رواية ذئاب لا تعرف الحب الجزء الثاني2الفصل الحادي والسبعون71 بقلم نجمه براقه
بدر
بعد ما كسروا عضمي في الحجز جه العسكري خدني لمكتب الظابط وهناك لقيت ابو فاطمة، لما شافني هجم عليه وقال وهو بيمسكني من هدومي
_ فين بنتي يا حيوان.. ودتوها فين
ضرب الظابط علي المكتب بايديه وقال بعصبية
_ انت اتجننت يا جدع انت.. اترزع مكانك لا احبسك
_ يافندم هو ده اللي اتهجم علي البيت مع الصيع التانين وخطفوا بنتي
_ طيب اقعد متتكلمش غير لما اسألك
كمل موجه كلامه ليه
_ فين البنت يلا
_ مع جوزها يا باشا
قال ابوها بغضب
_ جوز مين يا حيوان.. انا بنتي مش متجوزة
قال الظابط باستفهام
_ جواز إيه؟
قولت
_ جوزها، ماهو اللي خدها ده يكون جوزها وخدها عشان ده خطفها قبل كدة
بص لابوها وقال
_ مين خطف من مين
قال ابوها
_ واحد خطفها زمان وبعدين جيت خطفتها ماهي بنتي وبرجعها ، يقوم ابن عم ده وده يخطفوها تاني
_ مين اللي خطف الاول مخولتولي دماغي... اقعد احكيلي
بصلي بعيون مليانه شر بصتله بتناحة وقولت بهمس
_ احكيلوه خطفها ليه في الاول
صك علي اسنانه وقال
_ وحيات امك لا هوريكم
كمل موجه كلامه لظابط
_ يافندم البنت دي كانت مخطوفة زمان و....
قاطع كلامه تخبيط الباب ف امر الظابط بالدخول دخل العسكري وقال
_ المتهم التاني عايز يقابل حضرتك
انتفض ابوها وقال
_ جاي لغيت هنا برجليه ومش خايف
هتف الظابط بحده
_ ما تخرس انا محترم سنك.. دخله يابني
طلع العسكري وبعد ثواني دخل بجاد بصلي وقال بخفوت وهو بيضرب علي كتفي
_ هما دول ولاد العربي رجالة
قولت بغيظ
_ الله يلعنك انت وعيلة العربي كلها بس اطلع لا هخلص منك ده كله علي عينيك، علي ايه ياخويا شوفت منك إيه عدل علشان استحمل عشانك كل الضرب اللي اتضربته جوه
_ ما تقولي طلقني احسن
كمل موجه كلامه لظابط
_ اهلا يافندم
_ اهلا ياخويا اهلا.. عسكري
_ افندم
_ روقوه وهاتهولي
قولت بتفشي
_ احسن احسن
جري علي الظابط وحط قدامه شوية ورقة وقال
_ يافندم يروقوا مين حضرتك دي مراتي وانا انقذتها، الراجل ده خطفها وهو ملهوش اي صلة بيها
قال ابوها
_ كداب الولد ده كداب يافندم انا قولت لحضرتك انها بنتي
_ اااثبت.. فين الورق اللي بيثبت ان دي بنتك وانها مش مراتي واني خدتها بدون وجه حق.. يا باشا اهو الورق قدامك.. شهادة الميلاد والبطاقة وشهادة الاب وقسيمة الجواز وكله اصلي وكمان بتحمل الجنسية الأمريكية بنته ازاي بقا.. انا عايز اقدم بلاغ ان هو اللي خطفها
قال الظابط وهو بيبص للورق
_ امال بنتك ازاي وجاي تبلغ باي حق يا جدع انت
قال بجاد
_ افتري يا فندم مش كفايه انه خطفها في يوم فرحي عليها لا وكمان بيتهمنا انا بخطفها
بصله ببرود وقال
_ حراام تخطف مرات حد ترضا حد يخطف مراتك يا وحش .. تأمرني بحاجة يافندم ولا امشي انا "
استشاط ابوها غضباً وهجم عليه علشان يقتله ف امر الظابط بأنهم يحطوه في الحجز، ومع ان كلام بجاد خرجنا من المشكلة في لحظة بس كنت متغاظ لأنه مش هيتضرب زيي.
وخرجنا مع بعض وبرة المكتب حط ايده علي كتفي وقال وهو بيهزني
_ سبع ابن سبع
زقيت ايده وقولت بعصبية
_ وانت وسخ وابن و....
