رواية مكتوبة علي اسمي كامله بقلم ملك ابراهيم ) جميع الفصول مكتملة حتي الاخير الخاتمه

رواية ذئاب لا تعرف الحب الجزء الثاني2الفصل الثاني والستون62بقلم نجمه براقه

بجاد 

 جه تاني يوم وجه معاه مناسبتين مهمين اول مناسبة خطوبة بشر وهاجر وتاني مناسبة عيد ميلاد جويرية اللي تقريباً الكل نسية في الاول وبعد ما فطرنا كلنا مع بعض بابا راح  الشغل  وانا قولت لجويرية هوصلك المدرسة ولكن قبلها وقفت مع فاطمة وقولتلها 

_ انا هوصل جويرية المدرسة وانتي هتروحي دلوقتي مع ماما المستشفي وهخلص اللي ورايا وهجيلك علي هناك  

قالت بإبتسامة 

_ اوكي 

قولت بهمس 

_ هتوحشيني 

_ وانت كمان  .. متتأخرش عليه 

_ مش هتأخر... لا اله الا الله  

_ محمد رسول الله  

سيبتها ومشينا ناحية الباب وهناك وقفتني وقالت 

_ بجاد! 

بصتلها لقيتها جيالي وبتقول 

_ ابقي كلمني كل شوية

_ في حاجة 

_ عادي 

قولت بإبتسامة 

_ اوكي  هكلمك 

_ اوكي  باي 

مفيش حاجه منعتني عن اني احضنها الا وجود جويرية ورايا ومشيت وانا عيني بتلمع من السعادة وشارد وبعد مسافة فوقت من شرودي لما لاحظت ان جويرية ساكته مبتتكلمش ف قولت 

_ جويرية مالك  

هزت دماغها بنفي ف قولت 

_ امال شكلك مش مظبوط لية النهاردة.. اوعي تكوني ناوية ترجعي صنم تاني 

ابتسمت ابتسامة باهتة وقالت 

_ مفيش النهاردة عليه امتحان ومتوترة شوية  

_ لا متتوتريش انتي قدها 

ردت بإبتسامة وسكتت وانا مرجعتش اسألها تاني لأني كنت متوقع انها زعلانه علشان محدش افتكر عيد ميلادها وبعد ما وصلتها رجعت  البيت وفي طريقي اشتريت ليها هدية  ودخلت اوضتها حطيتها علي سريرها وقبل ما امشي لاحظت ورق مقطع في سلة الزبالة ومنكرش ان فضولي خلاني امسك قطع الورق واحاول افهم بس مفهمتش لكن كان واضح قوي ان دي مش ورقة تخص الدراسة وده خلاني اشك ان في حاجة بتحصل ف بقيت ادور في الادراج والدولاب والكرسات لغيت ما مسكت كراسة قلبت فيها و وقع منها ورقتين مطويتين  ف نزلت جبتبهم وقريتهم وكانت الصدمة انهم من ريان و واضح انهم بيراسلوا بعض ساعتها دمي غلي وحلفت لا اقول لبابا وبالفعل مسكت التليفون علشان اتصل ولكن تراجعت وقولت بلاش بابا مش هيستحمل وقررت ارجع في وقت خروجها من المدرسة واسألها 

#هاجر  

صحيت الصبح وبدأت اعمل ماسكات واجهز نفسي علشان حفلة الخطوبة في الوقت ده ماما وبابا مكنوش في البيت وانا واخده راحتي  وساعتها الجرس ضرب روحت عند الباب وقولت مين قالتلي خلود ف فتحت ولما شافتني قبل  بفزع مصطنع

_ يامه إيه المنظر ده خضتيني 

_ ده ماسك القهوة  تعالي لخبطي معايا 

_ لا مش هعك انا حلوة لوحدي  

قولت ضاحكة 

_ ياالثقة الزيادة  .. تعالي طيب مش فضيالك 

قولتها ومشيت خطوات ناحية اوضتي  ف وقفتني كلمتها وهي بتقول بضحك 

_ بت مش انا طلعت بقرة بجد 

رجعت بصتلها وقولت 

_ لسة عارفة المعلومة دي.. طيب ما احنا  عارفين انك بقرة من زمان اية الجديد 

كملت بضحك ولمعة دموع في عينيها

_ الجديد اني اتأكدت بنفسي.. طلعت بقرة وبقدم اللبن ببلاش انتي كان عندك حق 

بهتت ملامحي وانا بقول 

_ في ايه يابت مالك اية اللي بتقوليه ده

ردت بضحك هستيري 

_ زيد طلب يدوروله علي عروسة.. قال وانا اللي كنت مبسوطة لانه طلع بيحبني.. بس مطلعش بيحبني طلع عايز لبن ببلاش.. الغبي راح يدور علي لبن بفلوس 

زاد ضحكها وهي بتكمل وتقول 

_ الرجاله دول بهايم اقسم بالله.. طلع عندك حق يا هاجر وانا كنت عبيطة وقال واية جاية اقولك نطق وقالي علي مشاعره نحيتي  

بقت تضحك شوية وتتسند علي الحيط وبعدين قالت بعد دموعها ملت عينيها 

_ طلع الكلام ده زي البرسيم اللي بيدوه للبقرة علشان تديهم اللبن ببلاش  اااه هموت 

جريت عليها وحضنتها وقولت بدموع 

_ خلود حبيبتي اهدي 

بعدتني عنها وقالت بضحك مختلط بالبكاء 

_ اهدا اية... ده دبحني يا هاجر

انفجرت من العياط وقالت 

_ان حاسة ان روحي بتتسحب مني  مش قادرة 

قولت ببكاء 

_ حبيبتي عشان خاطري متعمليش في نفسك كدة هو ميستهلكيش اصلا.. اهدي علشان خاطري والله ما يستاهل دمعة منك 

مديت ايديه ليها ف اترمت في حضني وهو بتبكي بحرقة لغيت سكت صوتها مرة واحده وجسمها ارتخا ف قولت بصراخ وهي بتقع مني

_ خلود!!!  يا نهار اسود  ، خلووود مالك 

كملت بهلع وانا بضرب علي وشها 

_ خلود ردي  ... يااالهوي 

ريحتها علي الارض ودخلت اجري علي المطبخ جبت ميه ورشيتها في وشها ساعتها بدأت تفوق ف سيبت الازازة وارتميت جنبها وبقيت ابكي وانا حاسه جسمي كله بيترعش من الخضة  وبعد ما فتحت مررت عينيها في المكان لغيت ما استقرت عليه وقالت بدموع 

_ بتبكي ليه 

مسحت دموعها وقالت وهي بتوقف 

_ مفيش بكا تاني.. قومي 

قالتها وهمت انها تمشي وهي لسة مش قادرة تصلب طولها ف قولت ببكاء وانا بمسك فيها 

_ رايحه فين 

_ رايحه أجهز علشان الخطوبة وسامحيني لو طلعت احلي منك النهاردة  

_ خلود تعالي انتي تعبانه 

قالت بدموع 

_ لا والله مش تعبانة  ،  انا مبقتش حاسة بحاجة  اول مره مكنش حاسة بحاجة كدة 

_ طيب تعالي هتقعدي معايا وهنجهز سوا 

مسحت دموعها وقالت 

_ لا كل حاجتي فوق هجهز وهجيلك  

_ يابنتي مينفعش  خليكي هنا علشان متشوفهوش 

_ ليه مشفهوش،  عادي هشوفه وهصبح عليه كمان 

خدت نفس وقالت بتحدي 

_ انا مش ههرب  .. يلا هرجعلك لما اجهز.. بس اوعديني ما تقولي لحد  ولا حتي بشر اللي حصل دلوقتي 

