مليكة
فوقت علي رش المية في وشي ولما فتحت ومررت نظري لقيت ناس كتير حولية ومنهم اتنين من الستات بيقوموني ويساعدوني اسند نفسي ف قومت وقولت وانا ببص هنا وهناك
_ انا فين.. إيه اللي حصل
قالت واحده منهم
_ انتي بخير حبيبتي
قولت بتوتر
_ انا ايه جابني هنا وبدر فين.. ماات؟
_ بدر مين انتي كنتي لوحدك.. تعالي ارتاحي
مسحت بأيدي علي دماغي وانا بالتفت حولية بجنون ومش فاهمة ايه بيحصل في الوقت اللي الست دي ماسكة فيه وبتاخدني معاها ف شديت ايدي منها ودورت حولية لغيت ما لقيت شنطتي مع شاب واقف ورانا خطفتها منه وطلعت علي البيت متجاهله كلامهم ومناداتهم عليه وبعد مسافة وانا بنحني لطريق التاني وقفت وصرخت بعلو صوتي وانا سادة وداني ومغمضة عينيه لما شوفت بدر قدامي وزاد صراخي لما حسيت بأيديه بتلمسني وبيكلمني ، ومن شدة الرعب اللي كنت حساه مفسرتش كلمة من اللي بيقولها وبقيت اصرخ واحرك جسمي بهلع لما ضمني ليه وبعد وقت من الصراخ المتواصل لقيته بيمسك وشي بين ايديه ويقول
_ مليكة اهدي مفيش حاجة!! فتحي ، انا عايش.. اااانا مش عفريت ، اخرسي بقاااا
فتحت عينيه ولسة كل جسمي بيرتجف من الرعب ف لقيته بيقولي وهو بياخد نفسه
_ ده مقلب واللي جريوا وراكي صحابي ، وانا متقتلتش والدم ده لون وبس ، اهددددي ، ايوووه اهدي... ياشيخة جرستي اللي خلفونا
#بدر
سكنت شوية وخدت نفس وهي بتبعثر نظراتها بتوتر وبعدين بتاخد الشنطة وتمشي من غير ولا كلمة ف روحت وراها وقولت
_ استني رايحه فين.. مليكة انا بكلمك وقفي
تابعت طريقها بسرعه ف اسرعت وراها وقفتها وقولت
_ استني بقولك... انتي اللي بدأتي بالغلط.. انا مكنتش احب اعمل مقلب زي ده
قالت بصوت مهزوز
_ وسع... متجيش ورايا.. اوعي تيجي ورايا
قالتها ومشيت ف قولت وانا بسبقها واقف في طريقها
_ لما تهدي ابقي امشي.. تعالي هنقعد شوية
طالت نظرتها ليه وهي بتترعش وكنت شايف ايدها بتاخد وضع الاستعداد لضرب وهي بتضغط علي سنانها بغيظ ومجرد ما رفعتها مسكتها ف قالت بعصبية وهي بتشدها مني
_ اوعي كده انا هوديك في ستين داهيه
قولت بنظرات حادة وانا لسة ماسك ايدها
_ انتي لسة مفوقتيش من الخضة الاولانية ، طولي بالك ، وايدك متترفعش تاني بدل ما تموتي من الخضة التانية.. ها اهدي شويه
قالت وهي بتشد ايدها مني
_ انت مريض ومتخلف
كملت ببكاء
_ انا بجد كرهتك.. ياشيخ منك لله
قالتها ومشيت وانا وقفت مكاني اتبعها بعنيه وهي ماشية بتبكي وبتمسح دموعها بأيديها وبعد لحظات شوفت عربية كبيرة محملة امابيب جاية ناحيتها وهي مكنتش شيفاها بسبب الحالة اللي هي فيها وكانت ماشية علي طول في نص الطريق ومع ان لو هرستها قدامي هيكون منظر جميل جداً اختم بيه يومي بس قولت حرام ف جريت عليها وشديتها من ايدها وقبل ما تبعد تماماً وتمر العربية من جمبها بخطوة تقريباً فتحت عينيها وشافت العربية قدامها وقتها بصتلي وزادت رجفت جسمها وبقت تبكي بصوت عالي وهي بتقولي
