رواية حافة المنتصف الفصل الثالث والاربعون43بقلم اية
عيطت سديممم ونست روحها انها فالشارع ، صبن هديل ومرام يجرن عند الباب
هديل >> لااااااااااااا عطوها لكيييييي واخيرا
مجد اللي كانت تبكي >> الحمدلله الحمدلله
سديم >> حي عليا نبي نبكي
مرام >> حتى اناااااا
كان الصالحين واقف برا ماسك شنطة جنه ويبحت فيهن وهنا فم الباب ملتمات عالبنت و مجد ماسكتها و مبتسم عالمنظر اللي يشوف فيه
طلع الهادي من جوا شافهن وما فطنش لبنت مجد
الهادي >> كنكن عند الباب مشرعاته خشن جوا
سديم >> شوف من جاناااااا "وبرمت عليه ومسكت البنت من مجد "
الهادي >> مشاء الله مشاء الله
سديم >> تمسكها
الهادي>> لالا نخاف منها مسكت العيال الصغار نحس فيه بيطيح من يدي
ضحكن البنات و لف الهادي على مجد >> مبروك اتربى في عزكم
مجد >> الله يسلمك
خشن البنات بيها جوا يجارن لدار جدتهن ومعاهن مرام
الهادي >> هي الصالحين خششش
الصالحين>> لا والله عندي شغل فالمركز انا ونبراس
الهادي >> تي والله مانك متحرك ونبراس انا تو نكلمه تو يجي هو وباقي الكلاب عشاكم هنا اليوم ، عشا سلامتها على ما ذب*حنا و درنا العشاء الكبير
برمت مجد على الصالحين >> بينك وبينه ، خليني نخش نشوف البنت معش حنحصل فرصه فيها معاهن
مشت مجد
الهادي>> هي خش خش و كلم نبراس قوله سادك من الشغل كولو لقمتين على حالكم
الصالحين >> يا سيدي حاضر
خشو كلهم جوا وكلم الهادي باقي الشباب و قاللهم يلتمو كلهم عالعشاء … وطبعا كلاب النار ما صدقو صكرو المعرض وجو يجارو … وحتى معتز كلموه وخلوه يتكي يجيب فرج الصغير يحضر معاهم العشاء
ونبراس قاللهم يكمل شغل ويجي هو وخالد
//
//
وقبل ما يلتمو كلهم عالعشاء و فحوسة المطبخ لي جت فجأه للصبايا
كلم الهادي جميله وقاللها تجيبله هناء بيش يحكي معاها
وفعلا وسط الحوسه لي كانو فيها ولاهيين كلهم في جنه وفرحانين بيها وكل حد يشبه فيها الحد ، كلمت جميله هناء وخشت هيه وياها للهادي فالصالون ..
