رواية احتواء قلب
الفصل الاخير
بقلم عبير سليم
يدخل فاروق البيت و على وجهه علامات الحزن و الهم : سلام عليكم يا غاليه
غاليه : و عليكم السلام ورحمة الله وبركاته مالك يا فاروق في حاجه يا حبيبي
فاروق : آخر حاجه كنت اتوقعها يا غاليه و مش عارف اعمل ايه و لا اتصرف ازاي
غاليه : في إيه يا فاروق ايه اللي حصل قول الله يخليك قلقتني
فاروق : أدهم
غاليه : أدهم ابنك ماله يا فاروق
فاروق : أدهم جاله استدعا في الجيش يا غاليه
غاليه و هي بتخبط بايديها على صدرها : استدعا في الجيش يا لهوي ليه ما هو مخلص جيشه و خلصنا خلاص يطلبوه تاني ليه و اشمعنى هو ما يروحوا ياخدوا اللي مراحوش خالص و جالهم اعفا ابني يجيله استدعا ده الواد فرحه بعدها كام يوم يا حبيبي يا أدهم ده لو عرف مش بعيد يطب فيها ساكت ده قاعد بيحسبها بالثانيه و بعدين انت حتسيبهم ياخدوه متعمل حاجه خللي حماه يعمل حاجه هو ده مش فرح بنته اللي حيبوظ لا ده حيبقى فرح الاتنين اه ما هو لو مراد اتجوز و أدهم متجوزش مش بعيد يرتكب جنايه يا لهوي يا مصيبتي جيب العواقب سليمه يارب
فاروق : اهدي يا غاليه الله يخليكي انا على أخري و ربنا و عاوزك تهديني زي مانا متعود معاكي دايما في اي مشكله بنقع فيها مش تعملي كده
غاليه : اي حاجه تكون بعيده عن أدهم ابنك حتلاقيني هاديه و جميله و غاليه اللي انت عارفها
لكن أي حاجه تخص أدهم و بالذات جوارته اللي حيبيض عليها يبقى لازم ابقى كده و اكتر من كده يا فاروق
هو عرف يا فاروق قلتله
فاروق : عرف و هو لو عرف كانت حتبقى الدنيا هاديه كده هو فين راح
غاليه: راح هو و مراد بيقيسوا البدل بتاعتهم عيني عليك يا أدهم يا حبيبي لما تعرف كان مكتبولك ده فين بس يا ضنايا حتقولله يا فاروق
فاروق : امال حقول لأمي يا غاليه انتي كمان هو مين اللي حيتنيل يروح مش هو
غاليه : يا حبيبي يا بني الطف بيه يارب يارب هونها عليه يارب يا بختك المنيل يا أدهم هو الواد ده طول عمره فقري ومفيش حاجه معاه بتعدي بسهوله كده و اي حاجه ينبر فيها لازم تتكلكع يا تبوظ خالص
بس انت اتصرف يا حبيبي لازم تتصرف يا فاروق ده فرح ابنك يا حبيبي اللي حيبوظ
و هو فرح ابنه بس اللي حيبوظ يا هادي
ما فرح بنتي كمان و اختها بالمره ابن خالك ده فقري و الجواز اهي بانت من اولها اهيه
هادي : هههههه هههههه
يونس : انت بتضحك يا هادي
هادي : هههههههه انا اسف و الله يا بشمهندس بس مش قادر و الله ده ايه الصدفه العجيبه دي معقوله دي
قبل الفرح باسبوع أدهم يجيله استدعا ده زي ما يكون حد قاصدها و عاملها معاه بالعند طب عاوزين نشوفله حل يا بشمهندس ده أدهم ممكن يروح فيها
يونس : حل ازاي يعني يا هادي معقوله انت اللي بتقول كده انا لا يمكن اقف في وش حاجه فخدمة الوطن
هادي : ما هي الضرورات تبيح المحذورات و كده كل حاجه حتبوظ ده احنا حجزنا الفندق و بعتنا الدعوات و حجزتلهم شهر العسل حنعمل ايه في كل ده
يونس : حتتدبر ان شاء الله ليها رب يدبرها
هادي : طب انا عاوز افهم هما عاوزين منه ايه مش هو ادى خدمته العسكريه و خلاص
يونس : عادي بتحصل كتير يا هادي كل فتره الدوله بتستدعي بعض اللي خلصوا الخدمه حاجه زي تذكره كده ليهم عشان لو حصل حاجه في البلد يبقوا جاهزين
هادي : و الاستدعا ده بيبقى مدته اد ايه
يونس : في بيقعدوا شهر في بيقعدوا تلت اسابيع ما دامت أوضاع البلد مستقره و مفيش طوارئ لكن لو في طوارئ يبقى البس يا معلم نشوف وشك بخير
هادي : يالهوي عيني عليك يا أدهم و عاللي جرالك طب هما بيختاروا المده على اساس ايه
يونس : مش عارف و الله يا هادي مش عارف بس اكيد كل واحد و بخته و بالنسبه لأدهم عشان واضح اهوه بخته من اولها فممكن يقعدوه على طول خليه ينبط بقى و احنا نرتاح منه
هادي : طب هما بيبعتوا للكل
يونس : أكيد لاء طبعا يا هادي كل واحد و حظه في ناس بيفتكروها و ناس لاء زي مانت شفت أدهم جاله و مراد مجالوش
هادي : طب ليه مبياخدوش اللي اخدوا اعفا و يسيبوا الي راحوا خلاص
يونس : حياخدوا اللي اخدوا اعفا يعملوا بيهم ايه هما كانوا اخدوا حاجه عشان يفتكروها اللى راحوا هما اللي اخدوا عشان كده بياخدوهم و خصوصا بقى اللي كانوا مظلات او صاعقه اي حاجه من اللي بيكون ليها دور كبير وقت ما البلد يحصل فيها حاجه دول بقى بيلبسوا وش
هادي : و مجتش غير في أدهم يا حبيبي يا بن خالي
يونس : و الله يا ريتها كانت جت لمراد كانت بقت اهون لكن المج.ن..ون ده انا مش عارف لما يعرف حيعمل ايه
هادي : حيعمل ايه يا لهوي عاللي حيعمله
قاعد بيولول و بيندب حظه ماسك الفوطه و بيشوح بيها يمين و شمال : يا بختك المنيل يا أدهم جت الحزينه تفرح ملقتلهاش مطرح انا كان قلبي حاسس ان حتحصل حاجه انا عارف ان الجوازه دي مبصوص فيها اعمل ايه ياربي
