رواية جوازة ميراث الفصل السابع والعشرون27والثامن والعشرون28بقلم رانيا عماره
••أول ما مروه شافت ضياء ماسك البرشام في ايده..قامت من مكانها وهى مرعوبه..لحد ماهو اللي قرب منها بكل غل••
ضياء(بصوت حاد) :البرشام ده بيعمل ايه في الدولاب بتاعك؟؟
مروه(بخوف) :ده.. ده...ده...البرشام ده مش بتاعي
ضياء(بضحكة سخريه) :هاهاهاها القصر كله من أوله لآخره مفيهوش غيرك!..الرجاله بتوعي هياخدوا البرشام ده ليه؟؟..منين انا مبقربش منك...ومنين بتاخديه؟؟
مروه:اه هقولك..ده علشان عندي شوية مشاكل والبرشام ده الدكتور كاتبهولي علشان يعالجها
••قرب منها ضياء أكتر وشدها بقوته من شعرها••
ضياء(بعصبيه) :انا مش هعيد كلامي تاني!..البرشام ده بيعمل ايه عندك؟..لو منطقتيش انا هقتلك يامروه!
مروه(بعياط) :صدقني انا باخده علشان يعالج المشاكل اللي عندي مش زي مانت فاهم خالص!..ضياء هو انت بتشك فيا؟
ضياء(بعصبيه) :يا كلااااب...اجمعوا هناااااا
••جم رجالته ووقفوا جنب بعض..وساب مروه وفضل ماشي قصادهم يبص لكل واحد فيهم..ورجع بصلها تاني••
ضياء:مين فيهم؟؟؟
مروه(بصويت) :هو ايه اللي مين فيهم؟؟..انت بتشك فيا بجد؟؟..معقول انا هخونك برضه؟..ضياء انت فاهم غلط!.. ولو مش مصدقني تعالى معايا للدكتور وأثبتلك كلامي!
ضياء(بزعيق) :زيك زي لميس متختلفيش عنها في حاجه.. كلكم شوية كلااااب..متسووش ربع جنيه!..انا هدوس عليكم بأوسخ جزمه عندي زي الحشرات
مروه(بخوف) :صدقني يا ضياء انا مبعملش أي حاجه غلط!
ضياء(بزعيق) :اخرسي
••وضربها بالقلم على وشها، وشدها من شعرها وفضل جاررها من شعرها وهى بتصوت••
مروه(بصويت) :ضيااء انا معملتش حاجه..صدقني انا مبكدبش!..ياضياء ابوس ايدك... شعري ااااه
••لحد مادخل بيها في أوضه مُريبه..ونده على رجالته••
ضياء(بزعيق) :تعالوا هنااااا... يلااا خلصواا
••جم وهما خايفين من شره••
ضياء:كل واحد فيكم هيقتلها بطريقته
مروه(بصويت) :لا ابوس ايدك... ابوس ايدك ورجليك... ابوس على راسك علشان خاطري ياضياء... والله ماعملت حاجه...ابوس ايدك متعملش فيا حاجه
ضياء(بزعيق) :اخرسي يلاااااا
••وبعد ماربطوا مروه..قرب كل واحد منهم علشان يقتلها بطريقته..الأولاني ضربها بـ طلقه في بطنها..والتاني ضربها طلقه في دماغها..والتالت ضربها بـ سكينه في رقبتها!..ولما جه دور الرابع مقدرش يعمل حاجه وخاف..راح ضياء ماسكه من رقبته••
ضياء(بزعيق) :كنت عارف انه انت.. بس حبيت اتأكد بطريقتي
••وفي ساعتها كان طلع المسدس و قتله قبل مايرد..وبعد ما مروه ماتت وطى يتأكد ولما اتأكد خد نفس عميق..وقام••
ضياء:جهزولي الحمام..داخل استحما
_تمام ياضياء بيه
<عـنـد رشـاد و دالـيـدا>
••طلعوا أهل رشاد عندهم في الصباحيه..وكانوا واقفين يستقبلوهم على الباب ••
فريده(بتحضنها) :الف مبروك ياداليدا
داليدا:الله يبارك فيكي يافريده ياحبيبتي
سلمى(بتحضنها) :مبروك ياعروسه
داليدا:الله يبارك فيكي يا سلمى
عائشه(بتحضنها) :مبروك يا حبيبة قلبي يا قمرايه
داليدا:حبيبتي ياطنط
عائشه:ههههه لا بلاش طنط دي بعد كده!..قوليلي يا ماما
داليدا:أحلى ماما في الدنيا
عائشه:طالعه من بؤك زي السكر
والد رشاد:مبروك ياعروسه
داليدا:الله يبارك في حضرتك يااونكل
مصطفى:اتجوزت خلاص وسيبتني؟
رشاد(بيضحك) :سيبتك فين مانا فوقيكم اهو
داليدا:تعالوا اتفضلوا
••ودخلوا يقعدوا في الانتريه••
والد رشاد:عامل ايه في الجوازه التانيه؟
رشاد:الحمدلله مبسوط ومرتاح جداً طول مانا مع داليدا
والد رشاد(بيضحك) :انت كده هتخليني اقلدك واعمل زيك
عائشه:كده ياساهر؟. وانا ههون عليك برضه؟
داليدا:لا ياماما..اونكل ميقدرش يعمل كده حد يبقى معاه القمر ده ويفكر يتجوز تاني؟
والد رشاد(بيضحك) :كلي بـ عقلنا حلاوه من دلوقتي
داليدا:لا يااونكل دي الحقيقه والله
والد رشاد:لا اونكل ايه.. انتي تقوليلي يا بابا!.. من هنا ورايح انا وعائشه هتقوليلنا..بابا وماما.. احنا في مقام والدك ووالدتك
داليدا:صح يا بابا..انا اخترت اكون جنبكم لاني فعلاً بعتبركم اهلي
عائشه:مااحنا أهلك فعلاً ياحبيبتي..ولعلمك بقى لو رشاد زعلك بنص كلمه..انزليلي واحكيلي كل اللي حصل وانا هربيهولك من أول وجديد
رشاد:وانا أقدر ازعلها برضه؟..داليدا في عينيا الاتنين
سلمى:ربنا يخليكوا لبعض ياحبيبي
رشاد:عقبالك يا سلمى.. وعقبال مصطفى..وعقبال ما اشوفك ربنا معوضك خير زي ماعوضني بـ داليدا
مصطفى:لا انا طلعت الموضوع ده من دماغي خلاص..مابقتش عايز.. انا لواحدي أحسن
عائشه:ليه كده ياحبيبي؟..هو علشان الجوازه الأولى فشلت يبقى التانيه هتفشل زيها؟
مصطفى:خلاص ياماما..انا بجد بتخنق اوي من السيره دي
والد رشاد:سيبيه على راحته يا عائشه
عائشه:حاضر..قوليلي يا داليدا..خالتك هتيجي امتى؟.. انا بجد حبيتها وارتاحتلها
داليدا:وهي كمان حبتكم اوي وبتقول كل خير عليكم..هتيجي كمان شويه ان شاء الله
عائشه:يوصلوا بألف سلامه
داليدا:الله يسلمك ياماما
••راح رشاد قايم يشغل التلفزيون..وداليدا قامت••
رشاد:هشغلكم فيلم أجنبي..بتحبوا الرعب ولا الرومانسي؟
سلمى:الرومانسي طبعاً
مصطفى:انا بحب الأكشن
رشاد(بيضحك) :اذا كان كده هشغلكم رعب
عائشه:ههههه كده تخوفنا يارشاد؟
رشاد:وانا اقدر برضه؟.. بس دي لزوم القعده
والد رشاد:عن اذنكم هقوم ادخل الحمام
رشاد:اتفضل يا بابا ده بيتك
<عـنـد شـادي>
••لم هدومه وقرر يرجع القاهره تاني..وأول حاجه عملها لما وصل قابل مايا وقرر يعترفلها••
مايا:حمدالله على السلامه يا شادي
شادي:الله يسلمك يا مايا..انا مقعدتش يومين هناك على بعض..مابقتش لاقي راحتي وسطهم
مايا:ليه في حاجه حصلت؟
شادي:لا مفيش حاجه حصلت..بس مفيش تفاهم!..المهم سيبك من كل ده طمنيني عليكي..ايه الاخبار؟
مايا:الحمدلله وانت اخبارك ايه..مشوفتكش بقالي فتره!
