رواية عقيق إل دورادو الفصل التاسع عشر19 والعشرون20 بقلم منه ممدوح البنا
_أظن خطتنا ماشية زي ما أنتَ عايز يا ملك ضرغام!
قالتها زمرد وهي بتتقدم ناحيته بخطوات بطيئة متمهلة، كان واقف مكانه بيتأملها وعلى وشه ابتسامة واسعة لحد ما وقفت قدامه، فقال هو_كنت متأكد من قدراتك يا زمرد، حتى بعد ما فضلتي أعوام طويلة نايمة، مقدروش ينهوا قوتك
كان عاجبها الاطراء اللي بيرضي غرورها، فرفعت أنفها بكبرياء وقالت_ولكن أنا مش عايزة أي غدر يا ملك ضرغام، بمجرد ما الشعب يثور ويطالب بعزل الملك رسلان، المملكة هتبقى تحت حكمي أنا
فرد بابتسامة واسعة_متقلقيش، الملك ضرغام مبيرجعش في وعد قدمه، خاصةً لو الوعد ده كان ليكي يا زمرد
اتسعت ابتسامتها وهي شايفة نظرات الاعجاب اللي كانت ظاهرة على وشه، لوهلة زادت ثقتها بنفسها، في يوم من الأيام كانت هي عشيقته ولكن في السر، وكانت بينهم ذكريات كتير، لاحظت إنه اتقدم خطوة منها وهو ما زال مشبك إيديه الاتنين ورا ضهره، وجاب بعيونه على ملامحها وهو بيقول_لسة زي ما أنتِ يا زمرد، مفقدتيش رونقك
لسة ليكي طلة، ولسة ملامحك محببة حتى لو كبرتي
نكست راسها وهي بتضحك وبعدين رفعت عيونها ليه وهي بتقول_الزمن كفيل يطفي أي حاجة يا ضرغام، فيه حاجات كتير اتغيرت بس أنتَ مش واخد بالك منها
ولكنه فاجئها لما رفعت إيده وداعب خصلات شعرها تحت أنظارها المتعجبة وقال_بالعكس، أنتِ الوحيدة اللي نظرتي ليكي عمرها ما اتغيرت
نزل بإيده على وشها وثبته غلى خدها تحت أنظارها، وبعدين قال_صدقيني يا زمرد، كان فيه فراغ كبير في حياتي طول الفترة اللي مكنتيش موجودة فيها، وكإني شيخت واتضاعف عمر فوق عمري، وبمجرد ما شوفتك واقفة قدامي حسيت إني رجعت شباب من تاني..
وقبل ما تتكلم أو ترد عليه، انتفضوا هما الاتنين لما اتفتح باب غرفة الاجتماعات ودخلت منه الملكة آريا اللي لمحت جزء من اللي كان بيدور بينهم، فاشتعلت عينيها بغضب رهيب لما شافت الارتباك اللي ظهر على الملك ضرغام وانتفاضه عند دخولها، أما الملكة زمرد فابتسمتلها بسخرية وهي بتبصلها من فوق لتحت باستفزاز، فاتقدمت ناحيتهم وهي بتقول من بين أسنانها وبترمقهم بنظرات مشتعلة_شكلي قاطعت حاجة مهمة
حاول الملك ضرغام ميبنيش ارتباكه، وقال بتوتر_لا أبدًا، كنا بنتناقش انا والملكة زمرد في اللي بيحصل في المملكة
هزت راسها واتبدلت نظراتها للاستهزاء وقالت_طبعًا طبعًا، وأنتَ إيه هيدور بينك وبين الملكة زمرد غير عن أمور المملكة
يا جلالة الملك ضرغام
كان أسلوبها مليان استهزاء واضح جدًا، فكملت_عامةً الوزير مستنيك برا
قالتها ولفت وخرجت وهي بتقفل الباب بعنف وراها، وجهت الملكة زمرد أنظارها ليه لما شافت الارتباك اللي ظاهر عليه، واتكلمت بقوة_شايفاك اتراجعت عن كلامك أول ما ظهرت آريا يا جلالة الملك
حرك شفايفه عشان يتكلم ولكنهاطط رفعت كفها في وشه وهي بتقول_اسمعني كويس يا ضرغام، أنا مبقتش زمرد العشيقة السرية بتاعتك، ومش هقبل إني أكون حاجة في السر تاني، أنا دلوقتي ملكة، وهبقى حاكمة مملكة إل دورادو، مش هقبل غير إني أكون في النور!
حس في الوقت ده إنه هيخسرها، فقرب منها بسرعة واحتوى كتفها الاتنين بذراعينه وهو بيقول_صدقيني يا زمرد عمري ما هقبل ليكي بأقل من إنك تكوني ملكة، بمجرد ما الخطة تتم مش هتردد إني اتخلص من الملكة آريا بأي طريقة كانت
أنا اكتفيت منها ومن كبرها ومن كلامها عن إنها كانت أميرة لمملكة قبل ما تكون زوجتي!
لفت زمرد وشها الناحية التانية، فمد إيده ومسك دقنها وأجبرها تبصله وقال_صدقيني يا زمرد، وعد مني هتبقي أنتِ المرأة الوحيدة اللي في حياتي
وعد
لانت نظراتها في الوقت ده واتحولت لابتسامة واسعة، فابتسم الملك ضرغام بدوره.
وعلى بُعد كانت الملكة آريا واقفة على الجهة التانية من الباب ومايلة بتسمع اللي بيدور بينهم، اتوسعت عينيها بصدمة، مش متخيلة إن الملك ضرغام بالحقارة دي وإنه قرر يتخلص من زوجته وأم أولاده عشان واحدة لعوب!
اتعدلت واتبدلت نظراتها للحقد وتمتمت_صدقني يا ضرغام، هنهيك قبل ما تعملها، عشان تبقى تختار الساحرة كويس...
ـــــــــــــــــــــــــــــــــــــــــــــــــــــــــــــــــــــــ
اتململت على صوت حد بيتكلم من حواليها، ولكن مكانتش قادرة تفتح عينيها، كانت مازالت حاسة بخدل في جميع أنحاء جسدها، ولكن لقت نفسها بتهمس بضعف_بـ...
بـدر....