تنحنح الهادي لي بدا كلامه وجميله مقعمزه جنبه وهناء في الصالون لي مقابلهم
الهادي>> شوفي يا هناء من يوم ما خشيتي للعيله وانا عادك كيفك كيف مجد خيتي ، و بعد توفى المرحوم قعدتن امانه في رقبتي انتي والبنات …
هزت هناء براسها >> ما عمركم ما قصرتو لا انت ولا فرج ولا باقي العيله حتى هلي مطمنين عليا انا والبنات بينكم مانحسش في روحي غريبه ولا برانيه.. بس في كلام بتقوله؟ ولا شنو "وبحتت في جميله بمعنى شن فيه"
هزت جميله براسها وابتسمت وهيه اطمن فيها انه مافي شي
الهادي >> شوفي جاك لقمان قبل فتره وحكالك في موضوع هديل ورفضتيه وانا عارف ليش رفضتيه … خوفك على بناتك محد يلومك عليه وانتي عارفه اني عمري لا انا ولا فرج على وعارته غصبنا حد على شي لانه انا وياه ننصحو بس الباقي مش شورنا … لما خطبت نبراس الهديل كان المرحوم ما لش شي وجت القصة هذي بسرعه وهم الاثنين ما فكروش كويس الخطبه ماكانتش غصب عنهم ولا فسختها غصب عنهم هم الاثنين خذو قرارهم … بس توا لقمان وهديل يبو بعضهم … وانتي فاهمه
هناء >> نعرف والله انهم يبو بعضهم يعني مش مجرد انه ولد عمها ويبيها وهضا واضح في هديل لما جت حكتلي … لكن انا مانبيهش تسرع وفي نفس الوقت مش ح نقدر نمنعها وخايفه عليها من الغلط هضوم شباب و صغار ومانعرفش كيف يصرفو هضا عليش معش نخلي فيها تمشي وتجي كيف قبل بس معش عرفت شن ندير
جميله سقمت قعميزتها وبحتت في هناء >> انا ما كنتش بنحكي بس عارفتك تحبي تسمعي رايي فالموضوع صح
هناء>> اكيده طبعا وناخذ بيه اخرى مش غير نسمعه
ابتسمت جميله >> العيال في وقت توا وجيل توا ماتقدريش تغصبيهم على شي وتأكدي انه هديل لو تبي تحكي مع لقمان را تحكي معاه امتى ما تبي بس هيه محترمتك … خليهم يجربو و ياستي كانك خايفه من المشاكل انا نوعدك حتى لو لقدر الله ماصارش نصيب بينهم تقعد تجربه لهم يتعلمو منها ومش حتأثر فالعيله
هناء >> وفرج شن رايه؟
الهادي >> فرج موافق طبعا و نجوى نفس الشي يراجو غير في موافقتك
هناء>> خلاص يبقى لي تشوفه مناسب انتو هلها و هذي بنتكم
الهادي بحت في جميله >> تو خطبنا لولد خويا توا نخطبو الولدنا
هناء >> كيف ماهو نبراس اجوز
ضحكت جميله >> لا بدر الدين
هناء >> جميله ما تقوليش لي في بالي
جميله هزت براسها >> هو لي في بالك
هناء >> يناعلييييي بدر وسديم …. شن شكلها العيله لي بيديروها هضوم الاثنين طول نهارهم طالقين لساناتهم على بعضهم
ضحك الهادي >> والله ماني عارف شن شكل العيله بس خوذيها مني وعد مش ح نخليه ياخذها الا وهو ماشي عالصراط المستقيم
هناء >> خليني نستوعب بس هديل ولقمان قبل
جميله >> العيال كبرو خلاص
هناء >> باهي كيف وسديم موافقه ؟ ولا حتى هيه كيف هديل منظمه امورها والله نوريهن هاللفاعي يدسن عليا
