رواية همس الاسر
الفصل الثامن8
بقلم الكاتبة الصغيرة
حكت همس للينا كل حاجة ومع كل كلمة بتقولها كانت دموعها بتنزل اكتر من الاول ودا اللي زعل لينا عليها
لينا : انتي بتعيطي عليه ليه اللي زي دا ميستحقش حد يزعل عليه
همس : انا مش زعلانة عليه انا زعلانة علي كل السنين اللي ضيعتها معاه بس مش هيبقي بعد كدة
لينا : انتي ناوية علي اي
همس : هحقق اللي مخلنيش احققه وانا معاه واول حاجة هعملها اني هشتغل عشان معتمدش علي حد ولا احتاج لحد
لينا : دي سهلة
همس : ازاي بقي مين هيرضي يشغلني
لينا : انا هخلي واحد قريبي يشغلك في شركته
همس : مين دا
لينا : دا صاحب شركات العامري
همس : انا معرفهوش انا معرفش حد كان شريف عازلني عن العالم ودا خلاني معرفش اي حد حواليا
لينا : بصي ي ستي مش انتي متخرجة من كلية هندسة وبتقدير ممتاز كمان
همس : ايوة
لينا : يبقي خلاص هو دا بس اللي عاوزينه وسيبي الباقي عليا انا بس هتيجي بكرة معايا لشركته
همس : شكرا بجد ليكي ي لينا مش عارفة من غيرك كنت هعمل اي ولا كنت هروح فين
لينا : طب وليه الكلام اللي يزعلني منك دا قومي يلا بس عشان تنامي ليكي شوية وهترتاحي انتي اكيد تعبانة وسيبي ليا حور شوية هقعد معاها
همس : لا سيبيها معايا انا مش عاوزة اتعبك اكتر
لينا : مفيش تعب حور زي بنتي وانا بحبها قومي يلا
اخدت لينا همس علي الاوضة وسابتها عشان تغير وترتاح وهي اخدت حور وبقت تلاعبها عشان متعيطش وهمس تصحي
******************************
عند شريف راح للمستشفي عند يحيي وهو ساكت وباين عليه الحزن علي غير العادة دخل الاوضة اللي يحيي موجود فيها وكان لسة صاحي اول ما شافه حس بحاجة غلط
يحيي : في اي ي شريف مالك
شريف : مفيش
يحيي : طب هي فين همس
شريف : همس مشيت
يحيي : مشيت فين ما هي كانت في البيت اصلا
شريف : مشيت للابد ومش هترجع تاني
انصدم يحيي من كلامه وحس ان حصل حاجة لهمس ودا اللي خلاه يقول بعصبية : انت عملت فيها ايه انطق
شريف : انا طلقتها هي طلبت الطلاق وانا طلقتها
يحيي : ايه اللي انت بتقوله دا انت عملت اي توصلها تطلب الطلاق انا عارفها ومتاكد انها مش هتعمل كدة من غير سبب
حكي شريف كل اللي حصل ليحيي اللي مكنش مصدق ان اخوه فكر فيه بالطريقة دي
يحيي : انت بني آدم حقير ومفكر الكل زيك دا انا اخوك ازاي تفكر فيا كدة ازاي ييجي في بالك اني اخونك مجاش في بالك اني اعرفها قبلك اصلا وانا اللي عرفتكم علي بعض يعني كانت قدامي لو كنت عاوزها كنت اتجوزتها من الاول بس انا طول عمري بعتبرها اختي زي ما هي بتعتبرني اخوها
شريف : انا اسف بجد مش عارف فكرت كدة ازاي
يحيي : شريف انت تاخد بعضك دلوقتي وتطلع برة احسنلك مش عاوز اشوف وشك انا بجد مبقتش عارف انت ازاي اخويا انا طول الوقت كنت بقف معاها لان انا عارف انك ظالمها وكان باين للكل انك بتتلكك بس عشان تضربها وتزعق لها وتغلط فيها واللي بعد دا كله كانت صابرة لدرجه انا انا نفسي طلبت منها انها تطلب الطلاق لكن هي كانت رافضه رفض تام وقالت لا مستحيل ومكنتش راضيه تعمل كده ازاي ييجي في بالك ان انا ممكن اخونك واعمل حاجه زي دي انت بني ادم حقير وتفكيرك زباله
شريف : يحيي انا
يحيي : اطلع برة وانسي اني اخوك انا مبقتش عاوز اشوف وشك وهسيبلك البيت اول ما اخرج من المستشفي تشبع بيه
شريف : انت بتقول اي
يحيي : زي ما سمعت مبقاش لما دخل ببعض ولو علي الورث خده كله انا مش عاوز حاجة
شريف : يحيي
يحيى : اطلع برة
خرج شريف من الاوضة وهو مصدوم من دا كله ومش مصدق انه خسر اخوه وخسر مراته وحس اخيرا هو قد اي كان غبي ومفكرش كويس
******************************
تاني يوم صحيت همس ولينا من النوم وجهزوا نفسهم عشان يروحوا الشركة وجابوا وحدة تقعد مع حور لانهم مش هيقدروا ياخدوها معاهم
وصلوا للشركة ودخلوا وكانت همس مبهورة لان الشركة كبيرة طلعت لينا للدور اللي آسر فيه واخدت همس معاها وطلبت من السكرتيرة تقابله دخلت السكرتيرة وبلغتهم يدخلوا دخلوا هما الاتنين لجوة
لينا : اسورة عامل اي
آسر : هو انتي عاوزة اي ي بت اي اللي جابك هنا
لينا : هو دا الاستقبال اللي كنت متوقعاه
آسر : بطلي كلام وانطقي واللا حابة اطردك
لينا : طب مش قدام ضيوفي
اخد آسر باله من همس وانصدم من وجودها وانه قابلها للمرة التانية بصلها اوي ودا اللي خلاها تتوتر
لينا : اعرفكم ببعض
آسر : عارفها احنا اتقابلنا قبل كدة ازيك ي مدام همس
همس : كنت
آسر : ها
همس : كنت مدام دلوقتي لا
استغرب آسر من كلامها لانه يعرف ان شريف بيحبها ومكنش مصدق انه ممكن يكونوا اتطلقوا وخصوصا ان باين ان لسة عندها ايام
لينا : انت هتفضل واقف كدة كتير اقعد يلا عاوزة اتكلم معاك
آسر : ما تبطلي كلامك الكتير دا
قعد آسر علي مكتبه وكل واحدة فيهم قعدت علي كرسي قدامه والاتنين كانوا بيبصوا لبعض
آسر : ها مفيش واحدة فيكم هتقول في اي
لينا : بص انا هدخل في الموضوع علي طول انا عاوزة اطلب منك طلب
آسر : سامعك
لينا : انا عاوزاك تشغل همس عندك هي خريجة كلية هندسة وبتقدير كويس جدا وحابة تشتغل وانا مجاش في بالي غير شركتك
بص آسر لهمس اللي كانت بتبص في الارض من التوتر والكلام دا اكدله فعلا شكه انهم اتطلقوا
آسر : معاكي الcv بتاعك
همس : ايوة
مدت همس ايدها بالملف ناحيته وهو اخده منها ومنزلش عينه من عليها ابدا بص في الcv
لينا : ها قولت اي
آسر : .........