رواية غرام السلطان الفصل الحادي والثلاثون31 والثاني والثلاثون32الاخير بقلم عادل عبد الله
جميلة : يعني بتحبيه يا غرام !! وانا موافقة تتجوزي باسل لكن بشرط .
غرام : بجد يا ماما ؟؟ شرط ايه ؟؟
جميلة : شرطي الوحيد ان شيماء تيجي لحد هنا وتطلبك مني !!!
غرام : وهتقوليلها ايه يا ماما ؟ اكيد لازم ترفضي وتطرديها من البيت علشان تاخدي حقك وتردي لها اللي عملته معاكي زمان .
جميلة : لا يا حبيبتي انا لو طردتها ورفضت هكون بهد سعادتك بأيديا ، وانا مستحيل اعمل كده ، انا هوافق تتجوزي ابنها مادام بتحبيه .
غرام : اهم حاجة يا ماما ان دي فرصتك تاخدي حقك منها .
جميلة : هاخد حقي منها باسلوبي وطريقتي انا .
في المساء
تجلس غرام علي فراشها وتمرر اصابعها بين خصلات شعرها في سعادة ثم تجد اتصال من باسل ...
باسل : مساء الخير يا قلبي وحشتيني .
تضحك غرام : قولتلك أجل الكلام ده دلوقتي ، بلاش قلبي ووحشتيني والكلام الحلو ده .
باسل : انتي بنفسك بتقولي انه كلام حلو اهو ، عايزة تأجليه ليه ؟!!
غرام : نأجله للوقت المناسب .
باسل : أمتي بقي ؟!!! حاضر يا قلبي نأجله .
غرام : عندي خبر حلو هيفرحك قوي .
باسل : يارب يكون اللي في بالي .
غرام : ايه اللي في بالك ؟
باسل : انك تقولي ان مامتك وافقت علي جوازنا .
غرام : فعلا ماما وافقت علي جوازنا يا باسل لكن بشرط .
باسل : اي شرط مش مهم ، انا موافق من قبل ما اعرفه .
غرام : المهم ان مامتك توافق علي الشرط ده .
باسل : ماما !!
غرام : ايوه ، ماما شرطها الوحيد ان مامتك تروح تطلبني منها .
باسل : ماما ؟!! طيب انا ممكن اقول لبابا ، ليه ماما تحديدا ؟
غرام : هو ده شرطها الوحيد .
باسل : اوعي تكون مامتك عايزة تنتقم من ماما وترد اللي عملته معها زمان وترفض جوازنا !!!
غرام : ماما قالتلي انها هتوافق .
باسل : يعني لازم ماما تحديدا تروحلها ؟؟
غرام : ايوه يا باسل ، هو ده شرط ماما الوحيد ، بعدها هتوافق علطول .
باسل " بحزن " : حاضر يا غرام .
انتهت المكالمة بينهما بينما يشعر باسل بحزن شديد !!
فوالدته لم توافق علي زواجه من غرام منذ البداية ، فماذا لو علمت بشرط امها الذي يبدو انه وسيلة للانتقام منها !!! بالتأكيد سترفض .
وبدأت تدور افكاره في دوائر سوداوية مغلقة مما اصابه بالاحباط الشديد .
مرت الايام وجلس باسل في المنزل وحيدا لا يريد الذهاب للعمل او التعامل والحديث مع الناس مما اصابه بأكتئاب حاد !!!
بعد ايام .....
يذهب سلطان الي الشركة ويبدأ في مراجعة عمليات الشركة الاخيرة اثناء مرضه وغيابه عنها ، ويعلم ان الشركة قد حققت نجاحات وارباح جيدة في الفترة الاخيرة فيطمئن ان نور يسير في عمله علي الدرب الصحيح .
بعد ايام
صباحا في النادي
تجلس شهد مع سلطان يستمتعان بشمس الشتاء الدافئة بين الاشجار والزهور الرائعة ، وفجأة تجد شهد اتصالا من اختها !!!
شهد : صباح الخير يا شيمو .
شيماء : صباح النور يا شهد تعالي ألحقيني بسرعة .