شادي:الحمدلله..اديكي شوفتيني اهو
مايا:كررها كتير بقى
شادي:على حسب الظروف بس ان شاء الله تتكرر..انا كنت عايزك في موضوع
مايا:موضوع ايه؟
شادي:مش عارف اقولك ايه..بصراحه خايف اتكلم.. فا اندم! مايا:وانت هتندم ليه بس؟..ممكن تتكلم يا شادي؟
شادي:انا...
••راح موبايل مايا رن..والمفروض انها كانت لابسه الهاند فري••
مايا:طيب ثواني هرد وكمل كلامك
شادي:تمام
••حطت مايا الهاند فري وردت على ساهر على المتغطي..راح شادي قايم وعمل نفسه رايح الحمام! ••
والد رشاد :الو يامايا
مايا:ايوه
والد رشاد:عايزك تطلعي بأخبار من شادي عن ضياء بس متخليهوش يحس ان في حاجه..متتكلميش عالطول وحاولي تخلي في مناسبه للكلام!
مايا:حاضر
والد رشاد:تفضلي وراه يا مايا لحد ماتعرفي كل اللي انا عايزوا..اعرفيلي يوسف فين..ومع مين!..مع ضياء فعلاً ولا مروه! ولو حصل وجيبتيلي المطلوب ليكي مكافأة كبيره
مايا:حاضر
والد رشاد:سلام
مايا:باي
••ولـ سوء الحظ..كان شادي سامع كل كلمه بينها وبين ساهر ولما رجع كانت نظراته متغيره••
مايا:ها كنا بنقول ايه؟
شادي:كنا بنقول انك متستاهليش حبي ليكي..دي غلطتي ان عرفت واحده زيك..بقى انا تخدعيني؟؟..وتقربي مني علشان توصلي لمعلومات عن ضياء لاشين؟.. بقى كل الفتره دي وأنتي بتستغفليني يا مايا؟؟
مايا(بخوف) :انت بتقول ايه انا مش فاهمه حاجه!
شادي(بحزن) :لا انتي فاهمه كويس..وعارفه انا بقول ايه..ده انا قولت انك جيتي تعوضيني عن اللي حواليا!..طلعتي ألعن منهم!..فعلاً اللي تفكره موسى يطلع فرعون!
مايا(بخوف) :انا مش فاهمه حاجه يا شادي..ممكن تفهمني؟
شادي:انا سمعت كل الكلام اللي بينك وبين أبو رشاد..وطبعاً انا عارف السؤال اللي بيدور في دماغك دلوقتي..انا سمعت ازاي!.. متقلقيش صاحبتك عملتلك تحويل مكالمات على رقمي
••قامت مايا وهى ومصدومه••
مايا(بزعيق) :صاحبتي مين؟.. انت ازاي تعمل كده!!
شادي(بزعيق) :مش مهم مين!!..المهم انك اتكشفتي!.. اما كنت شاكك بس بكدب نفسي طول الفتره دي ومرضتش اقنع نفسي بكل ده علشان مظلمكيش
مايا:ماهو لو انت عامل Call forwarding فعلاً كان زمانك سمعت كل مكالماتي اللي فاتت
شادي(بزعيق) :قلبي مكنش مطاوعني اتجسس عليكي!!...مكنتش قادر أحطك في الخانه دي!..كان في أيدي اعرف كل حاجه من زمان بس مكنتش قادر أخد الخطوه دي كنت خايف!.. معرفش اشمعنا المره دي عملت كده!.. بس يمكن علشان أكتشف حقيقتك الكدابه!..بتوقعيني في حبك وتخليني اتعلق بيكي وانتي في الآخر بتقربي مني عشان في مصلحه في دماغك عايزه توصليلها؟؟..عملتلك ايه عشان تعملي معايا كل ده!..انا مصدوم فيكي يا مايا ومش مصدق ان انتي يطلع منك كل ده!..انا مش عايز أشوفك تاني
••وسابها ومشى وهى لسه مصدومه ..لحد ماطلعت الموبايل واتصلت بـ ساهر وهى بتعيط ••
مايا(بعياط) :الو يااونكل ساهر..الحقني انا في مصيبه
<عـنـد دالـيـدا>
••كانت في المطبخ بتجهز عصير..وواقفه معاها سلمى وفريده••
داليدا:كفايه عليكي كده يافريده..تعالي باتي في أوضتك بقى
سلمى:ماتسيبيها يا داليدا دي حتى مونساني!
داليدا:عارفه...بس مش حابه انها تتقل عليكم أكتر من كده..وبعدين انتي وحشتيني يا فريده!
فريده:والله وانتي كمان يا داليدا.. بس مش هقدر دلوقتي انتوا عايزين تكونوا لواحدكم شويه
سلمى:مش هينفع فريده تيجي عندك دلوقت لسببين.. أول سبب ان انا بحبها وهى مونساني..وتاني سبب ان انتوا عرايس جداد ومحتاجين تقعدوا لواحدكم عشان تكونوا على راحتكم
••قربت فريده من سلمى وحضنتها••
فريده:والله انا اللي بموت فيكي يا سلمى
داليدا(بتضحك) :ربنا يخليكوا ليا يارب
سلمى وفريده:ويخليكي لينا
••وبرا كان رشاد ومصطفى وعائشه قاعدين قصاد التلفزيون..لحد ما ساهر خرج وهو مستعجل ومرتبك ••
عائشه:ايه ياساهر رايح فين؟
والد رشاد:جالي شغل مهم
عائشه:يعني مش هتقعد معانا؟
والد رشاد:معلش ورايا شغل مهم
عائشه:طيب ربنا معاك
••خرج ساهر من غير مايرد وراح لـ مايا..وبمجرد ما مشى من هنا.. جات خالة داليدا وجوزها وبنتها ومعاهم حاجات••
صابرين:لولولولولولوي
••لحد ماطلعوا على السلم ووصلوا الشقه..وفتحتلهم فريده••
فريده(بتحضنها) :خالتو
صابرين:ازيك يا فريده ياحبيبتي
فريده:الحمدلله..ازيك ياغاده..ازيك ياعمو؟
غاده:الحمدلله
عصام:احم احم..ازيك ياعريس؟
••وقرب من رشاد يسلم عليه••
رشاد:انا بخير.. ازي حضرتك؟
عصام:الحمدلله..ازيك ياام العريس؟
عائشه:الحمدلله بخير..تعالوا اتفضلوا
••وقعدوا ولما داليدا سمعت صوتهم خرجت••
صابرين:لولولولولوي..عروستنا القمر..حبيبة قلب خالتها
داليدا(بتحضنها) :نورتي الدنيا يا خالتو..ازي حضرتك؟
عصام:الحمدلله.. الف الف مبروك ياعروسه
داليدا:الله يبارك فيك وعقبال غاده
غاده:يارب
صابرين:جينا اهو زي ما وعدناكي
داليدا:ده انتوا نورتوا الدنيا والله
عصام:امال الحاج فين؟
رشاد:والله بابا جاله شغل ضروري مينفعش يتأجل
عصام:لا ربنا يعينه
رشاد:يارب
داليدا:هدخل وجايالكم تاني
صابرين:خدي وقتك ياحبيبتي
عائشه:ماشاء الله بنتك عسوله
صابرين:ربنا يخليكي كلك ذوق
<عـنـد سـاهـر>
••كان وصل عند مايا..وكانت منهاره مش عارفه تتصرف••
ساهر:انتي ازاي تسيبي موبايلك لـ صاحبتك؟؟
مايا(بعياط) :غصب عني انا كنت مديالها الأمان..قالتلي هعمل مكالمه من عندك عشان ممعايش رصيد.. وانا مكنتش اعرف ايه اللي بيحصل ولا عمري شكيت فيها!
