رحمه...بعد ماطلع همام تقرببا بساعه طلعت ورا
واجرت سياره خصوصي
طول ماالسياره تمشي اني ادعي كل الي ابالي يطلع
حلم لان همام أملي الاخير
اذا انصدم بي راح اضيع حياتي نهائيا
معقوله عنده علاقه بمروه
مروه مو غيره
ياربي ليش هاي الانسانه ماعدها اخلاق ولا شرف ولا مبادى
وكلشي الي تريده تحصله
واني ابد ماغلطانه بحق اي احد
ويتيمه ومسكينه
كل الاشياء الحلوه جاي اضيع مني واني واكفه اتفرج
من كد التفكير بهاي الشغله
نسيت اني بلسياره
الحد ماسمعت السايق يكول من هذا الفرع
انتبهت واصلين الفرع بيت خالي
جمانه السعيدي
رحمه...اي منا اطلع
السايق...انتضرج
رحمه....هااا لا ارجع ويااا زوجي
نطيته أجرته وبقيت واكفه بمكاني
اتندمت ليش اجيت مااريد همام ينزل من عيني
مااريد اشوف شي مايرضيني
بقيت واكفه اكثر من عشر دقايق واكفه بلباب
مااعرف ادخل لو ارجع
ارجع وانسى كلشي واعيش وخلاص
لو ادخل واريح كلبي وعقلي واعرف الحقيقه شنو
لا خل ادخل اعرف نفسي مستحيل ارتاح اذا مااعرف الحقيقه شنووو
دكيت الباب وكلبي كام يدك على السربع
عبالك جاي اركض مو واكفه بلباب
فتحت الباب عمتي ومن شافتني انصدمت
بقت واكفه وماحجت اي شي
رحمه...شلونج عمه
عمتي...شجابج
رحمه...ليش اكو شي
عمتي ...هااا لا ماكو شي
رحمه...خلص خل ادخل اجيت اشوفكم
دخلت امشي وادور بلبيت لعد همام وين
عمتي ...همام مااجه
راسا اتجهت على الدرج وصعدت
عمتي...اوكفي رحمه خل افهمج رحمه اوكفي
كبل الغرفة مروه وفتحت الباب
وياريتني مافتحته ابد
منضر ماينحجي ابد يمكن بهاي اللحظه لو احد ضاربني طلقه جان ماحسيت بلالم
من الصدمه متت الف مره واني واكفه بمكاني
همام ومروه بوضع معاشره
التفت عليه همام وصاااح هاي شجابج
رحمه...اجيت اشوف زوجي حبيبي ويامن يخوني
يعني مالكيت غير هاي الساقطه تخوني وياها
انت شنو من بشر بس فهمني
مروه...ماغيرج الساقطه مره وزوجه بغرفتهم انتي شدخلج
باوعت علي وكتله جاوووب كلامه صحيح احجي خل اسمع صوتك
جمانه السعيدي
طفر من مكانه ولبس ملابسه وهو يكووول خل افهمج
رحمه لا تتهورين
رحمه...لا عليمن اتهور انت جاي تذبحني بسجينه بارده وتكول افهمج
اي اني واكفه فهمني صحيح هاي الزباله زوجتك
وهي طفرت عليه
ماكو غيرج زباله امشي اطلعي برا
اطردها يله اطردها برا انت عليمن صابر عليه
وحده ماتخلف ومامنه اي فايده
بقيت اباوع على همام اريد أبين اني قويه مااريد دموعي ينزلن اريد ابقه رافعه راسي الاخر لحظه
همام بقه ساكت واني نزعت الحذاء تكرمون وطفرت عليه
لان اني متحملته من زمان
وهي شبه بلا ملابس وكاعده على الجربايه
وضربته على راسه للحذاء
اني صرت فوكه وكمت اضرب بيه بقوه
وهي خرمشت وجهي
همام يريد يشليني منه مايكدر
كلبي محمل عليه من زمان واريد افوخ كلبي بيه
كوه شالني همام منه جبت خصله من شعرها بايدي
همام شألني ونزلني جووا كبل
وهي نزلت عليه فشار وغلط ومسبه
لبست ملابسه ونزلت وراي
علاوي من سمعنا نتعارك كام يبجي عمتي اخذته ودخلت بغرفته
جمانه السعيدي
حسيت اكو حراره بوجهي خرمشتني باضافرها وطلع دم من وجهي
همام...كافي اسكتي فرجتي علينا الناس
رحمه...طلكني مادام اختاريت هاي وزوجته طلكني
مروه...اي طلكه خل تولي اصلا ليش باقي عليه
ماتخلف ومامنه فايده
باقي بس تصرف عليه عليمن
طلكه واشمرها بلشارع هي هاي مال شوارع مو مال واحد يحترمه ويقدره
رحمه...ماغيرج تربية شوارع هو اصلا مايصرف عليه كاعده بيت اهلي واصرف من راتبي
مروه...اي ولي اطلعي هو مامحتاجج بحياته
