رواية ذئاب لا تعرف الحب الجزء الثاني2الفصل التاسع والستون69 بقلم نجمه براقه
جويرية
في وقت الفسحة قعدت في حوش المدرسة عيني معلقة بالشجرة ومستنية علي امل ان ريان يجي تاني النهاردة ويعرفني انه موجود بعد ما غاب شهر تقريباً واخباره اتقطعت عني حتي لو مش هنتكلم.
وبعد وقت دام في انتظاري ليه زي كل يوم وقبل انتهاء وقت الفسحة شوفت عصام واقف هناك وبيشاورلي علشان اروحله بصيت حوليه اشوف لو حد شايفه ولا لا وبعدين قومت من مكاني وروحتله وانا حاسه بتوتر وقلق ولما وصلت قالي بإبتسامة
_ ازيك
_ الحمدلله
كملت بتردد
_ امال فين ريان
تلاشت ابتسامته وقال
_ هو انتي مستنياه
_ لأ بس هو مختفي ف بطمن
_ اها.. لا هو سافر من بعد ما اتجوز خديجة بيومين ويمكن غيابهم يطول
_ سافر فين
_ انجلترا تقريباً، مش فاكر قوي الصراحة المهم سافروا علشان خديجة هتكمل علاجها هناك هو اللي صمم علشان خايف عليها تموت
حسيت بالخبث بكلامه وانه عايز يفهمني ان ريان نسيني وكان ردي هادي ومختصر
_ عنده حق اكيد العلاج بره متطور عن هنا ربنا يشفيها
_ يارب ويخليهم لبعض،... هو انتي عملتي بلوك ليه صحيح هو انا غلط في حاجة
_ لا بس محدش هيوافق اكلمك _متقوليش لحد اننا بنتكلم
_ اية
_ صحاب بس في ايه
_ لا.. راجعة المدرسة الحصة هتبتدي
قولتها واستدرت علشان امشي ف قالي
_ علي فكرة انا ناويت نكون صحاب ومس هسكت غير لما نكون صحاب انتي متعرفنيش انا عنيد ودماغي جزمة
التفت ليه وقولت باستفهام
_ بتهددني؟
_ اهددك إيه يابنتي! انا وش ذلك ، انا عايز نكون صحاب بس
_ هو انت عندك كام سنة
_ عشرين
_ صغير انا 25 مش هنفع
ضحك وقال
_ انتي فكراني بشقطك
_ يعني ايه
_ يعني فكراني عايز اخد مكان ريان
_ انا مش فاكرة حاجة بس مش هينفع نكون صحاب الكلام ده مش مسموح بيه عندنا
_ ومسموح تحبي وتتراسلي من ورا اهلك
_ اممم.. شكلك بتهددني ، بس انا مش خايفة ، اصل اخويا عرف كل القصة دي وممكن اكلمه دلوقتي لو تحب
قال ببرود
_ كلميه اهو نتعرف
طلعت التليفون من الشنطة وقولت
_ دقيقة
ضغطت اتصال وحطيت التليفون علي ودني وقتها شوفت بروده بيتحول لتوتر وقلق قدامي ولكن ممنعنيش وسابني اكمل اتصال وبعد لحظات رد عليه بجاد فعلت الاسبيكر وقولت
_ ايوه يا بجاد
_ في ايه
قولت وعيني مثبته علي عصام
_ عارف الولد اللي قولتلك عليه اللي اسمه عصام.. اللي كلمني عن ريان قبل كدة
_ اه ماله
_ جايلي عند المدرسة وبيقولي عايز نكون صحاب وانه عنيد وهنكون صحاب يعني هنكون صحاب
قال عصام بتوتر
_ بتعملي ايه يخربيتك
قال بجاد
_ صحاب! وعنيد اااه..طيب هو عندك دلوقتي
_ اه
_ طيب قوليله يستنا خمس دقايق انا جايله
_ اهو سامعك
_ طيب ادهوني
مديت ايدي ليه بالتليفون ف ازدرد لعابة بتوتر وقال
_ لا مش هكلمه ثم ده مش اخوكي
قال بجاد
_ امسك التليفون بس وحطه علي ودنك واقفل الاسبيكر هقولك حاجة مهمة مينفعش البنت تسمعها
_ ياعم روح.. انا ماشي.. ولعلمك ده مش اخوكي
