رواية ذئاب لا تعرف الحب الجزء الثاني2الفصل الحادي والخمسون51والثاني والخمسون52بقلم نجمه براقه
زيد
خدوني علي القسم ومدونيش فرصة اتكلم ولا افهم في ايه وايه تهمتي ولما وصلنا قال الظابط للعسكري
_ خده علي الحجز وروقوه يكون جبنا البنت
_ ياخدني فين حضرتك وبنت مين انا مش فاهم حاجة.. يافندم لو سمحت اسمعني ، فهمني انا عملت ايه طيب
اشرله بأيده علشان يمشي
وخدني العسكري علي الحجز ودخلوا اتنين حجمهم كبير دعكوني دعك ورمولي وشي وكسروا عضمي ومسبونيش غير وانا طريح علي الارض وفضلت مرمي مكاني لساعات
#خلود
كان في توتر في البيت وباين ان في حاجه حصلت بس محبتش اتدخل وفضلت قاعدة في الاوضه لغيت ما جت هاجر تقولي
_ بت الحقي
_ ايه
_ البوليس خد زيد
قولت وانا بعتدل في قعدتي
_ ليييه؟!
قالت بتوتر
_ مش فاهمه الموضوع بالظبط بس اكيد كدب زيد ميعملهاش
_ في ايه قولي قلقتيني
_ واحده قدمت فيه بلاغ انه اعتدي عليها في عيادته
وقف الكلام بين حنجرتي وانا شايفة اللي حصل بيمر قدام عيني وكلامه اللي قالهولي في المستشفي بيتردد في ودني عن ان دي طبيعتهم واللي حصل معايا كان ممكن يحصل مع غيري.. ومع انه ملمحليش في مره ان بينا حاجة بس انجرحت وحسيت قلبي بيتعصر ومقدرتش اتحكم في دموعي قدام هاجر ف قالتلي
_ بتبكي ليه!! .. انتي مصدقة
وطيت راسي وبكيت ف قعدت جمبي وقالت وهي بتهزني
_ بطلي! .. انتي مصدقة الكلام ده.. انتي اتجننتي انا مصدومة فيكي والله.. ازاي تصدقي حاجة زي دي
قولت ببكاء
_ علشان دي الحقيقه.. ابن عمك مريض ونجس
قالت بنرفزة وهي بتزق كتفي
_ وانتي شوفتيه نجس امتي ولا عشان قربلك مره يبقي خلاص ، انتي اللي هبله ومدلوقة ويمكن فهمتيه غلط
_ انا
_ اه انتي.. هو لسانه زفر بس هو ميعملهاش
_ طيب ولو قولتلك انا عملها معايا واني سيبت العيادة علشان الموضوع ده اتكرر تلات مرات.. انتي اللي مش فهماه ده مريض عاوز دكتور نفسي يعالجه.. هو قالي بنفسه ان دي حاجة عادية لما يكون اتنين لوحدهم.. ده غير اللي مسمعناش عنه
_ لا كدب كدب.. زيد ميعملهاش.. هو يمكن قربلك علشان بيحبك بس مستحيل يعملها
_ بس هو مبيحبنيش هو بعدها قالي انه بيعتبرني اخته.. مش بقولك مريض ونجس
_ لا بردو لا ، اكيد في حاجه غلط انا متاكده انه ميعملهاش وهتشوفي بنفسك
_ مش عايزة اشوف ولا اتاكد من حاجه ، كل حاجه وضحت زي الشمس انا اللي كنت غبية لما فكرت فيه من الاول .. سيبيني لوحدي ممكن ولا امشي اروح في داهيه
_ خلود متسبقيش الاحداث
_ مش هسبق ولا هأخر سيبيني لو سمحتي ونبي سيبيني مش عاوزه اتكلم مع حد
_ طيب بس اهدي
قالت كده ومشيت وانا فضلت مكاني مش قادره اوقف بكا لغيت ما نمت من غير ما احس بنفسي وصحيت تاني يوم علي اتصال إسلام ولما مردتش بعتلي رساله قالي فيها
_ مبترديش ليه كلميني ضروري عاوزك
تجاهلت رسالته ف بعتلي صوره ورسالة تانيه بيقولي فيها
_ انتي مش هينفع تقعدي في البيت ده تاني
رسالته ثارت فضولي وخلتني افتحها عشان اشوف الصورة ولما فتحتها وشوفت لقيت بنت مضروبه ضرب واضح قوي علي وشها وخبر بيقول
« ذهبت الي دكتور نفساني لمسعادتها ولكنه اعتدا عليها»
ده بس اللي كان مكتوب ولكن كانت باين ان زيد هو المقصود ف رديت وقولت
_ إيه ده
_ ده الدكتور اللي انت عايشه في بيتهم طلع بيغتصب البنات انتي مينفعش تقعدي عندك تاني
قولت بعد ما رجعت دموعي تسيل
_ همشي
بعت كده وقفلت الشات ومثلت اني نايمه لغيت البيت ما فضي وبعدها نزلت ومبقتش عارفه اروح فين ارجع بيت جدتي ولا اروح بيت بابا اللي انا اصلا مش فاكره شكله ولا عمره سأل عني ولا اروح اي مكان محدش يعرفلي طريق فيه مكنتش عارفه وحسيت الدنيا ضاقت بيه قوي وبعد لف في الشوارع لقيت نفسي قدام لجنة وقفت شوية ابصلهم وهما بيسحبوا الرخص من الناس وساعتها إسلام رجع يتصل بيه تاني ولما رديت قالي
_ عملتي ايه
_ سيبت البيت بس مش عارفه ممكن اروح فين
_ ده كلام.. انا هتصرفلك في مكان انتي فين دلوقتي
قولتله اسم الشارع اللي انا فيه ف قالي
_ ده قريب مني عشر دقايق وهتلاقيني عندك
قفلت معاه وقعدت علي الرصيف استناه وابص للجنة وفجأه لقيت الظابط اياه بيتكلم مع عسكري وبعدين سابه وجه عندي وقال
_ انتي!
_ ايوة
_ خير في حاجه
_ لا كنت بتمشا شوية وبس
_ بتتمشي وانتي راسك لسة مربوطة
_ اتضايقت من البيت ف نزلت
_ في مشاكل معاكي
اومات بنفي ف قال
_ متأكدة
اومات ايجابا وانا بتهرب من نظراته ف قال
_ بس واضح ان في مشكله .. قولي يمكن اقدر اساعدك
_ مفيش يافندم انا بس اتضايقت شوية ف..
قاطع كلامي اتصال من تيتة قفلت عليها ورجعت اكلمه واقول
_ نزلت اشم شوية هوا
قولتها وقبل ما يرد جاني اتصال تاني منها وبردو قفلت وطفيت التليفون ف قال
_ لا كدة في حاجة.. اتفضلي احكيلي في ايه
_ يافندم مـ...
قال بمقاطعة
_ علي فكره وقفتك هنا بشكل ده تخليني اخدك في البوكس بس انا مش هعمل كده ، تعالي ، تعالي متخافيش
مشيت معاه وقعدنا علي مقعد قريب من اللجنة ف قال
_ ها سامعك
_ هو ده تحقيق
_ مش بالظبط.. كنتي رايحه فين
_ مش عارفة
_ يعني ايه مش عارفة
اخفضت جفوني وسكت ف قال
_ محدش يعرف انك مشيتي من البيت
قولت بتفاجيء
_ عرفت ازاي
_ قفلتي علي جدتك مرتين وشكلك واديكي مش عارفه رايحه فين .. هو انتي كنتي قاعده مع مين بعد ما طلعتي من المستشفي
_ عند الناس اللي تيتة بتشتغل عندهم
_ قصدك بيت الدكتور زيد
بعثرت نظراتي بربكة ف قال
_ عرفت انه اتقبض عليه
_...
