رواية ذئاب لا تعرف الحب الجزء الثاني2الفصل الثالث والسبعون73الاخير بقلم نجمه براقه
عم الصمت بينا لدقايق وتعلقت نظرات زيد بالارض يفكر مع نفسه من غير ما يتكلم لا برفض ولا بالقبول بس انا كنت عارفة أنه هيرفض ومش عارف يقولها ازاي ومنع للأحراج قومت واتجهت بجسمي ناحية اوضتي عشان اعفيه من الحرج ده ويقدر يرفض براحته بعد كدة ولكن قبل ما اخطي خطوة قالي
_ رايحة فين
_ داخلة اوضتي
_ مش تسمعي اخر الكلام
_ عارفاه من غير ما اسمعه
_ وهو ايه
_ اللي انت محرج تقوله قدامي، قول مش هزعل ، انت من حقك ترفض، اي حد غيرك مش هيوافق علي الشروط دي
_ عندك حق.. مفيش انسان طبيعي ممكن يوافق بس اقعدي واسمعي هقول ايه
قال باسم
_ما تقعدي، انا قولتلك انه لو شاريكي هيقبل بأي حاجة ولو مقبلش يبقي انتي الكسبانة.. اقعدي مش هتخسري حاجة لما تسمعي رأيه بلسانه هو
قولت موجهه كلامي لزيد
_ قول انا مرتاحة كدة
وقف وقال
_ يبقي اقف انا كمان
سكت للحظات يرتب كلامه وبعدين
_ انتي اكيد فاكرة إني قولتلك امبارح اني مستعد اعمل اي حاجه علشان تطمني وكنت اقصد الكلمة اللي بقولها مش كلام وخلاص علشان اصالحك .. بس بصراحة طلب باسم صعب وخوفني الحقيقة ، اصل محدش ضامن اية اللي ممكن يحصل بعدين.. يمكن انتوا اللي تتغيروا.. يمكن انا مقدرش اوفي بوعدي.. يمكن يحصل اي حاجة انا مش هقدر اتوقعها.. حاجات كتيرة قلقاني...
سكت شوية يراقب تعابير وشي وبعدين قال
_ ومع كدة انا موافق علي شروطكم
قولت باستنكار
_ موافقة علي اللي قاله باسم؟!!
_ ايوة ولو عنده طلبات تاني انا بردو مستعد مدام ده هيخليكم مطمنين واساسا انا عارف ان كل ده هيفضل علي الورق وبس، انا مش ناوي اسيبك ولا ناوي نزعل تاني
_ اه بس انت لسة بتقول مش ضامن ممكن يحصل ايه بعدين ده انت حتي مش ضامن نفسك
_ انا ضامن نفسي طول مفيش مشاكل او حاجة تضطرني اتغير
_ يعني ايه
_ يعني عايزك وموافق
_لا لا انا اللي مش موافقة.. ده اسمه تهريج يا باسم
_ ياستي انتي مالك انا موافق
_ يازيد انت دلوقتي الحماس واخدك بس بعدين هتندم علي موافقتك دي
كملت موجهه كلامي ل باسم
_ باسم! اهو وافق مع انه مقلق يعني شاريني ، ف احنا ممكن نغير الشروط لحاجة ابسط من كدة.. انا مش عايزة الفلوس تكون سبب لخوفه انه يسيبني.. حتي لو طول عمره فضل متمسك بيه ورافض يبعد انا هفضل حاسة انه متمسك بيه علشان ميخسرش فلوسه
وقف قدامي وقال
_ لو هو ضامن انه مش هيزعلك و وافق يبقي مفيش مشاكل انتي محبكاها لية
_ يعني اية محبكاها ، حتي لو هو مش هيكون عنده مشكلة انا هيكون عندي .. وانا اللي مش موافقة.. انا مش موافقة اتجوزك يا زيد تقدر تشوف حد غيري
_ هو لعب عيال.. ياستي انتي مالك انا وافقت وشاري
_قولت لا يعني لا
قولتها ورجعت اوضتي وبعد وقت جه باسم يقولي
_ اطلعي يا خلود لسه مخلصناش كلامنا وعيبنا لما تسيبينا كدة
_ لا مش جاية غير لما تغير شروطك دي
_ هو لعب عيال ، انتي كدة بترخصي نفسك معاه لازم تعمليلك قيمة علشان يفكر مليون مرة قبل ما يزعلك
_ دي مش قيمة ده استغلال .. انت فاهم يعني ايه تفضل مستحمل حد عشان خايف فلوسك تروح او خايف تزعله عشان لا يبلغ عنك بوصل امانه
_ يااااحبيبتي ، يا مامااا ، هو شاري وقِبل بشروطنا ولو مش ضامن نفسه كان رفض متحبكهاش واطلعي انا بضمنلك حقك مش بستغله
_ لا يا باسم اضمنه بطريقة تانية انت كدة بتخوفني انا مش هو
_ يعني كدة
_ اه
_ماشي براحتك ، انا قولت شروطي وانتي رفضتي كدة دوري انتها
_ انا رفضت الجوازة كلها عشان خاطرك اظن كدة مش من حقك تزعل وتمشي
_...
_ خلاص يا باسم قوله يمشي مفيش نصيب
_ هو مش راضي يمشي
اتنهد بعمق وبعدين قال
_ خلااااص اطلعي وهنشوف ايه اللي يناسبك
لاحت ابتسامة علي وشي وقولت
_ يعني هتغير شروطك دي
_ ايوة بس هحط شروط غيرها ولو رفضتي او رفضتي الجوازة انا مش هتدخل تاني
_ طيب بس ونبي بلاش شروط تعجزية
_ هو فين التعجيز اذا كان هو اللي موافق.. غبية اللي بيجي بالرخيص بيترمي ويتجاب غيره.. انتي حره هو انا اللي هتطلق بسبب اني ابتسمت قدام شاشة التليفون
خدني ورجعنا عنده ف قال بإبتسامة
_ كيد فيه لو شوفتك بتبتسمي لتليفون مش هطلقك.. هحطك في مصحة للامراض النفسية علشان دي اعراض جنان.. والله انت فاهمني غلط يا باسم
_ هنشوف قال ياخبر بفلوس.. اتفضل خلينا نشوف ايه هيرضي الانسة
_ اتفضل
قعدنا ف قال
_ انا مستعد اغير كل الشروط الا شرط القايمه دي وان الشقة تتكتب باسمها .. انا بصراحه مش معايا اجهزها دلوقتي وهي كمان مفتكرش معاها تجهز ف مش هنتداين عشانك
ابتسم وقال
_ وانا موافق
_ والشبكة زي ماهي والمهر بردو
_ موافق
_ وشرط كمان
_ اتفضل
_ تكمل تعليمها هي جايبة مجموع حلو حرام لما يروح عليها واهو بالمرة علشان متشوفش انها اقل منك
بصلي وقال
_ انا مش قولتلك قبل كده تكملي وانا اتكفل بمصاريفك وانتي رفضتي يابنتي
_ قولت
_ اهي قالتلك.. وده كمان موافق عليه
زم شافتيه وقال
_ اممم. طيب و كمان....
