رواية غرام السلطان الفصل الخامس عشر15 والسادس عشر16 بقلم عادل عبد الله
في احدي كبار المستشفيات...
شهد " تبكي " : طمني يا دكتور سلطان ماله ؟
الطبيب : اطمني يا مدام الحمد لله الخطر زال ، هو محتاج يكون تحت رعاية ٢٤ ساعة بعدها ممكن يخرج ، لكن لازم يرتاح علي الاقل اسبوع قبل ما يرجع لنشاطه الطبيعي تاني .
شهد : هو ايه اللي حصله بالظبط يا دكتور ؟
الطبيب : سلطان بيه عنده مشكلة في الشريان التاجي هي اللي سببتله الازمة ، لازم يمشي علي العلاج وهنشوف الحالة ممكن تحتاج جراحة او لأ .
اليوم التالي في الفيلا
شهد : حمد لله ع السلامة يا حبيبي انا كنت همو.ت من الخوف عليك .
سلطان : الله يسلمك يا شهد ، ربنا يخليكي ليا .
شهد : ويخليك يا حبيبي ، سمعت الدكتور قال ايه ؟ لازم ترتاح شوية يا سلطان ، انت بتجهد نفسك في الشغل قوي .
سلطان : لازم اعمل كده ، ماهو لو ابنك كان جنبي في الشغل كان شال الحمل من عليا شوية .
شهد : معلش يا سلطان اصبر عليه شوية ، الولد لسه صغير .
في غرفة نور..
نور : بابا عامل ايه دلوقتي يا ماما ؟
شهد : الحمد لله احسن كتير لكن الدكتور قال لازم يرتاح اسبوع ، و اعمل حسابك يا نور لازم تبدأ تساعد باباك في شغله .
نور : اساعده !!! انا معرفش حاجة في شغل بابا خالص .
شهد : روح معاه الشغل واتعلم .
نور : يا ماما لسه بدري ، لما اتخرج من الجامعة ابقي اساعده .
شهد : وحاول تبطل تأخير بره البيت .
نور : يا ماما انا بكون مع بسام ابن خالتي مش مع حد غريب .
شهد : بردو الموضوع ده بيضايق بابا ياريت تخف شوية من التأخير .
نور : حاضر يا ماما .
تخرج شهد من غرفة نور وتجلس وتتصل بأختها شيماء ....
شهد : شيمو حبيبتي عاملة ايه ؟
شيماء : تمام ، وانتي عاملة ايه و سلطان عامل ايه دلوقتي ؟
شهد : الحمد لله بقي احسن .
شيماء : انا كنت عايزة اجي ازوره بس انتي عارفة هو مش بيطيقني ولا بيطيق منير جوزي .
شهد : كأنك جيتي بالظبط يا شيمو ، المهم انا عايزاكي في موضوع مهم .
شيماء : موضوع ايه يا روحي ؟
شهد : عايزاكي تقولي لبسام يخف شوية من الخروج بره البيت .
شيماء : ليه يا شهد فيه ايه ؟
شهد : بسام ونور ابني علطول بره البيت وده غلط عليهم في السن ده .
شيماء : وانا اعمل ايه ؟!! اذا كان هو ومنير جوزي مش بيطيقوا بعض ولما بيتقابلوا في البيت لازم تحصل بينهم مشاكل .
شهد : حاولي انتي تصلحي بينهم ، كلمي ابنك شوية وجوزك شوية .
شيماء : المشكلة مش في منير ، المشكلة في بسام مش قادر ينسي ان منير جوز امه وبيعامله وحش اوي .
شهد : كلمي باسل يخليه يغير فكرته دي ، هو اخوه الكبير والعاقل واكيد هيكون له تأثير عليه .
شيماء : لااا ، بسام مفيش مخلوق له تأثير عليه .
شهد : يعني هتسيبي ابنك يضيع يا شيماء ؟!!
شيماء : لا لا بسام متربي كويس ومادام دايما مع نور ابنك انا مطمنة عليهم ، هما الاتنين متربين ومش ممكن يعملوا حاجة غلط .