شهد : فيه ايه ؟ مالك ؟
شيماء : باسل ابني .
شهد : ماله باسل ؟؟
شيماء : تعبان قوي يا شيماء ، انا عنده في شقته دلوقتي ، لو شوفتيه مش هتعرفيه !! تعالي بسرعة انا مش عارفة اعمل ايه !!!
شهد : انا هجيلك حالا انا وسلطان .
بعد قليل
شهد وسلطان في شقة باسل يفاجئوا بمظهره الغريب !!!
تبدو علي ملامحه علامات الحزن والذهول ، صامت تماما ، ينظر لمن حوله وكأنه لا يعرفهم !!!
شيماء تجلس باكية يسألها سلطان : ايه اللي حصل ؟؟
شيماء : معرفش انا جيت اطمن عليه واكلمه علشان يرجع البيت اتفاجئت به بالمنظر ده وبكلمه مش بيرد عليا !!!
شهد : مالك يا باسل فيه ايه ؟
باسل لا ينظر اليها موجها نظره في الاتجاه المعاكس و لا يرد عليها وكأنه لا يسمعها !!
شهد : طيب قولي ايه اللي مزعلك ، انا خالتك شهد اللي طول عمرك بتحبها ، قولي يا حبيبي مالك ولو عندك اي مشكلة هنساعدك فيها ونحلها .
يتجاهلها باسل تماما وكأنه لا يسمعها !!!
سلطان : مالك يا باسل ؟؟ انت لما كنت عندي في المستشفي كنت مليان امل وتفاؤل ايه اللي غيرك فجأة كده ؟!!!
يتجاهله ايضا ولا ينظر اليه !!!
سلطان : مين اللي زعلك يا باسل ؟؟ انت كنت قولتلي انك عايز تتجوز غرام وكنت فرحان !!! هي غرام رفضت تتجوزك علشان كده زعلان ؟؟
ينظر اليه باسل والحزن يملأ عينيه !!!
يضحك سلطان ثم يقول : خلاص يا جماعة انا وباسل هندخل نتكلم جوه كلام رجالة .
يمسك سلطان بيد باسل ويدخلون غرفته ثم يقول له : اقعد يا باسل ، انا وانت لوحدنا اهو لو مكسوف تتكلم قدام مامتك وخالتك ، قولي بقي زعلان ليه ؟؟ اتخانقت انت وغرام ؟؟
باسل : لأ .
سلطان " مبتسما " : يا واد اتكلم انا اب متحضر وعارف انكم بتحبوا بعض وبتتكلموا ، قولي لو اتخانقتوا انا ممكن اصالحكم .
باسل : لأ يا اونكل .
سلطان : طيب قولي ايه اللي مزعلك بالشكل ده وانا اوعدك اني اقف جنبك واساعدك مهما كانت المشكلة اللي بتمر بيها .
باسل : طنط جميلة .
سلطان : مالها جميلة ؟!! رفضت ؟!!
باسل : مش بشكل صريح .
سلطان : يعني ايه ؟ مش فاهم !!
باسل : طنط جميلة وافقت لكن بشرط ان ماما تروحلها وتطلب غرام منها .
سلطان : ااااه فهمت .
باسل : فهمت ايه يا اونكل ؟؟
سلطان : وشيماء طبعا رفضت ؟
باسل : ماما رافضة جوازنا من الاساس ، يعني اكيد هترفض بعد الشرط ده !!!
سلطان : طيب خلاص سيب الموضوع ده عليا وانا هقنعها .
باسل : بجد ؟؟؟
سلطان : عمك سلطان قالك حاجة قبل كده ومش نفذها ؟؟
باسل : لأ .
سلطان : خلاص ، عايزك تدخل تاخد حمام وتسرح شعرك وتروق نفسك وانسي الموضوع ده خالص واعتبره منتهي .
باسل : انا عايز اسمع ماما وهي بتقول انها موافقة .
سلطان : حاضر يا جوز بنتي ، تعالي نخرج وشوف انا هعمل ايه .
