رواية انحراف
الفصل الثالث3
بقلم جمانه السعيدي
ساره... بقيت اسبوع كامل واني بس اتفرج على احلام ولا كعدت على المكينه ولا خيطت
بس احس نفسي فهمت الشغل
اما عمار كل يوم يجي يحجي وياي كم كلمه ويباوع عليه
ويحاول يبين هو مهتم بيه ويضحكني
إلى أن اجا الاسبوع الثاني واحلام سمحتلي اكعد على المكينه
طبعا مو مكينتها مكينه ثانيه
بلبداية دست حيل المكينه طلعت صوت عالي كلش خفت
احلام...مو هيج دوسي على كيف حتى المكينه متفلت منج
وديري بالج على ايدج
رجعت دست حيل
احلام صاحت بصوت مو كلنا على كيف
اني مدنكه سمعت صوت عمار
عمار...على كيفج وياها بعدها زغيره وتخاف ليش اصيحبن عليه
احلام...مجاي اصيح عليه اريدها تنتبه
عمار...روحي انتي اني اعلمه
احلام...ولله تسوي فضل اروح اخيط كم قطعه ليش يروح عليه الوكت
قرب عليه ودنك نزل للكاع ولزم جف رجلي وكال على كيف
لا تتاذين
خجلت منه كلش وحاولت اسحب جف رجلي منه
عمار....لا خل اعلمج لا تخافين
يله دوسي على كيف
ساره...اريد ادوس مااكدر لان هو لازم رجلي
عمار...شبيج دوسي
ساره...دست وهو لازم رجلي تحركت المكينه على كيف
عمار. عفيه يله بعد مره دوسي
ساره...رجعت دست شال ايدا من رجلي وكفت
عمار...ليش وكفتي يله دوسي على كيف
ساره..دست شويه ووكفت
دنك عليه وقرب راسه من راسي وكال انت اشطر وحده بيهن وراح اتصيرين مديرة هذا المعمل بيوم من الايام
لا تخافين
ساره...حسيت بحراره بوجهي وهو هلكد قريب مني ويحجي وياي
لزم ايدي وكال يله حاولي
رجعت دست حيل على الدواسه مال المكينه هلكد مامرتبكه
المكينه مشت بسرعه
عمار...عادي كلهن اول مااجن مايعرفن
وغلطن بمكان المره الف
ساره...حسيت كلامه ينطيني دافع للشغل والمحاوله حتى انجح جمانه السعيدي
رجعت دست على الدواسه هلمره سيطرت
عمار.. عفيه مو كتلج انتي شاطره
ساره...بقه واكف واني احاول اخيط منا لمن خيطت وجه مندر وهو واكف ويباوع عليه
جابلي قماش وكال خيطي
دنكت اخيط وهو واكف بصفي
عمار...عندج تليفون
وكفت من الخياط وكلت هااااا
عمار...عندج تليفون
ساره...لا
عمار...ليش ماعندج تليفون
ساره...وضعنا مايساعد على كد حالنا
عمار...اني راح اجيبللج تليفون حتى احجي وياج
خوما عندج مانع راسا ابتسم ابتسامه خفيفه
ساره....هااا امي ماتقبل
عمار...لا تكولين الامج اني اعلمج علي ومن يصير عندج وقت اتصلي عليه
ساره...اي
عمار...تعرفين انتي شكد عجبتني من اول مره صارت عيني عليج اخذتي كلبي
ساره...حسيت نار اشتعلت بجسمي هذا الحجي اليه
معقوله يحبني
عمار...مااريدج تصدكين اي وحده تحجي عني
شوفي هاي البنات كله تحاول تصادقني وتحجي وياي بس
اني ماعجبنني اي وحده
بس انتي مااعرف ليش خذتي كلبي
عبالك اول مره اشوف بنيه
شكد حلوه انتي
ساره...رفعت ايدي اتلمس وجهي اني حلوه
عمار....احلى وحده مو بس حلوه
ساره...شكرا
عمار....خاف وحده تحجي عليه لا تصدكين كلهن جذابات
راح يغارن منج ويحاولن يشوهن سمعتي
لا تسمعين اي وحده بيهن اسمعيني اني وبس
بس نتفاهم اني وياج راسا اتقدملج اطلبج من اهلج
اني ماالعب اريد ازوجج على سنة الله ورسوله
ساره...بقيت فاكه حلكي ومامصدكه الي اسمعه
من دون هاي البنات كله يحبني اني
ويريد يتقدملي معقوله
اني شكد محضوضه
