رواية غرام السلطان الفصل الخامس والعشرون25 والسادس والعشرون26 بقلم عادل عبد الله
باسل : بصراحة يا ماما البنت دي انا حبتها من اول مرة شوفتها فيها ، وكنت بدور عليها من وقتها والحمد لله النهاردة شوفتها .
شيماء : حبتها ؟!!!
باسل : ايوه يا ماما ، وعايز اتجوزها كمان .
شيماء : تتجوزها !!! ده انا اتحايلت عليك كتير علشان تتجوز وكنت بترفض !!! اشمعني دي اللي عايز تتجوزها يا باسل ؟؟
باسل : هي دي اللي كنت بتمناها من زمان .
شيماء : فيها ايه زيادة عن اي بنت تانية ؟! البنات كتير !!!
باسل : يا ماما غرام بنت حلوة ومؤدبة ومحترمة وشكلها متربية كويس وكمان دكتورة ولها مكانتها وقبل كل ده الحمد لله انها طلعت مش غريبة عننا .
شيماء : انت تعرف ان مامتها كانت بتشتغل خدامة عند خالتك شهد ؟
باسل : ايوه خدامة لكن ربتها احسن تربية ودلوقتي دكتور !!
شيماء : انت عايز تضايقني و تستفزني ؟
باسل : لا يا ماما مقصدش ، انا اقصد ان البنت كويسة ومش يعبها شغل مامتها مادام ربتها كويس و بالحلال .
شيماء : انا مش موافقة يا باسل شوف اي بنت تانية وانا اجوزهالك انما دي لأ .
باسل : ليه يا ماما ؟
شيماء : من غير ليه يا باسل
باسل : انتي عايزة تزعليني يا ماما ؟!!
شيماء : لا يا حبيبي ، لكن مش معقول امها تتجوز سلطان جوز اختي وهي تتجوز ابني !! كده كتير قوي !!!
باسل : وانا مش هتجوز الا غرام يا ماما .
شيماء : انت بتعاندني يا باسل ؟؟ وانا مش موافقة وده اخر كلام عندي .
يتركها باسل وينصرف في غضب !!!
تعود غرام في نهاية اليوم الي المنزل وهي تفكر في تلك المفارقة العجيبة !!
ذاك الشاب الذي اعجبت به واستطاع ان يتسلل الي قلبها في موقف صغير منذ فترة طويلة هو ذاته ابن شيماء تلك المرأة التي اهانت والدتها وكانت السبب في خر.اب بيتها و معاناتهما سنوات !!!
غرام : مساء الخير يا ست الكل .
جميلة : مساء الخير يا قلبي ، حمد لله علي السلامة .
غرام : الله يسلمك يا ماما .
جميلة : عملتي ايه في المستشفي النهاردة ؟ ابوكي لسه تعبان ؟
غرام : بابا بيستجيب للعلاج لكن لسه تعبان يا ماما .
جميلة : ربنا يشفيه .
غرام : عايزة اقولك علي حاجة يا ماما لكن مش عارفة اقولها ازاي !!
جميلة : اوعي تقوليلي انك عايزة تروحي تعيشي مع ابوكي ؟؟؟!!
غرام " تضحك " : لأ طبعا يا ماما ، ما انا قولتلك مستحيل ابعد عنك .
جميلة : خلاص يا قلبي ، اي حاجة تانية مش مهم .
غرام : انا كان حصل معايا انا وصحبتي موقف ايام الجامعة وولد عاكسنا وحصلت مشادة كلامية بيني وبينه وفجاة ظهر اخوه و زعق لأخوه واعتذرلنا .
جميلة " تضحك " : ياااه !!! الكلام ده حصل ايام الجامعة ولسه فاكراه ؟!! اكيد فيه سبب يخليكي تفتكري الموقف ده .
غرام : بصراحة يا ماما انا شوفت ان الشاب ده عمل موقف شهم وحسيت انه انسان محترم قوي ووو
جميلة : ومن الاخر اعجبتي به ، صح ؟
غرام : بصراحة ايوه يا ماما .