حتى وهي بين الوعي واللا وعي كان هو الوحيد اللي في بالها، كانت كل أمانيها إنه يكون بخير واللي حصل ده كله كوابيس من كوابيسها، اتحرك الملك رسلان تجاهها لما سمع همسها باسم ابنه بعد ما كان واقف هو وقائد الحرس بيتكلموا مع الطبيبة، وبعدين وقف جنبها وطبطب على كتفها السليم وهو بيقول_متقلقيش يا ضي القمر، صدقيني هعاقبه على اللي عمله فيكي
فتحت عيونها وحاولت تتعدل ولكن اتأوهت بألم من جرح كتفها المتخيط جديد، وجهت نظرها للملك رسلان وقالت بضعف_ملك رسلان
أنتَ رجعت!
اتشبثت بدراعه وقالت بتوسل_ملك رسلان، بدر في خطر لازم ننقذه!
بصلها بقوة وقال_لازم ننقذه فعلًا بس من نفسه!
عشان بتهاون كتير معاه زاد في تمرده، ولكن مش أنا اللي يتلوي دراعي، حتى لو هو من صُلبي عندي استعداد احطه في الزنزانة بنفسي!
خلص كلامه واتحرك عشان يمشي ولكن ضي القمر مسكته عشان تمنعه، اتلفتلها بتعجب فاتحاملت هي على نفسها وقامت وقفت وهي بتقول_صدقني يا جلالة الملك، كل تصرفات بدر دي مش بإرادته، بدر مسحور!
اتوسعت عينه بدهشة وتمتم_مسحور!
هزت راسها بعيون اتملت بالدموع_صدقني، بدر النهاردة مكانش هيتردد يقتلني، لكن لما حاولت أفكره أنا مين فضل يصرخ كإنه بيتألم، كإنه في صراع بين نفسه وبين حاجة متحكمة فيه
صدقني يا جلالة الملك بدر اللي بيعمله ده مش عشان يتمرد، ولكن هو مش مدرك، بدر بيحبني وأنا متأكدة، استحالة كان يفكر يئذيني!
اللي موجود دلوقتي ده مش بدر!
لوهلة مكانش مقتنع بكلامها وشايف إنها بتهذي أو من تأثير مشاعرها ليه، ولكن اتكلم قائد الحرس في الوقت ده وقال_اعذرني على التدخل يا جلالة الملك، ولكن سمو الأمير بالفعل مش في حالته الطبيعية بقاله أيام، وعشانك يا مولاي منشغل في أمور المملكة مش واخد بالك.
كان حاسس بالدهشة من اللي بيتقاله، معقولة بدر بالفعل مش في حالته الطبيعية!
فسأل بتعجب_ومين اللي يتجرأ ويعمل فيه كده!
_الملكة زمرد..
قالتها ضي القمر بدون تردد وهي بتنقل نظرها بين قائد الحرس والملك رسلان اللي عقد حواجبه بصدمة، فكملت هي_جلالة الملك، أنا متأكدة إنها هي اللي عملت فيه كده، صدقني، هي جواها شر خالص
هي بنفسها اعترفتلي إنها كانت بتعذب عقيق لحد ما هربت ولكن مقالتش سبب هروبها الصريح!
لوهلة اترنج الملك رسلان من قسوة الحقايق اللي بتتضرب في وشه، مكانش مصدق إن هي اللي اتسببت في إن عقيق تمشي من هنا، بقاله سنين بيدور عليها، وسنين بيسأل نفسه ليه سابته؟!
ليه اتخلت عن حبهم؟!
لدرجة إنه شكك في حبها ليه ولكن كان بينفي ده لما يفتكر اللي كانت بتعمله علشانه، كانت حاسة ضي القمر بالحزن عليه، فكملت_مكنتش عايزة اقولك أنا بنفسي يا جلالة الملك، عشان كده طلبت منك إن أنتَ اللي تدور بنفسك، ولكن عقيق كانت ضحية الملكة زمرد، كانت قاصدة تبعدها عشان تبقى هي الملكة، أنا معرفش ايه نوع الأذى اللي اتعرضتله عقيق على إيديها بس متأكدة إنه أكتر من اللي نتخيله بكتير
اتحرك الملك رسلان وقعد على طرف السرير بضعف، مكانش متخيل إن حبيبته كانت بتعاني كتير وهو مكانش واخد باله، هو مدرك من زمان شر زمرد وطمعها في الحكم وإنها حاولت تقتله كذه مرة وانتهت بالسحر اللي صنعته ليه عشان تخليه في غيبوبة وتمسك هي حكم المملكة بما إن ابنها لسة رضيع
ولكن كان متوقع إنه قادر يلوي دراعها لما هددها بإنه هيكشفها قدام ابنه
ولكن متوقعش إنها تستغل ابنه وتئذيه بالشكل ده!
إذا كانت عملت كده فعلًا
فمعقولة تكون هي الجاسوسة اللي بتسرب معلومات المملكة لاعدائهم وقطاع الطرق!
وجه نظره لقائد الحرس اللي كان متابعه بتحفز، وقال_روح لبدر وقوله إني عاوزه، لازم أشوف بنفسي تأثير السحر وأعرف وصل لأي مدى
وكمان روح لوكر سلطان وهاته، هو الوحيد اللي هيقدر يبطل تأثير السحر ويحصنه!
اتكلمت ضي القمر في الوقت ده_سلطان مختفي يا جلالة الملك، محدش عارفله أثر بقاله أيام
هنا ابتسم الملك بسخرية وقال_طبعًا
شيء متوقع
عقدت ضي القمر حواجبها بتعجب وقالت_يعني إيه؟
بصلها وقال بجمود_زمرد عارفة إن سلطان هو الوحيد اللي بيقدر يبطل مفعول أي سحر هي بتعمله، أكيد هي اللي ورا اختفاؤه
دلوقتي بس ابتديت اصدق اللي بتقولوه
قام واقف وعدل من وشاحه وقال_لازم ندور على سلطان بنفسنا
وجه نظره لقائد الحرس وقال_جمعلي عدد الحراس اللي تتأكد إنهم مش تحت تأثير زمرد، لإنها أكيد استخدمت سحرها ضدهم عشان يطاوعوها.
أدى قائد الحرس تحيته العسكرية وبعدين خرج عشان ينفذ اللي قاله، أما الملك رسلان فشاور لضي القمر تتبعه اللي اتحاملت على نفسها وقامت وراه...
