رواية عروسة الخرطوم
الفصل الخامس5بقلم سجي المدني
ختيت ليه الغداء! وختيتو ليه في التربيزه وقلت ليه ااي طلبات تانيه!!! إبتسم وقال لي لا ابدا شكرا!!!!
عاينت ليه بقرف ودخلت الغرفه!!! قعدت في السرير وقلت ي رب انا بتين ح اتفك من الحجر دا!!!!
مرو ايام كتيره علينا! وكل يوم شهاب معيشني وجع اكتر من الأنا عايشاه!! عادي يتكلم مع رضوي قدامي!وعادي يطلع يتغدا معاها! وعادي يقول ليها حبيبتي وحبيبي وبيب قدامي! طيب كان يخت لي حبة قيمه قيمه بسيطه بس ويقول انا مرتو م صح اتكلم معاها كدا قدامها! بس لا حياء لمن تنادي!!
الليله ناس أمي عازمننا غداء في البيت الكبير وكل العيله يعني!! الغداء في بيت ناس حبوبه!..
زي الساعه ٣ لبسنا وطلعنا! ونحن في العربيه شهاب قال لي م عايز نحسس ناس جدو إننا م عايزين بعض!
=ليه!
_لأنو م صح مننا!
=وصح منك إنك تتكلم مع رضوي كلام حلو قدامي! صح منك انك تطلع وتتغداء معاها صح منك إنك! توجعني وتقهرني كل يوم! صح منك إنك م تخت لي قيمه! صح منك إنك تحب رضوي قدامي وانا معاك!
_ههه انت ي زوله خاته كل دا جواك! وبعدين انت الدخلك بي شنو مش انت قلتي م ادخل في حياتك يلا عايز اقول ليك انت برضو م تتدخلي في حياتي! احبها ولا م احبها! اتغداء معاها ولا م اتغداء معاها! اتكلم معاها كلام حلو و لا م اتكلم دا م بخصك كويس!!!
عاينت ليه وهزيت راسي وغشيت الدموع النزلت مني سريع سريع! صراحه كنت عايزه اطلع الجواي عشان ارتاح! بس حاسه نفسي إني م إرتحت يمكن عشان متعوده على عدم الراحه دا!!
وصلنا البيت! ضيفوني وقعدنا كلنا قبل الغداء بنص ساعه نتونس!!
جدو:اها ي أولادي! إن شاء الله تكونو مبسوطين!
قلت في سري انت م عارف الحاصل شنو ي جدو!! قاعد هنا ومرتاح و م عارف الوجع المعيشني ليه شهاب طيب ننبسط من وين وكيف!
شهاب! :لالا الحمدلله ي جدو!
عاينت لي شهاب وقلت! :مبسوطين ي جدو شهاب م قصر مني دايما معاي! ونهائي م حصل سمعني كلمه شينه!
زحيت عيني منو وابتسمت إبتسامه باهته وقلت إنتو اكيد فقدتوني ي جدو صاح لمة الجمعه وونستي الرهيبه وجبنتي العجيبة!! 😂
حبوبه:معقوله م فقدناك ي بتي كان م فقدناك انت نفقد منو!!
كنت بحاول اغير الموضوع وم نحاول نتكلم كتير في موضوعنا! كنت بضحك بالغصب وبظهر إني فرحانه! بالرغم من وجعي!
أثناء م بنتكلم جات ملك بت عمو أحمد وقالت الغداء جهز!
قمنا كلنا على السفره وبقينا ناكل ونتونس!!!
جدو:إنتو م عايزين تسافرو ولا شنو.. شهر عسل هنا بس!؟؟؟
عاينت لي جدو بإستغراب وقلت:قصدك شنو؟؟
جدو:قصدي إنو سافرو برا غيرو جو حبه!! وعسلو بمزاج!
شهاب:نعسل اكتر من كدا ي جدو! م ياهو قاعدين في شقتنا ومبسوطين! تاني ماف داعي للسفر!
جدو:لالا انا حجزت ليكم لي بلجيكا ولازم تمشو!
اللحظه ديك اللقمه الكنت باكل فيها خنقتني! ريله قامت سريع سريع جابت لي مويه امي قالت لي بسم الله ي بت مالك في شنو!!؟
=لالا شكلو اللقمه خنقتني!
شهاب بقى بعاين لي جدو شديد وقال ليه:كيف يعني ي جدو! نحن م عايزين نسافر! تحجز ساي!
حبوبه:هي ي أولادي هي فترة عرس وبتنتهي امشو اتفسحو!
امي:ااي صاح كلام حبوبتكم!!
ابوي:وانا بأيدكم كمان!
ملك:وانا برضو!
ريله:وانا وانا!
ام شهاب:كلام جدكم صح والله!
كلهم ااي واحد بقى بقول إنو القرار صاح! في الاخر إضطرينا نقبل بعد ضغط من جدو!
رجعنا البيت زي الساعه ٨!وطوالي بقيت بستف في الشنط لأنو قال الطياره ح تقوم الساعه ١ص!!
شهاب جا خاشي غرفتي ولقاني برتب في الشنط!!! جا على وقال لي! بترتبي في شنو إنت!! نحن م ح نسافر ااي حته!! قلت لي جدو موافق بس عشان!! يسكت و م يضغط علينا!
=شهاب بس هو حجز!
_ماافي سفر!
قال كلامو وطلع! م إشتغلت بيه! زي الساعه ١٠!مشيت ليه في غرفتو لقيتو نايم! بقيت بصحى فيه وقلت ليه شهاب قوم نحن لازم نمشي المطار!!!
قام وقال لي انا قلت ليك م ماشي!
=شهاب سيب عبط وقوم!!
قال بنهره!:م قايم قلت ليك!
اصريت عليه في الاخر عاين لي بغضب وجراني من يدي وجر الشنطه وقال لي ارح! قلت ليه بس ماشي كده ووينها شنطتك!
_م ضروري بشتري هدوم من هناك!!!
فتح الباب! وفتح العربيه دخل الشنطه بورا وركبني في العربيه وبقي سايق!!!!
كان سايق العربيه بسرعه قبلت عليه بخوف وقلت ليه شهاب ح تعمل بينا حادث! قلل السرعه دي حبه!!!
م رد!! قلت ليه بصوت عالي شهاب! عاين لي وقال لي بحزم اسكتييي!!!
بقيت ساكته وبعاين ليه دا متخلف دا هو ولا شنو قلت ليه م بسكت عايزنا نموت ولا شنو!
_احسن شئ!
اخدت نفس طولي وإتاففت!! وصلنا المطار وصراحه طول الطريق كنت خايفه! قلت يعمل بينا حادث ولا شئ الولد دا!!
وصلني كراسي الإنتظار وقال لي ربنا يوصلك بالسلامه هسي انا ماشي لاني نعسان وعايز انوم ولمن تصلي اديني خبر!!