رواية عروسة الخرطوم
الفصل الثالث3
بقلم سجي المدني
أثناء م قايمه سمعت صوت امي وهي بتتكلم وبتقول ولاء نايمه جوا خلي ريله هسي تمشي تصحيها ليك!
إستغربت وقلت ي ربي دا منو دا! بعد شويه جاتني ريله وقالت لي اطلعي شهاب دا مستنيك برا!
بقيت مستغربه وقلت في سري شهاب شنو! هو م قال لي ح أجي واسوقك! عاينت لي ريله وقلت ليها شهاب!؟؟؟
_ايوه
=طيب!
ريله طلعت وانا خشيت الحمام غسلت وشي!وقلت كدي اصلي العشاء خلي يستنى بس! صليت وأثناء م طالعه سمعت امي مره تانيه بتقول وينها البت دي!
طلعت وقلت ليها انا هنا! قبلت عيني على شهاب لقيتو بعاين لي شديد! انا عاينت ليه ونزلت عيني! اكيد عايز يشاكلني ويقول لي اتأخرتي ليه جوا!..
ودعت ناس أمي وطلعنا ونحن في العربيه شهاب قال لي كان تسكني م تطلعي لي ساعه مستنيك!
=انا قلت ليك تعالني! اتصلت عليك!؟ اجبرتك؟ جاوبني!
_الحسنة فيك م بتنفع
=م كان تجي اصلا وتكلف نفسك ي شهاب!
_المهم جيت!
حمرت ليه وقبلت بس تاني قبلت عليه وقلت سهرتكم كانت كيف!؟
_سهرت شنو!؟
=سهرتك انت وصحباتك! عايز تعمل نفسك رايح!؟؟
_هههه كويسه كانت!!!
فتحت خشمي كبير لاني م كنت متوقعه إنو احساسي يطلع صح يعني جد جد طلع سهران مع صحباتوو! من غير م احس طلعو دموع من عيوني غشيتهم وقبلت راسي على الشباك هو قال في حاجه!
=لا ماف!
_طيب!
وصلنا البيت هو مشى قدامي فتح الباب وقال لي خشي! لمن خشيت كان البيت كلو مطفي! قال لي شكلو الكهرباء قاطعه!.
=يمكن!
دخلت جوا البيت وبقيت في النص فجأه البيت نور! كان في بوالين كتار في الأرض وريحة البيت لذيذه بطريقه خياليه! وكان في كعكه في النص! قبلت عليه بفرح وقلت شهاب! ابتسم وقال لي ايوه!!.. انا م كنت متذكره يوم ميلادي هو اتزكرو😍..
_عجبتك المفاجأة!
=ايوه شديد!
_تعالى نقطع الكيك!
=لا دقيقه افهم طلعتي من البيت عشان المفاجأة دي!
_دا الباين اصلا!
ضحكت وعاينت ليه ومشينا على الكيكه شلت السكينه عايزه اقطعها! هو ختي يدو في يدي! عاينت ليه وابتسمت وهو برضو! قطعناها اديتو ياكل واداني برضو!
فجأه اتكلم وقال لي ممكن نبقى أصحاب! عاينت ليه بإستغراب وضحكت وقلت ايوه ممكن بس مصدومه منك انا على فكره!
_عاااارف😂
اليوم كان حلو خلاص! كونو إنو يعمل لي مفاجأة م كنت متوقعاها! طيب هو ليه بقى لطيف كده معاي! ينقلب طوالي بين يوم وليله! ي ترى هو بحبني! هي هي مستحيل!
اليوم التاني بالصباح صحيت ومودي عالي! قمت إتشورت! وطلعت من الغرفه لقيت شهاب قاعد تحت! وبحضر! نزلت ليه وقلت شهاب صباح الخير!
_صباح النور!
=كيفك!
_تمام الحمدلله!
=شهاب ممكن تنزل معاي السوبر ماركت! لأنو الإندومي عندي خلص!