ـــــــــــــــــــــــــــــــــــــــــــــــــــــــــــــــــــــــ
كان الملك قاعد على عرشه في حين ضي القمر واقفة جنبه بارتباك وهي مثبتة عيونها على مكان الباب اللي هيدخل منه بدر، دق الباب فاضطربت دقات قلبها من الرهبة، هي مش قادرة تتخيله في صورة الشخص اللي كان هيقتلها من ساعات، دخلت بدر وهو بيقول بفظاظة_طلبتني يا جلالة الملك
ولكن بمجرد ما عينه وقعت على ضي القمر اللي واقفة جمبه اشتعلت عيونه بحقد شديد، فقرب بخطوات سريعة منهم وحرك إيده حطها على موضع السيف، انكمشت ضي القمر على نفسها من الخوف، ولكن وقف بدر مكانه لما قام الملك رسلان وشاورله بإيده بحدة وقال_عندك يا سمو الأمير!
ثبت إيده على السيف وهو بيتنفس بعنف وعيونه مشتعلة وقال بزمجرة_مولاي!
اتحرك الملك رسلان ونزل من على عرشه وبعدين وقف قدامه وهو بيبص لعيونه مباشرة، وبعدين قال_مين سمحلك تتطاول على ضي القمر؟!
مش عشان هي خليلتك يبقى ليك الحق تئذيها براحتك!
جز بدر على أسنانه بغضب رهيب_أنا مليش خليلة
وبالذات لو كانت دي!
قالها وهو بيشاور تجاه ضي القمر اللي حست إن قلبها بيتفتت ميت حتة من قسوة كلامه، فكمل بدر_مفيش مكان للي بتحمل دماء عقيق الملعونة بينا
قرب الملك رسلان خطوة منه وهو بيقول_مش أنتَ اللي هتقرر مين يبقى بينا ومين لأ!
ضي القمر هتفضل هنا، تحت حمايتي، وصدقني يا بدر لو اتعرضتلها مش هتردد ارميك في الزنزانة واسلب منك جميع القابك أولها كونك ولي العهد!
ضم قبضة إيده وهو بيتنفس بعنف وكإنه ثور على وشك الانقضاض على عدوه، ضامم شفايفه بيحاول يتمالك أعصابه، كان باين عليه إنه عكس طبيعته، بدر عمره ما عمل التصرفات دي قبل كده، اتأكد الملك رسلان في الوقت ده إن بدر فعلًا مسحور، وتأثير السحر ظاهر على معالم وشه الشاحبه وعيونه الخالية من الحياة، وجه نظره لضي القمر بنظرة رعبتها، وبعدين اتعدل وهو بيهدي نفسه وابتسم باتساع وهو بيقول بتهديد_فاكرة إنك هتقدري تخلصي مني لما تبقي في حماية الملك؟!
صدقيني يا ضي القمر مش هتردد أنهيكي لو جتلي الفرصة
اتنرفز الملك رسلان في الوقت ده وعنفه بحدة_بـدر!
إياك تتطاول عليها, إيـاك!
متمشيش ورا كلام الملكة زمرد وتصدقها!
عند ذكر والدته لفله بنظرة حادة وكإنه داس على الفتيل وقال بحدة_جلالة الملك!
أنا اللي مش هسمحلك تجيب سيرة الملكة زمرد بأي شكل
كفاية إنها استحملت هوسك بالملعونة عقيق لدرجة إنك نفرتها علشانها، ودلوقتي هتنفرني أنا كمان عشان اللي بتحمل دمائها
صدقني أنا اللي مش هسكت يا جلالة الملك
صدقني!
خلص كلامه وسابهم وخرج، مسمعش لهتاف الملك رسلان باسمه وكمل بلا مبالاة، فتح باب القاعة بعنف وخرج بخطوات تكاد تفتك بالأرض
اتنهد الملك رسلان واتحولت ملامحه للحزن، لف في الوقت ده لضي القمر وهز راسه بمعنى إن كل كلامها كان صح، اتجه لسلالم العرش وقعد عليه بإنهيار وهو حاطت راسه بين إيديه الاتنين، طاقته بتنفذ، من ناحية المملكة اللي بتنهار، وابنه اللي بيضيع من بين إيديه
ده غير سلطان اللي مش لاقيينه!
دخل في الوقت ده قائد الحرس اللي كان شاف خروج بدر بملامحه المشتعلة، ولما شاف الملك على حالته دي قدر يميز سببها
اتجه ناحيته ووقف قدامه وهو بيقول_مولاي...
رفع الملك رسلان وشه ليه ومتكلمش، فقال قائد الحرس_أحد الحراس اللي كانوا مع سمو الأمير قالي إنهم لقوا البنت اللي حطت السم في كاس الأميرة ضي القمر
اتعدلت ضي القمر في الوقت ده وهي بتتابعه باهتمام، فنقل قائد الحرس نظره بين الملك رسلان وضي القمر وقال_البنت اعترفت إن الملكة زمرد هي اللي أدتها الأمر
انتفض الملك رسلان في الوقت ده وقال_هي فين؟!
نكس قائد الحرس راسه وقال_البنت اختفت من وقتها يا مولاي وملهاش أي أثر
ضم الملك رسلام قبضته وهو بيجز على أسنانه بغيظ رهيب
أما ضي القمر ففضلت واقفة مكانها متجمدة، هي كانت متأكدة أساسًا إن الملكة زمرد هي المسئولة عن تسميمها، فاتكلم قائد الحرس في الوقت ده_مولاي أظن معانا الدليل دلوقتي إن الملكة زمرد بتتسبب في زعزعة استقرار القصر، نقدر نحاكمها
اتنهد الملك رسلام وقال_للأسف منقدرش يا قائد الحرس
تأثير السحر على بدر مخليه مطيع تمامًا للملكة زمرد، لدرجة إنها لو طلبت منه يقلتني هيعملها من غير تردد
لازم بدر يرجع لوعيه، وبعدين نكشف قدامه ألاعيب زمرد، وقتها هعدمها بإيدي الاتنين
نهى كلامه وهو بيجز على أسنانه بغيظ شديد.....
ـــــــــــــــــــــــــــــــــــــــــــــــــــــــــــــــــــــــ
_بجاسوس
بجاسوس تعالى...
هتفت بيها ضي القمر لما شافته بيتحرك بعشوائية في المكان، قرب منها الحصان بسرعة أول ما شافها وابتدى يمسح براسها في جسدها بحركات ودودة، أما هي فضلت تضحك وهي بتداعبه وبتقول_مفيش غيرك فاكرني يا بجاسوس
صديقك نسيني لدرجة إنه حاول يقتلني
نهت جملتها وهي بتتنهد بحزن، رفع بجاسوس راسه ليها وهو بيبص لعينيها كإنه فاهم اللي بيدور جواها، أما هي فكملت_بس أنا متأكدة إنه هيرجع بدر اللي أنا أعرفه، مش هسيبه غير لما أنقذه
لازم ألاقي سلطان بأي طريقة
هو الوحيد اللي هيحط حد للي بيحصل..
