رواية غرام السلطان الفصل التاسع والعشرون29 والثلاثون30 بقلم عادل عبد الله
يستيقظ باسل علي صوت جرس الباب وفي ذات اللحظة رنات هاتفه المحمول !!!
يفتح باب شقته وهو يكاد لا يفتح عينيه من اثر النوم ويفاجئ بشيماء تقف امامه وتسأله : هان عليك امك تسيبها لوحدها يا باسل ؟؟
باسل : لأ طبعا متهونيش عليا يا ماما ، تعالي ادخلي الاول .
دخلت شيماء مع ابنها الذي قال لها : انتي متهونيش عليا لكن انا هونت عليكي و عايزة تكسري قلبي .
شيماء : انا ؟؟ انا يا باسل عايزة اكسر قلبك ؟!!
باسل : ايوه يا ماما انا قولتلك اني بحب غرام وعايز اتجوزها ومش هتجوز غيرها وانتي اللي رفضتي !!
شيماء : عارف يا باسل زمان جميلة كانت هتتسبب ان خالتك شهد وجوزها يتطلقوا رغم انهم بيحبوا بعض جدا ، ودلوقتي شوف لما بنتها ظهرت هي السبب في زعلنا مع بعض وهي السبب في زعل سلطان ونور ابن خالتك .
باسل : يا ماما انتي بتفكري بالشكل ده علشان بتكرهي غرام ومامتها .
شيماء : بردو يا باسل ؟!! مش مصدقني ؟ طيب أسأل شهد من ورايا .
باسل : لأ ، انا مش هسأل حد يا ماما ، انا عارف ان بينكم وبين مامتها مشاكل من زمان ، لكن انا و غرام ذنبنا ايه ؟!
شيماء : طيب تعالي ارجع البيت معايا يا باسل ، مينفعش تقعد لوحدك وتسيبني قاعدة لوحدي .
باسل : هرجع معاكي يا ماما بس توعديني انك توافقي اتجوز غرام .
شيماء : ارجع الاول البيت معايا وبعدها نتكلم في الموضوع ده .
باسل : طيب هنزل اروح مشوار وبعده ارجع البيت .
في المستشفي
تذهب غرام لتجد والدها بحالة افضل ...
غرام : عامل ايه يا بابا دلوقتي ؟ معلش اتأخرت عليك شوية .
سلطان : لا يا حبيبتي ولا يهمك انا كنت عايزك ترتاحي من سهر طول الليل ، انا الحمد لله دلوقتي احسن .
غرام : يارب تبقي احسن دايما .
سلطان : جميلة قالتلك ايه عني بعد ما مشيتوا الصبح ؟؟
غرام : قالتلي خلي بالك من باباكي .
سلطان : جميلة بنت حلال وهي الحقيقة اتظلمت معنا ، لكن يا بنتي صدقيني انا مظلمتهاش ، للظروف اللي حصلت وكلام شيماء لشهد هو اللي غير كل حاجة وكان السبب في اللي حصل .
فجأة يدخل باسل من باب الغرفة !!!
باسل : عامل ايه يا اونكل سلطان الف سلامة عليك .
سلطان : الله يسلمك يا باسل ، تعبت نفسك ليه انا كويس .
باسل : ازاي يا اونكل ، انا قلقت اول ما عرفت ان حضرتك تعبان .
سلطان : متشكر يا حبيبي ، انا بحبك زي ابني بالظبط .
باسل : وانا كمان يا اونكل بعتبر حضرتك زي بابا بالظبط ، انا كنت عايز اكلم حضرتك في موضوع لكن لما تقوم بالسلامة بأذن الله .
سلطان : موضوع ايه ؟
باسل : مش وقته دلوقتي لما تقوم بالسلامة .
سلطان : انا كويس ، خير يا باسل فيه ايه ؟
يبتسم باسل : بصراحة يا اونكل انا عايز اطلب منك ايد بنتك الدكتورة غرام .
غرام " بدهشة وخجل " : بعد اذنك يا بابا انا خارجة .
سلطان : لأ استني يا غرام ، يا باسل يا ابني انا اعرفك كويس انت شاب كويس و اخلاقك عالية وانا معنديش مانع لكن الاهم من رأيي رأي غرام نفسها ورأي مامتها .
غرام : بعد اذنك يا بابا هروح اشوف المرضي .
