رواية وجوه فى العتمه الفصل الثالث عشر13 والرابع عشر14 بقلم منه ممدوح
من بين كل الجلبة اللي حصلت مسمعش لصوت أي حد من الموجودين، صراخ فارس بحسرة، صدمة عايد وخالد، ده غير اعتراض زايد على اللي بيحصل، مكانش فيه غير حسن اللي كان حاسس بحالة عامر، وكان عارف إن كل انفاعلاته داخلية، وشايف كويس نظرة القهر على في عيونه، قرّب منه وربت على كتفه، فرفع عامر عيونه المشتعلة بغضب ليه، ورجع بص على اللي بيحصل تاني، لحد ما الشرطة خدت السائق والشاحنة واتحركوا بيها، في الوقت ده وجه كلامه لحسن وسعد وقال_خذ الرجالة واطلعوا على القسم، وأنا جاي وراكم
حس حسن بالقلق عليه، ومن ملامحه كان عارف إنه وراه مصيبة، فجري وراه وهو بيقول_لوين رايح بس يا عامر؟!
وقف يطمنه بنظراته، وربت على دراعه وهو بيقول بملامح مظلمة_متقلقش، مشوار في السريع وراجع
المهم خلي فارس يصلب طوله، وروحوا على القسم تابعوا اللي بيصير هناك
هز حسن راسه بطاعه، وهو بيتابع اللي ركب عربيته واتحرك بسرعة مهولة وعصبية لدرجة إن الجو اتملى بالرمل بسببه.
كان مشدد قبضته على مقود القيادة، عيونه مثبتة على الطريق، وكل اللي شايفه نظراتها البريئة قدامه، اصرارها على الخروج رغم اعتراض والدته، وكلام حمد لما قاله إنها راحت نفس المكان اللي قابلها فيه عزيز
تصرفاتها الغريبة اللي نقلها ليه حمد
ودخولها لحمام الكافيه لفترة من الوقت وبعدها خروجها في حالة مزرية
وقوفها في البلكونة وقت خروجه وكإنها عارفة هو رايح فين
ملامحها الغامضة واللي كان باين عليها القلق
كل دي كانت دلائل على إنها اتفقت مع عزيز ضده، راحت حطت إيديها في إيده عشان تنتقم منه!
جز على أسنانه في الوقت ده وهو بيحرك رقبته المتيبسة للجهتين ونظراته وملامحه كانت مرعبة بشكل يخض
وصل في الوقت ده للبيت، دخل مدخل البيت بالعربية بهمجية وشد الفرامل فجأة أصدر صوت عالي خلاها تنتفض من على سريرها برعب، ازاي كان هيجيلها نوم وهي عارفة بإن عزيز هيوقعه النهاردة زي ما اتفقت معاه!
قامت بتوتر وحطت شال على كتفها من برودة الجو، وخرجت للبلكونة تبص بفضول
شافت العربية واقفة في المدخل، ولكنه كان ما زال جواها، مثبت إيديه الاتنين على المقود وباصص قدامه في الفراغ، سندت هي على السور تبص لحالته بتعجب، فرفع عيونه ليها في الوقت ده، اللي اشتعلت أكتر وهو شايفها بالهيئة دي قدامه.
نزل من العربية وهو بيقفل الباب وراه بعنف خلاها انتفضت بخضة، ودخل لجوا البيت بملامح متجهمة سريعة، لقت نفسها بتدخل لغرفتها وبتقف قدام الباب من جوا بترقب، وكإنها حاسة إنه جايلها، بلعت ريقها بتوتر وحست إن حلقها بقى جاف من القلق.
وقبل ما تستوعب كانت شهقت بخضة لما اقتحم الأوضة عليها بعنف، فهتفت بقلق_عـامـ....
صرخة هلع خرجت منها قطعت ندائها ليه لما هجم عليها قابضًا على رقبتها بعنف، اتوسعت عيونها وهي بتبصله بذعر، في حين كان باصصلها وهو بينقل عيونه المرعبة عليها، ونطق من بين أسنانه_خرجـتـي مخصـوص عشان تقابلي عـزيـز؟!
اتشبثت بإيديه وهي بتحاول تبعده عنها، أما هو فصرخ بعنف خلاها تنتفض_ردي!
ومن بين أنفاسها المتقطعة حاولت تنكر_أنا..
أنا مش فاهمة أنت بتقول إي.....
قاطعها لما شدد على عنقها أكتر وزعق بأعصاب مشدودة_سمعتيني وأنا بتكلم في التليفون صح!
أنتِ اللي كنتي ورا البــاب!
نزلت دموعها بهلع لما رعبتها حالته اللي مبتبشرش بالخير أبدًا، حست إن اللي قدامها مش عامر اللي أخدت على بروده الفترة اللي فاتت، ابتدت تتحرك بعنف وهي حاسة بالاختناق، أما هو فزمجر وهو بيكمل_روحتـي اتفقتـي مع عزيز عليا صــح!
روحتي حطيتي إيدك في إيد عدوي رغم إني حذرتك تبعــدي عنـه
روحتي بعتيــني ليــه!
بكت بإنهيار وهي بتقول بتوسل_عامـر
عامر بالله عليك هتخنق
ابعد عني!
دفعها بعنف لحد ما وقعت بضهرها على السرير فاتأوهت وهي بتغمض عيونها بألم، أشرف عليها هو بجسده، كان مايل فوقها ومحاصرها، في حين إيده كانت لسة على رقبتها، خصلاته الثائرة اللي ممزوجة بالشيب نازلة على عينيه، إيديه المرتجفة اللي مثبتها على عنقها، في حين زعق بغضب جحيمي_كان لازم اقتلك من أول يوم جيتي فيه هنا
كان لازم أخلص منك
أنا اللي جيبته لنفسي
بس ملحوقة يا صحفية، همسح أي ذرة شفقة من ناحيتك
أنتِ حلال فيكي الموت!
