![](https://blogger.googleusercontent.com/img/b/R29vZ2xl/AVvXsEhcouq4a1IJGXYSGN5zh9uKVSnvwjyQbJPPVLtCimUjyBX6_3iKYHPnKfe2GPPTKGK24JZoItCOXTWm4JKTEzplBEvVTBReAVQLRcB3YSv4RIOl_4P7c9ztM4Gh-KhuoIqMfFb6AMPRkkwTleGdtz1lQrWTaw6uZ-3V8PgP9kR9GaxFATF4qJ4WY8XrG8dz/s320-rw/FB_IMG_1715256979969.jpg)
رواية جوازة ميراث الفصل السابع7والثامن8بقلم رانيا عماره
••لسه داليدا بتتصل بـ رشاد..لقيت سامي داخل وعلى وشه ابتسامه عريضه مستفزه!••
سامي:ايه ياعروسه هتخلصي امتى؟
••بصيتله داليدا بقرف وسكتت مردتش••
سماح:نص ساعه بالكتير..هى اساساً حلوه مش محتاجه
سامي:طبعاً ده اسم الله عليها تتحسد..طيب انا هجهز وجاي
••وخرج من الأوضه..وأمه أول ماشافته فضلت تزغرد••
سماح:معلش في سؤالي يعني..انا حاسه انك مجبوره على الجوازه دي ومش طايقه العريس
فريده:داليدا مبتحبش سامي ومش عايزه تتجوزوا..ارجوكي ساعدينا نخرج من هنا
داليدا:وبعد مانهرب؟.. ينفع نرجع تاني؟أكيد لا!..ويبقى ميراث أبويا اتاكل علينا..هنعيش نخبط في الدنيا دي يمين وشمال واحنا لينا حق عند شوية الزباله دول؟
سماح:انتي مش أول عروسه اتعامل معاها وهى رافضه العريس ومغصوبه عليه..لأ حصلت قبل كده كتير وفي مره من المرات العروسه هربت قدام عينيا..وأم العروسه دخلت تدور عليها واتخانقوا معايا خناقه لـ رب السما وكانوا هيودوني في داهيه..وانا مليش ذنب في كل ده!.. بس الصراحه حرام..الجواز ده زي اللقمه.. لو حلوه هتبلعيها لو مش حلوه ومش على مزاجك عمرك ماهتبلعيها لو حصل ايه كده.. الله يكون في عونك الصراحه
فريده:اتصلي بأي حد يا داليدا قبل ماحد فيهم يجي
داليدا:بتصل بـ رشاد مابيردش..اوف
<عـنـد عـائشه>
••خلصت الأكل..وحطيته على السفره واتجمعت هى وعيلتها ماعدا رشاد ابنها..كان في الشغل••
والد رشاد:تسلم ايديكي ياعائشه
عائشه:بالهنا والشفا
سلمى:تسلم ايديها هى بس؟
والد رشاد:انتي ساعدتيها؟
عائشه:اه سلمى ساعدتني بصراحه..كتر خيرها
مصطفى:تسلم ايديكوا انتوا الاتنين
عائشه:خد ياحبيبي انت ومروه
••وبتديهم الفراخ قدامهم،ولما مروه داقته شكرتها••
مروه:ميرسي ياطنط الأكل يجنن
عائشه:بالهنا والشفا ياحبيبتي..انا عايزاكي تتعودي على الطبخ علشان لما ربنا يرزقكم بأولاد بعد كده تعرفي تتصرفي
مصطفى:علفكرا ياماما...مروه بتعرف تطبخ
عائشه:بجد؟ انا أول مره اعرف
مصطفى:ايوه بتعرف وان شاء الله هنعملكم عزومه قريب
عائشه:خلاص مادام كده انا مستنيه أشوف عمايل ايديكي..وواثقه انها هتطلع تحفه
مروه:ميرسي ياحبيبتي ان شاء الله اكون عند حسن ظنك
••وجات مكالمه لـ والد رشاد، فا رد على المتغطي••
والد رشاد:الو....ايوه......اه......حلو....نزود التعامل أكتر....اه ياريت عايزين نطلع بأي معلومه......خلاص ماشي...مع السلامه
عائشه:مين يا ساهر؟
والد رشاد:ده واحد زميلي
<عـنـد لـمـيس مـرات ضـيـاء لاشـيـن>
••كانت قاعده في جنينة الفيلا بتكلم واحد في الموبايل من ورا جوزها وواخده حذرها كويس••
لميس(بتضحك) :هههههه ضحكتني اوي يا مجدي...بقى مراتك بتغير عليك مني؟...هى حاسه ولا ايه؟
مجدي:اه حاسه وكل يوم تدب خناقه معايا وتقولي يابتاع لميس..بس ميفرقش معايا ده كله..المهم ان انا مرتاح معاكي..على الأقل انتي مش نكديه زيها ووش هم
لميس:مش يمكن الولاد مغلبينها..اسألني انا..تفضل مستحمله وبتخزن لحد ماتجيب آخرها وتنفجر في الكل!
مجدي:طب مانا طالع عيني في الشغل ومبعملش نص اللي هى بتعمله...ده هى الوحيده من وسط مراتات صحابي اللي بتعمل كده...خلي قرفها ينفعها
لميس:سيبك من سيرتها..وخلينا في المهم..هتيجي تزورنا امتى؟..بقالك كتير مجيتش
مجدي:لو عايزه من النهارده..آجي..الصراحه وحشتيني.. انا مستغرب ازاي واحده بالحلاوه دي تتجوز الراجل العجوز ده..مش لايقين على بعض خالص
لميس:فعلاً..ومين قالك ان انا طايقاه؟..انا بقرف انام جنبه..وشه لواحده بيفصلني من المود..ده ضياء يعني هههههه مش واحد أمور
مجدي(بيضحك) :خساره فيه وفي أهله..انتي بتاخدي منه ايه يعني؟
لميس:ولا أي حا....
••ولسه بتكمل الجمله..لقيت بنتها جايه••
لميس(بصوت واطي) :طيب اقفل يامجدي..هنا جايه.. باي
هنا:هاي يامامي
لميس:هاي ياحبيبتي
••وقربت تبوسها وقعدت قصادها••
هنا:كنتي بتكلمي مين؟
لميس(بتفكير) :كنت بكلم.... وانتي مالك؟
هنا:عادي يامامي ايه يعني لما اسأل؟
لميس:انتي هتصاحبيني ولا ايه؟..انا هنا مامتك!
