رواية حياة الادم الفصل الثاني2بقلم زهرة الربيع
قرب عليها اكتر وبقت ترجع لورا بخوف وقالت برعب ودموع...ادم خليك بعيد لو قربت مني هموت نفسي والله ..يا ادم خليك بعيد وانبي حرام عليك حرام وانبي
حياه بقت تبكي وتترعش بخوف بس اتفاجأت لما ادم ضحك جامد ورجع مسك قميصه لبسو وهو بيضحك من قلبو
حياه بصتلو باستغراب وادم بصلها بابتسامه جميله وقال..معقوله يعني مصدقه اني ممكن اذيكي...طب لو انا عايز اعمل فيكي كده ايه الي سكتني كل السنين الي فاتت ما انتي كنتي معايا طول الوقت...واتنهد وقال...للمره المليون..ادم بيحبك..اتخلق علشانك ومستحيل يأذيكي يا حياة أدم
حياه مسحت دموعها وابتسمت براحه وقالت..طيب...شكرا بجد يا ادم...ممكن تروحني بقى..زمان بابا قلقان عليا
ادم بقى يحط الحطب للمدفأه وقال بلامبالاه...لا متقلقيش ابوكي زمانو كمل دور الشطرنج..وابتدى يلعب طاوله ومغلوب زي العاده متشغليش بالك...هو عارف انك مع ابن عمك..وجوزك المستقبلي..واكتر انسان بيحبك في الدنيا فأكيد مطمن
حياه قالت بغضب...وانا بقولك متتعبش نفسك ..انا مش بحبك ومش هحبك..دي حاجه مش بالغصب تمام
ادم قال بنفس الهدوء..لا مش بالغصب برضاكي..هستناكي توافقي..شهر اتنين سنه سنتين..بصي مش هنمشي من هنا الا لما توافقي على جوازنا
حياه قالت بغضب...وانا مش هوافق على جوازنا لو فضلنا هنا العمر كلو تمام..انا مبحبكش
ادم قال بسرعه..ايوه ليه بقى..مبتحبنيش ليه...انا طول عمري فاكر انك بتحبيني...كنتي كل ما تشوفيني خدودك تحمر ومتعرفيش تنطقي كلمه واحده...حتى دقات قلبك الي كنت اسمعها من بعيد كانت بتقولي انك بتعشقيني..بس حالك اتقلب في ال٥ شهور الي فاتو من بعد ما رجعت من المأموريه الاخيره ايه الي حصلك مش فاهم
بقلم...زهرة الربيع
حياه قالت ..الي حصل اني خدت راحتي في غيابك طلعت للدنيا من غير ما تحرسني ولا تضايقني...اتكلمت مع غيرك من غير ما اخاف لتلمحني شوفت الدنيا وحبيت ..ايوه حبيت يا ادم..انا بحب مروان ومش هتجوز غيره
ادم ضحك وقال...انتي بتعصبيني كده يعني...بتحبي مروان من امتي..ده انتي الاسبوع الي فات كنتي هتتجوزي العبيط الي اسمو كريم..ايه..كان حب مؤجل مثلا ولا حبتيه الاسبوع ده وبقى حب الاسبوع الي مفهوش رجوع
حياه اتوترت وقالت..انا...انا ...انا بحبو والسلام انت مالك..انا اتجوز الي انا عيزاه..كفايه انو هو شاب طموح وبيحبني ومؤدب
ادم قال بسرعه..ياسلام ..ما انا كمان طموح وقربت ابقى عقيد وبعشقك مش بحبك...ومؤدب و...اه ماشي مؤدب دي فيها كلام هنتاقش فيها بعدين بس يعني العرسان الي بيتقدمولك مش احسن مني وبعدين انتي بتوافقي على اي حد والسلام..المهم ميكونش انا
حياه اتنهدت وقالت...لا طبعا..اسمع يا ادم..انا قولتلك قبل كده احنا اتربينا سوا وانا مش قادره اشوفك جوزي وبس كده كفايه بقى وروحني
ادم اتنهد وقال..ماشي مفيش فايده يعني..طب خليكي عارفه بقى ان مفيش مرواح قبل ما تحبيني لو فضلت هنا العمر كلو
حياه لسه هتتكلم قال بسرعه..اشششش خلصنا
في بيت حياه كانو ابوها وامها قاعدين عادي ومروان رايح جاي بغضب وقال..انا مش عارف ازاي انتو بالهدوء ده...بنتكم اتخطفت..اتخطفت ودلوقتي قاعده مع شاب لوحدها الله اعلم ممكن يعمل معاها ايه..انا مش فاهم ازاي مش عايزين تبلغو البوليس
ابوها اتنهد وقال..يا بني اقعد شويه دماغنا لفت..وبعدين انت ازاي عايزني ابلغ عن ابن اخويا..ادام انا مربيه على اديا متخافش عمرو ما هيأذيها واكيد كمان شويه وهيرجعها
مروان قال بغضب..وانا مش هستنى لحد مايرجعها انا ايه ضمني انو يرجعها مش يمكن يطمع فيها..خمس شهور وانا بحاول معاها وافقت على كل العرسان إلا انا مكانش ناقص غير تتجوز البواب ..وبعد ما وافقت عليا اخيرا يجي يخطفها مني ..ده بعدو ..خليكم انتو كده..اما انا مش هسكت لو انتو مش هتبلغو بخطف بنتكم انا هبلغ بخطف خطيبتي .