ابتدت تخربشه بضوافرها على إيديه وهي بتكح باختناق، لدرجة إنه دراعه اتجرح بالفعل، في حين بتقول بتوسل_سيبني يا عامر
سيبني بالله عليك
بإيده التانية ثبتها على عنقها، ومد إيده لخصره طلع سلاحه ورفع صمام الأمان وثبته على اسفل فكها، مكانش في وعيه، كان في حالة جنون عيونه الحمراء المرعبة، العرق المتصبب على جبهته رغم إنهم في عز الشتا، أوردته النافرة من العصبية، كان كل اللي في باله إنها طعنته وراحت اتفقت مع عدوه
حذرها تبعد عنه
قالها متقابلهوش تاني
قالها إن فيه حاجات كتير متعرفهاش
ومع ذلك في أول فرصة جاتلها راحت اتفقت ضده
كان مستني إيه؟
إن جوازتهم تكمل بشكل طبيعي؟
تتقبله كزوج وتكمل معاه حياتها؟
يقين من وقت ما ظهرت وهي غرضها واحد وهو عارف، ومع ذلك سمح لقلبه اللي يقوده وخلى شفقته واعجابه بيها اللي يغلبوا عقله
وهو عامر الزيات، مفيش مجال للضعف عنده
ممنوع!
_كــيف اتجـرأتـي ؟!
كـيف سويـتـي كذه ؟!
كــيف!
سمحتلك تخرجي، سمحتلك تاخدي راحتك، سمحتلك تتنفسي، حميتك من أمي، مسمعتش لكل اللي قالولي اقتلك
قولت طايشة، وقولت مغفلة متعرفش اللي فيها، قولت تعمل اللي عاوزاه فيا براحتها، تشتم، تزعق، تقل أدبها
بس تروحي تتفقي مع أعدائي وأنتِ جوا بيتي وتحت نفس السقف اللي أنا فيه!
هقتلك يا يقين!
مدت إيديها في الوقت ده وهي باصة لعيونه المشتعلة، كان فيهم مزيج بين الغضب، الحقد واللوم، وكإنه مجروح!
ولكن مكانش في بالها غير إنها تنقذ نفسها، فعافرت لحد ما امتدت إيديها لتحت المخدة، مكان السكين اللي محتفظة بيه، مسكته وهي بصاله برعب ومازالت بتعافر، وفلحظات كانت طلعت السكينة، وقبل ما تطعنه كان فاجئها وقبض على كفها اللي فيه السكينة.
اتسعت عيونها بهلع، فبصلها هو بابتسامة مرعبة أظهرت أسنانه، وقال_مش كل مرة هتصيب معاكي!
نزلت دموعها وهي حاسة بالألم من رقبتها ومن قبضة إيده على كفها، فضغطت على جفونها وبعدين صرخت بإنهيار_آه أنا اللي كنت ورا الباب يا عامر، أنا اللي سمعتك وأنتَ بتتكلم عن التهريب كإنها حاجة بسيطة لا ومتضايق إنك شغال الفترة دي في الأسلحة الخفيفة ولا كإنك بتهرب تفاح!
أنا اللي روحت دورت على عزيز واتفقت معاه!
عارف ليه يا عامر؟
عشان أنتَ تستاهل،
دمرتني، سرقت مني حياتي، سرقت مني أحلامي
قضيت على سعادتي، كرهت أهلي فيا، خلتهم يطردوني من شغلي
وفوق كل ده سمعتي بقت على كل لسان بسببك
العلاقة السرية بين الصحفية المتغيبة وواحد من رجال شمال سيناء،
اكتشاف جواز الصحفية المتغيبة بدون علم أهلها،
علاقة كانت تجمع الصحفية برجل اعمال في شمال سيناء عشان كده راحت العريش مخصوص!
حس هو إنه اتجمد، فخفف من ضغطه بالسلاح على رقبتها وهو حاسس بالعجز قصاد نظرة القهر اللي في عينها، في حين كملت هي بشهقات متقطعة_وغيره من الأخبار اللي قرأتها بعيني
قرأتهم بعينيا دول!
كنت مستني مني إيه؟
اسامحـك؟
اتعامل معاك عادي وانسى واقبل بالأمر الواقع؟!
اعتبرك جوزي فعلًا؟!
في الوقت ده اشتعلت عيونها بكره، وصرخت_بعينك يا عامر
الموت بالنسبالي أهون من إني أقبل بإنك جــوزي
أنا اتجوزت مرة واحدة بس
جوزي الوحيد هو يوسف منصور، الظابط الشريف اللي أنتَ قتلته!
وكون إنك لسة واقف قدامي سليم يبقى انتقامي لسة مخلصش
أنا مش ندمانة يا عامر على اللي عملته، ولسة عند وعدي، هنهيك
أنا مش خايفة منك!
شال إيده وهو بيدفع وشها فاتألمت من بين دموعها وهي بتشهق بعذاب، ساب إيديها اللي كان فيها السكينة واللي اكتشف فيما بعد إن السكينة جرحت باطن إيده اللي كان بينزف، فضلت مكانها بتبكي وهو واقف باصصلها بصدمة من كمية الكره اللي بتحمله ليه، فضل يلف حوالين نفسه وهو بيمسح على وشه بعصبية، في حين هي اتعدلت على السرير وهي بتدلك رقبتها وبتبكي
وبعد صمت ملى الغرفة عدا من صوت شهقاتها، قرب منها وجذبها من دراعها بعنف وهو بيقول_تعالي معايا
وبالفعل أجبرها تقوم تمشي معاه وسط اعتراضاتها ولكنه كان ضاغط على دراعها بقوة آلمتها
حاولت تبعد عنها وهي بتصرخ_سـيبني
واخـدني على فـين!
وقف مرة واحدة وقرب وشه من وشها وهو بيقول_هوريكي حقيقة جوزك الشريف
هوريكي أنتِ ضيعتي نفسك عشان مين!
عقدت حاجبها باستغراب، ولكنه كان كمل مشي بيها، كان بيجرها حرفيًا وهي وراه بتتألم من ضغطه على دراعها، شافته بيدخل بيها بين ممرات في البيت لحد ما وصل لغرفة ما، فتحها ودخلها لجوا وقفل الباب وراه، وقفت تتطلع للمكان بتعجب، كان غرفة مكتب، فيها مكتبة صغيرة مليانة كتب معظمها عن التجارة، ده غير المكتب الصغير والكنبة اللي فيه،
جذبها من دراعها مرة تانية، وأجبرها تقعد على الكنبة، في حين اتحرك هو وطلع مستندات وأوراق كتيرة من درج كان مقفول بمفتاح، ورجع ناحيتها تاني، حدف الورق في وشها بعنف وهو بيقول بغضب_خذي
شوفي حقيقة جوزك اللي عايزة تنتقميله بعينك
شوفي كنتي عايشة مع مين!