هنا:خلاص اوكي
لميس:عملتي ايه في الجامعه؟
هنا:روحت
لميس:بس كده؟ هو ده اللي عملتيه؟
هنا:أها امال هعمل ايه تاني يعني؟
لميس:اوكي
••وراحت قايمه من مكانها،وطلعت فوق في صمت..وبعد ماطلعت..ابتسمت بنتها ابتسامه خبيثه! ••
<عـنـد دالـيـدا>
••بعد ساعه كانت خلصت وكل ماتمسح دموعها ترجع تنزل تاني...وأختها كانت بتعيط ومش عارفين يتصرفوا ازاي!..لحد ما جه سامي وأهله علشان ياخدها..ورغم انه عارف انها بتعيط ومش عايزاه.. مكنش فارق معاه غير نفسه وبس!..صوت الزغاريد كان في كل انحاء البيت..لحد ماخدها وطلعوا في الشارع ودخلوا فرحهم وقعدوا في الكوشه..وطول ما داليدا قاعده كانت أختها واقفه جنبها وماسكه ايديها وبتبصلها بـ حزن وقلة حيله..لحد ماصفاء جات بالفستان••
صفاء:ايه اللي موقفك هنا يافريده؟..مالك مكلبشه فيها كده ليه ولا كأنكم مش هتشوفوا بعض تاني؟
فريده(بحزن) :مش عايزه أبعد عنها
صفاء:تعالي معايا بلاش الوقفه دي متخليش الناس تاخد بالها ويقولوا في حاجه غلط
••وشدت فريده بـ عنف وراحوا على ترابيزه بعيد..كان الفرح شغال فيه أغاني بأعلى صوت..بس صوت الحزن والوجع اللي جوا داليدا كان أعلى منه بمراحل!..مكنتش حاسه بالمعازيم ولا الاغاني..كانت شايفه شريط قدام عينيها وبتتمنى انه يطلع حلم مش أكتر!..لحد ما جات حسناء ومعاها واحده••
حسناء:لولولولولوي...دي فتحيه خالة سامي
فتحيه:الف مبروك ياعروسه...ماشاءالله زي القمر
حسناء:عقبال عيالك كده ان شاء الله
فتحيه: يسمع من بؤك ربنا..قادر ياكريم..مبروك ياحبيب خالتك
••راح سامي قايملها وواخدها بالحضن••
سامي:الله يبارك فيكي ياخالتي
••ورجع قعد تاني..وهما مشوا••
سامي:مش ناويه تفردي وشك ده؟..ولا عايزه الناس تاكل وشي انا!
داليدا:لو كان عندك نقطة دم..مكنتش اتجوزت واحده مش عايزاك!..لكن انت واخدها بالعند والاجبار والقوه!
سامي(بتريقه) :لا ماهو جو كلام المسلسلات ده مبياكلش معايا..انتي مش هتلاقي حد يحافظ عليكي غيري..وانا الصراحه مكنتش هرتاح ولا هيهدالي بال إلا وانتي مراتي
••بصيت داليدا للسما..ونزلت دموعها..وجه عمها ماهر واتنين رجاله وأول ما سامي شافهم راح قايم••
سامي:افردي وشك ها
ماهر:الف الف مبروك يابني عقبال كده لما نشيل عيالك
سامي:الله يبارك فيك يا بابا
ماهر: عمك علي..وعمك محمد..هما أغنيه عن التعريف
سامي:طبعاً نورتونا
_الف مبروك
=ربنا يتمم على خير
سامي:الله يبارك فيكم وعقبال عيالكم كده..نجيلكم في الأفراح
_مبروك ياعروسه
ماهر:تعالوا اتفضلوا معايا
••وخدهم وراحوا قعدوا على الترابيزه..وعند ترابيزه فريده وصفاء كانت فريده بتعيط..ولما واحده من المعازيم شافتها بتعيط جات تسأل••
_مالها بتعيط ليه؟
صفاء(بخبث) :أخت العروسه بقى...لازم تعيط..دي لو معيطتش يوم فرحها امال هتعيط امتى؟
_لا ياحبيبتي متعيطيش عقبال ماتتجوزي انتي كمان
صفاء:يارب ده انا افرح لما بنات عمامي الاتنين يتجوزوا
_ربنا يفرح قلبك
••وطبطبت على ضهر فريده ومشيت••
صفاء(بعصبيه) :ماقولنا بطلي عياط.. ايه موال هو؟..شوفتي اهو كل اللي رايح واللي جاي عمال يسأل.. هتجيبولنا الكلام
فريده(بعياط) :حرام عليكم...انتوا ليه بتعملوا معانا كده؟
صفاء(بتريقه) :ايه هو اللي احنا بنعمله ياحبيبتي؟..ده احنا بنصونكم من اللي ممكن يجرالكم..سبحان الله خيراً تعمل شراً تلقى
••وعند داليدا كانت عينيها مليانه دموع..لحد ماجه وقت الرقص..سامي شدها وهى كانت في دنيا تانيه..كأنها عروسة المسرح وهو اللي بيحركها على مزاجه!••
حسناء:أخيراً شوفتك عريس يابني
ماهر:احنا طلعنا تلاجه في الشقه وحطينا فيها شوية حاجات
حسناء:طب كويس
<عـنـد رشـاد>
••عدى على دكتور نفسي يحجز عنده..ومكنش عايز حد يعرف حاجه عن الموضوع ده••
رشاد:عايز اعمل كشف
_اسم حضرتك ايه؟
رشاد: رشاد ساهر
_الاسم ثلاثي يافندم
••وتحت كان في حد بيراقب رشاد!..وواقف بالعربيه بتاعته قريب من عربية رشاد..لحد ما خرج منها وفتح الموتور وقطع سلك الفرامل!..وركب عربيته ومشى••
_طيب اتفضل يافندم
••وراحت معاه لحد مكتب الدكتور..ولما الدكتور شافه قام••
الدكتور:اهلاً وسهلاً بـ حضرتك
رشاد:متشكر
الدكتور:اتفضل اقعد...سؤالنا المعتاد تشرب ايه؟
رشاد:لا شكراً مش عايز أي حاجه
الدكتور:ليه بس.. خير ربنا كتير!
رشاد:شكراً..انا جاي لـ حضرتك بدون علم أي حد من عيلتي..واتمنى كل اللي هقوله يفضل سر
الدكتور:بص حضرتك..احنا عندنا مبدأ السريه..لازم نحتفظ بـ أسرار العميل دي أمانه هنتحاسب عليها أمام الله وأمام القانون!