قولت بمقاطعة
_ باسم كفاية..انا هقولك حاجة تطمنك شوية
_ قولي
_ عمي عبيدة بيعتبرني بنته لو حصل وابنه زعلني انا هشتكيه لابوه وانا متاكده انه هيجبلي حقي من عينه
_ اممم
قال زيد
_ اهي قالتلك
_ تمام . مبروك
اتسعت ابتسامتي ف قال زيد
_ اخيرا خدنا موافقة الوالي.. امتي الفرح بقا ياريت المدة متزدش عن شهر بالكتير
قال بقرف
_ شهر ايه هو احنا هنسلق بيض.. مش لسة هنسأل عنك ده انا سمعت انك كان ليك قضية اداب قبل كدة
ـــــــــــــــــــــــــــــــــــ
« بعد أيام»
#زيد
بعد أيام خدتها وروحنا الشقة علشان تشوفها وتقول رأيها فيها واول ما دخلت بقت تبص حوليها بذهول وبعدين بصتلي وقالت
_ دي شقتنا
_ ايوة اية رأيك
_ تحفففة... حلوة قوي قوي
عبس وشها وقالت
_ بس مش غالية شوية؟
_ غالية شويتين بس انتي شايفة شكلها عامل ازاي يعني تستاهل.. شقة دوبلكس بدورين وجنينة.. ومرجيحة عارفك عيلة وبتحبي لعب العيال.. وكمان علي البحر
كملت بابتسامة
وانا بتوجه ليها بكامل جسمي
_ وكمان في مركب بتتأجر قريب يعني كل شوية هنكرر الرحلة اياها
_ قالت بإبتسامة
_ بجد
_ بجد.. تعالي اوريكي الجنينة "
خدتها وطلعنا في الجنينة مررت بصرها حوليها وهي بتقول بذهول
_ اااالله يا زيد اية الجمال ده ، دي جنة مش شقة
_ طيب مقولتليش أية رأيك في المرجيحة
ضحكت وقالت
_ اهي المرجيحة دي اكتر حاجة مبسوطة بيها.. انا بفكر نحط تربيزة عندها علشان نفطر عليها الصبح
_ نفطر ونتغدا ونتعشا كمان.. تعالي هوريكي منظر البحر هيعجبك اكتر
طلعنا فوق وقفنا في البلكونة وقولت
_ اية رأيك في المنظر ده.. يريح النفسية غصب
قالت بذهول
_ ده بحر بجد.. ااالله الله الله
عبس وشها من جديد وقالت
_ بس دي اكيد غاليه قوي قوي.. كنت جبت حاجة بسيطة عن كدة
_ قبل ما اتقدملك كنت مقرر اني هسكن في العمارة في شقة زي شقة بشر بس بعدين قولت لا لازم شقتنا تكون حاجة حلوة فيها كل الحاجات اللي بنحبها انا وانتي.. انا ملاحظ ان اذواقنا متشابهه وافتكر كمان الالوان الهادية هتعجبك زي ما عجبتني
_ عجبتني قوي والجنينة كمان عجبتني قوي قوي والبحر والمرجيحة كل حاجة في الشقة تجنن بس بردو غالية.. كان كفاية شقة عادية مش كفاية انك هتجهزها لوحدك
_ انا قولتلك كنت هسكن في العمارة بس بعد كلامنا لما اتقدمت ورفضك لشروط باسم واثباتك ليه انك مش عاوزه غيري كان اقل حاجه اقدمهالك حاجه زي دي والعقد جاهز علي فكرة مش ناقص غير امضتك
_ لا
_ لا اية
_ مش همضي
_ الكلام ده انتهينا منه وده الشرط اللي اتفقنا عليه
_ لا انا مش همضي علي حاجه زي دي
_ بصي بصي علشان اريحك.. انا جهزت العقد ومش باقي غير امضتك وهتمضي ومش عايز ولا كلمة
_ يازيد انا مش عاوزة، انت هتحس طول الوقت انك مهدد ومش مرتاح
_ ياستي انتي مالك.. انا راضي.. مش هرجع في كلمتي لاخوكي، انتي عاوزاه يقول عليه اية عيل مليش كلمة
_ طيب خلاص نكتبها باسمنا احنا الاتنين
_ لاااا... واسكتي وتعالي اوريكي اوضة النوم
ابتسمت وقالت
_ شاورلي عليها هشوفها لوحدي
_ يابنتي انتي محجبة مقدرش امسك اتحرق
ضحكت وقالت
_ هو الحجاب بيحرق
_ ايوة امشي قدامي لسة قدامنا لف كتير
#بشر
بعد أيام جه يوم فرح زيد وخلود وفي وقت كنت بظبط الكارفتة قدام المرايا شوفت هاجر بتميل علي الكوميدينو وتسند دماغها بتعب لفيت ليها وقولت وانا بسندها
_ مالك
قالت بتعب
_ دماغي بتلف ونفسي غامة عليه
لاحت ابتسامة علي وشي وقولت
_ بجد
اومأت ايجابا وابتسامتها علي وشها ف قولت بترقب لردها
_ اللي بفكر فيه صح
زادت ابتسامتها وقالت
_ صح
قولت بذهول
_ يعني انتي حامل
ضحكت وقالت
_ اه
_ طيب ازاي ده احنا يدوب لينا شهر وشوية
_ اهو حصل.. عملت تيست امبارح وماما كشفتلي واكدتلي اني حامل
قولت وانا لسة مش مستوعب
_ يعني انا هكون اب
ضحكت وقالت
_ اه هتبقي اب.. مالك مش مصدق ليه ولا حد قالك انك مبتخلفش
_ لا بس مكنتش متوقع ان ده يحصل بسرعة دي
كملت وانا بريحها علي السرير
_ طيب اقعدي ارتاحي واقفة ليه
_ ما احنا رايحين الفرح مش هينفع ارتاح دلوقتي
_ اه صحيح.. طيب هتروحي تقعدي متقوميش لغيت ما نرجع وبكرة هجبلك واحدة تساعدك في البيت
قالت بإبتسامة
_ حبيبي انا اقدر اعمل كل حاجه ليه ندخل حد غريب بيتنا
_ مش هتعملي اي حاجة انتي هتقعدي وبس
_ انا عارفه انك خايفة عليه وعلي البيبي بس انا مش هدخل ستات في بيتي
_ خلاص انا هنضف ودادة امينة هتساعدك وخالتي وامك بس انتي ترتاحي
ضحكت وقالت
_ هتجنن ياريتني ما قولت
_ وانتي كنتي تقدري تخبي اكتر من كدة
_ لا طبعاً ده انا لما عرفت مكنش عندي صبر علشان اقولك واشوف فرحتك دي بس كان نفسي اقولهالك بطريقة حلوة لكن نعمل ايه الدوخة كشفتني
_ تتعوض في الحمل الجاي اللي بعد تسع شهور ان شاءلله
روحنا الفرح وانا مش قادر اخفي فرحتي ولا خوفي عليها وعلي البيبي وطول الوقت وانا بحرص بهوس من ان حد يلمسها وعمال اجيبها من هنا لهنا واحرص بطنها وابعد اي حد يقربلها ف جالي زيد ومعاه خلود بفستان فرحها وقال
_ في ايه يابني مالك مجنون كدة.. اوعي تقول انها حامل
قولت بسعادة
_ اه
فتحت خلود بوقها بذهول وراحت ناحيتها تحضنها ف قولت وانا بحاول امنعها
_ لا لا بلاش حضن
شدني زيد من ايدي وقال
_ بس يا مهوس.. تعاله قولي
بص حوليه وبعدين قرب وهمسلي
_ حامل ازاي
_ يعني ايه حامل ازاي
_ يعني مين اللي عملها
زقيته عني وقولت
_ ولما اتف عليك دلوقتي.. ايه مين اللي عملها دي ما تحترم نفسك
_ يابني انت مش فاهم العيلة شيفاك محترم ازاي ده انا لسة من يومين سامع ابوك وهو بيقول لخالتك انك بتتكسف واكيد لسة ما لمستهاش
_ زيد انا مش عايز اقل ادبي عليك في يوم فرحك
بص حولية وبعدين ميل عليه وقال
_ يابني افهم... طب يعني انت متاكد انها حامل.. اصل ازاي
ضربته بكوعي في بطنه وقولت
_ هفطسك دلوقتي
تأؤه بالم ف جه بدر وقال وهو بيحضني
_ بشر مبروك يا حبيبي الف الف مبروك احمدك يارب هكون عم
قولت بإبتسامة وانا بربت علي ظهره
_ الله يبارك فيك حبيبي
بعد عني وقال
_ بس ازاي
_ هو ايه اللي ازاي
_ ازاي مراتك حامل
فجاة تعالت ضحكات زيد ف قولت بغيظ
_ تصدقوا انتوا عيال و*****
قولتها ومشيت وسيبتهم بيضحكوا وفي طريقي قابلت ابوي وقفني وقال
_ مالك
_ عيالك بيرخموا عليه
_ سيبك منهم وقولي
_ نعم
_ قال مرتك حامل
قولت بإبتسامة
_ ايوة
_....