********
جميلة : غراام ... مرمر ... يلا يا حبيبة ماما قومي علشان تروحي جامعتك .
غرام : صباح الخير يا ست الكل .
جميلة : صباح الفل يا قلبي ، يلا علشان تلحقي محاضراتك ، انا هجهز الفطار علشان نفطر مع بعض قبل ما تنزلي .
غرام : حاضر يا ماما .
علي مائدة الافطار
غرام : اظن يا ماما انتي دلوقتي بتعرفي تكتبي وتقرأي كويس ؟
جميلة : بقرأ كويس ، انما الكتابة لسه شوية .
غرام : اسبوعين كمان يا ست الحبايب وهتكتبي حلو ان شاء الله .
جميلة : البركة فيكي يا روحي ، لولا تعبك معايا كان زماني لسه مبعرفش .
غرام : لا يا قلبي انتي اللي ما شاء الله ذكية وبتعلمي بسرعة ، اهم حاجة كل ما تشوفي اي كلام قدامك اقرأي علشان متنسيش اللي اتعلمتيه .
جميلة : حاضر ، انا مش عارفة لزمته ايه تعبك معايا كل ده .
غرام : لزمته يا حبيبتي انك خلاص هتبدأي كورسات الرسم قريب .
جميلة : انا مش عارفة هلاقي وقت لكورسات الرسم دي ازاي !!
غرام : اسمعي كلامي يا ماما ، كلها كام سنة وتبقي صورك في كل المعارض ، وترتاحي بقي من وقفة المحل .
جميلة : مستحيل ابدا ، المحل ده وعمل السندوتشات هو اللي رباكي يا غرام وهيفضل مفتوح لحد ما امو.ت .
غرام : بعيد الشر عنك يا ماما ، انتي زعلتي ولا ايه ؟؟
جميلة : لا يا قلبي عمري ما ازعل منك ابدا ، لكن حبيت اعرفك ان عمري ما هقفل المحل اللي سترنا وربيتك منه ابدا .
غرام : و ده شئ يشرفني طبعا يا ماما ، معلش بقي لازم انزل لأتأخر علي المحاضرات ، باي يا قلبي .
جميلة : مع السلامة يا حبيبتي خلي بالك علي نفسك .
في الجامعة
ينتهي المعيد من الشرح ثم يسأل الطلاب : فيه اي حد عنده سؤال ؟
غرام : ايوه بعد اذنك يا دكتور كان عندي سؤال .
المعيد : تعاليلي المكتب يا انسة غرام علشان انا عارف أسألتك بتحتاج كلام وشرح كتير .
تخرج غرام مع زميلاتها من السيكشن فتسألها زميلتها منار : ايوه يا ستي مين قدك يا غرام هانم عندك محاضرة لوحدك عند دكتور عمار .
غرام : بطلي تريقة يا حبيبتي ، دكتور عمار بيشرحلي في المكتب لأنه بياخد وقت في الشرح ، ومش معقول هياخد الوقت ده كله يكون في السيكشن .
منار " بضحك " : ايوه عارفة عارفة .
غرام : بردو بتتريقي ؟
منار : تنكري ان دكتور عمار مهتم بيكي زيادة ؟؟
غرام : معرفش ، ولو افترضنا انه مهتم زيادة ده لأني بهتم اني أسأل في كل تفصيلة في كل درس .
منار : لا يا غرام ، ده واضح قوي انه معجب بيكي .
غرام : معجب بيا انا ؟!!
منار : ايوه .
غرام : معرفش وعلي العموم انا اللي يهمني الدروس وبس .
منار : يعني انتي مش معجبة به ؟؟
غرام : ايه اللي بتقوليه ده يا بنتي !! لا اطبعا ، احنا جايين نتعلم ولا جايين للكلام الفارغ ده !!!
منار : يا بنتي ده باين في عينيكي ، ده اول ما بيدخل السيكسن عينيكي بتلمع علطول .
غرام : طيب بطلي يا عسل علشان زمانه مستني في مكتبه ومينفعش أتأخر عليه اكتر من كده .