بترت كلمتي لما شوفت عمي ف قال بإبتسامة استفزازية
_ كمل سكت ليه
_ ياعم مبطيقكش ابعد عن خلقتي دلوقتي
قال عمي بدر
_ فعالين يا عيال العربي ومحدش يقدرلكم
قال بابا
_ برواة عليكم قدها وقدود.. رجالة من ضهر رجالة
قولت وانا برمق بجاد بقرف
_ وهو عمل ايه انا اللي اطحنت جوه
ميل عليه وقال بهمس
_ احنا الاتنين تعبنا الليلة دي يا بدر، متنساش ان انا عريس وكانت ليلة دخلتي وانتي فاهم مش هوضح
وصل غضبي لقمته مسكت في رقبته وبقيت اخنق فيه لحد ما لسانه دلدل من بوقه حشوه مني بالعافيه وهو بيكح من ضيق النفس
ف سيبتهم ورجعت البيت دخلت اوضتي من غير ما ارد علي حد جت ورايا ماما وبقت تسالني عملوا فيه ايه طمنتها ونهيت معاها الكلام وبعد ما طلعت مسكت التليفون اشوف اذا في اتصال من مليكة ولا لا وفعلا لقيتها متصله وباعته رسالة بتقولي فيها
_ رد عليه حرام عليك
رديت عليها كتابة وقولت
_ طمنيني حصل ايه
جاني ردها فوراً
_ كنت فين
_ هنا.. عملوا معاكي إيه
_ زي ما توقعت حبسوني في اوضتي ، وخالتي زعلت ودلوقتي منهارة علي بنتها
_ ضربوكي
_ طبعااا.. خدت قلمين، قلم من خالتي وقلم من امي ده غير الجرجة من شعري علي الاوضة.. ياخي منك لله انت وابن عمك
_ انا اسف قوي يا مليكة حقك عليه
_ عادي المهم انها معاه
_ ايوة يختي محدش دفع التمن غيري انا وانتي، انا كمان لسة راجع من القسم، هناك مسكوني شتوني لبعض يجي نص ساعة واكتر
_ اتحبست بجد
_ كام ساعة بس طلعت اهو.. كنت قلقان قوي عليكي
_ انا كويسة المهم دلوقتي لازم تطمنوا خالتي علشان هتموت
_ ماشي اصلا ممكن بنتها ترجع تطمنها
_ امال خطفينها ليه لما هترجع
_ كان لازم.. كدة بقت مراته رسمي اي تصرف من جوز خالتك علشان يبعدهم عن بعض هيأذي بنته، دلوقتي مقدمهوش غير انه يوافق علي جوازهم
_ صح وافتكر لو فاطمة اصتلحت مع بجاد هي بنفسها هتقول مش هسيبه وكدة المشكلة اتحلت
_ صح
_ الحمدلله
#بجاد
رجعت الشقة لقيتها مستقبلاني بقلق وبتقولي
_ عملت ايه
خدتها في حضني ضميتها من غير رد ف بعدتني عنها وقالت
_ حصل ايه قول
حكتلها اللي حصل ف قالت
_ لا يا بجاد لا.. خرجه فوراً
_ هيخرج بس انا لو معملتش كدة كان هو اللي هيحبسنا
_ اوكي دلوقتي تخرجه وانا هكلمه واقوله اني عاوزاك ومش هسيبك
_ ما ده اللي هيحصل متخافيش، المهم دلوقتي
_ اية
_ هتكلمي مامتك تطمنيها.. انا كنت عايز ارجعك مش اخدك منهم
ابتسمت وقالت
_ ماشي.. بس انا بقول اروحلها احسن
_ لا
_ هرجع بس خليني اطمنهم
_ هما مش هيسيبوكي تمشي وانا هخليكي تروحي بس مش دلوقتي
_ علشان خاطري هروح وهرجع.. وافق كدة هتطمن
اتنهدت وقولت
_ طيب بس هروح معاكي وهترجعي معايا
_ اوكي
#فاطمة
روحت وأيسل فتحتلي ولما شافتني تفاجأت وصرخت بأسمي ف جت ماما تجري حضنتني وقالت
_ ياحبيبتي يابنتي.. عملوا فيكي ايه
قولت وانا بربت علي ضهرها
_ انا بخير حبيبتي محدش عملي حاجة
حررتني من حضنها وقالت
_ امال جيتي ازاي
قولت وانا بأشر بعيني علي بجاد
_ بجاد جابني
وجهت نظرها ناحيته وقالت
_ وليه عين يجي لغيت هنا بعد اللي عملوه هو وخاله مش كفاية حرمنا منك كل السنين دي
_ ماما بجاد ملهوش دعوة باللي حصل.. هو اتجوزني من غير ما يعرف كل ده.. هو لما خدني خد مراته مش خطفني
_ يعني انتي موافقة علي اللي عمله
_ الطريقة غلط بس انا بحبه وعاوزاه.. وبردو مش هسيبكم
_ يابنتي ازاي هتجوزي ابن اخت اللي حرمنا منك
_ ياماما قولتلك هو مكنش يعرف حاجه.. انا وبجاد اتجوزنا علي سنة الله ورسولة وبنحب بعض
وجهت نظرها ليه وقالت
_ وهو اللي بيحب يخطف ولا يسيبك تعبانة من غير ما يسأل
_ غصب عنه وخطفني علشان مكنش حد فيكم هيوافق.. بجاد جوزي يا ماما.. وكملنا جوازنا امبارح يعني الموضوع مبقاش ورق وبس
_ كملتوا جوازكم؟!!! .. جواز ايه؟! جوازتكم دي باطله هو اتجوز فاطمة بجاد بس انتي ايسل احمد انتوا كدة زنيتوا مكملتوش جواز
_ علي ايام الرسول صلي الله عليه وسلم مكنش في ورق كان الجواز اشهار وموافقة من الطرفين وبس.. وانا راضية ب بجاد زوج ليه وهو كمان اي حاجة بعد كده نحلها.. علشان خاطري انا مش هتخلي عن حد فيكم وهو قالي انه مش هيمنعني عنكم وانتوا كمان متحولوش تمنعوني بليز
_ نمنعك إيه بقا وانتي بتقولي كملنا جوازنا.. خلاص مبروك بس مش هتروحي معاه من غير ما نصلح الاسماء وتجوزوا تاني علي يد ماذون ويتعملك فرح
قال بجاد
_ لا معلش هنعمل كل ده بس هي هتيجي معايا
وقفت قصادة وقالت
_ لا يا حبيبي بنتي مش هتروح معاك من غير جواز بورق رسمي من الحكومة وبفرح كمان
_ ورق ايه انتي عارفه الإجراءات دي هتاخد قد ايه.. طيب قولي فرح والباقي نعمله وهي معايا
قالت وهي بتقفل الباب في وشه
_ هو دة اللي عندنا
قولت
_ يا ماما انتي عملتي ايه
قال وهو بيخبط
_ فاطمة انتي قولتي هترجعي معايا مينفعش الكلام ده.. ياست انتي انا عايز مراتي لا ارتكب جنايا دلوقتي
_ ارتكبها عندك المكان واسع ويسيع جنايات كتير
قولت
_ يا ماما!!!