على الأقل أنا مخبتش حقيقتي عنك ولا أنكرت
إنما هو كان معيشك مغفلة يا سيادة الصحفية!
رمتله نظرات متعجبة بينه وبين الورق، وبأنامل مرتعشة مدت إيديها تاخد الأوراق، فتحتهم وهي بتبلع ريقها بقلق وكإنها عارفة إنها هتشوف حاجات متعجبهاش، وبالفعل، مجرد ما فتحت الورق اتسعت عيونها بعدم استيعاب وهي بتقرأ اللي فيه بدموع متجمدة، شحبت ملامحها وهي بتتنقل بين كل ملف والتاني بصدمة، في حين كان واقف هو ساند على الحيطة ومربع إيديه قدام صدره وهو بيراقب انفعالاتها بسخرية، وابتدى يتكلم_جوزك الشريف من أيام ما كان في السويس وهو كان متفق مع تجار المخدرات، بيحاميلهم يعني مقابل نسبة من أرباحهم، وعزيز وصالح الرشيدي اللي روحتي حطيتي إيدك في إيديهم، عرفوا بتورطه في هذي الوساخة، لاقوا إن مفيش أحسن منه ييجي يمسك هنا في العريش عشان يساعدهم في تهريب المخدرات والأسلحة جوا البلد
فك إيديه وقرب منها وقف قدامها وهو بيكمل_وفعلًا بنفوذهم ومعارفهم قدروا ينقلوه هنا، وطبعًا حصل الاتفاق بينهم اللي يوسف قبله بمنتهى البشاشة، وقتها إحنا عرفنا باللي هيصير، بعتناله يبعد عن المواضيع هذي، وميحطش إيده في إيد عزيز وصالح
قولناله يفضل ظابط بشرفه بدل ما يساعد هذولا الكلاب
حذرناه بدل المرة ألف
هددناه بالقتل لو مرجعش عن اللي بيعمله، ولكن نفوذ الرشايدة والفلوس اللي جاتله من وراهم هي اللي عمته، وفي الآخر هما اللي غدروا بيه لما عاز يزود من نسبته وإلا هيقلب عليهم
ولما هددهم آخر مرة بإنه هيكشفهم خلصوا عليه!
اتجمدت إيديها اللي كانت ماسكة الأوراق، شحبت شحوب الموتى، رفعت عيونها الحمرا ليه وتمتمت_مستحيل!
مستحيل الكلام ده
مش ممكن، يوسف عمره ما كان كده
عمره ما كان جشع
عمره ما كان عديم شرف زيكم!
ابتسم باستهزاء ورد وهو بيشاور براسه_قدامك الورق، قلبي فيه براحتك للصبح
رجعت بصت في الورق تاني، بالفعل كان كلامه صح، كلها مستندات بتدين يوسف وبتثبت إنه متعاون معاهم، حتى كانت مرفقة بصور ليه معاهم في اوقات التسليم، حست إنها مغفلة فعلًا، إنها عاشت مع واحد متعرفوش لمدة سنتين
سنتين من الكدب والخداع، سنتين وهي شايفاه ظابط شريف مبيرضاش بالحرام، كان بيحكيلها قد إيه بيعافر عشان يمسك المجرمين دول
وقد إيه بيعاني بسبب التهديدات اللي بتتبعتله، حتى أجبرها تجهض جنينها عشان كان خايف عليه، رغم إنها اتوسلتله بالدموع إنها تسيبه
ولكنه رفض رفض قاطع بحجة خوفه!
على كده معقولة حبه ليها كان كدب برضه؟!
سابت الورق من إيديها، واتحاملت على نفسها وهي بتقوم تقف بضعف تحت أنظاره اللي كانت متابعها، كانت حاسة بخدل في كل جسمها، رجليها مش قادرة تشيلها، جسدها بيرتجف بعنف، وعينيها مليانة بالدموع المحبوسة.
عدت من جنبه وهي بتتسند على الكنبة بضعف، سرعان ما حست بفقدان توازنها وأنها هتقع وهي بتشهق بألم نابع من صدرها، فسارع عامر ناحيتها وسندها وهو بيقول بجمود_على مهلك يا صحفية
هتقعي!
اتشبثت بدراعه عشان تحاول تنسد نفسها، رفعت عيونها ليه وهي بتبكي، بسطت كفها على شفايفها وهي بتبصله بنظرات مليانة ضعف وقهر لمسته من جوا، شالت إيديها من على شفايفها، وشاورت على نفسها في حين اتكلمت بنبرة مرتعشة_إزاي عمل فيا كده؟!
حس بالشفقة عليها، كان عارف ومدرك كويس إنها صاحبة مبادئ، استنكارها لشغله وحياتهم كان موصله ده،
كانت شايفة جوزها حاجة كبيرة، أو هو اللي كان مفهمها ده، عشان كده مكانش بيلومها على اللي عملته، كان مدرك إنها لو عارفة الحقيقة عمر ما كان حصل كده، ولكن لوهلة أشفق عليها ومقدرش يصفعها بالحقايق، خاف على مشاعرها!
نظراتها اللي مليانة ألم وخذلان وجعته وخلت قلبه ينتفض رغمًا عنه، وكإن عالمها كله إنهار بالفعل دلوقتي، ضغطت على جفونها وهي بتنحب بألم، فحافظ هو على ملامحه الجامدة، ولكن خرجت نبرته قلقانة وهو بيقول_أنتِ بخير؟
ضمت شفايفها وهي بتشاور لنفسها وللورق بعجز، وبعدها بعدته عنها وهي بتتحرك بصعوبة ساندة على الحيطة، وهو جنبها احتياطًا لتقع، خرجت من الغرفة واتحركت وهي مازالت بتتسند على الحيطة لحد ما وصلت لغرفتها، فتحت الباب ودخلت لجوا تحت أنظاره، لقاها بتتجه للسرير وبتتمدد عليه وهي بتضم نفسها في وضع الجنين، لافة إيديها حواليها وهي بتملس على إيديها وضهرها كإنها بتواسي نفسها عن كل القسوة اللي اتعرضتلها
فضل هو واقف باصصلها بحيرة، رغم الغضب اللي كان جواه من ناحيتها، رغم إنه لقى نفسه هيقتلها فعلا بدون تردد، ولكن حالتها دلوقتي أكدتله فعلًا إنها مجرد ضحية
وفي الوقت ده شاف كسرة في عيونها، عكس القوة اللي كانت فيها، أدرك إن يقين هتختلف شخصيتها تمامًا، بعد ما لقت نفسها فقدت كل شي.