رحمه...اني طالعه وبعد مااريد اشوف وجهك ابد طلكني
فهمت لو لا ابقه اشبع بيه
ياسبحان الله ثوب ومفصل عليك
اخذت جنطتي وطلعت بس درت وجهي نزلن دموعي
مالتفتت عليهم مااريدهم يشوفوني ابجي ابد
طلعت امشي بعصبيه ودموعي شلال
احس راسي راح ينفجر من العصبيه
يمكن ضغطي صعد
لكيت السايق الي جابني بعدا واكف يدور كروه
صعدت بلسياره وكتله اطلع رجعني منيين ماجبتني
هو بقه متفاجئ مني
ومن عصبيتي باوع عليه لكاني ابجي
هو كال ليش تبجي
واني انفجرت بلزايد كمت ابجي بصوت عالي
مشه شويه ونزل جابلي بطل مي
انطاني وبعد ماحجه اي شي
طول الطريق واني ابجي
ليش همام ليش هيج
ليش مو اني احبك
ليش تخذلني
منو اليه بعد الدنيا صارت سوده بعيني
ليش ياربي حتى الحيوانات عدها اطفال
لو منطيني واحد جان حافظت على بيتي وعلى زوجي
يعني اني مامقسوملي ارتاح
همام يبيعني علمود هاي
وهو يعرفه ويعرف اخلاقه
ماحسيت غير وصلت للبيت طلعت الكروه ولله مااشوف هم الدنيا صارت مغرب وهم دموعي مايقبلن يسكتن ابد
السايق...خليهن عمي الله يساعدج مبين واكعه بمصيبه
مااعرف شكد انطيته زياده او نقصان مااعرف
دخلت للبيت
وانفجرت بلزايد الطم واعيط
ولج يمه تعاي وشوفي بنتج
ولك يابه تعال وشوف حالي
ليش عفتوني وينكم شوفوني وحدي
حتى همام اتخلى عني
بقيت وحدي وماعندي سند ووين اروح
المن انطي وجهي
اريد اموت واروح وياكم ليش عفتوني
اتمددت بلكاع واحس الدنيا تفتر بيه
ماكمت من مكاني ابد الحد ماتعبت وفحطت وسكتت وحدي
الي مثلي منو اله يطبطب عليه والمن تشكي حاله
لو خالي موجود جان وكف وياي
يمكن اني صحيح فكر ليش كل الناس الزينه بحياتي تتخلى عني
نمت بلكاع وماكمت من مكاني
وعيت على الباب يندك
فتحت عيوني بسبعه الصبح
هذا الوكت كله واني نايمه بلكاع اريد اكوم مااكدر اعضامي عبالك مكسره
الباب بقت تندك حيل
كوه كمت حتى صوتي رايح من البجي واحس راسي يوجعني
رحمه...بصوت مبحوح منو
خالتي...اني رحمه يمه افتحي الباب
اني فتحت الباب وهي كالت شبيج واني حضنته ورجعت ابجي خاله همام ازوج مروه
خالتي...اعرف هو همام اتصل بيه وكال انتي تعبانه ووداني اللج بليل ماكدرت اجي
هسه كعدت من الصبح واجيت
رحمه...خاله تقبلين همام يزوج عليه
خالتي...وشنو همام اخر رجال بلدنبااا صحتج اهم
عوفي خلي يشبع بيه وتشبع بي
اصلا هو مايستاهلج
انتي احلى وأطيب بنيه وتستاهل احسن واحد
وهسه انتي تبجين على همام
كومي ادخلي اسبحي وبدلي جبتلج ريوك يخبل
كيمر عرب وكاهي
اليوم اني ابقه يمج مااعوفج ابد
همام شنو همام وتبجين علي
جمانه السعيدي
كومتني خالتي دخلت الحمام وسبحت وطلعت بدلت
وكعدنا نتريك اني وياها
رحمه...اني بعد ماارجعله اريده يطلكني
خالتي...ارتاحي كم يوم وبعدين قرري انتي الوحيده الي تكدرين تقررين تبقين ويااا لو تعوفينه
اطلبي اجازه من الدوام
تردين نروح اني وياج للزياره ونغير جوو
تردين تجين وياي البيتي
اطلعي من هذا الحزن وصيري قويه
ولا تخلين همام اكبر احلامج بهاي الدنيا
همام عافج وراح يدور مصلحته
انتي هم شوفي مصلحتج وين وامشي وراها
بعدج زغيره والعمر كله كدامج يروح همام يجي الف همام
بقت خالتي يمي طول النهار تسولف عليه
وتخفف عني الحزن
بس اني اجذب اذا اكول هديت
منظرهم كدام عيني مايروح ابد
اكثر شي قهرني موقف همام الي ماطيب خاطري
ولا لحكني من طلعت
ولا دافع عني وهي تغلط وتفشر وتعير بيه
ليش هانت على العشره بسرعه
ليش اتخلى عني
وهو يعرف اني مالي احد غيره بهاي الدنيا
ومتاكد اني احبه اكثر من نفسي