عمار...وين صفنتي بس نزوج تبطلين شغل واعيشج اميره
اني عندي بيت وسياره
وبعد عندي شغل ثاني ادللج دلال ماصاير
هسه اعوفج تخيطين وفكري بلكلام الي كلته
ولا تحجين اي شي من الكلام الي دار بينا لأي احد
مااريد الناس تدخل بينا وتخرب علاقتنا
محد راح يحبج ويخاف عليج بكدي
عافني ومشا بقيت كاعده مثل الصنم عقلي مايستوعب الكلام الي سمعته عبالك حلم جمانه السعيدي
خليت القماش على المكينه ودست حيل دخلت الابره بااصبعي
روحي طلعت من الوجع اريد اطلع اصبعي ماكوو
من الوجع كمت ابجي
حركت الابره على كيف وسحبت اصبعي طلعته
والدم كام يجري
شلت وصله من الكاع ولفيت اصبعي
يمكن هذا الحادث كان تحذير اليه حتى انتبه
بس عقلي عقل مراهقه
ماصدكت سمعت كلمتين حلوات منه
بقيت كاعده بمكاني ولازم اصبعي
رجعت عليه احلام
احلام...هااا خيطتي
ساره...اي خيطت وجه واحد بس الابره دخلت بااصبعي
احلام...مو كتلج انتبهي
يله ميخالف راح تتاذين كم مره وبعدين تتعلمين
بقيت كاعده على الكرسي ولا زمه اصبعي منا لمن خلص الدوام ورجعت للبيت
امي...هاي شبيه ايدج
ساره...اليوم كعدت اخيط والابره دخلت بااصبعي
امي.. اتاذيتي
ساره...اي ولله اصبعي يوجعني
جابتلي امي ديتول وكطن وشدت اصبعي
بليلته بقيت اتكلب مانمت هلكد ماافكر بكلام عمار
حتى نسيت الوجع
الصبح امي تكعدني مااكدر اكعد لان نمت متأخر حيل
امي...هاا اليوم ايدج توجعج ماترحين
ساره...واني مغمضه لا اروح
امي...يله بسرعه راح يجي الخط
ساره..كمت امشي اتخربط دخلت للحمام غسلت وجهي
شويه صحصحت
كعدت اتريك
ساره...امي اريد ملابس جديده اني من دون البنات ملابسي
تعبانه
امي..ومنيين اجيبلج اشتغلي وجيبي ملابس
الفلوس الي جاي احصله يله مسواك وامبيرات وماتكفي
واختج تستلم شهري بعدها مامستلمه
ساره...ولله ملابسي تعبانات حيل
امي...انتي رايحه حفله رايحه للشغل شلج بالملابس الحلوات
ساره...سكتت اني اعرف الوضع زين بس احجي هيج
ربطت اصبعي ورحت للشغل
كعدت على المكينه اجتني احلام
احلام ..ديري بالج مو مثل امس
ساره....لا تعلمت الدرس
كمت ادوس على كيف خيطت وجه بديت اخيط الوجه الثاني اجا عمار
اول مادخل للقاعه كبل عليه
عمار...صباح الخير شلون خياطتنا الحلوه
ساره.. ابتسمت تمام
عمار...شبي اصبعج
ساره...دخلت بي الابره
عمار...لا غير تنتبهين خوما اناذيتي حيل تعاي اخذج للمستشفى
ساره...لا صرت احسن
اخذ ايدي باوع على اصبعي اني رابطته بأس ايدي ورجعه
واني تخشبت بمكاني مامصدكه الي جاي يسوي وياي
عمار...سلامتج حبيبتي
ساره...الله يسلمك
عمار..جبتلج هذا التليفون حتى نحجي لان جاي اشتاقلك
مااتحمل مااا اشوفج
اريد احجي وياج واشبع كلام حلووو
التليفون كان عادي ومستعمل هواي بس شغال
خل اعلمج علي
دوسي هنا يطلع اسمي دوسي هنا يطلع اتصال
واذا ماتكدرين تتصلين تكتبيين رساله دوسي هنا مكتوب رسايل واكتبي رساله
ساره...اخاف امي تشوفه عندي تذبحني
عمار...راح اخلي صامت بدون صوت وحاولي حتلو رساله
منج اني قابل
ساره....اي أخذت التليفون وضميته
وهو راح كعدت اخيط لان اخاف من المكينه وتفكيري كله راح وياا عمار كل النهار يله خيطت قطعتين
من رجعت للببت حرت وين أضم التليفون خاف وحده من البنات تشوفه لو امي تحس بي تموتني وتمنعني من الطلعه نهائيا
