رواية سلطان زمانه الفصل السادس6بقلم مريم اليوسف
بيوم جديد
اندق باب جناح الاء ودخلت نجود
الاء : تعي نجود .. خبرني شو في تحت
نجود : والله غير شكل .. هشام بيك ما عاطي فرحتو لحدا بجية اختو وبنتها وجوز بنتها .. مابدك تنزل تسلمي عليهن انحط الغدا وهشام بيك طلب مني اندهلك
الاء : مو حابة انزل ولا شوفن لأنن ساعدو هشام بكذبتو
نجود : صار يلي صار وهشام بيك صار من نصيبك ماحلوة تخجليه قدام اهلو .. وبعدين انت بتعملي بأصلك
الاء :جبتيها ... قوليلي شو البس
نجود : اكيد شي مستر لانو جوز ملك موجود
الاء : اي صح .. شو لابسين نور وحلا
نجود : عينك عليهن .. لابسين عبايات ملون خرج بيت يعني وحجاب بس طالعين كتير حلوين
الاء : اذا البست متلن رح اطلع متل نسوان بديع يلي بعيلة سبع نجوم
نجود : هههههه
فتحت الخزانة وطلعت بنطلون قماش بلون البيج وفوقو قميص طويل لتحت الركبة وفوقو بالورو طويل للارض بلون الازرق السماوي مع تطريزة بيج وسكريبنة بيج وحجاب من نفس اللون طلعت كتير انيقة وحلوة
الاء : حلو
نجود وهية عم تراقبها : كتير انيق وشيك
الاء : بشبهن ؟؟
نجود : ابدا .. مميزة
الاء : وهو المطلوب
~~~~~~~~~~~~•
كانو قاعدين على سفرة الغدا والاكل من جميع الاصناف ..
ام عمر : شو وينها الاء مو ناوية تسلم علينا
هشام : شو هالحكي اكيد هلق بتنزل
ملك : لتكون ماخدة على خاطرها مننا
محمود جوزها : ليش شو عملتو
ملك : اااه لا ولاشي لا تهتم حبيبي
نور : انا قايمة شوفها
هشام : لا خليكي انا قايم .. قام ومشي خطوتين .. كانت الاء واصلة .. ابتسم هشام برياحة
الاء : السلام عليكم
قامت ام عمر وملك
الاء : لك ليش قمتو .. لا قيام على الطعام
ام عمر : لسه ما اكلنا ناطرينك
الاء : لا تواخذوني ... ماكنت عارفة رح توصلو بهل الوقت
قربت وباست ام عمر وكمان ملك
ملك : مبروك الاء
الاء :الله يبارك فيكي .. وانت كمان مبروك ماصحلي باركلك
ملك : ولا يهمك
وسلمت على محمود بسلام عادي من بعيد
وراحت قعدت مكانها
ام عمر : كيفك الاء .. شو اخبارك ان شاء الله مبسوطة مع هشام
اتطلعت بهشام ورجعت اتطلعت بام عمر وقالت : الحمد لله
حلا : هشام مافي مرى بتكون معو مو مبسوطة ...
ام عمر : اي اخي بيعرف كيف يسعد يلي حواليه
الاء : مو عطول ... قصدك بيعرف كيف يسعد حالو
نور : سمو بالله يا جماعة
هشام ماعجبو كلام الاء بس ماحب يزيد النقاش حدة
ملك : الاء حليانة
حلا بمزح : شو قصتكن يا جماعة شو مافي غير الاء بالقعدة
ام عمر : عسلامتكن انتو .. بس الاء بنعرفها من قبل وكمان عروسة اخي الجديدة وكمان لاتزعلوا والله كلكن معزتكن غالية على قلبي
حلا : ولايهمك حبيبتي عم امزح
ملك لجوزها : شو حبيبي ماعم تاكل .. ماعجبك الاكل
محمود : لا ماشاء الله كلو من اكملو .. بس مستغرب الوضع ههههه
ملك : بس مايعجبك وتصير بدك تقلد
محمود : بدنا نصيحة خال
هشام : انت وهمتك الشغلة بدها بال طويل
محمود :لا اذا هيك خلص وحدة بتكفي
ملك : بالله شوو
الكل صار يضحك
بلشو ياكلو والصمت سيد الموقف .. الاء كانت عم تاكل بهدوء رفعت نظرها ولقت محمود شارد فيها .. لفت انتباهها انو شب حليوة وكأنو وجهو مألوف بس ليش عم يتطلع فيها هالنظرات
حكى محمود بشك : الاء؟؟! الاء قمحاني ماهيك
الكل انتبهولو
الاء : بتعرفني
محمود : يعني هي انت
الاء : ؟؟!!
محمود : كنا بنفس المدرسة .. مدرسة الاجيال الذهبية ... انا كنت بكالوريا وانت كنتي عاشر
الاء عم تحاول تتذكر : ما اتذكرت
محمود : محمود الامير ..( البرنس )
الاء : سمعانة هالاسم
محمود : انا كنت مشهور بالمدرسة لازم تكوني متذكرة
ملك : بتعرفوا بعض
محمود : (بنبرة هادية )اي انا بعرفها منيح ل الاء بس هية ماعم تتذكر
هشام عم ينقل نظرو بين الاء ومحمود ومبين عليه الوضع مو عاجبو
الاء : اي اتذكرت .. انت محمود يلي كنت مجنن كل بنات المدرسة ... لهلق بتذكر تسريحة شعرك ... قد ماكانو البنات يتغزلو فيهن ... وبالعلامة كنا تحب بنت من صفنا .... ااامم ... احلام مو هيك
محمود : لااا ماكنت حب احلام
الاء : كيف هيك ... امبلى .. اول شي كنت تقول بتحب بنت ببلش اسمها بحرف الالف وبعدها قالوا احلام
محمود : لا مو احلام .. مابتتذكري الاء
الاء : والله مابتذكر .. ماكنت فوت كتير بهل القصص
محمود : البنت يلي حبيتها بعتلها رسالة وصدتني ومن وقتها سكرت على الموضوع نهائيا ... اخدت البكالوريا وسافرت
الاء : مابذكر ... بس عنجد غيبة مين ماكانت كيف رفضتك وانت كان كل البنات بدن منك نظرة
هشام : انتو ملاحظين انو الحديث عن ايام المراهقة ما الو اي معنى هلق
الاء : عم تقول ايام المراهقة .. صرلي شي ٥ سنين ماشفتو لمحمود بس اتذكرت هديك الايام .. صح كانت تحت القصف بس كانت حلوة
ملك مبين عليها الغيرة وماسكة الشوكة وعم تضغط عليها وقالت : مين هية حبيبي البنت طلعت
الاء : اي صح مين هية
هشام : فهمناا عااد
الاء : مافيها شي خلينا نعرف مين كانت البنت
محمود حس الوضع متأزم وقال : ههههه ولا حدا بنت هبلة اتفقت معها انها تكون حبيبتي كرمال البنات يبعدو عني
الاء : من شوي كنت تقول بعتلها رسالة
محمود : هي اشاعة طلعوها علي بس عم اذكرها لشوف اذا مارق عليكي هيك قصة
الاء : اممم ... لا ما مارق ... بس مابتقصر ... وبعدين منيح عملت هيك بنات المدرسة كانو كتير جلقين ... والحمد لله الله بعتلك ست الصبايا ملك
قدرت تلطف الجو لانو حست ملك تغير لونها وهية زودتها شوي وحست على هشام انقهر لانها عم تحكي مع محمود بهل العفوية
حطت راسها بصحنها ومن جواها مبسوطة شافت حدا من ايام مدرستها وكمان بدا تحكي لميساء عنو وتسألها لانو حست محمود مخبي شي وماحكي القصة كاملة او يمكن خاف من ملك يكمل وعند ميساء الخبر اليقين