يخرج سلطان مبتسما وفي يده باسل ويقول لشيماء : اهو يا ستي خلاص المشكلة خلصت .
شيماء : مشكلة ايه ؟ ولما انت يا باسل عندك مشكلة ليه مش بتقولي ؟!!
سلطان : لأن انتي يا شيماء سبب المشكلة دي .
شيماء : انا ؟؟!! انا عملت ايه ؟؟
سلطان : مش عايزة تجوزيه البنت اللي بيحبها ليه ؟؟
شيماء " بارتباك " : اناااا.. انااا....
سلطان : استني يا شيماء ، ابنك عايز عايز يتجوز بنتي وانا بالنسبالي موافق ، انتي مش عايزانا نكون نسايب ؟؟؟ ولا بنتي مش عجباكي ؟؟
شيماء : ده شرف ليا .
سلطان : يعني موافقة ؟؟
تنظر شيماء لشهد في حيرة !!
تشير لها شهد بالقبول ، ثم تقول : البنت ممتازة يا شيماء وكلنا موافقين ومش هنلاقي عروسة احسن منها لباسل .
شيماء : موافقة يا جوز اختي ، موافقة يا باسل ، مبسوط كده ؟؟
باسل " يبتسم " : ربنا يخليكي ليا يا ماما .
سلطان : ناقص بقي حاجة بسيطة يا شيماء .
شيماء : ايه تاني ؟ ما انا وافقت اهو علشان متزعلوش .
سلطان : تروحي تطلبي ايد غرام من جميلة .
شيماء : انت بتهزر يا سلطان ؟!! انا اروح لجميلة ؟!!!!
سلطان : وفيها ايه ؟ انتي هتروحي تطلبي ايد بنتها لابنك ، مش هتعملي حاجة غلط !!!
شيماء : لأ يا سلطان انا مش هروحلها .
سلطان : واذا قولتلك ده طلب مني انا هتكسفيني ؟؟
شيماء : انا مقدرش اكسفك لكن ..
سلطان : من غير لكن ، انتي مش عايزة تفرحي ابنك ؟!
شيماء : اكيد عايزة افرحه وعلشان كده وافقت ، وطلبت اخطب البنت منك ، وانت ابوها يبقي لزمتها ايه اطلبها من امها ؟؟!!
سلطان : صحيح غرام بنتي لكن امها هي اللي ربتها وتعبت عليها وهي الاحق انك تخطبي البنت منها ، هو ده الحق .
شيماء : لا يا جوز اختي انا طلبتها منك ووو....
شهد : مفيهاش حاجة يا شيماء لما تروحي تطلبي البنت من امها .
شيماء : عايزاني اروح لخدامتك لحد عندها واتحايل عليها توافق تجوز بنتها لابني ؟!!!
شهد : شغلها مش عيب ابدا ولا حرام وبعدين اللي يهمنا البنت نفسها ، وبصراحة غرام مفيش زيها انا اتمني اجوز ابني لبنت زيها .
شيماء : لا يا شهد .
باسل : خلاص مش عايز منك حاجة ، انا مش هتجوز خالص وهفضل قاعد كده لحد لما اموت .
شيماء : بعيد الشر عنك يا حبيبي ، ده انت اللي باقي لي دلوقتي .
سلطان : يبقي تريحي ابنك وتروحي تخطبي البنت من امها .
شيماء : ولو قابلتني وحش وطردتني زي ما انا طردتها زمان ، يبقي العمل ايه ؟
سلطان : جميلة مش هتعمل كده .
شيماء : مين قالك !! انا عارفة ، هي اكيد عايزة تنتقم مني .
سلطان : انا الضامن ليكي انها مش هتعمل كده .
شيماء : طيب سيبوني افكر .
شهد : مفيش تفكير يا شيماء ، وافقي علشان ابنك اللي ملكيش غيره ، لو عايزاني اروح معاك معنديش مانع .
شيماء : ماشي خلاص انا موافقة .
سلطان : لأ يا شهد ، بلاش انتي تروحي .
شيماء : ليه ؟ ليه مش عايز اختي تروح معايا ؟!!
