رواية انكسار انثي
الفصل العاشر10
بقلم نوسه حمد
انتظرت حمزه لمن جا ودخل البيت معاهو امو وبقيت مراغباهم هل ح يطلعو ولا ح يبيتو في البيت وبقيت قاعده لغايه م انتظرتهم طلعو وكانت عندي نسخه من المفاتيح شلتها في يدي قلت بعد افوتو حتي ادخل البيت عشان امو م تقول ليهو سرقتك مشيت فتحت البيت وبقيت مخلوعه حمزه اجي راجع مشيت شلت أوراقي واوراق بتي ولقيت حمزه م شال دهبي فتحت الدولاب وقلبتو ف الارض وشلت دهبي وقروش حمزه لاني كنت عارفه محل بخت القروش وين وشلت الطبل جدعتهم ف الشارع ومشيت والدنيا بقت ليل وم عارفه قوه القلب دي جبتها من وين بس كل م اتزكر رد الناس ف الاستشاره الكتبتها نهاي قلبي م بحن علي حمزه بس لازم اسوق بتي بي اي فهم واسوقا بي طريقه احرق بيها قلب حمزه واخليهو يتحسر لانو هي نقطه ضعفو واظنو لو ولد غيرها ميه بت م ح احبهم زي م بحب منه وكان متعلق بيها شديد اتزكرت امي متهوره لو قامو اتصلو عليها ح تبلغ فيهم وانا م دايره كده لقيت لي ولد صغير سلمت عليهو وحسيتو خاف مني عشان النقاب قلت ليهو عاين م تخاف انا بت ناس والخلاني اتخفا ورا النقاب م قناعه بالنقاب بس خوف من المجتمع لانو مجتمعنا ظالم وما دايره زرل يعرفني حسيتو برضو خايف قلت ليهو اسمعني انا م دايره اضرك ولا اي شي بس عاوزه تلفون عاوزه اتصل طوالي اداني ليهو شلتو اتصلت علي امي وفتحت الاسبيكر عشان الولد يطمئن اتصلت امي ردت قلت ليها يمه انا نسيبه قالت لي مالك قافله تلفونك اديتيني كلام وم تابعتي لي قلت ليها يمه الكلام كتير وم بخلص بس افهميني ومن غير كوراك وساعديني بالسكات بس وانا عملت دا كلو وعارفاهو غلط قالت لي سجمي عملتي شنو الغلط قلت ليها يمه انا هربتا وجدعت بتي لي حمزه امي قعدت تكورك قالت لي احمز قلبك ي ابجضوم انتي قايله حمزه بشتغل بيك م بقول هامله بس البتهرب من راجلها دايره تجيبي لي الكلام انتي هسي وين انا هسي بجيك قلت ليها يمه اسمعيني للنهايه وتاني اتكلمي عشان انا في شارع والتلفون دا حق ولد افهمي كلامي وشوفي المصيبه الانا فيها قالت لي اسمع شنو ي بت اوعك تقلي علي ادبك ارجعي بيت راجلك قلت ليها يمه انا لو قفلت ح تتحسري على صحي صحي قالت لي اوعك قلت ليها يمه حمزه داير اعرس انفال قالت لي بت عمتك قلت ليهاا اي يمه وكمان الليله محنن وانا لازم كان اقطع قلبو بس انا م دايره منك شي غير انك م تخافي علي وخليك واثقه فيني انا غلط يمه م بعملو بس لو م ضوقتا حمزه الحنظل ابقا م اسمي نسيبه وابشرك يمه حبي لحمزه اتحول لي كراهية اها كده ان شاء الله انتي وامو تنبسطو قالت لي يعني انتي مفتكره انو دا بعجبني لا والله وبعدين انتي تعالي هنا القال ليك اتصرفي كده منو ودي شنو قوه القلب الاتعلمتيها دي قلت ليها دي علموني ليها الناس موش انتي علمتيني الانكسار والنويح ع ابسط الحاجات قالت لي سجمي البت مهما كانت مكسوره جناح قلت ليها انا لا اتغيرت وبكسرك جناحهم حتي ارتاح وحرقه رحمي الاتشال بنتقم منهم واحد ورا التاني امي قعدت تكورك لمن قفلت الخط قلت للولد احظر