_ حاضر  

#زيد 

من وقت ما قولت خليهم يشوفولي عروسة وانا مستخبي في اوضتي وخايفة اشوفها لأني كنت عارفة انها بعد ما تسمع مستحيل هتسامحني ولا هترجع زي الاول كنت عارف ان خبر زي ده هيكسرها ولكن بعد ما سمعت صوتها وهي بتقول رايحه لهاجر فهمت انها مسمعتش واطمنت شوية بس كان لسة جوايا قلق من انها تعرف وكنت بفكر اقولهم بلاش ولكن كان لازم ده يحصل علشان ننهي المسألة دي وخرجت من اوضتي اخيراً مليش نفس حتي ارد الصباح وطلبت قهوة من دادة امينة وقعدت في الصالون وبعد دقايق الجرس ضرب ولأن محدش كان فاضي روحت انا افتح  ف لقيتها هي وقف مكاني ابصلها لقيتها بتبتسم ابتسامة مصطنعة غالب عليها الحزن وبتقولي  

_ صباح الخير 

_.... 

_ هعدي ولا هتفضل واقف في طريقي كدة كتير 

بعدت من قدامها ف دخلت وقالت 

_ ميرسي 

كملت طريقها للأوضة وانا رجعت مكاني بفكر انها اكيد عرفت  لأنها مكنتش طبيعية عينيها ودموعها اللي باين اثرهم علي وشها اكدولي ده وفضلت مكاني مستني منها اي رد فعل او عتاب او حتي زعيق بس ده محصلش وبعد دقايق شوفتها طالعة من الاوضه  حاطة تاج ناعم علي شعرها وفي ايدها شيكولاته بتاكلها مرت قدامي ناحية المطبخ جابت لمون ودخلت تاني وبعد شوية طلعت جابت طبق ومرة زبادي، كل شويه كانت بتخرج تجيب حاجة وتدخل تاني اوضتها  وبعد وقت طلعت والماسك علي وشها دخلت الحمام غسلته ورجعت تجففه بالمنشفة والمرة دي وقفت بصتلي وقالت  

_ إيه رأيك.. وشي بقي احسن ولا انا بردو 

تعلقت عيني عليها بحاول افهم حالتها دلوقتي ف قالت 

_ شكلي انا بردو.. كدة مقدميش غير ماسك البيض والبُن هو اللي بيجيب نتيجة 

_ خدي يا خلود

_ لاااا النهاردة مش فاضية اعمل قهوة ولا اتهزق، انا قولت لهاجر هطلع احلي منها يعني هطلع احلي منها.. داخلة اكمل   

قالتها ودخلت بس كانت بتقولها وهي بتقاوم رغبتها في العياط  كان باين عليها انها منهارة   

#جويرية  

بسبب محادثة اللي اسمه عصام ده مركزتش لحظة في الحصة وكانت دماغي مشغولة في اللي قاله عن البنت المريضة وبفكر إيه الصح اللي مفروض اعمله هل اطلع منها واسيب حرية الاختيار  ل ريان ولا  اكلمه واطلب منه  يتجوزها مدام كدة كدة مش هنقدر نتجوز انا  وهو. 

وبعد وقت جت الفسحي وكنت خلاص خدت قراري إني اكلمه وساعتها استجمعت شجاعتي وخرجت من المدرسة وقفت عند الشجرة واستنيت لغيت ما شوفته جاي وايده مخبيها ورا ضهره  ف خدت نفس وهديت ورجعت ابصله وهو جاي عندي نفس الابتسامة ونفس الخجل علي وشه لغيت ما وصلني وقال بربكة

_ ازيك

قولت بتوتر

_ الحمدلله وانت 

زادت ابتسامته وقال 

_ الحمدلله باحسن حال.. و... وشكرا انك جيتي  

قولت بتلعثم 

_اها.. مـ..  ممكن  ،  نمشي، شـ  شوية عشان العيال 

_ اه طبعاً طبعاً.. يلا  

كمل باستغراب 

_ بس انتي تمام 

_ تمام.. يلا نمشي 

قال بإبتسامة 

_ يلا 

مشينا مع بعض بعيد عن المدرسة وبعد مسافة وقفنا ف قالي بخجل غالب علي صوته 

_ كل سنة وانتي طيبة 

كمل وهو بيخرج شنطة هدايا من ورا ضهره 

_ اتفضلي،  حاجة صغيرة  ،  ان شاءلله السنة الجاية تكون هدية تناسبك اكتر

قولت بربكة وانا مش قادرة ابص في عينيه لسة

_ لية انا

_ اه  .. النهاردة عيد ميلادك ولانسيتي 

_ لا.. طـ ،  طيب متشكرة 

خدتها منه وفتحتها لقيت دفتر مذكرات بفرو بامبي وناعم مع قلم ومجموعة كتب وسلسلة ناعم من مادة الايبوكسي علي شكل كتاب ابتسمت وقولت بخجل  

_ حلوين قوي 

قال بإبتسامة 

_ عارفك بتحبي الحاجات دي... دول قصص هيعجبوكي انا اخترتهم بالواحدة ، والدفتر ده لو حبيتي تكتبي اي حاجة فيه.. والقلم معاه..  والسلسلة كمان تشبهلهم  

_ متشكرة قوي.. دول احلي هدية جاتني في حياتي 

حك اذنه وقال 

_هه... اممم فرحان انها عجبتك.  بس انا حاسس ان فيكي حاجه غريبة النهاردة 

_لية... مش خايفة وبجري زي كل مرة 

_ ايوة 

استجمعت شجاعتي اكتر وقولت

_ طيب ودي حاجه تزعلك

_ اكيد لا بس مفتكرش القوة دي من يوم وليلة.. معقول بتتعافي بسرعة كدة 

_ ليه مش معقول.. انا كبرت خلاص وبقالي حياتي وبختلط بناس 

كملت بتردد 

_ وكلامي معاك الفترة اللي فاتت اداني ثقة في نفسي  

ابتسامته رجعت تملا وشه وهو بيقول 

_ كلامي انا 

_ ايوة 

كملت بصعوبة وانا ببعد وشي عنه

_ انا من صغري متأثرة بيك  ، كلامك معايا بيفرق وممكن يحولني من حاله لحاله

ابتسم بس كان لسة الحيرة والتساؤل يعتلي ملامحه وهو بيقول 

_كويس، بس انا بردو حاسس انك مش طبيعية النهاردة  انا مكنتش متخيل انك توافقي تقابليني يا جويرية 

_.... 

