رواية حافة المنتصف الفصل الرابع والاربعون44بقلم اية
- إذا كان الناس يفضّلون في بعض الأوقات تذكّر الأيّام الجميلة من الماضي، فإن الأيّام القاسيّة يصبح لها جمالٌ من نوع خاصّ، حتى الصّعوبات والمعاناة التي عاشوها تتحوّل في الذاكرة إلى بطولة غامضة وممتعة، فهم لا يصدقون أنهم احتملوا كلّ ذلك العذاب واستمرّوا بالحياة.
.
.
.
✨والساعات مرن عليهم وهما فالطريق ، والرحله كانت طويله … مشو المطار بنينا في بنغازي .. ومنها لمطار الابرق في الشرق … قعدو كم ساعه تريحو
ومنها ح يمشو شور مدينة طبرق اللي تبعد عن وين ما هما قاعدين حوالي ثلاث ساعات عن طريق البر
.
.
.
اما عندهن ، فكانو كلهم حابين يغيرو جو وينسو الي ماشيين والمهمه
قعمزن بسفرة القهوة فالجنان ، مجد و غادة و مرام و هديل و سديم
سديم >> بنات عاد بتقعدن قالبات وجوهكن قريب اسبوع يعني انا فرحانه قلت نديرو جو مع بعضنا قعدت بنات
مرام >> انا حاسه روحي بنمرض اصلا هضا عليش مهبيه
سديم >> كنك
مرام >> شكله برد
مجد >> تو بعد تخشي نعطيك حبتين بنادول بيش ترقدي وتنوضي مصحصحه
غادة >> حتى انتي وجك اصفر
مجد تنهدت >> انا حاسه بألم في عمليتي اصلا ويستر الله
هديل وهيه تبحت فيها>> را تطلعي حامل اخرى
مجد >> بسم الله مازال ماربعنتش 😂
مرام >> وما قلتيش للصالحين ؟؟ تعبتي بكل انتي ماعشتيش شعور النفاس قعدتي ماشيه جايه عالمستشفى وبين هنا وحوشك
مجد >> ما قتلش ما بيتش نشغله قبل ما يمشي ، وعدني انه ح يروح وندير عمليتي بس انا خاطري بعد يجي نحاول نحمل بلكي نجيب وتقعد اخت او اخ الجنه والعمليه اتأجل
هديل >> ياربي يامجد ، انتي كانت جيبتك صعبه وبنتك كاننت بين الحياة والم*وت قولي الحمدلله
سديم بحتت فيها و بحزم قالت >> انتي سمعتي الدكتوره شن قالت صح ؟ قالت لك تقدري تحملي بس ما تحمليش ! عشان كل ما يكبر الجنين في بطنك كل ما يضغط على عامودك الفقري و على اسفل بطنك و ح يسببلك نزيف و تموتي ! انتي فاهمه ولا مش فاهمه المره لي فاتت كانت نسبة نجاتك ٥٠٪ المره هذي ح تكون ٢٠٪
مجد >> الدكتوره اصلا قالت لي بعد المضاعفات لي صارن لي لازم عمليتي تكون في اقرب وقت ، عشان لا قدر الله مايتحولش الموضوع لورم
سديم >> بناااتتتتتت بالله عليكن خلاصصصص خلونا نحكو في حاجه ثانيه، خلونا نتعرفو على غاده من الصبح قاعده معانا وما حكتش حرف
غادة ابتسمت>> انا لما ننسجم نسكت راه ، نقعد معناها عاجبتني الهدرزه
مرام✨
رن تلفوني وسط هدرزة البنات وكان نبراس ، قلبي دق.. بعدت شويه منهم وهنا مازال يحكن ورديت عليه
نبراس >> حبيبي
ابتسمت>> وصلتو ؟
نبراس >> توا فالطريق الطبرق
مرام >> توصل بسلامه ، كلكم بخير ؟
نبراس ضحك>> مازلنا ما وصلنا ومازال المهمه مش اليوم اصلا، بخير نحن بلا خوف
