رواية غرام السلطان الفصل الثالث والعشرون23 والرابع والعشرون24 بقلم عادل عبد الله
سلطان : أسف ، اسف يا دكتورة ، معلش معرفش اسمك ايه .
غرام : غرام ، اسمي غرام .
سلطان " بدهشة " : غرااام !!!
غرام : ايوه اسمي غرام سلطان ابو المجد .
سلطان : ايييه !! انتي غرام ؟؟؟
غرام : ايوه يا بابا انا غرام بنتك .
سلطان : غرام بنتي !! لأ ، مش معقول !!!! انتي عرفتي اسم بنتي من مراتي اللي خرجت من شوية وبتهزري ، صح ؟؟ قولي الحقيقة .
غرام : لأ يا بابا انا غرام بنتك ، دي البطاقة وده كارنية النقابة شوف بنفسك اسمك جنب اسمي اهو .
سلطان : انا بحلم ؟؟ و لا انتي بجد ؟؟ ولا انا هموت دلوقتي ودي تهيؤات ؟؟
غرام : بعيد الشر عنك يا بابا ، انا بنتك غرام انا حقيقة مش حلم ولا تهيؤات ، امسك ايدي علشان تتأكد .
يمسك يديها ويضمها بين يديه ويقبل يدها ...
سلطان : يا حبيبتي يا بنتي !!! الحمد لله اني شوفتك قبل ما اموت .
تنساب دموع الاب ويبكي سلطان وتبتل يد ابنته غرام بدموعه فتنحني وتقبل غرام رأس والدها وتحتضنها وتنهمر دموعها بغزارة .
غرام : اول مرة في حياتي اقول كلمة بابا ، كنت محرومة من الكلمة دي طول عمري يا بابا !!! طول عمري كنت بحلم باليوم ده .
سلطان : وانا يا بنتي طول عمري بحلم باللحظة دي ، كنت دايما بقول لنفسي ان هييجي اليوم واشوفك والحمد لله حصل ، انا دلوقتي نفسي اعيش كتير نفسي اعيش علشان اعوض السنين اللي كنتي بعيدة فيها عني يا بنتي .
غرام : ربنا يطول في عمرك يا بابا .
وفجأة يدخل دكتور عمران فيندهش حينما يجد غرام تقف بجوار سرير سلطان وتنحني نحوه و تحتضن ابيها !!
عمران : ايه ده !! ايه اللي انا شايفه ده !!!
ترتبك غرام بشدة من مفاجأة دخوله بينما يبتسم سلطان ويقول : تعالي يا دكتور عمران .
عمران : ايه يا سلطان بيه اللي شوفته ده ؟؟ اتكلمي يا دكتورة !!!!! فهموني فيه ايه ؟!!!
سلطان : معقول يا دكتور عمران انت متعرفش ان دكتورة غرام بنتي ؟؟!!
عمران : بنتك !! اول مرة اعرف !!!
" تبتسم غرام وترفع رأسها في فخر حرمت منه طوال عمرها " .
سلطان : معقول يا عمران مش اخدت بالك من الاسم ؟! دكتورة غرام سلطان ابو المجد وانا سلطان ابو المجد .
عمران : اسف يا سلطان بيه للأسف مش ربطت بين الاسمين ، لكن دكتورة غرام مش عرفتني نفسها قبل كده بأنها بنتك يا سلطان بيه ليه ؟!
سلطان : هي غرام كده بتحب تعتمد علي مجهودها بس في كل حاجة .
عمران " يبتسم " : ماشي يا دكتورة ، بصراحة يا سلطان بيه دكتورة غرام بنتك شاطرة جدا ومستقبلها ممتاز .
غرام : متشكرة قوي يا دكتور ، ده كله بفضل توجيهاتك وتعليمك ليا .
عمران : طيب استأذن انا واسيبكم ، ثم يبتسم يقول : خليكي مع باباكي براحتك لكن متنسيش باقي المرضي يا دكتورة .
غرام : حاضر يا دكتور ، انا اطمنت علي بابا وهشوف باقي المرضي حالا .
انصرف دكتور عمران ، وقبل خروج غرام سألها سلطان : جميلة عاملة ايه دلوقتي ؟
غرام : ماما !!
