الفصل الاخيربقلم جمانه السعيدي
رحمه...خالتي ماقبلت تعوفني ابد بقت طول النهار يمي
وحتى بليل اتصلت بزوجه وكالتله اريد ابقى يم رحمه
مريضه وماتكدر
ثاني يوم اخذتني للزياره
بلاول رحت الاهلي والخالي
كعدت وملخت نفسي وكمت اعيط
ليش هيج ليش عفتوني
همام عافني وتخلى عني اخر واحد جنت اتوقع يعوفني همام وين اروح وشلون اعيش
الحياة صعبه واني بعدني زغيره
ليش الدنيا تلطم بيه
ماعندي اهل ولا عندي احباب
واعز الناس نامو جو التراب
بقه بس الجرح والجرح ماطاب
ماعندي اهل ولا عندي احباب
واعز الناس نامو جو التراب
جمانه السعيدي
تعبت من البجي كلش رحنا أجرنا فندق اكبال الامام
ورحت زرت وشتكتيت للأمام علي من ضلم الزمن
وقهر الاقارب
وبعدين رحنا الكربلا زرنا وبقينا يومين ورجعنا
خطيه خالتي لا تكدر تعوفني وحدي وهي تشوف حالتي صعبه
ولا تكدر تبقى يمي بيته وجهاله وحدهم
رحمه...خاله روحي اني ماعليه شي لاتخافين عليه
راح اتعافه من هذا الجرح واخذ ثاري من كل واحد ضلمني
ايكول المثل الضربه الي متكسر تقوي
وداعتج اله اخلي يندم ويرجع يتوسل بيه
اخذت اجازه اسبوع اسبوع كامل وهمام ماجاي ولا واصل البيت ولا كال خاف ماعندج مسواك
تحتاجين شي
لاتباتين وحدج خاف تخافين
سكت على اساس ينطيني وقت افكر
لان يعرف اني احبه
متوقع راح اهدء شويه وبعدين اقبل بلامر الواقع واسكت
جمانه السعيدي
رجعت للدوام بس ماحجيت اي شي كدام صديقاتي
كتلهم شويه ضروف وعدت
بعد هاي المشكله بعشر ايام رحت رفعت علي قضيه
طلاك وطالبت بكل حقوقي
لمن وصله البلاغ للبيت
بنفس اليوم اجاني جنت متوقعه جيته
سبحت وبدلت وتعطرت ولبست نفنوف قصير يخبل
دك الباب
رحمه...منو
همام...اني افتحي الباب
رحمه...مالك اي كلام وياي طلكني ودزلي ورقتي
همام...راح اسوي اي شي تردي بس افتحي الباب خل نتفاهم
رحمه...فتحت الباب شافني وتفاجئ
متوقع امبهذله وابجي وجوه عيوني اسود
وبس اشوفه احضنه وابقه ابجي
رحمه...تفضل احجي بسرعه ماعندي وقت
همام...هنا على الباب
رحمه...انت بلنسبه اليه رجال غريب اني رافعه عليك قضية طلاك
همام...تعاي عندي كلام مهم وياج واذا ماقتنعتي راح اطلكج
سحبني من ايدي ودخلنا جوه
كعد وكال اكعدي وخل نحجي ولا تقاطعيني من اكمل كلامي يله تحجين
جمانه السعيدي
همام...انتي تعرفين اني احبج
رحمه...هههه ههه هههاااي تحبني مبين
همام...لا تقاطعيني
مروه يوميه تهدد امي تاخذ علي وترجع البيت اهله وامي حيل متعلقه بعلي خصوصا واحنا ماصار عدنا اطفال
امي بقت تلح عليه ازوج مروه
حتى ابن اكرم يبقى بلبيت
وهم اني يصير عندي اطفال
امي كل يوم تعرض عليه هاي الغكره
رحمه...وليش ما اخذت رائي بهذا الموضوع على الاقل
اعرف راح تتزوج واباركلك
همام...اعرف مراح توافقين
رحمه...اي وكلت خليه على عمه عيونه وازوج من وراها
شلون راح تعرف
ومنهاي كثرت الروحات والجيات البيت اهلك
جمانه السعيدي
همام...مو كتلج اني انجبرت على هاي الزواجه
رحمه...ولله جذاب ماكو واحد يكدر يجبرك على الزواج
وليش مافكرت بيه
ولا فكرت بمشاعري
ليش دست عليه وعبرتني
وخليت وحده مثل مروه تتشمت بيه
انت ماكلفت خاطرك وطلعت وراي بيوم العركه
طلعت ابجي ومنهاره والدنيا مغرب وبيتنا بعيد
مافكرت تلحكني وتجبر خاطري ابد
اسمع هذا الكلام زين انت طحت من عيني
واني الي يطيح من عيني ادوسه وامشي
ومااتحسف علي ابد
لو روحي بي لو مااكدر اعيش من دونه ابد