_ اخرسي يا بت قدامي علي جوه
قولت ضاحكة
_ خلاص يابجاد هاجي معاك بعد الفرح بقا، امشي ومتخافش
_ امشي فين وربنا هكسر الباب احنا متفقناش علي كدة.. يا حماتي ازاي تاخدي مراتي مني في شرع مين ده
_ يااااحبيبي ، مانت وخالك خدتوها مني كان في شرع مين.. امشي مش هفتح.. وهسمحلك تيجي تشوفها مره في الاسبوع كرم اخلاق مني
#احمد
جه العسكري خدني تاني لظابط لقيت المحامي اللي قولتله يرفع القضية هناك بيقولي
_ انت مفهمتنيش ليه ان بنتك ملهاش شهادة وفاة
_ مسألتنيش علشان اقولك
_ ازاي بس يا استاذ احمد انت كنت ظابط قديم لازم تكون فاهم ان طالما مفيش شهادة وفاة ف بنتتك تعتبر عايشة وهي بنتك من غير أي قضايا
_ ايوه بس هي عايشة بأسم تاني
_ لا دي مشكلة تانية احنا هنطعن في صحة شهادة الميلاد بتاعتها اللي عايشة بيها وبس انما بنتك هي بنتك من غير اي قضايا
_ ازاي يعني وهي متعلمه ومتجوزه وكله بأسم فاطمة مش ايسل
_ انا قولتلك هنطعن في الشهادة التانية ونثبت انها مزورة
#زيد
بعد ما اطمنا علي بدر وجت دادة امينة من بيتهم طلعت من البيت بسرعة وروحت علي بيتها ، بيت خلود عشان اصالحها، خبطت عليها ردت من جوه ف قولت
_ افتحي يا خلود
قالت بصوت مرتبك
_ مش هفتح امشي من هنا انا قاعدة لوحدي
_ افتحي هتكلم معاكي
_ لا وامشي بقولك
_ اسف .. انا مش عارف كنت بقول ايه انا بس اتضايقت لما فهمت انك ماشية مع واحد وبيدخل بيتك .. لو مش بحبك مكنش همني تمشي معاه ولا مع عشرة غيره.. صدقيني ما بقول كلام يضايقك غير من باب الغيرة وحبي ليكي
_...
_خلود! .. طيب اديني فرصه ، اوعدك عمري ما هسيء الظن فيكي تاني
قالت بصوت متحشرج
_ لو حد شافك هيكون منظري وحش قوي.. امشي من هنا
_ محدش ليه دعوة بينا.. لو رضيتي مسافة اسبوع هنتجوز ومحدش هيقدر يقول كلمة
قالت ببكاء
_ باسم جاي في الطريق لو شافك مش هعرف اقوله انت مين.. امشي
نزلت دموعي وانا بقول
_ مش همشي غير لما ترضي ، ياخلود انا مش هقدر اعيش من غيرك.. هعمل كل اللي يرضيكي بس متسبنيش.. خلود! .. خلود!
_ إيه يا استاذ واقف كدة ليه
جاني صوت من خلفي بيقولي الجملة دي التفت ليه لقيته هو نفسه الولد اللي في الصورة اعتدلت وقولت
_ باسم!
_ انت عارفني
_اه اعرفك
ربت علي كتفه ومشيت وبعد خطوات وقفني وقال
_ وقف عندك
وقفت بدون النظر ليه ف قال
_ انت كنت بتعمل ايه هنا
خبط علي الباب وبقا ينادي
_ خلوود!! خلود!!
كمل بعصبية موجه كلمة لية انل
_ انت كنت واقف ليه بسالك.. عملت فيها ايه
التفيت ليه وقتها الباب اتفتح بصيت لداخل بلهفة ولكن تبددت لهفتي لما مشوفتهاش كانت مستخبية ورا الباب وبتقوله
_ ادخل
قال وهو بيتنقل بنظراته بينا
_ افهم الاول مين ده وكان بيعمل ايه هنا
_ هفهمك بس ادخل
#خلود
حاولت اكون طبيعيّة قدامه مقدرتش ، وبقيت اتهرب من نظراته اللي ملحقاني بشك طول ما انا بعمل القهوة ف قال
_ سيبي اللي بتعمليه وقوليلي مين ده وفي إيه بينك وبينه
_ مفيش حاجه ياباسم.. ده دكتور، تيتة شغاله في بيتهم من زمان وانا عيشت كل عمري عندهم
_ عيشت عمري كله في بيت فيه شباب
_ اه في اتنين غيره
_ وازاي جدتك تسمح بكدة.. ليه مسبتكيش معانا طالما هي هتعيشك وسط شباب اغراب عنك
_ كانت هتسيبني لمين وانا محدش سأل عني
_ بس بردو ياخلود ازاي يعني تعيشي في بيت فيه شباب.. وعلي كدة كانوا بيعاكسوكي ويكمن كانوا بيحاولوا يقلوا ادبهم
_ الناس محترمين مشوفتش منهم حاجة غلط ، وصاحب البيت تكفل بمصريفي ومعتبرني بنته
_ واللي كان هنا بردو معتبرك بنته.. ما تحكيلي في ايه انا من حقي افهم ايه اللي بيحصل
قولت بنرفزة وانا بتوجه ليه بجسمي
_ لا مش من حقك انا عيشت عمري لوحدي كنتوا فين انتوا
_...
