رواية قطعة من الجنة
الفصل الثاني2
بقلم سبا النيل
بقيت قاعدة والباب بدق ابوي قام وفتح الباب جاني صوت طاغي كدة قال السلام عليكم قبلت على الباب لقيتو حضرة سيادتو زاتو .. جا داخل سلمنا على بعض وقعدنا وبقو بتكلمو بقولو في شنو ما عارفة... كان طويل ومعضل وشرايين يدينو ظاهرة لابس قميص بني ومكفكف يدينو بقيت اقول هييي يا وعد تقومي تقلي أدبك يديك كف واحد يواسي بيهو وشك ... تاني قلت انا مالي ومالو الليلة كما خليتو يطلقني ويشهد اني مجنونة ما برتاح آخر الزمن يعرسو لي واحد ما بعرفو ... بقيت احمر ليهو لمن عيوني وجعوني وهو حالف ما يعاين لي .. فجأة وقف على حيلو ومن هيبة الوقفة انا لمن وقفتة معاهو .. ابوي عاين لي وقال مستعجلة مالك أسي قال ماشي يجيب العربية من الشارع وجاي .. قلت ليهو لالا يا ابوي لكن ... قاطعني قالي خلاص بطلي كلام امشي يا ولدي جيب العربية عشان ما تتاخرو .. طلع طوالي ولا عاين لي .. قلت لأبوي نتأخر عن شنو وكنتو بتقولو في شنو انتو .. قالي سرحانة وين انتي قال ح تطلعو تتغدو سوا وتعرفو بعض كويس عشان ما تنقي كتير .. يعني الجامعة ما امشي .. لا .. لكن .. اداني عين لمن عرفت حاجة .. شوية وجا راجع قالي نتوكل؟ عاينت ليهو بطرف عيني وطلعت قدامو ركبنا العربية
ومشينا أقرب مطعم نزلنا وقعدنا بقيت احمر ليهو وارفع في حواجبيني زي المتخلفة وهو كان شغال في تلفونو وفجأة ضحك براحة وقالي بطلي تخلف ... ياداب استعدلت ليهو تمام وختيت يدي في الطربيزة وقلت ليهو .. بالله يعني انا المتخلفة طيب دة شنو التخلف والعوارة العملتوهم بدون اذني أمس ديل ولا حلال عليك وحرام علي انت يا أخينا انا بتكلم معاك جاوبني ما تعاين لي كدة دي عشوائية بس ما اكتر وانا ما موافقة والزواج دة باطل .. قالي كدي استهدي بالله واستغفري خلينا نتفاهم .. قلت ليهو نتفاهم بعد شنو يا بارد انت بعد ما الفاس وقع في الرأس .. قال بنفس النبرة لا إله إلا الله محمد رسول الله اللهم صل وسلم على محمد .. اسمعيني طيب قلت ليهو ما بسمع اي شي وتطلقني أسي دي .. الضحكة غلبتو ابتسم ومسح وشو بي يدو كان لاب مسبحة إلكترونية وشكلو متدين .. قالي يا بت الحلال استهدي بالله طيب كل شيء مكتوب ومسطر والمكتوب كلو ح يحصل ما تستعجلي على حاجة .. الصراحة سكتني استعدلت في الكرسي وبقيت بشرب في الموية .. قالي نطلب اول؟ قلت ليهو اتوكل.. نادى الجرسون طلعت بت مجرد ما وقفت قدامو نزل عيونو وهي بقت مبحلقة فيهو
