رواية سلطان زمانه
الفصل العاشر10والاخير
بقلم مريم اليوسف
متسطحة الاء على سرير الفحص والدكتورة عم تمرر الايكو على بطنها وتشوف على الشاشة
وهشام واقف جنبها
الدكتورة : لا وضع الحمل كتير منيح وبلش يصير في نبض .. بس ناقصك شوية غذى
الاء : اي هو من الوحام ماعم اقدر اكل شي
الدكتورة : ولا يهمك رح اوصفلك شوية مغذيات
الاء : وشو مشان الدوخة ولعية النفس
الدكتورة: كمان الهن حل
هشام : المهم هلق وضعها ووضع الجنين مناح
الدكتورة : اي كتير مناح
هشام : لأيو درجة
الاء بقهر ؛ شبك حبيبي عم تقول مناح
الدكتورة : هههه مافيها شي عم يتطمن الزلمة
الاء : خلص اطمن والحمد لله كلو منيح ..
الدكتورة : هو في شي انت خايف منو
هشام : بصراحة اي
الدكتورة : شو هو
الاء بتحذير : هشااام
هشام : قصدي السفر والطيارة
اتنهدت الاء وهشام ابتسملها بمكر
الدكتورة : لا ما بصير شي بأذن الله
هشام : طمنيتني
~~~~~~~~~~~~~•
ماشيين بممر الاوتيل ورا بعض وهشام بالمقدمة والاء عم تحكي وتعاتب : ماعد تسكت رح تفضحنا قدام الدكتورة خلص قالتلك منيح ... بيرجع بيسألها لأيو درجة .. شو رأيك تعرف ع أيو جنب نايم ابنك .. وتعرف اذا الجو عندو شوب ولا برد
كان ماشي ومتجاهل كل حديثها لوصلو لغرفتهم فتحها ودخل وهية دخلت وراها ولساتها عم تبربر
سكر الباب ومسكها من كتافها وثبتها قدامو وحكي بكل رواق والابتسامة على وجهو : خلصتي
اتطلعت حواليها وكأنو ماكانت حاسة وسكتت
هشام : اذا ماخلصتي عم اسمعك
الاء : شقد طويل بال .. طيب رد علي ناقشني ليش تاركني عم احكي لحالي
هشام : شوبدك لاحكي انا جاهز
اتطلعت عليه ورجعت اتطلعت حواليها وكانو عم تتأكد انو صارو لحالن ورمت حالها بحضنو وقالت : اشتقتلك كتيير لعد تساافر
شدها اكتر على حضنو وحكي وانا اشتقلك كتير ياروح روحي ... وعد اخر مرة باخد هيك مشاريع وبغيب عن البيت
الاء : بشكل عام مابتحمل تبعد عني
هشام : ليش انا يلي عم اتحمل
كانت عم تستنشق ريحتو بأشباع
الاء : ريحتك ادمااان
هشام : بس ريحتي
الاء : كلشي فيك وبخصك ... يمكن جاي وحامي عليك
هشام ؛ ههههه وانا مارح خلي بنفسك شي
حملها ودخل فيها لجوات الجناح
هشام : مو مشان شي مشان ماتطلع بعين الصبي هههههه
~~~~~~~~~~~~~~•
طالع من الحمام لابس بنطلون بجامة مع قميص شيال ... وهية غرقانة بالنوم
وقف على المراية يرتب شعراتو ودقنو وراح قعد جنبها
هشام : حبيبي نايمة
ماردت
هشام : دخيل يلي وحامها جاي على نوم
الاء بصوت ناعس :ماني نايمة
هشام : ههههه صدقتك
الاء : الفرشة دافية سهيت شوي
مد ايدو على خدها وقال اذا نعسانة نامي ياعمري
فتحت عيونها وقالت : بدي اقعد معك كتير مشتاقتلك
هشام ؛ بس انا كمان نعسان كتير بعديلي هيك خليني نام
الاء ؛ طيب تعال
بعدتلو وهو تمدد جنبها ... قربت منو وحطت راسها على صدرو وراحت بنوم عميق
ابتسم بحب وهو عم يلعبلها بشعراتها ... وكأنها طفلة بين ايديه .. وهو مزبوط فرق للعمر يلي بيناتن ... بس هو كان حاسس انو بحاجتها اكتر ماتكون هية بحاجتو
هشام : الاء نمتي
مافي رد
هشام : نوم العوافي يا وردتي الصغيرة ظبطلها نومتها وقام
~~~~~~~~~~~~•
بعد وقت رن موبايل الاء تململت وقامت تشوف مين .. كانت لحالها ومافي اثر لهشام اخدت الموبايل لتشوف مين وكان هشام
ردت : الو
هشام : فقتي
الاء : اي هلق
هشام : مو حاجتك نوم
الاء: وينك انت
هشام ؛ تحت بالمطعم قومي انزلي طلبت عشا الجو كتير حلو
الاء : يلا شوي ونازلة .. انت وين بالضبط
هشام : الصالة الخارجية جنب النافورة الكبيرة
الاء : اوك
هشام : ناطرك ها لاترجعي تنامي
الاء: لا لا جاي
~~~~~~~~~~~~•
كانت ماشية وعم تتلفت حواليها الاوتيل مبين فخم كتير .. صح بنفس البلد بس بحياتها مافاتت عهيك اماكن
شافتو قاعد على طاولة جنب النافورة متل ماوصفلها .. ولما شافها رفعلها بأيدو وقربت لعندو وقبل ماتوصل قام فورا وراح سحبلها الكرسي مشان تقعد
قعدت وهية متفاجئة وهو قعد محلو وشافها كيف ملاحقتو بعيونها
هشام : في شي
الاء: انت عطول هيك
هشام بثقة : طول عمري جنتل بس انت ماكنتي تشوفي
الاء : اممم
هشام : طلبت اكل بحري شو رأيك
الاء : اي ليش لأ
هشام : شبك كانك مو شبعانة نوم
الاء : لا شبعانة بس ليش مافيقتني .. عفكرة عم اتوحم على النوم بس انو بقدر اتغلب عليه
هشام ؛ شفتك نايمة ما اجى من قلبي صحيكي انزلت لهون حكيت مع نور وحلا
الاء : اااه .. وكيفن
هشام : مناح بسلمو عليكي
الاء : يعني حكيتو بموضوعكن
هشام : حكينا ومشي الحال
الاء : ايي
هشام : شو اي
الاء : احكيلي التفاصيل
هشام : مهم
الاء : انو شو بيصير اذا حكيت
هشام : انا شخص مابحب كتر الحكي
الاء : اف شو يلي غيرك
هشام : لا بالعكس ليكني ما احلاني .. بس انو شوبدك تعرفي
الاء : بدي اعرف كلشي .. ليش كان بدك اتطلقن .. وبدي اعرف شو صار
هشام : قلتلك مابحب احكي بشي ماضي
الاء : مافهمت
هشام : عفكرة انا مدايق منك من هداك اليوم مشان هيك سكري على السيرة
الاء : اي يوم
هشام : مازالك مصرة ترجعي تحكي بالماضي بنبلش من عندك .. انت كيف بتتركي البيت وبتسافري من دولة لدولة بدون علمي .. شو ماكان انا بضل جوزك وممنوع تطلعي من البيت بلا اذني ... بس انا تغاضيت كل هاد وماعاتبتك بحرف
الاء : كل هاد بس لانو قلتلك شو صار
هشام : وانا قلتلك انحلت المشكلة وخلص سكري ع السيرة .. نحنا مبسوطين وغير شكل لاتفكري باي حدا بالعالم ومابهمنا اي حدا بالعالم لما بنكون مع بعض
الاء : طيب ماشي سكتت
كتفت ايديها وبرمت وجهها على الجنب التاني ولاحظت بنتين قاعدين جنبن وعيونهن على هشام بس هو ابدا ما كان منتبه عليهن بعدت عيونها عنن وشردت بالنافورة
هشام : اي وبعدين
الاء : مابدك اسكت سكتت
هشام: طيب يلا افرديها مو مستاهلة تعملي منها حردة
الاء : خلص اتركني هلق بروق
مسك ايدها وقربها منو وباسها
هشام : انا اسف بعتذر
ماعلقت
هشام: الحق مو عليكي بس انا متوتر من شغلة تركتك للبيت وكل ماعم حاول اتناسى برجع بتذكر ... ومافيني ماعاتبك
الاء : تفضل عاتب انا قدامك
هشام بهدوء : كيف بتطلعي هيك لحالك ماخفتي .. كيف دبرتي حالك