مرام >> بعد توصل كلمني
نبراس >> حاضر ، كان ما كلمتكش معناها جنبي الجماعه بس
مرام >> دزلي مسج ما تخوفنيش
نبراس >> مرام تبكي ح نزعل ومعش نكلمك لعند نروح ، انا ران بنسمع صوتك
تنهدت ومسكت بكيتها >> نحبك
نبراس>> وانا نموت فيك ، قولي المجد صالحين تلفونه كمل شحن ومافيش شحن فسياره تو يكلمها بعد يوصل
مرام >> حاضر تمام
نبراس >> هي سلام وردي بالك
مرام >> حتى انت باي
خذيت نفس ورديت جنبهن
مرام >> فالطريق الطبرق
غادة تبحت في تلفونها >> خالد دزلي رسالة شكله معاه الجماعه ما يقدرش يرن "وضحكت"
ضحكت معاها سيسي >> نبراس لا حشم لا جعره عاد
ضحكت>> شكله جنبه الصالحين بس ، وخالد شكله فسياره الاخرى "وبحتت في مجد" قالي صالحين شحنه طفى يوصل ويكلمك
مجد >> يوصلو بسلامة "وصبت " خليني نخش نشوف جوجو را تقعد مقلقه امي
غادة>> بالله كان مُعز ناض ناديلي حطيته جنبهم فالدار
مجد >> حاضر
سديم>> بنات حنباتو كلنا في دار مجد اه
هديل >> ياربييي العالم الموازي بجد
ضحكت مرام >> شن صار معاكن جديد؟
سديم >> كل شي تأجل لبعد يروح نبراس ومنها عمي اصلا حاطهم تحت الاختبار
هديل >> قاللهم تلقوهن غرب تمشو شرق 😂😂
ابتسمت غاده>> نخشو جوا صقعت
سديم >> هي عميمه جميله قاعده اديرلنا في حساء اصلا
صبن البنات كلهن وخشن مع بعضهن جوا
//
//
عند محمد ، من بعد ما مشى للدكتوره اخر مره وهو يطبق في كلامها اللي قالاته وماسيبش اسيل ولا لحظظظه بروحها بالرغم انها كانت قاعده في حوش هلها و مُصره انها ما تروحش بس محمد كان حواليها
يومها ، كالعاده جاب حاجات للعيال من الدكان ومشى لحوش هل اسيل .. لقاها على نفس قعدتها فالجنان والعيال يلعبو قدامها وهيه سرحانه
محمد >> شنجونا اليوم
هزت براسها >> الحمدلله
محمد >> جبتلك الشوكلاطه هذي مش تحبيها "ومدها لها"
اسيل >> محمد بالله عليك معش ادير هكي
محمد نزل يده>> عليش تبكي بس
اسيل >> نحس في روحي ضعيفه بكل وانا مش هكي مشاعري من جوا مش قادره نتحكم فيهن بكل … مش قادره ندير اي حاجه في حياتي وحاسه روحي معش خاطري نعيش والله
محمد حضنها >> اسيل ممكن تسمعيني بدون ما تحكي و اتنرفزي
اسيل >> احكي
محمد >> عشان خاطري انتي عارفه كيف كنتي مليانه حياه وماتخشي مكان الا وتمليه طاقه ايجابيه ف انتي طفيتي وانا مش حنقدر نشوفك قدامي شمعه تذوب هكي وما ندير شي
اسيل>> مش قادره ندير شي يا محمد افهمني كاني مش انا مش اسيل
محمد وخرها من حضنه>> وعشان هكي يا حبيبي لازم نمشو نشوفو دكتور
اسيل>> محمد انا كويسه صحتي كويسه الموضوع مش جسدي
محمد>> مش قصدي جسدي ، قصدي نفسي نشوفو دكتور نفسي
بحتت فيه >> انا مش مكلوبه