فاروق : اسكت بقى يا زفت كله من نأك يا فقر قعدت اقولك اهدى اهدى داري على شمعتك تستاهل بقى حلال فيك
أدهم : اداري مين يا اخويا دي انطفت خلاص انطفت و على رأي المثل قليل البخت يلاقي العضم في الكرشه
مراد : كرشه هههههههه هههههههه
أدهم : بتضحك على اخوك طبعا مانت مش خسران حاجه
أدهم : مش خسران ايه يا بني آدم ما هي حتعك عالكل
فاروق : خليك اقعد ولول كده زي الستات
أدهم : امال عاوزني اعمل ايه في النصيبه اللي نزلت على راسي دي
فاروق بزعيق : اسكت بقى اسكت خلينا نفكر حنعمل ايه يا بني ادم انت بعد ما عزمت الناس كلها و اتفقت عالدبا... يح كل حاجه باظت حنعمل ايه دلوقتي قللي
أدهم : هو ده اللي هامك المعازيم و الدبا.. يح و ابنك مش هامك
بابا متسيبنيش يا بابا ده انا ابنك حبيبك فلذة كبدك الله يخليك اتصرف يا بابا اتصرف انا حتشل حيجرالي حاجه لو الجوازه متمتش فمعادها
غاليه : يا ضنايا يابني اتصرف يا فاروق اعمل اي حاجه عشان الواد
فاروق : و انا اعمل ايه بايدي ايه اعمله هو بخته و نصيبه بقى
أدهم : فين حبايبك فين صحابك فين أعضاء مجلس الشعب اللي عارفهم فين حمايا فين شايل ايده ليه هي مش جوازة بته دي فين هادي هاتولي هادي هو ابن عمتي اللي حيتصرف في المصيبه السوده اللي انا فيها دي اشمعنى انا بس ياربي اللي يحصل لي كده و دلوقتى بالذات لا و ربنا ما هو تمثيل و بجد و بحق و حقيقي ده حد موصي علية اتصرف يا بابا اتصرف يهون عليك أدهم حبيبك يحصلله كده
فاروق : اخس عليك يا ادهم انت عاوز تهر.. ب من المسئوليه انا ربيتك على كده
أدهم : انا مش متربي انا عديم الربايه شوفلي حل الله يخليك
فاروق و هو بيخبط بالعكاز عالأرض و مقهور : ملهاش حل يا أدهم حقك علية يابني مش حقدر اعملك حاجه
أدهم : يعني معناه ايه الكلام ده يابابا حعمل ايه دلوقتي
فاروق : لازم تسلم نفسك يا أدهم
أدهم و هو بيلطم على وشه : يا مرك يا أدهم يا مرك
غطيني و صوتي يا اما يا لهوووووي
في المساء قاعدين كلهم مع بعض و هما الاتنين بيعيطوا و الكل بيبصلهم و مش عارفين يعملولهم ايه
وفهد بيجاوبهم على أسئلتهم : بعد ما أي شخص بيكون أدى خدمته و نهاها بيتحول للقوات الاحتياطيه و ده بيكون لمدة تسع سنين من بعد انتهاؤه للخدمه و من حق الدوله انها تبعت استدعاء رسمي لأي شخص طوال الفتره دي والاستدعاء في الفترة دي بيكون بأجر كامل يعني لو بيشتغل في وظيفه حكوميه بياخد أجره كامل عالفتره اللي حيقضيها لحد ما يرجع
و بيكون مدة الاستدعاء حوالي شهرين يعني تمن اسابيع ده الرسمي لكن المتعارف عليه انهم بيكونوا ما بين اسبوعين لتلاته مش اكتر
أدهم : طب ليه ياخدوني من أساسه عاوزين مني ايه تاني هو انا لحقت وحشتهم يا دي النيله علية و على بختي المنيل
فهد و هو بيضحك : ده يا أدهم بيكون لقياس الحاله و الكفاءة الادائيه او لاستعداد الدوله للمعارك
أدهم و هو بيلطم على خده : معارك هي فيها كمان معارك الحقيني يا بيسان شكلها الجوازه مش مكتوبالك يا بسبوستي
بيسان : اهئ اهئ اهئ
أدهم : عيطي يا اختي عيطي ابقي خللي بالك من العيال يا باتعه
الكل مش عارف يضحك على كلامه و اللا يعيط
جميله : يا ضنايا يا ابن اخويا شفلنا حل الله يخليك يا فهد الواد عقله حيطير منه
فهد : هو مفيش غير حل واحد
يونس : حل ايه يا فهد
فهد : احنا مستلمناش حاجه
فاروق : ازاي يا بني مستلمناش و الظابط مبلغني بنفسه ان اسم أدهم نزل في الكشوفات اللي حيبعتوها بكرة للناس
فهد : تمام اوي يعني حضرتك لسه ما استلمتش حاجه فايدك و لا مضيت عالاستلام
فاروق : لاء لسه بس هو قاللي القرار اتمضى خلاص و بكرة حينزلوا للأهالي
فهد : تمام اوي اللي حييجي بالجواب حياخد قرشين و يتوكل على الله و يبلغ انكم عزلتم من البلد او ان الاستاذ مسافر خارج البلاد
هادي : و دي مفيهاش مسئوليه علية يا فهد
فهد : لا طبعا فيها مسئوليه ده استدعاء رسمي يا جميل بس هو ده الحل الوحيد اللي قدامنا مفيش قدامنا حل غيره
أدهم : يعني عقوبه ايه طيب فهمني حيعملوا فية ايه و اللا اقولك يعملوا اللي يعملوه بقى قال حيسخطوك يا قرد قال ايه غزال ما هي بايظه بايظه
يونس : اهدى بقى شويه يا بني يخرببيتك خلينا نفهم اللي حيحصلك
فهد : أدهم ده غلبني و ربنا تفوق علية هههههه
هو المفروض انه لما بيعرف ان كان جايله استدعاء و هو مراحش بيروح بنفسه يعرض نفسه عالتجنيد و بيسألوه شوية اسأله تقليديه اللي هو كنت فين و ايه اللي منعك من انك تسلم نفسك و بيحددوا له معاد و والقاضي هو اللي بيحكم يااما بالحبس و الغرامة يااما بالغرامة بس
لكن المتعارف عليه و حرصا على مستقبل الشاب بيكون في الغالب غرامه بس مش اكتر بس برضو في الاول و الآخر القاضي هو اللي فايده الأمر