سلطان : شهد مراتي وجميلة كانت مراتي والموقف هيكون حساس .
شيماء : وانا كمان موقفي حساس .
سلطان : شيماء ، انا قولتلك روحي لجميلة وانا الضامن انها مش هتقابلك وحش .
شيماء : طيب انا هروحلها .
باسل " يبتسم ويجري اليها وبحتضنها " : ربنا يخلبكي ليا يا ماما .
شيماء : وبخليك ليا يا حبيبي ، انا هروح لجميلة علشان خاطرك ، علشان تعرف اني مقدرش اشوفك حزين واسكت و ممكن اعمل اي حاجة علشان اسعدك .
باسل : انا هتصل بغرام دلوقتي واقولها انك هتروحي تزوري مامتها بكره .
شيماء : لأ استني انااا....
شهد : روح يا باسل كلمها وقولها ان مامتك هتروح لمامتها بكره .
شيماء : وهترجع معايا يا باسل علي الببت ؟
باسل : ايوه هقوم البس حالا .
نزلت شهد مع سلطان وتبدو علي ملامحها بعض علامات التوتر !!!
سلطان : مالك يا شهد ؟؟ شكلك متضايق من حاجة !!!
شهد : انت شوفت جميلة ؟؟
سلطان " بارتباك " : لأ ، هشوفها ازاي !! ما انتي معايا من يوم ما عرفت ان غرام بنتي ، هشوفها ازاي ؟
شهد : اومال انت ليه ضامن لشيماء انها هتقابلها كويس ؟!!!
سلطان : لأني عارف جميلة كويس ، واللي يخليها تضحي بعمرها علشان بنتها مستحيل تقابل شيماء وحش لأنها كده عارفة انها هتكسر قلب بنتها .
شهد : سلطان .
سلطان : نعم يا حبيبتي .
شهد : انت بتاعي انا لوحدي ، لو عرفت انك قابلتها او كلمتها بدون ما اعرف هيكون اخر يوم ما بينا !!!
سلطان : حاضر يا حبيبتي ، المهم دلوقتي انا هوصلك الفيلا واروح مشوار صغير .
شهد : هتروح فين ؟
سلطان " يبتسم " : مش هينفع اقولك .
شهد " بعصبية " : انت بتستفزني ؟؟
سلطان " يبتسم " : لا يا قلبي مش بستفزك ، لما ارجع هتعرفي .
وصلت شهد الي الفيلا بينما غادرها سلطان بسيارته التي سار بها الي ان وصل الي منزل جميلة !!!!
فتحت جميلة باب شقتها لتجد سلطان يقف امامها !!!
تفاجئ جميلة وترتبك ثم تقول : اهلا وسهلا اتفضل .
يدخل سلطان ويقول لها : ازيك يا جميلة عاملة ايه ؟
جميلة : الحمد لله ، حمدلله علي سلامتك .
سلطان : الله يسلمك .
جميلة : انت عرفت عنوان البيت ازاي ؟
سلطان : عرفت يا جميلة ، لكن يا خسارة اتأخرت كتير قوي .
جميلة " بارتباك " : حضرتك تشرب ايه ؟
سلطان : لأ ، مش عايز اشرب حاجة ، انا جاي اطلب منك ٣ طلبات والتلاتة اهم من بعض .
جميلة : تطلب !!! انت طلباتك اوامر يا سلطان بيه .
سلطان : اول طلب يا جميلة ياريت تقابلي شيماء كويس لما تيجي تطلب منك ايد غرام .
جميلة : وهي وافقت تيجي لحد عندي ؟
سلطان : ايوه وافقت لكن الاهم دلوقتي من موافقتها انك تسامحي وتغفري اللي عملته فيكي زمان مش علشانها ولا علشاني ، علشان خاطر بنتك .
الحلقة ٣٢
سلطان : ايوه شيماء وافقت لكن الاهم دلوقتي من موافقتها انك تسامحي وتغفري اللي عملته فيكي زمان مش علشانها ولا علشاني ، علشان خاطر بنتك .
