رواية غرام السلطان الجزء الثاني2 الفصل الخامس عشر15 والسادس عشر16 بقلم عادل عبد الله
في منزل شيماء
شيماء تحت.ضن ابنها بسام بقوة ودموع الفرحة تغمر وجهها .....
شيماء : حمدلله علي السلامة يا قلب امك ، نورت بيتك يا حبيبي .
بسام : الله يسلمك يا امي ، وحشتيني قوي ووحشني حض.نك .
باسل : حمدلله علي السلامة يا بسام .
بسام : الله يسلمك يا باسل ، اخبارك ايه ؟ ومراتك و ابنك فين ؟؟ نفسي اشوف ابنك .
باسل : هجيبه بكره تشوفه ، المهم اني شوفتك ، انت كنت وحشني قوي .
بسام : انت اكتر يا باسل ، رغم اني كنت زعلان انك اتجوزت في غيابي .
باسل : عقبالك يا بسام .
بسام : لا انا مش دلوقتي .
باسل : ليه يا بسام ؟ ياريت تغير اسلوب حياتك و تبعد عن الطريق اللي كنت ماشي فيه .
بسام : طبعا طبعا ، هي خالتي شهد ونور ابن خالتي فين ؟
شيماء : جاية دلوقتي يا حبيبي .
بسام : عارفة يا ماما نفسي في ايه ؟
شيماء : نفسك في ايه يا حبيبي ؟
بسام : نفسي في اكلة حلوة من ايدك .
شيماء : من عينيا يا حبيبي .
يدق جرس الباب ، ويفتح باسل الباب لتدخل شهد التي تهرول الي بسام وتقول له : حمدلله علي السلامة يا بسام ، نورت بيتك يا ابني .
بسام : الله يسلمك يا خالتي ، وحشتيني قوي .
شهد : انت اكتر يا حبيبي .
بسام : نور فين ؟
شهد : اتصلت به وجاي دلوقتي ، المهم طمني عليك انت عامل ايه وناوي تعمل ايه في حياتك ؟ عايزين نفرح بيك .
بسام : لا يا خالتي مش دلوقتي .
شهد : ليه يا واد ؟! عايزين نفرح بيك زي ما فرحنا بأخوك .
يدق جرس الباب ، ويفتح باسل الذي بجد نور امامه .
بسام " يضحك " : اهلا اهلا بصاحبي الندل !!!
نور " يضحك " : ياض احترم نفسك ، ده انا جاي اسلم عليك يا معفن .
يحت.ضن نور بسام ويقول : وحشتني يا بسام .
بسام : لو كنت وحشتك كنت زورتني يا ابن خالتي .
نور : ايه ده !! من امتي بتقولي يا ابن خالتي ؟!! احنا طول عمرنا اصحاب قبل ما نكون اولاد خالة .
بسام : وانت عملت بالصحبية اللي بينا يا نور ؟؟ ده انت مزوتنيش مرة في السجن الا اول شهرين بعد كده مشوفتش وشك !!
نور : معلش ظروف غصب عني يا صحبي .
بسام : وعرفت انك اتجوزت كمان .
نور " يبتسم بارتباك " : ايوه اتجوزت ، عقبالك يا صحبي .
بسام " يضحك " : يعني انا اعاكس البنتين وانتوا الاتنين تتجوزهم ؟!!!
باسل " يضحك " : النصيب بقي ، ما انت عارف يا بسام ان غرام كانت عجباني بسبب الموقف اللي عملته وفضلت ادور عليها في كل مكان وقتها ، والنصيب اني اشوفها بعدها بكام سنة في المستشفي .
بسام : هي اسمها غرام ؟؟
باسل : ايوه ، وطلعت كمان اخت نور !!
بسام : ايوه انا عرفت ، انها بنت عم سلطان وجميلة ، وانت يا ابن خالتي اتجوزت البنت التانية ؟؟
نور : ايوه وبقيت مراتي .