الاء : طلبت تاكسي ورحت ع المطار سألت ع حجز عسوريا وكان في طيارة بعد ساعتين حجزت وقعدت نطرت وبعدها وصلت عسوريا
هشام : طيب حصل خير وخلينا نسكر على القصة لانو عنجد بتزعجني .. كلشي بخص هالقصة بيزعجني من عيد ميلادك للمشكلة .. لجيتك لهون .. للقرار يلي اتخذتو وكلشي مشان هيك خلينا نسكر على القصة نهائيا مازال نحنا هلق مع بعض معك ونفتح صفحة جديدة
الاء : هو كان بدي قلك شي بس خلص مازال قلت سكري على السيرة رح سكر
هشام : شوفي
الاء : خلص مافي شي
هشام : الاء احكي
الاء: ماعاساس مابهمك الماضي
هشام : بس حاسس صاير شي كمان مابعرفو
الاء : بتعرف انو نور وحلا اجو كمان لهون
هشام : بغيابي ؟؟؟
الاء : اي اجو كرمال يحكو معي ويقنعوني ارجع
هشام : لاااا ... هيك كتير انا رجل كرسي يعني ... نسواني فلتانين بالمطارات وانا اخر من يعلم
ضحكت الاء من كل قلبها على حالتو
هشام : اي اضحكي اضحكي بسيطة
الاء : خلص ولوو مرقها ماعاساس سكري على السيرة
هشام : لك فهمنا انت جنيتي وسافرتي حردانة هنن كيف يعملو هيك بدون مايخبروني
الاء : بدك تحاسبن
هشام : شو رأيك انت .. والله انتو التلاتة بدكن قتل
الاء : بتسخى تضربنا
اتطلع فيها وابتسم
الاء : اي هيك هااا
هشام : خلص هالمرة سماح للكل .. بس لنخلص من اجازتنا رح ارجع حط قوانين لهل البيت لانو البيت فلت
الاء : متل شو
هشام : لما بنرجع بنحكي .. مشان الشي يلي صار مايتكرر و انا بعرف كل فصول حلا يلي صارت .. ونور تسترت عليها وانت بتصغري عقلك
الاء : عكل حال مابظن في داعي لكل هاد اجو لعندي قعدنا واحكينا بكل رياحة وخلص قررنا نكون متل الاخوات وماعد نجبلك وجع راس
هشام :ياااريت
اجا الاكل وصار ياكلو .. وهشام كل شوي يطعميها بأيدو وهية مبسوطة كتير لانو هشام عندو الاهتمام بالفطرة وماعم يبتذل شي
الاء : هشام
هشام : عيونو
الاء: بحبك
مسكلها ايدها مرة تانية وباسها وقالت : وانا بموت فيكي
هشام : عجبك الاكل
الاء : اي كتير طيب ، بدك تروح لعند ام عمر
هشام : بصير ماروح
الاء : وايمت بدنا نرجع ع قطر
هشام : قطر ؟؟ بكير
الاء : لكن
هشام : شو نسيتي انو بدي افتل فيكي واعملك احلى شهر عسل
الاء : عنجد
هشام ؛ مو انا يلي بوعد ومابوفي
الاء : وايمت
هشام : هاليومين بس لأمن على المشروع وكمان قال اختي بدا تخطب لعمر بنكون موجودين
الاء : عنجد ايمت
هشام : قال بكرا رايحين يخطبولو اياها
شردت وحكت بقلبها : معقول رح يخطبو اسماء .. بس كانو خبرو انو بدن يجو او لمحو ..
الاء : ومين بدا تخطبلو
هشام : والله مابعرف مادخلت بالتفاصيل
الاء : يالله الله يقدم يلي فيه الخير
هشام : حديقة الفندق كتير حلوة شو رايك بعد العشى نتمشى
الاء : موافقة
~~~~~~~~~~~~~•
بقطر
قاعدين نور وحلا وقدامهن اركيلة عمرانة والمقبلات والنقرشات مليانة الطاولة
قاعدين مرتاحين ولافين رجل على رجل
الاركيلة مع نور وسحبتها منها حلا
نور : تضربي ايه
حلا : وانت كمان نمتي على النفس
نور : دخيلك خلينا نمخمخ واخيرا ارتاح راسنا
حلا : اي والله .. كنت ماسكة قلبي بأيدي انو الاء اتنح وماتقبل ترجع
نور : المهم انت تتغيري معها
حلا ؛ خلص التوبة ... تتهنى منها الو المهم نحنا مايتغير علينا شي
نور : قولتك معقول هشام يضل معها ونحنا يتجاهلنا
حلا : ههههه بتصدقي انت هشام بيكتفي بوحدة.. ممكن بميزها عننا او بحبها اكتر مننا.. بس وحياتك بحبنا وبس بدو رضانا وبعدين نحنا مو قلال وبنظبطو 😉 وشي نتقاسموا كلنا احسن ماننحرم منو للأبد
نور : لا بعد فركة هالادن صاير يطلع معك حكم
حلا :لكن بعجبك ... وبتعرفي شو انا بضمن هالمرة هشام مايجيب الرابعة
نور : هههههههه مع انو مابصدق بس بقول ان شاء الله
~~~~~~~~~~~•
تاني يوم
واقفة الاء عم تزبط شالها وجنبها هشام عم يرد شعراتو لورا
اتطلعت فيه وشافتو شقد شخصية والبنات كيف كانو بتطلعو عليه مبارح
الاء : ليش كل هالتظبيط
هشام : ايو تظبيط انا عطول هيك
الاء : بس كأنو عم تبالغ
هشام : ههههه غيرانة علي
الاء : اي كتير ... وين مابنروح عيون البنات عليك
هشام : معقول انا ملفت
الاء : شو رأيك
هشام ؛ انتي كيف شايفتيني
التفتت لعندو ومسكتو من جاكيتو وقالت اجمل رجال بهل الدنيا كلها واحسن واحن مخلوق
قرب وباسها من جبينها وقالت : وانت اميرة قلبي وحب حياتي
ضمتو وقالت : والله ماعم اشبع منك
هشام : ياخوفي بعد الوحام تكرهيني
الاء ؛ لا مستحيل ... بحبك بوحام وبدون وحام
هشام : طيب لنفترض بعد الحبل خف الحب احزري شو نعمل
الاء : شو
هشام : بخليكي تحبلي مرة تانية هههههه
ضربتو على صدرو وقالت : فايق ورايق
هشام ؛ هههههه .. خلصتي
الاء : اي يعني لعند ام عمر
هشام : بس انا انت لعند اهلك قضي اليوم عندن
الاء : ليش خليني روح سلم عليها
هشام ؛ بكرا .. اليوم رح يكونوا مشغولين بالطلبة لعمر ومارح ينتبهولك منيح وانا بحب الاهتمام يكون بس النا
الاء : امممم طيب ماشي .. بس بتخبرني كلشي بصير من هلق عم قلك .. مابكرا تقلي مابحب احكي بالماضي
هشام : هههههه طيب ماشي
اخدت جزدانها وقالت : كمان ضحكتك خففها .. بتضحك بطريقة حلوة وملفتة
هشام : هههههه ماناقص غير تحجبيني
الاء : بيرجع بيضحك
هشام : اااخ منك روحي روحي احسن ما اكلك عند هالصبح
الاء : مشيت
~~~~~~~~~~~~~•
فتحتلها امها الباب ودخلت
الاء : كيفك ماما
امها : مشتاقتلك انت كيفك طمنيني عنك
الاء : غير شكل الحمد لله
امها : يعني مشي الحال
الاء : ان شاء الله تنذكر وماتنعاد
كانو عم يحكو وهنن داخلين لجوا
قعدت الاء وقالت : خلص من هون ورايح رح كبر عقلي وماعد ازعل ع الطالعة والنازلة هشام مابيتعوض ... وكرمالو رح اتحمل عيشة الضراير رضيت بقسمتي ونصيبي
امها ؛ الله بنور طريقك يااارب
الاء : آمين .. شو وين الكل
امها : ابوكي حممتو ونام واسماء بالمشفى .. ولؤي طلع هو وحمزة قال يدوروا على مكان للشغل الجديد
الاء : اممم يلا منيح
امها : تشربي قهوة
الاء ؛ جاي معك نعملها سوى
فاتو على المطبخ وبلشت الاء بتحضير القهوة
امها : وين نمتو
الاء : بالاوتيل
امها : ليش جوزك ماعندو بيت هون