رشاد:طيب
الدكتور:اتفضل على الشازلونج..وعايزك تتكلم بكل أريحيه اعتبر انك في حوار داير مع نفسك
رشاد:تمام
••وقعد على الشازلونج..وحاول يرتب أفكاره••
الدكتور:على أقل من مهلك...جمع أفكارك وواحده واحده
رشاد(بحزن) :انا فقدت مراتي وأهلها قصاد عينيا..مكنتش متجوزها عن حب وحصلت مشاكل كتير وقتها
<فـلاش بـاك>
••كان رشاد بيتخانق مع أهله بسبب انه مش عايز يتجوز دينا!••
رشاد(بزعيق) :مش هتجوزهاااااا..مبحبهاااااش!!
والد رشاد(بزعيق) :هتتجوزها ورجلك فوق رقبتك..انت هتصغرني مع الناس ولا ايه؟
رشاد(بزعيق) :وانت ليه تتكلم من غير ماتاخد رأي!!.. بتدبسني معاك في حاجه مليش ايد فيها ليه؟؟؟
والد رشاد(بزعيق) :انا عايزك تتجوز جوازه تشرف..أمال عايز تروح تناسبلنا واحده أبوها بواب في عماره!!
رشاد(بزعيق) :ماله البواب؟؟.. مش أحسن ما يكون خمورجي؟...ولا ماشيه شمال!.. على الأقل دي شغلانه شريفه..انتوا بس اللي هتفضلوا حاطين راسكم في العالي عالطول ومش هتتنازلوا عن النفخه الكدابه دي
••راح أبوه ضاربه بالقلم على وشه••
والد رشاد(بزعيق):أخرس ياقليل الأدب..واتعلم ازاي تتكلم مع أبوك بإحترام!..ولما ابوك يؤمرك بحاجه تقوله أمراً وطاعه ومتجادلش معاه كتير..انت مش هتعرف مصلحتك اكتر مننا!
••وسابه وخرج وهو متعصب..ورشاد قعد على السرير وحط ايده على وشه وهو بيعيط!••
____________________________________
رشاد: كان في مشاكل بينا طول الوقت انا و دينا..بس مش هنكر إن اللي حصل ده صعب اوي حد يستحمله..مالوش علاقه بحب ولا كره..بس ده قتل!..يعني ايه انسان يكون قدامك عايش وفجأه يتقتل ويفارق الحياه!...انا عمري ما لقيت الحنيه من أبويا..طول عمره متسلط وعايز اللي يقوله يمشي وبس..انا مكنتش مرتاح ولا دلوقتي مرتاح ولا هرتاح..انا كل حاجه اتمنيتها اختفت من قصاد عيني! كأن الدنيا بتعاند فيا!..بجد صعب اوي عليا كل ده
الدكتور:كمل!
<عـنـد دالـيـدا>
••بعد ماالفرح خلص..كانوا الناس بيسلموا عليهم..وبيحدفوا عليهم ورد!..وداليدا من جواها كانت بتتقطع!••
حسناء:لولولولولولوي الف مبروك...ربنا يخليكم لـ بعض ويهديكم يارب
••وطلعوا وراهم لحد الشقه!...كانت شقه على المحاره..مفيش حاجه متوضبه فيها غير أوضة النوم..وفي الصاله تلاجه..وأول موصلوا عند باب الشقه••
سامي:نجيلكم في الأفراح...تسلمولي
••نزلوا كلهم ماعدا أهل سامي وفريده أختها!••
حسناء:يلا يا عروسه ادخلي بـ رجلك اليمين
••فضلت داليدا ساكته مبتتحركش لحد مازقتها جوا••
حسناء:يلا متتنحيش!
••وخدتها ودخلوا أوضة النوم..وكانت داليدا ضربات قلبها بتزيد!••
حسناء:يلا ياحبيبتي غيري الفستان وفكي كده
داليدا:ابعدي ايدك عني!
حسناء:وهو انا عملت حاجه؟
داليدا(بزعيق) :محدش يقرب مني!
فريده:سيبوا داليدا في حالها بقى..انتوا عايزين منها ايه؟؟
حسناء:عروسه ويوم فرحها هنكون عايزين منها ايه يعني؟..خدوا بالكم شغل الدلع ده كان زمان انتوا دلوقتي مربوطين في رقبتنا..وأي حاجه كده ولا كده هتيجي علينا احنا!
داليدا(بزعيق):اطلعي برا انا مش عايزه حد هنا!
حسناء:يانهار اسود انتي بتكرشينا؟
سامي(بزعيق) :ماتتعدلي ياداليدا بدل مانا اللي أعدلك!
داليدا(بـ غل) :انت ازبل حد انا شوفته في حياتي..انت مش راجل ولا عندك دم..حقير
سامي(بزعيق) :انا مش راجل ياروح أمك؟؟
••وراح ساحبها من شعرها ونازل ضرب فيها وهى تصوت..و أختها كل ماتيجي تبعده عنها تيجي صفاء وحسناء شادينها ويكتفوها!••
سامي(بزعيق) :انا بقى هعرفك انا راجل ولالا..مش واحده قليلة الربايه زيك هتقل مني.. لا ياداليدا فووقي...يلااا يامامااا اطلعوا برا
فريده(بصويت) :داليداااا...داليداااا
صفاء:اخرسي يابت مسمعش صوتك..يلا ياماما
••وشدوا فريده وخرجوا من الشقه وكل ده وداليدا بتصوت..ولما خلص ضرب فيها..قعدت بالفستان بعيد وهى بتعيط! وبتبص حواليها بإستغراب!.. لحد ماقعد على الكرسي وحط رجل على رجل••
سامي:شوفتي وصلتيني لـ ايه؟..ما كنا حلوين..لازم يعني تعصبيني؟
داليدا(بعياط) :انا بكرهك... مكرهتش في حياتي قد ماكرهتك وكل يوم كرهي ليك بيزيد أكتر وأكتر!
سامي:تكرهيني تحبيني مش فارقه..المهم ان انا اللي بحبك
داليدا:بتحبني؟..كل ده وبتحبني؟..امال لو بتكرهني كنت عملت ايه؟؟
سامي:لا مانتي متعرفيش لما بكره حد بعمل ايه!..لو قريبه مني كنتي عرفتي
داليدا:مش عايزه اعرف!!
••راح سامي قايملها وماسكها بكل غل من ايديها••
سامي(بـ غل) :انا دلوقتي جوزك ومن حقي اعمل اللي انا عايزوا..ومحدش يقدر يقولي تلت التلاته كام!..فا عديها ياداليدا متخليش الشيطان يلعب في دماغي أكتر من كده
داليدا(بصويت) :اااه...ابعد عني...ابعد!