حس بالألم في كفه، رفعه قدام عيونه فشافه مجروح بعمق، نقل نظره عليها وهو بيتنهد وبعدين اتلفت عشان يخرج، ولكنه لقى نفسه بيرجع وبيتجه ناحيتها تاني، رفع عليها الغطا ورمى نظرة أخيرة ليها وبعدين خرج.
نزل لتحت عشان يروح القسم، ولكن لقى فيه جلبة في البيت، كانت أمه واقفة في حالة مزرية ومعاها نساء العيلة، أول ما شافته جريت عليه وهي بتهتف بكره في حين بتشاور لمكان غرفتها_الملعونة هذي هي اللي بلغت مش كذه؟!
هي اللي راحت اتفقت مع عزيز صح؟
عشان كذه كانت هتموت وتخرج!
قصاد نظرات أمه المشتعلة لقى نفسه بيسكت وهو بيضم شفايفه بعجز، فاحتوت كتفه وهي بتعيد سؤالها_رد عليا يا عامر، رد عليا عشان قسما بالله المرة هذي هكمل اللي سيبته ناقص!
كان عارف إنها قصدها على قتلها، وبعد تردد كبير لقى نفسه بيقول_يقين ملهاش دعوة باللي حصل ومتعرفش حاجة
ولكن فاطمة مصدقتهوش واستنكرت وهي بتقول_مفيش غيرها ليها مصلحة في اللي حصل
هي اللي هددتك وهددتني، هي اللي أقسمت إنها هتلف حبل المشنقة حوالين رقبينا
مفيش غيرها يا عامر!
زفر بنفاذ صبر وهتف_ياما
قولتلك يقين مالها دخل
شيليها من دماغك بقى أنا مش ناقص!
نهى كلامه وسابها وخرج بخطوات سريعة قبل ما يصدر منه رد فعل يخليها تشيل منه، لوهلة مكانش عارف ليه دافع عنها، بس حس إنه مجبر يحميها من بطش أمه
كفاية الصفعات اللي اتعرضتلها لحد دلوقتي..
أما فاطمة فتابعته بدهشة وهي بتقول_أنا متأكدة إنها هي اللي ورا اللي صار
ومتأكدة إنك عارف أنتَ كمان يا عامر..
****
وصل عند القسم، شاف ولاد عمامه واقفين برا مع بعض، قرب منهم وقال بقلق_وش اللي صار؟!
ربت حسن على كتفه وقال_ما تقلق ياخوي، طلع أصيل وطمرت فيه العشرة، شال الليلة كلها ومجابش سيرتنا في شي.
شافوا سعد خارج من جوا، قرب منهم وهو بينقل نظراته بينهم وقال_هيحبسوه اربع أيام على ذمة التحقيق
وجه كلامه في الوقت ده لعامر_بيقولك اتطمن يا عامر بيه، لو عليه هيفديك بروحه
هز عامر راسه وهو حاسس بالامتنان والحزن عليه في نفس الوقت، فقال_جيبله أكبر محامي في البلد، عاوزه ياخد أقل عقوبة ممكنة
مش عاوزه يتاخد بذنبنا!
هز سعد راسه، فدور بعينه في المكان لحد ما شاف فارس أخوه وهو قاعد على الرصيف ومحتوى راسه بين كفوفه، اتنهد بضيق وقرب منه، حط إيده على كتفه فرفع فارس عيونه شديدة الاحمرار ليه وهو بيبصله بقهر، فاتكلم عامر_هون على نفسك ياخوي
فداك مال الدنيا كله
ضم فارس شفايفه وبحزن قال_عمرها ما صارت معايا يا عامر، هذي وصمة عار هتفضل ملاحقاني!
فربت عليه عامر وهو بيقول بمواساة_أنتَ مالك ذنب
إحنا اللي اتغدر بينا
قام فارس وقف واتبدلت نظراته للغضب والحقد الشديد، وسأل_مين اللي ورا اللي صار ياخوي؟!
زفر عامر ورد_عزيز
ضم فارس قبضة إيديه بعصبية شديدة، ولكن لوهلة اتجمد ووجه نظره ليه وهو بيقول_مرتك؟!
سكت عامر وحط وشه في الأرض ومقدرش يرد عليه، غمض فارس عيونه وهو بيحاول يتمالك أعصابه وضم قبضة إيده بضيق رهيب
ولكن قطع حوارهم غالب ومروزق اللي قربوا منهم وقال غالب بغضب_قولتلك يا عامر
قولتلك خذ بالك، عاجبك كذه وإحنا مش عارفين عدونا من حبيبنا؟!
بصله عامر بعجز ممزوج بالضيق ومردش، فاتدخل مرزوق وقال_سبق وقولتلك يا عامر، أي حاجة هتحصل لهذي العيلة أنتَ المسئول عنها
ومفيش غيرك هيتلام!
اتنهد عامر ورد_هتتعوض يا عمي
ما تقلق
فزعق غالب بعصبية_هتتعوض كيف يا عامر؟!
العيون بقت علينا والحكومة هتفضل مراقبانا بعد اللي صار، قولي أنتَ هتتعوض كيف وواحد من رجالتنا مرمي جوا والله أعلم هييجي اليوم اللي هيبتزنا فيه ولا لا!
رغم ضيق فارس من عامر واللي يقين عملته، ولكن مقبلش أبدًا إن عمامه يستغلوا عجزه وييجوا عليه، فاتدخل بسرعة وهو بيقول بعصبية_أيش جرا يا عمي!
من أول غلطة صارت خلاص عامر بقى المسئول وبقى عليه هباب؟
ما طول عمره هو اللي ممشي تجارتنا على عجين ومبيحصلش أي مشاكل
من مرة اتصابنا فيها خلاص هتعلقوله حبل المشنقة ولا أنتم عاوزين تقفوله على الغلطة!
إيش نسيتم كل اللي فات وخلاص مفتكرتوش غير اللي صار اليوم؟!