_ اية
بصلي بقرف وقال
_ وانا اللي بقول عليك مأدب وشايل همك ومش عارف دخلت بالبت ولا لا.. ياد ازااااي حامل مين اللي حملها
_ياااالله ، يابوي عيب اللي بتقوله ده يعني ايه مين حملها.. مراتي هتحمل من مين غيري
_ الله يكسفك
قالها وسابني مش فاهم انا غلطت في ايه وبقيت مكسوف ابص لحد لغيت ما جه عمي شبل وقال بقرف
_ انت اية اللي عملته ده
_ عملت ايه ياعمممي عملت ايه
_ مش عارف عملت ايه
_ مش واخد بالي
بصلي بسخط وقال
_ انا الغلطان اني جوزتهالك
قالها ومشي وبعده جه عمي بدر وقال وهو بيحط ايده علي كتفي
_ مبروك ياولد اخوي
قولت بعبس
_ مبروك ايه دول كلهم محسسني اني عملت مصيبة
ضحك وقال
_ متزعلش اصل كلهم كانوا فاكرينك مأدب ومليكش في قلت الادب
_ يعني حضرتك وابوي وعمي شبل وكل اللي مخلفين دول قللات الادب وانا اللي هكون مؤدب ما تعقلوا الكلام في ايه واقسم بالله ندمتوني اني جيت الفرح مش كدة يا جماعة
#بدر
لأيام بحايل فيها وهي مش راضية تصتلح ولا بقيت بشوفها نهائي وجه يوم الفرح وبقيت مستنيها لساعات وقبل انتهاء الفرح بنص ساعة تقريباً جت واتجهت ناحية خلود وزيد باركتلهم وبعدين رجعت عشان تقعد جنب فاطمة ف اتجهت ناحيتها وقفت في طريقها وقولت
_ بتتجاهليني ليه
_ كدة.. ومتكلمنيش احسنلك
همت انها تمشي ف وقفت في طريقها وقولت
_ مش هتمشي غير لما نتكلم
_ انا مش عاوزه اتكلم معاك انت كلامك دبش وبتقل ادبك
قولت بإبتسامة
_ واية يعني مش هبقي جوزك
_ بعينك لو انت اخر واحد في الدنيا مش هتجوزك
« بعد 10 سنوات»
_ مليكة
_ نعم ياحبيبي
_ اية اللي ملبساه ل سيدرا ده انا مش قولت متلبسهاش كدة تاني
_ بدر!!!! دي طفلة اعقل
_ طفلة يعني ايه.. دي بنت لازم تلبس حشم.. ولا عاجبك رجليها ودرعاتها اللي باينين ما تلبسيها مايوه احسن
_ ياحبيبي دي طفلة عندها سبع سنين حرام عليك متخنقهاش عليها
_ ماخنقهاش عليهاااا! طيب ايه رأيك هتتحجب من بكرة يا مليكة
#جويرية
كانت العيلة كلها متجمّعة عندنا علي الغدا.. بجاد و ولاده وبشر و ولاده وزيد و ولاده وبدر وملكية وبنتهم وعلي قد ما كان يوم حلو والكل مبسوط إلا إني دماغي كانت هتنفجر بسبب العيال ف دخلت اوضتي بعد الغدا قعدت علي السرير عقلي شارد للحظات وبعدين فتحت الدرج طلعت تلات قصص.. قصص ريان اللي انا مشفتهوش من يوم ما طلبت منه يتجوز خديجة ولا اعرفله عنوان ولا رقم تليفونه وكل متابعتي ليه علي بيدج بتاعته علي النت عملها من كام سنة وبقا ينزل عليها سكريبات صغيرة وبيعلن عن اي قصة جديدة بينزلها ومكنش بيذكر اي تفاصيل عن حياته نهائي.. وكان كل ما ينزل قصة اروح اشتريها وكل مره الاهداء بيكون ليه زي ما قالي زمان مع عدم ذكره لاسمي وساعات كتير كنت بكدب نفسي واقول ان الاهداء ده مش ليه يمكن لمراته
_ قاعدة وحدك لية
قالهالي بابا بعد ما دخل عليه ف قومت وقولت
_ صدعت من العيال وجيت اريح شوية
اتقدم ناحيتي وقال
_ عيال يطيروا المخ بس عسلات.. عقبالك
_ عقبالي إيه
_ تجوزي وتخلفي.. خلاص بقيتي مهندسة قد الدنيا ومفيش حاجه تعطلك عن الجواز تاني
_ ان شاءلله
_ يعني موافقة
_ موافقة علي ايه
_ تجوزي
_ مش لما حد يتقدم الاول نبقي نشوف
_ ا فيه.. معيد كان عندك في الكلية جالي وطلب يدك
_ معيد عندي انا؟! مين ده
_ اسمه اسامة معقول مكنتيش تعرفي
_ لا مكنتش اعرف هو متكلمش معايا ولا لمحلي حتي
_ طيب واية رايك
_ ممكن سؤال يا بابا
_ اسألي
_ ملاحظة انك مش بتعترض ان العريس المتقدم مش عربي
_ علشان انا وعدت امك زمان ان طالما العريس كويس وراضين بدينه وخلقه يبقا هنوافق ، زائد ان العرب محدش فيهم يعرفك يعني لو استنينا عريس منهم مش هتجوزي
_ وحتي لو فيه عريس منهم ، مين هيتجوز واحدة كملت التلاتين
_ كتير اللي يعوز يتجوزك سواء عربي او غيره ، انتي بيتقدملك عرسان كتير في منهم اللي برفضه من بره بره وفي منهم انتي اللي بترفضيه بحجة تعليمك
_ ما انت عارف يا بابا اني كنت عايز اركز في التعليم والجواز كان هيعطلني كتير دي هندسة وانا تعبت وسهرت اليالي غير الدروس اللي بشيء الفلاني علشان اقدر اوصلها.. هي اه هندسة ديكور بس اسمها هندسة وتعب ومجهود
_ طيب واديكي خلصتي قولتي ايه
_ في ايه
_ في المعيد ، نسيت ولا بتتهربي
_ لا منستش ولا بتهرب.. بس انا مش مستعدة لجواز دلوقتي.. يعني ادوق ثمرة نجاحي الاول
_ يابتي العمر بيجري هتفضلي لامتي تأجلي
_ لما اكون جاهزة
_ وامتي هتجهزي.. ولا في حاجه في دماغك مقيلاش عليها
_ لا مفيش اي حاجة
توجه بعينه ناحية الكتب وبسرعة وقفت قدامه وريتهم عنه ف قال
_ بتداريهم ليه، شوفتهم كتير قبل كدة .. بس انتي كدة بتضيعي عمرك.. هو مبقاش موجود ولا حتي طلب يدك
قولت بربكة
