رواية احتواء القاسي
الفصل الثالث والاربعون 43
بقلم سوسو تويكس
اتفاجأتا بأنها حامل،بقد ما فرحتا بقدر ما اتوترتا وضعنا زياده كده الأمور اتعقدت ما قدرتا اوريها،مشيت وريت ناس ابوي ووقت سالوني عن السبب سكتا زعلو مني شديد بالزات ابوي ده بقا ما بتعامل معاي نهائي السلام ده بردو بعد تعب، طلبنا منهم ما يكلمون لينه لانو الدكتوره قالت تبعد عن الانفعالات للان بتذكر ابوي قالي شنو:وقت تعمل حاجه ابقا راجل واتحمل عواقبها، الموضوع كلو ما هاميني بس بت اخوي دي كان حصل ليها حاجه بسببك لا لدي ولا بعرفك_كلامو ده زاد وجعي زياده، كلهم شايفين اني غلطان وعندهم حق يقولو كده، ماف زول قدر يشوف معاناتي الانا بعانيها، وكلو يوم في راسي سؤال لو سالتني عن السبب ح اقول شنو _مضى شهر وحقيقي كان اكتر فتره انا عانيت وضعفتا وحسيت اني مربط من كل الجهات، كانت فترة قاسيه شديد_قدرتا اقنع ناس امي انو يسكتو بس ما كل الناس بسكتو، وجا اليوم الكنت خايف منو ولينه عرفت، كلامها كلو ما وجعني زي وجعة نظرة الخذلان الفي عيونها وجملة'' انت واحد من اغلاطي'' اتوقعتا منها اي شي الا انو تقول كده، ما كت عايزها تنفعل عشان كده اتحججتا بانو لازم تهدأ ونتكلم في وقت تاني، حسيتها كرهتني زياده وقت قلتا كده، دخلتا الغرفه وهي طوالي طلعت لاحظتا ليها نست تلفونها، دخلتا استحما وانا بفكر صالحها واخليها تسامحني كيف مع انو ده فوق المستحيل بي مراحل ما ننسى انو دي ''لينه'' لو قامت لي عنادها و زعلها ماف زول بحصلا_طلعتا من الحمام وانا لجفف في شعري من المويه لقيت تلفونها بيضرب اول مره ما اشتغلتا بيهو تاني ضرب ومره تالته المره الرابعه دي شلت عشان اودي ليها لقيت المتصل بكري فتحتا الاتصال جاني صوتو وهو بقول بخوف واضح:الو لينه انا قريت رسايلك الفي ال اتس طمنيني انتي كويسه، واجيك وين، الو الو_قفلتا الاتصال وانا حاسس الدنيا لافه بي، تلفونها بدون باسويرد دخلتا الواتس ولقيت منو رسايل كتير برقم السوداني، وقت دخلتا في الدردشه برجع في الرسايل القديمه واتصدمتا وقت لقيت انها تتواصل معاهو ليها فتره، طيب مش هي كان قطعت تواصلها معاهو ولا دي كذبه كذبتا ومشتني ساي، فتحت اول ريكورد رسلتو في الدردشه، واتصدمتا عديل وقت لقيتها حكت ليهو بمشاكلنا، لينه دي مجنونه ولا شنو لأ وكمان بتشكي بيهو عني انا، بتشتكيني لي ولد خالها الكان طلبها للزواج عايزه تثبت شنو يعني من حركتها دي..
بقيت اسمع في الريكودات وانا حسي بغصه في حلقي من الزعل وطعنه في قلبي في كل مره كانت بتلجأ ليهو وتحكي، لحدي ما وصلتا لاخر ريكورد رسلتو كان قبلي ساعه وحاجه فتحتو وكان بتقول:بكري انا محتاجاك فاهمني، مش راجع أمريكا بعد اسبوع لازم تقطع لي تذكره معاك.... _ما قدرتا اكمل باقي الريكورد، كلامها داك كلو كان ممكن اسامحها واطلع ليها اي تبرير لكن تجي تقول ليهو'' انا محتاجاك '' عارفين احساس انو راجل يسمع مرتو بتقول لي راجل تاني انا محتاجاك _جملتها دي بقت تتردد لي في اضاني اتذكرتا لمن قالت انو انا غلطه وانها ندمانه انو اختارتني ما اختارت بكري_هي كانت جاده في كلامها، يعي في الوقت الانا لتعذب ويعاني فيهو َشايل همها انو لو عرفت ح تعمل شنو واراضيها كيف هي كانت بتلجأ لراجل غيري_شلتا التلفون وانا طالع من الغرفه عشان اواجها سمعتا صوتها وهي منفعله وقت مشيت الصاله لقيتها ضربت اماني كف لمن وقعت وضربت ضهرها بحافة الطربيزةوبقت تنزف، يعني فوق عمايله دي كلها الطفل الانا حاربت وعملت كلو شي عشانو ح ينزل بي سببها _وفي لحظة غضب منها وانا بتذكر كلامها مع بكري قلتا ليها:ابعدي من وشي عشان ما اتصرف تصرف ما يعجبك_لانو انا في الحالة ديك كان ممكن اتهور وانا غضبان منها_قطع سرحاني صوت عمو إسماعيل خالتو سيده وامي وابوي جو المستشفى انا كان ضربتها ليهم وكلمتهم بس ما قلتا انو لينه لزتها شكلهم عرفو، شويتين كده الدكتور طلع وقال المدام الله يعوضها الجنين نزل _كلامو ده خلاني اشوف طشاش يعني العملتو كلو راح عالفاضي_امي جات تواسيني وقت شافتني منظري قالت:ربنا يعوضك يا ولدي، بركة في سلامتها، حسي لينه قاعده في البيت براها وانت هنا عشان نرسل ليها ملاذ_هزيت ليها راسي وانا لسه ما مستوعب الموضوع، ما فقتا من صدمتي ملاذ اتصلت على وهي خايفه وبتقول :الحقني يا معتصم لينه مافي في البيت وانا حسي لافه في الحله بفتش فيها تلفونها مقفول و... _ما خليتها تكمل كلامها طلعتا في العربيه وانا بتصل لي لينه فعلا تلفونها مقفول، ما خليت مكان لينه بتعرفو ما مشيت ليهو حتى عند ناس خالتها سعاد ام ساره ما فيشه، ساره قالت هي زاتها ح تمرق تفتش_ساعتين وانا لافي زي المجنون بفتش فيها وخايف عليها، ساره اتصلت فتحتا الخط بسرعه قالت لي:ايي يا معتصم لقيتها في بيت خالها احمد عند ناس بكري و.... _وقفتا العربيه وانا ما سامعها والخط فاتح يعني تاني بكري
وقفتا العربيه وانا ما سامعها والخط فاتح يعني تاني بكري انا لسع ما اتجاوزتا موضوعها داك تجي تعمل خطأ أكبر منو وتمشي لي بكري، عايزه تثبت شنو لي خالها انو ندمت وبتستنجد بيهو، وانا هنا حايم في الشوراع ساعتين زي المجنون بفتش فيها، وعيت على صوت ساره وهي بتقول :ألوو معتصم انت معاي _معتصم:ايي معاك_ساره:مش ح تجي عشان ترجعها اكيد ما ح تخليها_معتصم:مش هي براها مشت ليهم وعملت العايزه انا ما عندي بيها دخل خليها تقعد مكان بريحها.....
قلنا لن يفرقنا سوى الموت... وتأخر الموت وافترقنا😔💔