_ولاء م عشان أمس اتعاملت معاك بظرافه يعني خلاص كل الايام ح ابقى معاك كدا !على فكره قلت بس أجبر بخاطرك عشان شايفك اول أمس زعلتي! بس م بيعني إنو خلاص ح نبقى حلوين ع طول! أتأكدي انا مجبور على الزواج دا م أكتر! ف م ح اكون معاك لطيف زي م انت عايزه! ممكن
اكون معاك لطيف في الأوقات البتستدعي بس م أكتر! وبالنسبه لي إنو نكون اصحاب! دي قلتها انا من باب المساعده في البيت م أكتر تجيبي لي العايزو واجيب ليك العايزه! بس! ياريت م تفكري في حاجه تانيه!
اللحظه ديك بقيت بعاين ليه وانا مصدومه شديد دموعي طلعو من غير م احس وطوالي جريت على الغرفه! كنت موجوعه بالجد طيب ليه انا غبيه كدا! معقوله اصدق لي واحد زي دا! وإنو عمرو م ح يحبني! انت ليه غبيه كدا ي ولاء! انت عارفه نفسك بتنغشي اقل حاجه! وبأقل كلام سمح أو خطوه حلوه عملها زول!
ولاء!!!!..
بقيت ببكي وشديد انا ليه إتزوجتو ليه ليه! كان اهرب و م اسمع كلام جدو! ياريت لو تعرف ي جدو انا موجوعه قدر شنو وقرارك الاخدتو دا دمرني كيف! طيب ديل يادابهم يومين! طيب لو مدت سنه او سنتين! معناته انا ح اموت عديل!
بقيت ببكي لقايت م حسيت نفسي غفيت! صحيت زي الساعه ١٢!قمت وكان راسي عايز يتكسر من وجع الراس! قمت شويه شويه من الأرض لاني كنت نايمه فيها! وخشيت الحمام غسلت وشي! وفتحت الدرج شلت لي حبة وجع راسي! بس م كان عندي مويه! طلعت من الغرفه وأثناء م طالعه سمعت شهاب بتكلم! هو كان قاعد تحت! سمعتو بقول! رضوي حبيبتي! اكيد انا م ح احبها حتي لو قعدت معاها اكيد م ح تخليني انعجب بيها أو انجذب ليها! لأنو نفسي زاته م بترضي بالحاجه دي! لاني انا ليك انت وبس!..
دموعي طلعو! غشيتهم سريع سريع وقلت انت ي دموعي بتطلعي ليه ليه بتطلعي! خليك قويه م يهذمك شئ! م تطلعي!... انا صح م بحبو! بس موجوعه من كلامو! لأنو كلامو بالجد بزعل! كونو إنو يقول لي كلام حلو أمس والليله ينقلب دي حاجه بالجد بتكسرني! وبتكسر كبريائي لاني طلعت واحده غبيه!
مشيت سريع سريع! شلت المويه وطلعت وأثناء م طالعه هو أتلفت وعاين لي بس م إشتغلت بيه! لمن وصلت قريب لي غرفتي! قال لي ولاء لو عايزه تاكلي في بيتزا في التلاجة طلبتها قبيل!... الوقت داك هو كان انتهى من المكالمه! م إشتغلت بيه وخشيت غرفتي! بلعت الحبه وشغلت المكيف وطفيت النور! وبالقوه بحاول انوم!
فجأه باب الغرفه فتح وكان دا هو! جاب لي بيتزا في صحن وقال لي ولاء قومي اكلي! انت عايزه تمرضي؟؟؟ لو عايزه تمرضي م تمرضي لي هنا! لأنو أنا م عندي حيل للمرض! قومي أكلي! انا البكون معاي لازم يكون شبعان! م رديت عليه!
قال لي عارفك صاحيه قومي! برضو م رديت! جا زح البطانيه مني وقال لي بصراخ! أنا قلت ليك م عندي حيل للمرض! قومي أكلي ياخ! م تزهجينا معاك!
قمت من السرير ووقفت فيه وبقيت بضربو في صدرو بشده وقلت انت شنو إنت شنو عليك وحش أنت حجر انت شنو وريني! نزلت من سرير! ومشيت على صحن البيتزا وجيت ختيتو ليه في وشو وقلت م عايزه اكل شيل اكلك واتخارج منييي!!! ياخ زهجت منك انا! انت بالجد زول م بتحس! عاين لي وقال لي م ح أجبرك انك تاكلي بس لو مرضتي اتحملي مسؤوليتك براك!.. قال كلامو دا وطلع!
انام بتوقع اني ممكن اشوف إنسان اسوء من دا!