بسام : يعني خلصت البتات علشان تتجوزوا انتوا البنتين اللي انا عاكستهم ؟؟
نور : وبعني علشان انت عاكستهم يبقي خلاص كتبتهم علي اسمك ؟؟!!
بسام : لكن انت كنت عارف ان فيهم واحدة عجباني !!!
نور : خلي بالك اللي بتتكلم عليها دي مراتي !! يعني حاسب في كلامك .
بسام : حاضر يا ابن خالتي ، الله يهنيك بيها يا عم ، وخلفت ولا لسه ؟؟
نور : لسه ، وياريت بلاش نجيب سيرة حياتنا الخاصة في كلامنا .
بسام " بسخط " : وماله ؟!! وماله يا ابن خالتي !!!
نور : انا همشي علشان رايح الشركة .
بسام : عايزين نقعد قعدة من بتوع زمان .
نور : احاول افضي نفسي .
في المستشفي
بعد الولادة ...
غرام : حمدلله ع السلامة يا ماما .
جميلة : الله يسلمك يا حبيبتي .
فارس : حمدلله ع السلامة يا جميلة .
جميلة : الله يسلمك ، فين العيال ؟
غرام : مع الدكاترة ، نص ساعة ويكونوا هنا جنبك .
فارس " يبتسم " : انا سميتهم جميلة وجميل .
جميلة : بردو يا فارس !! كنت عايزة اسامي جديدة .
فارس : ولو كانوا الاتنين بنات كنت سميتهم الاتنين جميلة .
تبتسم جميلة وتضحك غرام وتقول : اش اش ايه الحب ده كله يا ست ماما !!
فارس : مامتك يا دكتورة اغلي حاجة عندي في الدنيا .
غرام : وانا كمان ماما اغلي حاجة عندي في الدنيا .
جميلة " تبتسم " : ربنا يخليكوا ليا يارب .
غرام : اسيبكم انا بقي ، ادعيلي يا ماما علشان بعد بكره هعمل اول عملية قلب مفتوح لمريض لوحدي .
جميلة : ربنا معاكي يا حبيبتي ويوفقك وتبقي اكبر جراحة قلب في العالم .
غرام : يارب .
في الشركة
يدخل بسام الي الشركة ويسأل احد الموظفين عن مكتب سلطان بيه ونور بيه فيعرف ان نور اصبح صاحب الشركة وحده ومديرها !! فتتملكه الغيرة منه !!!
ثم يسير في الشركة ذاهبا الي مكتب نور ، وفي الطريق يري منار خارجة من احد المكاتب !!!
يقف بسام امامها ويبتسم ...
منار تنظر له بتعجب حتي تتذكره !!!
تبتسم منار من المفاجأة ، فيبتسم بسام : افتكرتيني ولا لسه ؟؟
منار " تبتسم " : ايوه ايوه افتكرتك ، انت ابن خالة نور بتاع مشكلة الكافيه .
بسام " يضحك " : ايووووه بالظبط كده ، انا اللي كنت بعاكسك لما صحبتك اتخانقت معايا .
منار " تضحك " : ايوه كنا لسه صغيرين .
بسام : لكن انا يومها كنت معجب بيكي فعلا ، مش كنت بعاكس وبس .
منار " تضحك " : النصيب ، انت تعجب بيا ، وابن خالتك يتجوزني !!!
بسام " بصوت رومانسي هادئ " : لولا المشكلة اللي حصلتلي كان مستحيل حد ياخدك مني !!
للكاتب عادل عبد الله
منار " بارتباك " : اسفة ورايا شغل ، علفكرة ده مكتب نور ممكن تدخله .
بسام : تمام ، وحشني قوي قوي نور .
منار : طيب اتفضل .
تتركه منار وتنصرف بينما بسام يتابعها بنظراته ، ثم يتجه لمكتب نور ويطلب لقاؤه من السكرتيرة .
نور : ايه المفاجأة دي !! مش كنت تقول انك جاي ؟!!
بسام : حبيت اعمالهالك مفاجأة ، مش انت بس اللي بتعرف تعمل مفاجئات .