الاء : فتحنا هالموضوع امبارح .. قال كرمال كم يوم بينزلن ع البلد بدو يشتري بيت يقوم ينسرق ... او تحطي عليه حارس وتدفعي عليه اجار .. الاوتيل احسن واريح
امها : معو حق .. اذا الواحد ماقاعد ببيتو الله اعلم شو بصير فيه
الاء : بصراحة اقنعني
سمعوا الباب انفتح وصوت اسماء : الاء عنا؟؟
الاء : شو عرفك
اجت لعندن وقالت : سلام
الاء : هلا
اسماء : شفت جزدانك بالصالون .. كيفك عروستنا
الاء : مشتاقة
اسماء : واضح ماعم تفارقينا
الاء : ههههه شوبدي اعمل اشبع منكن قبل مانسافر
قعدت اسماء وقالت : مطولين ؟
الاء : ليأمن على المشروع ... وكمان (وسكتت)
اسماء : كمان شو
الاء : نحضر خطبة عمر
اسماء تجدمت ملامح وجهها والاء انتبهت عليها
الاء : ماما حطي الفناجين من بعد امرك
راحت امها تحط الفناجين والاء قربت من اسماء ونكشتها
امها : ومين بدن يخطبولو
الاء : مابعرف بس اليوم رح يخطبولو
اسماء : ايه الله يهنيهن
قامت وراحت
الاء : تعي صارت القهوة
اسماء : ماجاي عبالي اشربوا انتو صحة وهنا
الاء : لا رح جبلك ولا مشان ماتجلي الفناجين
صبت القهوة بالفناجين وحكت لامها رايحة اتغالظ عليها شوي وراجعتلك
ضحكتلها امها وقالت : صحة وهنا
اخدت القهوة وفاتت لعند اسماء وسكرت الباب واسماء كانت عم تبدل تيابها
الاء : ليش تبدل لونك
اسماء : مافي شي
الاء : وعدوكي بشي؟
اسماء : لا بس انا شكلي اتأملت زيادة عن اللزوم
الاء : الدنيا قسمة ونصيب لا تزعلي
اسماء : مو زعلانة لا تاكلي همي .. انت مابدك تروحي معن مرت خال العريس
الاء : هشام مابدو ياخدني وهو بيني وبينك احسن
اسماء : طيب تعي نشرب القهوة مع امي
الاء : يلا
~~~~~~~~~~~~~~•
المسا
قاعدين العيلة عم يشربو متة ويفصفصو بزر
لؤي : الاء يعني جوزك كل هالقد مستقلع منك لسه مابياخد برجعك
الاء : لا وحياتك .. بس بغار علي وبقول خليها عند اهلا اضمن
لؤي : خلص لاتحلفي مصدقك
الاء : وعمرك ماتصدق
اسماء : لك انتو شو صار معكن صحي كرمال المكان
لؤي : لقينا صالة بتجنن بس المشكلة صاحبها بدو يأجرها مابدو يبيع
الاء ؛ اي دوروا الا ماتلاقوا
لؤي : في حدا وعدنا لبكرا وان شاء الله خير
الاء : ان شاء الله
رن موبايل الاء وكان هشام وحكت للؤي : ليكو عم يتصل ومو مستقلع متل ماحضرتك حكيت
الاء : الو ... اي حبيبي ... هلق ... لعناا؟؟ طيب طيب
سكرت وقالت : قومو قومو بسرعة
لؤي : شوفي
الاء : قال جاي هو ورفيقو يشربو فنجان قهوة يمكن بخصوص شغلكن
لؤي : غرفة الضيوف مرتبة ؟
امو : اي نضيفة ومرتبة
الاء : لكن خلينا نضب هون ونفوت ننضب جوا قومي اسماء ... اي صح قلي بدو حمزة كمان
لؤي : رح حاكيه
قامو وبلشو ينضفوا مكان قشر البزر
~~~~~~~~~~~•
شوي واندق الباب وراح حمزة يفتح وبيتفاجئ بنسوان مع هشام ومعو عمر حاملين بوكيه ورد وعلبة حلو
حمزة : اهلا وسهلا .. اهلا وسهلا ... اميي تعي جاينيا ضيوف
طلعت امو تشوف واتفاجأت بالنسوان وقالت : اهلا وسهلا ام عمر نورتوا تفضلوا تفضلوا
الاء صار عندا فضول وراحت لتشوف شو القصة ولما شافتن فهمت كل القصة
دخلن حمزة لغرفة الضيوف هو وامو وهشام مافات معن لمح الاء ومشي شوي لعندا
الاء : شو القصة
هشام : ماقلتك بدنا نخطب لعمر
الاء: وليش جايبن لعنا
هشام : قال عندكن بنات حلوين
الاء : بالله وليش ماخبرتني
هشام ؛ حبيت اعملها مفاجأة
الاء : بس مو محضرين شي
هشام : ولا يهمك .. اعطاها مفتاح السيارة وقال كلو جاهز تحت بالسيارة ابعتي حدا ينزل يجيبن
الاء : بالله
هشام : اطمني مابيعرفوا شي ... الغراض بالطبون
الاء : طيب رح ابعت لؤي يجيبو .. بس مع هيك كان لازم تخبرنا البنت لما سمعت بالخبر زعلت
هشام : اااه يعني موافقين
الاء : روح روح من وجهي
هشام : ههههه رايح يلا البسي وتعي وخلي اختك تحضر القهوة وتجيبها
الاء : اوامر تانية هشام بيك
هشام : لا تطولوا ههههه
راح دخل لعندن والاء راحت تخبر اسماء ولؤي كان عم يلبس ابوه مشان يدخلو لعند الجماعة
~~~~~~~~~~•
بغرفة الضيوف الاغلبية اجتمعوا من ام عمر وابنها وملك وجوزها وهشام ولؤي وحمزة
اندق الباب ودخلت اسماء يلي كتير خجلانة وحاطة راسها بالارض ولابسة فستان اسود معرق بورد زهري والاء دخلت وراها ومعها صحون كيك
سلمو وبلشو ضيافة
ام عمر : بسم الله ماشاء الله
ملك : اهلا اسماء كيفك
عمر كان مبين عنو خجلان وبنفس الوقت مبين عنو محترم اخد القهوة وشكرها بهمس
والاء وراها ضيفو الكل
اسماء قعدت جنب امها والاء جنب جوزها
هشام : خطي عمر شو خجلان
الاء مع زورة : اي اكيد لانو اول مرة مامتل بعض عالم
هشام ؛ هههههه اي تعودنا
الاء : استغربت منك اول ماحكيت مع حمزة كنت جريء ... تاري الاخ خبررة
هشام: مو هيك بالله
سكتو لما حكت ام عمر وشرحت وضعهن وبما انهن متل الاهل حبت تفوت بالموضوع دغري وطلبت اسماء عسنة الله ورسولو وهشام كان يشاركها بالحديث بما انو خالو
حمزة : اكيد بنتشرف .. ومتل ماقلتو انت فتو بالموضوع دغري وماكان عنا اي فكرة عن هالموضوع وكرمال هيك بدنا تمهلونا كم يوم لحتى نشوف رأي البنت
استأذنت اسماء وطلعت
ام عمر ؛ حقها ونحنا ناطرين منكن اتصال
شربو القهوة وحكي هشام : مشينا
ام عمر : بنمشي
هشام : الاء جاهزة
الاء بهمس : خليني اليوم مع اختي
هشام : ممنوع .. بكرا الصبح بجيبك
الاء ؛ اووف منك .. كان بدي اعرف شو رأيها
هشام : واضحة موافقة بس بدكن تمرمطونا مو اكتر
الاء : اي مابأثر قليل ما ماتمرمط خالو
هشام : هههههه قومي قومي جيبي غراضك خلينا نمشي
الاء ؛ امرك يا تاج راسي
قامو الكل طلعو مع بعض والاء ودعت امها عند الباب وقالت : بكرا الصبح بكون عندكن
لؤي: بصير يعني هههه
الاء : شو قاعدة على قلبك يا زلمة
لؤي : عم نمزح ولووو بتشرفي بأي وقتي اختي الغالية
~~~~~~~~~~~~~
~~~~~~~~~~~~~
بعد سنة تقريبا
بقطر
بجناح الاء معها بيبي صغير لابس لون ازرق والظاهر انو صبي عم يبكي وهية عم تهزو ورايحة جاية بالغرفة
اندق الباب وانفتح ودخل هشام وشاف حالتها وكأنو مو نايمة طول الليل
هشام : صباح الخير حبيبي
الاء : صباح النور
هشام : شبو يمان
الاء ؛ طول الليل مانام وهو يبكي
هشام ؛ ليش ماخبرتيني
الاء : مابعرف .
