رواية ذئاب لا تعرف الحب الجزء الثاني2الفصل التاسع والخمسون59بقلم نجمه براقه
مليكة
قالت بانفعال بعد ما جت عندي ومسكتني بعنف
_ انتي مين قالك الكلام ده.. عرفتي منين انطقي
_ يعني حصل
قالت وهي بتشد عليه اكتر
_ بسألك عرفتي منين!!
بعدت ايديها عني وقولت بدموع
_ من مطرح ما عرفت.. بس ليه؟ عيلة مكملتش سنة تدبح ليه ومين السبب في ده.. ده انا لما سمعت مصدقتش وقولت كدب
قعدت علي الكرسي وهي بتبكي بانهيار جسيت علي ركبتي قدامها وقولت
_ في ايه يا ماما فهميني.. انا اول مره اخاف كدة مين ده اللي دبحها وليه
قالت ببكاء
_ معرفهوش ، ومحدش يعرف هو عمل كده ليه ، بس انا السبب انا اللي مقدرتش احميها بعد ما امها سابتها معايا امانه.. كنتوا انتي وهي مع بعض بتلعبوا جنبي ولما بصيت عليكم ملقتهاش وشوفت المجرم اللي ميعرفش ربنا واخدها وبيجري.. حاولت الحقه بس مقدرتش وخدها وبعتلنا صورتها وهي مدبوحة دبح من رقبتها .. دبحها من غير اي رحمة مش عارفه ازاي قلبه طاوعه يحط السكينة علي رقبتها.. ده شكلها كان يحنن قلب الكافر عليها
_ طيب ايه اللي خلاه يعمل كده.. ماهو اكيد مخطفهاش حب في القتل والا كان خطفني معاها
_ معرفش معرفش.. محدش يعرف حاجة
كملت وهي بتمسك فيه
_ بس انا مش هسيبك غير لما اعرف عرفتي منين ومين اللي قالك
قولت بدموع
_ اسفة يا ماما .. مش هقولك غير لما افهم كل حاجه
_ مش بمزاجك انا امك وبطلب منك تحكيلي وهتحكيلي يا مليكة
بعدت ايديها عني وقولت
_ وانا مش هحكي غير لما افهم كل حاجه .. ومش عاوزه خالتي وعمي احمد يعرفوا والا والله ما هقول وهسيبك محتارة كدة
سيبتها تزعق ورجعت في طريقي للكلية وبعد مسافة فتحت التليفون وكلمت بدر ف رد عليه وقال
_ روحتي فين
_ كلامك طلع صح.. بنت خالتي فعلاً اتدبحت بس انا عاوزه اعرف ايه المشكلة اللي بين اهلك وجوز خالتي
_ لتكوني شاكة ان اهلي اللي دبحوها
_ انا اللي متأكدة منه ان عمي احمد وراه سر كبير وعاوزة اعرفه
_ لا افهم.. انتي شاكة ان اهلي قتلوها
_....
_ تبقي شاكة في كدة.. بس لازم تعرفي ان مفيش حد في عمامي ولا بابا ممكن يعملوا حاجة زي دي وان جوز خالتك وصلتله صورة من القاتل وهو عندهم ولو معرفش مين اللي قتل بنته كان رجع ينتقم مننا.. وسكوته ده بيأكد انه عارف هو مين وعمل مصيبة خايف يقولها
_ كلام منطقي.. بس انا بردو عاوزه اعرف ايه اللي حصل مع اهلك ولية مش عاوزنا نقربلكم.. ايه السر اللي خايف انه يتكشف.. لو سمحت انا مش هعرف اتكلم مع حد غيرك في الموضوع ده
_ ماشي.. هحاول افهم واقولك
_ متشكرة قوي
_ علي ايه انا كمان مهم عندي اني افهم
_ تمام كده هدفنا واحد
#هاجر
مكنتش الفرحة سيعاني اما ماما قالتلي ان بابا موافق وزادت أكتر لما دخلت عليه اوضتي وقالت
_ مش تقومي ننضف البيت
_ ما نضيف يا ماما هي نضافة وخلاص
قالت بخبث
_نضيف فين ولا انتي عاوزه بشر واهله يجوا يلاقوه مش مترتب ترتيب يليق بيهم
نطيت من مكاني وقولت
_ هما جايين
قالت بإبتسامة وهي بتحط ايدها علي وشي