نور : تعالي يا بسام اقعد ، تشرب ايه ؟
بسام : لا لا ، مش عايز اعطلك ، شكلك بقيت مشغول بالشغل علطول .
نور : فعلا ، الشغل واخد كل وقتي .
بسام : يعني مش هنعرف نسهر سهرة حلوة من بتوع زمان ؟!!
نور : دلوقتي صعب يا بسام ، الظروف اتغيرت ، الشركة دي انا لو غفلت عنها يوم واحد تخرب .
بسام : ماشي يا ابن خالتي ، ربنا يقويك .
نور : ربنا يخليك يا باسم ، وانت حاول تشوف مستقبلك ، شوف شغل كويس وعروسة بنت حلال وابدأ حياتك .
بسام " يبتسم " : طيب ما تشغلني معاك يا ابن خالتي ؟؟
يتذكر حينها وجود زوجته منار في الشركة فيقول : لا لا ، مش هينفع هنا ، انا ممكن اشوفلك شغل كويس في اي شركة من شركات اصحابي .
بسام : اصحابك !!! لا خلاص متتعبش نفسك ، انا هشوف شغل لنفسي ، ومادام مش هنعرف نتقابل زي الاول اسمحلي لما توحشني اجيلك هنا اطمن عليك واشوفك .
نور " بارتباك " : ايوه طبعا طبعا ، ده مكانك .
بسام : طيب اسيبك بقي ومش هعطلك اكتر من كده ، سلام يا ابن خالتي .
ينصرف بسام من المكتب وعيناه تبحث عن منار في الشركة حتي يخرج منها ، بينما منار في مكتبها تستشعر الريبة والشك من كلمات وتعبيرات بسام الغريبة التي تحمل خلفها نوايا والغاز !!!
اما نور فخرج من مكتبه الي مكتب مراقبة كاميرات الشركة واخرج موظف المراقبة وجلس يراجع الكاميرات بنفسه حتي وجد بسام يقف امام مكتبه ويتكلم مع منار لعدة دقائق قبل دخول مكتبه !!!
دبت مشاعر الغيرة والشك في كل كيانه وخرج من مكتبه مسرعا حتي وصل الي مكتب منار ووقف امام المكتب قليلا يحاول ان يظهر قليلا من الهدوء .
دخل مكتب منار يبدو عليه الهظوء المصطنع ثم يسألها : بتعملي ايه يا منار ؟
منار : براجع شوية عقود .
نور : بسام ابن خالتي كان هنا من شوية ، انتي شوفتيه ؟؟
منار : لأ ، كان هنا بيعمل ايه ؟
نور : كان بيسلم عليا ، كنت فاكرك شوفتيه ؟؟
منار : لأ .
نور : طيب انا رايح مشوار دلوقتي ويمكن ارجع متاخر شوية ، متمشيش من الشركة الا لما ارجع اخدك ونروح سوا .
منار : حاضر ، انا لسه قدامي شغل كتير .
ينصرف نور وكله غضب ويظل يفكر لماذا كذبت منار ؟! هل هناك سمة علاقة او اعجاب بينهما ؟؟ ولماذا يأتي بسام الي هنا ؟؟ اكيد يريد ان يراها ويقابلها !!! واضح انه كان مش عارف يوصلها ازاي !!! ودلوقتي وصلها عن طريقك انت يا نور !!! ابن خالتك ناوي يعملك طرطور ويمشي مع مراتك يا نور !!! لكن لأ مش ممكن اديهم الفرصة دي ابدا !! لكن المهم دلوقتي اعرف منار كدبت ليه ؟!! وبتفكر ازاي من ناحية بسام ؟!!! لازم اعمل نفسي مش واخد بالي لحد ما اعرف نيتها ايه و ايه اللي في دماغها بالظبط !!!
بعد انصراف نور تجلس منار مترددة ومرتبكة وتعاتب نفسها ... ايه اللي خلاني كدبت ؟!! كنت قولتله اني شوفته وخلاص !!! كان هيغير شوية ويقول كلمتين ويسكت ، دلوقتي لو عرف اني كدبت عليه هيشك فيا !!!