اتلفتت على صوت جلبة وراها، شافت بدر من على بعد وهو واقف بيستقبل عربة باين عليها إنها ملكية وقفت في منتصف الساحة، مد إيده ناحية باب العربة فشافت إيد أنثوية بتمتد ليه، سرعان ما اتوسعت عينيها بدهشة، كانت الأميرة داريا!
أميرة مملكة ازتلان
حست بقلبها بينقبض بألم لما شافته بيرفع كفها ويطبع عليه قبلة وهو بيبصلها بعيون مُحبة ومبتسملها ابتسامته اللي اشتاقتلها بس للاسف مكانتش ليها!
كل تصرفات المحب مكانتش طالعة ليها هي!
فضلت مكانها تتأمل اللي بيدور بينهم، رفعت إيديها وثبتتها على موضع قلبها اللي بيصرخ من الألم، شافته وهو محتوى كتفها ومقربها منه، وبعدين دخلوا لجوا القصر، اتملت عيونها بدموع القهر، وبعدين قالت وهي باصة على أثر_بدر بيضيع مني يا بجاسوس
بيضيع وأنا واقفة عاجزة مكاني..
صهل بجاسوس بقوة انتفضت على أثرها وهي بتبصله بتعجب، شافته وهو بيمشي وهو بيشم حاجة على الأرض وكإنه بيتتبع أثر، بصتله ضي بتعجب وافتكرت اليوم اللي صهل بعنف قبل كده وهي مع بدر ووقتها شافوا ظل قريب منهم
فقربت منه وهي بتقول_بجاسوس
أنت شايفة حاجة؟
رفع عينيه ليها وصهل كإنه بيجاوبها، وفجأة لقته بيجري بسرعة، فلمت هي فستانها وجريت وراه وهي بتصرخ باسمه ولكنه مكانش راضي يقف وكإنه شايف حاجة بالفعل، لحد ما دخلوا بين الأشجار وابتعدوا تمامًا عن العيون، فوقفت تتلفت حواليها لما اتوقفت حركة بجاسوس تشوف إذا كان فيه حد حواليها ولا لا، وبعدين وجهت أنظارها ليه وهي بتقول بحنق_لازم تكون حاجة مقنعة بعد ما قطعت نفسي معاك كده!
ولكن لقته بيقرب من صخرة معينة اللي كانت ضخمة شوية وبيتلفت حواليها وهو بيشمها وبعدين صهل بقوة، فاتجهت ناحيته بسرعة وابتدت تدور حوالين الضخرة إذا كان فيه حاجة ولا لأ، فقالت بضيق_دي صخرة يا بجاسوس، أنتَ واخدني وراك ده كله عشان صخرة!
بصلها بجاسوس نظرة غريبة وكإنه متضايق منها أو نفذ صبره، وبعدين ابتدى يدفع الصخرة بدماغه لحد ما بعدها عن المكان، عقدت ضي القمر حواجبها بتعجب لما شافت بوابة خشبية تحته، قربت منها تشيل الحشائش من عليها وهي بتتأملها بتعجب وارتياب، وبعدين اتحاملت على نفسها وفتحتها فطلع من المكان ريحة بشعة للغاية خلتها تفضل تكح بسببها
ولما هديت الريحة نزلت لتحت بتردد كبير وهي بتتأمل المكان بتعجب واللي اتفاجئت إنه كان
سجن!
اتوجهت لأول زنزانة ولكنها تراجعت وهي بتشهق بخضة لما شافت بنت مقتولة في الزنزانة!
ولكنها انتفضت على صوته صفير من الزانزانة الأخيرة، اتحركت بخطوات حذرة بطيئة ومتمهلة، ولكنها اتجمدت تمامًا قدامها لما شافت الكاهن سلطان قاعد على الأرض وبيرسم بعصاه على التراب اللي في الأرض فهتفت بصدمة_سلطان!
اتوقف عن الرسم ورفع عيونه ليها مع ابتسامة واسعة متليقش على حالته وقال_مستنيكي بقالي كتير يا ضي القمر...
الحلقة العشرون
اتحركت بلهفة وقربت من الزنزانة اللي قاعد فيها وهي بتقول_سلطان
لازم ننقذ بدر
بدر مسحور يا سلطان!
كان لسة قاعد مكانه وهو باصصلها بابتسامة غريبة، وبعدين قال_اتأخرتي ليه؟
كنت فاكرك ذكية أكتر من كده وهتلاقيني بسرعة
وقفت مكانها متجمدة وهي بصاله بحواجب معقودة، هي عارفة إن سلطان مخه طاير ولكن متوقعتش إنها للدرجة دي، فاتكلمت بنفاذ صبر_سلطان مش وقت استعراضات
بقولك الملكة زمرد سحرت بدر وأنتَ الوحيد اللي هتقدر تنقذه
رفعلها حواجبه وقال بسخرية_وأنا بإيدي إيه؟
أنا مجرد عجوز مضطرب عفى عنه الزمن
زفرت بنفاذ صبر وهي بتقاوم إنها تخبطه بحاجة، وقربت تحاول تفتح باب الزنزانة ولكنه كان مقفول بالقفل، أما هو كان بيتابعها ببرود وهو بيقول_عارفة مشكلتنا إيه يا ضي القمر؟
دايمًا بنتعمد منشوفش الحقايق اللي قدام عينينا، زي مثلًا أنتِ
رغم إنك عارفة إن قدرك هنا
ولكن مشيتي بإرادتك على أساس هتنتهي الحكاية عند كده
وبعدين رجعتي تاني بإرادتك، لسة فاكرة برضه إن دي مجرد صدف؟
وقفت إيديها اللي كانت بتحاول تحرك القفل، وفضلت بصاله شوية بنظرات مغتاظة، وبعدين سابته وراحت جابت حجر ورجعت تاني للزنزانة وابتدت تحاول تكسر القفل بالحجر، فكمل سلطان_حتى بدر، رغم إدراكه من البداية إن النبوءة صحيحة وإنك البنت اللي مبتفارقش أحلامه ولكن برضه فضل ينكر مشاعره باستماتة، ورفض إنه يدور في الماضي رغم إنه عارف هيلاقي تفاصيل كتيرة فايتاه
رمت الحجر على الأرض وبصتلخ بعصبية شديدة وقالت_ممكن تبطل فلسفتك شوية وتساعدني أفتح الزنزانة عشان اخرجك!