ساهر:احنا كده كل اللي عملناه باظ..احنا روحنا في ستين داهيه..دلوقتي يروح لـ ضياء ويحكيله كل حاجه..يقوم عامل حاجه في يوسف ويخلص عليه!!!!
مايا(بعياط) :طب اعمل ايه طيب..قولي!
ساهر(بعصبيه) :مش عارف..هاتي رقم شادي
مايا:ليه؟
ساهر:بقولك هاتي الرقم وخلصيني!
مايا:حاضر
••ومسكت موبايلها وطلعت الرقم واديتهوله••
مايا:هتعمل ايه؟
ساهر:مش شغلانتك..سيبيني اتصرف
مايا:حاضر
••راح ساهر متصل بـ شادي من رقمه••
ساهر:الو شادي معايا؟
شادي:اه انت مين؟
ساهر:انا عايز أقابلك ضروري
شادي:ايوه اقابلك بتاع ايه..انت مين؟
ساهر:هتعرف كل حاجه..و متخافش انا عايزك في الخير
شادي:مقابل ايه؟
ساهر:مقابل اللي انت عايزوا بس نتقابل..قولي مكانك فين!
شادي:وانا ايه ضمني برضه انك سكتك تمام؟
ساهر:احلفلك بالله مليون يمين ان سكتي تمام عشان تصدق؟..ده انا بقولك عايزك في الخير!
شادي:تمام..هقولك
<عـنـد دالـيـدا>
••جابت العصير وقعدت معاهم••
صابرين:ربنا يسعدكم ياحبيبتي ويكملكم على خير والسنه الجايه كده يكون معاكم نونه صغيره
عائشه:ادعيلهم.. ده انا نفسي أفرح بيهم!.. ده هو كان حفيد واحد وراح مابقناش عارفينله طريق!
صابرين:بإذن الله الواحد الأحد هتلاقوه..ده ربنا قادر على كل شئ
عائشه:يااارب
عصام:افرحوا بـ شبابكم ده أحلى أيام هى الايام دي..لسه لما المسئوليه تزيد هتقولوا ولا يوم من أيام دلوقتي
داليدا:عندك حق يااونكل..بس هجيب مزاج منين؟..المزاج مش رايق
رشاد:لا يا داليدا احنا اتفقنا نرمي اللي حصل ده ورا ضهرنا.. انتي كده هتخلي خطته نجحت!
صابرين:ايوه اسمعي كلام أستاذ رشاد..ومتخلوش الاعداء يأثروا عليكم..افرحوا وعيشوا سنكم
داليدا:حاضر ربنا يسهل
عائشه:اتفضلوا اشربوا انتوا مكسوفين ولا ايه؟
صابرين:لا نتكسف ازاي ده احنا في بيتنا هو انا غُرب؟
عائشه:لا طبعاً انتوا اصحاب البيت..وبجد نورتوا الدنيا بحالها
صابرين:ده بنورك انتي ياعائشه وبنور رشاد وداليدا وأستاذ مصطفى
<عـنـد ضـيـاء>
••مكفاهوش اللي عمله!..لدرجة انه جاب بنزين ونار وولع في الجثتين وكان واقف بعيد ماسك سجاره في ايده وبيشم دخانها ودماغه في عالم تاني..وبعد ماخلص..دخل الحمام ونزل في الجاكوزي..وفي ايده كاس الخمره••
ضياء(ببرود) :روقان
<عـنـد حـسـنـاء>
••كانت واقفه في المطبخ مع جليله بيجهزوا أكل الخطوبه وهى واقفه كانت دماغها هتنفجر من التفكير في سامي••
حسناء:يانهار اسود عليا..يعني الواد ميحضرش خطوبة اخته؟..ويبقى هربان في الجحر زي الفيران؟..طب والله دي عين وصابتنا!
جليله:الشطه فين ياحسناء؟
حسناء:__________
جليله:ياحسناء!!
حسناء:_________
جليله:هو انا بكلم نفسي ولا ايه؟.. ماتردي!
حسناء:ايوه معاكي اهو
جليله:لا انتي مش معايا ولا حاجه..ايه اللي شاغل بالك؟
حسناء:المسئوليه والضغوطات كلوا دماغي من التفكير
جليله:معلش ربنا يعينك..شوفيلي الشطه فين..وبالمره هاتيلي الخلاط عايزه أضرب الطماطم
حسناء:طيب
••دورت حسناء وجابتلها اللي هى عايزاه••
جليله:مالك كده مدايقه ليه..هى الجوازه مش على مزاجك ولا ايه؟
حسناء:لا على مزاجي ونص كمان..هو احنا هنلاقي أحسن من رجب لـ بنتنا؟
جليله:لا مش هتلاقي..ده الواد باين عليه محترم وابن ناس
حسناء:الطيبون للطيبات.. عقبال بنتك كده مع عوضها
جليله:يسمع من بؤك ربنا..انا عايزه اتصل بـ زينه أشوفها خلصت هى وصفاء ولا لسه!