في المستشفي
تخرج غرام من غرفة العمليات ويبدو عليها الاجهاد والتوتر وبجانبها مدير المستشفي دكتور عمران يقول : الف مبروك يا دكتورة .
غرام : الله يبارك فيك يا دكتور .
دكتور عمران : انا كنت متأكد انك هتنجحي بجدارة .
غرام :ده بفضل الله ثم توجيهاتك يادكتور .
دكتور عمران : وبفضل اجتهادك وتميزك يا دكتورة ، انا متأكد ان كلها كام سنة وتكوني اكبر دكتورة قلب في مصر .
صلو على النبي محمد صلى الله عليه وسلم
الحلقة ١٦
في فيلا سلطان
سلطان : انتي بتهزري يا شهد ؟؟
شهد : لأ انا بتكلم جد .
سلطان : جميلة خلفت ؟!!! وفي السن ده ؟؟ اكيد بتهزري !!
شهد : وخلفت تؤام كمان .
سلطان : مين اللي قالك الكلام الفارغ ده ؟
شهد : يا حبيبي انت مش مصدق ليه ؟! ده باسل بنفسه اللي زار حماته بعد الولادة وكان عارف كمان من بدري انها حامل بس كان مخبي .
سلطان : باسل اللي قالك ؟
شهد : باسل قال لشيماء وهي اللي قالتلي ، وكمان جوزها سمي العيال جميلة وجميل علي اسمها !! واضح انه بيحبها قوي .
سلطان : طيب خلاص خلاص ، احنا هنشغل نفسنا بغيرنا ليه !!!
شهد : انا قولت اعرفك بس من باب العلم بالشئ .
سلطان : طيب خلاص ، ياريت تغيري الموضوع ده بقي .
يحاول سلطان اخفاء حزنه حتي يصعد ويصبح في غرفته منفردا .
يحدث نفسه وكأنه اصيب بالجنون !!!
معقول جميلة تتجوز وتخلف في السن ده ؟؟!
جميلة دي انا كنت بعتبرها ملكي , حاجة بتاعتي !! ازاي تتجوز وتخلف كمان من واحد تاني غيري ؟؟!! انا اكيد بحلم !!!
لأ انا مش بحلم ، دي موازين الكون اللي لو مالت لازم ييجي يوم تتعدل وكان لازم جميلة تاخد حقها بعد الظلم اللي حصلها بسببنا !!
لكن انا حاسس اني بتقطع من جوايا !!!
في فيلا نور
تجلس منار تتصفح هاتفها بينما يجلس نور شارد الذهن مهموم ، حتي تأتيها رسالة مفاجئة !!!!!!
الرسالة من رقم غريب تقول : ازيك يا منار ؟ عاملة ايه ؟
تتعجب منار من الرسالة و تحاول ان تخفي ارتباكها وتتجاهلها .
تأتيها الاخري : اكيد انتي مش عارفة انا مين وهتستغربي اكتر لما تعرفي !! انتي لسه مش عارفاني ، انا لما بحب حاجة لازم اوصلها .
تأخذ منار رقم الهاتف وتضعه علي تروكولر فتجد الرقم غير مسجل باسم !!!
ثم تأتيها الثالثة وكأنه يراها !!! مش هتعرفي الخط باسم مين ، اصل انا لسه شاري الخط جديد ، ها ؟؟ هتفضلي ساكته كده كتير ؟؟!!
منار ترد عليه : انت مين ؟
يرد عليها : انا بسام ، ايه رأيك في المفاجأة دي ؟؟
منار : انت جيبت رقمي منين ؟؟!!
بسام : مش لسه بقولك لما بحب حاجة لازم اوصلها ؟!!
منار : عايز ايه ؟؟ وجيبت رقمي ازاي ؟
بسام : بدل ما تسأليني عامل ايه وتطمني عليا بتقوليلي عايز ايه ؟!!! تصدقي كده ازعل منك بجد .
منار : طيب متبعتش رسايل تاني و اوعي تتصل بيا والا اعملك حظر .