كانت الابتسامة تلقائيا تنرسم على وجهها من افكارها يلي عم تدرو براسها بس عيون هشام يلي عم تشتعل غيرة متصببة عليها .. ولما اتطلع على محمود حس انو عيونو على الاء وفورا بعدهن
ملك : دايمة
هشام : ملك حبيبتي ما اكلتي شي
ملك : دايمة خالو .. جايين من السفر ومابدي تقل بركي بعد شوي بعمل وجبة خفيفة
هشام: عراحتك
ملك : حبيبي انا بالجنينة بس تخلص
محمود : جيت معك حبيبتي
هشام : ما اكلت شي
محمود : الحمد لله .. وبعدين مافيني بعد عن حبيبة قلبي وجودها جنبي بحسسني بالشبع
هشام : اذا هيك بالهنا
تركوهن وطلعو ومبين انو ملك زعلانة ومحمود عم يحاول يتقرب منها
ام عمر : انا دايمة
نور : والله ما اكلتو شي
ام عمر : انتو بتعرفو سفر وهيك
هشام : قوليلي يا غالية شو جبلك
ام عمر : بدي نام شي ساعة حاسة حالي مدووخة شوي
هشام : غرفتك فوق جاهزة
ام عمر : بس بالاول رح شوف ملك وجوزها اذا بدن يضلو او يروحو
بس قبل ماتكمل دخلت ملك وقالت : ماما خالو نحنا رايحين على الاوتيل نترتاح والمسا بنرجع
هشام :طيب خليكن هون
ملك : خالو بالاوتيل احسن خلص المسا بنرجع .. بتوصينا شي ماما
ام عمر : سلامة قلبك ياعمري .. لاتنسي تحكي اخوكي اتطمنيه عنا
ملك : ماشي .. يلا بالاذن
الكل: اذنك معك
ملك وجوزها راحو ... وام عمر طلعت ترتاح
حلا : سبحان الله يا الاء انت متل البوم وين ماحليتي بحل الخراب
ملك : بالله شوو انا شو دخلني .. هو يلي اتذكرني ما انا يلي اتذكرتو
حلا : ومين ذكرو مين كان يحب .. ماشفتي كيف ملك انقلب وجهها
الاء :ماكنت عارفة انو عقلها جوزتين بخرج ورح تنقهر من هيك شغلات
حلا : بدك كتير لتصيري تفهمي
الاء : تركت الفهم الك
نور : لك خلص انت واياها .. اذا شافكن هشام رح ينقهر ... اجلو خلافاتكن لبعد ماتروح ام عمر ماحلوة
الاء : انا ماعم قرب على حدا فهميها الها تقصر لسانها وماتقرب مني لانو ماعم قرب منها
نور : حلا فهمنا بقا
حلا : عم حاول خليها تصير شوي راقية وتتعلم كيف تتعامل مع الناس
الاء : وحياتك بعلمك وبعلم كل عيلتك ..
حلا ؛ههههههههه ... غبية
الاء : يا انتي
تركتهن ورجعت على جناحها بسرعة تحكي مع ميساء وتخبرها وماهما كل حكي حلا
وبهل الاثناء نزل هشام
هشام :سمعت صوتكن طالع شو القصة
نور : كالعادة حلا والاء بضلو يتناقرو
حلا: بس عم قلا كيف تتصرف كانت رح تفضحنا
هشام : حتى ولو .. لا تتدخلي كل حدا يهتم بحالو وبس
حلا : امرك حبيبي
هشام : وينا الاء
نور : رجعت على غرفتها
هشام : طيب ماشي .. نور شوفي شوبدك تجهزي للمسا
نور : عندي ولايهمك
~~~~~~~~~~~•
الاء : لك رددي
ميساء : ايييي... شبك رن رن كنت بالحمام
الاء : هههه ... كيفك
ميساء : منيحة .. هاتي لشوفي شوفي عندك
الاء : احزري مين شفت
ميساء ؛ مين
الاء : بتذكري ايام الثانوية محمود البرنس
ميساء : ايي اتذكرتو ... وين شفتيه
الاء: طلع جوز ملك
ميساء : اممم ... وكيفو شو اخبارو
الاء : منيح .. غير شكل ..صاير احلا من اول بتتذكري شو كان مدوب قلوب البنات
ميساء :اي صح
الاء : ليكي اتذكري معي
ميساء : شو
بهل الاثناء دخل هشام بس ما انتبهت عليه
الاء : هاد محمود ماكان يحب بنت من صفنا مين هية
ميساء : انت
الاء : شو انا ... مين كان يحب
ميساء : كان يحبلك اللك
الاء : الييي؟؟؟؟
ميساء : ايي ... الك كل المدرسة كانت بتعرف ليش انت مابتعرفي
الاء : لك لااا اكيد انت غلطانة ... ماقالو كان يحب احلام
ميساء : بالاول قال انو اسمها بحرف الالف .. فكرنا احلام لانها حلوة.. بس طلع بحبك الك وبعتلك رسالة وانت صدتيه
الاء : محدا بعتلي شيي
ميساء : والله بعتلك رسالة مع احلام وانت قال صدتيه وهددتيه .. كل المدرسة بتعرف وبالعلامة الكل كرهك بعد هالفصل .. يقولو عشو حبها وليش صدتو وانك مجنونة ومن هالحكي
الاء : والله مابعتلي شييي .. وانت ليش ماخبرتيني من وقتها
ميساء : فكرتك بتعرفي ومابدك حدا يحكي بالموضوع وانا مشان ما احرجك ومابدي هالشي ياثر على صداقتنا ... بس متاكدة انك ماصديتيه
الاء : والله مامعي خبر بشي
ميساء : اصبح هي احلام يلي عملت كل هاللعبة لانو ماطلع بحبها الها
الاء : سبحان الله قصة من سنين وانكتب انو اليوم تنكشف .. بس يلا محدا بياخد غير نصيبو
ميساء : كيف كان اللقاء
الاء شاردة وحكت : خليني ارجع اتذكر الموقف وبحكيلك سلام هلق
ميساء : ناطرتك
سكرت ورمت الموبايل بشورد والتفتت لتشوف هشام واقف وراها لتشهق من الخوف
الاء :شو عم تعمل هون نقزتني
هشام : كأنو انقهرتي لأنو طار من ايدك
الاء ؛ عم تتسمع علي
هشام : انت ما انتبهتي على وجودي
الاء : كنت دق تنحنح
هشام : ماهاد موضوعنا
الاء : شو موضوعك لكن
هشام : من اول ماحكى انو كان يحب وحدة بحرف الالف شكني قلبي انك انت .. لأنو نظراتو حكت كلشي
الاء: صحيان لكلشي
هشام : اي والله .. صحيان لدرجة انو حسيتك زعلتي لانو ماعرفتي بوقتها انو انت البنت يلي حبها
الاء لتغيظو : بجوز .. يمكن كنت هلق بدال ملك ما احسن ماكون مع شخص لتلت نسوان
ما حست غير على كف نزل على خدها
حطت ايدها على خدها بصدمة .. وصدمة هشام كانت اكبر ومتفاجئ بالشي يلي عملو
الدموع تجمعو بعيونها ... وهو انسحب فورا وطلع
بلشت تفوق من الصدمة : ضربني كف الي
مسحت دموعها فورا ورجعت على الموبايل واتصلت بميساء
ميساء : هلا حبي
الاء : ميساء هشاام ضربني
ميساء : انت شوو عم تحكي ... لييي
~~~~~~~~~~~~•
هشام طلع من البيت وركب سيارتو وساق بسرعة وطلع برات الفيلا ...
~~~~~~~~~~~~•
بالاوتيل
ملك : هلق بدك تقلي مين هية البنت ... الاء ماهيك
محمود بصدمة : انت من وين جبتي هالحكي
ملك : شايف كيف انصدمت اكيد هية ..