_ طيب استناني وانا هوريك البطاقة.. لو راجل استناني
_ ولا خايف منك.. وانا مش هعمل قيمة لناس زيكم
قالها ومشي وانا رجعت اكلم بجاد وقولت
_ خلاص مشي
_ وهو ايه اللي جابه
_ جاي يقولي عايز نكون صحاب ومصمم
_ مصمم! ماشي بس افضاله
_ لا خلاص هو مش هيرجع تاني.. بس هو كان فاكر اني هخاف وهوافق علي طلبه ف كلمتك قدامه
_ برافو عليكي جدعة.. عاوزين نعدي الترم ده وبعدين ننقلك في مدرسة تانية كدة مش هينفع
_ ماشي.. انت فين دلوقتي
_ في الدنيا
_ مروحتش الكلية
_ لا
_ لية
_ مش مظبط.. روحي شوفي دروسك ومتخرجيش من وسط زملاتك تاني غير لما تشوفي حد مننا جاي ياخدك
_ حاضر
_ شكراً يا جويرية.. انا مبسوط بيكي قوي ، انتي كدة اختي اللي اعرفها خليكي كدة دائما ومتخافيش من حد انا هفضل مساندك علي طول
قولت بإبتسامة
_ حاضر ربنا يخليك ليا
#بجاد
بعد ما نهيت كلامي مع جويرية بدأت ادور في الارقام اللي عندي عن حد يقدر ينقلها في مدرسة قريبة مننا او حتي مدرسة في طريق الكلية لغيت ما لقيت رقم عمي شبل ف جه علي بالي انه يمكن يقدر يكلملنا حد يقوم بالمهمة دي وبالفعل كلمته واثناء المكالمة شوفت ماما بتتصل قفلت عليها وكملت مع عمي وبعدين رجعت اتصل بيها ف قالتلي بصوت مبتهج
_ فين دلوقتي
_ في الشغل.. في حاجه
_ اه في
_ إيه
_ قلبك جامد
_ شوية.. في ايه يا ماما قولي
_ لما تعدل وشك الاول
قولت بزهق
_ معدول يا ماما قولي
_ طيب انا بحبك
_ متصله بيه علشان تقولي بحبك مش كبرت وطلعلي اسنان للكلام ده
_ إيه الرخامة دي والله خسارة فيك الخبر اللي هقولهولك.. خلاص هقول لبدر يرجع يرفض
قولت بترقب ولهفة للي هتقوله
_ بتتكلمي عن إيه
_ لا ما خلاص مش هقول
_ ماما ونبي اتكلمي.. بابا وافق
_ قولي بحبك الاول
_ ورحمة جدي بحبك بس اتكلمي.. بابا وافق
_ ايوة وافق
_ طيب احلفي بالله انه وافق
_ والله وافق يا حبيبي وافق
قولت وانا برجع للعربية
_مش مصدقك يا وفاء ، انا جاي اسمعه منه بنفسه
ضحكت وقالت
_ ياحبيبي وافق وانا هكدب عليك ، خليك انا وهو اجازة منكم النهاردة وعلي فكرة هو وافق بس مش هيتدخل في حاجة شوف بقا هتجيبها ازاي
قولت بسعادة
_ المهم انه وافق وانا هعرف اجيبها ازاي متشكر قوي يا ماما انا بحبكم قوي
_ واحنا كمان يا حبيبي يلا بقا مش فضيالك
_ انتوا رايحين فين
_ هنخرج مع بعض بقالنا كتير مخرجناش
_ ايووة هتستعيدوا ذكريات الماضي عارفه انا سن اليأس ده
_ طيب اتلم انا ممكن اقوم ابوك عليك تاني ومتطولهاش
_ ياحبيبتي وربنا ما في حد في سن اليأس غيري وامي مربتنيش ولا بتعرف تربي
ضحكت وقالت
_ ياولد والله هخليه يرجع يرفض بجد
_ خلاص يا فوفتي متبقيش ولية رخمة كدة يلا حبيبتي امبسطوا بس براحة الراجل عضمته كبرت
_ يعني اخليه يرفض
_ بهزر افوفا اجميل انت يلا حبيبتي سلميلي علي بابا وبوسيهولي... في خده ها في خده ، متتلككيش وتقولي بجاد اللي طلب ف تبوسيه فـ.....
