رواية غرام السلطان الفصل السابع عشر17 والثامن عشر18 بقلم عادل عبد الله
عمار : ليه يا بابا ؟ مالها غرام ؟
والده : دي بنت حرام يا ابني !!! انت عارف باباها عمل ايه مع مامتها علشان يخلفها !!!
عمار : يا بابا ده كان متجوزها .
والده : هي لازم تقولك كده ، اومال عايزها تقولك ان بابا اتسحب بالليل وراح للخدامة في المطبخ وغلط معها !!!!!!
عمار : ايه يا بابا الكلام اللي حضرتك بتقوله ده !!!!
والدته : باباك بيتكلم صح ، هو معقول مدام شهد مرات سلطان هتجوزه لوحدة غيرها ؟!! اكيد لأ وبعدين هي بتقولك انها كانت عقيمة وكل الناس عارفين ان سلطان ابو المجد عنده ولد !!!
عمار : ايوه يا ماما الحاجات دي بتحصل كتير .
والدته : ايوه ممكن تحصل في الافلام انما في الحقيقة لأ مش بتحصل .
والده : وحتي يا عمار لو مرات سلطان عايزة تجوزه واحدة بغرض الخلفة زي القصة البايخة اللي بتقولها اكيد كانت هتجوزه واحدة محترمة من مستواهم ، مش هتجوزه الخدامة يعني !!!!!
عمار : وهي هتكدب ليه ؟؟
والدته : علشان مستحيل تقول لبنتها انها غلطت مع سيدها .
عمار : لو سمحتوا كده حرام ، مادام مشوفناش حاجة بعنينا مبنفعش نقول الكلام ده !! ده اسمه قذف محصنات .
والده : طيب يا عم اللمض ، حتي لو امها شريفة وده شئ محل شك انت ترضي ان جدة ابنك تكون خدامة ؟؟
عمار : مادام شغل شريف مفيش مشكلة ارضي طبعا ، وعلفكرة هي سابت الشغلانة دي من زمان و فتحت مطعم .
والده : مطعم مرة واحدة !! كويس والله ، وفين المطعم ده ؟؟
عمار : العنوان معايا اهو ، خلي بالك مش مطعم زي ما في خيالك يا بابا لكن محل صغير كده بتعمل فيه سندوتشات .
والده " بسخرية " : تصدق ده شئ يشرف فعلا ان حماتك بتببع سندوتشات !! عمار يا حبيبي انسي الكلام في الموضوع ده خاااالص .
عمار : يا بابا بعد اذنك اسمعني ، لو هنتكلم في المكانة الاجتماعية فغرام دي هتبقي دكتورة كبيرة قوي وده في حد ذاته كفاية .
والده : خلص الكلام .
عمار : يا بابا انا مش صغير انا معيد في الجامعة وبحضر ماجستير يعني المفروض تسمعني .
والده : وانا ابوك وبقولك اسمعك واتناقش معاك في اي موضوع تاني الا الموضوع ده .
ينتهي النقاش بعد ان يصاب عمار ببعض الاحباط ولكنه يبقي عنده الأمل في محاولة التأثير عليهم فيما بعد !! ولكن بعد ايام يحدث ما لم يتوقعه ابدا !!!
بعد أيام...
يتكرر النقاش بين عمار ووالده ووالدته ويتمسك كلا منهم برأيه وفجأة يصاب والده بأزمة قلبية حادة !!! ويتم نقله الي المستشفي فورا .
تلقي والدة عمار عليه باللوم بأنه سبب مرض والده !!
ثم تذهب والدة عمار الي جميلة أم غرام .
تقف بسيارتها الفارهة بالقرب من محلها ثم تنزل وتتوجه لها .
أم عمار : انتي مامت غرام ؟؟
جميلة : ايوه يا هانم ، اؤمري !!
ام عمار : كنت عايزة اتكلم معاكي كلمتين .
جميلة : حاضر ، اتفضلي ارتاحي وانا دقيقتين واكون معاكي .
تجلس جميلة بجوار ام عمار وتسألها : تشربي ايه ؟
ام عمار : لا لا شكرا ، انا عايزاكي في موضوع بخصوص غرام بنتك .