_هو انا مبسوط قوي اني واقف معاكي وبكلمك بس حاسس ان في حاجة... في ايه؟ 

غمضت عيني وخدت نفس عميق وهديت واستجمعت شجاعتي تماماً وبعدين بصتله وقولت من غير خوف ولا  توتر 

_ انا دلوقتي حاسة اني موجوعة.. قلبي رجع يوجعني مرة تانية 

_ ليه.. ايه السبب 

_ علشان.. هطلب منك متكلمنيش تاني 

بهتت ملامحه وقال 

_ حد عرف  

_ لأ 

_ امال ايه 

_ هو انت مجبتش سيرة عن خديجة في جواباتك لية

_ خديجة مين؟

_ مش عارف 

_ لا عارف بس انتي إيه عرفك بخديجة 

_ عرفت.. وعرفت انها بتموت.. وعرفت ان امنيتها قبل ما تموت انها تجوزك 

_ انتي مين قالك الكلام ده 

_ اللي قالي المهم انه صح ولا كدب؟

_ صح بس انا مش عايز ورفضت... مين اللي قالك عاوز اعرف 

_ مش مهم..بس انا عايزة اعرف رفضت عشان إيه 

_ يعني ايه عشان ايه.. انتي عاوزاني اوافق؟ 

_عايزة اعرف رفضت ليه؟ 

_ علشان مش عايز غيرك.. عاصم او عصام لما قالولك مقلولكش ليه السبب مع انهم عارفين 

_ قالوا بس حتي وانت عارف ان عمره ما هيحصل بينا نصيب رافض تجوزها 

_ انتي بتقولي ايه انا مش فاهم انتي عايزة ايه بالظبط 

_ انت عارف  انه محدش هيوافق لمليون سبب.. وعارف ان رسايلنا دي مش هتستمر 

_ ايوة يعني انتي عايزة توصلي لاية

_ تجوزها 

_ انتي بتقولي كده 

_ اه انا.. ليه تحرم واحده تكون مبسوطه في اخر ايامها علشان حاجة عمرها ما هتحصل 

_ ومين قالك انه اخر ايامها هي لو كملت العلاج هتخف 

_ طيب ما دي حاجه كويسه.. انت هتساعد انسان انه يعيش.. حيات البنت دي متوقفة عليك 

قال بنرفزة

_ انتي بتقولي ايه!!!.. يعني مش هتزعلي.. ده انا كنت خايف تعرفي اللي بيحصل ف تزعلي ومتكلمنيش تاني.. ولا انتي مبتحبنيش وانا اللي فهمت غلط 

_ انت عارف مشاعري ناحيتك.. بس يصعب عليه ان يكون بأيدي اساعد حد بيموت واتأخر.. انا كنت هزعل بجد لو كان في فرصة لينا مع بعض 

_ اه يعني انتي بتنهي كل حاجه كده  

_ مفيش حاجه هتنتهي 

_ وده ازاي هنتواصل وانا متجوزها 

_ لا مش هنتكلم تاني بس انا هفضل طول عمري فكراك ومش هبطل...  مش 

_ مش هتبطلي تحبيني؟ 

_ اه 

_ واية الفايدة 

_ مفيش فايدة لينا بس في لغيرنا.. انا لو شايفة ان ممكن يكون لينا نصيب في بعض مكنتش قولتلك الكلام ده  .. احنا عمرنا ما هنكون لبعض ولازم نكمل حياتنا مش هنوقف علي مشاعر 

_ يعني ايه 

_ يعني اتجوزها 

_ طيب وانتي مش هتزعلي اني هكون مع واحده غيرك 

_ وازعل ليه 

_ يعني ايه تزعلي ليه... جويرية ارجعي اسكتي تاني  .. كلامك طلع وحش 

_ ممكن تسمعني علشان الحق ارجع قبل الفسحة ما تخلص 

_ اممم قولي بس مش هنفذ حاجة 

قولت وانا بلبس السلسلة بتاعته 

_ اول حاجة انا مبسوطة قوي بالهدية دي  .. وتاني حاجة كرهت عيد ميلادي  بسببك لأني بنفسي المرة دي بطلب منك تبعد عني 

_.... 

_ بس انا مش شايفه اي امل اننا نكون لبعض.. مش هنساك وهفضل ا... 

_ تحبيني 

_ ايوة.. ومعرفش انت ممكن تنساني ولا لا بس المهم 

قال بمقاطعة 

_ نهاية الكلام  انتي عايزة ايه دلوقتي 

_ عاوزك متضيعش سنين من عمرك علي وهم ولو بأيدك تساعد حد اعمل كده.. مش عاوزه اكون سبب يمنع ان البنت دي تكون مبسوطة اخر ايامها وان انها تلاقي سبب يشجعها تكمل علاجها وتخف.. بلاش تلاتة يخسروا.. كفاية اتنين  

_ بس انا مش هعرف امثل اني عاوزها وبحبها 

_ متمثلش عاملها بطبيعتك.. انت طيب.. علشان خاطري وافق لو صحيح مهمة عندك  وانا هعتبرها هديتي عن السنين اللي فاتت  

_... 

_ انا ماشية اتمني متكسفنيش.. ومتبعتش تاني عشان مش هرد ولا هخرج اجيب رسايلك

لمعت دموعه وهو بيقول 

_ مبلحقش اتكلم معاكي وبعدها بتحصل حاجة تبعدنا لسنين.. جويرية انا والله تعبت.. انتي مش فاهمة  ،  انا عقلي وقلبي مش مشغولين غير بيكي انتي وعايش سنين علي امل ان تحصل معجزة ونتجوز 

قولت بدموع 

_ مين عارف ممكن يحصل إيه بعدين.. روحلها يا ريان  اتجوزها وابني مستقبلك وانجح  وانا كمان هكمل تعليم وهحاول اوصل لنجاح اللي توقعته عشاني.. وهفضل... 

مقدرتش انطقها ف قالي بدموع 

_ كمليها.. علشان يكون ختامها مسك

خدت نفس وقولت 

_ هفضل احبك 

_ واية الفايدة.. جويرية افهميني انا مش هعرف اكون مع غيرك ا... 

قولت بمقاطعة 

_ انا قولتلك عايزة هديا لكل السنين اللي فاتت مش هقبل بغيرها.. اشوف وشك بخير  

قولتها ومشيت ف جاني صوته بيقولي 

_ استني  

قولت بصوت متحشرج وانا متابعة طريقي

_ اتأخرت علي المدرسة  ❤

كملت طريقي بسرعة ودخلت المدرسة لقيت لسة الفسحة منتهتش ف دخلت الحمام فتحت التليفون وبعت للولد اللي اسمه عصام وقولتله

_ كلمته 

جاني رده علي طول بيقولي 

_ كتر خيرك انتي كده ساعدتي البنت اللي بتموت في المستشفي 

كتبت ودموعي بتسيل علي خدي  

_ ربنا يشفيها  .. ممكن تقولي لو وافق 

_ هو مقالكش هيوافق

_ مقالش 

_ وماقنعتهوش ليه واتأكدتي انه هيوافق

_ علشان عرفاه هيوافق بس حابة اتاكد 

_ اوكي لو في جديد هبلغك 

_ شكرا 

قفلت معاه وحاول اهدا واتقبل اللي قولته بس مقدرتش حتي لو مش هيكون ليه صعب عليه اتقبل ان واحده غيري هتكون معاه وبعد ما خلص وقت المدرسة طلعت لقيت بجاد مستنيني طلعت في العربية ف بصلي وقالي بجمود 