محمد >> اهدي بس اهدي وخوذي نفس الدكتور النفسي ما يمشولش المرضى النفسيين يمشوله الناس اللي عندهم مشاكل نفسيه مش شرط يكونو مرضى
اسيل>> يعني انت تشوف فيا هكي توا
محمد بحده>> اسيل شوفي لعيالك محتاجينك انا نبيك، الحوش ناقصك وهلي فاقدينك و حتى هلك انتي قاعده معاهم هيئه بس بدون روح
جت اسيل تبي تحكي
محمد >> ما ترديش عليا توا صلي ركعتين و فكري فالموضوع ، وامتى ما تبي رني عليا و القرار لي تاخذيه انا معاك فيه تمام
هزت براسها وهيه تمسح في دموعها
//
//
في نفس الليله هذي كان سهم قدام الحوش ، ويحكي مع ليلى
ليلى >> والله جد دويت معاه؟
سهم>> والله قتله بعد يروح نبراس يمشو يحددو العرس
ليلى>> وبابا مش قالك بعد تكمل
سهم بجديه>> ليلى ! خلاص عاد خلاصص طولناها بكل
ضحكت>> قصدي خلاص سنة وحده
سهم>> ولا نص يوم ، يروحو الافنديه وانتممو كل حاجه
ليلى >> بينك وبين بابا
سهم>> ايوه خليها بيناتنا اطلعي منها انتي
ليلى >> بشويه الاعصاب
نفخ الدخان>> ما. اهمدي انتي
ليلى>> حاضر 😂 ، شن الجو عندكم؟
سهم>> مُحرم علينا قعد حوش امي سالمين .. فيه صبايا جوا وهكي و عمي الهادي اصلا من غادي لاز بدر و لقمان😂
ليلى >> عمو الهادي مسكين كل مره حد فيكم رافع ضغطه
سهم >> من اللقطه لي دارها معتز وباتي تحسيه مش كيف قبل سلم كل شي العمي الهادي
ليلى >> نبراس وصالحين ماكلموش اليوم ، مبدري رنيت على مرام ما ردتش عليا قبل نبوها تجي تبات هنا لعند مايروح نبراس بس قالت قاللها لا
سهم>> قاعده جوا مع البنات اكيده ، نبراس يوثق في بدر وموصيه ف يبيها تقعد قدام عيونه هنا
ليلى >> ان شاءالله يروحو طيبين
سهم>> يارب ، شنجو محمد
ليلى>> كويس ماشي جاي على اسيل والله خايفين عليها بكل قلنا فتره وتمر ومسكينه معش ردت
سهم >> ان شاء الله خير ياعيوني
على تدريسة سيارة الشباب قدام الباب وبدر خاش للشارع وهوا يبيب
ليلى >> جاتك المداهمه
ضحك>> هي نشوفهم ونكلمك
ليلى >> تمام حبي باي
صكر الخط على نزلت بدر من السياره
سهم >> كنكم تقول كنتو في زفه
بدر >> كنت فالمعرض اول مره نمسك حسبه كامله بروحي
ضحك لقمان>> شيبني بيش تعلم صح
بدر >> بيش تقول قدام باتي اني تعملت وزيد بهارات اني ذكي ولقطتها وهيه طايره
لقمان >> وبيش تقوله اني كلمت المقاول وبكرا بيجي ويشوف القطعه بيش الشركه تبدا طول
سهم >> الله يبارك الله يبارك ماتجو الا بالعين الحمرا
بدر >> راك حتى انت معانا تحساب روحك خطبت خلاص
سهم >> غير هيا قدامي بيش نباتو في حوشنا محرومين من الخشه جوا صبايا ودنيا
بدر >> تي نسيبو الحوش فاضي ؟
سهم>> باتك فالحوش لي فوق كيف فاضي ،انت دارك حاطلنا امها فالحوش اللي لوطا
لقمان>> الحواشين لاصقات فبعضهن بلا عباطه
رفع تلفونه >> حتى ولو خلونا نطمنو" وحط على رقم سديم ورن عليها "