_ القهوة
حطيتها جنبه وطلعت من المطبخ قعدت في الصالون ف جه ورايا قعد جنبي وقال
_ انا مش بحاسبك علي اي حاجة حصلت بس انا اخوكي ولو الراجل ده مضايقك هقف معاكي
_....
_ قولي انا هسمعك ومش هعلق علي اي حاجة غير لو طلبتي رأيي
سكت شوية وبعدين قولت
_ اقولك ايه انا مش عارفة ايه اللي ممكن يتقال
_ قولي كل حاجة
_ كل حاجه
_ ايوة انا مش هضرك وهترتاحي لو حكيتي
_ اها.. ماشي.. الحكاية
_ ايوة كملي
خدت نفس عميق وقولت
_ الحكاية اني كبرت لقيت نفسي في بيت فيه تلات شباب اتنين منهم مكنوش يقعدوا في البيت كتير علشان شغلهم ، انما التالت واللي هو الدكتور زيد اللي شوفته ده كان بيقعد طول النهار في البيت يسجل فيديوهات عن الامراض النفسية وبيعمل لايف ويجاوب علي اسئلة الناس وينصحهم ، كنت بقعد جنبه اتفرج عليه بتركيز شديد وبحفظ اللي بيقوله لغيت ما لقيت نفسي اتأثرت بيه جداً لدرجة اني عملت بيدج وجروب وقناة علي اليوتيوب وبقيت اعمل زيه بالظبط ، اطلع لايف واعمل فيديوهات ، وانصح البنات واحل مشاكل بس طبعا مكنتش عارفه اوصل للي وصله هو عنده متابعين كتير وانا اكبر عدد وصلتله 300 الاف وهو منهم.
لما عرف اني عامله بيدج وبنزل فيديوهات تابعني علشان يشوف اللي بنزله وبقا مع كل فيديو او بوست اشيره يقعد يقول غلط وينتقدني ويحسسني اني تافهه ومشاكل البنات اللي بحلها اتفه مني وبقا كل شويه يقولي وقفي اللي بتعمليه ده عيب انتي بنت.
عمره ما نصحني بهدؤء كان دايمًا بيحبطني مع اني انا كنت عايزه ابقا زيه هو لأني اتأثرت قوي بيه مكنتش طمعانه في شهره.
بس هو فهم ده علي اني بعمل كدة حب في اني انجح وخلاص ومن هنا بدأ يكون هدفي بس اني اكون احسن منه وتنازلت شوية لغيت ما اتعرفت ومن بعدها مبقتش ملاحقه علي المصايب.. وكان كل مصيبة هو يلحقني منها ، كنت بحس بخوفه عليه وبعدين بحبه.. حبني وحبيته فضل فترة كبيرة مش راضي يعترف علشان مش واثق فيه وشايفني متهورة ومصونش بيت.
وفي مره قالي كلام جارح ف وافقت علي ازبل خلق الله علشان ابعد عنه او اغيظه مش عارفه المهم وافقت ف غار عليه وبقا مش طايق اسم الولد ده ورجعت احس انه بيحبني وعايزني والمشكله اللي واقفه في طريق اعترافه ليه هو اللي وافقت عليه ده ف قولت للولد ده اني مش هقدر اكمل وبعدت عنه ورجعت اقرب من زيد...
_ كملي
قولت بحرج
_ المهم ان في مره قربلي شوية وقال كلام معناه اعتراف بحبه، ودي كانت اول مره يقولي الكلام ده، فرحت جداً انه اخيرا نطق ورجعت البيت مبسوطة والدنيا مش سيعاني من الفرحة وبقيت اتخيل وارسم احلام وردية وفجأة كل ده اتهد فوق دماغي لما جت تيتة عندي وقالتلي الدكتور زيد طلب نشوفله عروسة.. عروسة غيري مش انا.. بعد ما اعترفلي باللي حاسة ناحيتي طلب عروسة غيري ومفكرش انا ممكن يحصلي ايه.