محمود : ياعمري هالشي كلو مو متل ما انت مفكرة
ملك: هية مو هيك .. نظراتك الها بتحكي هالشي ولا كيف دغري اتذكرتها .. وانت كنت بكالوريا وهية عاشر ... وكنت تحب وحدة بصفن وببلش اسمها بحرف الالف .. مو هيةة
محمود : لك المخلوقة كل القصة ماعارفة فيها كيف بدي حب وحدة هية مابتعرف .. قيسيها شوي بعقلك
ملك : والله مابعرف بركي هية نسيانة او مو شايلتك من ارضك بالاصل ... بس بدي اعرف شو عم يعجبكن بهل البنت عادية جدا وحتى ناشفة ونكدية
محمود : والله شغلة مراهقة وانا هلق بحبك الك ومعك انت
ملك : شاايف يعني هية
محمود : اي هية .. بس والله الموضوع مابيعنيلي
ملك : لكن كيف فورا اتذكرتها اول ماشفتها
محمود : والله ماكان قصدي انو اتذكر انها البنت يلي بحبها ..
ملك : لا قلبك ولا عقلك نسيها
محمود : مشان الله ملك عم تحاسبني على ماضي راح .. وهية متزوجة وانا متزوج وحتى لو مو متزوجة ولا انا متزوج مابدي اياها ..واقسم بالله مابدي غيرك ولا برضى بغيرك ... بترجاكي تسكري على السيرة ماحلوة بحق حدا فينا نفتح شي قديم وتافه و المخلوقة كل القصة ماكان عندا علم فيها .. كرمال خالك ع القليلة
سكتت وماردت
قعد ع الارض قدامها : بحمد ربي ليل وانهار انو جمعني فيكي .. شغل طيش وايام مراهقة لاتخليها تنزع علاقتنا
ملك : احلف
محمود : والله بحبك وبموت فيكي انت وبس
ملك : خلص صدقتك ... بس كيف هية مابتعرف بالقصة وانت قلت انك باعتلها رسالة
محمود : بظن صار ملعوب من البنت يلي بعتت معها الرسالة .. بس الحمد لله يلي ماوصلتها .. والله جمعني فيكي
ملك : ...
محمود : يسعدلي هالوجه ما احلاه يا احلى ملاك ... ويقبر قلبي يلي غيران علي
ملك: هالمرة مرقتها لانو كنت صغير بس ياويلك مني يا محمود اذا بلمحك عم تطلع على شي وحدة
محمود : حاضر .
~~~~~~~~~~~~~•
ميساء عم تحكي : منيح ما قبرك
الاء : بالله شو .. شو ماكان مابحقلو يمد ايدو علي مافي اي شي بحللو انو يمد ايدو علي لا دين ولا شرع ولا حق
ميساء : بس اكيد قهرتيه بكلامك لحتى كانت ردة فعلو هيك ... الزلمة بحبك يا الاء .. ومو شوي كتير
ابتسمت الاء على حكي ميساء بس حكت : ومع هيك ما لازم يمد ايدو علي والله لندمو على هالكف
ميساء : هو معك حق بس .. مافي زلمة بيقبل انو مرتو تحكي هيك قدامو انو تكون لحدا غيرو وخصوصا اذا كان متل هشام ... انا برأيي لازم تفرحي .. وكمان هشام ما من النوع يلي بيضرب اكيد هلق بكون الندم عم ياكلو .. واكيد رح يراضيكي
الاء : ومع هيك بدو فركة ادن .. مشان مايفكر يعيدها
ميساء : شوبدك تعملي
الاء : رح هددو باختو انو رح احكيلها كلشي
ميساء: لك حاج تخبصي .. وبركي خلص قرر يتركك ويحررك منو ... هيك بتكون خسرتي فرصة عمرك .. والحياة فرص يا الاء
الاء : لا تخافي علي .. اذا عنجد بدو يعمل هيك بلاقيلها شي تصريفة مشان يحاول يصلح الوضع .. مثلا انو امرض وهو يعتذر مني وانا اعطيه فرصة تانية
ميساء : والله ماعم اعرفك
الاء : والله احترت فيكن .. ما انت كنت تقوليلي لاتضيعي هالفرصة من ايدك
ميساء: بس تفاجأت
الاء : لانو عاشرتهن وصرت متلهن .. خلص رح التفت لمصالحي .. وعقولتك متل هالفرصة ماعد تتكرر وغير كل هاد انا بحبو لهشام ... قلبي هالكم يوم عامل حالة فوضى
ميساء : الله الله على الحب .. طيب وضرايرك
الاء: مضطرة اتحملن شوبدي اعمل .. بس هي حلا متحلفلا على هزة بدن
ميساء :والله صاير ينخاف منك
الاء : ان لم تكن ذئباً اكلتك الذئاب
ميساء : دخيلها الديبة
الاء : دخيل قلبك يا احلى رفيقة لولاكي ولولا نصايحك ماكنت بعرف شو صار فيني .. وخلص وعد اول راتب مجهزتلك احلى هدية
ميساء : حبيبة قلبي والله مابدي غير تكوني مبسوطة
الاء : يا عمري انت يلا سلام
سكرت مع ميساء وفتحت على اسم هشام وايدها عم يكبسو على الشاشة والابتسامة على وجهها
~~~~~~~~~~~~~•
كان عم يتفتل بالسيارة ... ومبين عليه كتير مقهور .. وقف على الاشارة وكان كم سيارة واقفة قدامو وصار يزمر بعصبية .. لرن تلفونو بمسج
من الاء : مابكفيك كلشي عملتو فيني وصلت فيك المواصيل انك تمد ايدك علي ... ومنيح كتير انو ام عمر هون انا رح احكيلا كلشي ورح شوف رح ترضى بعمايل اخوها حبيب قلبها
عصب وصار يخبط على الزمور ويقول :الااء .. الاااء... ياررربي شو هالبنت هي ... لك ياريتني لا شفتك ولا تزوجتك ولا اتعلقت فيكي
مشو السيارات يلي قدام .. . وهو حرك سيارتو ومشي .. وعند اول تقاطع لف ورجع من الطريق يلي كان جاي فيه
~~~~~~~~~~~~~•
واقفة قدام المراية وعم تتحسس خدها مكان الكف باطراف ايدها ... تنهدت وحطت ايدها على قلبها .... لك شبك ليش هيك عم تعمل فيني ...بترجاك اثبت
سمعت الباب عم يندق وحست دقاتها ارتفعت اكتر من اول غمضت عيونها وزادت من الضغط على صدرها بأيدها
رجع اندق الباب وصوت هشام : الاء افتحي خليني نحكي
الاء : تقبر قلبي انت وصوتك وحكيك .. تماسكت وراحت فتحت الباب وهية عم تتظاهر القوة : ماعندك غير هالحكي على افتحي وخلينا نحكي ... شوعندك حكي اتفضل احكي
مسكها من دراعها ودخلها لجوى وسكر الباب
نفضت ايدها منو ومشت قدامو وقالت : تفضل احكي ...
هشام : اول مرة برفع ايدي مرى ... واول مرة رح اعتذر من حدا ... الاء انا اسف ... مابعرف كيف انرفعت ايدي وضربتك .. بس شي كان فوق ارادتي .. ما تحملت اسمع هالحكي ... اطلعت دور على شي لحتى اعتذر منك وكفر عن ذنبي بس مابعرف شو الشي يلي بيرضيكي ... الاء انا تعبت معك بترجاكي ارحمي قلبي فيكي ... عم اسعى لخليكي تكوني سعيدة وتتقبلي حياتك معي .. عايش على اعصابي معك بدي اياكي وبنفس الوقت خايف قرب ... صح انا غلطت وغلطي كبيير انو كذبت عليكي وفرضت عليكي واقع ... بس ماقادر صلح الامور .. ماقادر رجعك .... انا تعلقت فيكي ... كنتي غلطة عمري وعقابي بنفس الوقت
كانت مصدومة فيه وكأنو مو هشام .. يلي شايفتو عاشق ولهان عم يترجاها تضل معو
هشام : الاء عم تفهمي علي
ساكتة وماعم ترد
هشام : الاء انا بحبك ... والله بحبك .. والشي يلي عم حسو معك ماحسيتو مع حدا غيرك ...