سلطان : ايوه ، عاملة ايه ؟ اتجوزت ولا لأ ؟ وعرفت تربيكي وتعيشوا ازاي ؟؟
غرام : لا يا بابا مش اتجوزت ، ماما قعدت تربيني ورفضت تتجوز .
سلطان : كنتوا فين انتي ومامتك ؟ انا وخال جميلة دورنا عليكوا في كل مكان مفيش اي اثر ، لغاية لما يأسنا اننا نلاقيكوا وماما ربيتك ازاي لغاية ما بقيتي دكتورة ما شاء الله ؟!! اكيد جميلة تعبت قوي .
غرام : هقولك كل حاجة يا بابا ، معلش اديني فرصة اتابع باقي المرضي وارجعلك واقولك كل حاجة .
كان ذلك اليوم من اسعد ايام حياتها ، فلأول مرة تنطق غرام كلمة بابا التي حرمت منها شفتاها كثيرا !! ولأول مرة تغمرها مشاعر الابوة !! ولأول مرة تشعر بالفخر كما لم تشعر به من قبل .
لم تنقضي نصف ساعة حتي تمر غرام علي والدها لتطمئن عليه ولتهنأ ببعض مشاعر الابوة التي طالما حرمت منها ، وتحكي له فصلا من فصول رحلة حياتها مع والدتها ومعاناة جميلة حتي استطاعت ان تصل بها الي بر الامان .
في المساء كانت جميلة في المنزل تنتظر ابنتها علي احر من الجمر !!
عادت غرام تملؤها مشاعر السعادة الي المنزل وبمجرد ان رأتها جميلة عرفت ان غرام اخبرت والدها بالحقيقة !!!
جميلة : حمدلله ع السلامة يا حبيبتي .
غرام : الله يسلمك يا ماما يا ست الكل .
جميلة : عملتي ايه النهاردة يا قلبي ؟
" تحكي لها غرام كل ماحدث بينها وبين والدها في المستشفي " .
جميلة : سألك عليا يا غرام ؟
غرام : ايوه يا ماما سألني عليكي واستغرب لما عرف انك مش رضيتي تتجوزي وقعدتي تربيني .
جميلة : يا تري باباكي عرض عليكي تروحي تعيشي معاه ؟؟
غرام : لأ ياماما ، هو لسه مش هيخرج من المستشفي دلوقتي .
جميلة : قوليلي يا غرام مدام شهد وابنه نور عرفوا انك بنته ولا لسه ؟
غرام : لأ لما مشيوا كنت لسه مش اتكلمت مع بابا .
تضحك جميلة : شكلك مبسوطة قوي وانتي بتقولي كلمة بابا .
غرام : اكيد يا ماما كلمة اتحرمت منها طول عمري وكان نفسي اقولها واحسها من زمان .
جميلة : اهم حاجة يا غرام اوعي تنسي اني عيشت ليكي اب وام في نفس الوقت وضيعت عمري علشانك !!
غرام : اوعي تقولي كده يا ماما ، كل اللي في دماغك وتفكيرك مش هيحصل ، انا عايزة اقولك حاجة كمان حصلت النهاردة .
جميلة : ايه اللي حصل يا حبيبتي ؟
غرام : تخيلي النهاردة قابلت مين تاني في المستشفي ؟
جميلة : اكيد شيماء .
غرام : ايوة يا ماما صح ،قابلت شيماء .
جميلة : انا عمري ما كرهت حد في حياتي قد الست دي !!
غرام : عارفة يا ماما ، وحياتك يا ماما طلعته علي عينيها النهاردة .
ثم تحكي لها غرام ما حدث بينها وبين شيماء في المستشفي .
في اليوم التالي
تذهب شهد ونور الي سلطان في المستشفي وحينما يلقون سلطان يفاجئون به يخبرهم بالمفاجأة !!!
سلطان : عارفة يا شهد الدكتورة اللي بتابع حالتي تبقي مين ؟
شهد : مين يا حبيبي ؟
سلطان : تبقي بنتي غرام .
شهد " تضحك " : مش ممكن !!! انت اكيد بتهزر ؟؟
سلطان : لأ مش بهزر ولا بيتهيألي انا بتكلم جد يا شهد .
شهد : انا عرفت ان اسمها غرام ، لكن مش اي واحدة اسمها زي اسم بنتك تبقي بنتك يا حبيبي ، ده اكيد تشابه اسماء مش اكتر .