_ ايوة يا حبيبتي.. جاين النهاردة يتكلموا في التفاصيل
قولت بسعادة
_ بجد ونبي يا ماما
قالت وهي بتحضني
_بجد ياقلب ماما. ربنا يسعدك ياحبيبتي
حضنتها وقولت بدموع الفرحة
_ حبيبتي يا ماما ربنا يخليكي ليه
بعدتني عنها وقالت
_ طيب يلا بقا قدامنا ساعتين نخلص فيهم ترتيب
_ حاضر.. ساعة واحده وكل حاجه هتخلص
قولتها بحماس وطلعت من الأوضة وانتشرت في كل البيت انضف كل ركن اوصله لغيت ما خلصت وبعدين جريت علي الحمام استحميت ولبست اجمل حاجه عندي وحطيت ميكب بشكل مبالغ فيه علشان اطلع حلوة ولكن فجأه وقعت الفرشة من ايدي لما الباب اتفتح ودخل منه بابا وبربكة وخجل استدرت ليه وقولت
_ بابا!.. اتفضل
قرب مني وقال وهو عاقد حاجبية وعلامات الاشمئزاز علي وشه
_ إيه ده يا هاجر انتي هتشتغلي في سيرك ومقولتليش.. ايه الوان الطيف اللي عملاها في خلقتك دي
قولت بربكة
_ هخففها
_ لا انتي تروحي تغسلي وشك وتمسحي ده كله.. يابنتي خضتيني لما شوفتك.. انتي حلوة من غير اشارت المرور اللي عملاها في خلقتك دي.. دقيقة وتكوني ماسحة العك ده كله
هبطت عزيمتي وحماسي في لحظة وقولت بوش عابس
_ حاضر يا بابا
اتجهت ناحية الباب ف مسك مرفقي رجعني قدامه وقال
_ انا مش عايز اكسر نفسك ولا انغص عليكي فرحتك.. بس انتي كده وحشة.. انتي احلي من غير حاجه.. وبشر عاش معاكي طول عمرك واختارك بشكلك الطبيعي ف مينفعش تيجي دلوقتي تفهميه انك حلوة بزيادة.. كدة هيمشي مش هيرجع
ابتسمت وقولت
_ حاضر هغسله
#إسلام
جه العسكري خدني وداني لمكتب الظابط وبعد ما أشر للعسكري انه يمشي قام من مكانه وقال وهو بيحوم حولية
_ يارب تكون امبسطت معانا
_....
_ اقعد يا إسلام اقعد
قالها وهو بيضرب علي كتفي ف قعدت وهو قعد قدامي وقال وهو بيخرج سيجارة من العلبة
_ سيجارة
_ مبشربهاش
قال وهو بيحط سيجارة في بوقه
_ احسن دي مضرة بالصحة.. ها بقا احكيلي
_ احكيلك ايه اباشا
_ ليه اتفقت انت ونيرة علي خلود
_ ده مين اللي قالك الكلام
_ نيرة يا حبيبي.. احكيلي من الاول.. اتفقتوا علي ايه
_ زي ما نيرة قالتلك بالظبط اباشا
حد من نظرته ولطم وشي وبعدين رجع مكانه وقال بهدؤ
_ إيه يا إسلام بتخليني امد ايدي عليك ليه.. انا مش عايز لغة الحوار بينا يكون فيها عنف، اتكلم
قولت وانا بمسح وشي واخفي غيظي
_ انا معملتش حاجة ومفيش اي اتفاق بيني وبين نيرة ولا اعرف انها تعرف خلود
رجع يديني قلم تاني ويقول
_ يلاا!! شايفني داقق عصافير قدامك ولا برضع في صباعي.. انطق يلا اتفقتوا عليه
قولت بهدؤ
_ متفقتش علي حاجه يا باشا وعدم الامؤخذه انا مش هتكلم غير لما تجيبولي محامي
الغضب ملا عينيه وهو بيقول
_ ومين المحامي اللي ممكن يدافع عن واحد صايع زيك..
كمل وهو بيشدني من هدومي
_ انت هتقول ولا اخليهم يروقوك دلوقتي
_ انت عايز تجبرني اقول حاجه بالغصب اباشا.. انا معملتش حاجة ومش فاهم انا مقبوض عليه بتهمة إيه بالظبط.. ولا الحكومة اعتبرت مساعدة الناس جريمة دلوقتي
فلت ايده عني وقال
_ ماشي يا إسلام..