في مكتب عمار
يسمع عمار دقات علي باب مكتبه فيأذن لها بالدخول ...
عمار : اتأخرتي ليه يا غرام ؟
غرام : اسفة يا دكتور .
عمار : ياريت بعد كده متتأخريش عليا كده تاني .
غرام : حاضر يا دكتور .
" وبعد بعض الاسئلة والمناقشات العلمية ينتهي عمار من الشرح لغرام " .
عمار : تعرفي يا غرام انك اجمل واحدة في الدفعة ؟؟
غرام : نعم ؟؟؟؟؟
عمار : قصدي اشطر واحدة في الدفعة .
غرام " تبتسم " : اااه ، ميرسي اوي يا دكتور .
عمار : غرام .
غرام : نعم يا دكتور .
عمار : انتي مرتبطة ؟؟
غرام " بخجل " : لا يا دكتور .
عمار : كويس قوي ، ممتاز .
غرام : مش فاهمة يا دكتور .
عمار : الصراحة مش هخبي اكتر من كده ، انا معجب بيكي جدا يا غرام .
غرام : ايه اللي بتقوله ده يا دكتور ، بعد اذنك انا لازم امشي .
عمار : طيب استني .
غرام : لا لا معلش لازم امشي .
عادت غرام الي المنزل تساورها مشاعر مختلطة بين الفرح والدهشة والحيرة !!
تلاحظ جميلة تغير ما علي ابنتها غرام فتسألها : حبيبة قلب ماما سرحانة في ايه ؟؟
غرام : مفيش يا ماما .
جميلة : كل ده ومفيش حاجة !!! هتخبي علي ماما يا غرام ؟؟
غرام " تضحك " : مفيش حاجة مهمة تستاهل تشغلي نفسك .
جميلة : يعني مش عايزة تقولي لماما ؟ ولا فكرة ان مامتك جاهلة ومش هتفهمك ؟!
غرام : العفو يا ماما مش قصدي .
جميلة : مش هغصب عليكي ، لما تحسي انك عايزة تحكي لماما هسمعك وهفهمك كويس يا قلب ماما .
غرام : حاضر يا حبيبي اول ما تكون فيه حاجة تستاهل احكيلك عليها هتلاقيني انا اللي بقولك يا ست الكل .
في اليوم التالي..في الجامعة
بمجرد دخول دكتور عمار السيكشن تبحث عيونه عن غرام بين الطلاب حتي تقع عينيه عليها اثناء دخولها السيكشن .
يبتسم عمار وتظل عينيه شبه ثابتتين علي غرام طوال المحاضرة !!
الحلقة ١٦و١٧و١٨
بمجرد دخول دكتور عمار السيكشن تبحث عيونه عن غرام بين الطلاب حتي تقع عينيه عليها اثناء دخولها السيكشن .
يبتسم عمار وتظل عينيه شبه ثابتتين علي غرام طوال المحاضرة !!
منار : واخدة بالك يا غرام ؟ دكتور عمار مبيحركش عينه من عليكي ، كأنه بيشرح المحاضرة لكي انتي لوحدك !!
غرام : خلاص اسكتي بقي خليني اركز في المحاضرة .
منار : تركزي في المحاضرة ولا في عيون دكتور المحاضرة .
غرام : لو مبطلتيش كلام هقوم من جنبك .
تنتهي المحاضرة ثم ينادي عمار علي غرام ويطلب منها اللحاق به في مكتبه .
تذهب غرام وتجد عمار يجلس ويبدو عليه التوتر !!
غرام : افندم يا دكتور ، حضرتك قولتي تعاليلي المكتب .
عمار : ايوه يا غرام ، اتفضلي اقعدي .
جلست غرام يبدو عليها قليلا من الارتباك ثم سألته : ايوه يا دكتور .
عمار : انا فيه كلام كتير عايز اقولهولك لكن مش عارف ابدأ ازاي .
غرام : اتفضل يا دكتور انا سامعة حضرتك .
عمار : عايز ان من اول يوم شوفتك فيه وانتي لفتي نظري ، تفوقك الدراسي واخلاقك وجمالك كل حاجة فيكي حبتها من اول ما شوفتك .