يرد بسام بايموشن يضحك ثم يقول ولو عملتي حظر هشتري خط تاني واكلمك منه ، وكل ما تعملي حظر هكلمك من خط جديد .
منار : وانا هقول لنور وهو يتصرف معاك .
بسام يرد بعدة ايموشنات ضحك متتالية ثم يقول : انتي طيبة قوي يا منار !! نور ده غلبان قوي ، ريحي نفسك يا منار ، احنا عايزين نتكلم شوية مع بعض .
منار : نتكلم في ايه يا بني ؟! هو فيه حاجة بيني وبينك ؟!!!!
يسألها نور فجأة : انتي بتكلمي مين ؟؟؟
منار " تبتسم " : دي ماما بتكلمني زي كل يوم قبل ما تنام .
نور : سلميلي عليها .
منار : الله يسلمك يا حبيبي .
ثم تعود لمحادثتها مع بسام ...
منار : هنتكلم في ايه يا بني ؟ انا مبتكلمش مع حد .
بسام : لكن فيه كلام كتير بينا .
منار : كلام ايه ؟ انا مفيش بيني وبينك اي كلام !!!! اقفل بقي ومتكلمنيش تاني .
بسام : مش هقفل ، وهنتكلم .
منار : ده انت غلس قوي !! لو كتبت كلمة تانية هعملك حظر .
بسام يكتب لها : بحبك !!!
تفاجئ منار بالكلمة وتقوم بحظره فورا .
في اليوم التالي
في الشركة
تفاجئ منار ببسام يدخل مكتبها في الشركة !!!!!
منار : ايه ده ؟؟ انت ايه اللي دخلك هنا ؟؟!!!
بسام : مادام عملتي حظر جيت بنفسي لحد عندك .
منار : انت اكيد مجنون !!!
بسام " يضحك " : انتي اول مرة تعرفي ؟!
منار : طيب يلا اتفضل من هنا ، انت كده هتسببلي مشكلة مع جوزي !!!
بسام : وترفعي الحظر علشان نتكلم ؟؟
منار : حاضر ، حاضر ، بس يلا من هنا قبل ما نور يشوفك .
بسام : ماشي ، سلام يا قمر .
يخرج بسام من مكتبها ثم يتجه لمكتب نور .
نور : ايه ده ؟ بسام !!!
بسام : ايوه يا ابن خالتي ، وحشتني قوي .
نور : انت بتهزر يا بسام ؟!! وحشتك ايه ؟؟ انت كنت هنا من يومين !!!
بسام : وماله يا جدع ، مادام انت مشغول انا فاضي اجيلك واسلم عليك ، شوفت بقي انا اجدع منك ازاي ؟!
نور : انت عايز ايه يا بسام ؟
بسام : ايه المقابلة دي يا ابن خالتي ؟!!
نور : انجز يا بسام وقول عايز ايه ؟؟
بسام : يا جدع بقولك وحشتني وعايز اقعد معاك .
نور : طيب اقعد هنا ، ثواني وارجعلك .
يذهب نور الي مكتب مراقبة الكاميرات و يشاهد بسام اثناء دخوله وخروجه من مكتب منار !!!
يعود نور و نيران الغضب تستعر داخله !!!
نور : انت كنت بتعمل ايه في مكتب منار ؟؟
بسام : كنت بسألها عليك .
نور : انت بتستعبط يلا ؟!!! اسمع لما اقولك ، منار دي مراتي تبعد عنها خالص ، فاهم ؟؟
بسام : لأ مش فاهم ، ايه اللي بتقوله ده يا نور ؟!!!
نور : اللي سمعته ، ويلا امشي من هنا مشوفش وشك هنا تاني .
بسام : لأ انت اكيد اتجننت !!!
نور : لحد دلوقتي لسه ، انما بعد دقيقة واحدة هتجنن بجد وانادي الامن يطردوك في الشارع .
بسام : بقي كده يا ابن خالتي ؟!!
نور : ايوه كده ، يلا غور من وشي .