كمل بتحذير
_ عيني هتكون عليك لغيت ما اعرف اجيبك تاني هنا بتهمة حلوة تليقلك ولوقتها لو رجلك خطت خطوة ناحية خلود هقطعهالك وهتتحبس
كمل وهو بيمسك حاجتي من فوق المكتب ويرميها في وشي
_ اطلع بره
_ يعني خلاص كده اباشا معليش اي تهمه
_ متفرحش قوي كدة هجيبك تاني
ميل عليه وقال
_ وحيات امك لا هتشرف هنا قريب
ابتسمت وقولت
_ ياريت اباشا هو انا اكره اشوف جنابك مره تانيه
كملت بعد ما لميت حاجتي وقومت
_ هتوحشني والله اباشا.. سامو عليكم
قولت كده ومشيت وانا حاسس ببركان بيفور جوايا بسببه وبسببها وبحلف بايمانات الله كلها اني ما هسيبهم وبذات هي بس كان لازم ابعد شويه وفعلا بعدت ومشيت من اسكندريه وانا مخنوق
بس كان جوايا حته مبسوطه اني قدرت اغلب الظابط ده وميقدرش يمسك عليه حاجه حتي في تسجيلات الكاميرات مقدرش يمسك عليه حاجه لأني كنت اذكي منه ولما شوفته رايحلها عند البحر وقعد معاها يتكلم وبعد ما مشيت وهي منهارة فهمت ان الحوار عليه ف قولت العبهم شويه وحصل ومقدرش يثبت عليه حاجة
#خلود
لساعات محدش كلمني غير هاجر اللي اعتذرت منها وقولتلها تعبانه مش هقدر اروحلها وبعدين كلمني الظابط وقالي
_ عامله ايه دلوقتي
_ الحمدلله.. طمني حضرتك عملت ايه مع إسلام ، اعترف؟
_ ولا ، ومعملتش ولا حاجه.. للأسف العصير مطلعش في مخدر زي ما توقعنا
قولت بقلق
_ طيب وبعدين عملت معاه ايه
_ سيبته يمشي
_ ليييه؟
_ معلهوش اي حاجة اخليه ليه
_ طيب ما حضرتك عارف انه تبع نيرة
_ دي مش تهمة يا خلود بس مش عاوزك تخافي من حاجه مش هيقدر يقربلك
_ ربنا يستر بقا.. انا خلاص مش خارجة من البيت تاني
_ قولتلك مش هيقدر يقربلك.. انا هحميكي
سكت مستغربة اهتمامة ده ف قال
_ هو مش هيقدر يقربلك علشان عارف انه متراقب وهو ذكي وفاهم انه لو عمل اي حاجة هيروح في مصيبة
_ ما يمكن ذكائه ده يخليه يتصرف في طريقة يوصلي بيها
_ انتي مش واثقة اني اقدر احميكي ولا مستهونه بيه
قولت بتردد
_ واثقة بس ممكن اعرف انت بتعمل معايا كده ليه
_ بعمل ايه
_ يعني
_ مهتم
_ اه
ضحك وقال
_ وياترا فهمتي اهتمامي ده ازاي
_ مش فهماه
_ طيب ياستي شوفي انا كده مع اي حد بحس انه ملهوش حد يحميه وفي غيرك كتير لوحدهم ومحتاجين اللي يطمنهم ان الدنيا بخير وفي قانون يحميهم ده اول سبب.. تاني سبب بقا لجين بنت اختي مصدعاني اسئله عنك من وقت ما عرفت اني قابلتك ومحلفاني اعدم اللي ضربوكي
قولت بإبتسامة
_ ربنا يحفظها.. ابقي سلملي عليها.. ومتشكرة قوي
_ علي ايه ده واجبي.. المهم دلوقتي انا مش عايزك تحبسي نفسك ، اخرجي ومارسي حياتك عادي
_ مش هقدر
_ يا خلووود.. قومي من مكانك انا قولتلك هحميكي.. متديش للواد ده اكبر من حجمه
#زيد
كنت بجهز للمؤتمر وبالعافية قدرت افضي دقيقة اتصل بيها علشان اطمن عليها واشوف هديت ولا لا ولما ردت وسألت عامله ايه قولت
_ سامحيني مقدرتش اكلمك كنت مشغول قوي ، ولسة والله بس فضيت نفسي دقيقة علشان اطمن عليكي
_ انا تمام.. شكرا علي اهتمامك
_ العفو يا خالتي.. عامله ايه دلوقتي ، هديتي
_ اه الحمدلله احسن
_ بطلتي خوف
_ ايوة الحمدلله، ودلوقتي في العيادة
_ نعم!! عيادة ايه انا قولتلك متطلعيش من البيت
_ ما خلاص مفيش خوف الظابط مصطفي طمني وقالي اقدر امارس حياتي عادي
قولت وانا جوايا بيغلي من الغيظ
_ يعني طلعتتتتتي علشااااان الظابط طمنك
_ اه هو قالي مفيش خطر.. بتزعق ليه
_ عارفة لو انتي قدامي دلوقتي كنت عملت فيكي ايه
ضحكت وقالت
_ إيه
قولت بانفعال
_ مبهزرش! .. انا قولتلك متخرجيش وحضرتك اول ما كلمك الظابط نسيتي كلامي وخرجتي
_...