أدهم : و عشان انا أدهم ان شاء الله القاضي حيطسني مؤبد
بصوا انا اهوه يا جماعه انتوا شايفينني انا مسافر برة و مش راجع تاني
فهد : مش بالبساطه دي يا أدهم انت ناسي انك حتسافر تقضي شهر العسل و وقتها في الجوازات حيعرفوا يا اما و انت مسافر يا اما و انت راجع يعني حتتقفش حتتقفش و وقتها لازم تسلم نفسك
أدهم : لا انتوا لازم تشوفولي حل انا لازم اتجوز خلاص مش رايح شهر عسل بلاها شهر عسل خالص
فهد : و ليه بس يا أدهم ما تفرح يابني هو انت حتتجوز كل يوم
فاروق : طب نعمل ايه دلوقتي يا فهد شور علينا يا بني
فهد : اولا الموضوع مش صعب كده يا جماعه ده هما اسبوعين تلاته بالكتير اوي هو يروح و الفرح يتأجل إيه المشكله كل تأخيره و فيها خيره يا عالم كان حيحصل ايه لو الفرح تم فمعاده و ربنا سترها بالاستدعاء ده
يونس : قدر الله وما شاء فعل اتوكل على الله يا أدهم و اوعدك أن يوم ما ترجع و نكون كلنا طيبين و بخير حيكون تاني يوم فرحكم على طول ان شاء الله يا حبيبي
أدهم : طيبين و بخير لا بقولكم ايه كل واحد يخللي باله من نفسه لحد ما ادخل انا قلت اهوه و اللا كده الجوازه حتتاجل لأجل غير مسمى
ايه اللي انا بقوله ده يعني كده خلاص مفيش فايده لله الأمر من قبل و من بعد يا بختك المقندل يا أدهم
بعد يومين يسلم أدهم عليهم و بيسان بتعيط : انتي بتعيطي ليه انتي كمان مانا حتنيل ارجع و ممكن برضو مرجعش يالهوي لعلى بختي يحصل حاجه و البلاد كلها تقوم على بعض و يقعدوني اااه اااه تستنيني يا بت يا بسبس انتي فاهمه عارفه لو رجعت و لقيتك متجوزه حد غيري
اسماء : اطمن يا حبيبي بيسان قاعده مستنياك خللي بالك انت بس من نفسك
أدهم :طب بوسه طيب أي تصبيره لحد ما ارجع
اسماء : يابني مش كده بقى اتلم هو انت عقلك ده فيه ايه
أدهم : و هو كل اللي بيحصللي ده و عاوزين يبقى فية عقل مكنش يومك يا أدهم يا حبيبي
فهد: اطمن و الله يا أدهم حتستريح ان شاء الله انا موصي عليك
أدهم : ياخوفي لتكون الراحه الأبديه
يسلم على امه : مع السلامه يا غاليه خللي بالك منها يا فاروق
يرضيك كده يا فاروق يا اخويا اللي حصل لابنك ده
ملحقتش اغني تحت بيت ام فاروق الشجرة طرحت برقوق و اللي بحبه طلع مخبول و بلاسه لاسه نايلون
اشوف وشكم بخير ده اذا شفتكم تاني من أساسه و سلم عالشهدا اللي معاك
الكل : ههههه هههههه هههههه
...........................................
بعد مرور عدة أيام في إحدى القاعات يجلس عدي و هو واضع يده في يد والد مرام لعقد قرانهما و مرام تجلس بجواره بفستان زفافها و قلبها يدق من شدة فرحته و الكل يتجمع حولهم ينتهي المأذون بقوله : بارك الله لكما وبارك عليكما وجمع بينكما في خير
تعلو الزغاريد في القاعه و الكل يسلم عليهم و يبارك لهم
و مامت مرام تحضنها : ألف مبروك يا حبيبة ماما ربنا يهنيكي و يسعدك يا حبيبتي يارب
مرام : الله يبارك فيكي يا ماما ربنا يخليكي ليا يا حبيبتي يارب
الف مبروك يا عدي ربنا يهنيك يا حبيبي يارب
عدي : الله يبارك في حضرتك يا بشمهندس مش عارف اقولك ايه على كل اللي عملته معايا
يونس : هو في ابن بردو بيشكر ابوه ربنا يهنيك ويسعدك معاك اسبوعين من دلوقتي اعمل فيهم كل اللي نفسك فيه عشان بعد كده حتسلملي نفسك الشركه محتاجاك
عدي : حاضر يا بشمهندس ربنا يقدرني و اكون دايما عند حسن ظنك و عقبال البنات يارب
يونس : يارب بس أدهم يرجع
عدي : هو لسه ادامه كتير
يونس : اسبوعين ان شاء الله و يرجع
عدي : يرجع بالف سلامه أن شاء الله
يحضنه هادي و فهد اللي كانوا شهود عالعقد و يباركوله
و كل واحد فيهم يتصور معاهم هو و مراته هادي و جنه و فهد و نجلاء اما الولاد فسابوهم في البيت مع جدودهم عشان الصوت و الدوشه
يحضن عدي مرام و يقبلها من جببنها : ألف مبروك يا حبيبتي
مرام : مبروك لينا يا حبيبي
عدي : كان نفسي ارقص معاكي زي كل العرسان و افرحك
مرام : انت فرحتي يا عدي ربنا يخليك لية
ييجوا البنات يشدوها عشان تقوم ترقص معاهم و هي مش عاوزة تسيبوا لوحده في الكوشه
لكن عدي يصر عليها انها تقوم ترقص مع صحابها
ييجي فهد يقعد جمبه في الكوشه : ياه فكرتوني بالذي مضى بقولك ايه يا عدي
عدي : خير يا فهد
فهد : خير طبعا هو أنا بييجي من ورايا غير الخير هو مفيش مكان هنا الاقي فيه شيشه
عدي : هنا في القاعه
فهد : ايوة و فيها ايه فاكر مسلسل لن اعيش في جلباب ابي لما الحج سردينه شرب شيشه في فرح ابنه
عدي : يااه ده انت قديم أوي يا فهد
فهد : من فات قديمه تاه يا معلم اصل من يوم ما الواد اياد شرف و هو قطع عننا مياه و نور ماهو ابني بردو و بخاف على صحته ده غير كمان حمايا من يوم ما سكن جمبنا و هو مقيم عندنا يعني لو لمحني حيمرجحنى
عدي : ههههههه معلش بقى