_طبعًا
اتفضلي..
قالها ببساطة وهو مادد إيده بمفتاح عتيق ليها، عقدت حواجبها بتعجب وبعدين سألت_إيه ده؟
رد بتلقائية_مفتاح الزنزانة
لوهلة اتملى المكان بصمت رهيب، صوت صورصور الحقل شغال في دماغها، وهي متنحاله بصدمة من غير ما ترمش حتى، أما هو فكان بيبادلها بابتسامة مستفزة، فتحت شفايفها واتكلمت بذهول_يعني أنتَ كان معاك المفتاح كل الوقت ده وقاعد هنا برضه؟
رد بابتسامة صفراء_ما قولتلك كنت مستنيكي يا ضي القمر
حست إنها هتموت مكانها لو فضلت قاعدة مع سلطان في مكان واحد، الراجل ده ما زال بيثير دهشتها من تصرفاته غير المنطقية كل مرة، ولكن ابتسامته وردوده الباردة استفزتها بشكل كبير، فمسكت الحجر وحدفته على الزنزانة وهي بتصرخ_ولما المفتاح معاك سايبني قاعدة بحاول أكسر القفل ليــه!!
اتراجع سلطان لورا ومظهرش عليه أي تأثر ولكنه رد_أنتِ مطلبتيش مساعدتي
وقفت على جنب وحطت إيديها على جبينها وهي حاسة بفوران في دماغها من العصبية، وتمتمت وهي بتاخد شهيق طويل_يا ولي الصابـرين
يـا ولـي الصـابرين!
اتلفتت ليه وبعدين اتقدمت خدت المفتاح منه بعنف وبعدين فتحت القفل بيه، فتحت باب الزانزانة وشاورتله يخرج وهي بتتكلم بعصبية_ممكن تخرج يعني لو تكرمت؟
لو مش واخد بالك فيه مملكة بتنهار برا وأنتَ قاعد تتفلسف هنا وتفقع مرارتي
_أكيد
قالها ببرود وخرج وهو بيتسند على عصايته اللي على مقدمتها الضفدعة بمنتهى البساطة، وقفت تبص لأثره بدهشة من تصرفاته، وقعت عينيها على الضفدعة اللي كانت بصالها بمنتهى البرود وبعدين طلعت لها لسانها كإنها بتستفزها هي كمان
ضربت كف على التاني وهي بتقاوم فكرة إنها تخلص منه ومن الضفدعة اللي بتعمل تصرفات ميعملهاش بني آدمين
ولكن اتجمدت عند البنت اللي مرمية صريعة في الزنزانة وحست بجسمها بيرتجف وبعدين قالت_إيه حكاية البنت دي
اتكلم سلطان ببساطة_دي من أتباع زمرد واللي حطتلك السم في مشروبك
اتوسعت عينيها بدهشة ورددت_رحيق!
ومين اللي عمل فيها كده؟
رد سلطان_حبيبك المسحور نهى حياتها بأمر من الساحرة الشمطاء
فضلت واقفة متجمدة مكانها وعينيها مركزة على اللي دمائها كانت ناشفة على الأرض حواليها، لوهلة لقت جسمها بينتفض بعنف وهي بتتخيل بدر وهو بيطعنها لحد ما ازهق روحها بين إيديه من غير ما يرفله جفن، غمضت عينيها تضغط على جفونها بقوة من قسوة التخيل لوحده فما بالها بالحقيقة!
وبعدين لفت وشها بعيد عنها واتحركت عشان تطلع، ولكن قبل ما تخرج هي وسلطان لقت باب السجن بيتقفل عليهم ولكن مشافوش مين اللي قفله، جريت لفوق وهي بتصرخ_استنـى،
استنـى
احنا هنـا
فضلت تزق في الباب اللي اتقفل ولكنه مكانش بيتحرك_إحنـا هنا
الله يخريبيتك أهاليكم افتحوا البتاع ده!
يا اللي منكوا لله!
نهت جملتها وهي بتبكي بإنهيار لما أدركت إنهم اتحبسوا هنا وبقصد، أما سلطان فكان واقف بيتفرج عليها وهو حاطت إيده بيسد بيها أذنه وبعدين قال_كان الله في عون الأمير بدر
زوجته هتكون نواحة!
اتلفتت ليه ضي القمر على جملته الأخيرة، مسحت دموعها بطرف أكمامها بعنف واتقدمت ناحيته وهي بتقول_أنتَ إيه؟
ها؟
أنتَ جايب كل البرود ده منين؟!
إيه يا شيخ
إيــه يا شــيخ تلاجة!
اتراجع لورا وهو بيرفع إيده وبيقول بتوتر_أعصابك يا سمو الأميرة لترتكبي جريمة غير مقصودة
شدت على شعرها بعصبية وصرخت_أقسم بالله يا سلطان لولا الحوجة لكنت أنا اللي مخلصة عليك!
صدر صوت معترض من الضفدعة وكإنها فاهمة كلامها، فوجهت ضي القمر صراخها ليها وهي بتقول بغضب_أنتِ تسكتي خالص يا حشرة يا اللي مش عارفالك نوع أنتِ!
انكمشت الضفدعة على نفسها بخوف، فاتنحنح الكاهن سلطان وهو بيقول_الضفدعة حيوان يا سمو الأميرة مش حشرة
اتفلتت ليه ضي القمر وهي بترمقه بنظرة نارية بتهدد بإنها تفتك بيه فلف وشه بسرعة للناحية التانية وهو بيصفر متصنع الانشغال، اتجهت ضي القمر للباب تخبط بتحاول تزقه وهي بتقول_على آخر الزمن اتحبس في سجن تحت الأرض مع دجال!
صحح قائلًا_كاهن
يا ضي القمر
بصتله بطرف عينها فقال بسرعة_وتمشي دجال برضه!
ابتدت تزق في الباب وهي بتخبط على في نفس الوقت وبتصرخ_الحقـونا..
يا قائد الحرس
يا ملك رسلان
ولكن بلا فائدة، فقعدت مكانها وهي حاسة بألم مكان جرح كتفها اللي لسة جديد، حطت إيديها عليه فشعرت بسائل لزج، أدركت في الوقت ده إن جرحها اتفتح تاني، فسندت راسها على إيديها وهي بتتنهد بعجز...