قولت كده ف قفلت في وشي السكة ف قولت اكيد مش فاضية دلوقتي علشان كدة قفلت
وبعدها طلعت بالعربية وانا الدنيا كلها مش سايعة فرحتي وفوراً اتصلت ب مليكة ولما مجمعش افتكرت انها عاملة بلوك لفيت شوية حولين نفسي بحيرة لغيت ما افتكرت بدر واتصلت بيه
#بدر
مكنتش عارف اكلم مليكة بعد اللي قاله بجاد مكنتش عارف اقولها اني فشلت في اول اختبار ادتهوني علشان تختبر حكمتي ورزانتي زي ما قالت وروحت الشغل وانا بفكر في الموضوع ده وبفكر في كذا طريقة اقنع عمي بيها انه يوافق وبعد ما وصلت الشغل وصلني اتصال من بجاد ومجرد ما رديت قالي
_ اتصلي بمليكة فوراً خليها تشيل البلوك لانفخ اللي جابوها
_ ليه
_ بابا وافق
_ وافق علي ايه
_ اني اتجوز فاطمة يلا اتصل بسرعة وخليها تكلمني
_ بتتكلم جد
_ امال بهزر كلمها بسرعه بسرعة اديني مستني اتصالها
_ اوكي
قفلت معاه واتصلت بيها وانا مبسوط ومقرر اشوف نفسي عليها ف ردت وقالت
_ ها إيه الجديد
قولت بغرور
_ الجديد ان بدر ميحطش حاجه في دماغه ومتتنفذش
_ يعني اقنعته
_ طبعاً يابنتي ده انا بدر العربي يعني خلصانه بضربة خرزانه هاجي اقابل مامتك امتي بقا
_ ماما اية دلوقتي ، فهمني حصل ايه الاول
_ عمي وافق
_ هو انت كلمت مين فيهم عمك ولا بجاد
_ كلمت بجاد
_ يعني ايه.. لما كلمته اقنع ابوه يعني ولا ايه
_ لا
_ امال انت خليته يوافق ازاي
_ مش عارف وافق ازاي بس انا كلمت بجاد رفض طبعاً انه يتحدا ابوه وكان فاقد الامل تماماً وفقدني الامل انا كمان وكنت خلاص هسكت واسيبني منك ولكن بعد نص ساعة كلمني قالي ابوه وافق
_ طيب انت ايه دورك انا مش فاهمة
_ ولا انا فاهم انا عملت ايه بس المهم النتيجة.. ها هاجي اكلم ماما امتي
_ انت كدة بتنصب
_ انتي كدة اللي بتنصبي طلبتي بجاد ميسبش فاطمة وحصل ، امتي اقابل مامتك بقا
_ اوكي اوكي لما بجاد يتجوز فاطمة نبقي نشوف
_ نعم ياخالتي.. لا شوفي عقلك يقولك هتضحكي عليه هزعلك ده انا بدر الصايع اللي في العيلة ورحمة ابوكي اخطفك واسلقك واشرب شربتك ولا يهمني
ضحكت وقالت
_ مش هي كانت اخطفك واتجوزك هي امتي بقت اسلقك واشرب شربتك
_ من دلوقتي، امتي هاجيلكم
_ يابني مش نشوف هيحصل ايه الاول
_ انا هقولك هيحصل ايه بعد كده واريحك
_ قول يا فيلسوف الغبرة
_ احترميني علشان مهزقكش وخليني اكمل ... بجاد هيجيلكم وجوز خالتك هيرفض ف بجاد هيخطفها ويعيشوا مع بعض في تبات ونبات ويخلفوا صبيان
_ وبنات
_ لا احنا مش عايزين بنات كفاية قرف
ضحكت وقالت
_ انا مش عارف ليه مبعملكش بلوك بعد طول لسانك دي كل شيء
قولت بإبتسامة
_ علشان بتحبيني
_ ولا بحبك ولا بطيقك. اقفل
_ لا استني بجاد قالي اقولك تكلميه
_ اوكي هكلمه
_ هتكلميه
_ اه
_ امممم
_ إيه
_ فكريني امنع عنك التليفون لما نتجوز
#مليكة
بعد ما تماسكت وقدرت أبطل ضحك عليه اتصلت ب بجاد زي ما قالي ولما رد قال بزعيق
_ لو سقطتي السنة دي هتكون عملتك دي السبب ازاي تعملي بلوك نهارك مش فايت
_ ماحضرتك قليل حيلة اعملك ايه
_ قليل حيلة احسن ما اكون قليل ادوب وذوق
_ انا قليلة الادب
_ ايوة.. فين فاطمة
_ اممم
_ انتي لسه هتزومي هي فين
_ في الاوضه ومش بتكلم حد
_ اديلها التليفون
_ بقولك مش بتكلم حد عاوزها تعلالها
_ اخلصي يا مليكة لاحسن والله هخليكي تسقطي
_ طيب.. حسبي الله ونعم الوكيل
_ حسبني دكاترك كلهم صحابي
قولت بعصبية