سكت غالب ومرزوق ومقدروش يتكلموا ولكن فضلوا يتبادلوا النظرات الصامتة بين بعض.
لفت انتباههم كلهم وصول عربيتين في الوقت ده ركنوا قدامهم، اتعدل عامر وهو بيتابع بفضول، فشاف صالح وعزيز نازلين من واحدة من العربيات والتانية كان نازل منها رجالتهم، فتح عزيز دراعه في الهوا وهو مبتسم بسخرية وقال_جيت اقولك بنفسي قدر ولطف
تعيش وتاخد غيرها يا نسيبي الغالي!
اشتعلت عيونه واتبدلت نظراته لتانية مرعبة، جز على أسنانه وفلحظات كان طلع سلاحه من خصره واتجه ناحيته وهو بيقول_جيت لأجلك يا عزيز....
الحلقة الرابعة عشر
قبل ما يتجه لعزيز كان فارس وعايد مسكوه وهما بيحاولوا يخلوه يرجع عن اللي في دماغه في حين كان هتف فارس_اهدى ياخوي هتودي حالك في داهية، إحنا قدام القسم!
ولكن عامر مكانش شايف قدامه غير استغلاله ليقين وتدميره لشغله، فزق فارس وعايد فعنف ولكن كانوا قدروا يجذبوا السلاح منه، رمقهم بنظرة قاتلة وبعدين اتجه ناحية عزيز اللي كان واقف بيحرك سلسلة في إيده وهو بيبتسم بسخرية، قرب منه عامر وبدون تردد كان لكمه بعنف بقبضته، وبعدين مسكه من تلابيبه وهو بيصرخ فيه_هقتلك يا عزيز
هجيب اجلك في إيدي
وفلحظات اتملى المكان بالفوضى من رجالة عزيز ورجالة عامر، معركة طاحنة بينهم في حين كان فارس وعايد وولاد عمه كانوا بيحاولوا يفضوا الاشتباك، ولكن عامر كان الغضب عاميه، قدر يسدد لعزيز لكمات متفرقة بس بصعوبة لإن رجالته واخواته بيمنعوه، ده غير رجال الشرطة اللي جريوا يفضوا اللي بيحصل ده
ووسط الجلبة والصياح اتجمدوا كلهم على صوت طلق ناري في الهواء، اتعدل عامر وعزيز وهما بيبصوا لمصدر الضرب فلقوه من ضابط شرطة برتبة مقدم، اللي نزل من على سلالم القسم وهو بيصرخ فيهم_إيه!
فاكرين نفسكوا في زريبة!
شوية بهايم ماسكين بعض طحن ومش مراعيين إنكوا وسط الحكومة
أنتوا فاكرينها سايبة ولا إيه؟!
قرب منه صالح وهو بيحاول يلطف الأمور عشان ميحصلش مشكلة وقال_يا سيادة المقدم هذا بس سوء تفاهم و....
قاطعه الضابط لما رفع كفه في وشه، فسكت صالح على مضض وهو بيرمقه بنظرات مغتاظة، في حين وجه الضابط كلامه للعساكر بتاعته وهو بيقول بأمر وصوت جهوري_لمولي كل اللي كانوا بيتخانقوا دول واحد واحد وحطوهملي في الحجز
قرب غالب وهو بيقول بتوسل_يا باشا...
_ولا كلمة زيادة
صرخ بيها الضابط بعنف، في حين كمل_عشان تبقوا تحترموا نفسكوا بعد كده
إحنا مش في غابة!
اتوجه الضباط بالفعل وابتدوا يفصلوا بينهم، وجه عامر نظره لعزيز اللي كان وشه اتملى بالكدمات، ورفع ايده في وشه وهو بيقول_مش هعتقك يا عزيز
صدقني مش هعتقك غير لما اطلع روحك في إيدي
ابتسم باستفزاز ورد_مستنيك يا عامر
وبالفعل الضباط أخدوهم كلهم ما عدا غالب ومرزوق وصالح اللي كانوا بعيد عن المشكلة لإن سنهم ميسمحش
دخلوهم للقسم وفصلوا بينهم، كان عامر وولاد عمه كلهم ورجالته في زنزانة، وعزيز ورجالته في زنزانة تانية.
فضل عامر يلف حوالين نفسه وهو بيمسح وشه من حين لآخر بعصبية، كان صوت نفسه عالي ووشه شديد الاحمرار من الانفعال، أما اخواته وولاد عمه فكانوا قاعدين وهما بيبصوله بصمت
لحد ما اتكلم حسن_كان لازم تمسك حالك شوي ياخوي
أهو عزيز دلوقت وصل للي كان عايزه
فأيده زايد وقال_ كان عارف إنه لو جه هتصير مشكلة قدام الحكومة وهنتاخد كلنا وأهو قدر يستفز عامر
ضم فارس قبضته وهتف_البجح جاي هنا برجليه بعد ما بلغ عننا
وديني ما هسيبه، هسفلت وشه وأخليه عبرة!
فسأل عايد وهو بيزفر بنفاذ صبر_طب والعمل
كيف هنخرج؟!
رد خالد بأمل_أبوي وعمي برا
أكيد هيتصرفوا ويطلعونا من هنا في أسرع وقت
نقل فارس نظره على عامر اللي كان باين عليه الهم والضيق لدرجة مشاركهمش في النقاش، فاتحامل على نفسه وقام وراح ربت على ضهره بدعم، اتلفت ليه عامر وهو بيبصله بعجز، في حين قال فارس_هون على حالك ياخوي
متشيلش حالك الهم، عزيز يستاهل اللي صارله، وإحنا هنطلع من هنا ما تقلق
هز عامر راسه وهو بيحاول يبتسم على قد ما يقدر،
وقعت عيون فارس على إيد عامر اللي فيها دم، فمد إيده ومسك كفه ولقاه مجروح فهتف بخضة_إيدك مجروحة ياخوي!
جذب عامر إيده بسرعة وضمها ليه وهو بيقول بجمود حاول يتصنعه_ما تقلق حاجة بسيطة مش مستاهلة
سكت وهو بيبصله بتعجب، أما عامر فرفع إيده وبص على الجرح اللي بيفكره بيها ولقى نفسه بيبتسم
كانت على وشك طعنه للمرة التانية بدون تردد!
