رواية انكسار انثي
الفصل الاول1
بقلم نوسه حمد
زي الساعه ١٢ مساء وفي عز نومي جاتني صحيه وحسيت بوجع ولاده وكنت بكريه واصلا م بعرف للولاده شي بسمع بتفاصيلها والم الولاده سمع وكنت خايفه من اللحظات دي موت وكنت متجرسه شديد المهم انا من النهار كنت بحس بوجع ضهر وم ركزت شديد مع الموضوع لاني اصلا ي دابي ف نهايه السابع ومواعيد الدكتور بعيده صحيتو من النوم قام مخلوع قال لي نوسه فشنو قلت ليهو انا
دايره الد قال لي انتي مجنونه تلدي شنو انتي ي دابك في السابع قلت ليهو حمزه اقسم بالله انا دايره الد قال لي انتي التهأيات دي م عاوزه تروح من راسك وبعدين نحنا قبل اسبوع جينا من الدكتور وقال ليك بعد شهرين حتي تلدي قلت ليهو عندي مغص ووجع ضهر قال لي بكون من الحمل كدي حاولي نومي والصباح بوديك مركزنا هنا يكشفو ليك قلت ليهو لا لا قوم هسي قال لي نوسه انا جيت امس من الخرطوم وتعبان شديد ومصدع وكنت مدروش في الشغل ابلعي ليك مسكن خلي الالم يروح وبكره انا بدري بوديك الدكتور قلت ليهو سمح
قلت انا من حملت كل يوم اتشكا ليهو وادلع فيهو النسكت حبه عشان م يكرهني ورقدتا بس النوم نهاي م جاني وجع ضهر وروحي عاوزه تطلع حاسه بيها😢 بقيت احسب في الدقايق والساعات عشان الواطه تصبح وهو شده م تعبان اول مره اسمعو يشخر فتحت النور م حسا بي ولا انقلب وطلعت ودخلت فيهو ميه مره وغلبني ارقد والزمن ماشي بطي ووجعي ماشي ازيد وبقيت خلاص م قادره صبري كمل ولمن عاينت لنفسي في المرايه لمن شكلي اتغير وزاد خوفي زياده والوجع ماشي ازيد رقدتا في سرير الصاله غلبني ارقد مشيت اتوضيت وصليت والوجع ماشي ازيد واشحد في الله م الد لانو انا في السابع وبتنا الفي بطني كنا بنحسب ليها في الأيام م نفسي تضيع مني في لحظات رقدت في الارض وبرضو غلبني وقلت م بتصل علي امي اخلعا النستحمل الالم لمن الصباح يصبح غلبتني الرقده دخلت جوه لقيتو في سابع حلمه وحسيت نفسي لمن كتم صحيتو قلت ليهو حمزه اقسم بالله م قادره وبقيت اكورك قام مخلوع وانا حاسه اني خلاص ح اولد براي قال لي دقيقه النمش اصحي امي مشا صحا امو وجات قلت ليهو ارح دور العربيه نمشي المستشفى امو قالت لي مستشفي شنو وانتي بالحاله دي تقومي تلدي لينا في الشارع قلت ليها لا لا لا بس انا خايفه م بلد هنا قالت لي كدي هسي نفهم البحصل شنو وارح نجيب الدايه انا مسكتو من يدو قلت ليهو حمزه لا لا اموت ليك انت عارفني انا بخاف قال لي اعمل شنو انا امور النسوان دي م بفهم فيها وخايف اسمع كلامك وادور عربيتي نمشي وتلدي لينا في الشارع والدنيا ليل قلت ليهو اي خليني الد في الشارع قال لي انتي مجنونه وانا كنت بكورك شديد في ثانيه لميت الجيران وجابو الدايه قالت لي دي حاله ولاده ماف طريقه تطلعي من هنا انا بولدك والطفل ودوهو حضانه قلت ليها لا لا مستحيل امو هرشتني قالت لي ي بت بتكتلي لينا البت دي وانا بقيت تحت رحمتهم وولادتي كانت متعسره شديد والدايه النوع البتهجم داك شكلها قطعت فيني شريان ولا مصيبه ومن لحظه ولدتا النزيف م وقف لمن اسعفوني الخرطوم وهناك دخلو بتي حضانه ودخلوني عمليه مستعجله وللاسف استأصلو لي رحمي..