فهد : بص انا حخرج برة القاعه كده شويه يمكن ربنا يرزقني بحاجه
يقوم فهد و ييجي عمرو يسلم عليه : ألف مبروك يا حبيبي
عدي : الله يبارك فيك يا عمرو هي همسه مجتش معاك
عمرو : معلش هي بتسلم عليك و بتقولك الف مبروك و ان شاء الله انا و هيا حنجيلكم البيت لكن انت عارف هي مبتحضرش أفراح من يوم اللي حصل
عدي : ربنا يصبرها يارب و يقومها بالف سلامه أن شاء الله
عمرو : ربنا يخليك يا عدي ربنا يهنيك و يرزقك بالذريه الصالحه يارب
عدي : يارب يا عمرو نفسي يبقى لية عيله و محسش اني لوحدي في الدنيا زي ما طول عمري حاسس بده
عمرو : ان شاء الله يا عدي ربنا حيديك كل اللي نفسك فيه هما الجماعه عندك مجوش
عدي : بابا جه سلم علية و دلوقتي مش شايفه تلاقيه مشي
اما ماما حاولت ابلغها مردتش علية بعتلها رساله معرفتش شافتها و اللا لاء انا عارف انهم شالوني من حساباتهم من زمان يا عمرو
عمرو : عدي الليلادي فرحك يبقى عاوزك تفرح و تنبسط و متخليش حاجه تعكنن عليك دي ليله في العمر و الحمد لله ربنا رزقك بأهل مرام بيحبوك و معتبرينك ابنهم بص بيرقصوا مع بنتهم ازاي و فرحانين عشانها و بص هي الفرحه على وشها ازاي و عيونها مبتنزلش من عليك احمد ربنا يا عدي و انسى اللي فات و افتح قلبك للدنيا
عدي : الف حمد وشكر ليك يارب ربنا يخليكم لية يا عمرو انت و هادي و فهد و البشمهندس أهلى و إخواتي و دنيتي كلها ربنا عوضني بيكم عن كل اللي فات
عمرو : ربنا يخلينا لبعض يارب
سهره جميله يقضوها في الفرح و كلهم سعدا و مبسوطين و هادي و فهد و عمرو يوصلوهم لحد البيت بزفه جميله لدرجة ان كل الناس خرجت في البلكونات و قعدوا يتفرجوا عالزفه و يزغردوا ليهم و طلعوا معاهم الشقه و صوروهم صور كتير و سابوهم و مشيوا عشان يبدءوا
مرام كانت بتساعد عدي في كل حاجه بكل حب الدنيا و عدي سعيد انه حيبدء معاها حياته من اول و جديد
.......................................
بعد مرور اسبوعين يرجع أدهم و يكونوا حضروا كل حاجه للفرح و بقى قاعد خايف يفتح بؤه بكلمه ليحصل حاجه تاني
غاليه : يا حبيبي يا أدهم هما عملوا فيك ايه بس يا ضنايا من وقت ما رجعت و انت مكتوم
أدهم : خلاص حرمت انا عاوز اتجوز بقى نفسي الجوازه دي تعدي على خير انا حاسس اني معمولي عمل على رجل نمله
غاليه : حتتجوز يا واد و تنبسط و بكرة تضرب نفسك بالجذمه
أدهم : على اساس انك كنتي ضربتي نفسك بالجذمه نفسي افهم ليه كل واحد و واحده متجوزين يفضلوا يقولوا للمتجوزين انتوا كده احسن قطيعه تقطع الجواز و سنينه هما يعني اللي اتجوزوا اخدوا ايه ده الجواز ده قرف و ربنا ده انتوا كده عايشين احلى ايام حياتكم
طب لما هما قرفانين كده قاعدين مع اجوازهم ليه طب ما يسيبوهم و يرتاحوا
غاليه : يعني الحق علينا اننا بنعرفكم اللي حيحصل بعد كده عشان تبقوا مستعدين
أدهم : انا عن نفسي مستعد و جاهز و ربنا ادوني فرصتي بقى
غاليه : حتاخدها و الله و ابقى اتشطر بس و ورينا انجازاتك
أدهم : ياااه ده انا حعمل عمايل
يوم الحنه فاروق عمل احتفال كبير و عزم اهل البلد كلها و عزم الناس كلها عالغدا الفقرا قبل الاغنياء و الناس كلها فرحانه عشانهم و بيدعولهم و فاروق وزع لحمه عالناس كلها من فرحته بولاده و طبعا هادي معاهم طول اليوم فرحان لولاد خاله و الناس كلها بتسلم عليه و بتهنيه برجوعه لأهله بالسلامه و كان سامع الناس بودانه و هما بيقولوا ان حركاته نفس حركات ابوه عبد الرحمن و نفس طريقة كلامه كان سامعهم و هما بيحسبنوا على اسماعيل و اللي عمله فيه و هو صغير و فهد معاه بيساعده و بيحط الأكل قدام الناس
اما جنه و ناديه و آلاء ومعاهم نجلاء و مامتها فكانوا مع جميله بيشاركوها فرحتها بولاد اخوها
و جميله كانت خايفه أوي على جميله الصغيره من العيون : جنه عشان خاطري طلعي جميله فوق انا خايفه عليها
جنه : حاضر يا ماما
جميله : و انتي كمان يا نجلاء طلعي ابنك معاها فوق عشان خاطري
تطلع جنه و نجلاء فوق و ينيموا ولادهم و تقعد معاهم آلاء و هما يرجعوا ينزلوا تاني
جميله : العيال فين يا بنات
جنه : اطمني يا ماما آلاء قاعده معاهم
فاديه : امال آلاء فرحها امتى ان شاء الله
ناديه : بعد شهر ان شاء الله و الله ما عارفه حعمل ايه من غيرها حتوحشني اوي
فاديه : ربنا يسعدها يارب
ناديه : يارب دي آلاء حته من قلبي
عدت ليلة الحنه على خير و أدهم رايح جاي في البيت
فاروق : ما تتنيل تقعد بقى قرفتنا
و اللا اطلع اتخمد نام
أدهم: انام ازاي و انا بكرة فرحي انا قلقان قلقان اوي
فاروق: اهو ده اللي انا كنت عامل حسابه شفتوا بقى ان كان عندي حق لما قلت دول لازم يباتوا هنا اول ليله و مفيش سفر لشهر عسل غير اما اطمن حيهببوا ايه مع عرايسهم الاول خصوصا ابو لسانين ده ياخوفي منك يا سبع لتطلع قطه