الهادي >> بالنسبه لهن تو نحكي معاهن ونحكي مع كلاب النار لخرين و مدام عطيتينا الموافقه باقي الخطوات عندي واطمني "'حط يده على صدره " وفرج مسيبلي الامور انا
هناء >> زي ما قتلك انتو هلهن وهذين بناتكم و انا مش حنطمن عليهن كيف ما نطمن وهن واخدين عيال سيدهن وان شاء الله ربي يتمم بالخير ، خوفي كله خوف ام على بناتها ماعنديش غيرهن مش خوف رفض
جميله >> ماعليك فيهم كيف بدر كيف لقمان حيجوك متأدبين "وبحتت فالهادي"
الهادي >> المهم ماحد يحكي لحد شي خلوني نحكي معاهم قبل و بعدها ساهل
هناء >> ان شاء الله
//
//
على لمة العشاء … كانو الشباب كلهم فالمربوعه البرانيه ملتمين وطبعا لقمان وبدر مازال ما عندهمش العلم بشي … لا بنبراس شن حكى مع باته ولا ب انه الهادي حكى مع هناء … وهضا كله كان بطلب من الهادي انه مايحكيش شي
كانو حاطين ثلاث سفر
سفرة بعيده شوي فيها بات الصالحين و الهادي وفرج و سفرة فيها نبراس وخالد وبدر ولقمان .. وسفره جنبهم فيها معتز وولده و سهم والصالحين
بدر >> تو انتو يا افنديستا انت وياه المهمه لي بتمشولها هذي كم بتقعد
نبراس >> نحن مفروض نمشو بعد يومين يعني قبل المهمة ب خمس ايام عشان نتمركزو غادي ونعرفو المنطقه
بدر >> وبعد خمس ايام تديرو المهمه وتروحو
خالد نزل الكاشيك من فمه وهوا ياكل >> ايوه مهم المدام حتقعد هنا راه
بدر >> مغير ازمط بس
ضحك خالد و كمل وكال
نبراس >> مراتي ومجد و مرات خالد ح يقعدن هنا امانة عندك اه
صالحين التفت عليهم>> يقول مراتي و يجي عند راقد الريح ويقول اسم مراته
ضحك نبراس >> ماه عمتي عاد
صالحين بحت في سفرتهم >> عطوني لحمه من عندكم
بدر >> يا شريني راهو عشاء بنتي وانا لي جبت اللحم
معتز >> كول هذي فرج وكلته معايا مش حياكلها
نبراس >> ان شاءالله تشبع
برم صالحين على سفرته وخذا اللحمه وكمل وكال😂
لقمان بصوت واطي >> باهي انت قبل ما تعدي المهمتك كنك ما حكيتلنا على مواضيعنا انا وبدر
بدر >> شي من هضك اليوم داير روحه بيحكي وفاتنا بكل
نبراس >> ياعليك سكنه سكنتوها
بدر >> متضبط مراته ويقلب كتكوت قدامها ويجي عندنا يقول سكنتو ، تحسابني مش فاطنلك انت وياها 😒
دلفه نبراس بظهر يده على كتفه >> لم فمك وكول
برم عليهم الهادي >> كولو وانتو ساكتين 😒 بعد الوكال تو تحكوا
طبسو روسهم كلهم و لقمان وبدر مش قادرين يمسكو ضحكتهم 😂
//
//
طلع معتز من العشاء بعد كمل … ومشى يوصل في فرج لحوش هل خلود … و طبعا طلعله سعد خذا منه فرج لي كان راقد
✨ قعد معتز بالسياره قدام حوش هل خلود
مسك تلفونه بعد تردد و افكار ومش عارف شن يدير ومش من حقه يطلب انه يشوفها ويحكي معاها … و حط على رقمها و بتردد كبير رن عليها و يلي توقعه صار … ما ردتش عليه اصلا
بعد كملت الرنه دز مسج
" بالله عليك تردي ، و راس فرج ما اديريها فيا يا خلود ورحمة عمي جلال في ترابه نموت لو درتيها "
.
.
.