سلطان : لأ يا شهد انا شوفت بطاقتها الشخصية وكارنية نقابة الاطباء واتكلمت معها وعرفت انها غرام بنتي وبنت جميلة .
شهد : يعني بنت جميلة عايشة و بقيت دكتورة !!!
سلطان : شوفتي القدر يا شهد ؟!! انتي كنتي خايفة ان اخت ابنك تبقي بنت الخدامة و مش قد المقام !! سبحان الله البنت بقيت من اهم الدكاترة ودكتور عمران بيقول انها خلال فترة قصيرة هتبقي من اكبر اطباء القلب في مصر !! يعني ابنك هو اللي هيفتخر انها اخته وهي مش مستنية تفتخر بحد !!
نور : معقووول !! الدكتورة دي تبقي اختي ؟!! انت اتأكدت يا بابا ؟؟
سلطان : ايوه يا نور اتأكدت .
نور : لكن دي كانت بتتكلم معنا بمنتهي قلة الذوق والتكبر !!!!! مش ممكن دي تبقي بنت الخدامة اللي ماما كلمتني عنها !!
سلطان : جميلة مبقتش خدامة يا نور ، جميلة دلوقتي رسامة والصور اللي بترسمها بتنزل اكبر المعارض في مصر .
شهد : لا لا لا انت اكيد فهمت غلط !! فيه حاجة غلط في الموضوع ده !!
تأتي غرام الي المستشفي وتعرف ان شهد ونور في زيارة والدها .
تدخل غرام الي والدها .....
غرام : مساء الخير ، ازيك يا بابا عامل ايه دلوقتي ؟؟
سلطان : الحمد لله يا حبيبة بابا ، تعالي سلمي علي اخوكي وعلي طنط شهد .
تحييهم غرام وترحب بهم بينما تبادلها شهد التحية بدهشة وتعجب بينما يبادلها نور التحية ببرود !!!
تتأكد غرام من تناول سلطان للعلاج ثم تنتهي الزيارة وتخرج شهد ونور وتسألها شهد : انتي فعلا غرام بنت جميلة ؟؟
تضحك غرام : انا غرام بنت سلطان ابو المجد وليا الشرف اني بنت جميلة .
شهد : انا كنت فاكرة ان سلطان بيتهيأله انك بنته بسبب مرضه .
غرام : لا مش بيتهيأله ، انا فعلا غرام بنت سلطان ابو المجد وبنت جميلة ، ودي البطاقة الشخصية ودي شهادة الميلاد ودي صورة ماما !!!
تشاهد شهد كل تلك الاوراق وتتأكد تمام التأكد حين تري صورة جميلة معها !!
نور : انا مش فاهم ومش مستوعب !!!
غرام : مش فاهم ايه بالظبط ؟
نور : يعني ايه فجأة تطلعلي اخت عايشة وتيجي تقولي انا اختك !!! كنتي فين طول السنين اللي فاتت ؟؟
" تبتسم غرام بألم " : دي بقي تسأل فيها والدتك وخالتك شيماء ، هما عارفين السبب في اني اتربي واعيش طول عمري بعيد .
شهد : واضح ان جميلة حكت لك حاجات كتير عن الماضي ، لكن اكيد حكت لك من وجهة نظرها مش الحقيقة .
غرام : ماما حكت لي الحقيقة ، وعموما انا المهم بالنسبالي دلوقتي ان بابا يطمن لوجودي وانه يخف وتبقي صحته كويسة ، اي حاجة تانية بقي مش مهمة .
تنصرف شهد ونور ويعودون الي الفيلا وهم في غاية الدهشة !!!!!
نور : البنت دي فعلا اختي يا ماما ؟
شهد : ايوه هي فعلا غرام اختك .
نور : ازاي ؟؟ انا مش متخيل بعد ما عيشت حياتي كلها مليش اخوات فجأة كده يبقي ليا اخت ؟!!
شهد : وانت ليه زعلان !! بالعكس البنت كويسة جدا وواضح انها دكتورة شاطرة ، يعني هتضيف لك ولمكانتك .
نور : يا ماما انا مش بتكلم عن مكانتي وبس ، انا بتكلم ان بابا ده انا بعتبره ليا لوحدي ، هو بابايا انا بس مش ابو حد تاني .
شهد : لكن الحقيقة انها فعلا اختك ولها حق في سلطان زي ما انت لك بالظبط .
