رواية وللنصيب راي اخر الجزء الثالث3الفصل الثالث والاربعون43والرابع والاربعون44 بقلم لوليتا محمد
وائل كلم نهي و قالها إن آسر هيروحلهم البيت عشان يقابل ندي و يتكلم معاها....
ندي طلعت هي و آسر و وقفوا ف الجنينه عشان يتكلموا و ما تحسش إنها متراقبة من أمها و تاخد حريتها ف الكلام معاه....
آسر بهدوء: ندي أنا.....
ندي قطعت كلامه بسرعه و قالتله بهدوء: إسمعني للآخر يا آسر من غير ما تقاطعني...
آسر سكت و بصلها بإهتمام و هي بهدوء: أنا مابقتش ندي بتاعه زمان... آسر بلع ريقه بتوتر و هي بتتكلم بهدوء و تأني و جديه ملحوظه أوي ليه: أنا إتغيرت كتير أوي عن زمان... و مش هنكر إن الصدمات إللي خدتها منك واحده ورا التانيه كان ليها دور و عامل أساسي و كبير ف تغيير شخصيتي... آسر بص ف الأرض وهو مغمض عينه بوجع وقهر و ندم.... و هي بتكمل كلامها بثبات و هدوء و قوه: أنا مش زعلانه من التغيير إللي حصلي ده... آسر فتح عينه و بص ف عنيها بسرعه بإستغراب و مش عارف ولا فاهم إيه إللي بيدور ف دماغها... و هي بنفس الثبات: لو قولتلك إني مزعلتش و إتضايقت هبقا بكدب عليك.... فعلآ إتضايقت و زعلت و إتقهرت لما إتأذيت منك... آسر بلع ريقه بوجع و دموعه بدأت تنزل منه.... و ندي ب قوه: خيانتك ليا وجوازك عليا وجعني وجرحني جامد أوي... آسر مقدرش يتحكم ف دموعه و نزلت منه بغزاره.... و هي بتكمل كلامها بهدوء و ثبات من غير ما تنزل دمعه واحده: بس مش هقدر أنكر إن لولا خيانتك ليا و كل إللي حصل... مكنتش هتغير و لا هبقا أنا دلوقتي بشخصيتي دي.... آسر بدأت شهقات دموعه تعلي و ندي بهدوء بدون ما تتأثر بدموعه و شهقاته: آسر.... أنا إكتشفت إن إللي كان بينا مكنش حب...
آسر تنح و بصلها بصدمه و ذهول... و هي بتكمل بنفس الهدوء: ده حقيقي... إللي بينا كان حب عيال.... تعود... آسر صدمته و ذهوله و تتنيحته بتزيد.... و هي بتتكلم بثبات أكتر و أكتر: إتعودنا إننا نكون مع بعض.... أتعودت إني أسمع كلامك و أنفذ أمرك من غير ما أفكر فيه.... أعمل الحاجه إللي أنت عايزاها مش الحاجه إللي أنا عايزاها ولا الحاجه إللي أنا بحبها... آسر بلع ريقه بالعافيه و هي بتكمل كلامها بنفس الثبات: بس عشان أرضيك... عشان ما تزعلش مني و لا تبعد عني.... حتي لو مكنتش مقتنعه ب رأيك بس برده كنت بنفذه إرضاء ل رغبتك...
آسر سكت و بص لبعيد بخنقه و ضيقه... و ندي بهدوء أكتر من الأول وهي بتبص لبعيد: من ساعة ما سيبتك و بعدت عنك و أنا بقيت أحس بنفسي.... بقيت أقدر نفسي... آسر بصلها بإستغراب أوي.... و هي بإبتسامه هاديه: بقيت أحب نفسي بجد....
آسر بحنان: طب م أنا كمان بحبك...
ندي خدت نفس جامد و خرجته بالراحه و بهدوء: أنت أناني يا آسر.... أناني....
آسر تنح و بصلها بصدمه و ذهول.... و هي بجديه: أنت مش بتحب غير نفسك و بس.... عايز كل حاجه و أي حاجه من غير ما تخسر حاجه....