هشام : طيب عملتيلو ببرونة
الاء : لاء
هشام : ليش .. ما سمعتي الدكتور قال ماعم يشبع
الاء : بس امي قالتلي انو بيجي الحليب مع الايام .. مابدي عودو على الببرونة والحليب الصناعي
هشام : ياعمري لكن هيك حالتك احسن
ماردت
هشام : هاتيه عنك واقعدي ارتاحي
اخدو منها وصار يهزو وقرب من التلفون ورفع السماعة وحكي نجود اعملي ببرونة ليمان
الاء : الحليب هون خليها تجي تاخدو
هشام : هون الحليب تعي .. بس بسرعة
سكر التلفون ورجع يهزو ويغنيلو
هشام : ليش مابتسمعي الكلمة مابعرف
الاء : مابدي احرمو من حليبي
هشام : ماتحرميه بس بتساعديه حرام نشف قلبو للولد وهو يبكي
دمعو عيونها بتأنيب الضمير
هشام : ياروحي هي رزقتو والله مابعتلو حليب ومابأثر اذا عطيناه حليب مساعدة
اندق الباب ودخلت نجود ومعها حافظ مي وببرونة وفورا عملتلو ببرونة
اخدها هشام وصار يطعميه والصغير صار يرضع بلهفة .. قعد فيه عطرف التخت وبين ماخلصها كان نايم
هشام : شايفة انو جوعان
الاء: ياعمري انت والله مابقصدي يا ماما ... اسف ياروحي
حطو هشام على السرير وظبطلو نومتو وراح قعد جنبها وضمها على صدرو وصارت تبكي
الاء : حاسة حالي مو نافعة لشي
هشام : لاتحكي هيك ... بس شي جديد عليكي
الاء : والله ماعم اعرف شي
هشام : بتتعلمي بعدين هون كلنا جنبك وفي الدادا بس انت رافضة حدا يساعدك فيه
الاء : لأنو انا امو
هشام : هههه ياروحي بس كمان لازم ترتاحي لأنو هو بحاجتك واذا حدا ساعدك فيه مابأثر
الاء : معك حق
هشام : قومي نفطر
الاء : قولك مارح يفيق
هشام : انا بقول لأء لانو عبى كروشو وبدو ينام
الاء : دخيل قلبو وكروشو انا
هشام : غسلي وجهك وتعي
الاء : اسبقني انت
هشام: لا رح انطرك
غسلت ولبست فستان حلو ونزلو على السفرة كانو حلا ونور بانتظارن
حلا : كيفو يمان سمعتو عم يبكي بالليل
الاء : لا الحمد لله نام
نور : شو كان صايبو
الاء : كان جوعان وكنت عم حاول انو بركي بصير في حليب ماحابة عودو على الببرونة
نور : معك حق مافي احسن من حليب الام .. بس هي رزقتو
الاء : معك حق ... يلا معي معي بتعلم
حلا : شي طبيعي شي جديد عليكي
الاء ؛ اي والله .. تاري الامومة شي صعب كتير
نور : وحلو كتير
الاء : اي والله
هشام ؛ الاء ايمت بدك تنزلي معي على الشركة
الاء : ويمان اتركو لحالو
هشام : الكل هون وبنخلي الدادا تهتم فيه ... انا قصد بدي اياكي تطلعي لانو حاسك متعلقة فيه كتير .. وبالشغل بتتسلي
الاء ؛ معك حق من يوم ولدت ماطلعت من البيت الا لعند حكيم الاطفال
هشام : شايفة كيف
نور : ويمان كتير هادي ماشاء الله عنو المهم يكون شبعان
الاء : معك حق .. هو انا قطعت الامل بموضوع الحليب
حلا : لا ولو الامل برب العالمين بس بتساعديه .. ربك بكل شي الو حكمة يمكن حليبك مابغذي مشان هيك الله يسرلو مساعدة
الاء : ان شاء الله
هشام : لكن بكرا جهزي حالك ومابدي كسلنة
الاء : ماشي
اكلو بهدوء
وهشام قام على شغلو ونور جنب الاء عم تحكيها وتقلا انو عادي لأنو اول ولد وعطول اول ولد بكون حقل تجارب
حلا : اي والله مظبوط
نور : بكرا ارجعي على شغلك وغيري جو
الاء : وهو هيك .. صحي انتو شو صار بالجمعية ماعد شفتكن عم تروحو عليها
حلا: انسحبنا منها
الاء : عنجد ؟؟!.. ليش
حلا : بتحسي فيها نصب وسرقة ومابدنا يلحقنا حرام
نور : مع انو نحنا متطوعين وماعم ناخد شي لجيبتنا بالعكس عم نحط فيها بس اخر فترة حسينا عم تنسرق المساعدات والناس المحتاجة ماعم يوصلها شي حكينا مع هشام وقلنا اتركوا هالشغلة
الاء : معكن حق لازم الواحد يعطي بأيدو لحتى يأمن انو هالمساعدة عم توصل لأصحابها
الاء : وشو ناويين تشتغلوا
حلا : انا ولا شي مافي احلى من الواحد انو مايعمل شي
نور : انا عم كمل حفظ بالقرآن الكريم وان شاء الله اختموا عن قريب
الاء : مابتقصري ... الله يهدينا ويهديكي انا بس اتفضى ورتب اموري ناوية ان شاء الله بلش احفظ
نور : حلو كتير واذا بدك بساعدك
الاء : اكيد بدي مساعدتك
نور : وانت حلا
حلا بتهرب : بشوف بشوف
الاء : مازالك قاعدة طول اليوم شوفي وراكي
حلا ؛ ياعمي هي الشغلة هداية من رب العالمين وانا عم حاول انهدى
الاء : الله يهديكي
حلا : الحمد لله محافظة على صلاتي وعم اقرا قرآن و ان شاء الله بحاول احفظ كمان
الاء : بكرا بتغاري مننا
حلا : ياريت
الاء ؛ تنزلو ع السوق اليوم
نور : بننزل ليش
الاء : انو قبل ماارجع على الشغل جيب كم شغلة
حلا مع غمزة: مشان الشغل ولا مشان شغل اخر الليل
الاء : تضربي ايه لا ماني قليلة ادب متلك
حلا ؛ والله مافي احلى من قلة الادب
نور : انت مو ناوية تعقلي
حلا : لا .. المهم انا بنزل .
الاء : طيب رح جهز حالي بدنا نروح ع الصالون وع مركز التجميل اهملت حالي كتير هالفترة
نور : مابتقصري
الاء : يلا قوموا بسرعة انا رح وصي الدادا بيمان
~~~~~~~~~~~~•
بعد شوي تجمعو كلن عند باب الفيلا وراحو اتجاه سيارة من السيارات كبست نور على الزر وانفتحت
الاء : خليني سوق انا
حلا : نو نو اذا ماطلعتي شهادتك مافي تسوقي فينا
الاء ؛ والله بعرف سوق تعلمت منيح والشهادة قريبا رح يعطوني اياها
نور : لا نقوم ناكل شي مخالفة روحي اقدي ورا متل الشطورة
الاء : بسيطة بكرا بس اخد الشهادة رح شفط تشفيط
حلا : بكرا بنشوف
~~~~~~~~~~~~~•
ع الضهر
اجا هشام من الشغل وكان البيت هادي
اجت نجود : اهلين يا بيك
هشام ؛ وينن
نجود : من شوي اجو من السوق وكل وحدة بجناحها
هشام : والاء طلعت معن
نجود : اي الكل
هشام :تمام جهزو الغدا
نجود : حاضر
طلع هشام وبوجهو على جناح الاء
دق الباب ودخل ... كانت واقفة قدام المراية عم تقيس فستان ومبين جديد .. دخل وشافها كانت متغيرة عمالة لوك جديد لشعرها قاصصتو ومغيرة التسريحة وجها مبين عليه النضارة والفستان الجديد عليها
هشام : شو هالقمر
انتبهتلو واجت لعندو وقالت : شو رأيك باللوك الجديد
هشام : قمر بكل حالاتك
الاء : سامحني اهملتك واهملت حالي كتير هالفترة
هشام ؛ ولايهمك المهم انت تكوني منيحة
الاء : الحمد لله
قرب من السرير الصغير يلي جنب التخت وشاف ابنو نايم
هشام : شو الحلو نايم
الاء : اي والله اليوم ماقلب ياكل ونغيرو ويرجع ينام
هشام : اي الحمد لله
قرب باسو برقة على ايدو وبعد عنو
الاء ؛ وامو مابيطلعلها بوسة
هشام : هية امو يلي بدي اعطيها اكبر بوسة ..