حسناء:هما نازلين من امتى؟
جليله:من حوالي ٣ ساعات كده
حسناء:يبقى قربوا يجوا..بصي احنا نخلص آخر حاجه وندخل نظبط نفسنا قبل مالناس تيجي واحنا ريحتنا توم وبصل
جليله:عندك حق..احنا خلاص اهو قربنا نخلص..امال سامي فين انا مشوفتوش من الصبح
حسناء(بتردد) :ده ربنا يعينه بيلف في مشاوير من صباحية ربنا.. مانتي عارفه انه أخو العروسه بقى واحنا ملناش غيره..أصل ماهر كبر في السن ومبقاش يقدر يلف..فا سامي هو اللي بيلف بداله
جليله:ربنا يديله الصحه وطولة العمر
حسناء:يارب
<عـنـد والد رشاد>
••راح هو ومايا يقابلوا شادي..ولما شادي شاف مايا معاه اتدايق••
شادي:عايز ايه؟؟...مش كنت تقول انك تبعها؟
والد رشاد:ممكن تهدى؟..انا عايز اتكلم معاك في كلمتين
شادي:وانا مفيش كلام أقوله
والد رشاد:هما كلمتين وصدقني مش هدايقك في حاجه
شادي:يبقى نقعد من غيرها
والد رشاد:اقعدي انتي بعيد يا مايا..وانا هتكلم معاه
مايا:حاضر يااونكل ساهر
••مشيت مايا بعيد..وساهر خد شادي وقعدوا••
َوالد رشاد:انا عارف انك عرفت كل حاجه خلاص..بس صدقني احنا مش هدفنا أذيتك انت..وعلفكرا مايا حبيتك بجد
شادي:بلا حبتني بلا محبتنيش.. بلاش تتكلم عن الحب اللي هى متعرفش عنه حاجه!..انا اقدر أروح لـ ضياء واحكيله كل حاجه بس مش هعمل كده
والد رشاد:مش هتعمل كده ليه؟
شادي:__________
والد رشاد:انا هقولك ليه...علشان انت حبيت مايا ومش قادر تإذيها مع انك في ايديك تعمل كده عادي!..مايا بتحبك زي مانت بتحبها..بالاضافه لـ كل ده..انا اللي عايز منها المهمه دي.. ضياء خاطف حفيدي! بقاله شهور..واحنا كل يوم قلبنا بيتقطع عليه!..لا عارفين نعيش ولا طايلين نموت!..حط نفسك مكانا
شادي:هو العيل الصغير اللي ضياء خاطفه يبقى حفيدك انت؟
والد رشاد:ايوه حفيدي انا..لكن أقسملك بالله احنا ما في نيتنا نإذيك..مايا قربت منك علشان ترجع يوسف وتعرف مكانه..علشان تساعدنا وترجعلنا حقنا اللي اتهدر!
شادي:وانا المطلوب مني ايه دلوقت؟
والد رشاد:ضياء بيديك كام في الشهر؟
شادي:وده يخصك في ايه؟
والد رشاد:عايز أعرف عشان اديك الضعف
شادي(متردد) :بيديني 20 ألف في الشهر
والد رشاد:حلو اوي..انا هديك مليون جنيه لو رجعتلنا يوسف..وخد بالك ضياء مصيره هيلف عليك زي ما لف على غيرك.. ضياء لا له عزيز ولا غالي!
شادي:وانا ايه ضمني ان كلامك ده بجد..وانك مش بتضحك عليا!
••راح والد رشاد مطلعين دفتر الشيكات من جيبه••
َوالد رشاد:ده شيك بمليون جنيه..تسلم واستلم..ولو ياسيدي انا طلعت نصاب مع ان ده مش حقيقي واسأل أي حد هيقولك ساهر مالوش في السكه دي..متبقاش تديني يوسف
شادي:مش يمكن انت بتوقعني عشان تسلمني لـ ضياء؟
والد رشاد:ضياء ألد أعدائي!..انا وهو اعداء من زمان..اعداء من يوم ما ضربني بالنار يوم فرحي عشان اتجوزت عائشه..اللي كان عايز يتجوزها زمان!..وده السر اللي مش قادر اقوله لـ ولادي لحد دلوقت!..مش موضوع حادثة العربيه!..لان حادثة العربيه دي سبب من الاسباب اللي زادت العداوه.. لكن العداوه اللي مابينا موجوده من زمان
<فـلاش بـاك>
••ضياء بيضرب نار على ساهر يوم فرحه على عائشه..بيصرخ الناس وبتجري عائشه عليه••
عائشه(بصويت) :لاااااا سااااهر!!!
••وبعدها خدوه على العمليات وضياء اختفى سنين بعدها !••
_________________________________
شادي:انا مش فاهم حاجه!
والد رشاد:مش مهم..المهم انت ليك مكافأه لو نفذت اللي انا عايزوا..المليون جنيه دول يفتحولك مشروع حلو يعيشك انت وأهلك ومش هتحتاج لـ ضياء اللي مصيره هيغدر بيك في يوم من الايام
شادي:ويفرض عرف..اقوم انا أضحي بحياتي عشان خاطرك؟
والد رشاد:الذكي هو اللي يستخدم دماغه صح..وميخليش حد يمسك عليه نص غلطه
شادي:وده ازاي بقى ان شاء الله؟
والد رشاد:هقولك
<عـنـد رشـاد و دالـيـدا>
••بعد مرور ساعتين..قامت خالة داليدا وجوزها وبنتها علشان يمشوا••
صابرين:خدي بالك من نفسك ياداليدا
داليدا:حاضر يا خالتو
صابرين:سلام يا فريده
فريده:سلام ياخالتو
عائشه:نورتونا ابقوا كرروها تاني
عصام:الله يخليكي ده بنوركم
صابرين:ان شاء الله
رشاد:مع ألف سلامه
صابرين:الله يسلمك
••ونزلوا وبعدها خرجت عائشه بمصطفى ووراها سلمى وفريده••
داليدا:رايحين فين ياماما؟
عائشه:هننزل بقى ياحبيبتي..احنا قعدنا كتير
داليدا:انتوا مقعدتوش كتير ولا حاجه..خليكوا شويه طيب
عائشه:لا كده حلو اوي..يلا عايزين حاجه؟
رشاد:لا سلامتك ياماما
••ونزلوا وداليدا قفلت الباب••
رشاد:ايه الحلاوه دي؟
داليدا(بتضحك) :ياحياتي
رشاد:ايه رأيك نجهز الشنط ونسافر بقى؟
داليدا:ويفرض حد من قرايبك جه؟
رشاد:لا محدش جاي هما آخرهم الفرح وشكراً على كده..عايزين نقضي هاني مون حلو زيك!
داليدا(بتضحك) :وهنلحق نسافر؟
رشاد:احنا ورانا ايه يعني؟..الشغل.. فااهو واخدين اجازه
داليدا:خلاص ماشي هدخل أجهز الشنط
رشاد:هنجهزها سوا
••وخد داليدا ودخلوا يجهزوا شنط السفر••
<عـنـد صـفـاء>
••العريس خدها من الكوافير في أجواء الزغاريد والأغاني..لحد ماوصلوا على القاعه••
حسناء:لولولولولولوي
جليله:الله اكبر زي القمر..ماشاء الله عليها
••وعند ماهر كان واقف مع سعد وجمال••
سعد:الف الف مبروك لـ صفاء عقبال الليله الكبيره
ماهر:عقبال زينه وجمال
سعد:هههه قول يارب..امال سامي فين محدش شافه؟
ماهر(بتردد) :سامي مسافر..أصل جاله شغلانه هتكسبه دهب ومكنش ينفع يعوضها
جمال:بس دي شبكة أخته يعني..أي حاجه تتأجل علشانها
ماهر:اهو أصل صاحب الشغل ماشيها لوي دراع..لو مكنش راح النهارده كانت طارت منه..ياالنهارده يااما بلاش خالص
سعد:تلاقي صفاء عايزه أخوها جنبها في يوم زي ده
ماهر:وهو هيعملها ايه يعني؟..وبعدين هو احنا مش ماليين عينها؟
سعد:لا ماليين عينها حد يقدر يقول غير كده!
