رواية انكسار انثي
الفصل الرابع4
بقلم نوسه حمد
امي ونسيبتي اتشاكلن وماف واحده متنازله للتانيه كان علي امي موجوعه لي الحصل لي وم قادره تتقبلهم لانهم هم البقو لي سبب ونسيبتي م راعت لي اي شي م راعت لي لمن قلت ليها خلي حمزه يوديني المستشفى وهي النهرتني وقالت لي ماف مستشفي الوقت متأخر واسلوبها كان همجي شديد وبعد دا كلو في عز وجعي بتقول البتغلبا الولاده بنعرس فيها ع الاقل كانت تصبر ابقا كويسه واقوم وانسا الحصل لي وبعد سنين تعرس لي ولدا وي ربي حمزه ح يسمع كلاما وح يعرس فيني؟ خليتن اكوركن وشلت بتي وطلعت قعدتا برا الصاله قلت النشوف نهايتهن شنو م قدرت اتحمل كلام نسيبتي وبقيت مصدومه اتصلت على حمزه قلت ليهو تعال سوقني قال لي مالك فشنو بسم الله في زول اتكلم معاك قلت ليهو لا لا مشتاقه ليك بس قال لي وانا كمان والله قلت ليهو وانا اصلا تميت الاربعين بعد كده احسن نتلما عليك عشان انت بتكون محتاج لي في البيت قال لي اي والله من يوم ولدتي بيتي مسخ لي من دونك م سمح انا هسي بتحرك اجيك
رقدتا برا امي جات قعدت جنبي حست بي م كويسه بعد كلامن ونبزهن لبعض قالت لي اعفي لي م رديت عليها لانو كنت تعبانه نفسيا وامي المفترض تكون امان من يوم حصل لي الحصل هي م سكتت قالت لي عارفاك زعلتي مني بس انا قلبي مقطوع ونسيبتك تتفاصح للان قلت ليها يمه نسيبتي خليها راعي لي حمزه قالت لي حمزه اطير قلت ليها شكرا يمه قالت لي ي بت انتي دايره تجنيني صاح قلت ليها اجننك كيف قالت لي ديل ارتكبو فيك جريمه انا هسي لو دايره امش اشتكيهم بشتكيهم قلت ليها تشتكيهم عشان شنو وريني قالت لي اي ليه اجيبو ليك دايه ترتكب فيك جريمه قلت ليها يمه دا قدر انتي م بتعرفي القدر قالت لي بعرفو القدر وقدرك ي بتي شين م اتكلمت معاها لانها خلاص طممت بطني من الدنيا دخلت طلعت شنطتي ورجعت ملابسي فيها وملابس بتي دخلت الحمام استحميت ولبست بتي ولبست لي عبايه اتصلت عليهو قال لي انا قربتا للحله دايره اغشا السوق اجيب ليكم حاجات قلت ليهو تمام امي جات لقتني لابسه ومستفه شنطي قالت لي سجمي فشنو قلت ليها ماف شي ماشه مع راجلي بيتي قالت لي بيت شنو ي بت قلت ليها ربعين ربعنتا في المستشفى تاني في شنو قالت لي لا لا ماف شي بس م تمشي مع راجلك دا قلت ليها ليه م امش بمش والله قالت لي انتي هسي قادره تعيشي معاهم بعد العملو فيك دا قلت ليها يمه دا قدر اعمل شنو انا دايراني اطلق ولا شنو قالت لي اي تطلقي احسن ليك تقعدي هنا معاي من نسيبتك كل مره تطاعنك في الولاده وتقول ليك دايره اعرس لي ولدي قلت ليها يمه هسي انتي بتطمني فيني ولا بتشيلي فيني في هم للسنين الجايه يمه انا خلاص والله كرهت الحياه واليوم العرست فيهو لا انتي دايره ترحميني لا المجتمع ح يرحمني بعدين انا امش وين وراجلي البحبو عاوزين تكرهوني ليهو وعاوزنو اكرهني صاح قالت لي يختي ماف زول قال ليك اكرهيهو حبي واشبعي بيهو انا مالي حارقه دمي قلت ليها لا لا انتي دايراني اطلق موش قالت لي راحتك يختي واسمعيها مني لو طال الزمن لو قصر ح تطلقي وح اعرس فيك انا قعدت ابكي حتي حمزه امي دايره تكرهني ليهو حمزه جا داخل شال بتو سلم عليها ولقاني ابكي قال لي مالك قلت ليهو م كويسه اتصرف م توديني بيتكم قال لي طيب نرجع الخرطوم ااجر شقه شهر بعد تبقي كويسه نجي راجعين امي سمعتو قالت ليهو البت دي من هنا م بتسوقا بدل تجدعا لي بعدين مكسوره اجدعا لي من هسي وطلقا......