نور : حق !! حق ايه ان شاء الله ؟؟
شهد : حق في كل حاجة .
نور : قصدك ايه ؟ الفيلا والشركة ؟؟
شهد : ايوه لها حق في ابوك وكل حاجة يملكها .
نور : طيب الحمد لله بابا دلوقتي مش يملك حاجة ، كل حاجة باسمي .
شهد : لا يا حبيبي الحق انها لها الحق في كل حاجة .
نور : بعد اذنك يا ماما اوعي تفولي الكلام ده تاني ، انا طالع انام .
يصعد نور الي غرفته بينما تمسك شهد هاتفها وتتصل بأختها ...
شهد : انتي فين يا شيمو ؟
شيماء : في البيت يا شوشو ، فيه ايه ؟
شهد : غرام بنت سلطان طلعت عايشة ومش هتصدقي طلعت مين !!!
شيماء : غرام بنت جميلة ؟؟
شهد : ايوه .
شيماء : طلعت مين ؟ مش فاهمة !!
شهد : شوفتي الدكتورة غرام اللي منعتك تدخلي الزيارة البارح ؟
شيماء : بتقولي ايييه !!! مش ممكن !!!
شهد : انا مكنتش مصدقة زيك كده !!! لكن هي دي الحقيقة .
شيماء : يالهوووي !!! بقي الدكتورة دي طلعت بنت جميلة الخدامة ؟!!!
شهد : يا حبيبتي خدامة ايه ده كان زمان ، دلوقتي كل حاجة اتغيرت !!!
شيماء : لاااا ، ده انا بكره لازم اروح معاكي المستشفي .
شهد : خلاص اوكي ، بكره اعدي عليكي ونروح المستشفي مع بعض
الحلقة ٢٤
في اليوم التالي
في الطريق الي المستشفي ...
نور : تصدقي يا ماما غرام دي انا بيتهيألي اني شوفتها قبل كده !!
شهد : معقول !!! شوفتها فين وامتي ؟؟
نور : مش عارف ، بس شكلها مش غريب عليا .
شهد : ممكن يا نور علشان صلة الدم اللي بينكم ، هي بردو اختك .
نور : يمكن ، لكن احساسي بيقولي اني شوفتها قبل كده لكن فين مش فاكر .
في المستشفي
تصل شهد ونور ومعهم اختها شيماء الي المستشفي وتظل عيون شيماء تبحث عن غرام في كل مكان حتي تدخل غرفة الرعاية لسلطان .
شيماء : سلامتك الف سلامة يا سلطان .
سلطان : الله يسلمك .
شهد : عامل ايه النهاردة يا حبيبي ؟
سلطان : الحمد لله احسن يا شهد .
نور : الحمد لله يا بابا عايزينك تخرج من هنا بقي وترجع البيت والشركة .
سلطان : الحمد لله ، قولي الشركة والشغل عاملين ايه يا نور ؟
نور : كل حاجة تمام يا بابا مش ناقص الشركة غير وجودك .
سلطان : اول لما اخرج من المستشفي عايزك تجيب محامي الشركة و محامي العيلة في الفيلا علشان عايزهم في موضوع مهم .
نور : خير يا بابا في حاجة ولا ايه ؟!
سلطان : ايوه طبعا يا نور ، ما انت عارف بعد ظهور غرام اختك اكيد فيه حاجات كتير لازم تتغير .
نور : حاجات هتتغير !! حاجات زي ايه يا بابا ؟
سلطان : دلوقتي اختك ظهرت واكيد لها حق في كل املاكي .
نور : حق !!! حق ايه ؟؟
شهد : بلاش نتكلم في المواضيع دي دلوقتي ، لما تقوم بالسلامة يا سلطان نتكلم براحتنا .
سلطان : لكن لازم تعرفوا ان غرام لها حق ولازم تاخده .
نور : حق ايه يا بابا ؟! هي عايزة تيجي تاخد كل حاجة علي الجاهز ؟!!
سلطان : يعني ايه يا نور ؟
نور : يعني يا بابا مش ممكن هي تيجي وتاخد تعبي علي الجاهز !!
سلطان : تعبك !!! ده انت بتشتغل في الشركة من اقل من سنة !!!! تعب ايه اللي بتتكلم عليه ؟! الشركة دي عمرها اكتر من اربعين سنة !!! اربعين سنة من مجهودي وتعبي وعمري اللي راح فيها .