جميلة : حاضر انا علشان بنتي اعمل اي حاجة ، و مش هطردها ولا اقابلها وحش علشان غرام .
سلطان : الطلب التاني يا جميلة ، عايزين نرجع لبعض .
جميلة : نرجع لبعض ازاي ؟؟!!
سلطان : انا لسه مش طلقتك رسمي هننزل نروح لمأذون دلوقتي يرجعنا لبعض .
جميلة : لأ طبعا مش ممكن .
سلطان : مش عايزة ترجعيلي ليه يا جميلة ؟ انا لسه بحبك ، وعارف انك لسه بتحبيني !!
جميلة : احنا كبرنا خلاص علي الحب والكلام ده ، انا حبي كله لبنتي .
سلطان : لكن انتي يا جميلة مش عيشتي حياتك ، ومن حقك انك تعيشي حياتك !!! اديني الفرصة اعوضك عن السنين اللي فاتت .
جميلة : كل واحد بيعيش حياته بالطريقة اللي ربنا مقدرها له واللي هي مناسبة له ، وانا الحمد لله راضية جدا عن حياتي .
سلطان : وانا كنت متوقع رأيك ده رغم اني كان نفسي توافقي .
جميلة : كل واحد بياخد نصيبه وانا راضية بنصيبي .
سلطان : مادام رفضتي الطلب التاني من فضلك اقبلي الطلب التالت يا جميلة ، ده شيك بمبلغ معقول ، ده حقك يا جميلة .
جميلة : حقي في ايه ؟
سلطان :احنا لما اتجوزنا واطلقنا مش اخدتي حقوقك .
جميلة : وانا مش عايزة حاجة ، الحمد لله انا مش محتاجة .
سلطان : انا مش بقول انك محتاجة ، لكن ده حقك .
جميلة : وانا متنازلة عن حقي ده .
سلطان : انتي عايشة منين دلوقتي يا جميلة ؟
جميلة : عايشة من بيع اللوحات اللي برسمها .
ينظر سلطان الي عدة لوحات فنية موجودة علي الحوائط بأنبهار ثم يقول : ما شاء الله انتي فنانة بجد ، كان نفسي من زمان اشوف رسوماتك لكن شوفتها متأخر .
جميلة : زمان كانت هواية ، دلوقتي اتعلمت ودرست واتطورت كتير وبقيت رسوماتي تنزل معارض والحمد لله عايشة مستورة .
سلطان : برافو عليكي يا جميلة ، ارجوكي بقي تقبلي الشيك .
تنظر جميلة للشيك بتعجب : لكن ده مبلغ كبير قوي .
سلطان : لأ مش كبير ولا حاجة .
جميلة : انا مش عارفة اقولك ايه ؟!!
سلطان : متقوليش حاجة ، كفاية عندي كلمة سامحتك اللي قولتهالي .
جميلة : الشيك ده انا مش هاخده ، لو مصمم ممكن تديه لغرام تبدأ به حياتها .
سلطان : غرام لها حق و ورث شرعي هتاخده ، ده حقك انتي .
جميلة : وانا متنازلة عنه لبنتي .
عاد سلطان من عند جميلة الي الفيلا فوجد شهد في انتظاره !!!
شهد : كنت فين يا سلطان ؟
سلطان : كنت في مشوار .
شهد : انت مش رضيت تقولي رايح فين ، وقولتلي لما ترجع هتقولي ، ممكن تقول بقي كنت فين ؟
سلطان : كنت بسدد دين في رقبتي .
شهد : دين ؟!!! انت كنت مديون لحد ؟؟
سلطان : ايوه ده كان دين قديم و كنت ناسيه وافتكرته وروحت اسدده .
شهد : انت روحت لجميلة ؟؟
سلطان : ايوه .
شهد : ليه ؟ ليه يا سلطان ؟ انت عايز ترجعلها ؟
سلطان : لأ ، انا كنت عايز اديها حقها .
شهد : حقها في ايه ؟!!
سلطان : انتي ناسية انها ربت بنتي احسن ما كنت انا هربيها وانا مدفعتش قرش واحد في تربيتها ؟!! ده غير اني لما طلقتها مش دفعتلها اي حاجة من حقوقها !!