_ طيب بقولك طيب هو انتوا كنتوا اشترتوني كل شوية تتعصبوا عليه
_ وطي صوتك
_ صحيح انا نسيت انهم بره طيب دقيقه متتكلمش هخبي التليفون
قولتها وخبيت التليفون في جيبي ودخلت عند فاطمة لقيتها قاعده نفس القعدة ف مدتلها ايدي بالتليفون وقولت
_ خدي
علقت عينيها بالتليفون ومتكلمتش ف قولت
_ بجاد عاوز يكلمك
طال سكوتها وعينيها لسة معلقة بالتليفون وبعدين زقته ودارت وشها عني ف قولت
_ حبيبتي هو عايز يكلمك شوفية عاوز ايه
مردتش ف حطيت التليفون علي ودني وقولت
_ مش راضيه
_ حطيه جنبها
_ مش هتمسكه
_ حطيه جنبها وملكيش دعوة
_ ماشي
#فاطمة
سابت مليكة التليفون وطلعت من الاوضة، كنت سمعاه بيتكلم ويطلب مني اسمعه عايز يقول اية حاولت كتير مقربش لتليفوني ولكن فشلت مقدرتش اقاوم رغبتي في سماع صوته ومسكت التليفون حطيته علي ودني وقتها سكت شوية وبعدين قال
_ فاطمة!.. عارف انك معايا، سامع صوت انفاسك .. وحشتيني قوي يا فاطمة وهجيلك وهاخدك ونعيش مع بعض مفيش حاجة هتبعدني عنك تاني
قولت بجمود
_ومين اللي قرر
_ انا.. انا قررت اني عمري ما هسيبك
_ قرارك ده جه متأخّر ، مبقتش محتاجاك
_ انا اسف كان غصب عني انا لو عليه مكنتش سيبتك دقيقة
_ وسبتني ايام.. بعدت عني في اكتر وقت كنت محتاجالك فيه.. سيبتني وانت عارف اني بموت بسبب اللي حصل.. بس خلاص انا عديت حزني لوحدي مبقلكش لازمة عندي دلوقتي
_ عندك حق في كل اللي قولتيه وقولي اللي انتي عاوزاه وانا بردو مش هسيبك وهاخدك يعني هاخدك
_ وانا مش هاجي معاك وفر علي نفسك المشوار والرصيد
قفلت السكة وعدا يوم واتنين ومفيش جديد لا جه ولا اتصل
#خلود
أيام وانا قاعدة لوحدي في البيت طول النهار يدوب تيتة بتيجي تبات معايا وترجع تاني لغيت ما حسيت بالملل الشديد وعدم الرضا عن نفسي وانا قاعدة مبعملش حاجة ف قررت اخرج من البيت اشوف حياتي وادور عن شغل، وعن جذور ليه عن اي حاجة تخليني اعيش بدل ما انا حياتي من غير هدف. وطلعت من البيت رجليه خدتني لبيت ابويا اللي بيبعد عن بيت جدتي ساعتين تقريباً لأنه في منطقة تانية بعيدة عننا ولما روحت هناك وقفت قدام الباب لدقايق وانا خايفة اخبط ومش قادرة اتوقع اي رد فعل لناس اللي جوه لما يشفوني ولا عارف حد فيهم حتي ابويا انا مش واثقة اني هقدر اتعرف عليه لو شوفته بعد السنين دي كلها وفي النهاية مقدرتش اخبط وقررت ارجع ولما مشيت خطوات حد فتح الباب وقالي
_ انتي مين
انتفض قلبي ورجعت ابص ورايا لقيت شاب طويل قوي بس باين ان سنه صغير ف قولت بتوتر
_ انا خلود بنت صاحب البيت
ابتسم وقال
_ خلود؟!.. انتي خلود بجد
_ ايوة ، انت مين
_ انا باسم...باسم اخوكي مش عرفاني
سهمت وانا بتفحص شكله بعيني وبستوعب ازاي الشحط ده باسم اخويا انا..انافاكرة اخر مره شوفته فيها كان يدوب اربع سنين او يمكن اكتر شوية وكان بيصرخ من غير سبب ولما طال سكوتي قال بإبتسامة
_ تعالي اتفضلي... ماما!! خلود اختي جت
_ انت فاكرني
_ بصراحه مش قوي بس سمعت عنك كتير
_ اه
جت ست من جوه بصتلي بأستغراب وقالت
_ مين دي
قال
_ خلود ياماما
تفحصتني بنظراتها وبعدين رفعت حاجب وزمة شفايفها وقالت
_ خلود اه.. طيب ياحبيبتي انتي جاية لمين معلش
تحمحمت بحرج ف قال الولد
_ كلام آيه ده يا ماما عيب
_ اسكت انت .. لو كنتي جاية لابوكي يختي ف هو مش هنا ولا نعرفله طريق من وقت ما سافر لوحده واتجوز عليه في الغربة
قولت بربكة
_ اسفة بس انا...