آسر بسرعه: أنا مش عايز غيرك إنتي و بس.... أنا أناني ف حبك... أناني عشان عايز أرجعلك.... آسر بندم: أنا لسه بحبك و عايزك و شاريكي يا ندي....
ندي خدت نفس جامد وخرجته بالراحه و بهدوء: بس أنا مش ليك يا آسر.... أنا بحب واحد تاني...
آسر بصدمه و ذهول أكتر من الأول: إيه؟؟؟ بتقولي إيه؟؟؟
ندي بإبتسامه هاديه: سوري.... بس مش بإيدي... قلبي بقا ملك واحد تاني غيرك....
آسر بلع ريقه بتوتر و ملامحه إتحولت لغضب و حده و بعصبيه: يوسف؟؟؟؟
ندي هزت راسها ب آه.... و آسر بحده: ليه؟؟؟ ليه هو بالذات؟؟؟؟
ندي بهدوء: محدش بيقدر يتحكم ف مشاعره و قلبه يا آسر.... ندي بهدوء و جديه شويه: أنا ماسألتكش عن شهد و لا ليه إختارتها هي بالذات....
آسر بعصبيه مكتومه: نزوه.... كانت نزوه و راحت ل حالها....
ندي خدت نفس جامد وخرجته بالراحه و هي بتربع إيديها: ماسألتكش و مش عايزه أعرف حاجه.... آسر بلع ريقه بالعافيه لما كسفته.... و هي بتتكلم بهدوء و تأني: بص يا آسر.... من الآخر كده.... أنا مابقاش جوايا مشاعر ليك.... و ده مش بمزاجي... خلاص... مابقتش قادره أحس بيك... ف مابقاش ينفع نرجع لبعض....
آسر غصب عنه دموعه لمعت ف عيونه لما حس إن المره دي مش عارف يقنعها تسامحه و لا ترجعله ولا حتي في فرصه للرجوع..... و ندي بإبتسامه هاديه و هي بتقرب منه و بتمسك إيده و بتفتحها و بتحط السلسله جوه إيده و قفلت إيده عليها: سوري يا آسر... بس خلاص.... مابقاش ينفع....
ندي بعدت عنه.... و آسر بصلها بصدمه و ذهول من تصرفها.... لحظات و بص علي إيده و فتحها لقاها السلسله....
آسر بصلها بصدمه و ذهول أكتر من الأول... و هي لسه علي وضعها: مكانها مابقاش معايا.... مابقاش ينفع تكون ليا....
آسر لسه باصص لها بصدمه.... و هي بصت ناحية الباب بهدوء لقت يوسف مديها ظهره و خارج بره الباب و علبه حمرا واقعه ف الأرض مكان ماهو ماشي....
ندهت عليه بس مردش عليها... بسرعه طلعت تجري وراه و هي بتنادي عليه بس برده مردش عليها.... فتحت العلبه لقت خاتم ألماظ علي شكل قلب... ف فهمت إنه كان جاي يطلب إيديها للجواز.... بس هو شافها مع آسر و حصل إللي حصل....
《 باااااااك 》.......
ندي كانت باصه ف عنيها قصاد المرايا و دموعها بتنزل منها بغزاره مع كل ذكري بتفتكرها ف اليوم ده....
غصب عنها فضلت تعيط جامد بوجع وقهر لما إفتكرت إن يوسف مدهاش فرصه إنه يسمعها و حكم عليها ظلم بخيانتها....
صوتها كان عالي لدرجة إن نهي سمعتها لما كانت طالعه ع السلم و داخله أوضتها....
نهي بسرعه فتحت باب أوضتها و هي بتجري عليها و بتاخدها ف حضنها و هي بتطبطب عليها و بتحاول تهديها: ندي... حبيبتي.... في إيه بس؟؟؟ إيه إللي حصل.... ندي عماله تعيط بحرقه و وجع و صوتها ب يعلي.... و نهي بصوت عالي و زعيق: وائل.... يا وائل...
وائل بسرعه طلع علي صوت مراته و جري بسرعه علي بنته و خدها فحضنه بحنان: ششششش... أهدي يا ندي.... أهدي يا حبيبتي.... عشان خاطري أهدي....