جميلة : وبعدين حصل ايه ؟
غرام : محصلش حاجة ، الشاب ده اختفي ومش شوفته تاني لغاية النهاردة .
جميلة : شوفتيه النهاردة ؟؟
غرام : ايوه .
جميلة : وبعدين ؟؟ كلمك ولا كلمتيه ولا حصل ايه ؟
غرام : ايوه كلمني و قالي انه من وقتها وهو مش ناسيني ، يعني من كلامه بيلمح انه معجب بيا وكان نفسه يشوفني تاني .
جميلة : لو الشاب ده عايز يتقدم يخطبك انا معنديش مانع مادام انسان محترم وكويس وعنده اخلاق و انتي معجبه به .
غرام : ايوه هو تقريبا كده ، لكن فيه مشكلة كبيرة يا ماما .
جميلة : ايه المشكلة الكبيرة ؟؟
غرام : مامته !!
جميلة : مالها مامته ؟ انتي تعرفيها ؟؟
غرام : مامته تبقي شيماء اخت مدام شهد مرات بابا !!!!
جميلة " بصد.مة " : شيماء !!!!
غرام " بحزن " : ايوه .
تجلس جميلة ويبدو عليها الحزن في صمت !!
غرام : انا اسفة يا ماما لو كلامي ضايقك ، لكن انا حكيت لك علي اللي حصل .
جميلة : لا يا غرام مفيش حاجة ، هو قالك انه عايز يخطبك ؟؟
غرام : لأ .
جميلة : طبعا انا اللي مربياكي وواثقة في اخلاقك وعارفة انك مش هتعملي حاجة غلط ، طبعا مهما كنتي معجبة به اوعي يقابلك او يخرج مععاكي لأنك كده هتديله فرصة يلعب بيكي .
غرام : لأ طبعا يا ماما مستحيل .
جميلة : اي كلام بقي في خطوبة او جواز مش هنفكر فيه دلوقتي الا لما يطلب انه يخطبك .
في السجن ...
شيماء وباسل ونور في زيارة بسام .
بسام " بدموع " : انا عايز اخرج من هنا يا ماما ، انا تعبان هنا قوي .
شيماء " بدموع " : معلش يا حبيبي ، ايام وهتعدي .
بسام : الايام هنا طويلة قوي وانا مخنوق مش قادر اتحمل .
شيماء " بدموع " : معلش انت لسه قدامك فترة طويلة لازم تتعود و بلاش تفكر في الخروج دلوقتي علشان اعصابك يا حبيبي .
بسام : اعمل ايه !! انا بعد الايام يوم ورا يوم وحاسس ان الايام مش بتعدي .
باسل : معلش يا بسام هنقوم محامي يعملك نقض لكن المهم انك تحاول تأقلم نفسك علي انك تعيش يومك بأي طريقة وبلاش تفكر في الخروج دلوقتي .
بسام : ايوه يا باسل علشان خاطري شوف محامي يطلعني من هنا .
نور : متشلش هم يا بسام انا هقوم لك اكبر محامي في البلد يترافع عنك حتي لو هياخد اي فلوس مش مهم ، اهم حاجة انه يقلل الحكم وتخرج في اقرب وقت .
بسام : ايوه يا نور ، ربنا بخليك ، انتوا كلكم وحشتوني قوي انا بحبكم قوي ونفسي اخرج وارجع اقعد معاكم تاني .
شيماء " بدموع " : ان شاء الله هتخرج ونقعد مع بعض تاني انا خلاص بقي مليش حد غيرك انت واخوك .
بسام : بتروح لبابا يا باسل ؟؟
باسل : بروح له لكن مش كتير ، هو زارك هنا ؟؟
بسام : هي مرة واحدة اللي زارني فيها .
باسل : هكلمه علشان يزورك .
بسام : لأ بلاش تكلمه ، لو هو عايز يشوفني هييجي يزورني .