بسام : حااااضر ، همشي ، الفلوس جمدت قلبك يا ابن خالتي ، بس خلي بالك هتدفع تمن اللي انت عملته ده غالي قوي .
يذهب نور لمكتب منار وكله غضب ...
نور : بسام كان بيعمل ايه هنا ؟؟
منار " بارتباك " : كان بيسأل عليك .
نور " بصوت عالي " : انتي كدابة ، قولي بسرعة بسام كان بيعمل ايه هنا ؟
منار : وطي صوتك يا نور ، الموظفين هيسمعونا .
نور : يسمعوا ولا يولعوا ، اتكلمي بسرعة قبل ما افقد اعصابي .
منار : الصراحة كان بيقولي انه عايز يكلمني في موضوع .
نور : موضوع ايه ؟؟!
منار " بصوت عالي " : معرفش انا مش اديته فرصة يكمل كلامه وطردته بره مكتبي .
نور : انتي متأكدة ان ده كل اللي حصل ؟؟
متار : ايوه .
نور : لو عرفت انك بتكدبي عليا انا ا....
منار : متكملش ، انا مش كدابة يا نور ، وعلي العموم كفاية قوي لحد هنا ، انا هروح عند اهلي وكل اللي بيني وبينك انتهي .
نور : استني هنا اوعي تمشي .
تنصرف منار مسرعة وتغادر الشركة الي منزل عائلتها !!!
في منزل شيماء
يعود بسام تملؤه مشاعر الغضب والغيرة !!!
تلاحظه شيماء فتسأله : مالك يا حبيبي ؟ راجع من بره زعلان ليه ؟؟
بسام : مفيش .
شيماء : لأ فيه حاجة مزعلاك ، اتكلم يا بسام اتكلم يا حبيبي ، لو مش هتقول لأمك هتقول لمين ؟؟
بسام : متضايق شوية .
شيماء : انا حاسة بيك يا بسام ، انت زعلان علشان نور ابن خالتك بقي صاحب شركة واتجوز وانت لسه مش عارف تعمل حاجة ، صح ؟؟
بسام : متجبيش سيرته تاني .
شيماء : شوفت بقي اني حاسة بيك ؟!
بسام : يا ماما ارجوكي سيبيني دلوقتي .
شيماء : ايه اللي حصل ؟؟ اتكلم يا بني ، مالك ؟؟
بسام : نور بيه ابن اختك طردني من شركته .
شيماء : ايييه ؟!!! طردك !!! بقي كده يا نور ؟؟
تلتقط شيماء هاتفها سريعا وهي في قمة غضبها وتتصل بأختها شهد ...
شيماء : شوفتي ابنك يا شهد ؟!!
شهد : نور ؟ ماله ؟ حصل ايه ؟؟
شيماء : بسام ابني رايح يسأل عليه ، يقوم ابنك يطرده من الشركة ؟؟
شهد : ايه اللي بتقوليه ده يا شيماء ؟!! نور ابني عمره ما يعمل كده !!!
شيماء : اهو عمل يا شهد ، اسأليه انتي علشان تتأكدي بنفسك ، انا ابني مش هيروحله ولا يعبره تاني .
شهد : طيب يا شيماء حقك عليا ، انا هكلم نور واشوفه عمل كده ليه .
وخلال وقت قصير تطير اخبار ما حدث ويعلم بها الجميع !!!
ويقف الجمبع حائرون بين تصديق نور ان بسام حاول معاكسة زوجته وبين نفي بسام لذلك واتهامه لنور بالتكبر والتعالي عليه وطرده من شركته !!!
يذهب باسل وغرام الي منزل والدته ...
باسل : ايه اللي حصل يا بسام ؟؟
بسام : ابن خالتك علشان زورته في الشركة وكنت بسأل مراته عن مكتبه طردني من الشركة قدام اللي يسوي واللي ميسواش !!!
باسل : قول الحقيقة يا بسام ، انت فعلا عاكست مراته ؟؟
بسام : انت اتجننت يا باسل ؟!! هعاكس مرات ابن خالتي !!!