سلطان : باسل يبقي ابن خالة اخوكي نور وشاب كويس ومحترم وله مستقبل ، زي ما سمعتي انا معنديش مانع لكن رأيك ورأي مامتك اهم حاجة .
غرام " بخجل " : حاضر يا بابا .
سلطان : روحي يا حبيبتي شوفي شغلك و متتأخريش عليا .
بعد قليل من الوقت
تجد غرام باسل خارجا من غرفة الرعاية مبتسما .
غرام : انت ايه اللي قولته لبابا ده ؟
باسل : قولتله اني عايز اتجوزك .
غرام : فجأة كده بدون ما اقولك اذا كنت وافقت ولا لأ ؟!!
باسل : ولو كنت قعدت خمس دقايق كمان كنت قولتله اني بحبك .
غرام : ايييه !!!
باسل " مبتسما " : بحبببك ، بحبك وبموت فيكي كمان ، سمعتي ولا اقول بصوت عالي واسمع كل الناس ؟؟
غرام " تضحك " : خلاص خلاص سمعت ، مكنتش اعرف انك مجنون كده !!
باسل : انا مجنون بيكي ، مجنون بحبك ونفسي تعرفي اني مقدرش اعيش من غيرك .
غرام " بابتسامة " : مجنون ليلي حضرتك ؟؟
باسل : لأ ، مجنون غرام .
غرام : طيب سيبني و اديني فرصة يا عم المجنون .
باسل : علشان خاطري متتأخريش عليا والا هتلاقيني جاي واقف قدام المستشفي وهقول لكل الناس اني بحبك .
في منزل شيماء
تفاجئ شيماء بأختها شهد !!!
شيماء : ايوه يا شهد !! جاية تعايريني تاني ؟؟
شهد : عيب كلامك ده يا شيماء ، ده انتي اختي وملناش غير بعض .
شيماء : وعلشان كده بتعايريني ان جوزك بيقف جنبي في كل حاجة ؟؟!
شهد : انا مقصدش ، انا كان قصدي تتحملي كلامه علشان تعبان ، وعلي العموم حقك عليا لو لسه زعلانة .
شيماء : لا يا شهد مفيش بينا الكلام ده ، كويس انك جيتي ، عايزة اقولك علي حاجة مهمة .
شهد : فيه ايه ؟
شيماء : باسل ابني .
شهد : ماله باسل ؟؟
شيماء : باسل عايز يتجوز غرام !!!
شهد : غرااام !!
شيماء : ايوه ، انا اتفاجئت زيك كده .
شهد : واشمعني غرام ؟؟!
شيماء : بيقول انه بيحبها ولا قولتله اني مش موافقة زعل وساب البيت وقعد في شقته تلت ايام والنهاردة روحتله علشان يرجع .
شهد : وانتي مش موافقة ليه ؟
شيماء : انتي عايزاني اوافق ابني يتجوز بنت الخدامة ؟؟
شهد : غرام بنت ممتازة في كل حاجة ، لو ابني نور طلب يتجوز بنت زي غرام هكون مطمنة واسعد واحدة في الدنيا .
شيماء : انتي اللي بتقولي كده يا شهد ؟!! انتي نسيتي ان امها كانت هتخطف منك جوزك ؟؟
شهد : احنا ملناش دعوة بأمها ، البنت نفسها يا شيماء فوق الممتازة كمان .
شيماء : انتي طيبة قوي يا شهد ، ولو انا وافقت و باسل اتجوزها جميلة هترجع تظهر تاني في حياتنا وممكن ...
شهد : فعلا عندك حق !! و هتعملي ايه مع باسل ؟؟
شيماء : مش عارفة .
شهد : لو باسل متمسك بيها وبيحبها فعلا وافقي يا شيماء .
شيماء : اوافق ؟!!! ومش خايفة ان سلطان يرجع يفكر في جميلة ؟؟
شهد : في كل الحالات مادام سلطان قابل بنته و عرف مكانها لو عايز يشوف جميلة في اي وقت هيشوفها سواء اتجوزت باسل او لأ
شيماء : انا بردو مش هوافق .
يعود باسل من الخارج تبدو عليه السعادة فيجد شهد مع والدته في المنزل ، وتلاحظ شيماء علامات السعادة عليه ...
شيماء : تعالي يا باسل ، ما شاء الله وشك منور ومبسوط ، كنت فين راجع فرحان كده يا حبيبي ؟؟
باسل : قولتلك يا ماما كنت في مشوار .