أدهم : تصدق بالله يا بابا ما فى حاجه حتجيبني الأرض غير كلامك
ده بكرة ان شاء الله حتلاقي اسود بتجري في البيت و اعاصير و براكين
فاروق : ادي الجمل و ادي الجمال و المياه تكدب الغطاس و بكرة قريب و ادينا حنقعد جمب الحيطه و نسمع الظيطه
أدهم : إيه ده هو ابوك حيقعدلي جمب الباب و اللا إيه
مراد : لا و انت الصادق ده حيناملك تحت السرير
أدهم : ليه هو عارف حاجه عني انا معرفهاش مراد كلام ابوك ده بدا يقلقني على نفسي ايه ده بص يا مراد بيبصلي ازاي مراد انت متاكد ان الراجل ده ابونا
مراد : هههههههه يا عيني يا أدهم معلش حبيبي بابا عاوز يطمن علينا
أدهم : هما مش زمان كانوا بيبقوا عاوزبن يطمنوا عالبنات دلوقتي بقوا عاوزين يطمنوا عالرجاله هو ايه اللي حصل
مراد : معلش بقى عوامل التعريه يا حبيب اخوك
يوم الفرح ( ياللا يا أهل الجروب استعدوا كل واحده وراها حاجه تخلصها الليلادي فرح أدهم و مراد و هما عازمينكم كلكم متتاخروش بقى)
صحى الشباب من النوم و راحوا اخدوا البنات و ودوهم الفندق و الكل بدا يستعد للفرح
جنه لبست جميله فستان عروسه جميل و كانت زي القمر و هادي كان طاير بيها و بجمالها و نجلاء لبست إياد بدلة كان فيها زي القمر
اتجمع في الفندق كل الاهل و الأصحاب و زملاء العمل و رجال الأعمال و كبراء البلد
و أدهم و مراد اخدوا عرايسهم من ايد يونس و بدا الفرح اللي مبطلوش فيه رقص و لا قعدوا دقيقه
♥️ ياااه اخيرا وصلت الجو عندكم حر اوي في القاهره مش كانوا عملوا الفرح عندنا في اسكندريه الفندق اهوه
الأمن : ايوة حضرتك جايه فرح مين
♥️فرح أدهم و مراد و مش جايه لوحدي حضرتك بص كده
الأمن : إيه الاتوبيس ده
♥️دول كل أعضاء الجروب و حبايب أدهم ممكن بقى توسع حضرتك
الأمن : اه طبعا اتفضلوا و هو انا اقدر اتكلم
تعالوا يا بنات ادخلوا الفرح فرحنا و الليله بتاعتنا تعالي يا هبه و ايمان ياللا يا منى ادخلي يا اسماء ياللا يا رشا سوزي يا توته ياللا كلكم ادخلوا مش حعرف اقول اسم واحده واحده مفيش وقت
أدهم اهوه بيرقص ياللا بينا
♥️مبروك يا أدهم
أدهم : مش معقول عبير معقوله انتي هنا معانا
♥️و هو انا حاجي لأعز منك و حياتك ما عملتها مع هادي نفسه بس آخر حلقه بقى و قلت افرح الجروب قبل ما نحط كلمة النهايه
أدهم : عبير ابوس ايدك انتي بهدلتيني بما فيه الكفايه ربنا يخليكي عدي ليلتي دي على خير
♥️و انا عملت ايه بس يا دومي ده انا حتى غلبانه
أدهم : يا مفتريه ده انتي جيبتيلي استدعاء و الليلادي مش عارف ناويه لي على ايه بصي الناحيه اللي هناك دي
♥️دول عيلتك القمر و ده عمو فاروق باباك
أدهم : ايوة يا اختي و انا يعني حقولك عليه ناوي يباتلي على باب الأوضة عشان خاطري ارفعي راسي خليني اعرف اخد الغلبانه دي و اقضي شهر العسل
♥️مش لو انت بيت فيها يا معلم
أدهم : انتي بتقولي ايه مش سامعك ♥️بقول ليلتلك حتبقى و لا الف ليله و ليله عمرك ما حتنساها العمر كله و الليله ليلتك يا معلم أدهم متزعلش مني يا حبيبي ده انا بحبك و الله
امال فين عروستك اباركلها يا دي النيله ده انا مش عارفاهم من بعض اوعى تتلغبط انت و اخوك في العرايس هههههه حقه تبقى كملت
بنات روحوا انتوا عيشوا حياتكم في الفرح و انا حرجع بقى اكمل الحلقه و ربنا يستر و ليلته تعدي على خير
هادي : مين اللي كنت واقف معاها دي يا أدهم
أدهم : معقوله مش عارفها دي عبير سليم يابني جت عشان تباركلي بس مش عارف ليه مش مستريحلها و حاسس انها ناويالي على حاجه
هادي : لا دي مادامت جاتلك تبقى بتحبك اوي دي معملتهاش في فرحي بس انا زعلان منها ازاي تبقى موجوده و متسلمش علية
أدهم : معلش أصلها مستعجله عاوزه تجري تكمل الحلقه النهارده الحلقه الاخيره
هادي : معقوله يعني النهارده اخر مرة حنبقى فيها مع بعض حتوحشني و الله يا ادهم و الجروب كله حيوحشني و لو اني زعلان منهم عشان متفاعلوش كويس عالروايه و كانوا مزعلين بيرو منهم
أدهم : ان شاء الله الليلادي حيتفاعلوا و مش حيهون عليهم عبير تزعل منهم في آخر حلقه
ياللا بقى روح افتح البوفيه عشان الجروب كله يتعشى قبل ما يمشوا ده فرح أدهم حبيبهم
ليله من الف ليله و ليله الكل حضرها عيلة هادي طبعا مسعد و مرزوقه و بناتهم و خديجه و أبنها هادي و بنتها جنه هادي كان فرحان بيها اوي و كان شايلها و فرحان بيها
و عدي و عروسته مرام و عمرو حتى همسه مقدرتش متجيش تبارك لهادي و قعدت شويه و مشيت و اشرف و ريم و مصطفي كان موجود طبعا و طول الفرح جنب آلاء و ناديه طلبت منه ياخدها و يرقصوا مع الشباب كل الحبايب كانوا موجودين و الصور و الفيديوهات كلها نزلت عالميديا
رجعوا البيت و الزغاريد ملت الدنيا و كل عريس اخد عروسته و طلعوا اوضتهم