_ انا مش فاهمه انت بتتكلم عن إيه ، لو علي القصص ف انا بقراهم عادي انت عارف اني بحب اقرا وعندي غيرهم كتير
كملت وانا بفتح دلفة الدولاب
_ شوف كل دي كتب حضرتك فهمت غلط
قرب مني وقال في الوقت اللي انا بقاوم علشان دموعي متظهرش قدامه
_ ايوة فاهم بس هقولك حاجة .. انا مظلمتكش يابتي.. هو اللي مكنش ينفع وكمان مطلبكش مني .. بس انا فاهم انتي حاسة بأية من زمان وملاحظ كل حاجة
_ حضرتك بتقول ايه مفيش حاجه من دي
انسابت دموعي غصب عني ف قال
_ مش مهم انا بس حبيت اقولك لا تكوني محملاني ذنبك ""
سكت.. مكنش عندي حاجة اقولها ولو عندي مكنتش هقدر اقولها ل ابويا
ومرت الأيام واستلمت المكتب اللي بجاد وبابا وماما عملهولي هدية علشان ابدء حياتي المهنية ولكن اقصي شغل عملته لمدة شهر وشوية هو شغل لغرف اطفال ولاد ولاد عمي اللي حبوا يجاملوني وبعد كدة بدات احس اني عمري ما هنجح ويأست بدري بدري لدرجة اني ناويت اقفل المكتب وابتدي اشوف شغل في اي شركة وبالفعل رجعت المكتب علشان الم حاجتي منه واقفله ف جت البنت اللي شغاله معايا وقالتلي في واحد عاوزة يقابلك
سيبت اللي بعمله وقولت
_ واحد مين
_ مقالش اسمه
شردة شوية افكر هو مين ده وبعدين قولت
_ طيب دخليه
_ حاضر
طلعت وانا قعدت علي المكتب في انتظاره وبعد اقل من دقيقة فتحت الباب وقالت وهي بتشاور لداخل
_ اتفضل
بصيت للباب بترقب لغيت ما ظهر قدامي بطلة اشبه بطلات رجال الاعمال قومت من مكاني و وقفت متجمدة للحظات وانا ببصله واتفحص شكله اللي اتغير قوي لدرجة اني فضلت للحظات استوعب انه هو نفسه ريان ومش مجرد تشابه، بقا انضج في الشكل واشيك وبقا اجراء في نظراته ليه اللي اتمحي منها الكسوف بتاع زمان.
وبصعوبة استجمعت نفسي وقولت
_ ريان؟!
قال بإبتسامة ونظرات الشوق في عينيه
_ ريان
لملمت نفسي وقولت بارتباك
_ ات،... اتفضل
كملت بتوتر شديد وانا بشاورله علي الكرسي
_ أقعد... سحر قهوة لو سمحتي
_ حاضر
مشيت سحر وقفلت وراها الباب وهو اتقدم ناحيتي وقال وعينه متعلقة بيه
_ مبروك المكتب يا بشمهندسة
قولت بارتباك
_ الله يبارك فيك.. هو انت جايلي انا
_ اه .. استنيت كتير علشان اقدر ارجع تاني واقابلك
_ وكنت فين كل ده
_ كنت بكون نفسي علشان لما اجي تشوفي حاجة مختلفة عن اخر مرة
_ اه خدت بالي شكلك متغير كتير عن زمان.. باين عليك النجاح
تحمحمت وقولت بتردد
_ عامل ايه مع مراتك
_ الله يرحمها ماتت بعد جوازنا بكام شهر.. الكانسر كان تمكن منها ومفيش اي حاجة نفعت
_اه، الله يرحمها ويصبرك
_ امين
_ امال كنت فين كل السنين دي
_ ما انا قولتلك كنت بكون نفسي
_ عشر سنين مشغول في تكوين نفسك... ولا اتجوزت تاني
_ متجوزتش
_ امال ايه
_ كنت بشتغل واحوش قرش علي قرش ، كنت بعمل اسم ليه.. وعملت هو مش اسم كبير بس لحد ما كافي.. انا وبابا بقا معانا شركة ولينا شغل خاص بينا ، وبقالي تلات قصص بأسمي في المكتبات وحاليا الرابعة في الطباعة كل ده في العشر سنين..
كمل وهو بيمرر عينه في المكتب
_وانتي اهو باين عملتي ايه في العشر سنين دول..بقيتي مهندسة ونجحتي اهو زي ما توقعت بالظبط
قولت متجاهلة كلامة
_ وسط كل ده مفضتش دقيقة تبعت رساله حتي
ابتسم وقال
_ وانتي كنتي مستنية مني رسالة؟!
بعثرت نظراتي بربكة ف قال بإبتسامة
_ انا فاكر آخر مرة اتكلمنا قولتي لو بعتلك مش هتردي ، بس شكله طلع كلام من ورا قلبك.. واه يا جويرية فضيت كتير ومنعت نفسي اني اكلمك بس كنت بستناكي عند الجامعة واشوفك وانتي خارجة او داخلة وكل مرة كنت بتمني اجي اكلمك لكن كنت بقول لسه شويه لسه شويه
_ لسة شوية علي اية
_ علي إني اقدر ارجع واقابلك من تاني ولما لقيت اني حققت حاجة جيتلك عشان اقولك انك وحشتيني ومنستكش لحظة طول العشر سنين دول.. يمكن لو كنتي بتقري القصص اللي بنزلها وقريتي الاهداء اللي في كل قصة كنتي فهمتي انه رسالة ليكي
_ كنت عارفه انهم ليه بس كتير كنت بقول اني غلطانة واني واخده الكلام علي نفسي وانت متقصدنيش.. عشر سنين وانا بسأل نفسي هو فين وليه صدق ما طلبت منه يبعد واختفي نهائي.. انا كنت بتتبع اخبارك بشكل دائم بس انت مفكرتش تظهر مرة واحدة تعرفني اني علي بالك وشككتني لمليون مره في اهدائك ده ، كنت كتير بقول يمكن بيقول كدة لمراته مش لية
ابتسم وقال
_ وانا كنت بقول زيك كدة مكنتش اعرف انك بتسألي ولا تدوري وقولت اني اتنسيت ، بس بردو كنت متابعك.. بدر كان بيقولي كل جديد عنك، واديني رجعت اهو
_ متأخر بس المهم انك رجعت
تقدم خطوة حط ايده علي ايدي وقال وهو بيضمها
_ المهم اللي بعد كدة.. جويرية انا كل اللي عملته الفترة اللي فاتت كان عشان هدف واحد وهو انتي.. توعديني انك توقفي جنبي في اللي جاي
_ اية اللي جاي
_ هطلب ايدك والأكيد ان أهلك هيرفضوا.. لمرة واحدة اقفي معايا
_....