فيكي شي اسرني من يوم يلي شفتك ... عندك هالة مانها موجودة عند حدا ... انا اكتر شخص بهمني الاهتمام والجمال والاناقة .. معك هدول الشغلات مو مهمة ... يلي بدي اياه بس انو ضمك واشبع منك ... عشقت البجامات عليكي ... بحبك متل ما انت... حسي فيني بترجاكي ... ماكان شرطك انو حبك بس الك... شرطك منفذ من قبل ما تطلبي
حاسة حالها بحلم ... ما تخيلت ابدا تسمع هالشي ودقات قلبها عم تزيد الضغط عليها .. صارت تشوف زوالات ... طنين بادانها ... دوخة ... وفجأة وقعت
هشام : الاااء
فورا مسكها قبل ماتوصل على الارض ونيمها على التخت .. اخد ابريق المي وصار يرشرش على وجهها
هشام : الاء.. الاااء عم تسمعيني
فتحت عيونها
هشام : انت منيحة شو حاسة
الاء : مابعرف
هشام : تروحي على الدكتور
الاء: لا لا .. بس مي
شربها مي وهية تجلست وقعدت وهو قعد جنبها وصار يمسحلا على شعراتها وعلى وجها
هشام : اسف شكلي ضغطت عليكي كتير .. بس على العموم انا بعتذر كتير كرمال الكف وعد ماعد عيدها ومافي داعي ندخل اختي بالموضوع انا جاهز لكلشي بدك اياه
مدت ايدها وحطتها داخل ايدو وارتكت على كتفو .. وهو عدلها قعدتها وضمها لصدرو
وشد على ايدها يلي بقلب ايدو
الاء : هاد كلشي بدي اياه .. وانا بعتذر ماكان لازم احكي هالحكي
هشام : يعني نبلش صفحة جديدة
الاء: نبلش
هشام : وايمت بدنا نصير شخص واحد
الاء انتفضت وقالت : قليل ادب مو بايدك ...
هشام : هههه افهمتيني غلط ... بس ماعد اصبر اكتر من هيك بدي اياكي
الاء : اي مو هلق ... مابقبل الا لما عوض كلشي راح علي .. شهر عسل ونسافر لبعيد مكان بس انا وانت فيه
هشام : من عيوني
الاء : واكيد اختك هلق هون مارح نقدر نسافر مشان هيك لما نخلص زيارتها بشوف الموضوع
هشام : طيب خليها اليوم وبوعدك بس ترجع اختي فورا نسافر ع وين مابدك .. اقامتك صارت جاهزة وفينا نسافر وين مابدك
الاء : لاء يعني لاء .. وقوم هلق شوف اختك بتكون فاقت
هشام : طيب عطيني بوسة
الاء :لااااا
سرق بوسة سريعة من خدها وقام طلع وقال : انا اليوم جاي نام عندك لا تقفلي الباب
الاء : بنشوف
هشام : هههههه
~~~~~~~~~~~~~•
المسا رجعت التمت العيلة مع الضيوف بحديقة الفيلا ومبين انو الجو رايق وحلو ..
هشام قاعد جنب اختو وعم يضيفها من كلشي موجود هالشي مبين شقد قوة العلاقة بيناتن
هشام : اختي بس هي من ايدي
ام عمر : ياعمري والله ماعد اقدر
هشام : عالغدا ما اكلتو منيح وعشا ما اتعشيتي
ملك : هههه خالي شوي شوي عليها كرمال السكر والضغط
هشام : رح تخافي عليها اكتر مني .. هدول الاكلات كلنن مخصصين للي معن سكر وضغط
محمود : ماشاء الله عنك مابيخفى عليك شي
هشام : بحياة يلي بحبن اكيد مارح اتهامل
كانت الاء قاعدة وساكتة عم تراقب بصمت عكس حلا ونور يلي عم يشاركو ببعض الحديث
ملك وهية حاسة بنوع من الغيرة وجهتلا حكي : شو الاء ماعم نسمع صوتك
الاء : مافي شي احكيه
هشام : ماعاجبك الوضع يعني
الاء ابتسمتلو وقالت : بالعكس كلو بجنن .. هالقعدة الحلوة مابينمل منها والجو كتير لطيف
اخد صحن مبين متل الايس كريم ومدو اتجاهها وقال: جربتي هاد
الاء : والله مابنفسي
هشام : دوقيه رح تحبيه
اخدتو وهية عيونها بعيون هشام عم بتبادلو نظرات الحب .. يلي اكتر حدا دايقتو هي النظرات هية حلا
حلا : هشام كأنو هديك المرة كانو اطيب
هشام : لا حبيبتي انت قلتي انو هدولاك مو طيبين واخترتو هي وجبتها عطلبكن وطلبك خصوصا
نور : مزبوط
حلا : اااه والله نسيت ... بس ماشاء الله عنو هشام مابينسى شي ... شكرا حبيبي
هشام : واذا ماعجبتك بوصيلك ع غيرها
الاء انغاظت رجعت الزبدية على الطاولة وقالت : طعمتها مو زيادة
هشام : اطلبلك غيرها
الاء : لا مابدي عذبك لغير مرة
ابتسم هشام من مناقرة حلا والاء الغير مباشرة ورجع التفت ع اختو : كيفو عمر اختي
ام عمر : الحمد لله منيح
ملك : اي صح الاء كيفو ابوكي
الاء باستغراب : منيح .. لي عم تسألي
ملك : قصدي بعد العملية ان شاء الله مشي حالو
الاء بقلق : عملية شو؟؟ بابا ماعمل عملية
هشام عم يحاول ياشر لملك ماتحكي بس ملك ما انتبهتلو
ملك : مبلى .. اسماء خبرتنا على كروب البنات .. حتى خالي بيعرف
حط هشام ايدو على وجهو ونزل راسو والاء التفتت عليه الاء : هشام شو القصة ... بابا عامل عملية ؟؟
رفع راسو وقال : اي بس الحمد لله نجحت وهو بخير
وقفت وقالت : ايمت هالحكي
هشام : صرلو شي ١٥ يوم
الاء : واناا ليش مامعي خبر
ركضت على الفيلا والواضح كرمال تحكي مع اهلا
ملك : خالي مامعها خبر ؟؟
هشام : شو ذكرك بأبوها انت هلق
ملك : والله مابعرف انو مامعها خبر
هشام : طالع شوفها بالاذن
~~~~~~~~~~~~`•
دخل وراها على جناحها كانت قاعدة ع حرف الكنبة وبايدها موبايلها وعم تهز برجلها لتوتر وعم تقول ردي يا اسماء رديي
قعد جنبها وقال هو منيح روقي
سكرت بعصبية والتفتت عليه ..لك انتت شووو قلي انت شوو ... بتعرف ابي تعبان عامل عملية لييش مابتخبرنيي .. لييش
هشام : والله اهلك ماكان بدن لايخبروني ولا يخبروكي
الاء : وانت خبرت لييش ماخبرتني
ساكت
الاء : من ايمت بتعرف
هشام : عرفت قبل العملية بيوم
الاء : وقبل العملية كماان .. لك بركي صار معو شي لاسمح الله ومات تحت العملية ... موت انا وراه بحسرتي انو ماشفتو ... لك انت مافي بقلبك رحمة .. مابتحس فيني ... بس عارفة ليش ماخبرتني مشان ما قلك بدي انزل لعند اهلي .. المهم تفكر بحالك اما الناس شو بتفكر شو بتحس متل بعضا .. المهم انت ترضي غرورك
هشام : الاء لا تحكي حكي ما فهمانتيه
الاء : عملية شو عمل
هشام : انسداد شرايين
الاء : على احسن ... هي عملية خطرة .. ياربي يااربي
هشام : حكيت انا مع الدكتور وطمني انو مانها خطرة
الاء : واصل للدكتور واستكترت علي تخبرني... روح يا شييخ الله يسامحك بس
هشام : الاء ..