شهد : دفعتلها كام ؟
سلطان : هي رفضت تاخد اي حاجة واتنازلت عن اللي كنت هدفعه لها لبنتها .
شهد : وعملت ايه لما شوفتها ؟ وهي عملت ايه ؟ اكيد فرحت قوي .
سلطان : انا معرفش فرحت او مش فرحت ، انا مدخلتش جواها علشان اعرف .
شهد : انا بكره هروح مع شيماء عندها .
سلطان : ليه ؟
شهد : علشان نخطب لأبن اختي .
سلطان : يا شهد بلاش مشاعر الانثي اللي جواكي دي تدفعك تعملي حاجة نزعل بسببها انا وانتي .
شهد : انت ممكن تزعل معايا علشانها ؟؟
سلطان : بطلي غيرتك دي بقي ، جميلة قفلت حياتها علي نفسها وبنتها وبس ، يعني حتي لو فكرت فيها هي مش هتفكر ، بلاش الغيرة تغيرك يا شهد ، انتي طول عمرك قلبك طيب ، وانتي عارفة انك حبي الوحيد .
شهد : حاضر يا سلطان ، بس انت وعدتني انك مش هتفكر في جميلة ؟؟
سلطان : ولا حتي هشوفها تاني الا لو صدفة ، وحتي لو شفتها ولا انا ليا مكان في حياتها ولا هي لها مكان في حياتي .
شهد : ماشي يا سلطان وانا هصدقك لكن اعمل حسابك لو خالفت كلامك ده وعرفت انك رجعت علاقتك بجميلة سواء جواز او قابلتها من ورايا يبقي بتهد عشرتنا وكل حاجة بينا .
في اليوم التالي ...
تتصل شهد صباحا وتخبر شيماء بالذهاب معها مساءا لجميلة .
تذهب شهد الي شيماء فتجدها مازالت مترددة في الذهاب !!
شهد : انا عايزة اعرف انتي مترددة ليه تروحلها ؟؟
شيماء : مش قادرة انسي منظرها لما كانت بتمسحلك الشقة ومش متخيلة نفسي رايحة دلوقتي اخطب بنتها لابني !!
شهد : احنا اللي يهمنا البنت نفسه ، غرام بنت مفيش بعد كده جمال وادب واخلاق وطموح ومركز اجتماعي ، ومستقبلها هيكون احسن كمان ، سواء امها كانت خدامة او سيدة مجتمع مش هيفرق معنا ، ده غير ان ابنك متمسك بها ، يلا يا شيماء قومي ألبسي علشان نروحلها .
في المساء ...
تذهب شيماء و شهد الي منزل جميلة وتقف شيماء عند درج المنزل مترددة في الصعود !!! ولكن شهد حتي يصعدوا عند شقتها .
تفتح جميلة الباب بابتسامة عريضة وترتدي انيقة : اهلا وسهلا يا مرحب اتفضلوا .
شهد : ازيك يا جميلة عاملة ايه ؟
جميلة : الحمد لله في نعمة من ربنا .
شهد : دايما يا حبيبتي ، انتي بنت حلال وتستاهلي كل خير .
تلاحظ جميلة نظرات شيماء لها ولكنها تتجاهلها حتي بدأت شيماء : ازيك يا جميلة ؟ انا مبسوطة اني شوفتك .
جميلة : انا اكتر ، نورتونا .
شيماء : اومال فين عروستنا ؟؟
جميلة : هي جوه اوضتها ، مكسوفة تقعد معنا .
شيماء : هو لسه فيه بنات بتنكسف ؟ ده كان زمان .
جميلة : كل واحد حسب تربيته ، وانا بنتي بتنكسف ، لأني ربتها علي الاخلاق اللي اتربينا عليها زمان .
شيماء : وفعلا عرفتي تربي يا جميلة .
شهد : وعلشان عرفتي تربي يا جميلة احنا جايين النهاردة نخطب بنتك غرام لباسل ابن اختي .