مراد و هو بيقبل جيلان من جبينها : ألف مبروك يا حبيبتي
جيلان : الله يبارك فيك يا حبيبي
مراد : ربنا يقدرني يارب و اخليكي اسعد واحده في الدنيا
جيلان : انا فعلا اسعد واحده في الدنيا عشان اتجوزتك يا مراد
مراد : جيلان انا بحبك اوي
جيلان : و انا بحبك اكتر
مراد: نفسي اوي تجيبيلي بنوته امورة شبهك
جيلان : آه عشان تاخدك مني زي ما جميله اخدت ابيه هادي من جنه
مراد : لا طبعا مش صحيح مفيش حد ممكن ياخد هادي من جنه هو بيحبهم هما الاتنين بس كل واحده فيهم حبها غير التانيه
جيلان : يعني محدش حياخدك مني يا مراد
مراد : توء توء اطمني مفيش حاجه في الدنيا دي كلها ممكن تاخد مراد من جيلان حبيبته
ياللا نغير هدومنا و نتوصا و نصللي ركعتين و ندعي ربنا يباركلنا فحياتنا و يكتبلنا السعاده و الفرح يارب العالمين
جيلان حاضر يا حبيبي
عند أدهم و بيسان
أدهم : بت يا بيسان
بيسان : ايوة يا دومي
أدهم : اضربيني بالقلم على وشي يا بت
بيسان : ليه يا حبيبي
أدهم : عشان أصدق اني مش بحلم يا بسبوستي
بيسان : هههههههه لا اطمن انت مش بتحلم احنا اتجوزنا يا دومي
أدهم : يعني حبوس
بيسان : هههههه حتبوس يا دومي
لسه بيقرب منها عشان يبوسها يلاقي خبط جامد عالباب
أدهم : يا لهوي بابا هو مفيش غيره انا عارف خبطته عاوز ابه مني دلوقتي قطع حبل افكاري و بعدبن هو عاوز ايه هو احنا لسه قلعنا هدومنا يا دي النيله علية
انا عارف انها ليله مش فايته
بيسان : في ايه بس يا حبيبي ما تفتح و خلاص
أدهم : لأ مش فاتح سيبك منهم و ركزي معايا
يخبط الباب تاني : افتح يا ادهم افنح يا بني ادم
أدهم : ايه يا بابا ايه و ربنا لسه ماعملت حاجه
فاروق : و شكلك مش حتعمل حاجه يا فقري قدامي اوام مفيش وقت
أدهم : ادامك على فين اوعى تقول جالي استدعا تاني
فاروق : لا يا عين ابوك جالك حالة ولاده متعسره
جاموسه عندنا بتولد و مش لاقي حد يولدها ياللا مفيش وقت الجاموسه حتفطس
أدهم : لاءءءه ده حرام انا قلبي مكنش مطمن مش مسامحك يا عبير عالبهدله اللي بهدلتهالي دي
فاروق : سيبك من عبير و ياللا قدامي الجاموسه حتروح فطيس
أدهم : متغيريش انتي فاهمه انا اللي حقلعك الفستان اياكي تقلعي لحد ما ارجعلك
فاروق يسحب أدهم من قفاه و أدهم بيعيط و بيسان قعدت بالفستان على السرير و نامت و هي مش حسه
اما أدهم ففضل طول الليل بيولد في الجاموسه لحد ما ولدت و نضف العجل و حماه
فاروق : شاطر يا ادهم ميجيبها الا رجالها
أدهم : اهئ اهئ رجالها هي عاد فيها رجاله مبروك ما جالك يا والدي يتربى فعزك يا ابويا
ييجي راجل من الرجاله الحق يا حج فاروق الفرسه سكرة بتولد و تعبانه اوي
يقعد أدهم في الارض و يولول لاءءءه ده كتير علية و ربنا كتير هو انا كان مكتوبلي كل ده فين ياربي دي ليلة فرحي يا ناس دي دخلتي يا اهوه
دخله هي فيها دخله ما خلاص دي بقت خارجه اهئ اهئ اهئ
جدر البطاطا اللي كان السبب يا ضنايا
سيبيوني الله يخليكم اعتقوني لوجه الله
فاروق : و تهون عليك سكرة يا ادهم مش دي حبيبتك يهون عليك تسيبها و هي بتولد
أدهم: و ربنا ما حد حيولد غيري سيبني الله يخليك
فاروق : قوم يا حبيبي ربنا يهديك
يروح معاه و يولد الفرسه
فاروق : بسم الله ماشاء الله مهرة جميله
أدهم : فولت فيها مش قلتلي حتبات في الزريبه اديني بيت في الزريبه و الاسطبل و الله ما جصرت
فاروق : يا لهوي أدهم ابني الحقني يا سيد الواد اغمى عليه شيله معايا
سيد : عنك يا حاج انا حلفحه على كتفي
طبعا النهار كان طلع خلاص
دخل سيد الفيلا و هو شايل أدهم اللي كان نايم على كتفه
غاليه : يالهوي ابني ماله فيه ايه يا فاروق
فاروق : حطه هنا يا سيد متشكرين يا سبد
سيد : العفو يا حج و الف مبروك صباحيه مباركه يا عريس
فاروق : هو كان دخل انت كمان عشان تقولله صباحيه الواد لا مسى و لا صبح روح يا سيد روح
غاليه: يا حبيبي يا ادهم كده بردو يا فاروق تعمل في ابنك كده فليلة فرحه حرام عليك ده الواد كان مستني الليله دي بفارغ الصبر
فاروق : واد يا ادهم اصحى يا حبيب ابوك
أدهم : إيه انا فين
فاروق : تعالى اطلع لعروستك يا حبيبي
يطلع أدهم و يزق الباب
بيسان : أدهم حبيبي انت جيت
أدهم : بسبوسه هاتي بوسه يابت و فجأة يترمى عالسرير و يروح في النوم
بيسان :أدهم يا دومي ياربي طب اقلع الفستان دلوقتي و اللا اعمل ايه بقى هي دي ليلة فرحي ياربي هو زي أدهم ما بيقول حد باصص لنا في الجوازه دي
نام يا حبيبي نام
مر اليوم كله و أدهم نايم و اول ما صحى حلف ما هو قاعد و حياخد بيسان و يسافروا و فعلا العرسان سافروا على شهر العسل و عاش كل اللي كان نفسه يعيشه مع بيسان من ضحك للعب لهزار لحب و عاشوا أجمل ايام عمرهم
...........................................