قالت بمقاطعة
_ اسفك معاكي يختي ادخل يا واد "
قالتها وشدته من ايده ودخلت جوه وقفلت الباب حسيت بالاحراج والندم اني جيت ف مشيت ودمعتي علي خدي وبعد ما اتجهت لشارع التاني حد نده عليه وقفت وبصيت ورايا لقيت الولد جاي يجري ويقولي
_ استني
وقف قدامي وكمل
_ انا اسف قوي قوي ، متزعليش ماما طيبة بس هي زعلانه عشان اللي عمله ابويا
_ هو مشي من امتي
_ من زمان كان عندي سبع سنين ساعتها
_ كان معاك اخ تاني صحيح
_ ايوة تامر اخويا أصغر مني بس دلوقتي في الدرس اصله ثانوية عامة دلوقتي
_ اها
_ انتي ليه مكنتيش تيجي تزورينا
_ جيت انا وتيتة زمان بس قالولنا انكم سافرتوا بر مصر
_ ايوة صح بس رجعنا بعدها بسنه يمكن وبابا سافر تاني واتجوز هناك ونسينا
_ ما نسيني انا كمان
_ نسينا كلنا بس مش مهم احنا ممكن نعيش مع بعض في بيتنا ولا انتي مكنتيش جايه تقعدي
_ كنت جاية اشوفكم واشوفه بس خلاص بقا هرجع
_ لا ترجعي فين انتي هتقعدي معانا يومين
_ مش هينفع .. هو انت عندك كام سنة
_ 19 وشوية قولي عشرين
_ عشرين ازاي.. لحق يجيبك امتي
_ من اول ما اتجوز
_ اه بس كده مامتك حملت فيك وانا لسه في بطن امي
_ اه ما بابا اتجوز ماما وهو متجوز مامتك.. امي بتقولي ان مراته التانيه كانت عيانه علشان كدة اتجوز عليها بس مقلهاش
_ كمان
_ كمان
_ اول مره اعرف حاجة زي دي
_ اديني قولتلك.. تعالي بقا هنتغدا مع بعض
_ مش هقدر خليها مره تانيه
_ يابنتي ماما مش وحشة هي بس كانت زعلانه شوية وهديت وهترحب بيكي زي بنتها واكتر
_ انا عارفه بس خليها مره تانية
_ طيب انتي رايحة فين دلوقتي
_ هرجع البيت
_ اوكي انا هوصلك وبالمرة اعرف ساكنه فين
ابتسمت وقولت
_ ماشي
مشينا مع بعض وفي الطريق سألته
_ هو انت شغال ايه
_ بصي انا شغال بس ماما متعرفش.. شغال انا وصاحبي علي عربية شاي صغيرة جنب الجامعه بنبيع شاي وعصاير لطلبه
_ طيب ليه مخبي دي شغلانة حلوة مفهاش حاجة عيب
_ علشان لسة بدرس وماما رافضة بتقولي لازم اركز في المذاكرة
_ طيب وانت بتشتغل ليه
_ اهو بساعد
_ برافو عليك.. بس هي مامتك بتصرف عليكم منين
_ فاتحة محل هدوم في المنطقة بتاعتنا محل صغير وبتصرف علينا منه
_ ربنا معاها
_ يارب.. وانتي بقا بتشتغلي ولا بتدرسي
_ كنت بشتغل وسيبت الشغل وكمان سيبت الدراسة
_ ليه
_ مصاريفها غالية
_ انتي وصلت لفين في التعليم
_ ثانوية عامة
_ مجموعك كان حلو
قولت بإبتسامة
_ يدخلني كليات قمة
قال بذهول
_ يا دين النبي طيب وبطلتي ليه
_ مصاريف كتير انت عارف
_ مفيش اي شغل كنتي اشتغلتيه وكملتي
_ بصراحه فيه بس محستش اني هقدر
كملت باستفهام
_ هو انتي مشوفتنيش قبل كدة وانا في سني ده
_ لأ
_ امال عرفت منين اني اختك
_ مانتي قولتي انك بنت صاحب البيت وانا عارف ان ليه اخت اسمها خلود
_ ايوة
_ إيه