_ بتشوفي ريان فين 

انتفض قلبي لما سمعت جملته دي ف قولت بارتباك 

_ ريان 

_ اه ريان مش عارفة ريان.. ريان اللي بيبعتلك جوابات يا جويرية 

شيحت بنظري بعيد عنه بتوتر  ف قال بعصبية وهو بيضرب علي دريكسون 

_ انا بسألك بذوق متسكتيش وردي عليه لأحسن ادخل بابا في الموضوع دة وتكون الناهية

قولت بخوف

_حاضر هقول .. ساعات بيجي هنا قدام المدرسة 

_ واية عرفه انك في المدرسة دي

_ شغال في مكان قريب 

_ وبتبعتيله ويبعتلك ليه؟ 

طاطات دماغي بخزي ف قال 

_ تاني بتخدعينا فيكي تاني يا جويرية   صرخ فيه وهو بيخبط ايده في الشنطة اللي ماسكاها 

_ليييه!!! 

انتفض جسمي وقولت ببكاء 

_ مش هكلمه تاني 

_ عبيط انا هصدق كدبك تاني.. انا هقول لبابا 

قولت بترجي 

_ لا ونبي يا ريان والله نهيت كل حاجه النهاردة.. قولتله ميبعتش تاني ولا انا هبعتله 

_ انتي كدابة حياتك كلها كدب والله ما هصدقك 

_ مش بكدب المرة دي.. انا قولتله ميبعتش والله 

_ طيب احكيلي بتشوفيه ازاي  وكام مرة و وصلتوا لفين

اومات ايجاباً وحكتله اللي حصل ف قالي بجفا

_ يعني هيتجوز 

_ المفروض 

_ وحتي لو متجوزش  ،  اديني بحذرك يا جويرية  لو سمعت انك قابلتيه تاني وحتي لو بالصدفة هقول لبابا وانتي عارفة ممكن يحصل ايه لو بابا عرف 

قولت ببكاء 

_ حاضر 

#بشر  

تفاجأت لما قالتلي خالتي ان زيد طلب يشوفوله عروسة ف  دخلت عنده وقولت 

_ صحيح الكلام اللي سمعته ده 

قال بتلبد 

_ كلام ايه 

_ انك طلبت يشفولك عروسة 

_ صح 

_ طيب وخلود يابني 

بصلي بطرف عين ف قولت 

_ يابني مالك.. حاسك عاوز دكتور يعالجك.. لما انت عاوزها بتدور علي غيرها ليه 

_ مرض تقول ايه 

كمل بضيق

_ حاسس اني فعلاً عاوز اتعالج.. اول مره اقتنع لاني لازم اروح لدكتور 

_ ياحبيبي إيه مشكلتك.. علشان الفيديوهات يعني .. معقول يا زيد حبك ليها ميخلوكش تتغاضا عنهم وندورلهم علي حل نحذفهم

_ المشكلة مش بس فيديوهات لو كانت علي الفيديوهات كان بقا امرها سهل  .. المشكلة اني  معنديش اي ثقة فيها 

_ ثقة!! لا لو كدة اسكت احسن 

 متكلمتش تاني وحسيت ان مفيش كلام ممكن يتقال بعد اللي قاله  ،  الثقة اهم حاجة بين اتنين من غيرها يبقي الجوازة بايظة من اولها  يمكن لو كانت مشكلته حاجة تانية كنت قدرت اقنعه 

#فاطمة 

كل ربع ساعة تقريبا كان بجاد بيكلمني وبعد ما اتاخر ساعة اتصلت بيه علشان اطمن لقيت تليفونه مقفول ف قال بابا بعد ما لاحظة قلقي

_ مالك 

_ مفيش حاجه حبيبي.. انت عامل ايه دلوقتي 

_ احسن.. حاسس اني اقدر اخرج النهاردة 

_ عمتي قالت مش قبل اسبوع 

_ لسة هستنا اسبوع 

_ هيعدوا قوام وانا جنبك لغيت ما تخرج

_ طيب...  ممكن اطلب منك طلب 

_ اكيد يا حبيبي 

_ ممكن لما يجي بجاد تاخديه وتروحي البيت تجيبلي صورة فاطمة من الشنطة الصغيرة.. نفسي اشوفها 

قولت بإبتسامة 

_ مش بتقول بتشوفها كل يوم 

_ ايوة بس ساعات بتختفي 

_ بتوحشك الساعات دول

أومأ ايجابا ف قولت 

_ ياه يا بابا عمري ما شوفت حد بيحب حد كده.. اتمني بجاد يحبني زي ما بتحبها

_ انا بقا متمناش لأي انسان يوصل في الحب للي انا وصلتله.. ده عذاب متواصل حتي في عز الفرح  ربنا ما يكتبه علي حد  

_ ربنا يصبرك يا حبيبي

سكت وشرد في دنيا تانية ومكنش حاسس بيه ومتكلمش لغيت ما بدء يحس بالألم بسبب انتهاء مفعول المسكن ف خرجت وناديت الممرضة تديله الدوا وبعد ما ادتهوله بشوية نام وانا قعدت جنبه شويه لغيت ما اتصل بجاد وقتها خرجت  علشان مزعجهوش ورديت وانا بتمشي لخارج المستشفي 

_ كنت فين من بدري 

_ كنت في بجيب جويرية من المدرسة.. عاملة اية 

_ مش كويسة وانت مش جنبي 

_ اهااا.. واضح كدة اني هضطر اعجل بالفرح 

ضحكت وقولت وانا مكملة طريقي لشارع 

_ وانا موافقة

_ بجد  ،  يعني اعجل

_ ايوة 

_ بتهزري 

_ لا مبهزرش انا كمان مش قادرة استنا  

_ طيب والله لا اتكلم مع بابا ونعجل بيه ونعمله اول ما خالي يخف علي طول 

قولت بإبتسامة وانا متابعة طريقي 

_ اوكي 

_ اية ده  ... انتي فين دلوقتي 

_ بتمشي 

_ ايوة ما انا سامع صوت خطواتك بتتمشي فين 

_  حسيت نفسي هموت من الملل ف قولت اتمشي للبيت اجيب حاجة لبابا وارجع 

_ نعم يختي.. بيت إيه اللي تتمشيله.. افرض توهتي 

_ حفظت الطرق كلها واقدر اروح واجي 

_ طيب انتي فين دلوقتي 

_ قدام المستشفي

_ طيب ارجعي انا هجيلك دلوقتي 

_ لا خليك انا هكون بخير متقلقش عليه 

_ ارجعي بقولك... يلا قوام

قولت بضحك 

_ طيب هرجع بس متسبش شغلك مفيش حاجه ضرورية تيجي عشانها 

_ طيب بس ارجعي 

_ اوكي هتمشي شويه صغيرين في نفس الشارع وارجع اتخنقت من ريحة البنج

_ طيب بس خلي بالك من العربيات 

_ متخافش عليه 

_ هكلمك تاني 

_ بجاد 

_ إيه 

_ بحبك 

قال ضاحكا 

_ لا والله لازم  نعجل... وانا بعشقك 

قفلت معاه وانا مبسوطة ومش قادره اخفي ابتسامتي وكملت مشي لمسافة صغيرة وانا بفكر فيه وفجأة وقفت لما لقيت صاحب بابا قدامي وبيقولي 