ماهر: لا ازا...
••ولسه بيكمل الجمله لقى بوكس الشرطه داخل عليهم••
الفصل الثامن والعشرون
••أول ما ماهر شاف الشرطه جايه ارتبك! ••
ماهر:يانهار اسود ومهبب بستين هباب
سعد:ايه يا ماهر.. هى الحكومه جايه هنا ليه؟
••وقف بوكس الشرطه عندهم..ونزل الظابط عندهم..وقرب ماهر منهم ووراه سعد وجمال••
ماهر:خليكوا هنا
سعد:ازاي بس؟.. امال هنفهم ازاي؟
ماهر:في حاجه يا باشا ولا ايه؟..اصل لمؤاخذه دخلتوا علينا دخله جامده..هو في حاجه ولا ايه؟
الظابط:في كل خير ان شاء الله..انا كنت معدي رايح مأموريه قولت اعدي اقولك الف مبروك
ماهر(بإرتياح) :يااه ده انت خضتني ياسعاة الباشا.. الله يبارك فيك وعقبال ولادك ان شاء الله
سعد:طب تعالى ياباشا خد واجبك.. ده احنا أهل كرم
الظابط:لا انا مستعجل..انا جاي بس اعرفك خبر قد كده
ماهر:خبر ايه؟
الظابط:أستاذ ساهر رافع عليكم قضية ميراث للأستاذه داليدا بالنيابه عن زوجة ابنه
ماهر:لا ياباشا الكلام ده ميصحش..هو الراجل ده هيدخل نفسه بيني انا وبنات اخويا؟..ده ربنا العالم انا بعزهم قد ايه!..و قولتلهم كل اللي انتوا عايزينه شاوروا عليه وهتلاقوه تحت رجليكم..ياباشا احنا بنفهم في الأصول ولا يمكن نظلم بنات الناس ابداً
••وبعيد حسناء لاحظت ان البوكس واقف عندهم..و الظابط واقف مع ماهر..لحد ما وشها جاب ألوان وراحت عندهم••
الظابط:كل الكلام ده ميخصنيش..انا عديت اعرفك بالمره..واعمل حسابك عندك جلسه في المحكمه يوم 14!
ماهر(بخوف) :أمري إلى الله
الظابط:سلام
سعد:طب اشرب حاجه..عندنا كوكاكولا..وسفن أب و كل اللي قلبك يحبه
حسناء(بخوف) :في ايه يا ماهر؟؟
ماهر:متخافيش مفيش حاجه
حسناء:ازاي مفيش؟..بوكس الشرطه جاي لحد عندنا وتقولي مفيش؟
سعد:متقلقيش ياحجه..الظابط كان بيبارك لأبو سامي
حسناء(بخوف) :ياسلام؟
سعد:امال
حسناء:طيب
••ومشيت وهى خايفه وقلبها مقبوض..وسعد خد جمال ابنه بعيد على جنب••
سعد:انت مش كنت قايل ان سامي عايز يشتغل معاك؟
جمال:حصل..معرفش ليه خلع مني!..مع انه كان هيموت على الشغلانه!
سعد:الموضوع ده وراه إنه..خصوصاً ان أول ما ماهر شاف البوكس..ارتبك ووشه قلب ألوان
جمال:قصدك ايه؟
سعد:شكل سامي عامل عمله ومتكن..بس محدش هيقول وهيقولوا أي حجه زي موضوع السفر كده!
جمال:مش عارف بس انا كمان حسيتها..أصل سامي ده حوارتجي بتاع مشاكل..وأكيد مش هيتهد إلا لما يعمل حوار
سعد:الايام الجايه هتبين شكنا
••وعند صفاء في الكوشه كانت بتتصور هى والعريس••
جليله:لولولولولولوي
رجب:مش حاسه ان المكياج جه كتير النهارده؟
صفاء:ياحبيبي انا عروسه بلاش أحط ولا ايه؟..إن مكنتش انا احط امال مين اللي يحط؟
رجب:خلاص ده انتي زي الراديو اللي اتفتح..مكنتش كلمه!.. وبعدين ياصفصف انتي زي القمر في كل الأحوال
صفاء(بسهوكه) :بجد والنبي؟
رجب:امال ده انتي الوحيده النهارده اللي منوره..ده انتي أحلى واحده في الموجودين
••جات زينه على كلامهم وابتدت تتكلم بسهوكه••
زينه:طبعاً لازم تكون أحلى واحده..مش العروسه برضه؟
صفاء(بتضحك) :ياحبيبة قلب قلب قلبي..زينه دي أختي التانيه..بحبها حب..ربنا العالم بيه
رجب:ريما يديم المحبه مابينكم
صفاء:يارب
حسناء:لولولولولوي
_مبروك ياصفاء
صفاء:الله يبارك فيكي ياحجه
••جات ام خالد مع ابنها خالد••
ام خالد:براحه ياولا..ده ان كان عليك عايز تزقني وتجري على السنيوره مراتك
خالد:مانا بزق قصدي بسندك اهو ياامي
ام خالد:ياباي منك..اسندني
خالد:على مهلك
••لحد ماطلعوا على الاستيدج••
ام خالد:لولولولولولوي الف مبروك ياعروسة العرايس..ياجميلة الجميلات..عقبال كده يا حسناء لما تشوفيها في بيت عريسها..هو ده العريس ولا عود القصب؟
حسناء:ايه ياام خالد اللي بتقوليه ده..كده رجب يزعل منك
ام خالد:واحنا نقدر على زعله برضه؟..ده الغالي خطيب الغاليه صفاء
حسناء:الله يخليكي ياام خالد
خالد:الف مبروك ياعريس
رجب:الله يبارك فيك
••قربت ام خالد وخدت المايك من الموجودين••
ام خالد:السلام عليكم..انا أم خالد صاحبة الحجه أم العروسه..وأحب اهنيها هى وبنتها الغاليه صفاء
حسناء:حبيبي ياام خالد كلك ذوق
ام خالد:وعقبال ماتشوفها في بيتها مع عريسها..وتشيل عيالها..وتملالك البيت عيال..وتفرحي وتتهني بيها
حسناء:يااارب
أم خالد:وألف مبروك لأبو العروسه..راجل جدع ومحترم..سيرته سابقاه في كل حته..والكبير والصغير عارف قد ايه هو جدع..كان نفسي سامي يكون معاكم النهارده وزمانكم بتسألوا راح فين..أصل سامي راح فرح داليدا امبارح وفضحها..بس العريس مسكتش لبه العلقه التمام هو والرجاله أبو بدل..وطلبوله الشرطه ومرمي في الحبس لحد دلوقتي
حسناء(بزعيق) :ايه اللي انتي بتقوليه ده؟.. انتي كبرتي وخرفتي ولا ايه؟..ماتشوف أمك مالها؟
ماهر:يانهار اسود!