_ أبداً اصل انا عدت عليه فترة كنت معروفة شوووية علي الانترنت ساعات الناس بتوقفني تسلم عليه ف تخيلت انك تعرفني
_ معروفة ازاي يعني اوعي تقولي كنتي بترقصي علي التيك توك
_ لأ مش لدرجة دي.. كنت بلوجر بعمل فيديوهات نصايح للبنات ازاي يتصرفوا ، ازاي يلبسوا وحل مشاكل وكدة
_ بس بردو ازاي تطلعي علي النت
_ شيفاك معترض
_ طبعا معترض انا مقبلش ان اختي تظهر علي النت
قولت بإبتسامة
_ ما خلاص بقا بعدت وقفلت كل حساباتي
_ احسن دي قلة قيمة يا شيخة
قولت ضاحكة
_ فعلاً
كملنا طريقنا مع بعض من مواصلة لمواصلة لغيت ما وصلنا البيت ف قولتله يتفضل وقعدنا مع بعض جهزت وبدانا ناكل ف قالي
_ اكلك حلو قوي تصدقي
قولت بإبتسامة
_ ايوة تيتة معلماني كل حاجه اصل هي شاطرة قوي في الطبخ
_ برافو عليكي والله تسلم ايدك
_ الله يسلمك.. كل بقا علشان هدوقك القهوة بتاعتي بيقولوا اني بعمل قهوة حلوة
ضحك وقال
_ كمان لا كده انا هجيلكم كل يوم
قولت بإبتسامة
_ تنور طبعاً
كلنا وشربنا القهوة وقعدنا نتكلم شوية وبعدين خد رقمي ومشي وبعد وقت كلمني وقالي تامر عايز يسلم عليكي في الاول معرفتش مين تامر ولكن بسرعة افتكرته وكلمته كان مكسوف قوي ومش عارف يقول كلمتين علي بعض بقيت اهزر معاه لغيت ما خد عليه ولكن فجاة سكت وباسم قالي هكلمك تاني كان واضح ان امهم زعقتلهم ومع كدة كنت مبسوطة قوي باللي حصل عدا يوم واتنين ورجع تاني باسم خرجنا مع بعض علي البحر وبقينا نتكلم عن حياتنا وعن عربية الشاي اللي عاملها هو وصاحبه جنب الجامعة
#زيد
خصصت مبلغ للولد اللي بيتابع خلود علشان يسيب كل شغله ويتفرغ ليها ويبلغني لو وقعت في مصيبة جديدة يكون هديت و وافقت تجوزني وبعد ايام وصلني صور من الولد ده لخلود وهي و ولد تاني كانت ماشيه معاه في اكتر من مكان ف اتصلت بيه فورا وانا حاسس ان دماغي هتشت بسببها ولما سألته عن الصور دي قالي
_ انا اسف يا دكتور مكنتش عايز اقولك بس مقدرتش
_ اتكلم علي طول.. مين ده وبيعمل إيه مع خلود
_ من يومين شوفته جاي معاها ودخلوا البيت سوا قعدوا ساعتين او اكتر وبعدين مشي والنهاردة رجع تاني وخرجوا مع بعض علي البحر
_ هو مين الواد ده معرفتش
_ لا والله مقدرتش اعرف هو مين ولا عرفت كانوا جايين منين ، انا من يومين اضطريت اروح لامي شوية عشان تعبانه رجعت ملقتش البنت في البيت بقيت مستنيها لساعات لغيت ما رجعت وهو جه معاها والباقي حكتهولك
_ اه.. طيب روح انت
_ اكمل متابعة ولا كفاية
_ اه زي مانت ولو في جديد بلغني
_ حاضر
قفلت معاه ومن شدة الغيظ اللي كنت حاسس بيه بقيت ابص حولية عن حاجة اكسرها وملقتش اقرب من التليفون اللي في ايدي رميته في الحيط اتكسر علي حتتين وبعد ثواني دخلت عليه خالتني وسالتني وهي بتبص لتليفون اللي مكسر
_ في ايه يا زيد
_ مفيش حاجة انا تمام
_ كدة تمام ما تقول في ايه كسرت تلفونك ليه ياولدي