_ إيه
_ معرفش حاجه
_ شكلك عارفة وشكلك ماشيه عشان كده كمان
اخفضت جفوني من غير ما اجيبه بكلمة ف قال
_ انا معاكي انك لازم تمشي ، انتي كان المفروض تمشي من زمان علشان ميصحش تقعدي في بيت في شباب زيه وزي اخوه وانتي بنت جميله وصغيرة كدة حتي لو مكنش اتقبض عليه.. بس بردو مينفعش تمشي من غير ما تقولي لجدتك.. انتي شكلك كده متهورة
رجعت ابصله وكنت هتعصب عليه علشان قالي نفس كلمة زيد ولكن لاحظت انه ظابط ف تراجعت ف قالي وابتسامة خفيفة علي وشه
_ مينفعش
_ هو ايه
_ انك تتعصبي عليه ممكن تتحبسي
_ اسفة يا فندم بس حضرتك بتقول متهورة وانا مش شايفة كدة
_ لا كدة تبقي متهورة
_ هو انا عملت ايه علشان تقولوا كده بالعكس انا مش متهورة خالص والكل عارف اني عاقلة وراسيه
ضحك وقال
_ طيب اديني عقلك.. واحدة ذكية وجميلك وعاقلة وراسية زيك توافق علي ولد صايع علشان حد تاني و...
قولت بمقاطعة
_ حضرتك جبت الكلام ده منين ، مين قالك اني وافقت عشان حد تاني لا طبعاً
_ انا اسف لو بتدخل بس ده اللي انا لاحظته اخر مره باين ان في حاجه مع الدكتور زيد.. واضح قوي ان في حاجة لدرجة ان إسلام نفسه مستحيل ميكونش لاحظ ده ، اسمعيني انتي مينفعش تحلي مشكله بمشكلة أكبر حكمي عقلك قبل ما تاخدي قرارتك المصيرية انا اللي هقولك بردو
_...
_ انا مش بقولك تعملي ايه ومتعمليش ايه انا بقدم النصيحة وانتي حرة دي حياتك ، يلا ارجعي ولما تلاقي مكان أمن ابقي امشي ولوقتها خليكي جنب جدتك.. جنبها جنبها في نفس الأوضة مش في اوضة تانية
_....
_ يلا بقولك ، ده امر
قولت وانا بقوم من مكاني
_ حاضر
_ هترجعي علي البيت ها
_ حاضر.. متشكرة قوي
_ العفو ويارب ما نشوفك في مصيبة تانية
قولت بإبتسامة مجاملة
_ ربنا يستر
قال بإبتسامة
_ يارب ... يلا مع السلامة
_ مع السلامه
قولت كده واستدرت علشان امشي ف لقيت اسلام واقف بعيد مستنيني ف جاني صوت الظابط بيقولي
_ متروحيش معاه
_ ليه
_ هنعيد اللي قولناه تاني.. يلا علي طول علي البيت وسيبيلي ده انا عاوز اتكلم معاه
_ ليه هو كان جاي يساعدني
_ يساعدك! .. امشي يا خلود امشي بدل والله احبسك واهي تهمتك جاهزة كنتي واقفة بعيد تتفرجي واثرتي شكنا فيكي حتي اسألي العسكري
_ والله أبداً انا كنت بتفرج بس
_ طيب امشي
وطيت دماغي وقولت
_ حاضر
مشيت ولما وصلت إسلام قالي
_ كنتي واقفة معاه ليه
_ عادي ..و هو عاوزك
_ عاوزني انا
_ اه.. انا همشي
_تمشي تروحي فين
_ هرجع لتيتة
_ ترجعي لفين يامه
_ يامه!!
_معلش، زلة لسان بس هترجعي ازاي بعد اللي حصل يعني اخلود.. انا مسمحش حبيبتي واللي هتكون مراتي تقعد في بيت في واحد زي ده
_ متسمحششش ، اممم انا ماشيه يا إسلام
قولتها ومشيت علي طول علي البيت
#إسلام
ضيعت عليه كل اللي عملته بعد ما كنت خلاص قربت انهي الحوار ده علي الاخر لا وكمان دبستني مع الظابط الرخم وقعد يحقق معايا ساعة كامله ونظرات الشك مفارقتش عينه دقيقة وهو بيتكلم معايا وكأني مشبوه في جريمة من بتوعه
#بجاد
كنت في المستشفي من امبارح مع فاطمة لما جاني اتصال من بابا يقولي ان زيد اتقبض عليه ف روحت علي البيت وطلعت لشقة عمي عبيدة لقيته هو وكل اللي في البيت قاعدين متوترين ف قولت
_ ايه يا جماعه قبضوا علي زيد ليه
بصلي بدر بضجر وكره تجاهلته وركزت مع بشر اللي قالي
_ لسة مش عارفين حاجه
قال عمي
_ هتداري عنه ليه.. اتقبض عليه علشان حاول يقل ادبه مع واحده قال
_ مين ده اللي حاول يقل ادبه زيد.. طيب والله ما اشوف بنفسي ما اصدق.. وحدة مين دي وايه اللي حصل علشان يتقال كدة عليه
_ الظابط قال واحده بلغت عنه وقالت الكلام ده وادينا مستنين نشوفه ونسأله اكتر
قال بشر
_ انا مش عارف ايه اللي حصل بس اكيد التهمة دي كدب وتلفيق
_ وده رايي انا كمان .. هما محققوش معاه؟
قال بشر
_ منعرفش حاجة خدوه ومنعرفش ودوه فين
#مليكة
من اخر مره اتكلمنا فيها مخرجتش من الاوضه غير للاكل والشرب وبس وبعد ما طالت قعدتي لوحدي جت عندي الصبح وقالت
_ هتفضلي قاعدة لوحدك كدة كتير
_ ده لو مش هيضايقك يعني
_ لا مضايقني يا مليكة ، كل ده ليه علشان قولتلك متكلميش الناس دي
_ قولتي من غير وجه حق ومن غير ما تعرفيهم حكمتي عليهم انهم وحشين
_ وايه كمان
_ ولا حاجه يا ماما ، اديني سمعت كلامك وعملتلهم بلوك وحتي الكلية مروحتهاش علشان هاجر من حقي بقا اختار اقعد في اوضتي ولا لا
_هي بقت كدة ، ماشي يا مليكة ، روحي
_ اروح فين
_ روحي لجويرية بس بشرط
_ شرط اية
_ تدبريلي معاد معاهم انا عاوزه اتعرف علي الناس دي واشوف فيهم ايه علشان تزعلي عليهم قوي كده
قولت بسعادة وانا بنط من فوق السرير
_ بجد يا ماما
_ بجد... هتعرفي تدبري سبب اروح عشانه
_ سهله ، انا هكلم جويرية دلوقتي واقولها اننا جاين نزورهم
_ لا مش النهارده
_ ليه ما انا هقولها نفسها تتعرف عليكم وده سبب كويس مش لازم حجج
_ بردو مش النهارده.. بس لو روحت ومعجبونيش هتبعدي عنهم اديني بقولك
_ وربنا هيعجبوكي وهتحبيهم جداً جداً وهتقولي مليكة قالت
_ هنشوف
قولت بسعادة وانا بحضنها
_ حبيبتي يا مامي ربنا يخليكي ليه يارب.. يلا بقا اروح اشوفها
_ دلوقتي هما لسه صحيوا
_ ايوه قبل ما جويرية تروح المدرسة
#جويرية
كانت ماما في حالة وحشة بسبب خالي بجاد وبابا زعلان علشان زيد وبجاد تقريبا مشفتهوش من يومين والكل مشغول ومحدش فاضي يوديني المدرسة ف قولت لماما
_ انا هروح لوحدي
_ تروحي فين افرضي توهتي ولا حاجه حصلتلك.. انا كلمت محمد يجي يوصلك بالعربية ويجيبك
_ طيب ... هو خالي تعبان قوي
قالت بحزن
_ بيعيش اخر لحظاته
قولت بشهقة
_ هيموت
اومات ايجابا ودموعها بتسيل علي خدها ف قولت
_ ليه مش انتوا ممكن تنقذوه وميموتش
_ رافض يعمل عملية وشكله معندهوش مشكله انه يموت انا مش عارفه...