خالد:ايه ياما اللي بتقوليه ده..الكلام ده ميصحش
أم خالد:يصح ونص وتلات تربع..ده كفايه بس انه كسرلي برطمان السمنه اللي تعبت وشقيت فيه..وتعبي اترمى على الأرض
صفاء:يالهوووووي
رجب:بقى هو ده اللي اخوكي مسافر ياصفاء؟
صفاء:والله العظيم دي الحقيقه..الست دي بتخرف
••طلع ماهر على الاستيدج..وسحب المايك منها••
ماهر:الست دي كدابه..وداليدا بت اخويا هى اللي محفظاها الكلمتين دول.. انا ابني سامي فل وعشره على عشره ومتطلعش منه العيبه..سامي جاتله سفريه على فجأه هتكسبه الدهب.. يقول للرزق لا؟؟.. يرفص النعمه؟.. ده ياريت انا تجيلي فرصه من دهب زي دي! وعمري ماهقول لا..بس هقول ايه الاعداء وصل بيهم الحال انهم جايين يخربوا علينا يوم خطوبة بنتنا الوحيده
أم خالد(بزعيق) :انا مش كدابه.. انا كنت معزومه في فرح داليدا..وكل ده حصل قصاد عينيا اللي ياكلها الدود!
خالد:يلا ياما بلاش فضايح ياريتني ماسمعت كلامك وجيت معاكي في حته!
ام خالد(بزعيق) :انا مش كدابه.. انتوا اللي ناس حوارتجيه وغجر وكلتوا عليا حق برطمان السمنه اللي ابنكم المحبوس كله عليا
خالد:برطمان سمنة ايه ياما اللي بتتكلمي عليه بس؟
حسناء(بصويت) :امشي من هنا وعلى الله رجلك تعتب المنطقه مره تانيه
ام خالد:كل ده عشان بقول الحق؟
حسناء(بزعيق) :حق مين ياام حق جاكي كسر حقك.. يلا من هنا بدل ماامد ايديكي عليكي
ام خالد(بزعيق) :ده داليدا ربنا نجدها منكم..تاعبه نفسي وجايه وفي الآخر مكلتش جاتوه ولا شربت حاجه ساقعه. هقول ايه مانتوا ناس رمامه.. اتفووه
••سحبها ابنها ومشى..راحت حسناء قالعه الشبشب وحدفاه وراها••
حسناء(بزعيق) :أشكال زباله دي غلطتي ان انا عزمتك ياوليه ياجربوعه..اتفووه عليكي!
سماح:ايه الكلام اللي سمعناه ده ياحسناء؟..بقى انتي ابنك محبوس بجد؟
حسناء:محصلش دي وليه كدابه وحد زاققها علينا تبوظ يومنا..حسبى الله ونعم الوكيل فيكي ياأم خالد
<تـانـي يـوم>
••بعد ما رشاد وداليدا سافروا يقضوا شهر العسل..صحى رشاد من النوم وفي حضنه داليدا..ابتسملها وقال••
رشاد:صباح الخير ياحبيبتي
داليدا(بإبتسامه) :صباح النور
••وقامت قعدت••
رشاد:وحشتيني اوي!
داليدا(بتضحك) :وحشتك ازاي وانا في حضنك طول الليل؟
رشاد:حتى وانتي في حضني بتوحشيني!..قوليلي بقى حلمتي بيا ولالا؟
داليدا(بتضحك) :لا وانت؟
رشاد(بيضحك) :بصراحه برضه لا..بس عادي تتعوض الايام الجايه
داليدا:ده على أساس انه بمزاجك مثلاً؟
رشاد:مثلاً
••وشد ايديها ناحيته وباسها••
رشاد:ربنا يخليكي ليا..انا مبسوط اوي وانتي معايا!..مش عارف هعمل ايه بعد كده لما اروح الشغل وتكوني بعيده عني!
داليدا :مانا هكون معاك ياحبيبي!
رشاد:لا ماهو يا داليدا..انا مش عايزك تتبهدلي تاني
••وقام من على السرير وكمل كلامه••
رشاد:عايزك تفضلي قاعده برنسيسه كده..وكل طلباتك تجيلك لحد عندك..ارتاحي انتي ياستي وانا هتعب بدالك!
داليدا:ماينفعش يا رشاد..ده ومكنش اتفاقنا ان انا اقعد في البيت!
رشاد:عارف انه مكنش اتفاقنا..وانا مش ضد فكرة الشغل..انا عايزك يوم ما تشتغلي يكون شغل خاص بيكي..ده ميمنعش ان شغلي وشغلك واحد..بس مادام نفس الشغلانه يبقى ليه نكون فيها احنا الاتنين؟.. طيب ماترتاحي انتي واتعب انا؟
داليدا(بتردد) :مش عارفه يا رشاد..بس انا كده هزهق من قعدة البيت..خصوصاً ان مفيش حاجه اعملها..وبعدين صحيح مين هيكفي احتياجات فريده من لبس وأكل وشرب ومصاريف مدرسه ودروس؟
رشاد:انتي وفريده اختك ملزومين مني..وأي حاجه فريده محتاجاها تكلمني وتقولي الموضوع 1 2 3..وهتلاقي اللي هى عايزاه لحد عندها!
داليدا:رشاد انت متجوزني انا.. مش متجوز أختي علشان تصرف عليها!.. انا بجد محتاجه ورث بابا من عمي بأي شكل علشان افتح مشروع وأديره انا واختي
رشاد:هيحصل..انا بس عايزك تفهمي ان انا عايز راحتك وبس..انا علشان بحبك.. بحب أي حد تبعك!..وفين المشكله لما فريده تاخد مني مصروفها الشهري؟
داليدا:صدقني مش هينفع
••رن موبايل رشاد فا رد••
رشاد:بعد اذنك يا داليدا
داليدا:اتفضل
رشاد:الو يا بابا عامل ايه؟
والد رشاد:الحمدلله.. طمني عليك انت ياحبيبي..عامل ايه انت وداليدا؟
رشاد:الحمدلله بخير..ماما ومصطفى وسلمى أخبارهم ايه؟
والد رشاد:كلهم كويسين الحمدلله..عايز أفرحك بخبر حلو
رشاد:خير طمني؟
والد رشاد:عملت زي مانت طلبت مني..ورفعنا قضية ميراث على عم داليدا..ووصله إخطار وبإذن الله يوم ١٤ الجاي لينا جلسه في المحكمه.. انت عارفني مقدرش اتأخر عليك..انت ابني حبيبي..ومراتك بعتبرها بنتي التانيه
رشاد:بجد والله؟..طيب عملت كده ازاي من غير ماتاخد أي تفاصيل من داليدا؟
والد رشاد(بيضحك) :الفلوس والمعارف تعمل كل حاجه ولو انت ومصلحتك بينكم فرق السما من الأرض
رشاد(مبسوط) :فرحتني والله..انا لازم أفرح داليدا بالخبر الحلو ده
والد رشاد:ماشي ياحبيبي.. خد بالك من نفسك ومن داليدا
رشاد:حاضر
والد رشاد:سلام
رشاد:سلام...افرحي يا داليدا!
داليدا(بإستغراب) :افرح ليه؟
رشاد:بابا رفع قضية ميراث على عمك
داليدا:ازاي وانا مش موجوده؟
رشاد:مش عارف..مانا سألته نفس السؤال.. مرضاش يقول..المهم افرحي حقك قرب يرجع!
داليدا:يارب مستنيه اليوم ده بفارغ الصبر!
رشاد:بالمناسبه الحلوه دي بقى..عازمك بالليل على سهره هتعجبك اوي!
داليدا:بجد ربنا يخليكم ليا..انا شوفت فيكم اللي مشوفتوش من القريب!