هتفت بعصبية
_ قولت مفيش.. انا خارج
سيبتها ومريت بالموجودين وكملت طريقي متجاهل منادات بشر عليه ولما وصلت الشارع لحقني وقال وهو بيمسك فيه ويوقفني
_ ما تستنا يا زفت مالك بتجري لية كدة
قولت بعصبية
_ مالي!!! اديني زي الفل متجننتنش لسة
_ طيب اهدا شويه قولي ايه اللي حصل
_ اقولك اللي حصل مقولكش ليه علشان لما اقولك بعد كده معنديش ذرة ثقة فيها تصدقني انا ربنا بيحبني علشان بينلي حقيقتها اكتر من مرة
_ عملت ايه
_ الهااانم بعد ما خلصنا من إسلام والظابط مشيالي مع واحد جديد وخد الكبيرة بقا.. خدته البيت وقعده معاها لوحدهم ساعتين واكتر، وبعدين بيتمشوا علي البحر ومستجمين سوا دلوقتي.. بس تعرف العيب مني انا.. انا اللي فكرت في واحده زيها بعد كل عملته
_ يابني ازاي بس .. خلود متعملش كدة دي متربية معانا
_ لا عملت يا بشر عملت.. هي مبتقولش لحد لا.. اي حد معدي يقولها تعالي بتروح
_ طيب اسكت متقولش كدة ، مش يمكن في حاجه غلط خلينا نفهم الاول
_ نفهم ايه بقولك قعد معاها ساعتين لوحدهم في بيتها... هي ليه بتعمل كدة.. معقول ده تهور ولا الوساخة في طبعها وانا كنت فاهم غلط
_ طيب متزعلش اهو ربنا كشفهالك قبل ما تجوزها.. هدي نفسك شوية وسيبك منها
_ مش قادر يا بشر ، انا عيلة زي دي تعمل فيه كدة.. انا الدكتور اللي بيعالج مشاكل الناس مش قادر اعالج نفسي ومفكرش في واحده زيها .. بشر انا والله حاسس اني هتجنن.. انا اول مره اكون موجوع بشكل ده ❤
غلبتني دموعي ونزلت ف حضني وقال
_ متزعلش نفسك زي ما قولت ربنا بيحبك علشان كشفهالك.. انت تستاهل واحدة احسن منها
بعد عني وقال
_ بس لازم جدتها تعرف مينفعش نسيبها كدة لازم تربيها
_ لا مش هنقولها
_ ازاي يعني مش هنقولها
_ عايز اشوف اخر ما عندها واشوف هتقابله تاني في بيتهم ولا لا.. ومتقولش لهاجر أكيد هتقولها
#بشر
بعد ما طلعنا فوق كلمتني هاجر وقالتلي
_ مال زيد
_ ليه
_ شوفته نازل يجري ومتعصب
_ مشاكل في شغله متشغليش نفسك، بتعملي ايه
_ ولا حاجه قاعدة
_ طيب ما تيجي نقعد شوية
_ لا
_ ليه
_ كدة
_ خايفة مني
_ لا بس مش هاجي
_ اعتبر دي دعوة علشان انزلك انا
_ لو خبطت لصبح مش هفتحلك
_ والله شكلها دعوة وبتضغطي علي الجرح يا هاجر
_ والله ما دعوة انا فعلاً مش هفتحلك
_ انتي الخسرانه ده انا كنت جايبلك كرتونة شيبسي بالشط والمون
_ اقفل جاية
قالتها وقفلت وبعد دقيقة الجرس رن خالتي فتحت وطلعت هي، دخلت عندي وقالت بهمس
_ فين الشيبسي
قولت بنفس نبرتها وانا براقب خالتي بطرف عيني
_ في اوضتي تعالي نجيبه
ضيقت عينيها وقالت
_ وحيات خالتك
_ اعملك ايه انتي اللي تبيعي نفسك علشان كيس شيبسي ياخوفي حد يقولك تعالي اجبلك شيبسي وتروحي
_ ماشي يابشر والله لا مردوده
قولت بخبث وانا بغمزلها
_ يعني هتقولي تعاله خد شيبسي واجيلك البيت ...