جميلة : مالها غرام بنتي ؟ وانتي تعرفيها منين ؟
ام عمار : انا مامت عمار معيد غرام في الجامعة .
جميلة : اهلا وسهلا ، يا مرحب .
ام عمار : ميرسي ، انا جايالك بخصوص عمار وغرام .
تبتسم جميلة : ايوه غرام كانت كلمتني ، اصل غرام مش بتخبي عليا حاجة ، لكن انتي مش شايفة ان الكلام ده يكون في البيت احسن .
ام عمار : لا لا مفيش لزوم لمرواح البيت .
يقتضب وجه جميلة وتنزعج !!!
ام عمار : الصراحة انا مشوفتش بنتك لكن عمار كلمني وكلم باباه عنها لكن انتي عارفة ان الحواز لازم يكون فيه توافق بين الطرفين علشان حياتهم تستقيم وتكون هادية ومريحة .
جميلة : انا بنتي هتبقي دكتورة وابنك معيد في الجامعة في نفس المجال ، اظن مفيش اكتر من كده توافق !!!
ام عمار : لا انا قصدي ان مستوي عمار الاجتماعي غير مستوي جميلة خالص ، فيه فرق كبير بين تربية ابني وتربية بنتك !!!
جميلة : انا بنتي متربية احسن تربية .
ام عمار : ايوه طبعا ، انا برده مش قصدي كده انا قصدي ان مستوي حياتنا غير مستوي حياتكم خالص وده هيكون سبب في فشلهم ده لو حصل ووافقنا .
تنزعج جميلة من كلماتها وتظهر الدموع في عيونها وتسألها : حضرتك عايزة تقولي ايه بالظبط ؟؟
ام عمار : عايزة اقول اننا حاولنا نقنع عمار انا وباباه ان ارتباطه بغرام قرار غلط واننا مش موافقين لكننه صمم علي رأيه وده كان سبب ان باباه حصله ازمة قلبية بسببه ودلوقتي هو في المستشفي .
جميلة : الف سلامة عليه ، كل ده بسبب بنتي ؟!!
ام عمار : علشان مش بعد وصلنا ابننا للمكانة دي تبقي في الأخر جدة اولادة واحدة بتبيع سندوتشات وكانت بتشتغل خدامة !!! انا اسفة طبعا لكن دي الحقيقة .
جميلة : لا مفيش داعي للأسف .
ام عمار : انا جايالك علشان تأثري علي بنتك تبعد عن ابني مش خوفا علي مصلحته لكن علشان باباه ميحصلوش حاجة ويفضل عمار عايش بالذنب ده طول عمره ووقتها صدقيني عمره ما هيسامح غرام انها كانت السبب .
جميلة : مفهوم يا ست هانم ، خلاص اعتبري الموضوع ده منتهي ولو ابنك كان اخر شاب في الدنيا انا مستحيل اجوزه بنتي .
ام عمار : انا متشكرة اوي واسفة لو عطلتك عن اكل عيشك .
جميلة : لا يا حبيبتي مفيش عطلة ولا حاجة ، شرفتينا يا هانم .
بمجرد ان انصرفت ام عمار جلست جميلة تبكي بحرارة وحاولت حبس دموعها الا انها فشلت !!
اغلقت محلها ثم انصرفت الي المنزل ودخلت غرفتها وظلت تبكي !!
لم تظن جميلة يوما بعد كل التعب والشقاء والتضحية بحياتها من اجل ابنتها الوحيدة ان تكون هي ذاتها وصمة العا.ر التي ستقف حجر عثرة في طريق سعادتها !!!
عادت غرام من جامعتها فتشعر بالقلق !!!
تدق غرام باب الغرفة كثيرا فتمسح جميلة دموعها وتتظاهر بالنوم ثم تقوم لتفتح لها .
غرام : مالك يا ماما فيه ايه ؟
جميلة : مفيش يا قلبي كنت نايمة تعبانة شوية .
غرام : لا يا ماما عينيكي بتقول انك كنتي بتعيطي !!
تبتسم جميلة : لا يا حبيبتي مش بعيط ولا حاجة ده انا عندي صداع هو اللي عمل فيا كده .