باسل : كفاية يا عم نكد اهي ايام وهتعدي ، هقولك حاجة علشان اخرجك من المود ده وتضحك .
بسام : انا نسيت الضحك خلاص يا باسل .
باسل : يا عم اضحك ، فاكر البنت بتاعت خناقة الكافية اللي انا كنت بدور عليها كل يوم .
بسام : ايوه فاكر ، البنت الطويلة والبنت القصيرة ، مالهم ؟؟
باسل : شوفتها .
بسام : بجد ؟؟ مين فيهم ؟ الطويلة ولا القصيرة ؟
باسل : البنت القصيرة .
بسام : ايوه البنت اللمضة ام لسانين .
باسل : ايوه ، عارف طلعت مين ؟
بسام : طلعت مين ؟؟
باسل : طلعت اخت نور ابن خالتك .
بسام : ايه ده ؟!!! ازاااي ؟!!!
نور : ايوه يا عم طلعت اختي .
بسام : اختك ومتعرفهاش ؟!! انا مش فاهم حاجة !!!
نور : ايوه ، طلعت غرام اختي اللي بابا اتجوز امها زمان و امها مشيت واخدها معاها ومحدش عرف عنهم حاجة الا لما قابلناها بالصدفة في المستشفي .
بسام : انتوا بتتكلموا بجد ولا بتهزروا ؟
باسل : بنتكلم بجد ، و طلعت دكتورة وهي اللي بتعالج باباها سلطان جوز خالتك شهد !!
بسام : سلطان جوز خالتي تعبان ؟
شيماء : ايوه سلطان جوز خالتك شهد تعبان وفي المستشفي ، علشان كده خالتك معاه ومش جات معنا .
بسام : وعملت ايه يا باسل لما قابلتها ؟ ده انت كنت هتتجنن وتشوفها !!!
باسل : معرفتش اكلمها ، امك وخالتك كانوا معايا ومعرفتش اتكلم معها .
بسام " يبتسم " : هتفضل طول عمرك خايب .
نور : احم احم ، ايه يا شباب ، انتوا ناسيين ان اللي بتتكلموا عليها دي تبقي اختي ؟ ولا انتوا مش حاسين بوجودي ؟!!!
بسام " يضحك " : اسف يا صحبي معلش والله نسيت خالص انها اختك .
باسل : ايوه كده اضحك يا عم .
بسام : اول مرة اضحك من ساعة اللي حصل ، المهم قولي يا باسل انت ناوي تعمل ايه ؟؟ قولي الاول هي اتخطبت ولا اتجوزت ولا لسه ؟
باسل : لأ مش مخطوبة ولا متجوزة ، ايدها مفيش فيها دبلة .
بسام : وهتكلمها ولا خلاص ؟؟
باسل : انا هخطبها .
بسام : بتتكلم بجد ؟؟
باسل : ايوه ، انا كنت بدور عليها علشان عايز اخطبها واتجوزها .
شيماء : عايز تتجوز بنت جميلة خدامة خالتك ؟!!!
باسل : ماما ، ارجوكي سبيني اختار حياتي زي ما انا عايز .
شيماء : وانا مش موافقة .
بسام : ارجوكم بلاش تتخانقوا مع بعض قدامي ، انا اعصابي مش متحملة .
شيماء : طيب يا حبيبي ، المهم خلي بالك علي نفسك كويس ، وكول واتغذا كويس ومتفكرش في اي حاجة تانية واحنا هنشوف محامي كبير يعمل نقض .
في منزل شيماء
باسل : ماما ارجوكي انا و غرام ملناش ذنب في اي حاجة حصلت بين مامتها وببنك وبين طنط شهد سواء كنتوا بتحبوا بعض او فيه عداء بينكم ده مش ذنبنا !!
شيماء : انت لسه صغير وبتفكر لطريقة غلط يا حبيبي .
باسل : لأ مش صغير يا ماما ، انا عندي ٢٩ سنة ، ازاي صغير ؟!!!