_ مع ان وشك متغطي بس عرفتك بردو 

قولت بإبتسامة 

_ ازيك يا عمي 

_ نحمد الله  ،  امال رايحة فين كدة 

_ كنت بتمشي شويه 

_الجو حلو ويشجع علي المشي فعلاً  ، تسمحيلي اتمشي معاكي ونرجع سوا

_ اه طبعاً اتفضل  

مشينا مع بعض ف قالي 

_ انتي ليه لابسه النقاب مع انك عيشتي في امريكا 

_ تقدر تقول زيادة ستر وعفة

_ غريب تفكيرك ده بنسبة لواحده عاشت عمرها في امريكا  ،  وانا كمان مش فاهم وشك فيه ايه علشان تغطية  ، مين فهمك انتي ان وش الست عورة ولا بجاد اجبرك تلبسيه

_ بابا في حياته ما اجبرني علي حاجه بالعكس هو كان بيعلمني ويسيبلي انا الاختيار في كل حاجة  حتي النقاب انا اللي اخترت اللبسه مش هو اللي قالي 

_ واضح انه اب ديمقراطي اوي

_ صحيح وهو مقتنع اني مش هغلط علشان كدة مديني الحرية 

_ وانتي مبتغلطيش فعلاً 

ضحكت وقولت 

_ محدش معصوم من الغلط بس غلط عن غلط يفرق

_ صح كلامك مظبوط واضح انك بنت ذكية وعاقلة

قولت بإبتسامة 

_ متشكرة 

_ كمان متشكرة  ، مبتتكلميش زيهم ليه

_ لأني تقريبا مكنتش بتعامل مع حد هناك وكل حياتي في البيت مع بابا والافلام والمسلسلات العربية 

_ معقول 

_ اه معقول بابا كان طول الوقت حريص اني ميكونش ليه اختلاط بالناس هناك.. علشان عاداتهم متناسبناش وكذلك لغتهم وطالما في البيت وانا وهو  مع بعض  خلاص نتكلم مصري 

_ وانتي كنتي بتسمعي الكلام ولا بتزوغي وبتتكلمي زيهم بره البيت 

قولت ضاحكة 

_ الكلام غصب عني كان لازم اتكلم زيهم بره البيت وفي الكلية والمدرسة  واه كنت بسمع الكلام  .. بابا عمره ما راقبني ولا قالي متعمليش حاجة  بس بطريقة كدة عرف يمشيني زي ماهو عايز  ف انا بقيت بعمل الحاجة اللي هو عاوزها وفاكرة ان انا اللي عاوزة كدة 

_ انتي  هتقوليلي  ،  طول عمر بجاد ذكي ومش سهل 

_ فعلاً بابا ذكي وحكيم.. مفيش زيه في الدنيا كلها 

_ اها واضح انك بتحبيه 

_ اكيد مش بابا 

_ وطبعا هو بيحبك  ماهو ملهوش غيرك 

_ صحيح  

_ ده لو حصلك حاجة ممكن يموت فيها 

قولت بأستغراب 

_  بعد الشر عنه.. ومفيش حاجة وحشة ممكن تحصل الدنيا امان

وقف في طريقي وقال 

_مش دائما الدنيا أمان للأسف وبذات علي الناس الطيبة اللي زيك واللي زي بنتي  ، ايسل اللي اتقتلت وهي طفلة   

حسيت بالخوف منه في اللحظة دي ف رجعت خطوة لورا وقولت 

_ ازاي يعني 

_ يعني متزعليش مني مش انتي المقصودة بس ابوكي هو اللي حكم بكدة 

قال كده وأشر لحد ورايا استدرت بسرعه لقيت اتنين رجالة وعربية بتقرب وبتوقف جنبنا  ومسكوني بالقوة وواحد منهم حط ايده علي وشي بمنديل  وبعدها محستش بنفسي تاني 

#بدر 

بدأت الخطوبة والكل اجتمع حتي جويرية اللي كانت ساكته وشاردة طول الوقت مع أنها مكنتش خايفة من الناس زي الاول  او مكنتش خايفة خالص وكنت ملاحظ ان في تغيير جذري في شخصيتها لسبب انا مش قادر احدده بس واضح ان اللي حصل مع ريان قدامها ليه دور كبير. 

وبدات الحفلة بس كنت حاسس طول الوقت ان فيها كأبة والكل مش مبسوط  أولهم بجاد اللي كان قالب وشه وماسبش التليفون  لحظة وكان طول  الوقت بيتصل بحد وبعدين ساب الحفلة  في  اولها ومشي  وكمان هاجر مكنتش مبسوطة وبشر عمال يكلمها واضح انه بيحاول يفهم مالها ومن ناحية تانية زيد قاعد جنب بابا وعمامي علي نفس التربيزة ساكت وعينه بتدور علي حد مقدرتش اعرف هو مين.. يعني كل الابناء كان حالهم متشقلب  عكس خلود اللي دخلت مره واحده بلبس ابيض ناعم وشعر منسدل علي ضهرها مع مكياج كامل  ،ولحد كبير كانت هي العروسة في الليلة دي اظنها كانت قاصدة تغطي علي هاجر ونفسنة البنات غلبت حبها ليها وخاصة لما جت في وسط الحفلة وبدات ترقص قدام الكل علي اغنية انتي معلمة  

#زيد 

دخلت علينا ب طلة تشبه للملايكة بنعومتها ورقتها  وزايدة الفستان الأبيض جمال ونعومة، للحظات عيني بقت ماشية وراها وحاسس بالحزن والوجع لأني مش قادر ابعد ولا قادر اقرب ولأني عارفها رغم مظهرها ده اللي احرصت انه يطلع ف اجمل ما يكون  موجوعة دلوقتي ومكسورة بسببي وبتحاول تداري احساسها. 

وبعد ما طالت نظرتي ليها جاني صوت ابوي بيقولي 

_ بتبص علي ايه 

لملمت نفسي وقولت 

_ ولا حاجه 

_ متأكد 

_ ايوة.. سلامتك يابوي..  هروح اسلم علي الضيوف 

قولتها ومشيت من جنبه وقفت بعيد وحاولت مبصلهاش بس غصب عني عيني كانت بتجري عليها في الوقت اللي هي مبصتليش ولو لمرة حتي لو بالغلط  وشوفتها وهي بتجري علي ال جي دي تطلب منه حاجة وبعد ثواني بتشتغل اغنية انتي معلمة اللي مكنتش بتحبها واللي انا قولتلها عليها وبعتهالها ايام اسيل  وبدأت ترقص قدام الكل وتتمايل وشعرها يموج وراها  وتردد مع الاغنيه وتمثل بأيديها علي شكل فستانها وجمالها وكأن هي المقصودة بالاغنية وبتوصفها ولأنها هي الوحيدة اللي رقصت الكل انتبه ليها وكذلك الشباب اللي عينهم مبعدتش عنها لحظة وبيتمنوا يقربوا يرقصوا معاها واللي مانعهم بس ان دي حفلة تخص عيلة العربي.