ندي بحرقه و وجع و كلام متقطع: مش قادره يا بابي... يوس..... يوسف وجعني أوي.... غيابه عني وجعني.... ده... ده مفكرش ولا مره يطمنا عليه... ولا مره....
وائل غمض عينه بزعل وهو بيطبطب عليها.... و ندي بتكمل بدموع: ده كان رافض يسمعني... ر... رافض يسمع الحقيقه.... ندي بعدت عن حضنه و بتبصله بقهر و دموع: ده إتهمني إني خونته يا بابي... خونته....
نهي بحزن و وجع علي بنتها: مكنش يقصد يا ندي... كان سوء تفاهم... أكيد موضوع چاكلين كان مأثر عليه...
ندي بعصبيه: و ليه ياخدني ب ذنبها.... ليه؟؟؟ و راجع دلوقتي عايزني أسامحه علي غيابه و سوء فهمه... ندي بحده و عصبيه: لأ مش مسامحاه....
وائل و نهي بصولها بصدمه.... و هي بتكمل كلامها بدموع و حرقه و قهر: قولوله مش عايزاه... آه مش عايزاه... مش عايزاه....
ندي إترمت ف حضن أبوها... و وائل بيحاول يهديها: طب أهدي يا ندي... أهدي يا حبيبتي... و بلاش نتكلم ف الموضوع ده دلوقتي.... نتكلم بعدين...
ندي بحده: لأ يا بابي.... الموضوع ده هينتهي دلوقتي.... أنا مش عايزه أشوفه تاني.... يوسف خلاص.... صفحه و إنتهت بالنسبالي....
وائل خد نفس جامد وخرجه بالراحه بتعب: طيب نستني يومين كده و بعدين هقوله....
ندي بعصبيه و حده: لأ يا بابي.... دلوقتي... أتصل بيه دلوقتي و قوله مش عايزه أشوف وشه تاني...
نهي بصتلها بغضب من كلامها و وائل بتعب: لا إله إلا الله.... ده إنتي لغاية إمبارح كنتي هتتجنني عليه.... و أول ما يرجع تقولي مش عايزاه... وائل بقله حيله: ده إيه الهم ده بس يا ربي.... وائل بص لمراته بجديه: أنا مش عارف ألاقيها منين ولا منين.... وائل بحزن و تعب وهو بيبص لبنته: يا بنتي ماينفعش ناخد قرارات ف لحظة إنفعال.... ده غلط... و أديكي بنفسك شوفتي إللي حصل.... وائل بهدوء وهو بيطبطب عليها بحنيه: الدنيا مش هتطير يا ندي... خدي الوقت إللي يريحك يا حبيبتي و بعدين نبقي نتكلم...
ندي بحده و عصبيه و نرفزه و هي بتبعد عن حضنه: لأ يا بابي.... أنت هتتصل بيه و تقوله مش عايزه أشوف وشه تاني....
نهي مقدرتش تمسك نفسها أكتر من كده بسبب تصرفات بنتها... ف قالت ل وائل ب حزم و هي بتبص لبنتها بحده و غيظ: وائل.... سيبني مع ندي شويه....
ندي بصت ل أمها بنفس الحده و الغضب و الغيظ بس من غير ما تتكلم ب نص كلمه.... و وائل بتنهيده تعب وهو بيقوم من مكانه: ماشي يا نهي.... هسيبكوا لوحدكوا....
نهي و ندي لسه بيبصوا لبعض بصه الند للند... و وائل قرب من مراته وهو خارج و قالها بهمس عشان ندي ما تسمعهوش: بالراحه عليها يا نهي.... هي مش حمل كل ده.... ما تبقيش إنتي و الزمن عليها..... فهميها و عقليها بالراحه....
نهي كانت باصه ف عيون ندي بحده و غضب ما شالتش عنيها منها بس ف نفس الوقت حطت كلام جوزها ف الإعتبار...
وائل خرج و قفل الباب وراه و نهي بحزم بس بهدوء: كل إللي إنتي بتعمليه ده أمر طبيعي يا ندي.... حقك تزعلي و تغضبي و تزعقي و تصرخي..... و الأهم من ده كله.... إن رفضك ليه دلوقتي ده رفض مؤقت.... و لسه جواكي مشاعر ليه و عايزاه..... ف إصبري يومين تلاته و بلاش تتسرعي....