غرام : قوليلي الحقيقة يا ماما فيه ايه اللي حصل ؟؟
تنفلت دموع جميلة لااراديا !!!
غرام : وحياتي عندك يا ماما تقوليلي فيه ايه ؟؟ انا كده همو.ت من القلق !!!
جميلة تخبرها بزيارة والدة عمار لها وكلامها معها !!!
غرام : وعلشان كده انتي زعلانة ؟؟
جميلة : ايوه مكنتش عايزة اكون عقبة في حياتك ، كان نفسي اكون الام اللي تفتخري بها قدام الناس .
غرام : وانا فعلا بفتخر بيكي يا ماما بفتخر بأمي اللي ربتني وكبرتي وضحت علشاني ، وبالنسبة لموضوع دكتور عمار انا اصلا مكنتش مقتنعة بالارتباط دلوقتي وكويس انها جات من مامته علشان اركز في دراستي .
مساءا دخلت كلتاهما الي فراشها
جميلة مازالت تفكر في كلمات ام عمار ، هل ستكون هي السبب في تعاسة ابنتها التي افنت عمرها من اجلها !!!
ابنتها ستصبح طبيبة ذات مستقبل باهر وبالتأكيد سترتبط بانسان ذو مكانة ولكن هل ستكون هي نقطة ضعفها !!! لابد لها ان تصبح سبب لأفتخارها وليس العكس ولكن كيف !!! ليس امامها الا الرسم !! لابد ان تصبح فنانة مشهورة حتي تفتخر بها ابنتها غرام .
غرام تفكر فيما حدث من والدة عمار !! لابد وان تنهي علاقتها بعمار قبل ان تبدأ !! لابد وان تضع نقطة النهاية وتستكمل مسيرتها الدراسية بعيدا عن اي عاطفة او مشاعر .
في اليوم التالي
بعد انتهاء المحاضرة يطلب عمار غرام فتذهب له وتسأله : خير يا دكتور ؟
عمار : اخبارك ايه ؟ كنت عايز اتكلم معاكي .
غرام : اتفضل يا دكتور انا سامعة حضرتك .
عمار : عايزين نتكلم علي انفراد .
غرام : لا يا دكتور للأسف مش هينفع .
عمار : فيه ايه يا غرام ؟ مالك بتتكلمي معايا بشكل رسمي ليه ؟!!
غرام : مفيش بينا الا الكلام الرسمي ، حضرتك معيد وانا طالبة عندك .
عمار : من امتي يا غرام ؟! المفروض اننا في حكم المخطوبين !!!
غرام : لا يا دكتور الموضوع ده انتهي .
عمار : ازاي ؟ ايه اللي حصل ؟؟
غرام : الف سلامة علي والد حضرتك يارب يكون بقي احسن دلوقتي .
عمار : انتي عرفتي ازاي ان بابا تعبان ؟؟
غرام : والدة حضرتك قابلت ماما وكلمتها و قالتلها .
عمار : ماما !!! يبقي اكيد ماما قالت حاجة علشان كده انتي متغيرة من ناحيتي .
غرام : بغض النظر عن كلام مامتك انا كنت مترددة علشان مش عايزة حاجة تعطلني عن دراستي .
عمار : لكن انا وعدتك اني هساعدك في الدراسة وان خطوبتنا مش هتعطلك .
غرام : انا اسفة يا دكتور ، ياريت حضرتك متفتحش الموضوع ده تاني ، وانا هنقل نفسي سيكشن تاني منعا للحرج .
عمار : ياااه !! للدرجادي !!!
غرام : انا اسفة يا دكتور مضطرة امشي .
في فيلا سلطان
سلطان : حبيبتي يا شهد ربنا يخليكي ليا يارب ، معرفش من غيرك كنت هعيش ازاي .
شهد : ويخليك ليا يا حبيبي ، حمد لله علي السلامة يا روحي .
سلطان : الله يسلمك ، انا كنت فاكر اني همو.ت .
شهد : بعيد الشر عنك يا حبيبي ، يارب انا الاول .
سلطان : بعيد الشر عنك يا شوشو ، بمناسبة اني خفيت الحمد لله انتي كنتي طلبتي مني حاجة كتير وانا كنت دايما بأجل .