الاء : بترجاك هشام ماحابة اسمع شي ... قوم ارجع لعند ضيوفك واتركني بحالي
هشام : الاء
الاء : بترجاااك
قام بتردد وحكي اذا احتجتيني ابعتلي
الاء : مارح احتاااج ... سكر الباب وراك
اسم اسماء ظهر على الشاشة مكالمة ورادة
طلع هشام والاء فورا ردت
اسماء : هلا الووء
الاء : كييف بابااا بيعمل عملية ومابتخبروني
اسماء : ليه هيك صوتك .. روقي القصة مو مستاهلة
الاء : كيف مو مستاهلة .. يعني خلص نفيتوني من العيلة وماعم تخبروني بشي
اسماء : والله مو هيك ... بس ماحبينا نشغل بالك
الاء: وينا ماما عطيني احكي معها او بدي احكي مع بابا عطيني احكي معو
اسماء : والله هلق نايمين .. بكرا بتحكي معن .. وبابا الحمد لله كتير منيح حتى احسن من اول
الاء : طيب ليش ماخبروتني
اسماء : لانو ناقصك مشاكل
الاء :احكيلي كلشي بالتفصيل وليش لتخبرو هشام والي لأ
اسماء : لك شوبدي خبرك ... خبرك انو بابا كان تعبان كتير وبدو عملية مستعجلة وكان ممكن يموت ليجي دورو بالمشفى الحكومي ... كان بدك خبرك مشان تفكرينا عم نشحد منك او من جوزك ... ماكان بدنا نخبر حدا .. بس هشام يكتر خيرو مابعرف كيف خبر وفورا اتواصل مع احسن مشفى بالبلد واجت سيارة من المشفى خصوصي بالليل اخدو بابا وحطوه تحت المراقبة وتاني يوم عمل العملية تحت ايدين امهر اطباء البلد وهشام تكفل بكلشي وطمنا الدكتور انو العملية مافيها خطورة مازال لحقناه بالوقت المناسب .. والله لو في خطورة كان هشام بنفسو خبرك
ساكتة وماعم ترد ... ما استغربت هيك تصرف من هشام
الاء : كل هاد هشام عملو
اسماء : اي .. وما بس هيك عم يبعتلنا مصاري
الاء : لكن ليش مبارح كنت تقولي انو ما معكن مصاري وبعتو بطارية
اسماء : هشام طلب مني قول هيك مشان تقتنعي تشتغلي وتلغي قرار النزلة من راسك
الاء : هشام ؟؟!
اسماء : اي .. وشو حابة تعرفي غيرو ... شايفة الزلمة شو عم يعمل مشانك بس مشان مايخسرك
الاء : طيب ماشي .. سلام هلق
~~~~~~~~~~~~~•
اتأخر الوقت وهنن بعدن سهرانين على ضحك ومزح .. وبلشو ينسحبو تدريجيا .. اول شي راحت ملك وجوزها وبعدهن نور وحلا وبقي هشام واختو
هشام : قومي ارتاحي
اختو : نمت كتير اليوم بدي اقعد معك واشبع منك بس
اتمدد على الكنبة وحط راسو على رجليها
هشام : وانا والله بحاجتك
ام عمر : شو صاير معك .. حسيتك هالمرة متغير
هشام : مبين علي
ام عمر : انا حافظتك بصم يمكن غيرك ما لاحظ .. بس انا ملاحظة هالشي وكتير .. احكيلي شو صاير معك
هشام : الاء
ام عمر : شبها
هشام : حسيت حالي حقير معها كتير ... كنت اناني ومافكرت غير بحالي ... كذبت عليها وجبتها وفرضت عليها تعيش بواقع هية رافضتو ... ليش عملت هيك انا... ليش مامنعتيني
ام عمر : ليش انت وقت بدك تعمل شي بترد على حدا
هشام : كتير فكرت انو انا ليش عملت هيك .. وبين معي انو لما رفضت المصاري يوم عرس ملك انا حطيتها براسي وكان بدي اثبتلها انو المصاري بهل الدنيا هية كلشي ... ولما تقدمتلها ورفضت زاد اصراري عليها اكتر وصار التحدي انو خليها تقتنع انو المصاري هية اساس السعادة حتى لو مع ضرة
اختو : وشو طلع معك .. طلعت غلطان
هشام : هلق خلينا متفقين انو المصاري كلشي ويلي بقلك هيك اكبر كذاب
اختو : طيب هية اقتنعت
هشام : انجبرت تقتنع لأنو الحياة مابتمشي متل مابدنا .... بس يلي بدي قولو انها طلعت من خرجي واثبتتلي انو الواحد بيقدر يحب مرة تانية
ضحكت وقالت : حبيتها ؟؟
هشام : خلتني حبها غصب عني ... وانا عم حاول ارضيها وارضي غروري لقيت حالي واقع وماعم اقدر على بعدها ولا ثانية
ام عمر : ههههه والله بدك اياها
هشام : ماهيك بالله
ام عمر : طيب ونسوانك حرام هيك بصير في تمييز بيناتن
هشام : لا من هالناحية لاتخافي علينا نحنا الزلم حتى لو في بقلبنا مرى وحدة ... بس حواليها بسع كتير ههههه وان شاء الله مارح فرق فيهن .. اصلا نور وحلا كل وحدة عندها شي خاص بخليني اتعلق فيها
ام عمر : والاء
هشام : الاء .. اااه ... الاء هية النبض
ام عمر : يعني خلص مشي حالك مع النسوان واكتفيت
هشام :ههههه طيب مازال في خانة فاضية ليش لخليها فاضية
ام عمر : قوم من هوون قوووم ... صرلو ساعة يقلي الحب وبطيخ وبرجع بقلي في خانة فاضية
قام وهو عم يضحك وقال : كلشي لحال
ام عمر : ااااخ منك بس بدي اعرف لمين طالع
هشام : اختي انا بتسمحيلي بدي روح نام بكرا عندي شغل بكير
ام عمر : ودور مين اليوم
هشام : ههههه بدي شوف الاء بركي بتحن علي وبتخليني نام عندا
ام عمر : ليش مااا؟؟
هشام : ماااا يا اختي ماااا
ام عمر : والله طلعت من خرجك
~~~~~~~~~~~~•
كانت متمددة بتختها وعم تقلب بموبايلها حست باب الجناح انفتح وهية قصد ما قفلتو
دخل بهدوء وهو عم يتطلع على الباب باستغراب انو مو مقفول ... كمل ع غرفة النوم شافها اتجلست
هشام : ما نمتي
الاء ؛ ما اجاني نوم
هشام : اطمنتي على اهلك .. حكيتي معن؟
الاء : اي حكيت مع اسماء ... وحكتلي كلشي
قرب وقعد جنبها على التخت وقال : كيف يعني كلشي
قربت لعندو ورفعت حالها لعندو وضمتو وهو ما تردد ابدا بانو يحتويها بحضنو
وتابعت حديثها : حكتلي عن كلشي عملتو انت ... هشام شكرا كتير على كلشي ... هشاام انا بحبك
هشام : وانا بموت فيكي
شد عليها اكتر وهية تعلقت فيه اكتر
الاء : نام عندي اليوم
هشام : والله مو نايم غير هون
رفعت راسها وقالت : بس من هلق عم حذرك بتقعد عاقل ... مابقبل الا بليلة دخلة ماصارت
هشام : بيلبقلك يا احلى عروس
رجعت لورا .. وفسحت مجال لحتى يجي ينام حدها
~~~~~~~~~~~~~~~~•