جميلة : اعذريني يا مدام شهد ، طلبك علي راسي لكن ام العريس هي اللي المفروض تطلبها .
شيماء : انا واختي واحد ، وعلي العموم مش هزعلك يا جميلة ، انا جاية طالبة ايد بنتك غرام لابني باسل .
كانت دقات قلوبهم جميعا تكاد ان تسمع عن بعد !!!!!
شهد تخاف من شعور الاحراج اذا رفضت جميلة .
بينما شيماء يزداد خفقان قلبها خوفا من رفض جميلة فتكون تلك الساعة هي ساعة انتقامها منها .
اما غرام فكانت تسمع حديثهم عن بعد ويخفق قلبها حيرة وخوفا .
اما جميلة فكان خفقان قلبها فرحة وسعادة من جلوس شيماء امامها في هذا الموقف الذي انتظرته طويلا .
شهد : قولتي ايه يا ام العروسة ؟؟
جميلة : قولت الحمد لله اني ربيت بنتي التربية دي وعلمتها ووصلتها لمكانة اجتماعية اي حد بيحلم بيها علشان ابنك يا مدام شهد ميتكسفش يقول انها اخته بالعكس ده اكيد بيفتخر بها قدام اي حد حتي خالته نفسها اللي قالت زمان ازاي نور ابن شهد هانم يكون له اخت بنت خدامة جاية النهاردة علشان تطلبها لابنها ، انا كده حسيت ان عمري مضعش هدر والحمد لله ، انا موافقة يا مدام شيماء ويسعدني ان شاب محترم وطموح زي ابنك باسل يكون عريس لبنتي .
شهد : طيب نقرا الفاتحة .
جميلة : هنقرا الفاتحة مؤقتا ، انما الفاتحة للرجالة ابو باسل وابو غرام .
شهد : طبعا اكيد ، فعلا انتي تعرفي في الاصول .
بعد قراءة الفاتحة لم تنطق شيماء بكلمة ، حتي عندما خرجت اليهم غرام مرتدية حليتها ابتسمت شيماء لها ولم تتكلم !!!
شهد : الف مبروك يا عروسة ، بصراحة مش عارفة اقول مبروك لكي ولا مبروك لباسل ، فعلا ابنك يا شيماء عرف يختار .
ثم توجه كلامها لجميلة وتقول لها : شقتك حلوة يا جميلة .
جميلة : علي قدنا يا مدام شهد .
شهد : انا بتكلم جد ، الشقة رغم بساطتها لكنها حلوة وخصوصا اللوحات دي .
جميلة : دي لوحات من اللي انا برسمهم بحتفظ ببعضهم وببيع الباقيين .
غرام : ماما دلوقتي بقيت فنانة مشهورة يا طنط .
شهد : بجد ؟؟
غرام : ايوه ، انتي لو عملتي سيرش علي جو.جل هتلاقي اسمها ظاهر علطول ، وكمان في كل المعارض لوحاتها بتتطلب بالاسم .
شهد : مامتك يا غرام تستاهل كل خير .
شيماء : نستأذنكم احنا وهقول لباسل يبقي يرتب مع باباه علشان يقابل سلطان ويقروا الفاتحة ويتفقوا .
تنزل شيماء يملؤها الغضب وتلاحظ شهد ذلك وتسألها : مالك يا شيماء ؟
شيماء : شوفتيها وهي بتتكلم ، كانت بتشتمني بالأدب .
شهد : لأ الصراحة هي قابلتنا كويس جدا ، انا كنت متوقعة مقابلة تانية خالص ، تعرفي انا كنت جاية وغيرانة منها وحطة في دماغي كلام كتير كنت هقوله لها لكن من مقابلتها الحلوة غيرت كل تفكيري .
عادت شيماء الي ابنها الذي كان ينتظرها علي احر من الجمر .
باسل : عملتي ايه يا ماما ؟ طمنيني
شيماء : اطمن يا حبيبي ، روحتلها و عملت اللي انت عايزه ، يكون في علمك انا مكنتش موافقة لكن عملت كده علشان خاطرك بس .