_ خلووود!!
_ نعم
_ متخلنيش اقلب عليكي تاني.. يعني ايه اقولك متخرجيش واول ما يكلمك ترمي كلامي تحت الجزمة
_ انا قولت هو ظابط وفاهم وهو وعدني يحميني
قولت بانفعال
_ متجننيش امي.. يحميكي بتاع ايه وانتي ازاي تكلمية اصلا انتي مش قولتي مش هكلمه
_ انا مش فاهمه انت متعصب ليه دلوقتي.. ده ظابط وده دوره انه يحميني
_ طيب يا خلود استني لما ارجع اشوف مين هيحميكي مني.. راجع النهاردة
_ بجد
قفلت السكة في وشها وحاولت اهدا بكل الطرق مقدرتش ف مسكت الاب توب وفتحت الكاميرات في العيادة وشوفتها بتضحك ومبسوطة وقتها تحاول غضبي لتوتر واحساس بالغباء لأني وصلتلها ان عصبيتي دي غيره
#خلود
قفلت العيادة ورجعت البيت وطول الطريق وانا كلي خوف منتهاش غير لما وصلت واطمنت اني في امان وبعدها دخلت الحمام استحميت ولبست لبس حلو وفضلت قاعدة ومترقبه لجيته وانا كلي لهفه وشوق لشوفته ولكن عدت ساعات ومفيش جديد ، وعلي الساعة اتنين بالليل بعتله وقولت
_ انت مش قولت انك جاي النهاردة؟
_ غيرت رأيي
_ ليه؟
_ اصل واحده معايا في المؤتمر اصرت مسافرش غير لما تستضيفني في بيتها
_ واحده ولا واحد؟
_ واحده
_ وعلي كدة انت قاعد في بيت الواحدة دلوقتي
_ ايوة بس انا دلوقتي في اوضة وهي في الاوضة اللي جنبي بتغير علشان هنتعشا سوا انا وهي
_ ماشي.. ربنا يهني
_ ميرسي اوي يا خلود
قولت بنرفزة
_اهو انت اللي ميرسي، اقولك حاجه ومتزعلش
_ اممم قولي يا خلود
_ انت اشد قبح من فتيات الليل
_ انا؟
_لا دي وصلتك بالغلط.. انا كنت هقولك حاجة تانية بس تراجعت
_ معقول
_ ايوة معقول وانا هكدب عليك يعني
_ مصدقك بس كنتي بعتاها لمين
_ لواحد قبيح عاوز الدبح والدق فوق نافوخة
_ ليه
_ كدة
_ كدة ليه
_ كدة وخلاص انا حرة
_ طبعاً حره بس لو دبحتيه ودقتيه علي نافوخة مفتكرش حضرت الزاااابط مصطفي هيقدر يحميكي من حبل المشنقة
_ الزاابط؟
_ اه الزابط.. الا هو فينه دلوقتي.. واقف قدام الشقة بيحميكي بردو
_ واقف قدام باب الاوضه.. وكل شويه يخبط يطمن عليه
_....