هز سهم براسه>> كمل وتعال خش سيبتلك الباب مفتوح
بدر>> ناخذ بطانيتي مانرقدش بدونها
لقمان>> هضا مواله موال خش خش
خشو سهم ولقمان وسديم كانت عالخط
بدر >> ايوا بطوط
سديم >> ليا ساعه نقول الو
بدر>> هضوما معش سكتو
سديم>> روحتو؟
بدر>> اها كيف جينا وسهم قال باتي لازني من داري
ضحكت >> حرام من غادي يابال الحوش ملتمين فيه
بدر>> قتلك بيأدب امي انا ولقمان
سديم>> تعشيت؟
بدر >> اها ، رنيت بنسأل بس جوكم تمام ؟ شوفي مرام ومرات خالد ما يبن شي ؟ راه امانه في رقبتي ولد خالد يبي قطن حليب حاجات العويله هذينا
ابتسمت>> لالا كل شي فيه ، وحنسألهن لو في حاجه نقولك
بدر>> تم رني ف اي وقت حتى عالفجر حنخلي رقمك يرن بصوت بيش نفطن
سديم >> تمام حاضر
بدر>> وشن اديري انتي ؟
سديم>> فالمطبخ قاعدين نهدرزو كلنا في دار مجد فرشنا ونديرلهن فحليب وشاهي
بدر>> معناها اسمعي كان واتي جيبيلي كباية وبطانيتي من داري اه قاعد فالجنان انا
ضحكت >> هي تم
.
.
.
عند سديم ، كملت السفره ووتتها فالمطبخ ومسكت كباية الحليب وحطت حجابها ومشت لدار بدر الدين… رفعت البطانيه بيدها حطتها على كتفها وطلعت للجنان
سديم >> صقع بكلل
ابتسم وخذا منها الكبايه>> شن الجو عندكم؟
سديم>> اهو البنات يحاولن ما يفكرنش وكل وحده مشغوله
بدر>> مش اول مره يمشو مهمه عاد
سديم>> هنا اول مره يحضرن مشيه الهم عاد كيف مرام كيف مجد وحتى خلود راه مالهش واجد متجوزه هيه وخالد
بدر >> ان شاء الله يروحو طيبين
مدتله البطانيه >> هي استودعناك الله
خذاها منها >> معقوله يابطوط
سديم>> معش تقول يابطوط وهي اطلع بكرا وراك شغل فالصبح
بدر >> عارفه يا سديم
سديم >> شنو ؟
بدر >> انتظريني وعدّيهن نجوم الليل
وبرم وطلع من قدامها وهيه ضحكت ومشت للبنات
//
//
والايام يمرن عليهم … هنا ايام بسيطه اربع ايام بس مرن بس كانن صعبات عالكل … على غاده لي ماعندهش حد الا خالد واللي خذاته برفض من هلها … ولا مجد وقصتها و مرضها و كيف تحملها صالحين … ومرام وهيه لي كانت بداية القصه وبداية كل شي ✨
الايام كانن يمرن والافنديه كانو فالتدريبات المكثفه مع قسم الشرطه والقوات الخاصه للعمليه .. كانو يدوبك يحصلو كم دقيقه قبل النوم يطمنو على هلهم خلاص
//
//
ليلة المهمه الموعوده ، مقعمزين كلهم في المزرعه اللي مترصدين فيها واللي قريبه من المستودع لي فيه جماعة سرقة الاعضاء
ماسك دخانه ومقعمز ، طلع صالحين و قرب لعنده
نبراس >> ما قدرتش نكلمها اليوم
صالحين ابتسم >> ولا انا
نبراس بحت فيه >> ازعمك ح نروحو ؟
حط يده على كتفه وقعمز جنبه >> مش اول مهمه لنا هذي ياسيادة الرائد وماعمرنا فكرنا نروحو ولا لا