ـــــــــــــــــــــــــــــــــــــــــــــــــــــــــــــــــــــــ
دخل بدر لقاعة الاجتماعات اللي كان قاعد فيها الملك رسلان مع قائد الحرس وهو متشبث بإيد الأميرة داريا، رفع الملك رسلان عيونه سرعان ما اتجمد تمامًا لما شاف المشهد اللي قدامه، انتفض من على كرسيه وقال_إيه اللي جاب بنت ضرغام هنا!
ضمها بدر ليه وبص للملك وهو على وشه ابتسامة واسعة وبعدين قال_أقدملك الأميرة داريا يا جلالة الملك
واللي بتكون خليلتي..
اتوسعت عيونه بصدمة وهو بينقل نظراته بين إيد بدر اللي محتوي بيها كتف داريا والتانية اللي متشبثة بيه وبتبصله بانتصار، فهتف الملك رسلان_أنتَ اتجننت يا بدر!
ارجع لوعيك
من امتى وبنت ضرغام وأميرة مملكة ازتلان خليلتك!
بعد بدر عن داريا اللي كانت بتراقب الوضع بفرحة شديدة، جزء من أحلامها بيتحقق قدامها ولسة لما تتولى حكم المملكة، فاتحرك بدر لحد ما وقف قدامه، ورفع راسه بشموخ وقال_أنا في كامل وعيي يا مولاي، لو شايف غير كده فـ دي مشكلتك
أما بقى داريا فهي خليلتي من النهاردة، ولو على الصراعات اللي بينا وبين مملكة ازتلان فأنا شايف إن ده حل كويس عشان يعزز العلاقات بيننا
مش قولتلك يا مولاي إنك محتاج تعيد دراسة سياساتك في الحكم؟!
كان الملك رسلان حاسس إنه متقيد تمامًا، مش قادر ياخد رد فعل ضد ابنه عشان مدرك تمامًا إنه مش واعي لكل اللي بيعمله، ففضل الصمت وهو بينقل نظره بين بدر وبين داريا، ابتسم بدر في الوقت ده بسخرية وبعدين اتلفت ورجع لداريا مسك إيديها وهو بيقولها بحنان_تعالي أخدك للجناح اللي خلتهم يجهزوه ليكي مخصوص
اتسعت ابتسامة داريا ومشيت معاه بالفعل تحت مراقبة قائد الحرس والملك رسلان اللي قعد على كرسيه بإنهيار، وقف قائد الحرس وقرب منه ولكن مقدرش يتجرأ إنه يلمسه وحاول مواساته قائلًا_اعذره يا مولاي، إحنا بنسعى حاليًا عشان نخرجه من تأثير السحر
بمجرد ما يرجع لوعيه هينهي كل ده بنفسه
رفع الملك رسلان عيونه ليه بعجز، وبعدين فضل باصص قدامه في الفراغ من غير ما يتكلم...
ـــــــــــــــــــــــــــــــــــــــــــــــــــــــــــــــــــــــ
كانت قاعدة مكانها في السجن في حين كان الكاهن سلطان قاعد بيعبث بعصاه على الأرض، رفعت عيونها ليه وفضلت بصاله شوية وبعدين قالت_رغم إنك كنت عارف الحقايق دي كلها، ليه مفكرتش تقولها للملك رسلان؟
ليه مقولتلوش على سبب هروب عقيق؟
ليه سيبت بدر ماشي ورا زمرد لحد ما اذته؟
ليه سكت ده كله يا سلطان؟!
اتوقف عن الرسم وسكت شوية في حين هي متابعاه لحد ما قال من غير ما يرفع عينه ليها_أنا مش جاسوس يا ضي القمر
ومش وظيفتي إني اوعي كل شخص في المملكة
هما كبار كفاية عشان يقدروا يدوروا على كل الحقايق اللي هما محتاجينها ولكن مش عايزين يبذلوا أي مجهود في اكتشافها، النبوءة من البداية كانت مضمونها إن هتيجي ملكة صالحة للبلاد بتحمل القلادة
والملكة الحقيقية هي اللي هيكونلها شأن هنا ومش هتكون ضعيفة
لإن مملكة إل دورادو ميليقش عليها إن ملكتها تبقى ضعيفة
بصتله ضي القمر بصمت وبعدين قالت_عقيق كانت ضعيفة؟
رفع راسه ليها وبصلها في الوقت ده ورد_عقيق حبها للملك رسلان كان لاغي عقلها، كانت تقدر توقف زمرد من البداية، ولكن خافت تاخد أي خطوة، مكنش عندها الجرأة، ففضلت إنها تنفذ اللي اتطلب منها وتضحي بحبها في مقابل إن الملك رسلان يفضل بخير.
استنكرت كلامه فقالت_ده مش ضعف، ده حب
حب عظيم مش أي حد يقدر يفهمه
صحح كلامها وقال_الحب اللي يخلي الإنسان عاجز، يبقى يلا فائدة
على عكسك أنتِ يا ضي القمر، خدتي خطوات كتير مخدتهاش عقيق، كشفتي الملكة زمرد، وقدرتي تميزي إن بدر مسحور، حتى قدرتي توصلي لمكاني اللي لو فضلوا يدورا أعوام مش هيلاقوه
ضحكت بسخرية وقالت_وأهو بدل ما بقيت محبوس لوحدك بقيت معاك
ابتسملها وقال_الفرج قريب يا ضي القمر
قريب جدًا
حست هي بحركة حواليهم في الوقت ده، اتعدلت وقامت وقفت وقربت ودنها من الباب، فسمعت صوت خطوات ومعاه صهيل، لمعت عيونها بفرح وهمست_بجاسوس!
ابتدت تخبط على الباب وهي بتصرخ_بجاسوس
بجاسوس أنا هنا
بــجاسـوس!
حست بصوت جلبة على الباب وكإنه كان بيجر الحجر، زقت الباب في الوقت ده لقته بيتفتح معاها، حست إنها على وشك الرقص من كتر الفرحة، خرجت لبرا فقابلها بجاسوس اللي فضل يداعب وشها وكإنها خلاص بقت صديقته المفضلة، فضلت تملس عليه وهي بتضحك وبتضمه ليها وبتقول_بـجاسوس
أنتَ بطل!
أنتَ مدهش!
صهل في الوقت ده بقوة وهو بيلف حواليها بحماس وكإنه مبسوط من الاطراء ده، أما الكاهن سلطان كان متابعهم بعيون متسعة وبعدين قال_مـدهش!