_ اصلا هو راجل ذوق ومحترم ولتيييييف قوي
_ لتيف؟
_ اه زابط لتيف وملهوش في الستات ولا حد بيستضيفه
_ اما راجل خرونج صحيح هو في احلي من الستات واستضافت الستات دي الست اللي مستضفاني في بيتها كارماني اخر كرم
قولت بنرفزة
_ متشغلش بالك انا كمان هكرمه اخر كرم
_ خلود.. متهلفطيش في الكلام انا مش عايز ازعلك.. اعقلي
_ مش هعقل ومش انت اللي تقولي اعقل.. وهروق عليه وهتصل بيه دلوقتي اتكلم معاه لغيت الصبح وانت ملكش دعوة بيه
_ ماشي كلميه وروقي زي ما تحبي بس حسابك معايا لما ارجع والله لا اوريكي علي كلامك ده بس يارب ما تزعلي بعد كدة
_ ولا تقدر تعمل حاجه انا مش خايف منك ولما اقابله هحضنه كمان وانت ميخصكش اعمل اللي انا عاوزاه ❤
#جويرية
كتبت الرساله واستنيته علشان ادهاله يوم واتنين لغيت اليوم التالت وده كان يوم الخميس اللي بعده اجازة وهغيب يومين كاملين.. بقيت مستنياه ومترقبة جيته بفارغ الصبر وخلصت الفسحه ودخلنا الحصه ومر الوقت وانا مش مظبطة ومش مركزة مع المستر بسبب انشغالي بالموضوع ده لغيت ما خلص اليوم الدراسي وكان قدامي دقايق معدودة استنا فيها قدام المدرسة يكون السواق جه وفي الوقت ده رفرف قلبي لما شوفته واقف بعيد وقتها استجمعت شجاعتي وخرجت الرساله من الشنطة وجريت علي الشجرة وقفت جنبها شويه بمثل اني مستنيه حد وبعدين حطيت الرساله ورجعت تاني مكاني ابصله وهو بيتقدم وابتسامته الخجولة بتغلبه وهو بيحاول ميبصليش وكأننا لسه عيال و وصل الشجرة خد الرساله وكمل طريقه ناحيتي وتجاهلني وكأني مقعد علي الرصيف ابتسمت وتبعته بعيني لغيت ما وقف في اخر الشارع بصلي لحظات وبعدين مشي
#ريان
مكنتش في حالة تسمحلي اروح عند المدرسة ولكن خوفي انها تحس اني مليت او مش مهتم خلاني اروح ومقدرش اخفي سعادتي لما شوفتها تاني ولما لاقيتها مجهزالي الرساله وخدت الرساله ومشيت في طريقي للمستشفي عند خديجة وبعد مسافة وقفت وفتحتها وبدات أقرأ كلامها ليه
_ كل اخبارك تهمني حتي اللي انت شايفها هايفة.. ومبسوطة قوي انك اصتلحت مع اهلك واتمنا ان ميحصلش بينكم اي زعل تاني ، وبنسبة لشغل والسكن ف ده مفيش اسهل منه انت دلوقتي تقدر تأجر سكن بعد ما تاخد فلوس من ورا الرواية بتاعتك.. انا بفكرك بس ان في فلوس علشان واضح انك ناسيها.
واما عن اخباري ف انا في زحام من النعم.. ومغمورة بالسعادة الفترة دي.. بقا ليه صحاب في المدرسة كلهم اصغر مني بس في بينا توافق فكري ، وبقالي مدرسين ومدرسات مفضلين عندي والحمدلله حاسة باحترام وتقدير الكل ليه ولحد ما محبوبة وسطهم بس الامر مش بيخلي من بعض التنمر لاني بطولي ده كله بقعد في التخته مع عيال سنهم 15 سنه وكمان بقعد معاهم في الفسحه وبنحل مع بعض وبنتكلم مع بعض وبيعيروني ادواتهم وانا كذلك ولكن مبلعبش الحجلة ولا بجري معاهم ومخبيش عليك بكون نفسي قوي اعيش الاحساس ده ولكن بلاقي ان طولي ميسمحش وهزيد سخرية الناس مني وتنمرهم
واما عن اهدافي واللي بسعاله
هو اني اخلص الدراسة واكون مهندسة ديكور وانجح علشان نفسي اولاً وعلشان حبيت شخصيتي اللي في الرواية بتاعتك.. واما عن كلامي بخصوص المشاعر ف افتكر اهتمامي بالرد عليك وانتظاري رسايلك هو في حد ذاته تعبير عن مشاعري دي...