رشاد:داليدا.. انا أهلي بيعتبروكي بنتهم التانيه!..وكلهم بيحبوكي بلا استثناء
داليدا:وانا كمان بحبهم ويمكن أكتر كمان!
••ابتسملها رشاد وخدها في حضنه وخرجوا من الأوضه••
<عـنـد حـسـنـاء>
••كانت قاعده في الصاله بتندب حظها هى وصفاء••
حسناء:يابختك المايل يا سامي..من يوم مااتجوزت داليدا اللي ماتتسمى وانت مشوفتش يوم راحه..حتى بعد الطلاق مسابتكش في حالك!..بقى انا ابني على آخر الزمن يتسجن؟.. وكمان ام خالد تيجي تفضحنا وسط الناس؟..يعني احنا قاعدين نداري نداري وهى بكل بجاحه جايه تفضحنا..اودي وشي فين من الناس؟
صفاء(بحزن) :هو انا كل ماأجي افرح معرفش؟..هى الفرحه عدوتي؟..في تار بينا ولا ايه؟
ماهر:بدل مانتوا قاعدين تندبوا حظكم وتوجعولي دماغي..فكروا في حل..بدل مااحنا قاعدين وحاطين ايدينا على خدنا
حسناء:لا بقولك ايه انت تشوف حل..كلم الراجل ده وقوله كلمتين حلوين يهدوه من ناحيتنا..اتصرف يا ماهر!..انا مش هستحمل ابني يبعد عني أكتر من كده!
ماهر:ويفرض موافقش؟.. يبقى شكلي وحش؟
حسناء:اتصرف ياماهر..انشالله تدفع مبلغ وقدره المهم الواد يخرج..متخليش الناس تاكل وشنا أكتر من كده!
ماهر:انا مقداميش حل غير كده..هروح القسم واللي فيه الخير يقدمه ربنا
••وقام من مكانه وفتح باب الشقه وخرج••
حسناء:ابقى طمنا ياماهر
صفاء(بحزن) :اه يابختي اااه
<عـنـد شـادي>
••رجع عند ضياء..وكان ضياء مستغرب رجوعه بدري••
ضياء:ايه اللي جابك دلوقتي؟.. انت لحقت؟
شادي:بيني وبينك ياضياء بيه انا مرتاحتش هناك
ضياء:مش مهم..مش هتعزيني؟
شادي(بخوف) :في مين؟
ضياء:مروه..وصاحبك حبيبك
شادي(بخوف) :صاحبي مين؟
ضياء:محمد
شادي(بخوف) :محمد ماله؟؟
ضياء(ببرود) :الله يرحمه هو ومروه
شادي(بخوف) :إيه اللي حصل يا ضياء بيه؟؟
ضياء(بضحكة سخريه) :أصل مروه عملت زي ما لميس عملت..هههههه قومت مخلص عليها..بس مش بذمتك تستاهلها؟
شادي(بخوف) :طبعاً تستاهل..هو الخاين كده آخرته وحشه
ضياء(ببرود) :وقتك خلص معايا..شوف وراك ايه
شادي:حاضر اوامرك
••ومشى من قدام ضياء ودخل في الأوضه اللي يوسف محبوس فيها..وأول ماشافه حضنه••
شادي:حقك عليا.. بس بإذن الله رجوعك لأهلك هيكون على ايدي..متخافش!
••وطلع من جيبه باكو بسكوت..وابتدا يأكله..لحد ما واحد من زمايله جه ولاحظ..راح هو في ساعتها مداريه••
_انت بتعمل ايه؟
شادي:انا بأكله لا الواد يموت ويودينا في داهيه بسببه..اهو أي حاجه كده تخليه يعيش شويه كمان
_انت عارف لو ضياء عرف هيعمل فيك ايه؟
شادي:جرا ايه ياعم هو انا جايبله كباب وكفته؟..ده حيالله كيس بسكوت مكملش ٥ جنيه وكمان مش هأكلهوله كله دي حته..ماهو أصل لو حصله حاجه..احنا هنروح في الرجلين
_كل واحد يشيل غلطته..بس افتكر ان انا نصحت
شادي:كتر الف خيرك..اما قولي
••وراح قايم ووقف قريب منه••
شادي:هو ضياء قتل مروه ليه؟
_أصل لمؤاخذه كانوا على علاقه ببعض..أصل مروه بت صغيره وعايزه اللي من سنها..ومن الواضح كده ان ضياء مكنش مالي عينها
شادي:وهو يملى عين مين بس؟..ده مفيش واحده اتجوزها الا وخانته!
_بس في الآخر خلص عليها
شادي:ربنا يخرجنا منها على خير
<عـنـد مـاهـر>
••راح قسم الشرطه..علشان يطلع سامي••
ماهر:ياباشا..انا مستعد أدفع اللي انتوا عايزينه بس تخرجوا سامي ابني..الواد محضرش شبكة أخته..وزمانه متبهدل جوا
الظابط:ميشغلناش..انت ابنك غلط ويتحمل نتيجة غلطه..محدش قاله يعمل اللي عمله..ماهي بنات الناس مش شخشيخه في ايده يحركها على مزاجه
ماهر:أبوس ايدك ورجلك تخرجه..ده ابني الوحيد.. ده احنا ملناش غيره..وانا راجل كبير وصحتي على قدي..مابقتش حِمل بهدلة الأقسام والمحامين
الظابط:خلاص نشوف أستاذ ساهر والقرار قراره..لو اتنازل عن المحضر..ابنك هيخرج.. لو متنازلش يبقى استحملوا بقى نتيجة غلطكم
ماهر:طيب ياباشا اتصل بيه وانا مستني اهو
الظابط:تمام
••وطلع الموبايل واتصل على والد رشاد••
الظابط:الوو.. ازي حضرتك يا ساهر باشا؟...طيب الحمدلله...كنت بقول لـ حضرتك..محتاجينك في القسم عندنا....أصل ماهر عايز يخرج ابنه ومستعد يدفع اللي احنا نطلبه...خلاص انا في انتظار حضرتك... مع ألف سلامه
••وحط الموبايل••
ماهر:إيه ياباشا طمني؟
الظابط:أستاذ ساهر جاي في السكه..استناه برا لحد مايجي
ماهر:حاضر ياباشا
••وخرج برا••
<عـنـد سـاهـر>
••ركب عربيته واتجه للقسم..وأثناء ماهو سايق جاتله مكالمه من شادي••
والد رشاد:الو يا شادي
شادي:انا عرفت معلومات جديده
والد رشاد:ايه هى طمني؟
شادي:ضياء قتل مروه
والد رشاد(مصدوم) :قتلها ازاي؟؟
شادي:ماهو انا هفهمك..ضياء اتجوز مروه من قريب..واكتشف انها على علاقه بواحد من زمايلنا..قام قتلهم..واه صحيح حفيدك في الحفظ والصون متخافش عليه
والد رشاد(بحزن) :لا حول ولا قوة الا بالله..يارب ارحمنا..انت عرفت الكلام ده منين؟
شادي:اهو عرفت وخلاص..وقريب هحاول اهرب يوسف بس اصبر عليا شويه
والد رشاد:خد بالك منه وحطه في عينيك!
شادي:حاضر.. يلا سلام عشان متكشفش
والد رشاد:سلام
••وبعد ما والد رشاد وصل القسم ودخل••
الظابط:يااهلاً وسهلاً بحضرتك
والد رشاد:اهلاً بيك
الظابط:اتفضل اقعد
••قعد والد رشاد..ودخلهم ماهر••
الظابط:دلوقتي الحاج عايزكم تتنازلوا عن المحضر وهو مستعد يدفع اللي احنا نطلبه منه!