نبراس نفخ الدخان و بحت فوق >> بس المره هذي غير ، مرام ح تموت لو صارتلي حاجه مش ح تقدر بدوني تكمل انا عارفها ، انا مش مهم ولا فارقه عندي مانبيش نخلّد فدنيا بس حتى كان صارت فيا حاجه ما نبيش نكون بعيد عليها "بحت فيه و رد بحت فالسما" حل الغايه لو متت نموت بين يديها
بحت فيه و خبطه على كتفه>> تي بلا كلام زايد يا افندي من امتى حساس هكي ؟ ح تكمل المهمه و نروحو و مش ح يصير الا كل خير
طلع خالد >> مش جايكم نوم حتى انتو "وقعمز جنبهم"
صالحين >> نبراس قالبه عليه بدراما
خالد فك منه الدخان خذا واحد و ولعه>> مافيش حد ضامن عمره
صالحين>> ياراجل خرفي ! شن الليله الغبره هذي انت وياه
خالد ابتسم >> المدام مبسوطه عندكم ، كل ما نكلمها تقولي البنات معايا و نهدرزو مونسات بعضهن
"بحت في نبراس " لو صارت لي حاجه ما تخليهش في بنغازي شيلها الهلها في طرابلس
نبراس جا بيحكي ، قطعه الصالحين
>> اقسم بالله الا ادرهو ام الكبد ، واحد يوصي ولاخر بيموت بين يديها و ام ضيق العلم ، كذا صبو صبو ساعتين ونطلعو ماتزيدوهش عليا
صبا نبراس يضحك بعد ما نكدو على صالحين و خالد خش في جرتهم
شويه وبدو يلبسو و يوتو في سلاحاتهم وياخذو في اخر التعليمات، وبعد شويه طلعو في سياراتهم عشان يمشو شور المكان ونص ساعه ويهجمو
//
//
عند البنات في الليل متأخر كالعاده ملتمات في دار مجد
مجد >> ماحدش كلم ؟
مرام >> لا نبراس قالي من امس انه اليوم تدريبات وهكي قبل المهمه وفالصبح بيتوكلو
غادة>> حتى انا خالد نفس الشي ما حكش معايا
مجد>> صالحين دزلي يتطمن بس
هديل >> خلاص هانت بكرا المهمه وبعدها يروحو بخير
مرام>> ان شاء الله يارب
مجد >> وعندنا فاتحه تبي تنقرا قريبا
ضحكت سديم >> انا مازال مش مستوعبه راه
هديل >> نعطيك كف بيش تستوعبي ؟ 🙂
سديم >> بارده 😒 بس مش هكي نحس فالموضوع جا هكي بدون خطوات قبلها ومش عارفه فاتحه على طول
مجد >> بدر الدين ما ينفعش معاه الا هكي ولا كنتي ح تعدي نجوم الليل واجد
سديم >> بعد قتله اثبتلي مشى قال بنقرا فاتحه 😂
مرام ضحكت>> شن قصة اغنية انتظريني وعدي نجوم الليل كل ما نلقاه فالحوش نسمع فيه يغني فيها
هديل >> وياريت غير صوته سمح 🙂
ضحكت مجد >> هذي اغنية من زمااااااان عالقه معاه ويغني فيها
سديم >> من كثر الوجيج لي داره في حياته خلاهن كلهن يعدن نجوم الليل يراجن فيه
ابتسمت غاده >> ان شاءالله نحضرو فاتحتكم
سديم >> ان شاء الله يارب
رن تلفون مرام قاطع كلامهن ، بحتن فيها
مرام >> محمد خويا مش نبراس
مسكت التلفون وردت عليه >> الو
محمد >> كيف حالك وشن اخبارك
مرام>> بخير الله يسلمك
محمد >> شن الامور عندك ؟ والله انتي عارفه الجو عندي كيف ملخبط قالت لي امي نبراس عنده مهمه ونسيت نرن عليك
مرام>> عارفتك والله ان شاء الله ربي يلم شملك انت و اسيل قريب
محمد >> امين يارب ، شن امورك انتي