على رنت معتز ما ردتش عليه ، بس لما جاها المسج حست بدمها يغلي من القهر ، بحتت فالكلام باستفزاز
وحطت على رقمه ورنت
ما عطاتش فرصة حتى يحكي >> انت شنو يا بني ادم ! انت شنو تحس شن تبي مني يا اخي نوافق ولا ننحرق انت شن عندك عندي ، ولا الحاجه اديرها انت عادي بس غيرك لا ؟ ماهو مشيت اجوزت وعشت ودرت لي ما يندار في حد قدر يوقفك ؟ راعيت مشاعري ولا مشاعر هلك ولا ولدك اللي مش فاهم ليش بين يوم وليله قعد باته في مكان وامه في مكان وتغير عليه الروتين لي كان متعود عليه … درت حساب الهضا كله انت ؟ ليش انت ادير لي تبيه بس انا مطلوب مني نراعيك ونراعي شعورك … مدامك عارفها واعره هكي وقاعد قريب تموت ليش ما وخرت لو كان في لحظتها جيتني و قتلي خلاص معش بنجوز را والله سامحتك راهو قلت ساعة شيطان بس بعد ما اجوزتها بعد ما حرقت قلبي بعد ما عشت معاها ودرت ما في خاطرك جاي توا تبي خلود تسامح ؟ طلعني من راسك وخليني في حالي بيني وبينك فرج بسسسسس و ياريت حتى حوشنا ما تجيشش تبي فرج تو يجيبوه لكي خوتي لعندك … وما تقعدش كل شويه تحكي معايا عشان الي صاير فيك توا كله صاير فيا و مازال ياما بتحس .. جرب شعوري بلكي تفهم
صكرت الخط في وجه وخذت نفس بعد ما علقت الكلام كله في بعضه و قعدت تبكي … اما معتز ف سمع الكلام وحس انها خلاص النهايه و محاولاته كلهن ح يكونن فاشلات
مسكت خلود تلفونها وعشان عارفه معتز متهور دزتله مسج مكتوب فيه
" هضا ح يكون اخر مسج بيني وبينك ، معتز انا مش حنوافق على حد حتى لو هلي غصبوني مش حنجوز راجل غيرك … بس في نفس الوقت انا مش لك يا معتز معش فيه بينا اي رابط الا فرج"
قرا معتز المسج ، وولع سيارته و عزق التلفون جنبه وطلع من الشارع
//
//
قايلة ثاني يوم ✨
روح سهم بالبنات هديل من الشغل ، و سديم من الجامعه … خشن على طول الحوش جدتهن
هديل >> ماما مش قاعده هنا ؟
سديم >> لالا فالحوش
هديل >> بنشوف لقمان دزلي انه قاعده هنا مش فالمعرض
سديم>> يامراهقه
هديل >> اسكتي ليا فتره حتى تلفون ما نحكيش معاه
سديم >> سؤال باه وعدي
هديل>> بسرعه
سديم >> تحبيه ؟
هديل >> خليك في حالك " ومشت للجنان الي جهة المطبخ"
سديم عيطتلها>> يامراهقققه
خشت هديل جهة المطبخ ، لقت لقمان واقف من لاورا ماسك دخان … لما سمع خطواتها عزقه وبرم عليها
هديل >> من امتى ادخن ؟
لقمان >> ماليش واجد
هديل >> وعليش ان شاءالله
لقمان >> لما نتوتر بس
هديل سقمت حجابها >> اممم وعليش متوتر
لقمان رفع حاجبه >> لا شي كل حاجه ماشيه تمام
ضحكت >> ماصارش جديد مع عمي الهادي
لقمان >> معش فهمت شي ، كل مره واخذ حد يحكي معاه على جنب وانا وبدر مش معبرينه بكل
هديل >> حتى ماما معش حكت معايا في شي
لقمان قدم خطوه >> وباهي كان ما صارش شي اليومين هذينا بنرد ونحكي مع عمتي هناء
هديل >> خلي الموضوع عند عمو الهادي وساهل
لقمان >> اشر من عمي الا باتي من يوم لي داره معتز وهوا ناقم علينا انا وسهم مش عارف شن دخلنا
هديل >> معتز كبير ومسؤول على قراراته خلاص عميمه نجوى و عمو فرج مش مسؤولين على اللي داره
لقمان >> احكي عاد ، المهم جوك تمام انتي
هديل بحتت فيه >> تمام ، ووخر لاوره
ضحك >> خلاص بنطلع شور المعرض انا
هديل >> تغديت ولا لا
لقمان >> تغديت اه و ماشي بنطلق على بدر كلا كبدي كل شويه تعال تعال نبي نروح مليت
ضحكت>> ربي يكون في عون سديم
ابتسم مع ضحكتها>> هي تبي حاجه دزيلي
هزت براسها وابتسمت وهوا طلع
خشت من باب المطبخ الجواني ، جتها سديم تجري
هديل >> كنك؟
سديم>> عمي الهادي قالي كلمي اختك وتعالن نبيكن
هديل بخوف >> شافني مع لقمان ؟
سديم>> والله ما نندري بس تعالي
هديل >> حي علمنه شن درنا
سديم >> تي تعالي تو نفهمو
مشت سديم شور المربوعه البرانيه ولحقتها هديل
.