وجه تاني يوم و واجهته ف قالي بحبك بس مش واثق فيكي وانه ميضمنش ممكن اعمل ايه بعدين، كان قصده ممكن في لحظة زعل اخونه .. انجرحت طبعاً والدنيا اسودت في عيني وكنت متمنية الموت بس عديت الموقف ده زي اللي قبله وحلفت ما هحن ليه تاني وبالفعل عملت حد بيني وبينه وبعدها جه الولد اللي وافقت عليه وبعدين رفضته عشانه كان هيقتلني طعني طعنتين وكان هيكمل بس حد لحقه المهم كنت هموت ولحقوني علي اخر لحظة ، وقتها حس اني هضيع منه ف نسي كل أفكاره عني وقالي مش عايز غيرك رفضت طبعاً علشان الكلام اللي قاله مكنتش قادره انساه ولكن مع الأيام بدات احس بصدق كلامه وانه حبه ليه اكبر من اي افكار في دماغه.. وكان حبي ليه هيغلبني ويخليني ارجع لغيت امبارح بالظبط جالي عند البحر لما انت سيبتني وكان عارف ان في شاب ماشيه معاه ودخلنا البيت مع بعض.. عليك انت بس مكنش عارف انك اخويا.. وقالي كلام اصعب من اللي قاله قبل كده.. كلام يدبح دبح "
كملت باختناق ودموعي بتحتشد في عينيه
من غير ما يسألني حتي.. مجاش قالي مين ده قبل ما يقول حاجه لا دخل فيه شمال علي طول.. كان متأكد إني رخيصة قوي ممكن امشي مع اي حد مع اني عمري ما كنت صايعة او بعمل حاجة تخليه يصدق بسرعة دي من غير حتي ما يسألني ولما عرف انك اخويا ومغلطتش كان جاي يعتذر.. كل مره كان بيقولي كلام يوجع كان بيرجع يعتذر ويرجع يقوله تاني..بس عارف انا مش مشكلتي الكلام اللي قاله انا مشكلتي انه معندهوش ذرة ثقة فيه دائما شايفني بغلط ومتوقع مني اعمل اي حاجة
بصتله وقولت ببكاء مشيرة علي نفسي
_ ينفع ارضا بعد كل ده ولو رضيت هيبطل يشك فيه
أومأ نافيا ف قولت ببكاء
_ اديك قولت وانا مشكلتي انا مش قادره اسيطر علي قلبي مش قادره اكرهه
مسك ايدي وقال
_ مش مهم تكرهيه ، النسيان والتعود علي الغياب، واخراج حد من قلبنا كل ده بياخد وقت وهتتعبي علشان تقدري تعملي كدة ، بس المهم انك متتنازليش تاني.. في كل مرة هتتنازلي هتقللي من قيمتك مرة ورا مرة لغيت ماهو نفسه ميبقاش ليه رغبة فيكي وهيبطل يحاول يصالحك، وطالما هو مش واثق فيكي لو عاش عمره كله مهما كان بيحبك مش هيكون مطمن من ناحيتك، هيحرص، هيشك، هيفتش وراكي، ورا كل نظرة، ورا كل كلمة، ورا كل لايك، حتي سكوتك هيدور عشان يعرف وانتي ساكته بتفكري في ايه، عينه طول الوقت هتكون عليكي ، هيرجع في غير معاده وحتي لو اتاخرتي شوية في الحمام هيفتح الباب عليكي علشان يعرف بتعملي اية وهتتعبي والنهاية مش هتعجبك.
اهم حاجة بين اي اتنين مهما كان علاقتهم ببعض هي الثقة، مفيش ثقة يبقي مفيش راحة والحب هيهرب من الشباك .. ف مترجعيش تاني وقفي هنا
قولت ببكاء
_ نفسي بس مبقدرش
_ هتقدري انا معاكي لغيت ما تحبي نفسك وتكرميها.. قومي هتيجي تقعدي معانا يومين
_ لا
_ والله لا تيجي.. ماما هترحب بيكي جداً
_ لا ياباسم خليني هنا احسن ، هقدر اسيطر علي نفسي المرة دي
_ طيب اقولك حاجه
_ قول
_ بما ان الساندوتشات جابت همها ف انا موافق توقفي معانا تعملي الساندوتشات وتعملي قهوة وهو تسلي نفسك وتنشغلي
اومأت ايجابا ف قال
_ بس ممكن طلب قبل اي حاجة
_ اطلب
_ اتحجبي
_....
_ انتي حرة بس انتي شكلك حلو بصراحه ف نلم نفسنا شوية علشان الشباب
_...
_ مش هتخسري حاجه بالعكس هتكوني احلي
اومات ايجابا وقولت
_ طيب بس اشتري عشان معنديش
_ اول حجاب هدية مني ليكي فوراً هنزل اجيبه ونشوفه عليكي
ابتسمت وسط دموعي وقولت
_ طالما قولتلك هلبسه يبقي هلبسه..انت بتورطني كدة يعني
_ ايوة انا بورطك
طلعنا مع بعض اشترينا كام طرحة مع دبابيس ولبسين محجبات ورجعنا دخلت اوضتي لبست وطلعت لما شافني صفر وقال
_ قمر سيبك انتي
_ حاسة شكلي وحش
_ لا والمصحف شكلك حلو قوي
قولت بإبتسامة باهته
_ شكرا ، اديني لبسته ومش هقلعه تاني ولا تزعل نفسك
#احمد
بعد يومين جم خرجوني لما المحامي جابلهم تحليل ال دي ان اي وشهادة الميلاد وهي نفسها جت القسم مع بجاد شهدت اني ابوها ولما دوروا عن اللي خطفها عرفوا انه مات ف كل المشكلة بقت ان فاطمة عايشة بأسمين ايسل احمد وفاطمة بجاد والاتنين ورقهم رسمي وموثق، ورق منهم موثق في امريكا و ورق تاني هنا باسم ايسل بس الفرق ان ايسل لا عملت بطاقة ولا حتي دخلت مدرسة ولا معاها اي شهادات يعني لو مشيناها ايسل ف يعتبر مستقبلها ضاع ودي ازمة كبيرة مش عارف ممكن تتحل ازاي هل اسيبها تعيش عمرها بأسم فاطمة وتكون منسوبة لحد تاني غيري ولا تعيش باسم ايسل وتكون من غير مستقبل او تضطر تبدء من الصفر.