غرام حاولت تنصرف لكن عمار قاطعها : لا ارجوكي لازم تسمعيني للأخر .
غرام : انا مش عارفة حضرتك عايز ايه بالظبط !!!
عمار : عايز اقولك اني معجب بيكي وعايز ارتبط بيكي .
" يحمر وجهها خجلا " غرام : بمعني ايه ؟
عمار : بمعني اني عايزك تكوني شريكة حياتي ، انا عايز اخطبك يا غرام .
غرام : احم احم ، لكن حضرتك متعرفش عني حاجة !!!
عمار : بالنسبالي كفاية قوي اللي شوفته من تفوقك و اخلاقك وجمالك .
غرام : لكن انت متعرفش انا مين وبنت مين !!
عمار : كل دي شكليات متهمنيش ، انا اللي يهمني حاجة واحدة دلوقتي رأيك فيا ، هل انتي موافقة ولا عندك اعتراض ؟؟
غرام : الحقيقة انا مكنتش بفكر في الارتباط قبل ما اخلص الكلية .
عمار : يعني افهم اني بترفضي ؟؟
غرام : لأ ، لكن ياريت تديني مهلة افكر .
عادت غرام فب نهاية اليوم و يبدو عليها الاستغراق في التفكير .
عادت جميلة في المساء لتجد غرام تفتح كتابها ولكنها شاردة الذهن !!!
جميلة : اول مرة اشوفك فاتحة الكتاب وسرحانة مش بتذاكري .
تضحك غرام : تعالي يا ماما انا هقولك انا بفكر في ايه .
وبعد ان قصت غرام علي والدتها كلام عمار لها ...
تضحك جميلة : كبرتي يا غرام وجايلك عريس ؟!!!
يحمر وجه غرام خجلا !!
جميلة : رغم اني مش مريت بحاجة زي دي في حياتي لكن هقولك رأيي .
غرام : اتفضلي يا ماما ، انا حكيت لك علشان مفيش حد ممكن اخد رأيه غيرك .
جميلة : لو انتي شايفة انه انسان كويس ومش غرضه انه يلعب بيكي ومش هيعطلك عن دراستك مفيش مانع .
غرام : هيعطلني ازاي يا ماما !! بقولك ده المعيد بتاعي يعني ممكن يساعدني .
جميلة : الاهم كمان انه لازم يعرف عنك كل حاجة ، يعرف ابوكي مين وامك مين ، علشان كل حاجة تبقي علي نور من البداية .
غرام : ماما ، ممكن اسألك سؤال ؟
جميلة : اسألي يا حبيبتي زي ما تحبي .
غرام : انا يوم خطوبتي هتعرفي بابا ويكون موجود ؟؟
جميلة : لا .
غرام : انا اسفة لو سؤالي زعلك يا ماما !!
جميلة : لا يا قلبي مزعلتش ، لكن ابوكي ده اسم في شهادة ميلادك وبس انما انا ابوكي وانا امك ، انا اللي ربيتك وكبرتك وعلمتك ، اللي هيخطبك يخطبك مني انا .
غرام تقترب منها وتحت.ضنها بقوة : ربنا يخليكي ليا يا امي يا احسن ام في الدنيا كلها .
جميلة : ويخليكي ليا يا قلب ماما .
غرام : ولما يسألني عن بابا هقوله ايه ؟
جميلة : دي بقي سبيهالي وانا هتصرف .
بعد ايام ...
عمار : ياتري كل ده لسه بتفكري ؟
غرام : ايوه .
عمار " يبتسم " : ياااه للدرجادي انا وحش و مترددة ؟!
غرام : لا والله ابدا بالعكس .
عمار " يضحك " : بالعكس ؟؟ بعني انتي شايفاني اني حلو ؟
تضحك غرام : الموضوع ملوش علاقة بالشكل .
عمار : اومال له علاقة بأيه ؟
غرام : له علاقة بقلبي وبعقلي .
عمار : و يا تري قالولك ايه ؟؟
تيتسم غرام في صمت .