شهد : مش فاكرة .
سلطان : طيب اعملي حسابك الاسبوع الجاي هنسافر نعمل عمرة .
شهد : الله .. ربنا يخليك ليا يا حبيبي ، انا كان نفسي قوي اسافر للعمرة .
سلطان : ولما نرجع بأذن الله فيه شوية تغييرات في حياتنا هنعملها .
شهد : تغييرات !!! تغييرات زي ايه ؟؟
سلطان : لما نروح و نرجع بأذن الله هتعرفي .
الحلقة ١٨
بعد العودة من اداء مناسك العمرة...
شهد : كنت بتقول انك هتعمل تغيرات في حياتنا بعد رجوعنا ، و بصراحة انا مش فاهمة عايز تعمل ايه يا حبيبي ، احنا حياتنا الحمد لله ماشية كويس ، فيه ايه عايز تغيره ؟
سلطان : انا القلب عندي تعبان يا شهد ونور ابنك طايش وخايف لما امو.ت يضيع شقي عمري ويضيعك انتي كمان معاه .
شهد : يعني عايز تعمل ايه ؟؟
سلطان : انا بثق فيكي يا شهد زي ما بثق في نفسي بالظبط علشان كده انا هكتبلك كل املاكي وفلوسي باسمك ولو حسيتي ان ابنك عقل و يقدر يتحمل المسئولية يبقي ردي له نصيبه .
شهد : انت بتخوفني بكلامك ده !! انت بتتكلم وكأنك حاسس انك هيحصلك حاجة ليه يا سلطان ؟!!
سلطان : الاعمار بيد الله وانا قلبي تعبان يا شهد وانتي عارفة بحب اعمل حساب لبكره علشانكم .
شهد : متقولش كده ، ربنا يخليك لينا ده انا روحي فيك ، انا مقدرش اعيش يوم من غيرك يا روحي .
سلطان : ويخليكي ليا يا حياتي ، فيه كمان حاجة مهمة يا شهد .
شهد : خير يا حبيبي ؟
سلطان : غرام بنتي اللي انا لحد دلوقتي معرفش اذا كانت عايشة ولا ميتة ، لو ظهرت في يوم من الايام لازم تاخد نصيبها بشرع الله .
شهد : ايوه طبعا .
سلطان : اما بالنسبة للشركة من بكره لازم تروحي معايا الشركة كل يوم علشان تعرفي تمشي الشغل لو حصلي حاجة ، مادام ابنك لسه مش عايز يشيل المسئولية .
بعد عدة اسابيع
في الجامعة...
مازال دكتور عمار لم يقتنع ان غرام انهت كل تفكير في الارتباط به !! ينتظر عمار انتهاء اليوم الدراسي ليحاول الالتقاء بغرام .
عمار : لو سمحتي يا غرام كنت عايز اتكلم معاكي .
غرام : اولا عيب يا دكتور توقفني بالشكل ده ، ثانيا انا اتنقلت لسيكشن تاني علشان يكون مفيش اي كلام بيني وبينك ، ثالثا لو حضرتك كررت التصرف ده تاني انا هضطر اشتكيك لادارة الجامعة ، بعد اذنك ثم تنصرف غرام وهي تحاول حبس الدموع في عينيها .
تشاهدها صديقتها منار....
منار : مالك يا غرام ؟ هو كان عايزك ليه تاني ؟
غرام : كان عايز يتكلم .
منار : وليه مش سمعتي عايز يقولك ايه ؟
غرام : لا يا منار مش عايزة اسمع منه حاجة ، الموضوع ده انتهي خصوصا بعد اللي مامته عملته .
منار : لكن عينيكي بتقول حاجة تانية !!
غرام : قصدك ايه ؟
منار : قصدي انك حبتيه يا غرام .
غرام : متنسيش انه اول واحد افكر فيه وافكر بالارتباط به ، لكن انا دلوقتي خلاص لغيت الموضوع ده من تفكيري نهائي .
منار : طيب ايه رأيك تعالي نقعد في الكافية ساعة قبل ما نروح علشان نخرج من المود ده ؟
غرام : لا بلاش مش عايزة اتأخر علي ماما يا منار .