شيماء : ماشي يا باسل ، مش عايز تقولي ؟
باسل : ماما ، انا مش صغير علشان اديلك تقرير بتحركاتي !! ولا عايزاني امشي و اروح اقعد في شقتي ؟؟
شيماء : ولا يا باسل ، انت هتمسكها لي ذلة علشان قولتلك تعالي ارجع عيش معايا ؟؟ ماشي يا باسل
باسل " يضحك " : ما عاش اللي يذلك يا فلب باسل ، انا بهزر معاكي .
شيماء : لاااا ، انت لازم تقولي كنت فين راجع مبسوط قوي كده .
باسل " يضحك " : طنط شهد والنبي خلي اختك دي تبعد عني ، انا داخل اوضتي .
تضحك شهد وشيماء ثم تقول شيماء : بقي كده يا باسل !! ماشي !!!
يدخل باسل غرفته ثم تقول شهد لأختها : خفي شوية عن الولد ، باسل مبقاش صغير .
شيماء : وانا كمان دلوقتي انا مليش غيره بعد موت منير وسجن بسام .
بعد ثلاثة ايام
امام غرفة العمليات الجراحية
تقف شهد تبكي عيونها بغزارة ويبدو عليها التوتر والقلق الشديد !!
وبجوارها اختها شيماء التي تحاول تهدئتها .
بينما يقف في الناحية الاخري نور و يبدو عليه التوتر والقلق الشديد !!
وبجواره يقف باسل يحاول تهدئته ولكن نور ينفعل فجأة وينهار باكيا !!!
في غرفة العمليات
يرقد سلطان بعد ان تم تخديره بينما تقف بجواره دكتورة غرام تستعد للجراحة بينما يكاد قلبها ان يتوقف قلقا و توترا !!!
و بجوارها مباشرة دكتور عمران يستعد للقيام بالجراحة ويلاحظ توتر غرام ويحاول تهدئتها .
وبجوارهما طبيبان جراحان اخران .
يمر الوقت بطيئا للغاية و كل عدة دقائق تنظر شهد في ساعتها انتظارا لأنتهاء العملية والاطمئنان علي سلطان
عند باب المستشفي
تأتي جميلة وتدخل الي المستشفي في توتر وقلق بالغ تريد الاطمئنان علي سلطان !! ولكنها تعلم جيدا ان شهد بالتأكيد بالداخل وبالتأكيد معها اختها شيماء !!
ولكنها لا تستطيع ان تكون بعيدا في تلك اللحظات الحرجة !!
الحلقة ٣٠
تأتي جميلة وتدخل الي المستشفي في توتر وقلق بالغ تريد الاطمئنان علي سلطان !! ولكنها تعلم جيدا ان شهد بالتأكيد بالداخل وبالتأكيد معها اختها شيماء !!
ولكنها لا تستطيع ان تكون بعيدا في تلك اللحظات الحرجة !!!
تصعد جميلة ولكنها تقف في منتصف الطريق مترددة لا تريد ان تراهم .
سألت احدي الممرضات عن ابنتها الدكتورة غرام فعلمت انها في غرفة العمليات فطلبت منها الانتظار في غرفتها .
بعد ٥ ساعات
تخرج غرام ودكتور عمران وباقي الفريق الطبي من غرفة العمليات فهرولوا جميعا اليهم ...
شهد : طمني يا دكتور عمران ، طمني سلطان كويس؟
دكتور عمران : الحمد لله العملية نجحت .
نور : بجد يا دكتور ؟ يعني بابا كويس ؟
دكتور عمران : الحمد لله يا جماعة ، سلطان بيه دلوقتي لسه تحت تأثير البينج و ممكن يفوق خلال ساعة .
شهد : يعني ممكن ادخل لسلطان واكلمه واطمن عليه ؟؟
دكتور عمران : لأ طبعا هو هيدخل العناية بدون اي زبارة علي الاقل لبكرة الصبح .
شهد : ليه : يا دكتور ؟
غرام : يا مدام شهد دي عملية قلب مفتوح مش حاجة بسيطة .
شهد : طيب ممكن اشوف سلطان من بعيد يا دكتورة ؟؟
غرام : معلش يا طنط مش هينفع ، احنا كلنا وجودنا ملوش اي لزوم دلوقتي .