نور : وتعب ماما معاك طول العمر ، ومعاك في الشركة من سنين !!!
سلطان : انت بتحاسبني ولا ايه ؟!!
شهد : لا يا سلطان طبعا نور ميقصدش يحاسبك ، خلاص يا نور مش عايزين نتعب بابا اكتر من كده .
تأتي غرام وتدخل لتطمئن علي والدها ...
غرام : عامل ايه يا بابا اخبارك ايه النهاردة ؟
سلطان " يبتسم " : الحمد لله كويس .
غرام : يارب دايما ، ازيك يا مدام شهد ؟
شهد : الحمد لله يا حبيبتي كويسة .
غرام : ازيك يا استاذ نور ؟
نور : كويس .
شهد : استاذ نور ايه ؟!! نور ده اخوكي ، لازم تشيلوا التكليف والالقاب دي بينكم ، ولا ايه يا نور ؟؟
نور : ايوه يا ماما ، بعد اذنك انا ماشي ورايح الشركة .
شيماء : ازيك يا غرام ؟ انتي اكيد مش عارفة انا مين .
غرام : لأ طبعا عارفاكي ، انتي مدام شيماء اخت مدام شهد .
شهد : بلاش كلمة مدام شهد ، قولي يا طنط علطول .
غرام : حاضر يا طنط ،استأذنكم اكشف علي بابا واطمن عليه .
شهد : اتفضلي يا حبيبتي .
تقوم غرام بالكشف علي حالة والدها وتطمئن عليه ، ثم تخرج مع شهد وشيماء خارج الغرفة .
غرام : فيه حد ضايق بابا النهارده او عصبه ؟؟
شهد : لا ابدا ، ليه يا بنتي فيه ايه ؟
غرام : واضح النهاردة ان التعب بدأ يزيد تاني !!
شهد : يارب يخليكي يا غرام خلي بالك منه قوي انا خايفة عليه .
غرام : متخافيش يا طنط ، مش معقول توصيني علي بابا !!
شهد : قوليلي يا غرام مامتك عاملة ايه دلوقتي ؟
غرام : الحمد لله بخير يا طنط .
ثم يرن هاتف شيماء فترد عليه ....
شيماء : ايوه يا حبيبي انت فين ؟
باسل : انا تحت في المستشفي مش عارف غرفة اونكل سلطان فين ؟
شيماء : اطلع في الاسانسير الدور السادس وانا هقف قدام الاسانسير استناك .
ثم تغلق شيماء المكالمة وتقول : استأذنكم هروح اجيب باسل ابني عايز يطمن علي عمه سلطان .
شهد : اتفضلي يا شيمو .
غرام : هستأذنك انا يا طنط ، هروح اشوف باقي المرضي .
شهد : اتفضلي يا حبيبتي .
تنصرف غرام لتتابع باقي المرضي ، وفي نفس اللحظة يأتي باسل مع والدته ويقول : ازيك يا طنط شهد ؟
شهد : الحمد لله .
باسل : اونكل سلطان عامل ايه دلوقتي ؟
شهد : الحمد لله احسن ، ادخل اطمن عليه .
يدخل باسل لزبارة سلطان بينما تجلس شيماء مع شهد في الانتظار ....
شيماء : علفكرة يا شهد ابنك نور معاه حق في كلامه .
شهد : ازاي يا شيماء ؟ انتي عايزة البنت متاخدش حاجة من املاك ابوها ؟
شيماء : انتي عايزة بنت جميلة الخدامة تقاسمك انتي وابنك في فلوسكم ؟!!
شهد : دي فلوس سلطان ولازم تاخد حقها منها .
شيماء : وتعب ابنك في الشركة !! وتعبك مع سلطان في الشركة السنين اللي فاتت !! عايزاها تاخد من تعبكم علي الجاهز ؟!! انتي طول عمرك طيبة قوي يا شهد !!!
شهد : ايوه انا تعبت مع سلطان في شغل الشركة لكن انا ونور عايشين في عز من خير الشركة انما البنت دي عاشت في فقر واتحرمت من كل ده ، يعني اقل حاجة انها تاخد حقها الشرعي ، ده المفروض تاخد تعويض عن السنين اللي فاتت كمان .
شيماء : انتي اللي بتقولي كده يا شهد ؟!!! انتي انسانة غريبة قوي !!!
