلع فوق وخبط على الست اللي عايرته بفقره لما كان قاعد مع وجيدة في صالون بيتها}
==========فلاش باك========
حاتم(بزعيق) :اية الكلام اللي بتقوليه ده؟...انتي اتجننتي؟؟
_احترم نفسك يا رمامة الشوارع، اية اللي طلعك هنا؟...وانتي ياست وجيدة هو ده الشغل اللي بتشوفيه؟...سايبالك البيت وانتي من تاني ناحية بتدخلي عيال البوابين هنا في بيتي وكمان على الصالون اللي لو اشتغلتوا طول حياتكم مش هتعرفوا تجيبوا واحد زيه!!
=========================
{ولما الست فتحت وشافته ابتدت تزعق}
_انت اية اللي جابك هنا يا*****
{ولسة هتشتمه، قاطعها حاتم بصوت حاد}
حاتم:اللي قدامك ده بقى صاحب العمارة اللي انتي فيها يا أم صالون، مانا قررت أسميكي أم صالون فاكرة ولا نسيتي؟
_لا ده انت شكلك شارب حاجة وابتديت تخرف، يلا من هنا بدل مااتصل بالشرطة وأوديك في داهية!
حاتم(بصوت حاد) :اعملي حسابك تلمي حاجاتك وتغوري من هنا، بدل ماأحدفكم في الشارع، وكلمة زيادة مش عايز...يلااا
{عدى حسن من جنب حاتم، والست ندهته}
_بقى الجربوع ده بقى صاحب العمارة ياأستاذ حسن؟
{هز حسن راسه، وطلع في صمت}
حاتم(بزعيق) :الجربوع ده هيوريكي هيعمل اية، الشقة في خلال ٤٨ ساعة لو مخدتيش حاجتك ومشيتي انا همشيكي بطريقتي، قضي الأمر!!
{ونزل حاتم وراح العمارة الجديدة اللي أبوه شغال فيها، وبعد ما نزل من عربيته المرسيدس، قرب منه وشده}
حاتم:يلا يا متولي مفيش وقت!
متولي:مفيش وقت لـ اية؟
حاتم:شغل العمارات ده خلاص انتهى، انت من النهاردة هتقعد برنس، وكل طلباتك هتيجي لحد عندك!
متولي:انا مش فاهم حاجة!
حاتم:دلوقتي هتفهم، تعالى بس!
{وبالفعل خده، وعدى على مهرة ووجيدة وخدهم، وراح بيهم الڨيلا الجديدة اللي اشترهالهم وكتبها بإسم مهرة، كانوا كلهم داخلين بيبصوا حواليهم ومش فاهمين حاجة! }
حاتم:الڨيلا دي انا كتبتها بإسم مهرة، وقررت أجيبها كبيره عشان كلنا هنعيش فيها من النهاردة، وانتي يا ست وجيدة، مفيش خدمة في البيوت تاني، هتقعدي هانم واللي انتي عايزاه شاوريلي عليه وهجيبهولك لحد عندك، وانت يا بابا انا عايزك ترتاح انت كبرت ومابقتش حِمل بهدلة!...احنا اتبهدلنا كتير أوي وجه الوقت اننا نرتاح
{وبعدين قرب من مهرة وريان وباس راس وايد مهرة، وريان}
حاتم:لكن انتي بقى يا مهرة...أحسن حاجة حصلتلي في حياتي...ربنا العالم انا بعشقك قد اية!..وعملت كل ده عشانك انتي وريان في المقام الأول،عشان أعوضكم عن كل الوحش اللي شوفتوه، انتي تستاهلي انك تتاقلي دهب يا مهرة...انا بحبك وهفضل أحبك لآخر يوم في عمري..وعمري ما هنسى الصدفة اللي جمعتني بيكي،ولا هنسى كل تفاصيلنا وذكرياتنا في السفر، طول عمرك سندي وضهري وقد تعبي، عمرك مابعدتي عني ولا سيبتيني، وفضلتي متمسكه بيا لآخر لحظة، انا لو فضلت أشكرك طول عمري مش هيكفي، انا سعيد بالقدر اللي جمعني بيكي، انتي كنتي وش الخير عليا، صحيح مكناش هنوصل للي احنا عايزينه لو كنا في مكانا، يمكن اللي حصل ده وسفرنا وهروبنا لبلاد برا كان سبب انه يكون نقله كبيره في حياتنا..وعشان انتي تستاهلي كل خير، انا مجهزلك مفاجأة بسيطة، يارب تعجبك
{وخد مهرة من ايديها، لقيت عربية قصادها متزينه بـ بلالين وورد، عيطت مهرة واديت ريان لـ وجيدة وحضنت حاتم}
مهرة(بعياط) :لااا كل ده كتير عليا...انا مش مصدقة انك بتعمل كل ده عشاني انا!!...انا اللي سعيدة بوجودك في حياتي يا حاتم، ولو ربنا اداني عمر فوق عمري هختار انه يكون معاك يا سندي وضهري وأجمل ما ليا!!
{قربت وجيدة وحضنت مهرة وحاتم}
وجيدة:الف مبروك يا مهرة، ربنا يكفيكي شرها
مهرة:الله يبارك فيكي ياماما
{وحاتم شد مهرة من ايديها وركبوا العربية ومشوا بيها،وكانت مهرة طايرة من الفرحة بعد ما ربنا كرمهم وعوض عليهم!...وبكده تكون روايتنا انتهت بموت غسان، وسجن علاء وبيري، وغنى حاتم ومهرة، وجواز كمال و زهرة!} ♥️
تمت بحمد الله