••لقيت سامي ابتدا يقرب منها أكتر..ودي حاجه كانت بتموتها من الرعب.. لحد ماقامت تجري وطلعت برا جابت سكينه••
داليدا(بتهديد) :لو قربت مني انا هقتلك!
سامي(بتريقه) :وانتي فكرك لما تقتليني..هتهربي من الحكومه؟.. لا هتتجابي من قفاكي وهتتعدمي!..وهتبقي ضيعتي نفسك في الآخر
داليدا(بزعيق) :ابعد عني!
••وكل مايقرب منها تبعد أكتر..لحد ما مسكها راحت ضارباه بالرجل في بطنه وطلعت تجري.. حاولت تفتح الباب..متفتحش!..فضل يطاردها في البيت كله وهى بتهرب منه وبتصوت.. وتحت كانوا رابطين فريده علشان متطلعش أو تستنجد بالناس••
داليدا(بصويت) :مبحبكش!!!..ابعد عني بقى!!!
سامي:هتروحي مني فين ياداليدا؟
••وطلع المخدر ورشه في وشها فا اغم عليها!••
<عـنـد عائشه>
••بعد ماخلصوا السهره..قام مصطفى ومراته علشان يمشوا••
والد رشاد:لازم السهره دي تتكرر تاني!
مصطفي(مبتسم) :ان شاء الله
مروه:باي ياطنط
عائشه:باي ياحبيبتي..خدوا بالكم من نفسكم
مروه:حاضر
عائشه:باي ياحبيبي
••شاورلها مصطفى..وبعدين مشى هو ومراته..وبعد مامشوا خرجت عائشه مع جوزها في البلاكونه يتطمنوا عليهم••
عائشه:سلام ياحبايبي..ربنا يحفظكم
والد رشاد:انا حاسس ان انا ظلمت رشاد
عائشه:ظلمته في ايه؟
والد رشاد:لما أصريت عليه يتجوز دينا..انا عارف ان دينا خلاص الله يرحمها..بس خايف يكون الموضوع ده أثر على رشاد بالسلب
عائشه:هى مش بتتقاس ظلم ولا عدل..احنا كنا عايزين نفرح بيه ونشوفه متجوز جوازه تشرف
والد رشاد:مش عارف ياعائشه بس ضميري بيأنبني الايام دي أوي..هو لو كان له مصلحه في الجوازه دي مكنش عاش تعيس معاها وعالطول في مشاكل..كان ممكن لو اتجوز واحده تانيه بيحبها..هيبقى سعيد ومرتاح
عائشه:الكلام في اللي فات مبيفيدش..خلاص دينا الله يرحمها..لما يفوق من اللي هو فيه يبقى يختار اللي هو عايزها
والد رشاد:ربنا يسامحنا لو كنا قصرنا في حقه
عائشه:يارب
<عـنـد مـايـا>
••العلاقه بينها وبين شادي..كانت ابتدت تطور..كانت قاعده في أوضتها بتكلمه••
مايا(بتضحك) :بجد لازم اتعرف على بقيت أهلك..أكيد هما كمان زيك لذاذ كده
شادي:هما كمان هيحبوكي...انتي دمك خفيف وروحك حلوه..يابخت اهلك بيكي
مايا:أهلي؟..هما أهلي فاضينلي اصلاً؟
شادي:ليه بتقولي كده؟
مايا:اصل بابي طول اليوم في الشغل...ومامي طول اليوم في الشغل..وانا وحيدتهم..ومعنديش اخوات خالص
شادي:ده على كده أكيد بتزهقي وبتحسي بالوحده!
مايا:طبعاً..ده بقى شئ أساسي في يومي..بس كده أحسن..انا بقيت ارتاح وانا لواحدي أكتر!
شادي:أوقات البعد عن الناس بيكون راحه لما يكونوا متعبين
مايا:أكيد
شادي:بس خلاص انتي من النهارده ليكي زميل وصاحب وأخ..تقدري تعتبريني اخوكي وتحكيلي كل حاجه
مايا:أكيد وانت كمان من النهارده ليك اخت اسمها مايا!
شادي:أحلى أخت في الدنيا!
<عـنـد رشـاد>
••بعد ما حكى للدكتور كل اللي تاعبه..قاله شوية ارشادات وكتبله ادويه••
الدكتور:هتمشي على الادويه بإنتظام..والأهم من كل ده التعليمات اللي قولتهالك
رشاد:ان شاء الله يادكتور
الدكتور:ميعادنا يوم التلات ان شاء الله
رشاد:على خير ان شاء الله.. عن اذنك
••ونزل..ولسه بيركب عربيته حس بحاجه غريبه!..وده اللي خلاه نزل يبص في العربيه..ولما بص اكتشف ان سلك الفرامل مقطوع!..اتصدم ومابقاش عارف يعمل ايه!..لحد مااتصل بـ أخوه••
رشاد:الو يامصطفى...انت فين؟
مصطفى:انا لسه واصل البيت..في حاجه؟
رشاد:انا في حد عملها معايا..سلك الفرامل مقطوع!!
مصطفى(مصدوم) :يانهار اسود وده حصل ازاي؟
رشاد:مش عارف!!..انا كنت في مشوار ولما ركبت العربيه حسيت بحركه غريبه فيها! ولما بصيت لقيت السلك مقطوع
مصطفى:لا ده كده حد قاصد.. هو في غيره؟..انا مش فاهم ايه يخلي واحد يعمل كل ده لمجرد ان عربيته اتخبطت!..ايه الفيلم الهندي اللي هو عامله ده..ده كده شروع في قتل!
رشاد:طيب تعالالي..هبعتلك اللوكيشن
مصطفى:ماشي
مروه:في ايه؟
مصطفى:اطلعي انتي..وانا هروح اشوف رشاد ماله
مروه:طيب في حاجه؟
مصطفى:لا ده موضوع كده هحكيلك عليه بعدين..اطلعي بس وخدي بالك من نفسك
مروه:حاضر وانت كمان
••وطلعت ومصطفى اتحرك على اللوكيشن..وأثناء ما كانت مراته داخله العماره كان الاسانسير بايظ..ولما لقيته بايظ قررت تطلع على السلم وهى طالعه بيجي حد من وراها بيحط قماشه فيها مخدر على وشها وبتقع! ••
الفصل الثامن
••بعد ما مصطفى وصل لـ مكان رشاد..نزل من عربيته وراحله••
مصطفى:ايه اللي حصل؟
رشاد:زي ماقولتلك كده..سلك الفرامل مقطوع..هو مفيش غيره اللي يعمل العامله دي!