قاطع كلامها صوت رنة الجرس ف قولت
_ متزعليش ان شاءلله يشفيه ، هروح هشوف مين
قولت كده وروحت افتح ف لقيت مليكة قدامي ابتسامتها مالية وشها وهي بتقول
_ Good morning
_ صباح النور.. انتي كنتي عملالي بلوك
_ بلوك ايه لا طبعاً ده الفون وقع، انتي شكلك كنتي رايحة المدرسة صح
_ ايوه تعالي
دخلنا جوه ف قالت بعد ما شافت ماما
_ صباح الورد يا طنط
قالت والحزن لسة كاسي وشها
_ صباح الخير حبيبتي اهلا وسهلا نورتي
_ سلامتك ياطنط مالك
_ مفيش حبيبتي
قالت بهمس
_ مالها
رديت بنفس النبرة
_ خالي تعبان قوي وهي زعلانه عليه
كملت بعد ما لمعت في دماغي فكرة
_ عاوزه اقولك حاجه مهمه
_ حاجة ايه
_ دقيقة
كملت موجهه كلامي لماما
_ ماما اروح مع جويرية المدرسه ومحمد يجي ياخدني
_ ليه
_ كده
_ طيب حبيبتي روحي.. ممكن يا مليكة تخلي بالك منها ومتسبهاش غير قدام المدرسه
_ في عنية يا طنط
_ تسلمي حبيبتي
دخلت جبت الشنطة وطلعت وانا مبسوطه اني رايحه معاها من غير قيود وتركيز في كل حركة ، ولما طلعنا لقينا بدر نازل من فوق ولما شافنا وقف لثواني عينه معلقة علي مليكة وبعدين سابنا ومشي من غير ما يصبح حتي ف قالت مليكة
_ ابن عمك ده عبيط
_ عندهم مشكلة في البيت
_ مشكلة ايه
_ مش عارفه تفاصيل ، يلا خلينا نمشي علشان منتأخرش.. معاكي عربية
_ لا هنطلب اوبر
_ يعني ايه
_ يعني عربية اجره بيتصلوا بيها وتيجي لغيت المكان اللي احنا فيه
_ لا اكيد بابا مش هيوافق
_ مش هيقول حاجه يلا بس نتمشي شوية
_ ماشي
مشينا مع بعض ف قالتلي
_ كنتي عايزة تقولي ايه؟
قولت بإبتسامة
_ ريان
_ ماله
_ شوفته وكلمته
_ بجد.. شوفتيه فين؟
_ هو شغال قريب من المدرسة بتاعتي ومره شوفته معدي من قدامها
_ طيب ومين فيكم بدء بالكلام
_ انا نديت عليه
_ بتهزري
_ والله
_ احيييية يا جوجو احية ، طلعتي مش سهلة ، طيب وحصل ايه قوليلي
_ اللي قاله انه معرفنيش بس انا حسيت انه مش ناسي وشكله بيكدب
_ هو بيكدب فعلاً
_ مين قالك انتي
_...
_ مالك
_ انا اسفه بس
_ بس ايه
_ حصل كلام بيني وبين بدر الأيام اللي فاتت
_ ماشي بتتأسفي لية
_ يعني علشان لا تقولي اني...
_ انك هتاخديه مني
_ انا مش هاخده طبعاً بس يمكن انتي تفتكري كدة
_ لا مش هفكر كدة وبعدين هو مش بتاعي علشان تاخديه مني ، ونصيحة مني خدية بدر انسان كويس
_ طيب اسكتي طيب هتعصب عليكي وخليني اكملك
_ هههههه طيب قولي
_ هو اللي قالي ان ريان مش ناسي
_ هو اللي قالك كدة طيب وهو عرف منين
_ اصلهم اتعاتبوا مع بعض
قولت باهتمام
_ قالوا ايه
_ معرفش بس باين انهم مصتلحوش
_اه ، طيب وهو كدب ليه وقال ناسي من الاول
_ علشان عايز يبعد وميتكلمش في اللي حصل
_ ممكن
_ طيب وانتي ناوية تعملي ايه.. هتكلمية تاني
_ مش عارفه ممكن تيجي فرصه تانيه ولا لا
_ طيب ولو هو اللي كلمك هتردي عليه
_ انتي رايك ايه
_ رايي ان اهلك لو عرفوا بس انه قريب من مدرستك هينقلوكي
_ يعني مكلمهوش
_ كلامي مش هيفيدك بحاجة لو حابة تكلمية مش هقدر امنعك وانتي شكلك حابه تكلمية
_ يعني
_ مش يعني ، ده قوي وقوي كمان
قولت بحيرة
_ مش عارفه.. انا نفسي اكلمه بس لو هو مكلمنيش المره الجايه مش هقدر اكلمه تاني وكمان اهلي لو عرفوا هيزعلوا
_ بصي انا شايفة ان بعد اللي حصل واللي عرفتوه احتمال يكون في فرصة ليكم مع بعض ف حتي لو اتكلمتوا مره مرتين اتكلموا من غير ما حد يعرف.. اكيد في كلام كتير انتوا الاتنين محتاجين تقولوه
_ صح
اثناء كلامنا طلبت اوبر وبعد وقت جه وساعتها سكتنا علشان السواق ومشينا في طريقنا للمدرسة بعد ما احرصت اني اقعد في الناحية اللي هتمر من جنبه ولكن للأسف مشفتهوش ف رجعت اتعدلت في مكاني بوش عابس ساعتها مليكة فهمت وقالتلي
_ هنا
اومات ايجابا ومتكلمتش وكملت طريقي للمدرسة وهي رجعت تاني
#ريان
قصدت اختفي في الوقت ده علشان ده معادها مكنتش عايز اوجع قلبي وانا عارف ان مفيش فايدة ومع كدة استنيت دقايق ورا السور يمكن اشوف عربيتهم معدية والمحها ولكن مشفتهاش ف رجعت مكاني وقعدت علي الكنبة وفجأه وانا بفكر وعقلي مشغول بيها جاني صوت مليكة بتقولي
_ صباح الخير يا ادم ولا نقول ريان
بصتلها ف قالت وهي بتتقدم ناحيتي
_ عامل اية
_ تمام.. انتي ايه جابك هنا
_ كنت بوصل جويرية للمدرسة
شيحت بنظري تهرب من نظراتها بعد ما توترت من سيرتها ف قالت
_ تبقي فاكرها.. وفاكر كل حاجه
_...
_ إيه لسه هتنكر
_ لا... فاكر وفاكر انك انتي السبب في كل اللي حصل
_ وانا بردو السبب في نشر قصتك.. غلطت وكفرت عن غلطي
_ قصة واحده واتحرق قبالها 200 قصة تعبت فيهم سنين
_ متلومش عليه في دي.. ولا تلوم عليه في معرفة اهل جويرية باللي حصل كده كده كانت كل حاجه هتبان.. لوم علي نفسك انك اتجهت للمخدرات
_ ست سنين بلوم نفسي مش كفاية لوم
_ لا كفاية قوي .. انت كده ارتحت من كل اللي كان مضايقك تقدر تبدء من جديد
_....