_ اية.. هتخافي تقولي عاوزاني
خدت نفس واستجمعت شجاعتي وقولت
_ مش هخاف
ابتسم وقال
_ يعني اروح لابوكي
_ ايوة
طالت نظراته ليه بصمت وبعدين قال
_ اتغيرتي قوي.. كنت خايف ارجع الاقيكي بنفس خوفك زمان
_ خوفت كتير وضيعت سنين من عمري بسبب الخوف والسكوت.. بس خلاص انا مش هضيع يوم تاني كفاية كدة
ضحك وقال
_ لا اتغيرتي بجد.. طيب اقدر اعطلك شويه تحكيلي حياتك كانت ماشية ازاي"
قعدنا نتكلم وحكينا لبعض كل اللي حصل في السنين اللي فاتت وقبل ما يمشي قالي انه هيحاول يوسط بدر علشان يكلم بابا النهاردة وبعد ما مشي اتصلت ب بجاد وطلبت منه يجيني المكتب وبالفعل ساب اللي في ايده وجاني والقلق باين علي وشه وقالي وهو بيتقدم ناحيتي
_ في اية قلقتيني
قولت بسعادة
_ ريان رجع
بهتت ملامحه وقال
_ رجع امتي وانتي شوفتيه فين
_ جالي هنا
_ نعم
_ مش ده المهم
_ امال ايه المهم
_ المهم انه هيطلب ايدي .. ارجوك يا بجاد اقف معايا
_ يابنتي انتي مش بتقولي متجوز
_ مراته ماتت بعد جوازهم بشهور ومبقاش في حاجه تمنع
_ طيب مش نعرف ظروفه ايه الاول
_ ظروفه كويسة قوي بقا معاهم شركة وعربية وتليفونه من الغالي وبقا كاتب روائي معروف يعني عريس مناسب، وعلي فكرة هو مرضيش يرجع تاني قبل ما يكون نفسه ، عشان توافقوا.. نجح عشاني.. علشان خاطري يا بجاد متتخلاش عني واوقف معايا
_ اكيد ، بس نشوف ابوكي هيقول ايه الأول مش يمكن يوافق
#بدر
كلمني ريان وطلب يشوفني وطريقته كانت بتقول ان في حاجة مهمة عايز يقولهالي ف روحتله سلمت عليه وقعدنا ف قالي
_ كنت عايز اتكلم معاك في موضوع مهم
_ سامعك قول
_ زي مانت عارف وضعي المادي بقا كويس ، معايا شقة وعربية وشغل "
_ ايووة... كمل
_ ومش ناقص غير اتجوز .. انا دلوقتي 36 سنة ولغيت دلوقتي متجوزتش حتي خديجة جوازنا مخرجش عن الورق.. وصبرت كل ده علشان اكون نفسي واجيلكم اطلب ايد جويرية.. انا عارف ان الموضوع ده حساس بنسبالك بس انا شايف انك عايش حياتك عادي وبتحب مراتك وخلفت كمان.. انا عايزك توقف معايا يا بدر
_ اقف معاك اعمل ايه يعني
_ تكلملي عمك
_...
_ ملقتش انسب منك يكلمه
_ تمام
_ تمام اية
_ هكلمه
_ بجد
_ بجد.. ومش هسبق الاحداث بس انا مش هسيبه غير لما يوافق
ابتسم وقال
_حبيبي يابدر.. وانا هشلهالك جميلة طول العمر
_ علي ايه يابني ، ربنا يسعدكم مقدما
بعد ما ناهيت قعدتي معاه روحت الشغل في الفرع الرئيسي اللي عمي وابويا دايما قاعدين فيه وهناك لقيت عمي شبل معاهم رميت السلام وبعد ما قعدت قولت
_ كان في حاجه عاوز اتكلم معاك فيها ياعمي
_ قول
_ ريان السبع
اعتدل عمي بدر في قعدته وقال بترقب لردي
_ ماله
_ طلب مني اكلمك ، عاوز يتجوز جويرية
قال عمي شبل
_ وهو ايه اللي فكرة بينا ده، وازاي يفكر في جويرية بعد اللي عمله ، وازاي اصلا يكلمك انت هو ناسي انك كنت خطيبها والخطوبة اتفشكلت بسببه
قال بابا
_ باين عليه عاوز علقة جديدة تفوقه
قولت
_ ليه يا جماعه ريان انسان كويس وكلنا عارفين اخلاقه وهو عاوزها من صغره، ولسنين بيكون نفسه علشان يتقدم وتوافقوا عليه.. ولو علي انها كانت خطيبتي ف الكلام ده فات عليه سنين وانا نسيت ودلوقتي متجوز ومخلف
كملت موجة كلامي لعمي بدر
_ وصدقني ياعمي مش هتلاقي زيه ليها.. هو عاوزها وافتكر هي كمان رافضة الجواز كل السنين دي عشانه
قال ابوي
_ انت اللي بتقول اكدة.. ده بدل ما كنت بندقته لما طلبها منك.. هو اللي بيجري في عروقك ده اية ، دم سمك ياد
_ ابندقه ليه يابابا علي فكره انا وريان اصتلحنا من زمان وبنتواصل مع بعض عادي ونسينا كل اللي حصل
_ علشان معندكش دم .. ولا قوله مش موافقين.. لو هو اخر واحد في الدنيا مش ممكن نجوزهاله بعد اللي عمله فيها وتعديه علينا
_ طيب مش نشوف عمي هيقول ايه
_ هيقول اية يعني غير انه هيرفض ويقولك متفتحش السيرة تاني
قال عمي وهو بيقوم
_ استنا يا عبيدة ، بدر! قوله يجي عاوز اشوفه واتكلم معاه
قولت باندهاش
_ يعني موافق
قال بابا
_ كلام ايه ده يابدر.. هتقعد معاه وتاخد وتدي
_ هنشوف يا عبيدة.. هنشوف وربنا يعمل اللي فيه الخير
قال عمي شبل
_ شكلك عندك استعداد توافق يا بدر
قال بتنهيدة
_ والله مش عارف يا خوي بس انت شاهد كام عريس اتقدملها وهي ترفض لغيت ما كملت التلاتين.. هنشوف لو يستاهل ويستحقها صح ، مقدميش حل تاني غير اني اوافق
#بجاد
روحت البيت وكلمت ماما في موضوع جويرية ف قالتلي
_ يعني هو كلمها هي بدل ما يكلم ابوها
_ما انا بقولك هيتقدم هو بس عرفها وياريت بابا يوافق.. الواد شاريها وهي بتحبه
_ ايوة ما انا شايفة ده بنفسي ، بس متفتحش السيرة دي قدام ابوك لغيت ما يروحله هو الاول
_ اكيد مش هعمل كدة.. المهم لو فتح معاكي الموضوع ده حاولي تقنعيه يوافق، جويرية كملت التلاتين دلوقتي ولسة هترفض عرسان لغيت ما تبور عشانه
_ اه والله يابني ، ماشي.. هحاول اقنعه ويارب يوافق "
بعد شويه اتفتح الباب ودخل علينا وهو شارد وبيفكر في حاجة قامت ماما في استقباله وقالت
_ حمدالله علي سلامتك
_ الله يسلمك... جويرية جت
_ لا لسة.. اجهز الاكل
_ مش دلوقتي انا داخل اريح شوية