شيماء : عندك ٢٩ سنة لكن مفيش عندك خبرة بالحياة ، انا عايزاك تتجوز بنت ناس ومش بنت جميلة الخدامة !!
باسل : جميلة الخدامة اللي مش عجباكي دي يا ماما بقيت دلوقتي فنانة مشهورة ولوحاتها في كل المعارض وربت بنتها احسن تربية وبنتها بقيت دكتورة .
شيماء : بردو لسه في نظري خدامة .
باسل : شوفي الخدامة دلوقتي بقيت ايه وعملت ايه !! انتي بقي يا ماما عملتي ايه ؟ معملتيش اي حاجة حتي ابنك دلوقتي في السجن !!!
تشتعل نيران الغضب داخلها وتقوم وتصفع ابنها صفعة قوية علي وجهه !!!
شيماء : اخرس ، انت بتعايرني بسجن اخوك ؟!! انا لو كنت معرفتش اربي فأنا فعلا معرفتش اربيك انت .
باسل : انتي بتضر.بيني بالقلم ؟؟!!!
شيماء : اذا كنت معرفتش اربيك قبل كده ، فأنا لازم اربيك دلوقتي .
باسل : وانا علشان متربي كويس مش هرد عليكي ، لكن خلاص انا مليش مكان في البيت ده تاني .
يجري باسل ويخرج من المنزل بينما تبقي شيماء تعض نواجزها !!!
الحلقة ٢٦
في المستشفي
تفاجئ غرام بباسل يقف أمامها !!!
باسل : ازيك يا دكتورة غرام ؟
غرام " بأرتباك " : الحمد لله ، اومال والدتك ومدام شهد فين ؟
باسل : لأ انا مش جاي ازور اونكل سلطان .
غرام : اسفة ، اومال حضرتك جاي ليه ؟
باسل : انا جاي ليكي انتي .
غرام : انا !!! ليه خير يا استاذ يا باسل ؟
باسل : فيه موضوع مهم كنت عايز اكلمك فيه .
غرام : اتفضل انا سمعاك .
باسل : مش هينفع هنا يا دكتورة ، يا ريت لو تقبلي اعزمك تشربي حاجة في اي مكان ونتكلم .
غرام : لا للاسف مش هينفع لأني مش بخرج مع حد .
باسل : لأ مش قصدي ، انا اقصد هنقعد ونتكلم في حاجة مهمة وهتمشي علطول ، يعني مش هتتأخري .
غرام : اسفة مش هينفع ، لو فيه حاجة مهمة ممكن تقولها هنا دلوقتي .
باسل : الموضوع اللي عايز اكلمك فيه مش هينفع هنا .
غرام : انا اسفة وانا مش اقدر اخرج معاك .
باسل : علي الاقل ممكن اخد رقم تليفونك علشان نتكلم في التليفون ؟
غرام : رغم اني مش متعودة ادي رقمي لحد لكن مفيش مانع .
باسل : هكلمك اول ما تخلصي شغلك .
غرام : اوك .
في غرفة الرعاية
غرام : عامل ايه النهاردة يا بابا ؟
سلطان : الحمد لله احسن يا حبيبتي .
غرام : طيب تسمحلي بقي اكشف عليك علشان اطمن اكتر ؟
بعد الكشف
غرام : الحمد لله احسن كتير .
سلطان : يعني هخرج من هنا امتي يا حبيبتي ؟
غرام : هتكلم مع دكتور عمران ونشوف ممكن تخرج امتي .
سلطان : ياريت لو ينفع النهاردة او بكرة .
غرام : للدرجادي زهقت مني ؟!!
سلطان : لا يا حبيبتي انا مش ممكن ازهق منك ، انا ما صدقت لقيتك .
غرام " تضحك " : طيب يا بابا انا هكلم دكتور عمران انه يسمحلك بالخروج في اقرب وقت .
سلطان : كنت عايز اشوف جميلة قبل ما اخرج .