_ كانت هتدوسني يا بدر.. شوفتها مش كانت هتدوسني؟
كملت ببكاء وهي بتشاور علي العربيه
_ شوف... كنت هموت مدهوسة تحت عجل العربية
_ مدهوسة ومتفجره دي عربية امبابيب بتوجاز بس ربنا ستر اديني انقذتك ، ابقي امشي علي الرصيف وركزي المرة الجاية بقا
قالت ببكاء
_ حاضر ، انا متشكرة قوي قوي ، مش عارفة من غيرك كان ممكن يحصلي إيه، متشكرة قوي.. انا مروحة عديني
قالتها وهي بتبعدني وتمشي وانا وقفت مكاني اكتم ضحكتي لغيت ما وقفت فجاة ورجعت تبصلي وتقولي بعد ما جفت دموعها
_ هو انا شكرتك دلوقتي؟
_ هههههههه اه
وقفت لحظات عاقدة حواجبها تستوعب اللي حصل وبعدين قالت
_ اه
قالت كده ورجعت تكمل طريقها وانا وقفت مكاني ابصلها لغيت ما اختفت ومبقتش عارف اضحك ولا ازعل من نفسي لأني عملت قيمة لوحده هبلة زي كدة وبعدين رجعت لحسام ف قالي
_ عملت ايه معاك
_ ولا اي حاجة دي بت هبلة
_ اه باين عليها هربانة منها
_ انا باين عليه زودتها شوية؟.. هي اتفه من اننا نعمل فيها مقلب زي ده
_ يعني انت عملت ايه خضة وهتروح لحالها فكك
سمعت بنصيحته وتجاهلت ولكن كل شوية كنت افتكر شكلها وارجع اضحك
#مليكة
رجعت البيت وانا لسة متوترة ومش علي بعضي وده خلا ماما تقلق وتسألني مالي ولإني خوفت اقولها ف تزعل وتحصل مشكلة او تمنعني اروح لجويربة خبيت اللي حصل وقولت
_ وانا جايه شوفت حادثة ، عربية خبطت واحد
_ ياساتر يارب .. طيب وحصله ايه
_ اتدهس تحت العجل .. انا هدخل اريح شوية ، اعصابي بايظة من المنظر
سيبتها ودخلت الاوضه اترميت علي السرير وانا حاسه اني لسه رجلية وايديه بيترعشوا من الخضة وبعد وقت من التفكير نمت لساعة تقريباً وبعدين صحيت علي إتصال منه ف اتعدلت وفضلت شوية قاعدة لغيت ما فوقت وبعدين اتصلت بيه ف رد وقالي
_ الو
_ ايه
_ متصل اشوف عاملة اية دلوقتي
_ تتخيل عاملة اية يعني
_ مش عارف
_ تمام.. شكرا
_ انا مكنش قصدي اخضك بس انتي زودتيها
_ زودتها عملت ايه يعني، قتلتك ولا ضربت رصاصة بين حواجبك .. انت شايف ان اللي عملته واللي كان رد علي اسلوبك يكون ده مقابله.. انا لسة مش عارفه اتلم علي اعصابي من الخضة
_ انا عارف اني زودتها.. اسف
_ بلا اسف بلا بتاع بقا
قولت كده وقفلت التليفون كله
#عاصم
بعد الحاح شديد مني ومن خديجة علي ريان وافق يروح معانا نشتري هدوم جديدة علشان الكلية ولكن كان شرطه انه يلابس كاب ونضارة ويتخفي وفي الطريق قالت خديجة بسخرية
_ قال يعني الواد معروف قوي.. يابني انت محدش يعرفك غير اربعه امك وابوك واختك وصاحبك اللي بيعرفك وقت المصلحة
ضحك بسخرية وقال
_ لطيفة الاخت
_ انا مش اخت.. اكشف وشك كتمت نفسي .. وربنا وربنا ما حد هيعرفك
_ خديجة افصلي انا متوتر لوحدي لحسن والله ارجع
_ خلاص خلاص اقعد