مروان قال كده ومشي رغم ان ابو حياه كان بينادي عليه بس مرضيش يسمعو
ابو حياه اتنهد وقال بقلق ...هنعمل ايه دلوقتي الولد المجنون ده هيودي نفسو في داهيه
ام حياه قالت بضيق..انت خايف على ابن اخوك ومش خايف على بنتك يا توفيق انا كلام مروان وغوشني اوي..افرض فعلا عملها حاجه
توفيق قال ...لا طبعا انتي بتقولي ايه..دي مع ادم يا نهله ادم ده الي طول عمره بيحميها انتي هتعملي زي الاهبل ده
نهله قالت..يوه بقى معرفش يا توفيق انا قلقانه على البنت ربنا يستر ويرجعها انهارده بقى
عند ادم كان قاعد جمب الدفايه وعمل شاي وقاعد بيشرب وبيسمع موسيقى على تليفونو واخر انسجام
حياه كانت قاعده بتبصلو بغيظ وقالت بابتسامه...ادم..هيه الساعه كام معاك دلوقتي
ادم قال ببرود..واحده ونص
حياه قالت ...طب ايه بقى مش اتاخرنا ..ايه رأيك نروح ننام ونرجع نكمل الخطفه يوم تاني
ادم بصلها بطرف عينه وقال...نامي لو جايلك نوم علشان مش هتروحي
حياه نفخت بضيق وقالت ...طب انا عايزه اقلع الفستان ده ازاي هنام بيه
ادم بصلها وقال بهدوء...اقلعيه واقعدي بالي تحتو
حباه شهقت وقالت..انت اتجننت اقعد بالي تحته ازاي قدامك
ادم اتنهد وقال..حياه متصدعنيش اتأقلمي مع الوضع..عايزه تنامي بيه نامي.. عايزه تقلعيه اقلعيه وبطلي زن ماشي علشان مفيش فايده من الي بتعمليه
حياه ضربت رجليها في الارض بنرفزه وحاولت تنام بس الفستان كان تقيل وكبير وضيق معرفتش تنام ابدا قالت...اااووووف...مش عارفه انام بيه يا ادم..بجد اتصرف
ادم اتنهد وقلع القميص بتاعو وقال..خدي اقلعيه والبسي ده
حياه بصت لقميصه بتردد بس ملقتش حل تاني اخدتو وقالت..اتفضل اطلع بقى
ادم طلع ووقف ولع سيجاره وبقى يشربها وهو مضايق جدا من كل الوضع ده بس مش قادر يبعد عنها ولا قادر ينساها مهما حاول
جوه الكوخ حياه كانت ماسكه قميصه وبتبصلو بدموع وبقت تشم عطره فيه وقالت...ياريت اقدر اكون معاك في يوم يا ادم انت امنيه حياتي...بس ازاي بعد الي عرفتو وجات في بالها ذكرى مؤلمه من كام شهر لما ادم سافر ورجع من السفر وجاتها مكالمه من واحده متعرفهاش اصرت تقابلها
فلاش باك حياه قاعده على كافيه قريب من البيت وجات بنت في منتصف العشرينات بلبس قصير وضيق قلعت نضارتها وقعدت قصاد حياه وقالت..اذيك يا انسه حياه
حياه استغربت لانها أول مره تشوفها قالت..حضرتك تعرفيني
البنت قالت..عز المعرفه ادم مش بيتكلم غير عليكي
حياه ابتسمت وقالت..حضرتك تعرفي ادم كمان..تبقي اكيد زميلتو
البنت قالت..لا...انا مش زملتو...شوفي يا حياه انا عارفه ان الي هقوله صعب عليكي بس انا وادم نعرف بعض من مده طويله ولما سافر السفريه الاخيره قضيناها سوا...يعني انا وهو ديما بنكون مع بعض..وبننزل في اوتيل واحد واوضه واحده كمان
حياه اتصدمت وبصت لها بغضب وقالت..انتي كدابه ادم بيحبني ومستني بس اخلص دراستي وهنتجوز و
البنت قاطعتها وقالت..اهدي يا حياه انا عارفه انك اكيد هتنجرحي من كلامي بس انا مضطره اصارحك انا من شهر اكتشفت اني حامل