غرام " بدهشة " : ماما !!!
سلطان : ايوه .
غرام : مش عارفة يا بابا اذا كان هينفع ولا لأ .
سلطان : ليه ؟ هي ممكن ترفض ؟
غرام : مش عارفة .
سلطان : للدرجادي جميلة بقيت بتكرهني ؟!!!
غرام : لا اكيد مش بتكرهك لكن ...
سلطان : لكن ايه يا غرام ؟؟
غرام : مش عارفة يا بابا انا هقولها وارد علي حضرتك .
في غرفة دكتور عمران
غرام : بابا الحمد لله اتحسن يا دكتور و بيقولي انه عايز يخرج .
عمران : مفيش مانع ممكن يخرج بعد يومين ، لكن انتي اكيد عارفة انه لازم يبعد عن اي مجهود او اي عصبية .
غرام : ايوه عارفة .
عمران : لأنه لو تعب تاني هيكون التدخل الجراحي ضروري .
غرام : مفهوم يا دكتور .
عمران : عموما انا هتابعه بنفسي بكره وبعده ولو اطمنت عليه هكتب له خروج في اليوم التالت .
غرام : متشكرة اوي يا دكتور .
في بيت جميلة
جميلة : حمدلله ع السلامة يا حبيبتي ، اتأخرتي ليه النهاردة ؟؟ كنت قلقانة عليكي واتصلت عليكي تليفونك مقفول !!
غرام : الله يسلمك يا ماما ، المواصلات كانت زحمة النهاردة .
جميلة : نفسي تجيبي عربية صغيرة بدل زحمة المواصلات .
غرام : ان شاء الله قريب .
جميلة : وتكون من فلوسك مش فلوس ابوكي .
غرام : بمناسبة بابا عندي ليكي مفاجأة .
جميلة : مفاجأة !!! مفاجأة ايه ؟؟
غرام : بابا عايز يشوفك .
جميلة : يشوفني !!!!!!
غرام : ايوه ، النهاردة كلمني وقالي انه نفسه يشوفك .
" جميلة تغوص في ذكريات الماضي وتأتي امام عيونها صورة شيماء وهي تهينها و تقوم بطردها وصوت شهد العالي وهي تقول لسلطان طلقها وصورة سلطان يقف في سلبية وهو يري ما يحدث لها !!!!! " .
غرام : ست الكل ، ماما ، ماما .
انتبهت لها جميلة : ايوه يا حبيبتي ، كنتي بتقولي حاجة ؟؟
غرام : سرحتي لحد فين كده ؟؟
جميلة : افتكرت اللي حصل من ٢٥ سنة .
غرام : خلينا في النهاردة يا ماما واللي فات مات .
جميلة : مش قادرة انسي اللي حصلي قدامه لما اتبهدلت و اترميت في الشارع وانتي لسه حتة لحمة حمرا علي دراعي !!
غرام : يعني انتي دلوقتي بتكرهيه يا ماما ؟
جميلة : يا حبيبتي اللي يحب ميعرفش يكره لكن اللي حصلي خلاني مش عايزه اقابله او اشوفه تاني .
غرام : يعني افهم من كده انك رافضة تروحي تشوفيه ؟؟
جميلة : ابقي طمنيني انتي عليه انما انا مش هقدر اشوفه تاني .
وفجأة يرن جرس هاتف غرام !!!
تنظر غرام في هاتفهها فتسألها جميلة : مين اللي بيتصل بيكي ؟؟
غرام : ده باسل اللي قولتلك عليه يا ماما .
جميلة : ابن شيماء ؟؟
غرام : ايوه .
جميلة : واخد رقم تليفونك من مين ؟!
غرام : النهاردة جالي المستشفي وقالي انه عايز يكلمني في موضوع مهم وكان عايزني اخرج معاه .
جميلة : وبعدين ؟
غرام : قولتله اني مش بخرج مع حد فطلب رقم تليفوني واديتهوله علشان اشوفه عايز ايه .