باسل : ربنا يخليكي ليا يا ماما ، يعني مامتها وافقت ؟
شيماء : ايوه وافقت وقالتلي باباك يروح لعمك سلطان يطلبها منه رسمي .
باسل " بفرحة شديدة " يقبل يد شيماء : ربنا يخليكي ليا يا ماما يا احسن واجمل ام في الدنيا كلها .
شيماء : عايزة اننبهك لحاجة مهمة .
باسل : اتفضلي يا احلي ام في الدنيا .
شيماء : اوعي تقول قدام غرام او امها ان اخوك في السجن !!! مش جميلة تبقي ربت بنتها كده وابني انا يبقي في السجن !!!
باسل : ولو سألوني عنه ؟؟
شيماء : قولهم انه مسافر بره .
بعد عدة اسابيع
في احد الفنادق الشهيرة وفي قاعة كبيرة للافراح وبحضور كبار الاعمال وبعض الفنانين المشهورين .
تجلس غرام ترتدي فستانها الابيض وطرحتها البيضاء وبجوارها باسل وتبدو عليهم مظاهر السعادة والفرح الشديد .
بينما تجلس شيماء وشهد ونور تبدو عليهم السعادة وتضحك شهد وتقول لابنها : عقبالك يا نور ، عقبالك يا حبيبي ، نفسي افرح بيك يا قلبي .
نور : قريب يا ماما .
شهد : روح اوقف جنب باباك وهو بيستقبل الضيوف .
نور " يضحك " : بابا كل اللي بيستقبلهم العواجيز ، شوية كده هتلاقي الشباب جايين واروح استقبلهم .
شهد " تضحك " : ابوك مش عجوز يا ولد ، ابوك شاب عنك وعن اصحابك .
نور : طبعا ، مين يشهد لحبيب القلب .
بينما تجلس بعيدا عنهم جميلة وبعض اصدقائها وصديقاتها من كبار الفنانين ، عيونها تملؤها الفرحة والسعادة ولكنها لا تخلو من دموع الفرحة التي لا تستطيع ايقافها .
سلطان تملؤه مشاعر السعادة والفرح ويقف مع ابو باسل لاستقبال الضيوف و تحيتهم .
ثم يبدأ اصدقاء باسل في الوصول وصديقات غرام يصلن و يلتفن حولها في سعادة غامرة و يقومون باطلاق صيحات الفرح والضحكات مع الرقصات علي الاغاني الصاخبة .
فجأة يشاهد نور منار صديقة غرام " التي رأها معها من قبل مع بسام في الكافية " فيقوم ويقف فتسأله شهد : رايح فين يا نور ؟؟
نور : مش انتي لسه من شوية كنتي بتقولي عايزة افرح بيك ؟
شهد : ايوه يا حبيبي ، ده يبقي اسعد يوم في حياتي .
نور " يضحك " : طيب انا هروح اقف هناك عند البنات اللي هناك دول ، يمكن افرحك قريب .
ينتهي الفرح والاحتفال وتقف جميلة وتقبل ابنتها : الف مبروك يا قلبي ربنا يسعدك يا حبيبتي .
غرام : الله يبارك فيكي يا ماما .
جميلة : اوعي تنسي امك يا غرام ؟
غرام : مش ممكن ابدا يا قلبي .
جميلة : خلي بالك منها يا باسل يا ابني حطها في عينيك .
باسل : في عينيا يا ماما .
جميلة : اوعي تزعلها يا باسل ، انت متعرفش غرام دي بالنسبالي ايه ، غرام دي قلبي وروحي وعمري .
باسل : وقلبي وروحي وعمري انا كمان .
الي مش متابع صفحتي فايته كتير
ويغادر العروسان الفندق ويتوجهان الي عش الزوجية .
وعند باب الشقة يحمل باسل عروسته علي ذراعه ويدخل بها المنزل و سار بها حتي دخل غرفة النوم ثم اغلق الباب بقدمه وضحك قائلا : نورتي بيتك يا احلي واجمل واطعم عروسة في الدنيا .
ضحكت غرام ونظرها في الارض خجلا .
تمت بحمد الله