_ انت موهوب ومش هتلاقي صعوبة انك توصل موهبتك دي بكتابات جديدة يمكن وقتها يكون ليك نصيب مع جويرية
_ جويرية خطيبت بدر
_ لا ماهما فشكلوا ، كل حاجه بينهم انتهت وزائد ان جويرية بتحبك انت
_ بتحبني انا؟.. مين قالك
_ هي بنفسها ومش بس كدة دي رجعت تكمل تعليم بعد ما قرت قصتك عنها
جحظت عينيه بصدمة وانا بقول
_ هي قرتها
_ ايوه بدر بنفسه ادهالها تقراها
_....
_ حاول تنجح ، اصل مبقاش مستحيل انها تكون ليك.. اه وقبل ما امشي هي كمان عرفت انك مش ناسي وبتمثل .. باي
قالت كده ومشيت وسابتني تايه ومتوتر لغيت ما جه عاصم وقالي
_ هي عرفت عنوانا منين
قولت بتوهان
_ جويرية قرت القصة
_ قصة ايه... اه قصتك عنها.. طيب وفيها ايه
_ فيها انها عرفت كل حاجه كتبتها عنها
_ طيب وفيها ايه بردو ما ده كويس
_ اصلي كنت فاكر ان كل حاجه انتهت
_ يمكن ربنا اراد انها تكون ليك ، ايه الغباء ده ماهي مخطوبه صحيح وكمان لصاحبك
اتنهدت براحه وقولت بعد ما لاحة ابتسامة علي وشي
_ لا ما خلاص مبقتش خطيبته ، وهي بتحبني انا .... والقصة ، مكنتش حابب انها تقراها بس طالما قرتها وبدر سابها يبقي لسة الحكاية منتهتش
كملت محدث نفسي
_ جايز تكون هي دي المشاكل اللي هتحصل قبل ما تكون من نصيبي ليه لا
رجعت بصتله وقولت بحماس
_ عاوز ورقة وقلم
_ ليه
_ هات بس
#جويرية
بعد ما خرجت للفسحة واتجهت لأبعد زاوية في حوش المدرسة وقعدت شوية وقعت عيني عليه وهو واقف عند المدخل ساعتها قومت بلهفه وبقيت واقفة مكاني عيني عليه لغيت ما شوفته بيمشي بعد ما ابتسملي ف روحت بسرعه هناك ولما وصلت لقيته واقف علي بعد مسافة عشر امتار جمب شجرة كبيرة متفرعه حط ورقة بين فرعين كبار وحط عليها حجر ورجع يبتسملي وكأنه بيقولي ان الورقة دي ليه وبعدين مشي ف بصيت حولية وانا حاسه بضربات قلبي بتزيد وخايفة اني اتقدم خطوة ولكن قدرت استجمع شجاعتي و مشيت ناحيت الشجرة وبعد ما وصلت واتاكدت ان مفيش حد شايفني خطفت الورقة وكملت ناحية محل قريب جبت منه علبة بسكوت ورجعت علشان محدش ياخد باله اني خرجت لسبب تاني ورجعت للمدرسة دخلت الحمام وفتحت الورقة بتلهف وبدات اقراها بتركيز شديد لقيته بيقولي
_ تناسيت كل اللي حصل ونسيت منظري الزبالة بعد ما اتضربت قدامك ومقدرتش ادافع عن نفسي ومترددتش لحظة علشان ابعتلك الرسالة دي بعد ما عرفت انك قريتي القصة اللي كتبتها عشانا وبعد ما عرفت انك رجعتي المدرسة عشان اللي كاتبه فيها عنك واللي فرحت قوي انه كان سبب لرجوعك لتعليم ولبناء مستقبلك اللي ضاع بسببي لسنين ، ولكن اللي شجعني اكتر من السببين دول اني عرفت انك بتحبيني بعد كل اللي حصل وتوقفي بيني وبين الموت اللي المفروض كان عقاب علشان اللي عملته معاكي .. واختصار لكلام كتير اخد فيه عمر كامل عشان اقوله ، انا مش بتغزل ولا ببعتلك جواب زي المراهقين انا بس عندي سؤال واحد وياريت متحرمنيش إني اعرف اجابته عشان هيفرق معايا جداً و هو .
ليه مكرهتنيش بعد اللي عملته معاكي واللي انا عارف انه دمرلك حياتك ونفسيتك وضيع عليكي احلي سنين عمرك ، ايه الكويس فيه شفعلي بعد كل دة .. اجابتك ممكن ترجعلي طاقتي اللي خسرتها بسبب اللي حصل وممكن تديني الحماس اللي يخليني احاول انجح في حياتي واستغل نجاح القصة اللي نزلت واكمل .. هفضل مستني ردك متبخليش عليه بيه..
نزلت دموعي وانا بقرا رسالته وقررت اكتبله الرد مهما يحصل وانا متناسية كل حاجه حصلت وبعد ما انتهي وقت المدرسة رجعت البيت مع السواق وملقتش اي حد منهم ف دخلت اوضتي رميت الشنطة ومسكت قلم ودفتر وبدأت اكتبله
#بدر
كنت في القسم انا وبابا وبشر بنحاول نعرف من ظابط قمة في البرود مكان زيد ومقالناش حاجة ، وكل عمله انه قدر يثير غضبي وكنت متمني اضربه وفي الوقت ده مليكة بقت تتصل قفلت عليها مرتين وفي المرة التالتة بعدت وقولت بنفرفزة
_ في ايه
_ انا اسفة اني بتصل كتير ، بس حبيت اوضحلك ان ماما وافقت اشوف جويرية ومكدبتش عليك لما قولتلك ان....
قولت بنرفزة مقاطع كلامها
_ يقطع جويرية وسنينها انا مالي.. انا مش فاضي دلوقتي سلام
قولت كده وقفلت السكة ورجعت عند بابا وبشر لقيت الظابط بيقولهم
_ انا بقولكم امشوا مش مسموحلي اقولكم علي اي حاجة
قولت بنرفزة
_ يعني ايه مش مسموحلنا هو مقبوض عليه في قضية امن دولة ولا مخبرات احنا عايزين نشوف زيد اتصرف كلم حد
قولت كده ف قام وقال وهو بيضربني بالقلم
_ بتعلي صوتك عليه يلاااا وحيات امك لا اوريك
ضميت قبضتي وكنت هرزعها ف وشه ولكن بشر منعني هو وبابا ف قال
_ يا عسكري خد الواد ده علي الحجز
قال ابوي
_ لا يافندم انا بعتذرلك عنك هو بس زعلان علي اخوه لو سمحت سامحه
جيت اتكلم ف حط بشر ايده علي بوقي وقال
_ اسكت
قال الظابط بعد ما اتقدم نحيتي اكتر
_ هو نفسه يتحبس احرمه ليه
قال بشر
_ يافندم شاب متهور حقك علينا.. امشي قدامي
زقني قدامه وخرجني بالعافية ف قولت بنرفزة
_ بتطلعني ليه
قال بابا
_ اكتم جك قطر.. جاين نطلعوا واحد ندخلوا التاني قدامي علي البيت خلفت الندامة كلكم.. امشي
#فاطمة
كنت قاعدة جنبه ودموعي بتسيل من غير توقف وانا ماسكة ايده أثناء نومه وقلبي بيتمزق من حزني وخوفي انه يموت في اي لحظة وفي الوقت ده جه بجاد حط ايده علي كتفي وقال
_ كفاية يا فاطمة مش معقول كدة
كمل وهو بيوقفني قدامه
_ تعالي ، ادعيله وهو هيخف ويكون كويس
قولت ببكاء
_ انا خايفة يحصله حاجة ده انا ممكن اموت وراه
قال وهو بيحضني
_ بعد الشر عنك وعنه متقوليش كده
بعدني عنه وكمل وهو ماسك وشي بين ايديه وبيمسح دموعي
_ هيخف ويرجع البيت ومش هتتحرمي منه.. ادعي انتي بس
_ يارب
_ ايوة كدة قولي يارب واهدي شويه.. وتعالي لازم تاكلي انتي مكلتيش حاجة
_ مليش نفس لحاجة
_ لازم تاكلي علشان تكملي.. يلا تعالي
خدني من ايدي وقبل ما نطلع بص لسلسة وقال
_ السلسلة مفتوحة
قولت وانا بدخلها جوه هدومي
_ نزلت انا ونايمة
_ مش مشكلة بعدين اخدها ونشوف صايغ يظبط قفلها.. يلا
#زيد
بعد ساعات وانا في الحجز خرجوني و ودوني عند الظابط وهناك شوفت الست اياها قاعدة وبتبكي بقيت باصصلها وحاسس بفوران دمي وانا بفتكر اللي حصل وفجأه اتقدمت ناحيتها وقولت بغضب
_ هو انتي
قولتها ف وقفني العسكري وهي قامت من مكانها ورجعت خطوات لورا وهي بتدعي الخوف والظابط خبط علي المكتب وقال
_ انت تخرس خالص.. كمان هتضربها هنا ، في القسم ، ده انت نهارك مش معدي
بصلها وقال
_ هو ده
قالت ببكاء وهي بتلملم نفسها
_ اه هو ده يا باشا
قولت
_ انا ايه يابت ال....!!!