جميلة : طيب ردي عليه .
غرام : جرس الاتصال خلص ، هيتصل تاني كمان شوية .
جميلة : هتقوليله ايه يا غرام ؟
غرام : بالنسبة لأيه ؟
جميلة : ما انتي عارفة هو هيتصل بيكي ليه ، اكيد هيقولك انه معجب بيكي يا حبيبت امك .
يرن هاتف غرام مرة اخري .....
غرام : بعد اذنك يا ماما هدخل جوه ارد عليه .
تنظر لها جميلة في حيرة !!!!!
غرام : متخافيش يا ماما مش هعمل حاجة غلط لكن علشان اعرف اتكلم .
جميلة : طيب يا غرام خدي راحتك ، انا داخلة اوضتي .
في غرفة غرام
تجلس غرام علي فراشها وترد عليه ...
غرام : الو ، مين معايا .
باسل : انا باسل .
غرام : اه ، ايوه يا استاذ باسل كنت بتقول عايز تكلمني في موضوع مهم .
باسل : ايوه ، انا عندي ٢٩ وشغال مهندس باور في شركة كبيرة .
غرام : كويس جدا ربنا يوفقك ، لكن معلش انا دخلي ايه بده ؟!!
باسل " يضحك " : طيب اكمل كلامي يا دكتورة و هتعرفي كل حاجة .
غرام : اتفضل يا بشمهندس .
باسل : انا عندي شقتي وتقريبا جاهز للجواز وماما طلبت مني كتير اني اتجوز لكن انا كنت برفض .
غرام : وترفض ليه مادام جاهز للجواز ؟ اكيد كنت مستني بنت الحلال .
باسل : انا كنت مستنيكي انتي .
غرام : انا ؟؟
باسل : ايوه يا غرام انا من ساعة ما شوفتك حبيتك حتي من غير ما اعرف اسمك او اي حاجة عنك ، كنت بدور عليكي في كل مكان وكان عندي امل اني اشوفك تاني ، والحمد لله شوفتك تاني ، من الاخر انا بحبك يا غرام و عايز اخطبك .
تبتسم غرام وتصمت !!!!
باسل : الوو ، انتي سمعاني ؟؟
غرام : ايوه سمعاك .
باسل : قولتي ايه ؟؟
غرام : انا مش عارفة اقولك ايه انت فاجئتني .
باسل : انتي مرتبطة بحد ؟؟
غرام : لأ .
باسل : طيب قولتي ايه ؟؟
غرام : انا بقولك انت فاجئتني ومش عارفة اقولك ايه !!!
باسل : انتي عندك مانع اني اكلم اونكل سلطان و اتقدملك ؟؟
غرام : انت الاول عارف مامتك عملت ايه في ماما زمان ؟؟
باسل : عملت ايه ؟ معرفش .
غرام : عملت حاجات كتير قوي .
باسل : كل اللي اعرفه انهم حصلت بينهم مشاكل بسبب طنط شهد ومامتك اخدتك ومشيت ومحدش عرف عنكم حاجة .
غرام : لأ ، انت كده متعرفش حاجة ، مامتك اهانت ماما و طردتها من شقتها في الشارع وانا كنت لسه عمري شهور و مش هحكيلك بقي علي اللي حصلي انا وماما والبهدلة اللي شوفناها بسبب اللي عملته مامتك فينا !!!
باسل " بحزن " : انا معرفش حاجة عن اللي بتقوليه ده ، وبعدين انا ذنبي ايه ؟ انا من ساعة لما شوفتك وانتي دخلتي قلبي ومش بفكر غير فيكي ، والمهم عندي انتي مش مهم اهلنا ، انتي نفسك يا غرام .
غرام : انا هكلمك بصراحة مادام انت صارحتني بأحساسك ، انا مش هنكر ان موقفك معايا في الكافيه موقف شهم ونبيل ، وقدرت في الموقف ده انك تكسب اعجابي .