مستنيه اعرف اخر اخبارك
اتسعت ابتسامتي وانا بقرا رسالتها اللي كان باين انها كتبتها من غير كسوف زي المرة اللي فاتت واللي واضح منها انها بتتجاوز بسرعه الحالة اللي كانت عايشة فيها وثقتها في نفسها بترجع بشكل ملحوظ، واما عني ف انا زاد جوايا شعور الحب تجاها وكنت متمني لو ان معجزة تحصل وتخليني اكون معاها وميكنش كل اللي بيجمعني بيها رسايل وبس وكملت طريقي للمستشفي وانا محتفظ بجرعة مضاعفة من السعادة وحاسس انها مش هتنتهي بأي كلام او اخبار وحشة لغيت ما وصلت المستشفي واتجهت ناحية غرفة خديجة ومديت ايدي علي المقبض علشان افتح ولكن استوقفني صوت ابو خديجة وهو بيقول
_ انا عارف انك مياله ليه وملاحظ ان هو كمان ميال ليكي مفهاش اي حاجة كلنا حبينا واتحبينا يابنتي
كنت لسه هسمع رد خديجة ولكن اضطريت اخبط علشان الممرضة كانت جاية ولما دخلت لقيتها نايمة علي رجل ابوها وشها مجهد مايل لزرقة بشكل يخوف ولما شافتني اعتدلت وابتهجت ملامحها ف قولت بإبتسامة خفيفة
_ صباح الخير
قالت
_ قول مساء الخير
_ مساء الخير.. انا آسف اتأخرت عليكي بس خدتني نومة.. عاملة اية دلوقتي
قالت بإبتسامة
_ احسن.. متشكرة علي مساعدتك ليه امبارح
_ علي ايه. شدي حيلك علشان تقوميلنا بالسلامة انتي بس
قال ابوها
_ البركة فيك
ابتسمت ابتسامة ظاهرية وقولت
_ حضرتك عامل ايه
_ الحمدلله
كمل وهو بيقوم
_ ممكن شويه بره
_ طبعاً اتفضل
روحت معاه وبعد مسافة صغيرة من الاوضة وقف وقالي بعد ما كسا الحزن وشه
_ تعبينك معانا
_ لا ولا تعب ولا حاجه بس يارب يجي بفايدة
قال باختناق
_ مفيش فايده الدكاترة قالولي ان الكانسر انتشر في جسمها بشكل كامل وكلها مسألة وقت و.... وتموت
_ ربنا هو العالم يافندم مداش لحد علمه خلي ايمانك بالله كبير
_ ونعمة بالله.. بس انا عايز منك خدمة ، اعتبرها رجاء
_ اتفضل
_ هي دلوقتي بتعيش اخر ايامها والله واعلم بردو بس انا عاوزك تكون معاها.. هي بتحب وجودك جنبها... او بمعني اصح بتحبك.. انا عارف انه ميصحش اقولك الكلام ده بس لو كان ده هيسعدها في اخر ايامها معنديش مشكله اقوله
_ متقولش كده.. انا يسعدني ان وجودي ممكن يفرق معاها ويساعد في شفائها.. حاضر يافندم انا هكون معاها.. بس حضرتك مش فاهم ده مش حب هي معتبراني صديق وبس
_ المهم انك فارق معاها و جيتك بتخليها فرحانة
قولتله هفضل جنبها وبعدين رجعنالها انا وهو وبقينا نتكلم مع بعض لغيت ما جاله تليفون وخرج وقتها رجعت ابصلها وابص لشكلها التعبان واللي أصبح لونه مايل لزرقة من كتر التعب والكيماوي اللي بتاخده وجسمها الهزيل اللي تناقص اكتر من الاول لغيت ما عظام وشها برزت شوية وكذلك ايديها ف قولت محاول فتح كلام معاها
_ شكلك احسن النهاردة
قالت بتعب
_ كدة احسن امال لو مش احسن كنت بقيت عاملة ازاي
_ لا شكلك احسن النهاردة انا بقولك اللي شايفه
_ امال انا حاسه نفسي فاضيه من شدت التعب ليه.. ده انا لو حد زقني بصباعه هقع
_ كلنا لما بنتعب بنحس بالهزل وانا قوتنا راحت.. بس انتي قوية يا خديجة وهتقدري تعدي وتنتصري علي المرض ده
_ كنت قوية ، هتصدقني لو قولتلك اني بقيت بتمني اجلي يجي بسرعه علشان ارتاح من التعب ده
_ بعد الشر عنك متقوليش كده.. هتعدي صدقيني.. ومش عايز نكد ماااشي انا مخنوق لوحدي
قالت بقرف
_ يابني انت جاي لواحده بتودع ايه مش عايز نكد دي
_ياااما البنات يحبوا الافورة وايه يعني هنخلد في الدنيا ولا انتي عايزة تعملي زي ابليس تعيشي لنهاية