مصطفى:طيب وريني
••وراح يبص لقاه مقطوع فعلاً..و بانت عليه ملامح الغضب••
مصطفى(بعصبيه) :انا مش فاهم هو عايز مننا ايه؟ وعايز يوصل لـ ايه بالظبط!
رشاد:ضياء ناوي على موتنا زي ماعمل في دينا وأهلها!
مصطفى:احنا لازم نمشي من البلد دي وإلا هنعيش في حرب معاه طول حياتنا!
رشاد:ويبقى انتصر علينا يامصطفى؟؟..يبقى وصل لـ غرضه؟
مصطفى:انا مابقتش حاسس بالأمان بعد كل اللي بيحصل..بقيت خايف علينا كلنا
••وأثناء ماهو كان بيتكلم..كان بيبص حواليه لحد ما لمح بانر بإسم الدكتور النفسي! ••
رشاد: انا مش همشي واللي يحصل يحصل..مبقاش في حاجه تاني تحصلي!
مصطفى:هو انت كنت بتعمل ايه هنا؟
رشاد(بتردد) :كنت عند واحد صاحبي
مصطفى(بـ شك) :غريبه يعني خصوصاً انك مش عايز تقابل حد!
رشاد:انت عارف ان نفسيتي تعبانه وكان لازم أغير جو
مصطفى:ماشي يارشاد..تعالى اركب معايا وهنسحب العربيه لحد البيت
رشاد:مش هتعرف..دي محتاجه عربيه أكبر منها تشدها
مصطفى:تعالى بس نجرب
••وبالفعل راح مصطفى يجيب من شنطة عربيته..الحبل..وربط عربيته بـ عربية رشاد..وركبوا العربيه وكانوا ماشيين براحه لحد ماوصلوا لحد البيت..ونزلوا يزقوها..لحد مااتركنت عند الرصيف••
رشاد:ربنا ميحرمنيش منك ولا يحطك في شده يامصطفى
مصطفى:خد بالك من نفسك يارشاد..وبلاش تخبي علينا أي حاجه!
رشاد:حاضر..تصبح على خير
مصطفى:وانت من اهله
••طلع رشاد في شقة أهله..ومصطفى رجع على بيته..ولما جه يفتح الباب لقاه مقفول ٣ قفلات مش قفله واحده وده يدل ان مروه مدخلتش الشقه أصلاً!••
مصطفى:يمكن قافله على نفسها من جوا..حقها تخاف بعد كل اللي بيحصل!
••ولما دخل الشقه ملقاش مروه!••
مصطفى(بصوت عالي) :مروه...انتي هنا؟....روحتي فين بس!!
••ولف في الشقه كلها ملقاش مروه!..وفي الوقت ده حس بـ دوخه وخاف من اللي بيفكر فيه!..لحد ماطلع موبايله واتصل بيها مكنتش بترد!••
مصطفى:يانهار اسود!!
••وافتكر الحوار اللي دار مابينهم لما كانوا بيتخانقوا!••
<فـلاش بـاك>
مروه:لسه فاكر ترجع بيتك دلوقتي؟
مصطفى:انا لقيت رشاد..والحمدلله رجع وسطنا تاني
مروه:مش مشكلتي يامصطفى..انت دورت على نفسك..مفكرتش فيا ولا في اللي كان ممكن يحصلي..دخلتونا وسط المشاكل والقرف!..مابقتش لاقيه الأمان وسطكم..وحاسه إن في أي لحظه ممكن يا ااتخطف يااتقتل
مصطفى:خلصتي كلامك يامروه؟..انا بس عايز أسألك سؤال..ايه الانانيه اللي انتي فيها دي؟..انتي مش همك غير نفسك وبس؟..كل حاجه انا انا انا..طب وانا فين؟
__________________________
مصطفى(مصدوم) :كان عندها حق!!..انا ازاي معملتش حساب للحظه زي دي!!...مروه اتخطفت!!!!!
••وكان بيلف حوالين نفسه مش قادر يستوعب!..وكل مايتصل بيها مابتردش!.. ومن كتر قلقه وعصبيته كسر الفازه اللي جنبه وكان زي المجنون!••
مصطفى(بزعيق) :هو الكلب ده عايز مننا ايه؟؟؟...خناقة العربيه ده حوار ميدخلش دماغ عيل صغير...ميحطناش في دماغه اوي كده إلا وفي حاجه كبيره حصلت!..قسما بالله لو مروه حصلها حاجه انا ما هحله!
••ونزل من الشقه وركب عربيته وكان سايقها علي أعلى سرعه••
<تـانـي يـوم عـنـد دالـيـدا>
••صحيت من النوم لقيت نفسها لابسه لبس تاني غير فستان الفرح..وبتبص لقيت سامي نايم جنب منها!..اتصدمت..ودقات قلبها زادت..وقامت تبص على نفسها في المرايا..ولسه هتهرب من الأوضه..لقيت سامي بيشدها من ايدها وعينيه كلها شر••
سامي:رايحه فين ياعروسه؟
داليدا:ابعد ايدك دي!
سامي:وابعدها ليه ان شاء الله؟..مش انا جوزك برضه ولا ايه؟
داليدا(بزعيق) :مين اللي غيرلي الفستان!!!..وايه اللي حصلي انا مش فاكره حاجه!!!
سامي(ببرود) :هيكون مين يعني..اكيد جوزك اللي هو انا
••راحت داليدا ضارباه بالقلم على وشه••
داليدا(بزعيق) :انت ازاي تعمل كده!!..وبأي وجه حق!!
••قرب منها ولَوَا ايديها لـ ورا بكل غل..وابتدا يجز على أسنانه ويتكلم بـ عصبيه••
سامي:انتي عيارك فلت..شكل عمي معرفش يربيكي..بس انا اللي هربيكي ياداليدا..وهعرفك ازاي تحترمي جوزك!
داليدا(بزعيق) :ابعد عن وشي بقى انا مش عايزاك!!
••وزقيت ايده وكل ماتيجي تمشي..يشدها ناحيته بـ غل..لحد مازقيته جامد راح واقع على السرير وهى طلعت تجري..وجات تفتح باب الشقه كان مقفول بالمفتاح!••
سامي(بزعيق) :ليه فاكراني عبيط أسيبلك الباب مفتوح؟؟..ادخلي جوا..وشويه ومرات عمك قصدي حماتك هتيجي وتفتحلنا
داليدا(بزعيق) :ده مش جواز ده سجن!!