مرام>> والله تمام نبراس عنده شغل وقاعده عند هله قبل قعدت في شقتي قالي لا برضو مش مطمن عليك وخليك مع مجد والبنات
محمد >> نجي نجيبك هنا تقعدي عندنا على ما روح
مرام >> لالا خليني هنا نقعد قريبه من شقتي وكان نبي حاجه تو نقولك حاضر
محمد >> باهي تمام ، ناقصتك حاجه
مرام >> كل شي فيه ولله ما تشغلش بالك ، شن صار مع اسيل؟ عارف انها معش ترد عليا بكل
محمد >> تلفونها اصلا معزوق من لما طلعت من المستشفى تشحن فيه عشان قيس و لين يلعبو بيه ولا خاطيها ديما معزوق
مرام>> طول بكل وضعها
محمد >> دويتلها اخر مره قتلها لازم حالتك يتبعها حد مختص مش حنسيبها هكي بس مانبيش نضغط عليها اخر مره دويتلها وخليتها تفكر
مرام >> ان شاء الله تقعد احسن من قبل رايفة عالعيال بكل
محمد >> ان شاء الله يارب ، المهم تبي حاجه دوريني
مرام >> تمام
صكرت مرام الخط ، وخشت عالمسجات حطت على رقم نبراس وكتبت رسالة
" وحشتني بكل والله ، مانبيش نبكي عشان وعدتك ما نبكيش بس هيا روح بسرعه "
دزت المسج ومشت ردت حذا البنات
//
//
ثاني يوم
عند بدر الدين فالمعرض كان يومها بروحه قاعد يتعلم فالشغل من اول وجديد و لقمان وسهم خلوه بروحه عشان بجد يتعلم
فتح لقمان باب المعرض و جا لعنده وبدر الدين ماسك ورقه ويشوف في قائمة بسيارات جدد بيوصلن قريب
لقمان >> هذي الدفعه الجديده
بدر >> اها توصل قريب
لقمان >> وح تستلمها انت
بدر >> عارف كان وصلت الشححنه هذي و انا استلمت امورها كلهن باتي مش ح يقرا فاتحتي بس ؟ احتمال يجوزني اربعه
ضحك لقمان >> كان تسمعك سديم حترد لنقطة الصفر
بدر >> نبصرو لا اله الا الله 😒 بس بجد والله يعني نستلم الحسبه والاستلام خلاص تهيالي
لقمان >> بس متأكد سهم ح يخليك بروحك يعني تستلم ماعندش فيك ثقه
بدر >> خليه يبلط البحر بنمشي نستلم بروحي
لقمان >> بينك وبينه
بدر>> شنصار معاك انت
لقمان >> بديت انا ودرت كل شي ، وجو العمال وكل شي مية الميه
بدر >> ان شاء الله باتي يرضى علينا بعد هضا كله
لقمان قعمز عالكرسي >> مازال تو تحق يحطلنا شروط النسيب الكاره
ضحك بدر الدين على رنة تلفونه برقم غريب
لقمان >> وجيج القديم ؟
بدر >> لا تُبنا الى الله عيب .. غيرت حتى الشفره بس هضا رقم غريب
مسك تلفونه ورد عليه و ملامح وجه بدن يتغيرن ولقمان صبا قدامه
//
//
"مرام" ✨
كنت نسمع في هرجة برا صوت عمي وصوت الشباب و صوت عمهم فرج يتهارجو قدام الحوش ، حطيت يدي على قلبي وحسيت بشي غريب بكل
شويه وخش بدر دق عالباب اللي برا>> الي مش حاطه على راسها تحط
مجد>> خش يا بدر
خش بدر وبحت فينا كلنا ، كنا ملتمين فالدار الكبيرة
مسح على وجه وقال بكلام متلخبط وبسرعه >> صار انفجار كبير في مكان المهمه اللي فيها الافندية .