كملنا طريقنا وبعد مسافة صرخت خديجة وقالت
_ وقف وقف وقف
قولت وانا بوقف العربية
_ ايييه
_ شوف اللي هناك
_ فين
قالت وهو بتشاور علي عمود ورانا
_ العمود اللي ورانا ده .. دقيقة
نزلت من العربية وانا نزلت وراها ف لقيتها بتمسك ورقة كان ملزوقة في العمود وبتقول
_ مين المختل ده ، الحق دول كاتبين ان ريان مختل
خدتها منها وقولت وانا بدقق فيها
_ ايوه.. وهما كاتبين عنه كدة ليه
_ مش عارفه.. تفتكر رقم مين ده
_ معرفش
_ طيب تعاله
خدنا الورقة ورجعنا العربية ف قالت وهي بتدهاله
_ شوف
خدها منها وبصلها شويه وبعدين قال
_ مختتتل عقلياً ده مين ابن الكلب اللي كاتب كدة
قولت
_ عارف الرقم ده
_ معرفش انا مش حافظ ارقام بس ده مش رقم بابا ولا اسراء ولا حتي رقم ماما
قالت خديجة
_ يكون رقم حد من صحابك
_ معنديش صحاب
قولت بهمس
_ يمكن هو
وجه نظره ليه وشرد للحظات ف قالت خديجة
_ هو مين.. انتوا مخبيين عني حاجة
فاق من شروده وقال
_ لا مش مخبين.. اطلع
كملنا طريقنا وهي طول الوقت تسأل في ايه لغيت ما وصلنا ومن زنها سيبناها في المول وروحنا نجيب الهدوم
#ريان
بعد ما بيقنا انا وعاصم لوحدنا رجع يسألني ويقولي
_ هو؟
_ لا ده مش رقمه
_ انت مش بتقول مش حافظ ارقام
_ اه بس مش شبه رقمه خالص مش هو.. وهو مستحيل يعمل حاجه زي دي
_ ليه يمكن صدق انك مكنتش في وعيك
_ تؤ.. ولو صدق ليه يقول عليه مختل وبعدين.....
بترت كلامي لما جاني صوت خديجة من خلفي بتقول
_ تعرف حد اسمه بدر
وجهنا انظارنا ليها ف قالت
_ تعرفه ولا لا
قولت بتوتر
_ مين قالك علي الاسم ده
_ اتصلت بالرقم اللي ناشر الخبر وطلع اسمه بدر
قولت مفكر بصوت مسموع
_ بدر؟ .. طيب وهو منزله ليه.. ويقصد إيه بمختل دي
_ يعني تعرفه
_ قالك ايه
_ قالي انه صاحبك وبيدور عليك.. افهم ايه الحوار.. مين بدر ده
_ هو قالك ايه بالظبط
_ قالي انك مشيت ومحدش عارف رحت فين بعد ما حصلتلك حادثة... ها احكي مين بدر ده
قال عاصم
_ هتعمل ايه
_ مش عارف.. مش عارف بيدور عليه ليه اصلا.. ده يمكن يكون حابب يكمل اللي بدائه
دخلت وسطنا وقالت بنرفزه
_ ايه هو اللي بدائه ، ما تتكلموا هشحت منكم الكلام... مين بدر
قال عاصم
_ هو اللي شلفط وشه زي ما شوفتيه في الاول
_ امال بيقول صاحبة ليه ده مش بعيد يكون بيدور علشان يشلفطه تاني احنا لازم نبلغ
قولت بعيون شاردة
_ لا
_ لا ليه مش بتقول شلفطك... شلفطك ليه طيب ما تفهموني
_ هفهمك بس فهميني انتي الاول قولتيله إيه
_ قولتله اني اعرفك وسألته هو مين وبعد ما قالي قفلت السكة
_ احسن اعملي بلوك ومترديش علي حد
_ طيب ليه ما تفهمني هو سر
قولت بتنهيدة
_ هقولك .. بس الاول توعدوني ان لو في حاجة حصلت وقدروا يعرفوا طريقي مفيش مخلوق يعرف اني مش ناسي.. انا فاقد الذاكرة ومش فاكر اي حاجة ولا اي حد
#إسلام