منار : مش هنتأخر ، بس علشان تخرجي من الحالة اللي انتي فيها .
غرام : هنقعد في كافية الجامعة ؟
منار : لأ ، فيه كافية هنا قريب حلو قوي قعدت فيه كام مرة ، يلا يلا متضيعيش الوقت في التفكير .
في الكافية.....
نور : يلا يا عم بسام نروح بيوتنا ، احنا هنفضل قاعدين كده ؟! انا زهقت !!
بسام : نروح نعمل ايه ؟ ادينا قاعدين نغير جو ونتفرج علي البنات .
نور : انت مش وراك حاجة الا البنات ؟!!
بسام : هو فيه في الدنيا حاجة احلي من البنات !! طيب بص البنتين اللي جايين هناك دول الاتنين احلي من بعض .
نور : يا عم دول شكلهم مقفلين ولسه خارجين من الجامعة !! مش سكتنا !!
بسام : لا لا البنت الطويلة دي شكلها قمر وفرفوشة ، ايه رأيك انا هتعرف علي الطويلة وانت اتعرف علي التانية .
نور : لا يا عم انا مش عايز ولا طويلة ولا قصيرة ، خدهم هما الاتنين .
ثم يرن هاتف بسام بمكالمة من اخيه باسل.
بسام : ايوه يا باسل فيه ايه ؟
باسل " عبر الهاتف " : انت فين يا بسام انا عايزك .
بسام : عايز ايه يا باسل ؟
باسل : عايزك في موضوع بخصوص جوز ماما .
بسام : طيب لما اروح بالليل نتكلم .
باسل : لا انا عايزك دلوقتي ، انت فين تعالي دلوقتي .
بسام : لأ انا قاعد في الكافية مع نور ابن خالتك ومش هروح دلوقتي .
باسل : تصدق انت عيل رخم !! خليك مرزوع انا جايلك دلوقتي .
منار : تعالي نقعد هنا المكان فاضي .
غرام : ما بلاش نقعد جنب الولدين دول خلينا بعيد احسن !!
منار : احنا مالنا ومالهم !! احنا في حالنا وهما في حالهم ، تعالي تعالي .
جلست غرام ومنار علي مسافة صغيرة من مكان نور وبسام !!!!!!!!!
بعد قليل
غرام : مالك يا بنتي عينيكي مركزة مع العيال دول ليه ؟!!
منار : ااايه !! لا لا مفيش حاجة .
غرام : بت انتي !! انتي كده هتخليني اغير فكرتي عنك !!!
منار : لا والله يا غرام ، الواد ده عمال بيكرش عليا بطريقة هبلة اوي وبصراحة ماسكة نفسي بالعافية اني اضحك .
غرام : اوعي تضحكي يا منار !!! هيفتكروا اننا بنات شمال !!!
تنطلق ضحكة عالية من منار لم تستطيع حبسها !!!
يتجرأ بسام ويقوم ويقترب من منار وغرام !!! بينما مازال نور بجلس مكانه .
يحاول نور التحدث مع منار ولكن يفاجئ بغرام التي تنهره وتقول له : ايه ده !!! ايه قلة الذوق دي !!!
بسام : انا مش كلمتك انتي ، انا بكلم القمر اللي جنبك . ثم يبتسم : ولا ايه با قمر ؟؟
تنهره غرام : انت ملكش دعوة بالقمر خليك في حالك والاااا....وهنا يدخل باسل من باب الكافية ويسرع اليهم ...
باسل : ايه ده !!! فيه ايه يا بسام ؟؟؟
بسام : مفيش حاجة .
غرام : لا فيه ان صاحبك ده قليل الذوق وقليل الادب كمان .
بسام : انتي اللي قليلة......
يقاطعة باسل : اسكتتتت ، انت اتجننت هتشتم بنت ولا ايه ؟؟
باسل : طيب خلاص يا انسة انا اسفة بالنبابة عنه .
تنظر غرام لبسام بغيظ فيكمل باسل ويبتسم : خلاص يا انسة قولتلك حقك عليا انا اسف بالنيابة عن اخويا .