أشر للعسكري ف ضربني قلم علي وشي وقال
_ لو سمعت حسك هعجنك ، متتكلمش غير لما اطلب منك
كمل موجه ليها الكلام
_ اقعدي واحكيلي اللي حصل بالظبط
52
#وفاء
لما جت كاريمان قالتلي انه كلمها و وصلتلي رسالته ليه بأني ارفض جوازي من حامد اتضايقت جداً وحسيت انه بيلعب بيه ، وقولت طيب منين رفضني ومنين مهتم ارفض حامد ولا اتجوزه شاغل نفسه بيه ليه وعاوز يوصل لايه ف خدت منها التليفون واتصلت بيه ، وبعد ما كنت هنفجر فيه واقوله كل اللي مضايقني وجارحني حسيت صوتي واقف بين حنجرتي مش قادره اتكلم ، ف بقا يقول
: الو ، وفاء؟! ، انتي وفاء صح
طال سكوتي وانا بكتم شهقاتي بأيدي ومتكلمتش غير لما كاريمان كانت هتاخد التليفون ف بعدت ايدها وقولت
_ ايوه انا ، نعم عاوز ايه مني ، مالك انت ارفض ولا اقبل
: انا عاوزك ترفضي عشان اخوكي عاوز يجوزك انتقام مني انا ، يعني جوازتك دي بسببي
_ لا مش بسببك انت بعيد عننا ، انا موافقه علي حامد وهتجوزه بكامل رضايا علي الأقل متمسك بيه بقاله سنين
: ماشي مبروك اتمنالك كل خير ، انا بس اتكلمت لما اخوكي رد عليه وقالي هيجوزك ، كان بيقولها كأنه بينتقم مني فيكي
_ عشان عبيط ، ميعرفش اني مش مهمه عندك اتجوز ولا لأ
سكت ف قولت
: ساكت ليه
قال بتنهيده
: مين قالك انك مش مهمه ، بالعكس مفيش اهم منك عندي
قولت ببكا
_ لا ما انا عرفت ، مهمه جداً ، بس تعرف انا استاهل ، مكنش لازم لساني يفلت واعمل نفسي مضحيه وهقبلك باي شكل ، طلعت غبيه ورخصت نفسي وبس
: متقوليش اكده ، والله أبداً انا حبيتك وكنت بتمني تكوني ليه ، بس انا قولتلك اسبابي ، مرفضتكش عشان مش عاوزك ، انا رفضت علشان مصلحتك
_ مش مهم انا غلطت وهدفع تمن غلطي اهو ، اطمن ومتشغلش بالك بيه تاني
: وفاء!
_ نعم
طال سكوته قبل ما يقول
: صدقيني انا حبيتك مكنتش بجاملك لما قولتلك وانا كمان ، وعمري ما حبيت غيرك ، بس الموضوع اكبر مني ، مش بيدي
_ لا بأيدك ده لو كنت صح بتحبني ، انا طلبتها منك وقولتلك مش مهم اي حاجه ، مش عاوزه غيرك وانت رفضت واتخليت عني ، ف سيبني بقا اوجه مصيري
قولت كده وقفلت واديت التليفون لكريمان واتجهت ناحية الباب مش عارفه رايحة فين ف وقفتني وقالت
: رايحة فين استني
_ سيبيني دلوقتي
: يابنتي اسيبك ايه رايحة فين
بعدت ايدها وقولت
_ سيبيني بقووولك
فلت ايدها وطلعت من الاوضه واتجهت ناحية الباب عشان اخرج بعد ما حسيت نفسي بيضيق من البيت وعاوزه اخرج اشم شوية هوا ف لقيت بيجاد بيسبقني ويقف في طريقي ويقولي
: رايحة فين
_ خارجه اشم شوية هوا مخنوقه!!!
: لما تجوزي هتخرجي براحتك ارجعي
_ بيجاد بقولك مخنوقه
: ارجع بقولك
بقيت واقفه قدامه ابصله وانا مش مصدقه ان ده بيجاد اكتر حد المفروض بيحبني وفاهمني اكتر من نفسي ف قولت بعد ما نزلت دموعي
_ انت بتعمل فيه كده ليه حرام عليك ده انا وفاء ، اختك
قال بسخريه
: ايوه طبعاً اختي وعلشان كده مش هخليكي تطلعي قبل الفرح ، ارجعي بمزاجك بدل ما ارجعك غصب
قال كده ف وقفت قدامه دموعي بتسيل علي خدي لغيت ما جت كاريمان خدتني ورجعتني للاوضه ولما جت تحضني بعدتها وقولت بصوت مخنوقه
_ مش عاوزه ، ابعدي هنام
: وفاء حبيبتي اهدي عشان خاطري
: عاوزه انام اطلعي بره وسيبيني.، اطلعي بره بقولك
خرجتها وقفلت الباب ورجعت قعدت علي السرير ومقدرتش اوقف دموعي لحظه لغيت ما نمت
#ورد
بعد ما رجعنا بيومين عدوا في التعامل زي ما يكون اخوات جه عندي وانا بنوم العيال وقالي
: ناموا؟
قولت بصوت واطي
_ ايوه
: طيب تعالي عاوزك
_ حاضر
قومت من جمبهم وروحت قعدت عنده في الصال وقولت
: ايوه
_ العيال تعبينك
: لا أبداً مش تعبيني ولا حاجه
_ انا عارف انك متحمله مسؤليتهم وانتي مش من مسؤليتك تعمليليهم حاجه ، وعشان اكده انا فكرت ادور علي واحده تراعيهم
: ليه وانا اشتكيتلك
_ مش محتاجه تشتكي انا عارف اللي فيها
: له معرفش ، انا عاجبني ، مفيش واحده هتراعيهم غيري ، ولا انت بتقولي امشي عاد
_ لا مش هتمشي هي هتراعيهم وانتي هتكوني ست البيت
قولت بنرفزه
: لا مش عاوزه اكون ست بيت انا عاجبني اكده
_ طيب خلاص انتي متعصبه ليه
: لا متعصبه ولا حاجه ، هتتعشي ولا ادخل انام
قال بابتسامة
_ تعالي اهنه يا ورد
: له انا مرتاحه اهنه
قام وقعد عندي وقال وهو ماسك يدي بين كفوفه
_ ايه مزعلك
_ مزعلانش
: اكده مزعلاناش ده انتي شوية وهتنطحيني
_ يعني انا بقره
: له جاموسه
مردتش باي كلمه وديرت وشي عنه ف رجعني ليه وقال
_ متزعليش بهزر معاكي ، و انا اهو فضيت وتقدري تسالي وانا اجاوبك ، واول سؤال انا اتسألته قبل اكده ومقدرتش ارد عليه ساعتها علشان حالتي مكنتش تسمح ، بس دلوكتي بقت تسمح وبقولك اني ايوه بحبك انا محبتيش غيرك اصلا
: ايوه علشان اكده كل شويه تتغير وتبعد من غير سبب
_ كيه من غير سبب ، يا ورد انا كل الاسباب اللي بعدتني عنك لولا اني بحبك كان سبب واحد منهم كفيل ميخلناش نشوف بعض تاني
: وايه هي عاد الاسباب دي
_ جاهزة تسمعيها كلها يعني
: معاك لصبح
ابتسم وقال
_ ماشي ، اول سبب انك كنتي غجريه وانا مكرهش في حياتي كد الغجر والجواز منهم عار اصلا ... اممم بالمناسبة قبل ما أكمل ودي مش هحاسبك عليها مهما تكون اجابتك
: ايه
_ يعني انا اعرف ان الغجر او حريمهم بـيكون ليهم تعامل مع الرجاله جريء شويتين ف... ولا اقولك خلاص انسي ...