اللي كانو ماشيين للمهمة هذي 10 من بنغازي ، من غير قسم شرطة طبرق … جماعة طبرق كلهم طلعو تمام ما عدا واحد اما جماعة بنغازي 6 منهم نجو لانهم كانو برا ماخشوش جوا وقت الي صار
و " انخنق صوته وهوا يقول " وفيه جثة اش*لاء… كانت قريبه واجد من الانفجار لي صار ، ماتعرفوش عليها جثة منو ما قدروش يحددو الجثة لمن ! و فيه حد مات وتعرفنا عليه بس مش شورنا
وفيه اثنين مختفيين منهم نبراس وصالحين و خالد لانهم مش مع الناجيين… الاثنين هضوما فيه امل كبير انهم عايشين … بس مش معروف من الي عايش ومن الجثه لي لقوها بدون ما يتعرفو عليها ، الجثة احتمال تكون النبراس ولا الصالحين ولا خالد ، اثنين منهم احتمال عايشين وواحد عطاكم عمره اكيده بس مش معروف من منهم
كمل كلامه وهوا يرجف وسيسي تبحت فيه و دموعها ينزلن ! مافيش حد فالدار هذي ما بكا ! ومن هول الكلام و كبره علي مسامعهم ماحدش فيهم قاطعه ولا ناقشه قال بدر كلامه دفعه وحده وبسرعه كآنه يبي الحمل يخف عليه 💔 كل حد في راسه مية سؤال كيف وليش وشن صار و امتى بس ولا حد قادر يحكي لسانهم ارتبط وكلهم حتى مافهموش كلام بدر كامل
قطع صدمتهم جميله لي طاحت بدون ما تحكي حتى حرف وشالوها للمستشفى
اما انا حسيت الدنيا تبرم بيا بكلللللل ومعش قدرت ندير اي حاجه ولا حتى دموعي نزلن كل اللي في بالي صورته وشكله وهوا يضحك وصوته وعيونه ولمسته اللي نحس بيها
نبحت في مجد لي واخذه بنتها وتبكي غاده الي حاسه روحها غريبه وسطنا كلنا ماسكه ولدها و تبكي وتقول "ماليش حد غيره ليش عدا ليش سيبني "
حطيت راسي بين يديا و بكيت بحرقه وصوته وهوا يقولي نموت فيك ونموت بدونك يزن في راسي !
.
.
.
✨مرت ساعه ومن كثر بكانا خش عمي الهادي علينا
الهادي الي ما كانش مصدق اللي صاير >> مانبيش حد يبكي ! مانبيش نسمع فيكن وحده تبكي اللي بتبكي تطلع تبكي برا ما تبكيش في حوشي . ربي بروحه عالم وين مكانهم بتفاولو عليهم يعني ؟ اللي مات مات شهيد فيهم يدافع على الحق ، ماحد يبكي ماحد يبكي لعند ما نعرفو مصيرهم لعند ما نشوفو شن صار فيهم و نشوفهم قدامي باي طريقة
على خشت جميلة من المستشفى ماسكها بدر ، مشت لعندها نجوى ومسكتها
الهادي >> جميلة قوي روحك انتي الكبيرة فيهم وانتي العاقله معقوله اتفاولو عليهم
جميله ودموعها ينزلن>> هنيه قلتولها ؟
الهادي >> قلنا لراجلها وقاللها كوني في روحك وفي صحتك بس
طلع الهادي الي ماكانش احسن منهم حال بس قسى قلبه لازم في المواقف هذينا يكون في حد قلبه جامد عشان المركب تمشي
وخشو كلهم للدار كل وحده مسكت مكانها و سكتت خايفه من انها اتهزب عشانها تبكي
.
.
.