ندي قامت من مكانها و بحده و عصبيه: لأ يا مامي مش عايزاه.... و رفضي ليه مش مؤقت....
نهي قامت من مكانها بعصبيه و هي خلاص جابت آخرها من بنتها: هو إنتي فاكره إني معرفش ب إللي حصل بينكوا ولا إيه.... ها؟؟؟
ندي بعدم فهم: تقصدي إيه... مش فاهمه... إيه إللي حصل بينا؟؟؟
نهي بجديه و حزم: بسهركوا لوش الفجر و رجوعك للبيت الساعه ٦ الصبح؟؟؟؟
ندي بصتلها بصدمه و ذهول... لحظات و بصت ل بعيد و هي بتبلع ريقها بتوتر... و نهي ربعت إيديها و هي بتكمل ب ثبات: و لا فكراني مش عارفه ب موضوع مرواحك ل أصحابك من ورانا ساعة ماكانوا عاملين حفله و يوسف خرجك منها غصب عنك و روحتوا مع بعض السينما و بعدين طلعتوا ع البحر....
ندي برقت و بصتلها بصدمه أكتر من الأول... و نهي مكمله مش بتقف: ولا لما روحتي تقابليه هو و صحابه و فضلتي تغني و ترقصي.... و آخرتها رجعالي و هدومك متغيره!!!!! ندي بصلها بصدمه و ذهول من غير ما تتكلم و نهي بحزم: ها... تحبي أكمل و لا كفايه كده؟؟؟؟
ندي ب توتر و إرتباك: هو... هو إنتي عرفتي إزاي..... مين إللي قالك؟؟؟؟؟
نهي خدت نفس جامد وخرجته بالراحه.... و ندي بحده و عصبيه: يوسف؟؟؟؟ يوسف إللي قالك؟؟؟؟
نهي بصت ف عيونها كتييير أوى من غير ما تتكلم و هي بتفتكر إللي حصل.....
و الفصل الرابع والاربعون
《 فلاش باااااااااك 》.....
أول ما ندي عرفت بموضوع طلاقها عن طريق أبوها و تعبت و تليفونها كان مقفول و أمها مش عارفه توصلها و لا عارفه مكانها.... ساعتها بس نهي خدت قرار مهم جوه نفسها بالنسبه ل بنتها من غير ما تعرف جوزها و لا بنتها و لا أي حد....
تاني يوم نهي راحت للشرطه و قالتلهم علي إللي حصل ل بنتها لما كانت هتتأذي من الشباب إللي كانوا هيسرقوها أول ما سافرت أمريكا... و قالت لهم عن حالتها النفسيه بسبب طلاقها و إنها خايفه عليها ل تعمل ف نفسها حاجه.... ف طلبت منهم مساعدتها ف إنهم يبعتوها ل متحري خاص يكونوا عارفينه و واثقين فيه يراقب بنتها و كل تحركاتها من غير ما بنتها و لا أبوها يعرفوا بكده...
و فعلا قدروا يساعدوها و يبعتوها ل واحد ثقه و إتفقت معاه إنه يراقب بنتها و يقولها علي كل تحركاتها مقابل مبلغ إتفقوا مع بعض عليه....
و لما ندي راحت حفلة صاحبتها من وراها المتحري كلم نهي و قالها إللي حصل.... و قالها كمان بوجود يوسف....
نهي قالتله إنه يتابع من بعيد ل بعيد... بس لو تطور الأمر و يوسف دخل ف خناقه.... هو يتدخل و يساعده و يخرجهم من المكان ده و برده من غير ما يعرفهم حاجه.....