وبعد ما رجعت البيت عند مها وانا بفكر هعمل ايه علشان ارجعها وهعمل ايه في حوار الاسمين اللي تمتلكهم تفاجأت لما لقيتها هناك ف اتجهت ناحيتها بسرعة وقولت
_ انتي رجعتي ، عمل فيكي ايه ابن الكلب ده
_ اهدا انا بخير وبجاد هو اللي جابني وهو كمان اللي وداني القسم أشهد عشان تخرج
_ ياااحبيبي واية كمان.. عمل معاكي ايه وانتي عنده قولي
كملت بترقب
_ اوعي يكون قربلك
ازدردت لعابها وقالت بحرج
_ بجاد جوزي
_ يعني قربلك!!
_ بقولك جوزي
قولت بغضب
_ جوزك منين ، الجوازة دي باطلة هو مش جوزك
_ لا جوزي.. انا اتجوزته قدام ربنا
_ وانتي معتبره دي جوازة.. ولا راضيه بانك تعيشي بأسم غير اسمك
_ بأي اسم، ده مش هيغير حقيقة ان هو جوزي سؤاء بقا اسمي فاطمة او اي اسم تاني.. وبجاد مخطفنيش علشان يبعدني عنكم هو رجع مراته
_ طيب ولما انتي عاجبك قوي كدة وراضية باللي حصل راجعة ليه.. ليه مقعدتيش معاه
_ راجعة علشان ماما اللي اتحرمت مني كل السنين دي.. وعشانك ده لو كنت عايزني ، بس انا هكمل معاه بردو
_....
_ سوري بس انا لغيت دلوقتي مش عرفاك انا بحاول اقنع نفسي انك بابا.. وده قراري انا لو حابب اكون بنتك اوكي مش حابب اوكي بردو بس انا مش هسيب بجاد
_ اه.. يعني انا مليش كلمة ولا حق اقولك حاجه ولا حتي اعاقبك علي غلطك وتسليم نفسك لواحد غريب عنك
_ بجاد جوووزي مش غريب، قرر دلوقتي عاوزني بنتك ولا امشي
قربت مريم وقالت وهو بتضمها ليها
_ عاوزك.. كلنا عاوزينك
بصتلي وقالت
_ خلاص بقا يا أحمد ، ده كان ممكن جوازتهم تتم قبل ما نعرف انها بنتنا ومكنتش هتكون باطلة علشان اسمها.. انا مش هسيب بنتي تاني
_ اه.. يعني اطلع منها
قالت فاطمة
_ محدش قال كده.. انا مش عاوزه اسيبكم.. الحقيقة انكم اهلي بس انا ممكن اعيش مع جوزي ومعاكم"
فكرت لقيت اني مش هقدر امنعها عنها مهما اعمل ف قولت
_ طيب موافق بس بشروطي
_ شروط ايه
_يطلبك مني انا، ويكتبلك قايمة ويدفع مهر ويشتري شبكة من جديد وبأسمك الحقيقي، اللي راح ده انا مليش دعوة بيه
_ اه بس اسمي ده هياخد وقت علشان يتعدل وقضايا ومحاكم ، احنا ممكن نتجوز دلوقتي ونعدله بعدين
_ مش هياخد اي وقت انتي كدة كدة في السجيلات لسة عايشة بس من الربكة كنت ناسي اني معملتلكش شهادة وفاة اصلا ولا محتاج اعمل قضية علشان اثبت انك بنتي
_ ازاي ده يعني انا لية شهادتين
_ اه
بصت ل ايسل وقالت
_ واتنين ايسل
_ ايسل واحدة التانية مسمهاش ايسل مقبلوش يسجلوها باسم ايسل بس احنا بناديها بالاسم ده
_ امال اسمها ايه
_ انتي مالك باسمها دلوقتي.. الواد ده يجي يطلبك مني ويكتب عقد جديد ومهر جديد وشبكة جديده لأما تنسي
_ يعني يتجوزني مرتين وانا اكون ضرتي طيب ازاي
قولت بعصبية
_ يطلق فاطمة ويتجوز ايسل خلي كل حاجه تمشي طبيعي
قالت ببلاهه وهي بتحاول تفهم
_ يطلقني ويتجوزني؟
_ ايوة يطلقك ويتجوزك لا كدة لا تنسي انك تروحيله تاني ولا هو ولا عيلته كلها هيقدروا يخدوكي بعد كدة
_ ايوة بس هو لو طلق فاطمة هناخد تلات شهور فترة العدة علشان يتجوز ايسل
فكرت لثواني وقولت بحيرة
_ اه صحيح ده انا نسيت العدة
قولت بنرفزة لما استوعبت
_ لا لا، ازااااي ده اسكتي... هو هيطلق فاطمة ويتجوز ايسل اللي ملهاش عدة ولا ثبت انها اتجوزت قبل كدة..فاطمة هي اللي متقدرش تجوز قبل العدة مش ايسل ، لخبطتيني في اية
قالت ببلاهه وهي بتحاول تستوعب
_ يعني انا ممكن اتطلق واتجوز في نفس القعدة ونفس المأذون.. طيب وبجاد هيدفع مصاريف طلاق ومصاريف جواز في نفس الوقت ولا المأذون هيمشيها مبلغ واحد
#فاطمة
دماغي لفت وانا بحاول الاقي طريقة اقول بيها لبجاد انه يطلقني علشان يتجوزني وبردو معرفتش ولكن اتصلت بيه وحاولت افهمهاله براحه وقولت
_ انا متصلة بيك علشان اقولك حاجه مهمة
_ إيه
_ طلقني
_ ايه!!.. هو عشان خرجناه هيسوق فيها ويجبرك تسيبيني لا ده انا اخطفك تاني ومرجعكيش ليه
_ لا هو مقالش اسيبك ، بس انت لازم تطلقني علشان تجوزني
_ نعم.. انتي بتقولي ايه
_ بقول لازم تطلق فاطمة علشان تجوز ايسل اصل طلع ليه اسمين
_ ازاي ده
_ طلع ليه اسمين والاتنين موثقين ورسميين.. ابويا احمد معملش شهادة وفاة ليه وانا لغيت دلوقتي حية ارزق باسم ايسل