طلعت سديم ادور علي بدر الدين فالجهة لي لاوره .. قربت منه وبحتت فيه
سديم >> انت كويس
هز راسه بلا
سديم>> مش عارفه كيف نقويك عارفه علاقتك بنبراس و حتى الصالحين كيف ، بس آنا متأكده انهم بخير
بدر مسح على عيونه>> ان شاء الله ان شاء لله
سديم بحزن >> بدر مانحبش نشوفك هكي ، انا نقوى بيك .. ماعنديش حد غيرك عشان خاطري كون قوي "ودمعن عيونها ومسكتهن عشانه"
مد يده وكرها لعنده >> ما تبكيش و خليك قويه زي ما عرفتك وردي بالك من الهبلات لي جوا هذينا وصبريهن لعند ما نعرفو شن ح يسير
وخرت وبحتت فيه >> تعرف اني نحبك صح
ابتسم بحزن >> وانا نحبك يا لئيمه يلي ماتحكيش في كلام سمح الا في وقت زي هضا
مسحت على عيونها >> بتطلع ؟
بدر>> اهاا الدنيا ملتمه برا ، بكرا ح يوصل جثمان الاثنين لي ماتو واحد لاحول ولاقوة الابالله حطوه اشل*اء عشان يندفن ، ح نمشو كلنا نصلو مش معروف جثة من والثاني اللي تعرفو عليه بكرا يوصلو الصبح ويندفنو عالظهر
سديم تنهدت >> لو تبي حاجه كلمني انا مازال واعيه وبايته هنا اليوم
هز براسه وطلع وهيه تبحت فيه ومش عارفه كيف تاخذ الحزن من قلبه وتحطه في قلبها
.
.
.
والليلة هذي كيف مرت ؟ ماحدش يسأل ولا حد ح يحس بالشعور
البكا ما وقفش عند ولا وحده فينا ، كلنا كلنا كنا منهارين وما تسمعيش غير استغفر الله كلمة "ليش"
هو مش اعتراض على قضاء ربي وقدره اكثر من ما هو قهر وزعل وكلمة تنقال في لحظات الي تحسي كل الكلام كمل ! ولا حد فينا رقد لا رجالة ولا صبايا
مرت الليله وصبح الصبح الاسود ، وعرفنا انه في صلاة جنازة ح تصلى اليوم عالجثة المجهوله ، وهل نبراس وهل صالحين و هل خالد مشو يصلو فيها عشان الميت حد من عيالهم بس مش معروف من !
جن ماما وليلى وحتى اسيل، و جو الجيران والاقارب واللي يخش ما يقعدش عارف شن يقول ! يعزينا في من باهي ونحن اللي مش عارفين شي ؟ ماحد قادر يواسينا ولا عارفين شن يقولو ، اللي يخش يضبط ويبكي ويسكت
جت هنيه اللي لما شافت جميله انهارت
جميله>> من وهما صغار مع بعضهم وين ما تلقى نبراس تلقى الصالحين ، مكتوبلهم يمشو مع بعضهم و مكتوبلهم يريحو مع بعضهم وليدي ووليدك يا هنيه و ليدي ووليدك
هنيه >> ما صدقت فرحت بيه ما صدقت شفت بنيته بين يديه ، وحيدي ما لحقش يفرح
كنت واقفه ونسمع في كلامهن ونصكر في وذاني !
ليلى >> مرام انتي كويسه
مرام >> مش كويسه جيبولي نبراس نبي نبراس حنقعد كويسه
ليلى >> مرام اهدي خوذي نفس واهدي بالله عليك
مرام >> لو مات نبي نموت وراه مانبيش نعيش بدونه ليلى انتي تعرفي شن صار فيا بلاه صح ؟ تعرفي كيف حياتي كانت تعرفي كيف تعذبت عشان وصلت فيه
ليلى تبكي وتمسحلها في دموعها >> مرام ماما مقهوره عليك شوفي كيف تبحت فيك ماتخوفينش ، صبي معايا صلي وتريحي واغسلي وجك
صبيت ومش قادره نصبي ، طحت من طولي اول ما صبيت ومعش شفت ولا حاجه قدامي !