طلبت منها نتقابل علشان اجرب يمكن اقدر اخلص اللي ناوي عليه وبعد زن كتير مني وافقت تقابلني علي البحر وجت بس كان شكلها تعبان وزعلانة وكأنها مغصوبة علي الجاية زي ما انا حسيت ان موافقتها كمان مغصوبة عليها وانها مش عاوزاني ولكن انا ميهمنيش غير موافقتها وبس هي دي بس اللي هتقربني منها وتوصلني للي انا عاوزة وعلشان الطف الجو وافتح مجال للحوار ما بينا قولت
_ شكلك حلو قوي النهاردة
قالت وهي بتدرو بعينيها في كل مكان الا مكاني
_ شكراً يا إسلام
_ مالك يا فنانة في حد مزعلك .. قولي وانا اكسر رقبة امه
_ امه؟ .. لا مفيش تسلم
_ قولي بس انا إسلام رجوله ميقبلش ان حد يزعل موزته وهو عايش
قالت عاقدة حواجبها
_ موزته؟
_ ههههههه علي حسب ما سيكون يعني يا فنانة.. موزتي وحياتي كلها والله
_ اه طيب ممكن بلاش فنانة دي ، انا مش فنانة، قولي خلود عادي
_ يالهوي يامه اقولك اسمك عادي كده والله ادوخ واقع فيها ده انا لغيت دلوقتي مش مصدق انك وافقتي تجوزيني وحاسس اني انا بحلم.. ونبي اقرصيني يمكن اصحي
ابتسمت ابتسامة سريعة باهته وقالت
_ ليه بتحلم.. هو انا مين يعني.. انا زيي زيك
_هههههههه زيي ايه بس ، والله انا بحب فيكي التواضع بتاعك دة.. مفيش حد متواضع زيك كدة ، ده انتي تلاقي البت الجربانة من دول نزلت فيديو علي التيك توك وهي بترقص واتنين شافوها ف تتمرع علينا بقا تقوليش ليلي علوي.. دا انا اعرف واحده بتعمل فيديوهات علي التيك توك ده شمال والكل عارف انها شمال بس اية عاملة نفسها و....
قالت بمقاطعة
_ إسلام إسلام من فضلك مبحبش اتكلم علي حد ، ملناش دعوة
_ ولا انا..مكرهش في حياتي قد جيب سيرة الولاية... انا بقولك بس انك انتي انضف واحده علي النت كله
_ متشكرة بس متجبش سيرة حد
_ زي ما تحبي افنانه.. طيب ايه رايك تيجي اخدك ونروح اي مكان ناكولنا لقمة او نشربلنا حاجة
_لا انا مرتاحة هنا
كملت بتردد
_ قولي ، عملت ايه لما روحت بيت عمي عبيدة.. قالولك ايه
سكت للحظات ابصلها وانا شايف توترها ده وقلبي بيقولي انها بتسأل علشان الدكتور ف قولت
_ ما انا قولتلك.. الحج وابنه الكبير مقابلتهم كانت حلوة بس التاني ده مكنش طايقني في المكان وحاسس انه نفسه يبوظ الجوازة
_ عمل ايه
_ بقا يبصلي من تحت لفوق ويسأل كتير واسلوبة عدم الا مؤخذه في الكلمة ابن ميتين كلب.. والله لولا العيب لا كنت شقيته .. بس انا كنت في بيتهم وقولت لا ياض يا إسلام متحرجش الفنانة وسط الناس اللي ربوها
قالت وهي مش طايقة تبصلي
_ تشق ايه بس.. مفيش حاجه اسمها تشق
رجعت تبصلي وقالت
_ وملكش دعوة بيه انا موافقة وده المهم..سواء وافق او لا
_ اه طبعاً .. بس إلا هو ماله كدة يا فنانة.. لية بيتحشر.. هو يقربلك
شردت بعينيها وقالت
_ بيعتبرني اخته اصلي متربية معاهم من وانا في اللفة.. وفعلا اخته اخته يعني
« في مكان اخر»