دخل وسابنا مش عارفين حصل ايه ولا لية بيسأل عن جويرية، ومقدرناش نسأله ف رجعت البيت استقبلني عُمر و ومعتصم حضنتهم وشيلت عمر الصغير واتجهت ناحية فاطمة اللي بتستقبلني بحضن سريع زي عادتها وبعدين خدتهم مني دخلتهم اوضتهم ورجعت تقولي
_ مالها جويرية
_ مفيش حاجه.. مشكله في الشغل.. بتعملي ايه
_ كنت بذاكر للولاد
_ ربنا معاكي.. كلمتي مامتك واختك
_ اه كلمتهم
_ عاملين اية
_ تمام بس ايسل زعلانة ومودها متلخبط
_ مالها
_ هي كدة كل ما تقرب سنوية بابا.. هي اتأثرت قوي بموته
كملت بتنهيدة حزن
_ بتفكرني بنفسي لما تقرب سنوية بابا بجاد.. اصعب احساس ممكن الواحد يحس بيه ان يفقد انسان عزيز عليه وقتها بيقول ان اللي ماتوا ارتاحوا التعب للي لسة عايشين وبيتعذبوا في فراقهم
_ الله يرحمهم اقريلهم الفاتحة وادعيلهم
#بشر
خدت هاجر والعيال ونزلنا بيت ابويا نتعشا معاهم احنا وزيد وبدر و ولادهم واثناء الأكل قال ابوي
_ هو انا لازم اقولكم تيجوا عشان تيجوا ياد انت وهو
قال زيد
_ مشاغل والله يابوي
_وراك الديوان ياخوي مشاغلكم دي متشغلكمش عننا.. كل جمعة تلموا عيالكم وحريمكم وتيجوا نقضوا اليوم مع بعض
قالت مليكة بإبتسامة
_ سيدرا بقا عاوزة تيجي كل يوم مش جمعة بس
قال بإبتسامة
_ احسن من ابوها
ضحك بدر وقال
_ ما انا معاك كل يوم في الشغل يا بابا
_ وامك معاك في الشغل
قالت خالتي
_ ولا بقيت بشوفه.. الله يباركلها هاجر هي بس اللي بتسأل عليه.. انما دي ودي ولا بشوف وشهم.. الله يرحمك يا امينة قطعت بيه
قالت خلود
_ والله يا طنط ما بفضا دقيقة واحدة حقك عليه
قالت مليكة
_ وانا مستعدة اجيلك كل يوم بس ابنك بيقولي هو انتي معندكش حد يقولك رايحة فين وجاية منين ولازم هو يجيبني ويوديني كأني هتخطف
حد من نظرته ف قال ابوي
_ لم عينك ياد، بطل تبرقلها.. وقت ما تعوذي تيجي انتي او سيدرا كلميني.. الله يقطعكم ايه سيدرا دي.. قالت ايه عائشة او زينب مش كفاية اسم امها اللي انا لسه بحفظه
الكل ضحك عليه وبعد وقت من الضحك علي كلامه وتهزيقه لينا بالدور طلعنا انا وزيد البلكونة نشرب الشاي ف قولت
_ اية الاخبار
_ الحمدلله ماشية
_ عامل اية مع خلود
_ حلوين
_ عقلتوا ولا لسه
ضحك وقال
_ نعقل مين ده انا وهي واقفين لبعض علي الواحدة والعيال زهقوا مننا، حور كل ما تلاقينا بنتخانق تيجي تشد واحد مننا من ايده وتبعدنا عن بعض
_ طيب وبتتخانقوا ليه، نفسي افهم
_ كدة متفهمش ليه المهم لازم نتخانق ... مثلا لو شوفتها مندمجة مع ممثل آدب معاها خناقة وهي لما تعرف ان في حالة ست جاتني تقولي طلقني.. لو انا نسيت عيد ميلادها.. او نسيت اجيبلها شيكولاته لما جبت للعيال نتخانق.. مثلا شوفتها مره من غير الطرحة في البلكونة وكدة نتخانق بردو.. اهو بنتخانق وخلاص
قولت ضاحكا
_ والله انتوا ما كان ليكم جواز من اصله
_ لا ياعم متهزرش لا لا
_ ندمت
_ لا ندمت اية مش ندمان طبعاً بالعكس ده انا يمكن بخترع مشاكل علشان نتخانق
_ غاوي غم ولا ايه يابني
_ لا اصل بعد كل خناقة بنرجع مشتقين لبعض .. انا لما بحس بالملل بروح ادب معاها خناقة جديدة علشان الصلح بيكونله طعم حلو ، اكيد مجربتهوش انت الصلح ده ، شكلكم متفاهمين ومش بتتخانقوا كتير
قولت بسخرية
_انا وهاجر نتخانق!! لا طبعاً الحمدلله انا وهاجر متفاهمين قوي قوي قوي قوي
ضحك وقال
_ واضح قوي
_ يا راجل والله كرهتني في عشتي.. عليها عزت نفس الجاحدة، زعلها وحش ممكن سنه اصالح فيها واحايل علشان ترضا وتتكلم معايا من غير رسمية زيادة ، ومحسساني انها مبتغلطش.. وهي فعلاً مبتبتديش الغلط الا قليل جداً بس صعب اني اصالحها
_ جرب متصلحهاش في مرة
_ لا احنا اتعودنا اللي غلط بيعتذر ويصالح وهي لما بتغلط بتعتذر بس انا بصتلح بسرعه هي لا
_ خلاص يبقي طلع عينها علشان تصتلح انت كمان عاملها بالمثل ولما تتعب قولها ده اللي بحس بيه لما بصالحك
_ وهيجيب نتيجة
_ ايوة لازم يجيب نتيجة ولو مجبش اعتذر مره ومتكررهاش الواحد مخنوق لوحده
#مليكة
رجعنا البيت وسيدرا نامت في اوضتها وانا دخلت استحميت واترميت علي السرير وانا حاسة بجسمي بيهري من التعب وصداع من دوشة العيال ف غمضت عيني بتعب وبعد لحظات حسيت بأيد بدر بتدلك جبهتي فتحت وبصتله وقولت وانا ببوس ايده بوسة سريعة
_ حبيبي
_ تعبتي النهارده
_ شوية
_ معلش
_ معلش ليه انا بكون مبسوطة لما نتلم مع بعض ومش بتعب من تجهيز الاكل بس العيال يااااساتر بيخلوا دماغي قاااااد كدة
تمدد جنبي سحبني لحضنه وقال وهو بيدلك دماغي
_ ايوة حتي انا بكره اليوم ده علشان العيال الحمدلله علي سيدرا مش عايز عيال تاني
_ ولا انا كفاية عيلين عليه
رفع دماغه عن المخدة وقال
_ عيالين
ضحكت وقولت
_ اه ما انا بعتبرك ابني
ضيق عينيه وقال
_ ولما انيمك متكتفة في رجل السرير بتزعلي
#خلود
رجعنا البيت نيمت العيال في اوضتهم وبعدين رجعت ارتب البيت وبعدها دخلت اوضتي عشان انام والمره دي مستنتش زيد عشان كنت مخنوقة منه ومبكلمهوش ومرت ساعة وساعتين وهو لسة مدخلش الأوضة وانا متعودة مبنمش غير وهو جنبي حتي لو متخانقين ف طلعت اشوفه لقيته قاعد في الجنينة ومدد رجليه علي التربيزة قربت منه وقولت بجدية
_ مش هتدخل تنام
بصلي بصة سريعة وقال
_ مش جايلي نوم
_ ليه
_ كدة
قعدت قدامه وانا ساكتة ف قال
_ مش كنتي رايحة تنامي
_...