: لا مش خلاص انا فهمتك ، بس له محدش لمسني ، كتير حاول بس مقدروش ، انا لسه سليمه
ظهرت ابتسامته وهو بيقولي
_ زين قوي ريحتيني
: طيب لو مكنتش بت بنوت كنت هتقول ايه
_ كنت هتضايق بس مكنتش هقول حاجه انتي جايه من عالم كل الممنوعات فيه مسموحه المهم اللي جاي
: مين قالك اكده ، الحاجه دي بذات بيتحاسبوا عليها ، وفين تلاقي واحده عملت حاجه مع راجل من غير جواز
_ لا ياشيخه
: ايوه والله ، احنا مسموح عندنا السرقه ، الرقص ، السحر ، ضرب الودع اكده بس الحاجات دي بنتحاسبوا عليها وفيها دبح كمان
_ ايوه مش عارف عاد ، اهو سمعتهم مش حلوه وخلاص
: مش كلنا
_ انتي مدخله نفسك امعاهم ليه انتي مش غجريه
: ايوه قصدي مش كلهم ، وبعدين متنسنيش وكمل
_ ماشي ، كنت بقول إيه ، ايوه كنت بقولك كونك غجريه ده لوحده كان من سابع المستحيلات يخليني افكر فيكي بس لما شوفتك واتكلمت معاكي ولقيت ان تفكيرك غير باقي الغجر وسابق لسنك وشوفت شكلك اللي يشبه للعيال الصغيره اتشديت ليكي ، وبردك كونك غجريه كان يمنع اني افكر اتجوزك.
و شوفي سبحان الله لما تطلعي مش غجريه وممكن اتجوزك تطلعي اخت مرتي يعني متحرمه عليه بتلاته وكمان يزيد عليه كلام ابوي عن جوازك من شبل ، كلها أسباب تجبرني ابعد مع كل الحب اللي في قلبي ليكي
_ طيب وبعدين ، بعد ما ماتت دعاء ومن غير تخطيط مكنتش عايز تجوزني ليه وبقيت تزعق مع ابوك
ساب يدي وقال بتنهيده
: اهو السبب ده بذات لسه تاعبني ومش عارف كية ممكن اعتبرك مرتي عشانه
_ ليه
قال بعد سكوت وهو بيفرك في صوابعه
: بعد موت دعاء جاني بشر يقولي ، قال هتجوز خالتي يابوي قولتله مين قالك اكده ، قالي امي قالت انك مش مستنيها تموت علشان تجوز خالتي ، وقتها حسيت كاني انا اللي قتلتها وكنت متمني اي طريقة اقولها بيها ان عمري ما اتمنيت موتها حتي لما قابلتك وحبيتك وكان جوازي منك مستحيل عشانها بردو متمنيش دقيقة انها تموت
_ هي قالت اكده
: ايوه وهو ده السبب اللي خلاني ابعد عنك بعد ما اتجوزتك
: ايوه حقك ،وانا مش هقولك انسا، لان انا كمان حسيت بالذنب بعد ما ماتت ، بس انا بردك عاوزه اعرف ايه كوني في حياتك ، عاوزني اربي العيال وبس ولا عايز ايه
_ لا طبعاً انا عاوزك مرتي وقولتلك اجيب للعيال واحده تراعيهم انتي زعلتي
: لو جبتلهم هفهم انك معوذنيش
_ انا فكرت اجيبلهم علشان عاوزك ليه انا وبس متشغليش عني دقيقة
ابتسمت ف قال
: انا عاوزك مرتي وحبيبتي وام عيالي الجداد كمان بس..
_ بس اييييه تاني
: بس مش دلوك ، هأجل اي حاجه لبعدين
_ براحتك وانا مش هقولك حاجه ، بس ايه السبب
: لما بدر يتجوز
_ مش فاهمه ، بس ماشي لكن بدر ناوي يتجوز
: له حالف علي الجواز ومش عايز يتجوز خالص بس هحاول امعاه
مردتش ف قال
: انا عارف اني ملخبطك بس انا مش عايز اتجوز تاني ولا اكمل جوازنا غير لما هو يتجوز
_ ليه ، مانت متجوز مش ناقص الا حاجه واحده واحنا مع بعض في نفس البيت
سكت ف قولت
: انا مش هقولك حاجه بس عاوزه افهم السبب
قال بتنهيده
_ السبب اني انا غلطت في حقة غلط كبير قوي وهو مش عايز يتجوز علشان الغلط ده
: غلطت في حقة كيه... في ايه يا عبيده
طال سكوته قبل ما يقول بتردد
_ مش عارفه ابدء منين ، بس زمان لما هو اتجوز كان في غيره من نحيتي ، ف....