كانت شيماء تنتظر صديقتها علي احر من الجمر حتي عادت إليها وما ان رأتها حتي قامت متلهفة لسماع ما ستقول ف قالت علي عجلة
_ عرفتيها
_ايوووووة عرفتها يا سنه مدوحسة يابت .. دي البت بتاعت النت اللي اسمها خلود
_ خلود مين دي
_ يابت خلود البت الحلوة ام شعر ناعم دي البت البيضة الوتكة
_ حلوة وشعر ناعم و وتكة.. ودي بصتله علي ايه بروح امها
_ ونبي يختي ما عارفة ده معفن وريحته منتنه.. بس هي موزة يخربيت اللي جابوها احلي من فيديوهاتها مليون مرة يابت رفيعة كدة وطرية تحسيها هتدوب زي البسكوته في الشاي
قالت بغيظ
_ انتي بتغظيني.. بقولك ايه يابت ، البت دي لازم تتعجن هنجيبها نكسر عضمها عضمة عضمة
_ نكسرها ، دي حتي بت شمال وفيديوهاتها تكسف
_ بتعملة ايه في الفيديوهات دي يابت
_ بتحكي حكايات زي حكاياتك اللي عملتيها مع اسلام وغيره استغفر الله العظيم يعني
_ الله الله بقا عاوز تجوز بت شمال يا إسلام.. ماااشي انا هوريك واوريها.. قوليلي يابت عرفتي ساكنه فين
_ اه ما انا اتارتها لغيت ما شوفتها داخله بيتهم
_ حلو.. نستني لما تخرج ونمسكها
_ لا مانتي متعرفيش انها عايشه لوحدها جدتها بتيجي تبات معاها وتنزل ومبتجيش غير بالليل انا اطقست من واحده هناك
_ طيب يلا بينا
_ لا لا المنطقة دي بتكون زحمة في الوقتده خليها بكرة علي الضهر كدة
#جويرية
كنت قاعدة في اوضتي بقرأء في الصور اللي حفظتهم من قصة ريان ودموعي بتسيل حزن عليه وعلي اللي ممكن يكون حصلة وفجأة سمعت خبط علي الشباك بقيت بصاله ومترددة اقوم ولا لا لغيت ما سمعت صوته من بره بيقولي
_ افتحي يا جويرية
قومت من مكاني متلهفة وطلعت اجري علي الشباك فتحته لقيته قدام ف قولت بلهفة
_ ريان؟
قال بإبتسامة
_ ايوة انا
_ انت كنت فين ورجعت امتي
_ كنت مطرح ما كنت المهم اني رجعت وشوفتك.. وحشتيني قوي يا جويرية
ابتسامتي ملت وشي وانا بقول
_ وانت كمان
جويرية.. جويرية
كنت شيفاه بيقولي كده ولكن بصوت حد تاني وبعد لحظات اختفي وانا فتحت عينيه وبصيت حولية لقيت بجاد واقف جمبي وبيصحيني ف فهمت انه حلم ولكن مقدرتش اخفي ساعدتي بعد ما عرفت ان ده حلم من الاحلام اللي بيتحققوا يعني ريان هيرجع
_ ايه
قولتها ل بجاد وانا مش قادره اخفي ابتسامتي ف قالي
_ مبسوطه ليه
قولت وانا بعتدل
_ مش مبسوطه ولا حاجه ايه يبسطني
_ ايه يبسطك
_ قصدي مفيش حاجه.. مالك انت بتصحيني ليه
_ دخلت اطمن عليكي لقيتك نايمة وانتي مش عادتك تنامي بنهار.. انتي كويسة
_ ايوة
_ اها...طيب ماما لسة قيلالي انك هترجعي تكملي تعليمك صحيح الكلام ده
_ اه
_ وانتي جاهزة لكدة
_ ايوة
_ برافو عليك.. وانا هساعدك
قولت بإبتسامة
_ متشكرة
_ لا شكر علي واجب يا هبلة شدي حيلك انتي بس وانا هخليكي تطلعي الاول كل سنه.. اخوكي يفهم في كل المواد
_ ههههههه ربنا يخليك ليا
فاطمة
بعتلي رساله قالي فيها
_ Where are you, Jihaaaad?