_ اية
_ هنام لما انت تنام
ابتسم ابتسامة خفيفة وقال
_ رابطة نفسك بيه ليه انا مش جايلي نوم
_...
_ مكسوفة تقولي مش بتقدري تنامي من غيري
_ اديك عارف
رجعت ابتسامته تملا وشه و وقف مدلي ايده علقت عيني عليها شوية ف قال وهو بيمدهالي اكتر
_ تعالي
حطيت ايدي في ايده و وقفت وهميت اني امشي ف جذبني لحضنه وقال وهو بيضمني
_ كنت هدخل واصالحك بس حبيت اشوف هتعملي ايه لو مجتش المرة دي
بعدت عنه وقولت
_ وانت متوقع اني اعمل ايه.. اسيبك وانام.. مانت عارف اني مش بيجيلي نوم غير وانت نايم جنبي
قال بإبتسامة
_ عارف... هممم هو انتي لسة بتحبيني يا خلود
ديرت وشي عنه بمكابرة بعد ما لاحت ابتسامة خفيفة علي شفايفي ف رجعني ليه بلطف وقال
_ سكتي لية
_ مش هقول
_ هصالحك انا المرة دي بس عاوز اعرف لسة بتحبيني ولا لأ
_ انت مش عارف يعني
_ لو هحكم علي الأفعال وخناقنا طول الوقت ف هقول اننا مبنطقش بعض، انا بسألك علي اللي انتي حاسه بيه
اتنهدت وقولت
_ماشي هقولك مع اني زعلانه منك.. كنت في الاول بقول ان الحب الزيادة ممكن يكون بسبب الحرمان من حاجه انا كان نفسي فيها وكنت متوقعة ان حبي ليك يقل بعد الجواز واقدر ابعد عنك مبقاش زي المجنونة لما تكون بعيد وهموت واسمع صوتك بس اكتشفت بعدين ان حبي ليك حب حقيقي وبيزيد كل يوم اكتر من اللي قبله لدرجة اني والله بفكر ادبحك وانت نايم عشان واحده اتمددت قدامك علي الشزلونج
ضحك وقال
_ يابنتي بتتعالج متخليش دماغي تروح بعيد وانا شايف الحالات متمددين قدامي حرام
_ متتعلجش عندك
_ طيب اقولك ايه.. اقولك ان 80 في المية من الحالات ستات يعني لو مش هستقبل ستات مش هنلاقي ناكل.. وبعدين انا مبحبش ولا عمر عيني تروح لوحده غيرك بطلي جنان بقا
_ انا فاهمه بس بغير عليك اعمل ايه
_ متعمليش دي حلها عندي
_ ازاي
_ مش هقولك مين جاني ولا هتكلم في شغل
_ ياااسلام وايه اللي هيخوفك عشان تخبي عني
_ يااااااصبر ايوب يابنتي انا برضيكي
_ مش عايزة اتراضا.. طلقني يا زيد
#ريان
كلمني بدر وقالي ان عمه عاوز يقابلني وحددلي معاه معاد وروحت انا وهو دخلت عليه المكتب وانا بحاول استجمع شجاعتي لأني اكلمه واحط عيني في عينه بعد كل اللي حصل زمان. ولما دخلت وشافني قام سلم عليه واشرلي علي الكرسي عشان اقعد قعدت وفضلت ساكت مش عارف ابدء منين ف قال
_ اتفضل قول
قولت بتوتر
_ زي ما قالك بدر
_ قول ، انا عاوز اسمع منك انت
تحمحمت وقولت
_ حاضر.. انا ،... انا يشرفني اطلب ايد جويرية بنت حضرتك
_ ليه
ارتبكت من سؤاله اللي مش عارف رده يكون ايه،
بصيت لبدر ف أومأ بجفونه يدعمني عشان اتشجع ف قولت
_ عشان مش هلاقي زيها
_ايوة..بس مش غريبة انك تطلب تتجوزها بعد اللي حصل
_ اللي حصل انا مكنتش مسؤول عنه واتفاجأت بيه زيي زيكم
_ انا اقصد اللي بعد كدة
_...
_ اية مخليك تطلب تجوزها بعد اللي حصل
طال سكوتي قبل ما استجمع شجاعتي واقول بحرج
_ علشان من صغري وانا متمني اتجوز جويرية .. انا آسف اني بقول كدة بس ده السبب اللي عندي
_اها.. طيب ومخوفتش اقول لا
_خوفت ولغيت دلوقتي قلقان من رفضكم.. بس انا اجتهدت لسنين علشان اتجرء واطلبها ومستعد انفذ اللي تطلبوه
_ طيب ولو قولتلك لا
_....
_ لو قولتلك لأ
_ هطلب تاني وتالت لغيت ما حضرتك توافق
سكت ومردش بكلمة بقيت قاعد قدامه متوتر من نظراته اللي مسلطها علية ومش عارف هو ناوي علي ايه وبعد سكوت استمر لدقايق قالي
_ طيب سيبني افكر وهرد عليك
ابتسمت وقولت
_ يعني اتأمل في الموافقة
_ قول يارب
تلاشت ابتسامتي وقولت
_ يارب
طلعنا انا وبدر وقولتله علي قلقي من انه يرفض ف طمني وقال انه احتمال كبير يوافق بس انا بردو فضلت قلقان وبعد يومين من عدم الرد روحت لجويرية المكتب قعدت قدامها وقولت
_ اية يا بشمهندسة ابوكي مقالكش حاجة؟
تبتسمت وقالت
_ قال
_ قال اية
_ قالي انك روحتله وطلبت ايدي
_ وبعدين
_ قالي فكري ومعاكي شهر كامل تعيدي حساباتك وانه مش هياخد رد مني قبل الشهر دة
_ شهر ليه هو عذاب وخلاص
_ اه هو بابا كدة بيحب يعذبنا
كملت بإبتسامة
_ بس انا رايي مش هيتغير حتي لو بعد سنة
_ هو ده العشم بس انا والله تعبت عارفة يعني ايه تعبت
زادت ابتسامتها وقالت
_ غمض عينيك وفتحها هتلاقي الشهر خلص
_ حركة سحرية دي
قالت بإبتسامة
_ اه
_ ما نجرب ميجراش.. اهو
قولتها وغمضت عيني
« بعد فترة من الزمن»
#جويرية
قالي فتحي فتحت لقيت نفسي داخل اوضة نوم معمولة بالديكور الفيكتوري مررت بصري بداخل الاوضه وقولت باندهاش
_ اية دة.. مين صاحب الفكرة دي
جه قدامي وقال بإبتسامة
_ انا بس مليكة فتنت عليكي وقالتلي انك بتحبي العصر ده، بصي هناك
قالها وهو بيشارو علي صورة معلقة بالحيط بصيت عليها لقيت نفسي بفستان دانتيل في صورة معدله قربت منها وقولت بذهول وانا بتحسسها بأيدي
_دي زي الحقيقية بالظبط
استمرت نظراتي لصورة لغيت ما حسيت بيه ورايا ايده بتسري علي دراعي لغيت ما بيوصل لكفي وبيشك اصابعه بفرغات صوابعي وايده التانية بتحيط خصري تعالت انفاسي بتوتر ف قال وهو بيضمني ليه
_ دي انتي... ياااه يا جويرية زي ما يكون حلم.. عمري ما تخيلت اننا نكون مع بعض
لفني ليه وقال
_ انتي حاسة ان اللي بيحصل ده حقيقي ولا حاسة انه حلم زيي
قولت بتوتر
_ شكله حقيقة اصل مليكة لمت صحابها يقرصوا في ركبتي وبتوجعني لو حلمت مكنتش وجعتني كدة
« تاني يوم»
فتحت عيني لقيت نفسي نايمة في حضنه وملاية مدرياني رفعت وشي ابصله واتأمل شكله هو ونايم وانا لسة مش مصدقة ان ده حصل بقيت اقول معقول اتجوزنا وانا دلوقتي في حضنه ولا بتخيل.. كان شبه مستحيل ان ده يحصل ومحتاج معجزة من عند ربنا.