و طبعآ كان بيقولها كل خروجه و مقابله بتحصل بينهم.... قالها علي سهرهم لوش الفجر و رجوعها الصبح.... عشان كده هي إللي فتحت أوضتها و أتأكدت من وجودها لما طلعت أوضتها من الشباك... وهو إللي قالها علي مقابلتها ل أصحابه ع البحر و تغيير هدومها إللي مكنش فاهمه.... و وجودها ف عربيته.... عشان كده خلت وائل يكلمه و يعزمه ع الغدا و يقضوا بقيه السهره ف البيت عندها... و قالها علي موضوع الجاليات العربية.... و عشان كده هي برده إللي لمحت إن لو يوسف كان موجود كان هو يروح معاها الحفله..... بس طبعآ في حاجات ما قلهاش عليها.... زي ما كانوا مع بعض ساعه نزول الثلج ولا حتي إللي حصل بينهم لما وصلها البيت....
《 بااااااااك 》....
ندي بحده و عصبيه: عرفتي إزاي..... يوسف إللي قالك؟؟؟؟ مش كده؟؟؟؟
نهي خدت نفس جامد وخرجته بالراحه و بهدوء: مش مهم عرفت إزاي يا ندي... ندي بلعت ريقها بتوتر وهي بتبص لبعيد بإرتباك...و نهي بتكمل كلامها بنفس الهدوء: و لأ... مش يوسف إللي قالي....
ندي غمضت عنيها و خدت نفس براحه و هدوء لما عرفت إن يوسف مش هو إللي قالها.... لحظات و فتحت عنيها علي صوت أمها و هي بتقولها بهدوء بس بجديه: يوسف حافظ عليكي و مخرجش سرك أبدآ.... بالعكس.... كان دايمآ حاميكي و واقف ف ضهرك و بيخرجك من كل مصيبه و التانيه من المصايب إللي بتحطي نفسك و بتحطيه فيها....
ندي بلعت ريقها بتوتر وهي بتبص لبعيد.... و نهي بجديه و حزم أكتر من الأول: كل إللي هو عمله عشانك ما يشفعلهوش عندك؟؟؟
ندي غمضت عنيها و دموعها بدأت تنزل بوجع... و نهي مكمله زي القطر مابتقفش: ده معملش زي آسر و خانك.... ده عمل إللي عمر آسر ما عمله ولا كان هيعمله... ندي فتحت عنيها و بصتلها بدموع و قهر... و نهي بهدوء شويه: ده خدك و عرفك علي صحابه و قعدك معاهم عشان كل حاجه تبقي علي عينك يا تاجر و قصاد عينيكي.... عشان ما يبقاش جواكي ولو نص ف الميه شك من ناحيته و ناحيه تصرفاته... ده مفيش وجه مقارنه بينه و بين آسر يا ندي....
ندي بتعيط بحرقه و مش عارفه ترد علي أمها بنص كلمه..... و نهي بحده: عايزه إيه تاني أكتر من كده؟؟؟؟ واحد شاري مش بايع.... ف ثانيه تنسي كل حاجه حلوه عملها عشانك بسبب غلطه!!!! سوء فهم مكنش يقصدها؟؟؟ تمحي كل الحلو إللي قدمهولك ب أستيكه.....
ندي بحرقه و وجع: مرضيش يسمعني.... ظلمني..... بعد عني و سابني موجوعه عليه و منه.....
نهي خدتها فحضنها و بطبطب عليها بحنيه: حقك يا قلبي... و الله عارفه إنه حقك تزعلي و تتوجعي من تصرفه.... أنا نفسي متضايقه منه.... مش أنا بس.... أبوكي كمان.... نهي بتنهيده: بس في حاجات حلوه هو عملها و بيعملها تخلينا نسامحه يا ندي.... إتخانقي معاه.... زعقي فيه.... نهي بهزار شويه: يا ستي عايزه تو^لعي فيه ول^عي فيه.... محدش هيقولك حاجه.... ساعات كنت عايزه أعمل كده ف أبوكي.... عادي يعني..... ندي إبتسمت غصب عنها من ورا دموعها إللي بتنزل منها.... و نهي بهدوء بس بزعل: بس بلاش تبعديه عنك.... هو شاري مش بايع.... و إنتي كمان عايزاه و بتحبيه.... و كفايه إللي حصله يا ندي.... حرام عليكي... بلاش إفتري...