_ ابليس.. يا دعمك المعنوية ياخي
قولت بعد ما قعدت جنبها
_ متزعليش انا بفرفشك
ضحكت وقالت
_ جرب تحزني في مرة.. عشان انت شكلك مخالف
_ انا كده، زمان كنت بفرفش صاحبي بشكل ده
ضحكت وقالت بتردد بعد ما تلاشت ابتسامتها
_ هو انا ينفع اعمل حاجه يا ريان
_ حاجة ايه
_ ينفع ولا لا
_ ينفع
حاولت تقوم ف مسكت ايدها وساعدتها توقف ف قالت بتردد وهي متوجه ليه بكل جسمها
_ نفسي تحضني
بعثرت نظراتي وقولت بربكة
_ مفيش داعي للخوف ده مش هتموتي
_ مش خوف.. نفسي تحضني عادي
قولت بربكة
_ تمام.. تعالي
جاهدت نفسي علشان تقبل وفي النهاية مكنش قدامي غير اني انفذ رغبتها ف ضميتها لحضني وقفلت عليها ايديه وكنت حاسس بأيديها بتكلبش في هدومي وتحضني بقوة ، زاد توتري ولكن حاولت اخفية واصفي زهني ومكنش في غير جويرية اللي افتكرتها واتمنيت تكون مكانها دلوقتي وسرحت بخيالي معاها وكأني عايش اللحظة دي انا وهي وبس
#عاصم
دخلنا عندهم انا وبابا لقيناه حاضنها بقوة وهي دافنه نفسها بالكامل جوه حضنه ف شيحت بعيني بعيد عن بابا بعد ما حسيت بالاحراج ولما هميت اني اتكلم مسك ايدي وهمسلي اني اسكت وفضل باصصلهم وساكت وقبل ما يبعدوا شد ايدي وطلعنا وقالي
_ صاحبك بيتسلي ولا ايه
_ لا هو مش كدة بس يمكن لاقاها خايفة
_ خايفة! اممم طيب وهو متجوزش ليه
_ علشان مش بيشتغل ولا معاه شقة
_ انت جيت يا رشدي
قالها ابو خديجة بعد ما دلف علينا بشكل مفاجأة ف قال بابا
_ ايوة.. انت كنت فين
_ كنت بعمل تليفون.. مدخلتوش ليه
_ كنا هندخل
_ ادم هناك علي فكره
_ عارف بس ازاي تسيبه لوحده معاها
_ جاني اتصال مهم وقصدت امشي واسيبها علي راحتها
_ سايب بنتك علي راحتها مع واحد غريب
_ ايوة يا رشدي.. اذا كان ده هيخليها سعيدة.. والولد شكله ابن حلال مش وش غلط
_ بردو
_ معرفش بقا.. انا كنت عاوز اعمل حاجه تفرحها وخلاص
_ وهو وجوده لوحده معاها اللي هيفرحها
_ ايوة وجوده بيفرحها.. خديجة مياله ليه
سكت شويه يفكر وبعدين ربت علي كتفه وقال
_ مش مشكلة بس الاحسن يكون في اصول
قولت باستفهام
_ يعني ايه يا بابا
بصلي وقال
_ يعني يتجوزها
#فاطمة
بسبب حلم شوفته الليلة اللي فاتت بقيت طول المحاضرة مش قادرة اركز في ولا كلمة وفاقدة تركيزي تماماً وقلقانة ولما خرجت استنيت بجاد لغيت ما جالي وبعدين مشينا وفي الطريق قولتله
_ نفسي اروح عند البحر شوية ممكن
_ ممكن.. حالا نكون هناك.. بس في ايه مالك مش مظبطة النهاردة
_ شوية
_ في حاجة حصلت ، حد ضايقك
_ لا
_ امال في ايه
_ حلمت حلم الليلة دي مضايقني شوية
_ حلمتي ب إيه
_ حلمت ان شوية من اسناني وقعوا
التفت ليه وقلقه مالي وشه بسبب كلامي
_ وده معناه إيه
_ مش عارفه
_ انتي مجربه الاحلام دي قبل كدة
_ لا دي اول مره
#بجاد
قلقني حلمها اكتر منها ف مسكت التليفون وبحثت لقيت ليه تفسيرات كتيرة منها الحلو ومنها الوحش ف خدت احسن نتفسير وقولت وانا بسيب التليفون
_ اطمني ياستي بيقولوا طول عمر وانتهاء مشاكل في حياتك
_ معقول حلم وحش زي ده يكون معناه خير
_ عادي ملهاش علاقة.. متفكريش كتير مفيش حاجه هتحصل غير اللي كاتبه ربنا
_ ونعم بالله
بصتلي وقالت
_ اقولك حاجه
_ قولي
_ انا مفيش حاجه مخوفاني غير اني اتحرم منك
_ اموت يعني
_ بعيد الشر عنك.. انا اقصد البعد مش الموت.. خايفة جوازنا ميتمش
قولت بإبتسامة
_ طيب ما احنا متجوزين
قالت بإبتسامة
_ قصدي نعيش مع بعض في بيت واحد
_ طيب ما احنا عايشين مع بعض في بيت واحد
_....