تاني يوم
فاقت بكير على صوت موبايلها وهية نص نايمة ونص فايقة ... اتجلست وشافتو نايم جنبها وحاطط ايديه تحت راسو وغرقان بالنوم
ابتسمت واخدت الموبايل كان رقم امها عم تتصل فيديو فتحت وظهرت امها
الاء : هلا ماما
امها : كيفك حبيبتي
الاء : مشتاقتلكن كتتتير
امها : والله وانا بالاكتر طمنيني عنك وعن هشام مبسوطة يا امي
الاء : الحمد لله
امها : الله يوفقك طمنيني عنك
الاء : والله منيحة وكتتير مبسوطة وهشام مافي منو ... قربت الموبايل من هشام لتشوف امها انو نايم جنبها
امها : يي الزلمة نايم وانا عم اتصل قبل الشحادة وبنتها
الاء : ولا يهمك فداكي
امها : انا اتصلت لانو الصبح بكون النت قوي .. واسماء خبرتني انو بدك تحكي معنا وتطمني على ابوكي
الاء : اي والله .. مبارح لخبرت بعملية بابا
امها : اي لا تخافي ابوكي منيح والكل منيح وماناقصنا غير شوفتك
الاء : تسلميلي يارب وما انحرم منكن
امها : خدي ابوكي احكي معو
الاء : هاتي .. مرحبا بابا .. كيفك طمني عنك
بهل الاثناء فاق هشام وانسحب من التخت مشان مايبين على الكاميرا والاء انتبهتلو وعم تراقبو بعيونها وهو رمالها بوسة بالهوا ودخل على الحمام وهية تابعت تحكي مع ابوها وتطمن عن صحتو ... بعد شوي طلع هشام من الحمام ومعو منشفة عم ينشف والاء كانت عم تحكي مع امها مرة تاني
امها : ماما بدي سكر لانو بدي روح استلم
الاء : شوبدك تستلمي
امها : بعتولنا من الهلال الاحمر رسالة باستلام حصة غذائية ورايحة مع حمزة نجيبها
الاء : اي منيح الله يرزقكم.. ماحست الا الموبايل انسحب من ايدها
هشام : صباح الخير مرت عمي
امها : اهلا صهري .. كيفك
هشام بجدية : الحمد لله .. انتو كيفكن
امها : والله داعيلك بالخير
هشام : تسلمي .. شو كنت عم تقولي لألاء رايحة تستلمي كرتونة
امها : اي والله
هشام : مرت عمي مابتروحي
امها : ليش في شي
هشام : مابتروحي وبس .. هاد الناقص اهل مرتي واقفين على الدور ليستلمو كرتونة .. هاد الشي عندي مرفوض ... قوليلي شو ناقصكن وببعتلكن .. هي الشغلات بدكن تنسوها
امها : ليش يا ابني .. مافيها شي الحصة جاي على اسمنا ومنيحة والله بتسند
هشام : من اليوم ورايح ان شاء الله مارح تحتاجوها .. خليها لغيركن يستفيد منها .. اما انت او حدا غيرك ممنوع تنزلو هيك نزلات .. وانا هلق بعيوني ببعتلك سيارة مواد غذائية مو بس كرتونة بس الله يوفقك هيك شغلات مابدي اسمعها مرة تانية
امها : يا ابني مانك مجبور فينا
هشام : مجبور وغصب عني .. ولا مابتحسبوني واحد من العيلة ...
الاء كانت ساكتة وما علقت ابدا
امها : والله واعز
هشام : بعدين مابكفي انكن عطيتوني احلى بنت بهل الكوكب
الاء ماقدرت ماتفرح وتبتسم
امها : الله يخليكن لبعض ياارب
هشام : اي الله يوفقك كتريلي من هالدعاوي
امها : تكرم
هشام : يلا مابدي اتاخر عليكي .. بس متل ماوصيتك
امها : ولايهمك
هشام : الله معك
سكر والتفت على الاء
الاء : ليه سكرت .. لسه ماخلصت
هشام : تعي لهون كيف بتطاوعي امك على هالشغلة
الاء : اي واذا .. وبعدين انت شو مأثر عليك .. ولا كرمال بريستيجك
هشام : هاد هو .. والله شي حلو يقولو حماتو لهشام واقفة على طابور المساعدات
الاء : يعني كرمال مظهرك قدام الناس
هشام : كرمال كلشي
الاء : مغرور
هشام : نكدية
الاء : ان عجبك
هشام : المشكلة انو عاجبني
الاء : اممم .. اتمنيت تقول غير هيك
هشام ؛ هاهاها ... مستحيل خليلك مجال لتستلميني ... يلا قومي لننزل لتحت ونشرب قهوتنا ع بين مايجهزولنا الفطور
الاء : مو بكير .. خلينا شوي هلق بننزل
هشام : خلينا ننزل احسن ما افطرك .. طول الليل وانا ماسك حالي عنك بالغصب
نطت من على التخت وقالت اذا هيك نازلة فورا
هية فاتت على الحمام وهو كان عم يضحك فتح الخزانة مالقى تياب الو ... طلع وراح يجيب تياب لبين ماتخلص
~~~~~~~~~~~~~•
اتجمعو على سفرة الفطور .. عيلة هشام كلها بالاضافة لام عمر
والاء مبين الفرح بوجهها وبعيونها والنظرات المتبادلة بينها وبين هشام .. هالشي خلى حلا تموت غيرة
كان الفطور هادي ورايق
خلصو وهشام استاذن وراح على شغلو والضراير قامو يشيلو الاكل .. وام عمر كانت بدا تساعدن بس ماسمحولها وراحت هية ونور يتمشوا بالحديقة والاء وحلا تابعو شغل مع الخادمة
حلا وهية عم تشيل كم صحن وجنبها الاء
حلا: ذكرتيني بحركاتك لما كنت عروس .. نفس التصرفات ونفس النظرات بيني وبين هشام
الاء : ايو تصرفات
حلا ؛ نظراتك الو وابتساماتكن المتبادلة
الاء: وان شاء الله ماكون ضايقتك
حلا : لا طبعا .. بالعكس افرحتلك ... منيح الله جبر بخاطرك وبعتلك حدا متل هشام يهتم فيكي
الاء : لا ولوو
حلا ؛ لا تزعلي مو قصدي
الاء : انت شو قصتك معي .. ليش رح تموتي غيرة مني ... حبيبتي هشام انا ما اخدتو من حدا هو يلي اختارني وبرضاكن ف ليش هالحركات يلي بلا طعمة
حلا : اناا غيرانة منك ... انا بدي غار من وحدة متلك وعلى شو لا احلى ولا ارتب ولا عندك اي شي بخليني فكر فيكي او شيلك من ارضك
الاء : اذا مفكرة كلامك ممكن ياثر فيني فمحاولاتك كلها ع الفاضي .... وانت غيرانة مني لانك شايفة الحب بعيون هشام اتجاهي
حلا : لا تصدقي حالك كتير .. اجباري لانك جديدة بدو يحبك ويهتم فيكي .. بس كلها شهر زمان ورح تصيري متلك متلنا وحتى اقل .. لانو حبيبتي نحنا صرنا نعرف كيف نرضيه لهشام ونسعدو وانت بغشمنتك مارح تعرفي تحافظي عليه .. وشهر زمان ولا قلك اسبوع رح تلاقيه مل منك
الاء : بنشوف
حلا : اي رح فرجيكي
الاء : ايدك وماتعطي
تركت من ايدها الاء ومشت