بصله بجاسوس في الوقت ده وابتدت تتوحش ملامحه ويزمجر وهو بيتجه ناحيته، ولكن منعته ضي القمر وهي بتقول_بجاسوس
ده سلطان
هو الوحيد اللي هيقدر ينقذ بدر
لانت ملامح بجاسوس وكإنه كان فاهم كل اللي بيتقاله، فرجعت ربتت عليه وقالت_ارجع لمكانك يلا
وأوعدك هرجعلك بدر من تاني
صهل بجاسوس في الوقت ده وبعدين سابهم ومشي بالفعل، أما الكاهن سلطان فقال بإعجاب واضح_قدراتك بتبهرني بالفعل يا ضي القمر، قدرتي في لحظات تروضي اكتر كائن عدواني في المملكة كلها
ألا وهو حصان بدر الاسطوري!
اتجهت ناحيته وقالت_سيبك من كل ده
هنبطل مفعول السحر إزاي؟!
اتحرك الكاهن سلطان ووراه ضي القمر، كان ماشي وهو بيفكر وبيتكلم_أنا مش ساحر
ولكن المعروف إن لكل سحر ترياق بيكون مضاد لمفعول السحر
بيحمل العديد من المكونات، ولكن بيكون فيه مكون رئيسي معاكس للمكون الرئيسي في السحر المستخدم
كانت بتتابع الكلام اللي بيقوله باهتمام شديد، وبعدين قالت_وإيه المكون الرئيسي لسحر الملكة زمرد
وصلوا في الوقت ده لوكر الكاهن سلطان، دخلوا لجوا فوقفت ضي القمر تتابعه وهو متجه لمكتبته الصغيرة وبعدين جاب كتاب وقعد على الكرسي، حط الكتاب على الترابيزة وابتدى يدور بين الأوراق وهو بيقول_ده اللي محتاج اكتشفه، زي مثلا إيه اللي ممكن يضعف تأثير السحر حتى ولو بشكل لحظي؟
افتكرت ضي القمر في الوقت ده اللي حصل، فاتجهت ناحيته بسرعة وقالت_وقت ما شوفت بدر وحاول قتلي، حاولت افكره أنا مين، ولكنه وقع على الأرض وهو بيصرخ من الألم وكإنه بيصارع حاجة جواه!
اتجمد الكاهن سلطان وكإنه جه في باله حاجة، رفع عيونه لضي القمر وفضل باصصلها شوية، اتوسعت عينيه وبعدين قال_مدهش!
مـدهش!!
بصتله ضي القمر بتعجب، فقام الكاهن سلطان وقفل الكتاب اللي كان بين إيديه، وبعدين اتجه لمكان فيه ابريق كبير، ابتدى يطلع زجاجات غريبة من الأدراج بتاعته، واشعل النار تحت الابريق تحت عيون ضي القمر، فاتكلم الكاهن سلطان_زي ما قولتلك كل سحر بيبقاله قوة مضادة ليه، طبيعي سحر الملكة زمرد بيبقى أي مثيرات سلبية مع أعشاب بتعزز من تأثير السحر وكمان العنصر السحري بتاعها هو دمائها..
اتوسعت عيون ضي القمر بدهشة وبعدين قالت_دمائها!!
فوضح سلطان وقال_المملكة اللي كانت منها الملكة زمرد كانوا كلهم مشهورين بالسحر، ولكن بالسحر الخير، فـ دمائهم بتبقى معززة بعناصر سحرية بتخلي تأثير السحر قوي، ولكن بالطبع الملكة زمرد خرجت منذ زمن عن المألوف عندهم واستخدمت قدراتها في سحر الشر
حست ضي القمر إن دماغها بتلف بيها، مش مستوعبة اللي بيتقالها لإنها حاجات خارقة للمنطق، ابتدى الكاهن سلطان يحط العناصر اللي محتاجها في الابريق، كانت مواد مش معروف هويتها مع نباتات غريبة عليها، وقال_الترياق اللي أنا بستخدمه هيضعف من مفعول السحر ويخلي بدر يقدر يسيطر على قوته بس مش هيعالجه
اتجهت ضي القمر ناحيته وهي متعجبة وسألت_طيب إيه اللي هيعالجه؟
اتلفت ليها في الوقت ده وبصلها بقوة وبعدين قال_أنتِ..
قرب منها ووقف قصادها وقال_يا ترى حبك لبدر كفيل يخليكي تضحي بنفسك عشان تنقذيه؟
اتجمدت ضي القمر وهي بصاله بإرتياب واضح، بلعت ريقها بتوتر في حين سلطان كان ما زال مبتسملها بغرابة..
ـــــــــــــــــــــــــــــــــــــــــــــــــــــــــــــــــــــــ
خرجت من وكر الكاهن سلطان وهي مشتتة تمامًا من الكلام اللي قالهولها، طلعت الزجاجة الصغيرة اللي دساها في أكمام ملابسها وفضلت بصالها شوية، ولكن انتفضت لما شافت حراس جايين من بعيد ودارتها تاني بسرعة وبعدين كملت مشي، اتوجهت للنافورة اللي في ساحة القصر وقعدت على طرفها، حاسة إنها مشتتة تمامًا، مش عارفة هل هتقدر تعمل اللي قالهولها سلطان ولا لأ!
ولكن هي دي الطريقة الوحيدة اللي تقدر ترجع بيها بدر تاني
رفعت عيونها للسما تدور على القمر ولكن للعجب كان مختفي تمامًا تحت الغيوم، حست بحركة جنبها، فلفت وشها واتسعت عيونها لما شافت بدر واقف جنبها باصصلها بعيون غامضة تمامًا، مشبك إيديه الاتنين ورا ضهره، نظراته كانت غريبة ولكن مكانش فيها أي حب ودي حاجة آلمتها بشدة!
رجعت رفعت عيونها اللي اترقرقت بالدموع المحبوسة للسماء تاني وقالت_القمر مش موجود
حتى القمر تايه
ضيُّه مش موجود لما بدره اختفى تحت السحب السودا
رفعت عيونها ليه اللي كانت بتجاهد متنزلش دموعها، كانت حاسة بإن جواه تخبط شديد، وبعدين قالت_مش قولتلك قبل كده مفيش وجود للبدر من غير ضي ليه، ومفيش ضي من غير ما يكون فيه بدر،
دلوقتي لما واحد اختفى، السما بقت قاحلة، مفيش أي أثر للنور
اتوسلته بنظراتها، ومالت براسها ليه وهي بتقول بشفايف مرتعشة_مش فاكر أي حاجة يا بدر؟
مش فاكر ضيَّك؟
معقولة مش فاكرني خالص؟!