قربت وتعلقت برقبتو وهو حاوطها من خصرها وباسها .....
~~~~~~~~~~~•
نزلو على السفرة وتحت كانت
حلا :هشام حبيبي انت هون
قامت لعندو استقبلو وباستو على خدو
هشام : اي جيت من شوي بس طلعت شوف يمان
حلا ؛ وكيف لقيتو
هشام : شبعان ونايم
حلا : اي الحمد لله .. كيف لقيت الاء ع اللوك الجديد
اتطلع فيها ابتسم وقال : حلو كتير
حلا : هاد زوقي بعرفك بتحب هيك شي
ابتسم
هشام مع غمزة: وانت ماعملتي شي لوك جديد
حلا : ماصرلي زمان مغيرة لون شعري عمهل شوي
هشام ؛ متل مابدك بشكل عام انتو حلوين بكل حالاتكن
نور : مين هنن الحلوين (نازلة وراهن)
هشام ؛ انتو مين يعني
نور ؛ يعني انا معن مو بس لألاء وحلا هالحكي
هشام : لا انتو التلاتة بدون تمييز
الاء: وهيك هيك
هشام : هههه لا خلص الحمد لله اكتفيت عيني ماعد تطلع لبرا نهائيا
قعدوا على السفرة
وحكت الاء : طيب اذا بصرلك تتزوج الرابعة ؟
هشام : انتو بتوافقو ؟
بصوت واحد : لااااااا
هشام : ههههههه
الاء : مصدق حالك كتير
هشام : عم نمزح ولوو
بلشو بالاكل وحكت الاء : هشام بكرا شو ؟
هشام : عيد ميلادك
الاء : يعني متذكر
هشام : معقول انسى هيك يوم
نور : ويلي بعدو
هشام : عيد ميلادك
الاء : بدك تعملنا عيد ميلاد
هشام : لكن
نور : انا ماعندي مانع بنعملو بكرا
الاء : لا خليه لبعد بكرا هديك المرة انت عملتي معي وهالمرة انا رح اعملو معك
هشام : بنعمل كل يوم واحد
الاء : لا ما الو بهجة يومين ورا بعض
حلا ؛ معها حق
هشام : وشو قررتو ايمت رح تعملوه مشان جهز الهدايا
الاء : لبعد بكرا لانو اسماء وعمر بكرا جايين وبيحتفلوا معنا
هشام : لك منيح ذكرتيني كنت رح انسى
الاء : خلي ام عمر تجي معهن
هشام : مارضت قال البيت مابينرك لحالو .. وقال خلي عمر واسماء يطلعو لحالن
نور ؛ مع انو والله بنتسلى معها كتير
هشام : بس يرجعو عمر واسماء بنجيبها
الاء : بتعمل منيح
حلا : ابن عمي شو جايبلن هدايا
هشام : مفاجأة
حلا ؛ وانا مابتمرقلي شي هدية معن
الاء : هديك المرة احتفلنا بعيد ميلادك وجبلك طقم الماس وما احكينا ولا طلبنا شي
حلا ؛ شو عينك ديقة .. انا قصدي انو وقفت علي يجبلي هدية
الاء ؛ موافقين بس بشرط بعيد ميلادك بدو يجيب للكل
حلا : ماشي شو رايك ابن عمي
هشام : الله يساعد ابن عمك .. بدكن تفلسوه لابن عمك
ترك الاكل وقام
الاء : ماعد تعرفي تضلي ساكتة بكل شغلة بدك تدحشي حالك .. سبحان الله الغيرة ماشية بدمك
حلا : اي مادخلك وطقي موتي
نور : خليكن هيك متل الديوك .. انا قايمة شوف ابن عمي يشكل آسي
حلا : اي اقعدي انا قايمة اليوم دوري
الاء : لا دورك ولا دروها اليوم بدي اياه الي .. مابكفي كل فترة نفاسي وانتو مستفردين فيه
حلا : لا مادخل ماشين ع الدور وخلينا ع الدور لاتخربي
الاء : ما عاساس ايمت مابدك خديه
حلا ؛ انسي حكي راح ومات
الاء ؛ لا وراح ولا اجي .. اليوم عندي يعني عندي وبعدين بكرا جاي اختي بدي اتفضالها ونيمها عندي
نور : خلص حلا خليه اليوم عند الاء
حلا : طيب ماشي .. شفقت عليكي .. وكرمال اللوك الجديد مايروح ع الفاضي
الاء ؛ اي شكرا .. انا طالعة من هلق مابدنا ازعاج
حلا ؛ روحي وليه مجنونة
طلعت وهية عم تضحك
شافت باب غرفتو مفتوح وراحت لعندو وبالفعل لقتو متمدد على تختو وايدو على جبينو وشارد بالسقف
سكر الباب وراحت قعدت جنبو وهو لما شافها ضحك واتجلس
الاء : ليش لحالك
هشام :طفشت منكن
الاء ؛ واذا قلتلك انك معزوم عندي ع الجناح
هشام : وحلا
الاء ؛ دبرت امرها .. المهم انت شو قلت
هشام : قلت انو من ايدك هي لايدك هي
مسكتو من ايدو وسحبتو على جناحها .. شلحتو جاكيتو وقالت ما اكلت جبلك غدا لهون
هشام : لا اكلت الحمد لله
الاء : ماقلتلي شوبدك تجبلي هدية
هشام : سربرايس
الاء : المهم انك تذكرت وهي احلى هدية عندي
هشام : وانت احلى هدية الله بعتلي اياه
الاء : لساتك بتحبني متل اول
هشام : واكتر من اول
الاء : وحلا ونور
ضحك لأنو تقريبا كل فترة بتسألو هالسؤال وقال: بحبن بس مو اكتر منك
الاء : وانا بموت فيك ... شو حابب تعمل .. اذا بدك ارتاح نام شي ساعة والمسا بنسهر
حس انها تعبانة خصوصا انها مانامت مبارح واليوم قضتها بالسوق
هشام : اي والله تعبان بس بدي تنيميني بحضنك
الاء : انا يلي بدي نام بحضنك لانو دايبة من النعس
هشام : ملاحظ هالشي
الاء : لكن رح البس بجامة مريحة وانت بدل تيابك
هشام : ماشي
~~~~~~~~~~~~•
الصبح
هشام : الاء .. حبيبتي ... فيقي
فتحت عيونها الاء بتعب واتجلست
هشام : يلا ياكسلانة الشغل ناطرك
الاء ؛ خليني نام شوي حباب
هشام : لا مافي يلا قومي
تجلست وهية عم تنفخ وقالت : كيف بدي روح ع الشغل واختي اليوم جاي
هشام : بتروحي معي وبعدها بنروح بنجيبن من المطار
الاء : طيب ماشي
هشام : بالاول كنتي متحمسة ع الشغل شو عدا مابدا
الاء : والله ولساتني متحمسة بس نومة الصبح لاتقاوم خصوصا اذا كانت السهرة صباحي
هشام : هههه وماحدا قلك تسهري للصبح
الاء : يعني ماعجبك
هشام : مبلى وكتير بس يلا قومي
انتبهت لسرير ابنها فاضي
الاء : وينو يمان
هشام : اعطيتو لدادا كان عم يبكي وانت مانك حاسة عليه
الاء : ياعمري .. انا رايحة شوفو
هشام ؛ ع السريع وبتلبسي وع الشغل
الاء ؛ حاااضر
قرصها من خدها وقال : بسرعة يا كسلانة
~~~~~~~~~~~~~•
نزل هشام ببدلتو الرسمية والاء لابسة عبايتها وبحضنها ابنها وعم ترضعو بالببرونة قاعدة بالصالون
هشام : وين الكل
الاء : مابعرف
هشام : فطرتي
الاء : لا
هشام ؛ تعي افطري واعطي يمان للدادا بدنا نلحق عنا شغل كتير
الاء : يلا
باست ابنها وندهت للمربية تاخدو واكلو ع السريع وقامو راحو على الشركة
~~~~~~~~~~~~~•