وانا بقيت واقف مكاني بحاول اتماسك ومروحش اجيبها من شعرها واجرجها علي البيت مع كل خطوة وميلة بتميلها قدام عينيهم واستمرت محاولاتي دي لغيت ما طفح الكيل وعروقي برزة من  شدة الغيظ ومبقتش قادر اكتر من كده ف روحت  عندها مخترق الجمع اللي حوليهل وقولت وانا بقبض علي معصم ايدها وسط نظرات الكل 

_ تعالي عاوزك

قالت وهي بتحاول تفلت ايدي 

_ في ايه هرقص.. النهاردة خطوبة مفيش شغل ولا مواعيد 

قولت وانا بشدها 

_ تعالي بقولك  

خدتها وطلعت من القاعة زقيتها قدامي وقولت بعصبية

_ انتي اية!!!  مفيش اي احترام.. هتشتغلي رقاصة في الافراح

حدت من نظراتها وقالت 

_ وانت مالك

قربت منها خطوة وقولت بعصبية 

_ بترقصي لشباب وتقوليلي انت مالك.. خلود!!!  انا مطول بالي عليكي بعد كدة هكسر دماغك  ، اتعدلي بدل ما اعدلك دلوقتي 

وقفت قدامي ند بند وقالت

_ طيب مش هتعدل وهرجع ارقص   بتدخل في اللي ميخصكش ليه  ،  ليه بتدي لنفسك الحق تقولي اعمل ومعملش.. تكونلي اية انت.. ابويا.. اخويا.. جوزي.. لا انت ولا حاجة و دي اخر مره تجرء وتمسك ايدي ولا تكلمني بالطريقة دي  

قالتها وهمت انها تمشي ف وقفت في طريقها وقولت  

_ لا استني وفهميني  ، اية الاسلوب الجديد ده 

_ الاسلوب الصح بس جه متأخّر يا دكتور... اه صحيح انا نسيت اباركلك مقدماً الف الف مبروك علي العروسة وعد يوم خطوبتك لا ارقصلك من اول الحفلة لاخرها وهزغرط لغيت ما صوتي يروح وساعتها ممكن يحقلك تطردني لو مش عايز رقاصة 

_ ااااه.. يعني انتي بترقصي علشان كدة 

_ لا انا برقص علشان صحبتي وعشان الاستاذ بشر.. انت ملكش دعوة بأي تصرف بعمله

كملت بصوت مهزوز ودموعها معلقة بطرف عينها

_ ف خليك بعيد عني 

قالتها ومشيت خطوتين ف قولت بعد تردد 

_ خلود استني... 

وقفت مكانها من غير ما تبصلي ف قولت 

_ انا عارف انك مجروحة مني  ،  ومعترف ان اللي عملته كان غلط بس صدقيني مكنتش عاوز اعمل كدة  ... بس انا مش هينفع اتـ... 

بصتلي وقالت بسخرية ودموعها بتزيد 

_ كمل  ، مش هينفع اتجوزك  ، مش هينفع تكوني جوزي..  بس عادي تستفرض بيه  في وسط البحر   ،  عادي تقربلي وتبوسني وتحضني وتفسحني  ، وتحن مره وتقسي مره  ما انا مدلوقة بقا ومش هقول لا علي حاجة 

_ مفكرتش في كده ولا فكرت اقربلك.. انا مكنش قصدي العب بيكي  زي مانتي فاهمة 

_ امال كان قصدك ايه.. ما تقولها مش هزعل.. قولي انك لقتني مش هرفض ف قولت تسلي نفسك 

_ لا  لا.. خلود انا حبيتك وبحبك ومش بستحمل حد يقربلك ولا يكلمك.. بحس اني عاوز اقتل اللي يبصلك بس 

ضحكت بخيبة وقالت

_ تيجي ازاي دي.. بتحبني وبتغرق وانت معايا ومش بتحس باللي بتعمله وبعدها بساعات تدور علي عروسة تانية افهمها ازاي دي... فهمهاني مانت دكتور  وفاهم.. ما تتكلم انت مكسوف ولا مش عاوز تزعلني علشان المرة الجاية اوافق 

_ لا مش مكسوف واه مش عايز ازعلك بس شكلك مصمم تزعلي.. عاوزة تفهمي  هفهمك   ..انا اه بحبك  ..لا انا بعشقك  عشق  ، بس  مش واثق فيكي.. ومش هكون مطمن من نحيتك لو اتجوزتك  ، عشان طايشة وفي وقت الزعل ممكن تعملي كوارث  ، زي ما حصل قبل كدة وحبيتي تثبتيلي انك قادرة تنجحي ف روحتي تعرضي مواضيع جنسية واباحية ولغيت دلوقتي او لغيت ما تموتي هتفضل الفيديوهات دي موجودة ومتشافه من الكل  ، وزي ما حصل  قبل كدة  و وافقتي علي إسلام اللي طلع  تبع نيرة وكان مش عارف هيعمل فيكي إيه وجه واحد  غريب اتدخل  ، وزي دلوقتي لما حبيتي تضايقيني واشتغلتي رقاصة والكل بيبصلك والشباب هتموت وترقص معاكي  ، واقولك حاجة كمان  هتزعلك مني أكتر .. لما معملتيش حد بيني وبينك بعد اول قرب حصل.. ها قوليلي هطمنلك ازاي يا خلود

اتملت عينيها بالدموع وانفاسها اختنقت ف قولت  

_ انتي زعلانة ليه دلوقتي مش هي دي الحقيقة جبت حاجة من عندي 

هزت دماغها بنفي وهي مش قادره تبكي بسبب اختناق صوتها ف قولت بدموع 

_  اهو  يعني انتي كل يوم بتثبتيلي انك متنفعنيش 

طال سكوتها وهي حاطة ايدها علي رقبتها بتفرك فيها علشان تعرف تتكلم بعد ما صوتها وقف بين حنجرتها واخيرا قدرت تتكلم  وقالت 

_ وصلت المعلومة 

خدت نفس عميق وقالت وهي بتمسح دموعها 

_ كلامك كله صح ومش هقدر اكدبه.. ولا هحاول اغير فكرتك عني واقنعك اني لو اتجوزتني مش هتيجي تلاقيني مع واحد علي سريرك 

_... 