في إحدى المستشفيات يقوم عمرو و يفتح الباب : هادي اتفضل ادخل
هادي يروح عليها و هي نايمه مش قادره : ألف حمد الله على سلامتك يا حبيبتي
همسه : الله يسلمك يا ابيه
يروح هادي ناحية السرير و يشوفه و هو نايم : بسم الله ما شاء الله ربنا يباركلكم فيه و تشوفوه احسن الناس يارب
ياخده عمرو من السرير : خد يا هادي شيل هادي الصغير
هادي بفرحه : هادي
همسه : معنديش اغلى منك عشان اسمي ابني على اسمك يا ابيه يارب يطلع زيك يا ابيه هادي يارب
يفرح هادي بيه اوي و يضمه لصدره يا حبيبي ربنا يخليك و يبارك فيك و يقر عين مامتك و باباك بيك يارب
بعدها ييجي فرح آلاء و اللي يونس يعمله لهم في الفيلا عنده
عملهم فرح جميل و كلهم باركولهم و هنوهم و عملولهم احلى ليله و آلاء كانت فرحانه اوي هي و مصطفي
و فيوم كانت جنه و نجلاء في النادي و معاهم ولادهم
نجلاء : مالك با جنه بتبصي على مين
جنه : شايفه البنت اللي قاعده بتضحك هناك دي
دي اللي اسمها ميار اللي كانت شغاله في الشركه عند هادي بس هيا مالها لابسه كده ليه و مال شكلها عتمل كده ليه
نجلاء : دي واضح عليها اوي انها واحده تافهه و هبله كده
ميار : لا يا حبيبتي انا مش عاوزة جواز بقى و كلام من ده خلينا صحاب كده و خلاص انا لما احب اتجوز لازم اتجوز حد يكون مالي عيني غير كده لاء
تمر الأيام و السعاده ماليه القلوب و أدهم عايش حياته مع بسبوسته و فليله يدخل فاروق من برة : هو في ايه يا غاليه ايه صوت الطبل ده
غاليه : هههههه ده ابنك أدهم بيطبل لمراته و هي بترقصله
فاروق : بيطبل يا لهوي عالهبل يا ناس
غاليه : ربنا يسعدهم يا فاروق
فجأة يسمعوا أدهم بينده عليهم الحقوني الحقني يا بابا
فاروق : في ايه
أدهم : بيسان وقعت من طولها و مش عارف مالها الحقوني بدكتور بسرعه
بعد مرور الوقت : خير يا دكتور طمني
الدكتور: يعني بزمتكم بنفع كده معقوله بردو واحده حامل و لسه في الشهر الأول و تتنطط كده
فاروق بفرحه : حامل
الدكتور : هو انتوا مكنتوش تعرفوا
فاروق : و هو انا لو اعرف كنت حسيبهم يعملوا كده
أدهم : مراتي حامل
فاروق : طمني يا دكتور الله يخليك العيل حصلله حاجه
الدكتور : الحمد لله ربنا ستر لكن هي لازم ترتاح و تنام على ضهرها و مش عاوزين مجهود خالص انت فاهمني طبعا
أدهم : لا مش فاهم
الدكتور : فهمه انت يا حج
فاروق: اطمن يا دكتور انا حاخده انيمه جمبي اتفضل اوصلك
جيلان : الف مبروك يا حبيبتي
بيسان : الله يبارك فيكي يا جيجي عقبالك انا مبسوطه اوي حبقى ام بابي و مامي حيفرحوا اوي
يدخل ابوه : الف مبروك يا بنتي ربنا يكملك على خير يارب بقولك ايه يا بني ادم انت انت من دلوقتي حتروح تنام في اي مكان اه ما نا مش مستغني عن حفيدي انت فاهم
أدهم : يعني ايه مش فاهم
فاروق : يعني متجيش ناحيتها متقربلهاش لحد ما الحمل يثبت كفايه اللي عملته كنت حتضيعه مننا يا متخلف
أدهم : لا و ربنا ما حيحصل هو انا كنت لحقت اتجوز انا مليش دعوة ده انا ملحقتش ابوس لا وربنا اهئ اهئ
فاروق : مراتك حامل و ملحقتش تبوس هو انت عاوز تقضيها العمر كله بوس و اللا إيه يا بني انت ايه حكايتك مع البوس جي انا عاوز افهم
جيلان و بيسان : هههههههه هههههههه
..........................................
هادي في حاجه عاوزه اقولك عليها بس مش عارفه حتفرح و اللا إيه
هادي : خير يا حبيبتي قلقتيني
جنه : هادي انا انا انا حامل
هادي بفرحه : ايه انتي قلتي ايه حامل
جنه : ايوة لسه عمله الاختبار دلوقتى
هادي يحضنها و يشيلها و يلف بيها : الف الف مبروك يا حبيبتي
جنه : يعني انت مش زعلان
هتجي : ازعل انك حامل ياربي عليكي يا جنه مانتي عارفه اني لو علية نفسي تمليلي البيت ده ولاد
جنه : بس جميله لسه صغيرة
هادي : ماما ناديه و ماما جميله معانا و بعدين كده يتربوا مع بعض الف مبروك يا حبيبتي الف الف مبروك
ايه انتي حامل بس تبقي انتي و صاحبتك متقفين تعملوها سوا.