غرام : ده اخوك !!! مش باين ابدا انه اخوك !! فرق كبير جدا بينك وبينه .
بسام : عجبك كده يا سي باسل انا بتهزأ اهو قدامك وبسببك !!!
باسل : انت اللي غلطان ، انا لما دخلت شوفتك واقف قدام ترابيزتهم !! يعني انت اللي روحت لحد عندهم وضايقتهم وكمان عايز تزعقلها وتغلط فيها !!!
بسام : يا باسل انا مش عاكستها هي ، انا كنت بكلم صاحبتها اللي جنبها .
باسل : طيب خلاص خلصنا ، يلا بقي تعالي نقعد بعيد عنهم ، ثم يوجه خطابه لغرام : انا بكرر اسفي تاني يا انسة واتمني تقبلي اعزمك علي عصير ليمون يهدي اعصابك ؟
غرام : لا لا ميرسي جدا .
باسل : لا والله لازم تقبلي علشان احس ان خلاص الموضوع انتهي .
غرام : الموضوع فعلا انتهي ، واحنا ماشيين مفيش داعي للعصير .
ثم تأخذ بيد صديقتها منار وينصرفا من الكافية .
منار : ايه اللي عملتيه ده يا غرام ؟ شكلنا كان وحش قوي !!!
غرام : انا بردو اللي خليت شكلنا وحش !! يعني افهم من كلامك ان كان عجبك قلة ادب الولد ده ؟؟
منار : فكيها بقي شوية يا غرام ، مش هنفضل مقفلنها علي نفسنا كده !! انا كمان كبرنا ومش صغيربن وممكن نتكلم ونصاحب لكن وقت الجد نقدر نتصرف صح ونوقف كل واحد عند حده .
غرام : لا يا حبيبتي انا بقي مليش في الكلام ده ، لو انتي في دماغك كده يبقي كل واحدة فينا من النهاردة في طريق غير التانية .
منار : ايه ده !! مالك قلبتي كده ليه ؟!!
غرام : علشان مبحبش الغلط .
منار : طيب يا ستي انا كنت بهزر .
غرام : هزار سخيف زي الولد ده بالظبط .
منار : طيب واخوه ؟؟
غرام : قصدك اللي كان قاعد معاه ولا اللي جه واحنا بنتخانق ؟؟
منار : قصدي اللي جه واحنا بنتخانق ايه رأيك فيه ؟
غرام : ماله يعني ؟؟
منار : ده عينه كانت هتطلع عليكي !!
غرام : لكن كان مؤدب ومحترم وببتكلم بمنتهي الذوق والاحترام .
داخل الكافية
بسام : عملت الشوية بتوعك وطلعت انت الشاب المحترم وانا طلعتني زبالة قدامهم !!
باسل : ايه العب.ط اللي بتقوله ده يا بني !! علفكرة البنتين دول مش زي الاشكال اللي انت تعرفها ، دول شكلهم محترمين وبنات من عائلات محترمة .
بسام : سبنالك انت يا عم الاحترام ، انت شكلك البنت عجبتك .
باسل : فعلا والله البنت عجبتني .
بسام " بسخرية " : يا خسارة نسيت اسألها علي عنوانها علشان تروح تخطبها !!!
باسل : انت بتتريق !! ياريت دي فعلا بنت محترمة جدا وتشرف اي عريس يتقدملها او بتجوزها .
بسام : طيب يا عم سبنالك المحترمين ، انا بقي بحب الشمال ملكش دعوة .
باسل " يضحك و يوجه كلامه لنور " : ابعد يا نور عن الواد ده هيد.مرك زي ما دماغه اتد.مرت !!
يضحك نور : هوكلكوا بتقولولي ابعد بعيد عنه بس بصراحة بسام انا مش ابن خالتي وبس ده اخويا وصحبي كمان .
بسام " يضحك " : تسلم يا شقيق .
باسل : طيب سيبك من الموضوع ده وخلينا في الموضوع الاهم .
بسام : موضوع ايه ؟
باسل : موضوع جوز امك طبعا ، مش كفاية مشاكل معاه ؟!! ولا انت عايزه يطلقها وهتطلعه كله علي دماغنا احنا الاتنين