رواية اغتصاب ازهار الفصل السابع7بقلم جمانه السعيدي
نزلنا الدرج وام رياض كامت اتصيح ما اخليها تطلع
امي...مو بكيفج تطلع وغصبن عليج
لزمتني من ايدي واني جريته حيل ومشينا بسرعه
وهي تصيح بصوت ورانا وين ماخذته
عوفيها هذا بيتها ورجلها
بس احنا فتحنا الباب وطلعنا بسرعه مشينا سريع
لان هي دخلت اتصيح عليهم امها اخذتها تعالو رجعوها
شني هاي المصاريف الي صرفناها بلاش
اجرنا تكسي وصعدنا ومشت بينا السياره
واني انهديت بلبجي مامصدكه طلعت من بيتهم وامي وهيفاء يسكتن بيه
وصلنا للبيت اني شفت بيتنا واني كمت اصرخ وابجي
امي وهيفاء كابلني وكامن يبجن اثنيينهن
جمانه السعيدي
ازهار...اريد اروح الكماله البيتها بشرفي اله امسح بيها الكاع
بس بلاول اريد اروح دكتوره لان عندي الم داخلي
وفعلا حجزنا ورحنا للدكتوره ولمن شخصت حالتي كالت اكو جرح جبير ويرادلها عمليه
جيبوها باجر بدون ريوك
كون ابد بلا اكل ولاشرب حتى ندخلها العمليات
بطريق الرجعه كلت الامي خل نروح الكماله اريد اسحلها سحل
امي...يايمه بعد شيفيد الفاس وكع بلراس
ازهار...ميخالف اريد اسئلها ليش هيج سوت اني عاتبه عليه دورلي رجل لاخلفله عليها
وفعلا وصلنا وهي اكيد وصلها خبر بلي صار
كسرنا الباب تكسر ومافتحت النا
رجعنا للبيت وثاني يوم رحت للمستشفى وسوولي العمليه
وللعصر طلعت والحمد لله
اجتني نهى شافتني وكامت تبجي وكالت هي المعدله ماعدها حظ ابد
ازهار...السبب كله من كماله جنا واثقين بيها ونمشي وراها عميان الحد ماوكعتنا بهاي الحفره
اني حسيت اكو شي من اول مره ما اجه العريس يشوفني
بس بعدين كذبت نفسي
كلت يجوز عندا ثقه بذوقهن
نهى...الله لايوفقها الحقيره شني بنات الناس لعبه عدها
علمود كم فلس تضيع مستقبلج
وهسه شراح تسووين
ازهار...شسوي اطلك يم الشيخ ولله لوعندي عقد محكمه
جان اشتكيت عليهم وبهذلتهم بلمحكمه
بس اني الثوله رضيت بعقد الشيخ وسكتت
لو تشوفين شنو سون بيه بليله العرس عبالك ذبيحه وبيد كصاب
التمن عليه وضيعني الله لايوفقهن
انشاء الله حوبتي تعثرهن
فات اسبوع وصرت احسن بس امي من القهر صحته مو زينه
ليليه لوصاعد الضغط لو السكر
طبعا همه دزو علينا ناس خل ترجع وندللها وشتريد واوامراها مجابه
وامي نهدت بيهم مايستحون يضحكون علينا ياخذونها الواحد مخبل
شنو ترجع خدامه الهم المره اهم شي زوجها بلبيت
اذا زوجها مخبل المن ترجع
ترجع تحير بيهم بلمخبل ولله عيب عليهم الي سوسو بينا
خليهم يطلكونها احسن الهم احسن ما افضحهم بلمراكز
والمحاكم
فات شهر وماكو خبر منهم بعدين اني وامي رحنا السيد
دائما الناس تعقد عندا
رجال خير الناس كلها تحمد بي
رحنا وحجينا الي صار بلتفصيل
كال هذا الزواج مبني على الغش ومدام غشوكم من حقج تتطلكين
اصلا هذا الزواج باطل لان الزوج غير موهل عقليا
ومايكدر يتحكم بقرراته
وبما ان اهله قررو عنه فهذا الزواج باطل ومنحقج تتطلكين
بس اريد مجال يومين اسئل واتاكد من الولد وانشاء الله تاخذين حقج
وفعلا اطلكت يم السيد
ورجعت واني كلبي ينعصر من القهر
اذا زواجي باطل يعني الي صار كله حرام
يعني اغتصاب يعني خطيتي بركبتهم
اللاهي لاتحملني مالا طاقة لي عليه
دزيت نسخه من ورقة الطلاك الهم
ورجعنا مرتين على كماله بس ماتفتح الباب
وبعدين عرفنا اماجره بيته
وماجره بمكان ثاني خايفه من عدنا وشردت ومحد يعرف عنوانها الثاني
يوميه اكول حسبي الله ونعمه الوكيل عليها
صرت مطلقه بسببها حطمت حياتي
رجعت اخيط وامارس حياتي الطبيعيه بس مو اني ازهار القديمه احس كبرت مية سنه
والدنيا طلعت من عيني فد نوب
هيفاء جابت ولد وفرحنا بيه حيل
بس امي حالته بلنازل ضعفت وشكله تعبان حتى الصلا على رحله وماتكدر تمشي
يوميه ادعي ربي يطول عمرها وين اروح بعدها
ووين انطي وجهي
جهال نهى عدنا النهار كله من تطلع للدوام تخليهم عدنا
وحتى من ترجع مايقبلون يرحون وياها
بس همه مابيهم اذيه نظيفين ومرتبين حيل
النسوان الي تخيط عدنا عبالهم جهالنا
هلكد ما عايشين ويانه وقليل يرحون بيت اهلهم
فات على طلاكي خمس سنوات يعني صار عمري ٣٠سنه
واني على نفس وضعي اخيط حتى التهي وما اضوج
وجهال نهى مالين علينا البيت
الى ان اجا اكثر يوم مشووم بحياتي بعد يوم زواجي
اليوم الي نهاريت بي
شويه بعد واتخبل من الصدمه
والشي الي صار ابد مامتوقعته ولا مفكره بي
ولا حاسبه حسابه