كتبت وانا بضحك
_ I am here, Saaalama
_ طيب ولما انتي هير مبتكلمنيش ليه
_طيب مانت هير مبتكلمنيش ليه هههههه
_ هنقطع علي بعض ولا ايه ، لما انا اللي اسبق وابتدي بالنكد انتي تصالحي يا هانم والعكس
_ هههههههه اوكي فكرني ابعتلك علي الفجر علشان اكون سبقاك
_ ياريت انا اطول اصحا كل يوم علي رسالة منك حتي لو كانت نكد
قولت بإبتسامة
_ بس يارب متزهقش
_ مش هزهق لو عشت عمري كله تنكدي عليه مش هزهق
قولت بإبتسامة
_ ايوة دي حلاوة البدايات انا عرفاها كويس
_ لا انا مبعترفش بحاجة اسمها حلاوة البدايات اللي بتنتهي بعد شويه.. انا مقتنع تماماً ان الحب بيخلينا طول العمر في بداية حلوة وعمرنا ما بنمل.. ماما وبابا مأكدنلي المعلومة دي
_ ازاي
_ لسة بيحبوا بعض وتقدري تشوفي اللهفة في عينيهم بعد رجوع بابا اخر اليوم واهتمام ماما بيه وكأنه ابنها وهو بردو بيعاملها زي ما يكون بنته.. وانا اتمني اعيش زيهم
_ ما يمكن احنا نختلف عنهم ومنعرفش نكون زيهم
_ لا مش هنختلف عنهم ومش هسمح ولا هقبل منكنش زيهم والملل والفتور يدخلوا حياتنا لغيت اخر يوم في عمرنا
_ هههههه وده ازاي
_ بكلمك بجد.. من دلوقتي بقولك اهو انا اكون رقم واحد في حياتك والباقين بعدي
_ يا سلام ده اية الدكتتورية دي
_ مش دكتتوريه ولا حاجة.. شوفي انا هقولك
_ قول
_ لما تلاقي راجل مستقيم زيي ومحترم وملهوش في المسخرة والف ورا الستات ودخل البيت من بابه اول ما حس انك عجبتيه وحبك تعرفي انه مش محتاج غير الاهتمام والحب وزوجة متجددة وبعد كدة هتلاقي حلمك اللي حلمتيه ومقولتلهوش عليه بيتحقق قدام عينك وهتلاقي جنه علي الارض وسعادة مبتنتهيش ، انا كده دلعيني ادلعك
_ طيب ما نعكسها وانت اللي تبتدي بالدلع
_ هو سباق انا بقولك الواقع .. احنا كده حلوين بس بعدين بقا هتكون حياتنا روتينيه واللي بنصبح فيه بنبات فيه وهنا دور الست تصنع جوا مختلف في البيت.. عشوة حلوة.. مزيكا هادية ، بدلة رقص وترقص ، ولما الراجل مزاجه يروق بتلاقي الحياة وردي
_ طيب ولو مبعرفش ارقص
_ اتعلمي ممكن تسيبك من التعليم وتتعلمي الرقص ده اللي هيفيدك
_ هههههههه ولما احب اشتغل اشتغل رقاصة يعني
_ ايوة مفهاش حاجة بس في بيتك ولجوزك وياسلام بقا لو تجهزي طشت مية سخنة بملح وتدلكي رجلي ياااااه علي السعادة اللي هنعيش فيها.. مش عيب الست تغسل رجل راجلها بالعكس بتزود المحبة
_!!!!!!
_ بكلمك بجد
_ انا اغسل رجلك
_ وتهرشيلي ضهري يااااه
_ نعم
_ وتضربيني ضربتين فوق ضهري لما اشرق يااااه علي السعادة يا فاطمة
_ بتتكلم جد
_ اه وفيها ايه مش بدل ما ابص بره
_.....
_ فاطمة
_ نعم
_ روحتي فين
_ انت بتتكلم جد
_ ايوة
_ امممم
_ يابنتي افهمي هقولك حاجه
_ قول حاجة
_ انا مش بقولك كده علشان ازلك وكلام النسويات ده لا أبداً .. انا بقولك مفتاح قلب الراجل واللي لو عملتيه هتلاقيه بيقدملك اللي تحبيه واكتر شويتين .. حضن تلاقي ، شيكولاته تلاقي ، وقفة في وقت تعبك تلاقي.. شيل تلاقي ، حط تلاقي ، وناهيكي عن موسوعه عن اللي ممكن تلاقيه بعدين
_ هههههههه فكرتني بمسلسل كنت بسمعه انا وبابا في امريكا
_ الحج متولي
_ ايوة عرفت منين
_ اصلي متقمس شخصيته دلوقتي
_ هههههههه
_ هههههههه بهزر معاكي انا اصلا مقبلش انك تعملي كدة ، ده غير اني متعود اعمل حاجتي لوحدي لكن بصراحه انا عايز واحده ترقصلي نفسي اجرب الاحساس ده قوي يا فاطمة
_ هههههههه اوكي
_ يعني هترقصيلي بجد
_ هههههههه هرقصلك
_ ربنا يكرم اصلك انتي متعرفيش كلامك ده اداني امل للحياة ازاي.. اخيراً هيترقصلي
#خلود
ده اصعب وقت مريت بيه في حياتي وكنت بتعذب بين احساسي بشوقي ليه اللي بيجبرني اتصل او ارجع بيتهم وبين عزة نفسي اللي بتقولي بلاش هترخصي نفسك اكتر من الاول ويمكن يفتكر ان ده قبول مني للي بيعمله
وبعد وقت كنت متمنية الموت علشان ارتاح من اللي انا فيه وصلني اتصال من رقم طنط ورد ف مسحت دموعي ورديت وقولت وانا مش عارفه اتحكم في نبرة صوتي
_ الو
_...