_ و اوعدك في حياتي ما هحاول اعمل كدة   ، اه  ، ومش هسيب العيادة علي فكرة هتابع شغلي ومش ههرب بقا واتخفي زي البنات التانين.. انا مش هلاقي شغل احسن من شغلانتك بردو 

#هاجر ❤

رجعت تاني من بره وجت عندي وانا واقفة لوحدي وقالت بإبتسامة 

_ حيتلك الحفلة ياريت نقوط الرقاصة يوصلني 

_ انتي هبلة انتي كده بتغيظيه ولا بتشوهي سمعتك

_ كنت بغيظه بس دلوقتي انا مبقتش بفكر في اي حاجة  .. وبجد والله ما بقيت حاسة بأي حاجة.. نفسي انام وبس.. سامحيني هروح انام 

مسكت فيها وقولت 

_ لا مش هتمشي وهتيجي تباتي معايا 

بعدت ايدي عنها وقالت

_ متخافيش عليه انا كويسة.. مش هموت 

_ لا مش هتمشي قولتلك 

_ معلش سيبيني علي راحتي 

قالت كدة ومشيت وسابتني مرعوبة تعمل في نفسها حاجة ولما جيت احكي لبشر لقيت الجو متوتر وكل العيلة واقفين جنب بعض بيقولوا في ايه  

#بجاد 

بقيت اتصل بيها لساعات وتليفونها بيدني مغلق  ف اتصلت بخالي ورد عليه بقلق  وقالي 

_ ايوة يا بجاد فاطمة فين 

_ هي مش عندك 

_ لا مش عندي  .. هي راحت فين 

_ يمكن راحت البيت هشوف واقولك 

سيبت الحفلة وخدت العربية وروحت بسرعة علي هناك بقيت اخبط بسرعة ومفيش رد ف ضربت الباب كسرته ودخلت ادور عليها ملقتهاش.. طلعت تاني واتصلت ب ماما سألتها عنها قالتلي مشافتهاش من الصبح ف قفلت وكملت بحث في كل الشوارع والمستشفي وملقتلهاش اي اثر وكل العيلة سابوا الحفلة وبدؤء يدوروا معايا 

#وفاء

تقريبا حفلة بشر وهاجر باظت بعد ما بجاد قالنا ان فاطمة مش موجودة وفي دقيقة  كانت الحفلة خلصانه  والشباب كلهم طلعوا يدوروا في الشوارع  وانا وبدر وعبيدة روحنا ل بيجاد نطمنه انهم هيلاقوها وفي الطريق اتصلوا بيه قالولي انه بيحاول يقوم كملنا طريقنا بسرعة ودخلنا عنده وقفناه وهو  في حالة هياج عصبي وخوف وقولت وانا بحاول اهديه

_ حبيبي هيلاقوها بتعمل كده ليه.. اهدا ارجوك كدة غلط عليك 

_ مش هقعد  انا هروح ادور عليها بنفسي.. محدش هيلاقيها غيري 

قال بدر 

_ الشباب قالبين الدنيا عليها هتلاقيها فين انت.. ريح يا بجاد كدة هتتعب 

قال بصوت مختنق 

_ انا مش هرتاح غير لما اطمن عليها 

قال عبيدة

_ ما تكبر يابوي  هيلاقوها  عيب عليك اللي بتعمله ده 

قال بعصبية 

_ انا عيل بس سيبوني اشوف بنتي ايه جرالها .... 

قاطع كلامه صوت رسالة علي تليفونه ولما حاول ياخده قولت وانا بمسكه قبله

_ ارتاح انا هشوف 

بصلي بترقب وانا بفتحها ولما شوفتها تسمرت مكاني بصدمة لما شوفت اللي مبعتوله..صورة بنت صغيرة مدبوحة وصورة لفاطمة متكتفة علي كرسي وبنقابها اللي شوفتها بيه اخر مره ورسالة محتواها 

_اية رايك  انا بقا مش هبعتلك صورتها مدبوحة انا هبعتلك جثتها  

_ في ايه يا وفاء مين اللي باعت 

قال بدر وهو بيمسك مني التليفون 

_ وريني 

خد مني التليفون وبص لصور وسعت عينيه بصدمة وقال 

_ ايه ده يا بجاد   

_ في اية.. ما توروني

قال وهو بيوريله شاشة التليفون 

_ انت تعرف البت الصغيرة دي.. ليك يد في اللي حصلها

جحظت عينيه لاخرهم وفجأة خطف التليفون من ايد بدر واتصل برقم ولما لقاه مغلق رما التليفون وقال بجنون 

_ فاطمة هتموت  ، حد يوقفه.. اتصلوا بيه  .. بلغوا اعملوا اي حاجة 

 قالها وقام من مكانه ملحقناش كلنا نوقفه ف جري عليه بدر وعبيدة ومسكوه قبل ما يخرج  بقا يزعق ويقول 

_ سيبوني لازم الحقه قبل ما يقتلها  

قال بدر وهو بيرجع

_ تلحق  مين انت تعبان ارجع  احنا هنلحقها.. اقعد 

قال ببكاء 

_ مش هنلحقها.. كلموه بسرعة  حد يكلمه قوام يا ناس  

قال عبيدة 

_ هنكلمه وهنبلغ بس اهدا وفهمنا في ايه 

قال ببكاء 

_ افهمكم ايه  احمد هيقتلها يكون فهمتكم.. سيبوني  ااه 

قبض علي قلبه و وقع مكانه صرخت بعلو صوتي وجريت عليه وشالناه وقعدناه علي السرير ف قال بتعب 

_ حد يلحقه.. قوليلوه فاطمة تكون هي نفسها بنته  اتصلوا بيه 

وقفنا احنا التلاته مصدومين من كلامه ف قال بدر بإنكار 

_ يعني البت المدبوحة هي نفسها فاطمة  طيب ازاي 

_ ايوة هي .. وده كان الوان خليت واحد متخصص في الخدع الي من النوع ده يعمل فيها كدة وهي متخدرة.. ارجوكم حد يكلمه.. بسرعة لو معرفش هيقتلها  ارجوكم بسرعة  

بصينا كلنا لبعض بصدمة وبعدين بصيت لبجاد وقولت بصوت مهزوز

_ انت اللي خطفت بنته.. مش ممكن يا بجاد  حرام عليك بتعمل فينا كدة ليه  

قال بدر 

_ مش وقته لازم نوصل ل احمد قبل ما يعمل فيها حاجة 

_ وهنوصله ازاي احنا لا عارفين عنوانه ولا عارفين ليه رقم تليفون 

قال عبيدة 

_ بدر ولدي شافه

وجهنا انظارنا ليه ف قال 

_ بدر شافه من كام يوم ويمكن يقدر يوصلنا ليه 

#بدر 

كنا بنلف بالعربيات وبندور ف جاني اتصال من بابا رديت وقولت 

_ مفيش جديد يابابا ادينا بندور 

_ اسمعني.. الراجل اللي سألتني عنه من كام يوم  شوفته فين ومين صاحب المطعم 

_ الراجل اللي فضح مرات عمي  

_ ايوه 

_ ليه ماله 

_ عاوزين نوصله قوام

_ ليه 

_ هو اللي خطف فاطمة وبعتلنا بيقول هيقتلها ولازم نوصله ونعرفه ان هي بته اللي اتخطفت 

_ بنته!!  بنته ازاي 

_ اخلص مش وقته هو فين 

_ يعني اخو طنط وفاء هو اللي خطفها 

_ ايوه خلص قولي 

_ طيب انا  انا كنت بسأل علشان مليكة كانت شاكة فيه.. حالاً هوصلها هي في بيتهم دلوقتي  وهخليها توصله 

