رواية انكسار انثي
الفصل الثامن8
بقلم نوسه حمد
تلفون حمزه كان بتصل جنبي وهو كان في الحمام عاينت للمكالمه لقيتا من احمد ختيت التلفون وم ركزت معاهو بس المكالمات كترت وفي اثناء انا م شايله التلفون جات رساله مكتوب فيها حبيبي دايره اسمع صوتك قبل ما تمشي لنكير ونكير طبعا شكلي دي انا🙄
والرساله من الرقم المكتوب عليهو احمد طبعا انا م انخلعت ساي وبس انا حاسه انو شرياني الرئيسي انسدا وقلبي م حاسه بيهو وراسي تقل صدمه م عرفتها ح انجلط م عرفت وبقيت منططه عيوني وبسال في نفسي ي ربي دي منو ومعقوله بعد السنين دي كلها تكون بت خالتو وبت خالتو الشافتا عيني دي م اظنها تكون كده وغير دا كلو ي ربي معرسها ولا دي بت بخوني معاها ولا دي منو وبقا في راسي الف سؤال ولو سألتو ح ينكر وم بعيد يمسح الرقم ويكلمها اني عرفت وتعمل حسابا يعني م ح اعرف الحقيقه فلازم امسك نفسي خاااااالص لمن افهم القصه شنو وكرهتو شديد م نفسي اتكلم معاهو بس اعمل شنو مجبوره امثل عليهو لمن افهم القصه المهم مسكت نفسي للنهايه وحمزه تلفونو من يدو م بفكو وحاولت اقعد جنبو عشان احفظ الرمز وكان مسجلو بي رقم تلفوني قلت لازم م احسسو اني دايره افتش وراهو واصلا انا م حصل شلت تلفونو نهاي
والمحيرني حمزه م اتغير مني بالعكس اهتمامو ماشي زايد بس الشي الحيرني البت تقول علي نكير ليه معناتا حمزه منبزني ليها اتمغست منو شديد قلت م مفترض انبزني ليها لاي سبب من الاسباب وبقيت محتاره والتقول هو حاسي بي اني ح اشيل تلفونو لو م نومني ما نام
وانا م صحيت الا الصبح لقيت التلفون ف الطربيزه وطلعت المطبخ وبقيت ارجف فتحت التلفون وفتحت الرسايل لقيت بينهم قصه غرام وشكلهم بعرفو بعض شديد والشي الحيرني البت دي بتعرفني وبتعرف تفاصيل حياتي ولو دي بت خالتو م بتعرفني معناتا حمزه بخوني ودي ما داير اتزوجها قلت لازم اعرف البت البتعرفني دي منو حفظت الرقم وقبل م اقفل تلفون حمزه دخلت الواتس
بتاعو ويا ريتني م دخلتو فعلا شكلها البت دي داير اتزوجها ولقيت صورها وبت صغيره تكون عمر ١٥ كده يادابا داخله الجامعه وقدر م عاينت للبت شكلي بعرفها وغلبتني قلت تكون من بنات حلتهم جريت جري جبتا تلفوني صورت الصوره بتاعت البت وبقيت اقرا في الرسايل لي درجه انهم اشترو الشنطه وحددو العرس بعد شهرين والمغسني كاتبه ليهو لازم تتحنن وتعمل لي حفله ونمشي شهر العسل جزر المالديف انا انحرقت منها الحفله الما لقيتا انا وجزر المالديف الما مشيت ليها انا تجي بت الحرام دي تقول ماشه ليها غلبني البعملو بس اتزكرت مرت مدثر اخوهو قلت لازم اصل ليها عشان افهم الحاصل منها وانا متاكده م ح اطلع منها بي نتيجه لانو شكلو الموضوع دا عاملنو بالسر عشان انا م اعرف بقيت افكر لازم اصل لحل اتزكرت امي رغم انها ح تعمل لي موضوع بس هي الوحيده الحا تقول لي الحقيقه
اليوم داك منتظراهو بفارغ الصبر يطلع وعملت ليهو الشاي سريع سريع شغل كلفته عشان اطير من وشي لاني كنت حاسه ح اكتلو بس م بتهور عشان منه بتي وهي كانت ممتحنه لبستها وطلعتها وجيت مسكت تلفوني اتصلت على امي قلت ليها يمه دايراك في موضوع قالت لي خير ان شاء الله قلت ليها بس من غير م تنكدي علي عشان انا خلاص فاض بي قالت لي قولي قلت ليها افتحي الواتس انا برسل ليك صوره بت م غريبه على شكلها من بنات اهل حمزه غير بت خالتو ديك قالت لي مالا قلت ليها بتتصل وبترسل لي حمزه راجلي قالت لي انا م كلمتك انا قلت ليك بعرس فيك قلت ليها اها خلاص دايره تكرهني اليوم الكلمتك فيهو قالت لي سمح رسليها انا بسال جارتهم البتجيب لي الشمارات منهم قلت ليها لكن من غير م تحسسيها اني عرفت شي قالت لي سمح قفلت منها ورسلت لي امي الصوره امي اتصلت على مخلوعه قالت لي ي بت انتي متاكده البت دي بترسل لي حمزه قلت ليها اي ي امي اقسم بالله متاكده وحفظت الصور وقالت لي يا الغبيانه دي م عرفتيها منو قلت ليها دي منو يمه انتي عارفاني طولت من الناس وبعدين البت دي شكلها صغيره م بستحضر شخصيتا وانتي عارفاني انا انقطعت من الناس من رحلت وانا اصلا زمان م اجتماعيه اهلي م بمش ليهم قالت لي ناس شنو دي لحمك ودمك ي بت..