ماهر:انا ابني مترباش.. وعيل قليل الربايه..هاتها فيا انا ياحاج..وخرجه انا ماليش غيره..ده إبني الوحيد.. ده أمه كل يوم بتتقطع عليه
والد رشاد:ابنك غلط غلطه كبيره لا يمكن التهاون فيها..داليدا أحنا بنعتبرها بنتنا التانيه وأي حاجه تمسها..تمسنا احنا كمان
ماهر:سامي وداليدا ملهمش نصيب مع بعض..وانا وهو ندمانين على اللي حصل..وطالبين منكم السماح
والد رشاد:انا هخرج ابنك بس مش علشانكم.. لا انتوا كده كده متستاهلوش أي معروف..بس لو ابنك قرب ناحيتنا انا همسحه من على وش الأرض..ووقتها مش هيهمني أتخن تخين فيكم..انا ساهر بيه وكل الناس بتعملي ألف حساب.. فا مش هيجي واحد زيك انت وابنك يعلم علينا.. لا انسوا!
الظابط:متقلقش من اي حاجه يا أستاذ ساهر..انا هحط سامي تحت المراقبه سنه كامله..ودي خدمه مني ليكم
ماهر:متقلقش يااستاذ..انا ابني ندم وعرف غلطه.. بس ابوس ايدك تخرجه ده غلبان وربنا العالم بيه
والد رشاد:انا متنازل عن المحضر مقابل شيك منك بـ ٣ مليون جنيه.. ورث داليدا بنت اخوك..وإلا كده خلي حضرة الاستاذ سامي مشرف في السجن
ماهر:بس انا فلوسي مش جاهزه
والد رشاد:قصدك فلوس داليدا..وفريده أختها
الظابط:اطمن يااستاذ ساهر..كده كده عندكم جلسه يوم 14 في المحكمه يعني خلاص هانت..وهتاخد حقك على داير مليم
والد رشاد:انا باخد حق البنت الغلبانه اللي هما جم عليها و َاستغلوا موت ابوها..وجم عليها في أكتر وقت هى كانت محتاجاهم فيه!
الظابط:انت اللي زيك يااستاذ ساهر قليلين في الزمن ده..واللي بيعمل خير بيلاقيه واللي بيعمل شر برضه بيلاقيه
••وراح باصص لـ ماهر في آخر جمله••
ماهر:طلعوا الواد ابوس ايديكم..هديكم اللي انتوا عايزينه بس طلعوه
الظابط:هتدفع غرامه ماليه ٢٠٠٠ جنيه...ومتنساش جلستكم في المحكمه يوم ١٤
ماهر:حاضر ياباشا تحت أمركم
<عـنـد عائـشـه>
••كانت قاعده هى وسلمى وفريده ومصطفى قصاد التلفزيون••
عائشه:منورانا يا فريده
فريده:ده بنور حضرتك ياطنط
عائشه:لا بقى.. يعني داليدا تقولي يا ماما..وانتي تقوليلي ياطنط؟..قوليلي يا "ماما" انتي كمان!
فريده(بتضحك) :حاضر هحاول
سلمى:ولا يمكن فريده بتتكسف؟
فريده:لا خالص..انا خلاص اتعودت عليكم بجد!
عائشه:عارفه يا فريده..ياريت كل البنات زيك انتي وداليدا..فعلاً ربنا بيعوض..أصل بنات اليومين دول عباره عن كدب ونفاق وخداع..لكن انتوا ياحبيبتي..أبيض من جوا
فريده:الحمدلله..يمكن علشان بابا وماما الله يرحمهم كانوا كده..وعمرهم ما ربونا على أي حاجه من الكلام ده..بابا كان كل الناس بتحلف بيه ونفسهم يكونوا زيه!
عائشه:ماهو باين ياحبيبتي..والصراحه كان نفسي أشوف باباكم ومامتكم!..أكيد زي النسمه زيكم كده!
فريده:وانا والله كان نفسي بابا وماما يحضروا فرح داليدا ويشوفوها وهى عروسه!
عائشه:ربنا يرحمهم ويغفرلهم..أكيد هما حاسين بيكم دلوقتي وفرحانين!
فريده:الحمدلله
مصطفى:مش هتكلموا رشاد وداليدا تطمنوا عليهم؟
عائشه:ايوه طبعاً واحنا نقدر ننسى حاجه زي دي؟..هاتيلي الموبايل من الأوضه يا سلمى
سلمى:حاضر ياماما
••دخلت سلمى تجيب الموبايل، وخرجت••
عائشه(بتتصل) :ياترى صاحيين ولا نايمين!
••لحد ما رشاد رد..وكانوا في مطعم الأوتيل••
عائشه:ياصباح الخير والسعاده والهنا..عامل ايه ياحبيبي انت وعروستك؟
رشاد:الحمدلله ياماما انا وداليدا بخير..انتي عامله ايه انتي وسلمى ومصطفى وفريده؟
عائشه:الحمدلله كويسين..ايه اخبار الهاني مون؟
رشاد:الجو تحفه..انا كنت محتاج السفريه دي من زمان بس انتي عارفه البال مكنش رايق!
عائشه:تعيشوا وتتهنوا وتفرحوا بـ شبابكم ياحبيبي..ماتجيبلي داليدا اكلمها!
رشاد:حاضر..خدي يا داليدا كلمي ماما
داليدا:الو ياماما عامله ايه وحشتيني اوي!
عائشه:وانتي اكتر ياروح ماما..البيت وحش من غيركم!
داليدا:خلاص ياحبيبتي كلها كام يوم ونرجع وسطكم تاني
عائشه:ترجعوا بالسلامه ياداليدا
داليدا:الله يسلمك
عائشه:خدى فريده عايزه تكلمك
داليدا:الو يا فريده عامله ايه؟
فريده:الحمدلله كويسه..انتي اللي عامله ايه طمنيني عليكي!
داليدا:بخير ياحبيبتي..وحشتيني اوي اوي بجد!
فريده:والله انتي اللي وحشتيني اوي!.. وبعد الأيام..مستنياكي ترجعي!
داليدا:قريب ياحبيبتي ان شاء الله
<عـنـد صـفـاء>
••كانت في الصاله بتكلم خطيبها••
صفاء:صدقني مفيش حاجه من اللي الست دي قالتها حقيقه!..دي ست كدابه ومزقوقه علينا عشان تبوظ الجوازه..واللي زقاها علينا انا عارفاها كويس
رجب:وانا ايه ضمني ان كلامك صح؟
صفاء:انت هتكدبني وهتصدق الست العبيطه دي؟.. هو مين فينا اللي خطيبتك وقريب هتبقى مراتك.. انا ولا هى؟
رجب:خلاص مصدقك عشان متعمليليش حوار بس
صفاء:لا ياحبيبي مش عايز تصدق متصدقش
••اتفتح باب الشقه ولقيت ماهر داخل ووراه سامي وكان متبهدل جداً وأول ماشافته صوتت ورميت الموبايل••
ماهر:خش..اهو ده اللي خدناه من ورا جريك على المشاكل
صفاء(بلهفه) :سامي!!