باسل " بفرح " : يعني انتي بتبادليني نفس الشعور ؟؟
غرام : انا قولت اعجابي .
باسل : الاعجاب اول طريق الحب .
غرام : قبل ما يبقي حب فيه حاجات تانية هتقف حاجز بيني وبينك .
باسل : اي حاجز يقف قدامنا انا اقدر اشيله .
غرام : ده بيتهيألك !! احساس ماما بالظلم اللي مامتك كانت السبب فيه انا مقدرش اعمل نفسي مش شايفاه لأن ماما اهم حد عندي في الدنيا .
باسل : ده شئ اكيد ، وانتي معاكي حق .
غرام : ده غير ان مامتك اعتقد انها مش هتوافق .
باسل : اذا كانت دي العوائق اللي ممكن تقف في طريقنا انا اقدر عليها .
غرام : طيب انا هطلب منك انك تديني مهلة افكر واخد رأي ماما .
باسل : مش بتقولي ان فيه اعجاب من ناحيتك ؟!!!
غرام : ايوه لكن بردو قولت ان ماما اهم حد باانسبالي في الدنيا !!
باسل : اوكي يا غرام موافق فكري برحتك لكن وانتي بتفكري عايزك تكوني عارفة اني فعلا بحبك واني ممكن اعمل اي حاجة علشان نكون لبعض .
في اليوم التالي
في المستشفي
تذهب غرام لتطمئن علي والدها ...
غرام : عامل ايه النهاردة يا سي بابا ؟
سلطان : الحمد لله كل يوم احسن من اللي قبله ، دكتور عمران كان عندي من شوية وقالي اني لو حالتي فضلت مستقرة لبعد بكره ممكن اخرج .
غرام : ايوه انا كلمته البارح وقالي كده .
سلطان : كلمتي جميلة وقولتلها اني عايز اشوفها ؟؟
تصمت غرام .....
سلطان : قولتلها يا غرام ؟؟؟
غرام " بابتسامة مصطنعة " : ايوه قولتلها لكن هي تعبانة قوي الايام دي ومش هتقدر تيجي .
سلطان : تعبانة !!! تعبانة فعلا يا غرام ولا رفضت تشوفني ؟؟
غرام : هي تعبانة فعلا .
سلطان " بحزن " : لأ يا غرام ، مامتك لو عايزة تشوفني كانت جات مهما تكون تعبانة ، هي اكيد رفضت تشوفني .
وهنا تفتح الباب و تدخل شهد ونور الي الغرفة ......
سلطان : اهلا اهلا ، اتأخرتوا ليه النهاردة ؟
نور : متأخرناش يا بابا ، احنا جايين في نفس الميعاد اللي بنجيلك فيه .
شهد : عامل ايه النهاردة يا حبيبي ؟
سلطان : الحمد لله .
شهد : ازيك يا غرام ؟
غرام : الحمد لله يا طنط .
شهد : طمنينا باباكي هيخرج امتي ؟
غرام : ممكن بعد بكره ان شاء الله ، انا هستأذنكم علشان تاخدوا راحتكم واتابع انا باقي المرضي .
تخرج شهد ثم ينادي سلطان ابنه ...
سلطان : تعالي يا نور .
نور : ايوه يا بابا .
سلطان : كلمت المحاميين علشان اللي قولتلك عليه ؟؟
نور : لما تخرج من المستشفي يا بابا نتكلم في الموضوع ده .
سلطان : هنتكلم في ايه ؟؟ انا مش هتكلم في حاجة ، انا بقولك عايز المحاميين علشان اختك تاخد حقها وانت تاخد حقك !!!
نور : حق ايه يا بابا ؟
سلطان : حقها في املاكي .
نور : لأ معلش يا بابا انا مش موافق .
سلطان " بعصبية شديدة " : و انت مين علشان توافق او متوافقش !!!
وفجأة يضع سلطان يده علي صدره و يشعر بألم في صدره ويصرخ من الألم !! وتنادي شهد علي الاطباء لأنقاذه !!
يتبع