شهد : انسانة غريبة علشان مش راضية بالظلم وبقول الحق ؟!!!
يخرج باسل من غرفة سلطان وفي نفس اللحظة تعود شيماء لتطمئن علي والدها ، ويقفان في مقابلة بعض وجهها لوجه !!!!!
يقف باسل في صمت غير مصدق انه اخيرا قد وجدها امامه !!!
يكاد قلبه ان يقفز من بين اضلاعه !!!!!
تستدعي ذاكرته للتو موقفها في الكافية حين انطلق سهم الحب ليسكن بين اضلاعه ويستقر فيه طيلة كل هذة المدة الطويلة !!!
تقف غرام وتستدعي ذاكرتها موقف ذلك الشاب الشهم الذي واجه اخاه واوقفه عن مضايقتها و صديقتها في الكافيه .
نعم لم تنساه غرام للحظة فقد نال اعجابها في ذلك الموقف واستطاع ان يأسرها بشهامته ورجولته و اسلوبه المهذب .
تلاحظ شهد وشيماء وقوفهما في صمت ونظراتهما !!!!!
فتسألهم شهد : انتوا تعرفوا بعض ولا ايه ؟؟
تبتسم غرام في صمت بينما يضحك باسل ويقول : ايوه يا طنط اعرفها .
غرام : لااا متفهموش غلط ، انا والله معرفش حتي اسمه !! كل الحكاية ان حصل موقف من فترة طويلة .
شيماء : موقف !!! موقف ايه ؟؟
باسل " : ايوه يا ماما ، احسن موقف حصلي في حياتي .
غرام " بغضب " : ماما !!!!!
باسل : ايوه ، دي ماما ، ودي طنط شهد خالتي .
تبتسم غرام ابتسامة مصطنعة .
شيماء : انا مش فاهمة حاجة !!!
باسل : هفهمك يا ماما كل حاجة ، بس قوليلي الاول يا انسة انتي هنا بتعملي ايه ؟؟؟
غرام : انا دكتورة هنا في المستشفي ومسئولة عن الرعاية .
باسل : اسمك ايه يا دكتورة ؟؟
غرام : اسمي غرام .
باسل : طيب ممكن تطمنيني يا دكتورة علي صحة اونكل سلطان ؟
غرام : بابا ؟؟ ايوه الحمد لله كويس حالته مستقرة .
باسل " بتعجب " : بابا !!!!!!
غرام : ايوه ، انا اسمي غرام سلطان ابو المجد .
باسل " يزداد تعجبه " : انا مش فاهم حاجة !!!
شهد " تضحك " : لك حق يا باسل ، اقعد انا هفهمك علي كل حاجة .
غرام : انا هستأذنكم علشان اتابع باقي المرضي .
باسل : لأ استني ، عايز رقم تليفونك .
غرام : نعم !!!!!!
باسل " بارتباك " : قصدي علشان اطمن علي اونكل سلطان .
تبتسم غرام : لما تحب تطمن عليه تعالي اطمن برحتك ، بعد اذنكم .
باسل : فهميني بقي يا طنط علشان انا مش فاهم حاجة !!
شهد : دكتورة غرام دي تبقي غرام بنت عمك سلطان اللي امها اخدتها ومشيت من زمان وكنا منعرفش عنها حاجة لغاية لما قابلناها هنا بالصدفة .
باسل : معقول يا طنط !!! صدفة غريبة جدا !!!
شيماء : قولنا بقي انت تعرفها منين ؟ وايه الموقف اللي حصل بينكم ؟؟
يحكي لهم باسل حين رأها في الكافيه و تدخله لفض المشادة التي حدثت بينها وبين اخيه بسام .
شهد : نور كان معاك انت وبسام في الكافيه في اليوم ده ؟؟
باسل : ايوه كان معنا .
شهد : علشان كده نور كان بيقولي انه شاف غرام قبل كده لكن كان مش فاكر فين وامتي .
شيماء : قولي بقي يا باسل انت مهتم بالبنت دي ليه ؟؟
باسل : بصراحة يا ماما البنت دي انا حبتها من اول مرة شوفتها فيها ، وكنت بدور عليها من وقتها والحمد لله النهاردة شوفتها .
شيماء : حبتها ؟!!!
باسل : ايوه يا ماما ، وعايز اتجوزها كمان .