_ نعم!.. لا استني بحمل.. بصي انا مش فاهم بس متاكد اننا لو عملنا اللي بتقولي عليه ده هنتحبس البصمات يا ماما والصورة كمان
_ ماهو قالي ان المحامي هيطعن في الشهادة التانية وهنلغيها
_ طيب ومستقبلك وسنين تعبك في الدراسة هيروحوا كدة
_ هنعمل ايه مقدمناش حل تاني
#مليكة ❤❤
بعد ما رجعت فاطمة فتحولي الباب ولكن فضلت ماما مجفياني ومش راضية تكلمني ورافضه اي محاولة لصلح بيني وبينها ف رجعت قعدت في الأوضة واختفيت عنها وفي وقت الغدا جت فاطمة عندي قعدت جنبي وقالت
_ مش كفاية قعدة في الأوضة دي
_ هو انا قاعدة بمزاجي مانتي شوفتي بنفسك ماما مش عايزة تشوفني ازاي
_ تقومي انتي تختفي متحاوليش تصالحيها
_ المرة دي مفتكرش ممكن تصتلح
_ دي مامتك يعني مهما تزعل منك متقدرش تبعد عنك وهتلاقيها مستنياكي دلوقتي قومي هنتكلم معاها
_ مش عايزة
_ بقولك قومي.. النهاردة كل الزعل هينتهي
شدتني من ايدي وروحت الصالون لقيت ماما قاعدة ولما شافتني دارت وشي عني بجفا ف قالت فاطمة وهي بتقعد جنبها
_ خالتو.. بتحبيني؟
_ ليه
_ بتحبيني الاول ولا لا
_ بحبك
_ طيب لو كده صالحي مليكة .. هي مجنونة بس كان قصدها خير
_ والخير يخليها تخدرنا وتدخل ناس غريبة البيت
_ هي حبت تساعدني واهو ساعدتني.. ومش هتكررها تاني
_ لا خليها تكررها ونبي
ضحكت وقالت
_ كرريها يا مليكة بس المرة الجاية هاتي مجرمين بجد.. صلحيها بقا يا خالتو ، كفاية زعل ارجوكم انا صدعت
_ علشان خاطرك انتي بس
ابتسمت والدموع في عيني ف بصتلي وقالت وهو بتمدلي ايديها
_ تعالي
قعدت واترميت في حضنها ف قالت وهي بطبطب علي ضهري بشدة مقدرتش افسر اذا كانت طبطبة ولا ضرب
_ طول عمرك دماغك طاقة وبنعديها بس توصل انك تخدرينا وتدخلي علينا ناس غريبة يابنت الهبلة
قولت ببكاء
_ انا كنت بساعد فاطمة مكنش قصدي ادخل ناس غريبة البيت
_ ايوه ما انا عارفه بس مش كده يا حبيبتي مش كدة يخرب عقلك
_ آسفة
بعدتني عنها وقالت
_ يلا نسامحك المرة دي بس مش عايزة قلت عقل تاني
_ حاضر
_ واي حاجة بتحصل تقوليلي عليها مش عاوزة اتفاجيء
_ حاضر
كملت بتردد
_طيب لو كدة ف انا كنت عايزة اقولك حاجة
_ قولي
_ بدر اللي دخل البيت مع بجاد واللي كان خطيب جويرية صحبتي
_ ماله سي زفت
_ عايز يتجوزني
_ نااااعم
قومت من جنبها وقولت
_ هو اللي قال
قولت كده ف قلعت الشبشب من رجلها حدفته عليه
« بعد ايام»
#بشر
كنت كل ما احب اتكلم في موضوع الفرح حاجة تحصل تخليني اسكت لغيت ما زهقت وبقيت ماشي مش طايق حد.
ف بعتلي ابوي اروحله المكتب في وقت الغدا دخلت عندهم لقيت عمامي الاتنين وابويا وبدر قاعدين وبيتغدوا ف قال ابوي
_ تعاله اتغدا
قولت بضجر
_ شكراً مش جعان
قال عمي شبل
_ مالك مش حاملك دبان وشك
_ ومطقهوش ليه ، ما اديني كويس.. راجع اشوف الحسابات
قال ابوي
_ استنا ياد
رجعت بصتله وقولت بزهق
_ نعم يابوي
_ نافخ منخيرك علينا ليه
_ هي منفوخة لوحدها ، خلقت ربنا نعمل ايه
ابتسم عمي بدر وقال
_ في ايه يا بشر قول ايه مزعلك
_ انتوا هتزعلوني بالعافية مفيش انا مش زعلان
قال ابويا
_ وبتزعق ليه ولا عاوزني اقوملك
اخفضت راسي وسكت ف قال عمي بدر بإبتسامة
_ روق يا عبيدة مش كدة .. امال يا شبل ياخويا مش ناوين تعملوا الفرح ولا ايه
بصيت لعمي شبل بترقب وهو بيقول
_ ما احنا متفقين انه بعد ما تخلص تعليمها يا خوي
مررت بصري لعمي بدر وهو بيقول
_ يا راجل وحد الله تكمله وهي في بيت جوزها الواد هيقعد قد ايه من غير جواز كدة هيفضل متعصب ومنخيره منفوخة
كلهم وجهوا انظارهم ليه بعثرت نظراتي بربكة ف قال ابوي
_ هو الموضوع كدة.. يخيبك
قولت بحرج
_ انا راجع الشغل
قولت كدة ومشيت وانا متمني الارض تنشق وتبلعني وبعد دقايق جه بدر يقولي
_ مبروك ياعم عمامك وابوك قرروا يعملوا الفرح اول الشهر الجاي
بهتت ملامحي وقولت
_ لسة الشهر الجاي، ليييه
_ ياحبيبي الشهر الجاي اللي باقيله 11 يوم ده إيه مش قادر تصبر
قولت بعبس
_لا نصبر يلا 11 يوم 11 يوم احسن من سنتين
#زيد
تحجبت واشتغلت وحياتها بقت ما بين نصية الشاي اللي شغاله فيها مع اخوها وصاحبه عند الجامعة وبين البيت.