باسل : علشان يعني كان عينك منها زمان ؟
بسام : لأ يا باسل مادام ابن خالتي اتجوزها تبقي في مقام اختي .
باسل : اومال نور عمل معاك كده ليه ؟؟
بسام : معرفش ، ابن خالتك خلاص الغرور اتملك منه لما بقي صاحب شركة ، والكل بيقوله يا نور بيه .
باسل : الشركة دي مش شركته لوحده ، غرام مراتي لها نصيب في الشركة دي ، لكن هي مش بتطالب به علشان مشاعر ابوها اونكل سلطان .
شهد : لأ يا حبيبي ، اسمع يا باسل ، اسمعي يا غرام يا بنتي صحيح كان فيه زمان حساسية ومشاكل بيني وبين والدتك لكن الحق حق ، صحيح نور ابن اختي لكن كل واحد اولي بحقه ، انتي لازم تطلبي حقك علشان اخوكي اتسعر خلاص ولو مش اخدتي حقك وابوكي عايش مش هتطولي منه حاجة بعد عمر طويل لابوكي .
غرام : انا يا طنط مش عايزة حاجة .
شيماء : متقوليش كده ، مادام ليكي حق يبقي حرام عليكي لو سبتيه لواحد زي ده !! ده حقك وحق ابنك وولادك الجايين ، ولو حاسة باحراج انك تطلبي حقك جوزك يطالب بحقك .
للكاتب عادل عبد الله
باسل : ايوه يا غرام ، سيبي الموضوع ده عليا ، وانتي عارفاني مش هبص لفلوسك ، لكن ده حقك ولازم تطالبي بيه .
منار في منزل والدتها
تجلس منار تبكي وتحاول امها تهدئتها : خلاص يا بنتي متزعليش ، البيوت ياما بيحصل فيها .
منار : لا يا ماما ده بيشك فيا !!!
امها : بيشك فيكي !!! اخص عليه ، هو مش عارف هو متجوز مين ولا ايه ؟!!
منار : مش كفاية يا ماما صبرت عليه وقولت مش مهم اخلف واكون ام .
امها : طيب اقعدي واهدي وبيتي مفتوحلك ، ولما تهدي خالص شوفي انتي عايزة ايه .
بعد وقت قليل
تأتيها رسالة من بسام ...
بسام : شوفتي جوزك عمل ايه ؟؟
منار : روح يا اخي منك لله ، بسببك اتخانقت انا وهو وهطلق .
بسام : ياريتك تطلقي .
منار : قول كده بقي ، انت عايز تخرب بيتي ؟!!!
بسام : انتي بينك وبينه اطفال ؟
منار : لأ ، وبعدين انت مالك بينا اطفال ولا لأ ؟!!
بسام : انتي عارفة اني معجب بيكي من زمان ، وبصراحة مستخسرك في الرمة ده ، نور ده ميستاهلكيش .
منار : انا بسببك سيبت بيتي والشركة وعند اهلي واحتمال اتطلق ، اياك تتصل بيا او تبعتلي رسايل تاني .
بسام : مش بأرادتي ، ده قلبي .
منار : لو كلمتني تاني بأي وسيلة هبلغ عنك مباحث الاتصالات والانترنت .
بسام : طيب اسمعي الكلمتين دول وبعدها اعملي اللي انتي عايزاه
منار : ربنا يصبرني !!! اخلص .
بسام : انتي مش هتعرفي نور جوزك اكتر مني ، ده عشرة عمر من واحنا عيال صغيرين ، نور انسان مينفعش تربطي مستقبلك به ، و انا عارف ان اللي يهمك في نور فلوسه .
منار : ايه اللي بتقوله ده !! لأ طبعا .
بسام : سيبك من الكلام ده خلينا في المفيد ، انا عندي طريقة ممكن تاخدي بيها كل فلوسه بسهولة لكن ليا شرط وحيد ، اننا نتجوز وتكون الفلوس دي بالنص بيني انا وانتي .
صلو علي رسول الله صلى الله عليه وسلم