.
.
خشن البنات ولقن الهادي بروحه فالمربوعه
الهادي >> تعالن قعمزن قدامي وصكري الباب ياهديل
قعمزت سديم وهيه تبلع في ريقها من الخوف وهديل برجفه صكرت الباب … وجن قعمزن جنب بعضهن زي اللي دايرات فالطه
الهادي >> نبيكن تسمعني و تفهمن كلامي كويس
هزت سديم براسها >> شن في يا عمو شن دايره هديل
هديل ضربتها بمرفقها وبصوت واطي >> اقسم بالله نوريك
ضحك الهادي >> خلوني نحكي بس
هديل >> احكي ياعمو ان شالله خير
الهادي >> طبعا بلا ما يكون في استعباط انا نعرف والحوش كله يعرف ، انه لقمان يبي هديل وبدر يبي سديم ومش من توا الكلام هضا له فتره
وجهن قلب احمر هنا الاثنين و معش رفعن راسهن 😂
كمل الهادي كلامه>> المهم انا حكيت مع امكن و ماعندهش مانع مدام انه الموضوع يكون جدي ، انتن مش صغار ولا الشباب صغار… بدر الدين عنده حوش بس مش شاقي بشغله و لقمان ماسك الشغل بس مازال ما حط حيطتين علي بعضهن … لازم يتحملو مسؤوليه بيش ياخذو خطوه كيف هذي … بس قبل هضا كله انتن موافقات ؟
بحتت سديم في هديل و سكتت
الهادي >> الساس ما يحكيش راه نحكي معاكن 🙂
هديل >> عمو انت بعد بابا الله يرحمه خذيت مكانه في كل شي يخصنا مانكذبش عليك عادي انا مش معارضه الفكره ومش تقول هذي تقول باهي وخلاص زي ما درت مع نبراس بس ظرفي مع نبراس كان غير والظروف والوقت غير ، ف انا الفكره موافقه عليها بس لو انت شايف اي شي مش مناسب ف صدقني رايك يهمني واللي تشوفه انت ديره
هز براسه وبحت في سديم
سديم >> نفس كلام هديل 🌚
الهادي >> انا نحكي في موضوع جدي والكلام هضا لي بناخذه منكن ح تنبنى عليه حياتكن ، انا نضمنلكن والضامن الله انكن تعيشن معززات مكرمات … ف شنو نعتبره موافقه ؟
هزن هنا الاثنين روسهن بحشم
الهادي >> يبقى خلو الموضوع عندي وما تحكوش الحد شي لعند ما نتفق انا وفرج
هديل >> ان شاء الله
طلعن هنا الاثنين ووجوهن لوطا من الحشم
سديم >> حي علمي سخنت سخنه سودا
هديل>> تو يا بارده تخشي تقوليله كنك يا عمو هديل شن دايره
سديم ضحكت>> والله نحسابه شافك مع لقمان
هديل >> وتبيعيني هكي "ضربتها على كتفها " امشى من قدامي
سديم >> كتفي طار
ومشن هنا الاثنين خشن للدار الكبيره وكل وحده تفكر في حاجه
//
//
في المركز … في مكتب اول مره نخشوله
واللي هو مكتب عميد منصور … كانو اعضاء المهمه كلهم ملتمين عنده فالمكتب وياخذو فالتعليمات من العميد كان ماسك خريطة المنطقة وكلهم مصبيين حواليه و يشوفو معاه
العميد >> اللي ماشيين من بنغازي 10 وكلكم مدربين افضل تدريب … و من غير اللي حتلقوهم في قسم شرطة طبرق حيكون عددهم اكبر منكم … حكينا على كل شي و لكم فتره كبيره وانتو تدربو عالمهمه هذي … بعد بكرا ح يكون يوم مشيتكم حتلاقو كلكم في مطار بنينا … حتمشو بطياره خاصه انتو بس من بنينا لمطار الابرق فالشرق … ومنها ح تلقو سيارات القوات الخاصه حينقلوكم للمكان اللي حتقعدو فيه
صالحين >> و نحن والجماعه كلهم حنكونو في نفس المكان