النمرة الشرسة!
لقى نفسه بيرددها جوا دماغه وهو بيهز راسه بقلة حيلة
اتلفت فارس حواليه واتأكد إنهم مشغولين، فمال ناحيته وهو بيهمس_وش هتسوي مع مرتك؟
اتمسحت ابتسامة عامر بسرعة وبصله بعجز ورد_مش عارف يا فارس
مش عارف!
هي اتصرفت بغباء، كانت فاكرة نفسها بتنتقم لجوزها الملعون اللي الله يجحمه
فسأل فارس بتعجب_مقولتلهاش على الحكاية من الأول ليش ياخوي
أنا فكرتك معرفها!
سكت عامر ومقدرش يرد، هو بالفعل مش عارف ليه مقالش ليها من الأول، يمكن عجبه تحديها ليه؟
حس بالانتشاء من نظرة الغضب والقوة اللي كانت في عينيها؟
حب تصرفاتها الثائرة؟
أو يمكن خاف على مشاعرها؟!
لاحظ فارس صمته اللي أكدله إن فيه حاجة مش طبيعية، ولكن اللي مش هيقدر ينكره هو إنه لاحظ نظرات إعجاب عامى ليقين..
****
كانت ما زالت على حالتها من ساعة ما سابها، دموعها بتنزل بغزارة، بتعيد كل ذكرياتها مع يوسف من بداية تعارفهم لحد يوم ما اكتشفت إنه مات
كلامه
حنيته
وعوده
خناقاتهم اللي كانت بسبب خوفها عليه
وخناقتهم لما أجبرها تنزل جنينها
وترجع تفتكر الصور والورق اللي شافتهم ليه اللي بتدينه.
اتفتح باب غرفتها في الوقت ده بعنف وطلت منه فاطمة بهمجية اللي كانت بتصرخ_أنتِ فين
أنتِ فين يا جلابة المصايب!
مكلفتش نفسها حتى إنها تتعدل، مهتمتش، كان بالها مشغول باللي وقعت نفسها فيه عشان شخص اكتشفت إنها متعرفهوش في النهاية، دخلت فاطمة ووراها زوجات ولادها وبنتها وليلى اللي وقفوا يتابعوا اللي بيحصل من على الباب، فهجمت عليها فاطمة اللي كانت ملامحها مشتعلة، وجذبتها من إيديها بعنف خلتها اتعدلت وهي بتصرخ_قـومـي
هي كانت تكية اللي جـابوكـي!
رفعت يقين عيونها المدماة ليها، وجذبت إيديها وهي بتقول بضيق_عايزة إيه؟!
لوت فاطمة بوقها بسخرية وصرخت_عاوزة إيش؟
عاوزة سلامتك يا نور عيني!
قلبت يقين عينيها بملل، ولكن انتفضت لما فاطمة قبضت على دراعها بعنف وهي بتزعق بعصبية مفرطة_أنا عارفة إنك أنتِ اللي ورا اللي صار
عارفة إنك روحتي اتفقتي مع الكلب اللي اسمه عزيز ونقلتيله اللي بيصير في البيت يا ملعونة
أنتِ اللي ولادي اترموا في الحبس بسببك!
سكتت يقين ومردتش كانت بلا روح تمامًا ودي حاجة عصبت فاطمة أكتر، ولكن اللي لفت انتباهها هي جملتها عن إنهم في الحبس
معقولة خطتها مشيت زي ما عايزة واتحبسوا؟!
جت عهود في الوقت ده وحاولت تبعد أمها وهي بتقول_ما يصحش كذه ياما، هذي مرات عامر مهما يصير!
صرخت فيها فاطمة بجنون_اسـكـتـي مـسمعش حسـك!
مرات مين؟!
هذي عمرها ما تكون مرت ابني
الملعونة هذي المفروض ندفنها حية!
رجعت جذبت يقين اللي اتأوهت بألم وصرخت بحدة_انطقي!
أنتِ اللي اتفقتي مع عزيز ولا لا!
رفعت يقين عيونها ليها اللي اتملت نظرات متعجبة من سؤالها، في حين كملت فاطمة من بين أسنانها_انطقي يا ملعونة
إن كنتي ألفتي كذبة خليتي عامر يصدقك بيها فأنا عمري ما هصدقك
أنا متأكدة إنك ورا اللي صار
ورحمة أبوي لأكون دفناكي هنا!
ولكن عهود رجعت تجذب فاطمة وتحاول تخرجها بالإجبار وهي بتقول_يلا ياما كفاية فضايح، عامر قال مالها ذنب وما سوت شي
خلاص كفاية اتركيها
وبالفعل قدرت عهود تجبرها تمشي معاها وسط اعتراض فاطمة اللي كانت بتهتف وعيونها مصوبة على المصدومة اللي قدامها_اقسم بالله ما هعتقك يا شيطانة
أنا هعرفك مين هي فاطمة الزيات كويس
مش هرحمك يا ملعونة!
خرجوا كلهم من الغرفة إلا ليلى اللي فضلت تبصلها بنظرات متفحصة على حالتها اللي كانت مزرية، وفي النهاية قاومت رغبتها ونزلت وراهم هي كمان، أما يقين فكانت مكانها على السرير، في حالة دهشة متملكاها
معقولة مقالهمش إنها اللي عملت كده؟!
معقولة دارى عنها!
حست راسها بتشتعل من التفكير
مش لاقية سبب لإنه ميقولهمش
كان في إيده ينتقم منها ويسيبها ليهم خاصة وإن فاطمة منتظرة إشارة بس عشان تقتلها بلا تردد
ولكنه معملش كده ومقالش إنها ورا اللي حصل!
قامت اتحاملت على نفسها وبصت على صورتها في المراية، كانت باهتة وشاحبة، فاقدة للحياة في حالة مزرية، عيونها حمرا وارمة
فضلت واقفة مكانها وهي ثابتة، لحظات وابتسمت وهي بتبص لنفسها بسخرية ونظرات استحقار، وبعدها اتجهت للبلكونة، شافتهم واقفين في بهو البيت، باين عليهم القلق، في حين كان غالب بيطمن فاطمة وهو بيقول_ما تشيلي هم يا مرات أخوي
هما هناك عشان اتشاجروا بس قدام القسم والضابط حب يأدبهم
فقالت فاطمة من بين أسنانها_كله من الملعون عزيز
أنا هعرف أربيه هو وأبوه الناقص كيف!