وهو باصص لجوا عيونها قال_فاكرك كويس
فاكر ادعائك للبراءة، وفاكر إنك جاية تدمري حياتنا زي ما سبق وعملت اللي بتحملي دمائها!
نزل خط من الدموع على وشها، وهمست بارتعاش من قسوة كلامه_بـدر!
اتحرك خطوة وقرب منها وقال_استحالة احب واحدة زيك يا ضي القمر، وصدقيني لو بإيدي كنت قتلتك دلوقتي ولكن للأسف خدتي الملك لصفك زي ما عملت عقيق الملعونة، بس قريب كل ده هينتهي، كل حاجة في المملكة هتتغير وقتها مش هتردد اعدمك
ادركت في الوقت ده إن السحر متمكن من بدر تمامًا، حست بألم رهيب بينهش صدرها، اتهدلت انفاسها وهي بتحاول تتمالك نفسها قدامه، ولكن في الوقت ده ظهرت الأميرة داريا اللي جت حطت إيديها على كتف بدر وهي بتقول برقة_حبيبي..
لف ليها بسرعة، سرعان ما اتبدلت تعبيرات وشه ولانت، مال طبع قبلة على خدها تحت أنظار ضي اللي بتتابعهم بقهر وقال_منمتيش ليه لحد دلوقتي؟
مطت شفايفها ببراءة وهي بتنقل نظراتها تجاه ضي القمر بخبث وقالت_مقدرتش أنام قبل ما أشوفك
حست ضي القمر إنها هتنهار في الوقت ده، فسابتهم ومشيت تحت أنظارهم ولكن سرعان ما نسيوا وجودها واندمجوا مع بعض، اتلفتت ليهم قبل ما تدخل جوا القصر فشافتهم وهما واقفين بيضحكوا مع بعض، شافت بدر وهو بيرفع إيديه يداعب شعرها كإنها حبيبته فعلًا، كان المفروض هي اللي تبقى مكانها!
كان المفروض الحب اللي ظاهر ده يبقى ليها هي!
شهقت بعنف من شدة ألمها ونزلت دموعها، فرجعت اتلفتت ودخلت لجوا وهي مثبتة إيديها على قلبها اللي بينبض بألم، لازم ترجع بدر
حتى لو كلفها حياتها، مش هتقدر تسيبه وهو في الحالة دي
بدر محتاجها
محتاج وجودها ومحتاجها تنقذه
لازم تنقذه..
طلعت الزجاجة اللي مخبياها وبصتلها بعيون لامعة، وبعدين راحت تدور على قائد الحرس لحد ما لقته اللي أول ما شافها اتجه ناحيتها وسأل بقلق_مفيش أخبار عن سلطان؟
ضمت شفايفها وردت_لقيته
كان محبوس في سجن تحت الأرض بين الأشجار اللي في الاتجاه الشرقي
اتوسعت عيونه بدهشة وقال_يا خبر!
ده سجن الملك المذهب، محدش يعرف بوجوده غير الملك رسلان و...
ابتسمت بسخرية وكملت_والملكة زمرد طبعًا
اتنهدت وبعدين قالت_رحيق كانت في زنزانة من الزنزانات اللي هناك، ولكنها كانت مقتولة
سكتت شوية وكملت_بدر اللي قتلها بأمر من زمرد
حس قائد الحرس بالصدمة لدرجة إنه مقدرش يرد، فطلعت ضي القمر الزجاجة ورفعتها قدام عينيه وقالت بقوة_اسمعني كويس يا قائد الحرس
عشان نرجع بدر
محتاجة مساعدتك في اللي هقولهولك دلوقتي...
ـــــــــــــــــــــــــــــــــــــــــــــــــــــــــــــــــــــــ
على جانب تاني
دخلت الملكة زمرد لمكان عرش الملك رسلان اللي كان قاعد على عرشه وساند إيديه الاتنين وباصصلها بجمود، انحنت وهي بتبصله بطرف عينها وبعدين قالت بابتسامة صفرا_طلبتني يا مولاي؟
فضل مثبت عيونه عليها شوية، وبعدين نزل من على عرشه بخطوات بطيئة أثارت ربكتها في الأول ولكنها رفعت أنفها بكبرياء عشان متبينش قلقها، أما هو فقرب لحد ما وقف قدامها وبصلها من فوق لتحت وقال_مش ملاحظة إنك بقيتي تخرجي كتير اليومين دول من المملكة؟
ابتسمت وهي بتقرب منه أكتر وبتبص في عيونه وبتقول_إيه؟
مستكتر إني أحاول أعوض السنين اللي ضاعوا في حياتي بسببك؟
أشهر صوباعه في وشها وهو بيقول من بين أسنانه_بسببك أنتِ
بسبب السحر اللي عملتيه بإيدك يا زمرد، مش هنضحك على بعض، هتنكري إنك استخدمتي سحرك في الشر على عكس باقي شعبك؟
رفعت راسها بغرور وكإن مش فارق ليها كل الكلام ده، فاتكلم الملك رسلان بقوة_صدقيني يا زمرد لو اكتشفت إن ليكي يد في الإنهيار اللي بيحصل للمملكة هدمرك!
ابتسمت وقالت ببرود_ملكنا العظيم اتمنى توفر تهديداتك للي يستاهلها
مش ليا أنا
اللي قدامك الملكة زمرد، أنا مش مجنونة عشان أدمر مملكتي بإيدي
ضحك الملك رسلان بخفة وقال_مملكتك؟
أنتِ مجرد دخيلة على المملكة يا زمرد
بس عامةً مسير ألاعيبك هتتكشف
سواء ألاعيب دلوقتي، أو زمان...
لوهلة جفلت بقلق ولكنها حافظت على تعابير وشها وهي بتقول_وأنا منتظرة يا جلالة الملك..
قالتها وانحنت ليه وبعدين خرجت من المكان تحت أنظاره، فوقف هو يتابع أثرها وهو مشبك إيديه الاتنين ورا ضهره، دقايق عدت وهو واقف بيفكر مكانه، لحد ما اتفتح الباب ودخل واحد من الحراس اللي أدى تحيته وبعدين قال_فيه ضيفة عايزة تقابل جنابك يا جلالة الملك
عقدت حواجبه بتعجب وقال_مين؟
دخلت الملكة آريا في الوقت ده، وانحنت بخفة وهي بتقول بابتسامة واثقة وراس مرفوعة_أنا يا جلالة الملك...