عميد منصور>> كلكم في نفس المكان و عشان هكي نبيكم تمشو قبل المهمه بكم يوم … عشان هما عندهم معلومات اكبر .. و حتدربو منهم وحتراقبو المكان
صالحين هز براسه>> تمام
بحت فيهم العميد >> ان شاءالله تروحو كلكم نفس ما مشيتو .. توكلو على الله
ضربوله كلهم التحيه و طلعو من مكتبه
صالحين >> مروح ؟
نبراس >> اه
صالحين >> لاحقك بنروح بمجد
جا جنهم خالد >> شنو مروحين
نبراس >> اه خلاص خلي الدقيقه لي نقعدوها مع هلنا نقعدوها
خالد >> بدا دراما من توا
الصالحين>> خوذلك لعند نروحو
ضحك خالد >> نبلط حتى انا نطلع ، تصبحو على خير
نبراس >> قدامك الخير
خش نبراس المكتبه خذا تلفونه و طلع شور الحوش ووراه صالحين
//
//
في الليل
عند الهادي اللي مسكين يجري هكي وهك عشان كل شي يمشي تمام
طلع قدام الحوش … لقى القروب مجتمع لقمان وبدر وسهم مروحين من المعرض
بحت في ساعته وبحت فيهم >> مروحين بدري ؟
بدر >> والله ياحاج قفلنا اليوم والحسبه وروحنا
الهادي >> على اساس تندري عليها انت الحسبه
بدر بحت فيه وسكت 🌝
الهادي >> انت وياه "وشير على لقمان وبدر … لعند يروح نبراس من مهمته وروني عاد همتكم … بالنسبه لك يا قليل الربا "وشير على بدر " بتمسك الشغل كله انت الفتره هذي
بدر >> كله كله ؟
الهادي >> لا ربعه ،كله يا باتي اه بروحك لا معاك سهم لا معاك لقمان
بدر بصوت واطي >> خرف
الهادي بحت في لقمان >> وانت يا باتي تبدالي في شقتك و تشد على روحك … مدامكم تبو المسؤوليه يا تحملوها كلها يا بلاش بكل
لقمان >> حاضر … انا نبنبدا في القطعه لي لوطا بنبني فيها
الهادي >> من بكرا جيب المقاول وابدا
بدر >> وانا باهي
الهادي >> شد روحك وفاتحتك تقراها بعد يروح نبراس كان انا وافقت
كانو واقفين قدامه وسهم متكي عالسياره، قرب شويه
سهم >> يا جماعة مدام كلكم بتجوزو عاد .. بندز امي تحدد العرس
الهادي >> تو مش قلت البنت تكمل قرايتها ؟
سهم >> خلاص تكمل السنه هذي يقعد فاضللها سنة تكملها عندي
الهادي >> مشطركم عاد فالتخطيط انتو
درس نبراس سياره وفي جرته سيارة الصالحين ونزلو هما الاثنين
نبراس >> كنكم تقول ماسكينكم توقيف
بدر >> لا غير باتي كان يعاقب فينا بس
الهادي >> احكي كلمة زياده ونفضلك القصة قبل حتى ما تبدا
بدر بحت فيهم وسكت 🙂
ضحك نبراس >> شن صار
الهادي >> باذن الله بعد تروح انت من مهمتك يسير خير
سهم >> وتحددولي عرسي ؟
الهادي بملل >> بينك وبين هل البنت وبوها
الصالحين >> وبعد نروحو بنديرو اسبوع كبير الجنه صح درنا عشا للعيله بس نبي ندير اسبوع كبير و ن*ذبح
الهادي >> ان شاءالله على خير ، ربي يحفظكم بحفظه
نبراس >> جوا من فيه
بدر >> الكتكوت يدور على مراته
نبراس بحت فيه وخش
و لقمان وسهم واقفين يضحكو والهادي برم وخش
//
✨
✨
✨
//
- لا سعادة أبدية في هذا العالم، لا جاه ولا جمال، لا قوة ولا غنى، لا شيء يمكن أن يحمينا من ضربات القدر ✨
يوم المشيه ⏳
اليوم لي ماحدش تمناه يجي … ماحد يبي يعيش البعد وخصوصا انهم ماشيين عشان مهمه صعبة و المصير فيها مش معروف
.