همام...لا تصيرين انانيه اني من حقي اكون اب
رحمه...بلعافيه عليك صير اب الله يوفقك
يله مع السلامه ورقتي توصلني بأقرب وقت وكل حقوقي
فهمت لو لا عود خل مروه تفيدك
جمانه السعيدي
همام..انتي الي اختاريتي وباجر توصلج ورقة طلاكج
رحمه....تسوي عليه فضل لو هسه اطلكني وبعد مااشوف وجهك ابد
طلع وهو عصبي ويفور مامتوقع ردت فعلي ابد
اني سمعته طلع وطبك الباب واني رجعت ابجي من جديد
ابد مامتوقعه اني رخيصه عنده الهاي الدرجه
كنت متوقعه راح يتمسك بيه
ويكول اني احبج ومستحيل اعوفج ابد
انتي حبيبت حياتي واني راح اطلك مروه علمودج
بس هو طلع وكانما مامصدك
وفعلا ثاني يوم اجتني ورقتي للبيت
اني ماطلبت منه اي مهر لان غبيه وجنت احبه
وماردت اكلفه ابد
جان مبلغ رمزي جدا
دزه اليه هو ورقة طلاكي
لاحول يرجعني ولا دخل اي طرف يقنعني مع الاسف تنازل عني بكل سهوله
بس ولله حوبتي ماتنزل للكاع اني يتيمه وفقيره
ومروه جانت تحاول ويااا همام من اول زواجه
رادت تخون زوجها ويااا بس هو يحب اكرم ومانطها مجال
وهسه اجاها جاهز بدون تعب
خلت حجته علاوي حتى تاخذ همام
مااعتب عليه لان هي رخيصه
اعتب على همام الي تنازل عني بسرعه وركض عليه
اصعب ايام حياتي ومااكدر اجاوز هاي الازمه
ولا اكدر اطلع من حب همام
ست سنوات حب وثلث سنوات زواج
شلون اكدر انساهن واعديهن بسهوله
جمانه السعيدي
امشي مثل المريضه وماعندي واهس باي شي
ارجع من الدوام وانام ومااكعد اله بليل اكعد شويه وبعدين اخذ حبايه منوم وارجع انام
خالتي تجيني كل اربع ايام اجيبلي كم طبخه وياها
وتبقى يمي نص نهار وترجع الببته
البيت وحش عليه وحاسه بوحده مو طبيعيه
اكثر شي مضوجني احساس الخذلان
صعب تحب واحد وتتعلق بي ويصير اهم شخص بحياتك
وفجئه يتخلى عنك
ومايسئل عليك ابد رغم هو يعرف انت تحبه
مع ذالك يتخلى عنك بكل سهوله
جمانه السعيدي
فات اربع أشهر على طلاكي من همام
واني مااكدر افكر بغيره
هذا حب الزغر اصلا اني مااعرف احب غيره
وكل الرجال مو بعيني
بس شسوي على حكم الوكت الصعب
إلى أن اجتني خالتي بيوم وكانت ضايجه حيل
رحمه.... شبيج خاله حالج ماعاجبني ابد اليوم
خالتي...وضعج مضوجني حيل
رحمه ...شبي وضعي موضفه واستلم راتب خير من الله
وعندي رصيد بلمصرف
وعندي بيت ملك ابد ماناقصني شي
واذا على زواجي اعتبره تجربه فاشله ترا كل الناس
تمر بتجارب فاشله
الحمد لله طلعت بأقل الخسارات
خالتي..ليش ماتزوجين وتعيشين حياتج
رحمه...مااريد اعيد هاي التجربه مره ثانيه
خالتي...ليش ماتعيديه ترا همام عايش حياته بلطول والعرض ونساج للابد
وينتضر ابنه جاي بلطريق
رحمه..كمزت من مكاني شنو شنوو ينتضر ابنه من مروه
انتي متاكده
خالتي...اي الناس كله جاي تباركلهم حامل شهرين
رحمه...انتي متاكده
خالتي اي ولله متاكده قابل اجذب عليج
رحمه...الف الف الحمد لله والشكر هسه اكوم اهلل واركص
الله اخذ ثاري من همام
خالتي...شلون يعني اكلج زوجته حامل
رحمه..اي سمعتج الحمد لله والشكر
خالتي شبيج ليش هيج فرحانه
رحمه...لان همام عقيم واني رحت الأكثر من دكتور واكدولي همام مستحيل يصير عنده اطفال
نسبة حتى اقل من الصفر
خالتي...يااا شلون حبلت اذا همام عقيم
رحمه....خاله اليوم سمعت احلى خبر بحياتي
حيل حيل بهمام
فوكاها يكلي انتي انانيه اريد يصير عندي اطفال
مايعرف اني ضحيت بحلم الامومه علموده
همزين رب العالمين كشفه على حقيقته
خلي ياكل هذا المقلب المعدل
تمت