رواية انحراف
الفصل الخامس5
بقلم جمانه السعيدي
عمار...ماكو غير حل واحد
ساره...شنو احجي بسرعه
عمار...ننهزم ونزوج وبعدين ترجعين تصالحين امج
ساره...يااا شلون انهزم وامي
امي عدها هاي الشغلات خط احمر يمكن تموت اذا عرفت اني انهزمت وياك
عمار...مراح تعرف اذا عرفت اني وياج انهزمنا سوا
راح تقيم عليه دعوه وانسجن
اني راح ادزجج المكان واني ابقى هنا على الاقل اسبوع
الحد مااارتب اموري واذا امج اشتكت عليه
الشرطه مراح تشك بيه
ساره....ولله خايفه
عمار...خلاص اذا خايفه ابقى حتى يبين حملج وساعته امج راح تنجلط من صدك لا يمكن تموت
ساره....ووين نروح البيتك
عمار...لا اخليج بيت ولد صديقي منا لمن ارتب اموري واجي اخذج ونروح البغداد
ساره...وشغلك
عمار...اصلا اني اريد اترك هذا الشغل ماعاجبني بس التعب
وفلوسه كلهن تفاليس
ساره...يمته ننهزم
عمار....بس باجر اخلص كم شغله وبعد باجر من تجين للمعمل بس تنزلين تلكين سياره خصوصي منتضرتج
اصعدي وبعد مالج شغل
ساره...تمام
رجعت للبيت بيومها واني عقلي مو عندي جمانه السعيدي شلون راح اعوف امي وخواتي امي شراح يصير بيه
شكد حاولت امي تحافظ عليه وحذرتني واني غبيه
ضيعت كلشي بلحظه
امي هم منه السبب ليش رفظت عمار لو موافقه
جان مزوجني ومحد يعرف بهاي المصيبه
حتلو موزين واخلاقه مو تمام اهم شي اسمه رجال
نزوج وخلص
الله يسامح امي هي السبب لو مصادقتني واني حاجيتله
كلشي ابدال هذا الخوف منه
هذا اليوم خلص واني بس اصفن بوجه امي وخواتي
وافكر شلون راح اعوف هذا البيت
واكثر شي شاغلني موقف امي
رحت للمعمل بس ماكدرت اشتغل
افكر بمصيري شنو ووين راح يوديني زماني
اليوم الي بعدا كعدت حتى مااكدر اباوع بوجه امي
شكد تمنيت احضنه واشمه حيل قبل لا اطلع
ماكدرت احضن امي خفت لا تشك بيه
لان اني بعمري ماحاضنته ولا نايمه بحظنه
هلكد ماقاسيه اخاف اقرب عليه
بس حضنت ايمان
ايمان...شكو تردين تموتين
ساره...نزلن دموعي مسحتهن لا بس حسيت نفسي تعبانه
وحضنتج
ايمان....يمه من العياره
ساره...نزلن دموعي ومسحتهن
رجعت حضنت منى حيل
منى...اي خنكتيني
ساره....شبيج مشتاقتلج
منى...ونتي وين رايحه شو كل يوم اني كبالج شنو مشتاقتلي
ساره...مسحت دموعي وطلعت من البيت
اجا الخط صعدت خليت ايدي على وجهي وخلصت الطريق كله ابجي اول مره راح افارك اهلي
وصلت البنات انتبهن اني عيوني حمر
سئلني شبيج
ساره...مابيه شي
انتضرت البنات دخلن للمعمل شفت سياره واكفه خصوصي
سوده
السايق صاح ساره
التفتت علي اشرلي تعاي
رحت صعدت ويااا ومشت السياره
بس تحركت السياره دموعي كامت تنزل عشره عشره
كمت ابجي بصوت عالي
مقهوره على نفسي والي جاي يصير وياي
هواي مشت السياره ايجوز ساعه وربع
وكف السايق يم بيت ودك الباب
المنطقه شعبيه والشوارع مخربطه وجهال بلشارع
فتحت الباب وحده تقريبا ٣٥ سنه عمرها مكيجه وطك بعلجها لابسه ثوب قصير ودلع
السايق...هاي الامانه
نزلت من السياره
سوسو....تعاي عيني تفضلي
ساره....نزلت من السياره ودخلت للبيت
دخلتني جوه
سوسو...ارتاحي هنا خل اجيبلج مي
دخلت جوه سمعت تليفونه رن
سوسو....هله عيون سوسو وكلب سوسو اي وصلت
هياته موجوده
ساره.....يمكن هذا عمار الي اتصل
كلبي مامطمن الها احسه وحده منحرفه
لبسه وطريقته بلكلام
بقيت كاعده بمكاني اني ماجبت اي شي بس جنطت ايدي
بيه ٤٠ الف فلوس شغلي والتليفون الي انطانيا عمار
بقيت كاعده وحدي والندم اكلني اني شسويت بنفسي
وهاي سوسو ابد مارتاحتله
يمكن عمار يضحك عليه
لا مايضحك عليه غير ابنه ابطني
طبعا سوسو ماعافت التليفون ابد كل شويه متصله على واحد لو واحد متصل عليه
يمكن ساعتين بقت تحجي بلتليفون
بعدين طلعت كالت اذا تردين تسبحين الحمام منا