_ إيه
دارت وشها عني ف قولت بإبتسامة
_ ما تقولي عاوزة فرح
رجعت بصتلي وقالت بضحك
_ عاوزة فرح، وعاوزة اعيش معاك براحتنا، وعاوزة يكون لينا بيت مع بعض كدة بعجبك
_ واولاد
_ واولاد، بس انت بتتريق علي فكره انا اقصد كل حاجه مش اللي بتفكر فيه وبس
_ واية اللي انا بفكر فيه
_ بجاد!!!
قولت ضاحكا
_ مالك.. سؤالي عادي انتي اللي غريبة النهاردة.. اسكتي بقا علشان انتي هتبوظي اخلاقي بتلمحاتك دي
_ انا
_ اه انتي وانا راجل معنديش غير سمعتي.. وانتوا كدة يا ستات بتحبوا تجرونا لرزيلة
ضحكت وقالت
_ محدش بيضربكم علي ايدكم علشان تروحوا معانا الرزيلة
_ مبنقدرش نقاوم كلامكم المعسول
قالت بإبتسامة
_ مش حجة حافظ على نفسك انت احنا مالنا
ميلت عليها وقولت
_ في حد يحافظ علي نفسه من نفسه
ضحكت بصوت عالي وقالت وهي بتزق وشي
_ ركز في الطريق
قولت بإبتسامة
_ طيب بقول ايه
_ إيه
_ ما بلاش مشوار البحر ونروح الشقة بتاعتكم
_ نعمل ايه في الشقة بتاعتنا
_ نفسي رايحة لشوية رزيلة
#مها
بقيت طول اليوم اتصل عليها وهي تقفل وقعدت علي اعصابي لساعات لغيت ما جت ف روحت عندها وقولت وانا بمسك فيها بعنف
_ كنتي فين!!
_ في ايه يا ماما ، كنت في الكليه وبعدين اشتريت كتب وذاكرت انا وزمايلي
_ ومقولتليش ليه انك هتذاكري وليه مبترديش عليه
_ علشان عرفاكي عاوزة تقولي ايه وانا قولتلك يا ماما انا مش هقول حاجه غير لما اعرف كل الحوار ده
_ مليكة انا مش عايزة اكون وحشة معاكي.. انا لغيت دلوقتي سيبالك الحرية تتصرفي زي مانتي عاوزة متندمنيش اني مديالك الحرية
_ وانا مبغلطش يا ماما وكلامي دائما بيكون صح وبعرف اتصرف
_ لا كدة انتي بتوقعي نفسك في مشكله.. ومصيبة لتكوني عرفتي مين اللي عمل كده ده مش بعيد يعمل فيكي زي ايسل
_ انا اللي يهمني دلوقتي مش مين عمل كده.. انا اللي يهمني ليه.. وايه اللي عمي احمد مخبيه عننا ، عمي احمد وراه كتير احنا منعرفهوش وعلي فكره طلع يعرف عيلة العربي من زمان
« تاني يوم»
#جويرية
بعد ما الكل خرج من البيت بعد الغدا انا مسكت التليفون وبقيت اتصل ب مليكة وهي تقفل ومتردش وفي الوقت ده الجرس ضرب روحت فتحت ف لقيت ست شكلها مش غريب عليه ف قولت
_ اهلا وسهلا اتفضلي
قالت وهي بتدخل
_ اهلا بيكي حبيبتي ، عامله ايه
_ الحمدلله
_ انا مامت مليكة.. فكراني
_ اااه افتكرتك اتفضلي اتفضلي
دخلتها وقعدنا في الصالون ف قالتلي
_ امال مامتك فين
_ راحت المستشفي
_ يا خسارة كنت فاكره انها اجازة الجمعة وقولت هلاقيها في البيت
_ هي بتكون اجازة بس اضطرت تروح علشان خالي
قالت وهي بتقوم
_ ماشي حبيبتي ابقا اجيلها مرة تـ.....
بترت كلامها لما عينها وقعت علي صورة خالي بجاد وبدا علي وشها التوتر قبل ما تتقدم عندها وتقولي
_ مين ده
_ خالي
_ خالك العيان
_ اه
زاد توترها وهي لسه بصاله وبعدين سحبت شطنتها وقالت
_ طيب انا لازم امشي دلوقتي اتاخرت
_ انتي لسة مشربتيش حاجة
قالت وهي بتتجه للباب هرولة
_ مرة تاني