![](https://blogger.googleusercontent.com/img/b/R29vZ2xl/AVvXsEgz99flgJmcSczzfFlmHgVhgStCe54KvrL7PLwF6TAWJzpKCMAKhsYU_fR7iHUPeNFUgpVw3WNOBQlPnyihPoq8tLBAnyd1aXpCTuouuCCaNGXFDe5e10UiWXpyx7RGUlB-1seknk5a4fQqDGPy45ID7odmABBkeM9SIYWeFtQW_RelpHjoFi0jg8c_kFHP/s320-rw/FB_IMG_1715129783007.jpg)
رواية غرام مع الايام الفصل الحادي عشر11بقلم اسراء ابراهيم
فجاة اتحولت ملامح ادهم للغضب وهو شايف غرام واقفة قدام العربية وبتتكلم مع مراد اللي لسة طارده من شوية وكمان بتبتسم ليه فاخد ادهم تليفونه وجري علي تحت بس اتفاجأ لما نزل ان غرام واقفة لوحدها فقرب عليها وسألها بغموض وشك :
انتي نزلتي من العربية ليه ؟
غرام اتوترت وبصت بعيد عن عيون ادهم احسن يكشف كدبها وقالتله :
ممفيش انا بس جولت اشم هوا احسن العربية مجفلة وخنجة جوي
قبض ادهم علي ايده بغضب لان غرام كدبت عليه ومن جواه كان نفسه تقؤله الحقيقة بس بكدبها خلت تفكيره يروح لبعيد جدا ،، مردش ادهم علي غرام ولف وركب العربية وغرام اتنهدت براحة وهي مفكرة انها متكشفتش وركبت هي كمان وطلع ادهم بالعربية من غير ولا كلمة
مش هتطلعي تقابلي شادي يا داليا
قالتها فاتن وتبقي ام داليا وهيا بتقعد قدام بنتها بحيرة اما داليا فكانت في عالم تاني كل تفكيرها في اسلام وانه من يوم اللي حصل وهو دايما بيكلمها يطمن عليها وعمره ما حسسها انه كان بيساعدها عشان بس مصلحته وكانت مخنوقة اوي وحاسة انه واحشها اووي لانها بقالها يومين مشفتهوش او هو بيتلكك بشغله عشان ميقابلهاش مع انهم بيتكلمه في التليفون كتيير اوي ،، فاتنهدت داليا بضيق وهي بترد علي امها وبتقول:
لا يا ماما انا مش هخرج ومش عاوزة اشوف حد
استغربت فاتن وقالت لداليا بشك :
وده من امتي يا بنت بطني ،، امال انتي سيبتي اسلام خطيبك ليه،، مش عشان سي شادي بتاعك مع ان الواد اسلام زي الفل ميتعيبش ،، بس اقول ايه انتي اللي ماشية ورا قلبك اللي هيغرقك ده ،، و يوم ما شادي يجي وعايز يرجعلك تقولي ابصر ايه ،، فهميني انتي دماغك فيها ايه بالظبط
اضايقت داليا من كلام امها وفجأة قالت بحد*ة وصوت عالي:
هيكون فيها ايه يا ماما ،، ايوة انا كنت بحب شادي مش بنكر ده ،، كنت بحبه ومش شايفة حد في الدنيا غيره ،، بس دايما كنت خايفة من انه يعمل فيا زي ما عمل بابا فيكي ،، يسيبني ويتجوز عليا واحدة تانية ،، دايما كنت بقعد اقؤله وافهمه بس هو فهم خوفي غلط ،، فهم غيرتي عليه انه شك مرضي ،، مع اني مكنتش محتاجة غير انه يطمني ،، لا ما شاء الله اول خلاف بينا اتفاجأت بيه في الشارع جاي وواحدة في ايده ،، كدة واحنا لسة عالبر ،، اومال لو كنا متجوزين كان عمل ايه ،، ودلوقتي اأمنله ازاي واثق فيه ازاي يا ماما
قالت داليا اخر كلامها وهي بتعيط وامها حست بيها وكر*هت جوزها اكتر لانه ربي لبنته عقدة بسبب جوازه من واحدة تانية واخدت فاتن داليا في حضنها وطبطبت عليها وهي بتقول بهدو
صوابعك مش زي بعضيها يا داليا ،، افهمي يا حبيبتي ان مش كل الرجالة عنيها ز*ايغة ومش كل الرجالة بيتجوزو تاني وتالت ،، انا مش عايزاكي تتعقدي من ابوكي ،، وتد*مري حياتك بايدك يا بنتي ،، فكري يا بنتي كويس وافتي قلبك وهو هيدلك علي الصح ودوري دايما علي اللي يحبك ويعمل المستحيل عشان يسعدك واهم حاجة يا داليا انه وقت الزعل متهونيش عليه وميحاولش يكسر*ك
سرحت داليا في كلام امها وافتكرت اسلام وكل اللي عمله عشانها وانه كان عنده امل انها تشوفه وتحبه ورغم انها يعتبر رفضته الا انه دايما معاها مسبهاش ولما بتكلمه بيرد عليها وبيحاول يبقي طبيعي معاها كانه صديق وابتسمت داليا بحنين ليه وانه واحشها اوي فقامت بسرعة من عالسرير واستغربت امها وقالتلها :
ايه خلاص هتطلعي تقابلي شادي
حركت داليا راسها بموافقة وقالت بابتسامة :
انا هطلع اقول لشادي اني متأسفة بس مش هقدر ارجعله لاني مخطوبة لراجل غيره
استغربت فاتن وقالت بصدمة :
مخطوبة لمين يا اخرة صبري ،، انا مبقتش فاهمااكي
داليا لبست طرحتها وباست امها من خدها وهي بتقول قبل ماتخرج من القوضة :
مخطوبة لاسلام يا ام داليا ،، انتي نسيتي
ابتسمت فاتن بفرحة وفهمت انها حبت اسلام وهتروح تتكلم معاه وفعلا خرجت داليا ووقفت قدام شادي وهي بتقول بابتسامة هادية:
ازيك يا شادي ،، اسفة لاني اتأخرت عليك
شادي ابتسم بحب ورد بكلام مقصود:
بالعكس انتي جيتي في وقتك بالظبط يا داليا
ابتسمت داليا بجدية بعد ما فهمت قصد شادي وردت بنفس طريقته:
انت كنت عايزني في حاجة مهمة ،، اصل كنت خارجة مع خطيبي
كشر شادي بصدمة وهو بيقؤل بتهتهة :
خطيبك ازاي ،،انتي مش سبتي اسلام
ابتسمت داليا وردت باستغراب :
سبت خطيبي ،، مين قالك كدة ،،احنا مش هنسيب بعض او بالاصح اسلام عمره ما يتخلي عني ابدا لانه بيحبني وانا كمان بحبه
شادي فهم انه خسر داليا للابد وخصوصا انه سمع كل الكلام اللي قالته لامها جوة عنه بس لاخر لحظة كان عنده امل انها ترجعله وساعتها هيصلح كل حاجة بس للاسف خلاص مش هيحصل ،، قام شادي من مكانه وهو بيبتسم بحزن باين في عيونه :
اتمنالك السعادة يا داليا ،، همشي انا ،، مع السلامة
خرج شادي وكانت متابعاه داليا بعنيها وهي متأكدة من جواها ان هو ده القرار الصح اللي عمرها ما هتندم عليه ابدا وخرجت داليا ورا شادي بس عشان تروح لاسلام وتعترفله انها حبته وانها موافقة تكمل حياتها معاه