واذا تردين تنامين ادخلي بهاي الغرفه
طبعا اني مجايبه وياي ملابس مادخلت للحمام
رحت للغرفه دخلت وتمددت
عقلي يفكر بس باامي شلون راح تعرف وشراح تسوي
طبعا هي أكبر شريكه بهاي المصيبه
بعمرها ماقربت عليه لو حسستني بلحب
تعامله كلش جاف ويانه
اي واحد يصادفنا نسمع منه كلمه حلوه نصدك
غفيت واني لابسه نفس ملابسي بنطرون وبدي ولابسه رداء اسود وحجاب اسود
بس نزعت حذائي
غفيت مااعرف شكد نمت بس مو هواي اقل الساعه
حسيت ايد تمشي على وجهي وايد تتلمس جسمي
فزيت توقعت عمار اجا وراي
فتحت عيوني واحد اكبر من عمار بلعمر
كرشه شكبرا وبي ريحة جكاير
شعرا خفيف من كدام
كمزت خايفه رجعت ليوره
رعد....هاي شبيج
ساره...منو انت
رعد....اني صديق عمار
ساره...شتريد مني
رعد....مااريد شي حبيت اشوف البضاعه الجديده
ساره...شنو قصدك
رعد....تسوه وتستاهل بعدج زغيره
ساره...شتريد مني
رعد...مااريد شي
عافني وطلع واني متت خوف هذا عن شنو يحجي
طفرت جبت الجنطه طلعت التليفون حتى اتصل على عمار
شنو هذا هيج يقرب عليه
اريدا يجي ياخذني
اتصل يطلع الرقم خارج الخدمه
اتصلت خمسين مره بدون فايده
لملمت نفسي وبقيت كاعده على الجربايه
ساحبه رجليه على بطني
بعدين دخلت سوسو جايبه لفتين فلافل وقوطية ببسي
سوسو...هاج اوكلي عيوني
ساره...جاي اتصل على عمار ومايرد عليه
سوسو...وشتردين منه
ساره...يجي ياخذني
سوسو...وين ياخذج انتي لازم تختفين محد يشوفج
وخاصه وياا عمار شنو تردين تبلينه بلوه
اكعدي واسكتي
اقل شي اربع ايام يله يبين عمار
ساره...لا فدوه اني خايفه
سوسو...ومن شنو خايفه عيوني
راح ياخذج عمار البغداد وتلعبين بلفلوس لعب
بعدج زغيره عليج الطلب عيوني
ساره...شنو اشتغل
سوسو...بعدين تعرفين ليش لازكه بذني الملابس
ساره...ماجيت وياي ملابس
سوسو...اني هسه اجيبلج ملابس وادخلي اسبحي
ليش هيج كاعده ومتشجنه
طلعت سوسو من الغرفه ورجعت بيدها ثوب الله يستر منه
مشلتح تشلتح
ساره....اني ما البس هيج
سوسو...عليمن خانكه نفسج بهاي الملابس
ساره....ابقه بملابسي ذني احسن
سوسو...براحتج
ساره...بقبت كاعده بلغرفه وماطلعت جمانه السعيدي
اكلت بس لفه وحده وشربت ببسي وبقيت كاعده بمكاني
خاف انام ويجي هذا رعد مره ثانيه
انتهى الدوام وساره مارجعت للبيت
طبعا هي ترجع قبل امه وايمان
هي ترجع الساعه بلاربعه وامه وايمان يرجعن المغرب
استغربت منى ليش ساره مارجعت
الحد مارجعت ايمان وامه للبيت
بس دخلن للبيت
منى...يمه ساره الحد الان مارجعت
امي...شنو يعني مارجعت
منى...مااجت من الشغل
راسا طلعت الام من البيت بسرعه حتى ماي ماشربت
اجرت تكسي وكبل للمعمل
لكت المعمل مقفول وبس الحارس برا
سئلت الحارس اكدلها كل البنات طلعن الساعه بلاربعه
راحت على ام احمد حتى تسئل بت اخوها
اتصلت ام احمد على بت اخوها
سمر بت اخو ام احمد ..... خلص الدوام وطلعنا كلنا نفس كل يوم
ام احمد...هم شفتي ساره
سمر...لا ماشفته
ام احمد ...اريد رقم مديحه نسئل على ساره
اتصلنا على مديحه
مديحه...اليوم ساره ماداومت ولا اجت للشغل
ام احمد...امه تكول راحت بلخط وياا البنات
مديحه....بس مااجت للدوام
من سمعت ام ساره ذني الكلمتين ماكدرت توكف على حيله
من الصدمه كعدت بلكاع
ام ساره....يمه بنتي وين راحت شلون بيه ام احمد دبريني
بتي وين راحت
ام احمد....خل نروح نبلغ الشرطه
ام ساره....يااا فضيحتنا تصير على كل السان
ام احمد...انتي تفكرين بلفضيحه فكري بنتج خاف انخطفت بلكت نكدر نساعدها
ام ساره... اي كلامج صحيح نروح تنبلغ
طلعن ام احمد وام ساره للمركز حتى يقدمن بلاغ بختفاء ساره
بس الضابط أكد عليهن لازم تمر ٢٤ ساعه على اختفاء
ساره يله يطلعون يدورون عليه
ولازم ينتظرون المعمل باجر حتى البنات اداوم
ويسئلوهن عن ساره