_ الو.. طنط ورد.. الو
مردش مكنتش سامعة غير صوت انفاس حد من الجهه التانية وبعدين قفل الخط رجعت اتصل تاني ولكن مردش وبعدها الباب خبط قومت فتحت ف لقيت هاجر قدامي وبتقولي وهي بتدخل
_ ازيك يا ازبل خلق ربنا
قفلت الباب ودخلت وراها ف قالت وهي بتستدير ليه
_ مبترديش علي تليفوني ليه
_...
_ انطقي مبترديش عليه ليه
_ مليش نفس اتكلم مع حد
_ وانا حد يا جزمة .. ازاي يعني يجيلك عريس وتسيبي البيت ومتفكريش تقوليلي
_ وبعد ما اقولك هتعملي ايه
_ وهما الصحاب بيعملوا إيه في الحالات دي
_ بيسكتوا
_ بيضربوا بالشبشب.. اتعدلي معايا وتعالي هنا وقوليلي ايه حكاية الولد الصايع اللي جيبهولنا ده.. لقيتيه فين
_ لقيته مطرح ما لقيته يا هاجر.. مش عاوزه اتكلم في الموضوع ده
_ وانا مش جايه غير عشان اتكلم.. انا وانتي عارفين وافقتي ليه.. بس ده مش حل مينفعش تخرجي نفسك من مشكله تدخلي نفسك في مصيبة الواد ده لا شبهك ولا يناسبك
قولت بانفعال ودموعي بتسيل علي خدي
_ واية اللي يناسبني .. انا خدامة اخري ثانوية عامة لا عندي اب ولا ام ، وصايعة زي ما قال ابن عمك.. مين هيناسبني غير واحد زي ده
_ وانتي ميته علي ده.. ياستي متجوزوهوش وشوفي واحد تاني مناسب مش سرسجي
_ لا انا موافقه علي ده ومفيش حاجه هتغير رايي
_ علشان ايه؟ ، عاوزه تضيعي نفسك علشان مين ، علشان زيد.. هتضيعي نفسك عشان واحد مش بيضيع فرصة علشان يضايقك انتي اللي هتخسري مش هو
_ مليش دعوه بيه ، انا مبفكرش فيه انا موافقه علشان انا عايزة إسلام وهو كمان عايزني زيد مبقلهوش مكان في قلبي
_ بطلي كدب.. كدبك باين في عينيكي.. بس انا عايزة اقولك ان مفيش حد يستاهل تاخدي قرار غلط زي ده عشانه انتي كده بتثبتيله انه مهم عندك
_ اثبتله اللي هو عاوزة بقا مبقتش فارقة.. عارفة انا جوايا دلوقتي بينهار حاسة روحي بتتكسر وعلي اتم الاستعداد للموت بأي طريقة مبقتش فارقة هعيش ازاي.. ولا فارقة هعيش مع مين .. إسلام زي غيره.. واهو يمكن وجوده في حياتي يخرجني من الحالة اللي انا فيها
_ محدش هيخرجك منها غير نفسك.. طيب اقولك حاجه.. بشر قالي ان زيد بـ....