حلا : ع وين تعي كملي معي
الاء : مابدي اشتغلي لحالك .. وفي الخدم ماني مجبورة
حلا : قويان عصك
ماردت وضلت مكملة لعند نور وام عمر
نور : هي الاء اجت .. شو الاء تنزلي معنا على السوق
الاء : مين نازل
نور : انا وحلا وملك
الاء : لا مابدي
نور : ليه ولوو بنتسلى
الاء ؛ مشان تصيرو تتسمخرو علي متل هديك المرة مابدي
نور : اي تسطفلي
الاء : ام عمر مو نازلة معن
ام عمر : موجاي عبالي بدي ضل واطبخ شي اكلة من يلي بحبن هشام
الاء : واناببقى معك وبساعدك
ام عمر : روحي معن اتسلي
الاء : لا مابدي وقت بدي انزل بنزل لحالي مازال في شوفير بروح وين مابدي بلا منيتهن
نور : لا تحكي هيك ولوو والله بحبك وبحب رفقتك
الاء ابتسمت لنور بلطف : تسلميلي وانا كمان حبيتك وحبيت كلشي فيكي .. قلبك مافي اطيب منو (وبقلبها مو متل هديك الحرباية .. بس على شو ناوية .. بس وحياتك رح فشلك )
~~~~~~~~~~~~~•
بعد الظهر
دخل هشام على الفيلا وشم روايح الطبخ عم تهفهف في روايح مميزة ومستحيل يتوه عنها .. ريحة طبخ اختو المميزة
كمل على المطبخ وشاف ام عمر والاء قاعدين ع يتساعدو بتحضير الاكل
هشام ؛السلام عليكم
ردو : وعليكم السلام
هشام : اكتر تنتين بحبون مجتمعين ويعملوا هالاكل الطيب يلي ريحتو فايحة بكل البيت
ام عمر : تقبر قلبي .. ما انحرم من هالطلة وهالشبوبية
هشام : ايو شبوبية الشيب بلش يغزيني
ام عمر : بكل حالاتك بتجنن مو هيك الاء
ابتسمت الاء وقالت : متل ماقالت ام عمر
غمز الاء وقال : يعني عاجبك
خجلت وماردت وتابعت تقطيع السلطة
هشام : مافي حدا غريب احكي
الاء : بتجنن وعاجبني كتتير.. منيح هيك
هشام : بجنن .. طالع بدل تيابي وانزل فورا لانو ماعد قاوم
ام عمر : ونحنا رح نبلش بتجهيز السفرة
هشام : ما اجو من السوق ؟
ام عمر : على وصول
هشام : حبيبتي ليش مارحتي معن
الاء : مو حابة وكمان كان بدي ضل مع ام عمر لاتعلم اعملك الاكلات يلي بتحبا (وتابعت بمرح) لأنو اقرب طريق لقلب الرجال معدتو
هشام : لك انت دخلتي على قلبي ترانزيت بدون اي طرق
ام عمر: اذا كل هالقد حابين بعض خدها وطلعو كملو حكيكن فوق
هشام : ههههه وانت قلتيها تعي حبيبتي
الاء : خلصنا اطلع مشان مايبرد الاكل
هشام ؛ تعي على القليلة ساعدي جوزك وطلعيلو تياب
الاء بجدية : عنجد اجي
هشام : هههه لا لا انا بدبر حالي لانو اذا طلعتي معي رح يروح علي الغدا وانا هلق كتير جوعان
ام عمر : اي اطلع بلا قلة ادبك
طلع وهو عم يضحك والاء خجلانة وعم تضحك
ام عمر : عفكرة هشام مبارح اعترفلي انو بحبك الك اكتر شي
حست هالجملة متل الصاعقة الانعاش يلي بتخبط بالقلب وبعدها بصير يدق بشكل كتير حلو ... وقالت بفرح : هو قلك هيك
ام عمر : اي والله .. مانك ملاحظة عليه شقد متولع فيكي .. بس بدي منك تضل هالشغلة سر بينك وبينو ... وعاساس بحبك متل حلا ونور فهمتي علي ماهيك
الاء : اكيد فهمانة ... واكيد مارح اجرحن وان شاء الله نكون متل الاخوات
ام عمر ؛ ان شاء الله ..انتو اذا اتفقتوا واتقبلتوا الواقع المصاعب رح تتلاشى وتتساندوا على هالحياة
الاء : انا عم حاول اتقبل الامر صح في غيرة وكتير .. بس عم حاول اتقبل الامر وحتى نور كتير حبابة وقريبة للقلب بس حلا طول الوقت عم تحاول تجرحني وتسمعني حكي
ام عمر : حلا صح هيك بس قلبها طيب ... ومع الايام رح تشوفي شقد حبابة كمان هية حاسة بالغيرة متلك بالضبط .. بس معها معها بتظبط الامور
الاء : ان شاء الله .. لانو ماحابة اعمل عداوة مع حدا .. انا بدي التفت لحياتي ولدراستي ولشغلي
ام عمر : مابتقصري .. ابني هدف وامشي على اساسو
الاء : وهو هيك
سمعو صوت حكي وضحك جاي من برا
ضحكت ام عمر وقالت : اجو
طلعو من المطبخ وشافو البنات التلاتة جايين وحاملين كياس كتيرة
نور : اتاخرنا
ام عمر : ع الوقت تمام
حلا ؛ شو هالروايح الطيبة يا ام عمر .. والله حاسة شي كتير طيب
ام عمر : اطلعوا حطوا الاغراض يلي جبتوهن وغسلوا وانزلوا
ملك : ماشي
حلا ؛ هشام هون ماهيك
ام عمر ؛ اي سبقكن يبدل تيابو
حلا بنظرات ذات مغزى : كتيير منيح
طلعت حلا بلهفة والاء انتبهت عليها
وطلعو وراها نور وملك
الاء : ام عمر نحنا خلصنا هلق الخدم هنن بيفرشو السفرة ... خلينا نطلع نبدل تيابنا وننزل
ام عمر : بالاول بدي افرش السفرة على زوقي انت اذا بدك اطلعي خلصتي شغلاتك يعطيكي العافية
الاء :الله يعافيكي يارب
طلعت الاء بسرعة وتوجهت على غرفة هشام الخاصة لانو اغلب تيابو هنيك قربت بهدوء وكان الباب مفتوح شوي واتاكدت من شكوكها لما سمعت صوت حلا عندو
هشام بلطف : انبسطتوا
حلا ؛ كتتير
هشام : اي تمام
حلا : حبيبي
هشام ؛ عيونو
حلا :بدي منك طلب
هشام : انت بتأمري
حلا : اليوم تنام عندي .. اشتريت شوية شغلات لزوم السهرة وكتير رح يعجبوك
هشام : هيك لكن
حلا : اي شو قلت
هشام ؛ شوبدي قول شو انا مجنون لفوت هالفرصة ... بعدين هو بالاساس اليوم عندك مو هيك ولا انا غلطان
حلا : بصراحة انت مخربط الدور من وقت اجت الاء
هشام : معك حق .. بس خلص بس تمضى هالفترة رح رجع النظام على هالبيت
حلا : بكون احسن
هشام : يلا تعي نتغدا لأنو انا ماعد اصبر
حلا : بدي بدل تيابي انت انزل وهلق بلحقك
هشام : اوك
سمعت صوت بوسة وفورا بعدت عن الباب ودخلت اول باب كان جنبها وسكرتو وخلتو مشقوق شوي مابنتكر غيرتها عليه وهو عم يحكي مع حلا بكل حب واهتمام .. لمحتو طالع عم يظبط بجامتو يلي لبسها يلي عطتو جاذبية اكتر .. وبعدها طلعت حلا وراه وهية عم تقول والله لخليك بعد هالليلة ماتفكر غير فيني ...