خبطتني برجلها في ركبتي وقالت
_ انت زودتها قوي
_ طيب امتي هترديها بقا انا مش هقدر اصبر كتير
_ بس بقا
_ بس انتي.. امتا هنتجوز
_ ومالك مستعجل كدة.. بشر! فين هيبتك و وقارك
_ الله يلعن وقارك اللي مسكنلي فيها يابنتي الوقار ده يكون مع الناس التانية مش معاكي انتي.. هاجر انا لو متجوزتش وديني ما هتسلمي مني ، استعجلي
_ انا اللي استعجل.. لاااا انت اكيد اتجننت انا مروحه
مسكت ايدها وقولت
_ اترزعي بهزر.. بس فعلاً اتاخرنا قوي ، يابت انا مش ميت علي جواز والا كنت اتجوز من زمان بس انا عاوزك انتي فاهمة يعني ايه عاوزك انتي
قالت بإبتسامة
_ طيب كلم بابا في الموضوع ده
_ تفتكري هيوافق ولا هيقول تعليم ومش تعليم
_ وسط عمي بدر في القصة دي وهو يخلصها
_ هو عمي بدر مفيش غيره.. هكلمه
#احمد
يومين وانا شايف واحد واقف علي اول الشارع وعينه علي بيت مها ومركز معاه ولما حاولت اروح عنده واشوفه واقف كدة ليه مشي اول ما شافني وزود شكي فيه ، ف رجعت للبيت لقيتهم متجمعين في الصالة وقولت
_ لسة فاطمة مخرجتش
قالت مريم
_ لأ
_ طيب ممكن تجيبيلي شعريتين منها او لو قدرتي تقنعيها تخلينا ناخد منها جرعة دم
قالت مليكة
_ لية
_ هرفع قضية اثبات نسب وعاوز اعمل تحليل دي ان اي
قالت مها
_ ما تصبر يكون البنت خرجت من الحالة اللي هي فيها هي دلوقتي حمل قضايا
_ عايز اخلص انا مش ضامن ممكن ابن بدر يعمل ايه طول ما هي اسمها مراته ده مش بعيد ياخدها ، وقتها مش هنقدر نتكلم
قالت مليكة
_ وهو لو حب يتجوزها فيها ايه يعني ياعمي ده بيحبها وهي بتحبه
_ اجوزها لابن اخت اللي حرمنا منها، لو هو اخر واحد في الدنيا مش هجوزهاله
قالت مريم برفعة حاجب
_ ولية ابن اخت اللي حرمنا منها ما تقول ابن اللي صورتها في حضنك واللي ضحيت بمستقبلك علشان تثبت انها شريفة
_ ايوة يا مريم دي سبب تاني .. واحدة فيكم تقوم تجبلي شعرة منها
بجاد
بعد ما خلصت المحاضرة شوفت التليفون لقيت اتصالات كتير من مليكة وبدر وقبل ما ارن علي مليكه رجع بدر يتصل رديت ف قالي
_ الحق
_ ايه حد حصله حاجه
_ لسة
_ يعني هيحصل ،طيب ما تتكلم
_ ابو فاطمة بدء في رفع قضية اثبات نسب علشان متقدرش تاخدها
_ امتي ده وانت ايه عرفك
_ مليكة كلمتني وقالتلي
_ ايوة .. اووكي
_ هتعمل ايه
سكت شويه افكر وبعدين قولت
_ مالي ايدك من مليكة دي
_ يعني ايه
_ يعني لو طلبت منها تعمل حاجه هتعملها ولا هتخلي بيك
_ والله علي حسب إيه هي الحاجة دي
_ بسيطة هنتهجم علي بيتهم ولازم هي تساعدنا.. او تساعدني انا مش عارف انت هتوقف معايا ولا لأ
_ لا استنا بس يعني ايه نتهجم علي بيتهم هنلبس شربات سودة وندخل بسلاح نقتلهم وناخد فاطمة ولا ايه