وبعد وقت وانا مستمرة في نظراتي ليه وايدي بتلامس خده بلطف فتح عينيه وقال
_ زيي انا كمان فضلت ساعة ابصلك وانا مش مصدق انك معايا
_ كنت صاحي
_ منمتش اصلا .. مجنيش نوم الليلة دي
_ ليه
_ما انا قولتلك كنت ببصلك ومش مصدق نفسي ولغيت دلوقتي مش مصدق وبقول اصبر شوية هتصحي اصل انا كتير حلمت اننا اتجوزنا
قولت بإبتسامة
_ بجد
_ اه والله.. حلمت اننا عملنا الفرح وروحنا بيتنا و
اخفضت جفوني بخجل ف قال وهو بيزيح شعري عن وشي
_ وانك في حضني و...
ابتسمت ف قال
_ وبتجهزيلي فطار
عليت ضحكاتي ف قال بإبتسامة
_ اول مره اشوف او اسمع ضحكتك علي فكره
_ وانا
مر الوقت وجهزنا عشان نسافر لشهر العسل وسافرنا قضينا شهر كامل ونزلنا علي عزومة ماما وكانت كل العيلة حاضرة هناك الكل سلم علينا وباركوا تاني وقضينا ساعات مع بعض وفي وقت كنا كلنا بنضحك علي كلام عمي عبيدة وبابا الباب خبط قام بجاد يفتح ف كلنا قومنا لما شوفنا عمي جلال واقف علي الباب الكل اتقدم ناحيته وبابا حضنه وقال
_ جلال!!، ياراجل عاش من شافك
_ مشاغل والله ياكبير
كمل وهو بيبعد عن حضن بابا
_اتوحشتكم...اتوحشتكم قوي .. ازيك يا عبيدة
قال عمي وهو بيحضنه
_ بخير.. وحشتنا والله ليه الغيبة دي كلها
_ الدنيا عاد
سابه وحضن عمي شبل وبعدين رجع خطوة وقال
_ في ضيف جاي يشوفكم اصلكم اتوحشتوه قوي
التفت الكل لبعضه ف قال بابا
_ مين
_ الكبير.. رضوان العربي
تجمد الكل في مكانه ف قال بجاد
_ الكبير مين يا عم جلال
_ جدك رضوان العربي
_ يااارااااجل
_ ايوة تعاله شوفه
طلعنا كلنا علشان نشوف ازاي جدنا طلع عايش بجد وكمان جايلنا ، ولما وصلنا عند مدخل العمارة لقينا راجل هيبة جسمه منصوب وفي ايده عصاية براس اسد مدهبة بيبص لبابا وعمامي ويقول
_ عجزتوا يا عيال الجزم
بصو لبعض وهما مش مصدقين انه قدامهم ف قالي ريان بخفوت
_ ده جدك ازاي... ده ابوكي معدي السبعين تقريباً
_ اه ماهما عيلة معمرة
_ مش لدرجة دي بردو
في وسط ذهول الكل قرب بجاد منه وقال وهو بيحوم حولية
_ انت بجد
_ انت مين ياد
_ بيقولوا حفيدك... بس ازاي انت رضوان العربي مش المفروض انك دفعة سنة 73 ازاي لسة عا..... المهم حضرتك منور
استدار ليه وقال وهو بيتفحصه بنظراته
_ وه . انت بشر ، كبرت يا فقري وبقيت راجل
_ لا مش بشر ، بشر عدا الاربعين دلوقتي .. بشر حفيدك يا جدي عدا الااااااااربعين
_ امال انت ولد مين فيهم
_ ولد بدر
_اباي اباي ولد بدر ، جاك حشة تخشك ، جابك ميته ومبتجيش ليه تشوف جدك طالع جاحد زي ابوك وعمامك
بصلهم وقال
_وانتوا يا فرادي المراكيب محدش فيكم جاي يسلم علية لية
اتقدم بابا وقال
_ اهلا وسهلا يابوي اتفضل
قال وهو بيزقه براس عصايته
_ بعد اييييه جك بيت يتهد فوق راسك
تحمحم بحرج وهو بيبصلنا ف قال عمي شبل
_ نورت اسكندريه يابوي
_ ايوة ياخوي.. اديني هنورها علي طول.. بعد ما الحريم ماتوا وبعدهم العروسة الجديدة ماتت هي كمان بقيت قاعد وحدي
كلهم بصوا لبعض بعبس وهو بص لمليكة وقال
_ وانتي مبينه شعرك ليه.. بت مين دي
قال عمي عبيدة
_ مرات بدر ولدي يابوي
_ لا هو انت خلفت بدر.. طيب ولما هي مرت ولدك الع*** ممسترش مرته ليه... والله انا قلت من الاول انكم جيتوا اهنه وجيبتولنا العار
بصلي وقال
_ ومين دي
قولت بإبتسامة
_ بنت بدر ابنك يا جدي
_ ومالك لاصقة في الواد ده اكدة ليه..حتي لو اخوكي فسحي شوية
قال بابا
_ ده جوزها مش اخوها يابوي
_ ايوة ايوة... طيب ويكون ولد مين في اخواتك
_ لا ده من اسكندريه مش تبعنا
صرخ بعلو صوته وقال وهو بيرفع العصاية
_ منين!!!! مجوزها لواحد من برة العرب يا م**** يمين تالته اخدكم الساحة اجلدكم كلكم وهي وجوزها ال *** ده معاكم... طلقها ياد
اتقدم ريان وسط صدمة الكل وقال
_ لااااا وربنا ما تكون العربي نفسه ما انا مطلقها ، هو انا اتجوزتها بالساهل .. ده انا طلع عيني يا حج.. يلا يابنتي يلا
مسك ايدي وشدني ف قال جدي وهو جاي ورانا بعصايته
_ خد ياد.. عليه الطلاق لا تلطقها كية بت العربي تجوز واحد غريب دي اكدة هي والخاطية واحد
حد من مشيته ف شدني ريان وطلعنا نجري والباقين مسكوا في جدي بعد ما صوته رج الشارع وهو بيزعق ويشتم بابشع الألفاظ وبقا يضرب اللي ايده تطوله
🌹🌹🌹🌹🌹🌹🌹🌹🌹🌹🌹🌹🌹 💚 مرحبا بكم ضيوفنا الكرام 💚هنا في كرنفال الروايات ستجد كل ما هوا جديد حصري ورومانسى وشيق فقط ابحث من جوجل باسم بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹
بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