سامي(بزعيق) :ادخلي جوا بقولك..مشوفش وشك برا
••وسحبها من شعرها لحد الأوضه وقفل عليها بالمفتاح.. فضلت تصرخ وتخبط وهو ولا هنا!.وأثناء ماهى بتخبط حسيت بـ ألم! ••
داليدا(بتعب) :اه..افتحولي..افتح ياكلب!..افتحلي انا مش هسيبك!
••وشويه وجه أهله بـ صنيه فيها أكل••
حسناء:لولولولولولوي افتح يا سامي
••راح سامي فاتحلهم..وأول ماشافته حضنته هى وأخته••
صفاء:الف مبروك ياحبيبي
سامي:الله يبارك فيكي يا صفاء عقبالك كده
ماهر:امال العروسه فين؟
سامي:جوا..دي طول الليل تتمكيج ومدلعاني أحلى دلع
حسناء:يبقى حسيت بـ قيمتك!
سامي:اه طبعاً..ادخلوا البيت بيتكم
حسناء:لولولولولوي
••وحطيت الأكل على الترابيزه،وسامي فتح لـ داليدا..راحت خارجه وهى بتعيط••
حسناء:ايه ده مالك بتعيطي ليه؟
داليدا:انتي عارفه كويس انا بعيط ليه!..كلكم عارفين مش انتي بس...ورغم كل ده سايقين الاستعباط
ماهر:عيب الكلام ده يا داليدا متخليهوش يطلع منك..متنسيش ان احنا اهلك وسندك
داليدا:سند ايه؟...انتوا خليتوا ايه للغريب يعمله؟..لما أقرب ناس ليا يعملوا فيا كل ده يبقى سند ايه!..انتوا حيطه مايله اللي يتسند عليكم يقع!
••راح سامي ماسكها ضاربها تاني!..وهى فضلت تصرخ••
ماهر:خلاص ياسامي..شكل داليدا لسه معقلتش بس بكرا تعقل
حسناء:خلاص ياحبيبي متعملهاش حاجه دي مهما كان بنت عمك قبل ماتكون مراتك
داليدا(بزعيق) :حقي عند ربنا!!!..الأقوى مني ومنكم!
صفاء(ببرود) :وانتي كان حد عملك حاجه؟..ولا هو رمي بلا
داليدا(بزعيق) :ان شاء الله كل اللي بتعملوه فيا هيقعدلكم في بنتكم!..كله سلف ودين!
ماهر:جوزك لما بيضربك فا هو بيعلمك اللي انتي متعلمتيهوش في بيت أبوكي..الله يرحمك يا طاهر ياخويا..ده حتى ضرب الحبيب زي أكل الزبيب.. مش كده ولا ايه ياحسناء؟
حسناء:امال ايه..انتي بس متعصبيهوش ومتخرجيهوش عن شعوره وانتوا هتبقوا كويسين مع بعض مانتي لما بتعصبيه هتخليه يمد ايده عليكي والست الذكيه متخليش جوزها يوصل للمرحله دي..كل حاجه بالعقل
داليدا(بزعيق) :انا ولا كأني سمعت حاجه..كل ده جهل..وديتوا فريده فين؟؟
صفاء:اختك نايمه بتاكل رز باللبن مع الملايكه..شويه وهنصحيها علشان تفطر
داليدا:انتوا لو عايزين الجوازه دي تكمل..يبقى انا ليا شرطين..لو اتنفذوا انا هعيش خدامه تحت رجليكم ومش هفتح بؤي بـ كلمه!
سامي:وانتي مين قالك ان بشروطك دي الجوازه هتكمل؟..هى هتكمل اه بس بمزاجي انا
داليدا(بزعيق) :حسبنا الله ونعم الوكيل فيكم..انتوا ايه يهود!
سامي(بزعيق) :احترمي نفسك ياداليدا انتي ايه مابتحرميش وعالطول لسانك طويل؟؟
••راحت حسناء شداه ورايحه بيه ناحية الأكل••
حسناء:سيبك منها..انا عايزاك تاكل وتتغذى ده انت ياحبيبي لسه عريس جديد وعايز اهتمام
سامي:انا مكلتش حاجه من امبارح
حسناء:يلا مد ايدك وكل بسم الله...يلا يا داليدا ياحبيبتي ده انتوا عرسان جداد ولازم تاكلوا أحلى أكل..إن مكناش نهتم بيكم دلوقت امال هنهتم امتى؟
••سكتت داليدا وراحت داخله الأوضه••
صفاء:مالها دي مش عاجبها حاجه كده ليه؟
<عـنـد مـصـطـفـى>
••أول ماالنهار طلع..راح يعمل بلاغ في القسم بـ خطف مروه..وكان خايف حد من أهلها يعرف اللي حصل!..وبعد ماخرج من القسم..لقى رشاد بيتصل بيه••
مصطفى:الو
رشاد:مروه اتخطفت مش كده؟
مصطفى(بصدمه) :انت عرفت الكلام ده منين؟
رشاد:انا جاتلي مكالمه من شويه..فيها تهديد جديد
مصطفى(بعصبيه) :كل اللي بيحصل ده وراه حاجه احنا لازم نعرفها!..أكيد كل اللي بيحصل ده له سبب منطقي..ماهو مفيش واحد عاقل هيعمل المصايب دي كلها لمجرد ان عربيته اتخبطت!
رشاد:ده نفس اللي انا بفكر فيه..انا عايز افهم برضه!
مصطفي:طب بقولك انت في البيت؟
رشاد:ايوه لسه منزلتش
مصطفى:طيب اجهز هنروح لـ بابا في الشغل انا عايز أفهم منه حاجات كتير هموت وأعرفها!
رشاد:خلاص تمام
••وبعد ماقفل مع أخوه..ركب العربيه وراحله تحت البيت••
<عـنـد مـايـا>
••كانت بتحاول تقرب من شادي بأي طريقه علشان تكسب قلبه وتطلع بكل المعلومات المطلوبه!..اتقابلت معاه في الجامعه وبالتحديد كانوا قاعدين على كرسي في الجنينه••
شادي:هو انا اه عارفك من كام يوم بس بجد حاسسهم سنين
مايا:ده نفس احساسي برضه..هو انت صحيح شغال ايه؟
شادي:انا شغال مع والدي..بساعده في الحرف اليدويه
مايا(في سرها) :برضه مش هيقول انه شغال مع ضياء لاشين!..انا شكلي هتعب معاه اوي لحد ماطلع بـ معلومه!