نجلاء : هههههه و ربنا ابدا هي جت صدفه
فهد : ماشي يعني انا كده بقيت ابو العيال رسمي نظمي
نجلاء : ههههههه يتربوا فعزك يا حبيبي
بعد مرور عدة أشهر
انا و ربنا ما مصدق اللي احنا فيه ده معقوله واخدين دور كامل لحسابنا عنبر ولاده
اسماء : هههههههه انا حسه اننا في فيلم كوميدي و الله كل بناتنا مع بعض كده جنه و نجلاء و بيسان و جيلان مش ممكن دي لو مترتبه مش حتبقي بالشكل ده
الف حمد لله على سلامتكم يا حبايبي
يقرب هادي من يونس و على ايده ابنه : شفت يا بشمهندس يونس الصغير
يونس بفرحه و هو بيشيله : بسم الله ماشاء الله ألف مبروك يا هادي يتربى فعزك يا حبيبي
فهد : انا بقى جبتلكم بنوته زي القمر
اسماء : حتسموها ايه
نجلاء : لمار
اسماء : تتربى فعزكم يا حبايبي
صلاح : أنا بقول خدوا إياد بقى شويه و ادوني لمار
فهد : لا و النبي يا بابا سيبلي بنتي شويه
صلاح : يعني هو انا حاخدها و اجري مانا في العماره اللي جمبكم ده انا حتى حلبسها المايوه و اعلمها العوم
و اللا انت نسيت انك راسملي البحر عالحيطه ياااه اسكندريه وحشتني
نجلاء : هههههه حبيبي يا بو صلاح
أدهم قاعد جنب بيسان : تعبانه يا روحي معلش حتبقي كويسه
بيسان : سليم حلو يا دومي
أدهم : قمر زي ابوه طبعا
جيلان : مراد شيل المخده من تحت راسي يا حبيبي
مراد : حاضر يا حبيبتي
جيلان : غاليه حلوه يا مارو
مراد : لازم طبعا تبقى حلوة و قمر زي مامتها يا حبيبتي
.....................................
هادي طول تلت سنين و هو بياسس دار أيتام و جمعيه خيريه متكامله و وحدة غسيل كلى بالميراث اللي ورثه من ابوه
و النهارده عمل افتتاح للدار و دعا فيها كل حبايبه اخد كل الأطفال في حضنه اللي اهله ماتوا و ملهوش حد و اللي لقيط و اللي ميعرفش هو جه ازاي للدنيا اخدهم كلهم في دار و قرر يبقى هو ابوهم كلهم و يفرغلهم جزء، من وقته يقضيه معاهم
الكل كان موجود و الكل جه يشارك لحظته الجميله دي
وقف هادي بين الأطفال كلهم و بدا يتكلم : انا هنا عشان انا واحد من الأطفال دول عشت نفس اللي عاشوه و كنت واحد منهم في يوم من الايام وقتها مكنتش اعرف ان لية اهل و كنت حاسس أحاسيس مش ممكن حد يحسها غير دول لكن برغم كل شئ ربنا كان رحيم بية اوي و وفقني للي فيه الخير و وقفلي ولاد
الحلال يمكن عشان عمل ابويا و امي الطيب لكن انا مش عاوز الأطفال دول يعيشوا اللي عشته عشان كده دول حيكونوا ولادي و انا ابوهم كلهم و ربنا يقدرني و اربيهم أحسن تربيه و أوفر لهم كل اللي يحتاجوه و اكون ليهم العون و يبقوا لية السند و العكاز اللي يسندوني بيه لما اكبر
راح ناحية مسعد و مرزوقه و باس ايدهم اهلي ابويا و امي اللي لولاهم مكنش حيبقى لية وجود في الدنيا
وراح ليونس و باس ايده : ابويا اللي رباني و علمني و غرس فية الطموح و الأخلاق و الامانه
و بشمهندسه اسماء احلى ام في الدنيا كلها
و راح لفهد و حضنه : صاحب عمري كله اللي عمره ماسابني فازماتي و لا اتخللى
عني في أي وقت احتاجه فيه
جنه حبيبتي جنتي الجميله اللي نفسي اعيش جواها عمري كله ام ولادي جميله و يونس احلى هديتين من الرحمن
امي ثم امي لحد اخر يوم فعمري
حضن و من اول حياته و همه همي
امي حبيبتي جميلة الجميلات و ست الاميرات اللي الحب مالي قلبها و اخلاصها لذكرى جوزها و أبنها اللي كانت فاكره انه راح من يوم ولادته يتعمل لها تمثال
انا لو كنت اتعذبت ببعدي عنك يوم فانتي اتعذبتي سنين بحبك يا أمي بحبك يا اميرة قلبي و ملكة حياتي كلها
يشيلها و يلف بيها و الكل بيصقف لهم و عيونهم بتبكي
يوم جميل و فرحه ماليه القلوب كلها بعد كده يجروا كلهم مع الأطفال و يلعبوا معاهم و هما سعدا و مبسوطين
هادي : الله امال فهد راح فين مش شايفه
نجلاء : ما دام جوزي اختفى كده يبقى اكيد عملها تعالوا معايا اشوفه راح فين ده
بصوا بقى يا رجاله ما دمت حبقى متواجد هنا كتير يبقى لازم كل حاحه تبقى تمام و عشان كل حاجه تبقى تمام لازم دماغي دي تبقى تمام و عشان كده الأوضة دي و بالتحديد الركن ده حيبقى الركن البعيد الهادي اللي ححقق فيه كل أحلامي بس ده سر ما بيني و بينكم و لا من شاف و لا من دري و انا حظبطكم
هو ايه ده اللي و لا من شاف ده يا جوزي انت ناوي على ايه بالظبط
فهد : يا دي النيله انتوا ايه اللي جابكم دلوقتي
هادي : انت بتتفق على ايه يا فهد انت حتجلطني يا بني ده مكان حيكون فيه اطفال و عيانين و انت بتتفق على حاجه زي دي
فهد : و انا بتفق على ايه يعني و بعدين هو انا حاخدها و حقعد بيها في النص و احكيلهم حكاية قبل النوم دي حاجه بيني و بينها و مش حخللي حد يشوفنا و احنا مع بعض محبش حد يزعجني و انا معاها عشان تعرف تبسطني
نجلاء : هي مين دي يا فهد يومك مش فايت
فهد : مراتي التانيه عندك مانع يا نوجة قلبي
نجلاء : لا طبعا يا روحي ما دام الكلام على مراتك التانيه يبقى الف مبروك يا حبيبي و ارقعلك زغروته كمان لوووووولي
تمت