.
.
خالد >> ح نروحلك قريب ما تخافيش
غادة >> م اتخلينيش بروحي ياخالد ما ليش حد هنا غيرك
خالد >> هل نبراس نطمن عليك عندهم اكثر حتى من هلي ، عارف انك ما تريحيش عند هلي وهلك بعيد هنا نطمن عليك اكثر شي
غادة >> ح تجي و نسافرو مع بعضنا زي ما وعدتني
ابتسم و حضنها >> حاضر ، ردي بالك من مُعز
غادة >> في عيوني ياحبيبي
خالد >> كل شي عندك بزياده عقبتلك فلوس و تبي اي شي اطلبي من بدر خو نبراس تمام
غادة >> انت مش ح اطول ان شاء الله مش ح نستحق شي
خالد >> ان شاء الله
قرب بدر من السياره خبط عالقزاز
بدر>> خلي هلك يخشو امي فالجنان
خالد هز براسه ، ووخر بدر
صكر القزاز وباس جبهتها >> هي انزلي
غادة>> لما تطلعو كلمني
خالد>> حاضر "طبس على معز و باسه ، ونزلت غاده وهيه تبحت فيه"
//
//
مجد >> الصالحين
صالحين >> مجد عاد شن حكينا نحن
مجد مسكت يده >> نحبك والله
ابتسم>> وانا نموت فيك
مجد >> ح تروحلي بسرعه صح
قرص خشمها >> اسبوع ونكون عندك
مجد نزلت عيونها >> اسفه على كل يوم بعدتك فيه مني ، اسفه عشان رفضتك فالاول واسفه عشان كنت خايفه منك … لو نعرف اني ح نحبك هكي كنت وافقت من اول مره
ضحك وهوا يرفع في راسها >> مش خذيتك غصبا حتى عنك ؟ مش حبيتيني زي ما وعدتك وقتلك ح تحبيني؟ مش جبت منك اجمل بنت فالعالم ! نحبك و نحبك و نحبك لاخر يوم في عمري و ح نرد بعد اسبوع و اديري عمليتك ونكون معاك و نمسك يدك ونربو ونكبرو بنتنا مع بعضنا
ابتسمت وهيه تمسح في دموعها >> هيا عشان طولت
صالحين >> هي " طبس رفع بنته وحضنها وهوا يشم في ريحتها "
نزلو للسياره ومشى بيها شور حوش هلها
صالحين >> ردي بالك منها ومن روحك
مجد>> صالحين "ودموعها نزلن"
قربها منه وباس راسها>> وراسك ما تبكي ، وغلاوتي في قلبك ما تبكي
مجد مسكت يده >> ما اطولش انت وعدتني
ابتسم >> حاضر "وشير على عيونه"
مسكت بنتها وحضنتها وهيه تشم في ريحته فيها ، وكان الباب مردود وبدر مصبي قدام الباب و معاه خالد
نزلت خشت للحوش ، وصالحين درس السياره و قرب منهم بدون ما يحكي ولع دخانه ويراجو في نبراس ينزل
//
//
نبراس >> بنطلع عالساعه 6 الفجر
مرام >> نبراس حاسه بقلبي ماتمشيش
نبراس >> بالله عليكي تهدي وبلا دموع را والله قلبي بروحه مش متحمل ، طول عمري نطلع تدريبات ومهمات و عمري فكرت في روحي ، بس المره هذي ما نبيكش تصعبيها عليا