شيماء : يعني ايه ؟
غرام : يعني كلنا لازم نمشي حتي انا كمان همشي ، وبكره الصبح نطمن علي بابا .
تركتهم غرام وانصرفت الي غرفتها لتبديل ملابسها لتجد جميلة تجلس وتقرأ القران الكريم .
تعجبت غرام حين رأتها !!!
صدقت جميلة واغلقت المصحف الشريف وسألتها : طمنيني يا غرام يا بنتي العملية نجحت ؟؟
غرام : الحمد لله يا ماما نجحت .
جميلة : يعني باباكي كويس دلوقتي ؟
غرام : الحمد لله ، لكن هو لسه تحت تأثير البنج وحتي لما يفوق هيحتاج وقت علشان يرجع لحياته الطبيعية .
جميلة : ربنا يشفيه .
غرام : انتي جيتي علشان تطمني علي بابا ؟؟
جميلة : ايوه بصراحة كنت قاعدة قلقانة في البيت ، جيت علشان اطمن عليكي وعليه ، انا عارفة ان الموقف مش سهل بالنسبالك .
غرام : شوفتي شهد وشيماء ونور ؟
جميلة : لأ ومش عايزة اشوفهم .
بعد عدة ايام ...
في منزل شيماء ...
باسل : ماما ، انتي لغاية دلوقتي بتتهربي ومش عايزة تقولي اجابة مفيدة .
شيماء : بتهرب !! بتهرب من ايه يا باسل ؟ هو انا عملت حاجة غلطت علشان اتهرب منها ؟!!
باسل : مش قصدي ، انا اقصد موضوع غرام اللي كلمتك فيه .
شيماء : جوازك من غرام ممكن يكون سبب في مشاكل كتير لكل اللي حواليك ، انا عندي لك عروسة اجمل منها بكتير ، عارف رضوي بنت طنط مني ايه رأيك فيها مفيش بعد كده جمال البنت شقرا وبيضا وعيونها زرقا زي الاجانب ومتعلمة ايه رأيك فيها ؟
باسل : يا ماما انا عايز اتجوز غرام ، مقولتش عايز اتجوز واحدة حلوة حتي لو ملكة جمال ، انا عايز غرام وبس .
شيماء : وانا قولت لو اتجوزتها هتحصل مشاكل كتير ده غير ان انا مش موافقة .
باسل : وانا مش هتجوز غير غرام ، وعلفكرة انا كلمت اونكل سلطان وقولتله قبل العملية .
شيماء : قولتله انك عايز تتجوز بنته ؟؟
باسل : ايوه .
شيماء : من قبل ما اقولك اني وافقت يا باسل ؟؟
باسل : انا رجعت البيت هنا لما وعدتيني انك هتوافقي .
شيماء : وقالك ايه سلطان ؟
باسل : قالي انه معندوش مانع لكن الرأي الاخير لغرام و مامتها .
شيماء : وهي ومامتها ردوا عليك طبعا وقالوا انهم موافقين .
باسل : لا يا ماما لسه غرام مش ردت عليا لحد دلوقتي ، لكن اللي يهمني انا كمان انك توافقي .
شيماء : وانا مش موافقة يا باسل .
باسل : ده اخر كلام عندك ؟
شيماء : ايوه يا باسل ، متحاولش تكلمني في الموضوع ده تاني .
بعد اسبوع ...
في المستشفي ..
غرام : الحمد لله يا بابا انت بقيت دلوقتي كويس وممكن تخرج .
سلطان : الحمد لله ، يعني فعلا ممكن اخرج وارجع البيت ؟
غرام : ايوه ، دكتور عمران قالي انه ممكن يكتبلك خروج النهاردة .
سلطان : الحمد لله انا كنت فاكر اني هموت ومش هرجع البيت تاني .
غرام : بعيد الشر عنك يا بابا .
سلطان : مادام هارجع البيت ايه رأيك تيجي تعيشي معايا يا بنتي ؟
غرام : لا لا يا بابا ، انا مش هبعد عن ماما ابدا .
سلطان : انا مش بقولك ابعدي عنها ، تعالي عيشي معايا وروحي شوفيها حتي لو كل يوم برحتك .
غرام : لا يا بابا مش هقدر ، مش ممكن اسيبها بعد ما ضيعت عمرها علشاني !!
سلطان : انتي لما تتجوزي هتبعدي عنها وتسبيها ، اعتبري نفسك اتجوزتي وتعالي عيشي معانا .