قاطعتها بانفعال
_ مش عاوزة اسمع اسمه.. متجبليش سيرته.. انا هتجوز إسلام ودلوقتي في حكم خطيبته واي كلام في سيرة زيد تعتبر خيانة... سيبيني يا هاجر مش عاوزه اشوف حد ولا اكلم حد... امشي "
نهيت معاها الكلام بعصبية وده خلاها تزعل وتمشي بجد وانا ورجعت قعدت مكاني تليفوني في ايدي وبقلب في حساب زيد لغيت ما الباب خبط وفتحت لقيت بنتين واحده منهم تخينه بشرتها سمره حاطه اكسجين في شعرها والتانية نفس الشكل تقريبا بس رفيعة كان شكلهم خشن ويخوف حركت ايدهم لوحدها كانت شبه حركة ايد الرجالة واخده وضع الاستعداد لضرب ، شكلهم رعبني وحسيت بالغدر منهم ، حسيت انهم جاين يموتوني وكنت هقفل الباب في وشهم ولكن التخينة هجمت عليه ومسكتني وكتمت صوتي قبل ما اصرخ والتانية دخلت وقفلت الباب وراها والاتنين مسكوني ضرب بالاقلام وشد في شعري وجرجره في الأرض وبعد ما رموني قدامهم الرفيعة ضربتني برجلها في جمبي حسيت روحي طلعت وكل ما كنت بحاول اصرخ كانت التخينة تكتم نفسي ولربع ساعة تقريباً يضربوا فيه في وشي وفي بطني ويخبطوا دماغي في الأرض لغيت ما نزفت منها ووقعت علي الارض فاقدة قوتي تماماً وبعدها سابوني وطلعوا يجروا وانا بقيت مرمية وبنزف ومش قادره اتحرك لغيت ما رن تليفوني وقتها بقيت اجاهد واحاول الزحف ناحيته في الوقت اللي الدنيا بتسود في عيني والرؤيه بتقل شويه شويه
#زيد
جت هاجر في الوقت اللي كنت قاعد في الصالون زي عادتي قعدت قدامي وقالت وهي بتهز رجليها
_ انا مش عارفه ازاي ، بس انت لازم تتصرف
_ اتصرف في اية
_ خلود
_ مالها
_ لسة جاية من عندها
_ وبعدين
_ كلمتها عن العريس ده وقولتلها مينفعش بس هي بقا باين عليها واخداها عِند مش شايف اي حاجة قدامها وكانها بترمي نفسها للموت وخلاص
شيحت بنظري عنها وقولت وانا بحاول اكون طبيعي
_ هي حره
_ هي حره ايه ماهي هتعمل كده علشانك
_ عشاني انا
_ ايوة.. بشر قالي الكلام اللي سمعته منك.. الكلام ده جرحها قوي ومخليها بتتغابا.. كلمها يا زيد ونبي انت هتعرف تقنعها
شردت للحظات افكر في كلامها اللي فهمت منه ان خلود مجبتلهاش سيرة اللي حصل في العيادة ف قالت بعد ما طال سكوتي
_ سرحت في ايه.. كلمها وحاول تقنعها مش انت دكتور ودي شغلتك
_ لو انا سبب المشكلة ف مش هينفع اكلمها
_ محدش غيرك ينفع.. كلمها يا زيد.. هي بتحبك وانت عارف
_ طيب اسكوتي بلا بتحبني بلا هبل بنات وحتي لو بتحبني انا اعملها إيه احبها جبر خاطر
_ ده مش هبل وبطل كلامك ده انت ازاي بتتكلم بشكل ده امال لو مكنتش مهمتك تعالج المشاكل النفسية كنت هتعمل فيها ايه ياخي حرام عليك البت نفسيتها باظت
_ مش مشكلتي دي مشكلتها وهي تحلها
_ من فضلك بلاش الكلام ده دلوقتي اوقف جمبها وبعدين نتكلم في الموضوع ده
_ ماشي حتي لو وافقت هي عاملة بلوك اكلمها ازاي
_ كلمها من تليفوني
قالتها وهي بتمدلي ايدها بالتليفون علقت نظري عليه شويه وانا متردد اكلمها ولا لا لغيت ما قالت
_ خد
_...
_ امسك بتبص علي ايه
خدته منها وبعد جهد بيني وبين نفسي اتصلت وحطيت التليفون علي ودني واستنيتها ترد لغيت ما انتهت الرنه ف قولت وانا برجع التليفون لهاجر
_ خدي مبتردش
قالت وهي بتعاود الاتصال بيها
_ لازم ترد
حطت التليفون علي ودنها وبعدين ادتهوني وقالت بخفوت
_ ردت.. ااامسك
خدت منها التليفون وحطيته علي ودني وانا حاسس بحبس انفاسي ومش عارف هكلمها ازاي بعد اللي حصل واللي مكنش مفارق خيالي في اللحظة دي وزي المرة اللي فاتت فضلت ساكت مستني اسمع صوتها ولكن مجانيش غير صوت انفاس عالية بس مكنتش طبيعي كان في حاجة تقلق اعتدلت في قعدتي ولكن متكلمتش لغيت ما سمعت صوتها بيخرج بصعوبة وهي بتقول
_ هاجر... الحقيني بموت
قومت من مكاني وقولت
_ خلود!! .. الو... خلود في ايه؟!.. الوو
قالت هاجر
_ مالها
سيبت التليفون ونزلت اجري علي تحت وهي جت ورايا وروحنا علي هناك