بحتت فيه و مش قادره نوقف دموعي مش عارفه شن ح يسير ، حاسه بوجع في بطني و في قلبي و حاسه انه طلعته من هنا مش ساهله ! قعدت نبحت فيه و مانبيش نبكي بس مش قادره مانبيش نخليه يطلع وهوا يشوف لدموعي ، قربت يدي من وجه و حطيت راسي على راسه … قرب يده من وجي ومسحلي دموعي وغمض عيونه وتنهد
نبراس >> الساعه خمسه والفجر آذن صبي نصلو ، وغمضي عيونك وارقدي
مرام>> مش ح نعرف نرقد
بعد من وجي شويه >> في حضني
هزيت براسي و ابتسمت من وسط دموعي ،ابتسم معايا وصبا يتوضى و طلع وصبيت … وخذيت ملاية الصلاة وجيت وراه، صلى بيا الفجر و برم خذاني الحضنه ، حول ملاية الصلاة وحضني
صبيت للسرير وجا هوا جنبي >> بعد يصبح الصبح ، تطلعي حوش هلي و تقعدي عندهم على ما روحت
مرام >> نبراس قتلي اسبوع ما اطولش
نبراس >> حاضر ياعيونه حاضر ، عقبتلك فلوس تبي حاجه كلمي بدر وما تطلعيش من حوشنا لحوش هلي الا وحد مصبيلك فم الباب … تمام
مرام >> اطمن ما تفكرش فيا اهم شي تروح انت والصالحين وخالد بخير
نبراس >> ح تلقى مجد حتى هيه ح تقعد فحوش هلي و مرات خالد ردن بالكن منها
مرام بنعس >> حاضر
قعد يمسح على راسي و انا من الدموع والصداع نعست
مرام>> انحبك
ابتسم و تنهد >> نموت فيك ونموت بلاك
غمضت عيوني عالساعه 6 بالزبط ! … حطني وباس على راسي … خذا شنطته و طلع من الدار وهوا يبحت فيا
نزل لوطا لقى صالحين وخالد
صالحين تنهد >> تروق تروق
خالد >> هيا ؟
نبراس >> هي
ركبو فسيارة خالد بيمشو بيها للمطار، وبدر كان فم باب حوشهم يبحت فيهم وهما يركبو للسيارات ونبراس مازال واقف برا ويحكي مع بدر
بدر >> كان خليتوني نوصلكم بس
نبراس >> نبيك تقعد هنا انا ما نطمنش عليهم الا معاك ديما نقولك نحطك على طاوله في شارع ماتهنيش عليها ، بس انت عارف اني نا نوثقش فحد الا فيك
ابتسم وهوا يشوفله >> حاضر
خالد >>السيارة ح ياخذها حد من الافنديه من المطار بعدها و يشيلها للمركز لحد ما نروح
نبراس بحت في بدر >> مرام امانة عندك مانبيهش تزعل مانبيهش تبكي ، ح تنوض شويه اخرى جيبها هنا وخليها مع البنات
بدر >> تمشي وتجي بالسلامة يالقيادة "واضبطه" ما تشغلش بالك كيف مرام كيف مجد في عيوني
نبراس >> مرات خالد ما عندهش حد في بنغازي
بدر شير على عيونه>> توكل توكل
نبراس ابتسم >> رد بالك من سيسي
شيّر على قلبه >> هذي بذات في قلبي
ضحك و ركب فالسياره ، وطلع على عيون بدر و على عيون مرام اللي ناضت على طول بعد صكر الباب وقعدت تشوفله من الروشن