: ايوه
_ كنت متضايق منه او بغير مش عارفه بس كنت عايز آأزيه وخلاص ، ف بقيت احطله ادويه تمنع الخلفه وتقتل العيال عنده من غير ما يعرف ولغيت دلوك ميعرفش
شهقت بصدمه وانا بسمعه ف قال وهو منزل جفونه
: ومش بس اكده ده انا دفعت فلوس لدكتور المعمل وخليته يديلو تحليل لواحد معندهوش امل في الخلفه ولو لحاجة بسيطه ف هو بعد ما ماتت مرته قال مش هتجوز تاني ، ابوي وامه حاولوا معاه وهو رفض وبعدين بقيت انا وشبل نحاول امعاه ف زعل قوي وقال لو حد كلمه في الموضوع ده هيخسره
_ يعني هو يقدر يخلف ولا الدوا اللي كنت بتدهولوا خلاه ميقدرش
: الدوا اللي كنت بدهوله كان مفعوله وقتي مش دايم ، فتره وبيروح مفعوله ويقدر يخلف
_ حرام عليك يا عبيده كيه جابك قلبك تعمل في اخوك اكده
: اللي حصل عاد ، كان زلة شيطان وراحت لحالها ، بس ده سر محدش يعرفه اديني بقولك اهه
: من غير ما تقول بس افرض موافقش يتجوز هتفضل ساكت متقولهوش
_ هحاول مره واتنين اخليه يكشف او يتجوز ولو مقدرتش هضطر اقوله
: طيب ما تقوله دلوك يمكن يسامحك
_ لا مانتي مش فاهمه ، انا مش بس حرمته يخلف وكمان بقيت اعايره لسنين هنته بكلامي كتير قوي ، ف مش سهل اقوله
: صح ده لو عرف هيزعل قوي
_ ايوه فعلاً وده اللي انا خايف منه ، بس ان شاءلله اقدر اخليه يوافق يتجوز او يكشف وقتها مش هحتاج اقوله
: ان شاءلله هيوافق
_ ان شاءلله ، ها قوليلي عاد إيه رأيك فيه دلوك اتصدمتي مش اكده
: شوية بس ادام انت ندمت وبتحاول تصلح غلطك ف انا مش زعلانه
_ مانتي طبيعي متزعليش ، ايه يزعلك انتي ، انا عايز اعرف رايك فيه ، شيفاني كيه
قولت بإبتسامة
: شيفاك سيد الرجاله
_ لا ياشيخه
: والله
_، شيفاني سيد الرجاله علشان عملت اكده في اخوي
: له علشان عندك ضمير يأنبك
_ بس مكنش الضمير ده عندي ، او كان وكان بيأنبني بس كان رد فعلي عكسي ، مكنتش اطيق احساسي اني غلطت في حقة ف كنت بزيد في الغلط
: انسي اللي فات المهم اللي جاي ، حاول مع اخوك علي قد ما تقدر ولو موافقش قوله والحق نفسك قبل ما العمر يجري ويخسر فرصه للخلفه والجواز وتعيش باقي عمرك متحمل ذنبه
_ عندك حق ، اكيد هعمل اكده بس لو موافقش
: ربنا يكرمك
_ يارب ، المهم دلوك انتي ايه قولك في كلامي
: ما انا بقولك المهم اللي جاي
_ اقصد ف اننا نأجل كل حاجه لغيت ما يتجوز او اقوله الحقيقه
: ماشي المهم تكون جمبي من غير زعل ولا مشاكل
رجع يمسك يدي وقال
_ عمرنا ما هنزعل تاني ، وبعد ما يخلص موضوع بدر هتجوزك من اول وجديد هعملك فرح وكوشه وشبكه ومهر وكل حاجه
قولت بإبتسامة
: صح
_ صح
رفعت يده وحبيتها ف ضمني لصدره وقال
: ربنا يخليكي ليا ويقدرني اعوضك عن كل حاجه
_ عوضي انك تفضل جمبي
: ما انا عارف عبيده واحد ملهوش تاني عمرك ما تلاقي عوض زيي هههه
_ هههههههه صح
#طارق
حامد كلمني وبقا يوصفلي في شكل وفاء وهي بتشتري الفستان والحزن اللي ماليها وبيشوفه كل ما يروح عندهم ، وحكالي كتير عن عدم صبره في انتظار يوم الفرح علشان ينتقم منها ف قولت بعد ما اتنرفزت منه
: ايه كمية الحقد دي يابني ، معقول كل ده علشان مش عاوزاك
_ كمية الحقد دي من عاميلها انا عمري ما حبيت حد زيها كنت مستعد اموت عشانها وهي قابلت كل ده بالاهمال والبعد والخيانه ، هو انا انسا انها كانت بتكلمك وبتكلم بدر وهي اسمها خطيبتي
: حامد يا حبيبي ، هي قالتلك مش عاوزاك وقبل كده انت بقيت سنين تشتكي من عدم حبها ليك انت بنفسك قولتلي عمرك ما سمعتها منها ، ف خاينه ازاي ولا انت ناسي انك باعتني ليها علشان تطلع الاشاعه دي عليها ، صدقت نفسك
_ بقولك إيه انت بقيت تضايقني اقفل
: استنا يا حامد
_ عايز ايه
: عاوزك تراجع نفسك ، فكر علشان خاطري ، مهما كان اللي عملته ميستحقش اللي ناويه ، بلاش دي طيب افتكر اختك
_ لا مش هراجع نفسي ولا هفتكر حد ، لو زعلان عليها تقدر بعدين تجوزها وتصلح غلطك
: يابني افهم
_ اااافهم انت انا مش هسيبها غير لما ادفعها تمن كل اللي عملته معايا وانا بحذرك يا احمد انك تحاول توقفني
: لا اوقفك ولا توقفني انت حر سلام
قفلت معاه وقعدت شوية افكر ممكن اعمل ايه ، اوقفه ازاي من غير ما يزعل ومن غير ما اقول ل وفاء اللي عملته ، فكرت كتير وملقتش غير اني اكلمها يمكن اقدر احذرها بطريقة تاني وفعلا اتصلت بيها ف جاني صوت واحد بيقول الو ولما بقيت ساكت قالي
: عرفتك ، لو مبعدتش عنها والله هقتلك يا بدر اديني حذرتك
قال كده وقفل بس بعد ما فهمت ان بدر بيحاول يكلمها بس مفهمتش ليه حد تاني بيرد بدالها معقول يكون اخوها خد التليفون منها.
ومر اليوم كامل وانا في الشغل ودماغي مشغوله بموضوعها وخاص ان الفرح قرب جداً مش فاضل غير اربع ايام ولو معملتش حاجة واتصرفت بسرعة حامد هيكمل الخطة بتاعته ، وبعد تفكير ف حل قررت اخطفها كام يوم ف خدت اجازة و روحت القاهرة واول حاجة عملتها اني روحت هناك علي طول وبقيت واقف ومستنيها تخرج لساعات ولما مطلعتش ولا بصت من الشباك مشيت اوكلفت حد يراقبلي البيت اربعه وعشرين ساعة ولما يشوفها خارجه يمشي وراها ويقولي رايحه فين
#بدر
كنت واقف كالعادة عند البحر افكر في وفاء واللي بيحصل معاها و ناسي شبل لساعات وبعد ما افتكرته رجعت قوام وانا في الطريق بقيت ارن عليه ومفيش رد قولت يمكن نام بس بردو كنت قلقان لأن هو نومه خفيف وتلفونه جمبه يقدر يطوله ف مشيت بسرعه مرور ب محل عم محمد ورميت عليهم السلام هو وعبيده وكملت طريقي لشقة ودخلت عند شبل لقيته واقع ومزنوق بين الكرسي والسرير والكوميدينو وثابت علي نفس الوضعيه اللي هو فيها ومش قادر يتحرك ودموعه بتسيل والعجز والحسره علي نفسه ماليه وشه وقتها حسيت بخنجر بيضرب في قلبي وضميري أنبني علشان سيبته اكده وانا عارف ان مفيش حد جمبه ف جريت عليه بعدت الكرسي ورجعته لسريره وقولت بعد ما نزلت دموعي
_ حقك عليه
خبي عنيه بيده وقال ببكا
: انت ملكش ذنب في حاجه ، ومش مطلوب منك تراعيني
ضميته لحضني وقولت
_ متقولش كده ، حقك عليه ياخوي ، مش هسيبك تاني أبداً
قولت اكده ف لقيت عبيده داخل وبيبصلنا بقلق وهي بيتقدم ناحيتنا ويقول
: ماله شبل
_ وقع
قعد جنبه الناحية التانيه وقال
: سلامتك ، ايه وقعك
_ كنت بحاول امسك الكرسي و وقعت
: طيب ومكلمتنيش ليه دقيقة وكنت هكون عندك
_ محبتش اعطلك
: تعطلني عن إيه يا ما بارد افرض كنت اتعورت
سيبتهم يتكلموا وطلعت قعدت في الاوضه التانيه مش قادره اوقف دموعي ولا اشيل شكله من بالي وهو مزنزق في حته اقل من نص متر وبيجاهد عشان يقوم ومش عارف وبعد دقايق جه عبيده وفتح عليه الباب ف مسحت دموعي قوام وقولت
_ في ايه
قال وهو بيتقدم عندي
: مفيش ، لقيتك مشيت وسيبتنا ف جيت اشوفك
قولت وانا بدير وشي
_ قولت اسيبكم مع بعض
قعد جمبي وقال
: انا عارف انك زعلان ، بس انت ملكش ذنب هو وقع وحده متلوش نفسك
_ امال الوم مين ، عارف انه مبيقدرش يتحرك ومش هيقدر يزقي نفسه ميه وبردو مشيت وسيبته لساعات
: يعني هتفضل اربعه وعشرين ساعة جمبه ، انا بقول نجبله ممرضه
_ تقعد كيه الممرضه لوحدها في بيت في راجلين له مش هنجيب ممرضا
: بلاش ممرضه احنا نشوفله واحده من مركز رعاية هو اصلا مش محتاج تمريض محتاج حد يشوف طلباته وبس
_ وهي بتاعت مركز الرعاية دي مش مره بردو
: ايوه بس ده شغلها ، وافق انت مش هتفضل جمبه طول اليوم
_ قولت له انا هفضل جمبه مش هسيبه
: وهو مش هيجي يوم وتشتغل وغصب عنك هتسيبه
سرحت في كلامه ف قال
_ فكر فيها هتلاقي ان عندي حق
: خلاص لما انوي اشتغل اشوف
#عبيده
اللي حصل اداني فكره عشان اجوزه او حتي يغلط امعاها من غير جواز المهم يخلف وهي اني اجيب واحده حلوه ومش متجوزه يمكن تعجبه بس للأسف قال لما انوي اشتغل ومعرفش هينوي ميته وده الكلام اللي قولته ل ورد ف شهقت وضربت علي صدرها وقالت
: عاوز اخوك يغلط مع واحده يا عبيده
_ بسسس هو يغلط ، ده مؤدب زياده عن اللزوم ، ده انا بفكر اقفل عليه مع اي واحده يمكن شيطانه يوزه
: ياموري يا عبيده بتقول ايه عيب
_ انتي مفهمنيش ، انا مش قصدي يغلط قلت ادب مني ، انا بس عاوزه يخلف باي طريقة
: بردك مش اكده
_ ماشي انا بقترح مع نفسي، وده احتمال ضعيف جدا ، له ضعيف ايه ده احتمال مستحيل، بدر ميغلطش ابدا حتي في منامه بقولك مأدب
#حامد
كنت في المكتب لما جاني اتصال من الولد اللي بيراقب بيت ابو وفاء وقالي انه شاف احمد من شويه واقف وبيبص علي بيتها ف قفلت معاه واتصلت ب احمد ومكنتش ناوي اقوله عرفت انه رجع من اسكندريه واشوف اذا هيقولي ولا هيخبي عليه ولما رد قولت بإسلوبي العادي معاه .