ندي بعدت عن حضنها و ب عصبيه: أنا مفتريه يا مامي؟؟؟؟
نهي بهدوء بس بجديه: بصراحه يا ندي.... كل إللي إنتي بتعمليه ده إسمه إفتري.... أنا و أبوكي بنتحايل عليكي عشان ما تتسرعيش و تبوظي حياتك و حياته.... أدي لنفسك و ليه فرصه.... بلاش تاخدي قرار دلوقتي.... خدي وقتك زي ما إنتي عايزه.... بس بلاش تسرع....
ندي قامت و ربعت إيديها و هي بتبص لبعيد.... و نهي بتعب و إرهاق: أنا كده خلصت ضميري من ناحيتك.... هسيبك دلوقتي و هقول ل أبوكي إنك محتاجه كام يوم تهدي أعصابك فيهم....
ندي سكتت و هي لسه بتبص ل بعيد و نهي سابتها و نزلت قالت ل أبوها إنها محتاجه كام يوم عقبال ما تاخد قرار.... و وائل هز راسه ب تمام....
ف الشركه....
ماجي كانت قاعده ف الشركه و بتخلص شغلها... فجأة و بدون مقدمات لقت يوسف خارج من مكتبه و شكله لسه قايم من النوم....
ماجي بخضه: مستر چو؟؟؟؟ أنت هنا؟؟؟ طب... طب إزاي؟؟؟؟
يوسف بإبتسامه هاديه: إنتي كمان وحشتيني يا ماجي....
ماجي من غير ما تشعر خدته بالحضن و هي بتعيط و مش قادره تصدق إنه لسه عايش...
يوسف قالها ع إللي حصله بس طبعآ من غير ما يدخل ف أي تفاصيل و قالها إنه بايت من إمبارح ف المكتب..... بعد ما ماجي هديت من العياط سألها عن وائل و ندي و هي قالتله إنهم ماجوش الشركه...
يوسف إتصل ب وائل يطمن عليه و علي ندي و يشوفهم هييجوا الشركه ولا لأ... و وائل بهدوء بس بجديه و زعل ظهرت ف نبرة صوته: أيوه يا يوسف.... لأ مش هنيجي إنهارده....
يوسف بلع ريقه بتوتر: طب.... طب ندي عامله إيه إنهارده؟؟؟؟ ينفع أشوفها؟؟؟
وائل بص لمراته بجديه و هي مش فاهمه في إيه و إيه إللي يوسف ييقوله و ليه جوزها بيبصلها كده.... و وائل لسه بيبص ل مراته: بلاش إنهارده يا يوسف.... خليها وقت تاني....
يوسف بلع ريقه بالعافيه و بتوتر و إحراج و حس بنغزه ف زوره و غصه وجع ف قلبه.... و وائل بهدوء وهو بيبص قدامه: أنا بكره هبقا ف الشركه أبقي تعلالي هناك....
يوسف غمض عينه بتعب و إرهاق.... و بالرغم إنه زعل من تصرف وائل معاه بس قدر موقفه و إن وائل لسه زعلان منه ع إللي عمله معاه و مع بنته... لحظات و فتح عينه و قاله بهدوء: حاضر مستر وائل... سلام....
يوسف قفل معاه وهو متضايق و مخنوق من المكالمه.... و ف نفس الوقت مقدر موقف وائل و بنته منه.... نزل من الشركه و روح بيته ياخد شاور و يحاول يهدي من جواه و يشوف هيتصرف إزاي ف إللي جاي....
نهي سألت وائل ع المكالمه و قالها إللي حصل...
باقي اليوم عدي عادي علي أبطالنا من غير أي أحداث جديده....
تاني يوم الصبح....
وائل صحي هو و نهي و بدأت تحضر الفطار و قعدوا يفطروا سوا قبل ما يروحوا شغلهم.... دقايق عدت و لقوا ندي نزلت و صبحت عليهم و قعدت معاهم ف هدوء تام....
وائل بإبتسامه هاديه: ها يا حبيبتي.... عامله إيه إنهارده.... أهدي شويه؟؟؟؟
ندي بهدوء: الحمد لله رب العالمين....
وائل بإبتسامه هاديه: الحمد لله رب العالمين.... ها.... هتيجي معايا الشركه و لا نظامك إيه؟؟؟؟
ندي بهدوء من غير ما تبصله ولا تبص ل أمها: عايزه أرجع مصر....