لوهلة لقت يقين إن الأنظار بتتجهلها، ولكنها مكانتش خايفة، فضلت واقفة مكانها شوية، وبعدها اتلفتت ودخلت قفلت بلكونتها ونامت على السرير على ضهرها وهي باصة للسقف بصمت..
****
أشعة الشمس المسلطة على وشها اعاقت نومها اللي غرقت فيه في بدايات النهار بالعافية، رفعت إيديها ومسحت على وشها بضيق، واتلفتت بعيونها الناعسة ناحية البلكونة، سرعان ما اتنفضت وهي بتتعدل بخضة، لما وقعت بعيونها على اللي كان قاعد على الكرسي قدام السرير، حاطت رجل على رجل بأريحية وساند دقنه على قبضته
بصت حواليها باستغراب وبعدين بصتله وهي بتقول متحشرج من النوم_أنتَ..
أنت بتعمل إيه هنا؟
مردش عليها وفضل باصصلها بصمت، فشالت الغطا من عليها ونزلت رجليها على الأرض، عدلت خصلاتها الثائرة بإرهاق وقالت_أنتَ خرجت ازاي
مش كنت محبوس؟
نزل رجله واتعدل وهو بيميل وقال_زعلتي إنك شوفتيني لسة برا؟
ولا زعلتي عشان كنتي فكرتي حالك خلصتي مني؟
سكتت وهي بتضم شفايفها ومردتش، ولكنها حاشت بنظرها عنه وهي بتقول بتوتر_مقولتش لأمك عني
أقصد
معرفتهمش إن أنا اللي اتفقت مع عزيز
عجز هو عن الرد، ولكن في النهاية رفع راسه وحافظ على نظراته الجامدة وقال_ملقتش عقاب أحلى من إنك تعرفي حقيقة اللي كان جوزك
رفعت عيونها ليه في الوقت ده اللي اتملت بالدموع وحملت نظرة متألمة، اتحشرج صوتها وهي بتقول_كان عندك حق
بصلها بتعجب، فمسحت هي دموعها اللي نزلت غصب عنها ورفعت وشها وهي بتقول_كان عندك حق وأنتَ بتقول إن أنا مغفلة
أنا أكبر مغفلة فعلًا
عيشت سنتين مع واحد مدعي الفضيلة، خدعني وخلاني كنت هضحي بحياتي عشان انتقمله، وفي الآخر هو اللي كان موقع نفسه في ده بإرادته!
لوهلة عجبه الكلام، بعد ما حس إنها بقت كارهة جوزها ومش متقبلاه، ولكن العجز اللي كانت فيه والخذلان كانوا مسببين غصة في قلبه، ولكنها كملت بقوة_ولكن أنتَ برضه مش ملاك يا عامر
كنت بتتكلم عن يوسف إنه بيساعد في تجارة السلاح والمخدرات في البلد
وبالنسبة ليك أنتَ؟
بتتاجر في البرتقان مثلا؟
ما أنتَ متقلش عنهم في حاجة
مغموس في نفس المستنقع القذر اللي هو كان فيه!
اتجهمت ملامحه واتملت بالضيق، قام وقف وقرب منها، فضلت هي قاعدة مكانها وبصتله من تحت لما وقف قدامها، فاتكلم هو_متشبهينيش بيهم
أنا عمري ما اتاجر في السم هذا
وبالنسبة للأسلحة فأنا بتاجر بيها برا مصر، ببعتها للدول اللي فيها حروب، أو عامة أي دول برا مصر
إنما أنا مبشتغلش في التهريب جوا بلدي
كانت بصاله بصدمة من بجاحته، سرعان ما انفلتت عنها ضحكة بعد ما ساهم في انفلات أعصابها، وقف هو يبصلها بتعجب، فاتكلمت هي بسخرية_قالوا يا فرعون إيه فرعنك قال ملقتش حد يلمني!
رفع حاجبه وهو بيرمقها بنظرات مشتعلة من استهزائها بيه، قامت وقفت فكانت على مسافة قريبة منه، بصت لعيونه مباشرة بنفس نظرات الكره ورددت من بين أسنانها_أنتَ متقلش عن وساخة يوسف وعزيز في حاجة، يمكن أنتَ أقذر منهم عشان بتبرر الغلط!
ضحكت وهي بتلف وشها وبتقول بتريقة_قال مبتاجرش في بلدي!
شبك عامر إيديه ورا ضهره، وقال_افهم من كذه إنك هتكملي في اللي بتعمليه؟!
رجعت بصتله وبقوة قالت_أنا صحفية يا عامر، يعني مهنتي هي إني أكشف عدمات الشرف اللي زيك!
مال ناحيتها وهو بيهمس باستفزاز_قصدك صحفية مشطوبة من النقابة
ومفصولة من الجريدة
حست هي بإنها اتجمدت من إهانته، ولكن كلامه مزادش إلا اشتعالها، فبغل قالت_طب ما حلو أهو
طلعت عارف
زي ما عارف إنك أنتَ السبب في كل ده
أظن ده سبب كافي يخليني أنتقم منك ولا إيه؟!
ابتسمت وهو بيتأملها من فوق لتحت، رفع إيده وقربها من وشها قاصد يلمسها، ولكنها نفضت إيده بعصبية، حس هو بتسلية وقال_مشكلتك يا صحفية إنك بوق على الفاضي
وبعدين يرضيكي الناس يقولوا فضحت جوزها بعد قصة الحب العظيمة اللي كانت بينهم؟
فضلت بصاله بعيون اتجمدت الدموع فيهم، فهمس وهو بيبص في عيونها مباشرة_أنتِ بقيتي مراتي يا يقين
اقبلي بهذا
عشان مش هتخرجي من الدار هذا غير على قبرك
حست هي بالقهر فقالت بوعيد_يبقى متلومنيش على اللي هعمله بعد كده يا عامر
طول مانا عايشة هفضل أحارب عشان أخرج من سجنك
مش هستسلم لإني أبقى مع واحد زيك!
ابتسم بعبث وهو باصص لعيونها اللي كانت مشتعلة بتحدي، وبعدين سابها واتحرك عشان يخرج وهو بيقول_أنا واقف برا
غيري هدومك وتعالي، هتفطري معانا تحت اليوم
استنكرت الأمر وهتفت_هفطر مع مين؟
استحالة طبعًا!