عمار " يضحك " : هو ده اللي بيقولوا عليه السكوت علامة الرضا .
تضحك غرام .
عمار : تعرفي ان ضحكتك حلوة قوي .
غرام : ميرسي قوي ، لكن فيه حاجات مهمة لازم تعرفها عني .
عمار : تسمحيلي اعزملك في مكان هادي وكل واحد يتكلم ويقول اللي جواه .
غرام : موافقة بس بشرط .
عمار : ايه هو ؟
غرام : هتكون اول واخر مرة علشان مش متعودة اعمل حاجة من ورا ماما .
يجلس عمار وغرام في مكان هادئ ...
عمار : بداية كده قبل ما تتكلمي لو عايزة تقوليلي انك كنتي مرتبطة قبل كده فأحب اقولك ان ده مش مهم بالنسبالي لأن الماضي يخصك لوحدك انما الحاضر والمستقبل هما اللي يهموني .
غرام : لا لا انا عمري ما ارتبطت ابدا ولا حتي فكرت في المواضيع دي ، انا كان كل تفكيري في مذاكرتي وبس .
عمار : جميل ، طيب ايه يا ستي بقي الحاجات اللي كنتي عايزة تقوليلهالي ؟
غرام : عايزاك تعرف انا بنت مين .
عمار : رغم ان الاهم هو انتي نفسك لكن اتفضلي انا سامعك .
غرام : انا اسمي غرام سلطان ابو المجد .
عمار : باباكي سلطان ابو المجد رجل الاعمال ولا تشابة اسماء ؟؟
غرام : ايوه هو بابا .
عمار : معقول !! ده باباكي من اكبر رجال الاعمال في البلد .
غرام : ايوه بالظبط كده .
عمار : غريبة قوي .
غرام : ايه اللي غريب بالظبط ؟؟
عمار : يعني بما انك بنت سلطان بيه ابو المجد كان المفروض علي القل تكون فيه غربية بتوصلك وترجعك كل يوم من الجامعة !!!
غرام : لأ ، اصل انا بنت الخدامة .
عمار : سورري ، مش فاهم !!
غرام : هو ده باقي حكايتي ، هحكيهالك في دقايق بسرعة .......
عمار : يااااه !!! يعني انتي عمرك ما شوفتي باباكي ابدا ؟!!!
غرام : ابدااا ، بشوفه في الصور وبس .
عمار : ومامتك هي اللي ربتك من اول ما اتولدتي ولحد دلوقتي لوحدها ؟؟
غرام : أيوه ، بغض النظر اذا كانت اللي عملته مامتك صح او غلط لكنها ست عظيمة حقيقي .
غرام : فعلا ماما رغم انها مكملتش تعليمها وست بسيطة لكنها اعظم ست في الدنيا ، وهقولك عنوان المحل بتاعها علشان لو حبيت تروح تنفعها هناك .
يضحك عمار : الست اللي تهتم ببنتها بالشكل ده و تضحي بشبابها علشانها لازم تكون أم عظيمة .
غرام : و لو بعد اللي عرفته لسه متمسك انك تخطبني فالكلام كله هيكون مع ماما .
عمار : اكيد وده شئ يشرفني ، انا هكلم بابا وماما وقريب قوي هقولك علشان ناخد معاك نتكلم مع مامتك .
في منزل أسرة عمار
منزل فخم يدل علي أسرة ثرية جدا ..
يجلس عمار مع والدته ووالده ليخبرهم عن غرام .....
بعدما يستمعان لكل ما قاله عمار عن غرام ووالدتها جميلة تنظر له والدته بغضب بينما يقول له والده : عارف يا عمار لو اخر بنت في الدنيا مستحيل تتجوز البنت دي .
عمار : ليه يا بابا ؟ مالها غرام ؟
والده : دي بنت حرام يا ابني !!! انت عارف باباها عمل ايه مع مامتها علشان يخلفها !!!
عمار : يا بابا ده كان متجوزها .
والده : هي لازم تقولك كده ، اومال عايزها تقولك ان بابا اتسحب بالليل وراح للخدامة في المطبخ وغلط معها !!!!!!