: إيه يابني انت زعلت ولا ايه
_ لا ازعل من ايه يا باشا ، انت صاحبي مزعلش منك
: امال قفلت ومفكرتش تصبح حتي
قال بسخريه
_ أبداً سايبك تجهز لفرحك ، محبتش ازعجك
: بتتريق؟!
_ ايوه طبعاً بتريق ، ولا انت شايف ان في فرح بجد
: اممم ، سيبك ، قولي انت فين دلوقتي
_ في الشغل ، بتسأل ليه
: عادي ، اصل شكلك فاضي ايه مفيش حد قتل ، ولا حتي سرق
_ في لسه مخلص مع متهم وطلع عيني ومعترفش
: صعبت عليه والله ، اطحنه يا حبيبي وهو هيعترف بلاش قلبك الرهيف ده
_ هطحنه حاضر ، هعمله شاروما
: عااش يا وحش ابقي اعزمني بقا
_ عنيا احلي شاورما بني ودمين لعيونك
: هههههههه طيب ، بس المهم تبقي تقولي اعترف بعد ما اتعمل شاورما ولا اجيلك اخليه يعترف ، اصل حبيبك مش سهل بردو
_ انت هتقولي ما انا عارفك ، قولي بقا بتعملي ايه علي كده
: ولا حاجه قاعد
_ عندك وقت تقعد
: برتاح شويه وهقوم اشوف باقي التجهيزات
_ اه ، طيب وهي بتجهز معاك ولا ايه
: ايوه ، وانا وهي رايحين نلف علي المولات ونشتري الحاجات الناقصه كمان نص ساعة
_ رضيت عنك ولا ايه
: لا طبعاً هي مجبره تيجي معايا غصب عنها
_ اها ، تصدق بالله ما في حاجه مزعلاني غير التكاليف اللي هتترمي علي الارض دي
: فدا لأني ازلها حتي لو هدفع كل اللي حيلتي
_ حقك طبعاً
: اها ، شايفك راضي ، اقتنعت بكلامي ولا ايه
_ لا بس خرجت نفسي من الحوار ده ، انت حر
: ايوه كده تعجبني ويلا بقا علشان يدوب الحق اروحلها
_ انتوا هتروحوا فين
: هنلف علي المولات بقولك
_ اه طيب
: في حاجه
_ لا مجرد سؤال
: اهااا ، طيب ياحبيبي باي هكلمك تاني
قفلت معاه واتصلت ب بيجاد وطلبت منه يخليها تيجي معايا نشوف الحاجات الناقصه مع ان مفيش حاجه ناقصه بس كنت عاوز اعرف احمد ناوي يعمل ايه وبعد ما قفلت معاه رجع يكلمني ويقولي مش هتقدر تخرج النهارده ف بقيت الح علية عشان يقنعها ف قالي هشوفها تاني والمره دي نجحت وكلمني قالي هتيجي ف روحت لبيتها وخدتها وركبت جمبي في العربيه وبقت ترد علي قد السؤال وبس لغيت ما وصلنا المول
# وفاء
بعد ما وصلنا قالي
: انتي باين عليك تعبانه
_ شوية صداع
: الف سلامة عليكي ، طيب هجبلك حاجه تشربيها
_ لا مش عاوزه
: دقيقة وراجع
_ مش عاوزه
مردش عليه وسابني ومشي وانا وقفت مكاني ابص حولية بملل لغيت ما سمعت حد بيبسبس ولما بصيت ورايا اتفاجأت ب طارق ف رجعت بصيت حوليه ولما ملقتش حامد راجع روحتله بسرعه وقولت
: انت هنا
_ ايوه ، ازيك عامله ايه
: تمام ، فينك كل ده ، اختفيت فجأه ليه
_ تعالي معايا دقيقة
: اجي معاك فين
_ تعالي بس ، قبل ما خطيبك يجي ويقبض عليه
: ماشي روحت معاه في الجراج ف قالي
_ انا اسف اني اختفيت فجأه بس حصلت ظروف ، طمنيني عليكي انتي عامله ايه
قولت بتنهيده
: ززززفت
_ ليه كده
: مش هخبي عليك ، اهلي عرفوا بموضوع بدر واجبروني اتجوز حامد
_ طيب ما تهربي وتروحي ل بدر ده
: مقدرش اخسر اهلي
_ وتخسري نفسك ، اهربي وحطيهم قدام الامر الواقع ، ايه رأيك تمشي معايا
: تؤ ، مش هينفع ، هكون وطيت راس اهلي لتاني مره وهخسرهم
_ طيب وانتي ، مش بفتكري في نفسك واللي ممكن تعيشيه لما تجوزي واحد مش عاوزاه ، اهربي يا وفاء
: يابني اهرب إيه انت فاكرها ساهله مينفعش
_ ينفع ، انا ممكن اساعدك ، واهلك شويه وهيهدوا والمشكله هتعدي
: انت بتقول ايه ، لو ليك اخت او خاطب وفرحك قرب ترضا ان اختك او عروستك تهرب ، مش كفاية اول مره ، علي فكره انا اتخطفت يوم فرحي علي حامد المره اللي فاتت
_ وفاء!!!! اسمعي الكلام
: إيه ده ، انت بتزعقلي ليه ، وبعدين انت مالك
قرب مني وقال
_ بحبك، ومش هسمح ان الجوازه دي تتم حتي لو مش هتجوزك
رجعت خطوه وانا بقول
: طارق بلاش جنان ، انت اه ساعدتني بس انا مبحبكش ولا ههرب عشانك ولا عشان اي حد
_ يبقي اسف ، انتي مخلتليش خيار تاني ، هخطفك احسن
قال كده وفجأه مسك فيه وحط منديل علي وشي وبعدها محستش بنفسي تاني