اتلفت قبل ما يقفل الباب وقال بلهجة لا تقبل النقاش_عشر دقايق بالضبط وهتلاقيني فاتح الباب
يا تنزلي بإرادتك يا أجرك على تحت، كيف ما تحبي.
قفل الباب وسابها تدبدب على الأرض برجليها وهي بتزمجر بغضب رهيب، دخلت الحمام وغيرت هدومها، وبالفعل بعد عشر دقايق كانت نازلة قدامه على تحت
رغمًا عنه كان عيونه مسلطة عليها، مظهرها بالزي التقليدي بتاعهم كان عاجبه بشكل ملحوظ، ده غير خصلاتها البنية اللي سايباهم على ضهرها
زفر بضيق ولقى نفسه بيقول غصب عنه_يعني مكنتيش عارفة تستري شعرك هذا!
اتلفتت ليه وبحدة قالت_ملكش دعوة
خليك في نفسك!
رمقها بحدة ونظرات تحذيرية، فرجعت تنزل هي بصمت وهي رافعة فستانها عشان متقعش بيه
اتجمدت نوارة وراوية اللي كانوا شايلين الاطباق بمجرد ما شافوهم نازلين مع بعض واتوسعت عينيهم وهما بينقلوا نظراتهم بينهم هما الاتنين
حست يقين بالارتباك
هي مكانتش عايزة تشاركهم أي حاجة
ولكن خافت منه رغمًا عنها خاصة بعد ما حاول قتلها امبارح، مش ناسية وقت ما طبق على رقبتها أو السلاح اللي صوبه عليها ونظراته المرعبة
ولكن رغمًا عنها خففت من خطواتها بإرتباك فشاورلها تمشي بتشجيع ووراهم راوية ونوارة اللي مالت على سلفتها وهي بتقول_باينها هتولع ولا إيش!
فردت راوية وهي بتحرك شفايفها للجهتين_هي والعة لوحدها من غير شي!
دخل عامر وهو بيرمي السلام، فردوا كل الموجودين وقالت فاطمة بابتسامة_ما ريحتلكش شوية ليش يا حبيبي أنتَ يدوبك لسة جاي؟!
اتجه ناحيتها وطبع قبلة على مقدمة راسها وقال_ما تقلقي ياما أنا بخير
التفتوا كلهم على هتاف جواد المتحمس بعد ما نزل من على كرسيه وجري على اللي كانت واقفة متجمدة_مـامـا يقين!
ضمها بعنف بحب طفولي، ففضلت هي تنقل نظراتها عليهم بارتباك، ورفعت إيديها تربت على ضهره جواد، في حين اشتعلت عيون فاطمة بغل أول ما شافتها
بعد عنها جواد وقال_هتاكلي معانا اليوم يا ماما؟!
هزت راسها مع ابتسامة خفيفة، في حين وجهت فاطمة كلامها لعامر وهي بتقول_هذي الملعونة وش بتسوي هنا؟!
وجهتلها يقين بنظرات مليانة ضيق، اتعدل عامر وقال_تعالي يا يقين أقعدي
مال فارس عليه في الوقت ده وسأل بتعجب_وش بتسوي ياخوي كإنك بتحط النار جنب البنزين؟!
ولكنه مهتمش لكلامه وبنبرة أعلى قال_تعالي يا يقين!
_تيجي لوين؟!
هتفت بيها فاطمة باعتراض، في حين كملت وهي بتشاور ليها باحتقار_انجري على غرفتك مفيش طفح معانا
كإنك فاكرة حالك واحدة مننا!
مقدرتش يقين تسكت وردت بنزق_قولتلك عمري ما أكون واحدة منكوا
وبعدين قولي لابنك هو اللي جايبني هنا بالعافية!
وإلا غير كده مكنتش هبقى ميتة على إني أقعد معاكوا على سفرة واحدة!
_يـقيـن!
هتف بيها عامر بتحذير وكمل بأمر وهو بيشاورلها بعينيه_تعالي اقعدي قولتلك
ولكن استنكرت فاطمة وقالت_ارجعي لغرفتك مفيش طفح هنا
_ياما!
قالها بعصبية، فردت وهي بتبصله بعند_قولت لا يا عامر
مش هقعد مع هذي الملعونة على ترابيزة واحدة
كفاية إنها راحت حطت إيديها في إيد الرشايدة
زفر بنفاذ صبر وقال_قولتلك مالها دخل وما اتفقتش مع حد
_وأنا بقولك هي اللي اتفقت مع عزيز
_يوووه!
هتف بيها عامر بعصبية وهو بيضرب بإيده كوباية الماية والأطباق اللي قدامه بعصبية فوقعوا على الأرض واتكسروا مصدرين صوت عالي خلى يقين تنكمش على نفسها بخضة
قامت راوية ونوارة في الوقت ده وخدوا الاطفال اللي ذعروا ومنهم جواد ودخلوهم جوا
في حين كان عامر بيتنفس بعصبية شديدة وهو مصوب نظره على أمه اللي رفعت راسها باستنكار لتصرفه، فقام وقف وهو بيقول من بين أسنانه_قولتلك يقين مالها دخل ياما!
ويقين مرتي هتقعد معانا كيفها كيف نوارة وراوية!
ولكن فاطمة قالت بحزم_عمرها ما تكون كيف نوارة وراوية
متقارنهمش بيها
دخلت ليلى في الوقت ده وبصت للي بيحصل بتعجب، وثبتت نظراتها على يقين اللي كانت واقفة، فاتكلم عامر بحزم ونبرة متقبلش أي نقاش_يقين حاملة اسمي، حطي هذا الكلام جوا عقلك
يعني مراتي وهتبقى أم لأحفادك في المستقبل اتعودي على وجودها قدامك من دلوقت!
شهقت كلًا مين ليلى ويقين اللي حست وكإن دلو من المياه البارد نزل على راسها زي صفعات
في حين اتجمد فارس وعايد من كلامه اللي مكانش بيحمل أي هزار بل كانت نظراته بتأكد اللي اتفوه بيه
وكل الاسئلة اللي في بالهم كلهم دلوقتي
معقولة هيخليها مراته فعلًا؟!