_ طيب قوام قوام وبلغني 

وقفت بالعربية ونزلت وقبل ما اتصل لقيت الشباب جاين عليه يجروا يسالوا في ايه 

قولت وانا بحاول اتصل 

_ استنوا

كملت بانفعال لما لقيته مغلق

_ يلعن ابو كدة  افتحي الزفت 

قال بجاد 

_ في ايه ما تتكلم 

_ فاطمة تكون بنت خال مليكة  وخالك خاطفها من ابوها وهي طفلة  ودلوقتي ابوها خطفها وهو ميعرفش انها بنته  وباعت بيقوله هيدبحها علشان خالك وهمه انه دبحله بنته زمان 

خف توازنه وكان هيوقع ف لحقه بشر وسنده وبعد لحظات رجع يقوم ويقولي 

_ فاطمة هتموت  

قال بشر

_ ان شاءلله هنلحقها... انت بتكلم مين يا بدر 

_ مليكة هناك ولو وصلتلها تقدر توصله اسرع مننا.. بس تليفونها مقفول  

قال بجاد وهو بيلف حولين نفسه بجنون 

_ لاااا لااا.. فاطمة  لا.. مش ممكن  ، انا هبلغ البوليس

قالها وطلع يجري علي عربيته جرينا وراه احنا التلاتة مسكنا فيه وقال زيد

_ استنا بوليس اية احنا ممكن نلحقها قبله انت كدة هتضر خالك 

قال بانفعال 

_ مليش دعوة بحد يتضر اللي يتضر المهم الحقها 

قال بشر 

_ هنلحقها اول ما الراجل يعرف انها بنته ده المهم دلوقتي يا بجاد.. اهدا خلينا نعرف نفكر 

قولت بعد ما افتكرت حاجه 

_ بس عرفت هوصلها ازاي 

#فاطمة 

فوقت لقيت نفسي مربوطة علي كرسي والنقاب لسة علي وشي فتحت عيني وبصيت حولية لقيت الراجل قدامي لوحده من غير اللي كانوا معاه    ف قولت بصوت خافت بسبب الدوخة اللي كنت حاسة بيها 

_ انت جايبني هنا ليه  وبتعمل كدة ليه 

شد الكرسي وقعد جنبي وريموت صغير في ايده  

_ جايبك هنا ليه خليها بعدين  ،  بعمل كده ليه هقولك.. أول حاجه انا محبتش اشيل النقاب عن وشك ومحترم جداً ده علشان تعرفي بس ان مشكلتي مش معاكي انتي  وان مشكلتي مع ابوكي 

_ عمل ايه بابا.. وازاي انت صاحبه وخاطفني

_ لا انا مش صاحبه وعمرنا ما كنا صحاب وعمل ايه بقا هقولك.. زمان من عشرين سنة وعلشان مشكلة قديمة بينا كفرت عنها وخسرت شغلي وسمعتي علشان بس اثبتلهم اني ندمت ابوكي خطف بنتي ايسل اللي مكنتش كملت سنة.

كانت جميلة قوي  ،  مكنش في  طفلة اجمل منها  ، ايسل كانت اول فرحتنا اللي جت ونورت حياتنا ومالتها علينا   كانت ضحكتها لوحدها بتحلي الدنيا في عينينا انا وامها 

 لغيت ما ابوكي جه وحرمنا منها وحرق قلوبنا عليها وخطفها ودبحها وبعتلي صورتها وهي مدبوحة 

اتسعت عينيه بصدمة وانا بقول بانكار

_ لا  لا.. بابا مستحيل يعمل كدة...انت بتكدب  بابا مستحيل يقتل نملة مش طفلة 

_ وانا هكدب عليكي ليه.. هو اللي خطفها وخالتها شافته يومها بس مكنتش تعرف هو مين  .. خالتها تكون ام مليكة يمكن تعرفيها.  وشوفي سبحان الله بعد السنين دي كلها اعرف مين اللي خطف بنتي وبعتلي صورتها مدبوحة.. ده كنت مرعوب اموت او هو يموت قبل ما اعرفه

قولت ببكاء 

_ مش ممكن بابا يعمل كده.. بابا اطيب من انه يأذي مخلوق 

_ طيب شوفي بنفسك 

 قام وضغط علي الريموت تجاه الشاشة وقالي وهو بيمسك المسدس من علي التربيزة

_ شوفي  كدة.. مدبوحة زي مانتي شايفة

تجمدت في مكاني ومقدرتش انطق بكلمة واحده  مش علشان البنت المدبوحة  لا عشان باقي الصور بما فيهم الصورة دي نفسها تكون انا وصغيرة.. الصدمة كانت كبيرة عليه لجمت لساني مقدرتش حتي اوقفه وهو ماسك المسدس وجاي نحيتي علشان يقتلني 

#مليكة 

كنت في اوضة خالتي انا وماما بنحاول نخليها تتكلم او تاكل بعد ما خاصمت الاكل ليومين وفي الوقت ده دخلت علينا ايسل وقالتلي

_ واحد اسمه بدر عايز يكلمك  

قالت ماما 

_ وهو عرف رقمك منين

_ ده متصل علي مسنجر 

قالت 

_ وريني 

قولت 

_ استني يا ماما اشوف عايز ايه يمكن في حاجه مهمة 

_ ايه المهم معاهم المجرمين دول وريني 

حطت التليفون علي ودنها وقالت

_ عايز ايه من بنتي 

شديت منها التليفون وقولت 

_ ماما من فضلك استني شويه 

حطيت التليفون علي ودني متجاهلة زعيقها وقولت 

_ ايوة يا بدر معاك

_ كارثة هتوقع علي دماغكم لو ملحقتش جوز خالتك 

_ كارثة ايه تاني 

_ فاطمة تكون هي نفسها بنت خالتك اللي اتخطفت زمان

_ انت بتقول ايه.. فاطمة هي ايسل 

الكل اتلم عليه في الوقت اللي رد عليه وقال

_ ايوة ايوة.. جوز خالتك خطفها النهاردة وبيقول هيدبحها علشان ينتقم من بجاد .. اتصرفي وصليله الخبر  ده فورا  بدل ما يندم  بسرعة مفيش وقت 

قولت بذهول وانا ببص لايسل

_ وربنا صح.. انا ازاي مخدتش بالي من الشبه.. ايسل هي فاطمة  .. ايسل عايشة مدبحتش 

قالت ماما ببكاء 

_ ازاي ايسل عايشة 

سيبت التليفون لايسل وقعدت جنب خالتي اللي بتبكي وجسمها بيرتعش وقولت 

_ ايسل مامتتش يا خالته 

كملت بصدمة

_ ياااا نهار اسود انكل احمد خطفها وهيقتلها 

قامت من مكانها تصرخ وتقول 

_ اية!!  بنتي!!  وقفوه... هيقتل بنتي مرة تانية... فين التليفون 

خطفت التليفون من ايسل واتصلت بيه وفجأة بقت تصرخ وتقول 

_ تليفونه مقفول  يابنتي... بنتي هتموت تاني  حد يوقفه 

          الفصل الثالث والستون من هنا         

لقراءة باقي الفصول الجزء الثاني من هنا 

لقراءة الجزء الاول جميع الفصول الفصول من هنا

تعديل المقال