غرام " تضحك " : علفكرة يا بابا انا لما اتجوز بردو مش هسيب ماما ، هشترط علي جوزي نعيش معها .
سلطان : للدرجادي بتحبيها يا غرام ؟؟
غرام : متزعلش مني يا بابا هي دي الحقيقة ، ولو انا عملت غير كده ابقي انسانة ناكرة للجميل .
سلطان : عندك حق يا بنتي ، طيب علي الاقل عايز اشوفك علطول ، وياريت لو ينفع كل يوم .
غرام : ان شاء الله هتشوفني لما تزهق مني يا بابا .
سلطان : عمري ما ازهق منك ابدا ، بمناسبة الجواز بقي قوليلي هتعملي ايه مع باسل ؟ هتوافقي ولا لأ ؟؟
غرام : هكلمك بصراحة يا بابا ، باسل شاب كويس جدا وانا مش معترضة عليه لكن ماما لسه مش قالتلي اذا كانت موافقة او لأ !!
سلطان : جميلة طيبة وكل حاجة لكن اعتقادي انها مش هتوافق بسبب اللي عملته فيها شيماء زمان .
جميلة : مش عارفة يا بابا ، لكن انا موافقتي مرهونة بموافقة ماما .
سلطان : لو عايزاني اقنعها انا ممكن اروحلها واقنعها .
غرام " تضحك " : ايه يا عم بابا ؟ انت عايز تعملني كوبري علشان تشوف الجو القديم ولا ايه ؟؟!!
سلطان " يضحك " : انا بقول لو عايزة ؟
غرام : لا يا سي بابا انا مش عايزة ضغوط علي ماما ، عايزة رأيها اللي هتكون مقتنعة به علشان مرجعش احس بالذنب من ناحيتها .
سلطان : كلامك بيقول انك معجبة بباسل ؟!!
غرام : دي حقيقة فعلا ، خلاص بقي يا بابا متكسفنيش اكتر من كده .
في منزل شيماء ...
باسل يخرج ولا يعود الي المنزل وتظل شيماء تنتظر عودته حتي تيأس وتعرف انه قد ترك لها المنزل للمرة الثانية غضبا من موقفها !!!
تتصل به شيماء عدة مرات دون رد !!
تتصل شيماء بأختها شهد لتخبرها .....
شيماء : الو ايوه يا شهد .
شهد : ايوه يا شيمو عاملة ايه ؟
شيماء " بعصبية " : شوفتي باسل ساب البيت تاني !!
شهد : ليه ايه اللي حصل ؟
شيماء : علشان اتكلمنا في موضوع بنت جوزك وقولتله اني مش موافقة .
شهد : انا مش عارفة انتي منشفة راسك ليه ؟!! انا قولتلك البنت كويسة وبالنسبالي انا يا ستي مفيش عندي مشكلة انه يتجوزها ، جوازه من غرام مش هو اللي هيقربها من سلطان ، كده او كده سلطان خلاص هيكون علي تواصل معها علطول .
شيماء : مش قادرة اقبل ان البت جميلة الخدامة تبقي جدة حفيدي ابن ابني !!! لا لا مش موافقة يا شهد .
شهد : بردو لسه تفكيرك زي ماهو !! خلاص مادام مش هتغيري موقفك سيبي ابنك باسل لوحده وهو اكيد هيرجعلك ، مش معقول يعيش علطول لوحده !!!
في بيت جميلة
جميلة : باباكي خرج من المستشفي ؟
غرام : ايوه يا ماما خرج النهاردة .
جميلة : الحمد لله ان العملية عدت علي خير .
غرام : الحمد لله ، كنت عايزة أسألك علي حاجة يا ماما .
جميلة : اسألي يا حبيبة ماما .
غرام : انتي لحد دلوقتي مش رديتي عليا بخصوص موضوع باسل !!
جميلة : فعلا ، عارفة ليه يا غرام ؟
غرام : ليه يا ماما ؟
جميلة : علشان مش عايزة اكسر قلبك .
غرام : يعني ايه يا ماما ؟؟
جميلة : يعني لولا اني عارفة انك بتحبيه كنت رفضت بدون تفكير ، لكن علشان عارفة انك بتحبيه بحاول اقنع نفسي علشان اوافق .
غرام " بحزن " : لا يا ماما مادام مش قادرة تقتنعي وتوافقي عليه انا هتصل به وابلغه اننا رفضنا .