مايا:طيب والدخل بيكفي عيشتكم؟
شادي:اه الحمدلله بيكفي ويفيض كمان..وانتي مش بتشتغلي؟
مايا:انا بشتغل في جاليري ساعات ودهب وكده يعني
شادي:شغل خاص بيكي ولا مع حد؟
مايا:لا خاص بيا طبعاً..أكيد مش هشتغل مع حد يعني
شادي:طيب كويس...بس يعني بتعرفي تديري الشغل لواحدك؟
مايا:بص هو انا في الأول كنت تايهه شويه ومش عارفه حاجه..دلوقتي الموضوع اختلف وبقيت عارفه كل حاجه وطبعاً الفضل لـ بابي
شادي:انا بفكر أغير الشغلانه بتاعتي..وأفتح مشروع خاص بيا..مابقتش لاقي راحتي في الشغل ده..وحاسس ان لو غيرته هتقدم للأحسن
مايا: حلو... طيب ماتعمل كده فعلاً ايه اللي مانعك؟
شادي:راس المال..هو أساس أي مشروع
مايا:مش انت قولت ان شغلانة باباك بتكسب فلوس كتير..يبقى فين المشكله؟
شادي:المشكله ان أكيد محدش هيغامر خصوصاً انه مش عارف هل المشروع ده هينجح ولالا!
مايا: صح برضه لانه ممكن يفشل بعد الشر يعني
••جات ليلى صاحبة مايا.. وهى مبتسمه••
ليلى:هاي
مايا:هاي ليلى..عامله ايه؟
ليلى:بخير..ازيك؟
شادي:تمام الحمدلله
ليلى:مش هتحضري المحاضرات معايا؟
مايا:لا هحضر طبعاً امال انا جايه اعمل ايه!
شادي:طيب انا همشي بقى..عايزين حاجه؟
مايا:لا ميرسي
شادي:سلام
مايا:باي
••ومشى كل واحد فيهم من طريق••
ليلى:انا ملاحظه انك قاعده معاه ليل نهار..هو في حاجه مابينكم؟
مايا:لا طبعاً.. شادي ده بعتبره أخويا!
ليلى:بس لايقين على بعض اوي محستش انكم تنفعوا اخوات
مايا:لا احنا اخوات وبس مش اكتر من كده!
ليلى:ماشي ياستي..عايزاكي معايا بعد المحاضرات نشتري شوية حاجات
مايا:اوكي
<عـنـد فـريـده>
••كانت قاعده على السرير بتعيط..وفي الناحيه التانيه صفاء ماسكه الموبايل وبتضحك!..دخلت حسناء••
حسناء:يلا يا صفاء عشان تاكلي
صفاء:ماشي
••وطلعوا يقعدوا في الصاله على الأكل••
حسناء:كل ياماهر بسم الله ده انت بتتعب في الشغل
ماهر:ايوه ده ربنا العالم بيا..عايزك تبقي تحطيلي بقيت الأكل في علبه آخده معايا الورشه..اصل بجوع وانا بشتغل..ومش عايز اتعب حد فيكم واقوله هات واعمل وتعالى
حسناء:حاضر.. طب مش الأكل يحمض كده؟
صفاء:اه ممكن يحمض..انت تحطه في التلاجه يا بابا..ووقت الأكل تسخنه على البابور
حسناء:العلبه تسيح ياخايبه
صفاء:لا ماهو أكيد مش هيحط العلبه على النار..انا أقصد ياخد معاه حله يسخن فيها الأكل
ماهر:فكره برضه...دماغك دي متكلفه ياصفاء
صفاء:طبعاً يا بابا طالعالك
حسناء:يانهاري احنا نسينا فريده
صفاء:استني لما نخلص لو اتبقى حاجه دخليهالها
ماهر(بيضحك) :هههه ده لو اتبقى بقى..الاكل هيتنسف من حلاوته
حسناء(بتضحك) :بألف هنا وشفا.. كلوا كويس
<عـنـد فريده جوا >
••كانت لسه بتعيط..وعايزه تطلع لأختها ولكن مش عارفه!..لحد ماخرجت من الأوضه••
فريده:انا عايزه أطلع اقعد مع داليدا شويه
صفاء:علشان تقعدوا مع بعض وتخططوا؟
فريده:لا احنا مش بنخطط..هى بس وحشتني وعايز أشوفها
ماهر:اطلعي لـ أختك يا فريده
••راحت حسناء غمزاله واتكلمت بصوت واطي••
حسناء:هو ايه اللي تطلع!.. الا تهرب ياماهر!
ماهر:لا الباب مقفول بالمفتاح..مش هتعرف
••طلعت فريده وخبطت على الباب..واللي فتح هو سامي••
سامي:طالعه تباركي لأختك ولا ايه؟
فريده(بحزن) :ايوه..مبروك
سامي:الله يبارك فيكي
••ودخلت تخبط على باب الأوضه لحد ما داليدا فتحت..وأول ماشافتها خدتها بالحضن وفضلوا يعيطوا..وسامي واقف بعيد يتفرج••
داليدا(بعياط) :وحشتيني اوي يا فريده
فريده(بعياط) :وانتي كمان اوي..انا نفسي أخدك ونمشي من هنا!
داليدا:هيحصل قريب ان شاء الله
سامي(بتريقه) :بتتوشوشوا بتقولوا ايه؟
فريده:انا بقولها ان هى وحشتني
سامي:ساعه بتقوليلها وحشتيني؟
••بصيتله داليدا بكل غل..وخدت اختها ودخلوا الأوضه وهو طلع البلكونه يبص منها••
فريده:احنا لازم نلاقي حل في أقرب وقت
داليدا:انا مابقتش عارف أفكر..حاسه ان انا اتبدلت لـ واحده تانيه معرفش عنها حاجه!..مش انا داليدا اللي كل الناس كانت بتحلف بـ شجاعتها وقوتها..انا ازاي حصلي كل ده!..ليه بابا سابنا في الدنيا لواحدنا؟..انا بجد تعبانه اوي ومش عارف اتصرف
فريده:انتي معاكي رقم أستاذ رشاد صح؟
داليدا:ايوه بس انتي عايزاه ليه؟
فريده:ممكن اكلمه ويساعدنا!