حاولت كتير اكلمها و ولا مرة قدرت لما بروحلها البيت مبتفتحش ولما تعرف ان انا بتسيبني احكي مع نفسي علي الباب وعند الجامعة حاولت مرتين اكلمها هناك ولكن اخوها وقف في طريقي ومنعني.. لغيت ما تعبت مبقتش مركز في اي حاجة لا اهل ولا شغل ولا انترنت.. ولا حتي مركز مع نفسي.. مبقتش مركز غير معاها هي ومع حياتها اللي بتتغير وكأنها تجاوزتني خلاص وعلي قد امبساطي بالتغيير اللي حصلها علي قد ما انا حاسس اني اغبي انسان في الدنيا واني ضيعت من ايدي ابسط انسانة في الوجود.. الكل عرف ازاي يتعامل معاها الا انا.. الكل كان بيعرف يقنعها بالحاجة من اول مره الا انا .. كنت غبي ومتكبر و واثق من وجودها وانها في كل مره هتتصالح مهما اقول او اعمل معاها لغيت ما جيت انا بنفسي نهيت كل الفرص ورسي بيه الحال اني بقيت برتجي كلمة واحدة منها
_ وبعدين معاك
قالهالي ابويا وانا قاعد في اوضتي مطفي النور وبشرب قهوة ف اعتدلت وقولت
_ اتفضل
شغل النور وقال وهو بيتقدم نحيتي
_ هو انا كل ما هدور عليك هلاقيك قاعد القعدة دي
_ بفصل من دوشة الشغل
_ شغل ايه وانت بقيت بتقعد في شغل
_ بخلص الجلسات وارجع اكمل شغل علي الاب توب
_ طيب مالك.. احكيلي في ايه
_ مفيش حاجه انا تمام.. ربنا يخليك
_ ياولدي قول انا مفيش حيل للمناهدة.. مالك
_ مفيش والله يابويا.. انا كويس
_ كدة كويس
_ اه متشغلش بالك
_ طيب عاوز اتكلم معاها
_ تتكلم مع مين
_ خلود
_ تتكلم معاها في ايه
_ معرفش بس انت في الحالة دي من وقت ما مشت
_ أبداً هي ملهاش دعوة بحاجة انا مش مظبط لوحدي
_ نجبلك دكتور نفسي ولا ايه
قولت بتنهيدة
_ شكلي هروح لدكتور فعلاً.. انا محتاجه
_ طيب اجلها وبعدين نحطك في مصحة احسن دلوقتي عاوزين نجهز لفرح اخوك و ولدك عمك
_ قررتوا تعملوا فرح واحد؟
_ ايوة
#وفاء
في وقت تجهيزات فرح بشر من ناحية وتجهيزات فرح بجاد من ناحية انا قاعدة في اوضتي وصعبان عليه اني محضرش فرح ابني علشان احمد اكيد هيحضر وقتها جه بجاد قعد جنبي وقالي
_ مالك يا جميل
_ زعلانة
_ ليه بس
_ مش عارف ليه
_ مش واخد بالي
_ زعلانة عشان مش هحضر فرحك.. فرح ابني الوحيد
_ مين دي اللي مش هتحضر فرحي طيب ده انا ابطل اتجوز
_ طيب وابوها، انا اكيد مش هحضر وهو موجود لا انا ولا حتي ابوك
_ لا ما انا حليتها
_ ازاي
_ هنعمل الفرح علي مرتين مره علي الطريقة الامريكية ومره علي طريقتنا يعني فرح الصبح علي البحر ساعتين كده ولا حاجة اللي ما يتسمي يحضر وبعدين اخدها ونعمل فرح تاني في القاعة مع بشر وهاجر اي رأيك
_ هو لو عنده دم ميحضرش أصلا
_ وانا والله ما عايزه بس بقول حرام.. انا فاهم اني مينفعش اقول كده بس...
قولت بمقاطعة
_ متكملش فهماك.. اقولك حاجة
_ قولي
_ احمد ده صحيح ازاني ومش قادرة اسامحه بس منكرش انه حاول كتير يكفر عن غلطته دي واعترف باللي عمله علشان يظهر الحق.. فاهمة ان ده مش هيمحي الذنب اللي عمله بس اهو حاول
_صحيح، بس مهما كان عمري ما هتعامل معاه عادي واعتبره حمايا
_ احسن خلي علاقتكم مع بعض محصورة بفاطمة، هي تروح عندهم وقت ما تعوذ .. وانت متدخلهوش بيتك وده من حقنا، احنا مش هنكون بنظلم فاطمة
_ طبعاً ميدخلش هو غير مرحب بيه