ضميته وما اتصلت ولا دزيت رساله لان كلش خايفه
بليل كعدنا بلغرفه اني وايمان ومنى
ساره...اكلج امونه ماعندكم مكياج زايد بالصالون
ايمان ...شسوين بي
ساره.. البنات تجي للمعمل تخبل واني وجهي املح
ايمان....كون تسمع امي
ساره...اتمكيج هناك ومن اجي امسحه
ايمان...ولو امي ماتقبل هسه اني اشتغل بلصالون ومااخلي مكياج رغم ام الصالون تكول تعاي احفلج تمكيجي
واني مااقبل
ساره...الله عليج اذا اكو مكياج مخلص لو باقي شويه
جيبي اليه ولج بنفسي اخلي حمره
انتي ماشايفه البنات يخبلن بس اني عبالك غراب البين
ايمان...اشوف بس اني مالي دخل
من نأمن خواتي فتحت التليفون لكيت عمار دازلي
خمس رسايل
وينج كاعده اتصلي عليه
اذا ماتكدرين دزي رساله
اشتاقيتلج حبيبتي
راح ابقه منتضرج ردي عليه
نمتي نوم العوافي مريتي حبيبتي
ساره.. خفت ارد علي وخصوصا اول مره الزم التليفون
ضميت التليفون ونمت
الصبح كعدت رحت للشغل
الساعه عشره اجا عمار
كبل عليه البنات وحده تباوع للثانيه وياشرن
لان عمار كلما يدخل كبل يجي عليه
عمار..... اني زعلان
ساره...صباح الخير
عمار...حتى سلام ماكووو زعلان
ساره...ليش
عمار...بقيت انتضرج ومااتصلتي عليه
ساره...ولله اخاف خاف يحسون بيه
عمار...واهون عليج ابقه انتضرج
ساره...لا ماتهون عليه
عمار...صالحيني
ساره...شلون اصالحك
عمار...وقت الاكل انتضرج تجين ورا المعمل حتى نحجي براحتنا
ساره...ليش ماتحجي هسه
عمار....ماتشوفين شلون العيون علينا
ساره.. ميخالف
طلع واني بقيت اخيط بس بالي كله يمه الحد مادخلت الابره باصبعي نفسه وهو بعدا ماطاب
سحبت اصبعي وطلعته من الابره وشديته
وقت الاكل كلت للبنات اريد اروح للصحيات
مشيت بتجاه الصحيات وبعدين طلعت من الباب الخلفي
لكيته منتضرني
اكو سياره حمل واكف وراها منتضرني
عمار... لو ماجايه جان زعلت عليج
ساره...اني بعمري ماطالعه واخاف
عمار...من شنو تخافين اني زوجج
ساره ...ولو اخاف امي اذا تسئل عني هنا ويوصله خبر تموتني
لزمني من اديه ثنيينهن وحاول يحضني
بس اني ابتعدت عنه
ساره...شجاي تسوي
عمار...شببج مشتاقلج
ساره...درت وجهي راح ارجع جمانه السعيدي
عمار...جنت اعرف انتي ماتحبيني بس اني احبج
ساره...التفت علي لا احبك اني احبك بس مااكدر
اخليك تقرب عليه
كعد بلكاع وضاج حيل
ساره...اني راح ارجع لا ينتبهن البنات ويوصل خبر الامي
عمار....روحي اني هم راح اروح وبعد مااجي للمعمل
اني اجي علمودج
اذا ماتحبيني ليش تخليني اتعلق بيج
اضحكين عليه
ساره...لا مااضحك عليك احبك بس مااكدر
عمار...اني قابل شمسوي انتي اذا تشتاقين الامج لو الاختج ماتحضنيه وتبوسيه
ساره...انت كلت امي لو اختي
عمار...واني احبج اكثر من امج واختج وماابدلج بلعالم كله
ساره...ولو بعد الزواج من اكون حلالك عود ساعته اكون تحت امرك
عمار...براحتج
ساره.. كام من مكانه وهو ضايج عافني وراح
واني هم رجعت للمعمل بس ضجت علي حيل
احسه يحبني بس اخاف
رجعت للبيت ولكيت ايمان جايبتلي مكياج بقيا حمره
وكحله وباودر باقي بي شويه
بليل كتبتله اني احبك
مارد عليه
رجعت كتبت اني اسفه
هم مارد عليه بعدين دخلت ايمان للغرفه طفت الضوه ونامت واني هم نمت وقررت باجر اصالحه
واخلي يجي يتقدملي