ماشية الاء جنب هشام وايدهن بايدن بعض وقالت : عفكرة انا نسيت كلشي تعلمتوا
هشام : شي اكيد كل يلي داومتيهن كم شهر وكنت حامل ماكنت اضغط عليكي بس من هون ورايح ماعد في تساهل
الاء : طيب شوبدنا نعمل اليوم
وصلو ع مكتبو ودخلو وقال : عم نعمل جرد شامل للشركة
الاء : عجب
هشام : بدي فض الشراكة مع شريكي القطري
الاء : بتعمل منيح بس عادي تصير كلها باسمك
هشام : اي لما بكون حاصل على الاقامة الذهبية
الاء : عنجد .. ايمت اخدتها
هشام : قدمت عليها واعطوني الموفقة .. قريبا يعني
الاء : الف مبروك حبيبي
هشام : مبروك علينا
قعد ورا مكتبو وهية سحبت كرسي وقعدت جنبو وقالت : شو اعمل
فتح درفة تحت المكتب وطلع كتير ملفات وحطهن على الطاولة وقال : كل ملف بيحمل شعار شركة معينة بتحطيهن مع بعض
الاء : ماشي
وهنن عم يشتغلو اندق الباب وانفتح ودخل رياض .. نوعا ما تفاجئ بالاء
رياض : مرحبا
ردو : اهلا
رياض : كيفك ام يمان
الاء : الحمد لله
رياض بنشافة: خير استاذ هشام قال طالبني
هشام : وليش هيك عم تحكي بنفسية
رياض : عأساس مابتعرف
هشام ؛ مغلب مغلب وفرط ضحك
الاء: مغلب ؟ يعني مقلب
هشام : ههههه اي ماشفتي مقطع الفيديو شب عم يحكي مع حبيبتي فيديو ومثل انو نايم وهية شغلت صوت عاساس سكرت المكالمة وهو قام فز وشافها لساتها فاتحة خط وصار يقلا مغلب مغلب
الاء : اي بس شو دخل رياض
رياض : حكي جوزك خليه يكف بلاه عننا
الاء : شو القصة
رياض : كنت عم احكي مع مرتي ع التلفون انو بدي روح نسهر وهو قلها بصوت عالي مشان تسمع انو بدنا نروح نخطبلو وهية جنت وحردت عند اهلها
هشام : ههههههه اخس ع الرجال
الاء : هشام شو هالتصرف والله عيب
هشاء : مادخلك التهي بشغلك
رياض : بسيطة يا هشام والله لردلك اياها .. المهم شو بدك طالبني
مدلو هشام ملف وقال : خلصو قانونيا
رياض : ماشي
طلع وسكر الباب وحكت الاء : شو عامل بالزلمة
هشام عم يضحك وقال: مغلب مغلب ههههه
الاء : والله اوقات بحسك ولد صغير
هشام : والله مزحة ماتخيلت مرتو تكون قليلة عقل لهل الدرجة
زورتو ورجعت التهت بالملفات يلي معها
~~~~~~~~~~~~~•
قاعدين على كراسي الانتظار بالمطار
الاء عم تكبس بموبايلها وفجأة انسحب منها
الاء : انو مابتبطلي هالعادة
هشام : ولا كأنو قاعد جنبك
الاء : هلق فتحتو بدي شوف الساعة
هشام : وين ما التفتي بتلاقي ساعات بالمطار
الاء : طيب ايو ساعة رح يوصلو
هشام : مابتلاقيهن الا طلعو من البوابة
تعلقت بأيدو بغنج وقالت : هشام شو جايبلي هدية لعيد ميلاد
ضحك ومارد
الاء ؛ والله رح موت وانا عم اتحزر
هشام ؛ معلش اصبري لبكرا
الاء : طيب شو جبت لنور
هشام : رح قلك مشان ماتقولي ليش ماجبتلي متلها
الاء ؛ هات لشوف
هشام : رحلة هي السنة على الحج انا واياها
الاء ؛ عنجدد ... وانا ليش لا
هشام: عشان يمان صغير .. بركي السنة الجاي
الاء : بس شو ماكانت هديتي مارح تكون احلى من هالهدية
هشام : معك حق .. مافي شي بيتعوض قدام زيارة بيت الله الحرام
الاء ؛ الله يرزقنا زيارتو
هشام : آمين .. المهم مابدنا زعل
الاء : ماشي .. معك حق مابقدر اترك يمان لحالو وهو بالاشهر الأولى من عمرو
هشام : دخيلو المتفهم
الاء ؛ طيب شو هديتي
هشام ؛ ههههه ماحزرتي ... ها ليكهن وصلو
التفتت لمكان ماعم يتطلع هشام وشافت اختها اسماء مع عمر طالعين من بوابة القادمون وقامت بسرعة واختها ركضت عليها وضمو بعض
الاء : ياعمررييي.. اهلا وسهلااا
اسماء : اشتقتلك كتيير
عمر سلم على خالو سلام حار بس مو متل الاء واسماء طبعا وبعدو عن بعض واتطلعو على الاء واسماء يلي ضامين بعض وماعم يبعدو
هشام ؛ مطولين
الاء : كتتير مشتاقتلها
عمر : ماصرلكن كم شهر مفارقين بعض
اسماء : حتى لو يومين
بعدو عن بعض وحكت الاء ؛ كيف عمر
عمر : الحمد لله وانت كيفك
هشام : كيفك يا كنتنا
اسماء : الحمد لله بخير انت كيفك صهري
هشام : غير شكل
سحبو الشناتي ومشو وحكت الاء : ان شاء الله ماتعذبتو بسفرتكن
عمر : هاي هية قطر وين العذاب بالموضوع
ركبو بالسيارة اسماء والاء بمقعد الخلف وهشام عم يسوق جنبو عمر
اسماء : ي الله شو متحمسة لشوف يمان .. يقبر قلبي ما اطيبو
~~~~~~~~~~~~•
المسا
بجناح الاء .. كانت هية واختها قاعدين على التخت والاء عم تبدل تياب يمان
اسماء : يا الله ما اصغرو مبين ع الصورة اكبر
الاء : اي الصورة بتكبر
اسماء : ياعمري والله بيتاكل
الاء : حبيبتي ابني مو للاكل
اسماء : ياروحي انا
الاء ؛ يلا شدو همتكن وجيبو ولد
اسماء : ع مهل ولو
الاء : اي احكيلي كيفك انت وعمر
اسماء ؛ مناح الحمد لله ، أعطيني احملو
لفتو الاء وعطتها اياه
اسماء : شقد صار عمرو
الاء : فايت بالتلت شهور ، ماقلتيلي شو كيف الاوضاع
اسماء : ماشي الحال
الاء : مو مبسوطة ؟
اسماء : ماشي الحال
الاء : شو القصة حكيلي
اسماء : مابعرف شو احكي .. عمر بحسو كتير بارد
الاء : مابحبك يعني
اسماء : مبلى بحسو بحبني بس مابحسو بيعرف يعبر ... ومع وجود امو الوضع صعب .. عم تدلل كتير عليه وبحسها بتغار عليه
الاء : شي طبيعي ابنها الوحيد اجا حدا واخدو منها
اسماء : مابشوفها غير زعلانة .. وهو بصير يترجاها يعرف شبها وبالاخير بتكون زعلانة عشي تافه .. ماعم يقعد معي وماعد اهتم فيني
الاء : وهو عنجد هيك
اسماء : لا والله اصلا بيحسبلا الف حساب ومابيسترجي يجبلي شي مشان ماتزعل بجبلها الها والي مابجيب شي .. مليت من هالوضع
الاء : لا تحكي هيك ولوو ... لساتكن عرسان
اسماء : اي اهلين عرسان
الاء : طيب انت سايريها
اسماء : والله عم سايرها بس مليت عم ضل اعتذر عشي وبلا شي
الاء : ومافيكن تسكنو لحالكن
اسماء : اكيد لا .. خلص لا تاكلي همي امور عادية وبتمرق انت كيفك .. انت وضرايرك ..