رقمها وشكرا ليك قال لي دقيقه انتي من وين وريتو انا ساكنه وين قال لي انا سمعت كلامك وفهمتو بس مهما حصل ليك بتك م تخليها وتاني شي م تتغيري خليك بت ناس انتي مفتكره لمن تكوني بت ناس معناتا انتي انكسرتي لا بالعكس قلت ليهو انا كنت زيك كده ونفسي فهمي بس انا ادمرتا دمار م بعدو دمار راجلي اعرس بت عمي واكون في عصمتو لا وكمان في بت عمتي عمتي المقاطعانا قال لي ما صاح منو وانتي م صاح منك تهربي قلت ليهو انا م صاح مني انكسر تاني لي زول كسرني انا البتتكلم معاها دي اتغيرت ولازم اخد حقي واخلي حمزه يتحسر وودعتو قلت ليهو انا ماشه قال لي انتي مجنونه ماشه وين في الليل دا ح تخسري نفسك قلت ليهو اعمل شنو بتصرف ااجر لي غرفه في فندق قال لي لا ارح معاي قلت ليهو لا لا قال لي انا شهاده عربيه وقاعد في بيتنا براي قلت ليهو اي انا اتغيرت بس انا عندي حدود لي كل شي انت ولد م بقعد معاك بكره نبقا ونسه ف المجتمع قال لي م تخافي انتي اختي وزي م انتي بت جزيرة انا ولد جزيره وانتي عرضي ولو قلت ليك بخليك في الشارع اكون كذبت عليك واحسن ليك انا عرفت قصتك ومستعد اساعدك بس انتي وافقي قلت ليهو طيب ومشيت معاهو بيتهم وفعلا كان براهو وشكلو محترم شديد قال لي اجيب ليك اكل قلت ليهو لا دخلت غرفه جاب لي صلايه وقال لي لو خايفه مني اقفليها بالمفتاح خليتو طلع وقفلتها بالمفتاح وكنت خايفه بس نهاي الولد م جاني وانا الليل كلو م نومتا بس اخدت لي نومه قبل الصبح صلاه الصبح طق لي الباب قومتا مخلوعه قلت خلاص انا دمرت نفسي ومشيت ارجف جنب الباب قلت ليهو انت منو قال لي انا علي قلت ليهو علي منو قال لي الجابك امس قلت ليهو داير شي قال لي لا لا قومي صلي اطمئنيت وقومتا اتوضيت صليت وبقيت ادعي ربنا يحفظ لي بتي تاني طقا لي الباب قال لي الشاي جاهز وفي قروش ختيتن ليك ف الطربيزه وانا شغال جامعه فتحت االباب صبحت عليهو قال لي دا رقم دلفري اطلبي اكل وديل القروش انا ح امش الجامعه قلت ليهو ربنا يوفقك ان شاء الله قال لي امين اها ح تعملي شنو قلت ليهو ح انتظر حمزه يرجعو البيت وعندي فهم ح اعملو قال لي تمام قلت ليهو شيل ااقروش انا عندي قروش قال لي لا انتي ضيفتي ودا واجبي وطلع شكلو ولد محترم قلت ليهو بتقرا شنو قال لي طب قلت ليهو ان شاء الله حال منه بتي قال لي منه بتك قدر كيف قلت ليهو في اوله قال لي نصيحتي ليك م تخلي بتك وانا بساعدك قلت ليهو طيب تعال بعدين بفهمك انا ح اعمل شنو قال لي تمام
نهايه اليوم علي جا وجاب لي اكل معاهو وكان محترم شديد معاي وهو اصغر مني بكتير بعد اكلنا قلت ليهو انا بعدي اسبوع معاك وح امشي اخطف بتي قال لي انا بساعدك قلت ليهو تمام
بعد اسبوع علي ساقني بي عربيتو ووقفنا قدام مدرسه منه لمن طلعو وصفتها ليهو وعلي نزل شافا وجا كلمني انا نزلت ومنه من شافتني جاتني جاريه طوالي سكتها وبتاعت الترحيل كانت تركب في الطلاب وكانو كتار وهي كانت واحده المشرفه سوقتا بتي وركبنا في عربيه علي وبرضو بتاعت الترحيل شكلها م فقدتا ولا ركزت مع الجوطه وفاتو...