داليدا:طيب خدي رقمه بسرعه
••وشدت موبايل أختها وكتبتلها رقم رشاد..وبعد ماخلصت لقيت سامي جاي عندهم••
فريده:مبروك ياسامي
سامي:عقبالك كده نشوفك وانتي في بيت عريسك
فريده:انا هنزل يا داليدا اقعد مع مرات عمي
داليدا:ماشي
سامي:ربنا يزيد المحبه بينا
<عـنـد رشـاد و مـصـطـفـى>
••دخلوا مكان شغل باباهم..في بنك!••
_ازيك يااستاذ رشاد..ازي حضرتك يااستاذ مصطفى؟
رشاد:الحمدلله
_نورتوا البنك
رشاد:شكراً بنورك
••ودخلوا لـ باباهم في مكتبه..وكان معاه ناس••
مصطفى(بحزن) :عايزك في موضوع مهم
والد رشاد:حاضر...خلاص ياحاج كارم.. كله تمام كده؟
=ايوه مش عارف أشكرك ازاي على وقفتك جنبي
والد رشاد:لا شكر على واجب..اتفضلوا
••خرج الناس من المكتب، وقعد مكانهم رشاد ومصطفى••
والد رشاد:مالكم فيكم ايه؟..مالك يامصطفى مالك؟
مصطفى(بتردد) :مروه اتخطفت يا بابا
••وأول ماسمع اللي مصطفى قاله..راح قايم في ساعتها••
والد رشاد:يانهار اسود..يادي المصيبه اللي حلت فوق دماغنا!!..اتخطفت ازااااي؟؟؟ ماترد!!
مصطفى(بحزن) :امبارح..رشاد كلمني علشان في حد عمل فيه حركه كان قاصد بيها يخلص عليه..حد قطعله سلك الفرامل في العربيه..ولما كلمني يستنجد بيا روحتله..ومروه طلعت لواحدها.. ولما رجعت ملقيتهاش في الشقه اصلاً!!
رشاد(بحزن) :احنا جايين نفهم منك ده ايه؟
والد رشاد:يعني ايه جايين تفهموا مني؟ وانا مالي انا هعرف منين؟
مصطفى:ايه اللي حصل بينك وبين ضياء لاشين خلاه حاططنا في دماغه اوي كده؟
••وبمجرد ان مصطفى سأله..اتغير وش باباهم واتوتر••
مصطفى:مش قولتلك يارشاد ان في حاجه هو مخبيها علينا؟
رشاد:فهمنا بقى بدل مااحنا بنلف حوالين نفسنا كده!
والد رشاد:محصلش حاجه هيكون حصل ايه يعني؟
مصطفى(متعصب) :لا حصل!!.. وانا متأكد انه حصل!
<فـلاش بـاك>
••كان والد رشاد "ساهر" بعد ماعرف ان ضياء لاشين بيهدد وجدي اللي هو "حما رشاد".. بما انهم صحاب..قرر انه يبعتله ناس لحد باب بيته يضربوه!..ولما فشلوا ومكنش موجود في البيت..كان هو شايف كل حاجه من كاميرا المراقبه..لحد ماابتسم ابتسامه خبيثه وقال••
ضياء لاشين:ههههه عمركم ماهتعرفوا مهما حصل!
••وفي نفس اليوم كان ضياء باعتله واحده تعمله فضيحه في البنك..ودي حاجه هو كان مخبيها على أسرته••
الست:هو فين الحاج ساهر..ضحك عليا ياناااس..ناصب عليا في ٣ مليون جنيه..وكله بالاثبات قدامكم..ده حق ست...هاتولي حقي من النصاب اللي ضحك عليا وقش فلوسي
••خرج والد رشاد وهو مستغرب لانه ميعرفهاش••
والد رشاد(بزعيق) :انتي مين؟؟
الست(بزعيق) :انت هتستعبط مانا وانت عارفين اللي فيها...رجعولي حقي بدل مااموت نفسي هنا وألبسكم مصيبه
والد رشاد(بزعيق) :طلعوها من هنا.. دي كدابه.. انا معرفهاش. يلا برااا.. براااا
••والأمن خدوها برا..والنار ابتدت تزيد عند والد رشاد••
الست(بزعيق) :هتروح مني فين ده مصر كلها أوضه وصاله
••ومن بعدها قرر ينتقم منه..والمشكله كبرت من حاجه بسيطه..ولكن الشيطان كان قائد عقل ضياء!••
________________________.
مصطفى:برضه مش مصدق..الكلام ده ميدخلش دماغ عيل صغير.. انا عايز سبب منطقي ومقنع يدخل العقل!
والد رشاد:ده اللي عندي.. انا معنديش حاجه زياده
رشاد:لا انت عندك ومخبي..وكل اللي قولته ده مش مقنع
والد رشاد(بعصبيه) :عايزين تصدقوا صدقوا.. مش عايزين براحتكم ده اللي عندي
مصطفى(بحزن) :انا هعمل ايه طيب؟..انا بقيت متمسمر مكاني..مش عارف الاقي حل!!
رشاد:انت قدمت بلاغ صح؟
مصطفى:ايوه
رشاد:ان شاء الله هنلاقي يوسف ومروه
مصطفى(بحزن) :يارب
<عـنـد دالـيـدا>
••كانت كل دقيقه بتعدي عليها..كأنها سنه..مكنتش بتعمل أي حاجه غير انها بتحاول تخطط وتلاقي حل..افتكرت ذكرياتها مع اهلها وهى صغيره!..لما كانوا رايحين الملاهي!..كانت حاسه بالأمان ومتطمنه وسط أهلها..عكس دلوقتي خالص••
سامي:انا عندي سؤال مجنني...هو ازاي انتي مكنتيش عايزه تتجوزيني..ماهو اللي مش عايزه تتجوز واحد فا علشان في واحد تاني..يطلع مين هو بقى؟
داليدا(بقرف) :وانت مالك..خليك في حالك وسيبني انا في حالي!
سامي:ماهو أصل اللي تتجوز واحد وهى بتحب واحد تاني تبقى مش تمام
داليدا:ده لما تبقى متجوزاه بمزاجها مش غصب عنها!!..انت اتفرض عليا وجودك في حياتي...انا الحاجه الوحيده اللي هفضل ندمانه عليها طول حياتي..ان مهربتش قبل مااتدبس في الجوازه الزفت دي!
سامي:مش كفايه واخدك عدم اللمؤاخذه..تم استخدامك من قبل؟
••قامت داليدا..وابتدت تنهار من اللي سمعته••
داليدا(بزعيق) :انت حقيررررر... حقيررررر.... زبااااااااله..انا ضوفري برقبة 100 كلب زيك..والله لأوريك واعرفك ان الله حق
سامي:انا اللي هفضحك وهعرف الناس كلها انك زباله..مين اللي كنتي تعرفيه قبلي انطقي!!!!
داليدا(بصويت) :أخرس بقى..انت ايه؟
••وضربته بالطبق على دماغه بكل قوتها..راح واقع في الأرض!••