الاء : يعني مفكرة حياتي الوردية .. صح كلشي متقدملي بس الضرة صعبة يا اختي صعبةة
اسماء : حسيتكن متفقين
الاء : مبلى متفقين بس لما بكون مع وحدة منن بموت غيرة ... بس بحاول مابين علي لانو مافي شي اعملو لازم اصبر واسكت
اسماء : اوف ياااه محدا مبسوط
الاء : مستحيل تلاقي حدا مبسوط بحياتو .. عقولت شيرين :اي شخص عندو نقص لو قد مابين كامل اتأكد بدو اشيا كتير عندك اياها ومش سائل ... دنيا مابتكمل مع حدا شو نحنا مابنستاهل .. بس اوقات بتظلمنا وعم يطلع ظلما عادل
اسماء : اي والله معك حق
الاء : بس انت بتقدري تغيري الوضع ولوو والله بالمسايرة كلشي بصير وانت حماتك صح هيك بس والله طيبة اتقربي منها وحتى اكذبي عليها والله بتكسبيها
اسماء : عم حاول بس مابعرف اتبهور
الاء : اتعلمي مانها صعبة مازال كلو حكي بحكي .. والله الكل بحب الحكي الحلو حتى لو بالكذب ... متل هشام ماعد عرفتو صادق او كذاب المهم بيهتم
اسماء : ياريت عمر هيك لسانو حلو متل خالو
الاء : وبتلاقي حالك مع تنتين تلاتة
اسماء : هههههه
الاء : بعدين عمر مبين شقد بحبك بس يمكن بيخجل ووجود امو ماعم تطلع معو
اسماء : بجوز ..
الاء : بعدين انتي تلحلحي وبادري شوي شوي بصير يطلع معو
اسماء : والله بخجل
الاء : لا الخجل بدك تشيله عجنب .. وهلق اتصلي بحماتك وتبهوري عليها شوي
اسماء : شو قلا
الاء ؛ انو ماحلوة هالسفرة بدونك واستفقدك
اسماء : مو متعودة احكي شي مو حاسستو
الاء : معك معك ببتعودي يلا اتصلي فيها
اتصلت اسماء وفورا اجاها الرد
اسماء : كيفك مرت عمو طمنيني عنك
ام عمر ببرود : الحمد لله .. كيفكن وكيف كانت سفرتكن
اسماء ؛ منيحة .. بس (وسكتت)
صارت الاء تأشرلها شو تحكي
اسماء: بس والله الك فقدة ... ياريت جيتي معنا ... حاسة شي ناقصني
ام عمر ببعض الصدمة : لا روحو لحالكن تسلوا
اسماء : والله مابعرف .. حاسة كل هالجية مالها بهجة ياريت اسمعتي مننا وجيتي معنا
ام عمر تغيرت نبرتها وقالت : انت بتعرفي مابينترك البيت لحالو
اسماء : مزبوط .. بس عنجد انا من هون ورايح ماعد اطلع بدونك وبنخلي اي حدا يدير بالو ع البيت .. وحتى عمر حسيت انو مو متهني لانك مو معنا
ام عمر : يقبر قلبي مو متعود على غيابي
اسماء : وانا انعديت منو معو حق يتعلق فيكي ياست الكل
ام عمر : الله لايحرمني منكن .. يلا انبسطو باجازتكن وترجعو بالسلامة
اسماء : الله يسلمك ياغالية .. انتبهي على حالك
ام عمر : ماشي .. الله معك
سكرت وعيونها على الاء مصدومة
الاء : شايفة قدرتي
اسماء : والله انك داهية
الاء : هههههه
اخدت الاء يمان وحطتو بتختو ومع هزتين كان نايم
اسماء : ياروحي متل الملاك
الاء : ابني ما احلاه مايكون متل الملاك .. يلا قومي نزبط السهرة قبل مايفيق
اسماء : بدنا نسهر مع ضرايرك
الاء : لا انا هربانة منن .. بدي اسهر انا واياكي لحالنا
اسماء : مو عيب
الاء : حطي بالخرج
اندق باب الجناح وقامت الاء وقالت لاسماء : تعي وسكري بهدوء مشان مايفيق يمان
طلعو وكملو لباب الجناح فتحت الاء وكانوا نور وحلا
نور ؛ شو جبتي اختك وحبستو حالكن هون شو مابدكن حدا يسهر معكن
الاء : لا ولوو بالعكس نيمت يامن وعم قلها لاسماء قومي ننده لحلا ونور ونظبط سهرة .. مو هيك اسماء
اسماء بصدمة ولبكة : اي مزبوط هيك قالت
الاء : فوتو لخبر نجود اتطالعلنا لزوم السهرة
حلا ؛واركيلة ؟
الاء : واركيلة دوبو يمان نايم جوى
~~~~~~~~~~~~~•
قاعد هشام بالحديقة هو وعمر بعد ماجابولن ضيافة مع اركيلة
عمر : حلو كتير بيتك
هشام : مقدم
عمر : لا يسلم لصحابو
هشام : اي كيف الشغل
عمر : لا غير شكل
هشام : متفقين انت وولاد عمك
عمر : اي لؤي وحمزة اوادم والشغل معهن كتير مريح
هشام : محل الجوالات
عمر : مقعد فيه رفيقي
هشام : تمام .. يعني الشغل عم يطالع مردود منيح
عمر : والله ماكلين السوق
هشام : اخبار حلوة
عمر : ونسبتك عم تنشال عجنب
هشام : من كل عقلك بدي نسبة
عمر : لكن مابدك شي .. انا مابقبل
هشام : طيب شو رأيكن ترجعولي رأس المال والربح بدال مايكون ل اربعة بصير ل تلاتة
عمر : بس هاد مشروعك
هشام : من كل عقلك انت .. الحمد لله مو بحاجة هالشغل وعملتو كرمالكن وانتو استغلوه
عمر : لكن بحكي مع حمزة ولؤي
هشام : المهم احكيلي كيف اوضاعك ياعريس
ابتسم نص ابتسامة وقال : منيح
هشام : وليش هيك منيح بدون نفس
عمر : بصراحة وماتزعل
هشام : شو
عمر : امي ياخال
هشام : شبها
عمر : عم تحسها بتغار من اسماء
هشام : لا ولو
عمر : والله ... ومن اي شغلة عم تزعل .. تعبت من هالوضع عم قول ياريت ماتزوجت
هشام ؛ انت متأكد عمر اصحك كلشي الا امك واذا مضايق منها بجيبا بحطا بعيوني
عمر : أعوذ بالله خال هي امي اغلى من روحي ..بس عم احكيلك ممكن تفهم علي
هشام : يمكن لانك وحيدها وصار عندك حياتك الخاصة وهية حست انو ماعد الها لزوم
عمر : بظن هاد تفكيرها
هشام : ومرتك
عمر : والله اسماء مافي منها وعم تساير وماطلع منها حرف
هشام : بنات عمي بنات اصل
عمر : اي والله .. وبنفس الوقت عم حس انو مقصر معها وكتير .. بخاف دللها وعاملها بحب امي تزعل
هشام ؛ وكل امرك لرب العالمين والا ماتنحل
عمر : والنعم بالله
تناول هشام موبايلو وقال لحكيها بتكون ضايجة
عمر : وانت قلتها
~~~~~~~~~~~•
قاعدين الضرارير مع اسماء وعم يقلبو بموبايل الاء عم تفرجيهن على الصور اسماء وخطبتها والعرس كمان
الاء: هون لما لبسو المحابس
اسماء : ليش مابعتيلي اياهن
الاء : شقد بتدفعي
اسماء :تضربي صحي
حلا : حلوة تسريحة شعرك
اسماء : اي عند يلي عملت عندها ملك ليلة عرسها
نور : مزبوط شغلها حلو
قلبت الاء الصورة وقالت هون بالصالون لما اجا عمر ياخدك
كانت اسماء واقفة وعمر وراها وايدو على كتفها ومعو بوكيه ورد
اسماء : امانة ابعتيهن كل هدول الصور مو معي
الاء : ماشي ببعتن لاتصرعينا