جميلة : لااا ، استني اديني فرصة كام يوم قبل ما تكلميه ، في حاجة بفكر فيها ممكن تخليني اوافق
غرام : بجد يا ماما ؟؟ ايه هي ؟؟
جميلة : اديني كام يوم او اسبوع بالكتير وهقولك ردي النهائي .
في فيلا سلطان
شهد : حمدلله علي السلامة يا حبيبي نورت بيتك .
سلطان : الله يسلمك يا حبيبتي .
شهد : تتغدا دلوقتي يا حبيبي ولا تطلع ترتاح دلوقتي ؟
سلطان : لا مش هطلع انا عايز اكل بس خلي بالك من قايمة الاكل اللي الدكتورة غرام بنتي كتبتها .
تضحك شهد : بتقول بنتي الدكتورة وانت فرحان قوي يا سلطان ، ربنا يفرحك بيها يا حبيبي .
سلطان : طبعا فرحان بيها ، دي حاجة تضايقك يا شهد ؟؟
شهد : لا بالعكس والله يا حبيبي ، انت عارف ان حاجة تسعدك لازم تسعدني ، وغرام اخت ابني نور لازم اكون فرحانه لما تكون في مكانة كويسة .
سلطان : شوفتي يا شهد بنت جميلة الخدامة اللي كنتي خايفة زمان ان ابنك يتعاير بيها ؟؟ اهو دلوقتي كلنا بنتشرف بيها !!!
شهد : انا الغيرة كانت عامية عينيا وكلام اختي شيماء ، كل ده كان مأثر عليا .
سلطان : نور فين دلوقتي ؟؟
شهد : نور في الشركة .
سلطان : انا وانتي بعدنا عن الشركة خالص ومنعرفش عنها اي حاجة !!! يا تري دلوقتي الشركة اخبارها ايه ؟ بتكسب ولا بتخسر ؟ بتتقدم ولا بتتأخر ؟
شهد : متخافش علي ابنك يا سلطان انا كنت متابعاه وهو كان ماشي كويس .
سلطان : طيب اتصلي دلوقتي بنور وقوليله يكلم المحاميين النهاردة عايزهم بكره هنا في الفيلا وهو يكون معاهم .
شهد : حاضر يا سلطان .
يعود نور في اخر اليوم ويقول لوالده انه قد ابلغ المحاميان لكي يأتوا غدا الي الفيلا .
يشعر سلطان بالسعادة لقبول ابنه نور في اعادة الثروة والاموال لتقسيمها بينه وبين اخته .
في اليوم التالي
يأتي نور ومعه المحاميان الي الفيلا .
يجلس معهم سلطان : يا اساتذة انا عايز منكم تقيموا ممتلكاتي بما فيها الشركة والفيلا والفلوس وكل الاملاك علشان نقسمها بين نور وغرام وشهد كل حد فيهم بنصيبه الشرعي .
المحامي : الاملاك دي دلوقتي باسم الاستاذ نور .
سلطان : ايوه بالظبط كده ، عايز اعيد تقسيم التركة بينهم .
محامي الشركة : يا سلطان بيه صعب جدا في الوقت الحالي نظرا لتداخل المركز المالية للشركة في عدة شراكات في عدة مشاريع مشتركة وعدة قروض ولابد من الانتظار حتي نهاية السنة المالية للشركة حتي نقوم بما تريد !!
سلطان : لسه هستني ٨ شهور ؟؟
المحامي : للأسف يا سلطان بيه مضطرين ننتظر حتي تكون المراكز المالية للشركة اوضح من دلوقتي بعد الانتهاء من اغلب المشاريع المشتركة مع شركات تانية .
بعد ايام ...
في بيت جميلة ...
جميلة : تعالي يا غرام اقعدي معايا عايزاكي في حاجة مهمة .
غرام : خير يا ماما ، فيه ايه ؟
جميلة : هسألك سؤال وتجاوبيني بصراحة .
غرام : اتفضلي يا ماما ، فيه ايه ؟
جميلة : بصراحة ، انتي بتحبي باسل ؟؟
غرام " بخجل " : بصراحة يعني الي حد ما .
جميلة : يعني بتحبيه يا غرام ، وانا موافقة تتجوزي باسل لكن بشرط .
غرام : بجد يا ماما ؟؟ شرط ايه ؟؟
جميلة : شرطي الوحيد ان .....