الاء : على شو ناوية هي
راحت بدلت تيابها بنطلون جينز وفوقو كنزة نص كم وعلى صدرها في جيبة صغيرة بلون الارزق متناسق مع لون البنطلون وشبكت شعراتها بمشبك ردت بعضهن لورا وخلت الباقي على راحتو وبرجلها ماشية خفيفة وسلهة بالحركة .. كانت متقصدة تكون متميزة ومابتشبه حدا حتى لو اقل منهن المهم تكون منفردة ... لأنو هنن اكتر لبس بالبيت عبايات بيتية تقيلة او فساتين مكشوفة
نزلت على السفرة ومتل ماتوقعت كانو لابسين عبايات ملونة طبعا كتيرحلوين عليهن .. وبنفس الوقت هية طالعة حلوة وانيقة وطبيعية
اطلع هشام فيها وابتسم ... رغم جمال نور وحلا بس هو ماعجبو الا الاء
بلشو ياكلو .. والاء عم تطلع فيهن كلن .. لساتها غيرانة من يلي سمعتو وعم تسأل حالها كيف فيه يكون معنا تلاتتنا بنفس الاهتمام والرومنسية ... ما عاساس حبني الي وبس .. كيف فيه يكون مع غيري بنفس الاهتمام ... ولا الزلم كلن هيك كذابين حتى لو بحبو بس مابوفرو ولا مرى ... اي بظن هيك كلن نفس الطباع بموتوا على النسوان وكذاب يلي بقول انو بيكتفي بمرى وحدة ... حتى لو بس عندو مرة وحدة وبحبها ... بس اكيد الو حركات .. او مانو قدران يعملها يا اما خوف او مافي امكانية مشان هيك بيكتفي بمرى وحدة
نور : الاااء
فاقت من شرودها وقالت : شو في
نور : وين شاردة
الاء : هون
هشام : ماعم تاكلي
ام عمر : ولا ماعجبك اكلي
الاء : شو هالحكي .. الاكل بيتقدم لملوك ... وحتى ماقدرت قاوم الروايح وقت الطبخ هلق بدي قاومها .. بس شردت شوي عم فكرة بأهلي وبلمة العيلة
هشام : خلص ولا يهمك قريبا رح ننزل زيارة لعندن
الاء : ياريت
هشام : تكرم عيونك وهلق كلي ... اي صح ملك وينو محمود
ملك : عندو شوية شغل المسا بيجي
هشام : تمام الله يقويه واذا بيحتاج شي انا موجود
ملك : مابتقصر ياخالي .. هو الو رفيق هون راح يشوفو ...
~~~~~~~~~~~~~•
حلا مجهزة الغرفة لتكون ليلة رومنسية ... شموع حمرا .. وطاولة عليها شوية نقرشات مع عصير ... وكانت لابسة روب طويل مغطي شو لابسة وقاعدة قدام المراية عم تحط اللمسات الاخيرة لتكمل طلتها الساحرة ..
حلا : يي كنت رح انسى....
وقامت فور على جزدانها وطلعت علبة حب اخدت منها حبة وحطتها بكاسة من كاسات العصير
وقالت : رح خليك تحس بشي مختلف وماتعرف شو هو وتفكر انو انا سبب وتعرف انو مافي غيري بيعرف يروقك
اندق الباب وبعدها دخل .. واول ماشاف الاجواء ابتسم وقرب منها وهية قامت وتعلقت برقبتو وقربت وباستو على خدو وقالت : اشتقتلك
هشام : وانا كمان كتتير اشتقت
مد ايدو وسحب شريطة الروب ......
~~~~~~~~~~•
الاء بغرفتها رايحة جاية بالغرفة وعقلها عند هشام شافتو داخل لعند حلا ...
الاء : ع شو ناوية هي الحرباية ... شو هالغباء يلي علي انا كمان اكيد عاملتو شي سهرة واكيد هو مارح يقاوم ... بس انا بفرجيكي يا حلا اذا مابخربها عليكي مابكون الاء
اخدت موبايلها واتصلت بهشام
هشام : اي الاء
الاء ؛شو عم تعمل
هشام : شو في
الاء ؛ تعال شوي
هشام ؛ مابتتاجل
الاء : لااا بترجاك تعال بسرعة
هشام ؛ ثواني
مافي دقائق واندق الباب ودخل
كان عم يلبس كنزتو يمكن اجى بسرعة
هشام : شو في
الاء : بدي تنام عندي الليلة
هشام : ليه في شي
الاء : لاء بس هيك بدي تنام عندي
هشام : حبيبتي مافيني انا واعد حلا نام عندها الليلة واصلا هالفترة مأهملهن كتير لنور وحلا
الاء ؛ ماشغلتي .. بكرا نام عندها بس اليوم بدي تنام عندي
هشام : طيب بكرا عندك ويلي بعدو والي بعدو
الاء : لاء اليوم
هشام ؛ ياعمري انا وعدتها وهلق بتزعل
الاء : مو شغلتي ... اذا مانمت عندي الليلة ماعد في تنام عندي ولا ليلة وانت بتعرف بس اركب راسي
هشام : الله يمضي هالليلة على خير
الاء : والله بدك تدبر راسك انا الليلة بدي اياك الي
هشام ؛ طيب شو السبب
الاء : هيك ما انت قلت بتحبني اثبتلي هالشي ونام عندي الليلة
هشام : والله بحبك وبموت فيكي ... بس كمان هية مرتي والها حق علي
الاء : هشااام يا انا يا هية وانت اختار
هشام :ينعن عمرو لهشام منيح هيك
الاء : لا ما منيح .. شو قلت
هشام : خلص عندك .. ليش انا بقدر على زعلك
الاء : اي منيح
هشام : بس خليني روح اعتذر منها وبررلها
الاء : لاء .. ابعتلها على الموبايل
هشام : اوووف ... مااشي
راح قعد على الكنبة وبعتلها مضطر ضل عند الاء اليوم شكلها تعبانة وسكر مشان مايعرف شو رح ترد لانو اكيد رح تعصب وتزعل .. وهية قعدت جنبو والابتسامة على وجهها
التفت عليها وقال : ايي وبعدين
الاء : نتفرج على فيلم
قرب لعندها بمكر وقال: مو وقتو مازال مصرة علي هي الليلة خلينا نظبط الوضع
بعدت عنو وقالت : لااا انت وعدتني لما نطلع شهر عسل
هشام : ااااخ بس
قام ووقف على الشباك
الاء ؛ نطلب شي ناكلو
هشام وهو عم يوسع الكنزة من عند رقبتو ويهوي بايدو وحاسس حرارتو مرتفعة
هشام : لا لا عطيني مي
اخدت كاسة مي وراحت لعندو
الاء : الجو فيه قرصة برد سكر الشباك
هشام : لا بالعكس الجو نااار
الاء : فوت اعمل دش برد اعصابك
التفت عليها وقال : في شي واحد ممكن يبردني
الاء : شو هو
هشام : انت ..
سكر الشباك والتفت عليها مسكها من ايدها وهية حست عليه من نظراتو
الاء : هشاام لااا انت وعدتني
هشام : هشام اذا ماعمل يلي براسو اليوم ممكن يروح فيها
الاء : خلص روح لعند حلا
هشام : بعد مازعلتها متوقعة تفتحلي الباب
الاء : طيب روح لعند نور
هشام ؛ لا حبيبتي ماحزرتي .. متل ما اصريتي علي نام عندك تحملي العواقب
الاء : هشام بترجاك
هشام : انت يلي بترجاكي
رماها بخفة على التخت ...........