حلا : وغيرها فرجينا
الاء : هون بالصالة ، وهو تصونا انا وهشام معن
حلا : ياريت رحنا مبين حلو
نور : هنن عملوه فجأة
اسماء : اي تخيلو خلال اسبوعين كنت عندو اسرع خطبة وجازة بتصير
الاء : اي مازال مأمن كلشي وبما انو كنا تحت مشان ماكل يوم ننزل ونطلع
الاء ؛ وهي هنن مع ملك وجوزها
حلا : لك شو اخبار ملك عم تحكي معكن
اسماء : قليل لانو وقتن غير وقتنا
نور : وين صارت صحي
اسماء : هو جوزها كان بالسويد وراحو لهنيك
حلا : عأساس يستقرو هون بقطر
اسماء : اي بس بالاول يأمن على الجنسية الو ولملك بتعرفي الجنسية مهمة هالايام .. لانو الجنسية السورية ماصالحة تدخلك لأي دولة
الاء : اي والله صار الواحد يخاف يقول انا سوري وين ماراح منبوذ وكل همو الواحد يكون معو اقامة او جنسية اي بلد غير سوريا
حلا : اي والله
قلبو كتير بالصور بتظهر فيها اسماء وهية عروس وبعدها صارت الصور بس لالاء وهشام
اسماء : هي صوركن بايطاليا
الاء : اي بشهر العسل .. هي بروما ..وهي بالاسواق القديمة .. وهي جنب برج بيزا المايل
اسماء : شو حلوين هالصور
الاء : اي والله كتير انبسطنا هنيك
حلا : منيح لحقت تعمل شهر هالعسل قبل مايكبر بطنها
الاء : هههه اي والله
سكرت الموبايل وحكت الاء : اسماء كيفن اهلي
اسماء : كلن بخير متل ماتركتيهن
الاء : ومرت حمزة كيفها على هالحبل
اسماء : طاير عقلها هية وحمزة ماعم يلحقو زق غراض للبوبو
الاء : ياعمري الله يكملها معن
اسماء : وحبيبك لؤي قرر يخطب
الاء: عنجد مين ... عجب ماعم تخبروني شي
اسماء : احزري
الاء : مافي ببالي حدا
اسماء : عجبتو ميساء وسألني عنها
الاء : عم تحكي جد
اسماء : والله
الاء ؛ مو قليل هالضرسان .. وميساء بتعرف
اسماء : شوبدو يعرفها عاساس يحكيكي تحكيلو معها
الاء : اي انا يلي بحكي
حلا : اي صح شو التجهيزات لبكرا
اسماء : شوفي بكرا
الاء : حفلة عيد ميلادي انا ونور
اسماء : لك صحي اليوم عيد ميلادك
الاء : نعيماً
ضمتها وقالت لاتواخذيني راح عن بالي كل عام وانت بألف خير ياعمري
الاء ؛ وانت بخير ياحبيبتي
~~~~~~~~~~~~~•
تاني يوم بالسهرة
الصالون مزين كلو بسبب عيد ميلاد الاء ونور ،والحفلة بس للنسوان فقط وكانو لابسين فساتين مكشوفة ومبسوطين وموجود اصدقاء لألاء جداد تعرفت عليهن بالشغل بالاضافة لأصدقاء نور وحلا واسماء ..
قطعو الكيك وعيدوهن .. ورقصوا على بعض الاغاني .. وتقدمت الهدايا وقضو وقت كتير حلو وبعدها انسحبو المعازيم وضلت بس اهل البيت .. وقامو كلن لبسو لأنو هشام وعمر رح ينضمو الهن بباقي السهرة ويقدم هشام هداياه لنور والاء
دخل هشام وعمر ووقفوا الكل عمر وقف على جنب واسماء انضمت الو وهشام كمل لعند نسوانو وكان معو كيسين صغار من الورق قربت نور منو باسها من راسها وقال : كل عام وانت بألف خير حبيبتي
نور : وانت بخير يارب
فتح اول كيس ليأكد من الهدية وعطاها اياها : ان شاء الله تعجبك الهدية
نور : اكيد رح تعجبني
فتحتها وكانو تذكرتين للسعودية لأداء مناسك الحج
نور بفرح وعيون دامعة : رح نروح ع الحج
هشام : ان شاء الله
نور : مو مصدقة احلى هدية بكل حياتي عنجد شكرا كتير
هشام : وشدي همتك لتختمي القرآن رح نروح عمرة كمان
نور : ان شاء الله .. شكرا كتتييير هشام
الكل بارك لنور بالهدية
راحت عجنب وقربت الاء وحكت : صار وقت هديتي
هشام : ههههه بالاول كل عام وانت بخير يامصيبة
الاء ؛ وانت بالف خير
عطاها الكيس ومديت ايدها فيه طلع متل الكرت القاسي
سحبتو وتفاجأت بشهادة سواقة
الاء : طلعت ؟؟
هشام : اي من فترة بس خليتها معي مشان اعطيكي اياها مع الهدية
وكانو فهمت قصدو ورجعت مدت ايدها وطلعت مفتاح سيارة عليها شعار مارسيدس
الاء : سيارة الي ؟؟؟
هشام : اي تعي شوفيها
طلعو كلن لبرا واتفاجئت بسيارة جي كلااس بلون الاسود القاتم وعليها شريطة كبيرة باللون الاحمر
الاء : جي كلاااس 😍😍بتجننن
هشام : حبيتها
الاء : لك انا عم نام وفيق واحلم فيها بس شو عرفك انو حابة هالموديل
هشام : الانستغرام عندك لو بيحكي كان حكي .. كل الريلز يلي بتابعين عن الجي كلااس
ضمتو وقالت : شكرا كتير حبيبي .. بتجنن
هشام : مو حابة تجربيها
الاء : اكيد
وراحت تركض وهو عم يقلها عمهلك
ركبت فيها وصارت تكبس فيها وشغل الضو ومع تشغيلة الضو ظهرت قدامها صبية قريبة من عمرها .. والكل هلق انتبهلا وخصوصا انها غريبة
قرب هشام منها باستغراب وهية نزلت من السيارةوالكل تقدم
الاء : اهلا وسهلا ؟؟
:مرحبا هشام
الكل انظارو على هشام
هشام متفاجئ وقال : اهلين
: شو مامخبرهن عني
الاء : شوبدو يخبرنا عنك ومين حضرتك
: خبرهن ياهشام مين بكون
هشام : مو لاعرف مين حضرتك
: هلق نسيت مرتك
الكل : شووووو
: اي انا مرتو ريما متزوجني بالسر ومخبي عنكن
الاء بخوف : عنجد هشام
هشام ؛ والله مابعرفها .. واول مرة بشوفها
الاء : هشااام هي عم تحكي صح
هشام : عم قلك مابعرفها
: هلق ماعد تعرفني يا ظالم
هشام ؛ اقسم بالله مابعرفها .. مين انت ومين باعتك علي
الاء : فكرتك تغيرت .. بس عبس .. فتحت ايدو وحطتو مفتاح السيارة قلتلك من قبل مابتقدر تشتريني .. مشت خطوتين ووقفت قدام نور وحلا وقالت : وانتو اذا بتوافقو عنجد بتكونو بلا كرامة
هشام : الاااء والله مابعرفهااا ..
رن موبايلو وكان اسم رياض ورد : الو
رياض : كيف لقيتيلي هالهدية
هشام : هاد انت يا واطي
رياض : مغلب مغلب هههههههه
هشام : يا ابن الحرام ... والله بس شوفك
سكر وتنهد وقال : اووف طلع مغلب .. قصدي مقلب مقلب
ووالكل تبدلت ملامحهن من قلق لضحك
وهيك بتكون انتهت قصتنا بتمنى تكون عجبتكن ... وعطونا آرائكن و وشو استفتدوا من القصة
هلق انا بشكل عام كتبت هالقصة للتسلية اكتر من الحكمة ... لانو عنجد الضرة صعبة .. وبنفس عم شوف كتير ناس عايشة مع ضرايرها ومتل الاخوات ... امممم ومابعرف 😅😅وانتو شو بتقولو
تمت